nau awmtu 5

NAU AWMTU..(5)

Ziaktu : Toni Râlte

A ni 2-na pawh chu a ngai angin an hmang thei a, hmang thei ti ila Samuela rawn kal chuan an zir zawhah thingpui a in khawmuang ve a. An inbe ve luam mai. "Ka hmuh hnu i ang ka tia, mahse, ka hrechhuak mai thei tawh lo che." Samuela chuan a ti luam a, "Nia, ka hmel hi a common ve a..min hmu tawh ang." Hluzuali pawn a lo ti ve mai. "I thawh rei theih i inring em?" Sama chuan a ti sup a. 

"Ka hre lo le, thawh reng theih chu ka duh khawp mai." A lo ti fel thân a. 

"I thawh theih loh hun a lo awm a nih pawhin kan ṭhenawmah hian nau awmtu tur an duh reng a nia, anni phei chu a harsa lo ang,an felfai tawh a"..Sama chuan a ti leh a, chutiang thu a sawi mai danah Rinhluzuali chuan a thawh rei peih a ring vak lo niin a ngai. Mahse, han en zel phawt ila, tlin loh tawpkhawk a awm te a nih ngawt loh chuan heta thawh zel hi a duh, hlawh a ṭhat bakah pi Sangi te an fel si, a zalên tlat a, Alexa bak buaipui tur a nei lo bawk nen. Alexa muthilh hnuah a thawmhnaw a suksak a, Vani'n suk a tum pawn, "Ka nau awm a nia, hei chu ka tih ve tur alawm. " A ti ve tlat. Vani lah a lo lawm ve tumhrang a, Rinhluzuali hi a hmel han hmuh mai chuan ngen hmel deuh, nelawm vak lo hmel pu deuh mah se; nimin lama an inkawmna boruak avang khan a ngaina sawt a, Alexa rawn awm ṭhintu midangte ai ngawt chuan a pawh hma zawk daih. Dik tak chuan a khua a har ve ṭhin a, Alexa nen lah an inchai hleithei vak si lo. Pi Sangi a chhuah daih phei chuan a khua a har vawng vawng zel. 

Alexa rawn harh chuan pakora a rawn ei châk leh ta tlat. Hei kher hi chu Hluzuali siam thiam zawng a ni ve bawk a, Besan a lo awm sa bawk nen. Phur takin a siam ta sûrh sûrh a. Alexa erawh in chungah video games a khel a, vil em em a ngai hran lo bawk a,a zia viau. A inkhawih berh lai takin call a rawn kal a, Seni a lo ni. "Aw, Sen" a ti puat a. 

"Nichin lawk khan U Muanpuia te chu an lo haw a, bungrua an singsa mek e" a rawn ti a. 

"Hruaii pawh chu a rawn tel ve leh mi?" Rinhlui chuan a ti a. 

"Tel chiang e, an rawn inzui lut mawle..zâm lo haih haih tak an ni." Seni chuan a ti hmuk hmuk a. 

"Hruaii te angin zahna an hre hleinem" a lo ti ve sak. 

"Ka zak a ni, keimah zawk hi. Mi hian min en hrek hrekin ka hria. Zin bo daih ka châk, nangmah chuan awm la ka rawn zin daih ang mawle.." Seni chuan a ti niah niah a. A rilru tur chu a hrethiam reng mai, Apuia'n a phatsan tirha a nâ leh thinrimna aia a zahna nasat zawkzia a ngaihtuah chhuak bawk. 

"Engvangin nge maw i zah ang le? Tisualtu zawk pawh ni hlei lo, anni an zah loh phawt a hnu. Zak duh reng reng suh. " Tiin a han fuih ve ngial a. 

"Nia, hun kal deuh se a zia ve leh mai ang. Taka! Apuia kha a cher ka lo tih ka lo tih kha a lo damlo tak tak alawm, khum betin a na hmiah mawle.." a rawn ti leh daih a. 

A thaw hawk ringawt. "A va pawi ve." Tih chauhin a chhang. 

"Ka nîin, 'Natna benvawn tihdam theih tawh loh a vei alawm' a tia. Mahse, awih tur nge awih loh tur pawh ka hrethiam lo. Ka rawn sawi ve mai mai." Seni bawk chuan a ti leh a. 

"Umm, a nih chu..lo dam rawh se" a ti sap a. Nakina inbe leh turin an inbiakna an titawp ta rih. Pakora pawh chu a kang ṭan a, Pi Sangi incheck up pawh a rawn hawng ve tawh. "A va rimtui sar sar ve" a rawn ti lut a. Vani chuan a lo dawngsawng vat. Pi Sangi hi kar khat liamta khan a hnute hnuai hi a rawn na tlat ṭhin a, bâwk tih vel chu a awm lo naa, Sangzuala'n incheck up tura a tur ngun êm avangin a va incheck up kha a nia. 

"Min x-ray a, ka thisen an testna erawh naktukah Bawiha'n va lam rawh se. Ka rawn nghak ta lo mai. A ruh lam hi a ni maithei an tia, Vani, ka cancer lovang ka tih reng kha.." zangkhai takin a ti siam siam a. Vani'n a hmain, "I cancer a niang." A lo ti tawh niawm tak a ni. Mizote ṭhanmawhbâwk pakhat chu nâ kan neihin a nat fê hnuah kan inentir chauh zel a, nachhawknain a chhâwk theih chhung tawrh kan tum ṭhin. A tawpah a tlai tawh hnu, chhan theih a nih tawh loh hnuah kan inentir ve chauh a, Cancer vanga thi kan tam chhan te pawh hi a ni maithei ni. A theih hram chuan kan tlin ang tawkin nâ kan nei emaw nei lo emaw thla tin kan thei lo a nih pawhin thla khat dan, thla hnih danah emaw tal doctor hmuh hi a finthlak fô. 

Eitur a siam peih hnuah Alexa a han ko a, a lo khel laklawh viau a niang, a ngaihsak eih lo. Rinhluzuali chuan a video games khelh lai chu a off sak ta hmak a, Alexa thinur lutuk chu a ter ta at mai. A phak ang tawkin a per ve tân tân a, a meng rum viau bawk. Ngaipawimawh duh miah lohin Hluzuali chuan a kai lawp a, a ṭang nasa mai. "Apa bulah ka sawi vek dawn. Kal rawh, i sual si, ka ril a ṭam lo" a ti vei tân tân a. 

"A lo haw veleh i sawi dawn nia. I ril a ṭâm loh pawn ka barh lui dawn tho che. " Tiin stepah chuan a pawm thla ta a, a rit zêk lehnghal. In hnuai an zuk thlen chuan a pi chuan a lo nuih var var a, "A nuar leh elo?" A lo ti a. 

"Thu a awih lo a nih hi.." a ti mai a. Dawhkan kil chuan a ṭhuttir a, pakora leh thingpui sial zeta a siam chu a chhawpsak ta a. Alexa hi a la naupan nen a thil ei dan vel hi a felfai riau a, han berh lei luai leh han thlauh palh hi a nei ngai mang lo, pi Sangi thawhrim rah tih loh theih loh a ni. Eitur a han hmuh takah chuan video games lam kha chu a theihnghilh zui ta nge, tui ti takin a ei leh ta ṭeuh a. Rinhluzuali pawh a lawm ve hle. Anni pawh chuan an eizui ve ta nghal a. Pi Sangi'n, "Hlute, nang hi eisiam lam i thiam riau lo maw? I lo awm ve hunah chuan Vani hi i dah nil fô ang a..".nui chung hian a ti a. Vani'n, "Min dah nil leh ka âwl ting a ni mai.." a lo ti ve bawk a. An hlim ve hle. Inpawh taka a hnathawhna te nena an awmho thei chuan Rinhluzuali ngaih pawh a tingam hliah hliah mai. An routine angin an la kal zel thei lehnghal a, tunah chuan Alexa mawngtama jection chiah zir a ngai tawh. Chiu mut kher ngai lo va tihmut theih nise a duh a, a khirh bawk si. Mahse, chiu kher ngai lo va a tihmut theih chuan Pi Sangi te lawm dan tur a ngaihtuah a, tum chhin a rilruk ta a. 

Tlaia a haw tur leh Sangzuala an intawk leh chiah. "Eng nge kan an?" A ti dam dup a. An han din dun chuan an insanhleih viau mai, Rinhluzuali hi mizo nulaah pawh a te chhe lo pawl a ni ve si a. Remsangzuala nghek nghek chu, chutia palen teh vak. "A pangngai a ni mai." A ti ve sap a. 

"Thlah haw i duh em? " A sana bih zauh pah chuan a ti a. 

"Duh lo e, ka lawm e." A ti a, polite taka an la inbiak chhung chuan an la inpawh tawk lo tihna. 

"Aw le, naktukah hmuh leh che ka lo beisei e." Ti nghutin in lam a pansan ta a. Hluzuali pawh chak deuhin a kal ta hmawk hmawk a. In a thlen chuan a chau ve leh hle,. Mahse, rawngbawl a ngai si. Chawhmeh hi an duhtui vak lo hlawm a, a zia viau. Sundayah bak sa phei chu an hmeh ngai lo. Dal a kan laiin call a dawng leh ta a, unknown number a ni. A la ta tho a. Aw thâm ṭip ṭep hian, "Hello, Hlute, i dam maw?" A rawn ti a. 

"Aw ka dam alawm, tu nge aw?" A ti a. 

Lehlam ami chuan, "Apuia.." a ti a, a khuh zui bawrh bawrh bawk. 

A phone chu a thlauh ṭhelh a ni, Apuia midang hmelhriat a nei hauh si lo va. "Tu Apuia" a ti ta tho a,. A chhungril sa hat hat chu a duh lo ru hle. 

"Keimah Hmangaihpuia..i phatsan tak kha mawle." A rawn tih chuan a ding ngil zawt mai. 

"Eng thu nge i sawi a?" A ti nghek a, a khur titih deuh bawk. 

"Aw a dik lo em ni? Khatia hre lo awm deuha awm kher kha a ngai hleinem. I phatsana na taka i hliam Apuia kha ka la ni reng. Fa i nei tawh em?" A rawn ti duah a. A tawngkam tinte chuan na takin an chhu chawrh chawrh ni maiin a hria. A dal kan ût rim a hriat rual chuan a harh vat, tui a leih ta vat a. Phone erawh a dah phal bik mai lo. Apuia ṭawngkam aṭang chuan thil hriatsual eng emaw chu a awm tih a hre tlat. Engtin nge chutiang ngaihdan chu a neih theih tih hriat a duh a ni. 

"Enteh, khatianga min rawn ṭawng el tur chu i ni loin ka hria, i bialnu nen in luah duna ka msg leh call reng reng i chhan ngai loh chhanah khan min puh i rawn tum elo? Zak ve deuh teh aw." A ti ve ta zêk a. A thinrim ve tawh hi chuan a ṭawngkam pawh a na ve fak zel. Ṭawngkam a thiam lutuk lo zawk a. 

"Teh daih che chuan a..nangman a nih kha min phatsana min kalsan zawk. Nangmah vangin rawn haw pawh ka hreh phah a, nimin piahah ka haw chiah. I number i thlak ngun lutuk a, hei chu thlak tawh lo la a ṭha ang." A rawn ti bawrh bawrh a. A aw erawh a thâm viau, natna eng emaw tak chu a nei tak tak a ni ngei ang. 

"I sawi awmzia hi pakhatmah ka hrethiam lo va, hriatthiam pawh ngaiin ka hre lo. Min duh tawh loin i bialnu i luhkhung a, min lo biak leh pawh hi a ṭul lo. " A ti ve ta ngat a. Apuia chuan rang zetin, "Dah suh,. Eng emaw sawifel ngai a awmin ka hria. Eng nge a awmzia?" A rawn ti hê hâw a. 

Rinhluzuali pawh chuan, "Eng nge a awmzia?"a ti ve tho. 

Muangchangin Apuia chuan, "Aizawla i chhoh hnuah pasal i nei miah lo a maw?" A ti ta a. A ṭim sawk ni maiin a hria. 

"Nei lo,." A ti tawi tak a. A rilruin, "Ngaihzawng takgial pawh ka nei lo" tiin a chhunzawm a. 

"A va mak dawn ve leh..ka phone tihbo kha i hre ve em?" Apuia chuan a rawn ti leh a, "Hre lo, min be duh hleinem.." a ti nghat a. 

"Be duh tur chein i number ka nei lo va, ka phone a bo miau sia.." a rawn ti a, Rinhluzuali ṭawng ve hma chuan, "Ka hrethiam ta. Ka va â êm.." a ti hluk a, a rum nghut bawk. 

Rinhluzuali chuan, "Eng nge a?" A ti a. Ani pawn a hre châk ve tho mai. 

Thil thlen dan chu Apuia chuan a sawi ta a. "Aizawla i chhoha pi Muani te ina i awm lai khan ka phone ka tibo a. Number ka lo vawng bawk si lo, ka nu number chiah ka hria a,.ka nu hnenah i number neih dan lo ngaihtuah turin ka ti a. Seni zawt turin ka ti a, Seni te ina a va kal chuan amah a lo awm bawk si lo va, ka nu lah chuan a kal chhan a lo sawi bawk si, Seni Nî Nî Hmuni khan fing kherek takin thil a lo ti kual vel a nih ka ring ta. Ka nu bulah i number a neih thu a lo hrilh a, a lo pe nghe nghe. Ka nu lahin rinhlelhna nei miah lovin a lo la ve mai bawk a, tichuan, min rawn pe ta a. Pi Muani number kha emaw a nih ka lo ti zawk a, ka rawn call khan, nangman min lo chhang a, be tawh lo tur leh midang i neih tawh thu min hrilh a nih kha. A tirah chuan ka la ringhlel a, mahse, hmun danga i awm tawh thu te, pasal i neih tur thu leh kei chu min nghah theih tawh loh thu i sawi a, call-ah min block a, whatsapp-ah erawh min block lo. I thlalak engkim dp-ah a hmang vek bawk sia, nangmah turah ka ngai char char. Ka rilru i tihnat êm avangin whatsapp-ah chuan ka block ta che a. Mahse, tihian ka rawn haw a, vawiinah Seni ten min rawn kan ve a, ani pawh an boruak i hre vek turah ka ngai, i chanchin sawi loh theih loh a ni bawk sia, a hmaa i number anga ka lo block tawh kha ka han zawng ṭha leh a, mahse, a lo thi tawh nge whatsapp pawh a lo khawih tawh lo va. Seni bulah i number ka dil ta a ni. Chuan, ka lo bia che. Chuan, vawiinah Seni kâ aṭangin kan khuaah khuta ka awmnaah bialnu nei angin ka lo thang chiam tih ka hre ve chiah bawk. "I sual em alawm, i tihnatzia kha.." te min tih danah thil eng emaw inbatfuh lo a awm niin ka hre rêng a, chung vel chu a lo nih dawn chu.." tiin.

Rinhluzuali pawn thawk a la hawk hawk mai. Khatihlai Pi Muani te ina a awm chhung kha a rei lo va, an indan hnuah pawh Apuia kha chu a la callin a la be fô mai, mahse, chhanletnna a dawn ngai loh danah a phone chu a boin tuin emaw a hmansak tihna a ni ngei ang. A hnuah phei chuan Apuia khan a block ta daih kha a nia. Chutiang teh hrep a lo nih vang chu niawm tak a ni. Thil chu a fiah ta uar mai, mahse, Apuia'n amah anga a lo biak ve reng ṭhin chu tu nge ni ta ang? Hruaii bak a mitthlaah midang an lang thei lo. Seni Ni Hmuni kha Hruaii te lamṭang kha a ni tlat a, tuna Muanpuia leh Hruaii te inkarah pawh hian inrawlhna a nei leh maithei a ni. 

"A nih Seni'n a hre ve em?" A ti thei hram. 

"Ka la hrilh lo, hrilh rawh nangman" a rawn ti a.

"A nih ti nge i damloh a?" A ti ta daih a, a lo hlauthawng ve ṭhin a ni ngei ang. 

"Kan inṭhen tak hnu khan thil ka ei ṭha lo va, zu ka in nasa bawk nen, TB ka vei phah ka ti mai. Mahse, hei ka inenkawl mêk a, natna dam harsa tak a ni lo va, ka ṭha ṭêp tawh ang." A rawn ti a, a chauh hmel bawk si. 

"I dam vat a ngai a nih chu, a nih chuan bialnu nei anga i thang kha dâwt tihna maw?" A ti ve leh ngat a. 

"Dâwt chiang tak a ni e, ka nute pawn engmah an hre lo,. I hriat ngei turin tu ten emaw thudik lo an vawrhdarh tihna a ni mai. I hrethiam em?" A ti nghet charh a. 

"Hrethiam. A titute pawh Hruaii te an nih ka ring" a ti ve hmak. 

A ṭhiante an rawn haw ta sia, an rawn ri hlut bawk nen, "Zanah kan inbe leh dawn nia.".tiin an dah ta rih a, hmabak erawh a kô riau mai. Zanriah pawh a eitui meuh lo. Apuia hlirin a rilru a luah khat. Zanah VLa bawk a rawn lêng a, Zanin chu Saii pawh a chau deuh nge, dar 8 velah a mu ve ta mial a, Dami te pawn chance an nei thei ve dawn niin a lang. Rinhluzuali pawh a inphihfai zawhah a mu thân a, earphone a vuah hmak bawk. Apuia nen an inbiak hmain Seni a be leh te tê a, thil awmdan vel chu a han hrilhfiah a, Seni lah rilru chak ta ngang chuan a lo manthiam rang khawp mai. Anî hming pawh sawi tel loh theih loh a nih avangin hreh deuhin a sawi a, mahse, "Awii, ka sawi duh lo a nih kha, ka nî nen hian ṭha zaia kan inbiak lohna a rei lutuk tawh. Hruaii te a tiṭha hûrh hi ka nu nen kan mil tawh lo va, tuna Hruaii leh Muanpuia te inkarah pawh hian tel vena a nei tih ka chiang lutuk. A tir phat aṭangin ka nu hi a mil hlawl lo va, amah tihrehawm tur hrim hrimin a niang pasalte hi a neih duh loh.." a ti ta bawrh bawrh a. Seni nu hi Seni pa nupui pahnihna a ni a, Seni chiah hi a ni nen fa an nei, Seni û te chu a nupui hmasa laka a fate vek an ni. Seni nu hian a luahlan pawh a ni lo va, an inṭhen hnu fêah Seni pate rawngbawlna aṭanga inchhar ve chauh an ni. Chutianga a hranpa taka Ni Hmuni'n Seni nu a huatna chhan tur chu a awm vak lo, rilru chhiat vang bak a ni lo vang. A mak mang e, mihring rilru hi chu aw. Kan hlâwkna tur pawh awm hlei lovah kan intihah chiam a, mi pawi kan sawiin kan hliam bawk a, tu ten emaw kan chetdan anga kan chunga an chet ve lahin kan la na thei fû bawk si. A hahthlak a nih hi maw. 

Seni chuan, "Ka pa ka hrilh vek ang, ka nî chu hau ve hrim hrim rawh se. " A ti a, Hrilh mah se; Rinhluzuali pawh chuan pawi a ti vak lo. Ni Hmuni chu a ngei ve hrim hrim. Seni nen an inbiak zawhah Apuia nen an inbe ve leh a, ani pawhin Apuia chungchang thuthâng te a hriat vanga bansan a ni tih a sawi ve a, thil tam tak an sawi dun a ni. Mahse, buaithlak ber zawka chu Apuia hnena kir leh tumna rilru a put dawn chuan mawlhtu a nei tlat zel a, a rilruah hmun a chang thûk tawk tawh tlat lo a ni ber ang chu. Chutihrualin Apuia a lo huatna leh a lo ngeina te erawh an bo duak tawh a, a khawngaih letling zawk. 

"Bul kan ṭan ṭha leh thei ang tiraw? Thil kalsual avangin rei tak kan lo hrang tawh a, englaimahin ka theihnghilh ngai lo che. Ka lakah feelings i la nei em?" Apuia'n dam thlupa a han tih chuan a chhing sawk. 

"Ka hre lo" a ti sep a, an hunlai kha a ngaihtuah kir a, Apuia vanga a thlamuan theihzia leh a innghahna a nihzia te a han chhuikir a, a tan khan a rintlak ṭhin. Rintlak ta lo nia a hriat lah thu belhchiandawl lo a lo ni si! Tunah engkim hailan a ni tawh a, mahse, amahah kim lo eng emaw a la awm tlat. Chu tak chu a ni a hriatthiam loh chu. Apuia a hmangaihna te kha a lo dai hman tihna nge? A lakah a hel tawh zawk tih a hrethiam lo. Mahse, kha chen an lo intihrehawm tawn ve ve tawh a, tihbeidawn chu nuam a tih loh avangin bulṭan ṭha leh tur chuan thutlukna a siam ta poh a, beiseina engmah pawh a nei hran lo. A tlachawpa nun tawp mai chu a tum dan a ni tawp mai. 

A tukah a hna ngaitê bawk a thawk leh a, Apuia bulah pawh a hnathawh te chu a hrilh ve a, "Nau awm i thiam ve mi?" A ti hû mai. 

"Ka ti ve thei mai" a ti a. 

"Hna dang a awm ang mawle, dawr nghahte pawh a ṭha zawk lo mi?" A rawn ti hram a. "Hlawh a ṭha sia, ka ui alawm" a ti mai a. 

"Tak taka lo tuar hram hram rawh, Pathian zarah ka dam chho ang a, hna ka hmuh veleh ka nei ang che." A rawn tih chuan nuam lo tihna riau a nei, a chhan a hre bawk si lo. A awmdan tehhrep chu amah pawn hrehawm a ti. Vawiin chu School an chawl nge ni Alexa pa pawh a chhuak lo a,. A pindanah a tawm reng thung. Samuela nen pawh an inkawm thei ta fû mai. Sama chu a ṭawng duh bawk a, sawi tur lah a hria. 

"In vengah chuan ka lo kal fo alawm, khawi lai takah khan nge in awm?" A tih chuan, Hluzuali chuan a lo leng ang tih hlau ru zet chungin, "Pu Sailova te in hnuai ber dawttu kha kan luah ve a." A ti hap a. 

"Khai aw! Pu Sailova tu te kha tuition ka rawn pe ṭhin alawm. Kan va inhre lo rei ve, hei vang a nih chiah dawn hi ka hmuh hnu i ang ka tih.." a ti hlut a. Rinhluzuali awm erawh a nuam chiah lo, inleng neih hi a peih hlawl lo a ni ber. A ṭhiante bialpa te pawh a kawm nel thei tak tak ngai lo. 

"A nih chu mawle..tunah i la pe ṭhin em?" A ti ve a. 

"Tlai dar 4-5 thleng ka rawn pe ṭhin. Vawiin tlaiah ka pek zawhah ka rawn leng zuai dawn nia" a ti lûng lûng a. "Nia, aw le" a lo ti ringawt. Chutihlai tak chuan Sangzuala chu tui bottle keng chungin a rawn chhuk ve mek a, an thusawi pawh kha a rawn hre hman maithei. Fridge hawngin tui vawt a la chhuak a, amah pawh rawn en lem lo chuan, "Alexa mut a hun tawhin ka hria." A ti chang nghut a. Rinhluzuali pawh a vir ta vat mai. Sama pawh rei ṭhu tawh loin a chhuak zui ve nghal. Alexa chu a lo inchap darh leh nasa mai a, "Mu ang aw. Thawnthu ka hrilh ang che. Chhiar tawh loin." Tiin a kai a, a ṭang nasa ngang mai. "I sual êm mai, ka mu duh lo" tiin a ṭap fap fap a. 

"Mipa naupang fel leh hmelṭha i nih kha..e! Tihdan ka hria, number a lêt zawngin tu nge sawi thiam thiam kan ti ang. Chuan, i chak zawk chuan dawrah kan kal leh ang." A ti ta zung zung a. Alexa hi pawn chhuah an phalsak vak lo va, chuvang chu ni maw pawn chhuah hi a châk sakhai a, chu chu remchangah a hmang ve a ni. Alexa mitmenga phurna lo lang chu a lo en reng a, "Min hneh leh chuang lovang" ti nang nang chungin khumah a lâwn ta a, rang takin ani pawh a va mu ve nghal. Chunglam melhin an zangthal ve ve a, Rinhluzuali chuan number chu 100 aṭangin a lêt zawngin a chhiar boh boh a, 67-ah a tisual lui ta a. Alexa a lo nui awr awr mai. Tichuan, Alexa chuan a han chhiar ve ṭan ta a. A chhiar thla zel a, 76 a chhiar lai chuan a muthlu ṭan ta a, a riat zui ta nawk nawk a. Kar lovah a muthlu ta lâwp lâwp a, Rinhluzuali chuan a siamrem vat a, jection ngai lova a muhil thei chu a lawm kher mai. A muthilh hlan chuan a pindan hnawk zawng zawngte chu a thianfai ta vek a, aw thian kharh thawm a hriat chuan a phu chiang hle. Alexa pindan kawngka biang ngheng chuan Remsangzuala chu a lo ding reng mai a. A hamhaih deuh, eng chen nge a lo din tawh tih erawh a hre lo. 

"I jection em ni?" Ring vak lo hian a ti a. 

"Aih, chiu mut zel chu a buaithlak ka tia" a lo ti satliah a. Sangzuala meng phâwk deuh chu a va hmu hman. Mahse, a inthunun leh vat tho a, "Wow! I va dangdai ve. Ka nu a lawm dawn hle mai" tiel miah lo hian a ti a. Chu chu a rindansa kha a ni ve hrim hrim. 

"Keipawh ka lawm alawm. Chiu mut zel chu a khawngaihthlak" a ti ve duah a. 

Alexa thawmhnaw bal pahnih khat chu a hum khawm a, in hnuaia zu suk a tum a ni. 

"Vani kutah dah rawh." A rawn ti a. 

"Ka ti ve thei alawm, a harsa lo em mai." Tiin in hnuaiah a chhuksan ta a. Sangzuala bula awm hi nuam a ti miah lo, a palen vang nge a mizia vang zawk ni a uap rûn zel a, a zalên lo va, tihsual leh ṭawngsual hlau reng rengin a awm ṭhin a, hnaih loh hram a duh. 

Vani nen an inkawm leh ta mai mai a, Pi Sangi erawh a pasal boralta farnu te inah a lêng a, pa ber boral tawh mah se; an la inpawh reng tho. Vani chuan nui chungin, "Hlute, bialpa i nei em? Tunah" a ti a. 

Nui rah rah chungin, "Nei ve e..nang?" A ti sap a. 

Vani chuan hmun dang a lo en daih, a thlirna lam a va hawi ve nâk chuan Remsangzuala bawk chu eng file emawni bihin a lo ṭhu kur mai. An thusawi a hre leh vek dawn a nih hi..mahse, a ho êm mai. 

Vani chuan, "Nei ve dawn lawm ni? Mahse, kei aiin a naupang a" a ti zuah zuah a. 

"In inthlau viau mi?" A tih chuan, "Kum 3 chauhin. Mahse, min duh tak tak pawh ka ring lo" a ti ngial a. Han sawipui vak dan tur a hre lo hle. Alexa harh a hun hnaih tawh avangin in chungah a chho a, rei a nghah hmain a rawn harh ta chiah e. A va luh chuan, "Ka ril a ṭâm" a lo ti nghal a. Duat deuha a samkir chiat zût pah chuan, "Eng nge i ei châk?" A ti dam thlap a.

"Ih..englo, chow ka ei duh. Apa siam ang kha" a tih chuan a meng nur deuh. 

"I pa siam ang chu eng nge?" A tih chuan, "Apain a siam thiam" a ti leh ringawt. "In hnuaiah chhuk phawt ang aw. " Tiin a kai thla ta a. A muhil thophang a ni bawk a, a nungchang a zawiawi viau mai. In hnuai an thlen chuan a pa a hmu ta a, rang fea va panin, "Papa, chow ka ei châk, hmana i siam ang kha" a ti ta reuh a. Sangzuala chuan, "Hmm, lutuk tlat, ka fapa tui tih dan berin kan siam leh ang. " Tiin a tho ṭuih ṭuih a, Hluzuali chuan lâi deuhin a lo thlir ve reng ringawt. Sangzuala chu chokaah a lut a, chow lachhuakin a inpuahchah ṭan ta a. 

"Puih i ngai em?" Hluzuali chuan a lo ti vat a. 

"Purun sen lo chan ta che" a ti a. A che ve ta vat. Inbe lem lo chuan an che dun mawlh mawlh a, Alexa leh Vani te an lo inhnial thung. Sangzuala'n, "Ui leh kel thlunpawlh ang mai" a ti hluk a, Hluzuali pawh a nui hak mai. Purunsen a chan zawhah zikhlum leh carrot chu an chan dun a, duh aiin an inhnaih mah mahin a hria. A uap hi a na lutuk deuh a ni. Alexa a rawn tlan lut a, "Ate, insiam zo tawh em?" Tiin Hluzuali chu a melh kal a, "La zo lo deuh, zo ṭêp aw" a lo ti var a. Sangzuala'n a melh reng a ni tih a hre hauh lo. Sangzuala mitmengah chuan eng emaw hmuh tur a awm. Mahse, a reh leh nghal daih thung. Chow chu a kang zui ta sar sar a, a rimtui ngei mai. Hluzuali chuan Apuia msg a reply a, Sangzuala biakna reng reng a lo hre lo chu niin, "Alexa nute.." ring leng lâwnga a rawn tih takah chuan a phu zuk a, "Aw..eng nge?" A ti bah nak a. 

"Lo vil lawk ta che, souce a zo tlat, ka han lam lawk ang e." Zaidam deuh hian a ti a. 

"E..aw ..aw le." Tih leh din a rual nghal. A phone rawn melh zawkin, "A thlum hle ang" a ti sup a, a chhuak zui nghal. Rinhluzuali ner sak chu a hmu lo,. Ti nge maw a ṭawngkam hman dan hian awmzia nei tlata a hriat ṭhin ni. Mei tawitê hi chu a nei ṭhin chiang. Mahse, a ngaihtuah zui peih lo. Chow chu a lo vil ran a, a rawn let rang viau. Souce chu a pawlh a, a rawng pawh a mawi e. An peihfel meuh chuan Hluzuali pawh a rilṭam ta viau. An pali chuan dawhkan kilin an ei ta hlawm a, tui an ti tlâng hle. 

A pa nen chauha an ei tawh hnu chuan Alexa chuan, "Pa, i thi chhin tawh em?" A ti leh ta mauh mai. Sangzuala mitmeng a danglam zawk, mahse, inthunun vatin, "Aih, thih chhin theih a ni lo alawm. " A ti a. A fapa chu ngaihtuah hmel fêin a melh bawk. 

"Mahse, a theih alawm.." a ti lehzel a,. 

"Khawvelah thi chhin tumah an la awm hleinem, ka fapa.." zaidam takin a lo ti a. 

"A nih leh khaw nge Anu" a ti leh ta daih mai. Vani leh Hluzuali an inmelh zawk. Sangzuala hamhaih hmel chuan khawngaih a la ta nge ni, Vani zawk chuan, "Bawihte, Anu chu vanramah a awm ka tih kha." A ti dam diai a. 

A lu thing nar narin, "A ni lo" a ti a. Chow chu a ei chhunzawm leh nghal. An hrilhhai tlâng hle tih hrethiam lo niawm takin tui ti takin a tep chap chap a. Hluzuali pawn Sangzuala te chanchin a lo hriat silâwn ve tawh avangin a khawngaih ru hle. Pa tan chuan chhanna pek a harsa ve khawp ang le. An boruak ngui ru zet rawn tikiang turin Pi Sangi a rawn haw ta hlauh a, a tupa chuan a lo lawm cheng cheng a, an inpawm leh uaih uaih a, Hluzuali pawn an thil eina vel chu a lo tifel ve mek bawk. Vani erawh thawmhnaw faisa nawt turin mikhual pindanah a lut a. Thleng vel a sil zawhah Alexa nen pawnah infiam turin an chhuak ta a. Naupang awm ngai lo ta nafam chu han zawh loh lek lek chang a nei ṭhin. Mahse, lainatna mit hmanga a thlir chang chuan chu mipa naupang, pawisawi lo leh duhawm tak chu a lainatawmin a khawngaihthlak takzet a ni. A hringtunu pawhin a duh loh, nu hmangaihna la tem ve ngai reng reng lo a nihna te, 'Anu' tia koh tur a nei ve lo hrim hrim te chu a vanduai a ti. Ama nun nen a han khaikhin a, ani chu la vannei zawkin a inhre deuh. Nu leh pa nei tawh lo mah se; nu leh pate hmangaihna a tem hman ve ve tal a, chuta karah amah leh amah a la inenkawl thei tal bawk. Alexa erawh natna buaithlak tak a vei a, ṭhian kawm ve pawh phalsak a ni lo. A chhan chu a ṭhiante tan a hnawksak an hlau a ni. Tihian nau awmtu enkawlin hunbi siamsak thlap a ni a, a tettê aṭangin a nun a chêp nghal chu a nia. Lainatawm tak a ni. 

Alexa a bual lai chuan, "Ate, nu i nei em?" A ti lehpek a. He nau hian vei eng emaw chu a nei ve chiang a ni. 

"Nei bik nang" a ti ta thên a. Alexa hmelhmai pawh a dang ta deuh. "Keipawn ka nei miah lo." A ti reuh a. Hluzuali chuan a khawngaih kher mai. Thawmhnaw an inhaktir laiin a pa a rawn lut ve a, "I fai tawh bawk a, intibâl tawh lo la, tlaiah Ateii hi kan va thlah dawn nia. " A ti a. Alexa mitmenga phurna namên lo lang chu Sangzuala chuan lainat zetin a lo thlir vawng vawng mai. Pawn chhuah hrim hrim a châk tih a lang. A pa sawi ang ngeiin tlaiah chuan Rinhluzuali chu Sangzuala car-in an va thlah ta a. Hluzuali chuan ṭul a ti em em hran lo, mahse, Alexa avangin a hnial duh ta lo mai a ni. Back seat-ah a ṭhu a, Alexa chu car tukverhah a dak vauh vauh reng a, "Apa, enteh, saw lapaw chini a tam mai" tiin a au chel chul a. A hawina lam apiangah chuan hmuhnawm hmuh tur a awm zel a nih hmel. Rinhluzuali te in luahna kawtah an ding a, han chhuk mawl tawp chu a hreh ve deuh si, "Lo peng lut ve u la" phur vak lo hian a ti a. 

"Hun dangah zawk aw. Ka fapa hi kan lenkualpui lawk ang e." A ti a. Ani pawh chuan a chhuksan ta a. Eirawngbawl pahin Apuia nen an inbia a, a hma ang khan a be tui hleithei meuh lo. Mahse, thutlukna a lo siam ve luklak tawh si a, han biak ṭhat loh ngawt kha nuam a ti si lo. "Karlehah inentir pahin ka rawn zin dawn, inhmuh tum ang aw" a rawn tih phei chuan a sa vek thei. Mahse, Apuia chu a khawngaih si, "Tehreng mai, ka rawn kan ang che." A ti ve ta nge nge a. Han inhmu se boruak a pangngai leh theih mai a beisei. 

An zanriah ei laiin an in luahna, Pu Sailova te fanu naupang ber Miriami a rawn kal a, "Hlute, vawiina lo thlahtu che kha Sangzuala a ni em?" A ti lang lâng a. 

"Aw nih kha.." a lo ti var a. 

"Awii, ka starpa a nih kha. A chhe lo e tiraw? Engtin nge in inhriat teh daih?" A ti hlut a. 

"A fapa kha ka awmsak ṭhin alawm" a ti mai a. Saii chuan, "E! I nau awm pa a ni maw? Ka hre ve ngem le?" A lo ti a. 

"Hre ve ang, a lar alawm, IG-ah Remsangzuala tiin a indah. Lo follow ve r'u.." Miriami chuan a ti chul a. 

Dami chuan, "Miriami meuhin a star chu a chhe lo ang, stalk ve tur a nih chu,. " A lo ti ve a. Miriami hi nula harhvâng tak, mahse, lerh lo tak a ni thung a, mipa ngaihsak lo lutuk ang kha a ni ve a, ani meuhin a phulpui hlut mipa chu a chhe lovang tih a rinawm. 

Vla a rawn lang lo ve khiah a, Miriami a leng ta sa sa, an incard den ta vel mai mai a. An hlim dar dar viau,. A phone a rawn ri ta tlang tlang a, Alexa pa a ni tlat. Dar 10 a ri lek lek tawh si a, thil tha lo lam a nih ring rilru deuh takin ngaihṭha vak lo hian a la ta a. 

"Hlupui, ka tibuai che a, pawi ka ti, ka fapa hian a lam sek che a. Kan muhil thei lo chu a nih hi mawle.." inthlahrun hmel deuh hian a ti a. 

"A va mak ve aw. In jection em?" A ti a. 

"A duh tlat lo, a tâl pît zel a, a piin a lo lainat ve bawk si. Engtin nge ni ta ang le? Zanin chauh chu i rawn riak mai dawn mi niang?" Ngenngâwl tak hian a rawn ti a. 

A ngawih dat hnuah, "Nia, a pawi chuang hleinem. Taxi ka lo bia ang" a tih rual rualin, "Ka rawn hruai ang che. Ka rawn kal nghal aw" tih leh phone dah a rual a.

A ṭhiante bulah, "Ka nau awm kha a damlo a, riahpui a ngai dawn tlat, a pain min lo hruai dawn." A ti a. 

Miriami lah a lo phur, "Hetah lo luhtir rawh aw. Awii, ka va inen lawk. " Tiin pindanah a va tlan lut. A phi ruai a ni ber e. Rinhluzuali erawh a awm a nuam chiah lo, zan rei tawha an pahnih chauha motora chuan dun chu a eng emaw ti hreh riau..engvang tak chu ni ang maw?!