AMAH LEH KEI..(s2) 1

AMAH LEH KEI ..(S2)

Chapter- 1

Ziaktu : Toni Râlte

Daisy msg avang chuan ka tiril a khur a, ka thin pawh a rim thei lo. Hlauhthawnna leh mak tihnain ka khat a ni ber mai. Victora lo chhuak chu ka lo melh chiang ngang mai a, amah pawh chuan min melh hû hû, mak a ti ve deuh niin a lang. Ka ṭawng hleithei miah lo zui a! Ka bulah a rawn ding a, "Thil thleng a awm em ni?" A ti sup a. 

Inpet ruh chungin a phone chu a hmai bulah ka han lek kang a, "I sawi fiah thei em?" Ka ti ta fak a, ka awki ngaihnobei lo zet avang chuan a mitmeng pawh a ṭi deuh dûkin ka hria. A han chhiar chuan a rum nghut ringawt, "Daisy maw? Eng nge a awmzia?" A ti hû a. Rum zeta melh hrâwkin, "I hre zawk ang chu..Victor, min namnul hauh suh ang che." Ka ti leh ngal ngal a. Ka sama rawn tuai thuakin, "Va bia ila" a ti ta mai a. Ka hrilhhai letling. 

"In inbiakna dang zawng zawng i delete a, nizanah pawh inhmuh in tum tih a lang reng, eng inlaichinna nge in neih? Sawi rawh." Ka ti tuar tuar a, ka thin a rawn rim ṭan ta bawk. A nui suk a, "Chu tak chu alawm va bia ang ka tih..keipawn a awmzia ka hre lo ka tih chu" a ti a, a awki pawh a sang ve hlek. Bawihteii a rawn ṭap ta tlat, ka pawm vat a, ka thlem zui nghal. Rum zeta melh chungin room ka chhuahsan a, Maliani room kalpelin chokaah ka chhuk ta a. Sangi leh ka nu te an lo awm a, Bawihteii chu ka nuin a lo la ta vat a. Ka hmelhmai a dik lo deuh ni tur a ni, Sangi chuan, "I mu ṭha vak lo ni maw?" Nui chung hian a lo ti a. Nui luiin, "Mu ṭha e, ka tho fuh vak lo zawk" ka ti ve mai a. Ka nu chuan min rawn melhin, "Inpa a tho tawh em?" A ti a, ka lo bu nghat ringawt. Daisy rawn lut thut chuan min tihamhaih deuh nge ka phu zuk a, hmel hlim sar hian, "Vawiin chu kan tho nuam khawp mai. Chaw pawh a rawn ei dawn, Pipi bai ka ei châk a tia" a ti sar sar a. Ka hmui ka lo tipawrh vak ringawt, mahse, inthunun leh vatin, "Boss-in a tih te chuan kan bai suah suah ang a a ni mai lawm" ka ti a, ka che zui nghal sawk sawk. Daisy chu engmah thuchiang hre lo mah ila; ka thîk nghal em em tawp. Ani pawh coffee nen in chungah a chho zui a, ka nuin Bawihteii puain a lenpui bawk. Mali te nupa erawh an la rawn tho lo, an tih ṭhan a nia ngaiah kan nei tawh. Ka pa pawh a rawn lang ve a, Victora a la rawn chhuk miah lo. Mahse, ka ngaihven duh lo lui tlat thung. 

Tukṭhuan ei dawnah Mali pawh phak chuapin a rawn lang ve hlawl a, mak ka tih deuh chu thawh chiah pawn chaw a heh hle zel hi, kei chu ka thei ve lo. Sangi'n in chung lama awm te a han ko a, keiin chaw ei ka lo siam thung. "U Mal, fanghma hi lo chan ve lawk mai teh a" tiin fanghma ka kawk vâ a, ner nakin, "Mi âwm awl lah hi in hmu thei der lo va" a ti nghat a, ka ngawi tlat thung. Fanghma pawh chu a chan zui ve mai bawk a, chhang chhang lo ila kan ṭha a ni mai. Victora tel loin Maliani te pawh an rawn chhuk a, ka nuin, "Khaw nge Vica chu " a lo ti vat. Maliani chuan, "Ka ei peih lo a ti" a ti a. Ka nu chuan min rawn melh zauh, a sawi tur âwm ka hre nghal. Ka ngaihven lo lui tlat thung. Mi chaw ei peih lo na nâ na ei luihtir thu awm hek suh. Kan chaw ei dawhkan hi a lian bawk a, mi pawh kan leng tam, mahse, chawhmeh suah hran zel a ngai a, sil tur a tam ṭhin. Mama'n, "Naktuk ka zin leh dawn a, Mali pawh an in lamah lo va awm leh rih mai rawh se aw" tih bik pawh nei loin a ti a. Ka nute pawn an remti tih a lang. Awm lo se a nuam daih zawk si a. Mali chuan, "Daisy i khua a har awm, kan pa a zin chuan"..fanghma hmawm thawih pah chuan a ti hram a. Maliani a meng rum angreng viau, Daisy lah chuan, "Nia, a khawharthlak ngawt ang." A lo ti ve hmak bawk. Kan boruak hi pawnlama nawm hmel tak anga lang siin kan intai fek fek a, chhungrilah kan innger ru rân ni hian ka hria, kei tak hi chuan Mali bak han mil loh em em ka nei hran lo, Mali erawh chuan tumah min mil lo thung. A nun hi a hrehawm ve khawp hian ka ring ṭhin. Eikhamah Sangi leh Daisy te ka pui a, Bawihteii a ṭah tak avangin ka la a, in chungah hnute pe turin ka chhohpui ta a. Vica chu a inbual a niang a lo awm lo. Khumah thuin hnute chu ka pe nghal a, ka fanu hmel hi chu thlir nin a va har ṭhin tak êm..bathroom kawngka a ri rak a, ka melh duh lo lui tlat. Ani pawh ngawi reng chuan a inthlak mawlh mawlh a, a tawpa tawpah a thei ta ngang lo nge, "Lunglian leh lutuk, thudik pawh hmachhawn ngam tawp si lo." A ti hluk hluk a. Ka la ngawi tlat. A phone a hmet mual mual a, tu emaw a call ta a. "Daisy, i tihfel zawhah kan roomah lo chho lawk ta che" a ti ta a. Ka melh kâwk..

"Hriat i duh a ni lo'm ni?" Mi pawh en lo chuan a ti a. 

"Inchhuahchhalh ka duh hleinem" ..ka ti sap a. Bawihteii a lo rak ruai ruai mai, a pa chuan ka kut aṭanga rawn lain,"Ka hniangpui, ka enchimloh..vawiinah a nu lo tibuai lutuk lo la aw." Tiin a fâwp a, a fanu hian a duh bawk a, a pa nen an inpawm tawh chuan kei pawn ka chhuhsak hleithei ngai lo. Room kawngka chu a rawn kik dat dat a, "Lo lut rawh" ka lo ti vat. Daisy chu a rawn penlut ta a. Bawihteii chu a rawn lawm ve nghal hlut, ka lo thlir reng ringawt. "Daisy, hei hi min hrilhfiah theih kan beisei a." Rem leh rem lova a phone hmetin Victora chuan a ti ta a. Daisy pawh chuan msg chu a chhiar ta vat, a mitmeng aṭang chuan a ngaihna a hriat loh hmel viau mai. 

"Awii, he thil hi ka phone atanga lo kal a nia maw?" A ti ta hû a. 

Victora a bu nghut a, "Tuaimami tum bûr chhan a nih kha.." a ti zui hram. Daisy chuan min rawn en a, "Awii, Pipi, ka hre miah lo, ka thawn a ni lo. Hetiang turin ani nen kan inkarah engmah a awm lo, ka phone hi tu emawin a khawih a niang. " A ti chul a, dâwt sawi hmel a put eih loh avangin keipawh ka thêp huai huai mai, mahse, a phone chu tuin nge khawih ta ang? Maliani maw? A teuh lo. 

"Mahse, password te i dah vek sia, tuin nge khawih ang?" Ka ti ta ṭâlh a. 

A ngawih vang vang hnuah, "Rin dan ka nei thiam ta mai. Nizanah khan kan mu hma a, ka chau ve deuh nen, ka phone hi room luh chiah bangrelah ka charge a vangin ka dah a, U Mali hian a khawih a ni thei ang em? Pattern te chu a risk theih alawm." A ti ta mawlh mawlh a, ka lo thaw hawk ringawt, "Engvangin nge Mali chuan chutiang chu a tih kher ang?" Victora zawk chuan a ti a. 

"Ka hre lo,.in ina ka awm reng hi a duh lo a niang, min thîk sia." A ti niah niah a, nuam lo a tih hmel êm avangin ka lo inthlahrung leh hnuhnawh. "A ho lutuk, ka ring che lawm..mahse, thil hi chu hriatchian zel hi a ṭha a." Ka ti a, thawveng hawk hmel a pu ve thei ta. 

Rilrua pai neih loh hram tumin ni ka vuiliam ve leh thei ta a, Mali a awm ta lo bawk a, a thawventhlak angreng. Vica pawh a hnaah a kal a, a rawn haw aṭanga reivak loah zanriah kan eizui nghal. Khua a nuam vak lo va, ruah a sur seng seng reng bawk nen, ka nute in lama len phei kan tum pawh kan ṭhulh leh daih. Ka nu hriselnain ziaawm lam a pan chhoh bakah Tetea pawn rilru puitling a put chhoh ve ṭan avangin rilru hahna em em ka nei rih lem lo. Bawihteii lah a duhawm tulh tulh bawk si. Dar 7 pelhah kan mu ta daih a. Ka kawng a kham deuh avangin a pain Bawihteii a âwi durh durh mai, a inhmeh lo nain a zeihawi tlat zel hian ka nuih a tiza ṭhin. Dar 8 a la ri lo deuh ang tihin ka nuin min lo call a, "Tetea pa kha a rawn chhuak a, nichin lawk khan a rawn thleng. Engtia han tih chi nge mawni dawn ni?" A rawn ti niah niah a. Home-ah kan dah lut kha a nia, a awm rei thawkhat ve tawh viau mai, a khat tawkin Tetea'n a kan ṭhin bawk. Tin, Nuteii te nufa kha ka nuin indan a phal tak lovah chuan an la khawsa ho zel a, ṭhenawm lawkah putea te pafa an khawsa bawk nen, ka awm loh pawh an hre vak lo. 

"A ṭha tawh em ni? " Ka tih chuan, "Aw, hei a rawn sar haw vung mai. Mahse, Home-a thawktu pakhat nen an thu a inhmu lo deuh nge ni a rawn chhuak ringawt a." Inthlahrun hmel lek lek hian ka nu chuan a rawn ti a. 

"A va zia lo ve aw, kalna tur dang a hre bawk si lo a niang. Awmtir ve rih mai u la." Ka ti a. Lehlamah ka lainat ve riau, ka nau pa a lo ni ve bawk nen. Ka nu chuan thâwk la hawkin, "Ṭhenawm khawvengte an zahawm ka ti deuh mawle, Tetea thu thu ni teh se." A ti a. Kan inbiakna kan titawp zui nghal. Victora'n Bawihteii a muttir zawh chuan ka nu te chungchang chu ka hrilh ve a, "Innei leh daih se la ṭha daih zawk alawm, i nu pawh a khawhar a zia ang a." A ti awlsam leh êt a, ka melh nghek ringawt. 

Thutak deuh zawk hian, "Ka ti tak tak, Tetea pain a duh a nih chuan innei leh se ka ti. Dik tak chuan hmeithai hi an zahawm lo ni lovin pa uap loh chhungkua chu kim lo a awm tlat ṭhin. Bakah an kum a tam ve zel a, i nu pawn kawppui a mamawhna a sang zel dawn, dam mawh hritlan nikhuaah fate ai chuan kawppuite an hlu zawk zel a nia, nakinah Tetea'n nupuite a la nei ve ang a, a nupui a ṭhat loh phei chuan i nu a khawngaihthlak, Nuteii pawh sawn pasal nei leh se ka duhpui. " A ti ta duah a,. A sawi chu a dik tihna chen ka nei viau. "A thuhrimin khatiang khan i lo rilin ṭawngkam i lo thiam tih ka hre miah lo. " Tiin ka fiam zauh a. 

A khi suk duh chauh, "Story ka chhiar ṭhin alawm.." a ti a. Mu turin kan inpuahchah zui nghal. Ka mang a chhiat deuh avangin ka sira Bawihteii mu hi a ngaihtuah ṭhin a, zanlaiah te hian min siamṭha sawk sawk zel, ka lo khan bet tlat zel a, min hauh tamna ber pawh a ni. 

A tuk tlaiah min sawm nasa bawk a, ka nute in lamah chaw kan va ei phei a, Tetea hian Bawihteii hi a lawm em em a, a kut aṭangin midangin an laksak thei meuh lo. Tetea pa pawh inthlahrun hmel zetin a lo ṭhu ve khar a, ka biak bawrh bawrh takah chuan a tlangnel chho ve ta deuh, a hmel pawh ka nu sawi ang khan a sar vuah mai a, Tetea nen pawh an lo inang hle tih ka hriatchhuah phah. Nuteii nen eirawng kan bâwl a, Vica nen kan titi dun dante chu ka hrilh ve luam a, "Ka ngaihdan chiah a nih chu, innei leh se, keini nufa pawh in hrang chan ve a hun tawh." A ti a. "Indan ve kher a ngai mawni le" ka tih chuan, "Û te nghênga khawsak reng chuan puitlin a harsa alawm, Bawiha hmakhua pawh ngaihtuah a ngai. " A ti ve mai a, a dik tho mai. 

Zanriah pawh chu tlai chhe lutuk lovah kan ei a, Tetea ta pek chuan, "Chhungkua kan kim khawp mai, putea te chhungkua awm leh chiah se ṭha tur.".a ti zauh a, ka nu leh Tetea pa chu an laih hmel kher mai. Putea te sawm nachang kan lo hre miah lo chu keipawn pawi ka ti, mahse, vanneih asiamin mikhual an neih lai a lo ni hlauh a, ka inthiam lo lutuk lo. Chaw ei thleng vel kan sengfai lai chuan Vica chuan , "Ka pi, Hruaii nen kan lo sawi dun a, Tetea pa nen hian insawirem leh mai ula ṭha kan ti khawp mai. Ani pawh kalna tur dang a nei chuang lo va, eng nge in ngaihdan?" A ti ta hlawl mai a, ka va melh a, min melh duh ve ṭhak lo. Ka nu chu inngaihtuah nasa tih hriat zetin a thaw halh a, "Ka hrethiam lo le..thil mawi pawh a ni chiah dawn em mawni le.." a ti zawi sap a. Tetea pa an ngaichâng deuh niin a lang, ani pawh chuan zah hmel lek lek hian, "In tihdan dan ka pawm.." a ti a. Tetea phur ta lutuk chuan, "Yes, pa ka nei ve leh dawn ta. Ka sawi ngam loh U Vica'n a lo sawi chu ka va'n lawm." A lo ti chul a, Nuteii lah a lo phur bawk. Ka nu erawh rilru fîm pu tih takah, "Khatin lo sahâwk chiam suh u, nuṭa ka la nei ve a, i putea pawh kan râwn ve phawt a ngai alawm." A lo ti a. Hei hi chu a dik, putea pawn a remtih loh ka ring lo, Nuteii chuan putea a call chawp ta chuk chuk a. Khap hleihtheih pawh a ni lo,. Kar lovah Putea pawh a rawn thleng a, ka hmu tar riau. An inṭhen hnu hian an nu hlui khan vawi 2 dawn chu a rawn hêl leh a, a pawisa duh vang bakah kan ngaihsak lo, amah Putea pawn engah teh vak a lo ngai tawh lo va, an fate lahin an nu chu an lo ngaihlu tehchiam si lo. A beidawng ve ta a niang, a chanchin kan hre zui ta lo. Putea bulah chuan Victora'n ka nute chungchâng chu a hrilh malh malh a. Putea pawh a bu ve nghut nghut mai. Ka nute erawh an ngawi dûk a, nuam an ti vak lo tih ka hrethiam, Victora lah chuan ka bula a sawi ang chiah kha a auchhuahpui miah miah mai si. Putea pawn, "A dik khawp mai, i ngaihdan hi ka pawm dan chiah a nia, Kan hriat angin Thlenga pawh chhungkhat mumal belh tur nei tawh lo i ni a, hun kal tawh chu hun kal tawh a nia, tunah chuan nun tharin bul inṭan thei turah ngai ila, Nu-i pawn i fapa hringtu a ni tih hria la, fate pa, fate nu nge nge an lo tih ang hian a tawpkhawkah chuan thisena inzawmna hi a lo hlu ber nge nge zel a nia. Amaherawhchu, in lo inrem leh a nih pawhin man leh mual fel taka inhlan te pawh a ṭha ang. Chuvangin Thlenga paw'n i pa chan chang tur i zawn ve te pawh a ngaih hmel, tun tut tuta thil tihfel chi a ni lo bawk a. Hmanhmawh uchuak a ngai hran lo." A ti chuar chuar a. Kan pawm tlang viau aniang, sawibuai a awm lem lo. Hlim tlang takin kan titi ho a, Bawihteii ka pawm chang meuh lo, Bawihpuia'n a lawm bawk si, an inchhaih nui iar iar reng mai. Dar 10 rik hma deuhin kan haw phei ve ta chauh a, an lo reh ṭhap tawh. 

Zinglam dar 3 bawr velah ka harh hlawl mai a, thim hmuka mut hi nuam ka tih chiah loh avangin dim light kan on ṭhin a, Bawihteii pawh a muhil tui hle a niang, a thaw sâk sâk mai. Ka inlet thawk chu ka pasal a lo mu hauh lo mai le! A mutna ruak hiai chu ka'n melh ren râwn a, bathroom lamah beng ka chhi nghal bawk, mahse, thawmvâng engmah ka hre si lo. Ngaihṭhat lohnain min tuam nghal a, ka inbeng kâng a, bathlar lamte chu ka va thlir kual thul, tumah leh engmah ka va hmu chuang lo. Khum chu ka thawhsan ta nge nge a, Bawihteii ka melh leh thuak hnuah kan pindan chu ka chhuahsan a, Kalna tur ber pawh ka hre chuang lo. Thil ka hrechhuak thut a, ka let leh vut, kan pa lukham hnuai ka dap a, a phone a lo awm lo. Ka call ta nghal a, switch off bawk si ! Insehruh ṭeuhin ka chhuak leh a, Maliani room kawngka bulah ka ding vang vang, ka rilruah thildang engmah a awm thei lo, Maliani pindanah Daisy a mu ang em tih chauh ka ngaihtuah a ni. Kawngka hawn tuma ka herh lai takin in chung step ri thlep thlep ka hre ta a, rang lutukin Mama te pindanah ka tlan lut nghal, an nupa an awm lo bawk a, pawi ka ti hran lo. Ke pen thawm chu lo hnai zelin mi pakhat chauh a ni lo tih ka chiang, ka khur titih tawh, min hnawh up up bawk si. Chutah ke pen thawm chu tawpin Maliani pindan kawngka ri rek thawmin a zui a, ka maimichhing tawp. Ka lungphu ranzia leh ka inhumruh nasatzia tak kha aw..engvanga va chhuaka va fiah mai lo nge maw ka nih le..ka rilru kha a mang vek tlat a ni. 5 mins vel ka nghah vang vang hnuah ka chhuak ta chauh a, a lo reh huai tawh a, tumah hmuh tur an awm hek lo. Kan pindan ka pan nghal a, ka va luh chuan Victora a lo awm miah lo ! Ka bangbo lutuk chu ka hawi ka hawi ringawt. Mahse, ka hrilhhai rei lem lo, bathroom kawngka a rawn ri rak a, Ka pasal ngei mai chu a rawn chhuak ta a. Khum mawnga ka ding min rawn hmu chu a phu ve zukin ka hria, mahse, a inthunun leh vat a, "Ti nge? " A ti ro hak a. Ka ṭawng thei lo, ka melh tlawk tlawk ringawt mai a ni. A ngaih a ṭha vak lo nge a rawn ding hnai a, chiang zeta min melhin, "I ṭha em? Ti nge hetia i din reng?" A ti hniam ruih a, theihtawpa insangmarin, "Eng nge i tih zawk?" Ka ti chang fak a. Khumah ka ṭhu nghal hnawk. 

"Eng nge i awmzia? Eng thil nge ni leh ta? Kan chaw ei luat ka tuar lo va ka pum nuam lo vawi 3 ka tlan tawh. " Ring vak lo hian a ti a. Ka ner sawk, ka ngawih reng si avangin a rawn ṭhu ve a, "I tho â chu a ni lo va maw? Ti nge hetia i awm?" A rawn ti dam thlup a. Ka duh vang ni miah lovin ka mittui a hnâm sawk mai. A awki nêm leh dam thlup khan ka hnuk a tiulh tlat zu nia! 

"Min bum tum duh suh, Victor, engkim ka hre tawh. " Na ti zet hian ka ti a. 

"Eng inbumna nge maw i sawi teivet le?!" A ti hul hak a. A lungawi vak tawh lo tih a awki aṭangin ka hre thei. 

"Khaw nge i kal? Daisy nen in chungah khan eng nge in tih?" Ka ti pawr ve ta hlar a, ka melh kal bawk. A nui hawk a, "Tu nen maw? Ani bawk chu a..hawh, va hmu ang." Tih leh min kaih a rual a, "Min thlah rawh" ka lo ti ṭhawt. Min pawt dâwrh a, a âwmah ka bei thlawp mai. Min kuahbet tlat a, "Ti nge min rin theih loh ? Rinna i neih loh chuan, engmah i nei lo tihna..i pasal ka ni a, ka phatsan che hi ring suh. " A ti mawlh mawlh a, "Mahse, ka hmu alawm."ka tih chuan min thlahdul ta hret, "Tu chu?" Tiin min kuaidâk a, a mitmeng thim raihah chuan engmah thildang hmuh tur a awm lo. "Daisy" ka ti ta sep a. Keimah leh keimah ka inhau ru mawlh mawlh mai, engvanga Mama te room aṭang khan chhuak lo va va finfiah lo nge ka nih tiin. A sâwt tawh si lo. 

"Ani i hmu a, kei min hmu ve em ni?" A ti ta sup a. 

Ka lu ka thing nar nar ringawt. "Tichuan, fiahna nei lovin phatsantuah min puh ta mai a maw?" A ti dam thluam a, ka ṭah a chhuak leh ringawt tawh. "Ka hre lo, engmah hi ka hrethiam lo, keimahah hian ngaihṭhat lohna a awm a ni. Chu thil chu eng nge a nih ka hre si lo." Ka ti niah niah a, khumah ka ṭhu zui hnawk bawk. Ka bulah a rawn ṭhu ve zat a, ka kut chu lain a fawp zauh, "Tuaimam, ka hrethiam che alawm. Eng thil emaw chuan a tibuai che tih hi..eng emaw thil thleng hi chu a awm a ni maithei. Kan hriatchhuah a ngai a ni" a ti vang vang a. Amah ka rinhlelhna te kha an bo leh duak tawh. Victora'n min hneh hma theihzia hi aw. Bawihtei'n thawm a rawn neih deuh avangin ka ngaihvensan ta daih a, hnutê ka pe a, a muhil zui nghal. Keini pawh thildang sawi tawh lem lovin kan ngawi zui ta vang vang a, ka harh chuan Vica a lo tho tawh a, Bawihteii pawh a lo la daih a niang, dar 8 a lo pel vah tawh tlat atin ni. Mit nuai chawt chawtin in hnuaiah ka chhuk a, Maliani tih loh chu an lo awm ṭhap tawh, Daisy pawh a lo buai hmel khawp mai, Ka nuin Bawihteii a lo paw thung a, Vica erawh min hmuh rual khan, "Motor ka sil lawk dawn nia, a piin a puak kha" tiin a chhuak nghal. Daisy nena hmuhdun chu a duh vak lo a ni maithei. Sangi ka pui ve nghal a, Daisy chu a rukin ka lo chîk leh ngur ngur tawh. Min hrethiam ang tih ka hlau ve bawk si,. A nuam vak lo. Maliani erawh a mu ṭha vak lo nge ni, a rawn tho chhuak peih tlat lo. 

Kan pa kal tur insiam mual mual chu enin, "Nizan khan bathroomah i awm takzet a maw?" Ka ti leh sak a, rin zawh harsa ka la ti êm a ni. A chhan chu bathroom thawm ka ngaihchan khan eng thawm mah ka hre tlat lo a ni. Darthlalanga amah inmelh chungin, "Dawt ka sawi lo. Ka awm." A ti hmuk a, thinrim hmel erawh a pu hran lo. Ka duhkhawp vak lo naa han zawh leh kha ka tîm deuh, ka hresual ve pawh a ni ve thei e, tun aṭang chuan spy deuh taka chet ka tum ru ve tawh a ni. An pahnih hian an inkarah eng emaw a lo awm a nih vaih chuan ka rinhlelh tawh avangin an inveng tawh ngei dawn a, an fimkhur viau ang, mahse, keipawn ka theihtawpa chîka bawhzui ve ka tum thung a ni. Daisy hi sawi tawh angin a hmelchhe lo va, a vun a nalh bawk nen, amah lah nelawm tak, nui deuh har har reng mi a ni a, mipa tan chuan a bula awm a nuam viau ang. Kei lah Bawihteii vangin keima tawkah ka buai ve ṭhin sia, bakah pasalte tihlawm chiam dan hre vak lo, han zei leh tehchiam dan thiam lo ka lo ni bawk nen, Victora te ang hmeichhe tam lo khal fê tawhtu chuan min duhkhawp vak lo maithei a ni. Chutiang chuan ka rilru a insual deuh ngar ngar mai a ni. Tihlan loh hram erawh ka tum ang chu..

Bawihteii ka bual a, ka awih mut leh hnuah kan pindan chu ka chingfel mai mai a, kawngka kik ri pawh ka lo hre lawk lo, aw thian kharh thawm ka hriat rualin ka hawichhuak nghal a, Maliani a lo nia. "Koh i va hre thei lo ve, ngaihtuahna i kawm nasa deuh a ni maw?" Tih pahin a rawn lut a, khum epa sofa-ah chuan a ṭhu a, zingah a rawn tho peih lo kha a nia, tunah erawh a harh ṭhat hmel viau thung. "Ka beng hi a ṭha vak lo a niang" tiin ka lo nui ve hawk hawk a, Bawihteii hi a mu nghet thei bawk a, thawm dim vak pawh a ngai ṭhin lo. 

"Chaw kha i rawn ei peih si lo va, i zia leh deuh em ni?" Ka tih zawm zat a, "Ka ṭha reng, tukin kha chu ka ei peih hlawl lo a nih kha. " A ti a, a sam huh hlap chu a zût thuak thuak a, a inbual zo hlim a nih hmel. Keipawh ka intifel thawkhat bawk a, "Coffee ka zu lum dawn mi? I in châk em?" Ka ti a, "Ngai rih lo, ṭhu lawk teh, thil sawipui che ka duh." Thutak angreng deuh hian a ti a. 

Ka thu ve mai bawk, ka ngaichâng tih a hrethiam a niang. Hawi kual pahin, "Englo a nia, Daisy hi ka bân tawh mai dawn mawni ka tia" a ti zawi sap a. Ka lo meng phâwk deuh. "Ngati maw?" Ka ti hluai a, ngaihṭhat lohna bawkin min tuam leh ta. 

" aa..a thiam thu-ah chuan a thiam a, mahse, nangman min enkawl tawh la ka duh a ni. Bawihteii pawh a leikang chho ve ṭan tawh a, chutia in awmchilh tlut ngai ka ni lo bawk a. " A ti duah a, tehdaih chuan! Mahse, a chhan eng emaw tak zawng a awm ka ring tlat. 

"Awii! Teh thut a! Ka hrethiam lo le, ka peih lo pawh ni lovin ka hun neih dan ngaihtuah hian min duhkhawp lo vang tih ka hlau deuh." Ka ti a. Dik tak chuan Maliani ka nin leh enkawl peih loh vang ni lovin ka hun âwl ve angah chuan chawlh hahdamte ka duh ve ṭhin a, Bawihteii hi a pa a awm loh phei chuan lak chhawktu em em ka nei tlat lo, ka nu hi chuan zing lamah a pua a ni mai a, ani pawh treatment la kal reng, chhun leh tlai lamah chuan chhawr hleihtheih loh a ni tlat a, Maliani lah a ṭhat ve deuh laia a lo la ve hi a ni mai a, Sangi chu phût enah ka en lo, in chhung a enkawl tawp a, amah hian Bawihteii hi a duatin a lawm êm zawk a, rinrâwla neih chi a ni lo hulhual. Mali chu a sawi pawh ka sawi peih lo. Chutiang a nih teh nuaih avang chuan ka fanu enkawl bakah in chung lam tihfai hi ka mawhphurhna a ni deuh tawp a, tlai lamah eirawngbawl a ngai ve bawk nen, Maliani tan chuan hun ngah ka inti tawk lo a ni ber. 

"A dik khawp mai, mahse, Daisy hi ka ngaina tawh lo a ni." A ti tawl mai. Ka melh vak ringawt, a inthiam lo deuh nge ni za vak lo hian a nui a. "Ka sawi awmzia chu a hma ang khan kan innêl thei tawh lo, eng emaw a awm tlat.." a ti zui mawlh mawlh a, thildang daih ka lo ngaihtuah kai, Maliani hian ka rindan ang hian rindan leh ngaihdan a lo nei ve tihna em ni ang? Ka bula sawi dawt hreh siin ban mai a tum em mawni dawn le..min tihlauthawng zual sauh lehnghal a! 

"A va mak âwm ve aw. Amah hi a ngai reng tho sia." Ka ti ro hak a, ka hriat loh karin ka lo insangmar leh ṭeuh tawh. "Lemchan a thiam êm alawm.." a lo ti vei hmak si, sawi belh tur a vâng duh tawh asin aw. 

"Eng ..engtia lemchan?" Ka ti bah nak a, ka tha a khur titih ringawt lehnghal. 

Min rawn en vang vang a, ka zâmzia kha aw. A nui hak a, a nuih a za lo tih hrethiam tur khawpin kan lo inchenchilh rei ve tawh. "I hre lo tak tak em ni?" A ti a, min melh zâm a tum em mawni, a mit lah chu a la sawn duh der lo. Amah pawh melh ṭha ngam lo chuan, "I sawi awmzia ka hre lo, engmah." Ka ti sep a. Nasa deuh hian thawk a la hawk a, sofa chu ngheng dar darin chunglam a melh leh vang vang ringawt,. Min rawn en tawh chuang lovin, "Kan chhungkaw tan hian a la hnawksak dawn niin ka hria" a ti hriam hraih a, a awki-ah chuan lungawi lohna a tel chiang ngang mai. "Engtia hnawksakin, Victora ang mai, thu pehhel kual thin suh u. A ninawm." Ka lo ti hlar a, ka thinrim titih ringawt tawh. Ka chhungril lah a so bawrh bawrh tawh bawk si,. 

"Victora hi a ngaizawng niin ka hria, chu chu nang pawn i hria tih ka hria. Lemchan te, dawt sawi te i thiam ve lo. A dik em?" A ti ta fak fak a, ka laka thinrim erawh a ni lo,. Ka ngawi ta reng a, ka rindan ang chiaha thil a lo thlen takah chuan ka lawm lo zual a, thudik ni lo se ka duh ngawih ngawihzia ka chiang telh telh. 

"Ka ringhlel a..mahse, engmah ka hrethiam lo." Ka ti thâm ṭiak a. 

"Hruaipui, harh rawh, Daisy hi pawnlama beram, chhungrila sihal ang a nih hi, a langah a nui ver ver a, miin an ngaina ṭhin. A chhungril erawh a kha, U Mateii aṭanga ka hriat danin pawmlai nei pahnih ngawt a lo paldarh tawh a niawm e. Chuvang alawm bâng se ka duh." A ti ta khawl khawl a, ka hriat châk ber erawh a la sawi lo. Nizana thil thleng kha a hria em tih ka zawt hreh si, a lo hre ru khiau ang em? Victora'n dâwt min hrilh tih finfiahna ka mamawh a ni. 

"Chutiang turah ka lo ngai miah lo va,. A va'n mak em em. A nih, Malian, dik takin sawi la..Vica nen chuan thil eng emaw an inkarah a thleng tawh tihna em ni?" Ka ti ta hluai a, ka ṭawng te chu a rang mah mah hian ka hria, ka helhhawlh a nih ber mai chu..

A hmui a tisawi zauh a, "Ka ring rih lo. Nizanah erawh in chungah khan a chho a, ka ngaichâng ran a, Vica a chhoh ve awm ka hre miah lo. A han nghak leh a ni ngei ang. A hma pawh khan Mali a puh ringawt a, a phone hi tuma ensak theih pawh a ni lo, englaipawn a taksa sî hian a awm reng. " A ti mial mial a, ka ngaih a ṭhat phah hawk chuang lo. 

Ka ding uaih a, "Nizanah khan ka harhin Vica a lo mu lo va, ka ngaih a ṭhat loh avangin ka tho a, thawm ka hriat avangin Mama te roomah ka tlan lut ringawt a, In chung atanga rawn kal thla thawm a nia. Rooma ka phei leh hnu lawkah bathroom aṭangin Vica a rawn chhuak a, ka hrethiam lo ..an han inhmu a nih ka ring a. Vica erawh a thinrim hle ringawt. Fiahna ka nei bawk si lo va." Ka ti ta mawlh mawlh a. Tlem chuan ka zâng ta deuh e. 

"Fiahna i hmuh loh chuan thutlukna siam ngawt suh. Vica hi rinhlelha ṭha chi a ni lo, tin, ka nau a nih vang ni lovin dâwt a sawi chu ka ring lo. A han hmu a nih pawhin inkawp ang zawng chuan a nih ka ring lo. A chhan chu Daisy mood a chhe êm mai." A ti a. A lo chîk ru ve hle tho mai. 

"Khaw nge tunah a awm reng reng?" Ka tih chuan, "Ka va haw lawk ang e a tia. Inthlakna vel a va la dawn a niang. Tun thla hi ni 6 chiah a awm tawh a, tun thla ral se, thla thar aṭang chuan ka bân ang. A chi dawn loh tlat, Mali lahin a thîk bawk si." A ti tân tân a, thu hi chu a nei phian bawk si. 

"Kha chu i thu thu, ni 6 chhung chuan enthla char char ang aw. Keiin Vica, nangin Daisy..kan intext zel mai dawn nia, eng emaw a thlen chuan.." ka ti a, nui seih chungin, "Tehreng mai, time pass nan pawh a ṭhat viau dawn chu" a ti a. Sangi a rawn lan tak avangin kan sawi zawm ta lo, in hnuaiah kan chhuk a, thingpui kan in a. Ka nu pawh a rawn ṭhu chhuak ve, a ni têlin a cher tial tial mai a, a vun lah a thuin a dum chal mai bawk si, a natna ber lah an hre thei bawk si lo. A lainatawm khawp mai. Daisy pawh chawhnu lamah a rawn thleng phei ve leh a, a langah chuan keipawn ka be chhe lem lo. Amah hi chu a ngai reng, a zia ang kha a la pu zel, keimah zawk hi ka danglam hû a, ka sawithiam chiah lo. Hrehawm ka ti ru viau,. Sangi nen eirawng kan bâwl a, Maliani a lo harh ve bawk nen, Bawihteii a lo awm ve thei a, a tihzia hle. Ka nu rawn lut chuan, "Mama te nupa an rawn haw dawn a, chaw kha in lo chhum kep lo palh ang e aw." A ti a. Sangi chuan, "Sunday an cham dawn maw ka tia.." ner nâng chung hian a lo ti a, Mali hi chu a mil thlâwt lo a ni e. 

Ka nu pawh chuan, "Ngati nge mawni ka hre bik lo, Mama'n min lo bia a,." A ti ve ringawt. Ani pawh hian Mali han dawnsawn vel hi a phur fahran lo tih ka hria. Chaw pawh chu kan chhum kep a, Victora rawn haw chuan arpui tuilai a rawn pawm haw ve ngei a! "Kan customer hlun Pu Hluna nupuiin min lo pe ve ngei a, ka hnar duh ta lo mai. Engtin pawn siam r'u.." a ti a, a phur hmel sûrh sûrh khawp mai. Buh tlem nen kan chhum tawrh a, a tui ber an tia lawm le. 

Vica inbual hlanin a hak tur thawmhnaw ka thlansak a, a msg tone a ri sek a, insum theih lohna râuin min man nge ni, ka va ensak ta a . Lalvala te leh a ṭhian dangte msg a lo intlar nual a, chung karah chuan Daisy ngei mai chuan, "I awm loh chuan a ruak. In hi a lian zual vek zel.." tih leh, "Lo haw vat la..umm"tih te chu a lo awm a, a seen tawh naa a reply lo nge a delete zawk, a replyna hmuh tur a awm lo. Ka ner sak mai. Daisy chu Maliani sawi ang kha a nih ngei dawn hi,. Ka pasal hi chân ka duh loh chuan theihtawp ka chhuah a ngai ta tlat, ka elpui tur lah kan inah a khawsa ve tlat bawk si, mahse, a zia phian. Pawnlamah an inhmu thei dawn lo va, manchhuah an harsa lo zawk ang chu..eng nge kan an zel dawn i lo thlir teh ang. Victora bak pasal neih ka tum der si lo. Hruaipuii nge Daisy?!