Nau awmtu 2

NAU AWMTU..(2)

Ziaktu : Toni Râlte

March thla laihawl vel aṭang chuan Pu Thanga hriselna chu a tlahniam chho riau mai a, amah hi BP sang leh zunthlum nei a lo ni ve bawk nen, ṭha pûak anga lang si hian a bawrhsawm zêk mai a. A zan mu te hi a thaw a hah thut zel a, an nu hian a kaitho vat zel. Khawpui lama inentir ṭha an ti a, pi Mawii nen an han kal a. Kar hnih dawn an thang hnuin an rawn haw a, a zia chho dawn emaw an tih laiin kum chanve vel aṭang chuan a rawn zual leh ta tlat mai. Chawlhni zing a ni a, Rinhlui chuan vawksa a chan mawlh mawlh a, Hruaii erawh a la tho lo, pi Mawii'n tual a phiat a, Mama leh Tetea te pawh khaw ṭhenawmah an khua ami damlo zawn haw ngai zawn turin an chhuak tawh. Pu Thanga inthiar tur bathroom a lut chu a tlu ta thlawrh mai, bathroom-a bucket leh no te chu a ri rum rum mai a, Rinhlui chuan rang takin a va hawng nghal vat, a pa chu bathroom chhuatah a lo let ngût mai a, a thaw hrâwp hrâwp bawk. A thisen zâm te chu a pawng ṭawlh ṭawlh mai a, Rinhlui chuan a nu a ko ta chul a, Pi Mawii nen chuan zo leh zo loin an kaitho a, a zawi vek bakah nikhua a hre lo hrim hrim, a rih êm avangin a hnuhin an hnûk titih, sitting roomah chuan an muttir a, Pi Mawii chuan an ṭhenawmpa Pu Ngura te a va ko ta ringawt a, an rawn lut hiang hiang a, an han bawihsawm vel a, a mar chu a la awm ve, a thaw erawh a zawiin a muang kher mai. Hruaii pawh a rawn tho a, an buai phili ta hle mai, damdawi in hnai ber panpui an tum ta a. Pu Lawma te motor an va be ta chûk chûk a, tlawmngai takin anni pawh an rawn lang ta zat. Pi Mawii chuan, "Rinhlu, in lo nghak la, Mateii nen kan va kalpui ang e. " A ti a. Chaw pawh ei hman ta lo chuan damdawi in hnai ber pan chuan an tlan ta vang vang a. Mama te pawh an be bawk. Rinhlui pawh thlaphâng takin hun a lo hmang a, ṭhenawm khawveng leh a ṭhenrual ten an rawn lenpui hlauh zawk a, a zia zia a awm. An kal aṭanga darkar 1 leh a chanve vel a liam tawh ang tih chuan Pi Mawii te ṭawiawmtu an ṭhenawmpa Pu Ngura khan annu a rawn be ta a, "Lo insingsa ṭan rawh u, kan rawn lêt mai dawn. Mihringah kan inchan zo dawn tlat lo." A rawn ti ta a. Rinhlui pawh chu a hrilh ve nghal a, a ṭhu tawp ringawt, a chhe ber thleng tur ang pawn a hmain a lo ngaihtuah ve tho, mahse, a tak takin a rawn nanchin meuh chuan a tliak hnâwp a ni ber e. He khawvela a thisen zawm awmchhunte pahnih chu lakboin an awm leh ta. A nuhrawn leh a fate laka hum bertu leh hmangaih em emtu a pa pawn a kalsan ve leh ta si a! Nâ hi a va na ṭhin ngai êm. Ṭhalai lam ten an in chu an singsa a, Rinhlui erawh a ṭhu tlawk tlawk ringawt mai a ni, a dinhmun hrethiamtu te chuan an lainat ru em em a, vanlaia tla ang mai a ni tih hrilh nawn a ngai tawh lo. Thil chu a kal zung zung a, a pa ruang pawh a rawn thleng ta a, engkim chu mang ang ruaiin a hria. Ṭah pawh a ṭap thei meuh lo. A pa zet chu pa lar a ni bawk a, an vui ropui takzet, uitu a ngahin puan pawh a dawng hnem teh e. Thih ropui ai chuan la dam ve ṭêk ṭêk hi a la hlu zawk fô si a, nunna hi kan siam leh din a ni si lo. 

A pa kha July ni 3-a boral a ni a, July thla chhung deuhthaw chu inleng an nei tihtheih a ni. Thingtlang a nih piahlamah mi an thain amah pu Thanga an lo ui ve bawk nen, khawhar hman lêk loin an rawn lenpui thin a, Rinhlui pawh a lawm rilru ve hle. A nu pawh mi awm lai na nâ na chuan a fel duam duam ṭhin ngei mai, mahse, mi an haw reh tawh, an chhungkaw bila an awm tawh hnu hian a tawrhhlelhawm thin. Palzama palliam mai a tum, theih loh chin erawh a la nei maithei. Tawrh hram hram a ngai tih a hria, a chhan chu chenna tur a nei lo, pan tur dang tumah a hre hek lo. Inleng an han ṭin tak tak hnuah phei chuan Pi Mawii chuan a ze diktak a lantir chho mawlh mawlh reng a, Hruaii lah a nu siar a nu siar..Rinhlui chuan chhiahhlawh dinhmun a tem a ni ber e. Mama leh Tetea te tak hi chu mipa an lo ni bawk a, a lakah chutin an sual hran lo, sual a hnêkin Mama phei chuan a nu leh a farnute chu a khak fô mai. Mahse, inah an awm khât ve angreng si a, a ngaihna a awm lo a ni. Rinhlui pawh school- a kal tawh lo va, Pu Lawma khan a duh viau naa Pi Mawii te lamin remchang an inti tlat tawh lo a ni. Mahse, Pu Lawma thurâwn angin leh naupang nu leh pate ngenna angin zingkarah naupangho tuition a pe ṭhin a, chu ringawt pawh chu Pi Mawii te nufa mit tikham a tling tho. Zing dar 5-ah a tho a, dar 5:30 - 6: 30 thleng naupangho lehkha a zirtir ṭhin. Chuta an fee chauh chu ama puala pawisa a neih ve theihna a ni mai awm e. Chupawh a chanve a nu kutah a la dah cheu bawk. Dawr a nghah ve pawn enthlak a ni reng a, cheng khat lek pawh ama thuin a la ngam ngai lo. A rei a, a rethei tawlh tawlh a ni ber. 

"I hrawk kan châwm rengna chhan tur ka hre lo, i laichin awmchhun i pa ber a thi tawh a, ti nge i la awm ve reng?" Tia a nuin a ṭawngkhum fak fak changte chuan chhan ngaihna a hre ngai lo. Mama zawk hian, "Ka nu, i ti mah mah a ni. Ani hi kan û a nih hi, ka pa awm tawh lo mah se; kan unau a nihna a bo chuang lo" a lo ti ṭhin a. 

"Nang lah hi rawn inrawlh ziah suh, in unau hmakhua ka ngaih vang zawk a nih hi." Pi Mawii chuan a ti let êrh zel. Ṭhenawm khawvengte pawhin an hai lo va, Rinhlui chu an lainat ve thei hle, han tih vak ngaihna an hre bawk si lo. Rinhlui chu a inkhawm tih loh pawn a chhuak khât hle, mitthi an awm pawn a nuin kal ve a phal ngai loh avangin a lang ve ngai lo. Amah rimtu te pawh an reh tial tial a, an duh vanga reh pawh an ni chiah lo, Rinhlui'n inleng a neih chuan Pi Mawii'n a hau leh hrep ṭhin tih an hriat avangin Rinhlui an lainat vangin an leng duh lo a ni zawk. 

Chutianga hrehawm leh rethei reng renga hun a hman chhoh ve bek bek chhung chuan kum pawh a lo tawp leh dawn ta reng mai. December thla an han chuangkai a, boruak pawh a vawt chho hle. Rinhlui pawn a ruka a lo khawl ve a pawisa hmang chuan Christmas kawr thar pakhat tal chu lei ve a tum rân a, a pa te bula a awm aṭang hian a pain a damlaia a leisak kawr 2 tih loh thil thar engmah a la nei lo a ni. Chuvang chuan kumin chu lei ve ngei a tum ruh hle,. Sawi tawh ang khan amah duha ngaizawngtu haihchham a ni bik lo, amah hian a ngaihsak loh piahlamah a chhungte avang hian ngaihzawng neih chu a chakawm hlawl loh a ni. A nu damlaia pawl 12 a zir kuma ngaihzawng a neih ve bak kha ngaihzawng pakhatmah a la nei leh ta lo. Kha a ngaihzawng lah kha zakzum chi ve tho a lo ni bawk nen, kaih takngial pawh an inkai lo, an inhmu lo va, an inṭhen zui a ni ringawt. Zanriah an ei laiin Hruaii chuan, "Karleh chu Baby te nen zin kan tum a nia, ka han bazar ve ang e. Aizawl hmuh lohna pawh a rei ve tawh alawm." A ti lâng lâng a. 

A nu chuan, "Nia, han zin rawh u, mamawh lam a harsat êm hi, rawn inlei deuh nual rawh, zin leh a harsa si" a lo ti duam duam a, inthlahrung takin Rinhlui chuan, "Nu, keipawh zin ve ka duh khawp mai, ka nu thlan pawh tlawh ve pah ka duh a." A lo ti a.

Mitmeng rum leh hriam zet a hmachhawn nghal, "A sawi pawh i sawi zak lo e a. Ka nu te hi min ti tehchai fô suh, i nu ka ni lo. Zin thei i ni lo, i zinin tuin nge chhiahhlawh hna thawk ang?" A ti tâwn tâwn a. A ṭawngkam hi a hlawk ve hrim hrim. 

"I mak tâwn tâwn êm mai a, a zin ve châk a ni mai lawm. Hruaii pawh a zin dawn a, a zin ve duh phawt a hnu, han zin se ni mai lawm.." Mama'n a lo ti vat a. Tetea erawh ngawi melh melh chi a ni a, a inrawlh ve vak ngai lo. A nu chuan, "Lo ṭawng suh. A ṭul lo ka tih chuan a ṭul lo a ni mai. Vawikhatmah zin sawi ve tawh suh" tiin Rinhlui chu a melh shala tûn mai a, Rinhlui tan sawi nawn leh ngam chi a ni lo. A chang chuan muthmunah te hian a inhrosa ve nasa ṭhin. Ti nge ṭhat ka chhuaha duap ka kai reng bik? A thlawnin ka hrawk an châwm hleinem le..tiin. mahse, a tawpah hei bawk hi a hrechhuak leh ṭhin, he lai hmun lo chu chenna tur a nei tlat lo a tin ni, chu chuan chhel turin a infuihtir leh ṭhin. A nu a ngaih luat vanga tlaivar ṭhaka a ṭah chang pawh a tam mai. A pa tal la dam se chuan heti em em lo deuh hian a awm ve mai tur..

Chumi zan chuan a beisei loh deuhin Apuia hian a rawn be nawlh mai a, a nu te hriat hlau takin a pindan zimtêah a tlan lut ta daih a. 

"Vawiinah Aizawl ka rawn thleng chiah, naktuk tuk lehah lo haw ka tum a. I lo dam maw?" A rawn ti thluam a. A phai awm chhung khan inbe ngai lo chu an ni hauh lo, mahse, Rinhlui a buai bakah Apuia tak pawn buaina dang a ngah a, a ṭhiante kâ aṭangin Rinhlui dinhmunte a hriat ve bawk avangin a tibuai duh ta vak lo va. Whatsapp velah chuan an inbe zeuh zeuh, call tak chu tun chiah hi a la ni maithei. 

"A nih chu, tluang deuhin in lo haw dawn nia" a lo ti ve a. 

"Eng nge ka lo hawn ang che" a rawn tih chuan, a rilruin, "Mas kawr tur" a ti a. Mahse, a ri chuan, "Engmah a ngai lo, eitur tui deuh a ni mai" a ti thung. 

"Bazar te i tum lo mi?" A rawn ti leh a, a hnuk a ulh ringawt nia. "Aih, tum lo mai." A ti ringawt. 

"Nula i ni tawh alawm tiraw? Bazar kha chu a naupangchhia. " Nui hak hak chungin a rawn ti a, "Dik chiah" a lo ti ve sap. Rei tak an inbe lo naa, call meuha an han inbiak takah chuan Rinhlui chuan Apuia chu a ngaina thar sawt niin a hria, bakah amah lainata hrethiamtu a ni vein a hre bawk. Heta a ṭhiante ho pawn an hrethiam em em vek naa Pi Mawii hi hlauh chin leh tlawn chin an nei ṭhin a, chu chuan a tina deuh ṭhin. Chumizan chuan suangtuahna maksak pui pui hmanga boruaka in sang sain a muhil ve ta siai siai a. Lehlamah erawh Apuia chuan a ṭhianpa Sanga bulah Rinhlui chanchin a lo zawt ve mêk, "Hruaii te kha chu an zin dawn ngei mai a, Rinhlui erawh a nu sawn a phal ka ring lo bur" Sanga'n a tih chuan Rinhlui lainatnain a khat a, eng emaw tal a tan tih ve theih a châk takzet a ni. Apuia hi tlangval lerh a ni lem lo va, a zei pawh a zei em em hran lo. Chutihrualin pa ruk riauna nei, mi tlang tak a ni a, an khua a thlen veleh Rinhlui chu a bialnu atana sawm a rilruk hmiah mai, a ti ngei bawk ang le. 

Tichuan, Apuia chu an khuaah a hawng ta a. Hetihlai hian Hruaii te erawh an zin ve mek thung. Rinhlui chu a nu leh Mama te nen an awm a, Tetea erawh a nuteii te khuaah hunpui atan tiin in saknaah a inhlawhfa ve a, a fel reuh ngawt mai. Apuia chuan Rinhlui an treat dan a lo hriat ve tawh avangin Hruaii awm loh laia va len chu thil tih chi-ah a ngai lo va, Rinhlui chan chhiatna tur ang kha siamsak a duh bik lo a ni. Mahse, Sanga hnenah Rinhlui kawr atana a leisak, Vakiria kutchhuak ngei mai, a farnuin uluk taka a thlansak chu Rinhlui pe turin a hrilh a, Sanga pawn thuawih takin Rinhlui te in chu a va pan a. Vanneih asiamin dawr a lo nghak a, pi Mawii erawh an kawmthlang pitar damlo kanin a chhuak a. Remchang ti ru takin Apuia thil hawnsak chu a pe ta zauh a, Rinhlui chu a hrilhhai angreng hle. "Ka la thei lo vang, hetiang a man a to dawn bawk si.." a ti ve ngial a. 

"I tana a lei tawh a nia, i duh loh chuan paih a ni mai." Sanga lah chuan a ti bur mai si. Chutiang taka amah duhsaktu a han nei chuan a hnuk a tiulh titih tlat,. "Ka va lawm tak. Eng nge ka tihsak ve ang?" Tiin Sanga chu a melh a. Sanga lah a zeia zei ta ngang chu, "I thinlung kha pe la, a bak a ngai lo" a lo ti vei hmak. Rinhlui lai chu a sen ap ap mai. A nu hmuh hlau takin mut dawnah a kawr thar chu a han ha chhin vel a, a tawk chiah bakah a inhmeh kher mai. Mahse, ha chhuak ta se, chawngkawr mit nei a nu chuan a thar a ni tih a hai dawn si lo, engtin nge a tih tak ang..a rilru a buai ru hle. A hmeichhe ṭhian neih ve chhun, Seni a hrechhuak a, Seni te hi a khawsa thei pawl an ni ve a, incheina pawh an khuaah chuan a sang pawl an ni. Seni chu a va text ta a, Apuia chungchang engkim chu zep nei lova hrilhin a kawr rawn hawnsak chu a nuin a hmuh hunah, "Seni'n a hak hlui min pe" ka ti dawn a nia..lo hre sa rawh aw.." a va ti a. Seni lah thil hrethiam chi, Rinhlui lo khawngaih ve em em a lo ni bawk a. "Lutuk, kawr dang pawh ka pe dawn che nia, a rinhlelh loh nan che." A rawn ti zung zung a, a thla a muang ta deuh. 

Hruaii te pawh ni 2 hnuah an rawn haw a, an rawn inlei nasa ngang mai. A chhungte dang zawng zawng thil a leisak vek laiin Rinhlui erawh hmaih a ni thung a, mak pawh a ti lo, rawn leisak ve se mak a ti zawk daih ang. Mama chuan, "Eng emaw tal rawn leisak ve tur alawm le..khi leh chen in han kal a.." a lo ti ve nuah nuah a. Hruaii chuan, "A hak tawk awm ka hre si lo va, pheikhawk nise a buntawk ka hre hleinem. " A lo ti nang nang. 

Rinhlui chuan, "A pawi lo, Seni'n a hak tawk tawh loh min pe alawm, a la thar hlawm sia, a zia lutuk." Lungawi hmel deuh hian a lo ti var a, Pi Mawii leh Hruaii an inmelh zauh mai. Mahse, engmah an sawizui ta lem lo. A tuk zan aṭangin Apuia te pawh an rawn leng ve ta a, an rawn len hma zawng khan Rinhlui nen an intext char char tawh, dik tak chuan inngaizawng ang chiahin a ni an inbiak ve tawh. Mahse, an dinhmun avangin a rawn leng lo mai zawk a ni. Hruaii hi an tan hmanrua a nih ber mai chu..Apuia te an rawn lan takah chuan Pi Mawii te nufa mood pawh a fuh leh cher cher khawp mai. Hruaii han inla no kual vel chu Rinhlui chuan a ei hlawl lo,. Sanga pawh a ner suk suk mai. 

"Urlawk zan chu hetah hmang ila, ar pawh kan vulh lai khu ka nuin min pe dawn alawm." Hruaii chuan a ti ngher ngher a. 

"Nia, a nuam ngawt ang." Rinhlui va melh zawk chungin Apuia pawh chuan a lo ti ve a. Hruaii chuan, "Rini, thingpui va lum lawk la, ka nail polish hi a la ro lo." Tiin a pa fanu, a û nisi chu a tir kual vel. Thuawih takin a va lum ve mai bawk a, Sanga chuan, "Naktuk zan carol chu kal ve ang u aw. " A ti a. 

"Ka peih vak lo asin, kal i tum em? Apui.." Hruaii chuan a ti a. 

"Tum e a, a nuam alawm." A lo ti sam êt a. Rinhlui nen a hmaa an lo sawisa vek tawh a nih vang a ni. 

"I kal chuan ka kal ve mai ang. " Hruaii chuan a lo ti chat. Thingpui chu a rawn chawi phei a, "Hlute, nang pawh kal ve rawh aw, kan lo sawm ang che u." Apuia chuan a lo ti var a,. Pi Mawii a ner sak mai. Hruaii chuan, "Hlute i tia law? Hming a va ngah ve" tiel rawngkai lek lek hian a ti a. 

"Hlute an ti deuh vek alawm.." Apuia chuan a ti nghut ringawt. 

Sanga lah hi a sualthiam ve bawk a, thingpui an in zawh chuan, "Hmm, Bungpui khuaa ka thingpui inah a la tui ber ang, rawn lumtir ziah tur che a nih hi..Hlute.." a ti hluai a. Hruaii mitmeng a thîp sâwt hle, Apuia pawh chuan, "Ka nu thingpui lum i khum var var e.." a lo ti ve bawk. Hruaii te nufa an tihêlna a ni tih Rinhlui pawn a hrethiam reng, nui chungin, "A lawmawm thin mang e.".tiin no a khawm zung zung a, a sil nghal bawk. Choka aṭanga a va phei leh chuan a nuin, "Rinhlu, dawr va nghak rawh. Mut mai ka duh, ka kawng a na riau" a lo ti deuh hmak a. Rinhlui pawh dawrah a phei nghal, an in leh dawr hi a inzawm a ni. Rinhlui'n dawr a nghah tak daihah chuan Apuia te pawh rei an leng duh ta bik lo, Hruaii tana han ngaihṭhatna tur thil hi engmah a thlentir duh lo hrim hrim. Hruaii tak hi chuan midang bulah chuan inngaizawng ang maiin a insawi ṭhin, mahse, mi hi an â bik lo va, Apuia mizia leh chetdan aṭangin an inngaizawng hran lo tih an hrethiam ve vek. 

A tuk zanah chuan vengchhung mi harsate puala carol an huaihawt chu an ti ṭan dawn ta a. Apuia te pawn an rawn sawm ta ngei e. Mahse, Rinhlui chu a nuin, "Mateii a kal bawk si chuan kei ka nuamsam lo nen, kal ve lo mai rawh." A ti hmak si. Rilru nuam lo leh thinrim ru takin awmhmunah a insawh a insawh mai a, Apuia te rawn lut chuan, "I la insiam na nge? Va insiam rawh" an rawn ti bawrh bawrh a. Ngui deuh hian, "Ka nuin kal ve lo mai rawh min tia, ka rawn kal ve lo mai ang." A ti chuai raih a. Apuia thin a thawk ta tlat..chutiang em ema a laka an han duh chu a ngaithei tawh lo. 

"Nih chuan, ka kal bik lo mai ang, ka awmpui ang che.." a ti ta hmak mai. Rinhlui chuan, "A ngai lo, kal rawh. Kal ngei ngei rawh." A lo ti sawk sawk a. Hruaii insiam zo chu a rawn chhuak a, "Kal nghal mai ila, Rini chu dawr nghah a ngai a." A ti hlang hlang a, Rinhlui'n a mitmei nasat êm avangin Apuia pawh hreh zetin a kal ve ta a, mahse, a hnu lawkah a rawn text a, "Ka rawn kal tho ang, lo la mu suh aw." A rawn ti. Pi Mawii lah chu a nawmsam loh chhuanlam ve si, a nuam mah mah a niang, kawmthlangah a zu leng leh ta daih a, ṭhalai tam zawk an carol avangin khawlai pawh a reh dûk mai. Amaha dawra khawhar taka a ṭhut lai chuan Apuia a rawn lang ta hlawl mai. Phâwk zeta lo enin, "Ti nge?" A ti hluai a. 

"Timah, ka rawn rim dawn che. " Tiin a bulah a ṭhu nghal chawt a, "Awii, an thinrim leh ang e".hlauthawng deuh hian a ti a. 

"Chu chu an buaina alawm, kei chu inthup reng ka peih tawh lo. Min khap tawh suh. A nih nih ni tawh mai ang." Apuia chuan a ti nghut nghut a. Rinhlui pawn han sawi vak tur a hre lo hle. 

"Engtin nge Hruaii i rawn kalsan theih?" A tih chuan, "Ka pum a nawm loh thu ka sawi a, ka rawn kal daih" a ti sam êt a. Dipdaltu an awm lo bawk a, Rinhlui kut chu vuanin a khal neuh neuh a, "Nakkum July thlaah ka zirna ka zo dawn a, min lo nghak la, lo tuar hram hram la..i thei ang em?" A ti a. 

Rinhlui chuan, "Theih lohna chhan tur chu a awm lo va, mah se;."a ti fan raih a. 

"Eng nge mah se!" Apuia'n a ti vat. 

"Ka nute hi.." a ti khur dat a. 

"Chuvang alawm neih vat che ka duh, ka nu leh pate pawh ka hrilh vek tawh, anni pawn an khawngaih ve lutuk che a. Tunah pawh Hruaii rim anga ka lan loh chuan engtin emaw i lakah an chet ka hlau a. Mahse, ka pawisa tawh dawn lo, an ti ve mah mah a ni." A ti bung nghut nghut a. 

"Ka lo nghak ang che, i thutiama i din dawn phawt chuan.." Rinhlui chuan a lo ti nghet charh a, an mit leh mita inmelh dun vawng vawngin mipa zawk chuan chet a la ta a, tuma la fawh ngai loh Rinhlui hmui sen no chekah chuan a fawp ta a, Apuia hi chuan ngaihzawng pathum lai a nei tawh a, a bo lo tawk chuan a zei ve viau mai. Rinhlui erawh a zakin a khur nasa mai a, mahse, Apuia'n a han fawh chiah khan Apuia lakah chuan a inhnimphum kan ti dawn nge, a nghet hliah hliah a ni ber mai. Pi Mawii ṭawng lawng lawng thawm an hriat rualin an inlahrang ta vat a. Kar lovah Pi Mawii pawh rawn lutin dawrah a rawn dak nghal a, Apuia a hmu chu mak a ti hle tih a lang reng. "Apuia chu i carol ve emaw tia,. Ti nge a?" A ti hliai a, a awki-ah lungawi lohna tlem a tel bawk. 

"Nia, Hluteii hi a kal ve thei si lo va,a khua a har takin ka tia, ka rawn awmpui a nih hi. " A lo ti vei hmân bawk sia. "Mateii a rawn haw ve lo mi?" A ti khawmawi leh a, "Aw, ka rawn hawnsan ta mai." A lo ti sam leh êt a. Pi Mawii hmel chu hmuh theih khawpin a dur nghal mawle. Hetiang em ema huatna thinlung pai ta chu a thau pawh a thau thei lo rêng a, a cher fîp tlat rêng a nih hi. 

"A nih chu mawle..Rinhlui pawh naktuk thawh hma i ngai sia, mu hma rawh aw." Tiin a kalsan a. A thusawi mei nei zet zet te avang khan Rinhlui te chu an innuih tawp. Tihtheih nei si lo, thinrim bawk si Pi Mawii chu a khawngaihthlak letling zawk alawm le. Pi Mawii chu mu mai loin tv te a la en a, a rawn dak chhên bawk si, carol ho lo haw hmain Apuia pawh a haw ve ta a, mahse, chumizan erawh Rinhlui a mutui ngang mai, Apuia chu a thinlung taka a pawm tak vang a ni ngei ang le. 

Mahse, zing a rawn inherchhuak a, zingkar atangin Pi Mawii âng thawmin an in chu a luah hneh hle. A che te chu a che deuh sawk sawk a, Rinhlui chuan a chhan a hre kar mai si. Midang an rawn tho ve sap sap a, Mama pawn, "Ka nu mood a chhe leh tawh ni maw?" A ti bai bai mai. Tukṭhuan an ei laiin a nu chuan, "Rinhluzual, hei hi hre rawh, Apuia te ang te saw i lo ngaizawng ve ringawt a nge. I nau bialpa a nih saw. Bakah nang ang fahrah beisei phak a ni lo, vawikhatmah ka hmuh laiin inleng mipa kawm tawh suh ang che. Mi pawn an sawi duh teh mai che nia, hetah mikhual ang i la nia, inleng i nei ngam der tawh a nia. Zak ve deuh rawh. " A ti ta hlawih hlawih a. 

A ngawi reng thung. Engpawh sawi se awmzia a awm dawn chuang lo. Hruaii chuan, "Nizanah i lo ko hrang vel a ni maw? I zaktheilo sia maw..mi pawn i û sawn a chuhpui ve che ni maw an tia nia aw. " A lo ti ve bawrh bawrh a. Chu kher chu a awih loh zawng tak a ni. Tuman an sawi a ring lo, Apuia nena hmehbel theih turin khawlaiah an inzui ngai lo va, biak pawh an inbe ngai mang lo. Sanga lahin engmah a sawi dawn der si lo va. An nufa hian dawt an sawi ve mai mai a ni. 

Thleng a sil laiin Apuia'n a rawn call a, chumini chu ni 23 a ni tawh. Zanah an kohhran ṭhalai pawl ten Advance Christmas an hmang dawn nghe nghe, A phone chu a charge avangin Tetea'n a lo laksak a, "Kha, U Apuia"tih pahin a pe a, Hruaii'n a lo hre fuh si, rum elkhen hian a rawn melh a, mahse, a ngaipawimawh duh lo lui ve tlat. "Thleng ka sil laklawh lutuk a, sil zawhah ka lo bia ang che." A ti ve hmak. 

Phone a dah hnu chuan, "Awii, number te in lo inpe vel elo? Apuia pawh ka'n hau ang e. Zahpuiawm lutuk" Hruaii chuan a ti hlak hlak a, a rilru chhungril erawh a nuam hauh lo. Apuia hian a ngaizawng ve lo tih a hre daih tawh, Rinhlui zawk a duh avangin an rawn leng ṭhin a nih rinna a nei ṭan a, a hlauthawng ngawih ngawih a ni ber e. Thleng a sil zawh awm velah Apuia chuan a rawn call leh a, "Huanah kan kal dawn a, lo kal ve ta che" a rawn ti. 

"I â sia, engtin nge an phal i rin!" A lo ti hlak  

"Ni ve tho mai, sangha kan man dawn a, ka lo hawn ve ang che. Thil thleng a awm em?" A rawn ti a. A rilru tihhrehawm a duh loh avangin, "Awm lo ve, a ṭha vek." A ti ringawt. An dah zui leh ta a. In chhung a tifai dawn a, a che ṭan a, a nuin dawr a nghak a, Hruaii erawh a chhuak leh tawh. Hmun a phiah laiin Hruaii chu a rawn haw a, "Apuia te huanah kan kal dawn,. Nang chu a sawm ve lo che ni maw?" Uangthuang zet hian a ti hlang hlang a. Rinhlui nuih a za deuh, "Sawm ve nang." A ti mai a. 

"Ka ring reng a".diriam zetin a tihkhum zui. Apuia'n msg-in, "Hruaii tehchawng kha, kan huan kal tur a lo hria a, kal ve min rawn dil vak vak a, a nuam si lo va, ka phal ta ringawt a nih kha. Ngaih loh lamah ngai suh aw" a rawn ti a. 

"Ngai lo e, a tha daih zawk." A va ti thliam a. Rinhlui hi chu a rilru a tluang a, Hruaii mizia a hriatchian tawh êm avangin a runluihna vel chu eng hê hû-ah a ngai lem lo. Chumini nilêng chuan a che a, a hah ve hle,. Zan lamah kal ve ngei a tum avangin fai takin a inbual a, Seni'n a rawn sawm dawn bawk a, a nute pawn an phal ngei a beisei a ni. Hruaii pawh mood fuh zetin a rawn haw a, sangha a rawn hawn ve nual bawk, Pi Mawii pawh a hlim leh ta viau. Zanriah eikhamah Rinhlui pawh a insiam ve a, Seni'n a rawn sawm ta zân mai. Apuia te erawh an rawn dikdak lem lo, Hruaii chuan a nghak ru deuh tih a hrereng, mahse, an rawn sawm dawn lo tih Rinhlui chuan a hre ru kar a, a nui a nui mai. Seni nen an chhuak ta a, tun ṭum chu Seni'n a rawn sawm bawk a, a nu pawn engmah a sawi nawi lem lo. 

Programme an han ṭan chho a, zai a nuamin programme an siam thiam bawk a, an hlim dar dar hle. Apuia nen an insignal zeuh zeuh thei a, tleirawl inngaizawng ang mai an ni. A tawp lamah gift exchange an han nei chho a, Mak deuh maiin Rinhlui leh Apuia chu an number pawh a lo inang chiah chu niin an han inhlan lai vel chuan an lo haw haw hluah hluah mai a, hriat ruk an lo nei ve nge mawni dawn ni. Hruaii erawh a tum hmak mai, a hnu lehzelah pawh a tum bûr reng mai a, zai pawh a zai tui thei tawh lo. In an han thleng chu, "Hmeli, Apuia hi i lo ngaizawng ve tak tak elo? Ka bialpa a ni tih i hre lo mi?" Zan rei pawh sawi loin a ti ta hrep hrep mai a. 

"Ngaizawng lo ve." Tih chauhin a chhang. 

Hruaii tan han sawi leh vak tur awm hek lo. " Fimkhur hle ang che." A ti ta ringawt. Apuia bulah Rinhlui'n a va sawi chuan, "Hrilhfiah hlek a ngai dawn a nih chu, a ve vak vak ringawt chuan.." a rawn ti a. Rinhlui ngaih pawh a ngam ṭan. Mi hnunglama ngaihzawn ching hi an awm ve tak tak, miin an lo biak chhiat lem loh vang ringawta an duh ve emaw ti mai tawk hi an awm ve tlat! An khawngaihthlak zawk hial mai. 

Urlawk ni pawh a rawn inherchhuak a,. Rinhlui nun erawh a chêp sâwt hle. Apuia phei chu awm lo se a hrehawm zual ngawt ang, a rawn be harh reng zawk a. Call erawh a la ngam tawh chiah lo. Zanah chuan Seni'n a rawn sawm a, a han inkhawm ve a, An inah urlawk zan an hmang dawn tih a hre ve kar, awm ve loh law law a duh a, Seni lahin an in hnuaia hmanpuiah a lo sawm ve sek bawk nen, a nu te pawn hmundanga a hman daih chu an duh zawk a rin avangin Seni te bula hman ve chu a rilruk ta a. Seni te in hnuai hi Primary school zirtirtu Muanpuia'n a luah a, Seni nen hian an inngaizawng nghe nghe, mahse, Muanpuia chu pathlawi a nih bakah a hmelṭha lem lo va, Seni hi a chhe vak si lo va, a ui ru thei viau. Hlawh an neih hi chuan hmeltha lem lo pawh hi an lo 'puak' ve zel thei tho a nih hmel. Bakah Muanpuia chuan zu a in ṭhin a, thawkkhat lai phei kha chuan amah hêkna an dawng hial nghe nghe. Muanpuia thiante bakah Seni cousin Mapuii te ho nen ar an kang ve dawn a ni. In khawm bân chuan Seni chuan an inah a penpui a, Apuia te ho pawh an lo awm tawh. Pi Mawii bulah Seni chuan, "Nu Mawi, Hluteii hi ar kanpuiah ka rawn sawm a, i phal ang tiraw? Kan inah kan kang ve dawn a. " Tlawn titih hian a han ti a, a nui sang bawk. Pi Mawii pawh chuan beisei loh deuhin, "In inah a nihte chuan a pawi hleinem, va kang ve rawh u, rual hi a pâwl lo lutuk a, va intiharh ve rawh se." A lo ti luam a. Rinhlui rindansa chu a ni deuh tho. A va inthlak sawk sawk a, Apuia chu nakinah ka hrilhfiah mai ang a ti rilru bawk. Tichuan, Seni nen chuan an chhuak leh ta a. 

"I mak ve maw? In inah kan rawn kal ve em em a. Mipa dang bula ar kan i tum a maw?" Apuia msg a dawng nghal zat. 

"Inah khan awm ve mah ila, kan pahniha hun thawl kan neih theih i ring em ni? Ka hnawksak leh dawn sia, mu turin thu min pe leh vat dawn. " Tiin a va chhang a, a hrethiam êm ang chu maw. A hnu deuhah, "Nakin deuhah ka rawn kal ang, leng daih ang" a rawn ti a. Rinhlui pawh a thaw huai mai. Seni te nen chuan Muanpuia inah chuan an awmkhawm ve ta dal a. Mapuii leh a bialpa Fela bakah Muanpuia ṭhiante pahnih Dina leh Vena te an awm ve bawk. Zu an in a, Seni leh Mapuii te pawn beer an in ve, "Zu a ni hleinem, kha, lem ve rawh, a ruih theih loh" tiin Rinhlui pawh an pe ve a. An hnawn tlat avang chuan a la ve ta nge nge a, a in tirh chuan kha a tiin a ner nasa mai, mahse, a in a in takah chuan a tuina a pawh nge ni, cane khat chu a in zo ta der mai a. A lu a hai ta riau a, a zâng deuh hûih bawk. Seni leh Mapuii te titi karlakah chuan lo ṭawng ve teh a tum a, an ri nuai nuai mai. Mahse, Apuia call a dawng ta a, zangkhai zet hian a chhang a, "Seni te in piah kawiah khan ka awm, lo phei rawh" a rawn ti a. Seni te bulah a sawi a, anni lah ngaihsam tawh bawk, "Rei lo la" an ti liam puat ringawt. Apuia lo nghahna hmun a va thlen chuan bike-ah a lo thu rûn a, "Lo chuang rawh" a lo ti nghut. Eng sawi set set lo chuan a chuang vei tharh a, hmalam panin an tlan zui nghal. An khaw dai an thleng a, kawngsirah a bike chu park-in, kawng thlang lama kawngṭum fai angreng tak chu an zawh dun a, thla a eng riau a, boruak a nuam tawk chauh bawk nen, thui vak lo an zawh hnuah thlam lian lo tak an thleng a. Apuia chuan a hawng a, an lut dun ta a. 

"Sanga te huan a nih hi,. I la kal lovang tiraw?" Tih pahin namthlak chu a hawng rak rak a. 

"Kal miah lo" a ti sap a. A rawn kai a, namthlak bulah chuan an ṭhu dun ta a. "Zu i in elo?" Apuia chuan a ti thut, a rawn melh chiang hle bawk. 

"Beer alawm" a ti niah niah a. "Beer pawh alcohol a tel tho alawm, ti nge i in ve ringawt a?" A awkiah chuan lungawi lohna a lang tel tlat. 

"In ve rawh an ti tlat a" a lo ti leh nawk nawk a. "Kha i mitmeng pawh a zim sûn alawm. In tawh miah suh, beer aṭangin zu-ah i kai chho mai ang" tiin a han zilh ve ngial a, Rinhlui erawh beer khan hna a la thawk nen, a la nuam chem chem mai. Inkuah dun rialin an ṭhu a, a reh vawng vawng mai. A rawn fâwp a, ani lah ruih a lo nei ve tawh nen, a thiam ang tawkin thahnemngai takin a chhanglet ve a, Apuia chuan thlam chhuatah chuan a tlukpui ta. Mahse, Rinhlui rilru rawn fim tial tial chuan thil ṭha lo kawng an zawh mek tih a hai lo, "Apui, aih, ka duh lo" a ti chul a. Apuia pawh chuan, "Engtinmah tih che ka tum hleinem, min hlau suh " a lo ti dam thlup a. Ṭhu ṭha lehin an inkuah vawng vawng mai. 

"Engtin nge i rawn kal?" Rinhlui'n a tih chuan, "Ka nu call ka la der tawp alawm, chhungkaw inkhawm kan neih dawn vanga haw tur angin ka sawi tawp" Apuia chuan a ti a, Rinhlui chuan a lo nuih ver ver ringawt.

Apuia chuan rawn enin, a biangah a piai a, "Ka nei ngei ngei dawn che. Ka hmangaih chein ka hria.." a ti nghet charh a, Rinhlui phone lo ri chuan an boruak a rawn tidanglam ta deuh. Seni a lo nia. "Mate, i nu leh Hruaii te an rawn kal a, an chhuak chiah. An rawn zawng che a, sawi ngaihna ka hre si lo va, a lo haw tawh kha. A nuamsam lo va, a lo haw daih alawm ka ti tawp a nia. Lo haw vat ru" a rawn ti hmawk hmawk a,. Rinhlui chuan a phone a hum nghet kher mai..