Nau awmtu 3

NAU AWMTU..(3)

Ziaktu : Toni Râlte

"Engtin nge kan tih dawn?" Phone a dah hnu chuan Rinhlui chuan mangang zet hian a ti a. Apuia hmel erawh a dam thlup reng a, mangang hmel a pu ve miah lo. "Hahdam rawh, min ring la a ni mai." A ti a. "Haw ang" Rinhlui chuan a ti tâwng a. 

"Aw le..chîai vak suh, thâwk la la, hahdam rawh" a ti leh a, namthlak te an khar ṭhata an insingsak fel zawh chuan thlam chu an chhuahsan ta a. An khaw lam chu panin chak lutuk lovin an tlan a. Dar 12 rik nan 5 mins vel a la awm a, zanlai inkhawm tur ho pawh an insiam ve mêk ngei ang. "Tihian kan inkhawm nghal mai dawn nia"Apuia chuan a ti puat a, "Puan pawh ka bih loh hi.." Rinhlui chuan a lo ti hlar a, "A ngai kher hleinem, zanlai inkhawm a nih hi.." a lo ti leh hmiah. Chu aia remruatna fing zawk rawt tur hre bik hek lo, Biak in lam an pan ding ta nghal a. Mi tu vak mahin an hmu hman lo hlauh. A vanneih asiamin a kawm ve zeuh zeuh thin, Ngaihi te ho a va hmu a, a va zawm ve nghal ta daih a. Anni pawn puan an bih bik lo va, a inthlahrung lutuk lo. Biak ina an luh hnu daihah Apuia te pawh an rawn lut ve a, Hruaii te erawh a hmu hauh lo. A beer in khan a kua a tipuar nge ni, a pum a puar ûl a, a rilṭam deuh bawk nen, a awm a nuam vak lo. Ban veleh Apuia pawh nghak loin an in lam a pan ta nal nal a. A zu thlen chuan ar kang ho an lo la awm a, Pi Mawii pawh a lo la meng. An hmuh rual chuan thîp fahrana rawn melhin, "Khaw nge i kal a?" A lo ti chang fak a. 

"Ka inkhawm a, kan bang chiah" a ti ve hmak a. Ar kang ho an la awm nual avangin a nu pawh chu a insûm deuh a ni maithei. Rinhlui pawh rei ṭhu loin a mu ta daih a, zing dar 3 thleng Apuia nen an intext. Tunah chuan Apuia chauh hi a innghahna a ni ta. A tuk Christmasah chuan mitinte chu phur takin inkhawm turin an insiam a, Rinhlui pawn hmanhmawh taka thleng silin a che deuh sawk sawk mai. Apuia rawn leisak a kawr thar chu a han ha a, a nuin a damlaia a puanchei leisak ngei mai chu bihin mawi a inti ve hle. A va chhuah phei chuan a nu leh Hruaii te chuan an lo en duh kher mai. "Khawia kawr thar nge i neih a?" A nu chuan a lo ti leh thâwr a. 

"Seni min pek ka tih kha, a hak tawk loh min pe nual a. A fel tak tak a ni." A ti seuh seuh a, "Nizanah khan Seni te bulah i awm si lo va, khaw nge i awm a?" Hruaii chuan a lo ti chang fak a. 

"Nia, ka awm a nuam lo deuh a, rawn haw ka tum zet a, mahse, Ngaihi te khan min lo chelh leh tlat a, ka awm ve leh ta ringawt a nih kha. " A ti ta ngawt a. Nuam chu a ti vak lo,. "A nih chuan Apuia hmeichhe phurh kha tu nge ni ta ang le? I hmu ve em? Nizanah.." Hruaii chuan a ti niah niah a, amah an ringhlel lo tih a hriat takah chuan, "Hre miah lo, hetah a awm ve reng lo mi?" A ti ve zaih a, an chhang zui tawh lo. Biak in lam panin mitinte chu phur em emin an inzui nguah nguah a, naupangho lah an nalh, hmuh an nuam takzet a ni. Urlawknî khan a nu bulah, "Nu, ka pa thlan kan chei dawn lo em ni?" A lo ti tawh a. 

"A ho mai mai e a. Thlan chei tih luklak, sum senna mai mai" a lo tihsak hmak si a, a sawi zawm tawh lo, a pawisa khawlsain thlan cheina lei vea kumthar hmaa chei erawh a rilruk tho a ni. 

Chutiang chuan hunpui vuakvêt chu ama tawkah hlim takin a hmang ve a. In chhungah chêp mah se; pawnlamah ṭhenrual a ngah a, amah duhsaktu an lo awm ve zel bawk nen, zaikhawm te pawh chu nuam a ti ve ṭhin hle. Ruaiṭheh tlaiah pawh Sanga remruatnain a ruk takmeuhin Apuia nen Sanga te huanah bawk an inhmu leh a, venthawn ngai thil a awm chiah hian inthlakhlelhna a zual ta ṭhin a, chutichung pawh chuan a nu zilhna leh thuchah te hrerengin sex hman êm chu a duh ngai lo. Apuia lahin a tilui bik lem hlei lo va, thianghlim takin an inngaizawng a ni ber mai. Kumhlui thlah tlaiah Seni te nen an leng khawthawng ve a, Seni hi mi harhvâng, thutak lo ve tak mah nise ṭhian ṭha tak erawh a ni ve chiang khawp mai, chumini pawh chuan Apuia nen an inkar bakah a nu leh Hruaii te tawrhhlelhawmzia te chu a hrilh ve ta vek a, nidangah chuan an zawt a nih pawhin thup chin neiin a chhang ṭhin. Tun ṭum erawh an nasat tawh em avangin a inbunruah a ngai tlat. Seni pawh chuan hrethiam takin a lo ngaihthlaksak a, "Ka hai hleinem, a pawi a ni, i pa boral hma lutuk hi chu. Tunah hian mi sawi ruk dan ka hria a nia aw. In kawmchhak pathlawi saw a rawn lut ngun riau an tia, chhunah pawh i nu nen dawr an nghak reng zel te an tia,. I pa lung pawh in la phun êm lo va, kum pawh a la liam lo va, sawtia nuthlawi ang maia a parh leh saw mi mit a kham riau an tia.." a ti mawlh mawlh a. Hei hi chu Rinhlui pawh a mitkhamna a rei tawh, mahse, engmah sawi ve phalsak a ni ngai lo va, a ngawi mai zel. He khuaah hian a pa unaute tumah an khawsa tawh lo va, tu te nge pawh ani chuan a hre ve lo, a pa farnu te pahnih chuan Aizawlah pasal an nei tih a hria a, a patea erawh Champhaiah a awm a, a pa û chiahte hi Tripuraah Missionary hnathawkin an awm bawk a. A pa chhungte awm ta lo chu a nu pawn venthawn tur a nei lo a ni bawk a, che na âwm reng pawh a ni e. Mahse, a pa thlarau tal chu zah ve âwm hi a nia, mihring hi kan lo mak a nih hi maw. 

"A nih Sen, Apuia hi a rintlak i ring em?" Tia a zawh chuan, "A rintlak ka ring, an chhungkua hi zahawm deuh mai an nia, an nelawm tho sia maw. Apuia farnu pawh hi hmu la chuan i nel nghal ang, an hausak ang huin an inla ve lo, an nun a tlawm sia, nei rawh i tifuh khawp ang." A lo ti leh zung zung a, Rinhlui rilru pawh a nuam ve sawt mai. Zan lam chu zaikhawm a rilruk a, ina awm ve pawh Hruaii ṭhiante an rawn kal leh ang a, a michuang awm leh mai mai dawn tih a hria. Apuia pawh a hrilh a, "Ka zaikhawm ve ang, banah ar kan kang ve dawn nia.." a rawn ti a. Engkimah Apuia zawk hi chuan thlâwp zel a duh, mahse, amah hian ngam chin a nei zel si a, duh angin an induhna leh inthlakhlelhna pawh an parchhuahtir thei ṭhin lo. Mahse, engtikah emaw chuan khawtlang hriatpuiin an la inzui ve mahna. 

Zaikhawm turin a insiam mawlh mawlh a, Hruaii'n Apuia a be lâwng lâwng chu a hre ve kar, "A mak! Zaninte chu ka lo ring ve che sin, damdawi ei la, lo phei ve ru.." a ti hliak hliak a. 

Lehlam ṭawng a hre thei lo. Amahin a nui hak hak mai. Apuia chu a insawi damlo lehpek a ni ngei ang. A va chhuah chuan Hruaii chu a tûm bûr mai, Mama'n, "U, i zaikhawm dawn maw..ar kanpui tur pawh i hmu ve lo ni maw..lerh ve deuh rawh" tiin a lo fiam hlut a. 

"Ka hmu zo ve lo a nih hi, min zawnpui la.." a lo ti ve a. Mama hi chu an unauah a zia a dang a, a pa a chhun a ti mai, a ngaina ber nghe nghe. 

"Star tu i ngah alawm, an bem ngam lo mai mai che lawm. Nangmah hi han easy ve deuh phawt la maw.." Mama bawk chuan a ti a. An nui dun hawk hawk mai. Chung an nuite chuan Hruaii chu a tithinur zual nge ni, ṭap mai tur hmel a pu. "In hneawm, kal mai mai teh u." A lo ti hlak hlak a. Rinhlui pawh chuan engmah sawi tawh lovin a chhuahsan ta a. Apuia lo nghahna hmun a va thlen chuan, "Kan zaikhawm tak tak dawn mi? Leng daih zawk ila.." a lo ti a. 

"Zaikhawm turin ka rawn chhuak tawh a, ka zai leh si loh chuan min ringhlel leh ang. Zaikhawm phawt ila, kan sawi ṭha dawn nia.." a ti a. Thuawih tak chuan a zui ve ta hnu hnu mai. Sanga leh a bialnu Kimi te nen an pali chuan an zaikhawm ve ta ṭhap ṭhap a. Zai a nuam bawk a, Rinhlui pawh a zai tui ve hle. Nimin lamah a pa thlan a va chei ve thuak thuak a, a rilru mawlhtu pawh a tlem ta deuh. 

Dar 11 velah an chhuak ta a, an pali chuan Sanga te huanah an kal leh ta vang vang a. Kimi nen hian an inkawm tam lo naa han inhmuh nikhua chuan an inbe ve hlut ṭhin tho. Sanga te chu an huan mawnga dil kam bul hmun zawl duaiah an chhuk ta daih a, anni erawh thlamah bawk an ṭhu dun leh ta ran mai. "Ka duh telh telh che, a ruka inngaizawng rual pawh kan ni tawh lo asin. Tilang ve tawh ang." Apuia chuan a ti sup sup a. 

"Mi hi chuan an hre deuh ṭhûm tawh tho ang" a ti ringawt. 

"Min lo nghak ang em? I luck sia, startu i ngah si, i rinawm thei ang maw?" Apuia chuan a ti leh sek sek a, "Ka rinawm ang, i rinawm ve tho a ngai a nia." Rinhlui pawh chuan a lo ti a. 

"Kei chu ka rinawm dawn chiang sa. Nakkum kum tawp lamah inneih kan tum dawn nia..aw..i duh ang tiraw?" Naupangchhia zet hian Apuia chuan a ti a, Rinhlui pawh a lo bu ve nghat mai. A rawn fâwp a, ani pawn duhthawh takin a lo chhanglet ve. An duhthawh tulh tulh a, Apuia chuan a bawhthlu leh ta a, tun ṭum chu nidang a ang tlat lo, Rinhlui pawn chu chu a hai lo, chuti chung si chuan a hma ang khan ani pawhin a hnar hleithei ta tlat lo mai. Hnai taka inena thaw dun halh halhin, "Ka hmangaih che. " Inti tawnin a tawp thlen an inring chu a ni ta reng mai. A mipa zawk Apuia chuan chetlak dan tur a hai lo bawk a, zei takin a che zui ta mawlh mawlh a, Rinhluzuali thianghlimna chu Hmangaihpuia chuan a thliak ta..

Mahse, an inkarah chung thil chu tlazep tawh mah se; an inthlakhlelhna tizualtu a ni ta zawk a, inhnualsuatna leh inhmuhsitna lam a lang lo. Apuia phei chu a hlimin Rinhlui lakah chuan a lawm takzet a ni. A ngaih lah a ṭha..ni 5-ah a chhuk leh mai dawn avangin hun remchang an hmuh ang chu an bawhpelh thiang lo, mahse, sex erawh an hmang zui tawh miah lo thung. Khatianga an taksa leh rilru a han inzawm takah kha chuan Rinhlui pawh a huaisen ve ta deuh a, Apuia nen an inngaizawng tih khawtlangin an han hriat takah pawh chuan pawi tihna em em a nei tawh bik lo. An in chhungah erawh nasa taka nêkchêpin a awm thung a, chu erawh a tawrh ṭhan a ni a, ngaiah a nei leh thei mai ang. 

"Ka bialpa min chhuhsak a, i zak em? Zawngi, i va tenawm em em ve.." tia Hruaii'n a ânkhum chiam ṭum chuan, "A ngaizawng ve lo che ,i ngaizawng ringawt alawm. Ani sawn keimah chauh min duh a ni. " A ti ve hmiah mai. Hruaii thinur lutuk chu a ṭap tawp mai a ni. Pi Mawii lahin a lo hnawtchhuak ve sek a, mahse, chhuah erawh a tum bik lo bur. "In leh lo hi ka pa din a ni a, a fanu, a thisen kai ka ni a, heta awm ve theihna hi ka nei a ni.".. a ti ve tlat. Apuia a nei tawh bawk a, a hma ang em em kha chuan an hrual thei tawh bik lo. Mahse, Ni 5-ah Apuia chu kal leh mai dawn si. A kal dawn zanah chuan a rawn leng a. Hruaii leh Pi Mawii te chuan biak pawh an lo be duh tawh lo, mahse, eng hê hûah a ngai lem lo a niang. Zan dar 11 thleng a leng ve ngat. Tichuan, a tukah an khua chu a chhuahsan ta vung vung a. Rinhluzuali lung chu a va lêng tehlul êm..

Thil chu a ṭha chho mai dawn emaw tih laiin Pi Mawii te nufa chuan thil tum rûk an lo nei emawni tehchêk ni, Rinhlui chu a chan a chau telh telh a, a thlavang hauhtu ber Mama lah inhlawhin hmun dangah a zin daih ṭhin si. A chang chuan an ruala chaw ei te an phalsak lo a, tuition a pek pawh an phalsak tawh lo. Apuia vangin chung thil chu a tuar hram hram a ni ber e, Apuia hian a rawn hnemin a rawn fuih nasa ṭhin. A tan hian a hlu takzet a ni. Tin, Seni bakah Sanga leh Kimi te hi a tan an awm reng bawk. Chung chuan a nun hrehawm lutuk tur a tizangkhai ve deuh ṭhin. Tunhnaiah an kawmchhak pathlawi pawh a rawn lang ngun hle, an in aiin a awm tam ang tihtur a ni. Pi Mawii nen chuan inngaizawng angin an thang vek tawh, Mama pawn a khak tawh nghe nghe. Mahse, eng he huah an ngai lo nge an awm ngaiin an awm reng tho. Tin, chutiang a nih mek lai chuan Pi Mawii nau tlangval upa ve tawh lam hi a rawn zin a, an khaw Middle School thawm ṭhat hna thawk turin a rawn inhlawh ve a lo nia. Amah hi mistiri thiam tak a ni nghe nghe. Pi Mawii te inah a thleng ve bawk nen, a tirah chuan Rinhlui pawn a nel ve hle, pute pute tiin a ko ve mai zel a, nikhua a rei a, kar 2 êm pawh an cham hmain Thansanga mizia chu a mil ta vak lo. Kut thawha mi fiam a ching riau a, a ngaithei ṭhin lo. Tin, zu hi a rawn nam haw ziah bawk nen, Pi Mawii lahin hauh a tum der si lo. Ni 20, june thla a ni a, ruah a sur deuh reng mai a, zanah pawh inkhawm zan mah nise Rinhlui chuan mut mai a duh a, thleng a sil zawhah ṭhut pawh ṭhu khawmuang loin a pindan lam a pan nghal a. Apuia nen an inbe zuai a, mutchhuakin a zem chiai chiai avangin a muhil zui ta daih a. Chhun lamah a che chau deuh bawk nen, a mutui viau mai. Mahse, zing dar 2 bawr velah rawn khawihtu an awm avangin a harh ta hlawl mai a. Light pawh a la off loh avangin amah rawn pawmchilhtu chu Thansanga a ni tih a hre nghal, zu rim nam huam chungin bawhbeh a tum nasa mai a, a theihtawpin a ṭang ve, a ke te chu a leng âwrh âwrh a, chutimai chuan Thansanga pawn a hnehchhuh thei bik lo, mahse, mipa tha na nâ na chu ani ang hmeichhe thahrui ngah lem lo tan hneh zawh rual ni hek lo le, a chau titih dawn ta mai a. Tichuan, mangang takin a rak ta tuar tuar a, "Nu,min pui ru..Tete, Hruaii" tiin a theihtawpa ringin a au a. A hmui a rawn hupna kut chu na theihtawpin a sehsak ta a, Thansanga pawh a rak tuar mai. "Zawngi leh" tia phun hlukin a kut chu a thing nawk nawk a. Pi Mawii te an rawn lut ve chiah bawk. "Eng nge thleng a?" A ti hû a. 

"He pa hian min sual a tum alawm,." Thlabar zetin Rinhlui chuan a lo ti a. Thansanga chuan pai deuh awt awt chungin, "Mawina, amah zawk hian min sawm a, ka duh si lo va, tikhan fin kherek a chhuah a nih kha.." a lo ti bah nawk nawk a. 

"I va han dawthei tak êm, i zak thlawt na nge?" Rinhlui chu a thinrim kher mai. 

"Ngawi hmak rawh" Pi Mawii aw fiak ṭhak a hriat chuan makti zetin a va melh a, "Nang nu hi i zaktheilo lutuk, i mipa ngam dan herh hawrh atang hian i putea hian dawt a sawi lovang, i ngaihmelh nasat ṭhinzia te hi ka hai hleinem, kan mualpho tam hmain ngawi hmak ang che u. I hria em?" A ti ta daih mai a, Rinhlui chu a hrilhhai kher mai. "Engtin nge chutiang i sawi theih zawk?" A ti hliai a. 

"Hre rawh, mi bulah zanina thil thleng hi i sawichhuak a nih chuan thisaah inngai hmak ang che. " A rawn ti leh ta hmak mai. Beidawng zetin a ṭhu ta hnawk a. A thlavang hauha amah ring duhtu an in chhungah a nei ve miah lo chuan a tina vawng vawng mai. A thiltawn chu Apuia bulah bak a sawi ta lo rêng a, a rawn ngaihtuahin a thin a rim em em a, "Seni te inah khan lo awm rih mai rawh" te a ti leh ringawt thin. Mahse, midang tana buaina leh harsatna thlentu nih a duh bik si lo. Chutiang chuan rilru muang lo takin hun chu a hmang chho leh ta a. 

July thla a rawn inherchhuak a, a Thansanga te pawh an haw dawn hnai a, a lawm ru viau, kha thil thlen aṭang khan an inbe ngai tawh mang lo, Thansanga hlata awm chu a tum hram hram thin. Thansanga pawn a beisei zui ta bik lo a niang, Bungpui khuaa rawn pem tharte fanu a birh ta tlut tlut a, Rinhlui tan chuan lawmawm tak a ni. Sunday chhun a inkhawm bang chu in chhung a luh rual rualin Pi Mawii'n, "Rukrunu, khawiah nge ka pawisa dah ṭhat zozai kha i thuhrûk? Sawi nghal rawh." A ti nghal bawrh bawrh a. Bangbo zetin a nu chu a melh a, "Sawi rawh ka tih chu, Police ka koh hma ngei hian.." a ti leh. 

"I sawi awmzia ka hre lo, pawisa chungchang engmah ka hre lo bawk." A ti sap a. 

"Daw suh, nangmah bakin an ru lovang. Ka inhralhna ka dah khawl, bank-a dah atana ka tih kha a nia, engvanga lo la nge maw i nih le?" A ti leh hlawih hlawih a. 

"Ka nu, ka ru lo takzet, i dahna pawh ka hre lo. Ka ti tak tak." A ti leh a. Pi Mawii chuan a awihsak duh chuang lo. Hruaii lah chuan, "A pindan saw va dap ila a la awm maithei asin." A lo ti ve sek a, "E! Va dap vek rawh u, ka ru lo miau a, a awm lo tawp ang" Rinhlui pawh chuan inringtawk takin a lo ti ve a. Kawmchhak Pathlawi Chhuana ho chuan a pindan chu an dap ta a, mak deuh maiin a kawr inthlep karah pawisa chu a lo inzep ta tlat mai. 

"Hei hi maw ru lo chu? Tenawmnu, i va rapthlak ve. Rang takin ka in hi chhuahsan nghal rawh. " Pi Mawii chuan a ti tuar tuar a, a au ring bawk si, ṭhenawmte pawn an hre pha maithei a ni. 

"Engtin nge khatah khan a awm tih ka hre miah lo, tu emawin a dah a ni mai, ka ru lo, ruk ka ru ngai lo" Rinhlui chuan ti eng ang mah se; an awihsak duh tawh si lo. Ṭap chunga a nu bula a ngen pawhin an in chhuahsan tur chuan thutawp a siam hmak bawk si. A thinrim a, a rilru a na em em bawk, anmahni thiltih bawk a nih a ring, an inkhawm lo va, khami chhung khan amah tal awhtir nan pawisa kha an lo dah tih a lang reng. Mittui tla fap fap chungin a insiam ta nge nge a, hnawhchhuah hi an duhna a rei tawh a, an remchang hmuh chu hlah an tum lo khawp ang. Thawmhnaw leh bungrua a ngah hran lo bawk a, a insiam zo ta thuai a. Khawiah nge a kal ang aw tih a ngaihtuah a, Seni call mai a tum ta a. A phone a han lak dawn chuan a lo awm ta reng reng lo mai. Lukham hnuai leh a dahna ṭhinte a han dap sasawi a, a hmu zo ngang lo. Zah pawh dawn loin Hruaii hnenah a phone chu call sak turin a ngen a, a lo call sak ve mai bawk a. Switch off a inti tlat. "A bo a nih kha ,rukruk hrat chu rukru bawkin an rawk che nih kha.." a nu chuan a lo ti hlang hlang a. A rilru a hah ta ngei mai, a phone kha a nu leisak ve liau liau a nia sin le. An rawn tur sek tawh si, zak leh rilru hrehawm deuhin an in chu a chhuahsan ta a, mi veivak an tam lo hlauh zawk a, a mi tawh awmchhunte lahin a kalna tur an lo zawt ve sek bawk si,. "Ka zin dawn a" tih bak chhanna a pe lo. Seni te inah chuan a tlu lut ta râwih a. Seni a hmuh rual chuan a ṭap tawp mai, ani pawn hrethiam takin a pindanah a hruai lut nghal a. Thil awmzia a han sawi chuan Pi Mawii te thiltih bak a nih an ring bik lo. Seni nu leh pate chuan, "Tihian kan bulah i khawsa ve ang a, fanu thar kan nei a ni mai lawm.." an ti diam a. Mahse, chutiang ringawt chu thil tih chi niin a hre lo. Bakah Seni nî nula senior ve deuh tawh hi a awm ve a, a ngaithei vak lo tih a hrethiam tlat. A chhan pawh Hruaii te nen hian an inbe thiam tawp a, Hruaii hian a kawr a ṭhuitir nasa a, a tlawn thiam bawk nen, Rinhlui chu a mil lo ve ringawt a ni ber. Midang zawng a chungah ṭha teh mah se; an zinga chen reng chu a tum bik lo. Tunah chuan amah chauha khawvel a hmachhawn a ngai ta tih a hai lo va, chumi tur atan chuan a inpuahchah pawh a ngai ve tih a hria. Tin, a phone a bo avang khan Seni phone aṭangin Apuia a zuk bia a, a chanchinte a zuk hrilh a, Apuia chuan, "Seni te inah khan lo awm rih la, ka rawn haw thei ṭêp tawh alawm.." a rawn ti naa, "Aizawlah chhoh ka duh a, ka lo nghak zawk ang che." A ti a. A tum ruk dan chuan a nu nen an in luahna ṭhin neitute ina han tlukluh râwih mai kha a tum a ni, a lakah an fel tho bawk a, Apuia lo haw hma chu a awm ve theih mai a ring a ni. Apuia chu a lungawi chiah lo va, an khua chhuahsan chu a phal lo a ni ber,. Mahse, a rukin Seni nî vel te chu a hrilhfiah ta a, inthlahrung taka mi ina awm turin Apuia lah chuan a lo phal bik chiah si lo. Aizawla innghak tur chuan an inthlah ta rih a ni. Seni pawh a lawm lo angreng, mahse, "Aizawlah ka nu chhungte an awm tho a, hetah chuan ka awm reng thei dawn chuang lo, ka han hmuin chanchinte ka han hrilh ve ang a, Apuia lo hawn hunah te chuan inneih a duh deuh mai dawn a, hetah tho alawm ka rawn awm dawn. " Tiin a han hrilhfiah ve ngial a. Chuti na nâ na chu tiin Seni pawn a sawi nawi bik lo. 

Tichuan, a remchang hmasa berah Aizawl lam chu a pan ta vang vang a. A rilruin arbo a zawng nasa ve viau, an in luahna te lah a be hmasa si lo, be hmasa dawn pawh nise a phone a tihbo avangin an number a nei tawh lo hrim hrim a, a lut tawp a nih loh chuan kawng dang a awm lo. Aizawl chu an han thleng ta a. Pawisa tlem azawng a la nei ve bawk a, a phâng lutuk rih lo. Taxi-in an in chungte in lam chu a pan ta a. Phone neih vat a ngai, Apuia number erawh a chhinchhiah ve kar mai. An in luahna ṭhin a va thlen chuan a zâm ru ve hle, mahse, belh tur tumah nei ta lo chu a intihuaisen lui a, door bell chu a hmet ta ral ral a, kar lovah nu ber Nu Muan tia a koh ṭhin chuan a rawn hawng ta a. An inhmuh lohna a rei ve ta deuh bawk a, a lo lang upa ve ta deuh. Rinhlui pawh chu Pi Muani chuan a hai ve deuh nge ni, a tarmit te chu a han siamrem tê tê a, "Nu Muan, keimah Rinhluzuali kha.." zah pawh dawn lo hian a ti ta râwih a, "Ehe! Ka nau leh! Nangmah maw? Inhmuh lohna a va rei ta êm..lo lut rawh" a ti ta chul a, bangbawr deuh chuan a lut a. An in chhung chu an lo tidanglam deuh em mawni, a lang thar vûk mai. Ṭhuthmun te a han rem hnu chuan Pa ber Pu Zuala pawh a rawn lang ve a, hmeichhe naupang duhawm deuh mai a pawm bawk. "Hluteii chu a va mak teh nawlh ve aw. I lo zin satliah em ni? Nge helamah i awm tawh dawn?" Tiin a be luam a. A chanchin sawi dan tur a lo ngaihtuah lâwk miah lo va, mahse, zêp hni hne ṭula a hriat loh avangin, "Ka pain min boralsan a, helamah inbengbel turin ka rawn kal tawp mai a ni." Inthlahrung takin a ti a. 

"A ni maw? A va zia lo em em ve aw. Tichuan, i rawn innghat dawn tihna em ni?" Zaidam deuhin Pi Muani chuan a ti a. 

"Aw a ni mai ang chu, in luah tur ka hmuh hma chu ka rawn awm lailâwk ang ka ti deuh a, a rem ang em?" A tih chuan an nupa inmelh zauh chu a hmu hman, thil dik lo a awm a nih rinna a nei nghal. Mahse, Pi Muani chuan, "Thei tehreng e, inthlahrung reng reng suh, tunah chuan mikhual roomah sawn lo va indahlut phawt rawh" a ti ta sawk sawk a, thawk khat chu a veng deuh huai e. Pi Muani te hian fa pathum an nei a, an fa upaber mipa hi a nupui eizawnna a vangin Lunglei lamah an khawsa a, a mi lai hmeichhia erawh nula senior fê a nih hnuah amah aia naupang pasalah a nei a, zarkawtah dawr a nghak ve ṭhin. An te ber hi Rinhlui nu boral khan nupui a la nei lo va, tunah chuan nei tawhin Pu Zuala naute pawm kha an fanu a ni nghe nghe. Chung zawng chu an ina khawsa an ni. An fapa hna bang a rawn haw a, A nuin Hluteii chungchang a lo hrilh ve mawlh mawlh, an han inhmu chu unau ang maia lo inen thin an ni bawk a, an ri ve hlut mai. Ruata nupui Nunui erawh Rinhlui ngainat chi a ni ta hauh lo mai, a nuhrawn ang maiin a meng thîp râm a, rinhlelhna mit nen a melh reng tih mai tur a ni, biak pawh a be hek lo. A pasalte in chhungah chuan a lal hmel viau lehnghal a. 

Muthmunah Rinhlui pawh nasa taka inngaihtuahin hetah hian a khawsa reng thei dawn lo tih a hria, Nunui hian a la ngaithei lo thuai dawn, mi chhungkaw tibuaitu nih a duh lo bawk a, a rang lama mahnia awm hran ve nawk nawk mai chu a rilruk ta deuh. Pawisa erawh ren theihtawpa a hman a ngai dawn a ni. A hmasa bera a mamawh chu phone niin a hria, phone tel lo chuan thil han tih vel hi a harsa ve êm bawk a ni. Ni 3 lai Pu Zuala te ina a khawsak hnu chuan Nunui lalzia leh Pi Muani ten an hlau emaw tih mai tura ṭi dêka an awm ṭhinte chu a lo khawngaihin Nunui chu eng ang fakaua hlu nge maw a nih dawn ni..tin, Nunui chuan mitmei ṭha a hmuh ngai miah loh bakah a ṭawngkam chuan mei a nei ngei ngei ṭhin. Vawikhat phei chu ama chhungte an rawn len ṭumin pi Muani te an awm hnaih loh lai tak hian, "Mikhual chamrei kan nei a, engtikah nge maw chhuah a tum ni? A tlangnel ve khawp mai." A ti hlang hlang a. Rinhlui tan chuan bomb a ni ringawt, ama nu lah chuan hrethiam zet hian, "Thingtlangho hian inthlahrunna chang an hre ve vak ngai lo." A lo ti sak bawk. Khata ṭang phei kha chuan a rang lama insuan chhuah vat a tum chho a, a rilru manganna belhchhah tur tingin Apuia lahin call a la duh thak lo. Pi Muani phone hi a hmansak mai ṭhin a, Ruata phone hlui la tha ve tak hi leisak a dil a, amah chuan a phal, Nunui bawkin a phal lehpek lo va, phone pawh ama pualin a la nei thei lo. Dik tak chuan an ina a awm ve aṭang hian Pi Muani phei chu a chhawk zangkhaiin a lawm pawh a lawm, tihtur leh mawhphurhna awm tawh phawt chu phun nawi lovin a khawih nghal zung zung thin. Nunui phei chu a che ngai eih lo tihtheih a ni. An fanu lah Pu Zuala ten an lak chhawk reng a, mo a zawngah chuan mo nuamsa ber a ni hial awm e. Ruata lah hian a hlau viau mai bawk si, a mak ṭhin teh e. Tichuan, ni khat chu a awm zel dan tur ngaihtuaha ruahmanna siam tumin a chhuak ve ta thâwr a, mahnia in luah tur chuan a sum kawlsain a phak lo tih a hre kar. A hmasa berin phone man tlawm, a budgetin a tlin tawk a lei ve ta thâwr a, Seni leh Apuia number bak a vawng lo. Mahse, a facebook account te kha a hmu lêt leh thei ta bawk a, ta ṭang chuan in luahpui tur zawn a rilruk ta a ni. Post a lo awm nual a, mahse, mipa an ni deuh zel si, mipa nena in han luahdun ngawt chu thil tih chi-ah a ngai meuh si lo. Apuia nen lah an inbe thei der lo, a call leh msg pawh a chhang ngai lo hrim hrim. Seni bulah a sawi ta tawp a, "Ka sawi hreh lutuk, mahse, i hriat loh hi ka duh lo. I rilru tina miah suh aw. Khutah an awmnaah bialnu a nei a, a in luahah a insuanlut tih thu a thang nasa a. Chung vel vang chu a nih ka ring." A rawn tih chuan a tliak hnâwp a ni ber e. A innghah vena leh a rinchhan awmchhun khan a phatsan a maw? Chu pawh a vahvaih lai ber kherin, a thinlung na lutuk chu ṭap pawh a ṭap thei lo, a sahal titih a, a âwm a dawm vawng vawng ringawt. A mak tih bak sawi tur pawh a hre lo. A zak em em bawk, Hruaii te ṭawngkam, "A duh tak tak che i ring hi i mawl takzet, nang aia hmelṭha leh zirsang an awmna ami a nei ru kar ang tih ring rawh." An lo tihte kha a hrechhuak a, an lo sawi dik chiah a nih hi. A duh ve tak tak emaw tiin a thianghlimna te kha a lo hlan a, a hmusit ru ngawt ang tihte a ngaihtuah a, a rilru natna aiin a thinrimna chu a nasa zawk âwm e. Chu chuan lehlam zawng tak chuan hmalam pana ke pen châkna leh Apuia laka phuba lak châkna a neihtir a, a kehchhe sawm barh lo hlauh e. 

A vanneih asiamin in luahpui tur pawh chu a hmu ta hlauh mai. Hmeichhe pahnih an ni a, amah ai chuan an û hlek maithei, an inbepawp chho a, awlsamtêin ruahmanna pawh an siam zui ta a. Pi Muani te bulah pawh a sawi a, Nunui chu a lawm ngawtin a ring, Pu Zuala te chuan han chelh tum der ve mah se; an in chhunga an thu tawh lohzia a hriat avangin a hnial fithla thak a ni. Tichuan, a ṭhian tharte pahnih tur Saii leh Dami te in luahah chuan a insuan lut ta rup mai. An in luah chu an pathum tan a tawk tiu teu viau, Dami leh Saii te pawh chu a hmain an lo la inhre ngai bik lo va. In zawng chawp vek an nih ber mai chu, Saii hi Sumsuih khua a ni a, Dami erawh Thenzawl a ni thung. Saii hian damdawi dawr a nghak a, Dami erawh chuan phone dawr a nghak thung. Amah chauh chu eizawnna nei lo a nih avangin hna a zawn ve char char a ngai dawn a ni. Chutimaia awlsamin hna a hmuh theih ngawt si loh a, a ṭhiante mitmei a veng tawh si, mi inah lângin a thawk ta ngawt mai a ni. Thla khatah ₹ 7000 a hlawh ve a, sawi leh sawi hnu a tih duh ngai reng reng loh tur thil pawh ti duh tur khawpa retheihnain a salbeh a ni bawk a, ruk a ru ta zeuh zeuh a, chu chu sumah chantir lehin a ṭhiante ai mahin sum pawh a khawl thei ta deuh. Amaherawhchu, a hna aṭangin an ban ta si a, hna dang hmuh leh mai a harsa bawk nen, a sum khawlsa pawh a hmang lo thei lo va, chawhmeh eng ilo takngial pawh a lei theih tak loh chinah chuan Saii leh Dami te phun ânna a tam phah ta a ni. Chuvang a nia nau awm tur a hmu ta leh hlawh pawh a ṭhiante thla khat hlawh aia a tam daih zawk avanga a lawm ve em em ni. 

Khang hun liam tawh chhung zawng khan a nunah mi pakhat thi thei ngai miah lo a awm a, Hmangaihpuia ngei mai kha. Khatia a reh tak hmak hnuah kha chuan ani pawn a number delete-in a be zui ta bik lo. A ngaih zawng a ngai ṭhin tehmeuh mai. Mahse, a tuar a, a chang chuan ṭah tlaivar changte a nei thin. A ṭhiante bulah a sawi ngai lo va, sawi pawh a duh hek lo. An hmusit ang tih a hlau a ni ber ang chu. A thianghlimna a lo hlan kha a inchhir lo va, inchhir mah se a sâwt tawh lo tih a hria. Mipa reng reng a hnaih duh tawh lo va, a ring lo a ni ber ang chu,. Ni lo, risk la turin a huaisen tawk tawh lo a ni zawk e. Hun a kal a, Apuia zûn pawh chuan a kiansan ve tial tial a, mut dawn tih lohah chuan a hrechhuak ngai meuh lo, amah a buai ve a ni bawk a. 

"Khawiah maw i thawh dawn?" Saii aw a hriat rual chuan a phu zuk mai. 

"Aw..ih, Chawnpuiah a nia." A ti bah nak a. 

"An fel hmel em?" A ti leh a. Pi Sangi hmel mitthla chungin, "Aw, an fel ang ka ring.." a ti sap a, a rilruin, "Ka beisei" a ti zui bawk. Hna a hmu thar a ni bawk a, an zanriah ei pawh an hlim ve ta deuh e, Rinhluzuali hi ṭawng tam lem lo a ni bawk a, a ṭhiante pahnih titi a lo ngaithla leh mai mai tawh. 

A han mut chuan a hna thar hmuh kha a ngaihtuah leh a, thim zingah a khi sak a. "Ka tithei ang. Rinhluzuali ka ni alawm le.." ti rilruin a saisir thawk a, a chhing zui ta vang vang a.