Amah leh kei 4

AMAH LEH KEI..(S2)

Chapter - 4

Ziaktu: Toni Râlte

Pic chu ka melh vang vang a, kan nupa khum ngeia Victora muhil lai leh a bân lukhama inselfie Daisy te an ni. Kan nupa khumah maw? Tunah mai hian maw?! Ka luak a chhuak thut a, ka tlan chhuak nghal, ka nu khan mak min ti ang chu aw. Ka va uak tuar tuar a. Ka luak lem hlei lo va, thlalak chu ka han en nawn leh ṭhin a, ka hriat loh karin ka mittui a lo tla a! Kan nupa khum ngei maia ka pasalin hmeichhe dang a mutpui thei chuan min tikehsawm vek mai. Chhan pawh ka chhang lo, darthlalangah inenin ka hmai te chu ka'n phih ngawt a, ka nuin min hriatthiam ka hlau bawk si. Tunah rih chuan engmah ka hrilh thei rih lo, a remti lo chung ka nei a, "Ka tih rêng kha.." a tih theih tura awm ka duh lo. Ka tuar ang a, Victora ka sawipui ang a, kan inṭhen dawn a nih pawhin a mualpho lo zawnga inṭhen ka duh. A chan chhe zawka han awm takah chuan a tlawm theih khawp mai. Ka va luh leh chuan ka nu chuan ngaihṭhat loh hmel deuh hian, "Ngati nge a? I pum a chiangkuang vak na nge?"a lo ti a. 

"Nia, ka pum a let thut a mawle." Ka ti ringawt. 

"Nau te hi i pai leh a ni lo maw? Ateii ang deuh hian" nui chunga a tih chuan, "Rai mai mai lo. " Ka ti nghat. Dar 3 pelhah ka nu chuan min hawnsan ta a, ka khua a har nghal vawng vawng. Vica'n min lo call a, ka la duh lo. A lo call leh a, ka la duh chuang lo. A ngaih a ṭha vak lo nge msg-in, "I muhil mi?" A rawn ti a, ka seen a, ka chhang lo. 

Bawihteii chu tuilumin ka hru fai a, a khawsikin ziaawm lam a pan ta deuh bawk a, ṭah pawh a ṭap lo. Ka rilru a ipik em em a, ka ṭah a chhuak a, ka ṭap duh si lo. Daisy intithei kual vel tur ka mitthla a, ka thin hi a rim ngawih ngawih mai a ni. Dar 5 velah Victora chu chaw rawn kengin a rawn kal ta a, en pawh ka lo en duh lo. Chaw chu a dah a, Bawihteii a rawn lawm a, ka kalsawn nghal. Chaw ei châkna ka nei lo bawk a, bathroomah ka va tawm leh tlawk tlawk, chuti ringawt chu a dik dawnin ka hre lo va, thil awmzia sawipui turin ka va chhuak phei leh ta a. Min lo melh reng tih ka hria, thildang hlir ka en thung. Nurse rawn lutin Bawihteii chu damdawi a rawn pe a, hnute pek an la phal loh avangin cerelac ka pe a, tam pawh a ei duh chuang lo. 

"Tuaimam.." Vica aw chu a thûk angreng hle. 

"Tuaimam" a ti leh a, "Aw" ka ti nghat. 

"Thil thleng a awm leh em ni?" A ti thum dût a. "Sawi dun tur kan nei" ka ti a, Bawihteii chu muttirin ka chul pah hliau hliau a, a tlei hrat hrat reuh tawp. "Ka ngaithla e." Dawhthei taka a tih chuan ka hnuk a lo ulh leh tawh. Vica nen hian kan inṭhen ang maw? Nâ ka ti..

Ka phone lain thlalak kha ka hmetchuak a, Vica bula theh pheiin, "Sawifiah vak pawh a ngai ka ti tawh lo. Kan inṭhen hun tur sawi tawh zawk mai ang. " Ka ti a. Chutiang thusawi a harsatzia a hrethiam ve ang em le..phone chu a bih vang vang a, a mengzim san mai. A rum nghut a, "A tawk ta viau e." A ti nghut a, a phone phawrhin tu emaw a call nghal bawk. "A'n la duh lo khanglang a" a ti zui hluk a. 

"Vica, engmah sawifiah a ngai lo. Khumpui tihbawlhhlawh hi upa te pawn an duh lo asin. " Ka ti a. Ka aw a khur lo va, a fiah ṭha hle tih ka hre bawk. Ka inringtawk viau pawh a niang e. A melh ngai melh rengin, "Engmah a thleng lo. Saw ramhuainu saw ka beng dawn." A ti ram hmuk a, ka nui lui hawk ringawt. "Engtin nge kan pindanah a rawn luh theiha i bulah a mut theih? Mumang em ni?" Ka ti a. 

"I awih dawn lo tih ka hria, engtin pawn sawi ila i awih dawn lo,. Mahse, Kan inneih aṭang hian chhetê mahin ka la pelhesan lo che a, pelhe ka tum hek lo. I ta ka ni a, ka ta i ni. Hniangpuii nu i nih chhung chuan ka nupui i ni bawk ang" a ti sup sup a. Ngaipawimawh lo deuhin thil dang ka lo khawihsan vel, a thusawi erawh ka hre vek tho. "Bawihteii hi dam fel phawt se, a mualpho zau lo zawngin ka chhuak dawn nia, kan inṭhen chhan pawh kan phuahchawp mai ang chu." Ka lo tihsan a. 

"Ka ṭhen dawn awzawng lo che. Harsa taka ka neih hi awlsam takin ka kaltir ring reng reng suh." A ti ngal ngal a. A tumruh hmel khawp mai. Kei lah ka hel laklawh a, ka luhlulna a rawn pung sauh bawk si. 

"Daisy lakah ka tlawm ta chu a nih hi, ka pasal pawh ka venghim zo lo chu a nia, ka lo nep khawp mai." Ka ti a, ka hnuk a ulh leh tawh, ka mittui ka khap per sak sak a, min hmuh ka hlauh avangin bang lam ka hawi daih bawk. 

"I tlawm lo, ka muthilh laiin a rawn lut tih a hriat reng alawm, kawngka ka lo kalh lo bawk nen, khatianga a chet ngam kha ka ring bik hleinem,. Ngun takin han enchiang leh teh, engmah ka hre lo tih i hmuthiam lo em ni?" A ti charh charh a, ka lakah dawhtheih a ngaih miau avangin a thinrim duh hauh lo bawk. 

"A va huangtau ngam ve, signal i pe ṭha deuh a niang." Ka ti leh nghat a, ."Ka û kan bia ang e." Ti daihin Maliani a call nghal. 

"Aw, ka u, Daisy a awm em?" A ti hmuk a. 

"Awm e, i be duh mi?" A rawn ti lâng lâng. 

"Be duh e, chuan ka biak zawhah ka be leh duh bawk che." A ti a. Maliani chuan Daisy chu phone a pe a niang, a ri rak rak a. Daisy aw ngei mai hian, "Hello" a rawn ti puam ṭâlh a. 

"I thiltih hi i hrechiang a maw? Daisy, i dai loh tur chin i dai tlat tawh. Ka rawn haw hma ngeiin kan in kha lo chhuahsan ang che." Victora chuan a ti khauh fang mai a, Daisy pawh a hamhaih nge, a ngawi dat a. 

"Eng nge a awmzia?" A rawn ti bah nak. 

"I hria alawm, ka nupui hnenah thlalak i lo thawn a, kha khan eng nge thlen se i tih reng reng a? I idea kha a hlui tawh mah mah. " A ti mawlh mawlh a. 

"Thlalak satliah mai a nih kha" a rawn ti leh hram, ka bulah chuan awm se ka beng ang mawle, hmeichhe zaktheilo lutuk mai. 

"A satliah lohna chu kan nupa khuma kan phalna tel lova i lo mu ve ngawt kha. Zahna i tlachham hle mai. Haw ang che, bân i ni." Vica meuh pawh a pawr ve kher mai. Maliani chu a be leh a, "Daisy kha bân ang che, keiman nurse dang ka zawng ang. ka rawn haw hma ngeiin a haw tur a ni." A ti hluk hluk a, Maliani lahin, "Tehreng mai." A lo ti hmiah. Ka hah a dam deuh huai naa ka hel laklawh ka ti mai, lungawi angin ka awm duh bik lo. 

"Tuaimam, lungawi tawh la, zan a rei dawn asin." A ti a, ka kut a rawn la a, "Ninawm" ka lo ti hlar. Mahse, ka hmelhmaiah ka thinrim vak tawh lo tih a hrethiam a niang, a nui vur vur a, "I lungawi tih ka hria, khatia inlak thinrim vak a ngai lo, i tum bûr hian i chhe lutuk." A la tizui, rum zetin ka melh a. 

"Khatiang thil kha a thleng leh a nih chuan ka chhuahsan tawh ngei ngei ang che. Hrereng rawh." Ka ti sak sak a. "Yes boss, a changtunu thu a kawi a ngilin ka zawm ang. Aw Lalber.." tih pahin ka kut hnunglam a fawp zauh. 

"Chaw ei tawh rawh le.."..a ti zui nghal. Keipawh ka pum a ruah êm avangin châk viau lo mah ila chaw chu ka ei ta a. "Mama a zin dawn a, naktukah..Mali nen hian an inṭhen hlen i ring em?" Tiin thudang a rawn vawrh a. 

"Ka hrethiam lo, Mama pawh a tenawm ve êm alawm, Mali hi ka dem lutuk lo." Ka ti a. 

"A tlangval chhung zawnga a insumtheihna te kha nupui a neih hnuah a rawn langchhuak a nih hi. A tuhrah a sêng chho zel dawn a nih hi.." a ti ve mai bawk a. Doctorin ward a rawn fang a, "Rin aiin hma kan sawn e, in chhuak ve thei ṭêp tawh ang. " A tih chuan ka thaw huai e. A nurse rawn hruai chu ka la hmuh ngai loh a ni a, Victora inthiar zo rawn lut a hmuh rual chuan, "Ehe! Victora chu, i dam maw?" A ti chul a. 

Vica pawh chuan, "Masangi teh nawlh chu, i lo nurse luah tawh ni maw?" Tiin a chibai ve nghal a. "I fanu a lo ni reng elo? Hei maw in nu?" Masangi a tih chuan a ti mawlh mawlh a, "Aw, Hruaipuii a nih hi, pasal i la nei bik lo a ni maw?" Vica chuan a ti ve luam a. 

"Nei nang, kan hmu zo ve lo lawm" tiin a nui har har a, nula lian lam, hmelṭha tak leh nelawm tak a ni. Min rawn enin, "Inpa hi veng ṭha rawh aw, a lerh a nia" a ti hluai a, "Ven reng a ngai" tiin ka lo chhawn ve vat. An chhuah hnuah, "Masangi chu a vanduai reuh lutuk a, a bialpa rei tawk a kawp tawhin a boralsan a, khataṭang khan mipa lam hi a ngaihsak tawh vak lo." A ti zui nuah nuah a, ka lo sawipui ve lem lo. 

Hun tumtawi nan tiin games kan khel mai mai, Candy crush a khel a, keiin carrom pool, kan inbe mang lo. Dar 8 velah ka nuin min lo call a, eng nge kan an te min rawn zawt ve luam a, "Hei Daisy hi a haw daih a, Victora'n chhuak rawh min ti a tia, buaina in nei deuh em ni?" A rawn ti a. 

"Aa..phone-a sawi chi pawh a ni lo, kan lo haw hunah ka hrilh dawn che nia." Ka ti a. 

"Vica meuhin a bân a nih chuan chhan ṭha tak a awm a nih ka ring a, engpawhnise, nurse dang kan rawih vat chu a ngai ang, nang i hman rih bawk si lo va.".a ti a, "Vica'n zawn a tum kha..a hmu vat mai ang." Ka ti ringawt. Kan inbiak zawhah "Nurse dang i zawng chuang si lo va, naktukah pawh tuin nge enkawl ang?" Ka ti a. 

"Lalvala te ho ka zawntir a, an veng ami a lo be dawn alawm".a ti sam êt a, a ngaih lah hi a sam thei sia a. Dar 9 velah kan mu ta daih a, leng leh leng loin ka bulah a rawn inhnawh a, Bawihteii a harh ka hlau si, "Ka nghei rei tawh e" a la ti sur sur zui. 

"I a mi? Damdawi in a nih hi.." ka ti hlar a, "Damdawi inah pawh ka nupui i ni tho alawm, ni lawm ni?" A ti leh a, a mitmeng aṭangin a tumlui dawn tho tih ka hriat avangin, "Kawngka saw va kalh rawh." Ka ti ta nge nge a. Phur zetin a va kalh sawk sawk a, "Dimtêin che ang che, bawihteii a harh ang.".ka tih chuan, "Ṭhutthlengah sawn mu rih mai ang." Tiin min pawt tho a. Ka zui ve leh ta poh a. 

Zingah Bawihteii a lo pua a, a lo âwi leh darh darh mai. Tukin chu a pang a dai diak mai a, chuti tak a ṭha chak chuan min tilawm kher mai. Damdawi in hi a ninawm ka ti hrim hrim tawh,. "Nurse chu i hmu ta em?" Ka tih chuan, "Umm, vawiinah a va join nghal dawn e." A ti a, hah a dam ta deuh e. A dawra kal a ngaih avangin a haw a, kan nufain kan inawm nilêng leh dawn a nih hmel, hnute pek an phal tawh bawk a, a tlei angreng. Chawhnu lamah Nuteii a rawn lang ve a, ka lawm hle. Ka nu thu min chah pawh sawina hun ka nei thei dawn e. Bawihteii chu min puak chhâwk a, Nuteii hi incheina lam uar chi a ni lo a, a nu hnûp ṭhin. Hetia bialpa a han neih ve leh hnu hian a inchei thar ve leh deuh a, a samte pawh a vial kir ve ngei a, amah a nulian si, Opa tan pawh a iaiawm loh ve êm a ni. 

"Nute, U Opa hi ṭhen dawn ta la, i thei ang em?" Ka han ti tê tê a. 

"Theih loh tur thu a awm em ni? Pasal pawh ka ṭhen thei alawm le." A ti mai a. A sawi ang ngawta awlsam erawh a ni dawn lo tih ka hrethiam ve vek, Pa Zuala nen khan an inngaizawng rei lo va, an innei deuh thut kha a nia, chuvang chuan inngaihzawnna boruak nuam tak ang kha a la man pha chiah lo maithei. Tunah U Opa nen zalên takin an inngaizawng a, amah nuteii tak pawh a hlim a ni tih a hmel aṭang pawn a hriat theih. Chuvangin ṭhen tawl mai chu a harsat ve viau ang. 

"Ih, englo a nia, U Opa chhungte ṭawngkam vel kha i lo hre ve tawh em?" Ka ti ta a. "A nu ṭawngkam vel kha maw?" A tih takah chuan a lo hre tawh tih ka hre thei. 

"Umn, a zia lo ka tia, amah U Opa bulah i sawi hrim hrim em?" Ka ti a. 

"Sawi chuang nang, nuam lo a tih ka hlau deuh a,."a ti a. 

"Kei chu in kal thui hma hian ṭhen thei la ka ti e, innei pawh ni ula in hlim pawh ka ring lo." Ka ti ta nge nge a. 

A ngawih vang vang hnuah, "Vawi 2 chu ka ṭhen tawh a, a thei thlawt si lo a, dik tak chuan ka lo ngaina ve tawh sia, min rawn zim reng chuan hnar fithlak ṭhak hi a harsa ve tawh lutuk a." A ti a. 

"Nia a ni lutuk ang. U Opa nu bakah a farnu te ho ṭawng duhdan saw ka ngei deuh a, an unaupa hi i tel lo va a awm theih lohzia hmuhtir ve hrim hrim hi ṭha ka tia. " Ka ti ve zel a, "A pawi a ni, nuthlawi hi chu kan tlangtla thei tak tak lo a nih hi..nang pawh fimkhur viau ang che, Eng emaw mai mai vangin i pasal hi ṭhen miah suh, fa in nei tawh lehnghal a, i nulat lai nen chuan a inang thei ngai dawn lo a nia. Fate min hmangaihpui tur kan melh tel zel a ngai a, rilru hi a hahdam hman ṭhin lo. " A ti duah a. Victora ka ṭhen teuhzia ka hrechhuak nghal. Kan titi tui deuh a niang, a haw tum hunah pawh a haw hman ta lo,. Gate thleng ka zuk thlah ve a, "Naktukah chhuah dil rawh u, a ṭhat tawh êm kha.." a ti a, ka tumdan a ni hrim hrim. Bawihteii muthilh lai chuhin ka inbual a, bathroom aṭanga ka chhuak chiah chu ka bialpa hlui Peka nen kan inhmu thut mai. Inhmuh lohna a rei ve tawh deuh a, ka lo hai lek lek hman. Amah zawkin min be ta chul a, kan chanchinte ka han hrilh ve luam a, ani pawh a fapa a lo awm ve a lo nia,. "I la danglam lo hle mai. Fa nei tawh tih i hriat miah loh. Inpa pawh hmuh ve a châkawm chu a." A ti luam a. 

"Tlaiah a lo kal leh ang, i hmu ve dawn nia, keipawh i fapa chu ka rawn kan ve dawn nia." Ka ti a. Ka kalpelh dawn lai takin, "Pipi, theihnghilh i har ṭhin khawp mai.".a ti sup a. Nui chungin, "Min theihnghilh kher a ngai hleinem, min hrereng lo la a tawk" ka ti puat a, ka kalsan zui nghal. Peka nen hian college ka kal laia inzui kan ni a, kum 1 leh a chanve dâwn chu kan inzui ve âwm e, misual a ni lo va, mi zaidam tak, dam thlup chi, thuawih thei deuh ang kha a nia, a mizia hi boring ka tih ṭhin avangin a hunlai pawh khan ka duh huam ngai lo. An ina rawn awm a nute lam aṭanga an chhung Lunglei lam ami nen sawi an kai avangin ka ṭhen ta kha a nia, a tuar na viau lehnghal, mahse, ka hmangaih miau loh avangin ka pawisa duh lem lo, kan inṭhen hnu thla khat lekah bialpa ka nei leh nghal a, khata ṭang khan ani pawh a reh zui ve ta a ni. Ka hrechhuak khât khawp mai, ka lakah a sual ngai lo va, nulat tlangvalna lamah a nghal hek lo. Nupui neiin fa hial a lo nei ve tawh a, a lawmpuiawm e. 

Vica pawh a hun takah a rawn thleng leh ta chat mai, a nurse rawih thar chanchinte chu ka lo zawt ve a. "Lalvala'n a fel a tia, a fel ka ring ve tawp. Nangmah ang tiat vel a nia, nang aiin a hâng zawk, a ṭawngmawh hmel angreng a, ka û nen hian an innêl thei ang e maw.." a ti puat puat a. Maliani hrawn a hrehawm tawh lo bawk a, an inenkawl ve thei mai ang chu. "Doctorin ward a rawn fan hunah chhuah ka dil tawh dawn a nia." Ka tih chuan, "Hun an tihah chuan kan chhuak mai ang, dam chiang kâk rawh se." A ti duh chauh. Mahse, ninawm ka ti tawh, a boruak hrim hrim hi ka hne, in lamah a inenkawl theih tho. Chaw ka eikham doctor rawn luh hma siin Peka kha a rawn lut ve hlawl mai a, Vica nen chuan ka inhmelhriattir a, Bawihteii chu a thlêk vang vang a, "A chhun kawp hle mai che u, a nu leh pa in hmelṭha bawk a, nula hmelṭha tak a la nih ngei dawn hi." A ti ve suam suam a, "Doctorin ward rawn fang phawt se, ka rawn kan ve ang che u. Hma in sawn em?" Ka lo ti a, "Kan sawn chuan ka hria. Kâng hi chu a dam har ve bawk a.."a ti a. A fapa hi tui soin a buak a, a kawng hnuailam a kâng nasa a, a khawngaihthlak viau. An nu lah nau a lo pawm ve leh si, tihian Peka zawkin a rawn awmpui a niawm e. A chhuah hnuah, "I ex a ni maw?" Vica chuan a ti sup a. 

"Nih ve kha, a fel asin." Ka ti ve mai a, "A mitmeng aṭang khan a la duhzia che ka hre thei. A chân ropui ve bawk che a ni." A la tizui a! "I chhe mai nih chu.." ka ti hlak. Doctor pawh a rawn lut ta a, a'n en vel a, ka sawi pawh ngai loin, "In lama inenkawl te in duh tawh em? Hei rin aiin a ṭha chak reuh a, in duh chuan naktuk lamah chuan in chhuak thei tawh ang. " A ti ta mial a, "A va lawmawm dawn ve, nia, in lamah kan lo inenkawl ve tawh mai ang. " Ka ti a. Vica erawh a ngawi reng. An chhuah hnuah buangbâr taka chhuah ka duh loh avangin kan thawmhnaw leh bungrua te chu ka khung a, "I hmanhmawh thei siah" a lo ti nghut. 

Ka khung fel zawhah, "Tikhan lo awmpui lawk rawh, Peka fapa chu ka va kân ve ang e, kan chhuak tawh dawn bawk si" ka ti a. 

"Aw le, ka pi, thil hlui te kha va sawi kual lo u la" a ti a, a nui ruh ruh bawk, a bekah na lotêa penin, "Daisy biak nuam." Ka ti ve sak. Peka fapa chu ka rin aiin a lo lian tawh a, a lo mu bâm mai. A pa a chhun viau, a kanna lai te chu ka ensak ve a, kâng hrim hrim hi chu a na ve ê, engtin nge maw a intihkan theih ni. "In nu pawh hmuh a châkawm hle mai." Ka ti sap a. 

"I hriain ka va ring e, kha college kan kal laia tlaia kan chawlh hawna ṭhin restaurant kha i hria em?kha ta an fanu kha.." a ti a, kan chawlh ṭhinna chu ka hria a, an fanu hmel tur âwm ka hre thei tawh lo. "Tehdaih chuan, i lo zei riau mai nang hi" tiin ka fiam zauh a. 

"Nangmah vanga ka kehsawm lai khan min hnem nasa ṭhin alawm, chuan kan ni ta daih a, kan puklâwk ve ngei alawm." Nui vur vur chung hian a ti a. 

"Nupui pasal tur hi chu mak deuh mai a ni, inzui rei leh rei loh pawh a lo ni lo." Ka ti ve a, "A dik chiah, mahse, kan nu chuan hmu che se a thîk maithei che ni.." a ti a, "A va buaithlak." Ka ti ringawt. 

"A nia lawm, tun thlengin la sawi chhuah zauh a ching ṭhin, nangmah vanga intawng kha kan lo ni bawk nen..tak taka inpa kha ka rin loh deuh, ka sawi awmzia chu a va inchhu râng bei buai ve ka ti,. " Nuam tih hmel vak lo hian a ti a. 

"Ni ngawt mai, kan intawn hmain a lo chhu tawh sia, mahse, a lan ang a ni bik lo a nia, a fel lutuk.." ka ti ta ringawt. Ni e, Victora hi a pawnlam landan aṭang hi chuan fapa duatsual, insual mi niâwm reng a ni roh a, pawnlam landan aṭanga mi judge chawt ṭhinte tan chuan mi ṭha a ni hlawl lo alawm. Mahse, a chhungril nun ka hmuthiam tawh a, amahah hian ka bei thlawp chu a nih ber mai hi a. 

Victora msg ka dawng a, "Lo haw tawh rawh, bawihteii a ṭap" a rawn ti. Ka tho ta tharh a, "Ka va phei ang e, naktukah kan chhuak tawh dawn sia, insiam lâwk te ka duh, lo dam vat r'u aw." Tiin a fapa kutah Cheng 1000 ka hmehbel chawt chawt a, "A ngai lo asin, i ti duh kher a nih kha. Lawkin, i number min lo pe ve la, chanchinte pawh kan inhrilh ve ṭhin ang chu." Peka chuan a ti a, keipawh chuan ka number chu ka hrilh ve mai bawk. Vica chuan hria se a tûm leh vûau maithei ni. Cabin-a ka va luh chuan Bawihteii a lo ṭap awzawng si lo. A pa lahin games a lo khel mual mual, "A ṭap i ti ve si" ka tih chuan, "I rei alawm." A ti hluk. 

"Ṭhinga" ka ti hlak a, "I bialpa hlui kha a ṭhing zawk." A la ti hram. Zankhuain buaina em em tawk loin kan muhil thei a, zingkarah ka insiam zo vek tawh. Vica pawh dawrah a kal lo law law dawn a, Chaw va lak hman ni tawh hek lo, damdawi in chaw kan ei a, a ei theih viau tho e. 

Chaw eikhamah muangmarin kan inlachhuak ta a, Bawihteii pawh a harh ṭha leh viau tawh. Kan chhuah hma deuhin Masangi a tih kha a rawn lut hlawl mai a, "Vic, i number min lo pe" tiin a phone chu Vica a pe nghal, Vica chuan a number a chhu lut nghal a. "Ka lawm lutuk, thil hrilh tur che ka nei a, ka la rawn call ang che, hman veleh." A ti a, a kal leh nghal daih. 

Ka lo en run run min hmuh chuan, "Thîk chi a ni lo, ani kha chu aw" Vica chuan a ti nghut a, "Ka thik peih bawk lo." Ka lo ti hlar. In kan thleng chu ka hah a dam sawng sawng mai. Sangi'n min lo tihfelpui zung zung a, ka nuin Bawihteii a lo la vat bawk. In chunga kan chhoh chuan, Maliani ka va tlawh a, drip a lo khai mêk a, a nurse thar Tebawihi pawh chu a lo ṭhu ve reng. Vica sawi ang deuhin a nelawm tehchiam lo, mahse, ṭawng tam lo, taima deuh a nih ka ring. Maliani chuan, "Ka ngaih tawhzia che hi, Hei Tebawihi a nih hi, Tebawih, hei Victora nupui Hruaii aw. " A lo ti zung zung a. Tebawihi pawh chu a nui ve ta nge nge e,. 

Fai mangtarain ka inbual a, ka zâng hawkin ka hria. Ka inthlak laiin Vica a rawn lut a, "Bungraw thawnchhuah a ngai a, ka va kal lawk mai ang." Tiin a insiam nghal a. A phone a theihnghilh daih zui,. Ka zuk auh leh dawn chuan a lo kal hman tawh si. Ka sam ka chhemro laiin Maliani a lo lut a, an drip khai a zo tawh a ni ngei ang. 

"Daisy kha a chhuak ta sia, Vica lah kha a thinrim hmel si, eng nge thleng?" A ti a. A bul aṭangin ka hrilhfiah ta a, a ner sak sak mai. A ngei ve hle a ni mahna. "A va han zaktheilo tak e aw, mahse, a tawpsan mai ring suh aw. Fimkhur reng ang che. Pawisak nei lo chi angin a khawsa tlat, a rawn awm tirha a fel tehreng nen, tum nei râna a lo awm vang a nih chu.." a ti mawlh mawlh a. 

"Tebawihi saw eng nge a an dawn awm?" Ka tih chuan, "A ṭawng tlem a, a ṭha daih zawk, a kut a dam bawk si. Mahse, innêl chu a la har angreng" a ti ve mai a. Ka nuin Bawihteii a rawn paw lut a, hnutê a châk tawh a ni maithei, ka lo la vat a. Maliani hian a thlir ngawih ngawih zel, a vahnu kha a ni miau a, ka pek zawhah Maliani chuan, "Khawi, ka duatnu hi ka ngai tawh lutuk,." Tiin a pawm a, Bawihteii lah hian a ngaina zêk a. An inlawm laiin Vica phone a ri a, Rinchhana a lo nia, phone a theihnghilh thu vel ka sawi a, "Naktuk tlaiah chaw rawn ei r'u aw. Ka nau kha Singapore-ah a kal dawn a, thlahna nei ang u ka tia..in nupain rawn kal ngei ngei ang che u." A rawn ti luam a, a dah lehnghal. Victora phone chu dah ka tum zet a, ka hman tho tiin a whatsappah ka lut ta a, diktak chuan privacy inzahsak hi ṭha ka tia, a hma kha chuan a password hre mah ila ka luhsak ngai lo, Daisy vang hian ka lut ka lut ve ta a, ani lahin pawi a lo ti vak bawk si lo. Whatsapp chu ka han lepse leh ṭan a, A hmasa lamah Daisy a lo awm leh vang tawh. Ka'n lut chu a rawn vauna te, a duhzia te, bansan a tum lohzia thu hlir a lo khat dul mai. Victora chuan a reply lo nge a replyna a delete zawk ka hre lo, a chhanna a awm lo. Ka ngêng chhun deuhtu chu, "I nupui ai kha chuan ka zeiin ka laktlak zawk ang, khatiang mi chenbeh lutuk, hmelchhe bawk si khan zawlâidi a tat che em ni? Engtik lai pawn ka pawm thei che. Ka lo nghak ang che." Tih chu a ni, ani hmelchhiat min tih pawh a ngai lo, ve a..ka block hmak dawn mawni ka ti deuh a, mahse, tihian awm ve se Victora hian eng chen nge a hnar theih hriat ka châk ta tlat. Ka pasal hi ka ring zo lo tihna em mawni le..ti nge maw a ni lo zawng ngawta ka ngaihtuah ni. Masangi a tih pawh khan a rawn text a, "Lal Vic, sawi tur ka ngah lutuk, inbunruahna hi ka mamawh thin a, tumah ka ring zo si lo, hun remchang i neih veleh zanriah la ei dun ang aw. " Tih thu a rawn thawn a, Vica paw'n, "Tehreng mai" tiin a chhang. Ani hi chu ka thîk hran lo. A chanchin kha a sawi zuai tawh bawk a. Bawihteii a tlei bawk a, Sangi ka zu pui ta daih a, bai thak tawk ka ei châk tawh avangin bawkbawn leh samṭawk ka bai a, Sangi'n a bialpain inneih a rawt thu te, amah pawn a hnial loh thu min hrilh malh malh lai chuan rin loh lutukin Mali a rawn lut thut mai. Sangi phei chu a hamhaih deuh niin ka hria, "Khaw nge ka nute?" Tlangnel zet hian a ti a. 

"A awm ang, an pindanah a awm a niang" ka ti a. 

"Lawmkima chu a zin leh ta maw?" A ti leh a, Sangi'n a lo chhang vat. A rilru a hah nge ni dawn ni a cher riau a, a mitkhur te chu a tla dâk mai. A chauh hmel bawk si. "Lawmkima lo hawn veleh bungrua kan rawn la ang. Ka nute pawh in lo hrilh dawn nia, ka rawn peng zuai a nih hi.." tih leh chhuah a rual nghal, kohzui hman pawh a ni lo. Sangi'n, "An inṭhen hlen tak tak dawn mawni le.." a ti sap a. "A nih hmel, i lawm awm" ka ti zauh a, "Lawm tho nain an innei rei lo e" a ti vang vang a. Inneihna te hi fiamthu a ni si lo va, Mama te pawh awlsam viau turah an ngai a, rin aiin a lo hautak ta si, Pawmlai nei ve ve ang an nia, tiang hian tlang rêl pawh phurh huamin an innei ve em em a, tunah lem an inṭhen leh dawn chu a ni ta reng sia, U Mateii kha nei hle hle se a ṭha mai tur. Mali pawh hi a pasal a ṭhen kha a inchhir ve tho ka ring. U Mateii sawi takah chuan damdawi ina kan awm lai khan min rawn be ve reng zel a, Reiekah an zin avangin min rawn kan thei si lo, tun thleng hian min la intiunau ve a, hmeichhe fel tak hi zawng a ni ve chiang a ni. Mama hi pawm leh thei se, han mo dun ila ka tan pawh a nuam ngawt ang. Vica pawh thim hmain a rawn haw a, "Ka phone ka theihnghilh daih alawm." A ti nuah nuah mai. "Nia, ka lo lepse leh a,. A pui hlawm khawp mai." Ka lo ti a, a nui huk mai. "I block daih lo nia, a hneawm riau" ka rilru man zet hian a ti a. "Tikhan awm ve mai mai teh se. A ṭha ve lawm." Ka ti mai a. Rinchhana sawmna te chu ka hrilh nghal bawk, "Kan va ei dawn nia, Bawihteii damdawi in chhuak lawmna a ni mai a" a ti a. Inbual turin bathroomah a lut nghal. Ka pa lo haw hnu lawkah zanriah chu kan ei a, Tebawihi chu sawi tawh ang khan a ṭawng tam lo naa, a che vel reng reng chu a fel thlarh mai. Chaw ei lai chuan Mali rawn kal thu leh a thusawi te chu ka sawi a, ka nuin, "Rawn la daih rawh se. A pawi ka ti lo." A ti hmiah mai, ka pa erawh chuan, "Nupui thlak chhên te hi thil zahthlak a nia sin. Mama rilru han hre phawt ila, bungrua an rawn lak hmaa thiamchan nana va koh ve hrim hrim hi ṭha ka ti. " A ti chuar chuar a. 

Maliani'n, "Mama pawh a dik bik lo, U Mateii nen an inneih lai khan tiang hian a lerh ngai si lo va, ti nge maw hetia a awm tlat ni." A lo ti ve a, Daisy chunchang ka hrilh khan Mama vel kha a sawi tel loh theih si loh a, a hre ve vek tawh a ni. "Nia, fa tal lo nei hman se hetiang hi chu a ni kher lo maithei." Ka pa pawh chuan a ti ve a. 

A tuk tlaiah chuan Rinchhana te ina chaw ei tur chuan kan chhuak ta a, Bawihteii ka pua a, Ka nuin, "Dah mai rawh, chaw ei chhung ringawt chu kan lo awm thei ang." Ti mah se; a la damkawr ve bawk nen, ka hruai ta mai. Kan va thlen chuan an ṭhian dangte pawh an lo awm ve a, a ṭhen chu ka hriatsa an ni. Kan ri hlut a, keipawh ka tlangnêl ve tawh hle.. zanriah pawh hlim takin kan kil ta a, kan chaw ei lai bawkin Vica phone chu a ri leh chhên a, ani pawn a ning deuh nge a ner leh sak ṭhin. Chaw eikham veleh a call back ta a, tu nge ka hre bik lo. Bawihteii ka hruai ve bawk nen, kan awm rei lo va, anni lam pawn min hrethiam viau e. Motora kan ṭhut luh rual chuan, "Masangi khan min lo bia a, falkland-ah a awm a, zuk lam lawk ang aw." A ti a. "Tehdaih chuan a.." ka ti ringawt. 

"A rui a" a ti ringawt. Ka chhang tawh lo. Falkland lamah chuan kan tlan zui ta nghal a, Bawihteii a rak ruai ruai reng a, motor chuan hi nuam a tithei a nia. Masangi awmna hmun nia a sawiah chuan kan peng phei ta a, fal deuh taka in lo dingah chuan a va lut zauh a, kan nufain motorah kan lo awm a. A rei angreng sia, ka dawhthei lo leh ṭêp a ni. A tawpa tawpah an rawn inzuichhuak ta a, Masangi chu a hnungah a rawn ṭhu lut nghal, a ruih hmel viau mai. A inhmeh lo tawp. "Hruaipui, min hrethiam rawh aw, ka free ve lai a nia, ka'n chen lawk a nih hi. " A ti chhar chhar a,. "A ho lutuk, nuam lo ti duh suh" ka ti a. A chanchin tlem ka hriat tawh avangin khawngaihthla te pawh a la deuh e a. Victora chuan, "Thlah phawt ang aw. " A ti sup a, ka lo bu nghat. Chhinga vengah an khawsa a, chulam chu kan pan nghal. Masangi te chu an khawsa thei ve pangngai a nih hmel, an in leh lo a ṭha em mai. "Mu hmiah rawh aw. Ṭha takin awm rawh." Victora chuan a ti a. Masangi chu a chhuk a, a pai deuh at at mai. Victora ṭhutna lamah chuan a rawn dak a, "Vic, ka lawm e aw, ka tan i awm reng ṭhin a. Engtikah emaw hun remchang chu insiam hram la aw. Kan pahnih chauhin.." tih pahin Vica biangah a rawn chuk zauh a, Ka lo melh nghek ringawt. Min rawn buk khum zauh a, an in lam a pan ta a. Tlanchhuak ta mai lo chuan, "I thinrim em?" A ti sup a. 

Hmalam melhin, "Rim lo, mahse, huangtau suh se." Ka ti nghat a. 

Chutihlai tak chuan call ka dawng a, ka la nghal vat. Peka a lo nia, Masangi'n ka pasal bianga a fawh vanga runluih nan, "Peka, in chhuah veleh zanriah la ei dun ang aw" ka ti ve ta ngat a, a naupangchhia viau naa khatia ṭawng kha ka duh tlat. 

"Lutuk, ka duhthusam alawm" Peka lah chuan a rawn ti. 

Victora'n ka phone chu a phihthla nghal a, rum eltianga min melhin, "Ka ta chauh i ni. Hruaipui.." a ti hriam hraih a. 

"Ka ta i ni ve em?" Ka ti ve leh sak a. 

"Ka nih loh chuan ka hming hi Victora a ni lovang. Bawihteii hmingin mipa dang i be tawh lo ang tih min tiam rawh" a ti khur dat a. 

Hmalam melhin, "I chet dan ang zelin ka che ve ang. Hrereng ang che." Ka ti sap a. Steering a chum chawrh a, ka phu chiang kher mai..mitmeng sen rûma min rawn melhin, "Peka number kha delete nghal rawh" a ti tuar a. 

"Aih" ka ti ve tlat. 

"Hruaii.." a ti ṭhawt a. Ka phone ka hum nghet kher mai.