Amah leh kei 6

AMAH LEH KEI..(S2)

Chapter - 6

Ziaktu : Toni Râlte

Rinteii maw?! Engvang nge? Tunah kher kher engvangin nge a hriatchhuaha a natpui leh theih? Tlaia Tebawihi nen kan titi dunna te kha ka ngaihtuah lêt a, Rinteii hming te kha kan sawi a, khangte kha a lo hre ru em mawni dawn le. Nge vawiin hi Rinteii thihcham a ni zawk? Ka tho thut a, Maliani pindan ka pan nghal, an lo mu dawn mêk a, kawngka erawh an la kalh lo. Ka va lut thut chuan mak tih hmel deuhin min lo en dun a, ka hmelhmai a dik lo hlein ka ring. Ka inthunun thei thlâwt lo a ni. Han sawi mai dan tur ka vân leh si, "Ih, englo, In mu tawh dawn mi?" Ka ti ta vel mai mai a, engvang chu ni maw ka sawi hreh leh tlat mai. "Kan lo tum mek a, ti nge i hmel a va dik lo ve, i nuamsam lo em ni?" Maliani chuan a lo ti nghal var a. Ka chil ka lem khawlh a, ka dang lah chu a ro huam huam lehnghal, "Aa..aw, ka khuasik niin ka hria, nachhawkna ka lo kawl mai si lo va, i ta ka lo ei lawk mai ang " ka ti ta ngawt a. Tebawihi chuan min lo laksak nghal var, min en reng si avangin tui bottle ka hawng rawp a, ka dawlh ta pawp mai. Ka eng nâ tak chhâwk ang maw. "Mu r'u, ka zia mai ang, keipawh ka va mu ang e." Tiin ka chhuahsan a, ka khuate chu a sik deuh tak takin ka hria. Ka phone ka khâl ka khâl a, Victora number te chu ka han hmetchhuak leh ringawt ṭhin. Ka call duh bawk si lo, ani lah a reh vawng vawng mai si. Dar 10 a pel ta hial mai. Ka tuar thei ta ngang lo va, Lalvala bawk ka call leh ta a ni. 

"Aw Pipi, hei kan lo haw mêk e " a rawn ti vau vau a. 

"A la rui viau em?" Pangngai takin ka ti thei hram. 

"Rui viau lo e., Ka rawn hruai haw dawn nia. Lo lungngai lutuk suh. Kan ṭha aw." A rawn ti a, an rui a reh deuh tawh a ni maithei, a ṭawngkam a felfai angreng. Keipawh chuan ka dah zui ve zat a, ka lo nghak ngat ngat mai a ni, han muthilh theihna chi ziazang ni hek lo. Buaina kan nei lo rei tawh viau asin mawle. Tun ṭuma kan buaina erawh a hmaa kan buaina aiin a danglam a, ka tan inrawlh inthlahrunawm thil a ni tlat. Dik tak chuan Rinteii hi ka thîk tho, mitthi tawh a ni miau a, thîk vakin awmzia a neih miau si loh avangin ka palliam ve tawp mai a ni, mahse, Vawiin thlenga Victora nun khawih theitu a la ni hi nâ ka ti ru veng veng. Chhan ṭha tak a awm ngei pawh ka ring. Lo thinrim khum vak pawh ka tum lem lo. Ṭha taka sawipui chi niin ka hria. Dar 11 rik hma deuhin motor thawm ka hria a, ka va dak duh lem lo, an ṭawng nak nak a, in hnuai kawngkapui a ri rak a, ka insangmar nasa viau mai. Reivakloah kan pindanah chuan Lalvala'n a rawn kuahlut ta a, Victora chu ka rin ai daihin a rui! A ruih ṭhin lai khan rui chhe takin ka la hmu ngai lo bawk nen, a mitmeng te chu a vai ruai mai a, a pheikhawk te chu ka phelhsak sawk sawk a, a jacket ka hlihsak bawk, a riat nawk nawk a, a sawi ber pawh ka hre thei lo. Vala chuan, "Thinrim suh aw. Hriatthiamna nena en a ngai rih a nia, i mitmei a veng ve lutuk tih hria la, naktukah chuan a ṭha vek mai ang. " A ti sauh sauh a. 

Ka ṭawng hma hmain, "Lawma'n min nghak sia, ka hawsan phawt ang che u. " A ti leh nghut a, kawngka kalh a ngaih avangin in hnuaiah kan inzuithla a, step kan zawh lai chuan, "A chhan ka hre duh." Ka ti tawl mai. A ding chut a, rawn hawiletin a chal a chuar nâng bawk. "Chhan ṭha tak a awm ang tih ring phawt mai rawh,. Ka hriat chhun a tlem lutuk a ni " beidawn hmel fê hian a ti a. 

"Vawiin hi Rinteii thihcham em ni?" Ka ti leh zat, tawitê hian a nui suk a, "A teuh lo. Engmah ka hre bik lo tak tak, a rawn phei kha darkar chanve vel hnuah chhuah a rawt thut a, Lawma hi zu a laktir bawk a, WBR-ah khan min tlanpui a, 'Ruih chhum hmawk ka duh, kan nu erawh chuan hre lo se ka ti mang e. ' a ti a, kan han kai deuh tak hnuah khan, 'Rinteii vang a ni. Thi tawh mah se; a la nung a nih hi' a tia..sawipui dawn khan thudang a sawi leh daih zel bawk sia, Pipi, thinrim suh aw, ṭhianpa nunhlui chu i hriatsa vek kha..Rinteii chu thîk mah la, he khawvelah a awm tawh chuang lo, thikin awmzia a nei lo, mahse, naktukah a harhfim hunah ṭha takin i sawipui dawn nia. " A ti bul bul a. A irh leh uk uk ṭhin. 

A chhuah hma deuh chuan, "Jasmine te chu eng nge chanchin?" Ka ti leh hram a. "Naktuk tlaiah ka va ru chhuak leh ang. Ka hrilh sa vek tawh." A ti hmuk a, kan inmangṭha zui ta a. Keipawh in chungah ka chho zui nghal. Vica chu a lo chatthla der tawh a, khawih ang ang chuan a awm tawp. A kekawr ṭep ṭup chu ka hlihsak a, boxer nen ka muttir. Kawr erawh ka thlaksak ta lo mai. A rim tehchai chu ka tih hleihtheih loh avangin lehlam ka hawi ngût a, mutchhuak reng reng a lo kal thei lo. Ka meng kar reng a, sana chek ri te chu ka ning. A chhan puh ber tur hre si loin ka thinrim bûr a, a chang leh, "Hre sa veka nei i nia, hei chu i hmachhawn ve a ngai alawm, â takin che suh. " Ti ten ka infuih thul. Ka tihtur hre lo chuan Vica phone te chu ka han khawihsak ngawt a, Masangi leh Daisy msg tharlam hmuh tur a awm lo, midang rawn betu te chu ka hriatsa deuhte vek an ni bawk. A call log-a ka luh erawh chuan number a save loh nen 5 mins chhung an inbia a, mahse, chutiangin ka ringhlel hran lo. Engvanga zanin ataka Rinteii avanga danglam ta thut nge a nih hriat ka tumna pawh chu a hlawhchham titih dêr mai. Ka han ṭhu leh rên râwn a, ka ipik lutuk bawk nen, engah nge pan tur leh râwn tur diktak Pathian ka râwn mai loh le tih ka ngaihtuah a. Ka chhing ta vang vang a, "Lalpa, ka chunga thil thleng hi kei chuan ka hrethiam lo, chinfel dan ka hre lo va, ka pasal hnena sawi tur lah ka hre hek lo. Engkim i hria a, ka rilru a ipikin a zîng em em a ni. Fing taka hmachhawna dawngsawng thei turin min pui hram rawh. Tin, ka pasal hian zu in a ching zui ang tih ka hlau em em a, naktuka a harhfim hunah khawngaihtakin a thinlungah hna min thawhsak ang che." Tiin ka thiam ang tâwkin ka ṭawngṭai ta a. Ka zân phah hawk chuang lo. Mahse, ka thla erawh a muang ta deuh e. Zangthal zawnga muin number a lêt zawngin ka chhiar a, 56 ka chhiar vel laiin ka lo muhil ta daih, he thil hi Tetea pain ka tleirawl tirh mut ka harsat laia ti tura min hrilh dan a nia, ka rin êm vang ni maw ka muthilhpui ve leh mial zel. 

Ka harh chuan Vica a lo tho tawh, bathroom lamah a uak deuh tuar tuar ka hre zui zat, a lu chu a na ve khawp ang le. Bawihteii a la mutui angreng a, tihharh hlau takin ka tho a, inhnuaiah ka chhuk nghal. Sangi pawh a lo che leh vat vat tawh, a hmel hmuh pawh a nuam ta hle. A ṭanna a dik bawk a, a hmai pawh a uang ve hle ang chu. Tuilum ka in laiin kan pa chu a rawn lut ve a, tuilum a in ve nghal zat. A mitmeng ṭi lutuk avang chuan ka khawngaih angreng,. "Vawiin chu kal loh mai ka duh. Ka nuamsam lo" a ti a. 

"Ka ring" ka ti ringawt. Inthiam loh hmel deuha min melhin, "Ka tihpalh " a ti sup a. 

"Nakinah kan sawidun dawn nia. Han inbual rawh, i rim kha a na lutuk. " Ka ti zawi sap, Sangi'n a hriat ka hlau ve bawk si. Thuawih zetin tuilum a in zawhah a chho ta a,. Midang pawh an rawn lang ve ṭak ṭak a, Tebawihi'n min hmuh rual chuan,"Nizan i muhil thei maw? I khawsik chu eng nge a an?" A ti luam a. Ka mut theih thu ka lo sawi var. Midangin hre tam lo se ka duh, ka nu phei chu a dilchhut thei si. Tukṭhuan chu Mama te nupa tel loin midang zawngin kan ei a, anni chu kan ei dawn vel lai khan nalh deuha incheiin an chhuak tawh, "Kan bazar dawn" an ti! An nei bawk a, va bazar ham ham teh se. 

Kan eina vel ka tihfel vek hnuah in chungah ka chho a, Pu Tluanga'n bungrua a lo thlen dawn avangin kal turin min rawn chah a, Bawihteii bual vat vat a ngai tlat. "Dawrah kal lawk ka ngai a, Bawihteii i lo awmpui thei ang em? Dawra i kal dawn loh chuan." Vica bulah ka ti a. 

"Tu nge hruai dawn che" a lo ti daih. 

"Scooty-in ka kal mai ang chu ka tia" ka ti mai a. 

"Ka va hruai ang che, Bawihteii chu Sangi pawn a lo awm thei ang chu. " A ti a, pawi ka ti em em lo, scooty hi kan hman rim deuh avangin a ṭâwng ve deuh tawh bawk nen, ka khalh peih lutuk lo. Bakah Victora nen sawidun tur kan nei tho bawk nen, kan insiam zui nghal a. Sangi kutah Bawihteii chu kan dah a, amah Sangi lah a lo lawm tumhrang. Chhangchhe in a ni lo bawk a, in pawh tihfai nitin a ngai bik lo va, insuk nise a awlsam tawh si. An lo inawmthei ve em ang chu, ka nu a tho harh ve bawk a. Victora car-in kan kal ta a. A inthlahrung ngawih ngawih chuan ka sawi duh ang pawh min sawitir hleithei lo, ka mitah hian a enin a en ngam lo tawp a ni mai. Mahse, sawipui ngei ṭha ka tih avangin, "Nizan kha chhan ṭha tak a awm ka beisei a nia, Vic.." ka ti ta nge nge a. Hmalam a melh run a, a heh a liak zauh bawk. Rei fê a ngawih hnuah, "Ka bia che, Victor" ka ti leh a. 

"Min ngaidam rawh. " A ti mawl tawp. 

"Ngaihdam i ngaihna chhan tur ka va hre lo ve. I ruih vang nge Rinteii vang zawk khan.." ka ti a. 

"A pahnih vang khan.." a ti leh tawp. 

"Eng nge a chhan? Ani kha ka thîk a ni lo, a chhan ka hre duh, i tharthawh leh chhan kha.." ka ti a, ka awki pawh a ring ta deuh. 

"Ka hre lo, ka hrechhuak thut a, ka vei zui leh tlat a, keimahah sualin hna a thawk a niang. Rinteii ka khawngaih thar lutuk a, ka hrethiam lo. A thleng ve tawp, Tuaimam, ka tihpalh takzet. A thleng tawh lovang." A ti ta mawlh mawlh a. Awih tur nge awih loh tur tih pawh ka hrethiam tehnuaih lo e a. "Tibuaitu kan nei tawh dawn lo emaw ka lo tia, tiang kha a nih fô dawn chuan ka tan a hrehawm.." ka ti nghat a. 

"A thlen leh ka phal tawh lo, tihnat che hi ka duh reng reng lo. Ka hmangaih che." A ti dam thlup a, ka va melh a, min lo melh ve chiah, chu mitmengah chuan inchhirna ka hmu a ni. Ka pasal hian min hmangaih em em, mahse, a kalsan tawh a nunhluiin an rawn beihlêt chang a awm lo thei lo a ni. 

"Zu in tawh suh aw." Ngenngawl takin ka ti a. 

"Ka tum ang. Ka in paw'n i bulah ka in ang. " A ti thawp sup a. A intiam thlap loh chuan in hun a nei leh dawn tihna..mahse, tunah rih chuan ka nawrlui rih lovang. Victora hi ka lo ringtawk tawh ṭhin a, tuna a laka rinna nghah leh pawh hi ka harsat lo ve. Min hmangaih miau alawm le. Dawr chu kan thleng a, Pu Tluanga te pawh an lo awm ran tawh. Kan thlen aṭanga reivakloah bungrua pawh chu a rawn thleng a, chhut ngai leh ziahfel ngai zawng zawng chu Victora'n a ti ta vek. Kan inremfel lai takin ka nuin min lo call a, thlabar hmel zet hian, "Tetea te an accident a, tunah Civil Hospitalah an kalpui mek, keini pawh kan kal dawn, in remchan chuan lo kal ve u la ka lawm ngawt ang" a rawn ti ṭuau a. Ka bulb ken lai ka thlauh keh chhuai mai. Min ṭhâwng lutuk a tin ni. "Engtin nge a accident theih a?" Ka ti tuar a. 

A ngawih dat hnuah, "Bolero nen an insu a, kimkimi phei chu a serious viau an tia..ka dah rih aw. Hei kan kal dawn. " Ka nu aw pawh a khur ve dat mai. Victora chuan, "Eng nge thleng?" Tiin min ngaihtuah hmel deuh hian min rawn pan a, "Tetea te an accident.." ka ti ro hak. "Kal ang. " A ti nghut a, "Pu Tluang, buaina kan tawk tlat mai, Tetea te an chesual a, kan han kal ve vat loh chuan, ziahfel ngai ka ziakfel tawh a, a bak hi chu in lo khawih thei mai ang chu tiraw?" A ti zui mawlh mawlh a. 

"A va zia lo ve, aw le, han kal rawh u, chanchin min rawn hrilh ve u la aw." Pu Tluanga chuan a ti thluam a. Hmanhmawh phelêngin Vica nen chuan Civil Hospital lam pan chuan kan tlan chhuak ta nghal a. Kan han thlen chuan Kimkimi chu OT-ah an lo dah lut chiah a lo nia, Tetea erawh Emergency ward-ah an nawrlut nghal. A lu a sawh a, nikhua a hre lo, CT scan te la tih theih a ni rih lo va, a taksa dangah eng nge thleng kan la hre thei lo. Kimkimi erawh a kawchhungah thi a pût nasa a, an zai nghal dawn niawm tak a ni. Ka nu meuh pawh a chiâi tih hai rual a ni lo, nuteii a hamhaih vak lo zawk a, Tetea pa pawh hnathawh thawmhnaw nen a rawn kal ve vang vang. Ani pawh a mangan hmel khawp mai. Victora nen chuan buaipui ngai te kan han tifel zung zung a, ka nu lahin chet a la thei si lo. Hmutu te sawi danin Bolera khalhtu kha a rui viau a niawm e. Hmeichhe pakhat a phur bawk a, ani hmeichhia pawh chuan a chal a tauh kak a, casualty-ah an ṭhuisak a niawm e. Police-in driver chu custody-ah an khalh lut nghal a, ama motor pawh a lo ni lo lehnghal. Kimkimi chhungte pawh an rawn lang ve thuai a, a nu a chiâi viau, mahse, a pa hi pa dam thlup, fel taka thil ngaihtuah ṭhin mi a ni a, min ṭawng thlamuan mawlh mawlh mai. Victora nute pawh chanchin kan va hrilh ve a, "Bawihteii chu lo ngaihtuah suh u, hei a muhil mek e. " A rawn ti diam a, rilru a hahdam ta deuh e. Tetea chu ka nuin a awmpui dawn a ni, Victora leh nuteii ten mamawh an zuk lam a, Tetea pa pawh a haw ve nghal bawk. Ka nu nen Tetea khum bulah kan ṭhu dun ran a, ka nau chuan thisen a hloh tam ve bawk nen, a dang bâi mai. Pathian zarah kan unau hi ka hriat theih tirh ata damdawi ina luh ngai khawpin kan la awm lo va, tunah Tetea a awm ve ta si, thla a phâng lo thei lo. Emergency ward-a awm kan ni bawk nen, lung a zîng duh khawp mai. Kimkimi pawh an zai zo a, Surgical ward lamah an nawrlut ve zat, ani pawh a nuin a awmpui dawn a niawm e. Dar 4 bawr velah ka fanu ka ngaihtuah ve tho nen eng han tihtheih ni bawk si lo chu hawn lam kan hnaih ta a, chanchin min rawn hrilh vat zel turin ka nu ka chah mawlh mawlh bawk. 

In kan thlen chuan Bawihteii hnute châk a lo ṭap ruai tawh a, ka pe nghal vat. Mali te bazar pawh an lo haw ve tawh a, "Chu chen chen fanu rilṭama han dah theih.." a ti leh kher. "Ngawi mai mai teh." Ka lo ti nghat. Rilrua mawlhtu neih nen, aniin a duh duh dana min ṭawng el reng hi ka kham a ni. Bawihteii chu Tebawihi'n a rawn la ta a, ka inbual vat vat. Zanriah kan ei zui ta nghal a. Sangi leh Mali an la inbe miah lo, ngaihdam pawh an dil lo a niang,. An ti âwm ang lo ve e. Chaw pawh tihtham ka ei meuh lo. Ka nauin ka rilru a luahkhat êm a ni. Zanah pawh ka awm hle hle thei lo va, ka nu ka be deuh reng mai. Tetea chu naktukah CT scan bakah test neuh neuh tih a ngai dawn a, zanin erawh a changa vai ruaia a rawn harh leh zauh ṭhin tih loh chu a muhil char char a niawm e. Kimkimi pawh nikhua a la hre lo zui zel a, a hnunga chuang zawk hi an na zawk tlangpuiin ka hria,. Rui chunga motor khalh pawizia a lang ka ti mai, mahniin khalh fimkhur viau mah ila mi fimkhur loh zar hi kan zo thei tlat. Pawi tak a ni. Muthmunah kan pa nen kan titi mai mai a, Rinteii chungchang erawh kan sawi tawh lo. Nizan lam ka mu tlem bawk nen, vawiin lamah ka vei tuak zing si, ka chau tawngkhawng a niang, dar 10 velah ka lo muthilhsan daih. 

A tukah Victora'n dawr kal pahin Bawihteii nen damdawi inah min va thlah a, Tetea pa a rawn kal ve thei bawk a, Tetea chu CT scan an ti a, kimkimi ka va kan ve zuai,a la harh hleithei meuh lo. Mahse, a tira a thih loh danah a damchhuak tura rinna ka nei lian hle. Tetea erawh a harh tawh a, mahse, a kawng bâwr vel chu a tiche thei meuh lo. Ka mangang ru viau mai, a spinal chord te hi a lo khaw lo mai ang em tihte thlengin ka ngaihtuah a. Chutiang a nih vaih chuan ka nu phur a rit zual sauh dawn a, a fapa neihchhun a ni ve tawh bawk si. Rilruin kan ṭawngṭai mawlh mawlh mai alawm le. Ka awm ve lai a ni bawk a tiin ka nu chu va inthlak turin ka hawtir a, Bawihteii a mutui tho bawk a, mahse, puak reng a râlah chuan a rit ve zêk tawh. Chawhnu lamah Tetea pawh chu mumal takin a biak theih ve tawh a. A pain eitur a zu lamsak a, thil tuiril lam lo chu ei an phalsak rih lo. Baiwhteii ka pawm a, Thei leh thei loin a putea chuan a rawn lawm a, "U, kimkimi eng nge a an?" A tih chuan, "A la harh lo a, mahse, ngaihthat lohna tur a awm lo." Ka lo ti var. 

"A pawi e, a chhungten min haw ngawt ang." Chunglam melh vang vang chungin a ti a. 

"An huat ngawtna chhan tur che a awm hleinem, an haw lo che a niang, a nu pawh nichin lawkah a rawn kal alawm." Tiin ka lo hnem ve luam a.

"Ka kawng hnuai lam hian engmah a hre lo a, ka ngaih a ṭha lo e." A ti leh daih a, "An jectionna che a niang, a la ze rih a nih ka ring." Ka lo ti leh a, kei tak pawh ka ngaih a ṭha vak lo. A damchhunga wheelchair-a a ṭhut ka hlau a ni. Ka nau neihchhun kha a ni miau si a. 

Ka nu pawh a rawn lang ve leh a, "Mate, va haw tawh rawh, Bawihteii pawh damdawi ina awmpui ve reng chi a ni lo. Hei kan ṭhat ve tawh êm hi." A ti a. Vica min lo hruai turin ka chah tawh a, a lo thleng ve ṭêp ang. Kan hawn lamah chuan, "Naktuk tlai chu chaw ei chhuak ang aw. Kan nupain kan eichhuak khât tlat, Bawihteii pawh a piin a awm thei ang. " A ti a. Ni e, a hma fa kan neih hma kha chuan zirtawp tlai apiang hian chaw kan ei chhuak thin a, kan inpawhna pawh a ṭhat phah viau a nih kha. "Nia, i tih dan dan.." ka ti a. Rem leh rem lova ka kut rawn vuanin, "Tuaimam, ṭul lovah i rilru sêng vak ṭhin suh, Tetea pawh a ṭha vat mai ang. Pathian kan nei alawm." A ti sup sup a. Ka nui lui a, "A dik alawm, nia, inrefresh ka ngai." Ka ti halh a. 

Zanriah kan ei tlai deuh a, a chhan pawh Sangi a pum nawm loh avangin loh theih lohin Mali leh ka nuten rawng an lo bawl ve a. Chaw an lo chhum ût vek a, an lo chhum ṭhat leh vang a lo ni. Tebawihi lah vawiin chu an chhungkaw lam harsatna avangin dar 2 velah a lo haw daih bawk si, zanriah eikhamah a rawn phei dawn chauh sia, kei leh Sangi kan chet theih loh chuan chuti hlauh chu kan ni e. Ka pain chhuahna tur a nei bawk si, a phun nuah nuah a, "Nu chhûr pahnihin rawng in bâwl a, chaw in chhum ût thei a nia, in laktlak loh lutuk" a ti hluk hluk mai. 

Ka nu chuan, "Mali ka ring deuh a, anin min lo ring ve bawk nen, kan inringthul a nih kha.." a lo ti dam diai a. 

"Chhuah pawh hian rawngbawl hmana hawn leh hi mi pangngai tihdan a nia,.kan thiam loh pawh a awm lo " Mali chuan a ti hlang hlang a, a zahtheih lohna level hi a sang ve mah mah chu a ni. "In dang ta ula, eirawng i bawl thiam bawk si lo va, in nghei zing nupa âwm.."Victora'n a rawn ti ve ta hmak a, Mama pawh a meng rulh rulh ringawt. Mali erawh a tûm ang bâwr a. 

Ei pawn ka ei tui nek lo ve. Tetea'n rilru a kap ve bawk nen. Ka nu nen kan inbia a, a hnungzâng ruh chu a lo khawlo deuh a, mahse, chutia serious lutuk a lo ni lo hlauh, a lu a sawhna tak pawh a pawi tur lai a lo khawih pawi lo hlauh bawk. Ka thaw huai a, Pathian hnenah lawmthu ka sawi ve vat vat mai. Victora pawh a lawm thiam ve hlein ka hria,. Kan mu hma angreng a, kei phei chu nileng deuhthawin damdawi inah ka va tei kual ve nen, ka chau deuh bawk a, ka muhil hma angreng. Ka harh chuan Victora a lo mu lo va, bathroom lamah a ṭawng bul bul thawm ka hriat avangin ka ngaih erawh a ṭha lo hran lo. Dar 11 a lo pel awrh a, muthilh leh mai ka tum chu ka harh laklawh nge ka mutchhuak a bo deuh tlat, Vica lah a rawn chhuak har hrep a,. Ka phone ka khawih ve leh ta mai mai a, Peka khan, "Inpa khan min thîk em ni? A nuam lo e, nang lah biak chein min chhang duh tawh bawk si lo." A rawn ti a. Nia, khatia Victora'n kan inbiak lai min tihbuai aṭang khan min rawn be zauh zauh mah se; ka lo chhang tawh lem lo va, pasal te berin be lo tura min tih chu biak luih ṭâlh kha ka tum hran lo. 

"Thik lo ve, ka buai ve deuh a, ka nau damdawi inah a lo awm ve bawk nen.." ka va ti a. 

"A va zia lo ve aw. Lo la kan ve tur a nih chu, i fanu a ṭha zel maw? Vawikhat tal inhmuh leh a chakawm hle mai." A rawn ti luam a. 

"Aw a ṭha ve zel e, kan la inhmu leh maithei asin. Damte han hauh ila" ka ti ve ngial a. 

"Dik tak chuan, thinlungah ser nung i hnutchhiah tawh a, theihnghilh hi chu i har ve thlawt a ni. " A rawn ti leh hluam a. Hei hi ka nin ṭhinna chu a ni, a chhawrthlapui thei lutuk a, kei ka ho hulh mai bawk si. Kan inmil lutuk lo a ni. 

"I ho em mai, kawppui kan neih ve ve tawh hi, tiang khan ngaihtuah tawh suh. " Ka ti a. Victora lo chhuak tur thawm ka hriat avangin a rang rangin phone chu lukham hnuaiah ka thawlh nghal vat a, ani pawh a rawn mu a, ka maimichhin avangin ka muhil emaw a ti a nih hmel, muhil nghal ta mai lo chuan a phone chu a kheuh zui leh mawlh mawlh a. Ka meng derê a, thutak hmel zetin a phone chu a lo bih ngur mai, tu tak bia ang maw. Bathrooma a awm lai pawh khan tu emaw kha chu a be dût dût kha a nia. Ngaihven duh lo luiin leh muhil harh hlawl angin lem ka chang a, thawhphan hmel zet hian, "I la mu na nge? Dah tawh rawh." Ka ti hluk a. 

A phu zukin ka hria, rang zetin a phone chu lukham hnuaiah a dah ta a. "Lalvala ka be lawk a." A ti nuah nuah. A thusawi chu amah ngei pawhin a awih lo vang, mahse, zan a rei tawh a, inhnial kual vel ka peih loh avangin ka ngawihsan ta rih a, ani pawn ka men chhung chuan a phone a khawih leh âwm ka hre miah lo, ka hriat loh karin ka lo muhil leh daih a. Ka harh chuan min lo kuah chial a, a muttui hmel sûk sûk khawp mai. Bawihteii a rawn harh tak avangin ka thawhpui a, Vica pawh a rawn harh. "Vawiin tlai kha aw. Thil sawipui che ka duh bawk a nia.." a ti sup a, a vei ngang ni tur a ni. 

"Aw le, i book tawh em?" Ka ti a, "Ka lo bia ang, chhunah. " A ti nghut a, bathroomah a lut zui nghal. A phone a ken loh avangin alarm a rawn ri ṭât ṭât a. Ka off sak a, eng nge maw ka hriat ni a whatsapp-ah ka lut leh hram. Number a save loh nen an lo inbe nual a, ka luh chuan thlalak a lo thawn nual mai a. Ka'n en chian nâk chuan Rinteii thlalak bakah amah Vica nen an lak dunna te, a tam mai. Tin, chung thlalak hrang hrang chuan caption a nei zel bawk a, Rinteii leh Victora te nalh deuha an incheina, a hmun chu ka hre chiah lo va, hmun nuam tak a nih hmel chuta inkuah dun riala an lakna captionah chuan, "Innei tura in intiam nî..ani chuan vanah i nupui ni turin a lo nghak reng si che a, nang chuan nupui neiin fa hial i neihsan a, mi phatsan ching, bumhmang mai i lo ni." Tih thu a dah a. Ka ṭim sawk thei. Thlalak chu a tam angreng a, ka en vek sêng lo, Bawihteii buaipui ngai bawk nen, Vica tak chuan a chhang lutuk lo. "Ka khawvel thar hi tihchhiat tum suh. Ka chhungkua hi ka neihchhun leh ka hmangaih an ni.." tih thu bakah, "Hman zan avang khan ka nupui lakah engtianga rei nge ka inthiam loh anga ka inthlahrun dawn tih pawh ka sawi thei lo. Engvangin nge hetiang hi i rawn tih?" Tih te chu a chhanna langsar zual an ni mai. Victora rawn chhuah hmain phone chu ka dah ṭha vat a, in hnuaiah ka chhuk ta daih. Ka pain Bawihteii chu a lo a vat a, "I nu a tho harh peih tlat lo, tukin chu.." a ti a. 

"Vawiin lamah va incheck up leh se a ṭha ang, a kal khât riau" ka ti a. 

"A duh tlat ṭhin lo va, Victora'n nawr teh se, Vica thu hi zawng a ngaichâng deuh.." ka pa chuan a ti a, Zei vak lo va Bawihteii chu puain ṭhenawmte in velah a va lenpui dawn a niang, a chhuak ta daih a. Keipawn Sangi ka pui nghal, Tebawihi pawh a rawn lang ve var a, "Vala te pawh an inhruai leh tawh kha" a ti a. Nizan khan Victora'n min hrilh tak e, Jasmine pa pawn a dinhmun a hriatchian avangin man leh mual inhlana nupui pasal tak taka invawn a duh thu a lo sawi ve mial a! Amaherawhchu, a hranpaa inneih bûng bung ang ni loin man leh mual an inhlan chûk chûk dawn a niawm e, a hun hmain Jasmine pawh Vala te bulah a phei phalsak a ni. 

"Inneih pangngaiin innei vat vat se a ṭha" ka ti ve a. 

"U Mali rawngbawlsa nizanah in ei mi?" Nui chunga a tih chuan Sangi nen kan inmelh ralh a, kan nui hawk. An chaw chhum ût thute kan sawi a, kan hlimpui ta phian. Victora a rawn lan takah chuan Rinteii lam ngaihtuah duh rih loin ka nu chungchang ka sawipui a, incheck up tura hruai turin ka ti a, ani pawh a tuilum in lai nen ka nute pindanah a lut zuk mai. Ni e, ka nu hian inentir hi a hreh tlat zel a, ka hmuh hmasak ber ai kha chuan chhe tawh tak a ni. Natna benvawn a vei tih hairual a ni lo. Maliani ai pawn a hrisel loh hmel tawh zawk. Enkawl deuh a ngai tlat a ni. Tukthuan pawh a rawn kil peih lo, mahse, Vica'n doctor a va hmuhpui dawn hlauh e. "Vawiin chu dawr khar mai ang, Vala lah an nupa velah a buai ve rih sia, ka naute dang saw chu rinrâwlah chuan ka la hmang ngam chiah lo. " A ti a, ka pa pawn a pawmpui ve mai. Doctor hmu tur chuan a insiam a, "Zo choka ka be tawh aw. Dar 5-ah kan chhuak dawn nia. Sangi be lâwk mai rawh, ka nu a damsam si lo va." A ti a. 

"Vawiin chu kan cancel mai lo va, Sangi a buai viau maithei a ni, Bawihteii awm ngai bawk, rawngbawl ngai bawk chu, bakah Mali ten min sawisel leh ang a." Ka ti niah niah a. 

"Aa..ka ti laklawh tawh. Ka û pawn a lo awmpui ve thei mai ang, kan nupa chauha hun hman dun ka duh a ni." A ti khauh bur mai si. Hnial a sâwt lo tih ka hria, ka um e kual ta ringawt a. Ka nu nen chuan Doctor hmu turin an chhuak ta a. Vawiin chu kei pawh insuk ka ngai, Tetea chanchin ka zawt zeuh zeuh reng a, Kimimi pawn hmasawn lam a pan niin ka hria a, ka lawm ve hle. Tetea erawh a ruh lam a nih avangin hun a duh rei deuh maithei a ni. Phai lam min refer lem lo bawk a, chuti taka serious a ni lo a niang chu maw. Chawhnuah Vica te pawh an lo hawng a, damdawi an rawn lei haw nual,. "Admit te pawh a duh reng, ka nu khan a duh leh tlat lo va, a awmzia khu ka hrethiam lo, dam reng hi a châk tawh lo a niang." A ti bul bul a. Ni e, a taksa chhiat tawhzia Doctor pawn a hmu ngei ang a, damdawi ina enkawl a duh khawp ang le.."Bawihteii min lak chhawktu hi chu awm se, keipawh hian enkawl dan dan a awm ang mawle" ka ti niah niah a. 

"Nau awmtu tur lak ka remti lo kha ka tifuh vak lo mawni le..kan la mai dawn mi? In khawsa ho vek dawn tho a, " a ti a. 

"A ngai lo, Mali te min elsen lehna mai mai tur. Tihdan a awm mai ang" ka ti vat. Sum hmanchhuah vak hi ka inthlahrun bakah nakin zel atan savings hi uar ka duh, Vica hi a thilphal leh lutuk a, A dawra thawk Muanchhana pawh a scooty man a zatve a tumsak leh ringawt a, a khawngaih zawngte lakah engmah a ui ngai lo, a ṭhat tho rualin fa kan nei ve tawh si a, ka nu leh paten min dampui reng dawn lo nen, tun aṭanga lo inkhawl vea rilru nei taka lo inruahman hi ṭul ka ti ve tawh a ni. Maliani pindanah ka va kal a, a lo harh angreng a, ka lawm hle. Inthlahrung takin chaw kan ei chhuah tur thu leh Bawihteii an lo awm lawk thei ang em tih ka zawt ta râwih a. 

Lawm lo hmelpu lek lek hian, "A nî ka nia, khatia inthlahrung taka min ngen kha a ngai viau lo aw. 'kan chhuak dawn, lo awmpui rawh' ti ve tawp mai ṭhin rawh u, min enhran hmel lutuk.." a ti deuh hrep a, ka tan erawh dawnsawn a nuam daih zawk. Rilru thlamuang takin Bawijteii ka kalsan thei dawn a ni. Tebawihi pawh chuan, "Lo ngaihtuah miah suh u, honeymoon hmang angah inngai u la maw..Thanthani zawng a fel êm mai. " A lo ti ve chul a. Ngaihṭha takin ka chhuak leh ta a, fai mangkhêna inbualin ka insiam zui nghal. Thawmhnaw hi kan inneih hnuah keimah hian ka lei tawh ngai mang lo va, thla tin thla tirah Vica hian min rawn leisak ṭhin. Ka inhmeh tur lah hi a hre hrep lehnghal a, mak ka ti deuh ṭhin. Tun ṭumah pawh a kawrfual sen duk min leisak, pian tilang nalh deuh mai ka ha a, ka chawnpuar a thleng lo deuh a, ka sam ka ṭawn khawm tawp a, hand bag dum, Victora nu min leisak ka khai bawk a. Nalh ka inti ve viau. Vica pawh Denim grey hnuaiah tshirt var hain, Slim fit denim jogger a ha bawk a, ka hmu tlangval thar riau. Dawra a kal hian workshop lamah an ṭul ṭhin êm avangin a inchei tehchiam ngai lo va, bâl zeta rawn haw chang lah a ngah,. Vawiin erawh kan nalh nupa ve viau e. Dar 5 rik hma hlekin kan chhuak ta a, Bawihteii hnutê ka pe sa vek bawk a, a lo tlei êm ang chu maw. Garage-a a luh hlanin Mali bazar a lo haw a, min hmuh rual chuan, "Eng nge in tih dawn a?" A ti hluai a, ka inchei ngai vak si lo va, mak a tih ve hmel hle. 

"Chaw kan ei chhuak dawn a." Ka ti a. 

"Va han ṭul lo thei tak, eirawngbawltir te kha min tum leh ang e aw." A ti hlak hlak a. 

"Sangi a dam tawh alawm. " Ka ti hmak. Vica a rawn tlanchhuak ta bawk a, ka kalsan ta a. Zo choka lam chu kan pan dîng nghal. "Kar leh ninga zanah Vala te pawh man leh mual an inhlan dawn a, kan va ṭawiawm a ngai ang aw." A ti a. Ka lo bu nghat ringawt. Tetea chanchin min zawt a, ka hriat ang ang ka hrilh ve nghal. "Naktuk nilêngin i va awmpui leh dawn nia, i nu a hah lutuk ang." A ti a, ka chhungte a care thiam thei lutuk hian min tilawm veng veng zel. "Pa Thlenga'n chhun lam chu a âwl ve a. " Ka tih chuan, "Ka pa ti ve mai la, i tetlai pawn i ko tho a, tun ataka Pa Thlenga tih kher.." a ti nghut a. 

"Nia, ka ko tîm tlat mawle, a zu nghei vang hian a lang naupang leh deuh sia" ka ti ringawt. Hmalam bih run chungin, "Hniangpuii hi ka thihsan ang a, pasal dang i neih hunah tui lo deuhin 'Apa' tiin i koh luihtir ang tih ka hlau.." a ti daih a. 

"I â nih chu." Ka ti hlar a. 

"Thi ta ila pasal dang neih i tum em?" A ti leh a, "Chutiang sawi hun pawh a nih loh chu" ka ti vîn leh ṭhak. 

"Sawi ve mai la.." a ti lehzel a, a hmel a thutak hrep lehnghal. 

"Neih ka ring lo. Nang chuan i nei ang tiraw?" Ka ti a. 

"A teuh lo. Ka fanu hian nuhrawn a hrawn ka phal teuh lo." A ti hmuk mai. "Mahse, i sawi tawh kha, kawppui te nge nge chu an hlû i tih ṭhin kha, i tar hunah tuin nge enkawl ang che." Ka lo ti a. Min rawn melh zawkin, "I kal a nih chuan kei hi ka dam reng theih i ring reng reng em ni? Ka rawn zui ve vat ang che." A ti hniam ruih a. A sir leh hma zawng pawha engtik lai pawha hmelṭha ṭhin ka pasal chu melhin ka khi sak a..