Nau awmtu 7

NAU AWMTU ..(7)

Ziaktu : Toni Râlte

NOTE : Kan chawl rei ta ngat ngat hle mai a, a hmalam thu in lo hre ta lo a nih pawhin, in lo chhiar nawn leh mai a niang chu..tin, zantin ka dah thei dawn em tih ka sawi lâwk thei lo bawk aw. Theihtawp erawh ka chhuah ang e. Tin, khawngaihin ka group pawn lamah share lo turin kan inngen e, a chhan chu YT nen ṭang kawp ka ni si a, ka ngenna min zahsak ngei ka beisei..🥰

Rintea chuan, "Mary maw?" A lo la ti hû zui. Remsangzuala chuan , "Ṭhinga" a ti hluk. Mary chu thinrim hmaisen ṭeuhin Sangzuala te dawhkan lamah chuan a rawn phei a, "Alexa nanny chuan min va zah lo em em ve, eng mihring nge nia a inhriat a?" A ti hlak hlak a. Sangzuala lah chuan, "I phî a nih kha, hahdam rawh. Phi cheng a ngai hran lo" a lo ti thlup si. A thinrim vena ngaihpawimawhsak a ni ta si lo chuan a tina zual nge, a ngawi zui ta hmak a, eng he hûah an lo ngai bawk si lo. Dini leh Vani an insignal zauh zauh mai. Hluzuali pawh Alexa te infiamna bulah a va kal ve ta daih a, naupang ho pawh chu an hlimin an thawveng hle, Remsangzuala pa Pu Chungnunga te hi unau pali niin midang zawng an la dam vek a, Pu Chunga hi a upa ber a ni, an naupang ber nen an inkarah hmeichhe pahnih an awm a, Sangzuala nî upa zawk chu Hnahthialah College-ah a pasal a thawh avangin an pem tawh a, a nî naupang zawk te chhungkua erawh Aizawlah an la khawsa a, a patea hi Kolasib lamah nu ber nen quarter an luah a, an rawn haw chho zeuh zeuh thung. An chhungkua hi an inpawh hlawm a, an inkawmngeih vek hlawm mai. Sangzuala hi upa ber a ni bawk a, an zah bakah a thurâwn pawh an ngaichâng thiam hlawm. Tin, Zodini chetdan khan an thin a tirim em em a, Alexa lainatnaa khat ta ngang chu Alexa pawh chhungkaw duat rawn a ni ta chiah a; duatsual a ni chiah em tih erawh a hriat loh. A patea te hian fapa hlir pathum an nei a, a niteii ten fapa pakhat leh fanu pahnih an nei thung. An ni upa zawk fanu Remruati hi a putea te inah a rawn awm ṭhin, Zodini nen pawh inkawm ve ṭhin an ni a, Mary nen pawh an inclose viau, amah vang hian Mary pawh a ngampat phah ti mai ang, mahse, vawiin erawh a hna avangin a rawn tel thei lo hlauh a, Mary chuan vui hmui a pu ta reng chu a nih hi maw. 

An chaw eina tihfel vel chu Hluzuali pawn a pui ve zuai zuai a,Vani bakah Sangzuala nî fanute Dini leh Sawmi an fel bawk a, puih tehchiam an ngai lo. Hluzuali pawh chu an be ve siam siam reng a, fel a ti viau mai. Sangzuala pate fapa upa ber Lawma fapa Danny leh Alexa te hi kum khat chhuak an ni. Lawma nau Rintea hi a la tlangval a, an te ber Malsawma erawh a sâwn thlakna Chhani nen an innei ve tawh a, an ni ve nak nak mai. Dini te upa ber Marini te chhungkua erawh an rawn lang ve thei lo. Hluzuali chuan an chhungkaw hming ho chu a lo chhinchhiah ru ve kar mai, nakinah mamawh hunte pawh a la nei maithei a ni. 

"Riak mai rawh aw, Hlute.." pi Sangi'n a tih chuan, "Aw riak ang" a lo ti var a, Sangzuala nî Ni Hmai pawn a u Sangi bulah, "A fel hmel khawp hi a..a hmel pawh a chhiat loh hi" a ti ve luam mai. Pi Sangi lahin a fak ve bawk si a. 

Rintea lah chuan Hluzuali chu a lo hmu tai ve deuh nge, biakna tur phêt a zawng ta mai a. Rintea hi an unauah a lerh ber a, chuvang nge nupui pawh a nei har ta ber chu a nih hi. A hmel pawh a ṭha ber, Sangzuala nen an intiat thuak a, tlemin a hâng deuh zawk tih mai a ni. Hluzuali'n Alexa te pipu uai a thên lai chuan a va phei ve a, "Ka hmu tawh tlat che. " A'n ti nghal tâwng a. 

"Hmu tawh ang" a lo ti ve mai. 

"Hmelṭha hi chu hriatrei an awl alawm" a ti leh a, "Ka hmelṭha mi?" Hluzuali'n a lo ti hû a. Mipa kawm ngai lo tih takah. 

"Hmelṭha e,." A lo ti sam êt a, Mary te an rawn phei ve mêk bawk. An zawn an rawn thlen chuan, "Khatiang nau awmtu nena ṭhut dun kha i inhmeh lo, a chaltlai reuh si, dawrah kal ang u" a rawn ti piap mai a. Chaltlai ve ve chu an inmil hleithei meuh lo a nih hmel e. 

Hluzuali a nui hak a, "A ve lutuk che hian a." A ti ve sak mai. Mary lah thinrimna lo pai sa tawh a ni bawk a, a sa leh kher mai, "Khatianga min tawngkhum ngam tur kha chu i ni lo mawle.." a ti a. 

"Min ṭawngkhum danin zir hek lo." A lo ti ve leh hmak. 

Sangzuala chuan a dik dawn lo va hriain, "Kal ang" a lo ti vut a, Rintea chuan, "Va kal r'u..ka lo awm ang" a ti lûng lûng a. Tlemin a kainam ve deuh bawk nen, a ṭawng nuam hle. Hluzuali bulah chuan, "Mary hi chu hriatthiam ngai chi a nia, a proud ve maw..thawhchhuah a lo nei ve kher bawk sia,. Hrethiam rawh." A ti mawlh mawlh a. 

"U Sangzuala bialnu em ni?" Hluzuali chuan a ti sap a. 

"Ka hre lo, kan hre lo a ni zawk ang chu, Sangzuala hi chuan a ngaizawng ve pawn ka hre lo." A ti ringawt. A nihna diktak a sawi chiah rêng a, Sangzuala'n a ngaizawng ve lo anga sawi a nih khan Hluzuali chu eng emaw ti lâwm hian a lawm ve ringawt nia! Alexa nu a tan a duh lo te pawh a niang. A nasat ve hmel êm bawk a ni. A pa nupui Pi Mawii leh a fanu Hruaii te tihduhdahna hnuaia lo khawsa tawh a ni a, chuvang chu ni maw mi nazawng hnuaichhiah mai maia awm hi a tum tawh bik der lo. A hna chu eng hna pawh ni rawh se, rinawm taka a thawha a duty a hlen chuan hna zahawm a ni mai. A thawhna hmasaah khan ruk lo ruin lo hmingchhe tawh mah se; khatah kha chuan inthiamna chin a nei ve tlat. Mahse, awlsam taka sum lakluh hi chu a ral pawh a ral leh hma tih a hriatchian phah deuh. Tuna a hnathawh mêk hi thla khat êm pawh a la thawk lo naa, thawh zel a duh viau mai. Alexa'n a beisei loh deuhin a lo ngaina ve bawk si a. 

Rintea chu a ṭawng duh angreng hle, mahse, a ngaithla ṭha hman vak lo, Alexa te a va buaipui leh zauh zel bawk nen, khua pawh a thim chho ta a, in chhungah a luhpui ta a. Danny te pawh an hawnpui a, Alexa mut a la chhuah loh avangin a pindanah an la meng dun a, Sangzuala chu khaw nge a kal pawh a hre lo, Mary nen khan an leng te pawh a ni mahna le. A ngaihtuah zui peih lo. Dar 8 a rawn rik chuan Alexa a meng hnual ṭan a, a mut a chhuak tih a hai lo. Khumah mutpuiin thawnthu sawi tura a tih angin ama chanchin chu thawnthu angin a hrilh ta melh melh a, a chanve vel a sawi aṭangin a muthlu ṭan ta a, a lawm hle. Zanin chu mut hran ve pawh pawi a ti chiah lo. Mahse, Alexa muthilh ngheh hnu a nghak ta phawt a, a hnar sûk sûk hnuah chuan dimtêa thoin a pindan atana an dahsakah chuan a phei ta a, a lut dawn chiah tihin Sangzuala a rawn lang ve hlawl mai. Luhsan mai a tum laiin, "I mu hrang dawn a ni maw?" A rawn ti a. 

"Aw" a ti mai a. 

"Zanlaiah i buai si ang e" a tih chuan a ngei ve ringawt, "A pa i nia, buai ve zawk rawh" a ti hmak a, a lut daih. Sangzuala chu a nui hawk hawk mai. "Huatthu a pe chhe zêk mai." A ti sup a. A pindan lam a pan ve ta nghal a. Hluzuali pawh khumah a mu nghal thlawp,. Chauhna chhan tur em em nei si lo hian zanah hian a chau tlat zel, incheck up tur a ni a ti ve fô a, khua a lo var hian a ṭhulh leh nge nge zel. Apuia nen an intext a, naktukah an lo zin dawn avangin a mu hma ve hlauh mai. A lehlam zawng tak chuan a lâwm angreng,. Incall te hi nin chang a nei ṭhin, sawi tur a hre ve ngai bawk si lo va. A phone pawh chu a hmet thim a, saisir thawkin muthilh a tum nghal. Mahse, Ṭap hlawp hlawp thawm avangin a meng leh kâwk, Alexa pindan aṭanga lo chhuak a ni. A tho nghal vat a, Sangzuala kutah khan a dah ve tak naa, a ring zo lo a ni teh chêk ang chu. Alexa pindan chu a va lut a, khumah ṭhuin a lo ṭap tuar tuar mai,. "A ṭha vek e, bang rawh le. Bawihte" tiin a pawm nghal vat a, a lo kuah bet chial mai. Chutihrualin, "Eng nge thleng? Bawihte" tih leh Sangzuala'n kawngka rawn hawn a rual nghal a, Hluzuali chuan a lo melh lem lo thung. Khumah chuan a rawn ṭhu ve a, a fapa sam chu duat tak hian a rawn chûl ve a, "Papa, Ateii hian min mutpui duh lo".titau awka zet hian, Alexa chuan a lo ti ṭuau a. A pa chuan a lo pawm vat, Hluzuali chuan nuam lo a ti letling. Mahse, a ngawi reng thung a. 

"A zung lawk a nih kha..Ateii kha." Sangzuala chuan a lo ti dam thlup a, Hluzuali nen an inmelh zawk bawk. 

"Ate, min mutpui rawh.".tiin Hluzuali chu a kuah leh a, khumah chuan Hluzuali chuan a mutpui zui nghal. Sangzuala pawh a insaseng nghal vat. "Muttui u aw" tiin a rawn kun hniam a, Hluzuali chu a lo chhing ringawt, a rawn fawp dawn emaw a ti hman alawm le. Mahse, a fapa zawk chu a chalah a fawp zauh a, Hluzuali melhin, "Muttui aw" a ti nghut a, thutak deuh rûnin a chhuahsan ta a. A muhil thei lawk lo zui, phone a khawih peih bawk si lo, Sangzuala chu a mitthlaah zu châm tlat a mawle.."A sual hmel si, ninawm" te a'n ti leh ringawt ṭhin. A tal a tal mai, Alexa erawh a mutui leh ta viau, vawiin lamah a tal chau ve bawk nen. 

Sangzuala pawh cigaratte a zu hnem ta hle mai. Khumah a ṭhu mu a, a pindan epa a fapa bula mu nula la naupang tak, mize danglam tak nei chuan a rilru a luah tlat. A hmuh tirh phat kha chuan eng he hû-ah a ngai hran lo va, awmpui satliahah a ngai mai. A fapa awmtu te hi zêp nâk emaw mi satliah leh naran ve tak an ni tlangpui zel bawk nen. Mahse, a hmaa lo thawk tawhte aiin a danglamna a hmu chho ta zel a, a fapa enkawltu tur diktak niin a hria. Tin, Hluzuali chu hriatchian a châk, an khua takngial pawh a hre si lo, a ṭhiante nena in an luah danah Aizawl khaw nghet a ni lo ang tih rinna a nei tho a, mahse, a chanchin han zawh chian erawh a tîm ve tlat. Mihring reng reng thil hriat châk lutuk ho hi a mil vak lo nen, chuvanga la insûm rih mai a ni. Zodini pawh a rilruah a rawn lut tho. Tunhnaiah kawnga han intawh zauh zauh châng an nei fô a, Zodini chuan melh pawh a melh ṭha ngam ngai lo, ani erawh chuan chiang takin a lo en ṭhin. A pasal lah hi a upat hmel tawhin a sum leh pai a neih chhan tih a chiang reng mai si. Awlsam taka a chhungte hneh theia Zodini a lo awm kha mak a ti fô mai. Alexa te hi eng ang hmel puin nge a rawn ṭhanlen chhoh tihte hi a hre châk ve eih lo nge, an pa a hlau zawk pawh a hre lo. Tunhnaiah Alexa hian 'Nu' chungchang a sawi ta zauh zauh mai a, a upa telh telh ang a, zawhna a la ngah dawn chauh a nih hmel, a nuin a sawipui fô thin, "Tuna nu ang taka a pawm theih tur hmeichhia i zawn a ngai, ka dampui reng dawn lo che u" a tih ṭhinte pawh hi dik a ti ve reng. A rilruah hian hmeichhia hian hmun an chang thûk thei tak tak tawh lo a ni ber, mahse le, hei Hluzuali a rawn lang a, a vei ṭan chu a ni ta reng mai. Hmeichhia a ngaihven loh rei luat vangin Hluzuali bula a awm chuan a khawr deuh ṭût zel a, a lai ve thei lutuk tih te hi a hriatpui ve ang em le..engpawhnise, Hluzuali hian bialpa a nei tih a hre ru deuh a, biak zin a nei tih te thlengin, inrawlh chu a duh hauh lo naa, eng emaw ti tala chet a lak a ngai dawn a ni. 

Thawhṭanni pawh a rawn inherchhuak ve leh ta a. Hluzuali chuan a harh rualin vawiina Apuia te lo zin tur a hrechhuak nghal. A phur hlawl lo va, mahse, a khawngaih si. A damloh lai na nâ na chuan chhe lutuka dawnsawn leh tihnat a duh bik lo, thil kalsual vangin kha chen lo inṭhen tawh mah se; Apuia pawn midang a melh thei bik lo tih a hria a, chuvang chuan hetia an insuihzawm leh hnua kalsan leh chu a ngaingam chiah lo a ni. An nitin hun hman dan ngaitêin hun an hmang leh a, Sama lah hian a number te a dil vel, a tirah khan a ngainatawm viau dawn emaw a tia, a tenzawng tak angin a khawsa leh ta si. A insawithei riau chu a ngaithiam thei thlâwt lo. A number erawh a dil ve miau sia, a pek ve tak ngawt kha. Thingpui a in khawmuang leh bawk a, mahse, Alexa'n a rawn ko hlauh a, Vani nen a kalsan ta daih. Tlaiah Sangzuala a rawn haw tlai bawk nen, taxi a hmang a, Alexa'n a ngen deuh naa a titlei thei hram, a ṭhiante bulah awm hran chungchang hi la sawi chu a ngai niin a hria. Heti reng reng chuan a buaithlak tlat. In a thlen hnuah Apuia pawn a rawn call ta ral ral mai, tîm ru zetin a la a. "Kan thleng chiah, bual pawh ka la inbual lo. I haw tawh em?" A rawn ti a. 

"In ka thleng ve deuh chiah, i chau em?" A ti ve ngial a. 

"Chau ve tho, kan inhnaih ta deuh a, a zia e." A ti a. 

"Nia, inbual la, mu hahdam daih rawh" a lo ti ve a, "Umm, ka'n inbual ang e. Zanah kan inbe dawn nia" tiin a dah a. Hluzuali pawh a thaw huai mai. Nilai tlai lah kha chaw eiah a sawm ve bawk si, han kal loh ngawt pawh chu. A ṭhiante an rawn thleng a, zanriah an ei laiin awm hran chungchang chu a sawi ta a,. Dami chuan, "Naa, i awm hran daihin. " A ti nghek a. Saii chuan, "Lehlamah an rawn ko reng ve bawk che sia, i awm hran dawn pawn tun tut tut loah ti la." A lo ti ve a. 

"Nia, thla tharah law law chu ka tia, e taka! Sawi tur ka nei, englo, min nuih miah s'u, ka bialpa a lo zin a." A ti ta hlawl mai a. Dami leh Saii makti chu an meng phar nasa mai. 

"Bialpa a?! I nei a maw?" An ti rual ṭhawt a. Buk nghat pahin, "Nei ve ang chu, nula ka nih ve hi" lai zet hian a ti a. 

"Tu nge a hming? Khawi khua?" Zawhna an ngah ta kher mai, chaw bar ṭhulh ṭhakin sawi an inchuh a ni ber mai, dik tak chuan an awmho tirh khan Hluzuali hian an hmuhsit a hlauh avangin a chanchin diktak a hrilh lem lo. A nu leh pa boral tawh vanga a putea te ina awm a nih thu leh a piteii a ṭhat vak loh vanga in dan a duh thu kha a hrilh mai a, an lo awih ve mai bawk nen,. 

"Bungpui khua ti ila, a pa hna avangin an awm a, anmahni tak chu Aizawl khaw pangngai an nia, a damṭha lo a rawn incheck up dawn a." A ti a. A hming Apuia a nih thu a sawi zui nghal bawk. 

"Lo leng teh se, chaw te lo ei se la, nang meuhin bialpa i nei chu a lawmawm êm mai." An ti a, an phur khawp mai. A rin aia an phurpui avang chuan Hluzuali pawh a hlim sawt mai. Vla a rawn leng leh a, an pali chuan an incard den leh mai mai. Mahse, dar 9 velah Apuia'n a rawn call avangin a mutsan ta a. An inbe rei hran lo, a tuka inhmu tur chuan an inmangṭha ve ngei kha. 

Thawhlehnî hi ni zawng zawnga a nin ber a ni ṭhin. A zing tho a fuh vak lo bawk nen, a tûm bûr mai a. Chaw pawh tihtham a ei lo. Alexa te in a thlen chuan Rintea kha a lo awm a, a lo be nghal var mai. Rintea hi chu sama te anga ninawm leh tenawm chi a ni ve lo bawk a, ani pawn a kawm ve thei mai. Sangzuala school kal tur chuan, "Hlupui, naktukah chhungkaw picnic kan nei dawn a, i rawn kal ve a ngai aw. Alexa buaipui a ngai dawn sia." A kawr bân thleh pah chuan a ti mawlh mawlh a. Nilaini ber khera picnic, tlaiah Apuia ten chaw eiah an sawm si,. A hnual ve ta deuh, mood fuh vak lo sa nen. 

"Naktuk kher kher maw? Tlaiah chaw eina tur ka nei asin le." A ti nang nang a. Sangzuala chuan hmel danglam chuang lo hian, "Chawlh a nia, kan hman tlan lai ber a ni sia. A pawi hle mai, hun dangah ei mai rawh" a ti nghut nghut a. 

A lo ner khum nghek ringawt. Rintea chuan, "Bro, Mary a rawn kal ve dawn em?" A lo ti ve a. 

"Kan chhungkaw mi leh sa a ni hleinem" a zawhna tak chhang si lo hian a ti hmuk a. Mary a tel ve dawn loh chuan Hluzuali pawn nuam a ti ve deuh ang chu maw. "Remruati'n a sawm leh tho ang,." Rintea chuan a lo ti a. Remruati chu sawi tawh ang khan Sangzuala nî upa zawk fanu a ni. Mary nen an inkawmngeih hle a ni. 

Sangzuala chuan chhang tawh lem loin a chhuahsan a. Rintea pawh rei a awm lo, Sama a rawn kal ta bawk nen. Tihtur em em nei ta lo chu Vani a pui ve leh a, Vani lah titi nuam ti chi a ni bawk nen, an ṭawng leh ṭeuh mai. Vani lahin Mary leh Remruati a mil loh thu, an inlak zia leh amah Vani pawh an ngaihnepzia a sawi leh sar sar a. Remruati chu la hmu ve chiah lo mah se; Mary ang a nih chuan a ngainat a ring lem lo thung. Tin, a mood a fuh vak lo chu a ni, Apuia beiseina han tihbeidawn kha nuam a ti chiah lo, khi leh chen ram aṭangin a rawn pan ve êm êm a, chaw eiah a la sawm zui, han hnial leh ngawt pawh hrehawm a ti ve takzet a ni. A ngaihtuah lai mêkin Apuia chuan a rawn call ta nawlh mai a. Bathlarah chhuakin a va be ta a. 

"Vawiin chu chawhnu lamah daih kan incheck up dawn a, tlaiah i rawn haw pahin kan inhmuh theih ka ring deuh, ka lo nghak che ang a.." a rawn ti duam duam a. 

"Nia, a pawi lo, chanchin kan inhrilh leh ang a.." a ti ve mai a, " Naktuk tlai chu ka rawn lam mai ang che. In ina haw tawh loin i tlang ang a" a rawn tih takah chuan a chhing sawk mai. Nuam lo ti êm em hian, "Ih, Apui, naktuk tlai kha ka remchang leh dawn tlat lo. Ka hnathawhna ten picnic an rêl a, ka nau awm pawh a kal ve dawn sia, ka kal ve a ngai dawn a." A ti zawi raih a. 

Apuia rum nghut a hre zui nghal. A lungawi tawh lo teh ang chu. 

"Bang rawh" a rawn ti tawl mai. A beisei loh lam daih a ni. "Eng a?! Ngati maw?" A ti hâ a. 

"An khirh em mai, bang la, innei tawh mai ang" a rawn ti hmiah. A ner sak a, "Thawhchhuah nei lo ve ve kan inneih ten" a ti hlak a. 

"Ka nu leh pa an la dam chhung chu kan rethei lovang, hna ka zawng dawn alawm, ka hmu ve em em ang. Kha hna i thawh avang khan kan inkar hi a chhe dawn tlata hriatna ka nei" a rawn ti mawlh mawlh a, a dikna chen zawng a awm ngei ang. Mahse, Apuia vang ringawta a hna bansan chu a ngaingam bik lo, hna vânzia leh ani ang tana thawh tur vânzia a hre ve vek, awmpuiah ṭang dawn se tun ai hian a hrehawmin a thawkrim maithei, tih leh lamah chuan hetah te chuan a nuamsa viau zawk a ni, Alexa lahin a ngaina a, a duh duh a in in a ei thei a, pindan nuam tak pek a ni bawk a, ani ang vanlaia tla tan chu aia hmun nuam chu a awm kher tawh lovang. 

"Lungngai lutuk lo la, chaw ei hunte chu a sawn theih alawm, ningani tlaiah pawh a theih tho alawm" a ti ve a. 

"Aa..i thei leh chuang lovang, nangmah hian chhuanlam i zawng ve hrim hrim, min hmuh hi i phur hlawl lo alawm tiraw?" A rawn ti hmuk hmuk tawh si. 

"Chutiang lam a ni lo, ka hnathawhna te mitmei ka vên a ngai ve alawm..i hrethiam lo zawk a nih kha." A ti hlak hlak a. 

"Ka beisei anga thil a thlen loh hian ka hnual vek zel, vawiin tlaiah pawh inhmuh a ṭul lo, i awm awmin awm rawh" a rawn tih chuan a sa ve deuh zak mai. "Ê..aw le, i tihdan dan, ka thiam loh pawh a ni lo va, nge keimah chu min mawhpuh daih le..a ṭha lawm" ti ve hmakin a hmet hlum zui zat. A ding ngawi reng a, hmalam a melh reng ringawt, a thin chu a rim et et mai, Apuia mil loh ruksa tawh nen, khatianga a rawn ṭawngkhum hrep kha a ngaithiam thei lo. An haw nghal dawn pawh ni hlei lo, chaw ei hunte chu sawn a harsat loh tehlul nen. A rilru tê tê chuan, "Aw, tikhan tawp hmak rawh se..be buaitu ka nei tawh lovang a a zia a ni mai" a ti tan tân a. Mahse, a rilru fîm deuh hnua a han ngaihtuah chuan Apuia pawh demawm lohna chin nei vein a hre tho, a thlakhlelhzia te a hre ve vek si a, a rawn zin a, hmuh êm pawh an la inhmu lo a nia, ani damkawr thinchhe tan chuan khatianga ṭawng mai pawh kha a mawh lo ve. 

Nilêngin a mood a chhia, Alexa pawh a kawm hlim peih meuh lo a ni e. Alexa pawh a ngui nghiai reng mai. Tlaiah Remsangzuala a rawn haw hma a, Pi Sangi chuan, "Hlute, naktuk picnic a ni sia, Mama hian va thlah che se la, i mamawh tur va la la, rawn let leh mai ta che u, hetah riak mai la, naktuka inlam kual leh kha i tan pawh a buaithlak ang" a ti a. 

"A pawi hleinem" a lo ti sep. Sangzuala pawh chu a inthlak sawk sawk a, Alexa te nen an pathumin Hluzuali te in lam chu an pan ta a. A rilruin Apuia chu hre rauh rauh mah se; a rawn tihdanah a lungawi chiah loh avangin ngaihtuah loh luih hram hram a tum a ni. In an thleng a, a ṭhiante pawh an lo haw ve deuh chiah a lo nia, a inthlakna tur leh mamawh zualpui a la khawm zung zung a, Sangzuala te ina inbual mai a tum a ni. Khua a tlai ve deuh tawh bawk nen,.Saii leh Dami te chuan Sangzuala te pafa chu an lo besâwm ve bawk a, anni zawng a zeizia hre tawh an ni bawk a, an kawm tlangnel thiam viau mai. A inpeih veleh pindan aṭanga chhuakin, "Ka hman" a ti hap a. 

Sangzuala chuan din pahin, "I ṭhiante pawh hi naktuk chu rawn kal ve se la, nge Holiday-ah pawh in chawl ve lem lo?" Tiin Saii te chu a zawt a, phungthlûk thuhla vanga sawm satliah a ni tih lang tho mah se; Saii te chuan kal ve an châk ru hle, "Chawl ve nang, sunday chiah kan chawl a, keini chu" Dami zawk chuan a lo ti var a. 

"Nakinah Sundayah in pualin kan la huaihawt leh dawn nia, a nih kan phei phawt ang. Chaw eitui u" tiin an chhuak ta sang sang a. An kal liam ta maw tihah Saii chuan zawi sap hian, "Hluteii chu ni ila ka kherh nasa ngawt ang" a ti a. Dami pawh a lo bu ve nghat mai. Sangzuala nge nge zûn a lo nei deuh te pawh a nia nge. 

In an thlen phei chuan a inbual sawk sawk a, an inpeih hnuah zanriah an ei zui nghal a. Pi Sangi chuan, "Hetianga chhungkaw picnic hi kan kumtin neih dan a nia, chhungkaw inpawh lehzual nana kan tih a nia, a ṭha khawp mai. Hlute, i lo inkiltawih ang e aw, kan chhungkaw zing ami i nih kha.." a ti siam siam a, Hluzuali tan pawh dawnsawn a nuam viau e. Vani lah chuan, "U Remruati leh U Mary te an kal ve dawn chuan ka tui lo nghal, an inla leh dawn ropui si" a ti tân tân a, a duh duh hi a sawi mai zel a, ani hi zawng. Sangzuala chuan nui chungin, "Inla ve daih la a tawk a ni mai. Anni ai chuan i lal hrim hrim" tiin a han on zauh a, Vani lah inla neitu takin, "Dik chiah, kan inah na nâ na hi chuan ka thu ve êm.." a han ti vei lar lar a. An nui ham ham mai. Alexa erawh chaw a ei tam lo viau, a ngui riau mai a, Hluzuali tak pawh a inthiam lo deuh, chhun lama a mood chhiat vang khan Alexa pawh chu a ngui ve deuh niin a lang. Eikhamah Vani a pui thuak thuak a, Alexa erawh a pi bulah a tawlh hrat hrat reng a, a zia a zâwi ta riau chu a pi pawn mak a ti ve deuh niin a lang. Mahse, engmah phei chu a sawi chuang lo va,. Alexa lehkha zir a hun ta bawk a, a pindanah Hluzuali chuan a hruai lut ta a. 

"Ate, ka lungngai" khuma ṭhut pah chuan a ti reuh a. 

"Ngati maw? Lungngaihna tur a awm em ni?" A han ti a. A kut a kuangkuah vei thân a, chhuat lam chu a melh run run bawk. 

"Ti nge Anu i nih loh?" Tih leh han melh a rual a, Hluzuali a phu zawk mai. Sawi mai tur a haihchham deuh a, mahse, inngaihtuah harh vatin, "I nu ve tho alawm ka nih..ngati nge chu chu min zawh?" A ti a, Alexa lu-ah chuan a chul pah bawk. 

"Danny te, Bawbawihi te chuan nu an nei sia" a ti leh nghat a, lungawi vak lo hmel a pu deuh bawk. Tunhnaiah nu tih thumal a lam nasa viau mai a, a rilruah a lian hle tih a lang. He thil hi chu a serious deuh bawk nen nakinah a pa sawipui a rilruk ta a. 

"Nakinah kan sawi ṭha dawn nia, tunah chuan lehkha zir phawt la..umm, i fel kha" thlem titih hian a ti a. Alexa chuan naupang e ti lo chuan a hmui a tipawrh a, "Ka zir duh lo, ka peih lo" a ti ta mai. Hluzuali pawh a hrilhhai letling. 

"Khatin an ti ngai lo, i zir loh chuan i pi leh i pate an lungngai dawn asin."..a han ti ngial a. 

"Anu pawh a lungngai ve dawn lo mi?" A ti ta khauh mai,. A heh liak zauhin, "Aw, i nu pawh a thinrim ang " a ti a. A zia a rawn dang leh thut, a che leh ta neuh neuh a, a harhvâng leh ta kher mai. Hluzuali pawh a beidawng lek lek a ni. Boruakin zir hek lo, lehkha pawh chu an inzirtir ta lo a, mut lah an mu mai thei bawk si lo. A tuk thawh hma a ngai ve bawk si nen, chiu mut ve mai a rilruk ta a, Pi Sangi bulah a sawi a, amah Pi Sangi pawn hrethiam takin amahin Alexa chu a jection ta a, kar lovah a muhil ve ta mial a, Hluzuali pawh a thaw huai mai. Remsangzuala chhuak a lo la haw lo va, a len ngai loh nen zanin chu a chhuak ve teh tlat a, a rei phian lehnghal. Pi Sangi bulah Alexa nungchang rawn danglam chho chu sawi mai chi a ni ang em tih a ngaihtuah lai takin Sangzuala chu a rawn haw ta hlauh a, apa bula sawi phawt chu ṭha a ti a, a pi bulah chuan sawi se, pite na na na chu a rilru a nat a hlauhpui ve deuh a ni. Sangzuala chu a pindanah a lut nghal a, Ani pawn Alexa chu a la ṭhutpui rih, pi Sangi a chhuak ta maw tihin a tho tharh a, Alexa melh leh zawkin Sangzuala pindan lam chu a pan ta a. 

A kik karh karh a, lut tura sawmna a dawn rualin a hawng nghal rap. Sangzuala chu makti âwm pawn a awm lem lo, a lo beisei ru reng emaw tih mai tur a ni. "Lo kal rawh, eng nge ni ta?" A lo ti thluam a. 

Ṭhutna tur a melh kual lai chuan, "Khumah hian lo ṭhu ve mai rawh. " a lo ti leh zat. Tîm ru zet hian a ṭhu ve ta nge nge a. Sawi ṭan mai dan tur a haihchham leh ta tlat mai, tukverh lam melh daih pahin, " Ih, englo..ih.." tiin a riat nawk nawk a, Sangzuala chuan rawn ṭhut hnaih deuhin, "Umm, ka ngaithla e, ka fapa chungchang a ni tiraw?" Tiin a rawn sawi hmawrhmuh ta hlauh a. A chil a lem khawlh, "Aw" a ti ṭiak a. Ti nge maw sawi mai harsa a tih em em ni..

"Ka ngaithla e" Sangzuala chuan a ti a. 

Hluzuali chuan, "Englo a nia, ih, tunhnaiah hian a nu hi a lam nasa a, nu chungchangah a buai viau niin ka hria, a nu pawh ka hre ve bawk si lo va, han dawnsawn dan ka hrethiam lo lutuk a" a ti ta mawlh mawlh a. Sangzuala chu a ngawi vung vung a, rum leh nghutin, "Ka ring rêng a ni. Ka bulah hi chuan a sawi ngam chiah lo va, a pi bulah pawh a lo sawi alawm. Chinfel dan tur ka hre mai lo khawp mai." A ti ta a. 

"A nu nen hian inhmuhtir ve hrim hrim a ṭha lo maw?" Hluzuali chuan a ti a, a tîm ru viau naa an sawi pawp ta sa sa nen, a sawi ta tawp mai a ni. Sangzuala chu a ding ta hluai a. A mitmeng pawh a danglam nghal, “Aih..” a ti hluk a, a thaw hak bawk. Hluzuali chuan inthlahrung takin, “I fapa ngaihtuah la ka duh a ni.” A ti sap a. 

“Kei hian ka thlahthlam tih sawi i tum em ni?” A ti leh ṭhak a. A lungawi lo ringawt chu Hluzuali pawn mak a ti ru hle. 

“Chutiangin ka sawi lo, a chhungril nun kan hre vek lo va, hringtunu pawh hre miah lo va a seilen chhoh hi i duh tak tak maw” huaisen chhuahin a ti a. 

Sangzuala chu a ṭhu hnawk a, a chal chuar nângin, “A nu chuan duh loin ka hnenah a hnutchhiah tih hi ka hrilh ang maw? Ka theih i ring em? Ani saw ka hmangaih a, ka neihchhun a ni asin.” A ti nghut nghut a. Hluzuali chuan a nu boralta a lo ngaihtuah daih, nute ṭheuh ṭheuh pawh hi an lo va inang lo tak êm tiin. Inthingharh leh vatin, “A harsa ang tih chu ka hria alawm, mahse, nakinah chuan a zawhna chhanna hi i la pek ngei a ngai ang. “ Inringtawk tak hian a ti ta a, kal mai tumin a pen uaih bawk, mahse, a kutah chuan a rawn vuan ta tlat mai. A ding chawt a, an inmelh ta kal mai. 

“Hlute, ka fapa sawn nu a mamawh tiraw? A dik em?” Sangzuala aw chu a thûk hle. 

“Aw..amah hmangaihtu a mamawh” hrethiam vak lo hian a lo ti a. 

“Ni ta che..” zawitê nisi, Hluzuali benga ring tak si chu Sangzuala ka aṭangin a rawn richhuak ta tlat..

A hamhaih a, Remsangzuala hmel thutak rûn chu melh pawh a melh ṭha ngam tawh lo. Harhchhuak thutin, “Ka thei lo..ih, ka..Mary kha a ni duh ang. “ Tia riat nawk nawkin a kut chu a thingthla a, hmanhmawh zetin a pindan chu a chhuahsan ta a. A pindan a va thlen chuan a thaw ṭha ngam chauh, khumah ṭhuin chechâng lo lêka ṭhuin thawk a han la kâwk kâwk a..a âwm a dawm vang vang mai. Engvangin nge khatiang thu kha Remsangzuala khan a phuhchhuah theih?! A fiamthu nge amah Hluzuali a tiêl zawk. Intihêlna ni chuan a hre lo, lawm tur nge lungngaih tur tih pawh a hrethiam chuang lo. Remsangzuala vangin a muttlem phah kher lehnghal. 

A harh rualin Alexa ṭawng lar lar thawm a hre nghal a, Alexa chu a mu tam bawk a, mood fuh deuhin a tho a nih hmel. Picnic tur an nih avangin chet hma a ngai ve deuh bawk nen, ani pawh intifai nghalin a inbuaipui nghal sawk sawk a, Alexa erawh a phur bawk a, api nen an lo insiam fel diam tawh a,. Vani pawh a phur thur thur khawp mai. Sangzuala erawh a la hmu miah lo, ani hi thawh a hai em mawni dawn ni, a rilru hria niawm takin Pi Sangi chuan, “Mama chu a bazar lawk a nih kha, mipa e ti lo hian chawhmeh bazar lamah hian kan ring deuh tlat zel” a lo ti var a. Reivakloah Sangzuala pawh chu a rawn haw ve mai bawk a, tukṭhuan an ei kham tih âwm velah kal ve tur dangte chuan an rawn sawm ta hlawm a. Rintea pawh a rawn thatho ngei mai. Sawi tawh angin chhungkaw picnic a ni bawk a, a hmaa heta chaw rawn eite deuh vek kha an ni bawk a, Hluzuali pawh a zum em em tawh lo. An han inhlang fel a, Alexa chuan Hluzuali chu a vuan ṭai reng a, kalsan a hlauh hmel kher mai. Sangzuala motorah anni chhungkua chu an leng tawk bawk a, an tlanchhuak ta. 

Sangzuala nî te an sawm phei bawk a, in aṭanga Mary leh hmeichhia a la hmuh ngai loh rawn chhuak te chu a lo thlir deuh tawp, Vani’n, “Ka ring rêngah, mi hneawm pahnih” a tih sap takah chuan a hmaa a lo sawi Remruati ngei kha a nih a ring thiam nghal mai. Eng erawh a sawi ve lem hlei lo va, Mary chu Sangzuala ṭhutna zawna rawn dâkin a hnunga ṭhute chu a rawn melh thuak a, awmze nei zetin a ner sak bawk. “Hawn lam chu Rintea motorah chuantir tawh la..penna tur ka nei a nia” thupe aw deuh hian a ti ham ham. Sangzuala chuan, “Nia..” a ti ringawt. Nizan lam thil thlen vang nge a ṭawng mawh riau mai a, Hluzuali phei chu a la be lo hrim hrim, ni e, nizana Hluzuali’n a chhuahsan hnu khan a roomah a vei tuak sek a, a fapa leh Hluzuali a ngaihtuah chhâwk a ni ber mai. Engvanga Hluzuali bula khang thute kha sawi ta mai nge a nih a in hre bik lo. A zak leh hnuhnawh hle a, bialpa a nei tih a hre ve vek chunga khatianga tlang reng rawnga a han ṭawng ta khan Hluzuali chu a tihlau niin a hria a, pawi a ti hle. Hnar a la ni zui a! A mood chu zêp nâk emaw a fuh zân lo a ni. 

Picnic spot hi Sangzuala patea ten kum 2 liamta khan an lei a, chei ṭhain sumdawn nan em em pawh hmang loin a chhehvel chu huan atan hmang pahin chhungkaw intihhlim nan an thuamṭha leh kha a nia, a nuamin a tawk reuh khawp mai. Tihian, an chhungkaw vua leh vangte chuan an duh hun hunah an hmang mai a, thawm ṭhat a ngaih changin an inpui ve leh liam liam zel bawk a,. A zia phian mai. Naupangho an râk chul a, tuichen bak an rilruah lang mawlh hek lo, an inphelh sawt sawt hlawm a, Alexa pawh a inphelh rang ngei mai. Mahse, Hluzuali chuan pi Sangi a râwn leh phawt a, phalna a hmuh takah chuan Alexa chu tui cheng turin a kaltir ve chauh, . Mary te laka a inven a ngai ve bawk nen, fimkhur tluk a awm lo. 

Anni bakah midangte chu choka lamah kalin a ṭhen an lo inthlak bawk a. Hluzuali pawh Vani bakah Dini te ho nen an inkawp tlang leh dial a, Dini pawh pa ru fû e ti lo chuan a han inphelh chu a vun a no zêk a, Vani ta pek chuan, “U Din, i vun a no bakah i hmeltha si, patil atan chuan i uiawm” a ti leh ngawt a! Dini lah a nui hawk hawk ringawt. An eitur ken te an han thiar a, tukṭhuan an ei tawh bawk a, tlai lam eitur siam chu an hmanhmawh tehchiam loh. Vani te nen chhun chawlha eitur erawh an buaipui a, tui chen ve pawh a tum tehchiam lo. Apuia a la reh tluang zel chuan a rilru erawh a kap ve deuh rûn a. Be hmasatua ṭan erawh a duh hran lo. An reh hlen a ring lem lo bawk a, Apuia a thlakhlelhna tam zawkte kha bo ta mah se; a bialpa a la ni miau a, then ngawtna chhan tur lah a nei hek lo, a lo pawm leh ta sa sa a, amah zawkin thutlukna siam hmasak a tum hauh lo thung a ni. Thingpui fe a thlak laiin Sangzuala leh Mary te pahnih kha an rawn kal ve a, anni pawh an taksa a la hul phak danah tui an la cheng lo niin a lang. Remruati chuan Hluzuali chu a melh zeuh zeuh reng a, “Alexa nanny ka tih kha..” Sangzuala chuan a rilru hria niawm tak hian a lo ti sup a. Remruati lah chuan, “Ka ring nghal alawm, a class chim chin ka hriatsa tawh avangin amah hi ka ngaihbel nghal..” a lo ti kher a! Hluzuali a ner nak mai. 

Mary pawh chuan, “A nau awm lakah a inla thu ve phian lehnghal..” dimdawihna nei hlek lo chuan a lo ti ve sak bawk a, ruih an nei nge mawni an boruak hap a sang riau hian a lang. 

Sangzuala ṭawng tum a ân lai takin, “In tihtheih tawk chu a class mep mep teh e..” nui hak hak chung hian Hluzuali chuan a lo ti ve ta fak mai. Boruak a reh duk a, mahse, a rei lo. Remruati thinrimin, “Khanglang che chuan..” a tih mêk laiin Alexa leh Danny te an rawn tlan lut a, Hluzuali rawn pawm pah hian, “Anu..oh..Atê, hawh tui lo chêng ve rawh” Alexa chuan a ti ta reuh a. An phâwk hlawm hle. A ko sual lui lovang tih an chiang hle hlawm a, amah Hluzuali tak pawh a hamhaih deuh..

“Lutuk” tiin Alexa biang chu a piai zauh a, “Van, hei a so ṭêp aw..ka va chenpui ve lawk ang e” ti leh zauhin Alexa te chu a kai a,. An kawng dal fahrana lo ding îng êuh kual vel Mary bulah chuan, “Lo kal sawn lawk mai..”tiin Alexa chuan Mary chu a nêk a, rak hlut chungin choka chu an chhuahsan ta a. Mary hrilhhai leh tlawmla lutuk sen ṭân ṭân chu Vani leh Dini te chuan inpetruh chungin an lo nuih ngat ngat mai..an sual ve ee..

“I fapa enkawltu chu leh! A va chaltlai reuh ve a. Mary sawi kha ka lo awih ṭha duh lo vel a,. Bân vang vang rawh” Remruati chuan midang awm vete hmai êng zah miah lo chuan a ti ta bawrh bawrh a. Remsangzuala erawh ngawi rengin a inthlak mual mual ringawt. 

“Khatiang a nihte chuan keini i cousinte pawh min zah dawn miah lo tihna a nia, a nihin a ni lo lutuk” Remruati chuan a ti leh hlaih hlaih a, Sangzuala chuan muangchâng hian, “Ka fapain a ngaina a nih chuan, hmeichhe sual tak zawng a ni lo vang. Nangmahni zawk kha insiamrem mai rawh u. “ A ti ta thluam a. Mary leh Remruati chu an thinrim tih a lang reng, Mary phei chu a rilru a na tel tih a lang. Mahse, ngawih a chuh ve deuh nge engmah a sawi lem lo. 

“Vani, thingpui in peih dawn tawh em? I pate ho chhâwl a hal ṭan a niang” Pi Sangi rawn lut chuan a ti a. Boruak a rawn her danglam ta deuh, Vani te chu an chezui ta sawk sawk a. Pi Sangi chhuak leh chu Remruati te chuan an zui nghal vat a, Remruati awmna Sangzuala nî pakhat zawk fanu Teremi chuan, “U Remruati te chuan Api Sangi rilru hneh an tum leh a ni chiang..an ninawm siah” a ti hlak a. Lo hre phatu Sangzuala chuan, “Ka nu rilru an thlak thei dawn chuang lo” a lo ti nghet churh mai. Engvanga Mary te chuan Hluzuali chu hmumawh em em nge an nih a hrechiang. Mahse, sawi chhuah kher ṭul a ti lo. 

Thingpui in chawlh an neih lai chuan Hluzuali pawh naupangho nen an inkhualtelem pah a, naupangin an ngaina viau zel chu a mak angreng hle😍, amah pawn mak a ti ve tho..Danny nau Bawbawihi nen in lem an sak lai takin Alexa’n ring lutuk hian, “Anuu

..Anûuu..” a rawn ti vau vau mai a. A ding chhuak nghal vat..Alexa te awmna lai hnahthel ro tlak ṭeuhnaah chuan rul dum tê chhe lo tak hi a rawn tlêng phei zûl zûl mai le..