Amah leh kei last

AMAH LEH KEI..(S2)

Chapter - LAST

Ziaktu : Toni Râlte

Zo choka chu kan thleng ta a, Zo choka hi Mizoramah chuan a lar ve viau tawh, a to over lo va, a thianghlimin a zo raih mai bawk nen, a neitupa Rosangpuia hi pa dam thluam, a hnathawkte pawn an ngainat em em a ni a, a nupui lah mi biangbiak thiam bawk si a ni a, customer hi englai pawn an ngah reng tihtheih a ni. Victora dawhkan hauh dawhkan no. 23-na lam kan pan nghal a. Waiter a rawn lang nghal var, nelawm takin menu min rawn pe a. Sea food ka ei châk deuh a, kan chah ta a. Inhmatawna ṭhu dun kan nia, kan inen lo thei lo va, a hma ang bawk khan a inthlahrung hmel ka hmu leh tawh. "Eng nge min sawipui i duh chu?" Ka ti ta a. A aw a thian kharh a, hawi kualin a tawpah min rawn melh chat a, ka kut rawn vuanin, "Min ngaidam rawh aw." A ti sup a. 

"Eng thilah?" Bo hmel deuh hian ka ti a. 

"Engkim avang khan. Ka laka i thinrim loh zawh poh leh i laka ka inthlahrunna a zual,. I va hlu tak. " Tiin ka kut chu a hum nghet sauh a. "Ka thinrim maithei asin." Ka ti a. 

"Mahse, i inthunun thei alawm.." a ti a. 

"Ka inthunun theih vang pawh a ni lo. Mitthi tawh thîk chu ka duh bik hleinem, a tlawmthlakin ka hria a,." Ka ti a. A bu nghut nghut a, "Engpawhnise, tumah i thik ngai lovin nun hman ka tum ang. Ka thunun theih piahlam thil thleng a awm te a nih ngawt loh chuan..Rinteii chungchang kha sawidun i duh em?" A ti zawk hlauh a. A phone ka en tih a hre lo. Khatia an thlalak rawn thawn chiamtu kha tu tak ni ang maw? Rinteii chhungkhat tu emaw ber a nih ka ring ve ngawt a, engvanga kum a liam fê tawh hnuah a rawn tharthawh leh ang? Kha tak kha ka buai rûkna a ni. A tlangval chhung zawng pawha tibuai ngai si lo, tuna taka rawn lang leh sek si chu..

"Sawi tur ka hre ve hleinem, amah pawh ka hre ve si lo va." Ka ti satliah a. 

"Ka duh vang renga hrechhuaka zahpuiawm taka khatia awm kha ka ni lo. Tu nge a nih ka hriat lohin kan thlalak hlui tam tak min rawn thawn a, min rawn ṭawng el reng bawk a, Rinteii ka hriatchhuah khât tawhzia ka ngaihtuah a, a thihdan runthlak tak te leh a thattu tun thlenga hriat a la ni lote thlengin, Rinteii khawngaihna khan ka khat ta a ni ber ang chu. Mahse, khatih lai reng pawh khan ka rilru chhungril takin ka hrereng tho che. Ka awmdan kha min rawn hmu la i rilru nat dan tur te thlengin..ka beisei loh tawpin ka laka thinrimna pawh nei lo ang maiin min lo dawngsawng a, ka zak a, ka inthlahrung ngawih ngawih. Tuaimam, chunglam ruat hi chu kan ni chiang alawm tiraw?" A ti charh charh a. Ka lungawi loh ve deuhna te pawh lakbo ang duak an ni leh ta. Ka pasal hi a inchhir a, a pawi a ti em em tih ka hrechiang êm a, a thlen nawntir lah ka ring hek lo. Chuvang chuan a nuna bet ve tlat a nunhlui chu ka thîk buai duh ta lo. 

Eitur an rawn dah avangin kan ngawi ta rih a, ka ei tui kher mai. "Vala te inah peng haw zuai ang aw. " A tih chuan, "An lo buai viau ang em le? Bawihteii kha a tlei loh chuan an buai ang." Ka ti a. 

"Kan be phawt dawn nia.." a ti ve leh mai a. Kan eikham hnuah chhuak nghal mai loin kan ṭhu khawmuang a, "Lo betu che chu i hre lo em ni?" Ka zawh châk em em ka zawt ta phawng mai. Min mawlh tlat a tin ni. 

A ner suk a, "Hriatchhuah chu ka tum nasa alawm,. Mahse, tu nge a nih chiah ka hre thei hlawl lo." A ti a. "A number atangin a chhui theih ang chu, eng number nge a hman?" Ka ti a, "Airtel a nia, niminah pawh airtel office-ah ka va kal a, ka va chhui alawm. Lalmuanzovi, Hnahthial hminga book a nia, Muanzovi hrim hrim hmelhriat ka neih awm ka hre lo va, Rinteii nen kan hunlai khan chutiang mi hmelhriat kan neih awm ka hre lo hrim hrim bawk. " Beidawn hmel zet hian a ti a. 

"Muanzovi sim card chu an ruksak te a ni thei mai lo maw?" Ka ti leh hram a. 

"Thil ni thei chu a ni. Khami zan ka ruih zan khan ka va call a, vawi 3 dawn chu a ring ral a, a tawpah a rawn la hram, hmeichhe aw chher lam deuh hian a lo la a, "Min hre dawn chuang lo, min hriatchhuah tum duh suh. Rinteii ṭhian ka ni." A ti ringawt a, a ṭhiante leh ka ṭhiante kha kan inhrepawh vek zel, hetianga min rawn chachhuah duh âwm mi an awm ka hre lo. Ka ngaihtuah ngial pawn. " A ti nuah nuah a. "Block daih la ni mai lawm.." ka inrin hmain ka ti a. 

"Nia, a la ngai ang, a rawn che leh a nih chuan." A ti ve mai bawk. Victora nen kan inânna deuh pakhat chu mi block tawp hi kan hreh dun lutuk. Ex te block tih angreng hi kan ti ve meuh lo, a dawihzepthlak kan ti deuh nge mawni dawn ni. 

Kan chhuah hnuah Maliani ka call ta a, "E! Hei, a tlei lutuk, a ninhlei reuh bawk sia maw..rawn ngaihtuah reng reng suh u, in duh duh hunah lo haw r'u" a rawn ti chul a, ka nuam nghal sawng sawng mai. Chutiang a nih takah chuan Vala te inah chuan kan peng kawi ta a, an lo awm dun ral mai. Nu Piani hmel hmuh pawh a hahdamthlak viau e. Jasmine-i'n thingpui min lumsak tlat si a, kan ṭhu ve leh ta reng. Man hlan zanah kan kal loh an hlau khawp a, an sawi sek reng mai. Victora hi an tan a hlu ve êm bawk a, keini'n kan ṭawiawm loh te chuan thil mawi pawh a ni dawn lo hrim hrim. Bawihteii ka ngaihtuah ruk tawh êm avangin thingpui in zawhah kan haw ta a, Hawn kawngah ka nu nen kan inbe zuai, Tetea pawh a ke lam a chet ve sawlh sawlh theih tawh thu bakah Kimkimi pawn ṭhat lam a pan zel thu a sawi siam siam a, ngaih a ṭha ṭan e. Kan veng kan luh tawh hnu kan in thlen hma kâwnah hian Mama motor a lo ding vâng a, Vica chuan a hai lo nasa, "Tun angah eng nge maw a tih le.." tih pahin a thlêk dûk dûk a, a motor dinna chhak dawr atanga Daisy rawn chhuak lai hi ka han hmu fuh kher a! "Daisy nih khi.." ka ti hluai, ani pawh a hamhaih deuh nge a tlan muang deuh a, Daisy chuan min rawn hmu ve loin ka hria. A hnungah Mama chuan a rawn zui bawk a, an kalna dawr chu nepnawi dawr niin ka hria,. "Ka rindan chiah." Victora chuan a ti sup a, a lungawi vak lo niin ka hria. "Kal ang, min hmu ang" ka lo ti vat thung. Mama chu ka ten thar leh riau, Mali a ko hawng chauh a, tunah midang a fawr kualpui leh chu a ni sia. Mali tan tak pawh hian a rilru natthlak ve dawn lutuk. Victora pawh a nelawm fahran tawh lo, "A tuhrah a la seng khawp ang. Ti nge hetianga a awm tlat le.." a ti mawlh mawlh a. 

"U Mateii nen an inneih laia a fel nen" ka lo ti ve luam, "A fel hlen thei lo va, an inṭhen chu a nih rêng kha..kei chu Tuaimam, kan chhungkua hi ka zak ṭhin. Mite hian a rukin min nuihzat ṭhin ngawt ang." A ti hluai a. Hei hi lawm a ruka ka lo nghah ṭhin chu,. Tunah zahna chang te, inenlet nachang a hre chho ṭan a, siamṭhat tumna hi a la nei ngei ngei dawn tih ka chiang. 

"A chang chuan keipawn i ngaihtuah ang khan ka ngaihtuah thin. A pawi ngawt mai." Sawi thui hlau deuh si hian ka ti a. 

"A bul chu ka nu leh paten Kohhran leh Pathian an bel lo lutuk a, anmahni theihna an ring lutuk a, kan dik thei tawh lo a nih hi.." a ti ta a. Lehlam hawiin ka khi sak mai. Ka pasalin hetianga ngaihtuah nachang a hriat chuan ka thil lo ruahman lâwk te kha tih a harsa dawn lo tih ka hre ve tlat. 

"A la tlai lo a nia, Vic.." hmalam melh chungin ka ti sap a. 

"Eng nge sawi i tum?" A ti nghut a. 

"In chhungkaw kalphung siamṭha tur hian khua a la tlai lo ka tihna a nih chu.." ka ti nawn sak a. 

"Engtin?" Beiseina mitmeng nen a meng de sawr sawr mai. 

"Kan pahnih hian kan thawk dun thei alawm. Kan intanpui tawn thei ang. Keipawhin kan chhungkaw boruak hi ka chauhpui thin, fate seilenna leh ṭhanlen zelna atan chuan ka iai deuh." Ka ti ta hmiah a. 

"Kan inang a nih chu,. Ka sawi ngam ngai lo va, ka zah avang hian. Chhungkaw pangngai âwmtêa lang si hian kan chhungril nun hi a kawrawng hlawm si, tumah hi inzilh tur chuang pawh kan awm lo. Ka pa eirûk zarzoin kan hausa a, mahse, mite hian min awh ka ring miah lo." A ti ve ta bawrh bawrh a, a lo ap ve hle tawh a ni maithei, a ṭawng dan bawrh bawrhah. Kan sawi thui hmain in kan thleng leh ta mai sia , mahse, kan sawi hawng tawh a, hmalak a harsa tawh lo turah ka ngai e. Mali ka hmuh chuan nuam lo ka tia, engmah a hre ve bawk si lo, tihian ka ngaihtuah a, lehlamah chuan mi nu a luahlan ang a ni ve tho a, pasal rinawm tak nei thei a ni bik lo tiin. Mahse, mihringte hian dikna chanvo kan nei ve vek a, Mali pawn hetiang em em hi chu a phû bikin ka hre lo. 

Hun a kal ve zel a, ka rilrua riak reng kan chhungkaw siamṭhat hna chu thawh ṭan a hun ta viain ka hria, mahse, hmalak dan tur ka hre bawk si lo. Victora nen lah kan sawidun leh tawh bawk si lo. Sawipui ka tum dawn hian ka tîm tlat zel. Ka zak a ni ber ang chu. Mahse, ṭul ka ti bawk si. Mama lah hian pawnlam a ngaina sâwt hle mai a, Ka tan lo hauh ve ngawt a zahthlak bawk si, Daisy chuan Vica chu a rawn tibuai tawh lem lo, Mama lakah a ṭuan a ni ber ang chu. Vica pawn Rinteii thlalak rawn thawn ṭhintu kha a chhui ve reng a, mahse, mak deuh maiin a chhui tih a hria nge kha number kha a hmang duh tawh miah lo. Msg lah a rawn thawn ngai tawh hek lo. Tetea pawh damdawi in aṭangin a chhuak a, a ke a la hmang lutuk thei lo naa in chhung dungah chuan tiang nen a kal ve thei sawlh sawlh e. An chhuah tlaiah Vica nen chaw kan va ei nghe nghe. An damdawi in awmna bill pawh Vica'n a peksak vek a, ka nu lah a lo inthlahrung. "Makpa ṭha deuh i nei hi i lawm awm" Vica lah chuan a ti sek a, ka nu pawh a nui a nui mai. Kan inneih hmaa a duh lohzia hre tawhtu te vek kan ni bawk a, a rin ang a lo ni si lo hi ka nu pawn nuam lo a ti zawk maithei a ni. Nuteii te pawh an la inzui tluang ve zel a, U Opa hian a ṭhen thei mawlh si lo. 

Mali leh Mama te nunah thil danglam tak a thleng ve ta. Mali a rai! Mama pawh a khi ve vur vur reng a, fa hmasa lo nei tawh mah se; Mali han rai chuan kan chhungkaw boruak pawh a tidanglam ve dâwrh mai. Amah Mali tak pawh a hlim tih a lang. A pasal hmasa nen fa an lo nei lo bawk nen,. Mama pawh pawn lamah a chhuak khât ta deuh e. Zan khat chu a remchang bawk a tiin Vica chu ka titipui ta a, "Kan chhungkua hi engtin emaw kan danglam a ngaiin i hre ve em?" Ka han ti tê tê a. "Ngai e le"a ti mai a. 

"Ka ṭawng lo haw lo la, dik tak chuan ka nu leh pate hian Pathian an bêl lo lutuk a, hei hi kan mutân niin ka hria. Pathian malsawmna in dawng nasa a, tumah ngaihtuahawmin in awm lo bawk a, mahse, eng mi pawh ni ila Pathian belh hi chu a ṭha asin." Ka ti melh melh a. 

"A dik chiah, ka nun khua hi a har ṭhin. Hrehawm ti lo la, Rinteii nen khan inngaizawng ta lo ila khatihlai hun khan ka intihlum tawh hial maithei. Kan hausa, sum leh paiah kan buai lo. Mahse, kan nun a ruak si. Rinteii a han thi ve leh kher bawk nen, khatihlai te khan Pathian thu hmanga min han thlem keuh keuh kha an nei ngai lo, min enliam tawp a, Kohhranah kan inkiltawih a, chhiat te hi tâwk ta ila mi hian min ngaihpawimawh vak hi ka ring miah lo. Mahse, nang i lo lang a, tlemin ka mi pangngai ve ta deuh zawk a,. Eng nge maw tak hi chu kan tih a ngai ka ti. Mi, Kohhran leh khawtlang tana inhmang em em ka hmuhte hian ka awt ṭhin. An rethei emaw an hausa emaw midang tana thawka mite tana malsawmna ni ṭhinte hi chu an ngaihsanawm bîk..Mama leh U Ma-i te lah ti hi an nia.." a ti ve ta duah a. 

"Kan la siamṭha thei ang. Kan pahniha kan ṭanrual phawt chuan" ka lo ti a. 

"Engtia bulṭan nge i tum" a tih chuan, "Naktuk zanah chhung inkhawm neih i rawt ang a, keiman ka hmang dawn nia." Ka lo ti nghet charh. Min melh vang vang a, ka biang a piai zauh a, "I awm lovang tih hi ka hlau ṭhin." A ti sup a. 

Zing lam dar 4 a lo pel tawh a, ka zun chhuak lutukin min tiharh nen, peih lo zetin ka tho a. Victora a mu nghet hle a niang, a phone vibrate char char pawh a hre lo. Ka va zung tê tê a, a phone a rawn rik leh sek avangin ka laksak ta nge nge a, number lawng tawp a ni. Tun ang zan rei tawh, zing lam a ni mah zawk ang chu, zualko te a nih tak thutin tih thuhlaah ka pickup ta a. "Hello" ka tih rual deuhthaw chuan a thaw deuh hawk a, ka hello nawn leh. A reh vung vung mai si. A tawpa tawpah ka vîn deuh ṭhak vang nge, "I pasal kha lo hrilh la, A nupui hual thi tawh unaunu ka ni e. Ka û phuba laksak turin ka intiam tawh a, in chhungkua kha in la darh vek dawn tih lo hria ang che. " A rawn ti ta chher chher a, a aw erawh a tliang mawi angreng hle. "A nih tak chu.." ka ti zawi sap a. A dah zui nghal bawk. Dar 4 bawr vela inbiakna atan chuan a ho angreng viau mai, ka ngai thutak tehchiam lo. A whatsapp-ah ka lut zui a, mahse, rinhlelhawm tur thil engmah ka hmu lo. A hmaa Rinteii pic rawn dahtu leh tuna rawn calltu number a inang lo bawk. Engpawhnise, hetia chet an rawn la dawn a nih chuan ka pasal nen ṭha taka sawi dun leh ṭha ka ti deuh. Tibuaitu kan nei lo rei tawh a, Daisy leh Masangi boruak a dai fel chauh a, hetianga boruak a rawn alh leh dawn chuan lo inrâlrin pawh ṭhain ka hria. A tuk zingah tukṭhuan ei hma deuhin Vica nen roomah kan awm a, ka sawi ta a, a ranga rangin chu number chu a call nghal, mahse, a pickup duh ṭhak lo. "An va ninawm bawk ve mawle. Rinteii'n laizawn a nei lo. A cousin tu emaw a ni mai. Ka hne ṭan riau, Rinteii thlarau zah viau lo ila chuan va phindarh vek mai ka duh" a ti bul bul a. 

"Rilru fîm taka hmachhawn chi a nih kha, hetianga an unaunu boral hnua chhungkua i din leh mai bik hian an rilru a tina ve te pawh a ni thei. " Ka ti a. "Rawn ti leh rawh se, ka hau ang" a ti tûn tûn mai. Diktak chuan tunhmain hetiang a la tawng ngai lo va, tun ataka hetianga an rawn ti hi ngeiawm ve deuh tur a ni. Vawiin chu ka hman bawk a, ka nute in lamah ka va leng khawthawng ve a, Tetea pawn hmasawn lam a pan ve zel a, Kimkimi a fel bawk a, a rawn kan deuh reng a, tleirawl inngaizawng mah nise, an chetsualna chuan a hma aiin a pawt thûk a, Kimkimi chhungte lam pawn sawisel leh î an nei lem lo. Ka nu bulah kan chhungkaw nunphung siamṭhat ka duh thute ka sawi ve a, ani pawn min support hle, "Misual chhungkua an ni lo va, a ngaihna an hre lo mai zawk a ni. Chuvang chuan theihtawp chhuah la, i la siamṭha thei em em ang." Tiin min fuih sauh sauh a, Hmeichhia chu a tlakna leilung azir an ti ṭhin tak naa, mi ṭha chhungkuaa kan lawi avanga ṭha chhawm ve mai te, mi ṭha vak lo an nih avanga an zia chhawm ve chawm mai te hi ka duh ve lo. Nupui ṭha leh mo ṭha tur hi chu an nulat lai aṭang hian an hriat theih maiin ka hria. Nulat lai pawha mi thatchhia, paurau leh mi rêl chingte hian mi mo an nih vang ringawtin an chhungril zia an sim theih ka ring tlat lo. Chutiang bawkin mi ṭha sa, taima leh che fel, fing fel takte kha an lawina te nihphung vang maia mo sual leh hmeichhe ṭha lo-a an chhuah ngawt ka ring thei lo bawk. Pasal kan nei a nih chuan kan pasalte in kha kan in a ni tawh a, a chhungte pawh kan chhungkua an nih tawh avangin siamṭhat an ngaihna zawnah kan bei ang a, anni pawhin kan dik lohna leh ṭhat tawk lohnaah min hauin min zilh mai tur a ni. Chu chu chhungkaw phuarkhawmtu a ni thei tlat si a. Chaw ei ve turin min sawm nasa viau naa, pasalte tel lova mahni nute in lama chaw ei chhuah fô te a mawi vak loin ka hre deuh a, bakah chhung inkhawm kan neih tlai tur a lo ni ve bawk nen, eirawngbawl hmanin ka haw ta a. 

Vica pawh a rawn haw hma ve mial a, Mama te nupa pawh ka duhthusam ang chiahin an chhuak lo hlauh e. Maliani eng nge a an tih hriat tuma ka va lut chu a lo muhil tui viau mai a, Tebawihi pawh ka hmu lo. Thawm dim takin ka chhuahsan a, puan pho seng turin in chung lam ka panzui nghal. Puan pho senga ka buai viau laiin ka nu pangpar huan phên aṭanga ṭawng thawm lo chhuak chu ka va hre ta a, ngaihthlak ka tum em em pawh a ni lo. Mahse, "Rinteii chu a thi tawh, tihtheih a awm tawh lo, intibuai duh tawh suh. An hlim asin, an fanute hi a hmelṭhain a duhâwm si, khawngaihin bansan tawh rawh." Tebawihi aw ngeiin a tih takah chuan ka ding chawt mai, min hmuh hlau takin ka petek zauh a, "Aw a tirah chuan keipawn i rilru ang kha ka pu, mahse, hei hi Rinteii duhdan pawh a ni lovang. Awmtir ve mai mai rawh, nupa inhmangaih tak an nia sin. " Tebawihi chu a pawr ve tawh hle. A tawpah phei chuan, "Aw i thu thu le, i duh ang chuan che la, ka dan theih dan ang ang chein ka dang ang che. Engkim ka hrilh vek ang." A ti tân tân a. A dah nge a reh ta dûk mai. Keipawh min hmuh hlau takin in hnuaiah ka chhuk ta zâl zâl a. Ka lungphu a inthumrawn tluk tluk mai. Tebawihi pawn engkim a lo hre vek tihna a ni maw..mahse, kan lamṭang ang khan a awm bawk si, amah Tebawihi ngei hi biak a la ngai dawnin ka hria. Vica pawh zanah ka hrilh vek ang. Zanriah kan kil ṭhep ṭhawp laiin Victora chuan, "Tun aṭang chuan inkhawm zan lo apiangin chhung inkhawm kan nei tawh ang, zanin chu Tuaimami'n a hmang ang, chaw eikhamah kal darh loh tur. " A ti ta charh charh mai. Ka nu leh pa an hawi phâwk hrâ mai a, Mali erawh a lo ner sak, "Eu! Kan piangthar a ni maw" a ti nghat a. Mama erawh a zum dûk hian a lang a, Maliani chuan, "A ṭha ngawt tak ang, bung thar kan kai a ngai" a lo ti ve hmiah. 

Ka nu pawh chuan, "Ni e, a dik alawm, kan hmang ziah tawh dawn nia. I pa hi alawm hetiang lam hi a ngaihsak lo lutuk a.." a lo ti ve a, ka pa lah chuan, "Nu i awm a, ka han ring ve deuh che mawle.." a ti duh lek. Kan boruak a zangkhai chho ṭan e. Eikhamah kan han che sang sang a, Bawihteii erawh a muhil a la harh hleithei lo. Kan han intifel fai zo a, Sitting roomah kan ṭhu ta ṭhap mai, ka zâm ve deuh naa bul ka ṭan loh chuan tiin ka inhumruh a, ka'n dingchhuak a, tlaiah khan Bible chhiar tur ka lo enlawk tawh diam a, ka han chhiar a, sawifiah pawh ngai ka ti hran lo. Mahse, zahtheih loh chhuahin, "Hei, kan chhungkua chu heti hi kan nia, Pathian malsawmna kan dawngin sum leh paiah buaina em em kan nei ngai lo tihtheih a ni, mahse, Hetiang taka malsawmna kan dawng chung hian Kohhran leh khawtlang tan kan thawk nep ka tia, Victora nen kan lo sawidun ve ṭhin a. Inkhawm te hi rin aiin kan ngaipawimawh lo ka tia, tun aṭang chuan ṭan la thar ila, U Mama te pawn fa in la nei dawn a, fate seilenna tur atan kan chhungkaw boruak hi kan duh em tih ngaihtuah ila, an tettê aṭanga kan zirtir ngun te hi a ngaiin ka hria. Khang kha ka sawi thiam ve tâwk a ni a, tumah inmawhpuha indem tur chuang kan awm lo, keimahni ṭheuh kan insiamṭhat hi a ngai a ni." Ka han ti ve ta dap dap a, Pathianin min pui ka ti mai. Ka pa te pawh an lo bu ve nghut nghut mai. Ṭawngṭaina tawitê ka nei a, kan zo a ni mai. Ka pain, "A ropui hle mai. Hruaipuii hi kan chhungkaw mo tura Pathian rawn tirh i ni ngei ang, a dik a dik chuan i sawi kha dik lo pakhatmah a awm lo, keini a lu pahnihte hian kan zir lo va, in tettê aṭangin kawng dika inhruai aiin in tâl tâlin kan tâltir che u a, a nghawng chu hei kan hmu chho ta zel chu a nih hi. Insiamṭhat nan khua a la tlai lo ve, vanneihthlak deuhin tun inrinni zan aṭang hian kan Kohhranah crusade a awm dawn lehnghal a, Ma-i pawh lo inring la, kan chhungkuain kan inkhawm ṭhap ṭhap ang. A ni lo'm ni? Nu-i.." tiin ka nu a han melh a, ka nu pawn a pawmpui tih a langchiang hle. 

Mali bawkin, "Kan thutak rûn hlawm a, tiang ang chi hi ka ning. Inkhawm nazawng an piangthar kher lo, inkhawm ṭhulh ngai lo, an nuna entawn tur vâng hle si ka hre ṭeuh." A ti bawrh bawrh a. 

Ka chhan hmain Victora'n, "Inkhawm ṭhinte pawh chutiang an nih chuan, inkhawm ngai miah lote nun phei chu a va rapthlak dawn ve.." a lo ti nghut a, a chhang thiam hlein ka hria. "Inkhawm vanga piangthara inngaih tur a ni kher lo, mahse, Piangthar chu a inkhawm ngei ngei thung. " Tebawihi'n a lo ti ve khauh mai a, Mali a so leh ta, "Chhungkaw titinaah pawnlam mi chu inrawlh lo ngam ang aw." A ti hmak a, Tebawihi zak chu a hmai a sen awp awp mai. Maliani'n rang taka a thlavâng rawn hauhin, "Tebawihi hi pawnlam mi a ni lo, min enkawl tura lo awm a ni, khatiang zawng kha chu inṭawngkhum tawh lovang aw." A lo ti ve hmak hmak mai. Kan boruak a khawloh leh ka hlauh avangin, "Tikhan lo titi rawh u, Vica hi thil hrilh tur ka nei a, kan chho dawn." Tiin ka pasal ka melh zauh a, kan inzui chho nghal. Pindana kan luh tawh hnuah, Vawiin tlaia Tebawihi chungchang ka hriat dante chu ka sawi ta mawlh mawlh a. A ngaithla uluk kher mai. "A mak hle mai, amah ngei kan be dawn nia, ka û saw buaipui zo se hetah kan ko lut ang a." A ti a. Ka lo bu ve nghat. Chinfel tur thil a awm a nih chuan chinfel zung zung zel mai hi ka duh. Chutia kan phun sar sar lai chuan Mali rak hlut thawm kan hre zui a, hmanhmawh deuhin kan tlanchhuak nghal. "Zawnga, tenawmpa, i lo va han rapthlak ngai ve, nupui nei chungin sâwn i thlak a maw? Chupawh Daisy lakah ber kher.." a ti tuar tuar a, Mama lah chu hrilhhai hmel deuhin a lo ding zum reng ringawt. Kar lovah ka nute pawh an rawn chho a, Maliani te pawh an rawn chhuak ve. "Eng nge thil awmzia?" Ka nuin a han ti dek dek chu, "I fapa, he ramhuaipa hian Daisy lakah sâwn a thlak a nih chu, kan inneih reng lai hian." A lo ti hlawih hlawih a. Midang tan chuan sawi tur a vâng duh hle mai, ka pa chuan, "A dik em? Mama" tiin Mama chu a melh a, "Dik lo, Daisy game play tih ka sawi reng, a awih duh tlat lo alawm. Nizanah khan Daisy nen chuan kan inhmu ngei e, ka fa a pai thu a sawi a, mahse, kan in a chhuahsan hnuah vawikhatmah kan chesual tawh lo, tunah thla 2 mi a pai niin a sawi a, ka fa a nih theihna a awm lo. Chu thil chu hrilhfiah tur leh thudik hre turin nizanah kan inhmu ngei e, eng thildang mah a thleng hek lo." A ti ve ta charh charh a, Victora nen kan inmelh zauh ringawt. A sawi hi a dik maithei. Daisy kha a turu êm mai a. Mali lah chuan, "Amah Daisy ngeiin msg min lo thawn alawm, hetiang angah tumah an inbum duh lo vang. Inṭhen ila a ni mai, ka peih tawh lo,." A ti a. An pindanah lut nghalin a thawmhnaw a khawm nghal rawk rawk. Ka pain, "Ngawi teh, Mali, thudik hre phawt ila mawle..chuti chûk chûk tur em ni dawn?" Tia khap a lo tum chu Mama'n, "Kal rawh se. Keipawn ka duhtawk tawh e. Ka nei thei tawh lo." A lo ti tawl mai. Kan inmelh hrek hrek a, lo ṭawng ve kha kan tan a nuam si lo. Mali chu a rawn inak bâwr viau, "Chutia kal i tum lui tlat a nih si chuan Victora hian va thlah che rawh se, kan rawn ko leh dawn che a nia. Inṭhen hlen ringawt zawng thil tih chi a ni lo." Ka pa chuan a lo ti leh thluam a, Vica pawh chu a che ve hrut, Mali pawh chuan a hnial bik lo nge Vica chu a ngaichâng a, an inzui thla chu kan thlir liam ta a ni. Mama chu an pindana a luh hmain, "Tikhan engkim tawp rawh se, keimah leh keimah hi hrehmunah ka inhnuk lut a ni ber mai, ka tuar thei tawh lo. Mateii ka tihnatna phuba ka tuar mêk a nih hi..min ngaihtuah suh u. Ka ṭha." Tiin a lutzui ta a. Ka nute pawh bangbo takin an chhuk thla ve nghal. Chu chu Mali leh Mama te huntawp a lo ni ta reng mai, kan chhungkuain bung thar kan kai e kan tih mêk laiin..a pawi takzet a ni. 

Bawihteii a harh laklawh avangin ka awi dârh dârh a, room kawngka chu zawitêa rawn kikin Tebawihi a rawn lut hlawl mai. Sawi duh nei, sawi hreh si hmel a pu a, ka lo hriat lawk deuh tho avangin mak ka ti lem lo. "Thil sawipui che ka duh a." A ti sap a, "Lo ṭhu rawh, bawihteii hi ka'n mut lawk ang e." Tiin ṭhutna ka kawhhmuh a. Ka fanu ka muttir zawhah a bulah ṭhu vein, "Eng lam nge ni ta, a pawimawh hmel sia. " Nui chungin ka ti a. 

"Nia, a pawimawh tho mai. Eng atan mah i lo ti lo thei bawk. Victora leh Rinteii chungchang a nia. A hmain ka sawi tawh kha, Rinteii te nen hian kan inkawm ve ṭhin a, Rinteii nî fanu Lawmzuali aṭanga Rinteii pawh hria ka ni. Lawmi leh Rinteii te kha unau an nih piahlamah inzui chawt reng, inhmangaih em em an ni a, a thih pawh khan Lawmi chu a â lo chauh reng a. Bangalore-ah zirna avangin a zuk awmbo ta char char a, hna te nei zuiin a rawn haw ngai mang lo. Mahse, Victora chanchin hi a la ngaihven ve reng tho, a ngaihtuah dan chuan Rinteii kha Vica nen an inhmangaih êm avangin Victora hian hmeichhe dang a neihsan theih a ring lo va, keimah kaltlang hian a rawn ngaihven ṭhin. Mahse, tihian in lo innei ta si a, Maliani enkawltu tur in zawng tih kha Vala'n min hrilh a, Victora û a ni tihte ka hriat takah chuan Lawmi chuan thawka Vica chanchin ngaihven turin min ti a, pawisa pawh min rawn thawn nual nghe nghe. Tikhan nupui neiin fa hial in nei tawh tih ka hrilh khan a rilru a dan phah ta daih a, Victora lakah a thinrim ta em em a ni. Nupui nei tawh lo tura a ngaih laia nang a nei che hi Rinteii a phatsan angah a ngai tlat a, engvanga mitthi tawh chungchanga buai em em nge a nih tih ka hrethiam bik lo. Tichuan, Victora a be pawp a, tihbuai ngei che u tumin Rinteii nen an thlalak te a thawn chho ta a, ka khap nasa, a sâwt si lo. Tunah hian Mizoramah rawn haw a tum a, eng nge a tih ang ka hre lo,. Ka hrilh lâwk che u a nih chu..a ho tham viau maithei, in tan chuan.." a ti ta dap dap a. Ka rin dansa a nia, thawk ka la hawk ringawt. "A va buaithlak ve aw. Vica nen inṭhen pawh ni ila eng nge maw hlawkna a neih dawn le?" Ka ti sap a. 

"Ka hre lo, a â vek tawh ni maiin ka hria. " A ti hap a. Vica a rawn lut ve chiah, keimah zawkin thil awmzia ka lo hrilh zung zung a, "Kan Lawmzuali lek maw lo ni a?! Ani kha zawng a atchilh tawh kha a thlah thei tawh lo rêng a, a rilru hian mi pangngai a pha zân lo alawm. Rinteii nen pawh kan sawi dun ṭhin. Lo haw se la, ka lo kawm ang e." A ti sam êt a, thawveng hawk hmel a pu bawk. Ka pasal berin a ngai holam angreng si a, ka la thutak vak duh lo. Tebawihi pawh thlamuang takin a chhuak zui ta a. 

Lalvala te man leh mual inhlanna lamah kan va tel ve a, kan tam lem lo. Lalvala lawm lah hi a khi sûng reng mai a, an lawmpuiawm nupa viau e. Tikha chuan tibuaitu an nei tawh lo turah ka ngai. Kan hawn kawngah ka nuin min lo bia a, "I nuteii te an tlan dun ve ringawt mai. Duatpuia an hruai bawk." A rawn ti a! "Ehe! Khaw nge an tlan ?" Ka ti chul a. 

"Opa nî te khua Pangzâwl lamah daih..a buaithlak a nih hi maw" a rawn ti hlak hlak a. "Aa. Philî vak suh, nuteii te chu a puitling tawh a, engkim a ngaihtuah fel vek mai ang " ka ti ringawt. Lehlam zawng tak chuan an inru chu pawi ka ti tehchiam lo, U Opa chhungten duh lo mah se; an tlandun tawh miau chuan an inrem ve mai ka beisei a ni. 

Mali te lam pawn bungrua an rawn la ta rap rap mai. Mama lahin a dang duh der si lo. Ka paten han ui dêr ve viau mah se; a neitu ber a ngawih tlat si avangin an la lui ta tho va. Mali chhungte leh an vengte ngaihdanah chuan Mama chu thiam lo leh dik lo hulhual a ni, Mali te lam an ṭawng thei ve bawk nen. Mahse, an bungraw lak tlai kan zanriah ei laiin ka pain Daisy fa pai chu a fa a ni takzet em tih a zawt a, "Ka sawi tawh kha, ka fa a ni thei lo. Lo piang se DNA kan test ang a a ni mai." A ti duh chauh. A inringtawk hle bawk si, Daisy hian sum a duh luatah leh neih a duh luatah dâwtin a lo puh ve thei tlat bawk si a ni. Naute pian hun nghah ngat ngat a ngai dawn tihna a nih chu. Chutianga a han pathlawi leh takah chuan a fate pawh kan inah an rawn ngam ve leh ṭan a, Mama pawhin a theih ang tawkin a ngaihsak ve tawh a, nuam pawh an ti hle niin a lang. Nuteii te pawh kar khat hnuah an ko hawng a, tihtheih dang awm hek lo, U Opa te lamin palai an tir ta nge nge a, an inrem ve mai dawn niin a lang. Mahse, U Opa te inah an awm reiin a rinawm loh, U Opa farnute pahnih bakah U Opa u te chhungkua an ni a, an chenho rei theih a rinawm vak loh. Nupa hlim tak ni mawlh teh se. Tebawihi sawi Lawmzuali erawh mak deuh maiin thei reh takin a reh ta vawng vawng mai a, Vica pawhin zuk biakpawh tumna a nei leh tawh lem lo. Ka pasal nena kan theihtawp chhuahna kan chhungkuaah a lang ṭan a, Maliani meuh pawn sunday kawr tur a ṭhuitir a ṭhuitir ve ta. Kan danglamna chu ṭhenawm khawvengte pawn hre chho ve zelin a hmaa inleng nei ngai mang lo kha ka nu kawm tura rawn lenglut te hi an awm ve ta deuh reng a, ka nu pawh Biak in a han tlawh zing ta chu a hriselna pawn ziaawm lam a pan tih hairual a ni lo, a nui hmel hmuh tur a tam tial tial a, a taksa cher leh thu thette kha rawn thauin a vun pawh a êng sawt sawt mai. Ka pa lahin a nei a ni bawk a, sum leh paiah ui a nei lo nen, Pathian ram kan pekchhuahah pawh a sang pawl kan ni chho a, Victora pawh ṭhalai pawlah inhawlh lawr chhoin a tlawmngai thei bawk a, a hmaa a kawm ngai mang lohte nen pawh an inzui an inzui ve ta. Mahse, a intatlut thûk lutuk ang tih erawh ka hlau deuh a, Kohhran leh khawtlang thiltihna remchanga hmanga a ruka inlaichinna lo neite hi an awm ve ṭhin nen, kei lah thikthu chhe mi ka ni bawk a, ani pawh a la inveng thiam khawp chuan ka hria. Kei tak hi chu nau pawm ka ni bawk a, inkhawm bak tih loh chu ka chhuak zen zen lem lo, eisiam lam ka tui thar a, ka inchhawp hnawk rum zel. Bawihteii a leikâng ve zel bawk nen..

Taka sawi hmaih miah loh tur chu Daisy chungchang a ni. Sâwn man an rawn ṭhing a, ka pa leh Mama pawh an inhnial chiam phah, "Sâwn man inṭhin tawh êm chuan i fa a ni tihna a ni mai. I fa hmasate nen in chengho thei tawh lo, tunah ani lehzel tihfahrah ka remti lo" ka pain a ti bur mai si, Mama lahin, "Naute piang phawt rawh se, ka fa ni miah lo tan ka damchhung ka hmang thei lo." A ti ve tlat bawk si, sâwn man erawh rawn dil ta miau si chu an pe ta tho a, a nih dan takah chuan Mama fa ang chu a nih mai chu. Ka pain sawn man pek a ti tlat si a. Sawn man kan pek hnu kar 3-na velah Daisy nau chhiat thu kan hre zui ta a, Daisy lahin Mama a la rawn mawhpuh zui! "I titla tih hriatreng, kei chuan pawi tihna ka nei hran hleinem. Tikhan nang leh kei chu inhre ngai lo ang kan ni tawh e." A lo tikhum siah mai a. A nau chhiat hnu thla 1 leh a chanve velah pasal a um ta mai bawk. Mama chu a felfai ti tawh mai teh ang. 

Bawihteii piancham kum khatna pawh kan thleng ve ta, kan nupain kan lo plan vek tawh bawk a, kum khatna nâ nâ na chu tlema ropui deuh hleka lawm ve kan tum a ni. Ka nute chhungkua bakah putea te chhungkua an rawn kim ṭhap a, Nuteii te pawh thla thar maia innei tur an ni bawk a, U Opa pawh a rawn kal ve thei e. Victora nî te chhungkua, Lalvala te, U Rinchhana te leh Ateii te pawh an rawn tel vek thei. Kan ri hut hut mai a, U Mateii leh a fate rawn lut ka hmuh phei chuan ka khi ver ver mai. Mama chu a lai deuh niin ka hria. Lalvala lah chuan, "Reunion tenau a ni ringawt, U Mateii pawh haw tawh loin awm tlang mai rawh se. Chang dang in kan thei lo ve ve" a lo ti lûng lûng a, kan hlimpui phian mai. Hunserh te kan hman zawhah chaw hlui kilhona kan nei zui a, mahni buai buaiin kan buai ve mawp mawp mai. Bawihteii chu putea fanu naupang zawk Felfeli'n a pua a, in chungah an awm daih nghe nghe. Kan in a zau bawk a, kan inpel suau suau mai a, kan hlim ve khawp mai. Ka chaw eikham chawhmeh bang nawi ka en thuak thuak lai chuan Felfeli hian in chung kailawn tâwp aṭangin ring zet hian, "A û, Bawihteii kan hmu zo lo, a bo" a rawn ti ta mai a! Fian ka thlauh ri bawl mai. Kan phâwk hrâ hlawm a, Vica a che phut, in chungah a tlan chho nghal a. Ka zui ve nghal zat. Bawihteii hmel reng reng hmuh tur a lo awm lo. Kan phek buai ta chiam mai a, police lo call tawk pawh an awm. Maliani hian ka kut a rawn vuan a, thaw hlawp hlawp hian, "Tebawihi pawh a awm lo." A ti zawi raih a. 

A TAWP TA.