Nau awmtu ..5

NAU WMTU.. (4)

Ziaktu : Toni Râlte

A nau awm tur nen chuan an inhmachhawn ta ran mai. Alexander chu mipa naupang kum 4 bawr vel tur a ni a, a sam chu a kir chiat reuh a, a ngo a, a duhawm takzet. Rinhluzuali chuan han biak lumlam vak dan a hre lo thung. Pi Sangi'n, "Bawihte, hei hi i nuteii a nih hi, Nute tiin i ko ang a, amah hian a awmpuiin a enkawl ṭhin dawn che a ni. " A ti siam siam a. Alexa chuan a melh vung vung a, chutah Hluteii beisei loh lutukin a rawn pan phei a, a kurta hmawr chu na zeta pawtin a tlanchhe zui nghal daih. Hluzuali pawh a hrilhhai angreng hle. Pi Sangi chuan inthlahrun hmel deuh hian, "Lo hrethiam hram rawh. Sawi loh theih loh a ni bawk a, ka han sawi tlang pawp mai ang e. Kan naua khan natna buaithlak zet mai a vei pek a! Attention Deficit Hyperactivity Disorder a nei a nih kha. He natna hi nang chuan i la hmelhriat chiah lo maithei a, hetiang natna nei te hi chuan eng thilah mah attention an pe rei thei lo va, che loin an awm hleithei lo, a chimawm leh ngeiawm zawngin an harh a, lehkha an zir pawhin 2 mins aia tam attention an pe hleithei lo, chu chu a nia kan naua khirhna em em chu, hei vang hian a nia nau awmtu kan thlak chhên ni, mi dawhthei leh hmangaihna nena en thei lo tan chuan a ngeiawmin kuk lawlh te pawh a châkawm ṭhin ang. Nang chuan nau pali lai i lo awm tawh a, i dawhtheih ngei ka beisei ve ngawt a nia. A pa leh kei tih loh chuan an thunun hleithei ṭhin lo, mahse, ṭha i tih angin enkawl rawh. Phalsak i ni, hrem i duh pawhin thisen chhuak khawp a nih loh chuan a pawi lo. A hlauh thiam chea i thunun theih khan a ṭha a ni mai. Harsatna i nei ang em?" A ti ta mawlh mawlh a. 

Rinhluzuali chuan a chil a lem khawlh ringawt. Dâwt a lo sawi tawh si a, nau awm ṭhin tak takah an ngai ta si, ama thangkamah a âwk dawn ta chu a nih hi,. Chutiang natna nei naupang chu a enkawl thiam dawn em mawni le. Mahse, pawisa a mamawh si, a kut humruhin amah leh amah a infuih char char a, "Nei lo e. Theihtawp ka chhuah ang" a ti ta a. 

Chutihlai tak chuan in chung aṭang chuan mi pakhat hi a rawn pen thla pâwk pâwk a, a kamiz bân chu a thlep ṭha pah mawlh mawlh bawk. A sang viau mai, 6'1 emaw 6'2 ft emaw vel a ni maithei. A lu chu smart takin a mêt a, a vun a êngin a sâr vuah mai. A inchei dan pawh a smart thlip thlep khawp mai. A mithmul buk leh chhah lam lek lek hnuaia a mitmeng chu a rum lam hret a ni, a hnarngul invuah dan pawh a dik fû mai. A hmui erawh a pan lam a pâwl mah a, a khabe hmul chu a inhmeh khawp mai. In hnuai a rawn thlen chuan Rinhluzuali chu a melh zawk a, a duhtawk dêr. Pi Sangi chuan, "Mama, hei hi Hluteii chu a nih hi, Bawihtea nanny thar tur" a lo ti var a, Rawn melh lehin chu pa chu a vei nuih suk a, a kut pharchhuakin, "Remsangzuala ka ni e,. Ka fapa hi ṭha taka i enkawl ka beisei" a ti thum chhak a, Hluzuali pawh chuan lo ban ve vatin, "Ka theihtawp ka chhuah ang" a ti ve sap a. Chu chu an inbiakna awmchhun a ni rih. Alexa leh Remsangzuala chu pafa an ni ang tih hriatthiam a har, inanna an nei miah lo. Alexa lah a sam a kir chiat a, a biang a puarin a rah vei ṭhat bawk nen. A nu zawk a chhun a ni ngei ang. Remsangzuala chhuak tur chuan a nu chalah a fawp zauh a, "Ka fapa chu khawiah nge a birûk leh tak aw" tih pahin a zawng kual a, Pi Sangi'n, "Hlute, hawh, in chungah Alexa roomah ka hruai ang che" a rawn tih avangin in chung lamah an chhohsan ta a. 

Alexa room chu a zau angreng, toys a lo let phung a, khum erawh felfai taka phah thlap niin naupang pindan a ni tih hriat takin bungraw awm ho chu an cute hliah hliah mai. "Nau awmtu kan lak hian Alexa pindan depah hian an mu ve mai zel a. A zau lo naa a nuam ve tho turah ka ngai. Thla khat hnuah chuan nang pawh i pindan i luah ve thei tawh ang chu tiraw?" Pi Sangi chuan a ti leh siam siam a.

"Ni e.." a lo ti ringawt. 

Pi Sangi chuan a kut hmalam suih ât pahin, "I nitin hun hman dan tur lam sawi tawh ang aw. Alexa hi school kal chi a nih loh avangin in lamah tutor kan rawihsak a, dar 10-ah a rawn thleng ang. Darkar khat an inzirtir ang a, chumi chhung chuan Alexa thawmhnaw leh bungrua eng emaw i lo dah fel ang a, suk ngai a awm a nih erawh chuan Vani kutah i dah dawn nia. Nau awmtu te hi in chhung sekrek hna kan khawihtir ve ngai lo. Tuition an lak zawhah chaw chhun ei hma zawng hi muthilh tir kan duh a, tihmut hi a harsat êm avangin kan chiu mu mai zel. Tichuan, Alexa ei châk zawng chaw chhun erawh i siamsak a ngai dawn thung, dawra order ngai chi a nih erawh chuan min hrilh mai dawn nia. Thil a ei zawhah a infiampui a ngai a, a nin hunah chawhma lama a lehkhazir kha ennawnpui leh a ngai ṭhin. Hei tak hi a nia nula dangin harsa an tih em em ṭhin. Mahse, i thiamthil engpawh hmang hreh miah suh ang che. A la nêl dawn lo che a, vawiin chu in innêl theih dan kawng i zawn phawt a ngai ang. Lehkha zir zawhah bualfai a ngai dawn a, inbual erawh a harsat em em lo, tui hi a ngaina a. A inbual zawhah a ril a ṭam leh tawh ṭhin a, thingpui emaw bawnghnute emaw i pe mai dawn nia. A bak chu a tlachawpin kan sawi leh zel ang. I riah dawn loh avangin zan lam chu ka sawi rih lo mai ang. A chet leh ninhlei nasat avangin a intal hah ṭhin a, a hah chuan a thinchhia a, chimawm a chhuah ṭhin. Hetia ka han hrilh thlap thlap chhan che chu buaina i tawh loh nan a ni. Nangmahah hian beiseina sang tak ka nei tlat a nia. Min tihbeidawn loh hram ka beisei.." a ti leh ta charh charh a. Rinhluzuali pawn a ngaithla uluk kher mai. Thil phurawm leh huphurhawm tak ni bawk si a hmachhawn dawn chu a nia, ani ang duang chuan a thei ve ngût ang e mawle. Mahse, sawi leh sawi hnu Hluzuali hi a nu aṭanga rilru puitlin riauna nei, luhlul ve tawk tak a ni a, a tuma a bei a nih phawt chuan ama kawng na nâ na zawng a sat kaw ve zel thei turah ngai ang. 

Pi Sangi sawi ang khan dar 10 rik hma deuhin Alexa tutor Sir Samuela chu a rawn lang ta a. Ani hi khawpuia awm ten an chhawr rim pawl tak a niawm e. Darkar bîin naupang eng emaw zat lehkha a zirtir ṭhin, naupang a ngah viau phei chuan ni khatah ringawt pawh a hlawh nual dawn tihna a nia. Mahse, a naupang enkawl harsa tak tak enkawl chu a hautak ve fû maithei bawk. Samuela chu sang ve tawk tak, thau lam pâwl mah a ni a, a ti lang palian zual ti mai ang. A hmel pawh chutia chhia han tih tur chi a ni hran lo,. Hluzuali nen pawh an han inchibai lawp lawp a, a nelawm phian lehnghal. Alexa study roomah lutin Alexa pawh an han ṭhut tirh chuan a fel viau,. Mahse, rei a daih mawlh si lo. A ninhlei leh che sek chung chuan Samuela chuan a zirtir mawlh mawlh tho a, awka vin pawh a hmang chuang lo. Alexa chuan hlawkpui tak ang maw. Hluzuali chuan pi Sangi sawi ang khan an lehkha inzirtir chhung chuan Alexa thawmhnaw leh bungrua te chu a lo remfel mawlh mawlh a. An inzirtir zo a, Samuela chuan, "Ka kalsan phawt ang che u. " A rawn ti a, a lo buk khum nghat ringawt. Mipa hi Apuia aṭang khan han kawmnêl tak tak a nei thei tawh lo, ngaihzawng phei chu a nei leh tawh lo hrim hrim. Hei chen hi an inbepawp ta lo va, engtin chiah nge nun a hman zel ang tih ngaihtuah châng chu a nei ve ṭhin. Seni nen an inbe zeuh zeuh a, Apuia chanchin erawh an sawi ngai lo, a zawt duh lo hrim hrim, Seni lahin a sawi ngai bik der si lo. Hruaii pawh kha a la nula ve zel a, Tin, Pi Mawii kha Chhuana khan a luhkhung titih a,.sawi an kai hle a ni. A pa thihna a la rei loh nen, a pa thawhchhuah sa hmangin nuam a chen a ni ringawt. Tin, Seni leh a bialpa Muanpuia te pawh inneih an tum hnai a, kal ve turin a rawn sawm nasa, a hunte a thlen chuan a kal ve mahna le. Mahse, Apuia a hmu leh thut ang tih a hlau bawk si. Ama tawkah a rilru a buai ve ṭhin hle. 

"Hey, hey" a kawra rawn pawttu avang chuan a ngaihtuahna kal ding lai chu a rawn harh zawk. "Aw..eng nge ni ta? I mut a chhuak em?" A ti sawk sawk a. A lei a chhuah khum zuk a, "Ka mut a chhuak ngai lo" a ti ta reuh a. 

"I muthilh a hun tawh alawm, muhil rawh aw. Thawnthu ka chhiarsak ang che." Zaidam deuh hian a ti seuh seuh a, amah pawh a inawih lo zawk hial, a zaidam vel lutuk chu. 

"Aih, ka duh lo." A ti tlat bawk si. Khumah chuan a mut luihtir a, a tal nasa ngang mai. "Ṭha deuhin ngaithla la, i mut a chhuak mai ang" tiin naupang lehkhabu chhah vak lo hi a va la a, a keu phawk a, chhiar hmasak ber tur a hre lo hle. Alexa lah chu muthmunah pawh a vir sek a, a thle tawn sek bawk. Chiu mut nge nge chu a ngai dawn a nih hmel. In hnuaiah a chhuk a, Pi Sangi a hmu mai si lo va. Vani erawh a lo awm a, "Englo, khaw nge nu Sangi hi le.." lai ru deuhin a ti a. A hminga han koh thut kha a hreh ve deuh a ni maithei. Vani chuan hlim hmelpu tak hian, "A pangpar ho a va en leh lawk a niang. Eng nge ni ta?" A ti var a. 

"Alexa khi chiu mut a ngai a, engtia han tih tur nge ka ti mawle" a ti niah niah a. 

"E! Ni dawn tak, hawh.." tih leh in chunga chhoh a rual a, a zui ve nghal zat. 

Bawm pakhat chu a hai rawk rawk a, mut duhna damdawi leh syringe a rawn phawrh ta a, "I thiam ang tiraw?" A tih chuan a mang a lo ang ru deuh, sen ap ap chungin, "Ka la chiu ngai miah lo a.." a ti a. Vani chuan makti hmel a pu hran lo hlauh, "Nia, tih ngai loh chuan a risky ve alawm tiraw? Lo en la, a harsa lo a nia. " Tiin damdawi chu syringe-ah a kap lut a, Alexa lo mu vir sek hnenah chuan, "I damdawi pek leh i hun tawh a. Bawkkhup rawh le.." tiin a han besâwm kual a, Alexa pawh chu thuawih deuhin a bawkkhup ve mai. 

A mawngtamah chuan lapuaa a hruk hnuin a kap lut ta a, Rinhluzuali chuan a lo en reng mai. A tih ve theih mai chu a beisei. Mahse, inzir ve hlek erawh a la duh tho mai. Alexa chu kar lovah a ngui ṭan a, "Thawnthu ka ngaithla duh" a ti sek mai. Chuveleh Hluzuali chu che vatin naupang thawnthu chu a chhiarsak ta melh melh a. Rei a chhiarsak hmain Alexa pawh chu a muhil ta siai siai a. A muthilh chhung chuan tihtur em em a nei lo bawk a, Vani a zu pui ve ta mai mai. Vani hi amah ai chuan a upa hlek maithei, a nui sâng reng chu a ngainatawm riau a, a ṭawng a zangkhai thei bawk si. Pi Sangi pawh a rawn chhuk ve leh tawh a, Alexa muthilh thu a lo hrilh vat. "Vawiin chu dawr ami kan order dawn nia, eisiam lam hi eng nge i an reng reng? " Tiin a zawt a. 

"Aa..ka sawi thiam chiah lo, tui in tih leh tih loh a ni mai. Bawlhlo azir te pawh a niang chu.." a ti duah a. 

"I mamawh chu kei emaw Vani hnenah emaw i sawi zel dawn nia, inthlahrung suh" a ti sawk sawk a. Rinhluzuali pawh a bu ve nghat mai. Pi Sangi chuan din hluai pahin, "Lalvan, ka lo mangnghilh ṭêp alawm, vawiin hi Pu Zara thihcham kha a nia, nizanah min rawn hrilh tak kha mawle. Ka va lan ve zawk loh chuan..Hlute, Vani bulah i mamawh i lo sawi mai dawn nia aw." A ti zung zung a, a pindanah a lut ta a. Pi Sangi leh Vani te pindan hi in hnuai lamah a awm a, mikhual room pakhat a awm bawk. In chung lam hi a te hlek a, Alexa te pafa pindan bakah nau awmtute riahna tur pindan zau vak lo a awm a, Alexa study room lian lo tak a awm bawk. An in hi a tawk tiu teu viau mai. Pi Sangi chhuah hnu chuan Vani nen chuan an inkawm ta mai mai a, tihtur em em a awm tawh bawk si lo. Vani hian a hna a tlin hle a nih hmel.

"Ti daih ila, Vani, ka û lo mai ang che. Khawi khua nge i nih?" Zahtheih loh chhuahin a ti ta râwih a. 

"Min û suh, nula leh nula in û ṭût ṭût te chu a..hehe, kan khua maw khitah Zokhawthar daih mawle.." a ti zangkhai leh vah a. 

"Heta i awmna a rei tawh em?" A ti lehzel. "Alexa pian hmain ka awm tawh. Ka pu boral erawh ka hre hman lo chiah chiah,. Nang khawi khua nge i nih ve?" Vani pawh chuan a lo ti ve zat a. Rinhluzuali pawh chuan a pate khua Bungpui chu a sawi ve mai bawk. 

"Englo, ih, Alexa nu hi a boral tawh nge? An inṭhen le? Sawi chi a ni em? Mak ka ti deuh a." Rinhluzuali chuan a ti ta thâwr a,. Vani chu a thle bak a, eng emaw ngaihtuah hmel a pu deuh, Hluzuali lah a lo inthlahrung nasa mai. Mahse, Vani chuan dam dap hian, " Thi lo ve, sawi nuam vak chu a ni lo. Mahse, i hriat ve chu a ṭhat ka ring. Englo a nia, Alexa nu leh U Sangzuala te hi inzui ve reng reng, inkawp nghet kan tih ang kha an nia. Mahse, Alexa nu chhungte hian U Sangzuala hi an iai a, tun ang hian an khawsak a la ṭha em em bik lo va, U Sangzuala lahin zirna a la chhunzawm ve bawk nen, U Mali sumdawn bulṭan nan an pawisa an hmang nasa bawk sia, Alexa nu te lam an khawsak a san bakah an vengchhungah pawh a lar pawl an ni ve bawk sia. Mahse, Alexa hi a pai ta sia, palai an va tir a, an rem ta si lo. U Sangzuala'n inrûk a rawt khan Alexa nu khan a duh tlat lo va. Alexa hi a ruka tihtlak an lo tum a, mahse, U Sangzuala hian a hrechhuak ta sia, Police hnena report-ah a vau ve ta a. An titla ngam ta lo a ni. Tichuan, Alexa a lo piang a, a pianhlim ti ila a nu bulah zan khat chiah a riak tihin a tukah U Sangzuala te hi an rawn pe ta tawp mai a ni. Ka pi hian a enkawl a, kei hi nau khawih ka zeihawi vak lo nen, ka pi pui turin nau awmtu an ruai ta bawk a, a buchip zual lai kha chuan kan buai thei asin aw. Rilru hi a châwl lo a ni ber, U Sangzuala rilru na lutuk lah chu mi â ang deuh hian a khawsa a, a bawrchhawrin a pindanah a tawm tlawk tlawk ringawt mai a ni. A fapa hmel a hmuh lahin a rilru a na zual zel bawk si, a khawngaihthlak a nia. Chuan, a rawn ṭhat chhoh hnu, Alexa pawn kum khat a rawn tlin ve hnuah Alexa nu chuan sumdawng hausa pasalah a nei ta a ni. A fapa hi a rawn ngaihsak ngai eih lo, Ka pi pawn a ti ve alawm, 'Kha chen Bawiha nen an lo inzui a, awlsam taka midang a neihsan thei leh a ril arah a fapa a ngaihsak miah lo thei hi mak ka ti ve thlawt. A thluak hi an su hneh viau a ni mahna.." a ti ve hial. Tichuan, ih, Alexa kum 2 leh a chanve a nih khan a natna hi an hmuchhuak ta bawk nen, ka pi hi ka khawngaih thei a nia aw, a tu leh fate tan a inhlan pumhlum ṭhak a ni ber e. U Sangzuala'n ṭan la tharin School lamah rilru a han pe chho ta a, tunah chuan mite pawhin an bawh ber pawl a ni ta a, khawsak pawh an khawsa ve thei ta deuh a nih hi.." a ti dap dap a. Hluzuali chuan ngaihnawm a ti kher mai, tin, Remsangzuala leh Alexa nu te chanchin a hriat rual khan mi pakhat a rilruah a rawn lang zawk mai, Hmangaihpuia bawk kha. Ani pawh khan chhan leh vâng engmah sawi loin a rehsan tawp a, tun thlengin engmah a la sawi ta lo chu a nih hi mawle..a hlim viau a ni ngei ang. 

"Alexa nu chuan a va timak ve leh. Chuan, ti daih ila, Zokhawtharah chuan i chhungte an la awm ve tihna mi?" Tiin titi dang deuh a han vawrh a. 

Vani chuan, "Alexa nen hian kan inang deuh reng, ka nu leh pate an inṭhen tawh a, ka nau hi ka nuin a awmpui a, kei chu ka pa leh ka pite nen. Mahse, ka pi a boral hnuah ka pain nupui dang a nei ve leh a, a sual em em chuang lo nâin a fa chhawm keimah ang rual nen kan inmil vak lo va, Aizawlah ka rawn awm ta daih a nih hi. Ka pite hian min duat sia, tihian an fanu ang tak takin min en ve a, U Mali lah a rawn haw khât si, a theih chen chen chu hetah hian ka awm ka ring." A ti ve duah a, hmeichhe nelawm leh ṭawng duh ve tak a ni. A rilru pawh a tluang viauin a rinawm. Rinhluzuali chuan, "Inânna kan nei ve tho a nih chu. Kei chuan nu leh pa ka nei tawh lo thung." Tiin a chanchin tuma bula a sawi duh ngai loh a ṭhen a zâr chu a hrilh ve a, Vani nen an inkar pawh a ṭhat phah sawt niin a hria. 

Alexa a rawn harh takah chuan a ril a ṭâm ta ngei a, a ei châk zawng a sawi lah chu, "Octopus note" tih a ni mauh mai. Vani a hrilh chuan, "U Sangzuala ka'n bia ang e" tih leh phone a rual a,. "Octopus note a ei châk, a mumangah a mukbang en ṭhin a hmu a niang" a ti a, a nui har har bawk. Lehlam ṭawng erawh a hre pha lo. Phone a dah hnuah Vani chuan, "A rawn dah dawn a nih chu, kan naua hi chu a dangdai a nia aw. " A ti sap a. A lo khi ve hûi ringawt. Alexa chu mu tho hlim e ti lo chuan a tlan kual leh sek tawh a, a toys ho pawh chhuatah an let leh rum tawh. Hetia han en mai chuan "A va hrisel ê" tih mai theih tur a nih laiin natna buaithlak tak a vei mauh mai si. Nu leh pa mawlmang tak tan phei chuan enkawl thiam a harsa dawn hian a hria, a râwlthar chhuah thlenga he natna hi a neih phei chuan an buai zual viau maithei a ni. 20 mins âwm velah Remsangzuala chu helmet khum chungin hmanhmawh hmel zet hian a rawn lut a, Hluzuali rawn enin, "Hei aw, a siam lam chu i tithei mai turah ka ngai. " A ti sup a. Biak hman lohin a chhuak leh nul nul. Vani'n puanpho a seng lai tak a ni bawk nen, an inbe tuitam lo ve chiang khawp mai. A thil rawn dah chu a han en a, a râp deuh tlat. Mahse, a siam ngei a ngai si,. Youtube-ah a siamdan a en ta ringawt a. A risk kual ve ta nawk nawk mai. Vani rawn kalin a rawn pui ta bawk a, a ni khatna chu a beisei ai daihin a hahthlak loh angreng zawk. Alexa thil ei lah chuan a ei uluk ngang mai a, ṭawng pawh a ṭawng lo. Vani nen anni pawh an inhnawhpuar ve a. Alexa puar zawhah a han hahchawl ve zuai a, mahse, kawt lama infiam a ngen zui lehnghal. Pipuah te chuan an han inthên ang lâwp lâwp a, Alexa chuan a ngaina nge ngaina lo pawh a hrethiam tawh lo, a sawithiam dan berin a duh dan dana awm tura Alexa uitê ni maiin a inhria, mahse, a hna a ni miau a, sawisela bansan thei dinhmunah a ding hlawl si lo. 

A inbual hunah chuan an inhruai lut a, Inbual nuam ti em em Alexa pawh a phur viau. Bath tub-ah chuan a lut tharh a, Hluzuali chuan a thiam ang anga bualin a be pah siam siam bawk. "I pa hian a duat che em? A fel em? Api nge apain duat che?" Tih vel mai mai bak sawi tur a hre chuang lo. Alexa lah chuan a'n chhang ṭha duh mai mai khawp a. "Apiin min duat daih zawk. Mahse, Apa chuan thil min leisak ṭhin." Tih angreng, "Anî chu maw nang ai daih hian a hmelṭha asin. Min duat bawk si..ih, ka tlangval hunah anî bulah vairamah ka awm ve daih dawn." Ti ten a ma tawkah a titi ve nasa mai. Hluzuali pawn a hmu duhawmin a ngaina ve ta deuh. A thawmhnaw a haktir lai chuan, "Ate, i thi chhin tawh em?"a ti hlawl mai a. Hluzuali pawh a hrilh a hai kher mai. Inthingharh vatin, "Aih, thih chhin theih a ni lo alawm..Nang pawh thi chhin ve miah suh." A ti mawlh mawlh a. 

An ngawi dun ta reng a. A fai ta bawk a, chawhma lama an zirlai kha an ennawn leh dawn a ni. Alexa chuan a peih lo tih a hriat ngawih ngawih, mahse, Hluzuali chuan, "Tihdan ka hria, tu nge thiam zawk kan ti ang. A ṭha em? Kei aia i thiam zawk chuan dawrah thil kan lei dawn nia" ti zawngin a fuih kual a, Alexa hmel pawh a phur hmel ta deuh. An han zir dun ta a, Mathematics hi chu Hluzuali tui lohna ber a ni awm e, a tihpui a ngai miau bawk si, mahse, rin ai takin Alexa chuan a lo thiam a! A rilru kalding lai chuhin Hluzuali lahin a tiphur tur tâwkin a thiam lo der vel thul. Chu chuan Alexa chu a tiphur ta em em a, a nanny aia thiam zawk anga lan chu nuam a ti ve hle. An zir zawh meuh chuan pi Sangi hmel pawh an hmu leh ta. "In va hmuhnawm ve. Bawihtea chuan a nuteii a dah nil chiang mai." An boruak hrethiam takin a ti a, Alexa chuan rang zetin, "Dawrah kan kal thei" tiin Hluzuali a kai chat. Hluzuali chuan a mitmeiin pi Sangi a râwn a, ani chuan a phalsak tih hriat takin a lo buk khum zauh. Inkai chung chuan dawr hnai ber lam chu an pan ta ral ral a,. Dawr an va thlen chuan a lo nghaktu nula khal lam, hmai hlai phek phuk, hmelchhelo tak hian, "Lexa chu! Inhmuh a va khât ve. Apa a lo haw tawh em?" Tiin a lo be sawk sawk a. 

Rinhluzuali lam melh daihin, "A haw tawh em?" Alexa chuan a ti hê hâw a. A lu a thin takah chuan, "Haw lo a nih chu" tih pahin dawr thil chu a melh kual zuk zuk a, chocolate lam a melh ta chat. Rinhluzuali pawn hrethiam takin a duh ber a thlantir a, an chhuah dawn chuan nula bawk khan, "I pa chu min lo biak rawh aw." A ti zui hram a. Alexa chuan a chhang lem lo. Gate an lut chiah tihin garage aṭang chuan Remsangzuala a rawn chhuak phei ve chiah a, an pahnih chuan a rawn melh chiang ngang mai. A fapa chuan, "Papa,.." tih leh va pan a rual a, a pa chuan a lo pawm chat mai. Inngai leh inthlahlel taka an pafa inkuah dun chu hmuhnawm ti zetin a lo thlir veuh veuh a. 

"I lo lut tawh dawn lo em ni?" Tia Remsangzuala'n a rawn biak chuan a phu zawk mai. Insiamrem vatin, "A..aih..e..aw lut dawn e" a ti nawk nawk a. 

An pafa inpawmlut chu a zui lut ve ta a. Dar 5 a la ri lo deuh naa a ni khatna a nih bakah lânga kal a nih rih avangin Pi Sangi chuan hawn a phalsak ta hlauh mai a. A ṭhiante an la haw dawn lo tih hre rilru ranin hmanhmawh ru deuhin a haw ta a. In a thlen chuan a chau ve rawih mai. Eng em em va ti lo mah se; naupang ninhlei leh harh lutuk bula nilêng deuhthaw han awm chu chauh a na ve duh viau a ni ngei ang. Eirawng a bawl zui nghal a, a nu nen an pahnih chauha an chendun lai kha a ngaihtuah pah neuh neuh bawk. A phone riin a rawn tibuai a, Seni a lo nia, "Hello" a tih chuan a rawn thaw hlawp hlawp ringawt. 

"Seni" a ti leh a, "Hlute, ka chhe ta vek mai. Ka kehsawm chiang hle a ni." Tiin a rawn ṭap nghal hlawp hlawp. "Eng nge a awmzia?" A ti nghek a. 

"Muanpuia leh Hruaii, i nau Hruaii te an inru" a rawn ti ta mai. Maktiin a meng bial kâwk kâwk. " Awii, a awihawm loh e" a ti ngial a. Seni ṭap hawm hawm avang chuan, "A va mak êm êm ve.." a ti leh ringawt. 

"Nakinah ka lo be ṭha ang che. Ka zak lutuk hi thih daih ka châk.." a rawn ti a, a chhan hmain a dah ta daih. A thaw hawk a, kan khawvel tak hi chu aw..Seni te chu inneih tumin an inbuatsaih chho ṭan tawh kha a ni si a, engtin nge chutiang thil chu a thlen theih le? Bungpui khawtlangin Seni leh Muanpuia inngaihzawn thu kha an hre vek tawh a, a tu emaw zawk zawk kha beisei enah an en tawh lo ni khan a hre si a, a nau Hruaii chuan engtiang takin chet la ang maw?! Bungpui khuaah Seni number chiah a nei pawi a tih vawikhatna a ni hial âwm e. Thil hriatchian a châk takzet a ni. Seni'n a lo call leh hun nghah tlawk tlawk bak tihtheih a nei lo. A ṭhiante an rawn haw a, an intihfai zawhah zanriah an ei a, Rinhluzuali phei chuan tihtham a ei meuh lo. Dami phei chuan a chhan a zawt nghe nghe, "Thil ka ei ṭeuh a, vawiinah" a ti ringawt. 

A engtih mah a tui thei thlâwt lo a ni ber e. An ṭhian thum hian inânna an nei a, Kohhran an bêl lutuk lo hlawm. Mahni khua a nih loh vangte pawh a ni maithei. A bel ber Saii lah simeikhu ang deuh a ni mai. Khawtlang chhiat tawhah erawh a mawi tawkin an lang ve tho a, an va inhmang thûk em em chuang lo. Chumizan pawh chu inkhawm zan a nih rualin a tu amah chu inkhawm tum an awm lo a nih hmel. Reivakloah Dami bialpa Vla a rawn leng a, Saii pawh hian thawk khat lai kha chuan bialpa a nei ve zuk a, mahse, an inbân leh tawh a nih hmel. "Ka chau riau, ka mutsan dawn che u." Tiin Hluzuali chu pindanah a lut ta daih a, an in hi a zau lem lo bawk a, pindan pakhatah single bed pathum an hung a, an mu ve mai. Thawmhnaw dahna tur chhuar lian lutuk lo pathum a awm bawk a. A awm ve naw naw theih a ni mai e. Hostel te pawh a ang. Amah zawkin Seni chu a call ta a. 

"Aw..mate" a aw chu a chhang lek lek, a ṭap nasa a ni maithei. 

"Thil awmzia han sawi teh" a ti ta tawp a. 

"Ka sawi ang kha a ni mai. Hruaii'n U Muanpuia fa a lo pai reng alawm. Chuvangin alawm an lo inrûk.." a rawn ti ta a. A chek hlak mai. "Sawi tur pawh ka hre lo, ka khawngaih takzet che, nang aia ṭha hi chu a hmu dawn si lo va, a va â tak ..U Muanpuia chu" a ti vang vang a. 

"Hruaii a thlang zawk alawm,. A pawi lo, kan inneih hmain a mize diktak ka hre hman a, kan lo innei hman ang tih a hlauhawm zawk. E taka! Apuia a rawn haw a." A rawn ti teh daih a! Thupuifûn taka thil sawi ve lai laiin. 

"A ho êm mai. A awm sa reng maw ka tia" a ti liam puat tak naa a ruk tak chuan a ngaihven ve tho mai. 

"Awm nang, i awm laia a chhuk kha vawiinah a rawn haw chiah alawm. Min zawt ngai si lo va, ka sawi lo a nih kha. A damlo nge ni, a cher rap mai." Seni chuan a rawn ti siam siam a, "Apuia chungchang sawi a ṭul lo, tichuan, U Muanpuia te chu khawiah nge an inrûk?" Rinhluzuali chuan a ti ta daih a. 

"Hruaii nuteii te inah an tia, khaw ṭhenawmah khan. Ka pa ten U Muanpuia bungrua hi rawn la turin an chah a, naktukah chuan an rawn haw mai ka ring." Seni chuan a ti a, a hma ai chuan biak pawh a nuam ta deuh. Seni zawng thil lazam chi, ngaihsam ve tak ngang kha a nia, nat chu a na viau ang a, mahse, mahni intiharha infuihphur hram hram ṭhin mi a ni tlat. "Engpawhnise, chanchin min lo hrilh ve rawh aw. Nang chu i chak kha, i dam leh vat mai ang. Bakah ani aia ṭha kha i hmu dawn nasa lutuk." A ti sar sar a. Seni pawh a rawn nui ve leh awr awr.."Hmelah na nâ na chuan min phû lo ve alawm tiraw? Tak taka chhungten min hnem a, ka zia tawh lutuk, nia, ka lo hrilh ang che." A rawn ti a. An dah ta rih. 

Muthilh tuma a maimichhin apiangin Apuia hmel kha a mitthlaah a rawn lang zel a, a meng leh nge nge ṭhin. Seni'n a hming a rawn sawi vangte kha a ni thei ang em? Ti nge a zirlai a zo daih tawh awm sia, tunah chauh an khuaah a hawn le? A bialnu nen chuan an innei ta lo em ni ang? Nge a bialnuin a ṭhen ang a..a rilru nâ a rawn haw zawk..a ṭhu ta hlawl a, "Ti nge mawni le..ka ngaihtuah vak le. Ka engmah a ni tawh tawp si lo va" ama hriat tawk lek chuan a phun sap sap a. A va zung a, Vla a lo la ṭawng tui nasa, Saii lah hi a â ve thei si, chance pekna chang hi a hre vak ṭhin lo. Rinhluzuali erawh a mu leh daih a, a phone a khawih ta ringawt. Whatsapp-a a luh chuan number hriat loh aṭangin, "A ni khatna chu eng nge a an le?" Tih thu hi a dawng a. Dp lah chu a dah mang si lo. Mahse, Alexa pa emaw Vani emaw an nih a ring deuh, a ni khat nan nau a awm a ni tih hre tur dang an awm tlat lo. 

"A zia viau e." Tih ringawtin a va chhang ve a. 

"I fit tawk ang tih ka ring alawm. Beiseina pawh ka nei sang." A rawn tih leh takah chuan Alexa pa a nih rinna a nei lian ta deuh, "Tu nge? I hming leh Dp i dah bawk si lo va.." a va ti ta tawp a. 

"Sangzuala." A tawi tek tawk khawp mai. "Aw le." Tih chiahin a reply ve bawk. Mahse, Alexa pa tiin chu number chu a save ta tho a. A mut a rawn chhuak ta deuh bawk nen a chhing ta vang vang a. 

A tukah a ṭhiante nen an chhuak rual a, Pi Sangi kha chuan 2 wheeler taxi rawn hmang mai zel tur leh an lo peksak mai tur thu a sawi naa, a inthlahrung ve deuh a,ama pawisain a hmang ta mai. Dâk erawh a da tawh viau a ni. Advance-a hlawh han lak nghal lah chu nimin aṭangin a thawk ve chauh bawk si, a rilru a buai angreng viau. A taxi hman pa lah chu a ṭawng duhin a be chhên mai a, zu rim lah chu a nam deuhin a hre tlat bawk. Mahse, engmah chu a sawi chuang lo. A chhukna turah a chhuk a, fare a pek lai chuan, "Lenna tur hmun nuam deuh ka hria sin. Leng daih ila" a la ti ham ham zui. 

Chhan tuma a ka a ân lai takin, "Ani hi chu ni lo ve. Pu-a.." rawn ti thum dûttu lam chu a hawi vat a, Alexa pa chu smart takin a lo ding rûn mai. An gate bul maiah a chhuk bawk nen, an ṭawng a lo hre pha a nih dawn kha. Taxi driver pawh chuan engmah sawi tawh loin a kalsan ta vang vang a. Rinhluzuali lai leh hrehawm ti lutuk chu a sen awp awp mai. A ngai dik lo palh ang tih a hlau ru viau. Mahse, "Ka fapain a lam sek tawh che a nia. Lo kal rawh" a rawn tih takah chuan a ngaih a ngam ta deuh e. Sangzuala pawh en lo chuan kalpelh mai a tum a, "Kha i fare kha.." a rawn ti a, a ding dat. Sangzuala hmel chu a en ta nge nge a, a mitmengah engmah hmuh tur a awm lo, mipa ngeng zet hmel bak hmuh tur a awm lo. "Aih, a ngai lo" a ti ngial a. 

"Ngai" tih leh a kut rawn lain hmehbel a rual a, garage lam a pansan zui nghal daih. A ruk tak chuan Hluzuali chu a lawm hle, a tan cheng za hnih khat hlutzia a rawn hrethiam a ni mahna. Sangzuala kal hnuah in chhungah chuan a lut ta chauh a. Alexa chu in chung lamah a awm avangin a chho ve nghal zat a, a pindanah a va lut ta nghal. Ui chhungkaw thlalak niawm tak hi a lo bih ngur mai a. Chung uite chu golden retriever an ni a, pa ber leh nu ber inkarah an note pahnih hi an bawk ran mai. 

Alexa chu muangchangin a rawn tho a. Rinhluzuali hmachhawn zawng chuan a ding a,. Mitmeng pawisawilo zeta Rinhluzuali melh chung chuan,."Anu.." a ti tham ṭiak a. Rinhluzuali a hrilhhai leh ta. 

Mahse, "Eih ah, i lo ṭha em?" A ti ta vat a. 

Naupanga thukhawchang, Hluzuali chu rawn kaiin, "Spiderman leh Batman insualtir ang." A ti leh zung zung a. Amah chuan batman-a lem chu a lek kang vû bawk. Hluzuali pawh chuan Spiderman lem chu a chuh vat a. "Tun ṭum chu min hneh tawh bik lo vang, niminah min dah nil tawh sia..ka'n ṭang ang e." A ti sauh sauh a. Alexa chu hlim taka nui hak hakin, "Chiah aw. Min hneh dawn lo sa" a ti lang lang a. 

Rinhluzuali'n a bag chu khumah a theh phei a,a mitsirin hmuh a neih avangin lehhawi meuhin kawngka lam chu a va en a. 

"I kal tawh emaw ka tia.." tiin Sangzuala chu a va melh nghek a. 

Nui hmel pu chuang hauh mah suh se; mitmeng nung sarh hian.."A ni 2naah hian bân i tum dawn nge dawn lo ka rawn enfiah.." a lo ti nghut a. A fapain a va hmuh ve hmain dimtea kawngka chu kharin a hnaa kal turin a fapa leh a awmtute chu a kalsan leh ta phawt a.