Nau awmtu 6

NAU AWMTU..(6)

Ziaktu : Toni Râlte

A insiam zo thawkhat tih âwm velah kawngka an rawn kik a, Dami'n a va hawng ta vat a, Remsangzuala chu a lo ding rûn mai. "Hlupuii chu a inpeih tawh em?" A ti sup a. Amah chauh hian 'Hlupui' tiin a la ko. Dami chuan a ko ta vat a, a va chhuak a; Miriami lai lutuk leh phur bawk si chu a nuihzatthlak tawp. Hluzuali chuan, "Ka hman reng mai "a ti a, "Khawi i bag kha" tih leh laksak a rual a, a khaisak ta a. A ṭhiante bulah, "Kan phei phawt ang. Muttui u aw" tiin kawngka chu a khar a, step chu an zawh chho ta a. An inbe mang lo. Car-a an luh hnuah, "Engtin chiah nge Alexa chu a awm a?" A ti sap a. 

"A mu duh lo tawp, jection kan tumin a tâl nasa sia, vih sual kan hlau bawk si, 'Ateii awm se aw' a ti sek a, ka nu mangangin min rawn tir a nih hi.." a ti duah a. 

"A va zia lo ve aw. " A ti ve ringawt. 

"I chhungte nen in awm turah ka lo ngai a." Sangzuala chuan a ti nghut a, "Ni lo ve" a ti mai a. Hmalam a bih ngar mai. 

"Zawh chian i hlauh hmel êm mai, ka zawt lo mai ang che. " Tiin Sangzuala chu a nui huk a. Hluzuali pawh chuan, "A ṭha lawm" a lo ti ve hmak. A uap leh rûn tawh avangin a thaw a veng lo va, thlen vat vat a châk tawh kher mai. A tlan muang lem lo bawk a, in pawh chu an thleng ve ta mai. An luh chuan in hnuai chu a lo reh ṭhap, in chungah an inzui chho thoh thoh a, Alexa leh a pa pindan inkara ṭhutkhawmna pindan zau lo takah chuan Pi Sangi te pitu leh Vani te chu an lo ṭhu a. Pi Sangi'n a hmuh rual chuan, "I lo kal thei maw? Kan va lawm tak. Hei a ngai tlat che a nih hi.." inthlahrun hmel deuh hian a lo ti sawk sawk a. Alexa bulah ṭhu thatin, "Engtin chiah nge i lo awm a?" Dam deuh hian a ti a. 

Amah ang lo takin a kut pahnih chu a mal leh mal inkarah a rawlh thân a, naupang thuawih deuh a ang. "Number insawi siak leh ang. " A ti ta daih a, midang chuan a ngaihna an lo hre lo viau. "Tehreng mai, hawh, i pindanah phei ila".tih leh Hluzuali chu din a rual a. Alexa pawh a ding ve vat,. Midang lo awm vete bulah chuan, "Ka va mutpui ang e. Nangni pawh mu r'u,. A muhil mai ang" a ti a. Pi Sangi chuan, "I mut hran duh chuan pindan chu i hriat tawh kha aw. A lawmawm e, tirawh Vani, i mu tawh ang. Mama, lo ngaihven deuh la aw.." a ti zung zung a, an chhuksan ta a. Sangzuala chu a la ṭhu khawmuang a, Hluzuali chuan, "Nang pawh mu rawh, a tlai tawh hi" a ti ve ngial a. 

"Aw mu phawt rawh u" a lo ti dam thlup. Alexa nen chuan a pindanah inzui lutin khumah chuan an mu dun a, Hluzuali chuan, "Sawi hmasa rawh le.." a ti a. Alexa chuan, "100, 99, 98…" tia chhiar ṭanin a chhiar thui ta zêk a, a mut a la chhuak lo hrim hrim niin a lang. A sawi chhuak ta parh mai. Mahse, Hluzuali chu a beidawng lem lo,. A phone a la a, you tube-a mi thawnthu a play ta a. A sawituin a thiam bawk a, amah zawk zawk chu a mut a chhuak ṭan der, Alexa lam a va hawi chuan a lo muhil reng tawh mai a, kalsan hlau niawm takin Hluzuali zakhnuai aṭang chuan a bân a rawn vuan ṭât mai. Chutiang na nâ na chu Hluzuali pawn kalsan a tum bik lo. An thil ngaihthlak lai chu a off a, Apuia msg a lo awm dul tawh. "Min mutsan em ni? I nau awm nge pawimawh zawk keimah?" Tih te a ni nawk mai. Thikthu a rawn pe chhe ṭan viau,. Hluzuali chuan bengdaih tum takin, "Ka nau awm hi naupang naran a ni lo alawm, ka hrilh tawh che kha. Hei a muhil chiah. Muhil tawh la, a tlai tawh hi.." a va ti a. 

"Min be peih tawh lo a nih kha. A ṭha alawm. Mangṭha le, nau chauh lo pawh i awm tel a nih kha." A rawn ti deuh hmak hmak mai. Hluzuali nuih a za deuh, mahse, Apuia chu dam ṭha pangngai a ni bawk si lo va, a thikthu chhia pawh a hrethiam deuh reng. 

"I mak ṭhin mang e, aw le, muttui le. Ka mut a chhuak tawh sia." Tiin a reply a, a phone a hmet thim a, Alexa lam hawia saisirin a chhing ta vang vang a. 

Tukverh darthlalang aṭang chuan pawnlam a lo thlir vung vung a, ruah leh thli lah chu a nasain ruah mal pawh a lian kher mai. "Eng nge i thlir?" Tiin a darah a va hmer a, amah pawh rawn en lo hian, "Ka ṭhiannu saw tanpui rawh, Ate.." tiin pawnlam ruahsur leh thli tleh vur vurna lam chu a kawk vû a, a va thlir ve chuan tumah a hmu bawk si lo. "Tumah an awm loh saw" a ti a, "A din reng saw, saw kal turin min ti, ka kal dawn" tih leh tal phut a rual a, tukverh chu hawn tumin a bei nghal. Hluzuali chuan a lo chelh vat a, a tal nasa ngang mai. 

"Ate..Ate..a na a nia" tih thawmah a meng ta kâwk a. A mumang lek chu lo niin. Alexa'n a rawn kuahna bân chu a lo chelhsak chu niin, a chelh nghehsak lutuk chu Alexa a harh phah ta a nih hmel. Zing dar 2 leh 46 mins a ri chiah. Thophang zet hian, "Muhil leh rawh..Bawihte" tih pahin a sam kir chiat chu a zutsak heuh heuh a, A rilru a hah ruk tehreng nen, Alexa chu kar lovah a muhil leh ta thuai a. A lawm ru hle. A mumang kha chu a ngaihtuah zui peih lo,. A phone pawh a en tawh chuang lo. A harh leh meuh chuan khua a lo var tawh a, dar 7 a lo ri lek lek tawh. Alexa pawh chu amah kuah chial chungin a lo la hnâr sûk sûk mai. Tihharh a hlauh avangin a chechâng duh lawk lo va, mahse, a zun a chhuah turu tawh êm avangin dimtêa a kut chu dahthlain a thawhsan ta a. 

In hnuaia a zu chhuk chuan a beisei loh deuhin Remsangzuala'n eitur a lo siam sûrh sûrh a, a rimtui leh hle. A rawn hmuh chuan, "Morning, i tho nuam em?" A lo ti var mai. 

"Morning, nuam a ni mai, nang zawk?" Pangngai tak hian a ti ve a. 

"Aw nuam e. Ka fapa chu a la harh na nge?" A ti a. 

"Aw, a la mutui lutuk" a tih chuan, "I ropui e" a ti sup. Hluzuali chuan a ngaihna hre vak lo hian a va melh kâwk a, nui chungin, "Theihnghilh daih rawh" a lo ti. 

In chunga a chhoh leh chuan Alexa pawh khumah a lo ṭhu ngui bûr mai a, a melh ngai a lo melh vung vung. "I lo harh tawh maw..intifai rawh aw..hawh le." Tiin khum aṭang chuan a chhuktir a, a hmaite phihsakin a inthiartir thlap hnuah a thawmhnaw a thlak a, tukṭhuan ei turin in hnuaiah an chhuk ta a. A pa eisiam rim chuan a ril a tiṭâm ni ngei tur a ni. "Ate, ka ril a ṭâm" a ti deuh sek mai. Pi Sangte hman hnuah tukṭhuan chu an ei ta a. Sangzuala artui kan leh bawngsa roast bakah Vani anṭam tlak te chuan ṭâm a hnem ve khawp mai. Hluzuali pawn a ei ve ṭeuh mai. Alexa lah a ṭâm tawh bawk a, a ei nasa tân tân hle. " Ei ṭeuh rawh, i ṭhang uak uak dawn alawm." A pa chuan a ti sauh sauh a. An han eikham an insengfel lai chuan, Vani'n, "Lo awm law law tawh mai rawh, i lo awm ve hian a nuam zual" a ti sar sar a. 

"Nia, awm ve ṭêp ang, kan la laklawh ve lutuk a." A tih laiin Sangzuala tui rawn in chuan, "In luah man velah in laklawh kual nge? Buaina a awm chuan sawi hreh suh. Ka fapa hian a mamawh che asin" a lo ti hniam ruih a. Hluzuali hmun phiat lai pawh a tawp chawt. A dik a dik chuan hlawh a neih veleha a ṭhiante chhuahsan kha a hreh mai chauh a nia, in luah man 1500 hi 500 ṭheuin an intum sen a, mess fee atan 1000 ṭheuh an thawh leh bawk. An tlak loh chuan an thawh belh leh mai a, tunah tak chuan a ṭhiante pawisa ringin a la awm tihna a ni. Chung zawng zawng han sawi chu a hreh ve deuh si, "Aa..tun thla chauh chu min hrethiam hram mai rawh u. Ka inchingfel ang a, ka rawn awm ang" huaisen chhuahin a ti ta chawt a. 

"Nia, i thu thu le. Eng emaw buai rukna riau i neih chuan ka nu a awm a, i hrilh zel dawn nia." Hrethiam takin Sangzuala pawh chuan a lo ti ve a. A hahdam huai mai. A phone a rawn rik takah chuan an sawi zawm ta lo, Apuia a lo ni a. 

"I thawh phat aṭangin i buai nghal char char a ni maw? " Ti el lek lek hian a rawn ti a. 

"A ni mai ang chu" a ti ringawt. 

"Min ngaihsak loh chu thuhran, i rilruah hian hmun ka chang tawh lo niin ka hria." A rawn ti hluk hluk a, a lung chu a awi chiah lo a ni. 

"Chupawh a ni lo, ka buai em alawm,.ka hnathawh chu i hriat kha" a ti niah niah a. 

"Hlute, i rilru diktak sawi rawh. Min hmangaihna te kha a bo vek tawh em ni? Kan inṭhen chhung khan midang i lo nei hman zawk nge? Ka thinlungah hian hriatna a awm.." a rawn ti ta nge nge a. Hluzuali pawh balcony lamah a chhuak ta daih, a rilru a buai ru ta hle mai. 

"I ngaihdan mai mai a nih chu" a'n ti ngial a. 

"Ka ngaihdan hi a dik lo tih i sawi chuang hleinem" a rawn ti ta khauh mai. 

"I lo zin hunah kan sawi ṭha dawn nia" a ti sap a, hmaichhana an inhmu te a nih ngai chuan thilte pawh a danglam ve thut thei asin. Thudik engkim a hriat tawh hnu pawha Apuia laka a rilru danglam thei si lo hian a vaw chau a ni ber, amah zeihawi lo chi, thu han thluaimama thukhuh chi vak a ni bawk si lo. Apuia chu tihbeidawn law law mi thar nena bulṭan law law te chu a ṭha zawk ang em tihte pawh a ngaihtuah fô mai. Apuia a khawngaihna hian a la chelh hram hram chauh a ni. 

"Nia, hmaichhanah sawi dun ila a fiah zawk ang. Chuan, eng nge i tih leh dawn?" Pangngai takin a rawn ti a. 

"A tam mai, ka nitin hun hman dan ngai kha a ni mai. " A tih mêk laiin Alexa a rawn kal a, "Ate, ka Batman lu a bung a nia" a rawn ti. "Apui, ka dah phawt ang aw. Hei ka buai lawk dawn a" a ti a, "Buairengi ni mai rawh. Nau awm thin bialpa ka ni ang tih ka lo beisei ngai lo va, awmdan ka thiam lo. " A rawn ti deuh kher a, Hluzuali a run ve ta deuh. "Officer bialpa ni rawh. A nih phawt le.." tiin a dah ta hmak. Apuia lakah chuan feelings a la nei ve tih a chiang ta viau, hmusit niawm taka a rawn ṭawngkhum khan nâ a ti êm mai. Alexa nen chuan in chungah an inzui chho a, Sangzuala school kal tur nen an intawk, a smart leh zaih zaih khawp mai. "Ni hman nuam u aw" a ti dam thluam a. "Nang pawh le" a ti ve sap. Alexa Batman lu bung chu a'n siamsak zung zung a, a ngheh loh deuh avangin ṭhui tumin in hnuaiah an khawlla leh hriau dahna chu Vani a zu zawt a. 

"Mikhual roomah sawn" a lo tih chuan a lut ta vat a. Drawer chu a han check zung zung a, Drawer hnuai ber dawttuah bawm lian va loah a lo awm a, a lak kan rual chuan passport photo copy hi a tla nawlh mai. A mithlei chuan a han bih vang vang a, nula sam dum hlap, hmelṭha tak mai a ni. Alexa nen an inâng riaua a hriat avangin Alexa nu emaw Sangzuala farnu Mali an tih kha emaw a nih a ring. A ngai ngaiin chu thlalak chu a dah a, Pindan chu a chhuahsan ta a. A thlalak hmuh vang kha em mawni an chhungkaw Album en châknain a khat ta tlat pek a! A dik lo tih hre kur mah se; a mit chuan a zawng ru ruai reng mai. Samuela a rawn kal a, Alexa nena an inkhung hran hnuah pindan chu a thianfai leh ṭan a, in chungah Vani leh Pi Sangi te an chho zen zen lo tih a hriat ve kar tawh avangin Sangzuala pindanah chuan ṭi zetin a lut ta a. Mipa room e ti lo chuan a rimtui chêk mai a, engkim chu a felfai thlarh mai. Khum pawh a mar ṭha awt awt viau. Lehkhabu inrem dal lam chu panin a enkual dan dan a, Album chu a vân hmel angreng. Khum bul dawhkanah chuan frame lian vak lo a inhûng a, chutah chuan Sangzuala leh Alexa tetlai thlalak a lo intar vâ mai. Alexa chu kum khat vel a ni maithei. Sangzuala pawh tun ai hian a cher deuh,.chubak thlalak dang reng reng hmuh tur a awm lo. Midangin an rawn hmuh a hlau bawk si nen a chhuak leh ta vut a. Samuela te pawh an inzirtir zo ta a niang, an rawn chhuak a. Alexa chuan a toys a khal leh nghal mawlh mawlh. 

"Thingpui i in dawn em?" Hluzuali chuan a ti a. 

"I lum peih chuan a pawi miah lo" tih pahin a nuih suk a. In hnuaiah an inzui thla ta a, thingpui a lum nghal. Vani erawh khaw nge a awm a hre lo. Samuela chu a titi leh bawrh bawrh a, "Vawikhat na reng reng chu ka la rawn lêng ang, a remchang tho a.." a tih chuan, "Nia, lo leng rawh." A ti ve mai a. 

"Ka lo len rem ti lotu an awm êm lovang chu maw?" Nui vur vur chungin a ti a. 

Hluzuali chuan a ngei lek lek, a nuih hian a mipa tenzawng tak ang hian a awm tlat zel. 

"Awm maithei ni" a ti a. A nui ve tho bawk. Sama chu a hnual deuh niin a lang. Mahse, insiamrem vatin, "Ka awih duh ang em aw. Ka awih hreh mang e." A la tizui! Hluzuali chuan chhan vak ngaihna a hre lo, thingpui chu a pe sawk sawk a, "Alexa ka han ngaihven lawk ang e" tih leh in chunga chhoh a rual daih. Alexa chu a khum bul chhuatah a lo ṭhu sawp niaih a, Batman leh Spiderman a lo insualtir mêk niawm tak a ni, "Ka batman lu i ṭhuai bun leh chuan Ateii ka hrilh tawh ang. Min hneh dawn chuang lo" tiin a lo rak ve nasa mai a. Hluzuali va lut pawh chu a lo ngaihsak eih lo. "I va tui awm ve a. " Tia a bula a va ṭhut pawh chuan a lo ngaihsak chuang lo. Hluzuali pawh a lawm lo lek lek a ni, A spiderman ken lai chu a laksak ta a, a rawn melh ta hû mai. "Kan insual laklawh asin. Kha..nangmah vang vek, a kal leh daih kha" a ti ta a. Hluzuali chuan makti deuhin, "Tu maw kal daih a?" A ti a,. 

"Ka ṭhianpa kha." A la ti zui! 

"Tihpalh, a lo kal leh mai ang. I muthilh a hun tawh dawn asin. " A ti dam thlap a. 

"Reilotê" ngenngâwl taka a tih chuan a lainat tlat. Buk khum nghauhin Sama zu ngaihven turin in hnuaiah a chhuk leh ta phawt a. Sama chuan, "Midang ang i ni lo tlat. Alexa hi nikum aṭang khan ka zirtir tawh a, amah enkawltu dangte hi chuan i ngaihsak ang hian an ngaihsak ve miah lo. An pal mai mai niin ka hre ṭhin. Chuvanga bang ṭhin pawh an ni maithei." A lo ti sûrh sûrh a. 

"Ka ngaihsak em em pawh a ni lo, ka duty a nia.." a ti duh lek a. Sama chu a thingpui in zawh hnu pawn a la ṭhu ta zel si,. A zawh ni miah loin an venga a ex te a sawi kual a, Hluzuali phei chuan hriat pawh a hre ve lem hlei lo va. A um e liam vel mai mai. Vani a rawn lang ta hlauh a, "Lo inkawm r'u, Alexa ka han timu lawk ang e" tih leh chhohsan a rual a. Sama mitmei chu a vêng duh vak lo, ninawm tih rûkna riau a nei tlat a tin ni. 

Alexa nen chuan mu chungin Alphabet hrang hrang hmangin ramsa leh thil hming hrim hrim an inphuahsiak leh a, F an thlen meuh chuan Alexa pawh a muthlu leh ta duar duar mai, a mutdan a siamremsak a, a pindan a singsak fel leh hnuah in hnuaiah a chhuksan leh ta rih a. Sama pawh a lo awm tawh lo, Vani nen chuan an hman bawk a, an titi leh mai mai. 

"Alexa pa hi kan ṭhiannu pakhatin a star tawp a, awii a duh tawp a ni mai. " Hluzuali'n a tih chuan Vani chuan rang fahranin, "Awmzia a awm lo. Mi â a nih hi. " A lo ti hmuk a. Mak a ti deuh. 

"Eng nge a awmzia?" A ti hû a. 

"A awmzia chu maw..he pa lel lul hian hmeichhiate hi eng atanmah a ti lo. Nula hmelṭha leh lehkhathiam, hna sang tak tak thawk engzat hi nge a hnawl tawh pawh ka hre zozai tawh lo. Alexa nu kha a hlu viau a nih ka ring, Ka pi nen pawh kan ngei ṭhin alawm. Pu Tumsanga fanu Dr. Zorini saw i hria em? Awii sawte sawn a duh tawp a maw..a rawn leng ve ṭhin. Alexa pawn a ngaina, mahse, U Sangzuala hi a ngaihna a awm lo. Ṭhianah bak a chhuah thiam lo" a ti hlak hlak a. A ṭawngkam leh tawngdan aṭang chuan Sangzuala chuan bialnu nei ve se a duh hle tih a lang. 

"Alexa nu hi tu nge ni reng reng ?" A ti ta chawt a. 

"Zodini a nia, Zarkawtah sawn an awm, a pasalte sumdawnna hi a buaipui vein ka hria. Pathianin a hrem ka ti mai, fa an nei thei lo nge, an la nei lo.." ei loh hmel zet hian a ti a. Hluzuali nuih a lo za deuh. 

"Chu! Sangzuala chuan Alexa pian aṭangin bialnu a la nei miah lo a ni maw?" A ti a, han zawh chîk deuh chu nuam a ti vak lo, a hre chak ve deuh tho bawk sia. 

"Nei nang,. A ruka a lo neite a nih ngawt loh chuan a neih âwm ka hre miah lo. " A ti a. Apuia'n a rawn call avangin a kalsawn ta rih. 

"Kar leh thawhṭanah kan rawn kal dawn aw. Chhinga vengah kan thleng ang,. Rawn len i phal ang tiraw?" A rawn ti mawlh mawlh a. 

"Phal e, ka ṭhiante pawn an hmu châk ve ang che. " A ti ve luam a. A ṭhiante bulah a la sawi tawp si lo, mak an ti ve tho maithei a ni. Apuia pawh chuan, "Nia, anni pawh hmuh ve an châkawm, i nau awm ṭhin pawh chu ka hmu ve chak" a rawn ti luam a. 

"Nia, i hmu ve dawn nia,. In chamrei dawn ni lo'm ni?" A tih chuan, "Rei ve deuh hlek ang, ka pa pawn chawlh a la a.." a ti a. A nihna takah chuan Apuia te hi Aizawla piang leh seilian an ni a, Bungpuiah a pa a thawh avang hian an awm lo thei ta lo va, unau pahnih chauh an ni a, a farnu phei chu Apuia pa te in pui, a pute inah a awm a ni,. Bungpuiah chuan hunpuiah bak a haw vak lo, Apuia erawh chuan Bungpui hi nuam a ti a, ramchhuah leh lui kal tih vel a thlakhlelh avangin Aizawl aiin a awm tam zawk. An inbiak zawh meuh chuan Alexa muhil pawh rawn harhin chow bawk a siamsak leh ta a,. A eitui ve tho ang chu maw. 

Tlaiah Alexa pa chuan Alexa tel loin a thlah haw ta a. Alexa chu a hritlân deuh avangin a piin chhuah a remti lo a ni. A kal ve châk lutuk chu a ṭap deuh par a, Hluzuali chuan a khawngaih reuh hle, mahse, Pi Sangi te a hnial ngam chiah si lo. Sangzuala nen chuan an kalsan ta a. 

"Ṭhiante nena in luah chu a him lo asin." Remsangzuala chuan a ti a. 

"Nia, mahse, mahnia luah pawh a hlauhawm tho" Hluzuali chuan a lo ti ve hmak. 

"Rawn insuan lut tawh mai la, nge bân i tum zawk?" Sangzuala bawk chuan a ti a. 

"Tum lo" a ti tawi tak. 

"Ka fapa hian min hmangaihin i hria em?" A ti leh daih a. 

"Hmangaih lutuk ang" a ti a. 

"Ka beisei" a lo ti ve hmuk. Inbe zui tawh loin an tlan ta char char a, an in kawt an thlen chuan, "Lo peng la" a ti ve leh a, "Peng lo mai ang. Zan programme ka nei a, ka haw phawt ang e. " A ti thlup a. An inkalsan zui nghal. 

Seni nen an inbe leh a, "I Nu Mawii pawh a phur khawp mai, Sawrkar hnathawk nge nge chu an lo hlu a niang e. U Muanpuia erawh a hlim vak lo tih ka hria, a laklawh kual vel ni berin ka hria..ka khawngaih lek lek zawk. Mahse, ka lêt tawh dawn chuang lo va" a rawn ti a. 

"A hlim em em bik kha ka ring vak lo rêng a ni. " A ti ve a. 

"Ka nî chu apain a kamkhat hlak kha. 'I hetih vang hian pasal pawh i hmu zo lo chu a nih hi maw' te a tia, anu nen min haw zual sauh mai. Ka engahmah a thawk der si lo. " Seni bawk chuan a ti a. 

"A ṭhat chu, inenfiah ve se a ṭha hrim hrim. " A lo ti a. 

"Apuia nen in ṭha leh hi ka lawm, dam vat se innei vat ula ka ti. Kan khuaah i rawn awm leh thei ang a." A rawn tih chuan a hnual deuh,. Apuia nena an khatih hunlai kha chuan inneih pawh kha a suangtuah ve ṭhin, Apuia bula thlamuang taka awm te kha a ngaihtuah fô mai. Mahse, tunah chuan khatiang kha engmah a awm tawh lo. A mak ngawt mai, a duh dan chuan tihian a inhlawh zel ang a, pawisa a khawl ang a, A ngah ve deuh hunah amahin in a luah ve ang tih kha a nia. Pasal lam chu a ngaihtuah ngai mang lo. Mahni intodelh bak suangtuahna a nei vak lo. 

"Kan inneih pawh ka ring lo" a ti chhum hmuk a. Seni lah chuan, "Wow! Khalamah khan tawn thar D an awm tihna em ni?" A rawn ti lâng lâng a. 

"Awm mai mai lo" a ti leh a, mahse, a nui tho. Aizawla a awm aṭanga mipa a ngaihsak lohzia hi hria se chuan mak an ti zawk hial ang chu. 

Sunday a ni bawk a, a chawl ve a, khawm pawh a inkhawm chuang lo. Dami erawh a va inkhawm ve hram. Mi fate chu sundayah te hian an leng suau suau zel a, anni ṭhianho erawh hetiang lam pawh hi an ngaihtuah em em lo. A bik takin Rinhluzuali phei hi chuan nuam tihna pawh a nei lo, Aizawlah hian la kal ngai lohna veng a ngah mai,. Amah chauhin chhuak se a bo thei hial maithei a ni. Chawhnu dar 2 velah Pi Sangi hnen aṭangin call a dawng leh ta tlat mai. "Hlute, ka rawn tibuai leh ta mai che. Min hrethiam hram teh. Kan naua hi a khirh leh tlat tawh, zanin tlai hi a pu thihcham puala chhungkaw chaw eikhawm kan tum zan a ni si a, khawngaihin i rawn phei thei mai ang em le?" A rawn ti a. A inthlahrun hmel kher mai. 

"Theih loh pawh a awm lo. Taxi ka'n bia ang e aw. " A ti var a, "Mama'n a rawn hruai ang che. " A rawn tih chuan a îp deuh . Remsangzuala teh fô pawh chu a..hnial thei dinhmuna ding niin a inhre lo bawk a, "Aw le" a ti ve mai. A ṭhiante bulah a sawi a, "Sunday em emte chu chawlh pek ve tur che lawm le..a ni em em lo" an ti niah niah a. 

"A hahthlak chuang hleinem,. Ka riah nghal ka ring. An buai ve rih a nih saw" a ti mai a. A insiam zui nghal. A inbual zo a inthlak laiin Sangzuala chu a rawn lut a, Saii te chuan an lo dawngsawng vat, Rinhluzuali ai ngawt chuan inleng han dawnsawn pawh an thiam zawk awm e. A inpeih hnuah an inzuichhuak leh ta nge nge a, bike zawk a la rawn keng zui! Bike chuan hi nuam a ti ngai miah lo, a dawihzepna lam tak a ni. Mahse, hlau angin a awm duh bik ṭhak lo. 

"Engtin chiah nge a awm a?" Tiin Alexa chu a zawt a. 

"A nuar leh a, damdawi pek a duh bwk si lo, a muthilh hun a pelh thui tawh bakah naupang dang awm vete tan a hnawksak ṭhin bawk nen,. I hming a lam sek bawk sia." A lo ti duah a. 

"Kan la inhrawn rei loh ngaihtuahin min ngaina a, ka lawm." Hluzuali chuan a ti ve a, thil eng emaw ngaihtuah vung vung hmel a pu bawk. 

"I ngainatawm loh nen tiraw?" Tih ri avang chuan a ner sawk, a tukhum chu a chhiatkhum zauh a, "Ka ngainatawm a niang chu" a ti ve hlak. 

"Ngainat harsa, ngainat tawh chinah ngainat loh theih tawh loh ang kha i ni tihna em ni?" A rawn ti khauh a. Chhan vak ngaihna a hre tawh si lo, "I ninawm, bike chuanlaia inbiak lûng lûng hi a ṭhing" a lo ti leh hmuk, Remsangzuala pawh a nui vur vur mai. 

In an thleng a, mi an lo awm deuh ṭiai tawh, Pi Sangi chuan introduction a han pe zung zung a, an fel hmel hlawm khawp mai. "Tikhan Hlute, nang chuan i nau awm chiah ngaihtuah rawh, helam chu rawn chet ve a ngai miah lo a nia,." Pi Sangi chuan a ti zung zung a, thuawih hmel deuhin in chungah a chho ve nghal zat. Alexa pindan a va luh chuan hnawk namên loin a lo hnawk a, amah Alexa chuan lem ka ziak e a ti ve niawm tak a ni, a lo inkhawih berh luai bawk. Hluzuali a hmuh rual chuan, "En la, Ate, ka thiam asin" tiin a lemziak chu a kawhhmuh vat a. A'n en nâk chuan mihring lem ni ve awm tak, chhe deuh deuh pathum hi a lo din tlartir ve ṭhap a, a sang ber chu 'Papa' tiin a dah a, a laia naupang lem chu, 'Me' tiin, a tawpna ber chu, "Ateii" tiin a lo chhu kuau bawk. Hluzuali pawh a hrilhhai lek lek alawm le. "Tu nge hetiang hian ziak rawh ti che" a ti ngial a. 

"Ka ṭhiannu khan mawle" a ti leh daih, a tu a ṭhiannu chungchang nge a sawi pawh a hre bawk si lo. "Nakinah ka la zirtir ang che. An chhe hlawm si" a tih chuan, "An chhe bawk lo" a lo ti ve hlur a. Hluzuali a nui tawp. 

"Tunah chuan i inbual ang a, i muhil ang. I pindan pawh thenfai a ngai dawn sia, ka hun tihek miah suh." Tiin puitling takin a han bia a,.ngaithla awm pawn a lang lo. "Danny te nen kan infiam dawn" tiin tukverh lam a hawi a, "A hun tawh lo, i muthilh a hun" a tih mek laiin, "Danny te pawh chhunah an muhil ngai lo, ka mu duh tawh lo" a ti a, a men puai nghal mai. Luhlul tak anga lang siin a no nâl em em a, tihnat pawh awlsam tak a ni. Hei vang hian a nia a hringtu a pa ngei pawn a enkawl tam loh, tihnat a hlauh luatah a thunun theih loh a hlau a ni ber ang chu. 

"Aw le, inbual la, in chhungah in infiam dawn nia." Tiin a thawmhnaw a phelhsak zung zung a, inbual tak hi chu a hreh ngai lem lo. An inbual chhung zawng hla phuahchawp a sa âl âl a, Hluzuali pawh a nui kar kar reng mai. An inthlak laiin kawngka chu an rawn kik a, an rawn lut zui nghal. Alexa pa leh nula, Hluzuali aia kum 3 vela upa tur awm vel, sam sei tak, hmel nu hnûp leh pian pawh nalh tak hi an rawn lut ta a. Nula chuan Alexa a hmuh rual rual chuan, "I va fai tawh awm ve, i lo ṭhang leh deuh a ni maw?" A ti chul a. Sangzuala erawh chuan Hluzuali melhin, "Hlupui, hei hi Mary a nih hi, Mary, hei ka fapa awmtu thar ka sawi kha a nia. " A lo ti nghut nghut a. An inchibai lai chuan Mary chuan nui sâng chung hian, "Enkawl a hrehawm em? Ka chhâwk thei ṭêp tawh che a nia, lo tuar hram hram rawh" a ti a. Hluzuali chuan Remsangzuala bialnu a nih a ring nghal hmiah, chutihrualin Vani khan hmeichhia a mamawh lohzia kha a lo hrilh tawh sia, he nu hi a rukin a lo nihpui tihna a ni maithei. Bakah a pa thihchamah meuh a rawn hruai chu a tan a pawimawh hle ang tih a ring thiam ve mai. 

"Enkawl a nuam lutuk" a ti ve sap a, Alexa erawh a video games ngawt a lo buaipui leh daih tawh. 

"A muhil dawn lo em ni?" Apain a tih chuan, "Ni hi a vuiliam ve thei tawh tho ang ka ti deuh, zanah a mut ṭhat loh phah zawkin ka hria a." Hluzuali chuan a lo ti vat a, a dik a ni, Alexa ang rual chu school an kalin ni an vuiliam vek tawh,ani a nih avanga muthilhtir zel bik kha nakinah nghawng ṭha lo a awm a hlau. 

"Ṭha i tih ang ang kha kan pawm e. Chaw ei dawnah kan rawn ko ang che u, tirawh, Mary, keini chu chhuk ang" tiin Mary chu a kai a, Mary chuan, "Nau awmtu rau rauah i nuamsa deuh dawn a nih hi, chuvangin ṭha taka i thawh ka beisei." A ti deuh kher a, Hluzuali chuan a lo ei vak lo, "Ka theihtawp ka chhuah e" a ti ve hmak a, Alexa pindan chinfel hna a chhunzawm nghal daih. Step an zawh laiin Mary chuan, "Nau awmtu atan chuan a hmai a fai mah mah a nih kha mawle. Tunlai nula ho hian tum rûk an nei ṭhûm tawh a nia." Rinhlelh hmel fê hian a ti sap a. 

"I ngaihtuahna a nih chu. Chutiang rilru pu hmeichhia a ni lo" Sangzuala'n a lo ti hmuk. 

"I va ṭan ve a" titau awka deuh hian Mary chuan a ti leh a, "Ṭan e, ka fapain a ngaina alawm" a lo ti leh hmiah, sawi zawm tur a vâng ta deuh nge, a ngawi zui ta a. In hnuai lamah pawh a inla thu angreng viau, Pi Sangi lah chu a be thiamin a nui har har reng bawk a. Choka lama buai mêk Vani leh Sangzuala nî fanu Dini te chuan an lo ei lo ve rap, "U Zodini ṭhiannu a nih vang hrim hrim pawn ka ei thlawt lo, a zakthei lo sia a." Dini chuan a ti tân tân a,. Dini hi patil lam a pawl lek lek a, a rilru erawh hmeichhia zia a kai ve tho tihna a nih ber chu. Zodini a tih chu Alexa nu a ni, ni e, Mary hi Zodini ṭhiannu, a best friend hial a ni ṭhin, Zodini leh Sangzuala inzui vel lai hian pasal a um ve zuai tawh a, thla 3 pawh an inkawl tlin hmain an inṭhen leh tawp mai a ni, a chhan sawi fak thei an awm lo nge, sawi dan pawh a inang lo va, Mary thatchhiat vang ti tawk an awm laiin a pasal lerhkawh vang ti pawl an awm bawk. Tihian a han thlawi chho ta a, Zodini'n Alexa a pai laite khan a buaipuitu ber chu a ni lawi a! Khatia Sangzuala te kuta Alexa an va dah tawp te pawh khan a rilru a lo natpui ve hle. A ṭhiante fapa na nâ na chu tiin a sen buchip lai kha chuan tlawh pawh a tlawh zing, mahse, phaiah SPA -ah zu thawkin kumin kumtir lamah khan a rawn haw ve a, amahin a sumdawnna chu a run chho ve ta a ni. Amah a nelawmin ṭawngkam a thiam a, customer pawh a ngah thei phian. Tin, tuna Sangzuala ten a pa hriatreng nana an din School Chungnunga memorial School-an din dawn hian Mary pain a pui nasa a, Mary te leh Sangzuala te lo inkawm ve ṭhin ta chu Mary hian a pa bulah Sangzuala mamawhna te a sawisak a, an neihin a tlin bawk nen, a thawh hlawk ber pawl a niawm e, chuvangtak chuan Pi Sangi te tan pawh biak chhiat ngam an ni lo va, Mary lahin a rawn haw phat aṭangin Sangzuala chu a belbul chawt a, a ngaizawng tih loh rual a ni lo. Mahse, a duhthusam ang taka inlaichinna erawh an la nei chiah lo a nih hmel. 

Vani pawh chuan, "School chungchangah te hian a intithu thei si, U Sangzuala pawh hian a ngei ru ve thei ngawt ang" a lo ti ve a, mi ei loh an tina ve khawp mai. In chung lamah erawh Hluzuali chuan Alexa toys a dah fel thawkhat a, a hah hran lo naa in hnuaia zu chhuk vel kha a peih chiah lo. A phone a khawih ta mai mai a. Whatsapp luh apianga Apuia msg lo awm ṭhin hian a tihnual deuh ṭhin. A hne tih dawn chuan ni chiah si lo, amah a veng leh engkim a hre duh thin chu zalên loin a inhria a niang e. Mahse, a reply ta tho a, a rawn call leh zat, ani damlo mu ta reng chu a hman ve bawk nen. 

"Naktukah chuan min lo hmuak hman awm si lo va." A rawn ti a,. 

"Nia, hnathawh ka ngai sia, in lo thleng tluang turah ngai ang" a ti a. 

"Ka hmu châk tawh che e, kei chu ka cher tawh bakah ka thu bawk sia, mak min ti suh aw" a rawn ti ngial a, a khawngaih ta deuh. 

"I â em mai, damlo i nia, i ṭhat vur ka beisei hleinem. Chuan, thawhlehni-ah mi i incheck up dawn?" A ti a. 

"A niang. Naktuk zanah chuan zin chauh nen ka rawn leng thei pawn ka ring lo" a ti chuai ruih a,. "Hun a la tam alawm, lungkham suh. " A tih mêk laia a hnunglama Sangzuala lo ding chu a hmu mai lo. Apuia bawk chuan, "Nilai tlaiah chaw i rawn ei dawn kha aw, ka chhungte ka hrilh vek tawh a nia." A rawn ti a, Hluzuali chuan, "Nilai tlaiah maw..aw le, hawn hma ka lo dil ve dawn nia, an fel alawm" a ti ve ta thliam a, Apuia pawh a lawm hmel ve hle. Sangzuala'n ,"Ka rawn tibuai che a, sorry, chaw ei an siam a..Alexa nen lo chhuk ta che u" a rawn tih takah chuan an dah ta rih. Alexa pawn thuawih deuhin a zui ve mial a, dawhkan a kil ve peih loh avangin thlanglam bathlar zau duaiah chuan Alexa nen an ei dun a, Vani ten an rawn zawm ve bawk. An ei laklawh lai laiin Mary lah chuan, "Vani, Bawngsa chhum saw a tui thlit a ngai a nia. Che zung zung ta che u" a rawn ti sek a. Vani lahin a lo ngei sa nen, "Anmahniin inthlit ve mai rawh se, a ninawm, ka ei laklawh." A ti hmak. 

Dini a lo nui tet tet mai. Mary chuan, "Ve khanglang che hian aw." A ti hmak a, Alexa chaw ei kham chuan, "Ate, ka puar, Danny te bulah ka kal ve dawn nia aw." Tiin Hluzuali chu a dil a. 'Ate' a ti kher chuan a run deuh nge ni, Mary chuan, "I nuteii pawh a ni lo, khatiang khan vawikhatmah ko tawh suh. A zahthlak" a lo ti leh hlar a. 

Hluzuali chuan thawh pahin, "I thu lo ve e, ka nau awm a nih hi" ti hmakin in chhungah a luhsan daih. An piah lawka dawhkan lian vak lo kil mêk Sangzuala leh a cousin te chu an lo nui huk hlawm a, Sangzuala chuan a bula ṭhu Rintea hriat phak tawk lekin, "A duhawm riau i ti ve lo maw?" A ti sup a.