Amah leh kei 5

AMAH LEH KEI..(S2)

Chapter - 5

Ziaktu : Toni Râlte

"I duh duh danin i awm ang a, keiin i thu ka awih char char bik ang maw?" Ka ti ve ta ngat a. Min khuahkhirh a tum a, amah a inveng chuang si lo chu ka ngaihdan a ni hlawl lo a ni. Thawk a la hawk a, motor a tinung a, kan tlan zui ta nghal. A ngawi ngur mai a, ka be duh bik der lo, Bawihteii a muhil tawh a, tawng vak vak kha ka duh lo ve deuh bawk nen, ka lung erawh a awi tehchiam lo. In kan thleng a, ka nute an lo la meng a, mahse, kan ṭhu khawmuang lem lo, in chungah kan tlang nghal a. Ka inthlak sawk sawk a, hmai pawh phih loin ka mu hmak. Victora erawh a va intleuh zuai a, a lo chhuah leh chuan ka muhil der tlat. Ka be châk lo va, titi ka peih hek lo. Masangi kha ka thîk em em pawh a ni lo, mahse, ka pasal an zuam mah mah zel hi ama dik loh a nih ka ring tawh, mi pasal pawmlai bianga fawp ngamtu chu a ṭhianṭha tâwp pawh ni se; a nupui awm ve reng laia khatiang a ti ngam a nih chuan ka awm loh hunah chuan a hmuiah pawh a fawh ngam ka ring, a rui tih chu hre tho mah ila, palzam theih loh chin a awm ve tlat. A phone a ri leh a, mu chungin a la a, "I va muhil har ve" a ti satliah a. 

"Hei kan mu chiah, Hruaipuii pawh a muhil der ngat ngat, a titau deuh a.." a la tizui mawlh mawlh lehnghal, ka meng ta nge nge a, "Zaninah chuan ni lo ve, ka chau tlat, bakah ka nupui hi ka duat duh a. Hun dangah aw, muthilh tum rawh, a nih muttui phawt le" ti leh zung zungin phone chu a dah nghal. Ka insum thei ta lo va, "I va zuamawm âwm ve, ti nge hmeichhia hian an zuam em em che a." Ka ti a, ka aw erawh a ring lem lo. 

"Ka hre lo, ti nge mawni dawn le..hmeichhe enin ka en ngai si lo va." A ti ve ringawt. 

"Mitmei i hmuh tihna a ni mai lawm, inah te khan in va tawm rei sia, in va ti zuai em ni?" Ka ti a, ka insawi thinrim leh dawn tlat. A nui hawk hawk a, "I thil ngaihtuah dan te reuh chu aw. I thluak kha hmang vak vak suh. Tuaimam" a ti a. 

"Kei chu ka peih lo a nia, hetia thik tur an awm reng dawn ai chuan thutawp siam mai ka duh,. Min duhkhawp lo a nih chuan ṭha takin sawi mai rawh." Ka ti leh nghat nghat a, beidawn hmel zeta chek hlukin, "Mi hmai êng ka zahna hi remchangah an hmang a ni maithei,. Thutawp maw? Siam lah lo ve, kan inneih thutiamah chutiang a tel ve loh kha.." a ti nghut nghut a. 

"Rinawm turin min tiam a ni lo'm ni?" Ka tih chuan, "Ka la rinawm mar pât chu a nia, ngaihtuah ang ang hi a tak emaw tih zel loh a ṭha.." a ti a. 

"Ngaihtuah loh theih loh a nia lawm. Ka awm lai rengin i biangah a fawp ngam a nia." Ka ti hlak hlak. "Nia, kha chu keipawn ka beisei bik miah lo, a ruih vang a niang. Peka number chu i delete em?" A ti a, a rawn tawlh phei hûrh hûrh bawk. "Engvangin nge ka delete ang a?" Ka ti hlar a. 

"I bialpa hlui a nih vangin." A ti duh lek, "Ka delete awm lo e, ka kawm ve duh alawm, khawhar hnemah.." ka ti kawisawi a. A inbeng kâng ûr a, "Hruaipui, khatiang ṭawngkam kha hmang tawh lo teh. Ni e, ka dik lo a ni maithei, anmahniin min rawn bia a nih ngawt loh chuan tumah hi ka be hmasa ngai lo, kei chuan ṭhian enin ka en vek, puih an ngaihna zawnah ka theihna a awm a nih chuan ka pui hreh hek lo, mahse, i lungdam nan, mipa anga min entu te chu ka hnaihin ka be tawh lo vang. Khawngaihin nang pawn min runluih suh." A ti ta duah a. Ka rilru a la dam kim chuang lo. Mahse, kan inhnial tawp thei dawnin ka hre lo va, "Aw a nih chu, muhil ang, zingah kan sawi dawn nia. Muttui" tiin Bawihteii lamah ka inher a, ka maimichhinsan ta vang vang a. Ka hriat loh karin ka lo muhil ve mai bawk. 

Chutiang chuan han inhnial bap bap ṭhin mah ila, a dawhtheihna vang nge ni kan la innupa ve zel a,. Masangi nen pawh a ruka an inhmu a nih ngawt loh chuan an inhmu tawh awm pawn ka hre lo. Daisy pawh a reh rih viau. Tin, ka pain a rawt tawh ang khan Mama zin hlanin ṭhenawmpa leh ka pa ten Mali chu an va ko ngial a, Mali pa hi pa pangngai tak a ni ve bawk a, ani pawn inṭhen ringawt chu a lo remti chiah bik lo a niang, Mama lo haw hunah amah Mama ngeiin a va hruai haw dawn a nih awm chu..Mali pawh a lungleng ve deuh tho nge ni a thinrimna kha an bo tawh zawk, lo haw leh chu a lo hnial bik hauh lo. Kan in aia nawmsakna tur hi a hmuh ka ring bik lo. 

Ka dawr pawhin hmasawn lam a pan zel a, Pu Tluanga te an felin an fair bawk a, a hlawkna pawh ka nuten an têl ve mêk zel a, Savings ka ngaipawimawh bawk a, bank-ah ka dah luhsak hmiah hmiah zel. Ka pa lama ka pute inah pawh kan nupain vawihnih lai chaw kan va ei ve tawh a, ka pa nupui kha a la awm ve zel a, hawn an phal loh chu thuhran, ka pute an upa ve tawh si a, enkawltu an mamawh tlat a ni. Tihian an boral hnuah pawh ka pa nupuiin an in leh lo pawh a chang vek dawn a ni. Ka nute pawh an la innei tluang ve zel a, Tetea pa lah a felin a taima a, kawmchhak mistiri zuiin in saknaah a inhlawh nitin ve ṭhin a, an khawsa pawh a buai lo chho ta viau mai. Nuteii te pawh amah Nuteii'n han ṭhen sateh mah se; U Opa hian a duh hneh khawp a, len ṭhulh ngai lo nafam chu Nuteii pawn lo hnar reng harsa a ti ve si, an inpawm leh nge nge zel, ka nu pawn tihngaihna a hre tawh bik lo. 

Mama zin pawh a lo haw ta a, ka pain a nawr na bawk a, Mali koh leh pawh chu pawi a ti em lo a niang, a ṭhian pa nen an va ko haw ta a ni. Mali rawn let leh chu a zia a zawi angreng viau. A taimak lohna erawh a la ngai reng mai. Ngaia neih leh mai a ngai dawn a nih hi. Victora nen kan inkar pawh a ṭha chho zel a, Daisy hian keimah zawk min rawn text zeuh zeuh a ching ṭhin, ka chhang ngai hlei lo va. Sunday zing a ni a, inkhawm turin ka insiam mawlh mawlh a, Bawihteii pawh ka thlak fel vek tawh. Vica pawh faifûk rût rût chungin a insiam ve mual mual. Maliani tih loh hi chu sunday zingah na nâ na chuan kan inkhawm vek ṭhin. Maliani hi chu a hriselna lam chu thuhran, a la hel laklawh ka ti mai. Tuman kan nawrlui lem lo bawk. Kan inpeih ta, room kan chhuahsan dawn aruaiah Victora phone a rawn ri leh a, "Lalvala mai mai chu, a va bei laklawh ṭhin ".ti hlukin a la a, "Aw..Val" a ti zui zat. Bawihteii bakkilh ka kilh ṭhattir a, Vica chuan ring zet hian, "Eng a?! A va buaithlak e aw. Aw le, ka lo phei ang." A ti tuar a, ka va melh ve vat. Phone chu dahin, "Buaina an tawk leh a nih chu, Jasmine pa kha a rawn chhuak a, chempui nen a va luhkhung a, Jasmine a hruai haw daih." A ti zung zung a. Ka nghilh dupin ka hria, Jasmine khan nau vawikhat a chhiat tawh a, tunah an la pai leh rih lo a ni. "Chuan, i va phei dawn maw?" Ka ti a, "Phei mai ang, Bawihteii hi lo inkhawmpui mai rawh aw, Vala nu zawk a thlabar riau a nih hmel." A ti a. Keipawn ka hrethiam viau mai. Bawihteii nen chuan kan inkhawm ta a, Sangi kan bulah a ṭhu ve bawk. Naupang inkhawmpui hi tihmakmawhah ka ngai ve a, zan lam tak hi chu a harsa rih a, Bawihteii pawh hian a tette aṭangin Pathian biak inkhawm awmzia hi hrethiam se, tlangnêl se ka duh a ni. Victora te chhungkaw zia ka hre tawh a, nu leh pa sual tak chu an ni lo, mahse, Vica te unau pawh an tette aṭanga Pathian thu hmanga chawm seilen an nih loh avangin buaina a awm leh khut ṭhin. Ka nu sawi ṭhin, "Tette aṭanga inkhawm ngaina, Sunday School kal kim thlap thlap ṭhinte hi chu an puitlin hnuah pawh han petek chang nei ve ṭhin mah se; inlamlêt hun an nei ve leh nge nge zel" a tih hi ka vawng ve tlat a, keini unau pawh ka nu khan harsa chung chungin min lo kaihruai tawh ṭhin a, tun hnuah buaina te han tawk ve ṭhin mah ila; mihringa innghat loin Pathian hnenah ka thlen mai zel, hei hian ka nun pawh a tizalênin a tithlamuang ka ti lo thei lo. 

Lalvala te chu ka rilruah an awm ve reng mai. Thusawi pawh ka ngaithla fumfe lo. Sawi tawh ang khan kan inneih hma khan Lalvala bialnu Jasmine nuṭapa kha a tualthi a nih kha. Victora leh Lalvala te kha tualthattua puh niin man te pawh an han tawk ve ren râwn a, kan inkar pawh a chhiat phah ṭêp a nih tak kha. Mahse, thu a kal zel a, Victora te thah a nih lohzia Jasmine-in huaisen takin a rawn tlangaupui ta a, Jasmine pa zawkin a fapa kha khamah a namthla palh tih a rawn lang chho a, central jail-ah phurh liam a ni ta a nih kha. Mahse, a duh vang renga a fapa kha tihlum a ni bik lo va, a ukil ten theihtawp chhuahin an beihpui a, bail theih ni lo mah se; eng emaw ti chhung chhuah lailawk theihna an dilsak a, amah lah chhuanlam remchang takin a lûng lamah chian lohna a lo nei bawk nen, tunah hian an rawn chhuah lailâwk lawk a niawm e. Enthlak reng tur erawh a ni thung. Lalvala hi sawi tawh angin a nu hova khawsa ve tho an nia, a pa a boral tawh a ni. A farnu pawh kumin kumtirah khan Malaysia-ah maid hnathawkin a kal ve a, an dinhmun pawh a kang ve sâwt viau. Anni nupa bakah a nute nen khawsa hoin an hlim ve riau kha a nia,. Tunah Jasmine an hruai haw leh ta daih si, va hnem chu a ngai khawp ang le. Banah chow ka kang a, Mali a rawn lut ve a, "Ka tlan hlan khan kan room khi tuin nge tifai ṭhin." A ti a. 

"Vawi khat chu ka tifai a, mahse, damdawi inah kan awmzui ta sia, tu nge chhunzawm ka hre miah lo." Ṭha takin ka ti a. 

A tûm deuh bar a, "Ka rangkachak ṭhi leh bengbeh ka hmu zo miah lo va." A ti nghat a. Ka hawichhuak vat, "Va mak ve, i tlereuh bawm chu ka hawng miah lo." Ka ti a. 

"Nang chu ka ringhlel che pawh a ni lo, Sangi hi a nih ka ring. " A ti a. 

"Sangi chu a ni thei dawn mi? Kha chen ka awm loh leh hman loh chang pawn a lo tifai tawh a, engmah a bo ngai hleinem, ka thil pawh a bo ngai lo " ka ti a, Sangi a nih ka ring thei lo hrim hrim. Mali kal hnu lawkah Sangi pawh chu Bawihteii paw chungin a rawn lut a, a remchang êm a tiin Mali thil bo vel chu ka lo zawt a, "Awihawm loh ê, a tlereuh bawm dahna pawh ka hre hleinem a, hmun ka phiat a, chhuat ka nawt a, ka chhuak lehnghal." A ti tân tân a. Ka ring thlap mai. "Nakinah ṭha takin i sawi dawn nia, a tibo tak tak pawn ka ring lo e a" ka ti ve hmak. Maliani te pawh an rawn chhuk ve a, chow chu kan ei ho a, Tebawihi pawh a ṭawng ve siam siam mai, Vala te chanchin a lo hre ve bawk nen, "U Vala chu ka khawngaih reuh, Jasmine hi a duh ve sia, Jasmine lah a lo fel ve bawk nen, Nu Piani pawn hrehawm a ti ngawt ang." A ti ve niah niah a. Mali leh Mama te an rawn lut a, "Lo insuah ve tawp mai r'u, a la tam kha.." ka lo ti var. An hmelhmai erawh a dik chiah lo tih ka hre thei. 

Mama chuan, "Sangi, thu zawh duh che ka nei a, Pipi te damdawi in awm hlan khan kan pindan i tifai tiraw? I U Mali ṭhi leh bengbeh a bo tlat mai a, a nuin a pianchama a leisak ve a ni sia, a roh riau a, i lo la a nih chuan rawn dah lêt leh la, engkim a ṭha a ni mai. " A ti ta nghut nghut a. Kan ngawi ṭhap mai. Sangi chuan a fork ken lai chu dah ri bawlin, "U Pipi bulah pawh ka lo sawi zo chiah tawh e. Ṭhi leh bengbeh ka hmu lo hrim hrim, hmu pawh ni ila ka la lo vang. Hei chen in inah ka awm tawh a, rûk ka ruk in la hriat ka ring lo. Dâwt chuan min puh suh u." A ti ve ta sak sak mai. Mali chuan, "I va huaisar reuh ve, chu! Dâwtin ka puh che i tihna maw? Nang leh Pipi chiah kan pindanah in lut a, nang emaw Pipi bak in ni thei lo hrim hrim. " A lo ti hlaih hlaih a. Ka sa ve phat, "Ngawi teh, Mali, chhungkua kan nia, engvangin nge i thil chu kan han rûk ngawt ang. Chutiang ît tur khawpin kan rethei bik lo" ka ti ve ta ngat a. 

Mama chuan, "Nang chu ka ringhlel che pawh a ni lo, Sangi bak han rinhlelh tur an awm tlat lo. Sangi, ṭha tê têa ka zawh lai che hian sawi mai rawh, engtinmah ka ti lovang che. " A lo ti leh hmuk hmuk a, Sangi chu a hnuk a ulh deuh niin ka hria, ka khawngaih hle. 

"U Mam, kha chen U Mateii nen in inneih lai aṭang tawhin in bulah ka awm a. Vawikhat tal rûk ka rûk i hre tawh em ni? U Mali thil a nih bik avangin engvangin nge ka ruk ngawt ang, bakah tlereuh ka ngaina ve lo,." A ti zawi raih a,. Mali chuan,"I hralh tawh pawh a ni maithei, i hralhna sawi la kan khul ang, ka nu phei chuan hria se a thinrim khawp ang. " A lo ti tâwn tâwn a. Maliani ngeng a chhun ta nge ni, fork chu a dah chawrh a, "A tawk, ka la lo a tih mawlh mawlh chu! I tibo takzet a maw? Thil tibo hian dâwt an sawi duh an tih kha. Sangi a nih ka ring hlawl lo. " A ti chang ta fak fak a, Maliani thinrim hi chu Mama meuh pawn a do ngam ngai meuh lo, pawisak a lo nei tawh ṭhin si lo nen. Kan awrawl a ring deuh nge ka nu pawh a rawn chhuak ve a, "Eng nge ni leh ta hlut?" A ti chul a. Mama chuan thil awmzia chu pangngai takin a sawi a, a tawpah, "Sangi hian ṭha takin pe mai se, thubuai a awm lo ni mai tur " a ti hram a. Ka nu chuan zaidam takin Sangi chu a bia a, mahse, Sangi a ṭang ve tlat si. "A ninawm, police ko ila a ni mai, cheng nuai tel man a nih kha a pahnih khan. Ka ngawi mai mai dawn lo, jail tan i duh loh chuan inpuang mai rawh, Thansang.." Mali chuan a ti hlawk hlawk a. Sangi erawh chuan zâm eih lo hian, "I duhtawkin Police chu ko rawh, ka room pawh lepse vek rawh u, ka la lo ka tih chuan ka la lo a ni mai. " A ti ve ngat. 

"Ni e, ko mai rawh u, ka tan tak pawh a nuam lo, in roomah ka lut ve tho sia,. Sawifel vek law law ang u." Ka lo ti ve hmak bawk. Mali hi hlau leh ṭi taka biak chi a ni lo, min zuam zel dawn tlat, hetia ngam sârh hi a tha zawk. "Nang lah hi mo û zawk ang hrim hian i inla thunei ve khanglang a ,hre rawh , he inah hian mo upa zawk ka nih hi, min zah hle rawh. Fa ka la neih loh vangte hian min lo hnuaichhiah ngawt ang e. " Tiin rum zet hian min rawn melh a, "Mo û zawk i ni bawk a, a nawm pawh i nuamsa viau alawm le tiraw!" Elsen zet hian ka ti ve a, a thin a rim ngang mai. "Eirawng ka bâwl ve loh vangte, in chhung chet ka tih loh vang hian nuamsa turah min ngaiin min lo thîk elo? Keimahni inah pawh ka tih ngai loh chu mo ka nih vang maiin ka ti ngawt lovang. Ve khanglang che hian a.." a ti nang nang a. 

"A tawk, duhtawk rawh u, inzahpuiawm mah mah, chhungkaw mo ve ve in nia, khatia inhnial buai kha thil zahthlak a nih kha. Mali, i tlereuh chu a bo takzet a maw?" Ka nu chuan a lo ti ve a. 

"Eng nge maw min rinhlelh fô le, a bo ka tih chuan a bo a ni mai. Nang thleng thleng hian he awmpuinu lam hi in ṭang dawn a maw? Lawmkim, zaninah ngei Thansangi hi a chhuak tur a ni, a chhuak lo a nih chuan ka chhuak ang." A pasal melh râm râm chungin Mali chuan a ti khar khar a. Maliani a lo nui hawk, kan lo en ṭhap mai. "Vei tân tân che hian, he in chhunga thu ber hi i ang thin. Sangi a chhuah dawn ai chuan chhuak daih rawh, in nupa khan chhuak daih rawh u, kan hmu ning che u, hneawm tak in ni, in awm loh hian buaina kan nei ngai lo. " A lo ti hmiah hmiah mai. Ka nu tak tak pawn ṭawng ngaihna a hre lo a niang, a ding zûm zût ringawt. "Chu! I lo hria maw? In inchhung hi ka tan hremhmun a ni ka tih kha, tumah hian min lawm lo, min kher ran reng a, hnathawkin min phût ran bawk a, ka chhuak ang. Ka awm châk em em bik hi ring suh u." Mali chuan a ti hlawih hlawih a, a han ân tak tak hi chuan lamṭang atana ṭha tak tur hi a ni ṭhin. Mama chuan, "Rinlian, i va zak lo ve, engtin nge khatiang khan i u nupui i ṭawng khum theih zawk? Tun ṭumah chuan Mali hi a dik zawk, a thil a bo a, ṭha takin Sangi kan zawt a ni mai, a thlavang in lo hauh teivet vang hian alawm a huangtau tawh em em. Sangi, khaw thim hmain min chhuahsan mai rawh aw. Va insiam la.." a rawn ti ve leh chhut chhut a, ka pa a awm si lo, ka nu lah a fate an thinrim tawh chuan zâm hma tak, nu derthawng tak a ni bawk si. "A chhuak lovang,a chhuak miah lovang. Sangi hi Mali aiin ka ngai chhungkua tawh zawk,. " Maliani chuan a lo ti hmak a, Sangi erawh a rilru a na ve hle a niang, a insût faih faih a, mo ka ni si, lo ṭawng ve vak kha ka tan a nuam bawk si lo, Tebawihi pawh hrehawm tih hmel zetin a ngawi rân a. "He in chhungah hian i thu ber em ni?" Mali'n Maliani a tih chuan, ṭawng lama chak vak lo Maliani thinin a tuar ta lo nge, Mali biangah ben thlawrh pahin, "Nang ai chuan thu zawk e, fanu awmchhun ka nih hi." A ti ram ta hmak mai. 

"I farnuin kut min thlak a nih hi, Lawmkim, mipa i ni na nge?" Mali chuan a pasal puihna a dil nghal chûl a, Mama lah Mali zem âtin a awm tawh nge, "Rinlian, i va huaisar ngai ve le..kut thawh khera i han chet chu le.." tiin Maliani chu a beng ve ta ṭhuai a! Ka nu a lo rak chul,. Chutihlai tak chuan Victora a rawn haw ta hlauh a, kan boruak chu a rawn manthiam nghal nge, "Eng nge thleng a? " A rawn ti lut a. Ka nu chuan a dam thei ang berin a lo hrilhfiah mawlh mawlh, Sangi'n ṭap pur chungin, "Keimah vangin tumah buai tawh suh u. Khawngaihtakin, chuan ka chhuak ang e. Keimah vanga chhungkua in buai hi ka duh lo." Tiin a pindan lam pan a tum a, Mali'n a chhipsama va ṭhâmsakin, "Chutimai chuan ka kaltir dawn lo che, ṭhi leh bengbeh kha rawn dah let phawt rawh. " A ti sehchilh nawk nawk a, a ngam zawng Sangi lakah chuan a nunrâwng thiam ve tlat. Ka awm hle hle thei tawh lo, "Thlah vat rawh." Ka ti tuar a, ka inrin hmain Mali chu ka va namsawn dâwrh bawk, dawhkan kil zumah tak a va intauh a, a nat em em pawh ka ring lo, "A na lutuk. " Tiin a rak chul a. Mama'n , "Nanga pawh chu le.." tih paha min ben a tum chu Victora'n a rawn dang hman hlauh,. "Hmeichhe thu khelah mipain kut kan thawh tur a ni lo. " A ti dam thlup a. Mama chu a sen vek tawh, thinrimna a lo ruihhnan tawh a niang ka ti mai. "Naua, lo awm mai mai rawh, i nupui hi zilh hlak a ngai a nih hi." A ti khur dur dur a, Vica chuan, "Ka nupui chu keiman ka zilh mai ang, i nupui pawh control zo lo khan ka nupui control tum duh suh. " Tiin Mama chu a namsawn a, Maliani kha Mama benna vang khan a lo thinrim sosang tawh bawk si. Kan chhung buai a ni ber e. "Nu, Maliani hi Tebawihi nen a roomah han hruai r'u " ka lo ti vat a, Bawihteii a lo harh bawk nen, Sangi'n min rawn pe ta bawk si, Sangi lah tuilairap kan tih ang hian a awm a, ka khawngaih takzet. "Engpawhnise, duhtawk ang. Ṭhenawm khawvengte pawh an zahawm e. Sangi, nang pawh i pindanah lo va awm rawh, i chhuak tur a ni lo. Mama, nangni pawh fim takin han inngaihtuah phawt teh u. Tuaimam, keini pawh chho ang." Victora chuan ti zung zungin kan nufa chuan in chung lamah min nawr chho nghal a, Maliani te pawh kan rualin an rawn kal ve nghal. Sangi pawh thuawih takin a pindanah a lut ve nghal a. Mali vangin kan buai leh ta laih chu a nih hi. A ṭhi leh bengbeh chu tu takin maw lo la ang. 

"Ka pa sawipui a ngai a nih hi, in hrang hi chang se anmahni pawh an hlim zawk ang. Keini pawh kan buai tawh lo bawk ang a. " Pindan kan luh hnuah Vica chuan a ti mawlh mawlh a. 

"Nia, mahse, U Mama hi a hah thei ngawt ang, Mali a nep si." Ka ti a. Mahse, ka hre lo le, mo ṭha vak lo nia kan ngaihte pawh nu leh pa chan changa an han indan chuan fel leh puitling ta em em an awm tho mai. Chhungkua inchenpawlh nuka inngeih loh ai chuan in hrang hi han chang zel mai ila, in hrang aṭangin a inhmangaihin a induhsak theih zawk daih. Mizo te chu lehlamah in dan kherh ṭhin hmeichhia te hi kan hmu nikhua lo ringawt zel a, Mali pawh a rukin a lo kherh ve a ni maithei asin. A dik adik chuan an khawsa thei a, an inah a lalin engmah a tih ngai loin awmpui an nei a, pasal a neih ve chhung pawh khan awmpui an nei bawk a, nalh taka awm deuh tawp bak tihtur a nei lo an tia, tunah mize inang lo ṭhah kan chengho a, a tan pawh insiamrem a harsa ve viau ngei ang. Kei tak chu Maliani ka lo enkawl tawhna khan an chhungkaw zia anga awm rem min thiamtir tawh zawk a, a chang chuan zawh loh chang ka nei ve ṭhin tho mai. 

"Engtin nge Lalvala te chu" tiin ka zawt ta daih a. 

"Zaninah palai an va tir dawn a niawm e. Man leh mual an la inhlan chiah lo ber hi a buaithlak a, Jasmine te lamin an dawnsak duh tlat si lo va. Ka hrethiam lo,.zanin han ngaichâng phawt ila." A ti a. 

Sunday a ni bawk a, Vica'n bawihteii a lo awm ve thei bawk nen, Sangi ka zu pui ta a. A che reng reng a zawiin a phur hlawl lo tih a lang reng, "Va mu hahdam daih rawh, tihtur em em pawh a awm loh hi. Ka ti thei vek" ka ti ta ringawt. Ani pawn min hnial thei ngang lo a niang, "Nia, U Pipi, min hrethiam rawh aw, ka rilru a na ve êm a, ka va mu harh lawk ang e, min lo kaitho leh vat dawn nia." Tiin a pindan lam min pansan ta a. Kan chhungkua hi chu a bulṭhut aṭanga kan siamṭhat hi chu a va ngai tak. A tlai tawh hial maithei a ni. Ka pa lah pa ṭha ve tawp, khirh lo leh ngaihsam ve tak a ni ringawt a, fate an han chet dik loh deuh pawha khak vak ngai lo, enliam theih an nih chhung zawng enliam thei mi a ni a, a thinrimah vek a incontrol thei lo va, a ti leh vak ringawt a, hetiang tur hi chu a ni lo mawle. Chhung inkhawm te hi ka mo aṭangin vawikhatmah kan la nei lo. Ti khawp hian Pathian malsawmna an dawng a, hei tak hi kan chhungkaw mutân niin ka hria,. Victora aṭangin kei hian ṭan ka lak a ngai dawn hlein ka hria. Kei lah thlarau mi lo ve tak, nun ho ve nget ngawt tak ka ni roh si a..

"Pipi.." ka phu zawk mai. Tebawihi ka hnungah a lo ding reng mai. "Koh i va hre thei lo em em, ka lo pui ang che. Maliani a muhil rih bawk sia, tihtur ka nei lo êm mai." A ti a, a nui sen sen bawk. 

"Awii, puih em em pawh ka ngai hran lo asin, mahse, i peih chuan alu kha lo vêl la. Bai hi ka'n chhuang lawk ang e." Ka ti a, khua a har lo deuh ang chu. Alu a vêl pah chuan, "An chhungkua hi a mak ê,. Hrehawm i ti ṭhin em?" A ti ta a. Ni e, hre ṭhang lo tan chuan vawiina thil thlengte kha a mak tih loh rual a ni lo ve bawk a ni. 

"Hrehawm ti hran lo ve, khatiang kha a thleng zen zen bik lo a nia, i awm rei ang a, i hre ve zel mai ang. Mali khi chu hnaih vak lo mah la a pawi lo." Ka ti hmiah mai, buaina a tawk ve ang tih ka hlauh vang a nia. 

"Ka hnaih duh teuh lo mai, bakah a hmain ka hre tawh alawm, a pasal kha ka ṭhiannu cousin a nia." A ti a, "Khawvel hi chu a zim a nih hi tiraw?" Tiin ka nui a. 

"Ni ngawt mai, amah hi chuan min hria ang pawn a awm lo,. Min hre tawh lo hrim hrim pawh a ni maithei. A nasa ve a, zep loh chuan." A ti tlang hmiah mai. 

"A buaithlak a nih hi..enliam hi zir ila a hahdam a ni mai" ka ti ve ringawt. 

"Ti daih ila, sawi nuam chu a ni lo maithei a, Victora bialnu boralta Rinteii kha i hre ve hman em?" A ti ta hlawl a. Ka mengphar deuh, Tebawihi hian ka rin aiin thil a hre thui tlat. 

"Hre hman chiah lo, mahse, a thi tih chu ka hria." Ka bai chhuan chawh rawk rawk pah chuan ka ti a. 

"A hmelṭha asin aw, a fel bawk sia maw. Kan inkawm ve ṭhin alawm, Victora hi chuan min hre kher lovang, Schoolah bak kan inkawm ngai lo va, kan veng a lo inang lo nen, tun thlenga a thattu an la hre lote hi ka rilru a na thei lutuk. " A ti dap dap a. Rin aiin Tebawihi chu a lo intatlut thuk riau.."A nih chu mawle, nia, mi pawisawi lo, râwng taka thattu te hi chu manchhuak se khaihlum hmak hmak se ka ti,. Victora pawn a tuar alawm. Mahse, kan inhriat hma thil a nia, kei tak chuan a tawrh nat dan vel pawh ka hre ve lo." Ka ti ve duah a,. Victora thinlunga châm hlen tawh tur Rinteii hi mitthi a nih tawh vang chauha thîk ngamlo ka ni tih erawh sawi kher ka tum lo. Ka pasal thinlungah hian Rinteii pualin pindan pakhat a la awm reng tih ka hria, ka ṭhiahsak theih a ni lo tih thlengin, chuvangin palliama ngaia neih mai ka tum kha a ni rêng a. 

"I hre hman lo chu a lawmawm daih zawk alawm, nia, a at phah ṭêp te pawh an tih kha, hetia a rawn ṭha chho leh nupui a nei leh thei te hi ka lo lawmpui ve tawp. " A ti ve luam a. 

"Rinteii chu la dam se an innei tawh awm sia tiraw?" Ka ti a, a nui hmel kha a reh tawh a, lungngai leh lunglêng hmelin a rawn thlak ka ti mai, ngui zet hian, "Fa pawh an nei ve nual tawh maithei a ni." A melh ngai melh ngawt ngawt chung chuan a ti a. 

Kan boruak uap zet tihdaih nan, "Maliani hrawn chu a hrehawm em? " Ka ti ta daih a, ani pawh a mitmeng a inthlak nghal daih. Phur hmel a rawn pu leh thei ta a. "Hrehawm loh e, a phunchiar ve leh zauh ṭhin hi a ni mai. Ani pawh a vanduai êm a ni, Rinzuala kha la dam se an innei tawh ngei awm sia.." a ti ta a. 

"Rinzuala pawh i hria law?" Ka ti hluai a, mak ka ti telh telh. 

"Hrechiang vak lo, ka hre ve satliah. A thih bawr vel khan sawi a tam êm a, in vengah hian hmelhriat leh ṭhian ka ngah em alawm. " A ti mai a. 

"A nih dawn chu, an vanduai tlâng a nih hi a. Mahse, engkim hi Pathian remruatah pawm thiam ila a ṭha a ni mai." Ka ti ve ngial a. "A dik chiah, chuan, In fanu hi a va duhawm tak, ka pawm ve châk thei sia, ka inthlahrung ṭhin a.." a ti a. 

"I ho em mai, pawm bawrh bawrh rawh, buai lai phei chuan lakchhawktu ka mamawh ṭhin lutuk" ka lo ti var a, han kawmchian chuan chutianga nelawm lo leh sual a ni miah lo tih a lang. A ṭha dawn e. 

Zanriah ei dawnah an rawn kal khawm a, Sangi erawh chuan a ei peih loh thu a sawi a. Ka hrethiam viau. Kan kil hma deuhin door bell a rawn ri tlang tlang a, ka nuin a va hawng a, Mali nau, an te ber hi helmet khum chungin a rawn lut hlawl mai, "Chaw in ei tawh dawn law.. " a rawn ti lut nghal a. Mali chuan, "Teh nawlh che chuan, eng nge i rawn tih dawn?" A lo ti hluai a. 

"In ṭhenawmah sawn order ka pe lawk a, a remchang em a ka rawn peng zuai" tiin a helmet chu a phelh a, Mali aiin a hmelṭha zawk a, a vun pawh a nalh zawk. Mali chuan, "Chaw ei ve nghal la, Pipi, thleng kha lak belh rawh" tiin min rawn en a, ka chechâng duh eih lo, chawhmeh ka suak laklawh bawk nen. A nau chuan, "Aih, ei lovang, tui ka in ang a, ka phei ang" tiin filter-a tui chu a va thli kar kar a, Mali bawk chuan, "Nunute, enteh, ka nuin ka birthday-a min leisak ṭhi leh bengbeh kha a bo daih mawle, tuman ka la an ti duh bawk si lo va. " A ti nghat nghat a, a nau tui in zo chuan, "Naa, sawtah i theihnghilh kha..ka nuin a dah ṭhatsak che lawm, i haihawt ve sia" a ti ta mai a. Kan phâwk hrû hlawm a ni ber e, chawp leh chilhin Mali hmel pawh a danglam nghal a, "Tak tak maw? Ka rawn keng phei tih ka hre miah lo. " A ti chul a. 

"Ken phei kha, naktukah hna kal pahin ka rawn keng ang, ka phei dawn. Chaw eitui u. " A phone hmeh mawlh mawlh pah chuan a ti a, a chhuak zui daih. Mali chu ṭit hmel zetin a rawn ṭhu a, Maliani'n, "Tu nge dâwt sawi chu a rawn lang mai alawm. Vawikhatmah i chenpuite hi rukrûah puh tawh ngai suh ang che." Tiin Mali chu a melh râwm râwm a, Mama hmel pawh a pha dai mai, tuman an chhang tawh lo. Keini pawn ngawi rengin chaw kan bar mawlh mawlh mai. Mali chu chawh ka ti, ama tihsual ngeiah a inâwk a, a mualpho ka ti lo thei lo. Victora'n kham pahin, "Sangi hnenah ngaihdam dil ngei a ngai ang. " A ti sup a. Tuman kan sawizui chuang lo. Tebawihi nen chaw eina chu kan sengfel a, Maliani'n bawihteii a lo pawm bawk. Kan tihfel zawhah in chungah kan chho ta dial a, ka nu te pawh an pindanah an lut nghal, Sangi chu a rilṭam hunah a ei ve leh mai ang chu maw. Kan rooma ka luh chuan Vica chu chhuah tumin a lo inṭam at mai a, "Khaw nge i kal dawn?" Ka tih chuan, "Vala te inah ka va phei ve leh loh chuan.." a ti a. Ni dawn tak e. 

"Nia, va ṭawiawm ve rawh, chanchin min rawn hrilh ve la aw." Ka ti a. 

"Aw le, ka rei lovang. " Tiin ka biangah a chukz zauh a, a chhuak zui nghal. Tihtur em em ka nei lo bawk a, youtube te ka en vel mai mai. Bawihteii an rawn dah hnuah ka awi mu leh a, mut hi a duh hlauh a, ka tan pawh a zangkhai zual. Dar 9 bawr velah ka mut a, keipawh ka hmai te phihin skin care ka apply a, mut mai ka tum. Vica lah a reh vung vung mai si,. Va call sek kha nuam ka ti chiah bik lo nen, youtube bawk ka en leh ta a. 

9: 26-ah Ateii'n min lo call hlawl mai a, "Aw " ka ti puat a. 

"I mu tawh em ni?" A rawn ti a. 

"Mu deuh chiah, eng nge ni ta?" Ka ti a. 

Thawk a la hawk a, "Ih, Victora a chhuak tiraw?" A ti sap a. Ngaihṭhat lohna pawh nei hran lo chuan, "Aw, Lalvala te inah a kal a." Ka ti a. 

"A kal lo" a rawn ti teh ngawt! 

"Maw? I hmu mi?" Ka inbengkâng nghal. 

"Kan pain a hmu a, WBR -ah rui deuhin ka hmu a tia. Mak ka ti deuh a" a rawn tih chuan ka nghing lawih thei. 

"A hmu sual a ni lo maw?" Ka ti ṭâlh a. 

"Hmu sual lo, Lalvala leh an thian pakhat nen an pathumin a hmu" inringtawk deuh hian a ti a. 

"A va mak dawn ve aw.." ka ti ringawt. 

"Call ve hrim hrim teh, zu te a lo in leh tih ka hre lo va. A pawi em mai." A rawn ti a, "Aw , ka'n call ang e" ka ti khur dat a. Ateii pawh chuan a dah nghal. Victora number chu ka hmetchhuak a, rilru mang deuhin ka call ta. A ring ral ral a, chhanna ka hmu lo. Lalvala zawk ka call ta a. 

"Aw, Pipi" a rawn ti lûng lûng a, ka bulah awm lo mah se; a awrâwl leh a ṭawng sehchilh dan aṭang chuan a rui tih ka chiang khawp mai. 

"Khaw nge Victora" ka ti a. 

"Pipi, ka ngen a che. Tun hunah chuan tibuaitu ni lo hram rawh. Ṭhianpa hian hun thawl a mamawh. Khawngaihtakin.." a rawn ti duam duam a, ka bo tulh tulh mai. 

"Eng nge a awmzia?" Ka ti nghek a. 

"Nunhlui leh sulhnu vang hian nâ kan insiam leh ṭhin. Chutiang chu..i hrethiam em? Rinteii vang a ni e." A rawn ti ta a. Ka melh ngai ka melh tlawk tlawk ringawt.