NAU AWMTU..1

NAU AWMTU..! (1)

Ziaktu : Toni Râlte

A hmaa building te fel ât, sak thar hlim tih hriat tak, kawtzawl zau vak lo, mahse, grass phah vek, a sir deuh hleka pipu lo awm te, gate luh chiah dinglama naupang toys lo let rumte chu melh kualin thawk a han la vang vang a. A bag hrui hum nghet sauhin a chalsam rawn uaithla chu a huih chho thuak a. Dîng takin kawngkapui lam chu a pan phei ta a. Door bell chu a han hmet ri tlang tlang a, rei nghah ngai lovin a rawn inhawng vat. Tunah hian dar 11: 03 chiah chiah a ni. Nula, ngo var mai leh hmel hmuh nuam zet mai hian a lo hawnsak a, a khi nghal var var bawk. "Rinhluzuali i ni ang maw?" A han ti tê tê a. Nula chu a bu nghat a, za vak lo hian a khi ve sak bawk. "A lo beisei reng tawh che a, lo lut rawh. " Ti sapin kawngka chu a hawn zau belh a, ani pawh chu a lut ve nghal mai bawk. In chhung chu a lian lem lo naa engkim a awm ve biai ti tawh mai ang, sak thar a ni bawk a, bungrua pawh an la thar hlawm angreng. Mi hausa tak tia sawi theih chu an ni chiah lo maithei a, a vantlang tawk vel zawng an niâwm e. Tunlai khawvelah Zoram pawn hma a sawn nasa a, in leh lo ṭha tak tak, changkang tak tak a tam tawh a, tuna a awm mêkna hi chu milian tak takte chenna chu a ang tehchiam lo. Mahse, engkim a dahna tur hmuna an awm bakah an in chhung bungrua engkim mai chu a fai êm avangin in leh lo changkang tak a ni lo tihtheih rual zawng a ni lo ve. Nula khan ṭhutkhawmna pindanah a hruai lut a, Semi sofa simple leh changkang ru angreng deuh maiah hian nu kum 50-58 bawr vel tur a lo ṭhu a, a sam chu a tawiin a kir bawk, nu hmelṭha leh tlawntlai ṭha tak a ni. Tarmit a vuah a, "E! I lo thleng tawh maw? Lo ṭhu rawh. " A lo ti vat a. Inhmatawnin an ṭhu dun ran mai. Nu valai khan a kalsan zui ta bawk a. 

"Rinhluzuali tiraw? Khawi vengah nge in awm kha'h" Nu chuan a han ti tê tê a. 

"Tunah chuan Saron-ah kan khawsa" felfai takin a lo ti a. 

"Liansangi ka nia, Nu Sang tiin min ko mai dawn nia, tichuan, han inzawt ta zel ila, engtin nge kan koh ve che ang a, nau awm hna hi engtik aṭangin nge i thawh tawh tihte hriat ka duh hle mai." Nelawm tak hian a ti leh siam siam a, Nula khan tuisik a rawn chhawp a, mahse, Rinhluzuali chuan a in rih lem lo. 

"Koh danah kha chuan buaina ka nei lem lo, Hlute, Rini, Zuali tih hi min koh dan tlangpui a nia, in thu thu a ni mai. Chuan, nia, nau awm hna hi kum 3 ka thawhna tur a ni ve tawh a, nau pali chu ka awm ve tawh." A kut tin sih niap niap pah chuan a ti a, inrintawk loh hmel deuh anga lang siin a aw erawh a fiahfai em em lawi a. 

Pi Sangi chuan, "A nih chu mawle..a lawmawm e. Nau awmtu hi mi paruk kan la tawh a, thla 4 aia rei an thawk ngai meuh lo. Kan naua hi a khirh lulai êm mai a, chu chu lo hresa la ka duh a. I inhuam leh huam loh ni se la, hlawh erawh midang ai chuan kan pe tam thei chuan ka ring. " A ti leh mawlh mawlh a. Rinhluzuali chuan inthlahrun hmel lek lek hian, " Nautê chu i fa em ni?" A ti a. Pi Sangi chu a nui hawk hawk, "Ka tupa zawk mawle, Alexander Lalduhawma a nia, Alex tiin i ko dawn nia. Ka tupa neihchhun a ni." Duhthawh deuh hian a ti a. 

Nau awmtu mamawh a nih thu kha chanchinbu aṭangin a lo hmu ve a, a va bepawp ta thâwr kha a nia, midang dil ve an awm lo nge an lo dawngsawng ṭha phian a, hlawh nise midang aiin an tiṭha a, engvanga midang hian dil ve vak lo nge an nih tih a ngaihtuah a, a nau awm tur hi enkawl a harsa viau emaw an chhungkua hi hrawn an hrehawm viau emaw a ni thei. Tunah chuan pawisa a mamawh a, eng anga harsa pawh nise a thawh phawt chu a ngai a ni. Pi Sangi chuan, "A nih chuan kan inberem ni se la, naktuk aṭangin i rawn thawk thei ang chu tiraw?" A ti a. A harh zawk, "Aw le, ka lo tum ang. Ka nau awm tur chu tunah a awm lo em ni? Hmuh hmasak phawt te pawh a va châkawm ve.." a ti hliai a. 

Pi Sangi chuan, "Vawiin chu a incheck up ni a nia, an la rawn haw lawk loin ka ring. Ih, i lo thawh hmain kan chhungkaw chungchang te hriat i duh em?" Nelawm takin a ti leh a. 

"A remchan chuan ka lawm ngawt ang." A ti hap a. 

Pi Sangi chuan tui chu a han in khawlh khawlh phawt a. Chutah, "Englo a nia, ka pasal hian kum 5 kalta khan min boralsan tawh a, fanu pakhat leh fapa pakhat kan nei hman a. Ka fanu erawh tunah hian phaiah sumdawnna lam a khawih ve mêk a, ka fapa erawh chuan a pa hriatrengna atana kan din school a enkawl ve mêk a, kei hi chuan hnathawh ka nei lem lo, kan pa pension kha kan la la ve bawk a, hausa lê lû lo mah ila, a vantlang tawk chuan kan che ve thei ti mai ila, Tichuan, ka fapa Remsangzuala fapa chu a nia i nau awm tur chu. Tihian anni pafa bakah tuna kan hnathawk Vani te nen kan khawsa ve nawk nawk mai a ni. Vani hi a fel a, kei hi asthma natna nei ka ni a, min enkawltu ber a ni bawk a, nang i lo awm ve leh phei chuan kan phuisui sawt dawn tihna a nih chu.." a ti ta mawlh mawlh a. Rinhluzuali chuan, "Lângin ka lo kal dawn a ni lo'm ni?" A lo ti vat a. Pi Sangi chu a meng hnual deuh a, mahse, nui sâng chungin, "I remchan chuan min chenchilh thei la ka lawm ngawt ang. " A ti a. A chil a lo lem khawlh mai. A ṭhiante in luah a ṭawm ve tak ringawt, in te taktêa chêp zeta an khawsak dante a han ngaihtuah chuan inchenchilh chu a nuam zawk mah ang em aw a ti deuh a, mahse, duh awm deuha lan a duh bik lo. "Thla khat tal hun min pe la, thla khat chhung chu lângin ka rawn kal rih mai dawn em ni le? Kan la buai ve deuh a." A ti ta ringawt a. Buaina erawh a nei chuang hauh lo. Buaina awm thei erawh awlsam taka a ṭhiante kalsan kha a hreh ve a ni mai. Bakah thla khat tal enchhin ve phawt a duh, a nau enkawl tur hi a khirh viau a nih chuan bân a duh dawn a, tuna a ṭhiante a chhuahsan nghal chuan lêt lehna tur a nei dawn tlat lo. Pi Sangi pawh chuan a hrethiam ve nge, "Aw le, tehreng mai. Mamawhtu zawk kan ni a, kan ti lo thei lo alawm. Thla khat chhung chu zing dar 9-a lo thlen hman tum la, tlai lamah dar 5- thleng ni thei se. Zan lam chu a pa pawhin a vil ve thei mai ang chu. " A ti charh charh a. Rinhlui pawh a nui ve ta sen sen mai. Thingpui tui sial zet a in hnuah a tuk aṭanga nau awm hna thawk tur chuan Pi Sangi te in chu a chhuahsan ta a. 

Kum 2 liam taah khan lêt leh ta lawk ila..

Khawchhak lam thingtlang khaw pakhat Bungpui khuaah chuan thil dangdai angreng tak a thleng pek a! Bungpui hi khaw lian a ni lem lo va, in 100-120 awrh chauh an niawm e. Tin, an khua hi a pilril ve deuh bawk a, tu vak mahin an tlawhpawh ngai mang lo. A khaw mi hrim hrimte hi chhulkhat kual ni deuh reuh vek tihtheih an ni bawk a, a hma chuan khaw lian ve pangngai tak chu a ni ṭhin. Mahse, changkan zawkna beiseiin khaw lian zawk leh khawpui lamah te an pem lût ruih ruih a, a khaw tuiliak diktak bak an cheng ta meuh lo a ni. Khaw inlungrual tak erawh an ni thung a, an changkang lem lo va, School pawh Middle School thleng chauh a awm a ni. Lo neia eizawng an tam zawk a, an thlaite chu khawpui lamah an thawnchhuak ve ṭhin. Dawrkai pawh pathum chauh an awm a, kawngpui chuan a tlawhpawh ve naa, kawng a chhe lulai êm a, motor teivak a tam ngai lo. Chu khuaah chuan tleirawl ti ila, nula ti pawn a chhiar theih tawh ang chu. Kum 19 mi hian a hringtupa diktak a rawn zawng chhuak a, chu chu tunhma aṭanga la thleng ngai lo a nih avangin khaw mite tan chuan a mak viau mai. Chu nula lah chu an khaw nula dangte ang lo takin a tlawntlai ṭhain a ngo êm êm a, a sam pawh sen bik bik, mahse, a inhmeh viau lawi a! 5'4 ft bawr vel, a âwmbawr pawh lian ṭha ve tawk tak, a âwmbawr chawih tur taka mawngbawr vâwng lah mai a ni reuh a, hmai tung lam, mitmeng rum lam lek lek a ni a. An khaw sumo service awmchhun, ṭâwng tawh takah a rawn insawh thla ve nghawng nghawng mai a, midang chuang vete chuan an la hmuh ngai loh avangin a tirah an be ngam lawk lo. An khuaa zirtirtu tur emaw an ti deuh a, a tawpa tawpah driver chuan, "Mami, eng ti turin nge kan khuaah i rawn kal ve dawn?" Tiin a zawt ta tawp a. 

Nula chuan, "Ka pa ka rawn tlawh dawn a, ka pa chu Pu Thangliana Chenkual a ni a, i hria ang tiraw?" A lo ti ve vat a. A hmel erawh a nelawm em em loh. Pu Thanga te chu an khaw dawrkai pathum zinga pakhat niin mi zawng zawng hriat a ni. Ta ṭang chuan inkawm chhoin midang pawh chuan an be ve ngam ta chauh a, mahse, kawng a thui tham ve bawk nen, ani lah a chau deuh nge a muthlu zui ta mai a. An khua an thlen meuh chuan khua a thim ruai tawh. Pu Thanga bungrua a phurh tho avangin driver chuan a thlah ta nghal a,. Pu Thanga te nupain an bungrua chu an lo ngaihven a, nula an hmuh chuan mak an ti ve deuh niin a lang. Driver chuan, "Pu Thanga chu fanu i lo va nei hmelṭha ve" a lo ti lûng lûng a. Pu Thanga makti hmel a zual sauh lehnghal, nula lah a ding zûm reng bawk si. Patling ta na nâ na chuan, "Eng nge a awmzia? Mami" a ti ta phâwng a. 

"Ka pa, ka rawn zawng chhuak ve tawp che a ni e. Ka nu chu Dinpuii a ni a, tikhan i hre thei em?" Nula chuan a ti a. Pu Thanga nupui pawh a rawn lang nghal vat, "Dinpuii fanu maw i nih a?! A dam em? Khaw nge a awm?" Pu Thanga lah chuan a lo ti hû a. 

"Nakinah ka sawi thei zawk ang em?" Nula chuan ngenngâwl takin a lo ti a. Pa â a ni lo bawk a, "A ni dawn tak e, hawh lo lut phawt teh, Nu-i, bungrua kha chu Sawma te kha lo remtir mai rawh." Ti zui mawlh mawlhin in chhungah chuan an inzuilut ta a. Thingtlangah na nâ na chuan Pu Thanga te in chu a ṭha pawl tak a niawm e. A zau lah a zau, amaherawhchu, bungrua erawh a thawl deuh lam a ni, a kawrawng riau. Amah aia nau hlek tur tleirawl leh mipa naupang pahnih an lo awm a, a pa fate an nih a ring thiam nghal. An han ṭhu fel a, Pu Thanga nupui pawh a rawn ṭhu ve, Pu Thanga chu pa thau lam, dul pawh kiar lam deuh a ni a, pa hmaitluak ṭha tak erawh a ni. A nupui erawh cher zawr ve deuh tak, meng thîp lam lek lek a ni thung a, nupa inhmeh tak chu an ni lo. 

"Thil awmzia min han hrilh teh le.." zaidam taka a pain a tih chuan a hnuk a ulh deuh. Midang lah chuan an lo en ṭhap bawk si, a nu hmel mitthla chungin, "Ih, ka nuin i bula kal tur hian min ti a, chuvanga rawn kal ka ni. Tumah chhungte dang ka nei si lo va, ka nu khan a boral dawn hnaihah i chanchin leh i awmna te min hrilh a,." A tih lai mêkin, "A boral a! Dinpuii a boral a maw? Engvangin?" A pa chuan a lo ti nghek a. Mak tihna hlirin a khat bawk. 

"Aw, thla khat kalta khan a boral tawh a ni." A ti chuai raih a. Pu Thanga chuan insûm tum tak hian, "Eng nge a thih chhan?" A lo ti a, "A pumpui a cancer a.." a insût faih a. Chhuat lam chu a melh tlawk tlawk, Pu Thanga nupui chuan a tuar ta lo nge, "Eng nge thil awmzia hi? Pa-a, he nau hi tu nge? I eng nge a nih?" Vin lek lek hian a ti ta a. 

"Mawii, hei hi ka fanu, ka fa hmasa a nih hi..a nu a boral avangin kei a pa hi min rawn zawng chhuak a ni. " Pu Thanga chuan a lo ti nghet charh a. Mawii chu a tûm nghal hmak mai. 

"Mate, tu nge i hming ni reng reng? I nu boral chu a va pawi tak êm" Pu Thanga chuan a ti zui zat a, Nula chu muangchânga rawn hawichhuakin a pa melh chung chuan, "Ka hming chu RINHLUZUALI a ni e,." A ti zawi raih a. 

Pi Sangi te in a chhuahsan hnu chuan Rinhluzuali pawn an in luah lam a pan zui nghal a. A thlen chuan a ṭhiante pawh an lo la haw lo, la hma deuh tho mah se; eirawng a bâwl ṭan a, a hna hmuh thar chu a ngaihtuah pah neuh neuh bawk. Pi Sangi bulah khan dawt a sawi chiang, nau hi vawikhatmah a la awm lo hrim hrim ! Mahse, mi inah lâng chuan hna a thawhsak ṭhin. An la duh lo mai ang tih a hlauh avangin dawt a sawi ta mai a ni. A chhan chu pawisa a mamawh a, hna a neih ve ngei a ngai, kar hnih kalta khan a hnathawhna ten an bân miau a! A chhan pawh an nula rangkachak ṭhi a ruksak vang a ni. A hma pawn tlereuh bakah a pite pawisa tam vak lo ruk zauh zauh a ching a, an hre lo hlauh zel a. A la him zel zawk a, mahse, an nula rangkachak ṭhi a ru lai kha an driver-in a lo hmu si! A hmaa thil bo zeuh zeuh te an han sawi chho a, amah an kawk vek lo thei tawh si lo, ama ruk vek a ni miau mai bawk si a, an hnawtchhuak ta nghal a ni. Mahse, hnawhchhuah a ni kha pawi a ti tehchiam lo, Police lama an zualko lo kha mak a lo ti zawk a. Dik tak chuan a chungah khan an sual ve êm bawk a, an tawrhhlelhawm a ni tawp mai. A thawh chhung zawng khan a thlawnin vawikhatmah eitur an pe lo, a hlawhah an cut zel ṭhin,. Chutah a thil tihfai tawh sa te hi an han tibal nawn kher zel a! An nu ber lahin a ṭhu mai mai a hmu thei lo, tirhna tur a zawng reng a, mawng kha a hûng hman meuh lo. Pa ber eiruk zar zova inla milian an ni a, an fate lahin an hmusit si, an room a tihfaisak chang pawn kutkawr an buntir kher zel. Chuvang chuan khatianga a lo rawk ve zauh zauh kha an phutawk chauhah a ngai ve. Mahse, a hlawh hmuh vena ber a tawp tak si-ah chuan hna a zawn vat a ngai tlat. Mamawh a nei ve reng bawk si a, a ṭhiante lah an hlawh a tam bik si lo, in luah man ringawt pawh an buai ṭhin kha a nia, ei leh in tur a lo ngai ve zel nen. Kar hnih zet thawhchhuah nei lo va a han awm takah phei chuan a ṭhiante ngei pawn mitmei ṭha an hmuh ngai ta meuh lo, an eitur siamsakin in chhung tifel mah se; a pawisa ber phawrh tur a neih loh miau avangin a lam hawiin an nui khât tial tial tawh si. Mahse le, kha..vawiinah midang zawng aia hlawh ṭhatna hmunah hnathawk tura lak thar a ni tawh a. A ṭhiante pawn an kawm ve leh duh tawh ang chu. A ṭhiante kan han ti ngawt a, a hmelhriatte an ni zawk mah e. Chutianga inhnimhnai tak pawh an ni lo, an intawn dan leh an bula a chen ve ngawt dan hre tur chuan kum 2 hmalama kan lêt leh lawk kha a ngai tlat. Lêt leh lawk mai ang aw. 

Khatia Bungpui khuaa Rinhluzuali'n a pa a zawnchhuah takah khan khawtlang titi a tling nghal a, driver lah khan thu a lo uar vei phian a! Pi Mawii'n a ngeih lo nghal niawm taka sawi thawmte pawh a awm nghal, ani lah a thleng ve chauh a ni si a. Pu Thangliana hi Kohhran Upa ni lai mêk a nih bakah VCP te pawh lo ni hrep tawh a ni a. Kohhran upa a nih takah chuan politics lam chu a bansan ta kha a nia. An khuaah chuan pa zahawm leh challang, mi râwnkai tak a ni ve a, ṭhenawm khawvengte pawhin tluk luh nana an hman ve fô a ni a, pa ṭha leh zaidam thluam a nih bakah a thilphal a, hetia dawr siama an han awm theih tak hnuah phei chuan a rukin mi rethei leh chanhaite hi a ṭanpui fô ṭhin. A nupui hian thlawp ngat phei se chuan an khuaah na nâ na chuan vawk lal len thei tur an ni a, Pi Mawii hi an pa letling chiah a ni a, mi duhâm leh midangte hnuaichhiah ru deuh a ni, an pa zara lang mawia nu zahawm awma awm ve mai mai a ni bawk. Chutianga an khaw pa lar Pu Thangliana fanu a rawn zin takah chuan khawtlang titi an tling lo thei lo a ni. Rinhlui pawh an hnenah chuan a khawsazui ve ta poh a, Muthmunah a pa leh a nuhrawnte an inhnial bap bap tih hre miah lovin a zan khatna chu tui takin a muhil ta siai siai a. Chutiang chuan kar khat dawn chu a awm ve ta a, a nuhrawn mitmeng râng hmu zeuh zeuh mah se; a pa berin a duat ve viau avang chuan a awm lui ve tlat mai a ni. Pu Thangliana chuan khawlai fa a lo nei reng tih khawtlangin an hriat hnuah pawh an hmuhdan leh ngaihdan a danglam phah chuang lo. Mahse, chutiang chen chen a lo inthup thei chu mak an ti ve deuh. Kum 19 kal taah khan Pu Thanga pawh tlangval fel leh hawiharh tak a ni a, chutihlai chuan khawpuiah sum thawkchhuak ve turin a pa farnu a nî te hnenah a khawsa ve a, zirna lamah thleng sang viau lo mah se; amah tlangval taima leh ruihhlo ti lo a lo ni bawk a, mi chhawr duhzawng tak a ni bawk a, a indaih lo lam zawk a ni. In sakna lamah a inhlawh ve thin a, a thawhchhuah ang ang pawh a chhungte hnenah a thawn ve ṭhin. A nîte chhungkua an felin an enhrang lo bawk a, anî phei chuan nupui a neih pawn khawpuia inbengbel turin a ti fô ṭhin. Ani pawn Thingtlang a ngaihnep vang ni loin khawpuiah chuan eizawnna a lo awlsam ve bawk nen, nupui chhia ṭha a hmu ve te a nih phawt chuan anî thu zawm pawh chu a tum ve reng. An khaw lamah an khawsak a harsa em em lo bawk nen. Chutianga in saknaa a inhlawh kual tak fô-ah chuan a nuna hmun thûk ber chang tawh tur hmeichhia a tawng ta a ni. An in sakna te fanu Dinpuii nen chuan an inmitmei ta fô a, Dinpuii chu hmeichhe nunnêm leh zawiawi tak, hmelṭha tak mai a ni a. A la naupang ve deuh bawk a, Thangliana laka a rilru pawh a phawrh ngam ve ngai lo, an rawn inhlawh changa an mit leh mit a intâwn chânga an ṭêk chhawk zel chu an zan mut tituitu a tling ṭhin. Dinpuii pa chu an veng chhungah na nâ na chuan sum ngah leh neinunga sawi a ni ve a, vengchhung mite pawhin an chung en an ni. Dinhmun inthlau tak mah nise; Dinpuii leh Thangliana te chu hmangaihna khurah an lo tlu lut dun ta si a, dinhmunin a sawi nghin rual loh hmangaihna chuan a phuar dun ve tlat si. Dinpuii chhung ten an hriat chuan Thangliana chu hnathawk aṭangin an bân nghal hmak a, Dinpuii lah pawn chhuah an khapsak bawk. Mahse, hmangaihna hi chuan thil a tithei viau te pawh a nia nge, engtin tin emaw inhmuh rûk dan tur an hre ve leh zel a, Dinpuii ṭhiannu Matluangi zarah an inhmu ru ta fô a, doral kara inhmu fô nafam chu inven zawh loh chin neiin an chesual ta fô a. Dinpuii chhungten an la inhmu ṭhin tih an hriat takah chuan, Dinpuii chu an chhungte bul Shillongah an dahthla ta hmak mai. Lungleng reng renga hun an hman dun lai remchanga hmangin Dinpuii chuan midang a neih tawh thu vawrhdarhin Thangliana thinlung chu an tikehsawm ta a ni. Chutiang a nih takah chuan Aizawla awm reng pawh chu nuam a ti ta lo va, beidawng takin an khaw lamah a ṭul ṭul thawk turin a haw ta kha a nia, a haw aṭanga thla 2 hnu lekah a pain a boralsan zui a! Vanduaina pawh hi a hlawm hlawm hian a lo thleng ṭhin si a. Hetihlai mek hian Dinpuii pawh dinhmun hrehawm takah a lo ding ve mek bawk. 

Nau a pai tih a chhungten an han hre zet chu an alh lo chauh a ni. Tihtlaksak an tum a, amahin a duh bik si lo, Kut pawh an thlak nasa. A kawtawpa ṭang tih takah a rilru hneh thei hek lo le.."I khawlai fa nen chuan kan chhungkaw mi leh sa in ni ve thei tawh lo e.".tiin an tuithlar ta hial a! Dinpuii chu a vakvai ta, an chhungte dang reng rengin uire melh takin an melh tawh si. Awmna tur nei ta lo nafam chu home pakhatah a tlulut ta tawp a, chutah chuan a nau neih thleng a awm ve ta ngawt a ni. Rinhluzuali'n thla 3 a tling tihin a pa Thangliana chuan nupui neiin a nupui chuan an fa thla 6 mi a pai ve mêk bawk. Thil a kal sual zui zel mai chu a ni. Pawi ta ber chu Dinpuii'n hnawhchhuah a nih tirha Thanga nî te a lo pan lo kha a ni. Home aṭanga an chhuaha an nufaa khawvel an hmachhawn tak hnu daihah Thanga nî fanu nen an inhmu a, tah chuan Thanga'n fanu a nei tih an hre ve ta chauh a ni. Thangliana'n nupui a nei tawh tih Dinpuii'n a hriat takah chuan fanu a nei tih pawh hrilh lo law law turin a ngen a ni. Mahse, Rinhlui'n kum 16 a tlin tawh hnuah Pu Thanga hian fanu a nei tih a hre ta tho. Dinpuii biakpawh ngaihna a hre bawk si lo, a rawn zin chang te hian a zawng ru nasa ṭhin. Dinpuii chhungte lah zawh chi a ni bawk si lo. Rilru nuam lo leh mawlhtu nei reng rengin a hun a hmang chho ta a ni. Chhungkua dina eizawnna kawng zawha theihtawp a chhuah laiin Dinpuii te nufa pawn damkhawchhuah an lo tum ve ngat ngat a, Rinhluzuali hian retheihna hi eng nge a awmzia a hrechiang khawp mai. Anu nen mi in hnuai chep zetah khawsa vein, mutna leh choka a inzawm nghal a, inleng pawh an nei ngai lo. Nitin Dinpuii chu mi in tifaiin hnathawkin a chhuak a, a fanu zirna senso tur tuakin a vanglai hun zawng zawng a hmangral tihtheih a ni. Amah a hmelchhe lo bawk a, nupui atana iai lo fe fe pawh a tawng ve fô, mahse, a thinlungah mipa pakhat bak an awm thei lo. Tin, a fanu chu a damchhan a ni mai a, a fanu puitlin hun chu a nghahhlelh ber a ni. Chutianga an tei ve rek rek chhung chuan kum pawh a lo vei ve zel a, Vanneihthlak takin Dinpuii chuan an in luahna te sawipuina azarah 4th grade hna a hmu ve hlawl mai, an va lawm nufa tak. Thla bi hlawh han neih ve takah chuan an dinhmun pawn kan lam a pan ve ta a, Rinhlui zirna senso pawh rilru hahdam takin a thawkchhuak ve thei ta. An nufain an inkawmngeih bawk a, Dinpuii lah a han intuaifai chho nen, nufa pawh an ang lo, midang an mamawh vak lo tihtheih a ni. Mahse, vanneihna hian rei a lo daih reng thei bik lo va, Rinhluzuali'n College a rap ve ṭan chiah tihin Dinpuii chuan a pum lam a sawisel chho ṭan a, nufa maia khawsa an ni bawk a, an inngaihtuah nufa ṭhin hle. Damdawi te eiin han dam chang nei mah se; a nâ a rawn chhuak zing tulh tulh a, loh theih lohin doctor an va hmu ta a ni. Damdawi a chawh a, an ngaih a ṭha chho viau, mahse, kar lovah a kulcho chho titih ta tlat mai a. Damdawi inah a awm a ngai ta hial mai, an nufaa an awm hran aṭang khan vawikhatmah damdawi inah an la lut lo va, vannei an intih tehlul nen. Pi Dinpuii damdawi in han lut lah chuan thu lungchhiatthlak tawpkhawk a hre ta si a! A pumpui a lo cancer reng tih chu. An dinhmun lah a harsa ve si, chemotherapy han la tur pawhin puk chawp takmeuh a ngai a. Mahse, an in luahna te hi an felin an lainat nufa ve êm mai a, a chemo khaina pawh a chanve an tumsak ve zel a ni. A nitêlin a chau telh telh a, chemo pawh khai tawh lo mai turin doctor ten an ti ta kha a nia,. In lamah an han inenkawl chho a, Rinhlui pawn college chu a chawlhsan ta hmiah mai. An inenkawl nufa nitin takah chuan, Rinhlui zawhna fô ṭhin, "Tu nge ka pa? Khaw nge a awm?" Tihte chu Pi Dinpuii chuan a hrilh chho ṭan ta a, ama chhungte, a nu leh pa leh a unaute chanchin thlengin a hrilh a, A pa Thangliana mizia leh hmelhmang te a sawi lai chuan hlim hmel a pu ṭhin. "Kal mai tur ka ni a, ka lo kal ta a nih chuan, kan bungrua neih ang angte hi i tiral vek ang a, i pate khuaah kalin i pa i va zawngchhuak dawn nia, min hmangaihtu a ni a, nang pawh a hmangaih em em ang che. " Tiin a chah lâwk thlap a ni. Rinhlui hi a kum anga en chi a ni lo va, nufa chauha khawsa leh a nu awm loh hlana khawsak lo rêltu ber a nih avang hian a rilru a puitling riau a, a nu thuchah te pawh uluk takin a vawng ṭha tlat a ni. A nu lo chu laichin a nei lo tih a hriat avangin a pa pawh zawnchhuah ngei a tum ruh tlat bawk. Tichuan, Pi Dinpuii chuan kum naupangtêin a fanu, a hmangaih em em chu kalsanin khawvel a chhuahsan ta a. A lo sun lâwk nasa tawh bawk a, Rinhlui chuan rin ai takin a tuarthiam reuh. Hmabak kô tak a nei bawk nen. A nu thuchah ang khan an in leng te an ṭin zo ta maw tihah an bungraw neih hlu ve deuh te chu a hralh ta a, a nu khan a account ami a pawisa te kha ama ac-ah a lo transfer vek tawh bawk a, sum lamah chuan a phâng em em rih lo. An in luahna te pawh an ina khawsa ve mai turin an ti a, mahse, laichin pakhat a la nei ve a, chu chu hmuh ve phawt a duh a ni. A nu sulhnu leh bungrua te erawh a tiral phal lo va, a kalna hmun apiangah a keng tel ve zel mai a ni. Tichuan, Amah hringtu a pa hmachhawn turin Bungpui khua chu a pan ve ta râwih kha a ni a, a pa a hmuh rual khan mak takin a thinlungah ngainatna leh thlamuanna a nei nghal hmiah a, a pa lahin lawm takin a lo pawm thlap bawk si. A la khawsak ngai reng reng lohna Thingtlang khuaa a hringnun hmang turin thutlukna pawh a siam ta nghe nghe a nih kha..

Mahse, Bungpuiah thla khat zen zawn a awm tih vel aṭangin harsatna a tawk chho ṭan a, hmelhriatte pawh nei ve ṭan tawhin ṭhiante pawh a nei ve nual tawh. Thingtlang nula tlangvalte chu khawpui ṭhalaite aiin ngainata pawh an awl zawkin a hre ṭhin, anni chu an nih ang angin an lang ngam a, an taimain engmah an thawk hreh si lo, zirna lamah sang lua lo mah se; an phak tawkah an lungawiin midang ṭanpui an peih em em a. Chhiat ṭhatah an tlawmngaiin an rintlak em em bawk. Chungte avang chuan nuam pawh a tih phah ve em em a, anni chu an khawsa thei deuh bawk a, dawr a nghak deuh ber ṭhin. A pa fa a unau te kha an upa ber kha Hruaii a ni a, a nau chiah mipa hi Mama an ti mai a, an tê ber erawh Tete tiin an ko mai zel. A tirah an hrang deuh hû naa chenho reng takah chuan an innel chho a, Tetea hi an khaw ṭhenawmah pawl 10 zirin a nuteii te inah a va awm ṭhin a, chawlhni hmangin a rawn haw ṭhin. Hruaii leh Mama te erawh pawl 12 an fail ve ve hnuah zirna an chawlhsan tawh. Hruaii nen hian an inthlau lo bawk a, inkawm rual an ni bawk nen, khawi ilo chhuahah pawh an inzui ve ral ral zel. Pi Mawii pawh "Nu" tiin a ko ve thlap. Zan khat an zanriah ei laiin an kawmthlang tlangval Zira hi a rawn lut a, "Hlute, zanin chu hla zir ang u aw. Ka rawn sawm ang che u.." a ti a. "Nia, Hruai, i thei ang tiraw?" Tiin a nau chu a va melh zauh a. 

"A thei lo, ani chu. Apuia a rawn haw a, a rawn leng dawn." A nu chuan a lo tihsak hmak a. Dik tak chuan hetiang a thlen hma pawh hian Pi Mawii hian biak thatin a be ṭha vak ngai lo. A koh phei chu a la ko miah lo, a mawl biak tawp zel. An pa nen pawh an inhnial phah nasa ṭhin viau, Pu Thanga hi ama tawka thuduh leh patling ve tak a nih avangin Pi Mawii hian a hlau êm zawk a, chet a la lo mai mai zawk a ni. Rinhlui pawh a ngawi zui ta daih a, Apuia an tih chu Middle school Headmaster fapa a ni a, anni hi an khuaa awmthei ber an ni. Hruaii bialpa ti ila, Pi Mawii hian a tihpui a ni ber ang chu, chutianga inlaichinna tak tak va nei ang pawn an awm hran lo. 

Tin, thil pakhat a lakah Hruaii hi sual viauin lang lo mah se; in chhungah a intilal thiam em em a, a nu hian a fuihpawrh emaw tih mai tur a ni. In chhung chet ngai zawng zawng hi Rinhlui kutah a dah vek tawp a, an chaw eina thleng seng leh sil takngial pawh a tihpui ngai lo. Pu Thanga pawn chu chu a hai lo va, mahse, Rinhlui a â lo va, "Pa, engmah sawi suh, i fanu a ni a, ka nau a ni bawk a. Ka âwl ve tur a nia lawm. Engmah ka tih loh chuan ka inthlahrung zawk ang" a tih tlat avangin a zilhhau lo mai mai zawk a ni. Primary schoolah Hruaii hi mi âi a kal ve bawk nen, hah a inti ve te pawh a nia nge. Chumizan pawh chuan aman engkim a sengfela a phiahfai leh vek avangin a thleng sil laiin Zira chuan a rawn sawm a. A laklawh nen Zira pawh chuan a lo nghak a. A sil zo, a kut a hruk hul lai takin Apuia leh a ṭhianpa Ruata te an rawn lut ve a,. Pi Mawii chu a parh hârh mai. Ṭhuthmun an rem a, Apuia chuan Rinhlui chu a en duh angreng hle. Rinhlui erawh chuan Pi Mawii mitmei a ven avangin insiam turin pindanah a luhsan ta a. Apuia chuan Hruaii bulah, "Kha kha mi i û chu?" A ti a. Hruaii pawn a nih thu a lo hrilh ve mai a, pi Mawii rawn inrawlh vatin thudang an sawi ta a. Zira nen Rinhlui pawh inzuichhuakin an chhuak chiah tihah Pi Mawii ta pek chuan, "Zira hian a thlang thiam khawp alawm, kan sawirem vat turah ngai ang" a ti ta mai a! Pu Thanga a lo rum nghut mai. Apuia'n Rinhlui zawk a lo hmelduh ang tih a hlauh vanga intlawhkhalh lâwk a ni tih a chiang reng. Khami zan aṭang khan Apuia pawh a rawn leng zantin a, ani hi Bangalore-a zirna avanga awm, chawlh rawn hmang a ni. Chuvanga Pi Mawii pawn a fanu tan lo hauh em em a ni. Apuia'n a biak ve zauh zauh takah chuan Rinhlui pawn ṭha takin a lo chhang ve mai zel a, engtin nge a number a lo neih pawh a hre lo, a rawn be ta fô mai. Mahse, inngaihzawnna lam erawh a sawi lem bik lo. A hriat loh karin Rinhlui pawn a ngaina chho ve ṭan a, amah hi mipa kawm chi, a ṭhianteah pawh mipa an tam zawk reng reng a. A tirah phei kha chuan hmeichhe ṭhenkhatte ei loh kha a hlawh phah hial a, mahse, a rei a, a mize tlang tak leh nu vak lo avang chuan ngaiah an nei chho a, an nêl phah ta daih zawk kha a nia. Apuia pawh a mipa ṭhiante ang bawkin a en ti mai ang, mahse, Apuia zawk chuan a vei chho tlat mai si. An ina a len changa Rinhlui a mut daihte hian a hnual a, a lengrei ngai lo. Chawngkawr mita meng ta rân Pi Mawii chuan boruak kal vel dan chu a lo hai lo nasa mai a, awmhmunah a insawh a insawh mai ṭhin. An pa bula sawi chi lah a ni mang si lo, Rinhlui chungah a ṭuan chho a, ṭawngkam mei nei tak taka ṭawngkhum a ching chho ta. Hruaii pawn Apuia hi a duh em avangin a û chu a ngaithei lo chho ta hle. Mahse, vanneih asiamin Apuia chawlh hun a tawp a, a awm loh takah chuan boruak a ziaawm leh ta deuh. Tin, chutihrualin Middle school-a thawk pakhat khan training a neih dawn avangin Rinhlui chu qualified chiah lo mah se; an khuaah amah aia chhawr tlak, khaw chhunga awm an awm miau si lo va, a ai kal turin a rawn ngen ta chawt mai. Pi Mawii chuan lo hnial tum sateh mah se; Pu Thanga'n, "A va lawmawm dawn ve, kal hlauh teh tak se..a rei dawn chuang hleinem" a lo ti thên a. Rinhlui pawh chu nitin school a kal ve ta a ni. Khawpuia zirchhuak, a nuin thi leh thau pawlha zirna ṭhaa a luhtir hram hram kha a ni bawk a, a han kal ve aṭang chuan English-ah naupangho chuan hma an sawn ta em em mai a, Apuia pa, an Headmaster Pu Lawma pawh a lawm kher mai. Rinhlui chuan fakna a dawng nasa a, amah a nungchang leh ziaah sêl tur a awm hran bawk si lo, mi ngainat leh lawm a hlawh ta viau mai a. Chungte chuan Pi Mawii thin a tirimin lungawi hmel a pu hleithei ngai lo, Rinhlui chu a thîk a ni ber mai. Han tih vak ngaihna a hre bawk si lo va, Rinhlui chu a haw takzet a ni. 

Bungpui khuaah kum khat zet a awm ve ta a. Hunpui pawh hlim takin a hmang ve a, Apuia kha chawlh a neih theih loh avangin hunpuiah a rawn haw lo va, a lawmawm daih zawk. Buaina a tam mai mai. Kum a lo thar a, mahse, Rinhlui tan chu kum chu kum chhiat kum a ni dawn ta reng mai..