Amah leh kei 3

AMAH LEH KEI (S2)

Chapter - 3

Ziaktu : Toni

Daisy chu a ngawih vang vang hnuah,thawk la hawkin, "I ngaih ang kha engmah a thleng lo. Victora nen kan inkarah engmah a awm lo." A ti ta a. Ka awm a nawm phah reng reng lo. 

"Ngaihdan engmah ka nei sa hleinem,. In inngaizawng pawh ka ti lo. Engvanga in chunga inhmuhpuia sawm ṭhin nge i nih ka hre duh mai a ni." Fiah zet hian ka ti a. 

A nui lui nghat a, mahse, a mitmengah nuam tih chiah lohna ka hmu thei tlat. "Ka sawm pawh a ni lo, eng emaw sawipui ka duh mai chauh a ni. " A ti sap a. 

"A rûk arâla inhmu kher lo va sawi dan a awm lo em ni?" Ka ti ve leh ngat. 

"I pasal hi i hrechiang em!" A ti ta daih a! Mak ka ti deuh, "Hrechiang viau lo ila chuan, ka chhuahsan tawh maithei.." ka'n ti ve leh hram a. "I hrechiang tawk lo a nih dawn chu. Zaninah khan tu nge a hmuh i zawt lo em ni? Hun nuam tak kan va hmang ka tih chuan awih harsa i ti awm si a, thil tam tak a thleng ti ila a funkim ber ang chu.." min chaldelh tum fê hian a ti a. Ka chak lohna ka hmuhtir vaih chuan min hnuaichhiah a hreh dawn lo tih ka hriat ve miau avangin, cho zet hian, "Ni e, tibuai tawh lo tur chein thu a pe che a ni lo'm ni kha?" Ka ti ve ngat a, ka risk a ni tih a hriat loh nan a mitah ka melh lui hram hram, ka chhungrilah erawh zahna, tlawm intihna leh nuam lo tihnain min luahkhat mup mup thung. Chutia ka han tih deuh hrep takah chuan a zuai leh deuh niin a lang. Mahse, a ze diktak a rawn lang dawn chauh a lo ni zawk a, ngui hmel zeta min melhin, "Tibuai tawh lo tura min intiamtirtu hian chhan ṭha tak a nei a tin ni.." a ti ve ta khauh mai le. Ka dang titih a, mahse, tlawm ka tum lo bur..

"A chhan chu min hmangaih tlat a ni. A dik em?" Za vak lo va nui chung hian ka ti a. 

"Engpawhnise, Victora i ni lo va, nang hi ka biak reng nachhan tur che ka hre lo tlat, inpa chu lo hrilh la, naktuk dar 2-ah a hmun ngaiah ka lo awm ang tih hi.." min tihkhum ta sak sak mai. Ka chhungrilah hian nâ tih piahlamin kha a ṭawngkam khan hna a thawk ṭha a ni. Ka nâ ti hmel a hmuh loh nan thlang lam ka hawi vang vang a, kal mai tuma a inher lai chuan, "Intibuai duh tawh suh, ani bak pasal neih ka tum lo. " Ka ti ban chhalh a. Ka aw erawh ka rin ai takin a fiahfai. "Kan hria ang chu" ti zui nghatin min kalsan ta a. Thawk ka la ve thei chauh, ka âwm ka dawm a, min hnawh up up mai si, Engtin nge a nih theih? Keimaha hriatna eng emaw awm ṭhin, thikthu chhiat thuhla vang mai mai ni lova ka lo rinhlelhna te kha a lo dik tak tak a maw? Engtin nge a nih theih..chhuk mai nachang pawh hre lovin in chung zawlah chuan ka ding ta ngat ngat a, chet lak dan tur ka hre lo va, ngaihtuah dan pawh ka hre hek lo. Victora be ta ila engti kawng zawng mahin a inpuan ka ring si lo. Kan ṭhianpa Tka sawi ka la hriatreng chu, "Mak ve deuh mai chu, mipa te hian nupui kan neiha fa pakhatna an neih zawh hnu lawkah hian han lerh zuai kan châk ṭhin. Nupui thlak duh lam ni loin vawikhat na reng reng han leukuala pawisak neih loh hi kan thlahlel ve ṭhin. A rei a, kan sim ve mai zel.." a tih kha. Chu chu tunah hian a takin ka hmachhawn tihna em ni ang? Ka phu reng em ni? Awih harsa ti si, awih lo thei lo dinhmuna ding siin ka awm a ni ber e. Fa pakhat kan nei dek dek a, hun thim ka hmachhawn chu a ni ta reng mai. 

Zinga ka harh chuan ka pasal chu a lo la mu a, Bawihteii a tal et et reng a, a pang ka han deh chuan nizan lam ai chuan a dai ta deuh, mahse, damdawi ka pe ta tho a, naktukah vaccine lak a la ngai dawn zui a! Ka huphurhpui mang e. Hnutê ka pe a, a hne ve duh ta deuh e. Ka pua a, in hnuaiah ka chhuk ta a. Ka nu a lo tho harh peih hlauh mai a, min lo lakchhawk ta vat. Ka han intihfai hnuah Sangi nen rawng kan bawl zui a, "U Mali chu a rawn haw leh i ring em?" Sangi chuan a ti sep sep a. 

"Ka hre lo le, a thinrim hmel riau mai a..a lo haw leh duh ang e maw.." ka ti ve mai a, ka ngaihven tehchiam lo. Ka peih lo. 

"Awii, tunlai chu ka period dawn vang nge mi ei loh ka nei reng a, hrehawm ka ti, U Daisy te hi ka ngei tlat.." a ti leh tân tân a, a rilrua awm apiang sawi pawp pawp mi a ni a, a rilru a thianghlim tih a lang. 

"Nge i ngei ve ringawt, a fel êm hi." Ka ti khawmawi a. 

"Aih, hei maw chaw eina vela a ṭawng ve chânga mipa a melh kual zuk zuk zel hi ka ngaithei lo, a lerh ka ti mai." A la ti zui! Kan han nui leh rih a. "A chhe lo va, bialpa ṭha deuh a nei ngei ngei ang."ka ti ṭha ve mai a, midang bulah kan nupa inkar ka sawi thei si lo a ni. Engtikah emaw chuan a la lang chhuak mahna le. Vica pawh a rawn chhukthla ve chhut chhut a, chokaah rawn dakin, "Tuilum" a rawn ti teh ngawt a! Sangi zawkin tui chhuanso sa chu thlitsakin a va pe a. "Khaw nge Hniangi?" Tih pahin a hawikual a, "An leng." Tih chauhin ka chhang. Ka be châk em em hran lo tlat. Tui chu a in a, "A khawsik a zia tawh mi?" Tiin min rawn melh leh zauh a, "Aw" ka ti leh hmuk. Ka chhan dan aṭang chuan ka lungawi lo tih a hrethiam vek tawh ang. Mahse, eng thil mah min zawt lo a, min ngaihven ang pawn a awm hek lo, chu chuan mi run kher mai. Mahse, ka intipachang lui ve tlat a, ngaihsak lo awm deuhin thildang ka tihsan ve hmiah hmiah. Tukṭhuan kan ei a, ka pa bawkin Mama chu Mali ko turin a ti leh a, ka nuin a lo khak hlak, "Aw..puitling an ni tawh a, an duhthlanna vek alawm, a pasal berin koh a duh rih loh chuan nawrluih tlat chi pawh a ni hleinem. " A lo ti ve hlar a. Ka pa pawh a ngawi ta dûk mai. Mama pawn engvakmah a sawi lo. Kan cool tlang a ni ber ang chu, Daisy pawn ka mitah a en ngam miah lo va, Vica lahin ngawi rengin chaw a bar mawlh mawlh bawk. Ka ei tlem khawp mai keipawh. Bawihteii pawmin in chungah ka chho a, an chaw eina vel pawh ka sengfelpui peih lo. Bawihteii chu damdawi ka pe a, a kha deuh nge ni a ṭap ngâk ngâk a, hnute ka han pe leh rih, Pathian zarah ka vannei a, hnute tui ka ngah hlauh a, a han ṭan tak tak phei chuan ka khua a tisik lek lek hial zel. Hnute ka pek lai chuan ka pasal pawh a rawn lut ve a, a insiam zui mawlh mawlh. Ṭha taka sawipui chu ka duh, mahse, keimahah induhtawkna la chambâng chuan min tihtir thei tlat lo. Amah lah biak huphurhawm khawpin a tûm lian si a, engvanga tûm ve vûau nge maw a nih ni, keimah zawk hi thinrim tur chu ka ni asin le. A chhuak tur chuan Bawihteii a rawn chukz zauh a, kei chu melh pawh min melh lo. Ka thinin a tuar ta lo va, "Hun nuam tak va hmang ang che u. Mahse, condom pai ang che. " Ka ti ta ngat a. Kawngka bulah a ding chawt, muangchangin a rawn hawilet a, "Ka mamawh lo ve." A ti ram hmuk. A kal zui nghal. Namên lovin ka thin a rim a, ka sa hulh hulh thei, chutiang taka min namnul ta chuan min ti â mai dawnin ka hria, a hma zawngin dawhthei takin min dawm a, zaidam takin min hrilhfiah ṭhin kha a ni a, tun ataka induhtawk leh ngeng taka min han hmachhawn chuan ka nun a tihrehawm zual ta a ni ber mai. 

Bawihteii ka bual sawk sawk a, ka inbual chhungin Sangi kutah ka dah a, lenchhuah ve ka rilruk a ni. Ateii ka be sa tawh a, ka tlawh khât ve bawk nen, ani lah zahthlak deuhin an fatir pian aṭanga thla 5naah a rai leh nghal a! An buai ve riau a, kan intlawhpawh mang lo. Ruata nauin nupui a neih ve tak avangin Ruata te in bul lawka a pute in hnuaiah in hrang an chang ve tawh a, Ruata te nau, thingtlang lam mi tleirawl an awmpui hlauh zawk a, Ateii tan tak pawh a zangkhai phah viau. In hnuaia ka chhuk chuan ka nuin ka kalna tur min lo zawt chat a, "Ateii te inah ka va leng ve lawk ang e, kan inhmu khât lutuk a." Ka ti a, "Ni e, lênglâm ve rawh, i tawm tlawk tlawk a, a ṭha lo. Vica kha ka thawn theihnghilh daih a, hemi damdawi hi min rawn lei hawnsak nghal teh aw." Tiin doctor lehkha leh pawisa min pe a, a damdawi hi damdawi dawr nazawngah a awm ṭhin lo va, zawn ve deuh a ngai maithei. Taxi biak lâwk ka nei lo va, kan in chhak waiting shed-ah chuan ka châng a,. Kan kawmthlang nula senior U Zâmi pawh a chhuak ve dawn a niang, a lo ṭhu ve khar a. Min hmuh rual chuan nelawm takin, "Awii, Thanthani chu a va mutui ve a, a lo lian tawh roh hle mai..hmuh loh karin" a ti luam a. "Nia, hei tunlai chu tlang hrilêng a man ve deuh nge a khua a rawn sik leh thut zel a..tunah tak chuan a zia" ka lo ti ve a. Taxi a rawn lang har ta zêk sia, kan titi ta mai mai. Ka bengverh zawng tak thil pakhat a rawn phuhchhuak ta hlawl mai a, "Awii Enteh, sawi nuam chu a ni miah lo va, mahse, Maliani nurse hi an sawidan vel i hre tawh em?" Zawi angreng tak hian a ti a, a hawikual pah bawk. "Engti kawng zawngin maw? Ka hre ve lo mawni le." A ngaihna hriat loh hmel deuh hian ka lo ti a. Ka sawi ang nge sawi lovang tih ngaihtuah niawm taka a ngawih vang vang hnuah, "Aa..ih, englo, ka naute ho sawi ka hriat a nia. An venga a ṭhiante leh ka nau bialpa te hi an inkawm ve ṭhin a, chungho bulah chuan, 'Victora emaw U Mama emaw saw ka bitum chat ang. Ka hlawhtlin vaih chuan mi hausa mo ka ni nghal dawn tihna a nia, nurse hna pawh ka bansan vang vang ang" a ti an tia, a uang te pawh a ni thei tho, mahse, nula pangngaiin khatiang han sawi kha a inhmeh tehchiam lo tih thilthuah ka sawi ve mai mai a nih chu, lak thutak chi pawh a nih ka ring lo. " Nuam lo tih hmel deuh hian a ti ta a. Min deng na lutuk tawh lo zawk, nizan lama a mizia leh ṭawng duhdan aṭang khan thil thleng thei âwm chu ka manthiam ruak tawh a ni. "A nih chu mawle, a fiamthu mai mai a niang, fiamthu hi a duh ve a..a fel lutuk." Ka ti thei hram, U Zami ka rin loh vang lam ni loin kan nupa leh chhungkaw thuhla hi pawnlam mi ten an hriat vak ṭul ka tih loh vang a ni. Chuvang a nia Daisy pawh ka khuhmawi hram hram ni. U zami pawh chuan, "Nia, amah hi chu a fel hmel reuh ka tia, a mawngte hi a zân hmel sia. " A ti ve leh diam tho. Remchang takin taxi ruak a rawn tlan ta bawk a, U Zami nen chuan kan chuang ta vat a, min chhuksan hnuah Ateii te veng lam pan chuan kan tlan leh ta vang vang a. Ka thlen chuan ani pawh a lo ṭhu thlandai hman chiah a lo nia, an nau kha puanṭhui zir lai a nih ve avangin chhun lamah chuan Ateii hi a âwmawl thei chuang lo, hnawk leh bâl ngaithei lo chi a lo ni bawk sia, an in hi chu a fai hliau reng mai chu a nih hi a. Ruata erawh a lo awm lo va, an nautê pawh Ruata nu ten an lo la phei daih a, an naute thênbâwmah Bawihteii chu ka muttir ve a, duhtawkin kan titi thei ta. Sawi tur a lo ngah zet mai. An chhungkaw inrêlbâwlna vel, Ruata nu aia a pa zawk hrawn hrehawm a tih thute chu a sawi ve malh malh a. 

"Mak ka ti ṭhin alawm, Ruata hi a fa a ni ve lo mawni aw tih changte ka nei ṭhin mawle,.tunlaiah pasalte pa te chu mo thlavâng hauhtu ber, mote pawn an nela an zah ruk em em an ni ṭhin a nia. Kan inneih tirh aṭang khan ṭawngkam mei nei deuh deuha ṭawng a ching tawh. Ruata nau Kimtea hi a duat hlur a, Ruata hi a hrang bik, ka sawithiam lo. Kimte'n nupui a rawn ruk tukah khan indan chungchang a sawi nghal hmiah thei mawle.." a ti mawlh mawlh a. "Nia, keipawn ka nel thei lo ka tih ṭhin kha, a nu hi chu a fel, keipawn ka ngaina." Ka lo ti ve a. 

"Kimtea nupui saw an awm thei bawk a, ka pa chuan a duat tawp, mahse, ka awt lo nasa, hetia in hrang chan hi ka duh daih zawk, kan lal ber ve tawh ta maw.." tiin a nui leh har har a. A dul pawh a lian ve deuh tawh a, mahse, amah hi mi inzo mi a ni bawk a, a tihbuai phah vak loh hmel. "Leng ve reng rawh aw, chaw ei nghal la.." a han ti leh hluai a. "Chaw chu ei lo vang, a buaithlak." Ka lo ti vat. Kan pa nen kan inkar buai vel kha hrilh vek ka tum kha a nia, mahse, "Nang zawng i vannei, kan rin loh deuhin Vica lah nupuite duat chi, fate hmangaih hluam chi a lo ni bawk sia, a nuam bik ngawt ang." A tih avangin Vicaa leh a û nurse rawihlai an lo inhnimhnai tih han sawi leh chu nuam ka tih loh avangin ka zêp leh ta zawk a, a kal thui zel a nih leh ka la hrilh mai a niang chu. Thingpui kan in laiin Bawihteii a rawn harh a, amah Ateii zawk chuan a va la vat, A hmuh khât vang nge Bawihteii lah chu a ṭap tuar tuar a, ka chhuhsak ta vat. Ruata a rawn haw ve chiah bawk a, min hmuh chuan a hlim ve hle. "Chaw ei ang che u, Ate, bawngsa kha kan siam dawn nia, Pipi te nufa rawn len ve chhunah chaw ei lo chuan an haw tur a ni lo." A ti bur mai a, hnial a sâwt mang si lo, ka um e kual ta mai mai a. Bakah Vica vangin ina haw vat ka phur lo ve deuh bawk nen,. Sangi ka call a, chaw ka ei chhuah tur thu ka hrilh ta a. Chaw eikhamah Ruata'n min va thlah mai aniang chu. Anni pawh 2nd hand car an la ve a, anmahni tawkah an khawsa ve thei phian, Ateii hi khawsak thiam, sum renchem thiam tak a ni bawk nen. Kan nulat laite sawiin kan ex tih luklak te kan sawi kai a, kan nui tlâwrh tlâwrh mai, keipawh ka leng lovang tih ka hlau, ka nui ka nui mai si a. Victora erawh a la reh tluang zel, nidangah chuan a hun awl hlekah min lo text-in, "Khaw maw selfie teh" rawn tihte a ching a, a pic te a rawn thawn thul. Vawiin erawh a eng pawi nge ka sawi a min han ngawihsan tlat ni, a che hmasatu ka ni dawn lo bur si a, kan luhlul dun viau chuan kan inkar a chhe thui hle maithei a ni. Ruata'n a fapa a va la a, Bawihteii nen chhuatah toys hrang hrang nen kan dah dun a, Bawihteii pawh a tlei ta phian mai. Ateii rawng ka bawlpui a, an nula Mapuii tia an koh pawh chu a rawn haw ve a, a fel hmel thar thar khawp mai, a rawn che nghal mawp mawp a, kei nen pawh kan inkawm thei nghal fû. Haw leh tur ka nih avangin a hma lama ei kan tum a ni. 

Dar 5 a la ri lo deuh ang tihin call ka dawng ta a, Victora a ni. Ka la lo ṭêp a, mahse, êmah ka ti ve deuh a, ka la ta hram. "Chu chen chen i awm a?" A rawn ti hmuk a. 

"Chaw ka ei dawn tih an sawi lo mi?" Ka ti a, ka aw a pangngai viau. 

"Chaw ei chhuah kha eng nge a tulna? I pasal tel lo lehnghalin." A ti leh nghut a. 

"Ei ka tum em em pawh a ni lo, ka len phei takah chuan min lo ngai ve sia, min sawm nasa bawk nen.." ka ti ve leh mai a, Ateii te nupa an awm avangin inhnial buai ka duh lo a ni. 

"A nih tak chu, keipawh ka ei chhuak ang. Bye" tih leh dah a rual nghal. Ateii'n, "Eng nge a rawn sawi a?" A ti hâ a. "Aa, bawihteii khawsik leh sik loh min rawn zawt a nih kha, a fanu hi a ngaihtuah ve sia maw.." ka ti liam puat a, ka chhungril erawh a rawn kher leh ngut ngut tawh. Inthunun reng ngaihna hmuna awm hi a nuam miah lo. Ateii te bulah kan chungchang han sawi leh chi a ni tawh mang si lo va. Tichuan, zanriah chu kan ei ta phawt a, ka rin ai tak chuan ka ei tam, nau ka neih hnu hian ka dul a kiar ve ta deuh a, ka thau hlek bawk. Indiet ka tum apiangin Vica'n a phal lo bur zel sia, ka pian chu tunlai tak chuan a ṭhing ṭha ve reng mai. Nu kan ni ve tawh miau alawm le. Mapuii vekin chaw eikham chuan a tifel a, ka chet ve a phal tlat lo. Ka va inthiar zuai a, ka inthiar lai laiin Bawihteii a lo ṭap, hmanhmawh zetin ka insil sawk sawk a, ka va chhuak a. Ateii'n a lo pawm a, a pang a lo dek mêk, "Duati, a pang hi a va sa ve. " Mangan hmel deuh hian a ti a. Ka va pawm ve vat, a pang chu a lo sa vur mai a, nachhawkna lah ka lo keng mai si lo, Ateii chuan a han dap rawk rawk a, a ei thin aia sang hlek kan pe ta a. A ṭap tawh lo va, mahse, a thaw chu a rang riauin ka hria, a thinhnûn te chu a khuar dâwk dâwk mai a, Ateii chuan a rawn pawm ve sasawi a, "A kaih niin ka va hre êm, Ruat, motor han start vat rawh, chhohpui ang u" a ti ta chul a. Kei erawh ka mang vek. Ka chiâi lutuk chuan engtih zai mah ka rel thei lo a ni ber e. Ruata pawh a rang arangin a tlanchhuak a, Ateii chuan, "Mapui, Bawiha hi lo awmpui mai rawh aw, a pite inah i duh leh lo lenpui mai la..ka han kalpui ve ang e." A ti sawk sawk a, "kal ang" tiin min rawn melh nghal, ka zui ve chawt a, ka bag ka la theihnghilh zui, Mapuii a bengvar hlauh a, motora kan chuan tawh hnuah min rawn pe. Ateii'n Bawihteii chu a pawm a, ka fanu chungah hetiang a thlen ngai loh avangin kei chuan han tih vak dan ka hre lo, ka chhungte hrilh nachang pawh ka hre hek lo. Nu nih ka va tling lo rua êm..Ateii zawk chuan Vica a call a, "Vic, Hei Thanthani hi a khua a sik leh a, a kaih bawk niin ka hria a, damdawi in kan pan mek a, i lo kal ve mai dawn mi? Pipi lah a chiâi vek bawk sia" a tih lâng lângte chu ka hre ve vek, chetzai ka rel thei chuang lo. Vica chuan engtin tak chhang ang maw. Ruata a tlan chak bawk a, kar lovah damdawi in pawh chu kan thleng a. Keipawh ziaawm lam ka pan ta bawk a, ka fanu chu ka pawm ve thei ta, a muhil ni maiin ka hria. Ateii leh Ruata te vekin tihfel ngai chu an tifel a, Doctor a la awm remchan loh avangin casualty-ah min dah phawt a, Nurse ten an rawn buaipui nghal zung zung. Doctor rawn kal hmain Victora pawh a rawn thleng a, ka nu leh Sangi te an rawn tel ve bawk. Tlem chuan ka thla a muang ta deuh e. A fanu kut te taktê chu a chelh a, "Ka hniangpui, i dam leh vat dawn aw.." a ti duam duam a. Ka nuin Ateii te nupa hnenah lawmthu a lo sawi ve mawlh mawlh bawk. Doctor a rawn kal a, Bawihteii chu a han en vel a, "Enkawl ve deuh a ngai dawn a nih hi,. Tun hmain a kaih tawh ṭhin em?" A ti a. Ka lu ka lo thing nar nar, a kaih ngai tlat lo alawm. Tichuan, min admit ta rup mai le. Ka nuin, "Naupang ward chu a bengchhen bakah hrilêng inkai theih a mual a tam ṭhin, cabin a la awm chuan book mai rawh u" a tih avangin Vica leh Ruata te chuan an va be chhin a, vanneih asiamin niminah pakhat chu an lo chhuahsan hlauh mai a, chu chu kan luah zui ve nghal dawn a ni. Ateii te pawn min la ṭawiawm ve zel a, Vica chuan ka nute thlah haw pahin mamawh a rawn keng dawn a, an haw chhung chu anni nupa chuan min awmpui a, "Awii, in awm lovang tih ka hlau êm mai" ka ti ve luam a, "I ho set sut, kan laka i tih ve tur tho a nih kha. " Ateii chuan a ti a. Ani nen hi chuan laizawn ang mai kan ni rêng bawk a. Vica pawh a rei hran lo, mamawh zualpui a rawn keng a, zanin chu kan nupain kan riak dawn a nih hmel. Bawihteii pawh an jection vang nge a mu chiah chiah mai a, a kaih leh ta rih lo chu ka lawm hle. Kan insingsak zawh fel vek hnuah Ateii te nupa pawh chuan min hawnsan ve ta a, chanchin kan inhrilh zel ang chu. 

Victora chu a ngawi hmuk reng a, ka laka lungawi lo sa a ni bawk nen, kei lahin be tang e ka ti chuang hlei lo va. Mutna chu ka siam ṭha a, Bawihteii bulah kei ka mu ang a, ani thutthleng seiah a mu thung dawn a ni. Beer cane 2 hi a rawn phawrh a, pakhat chu hawngin a in nghal. Pakhat chu a rawn theh phei a, "Nizan ang khan in leh pup pup rawh" a ti hmuk a, kei lahin rilru tihthawven nan tiin ka lo hawng nghal khap a, no-a thlit chhuah loh chuan ka in thiam si lo, no ka va la leh tê tê a, ka thli chhuak ta her her a. Ka thawkkhat vei piap,. Min en reng tih hre mah ila engah mah ka ngai lo lui tlat. A insum zo ta thlawt lo nge ni, "Daisy leh nangmaha duhthlang tur angah min ngai tiraw?" A ti ta a. 

"I thlan tawh kha.." ka beer in a thawk ṭan nge pawh ka hre lo e a. 

"Tu nge ka thlan a?" Elsen rawngkai lek lek hian a ti a. 

"Daisy ngat le..nula nge nge chu an lo nei tight deuh a niang." Nui hak hak chung hian ka ti ve leh ngat. 

"I hre lo tawp a nih chu" a ti duh lek a. 

"Hriat pawh ka duh hran hleinem, nupui pahnih neih chu a nuam em?" Ka ti leh a. Beer chu ka thli leh nghal zat bawk. "Nizana in inhmuh te kha ka hre lo emaw i ti em ni?" A ti ta daih a. 

"I hria a, chuvang em ni i tûm bûr reng a? I bialnu ka han hmu ve chu pawi i va ti awm ve." Ka lo ti zat zat a, ka rin aiin ka ṭawng thei. "Ka bialnu nise chuan nang hian min chhuahsan tawh ang, a ni em? Ka bialnu a ni lo tih i hriat avangin i la awm.." a ti charh charh a, ka ner vak ringawt. A sawi dik ve deuh tho, Daisy nen inlaichinna thuk tak nei tak tak nise kei hi a bulah ka muin ka eiin ka in lo tawp ang, ka hriat rual rualin ka haw ang a, inṭhen ka duh nghal rum rum ang. Tunah hian eng nge ka beisei ber erawh ka hre lo, amah Victora ngei hian sawifiah se ka duh a ni mahna. 

"Min ngam salh salh khawp mai, i bialnu chuan.." ka ti leh ṭâlh a. A khi suk, "Nupui i nia, ani aia huaisar tur zawk si, ti nge i khup zûl a.." a ti ve leh ngat. 

"Spare part ka ni lo ṭêp, bawihteii dam se kan inṭhen ang." Ka'n ti leh tâwng a! Beer vang vek, ka ngaih a sam ta lutuk chu.

"Nupui nei chungin ngaihzawng nei duh ni ila chuan Daisy te ang lo deuh ka ngaizawng ang. Tikhan a chiang em?" A ti nghut nghut a. 

"Chiang lo, nizana kan inbiak danah kha chuan ka hriat lohin thil tam tak in lo sawi dun ṭhin a, hmuh pawh in lo inhmu ngei tih a chiang. Ti nge i zêp si a? Thil dik lo in ti a nih si loh chuan engvangin nge i zêp?" Ka awki pawh a sang ta mah mah. Bawihteii a harh ka hlau leh si, ka zuk thlêk vut a, a lo la mutui viau. 

Victora chu hahdam hmel zetin a ṭhu a, min thlêk vang vang hnuah muangchang hian, "Hmeichhe nasa tak a ni tih ka lo hre har a, chuvanga i laka thup nei ka ni. Dâwt a sawi hreh lo va, pawisak a nei hek lo. Nizanah khan kan inhmu ngei alawm. In ina kan awm lai khan min rawn bia a, kan chhungkaw mualpho theihna tur thil a kawl niin a insawi a, ka va hmu lo a nih chuan pawisak a neih loh tur thu a sawi a, va hmuh ngei kha ṭul ka ti ta a nih kha. Ni e, thil zahthlak tak a ni, ka va thlen khan thil thlen dan ka hre chiah. Lawmkima lepelerh lutuk vangin kan nupa inkar thlengin nghawng a siam a, Mali'n Daisy a lo thîk ṭhin kha a tidik chiah alawm. Lawmkima nena an inkuah lai, an infawp lai, ruak veka an thlalak te a lo kawl dul mai a! Chungte chu Mali thawnah min vau ta daih a ni. Amah Mama blackmail si loin kei zawk min bitum a, a chhan chu Mama'n a ngaihsak ṭha leh tawh si lo va, kei min zarbuai leh ta zawk a ni. Nizanah khan a thiam thil chhetê te hmangin ka rilru hneh a tum ve khanglang a, kei min neih theih loh pawn Mama tal a neih theih nana keiin amah pui tur ten min vau vel a. Ka ning lutuk a, "I tih tihin ti rawh, i mualpho zawk dawn. Kan in saw a rang thei ang berin chhuahsan bawk ang che." Ka ti a, ka rawn hawnsan. Mahse, Rinchhana te inah ka rawn peng kawi a, kan titi tui leh ta nen, ka rawn haw chuan beer rim nam ham ham chungin i lo muhil der vel a nih kha. Beer i in kha ka sawisel lo, mahse, ṭul lova i rilru i lo tihah vak kha hrehawm ka tia. Ka muhil emaw tiin Daisy i va bia a, in han inhmu a, Daisy thluak ka hriatsa vek avangin zaidam taka thlem daih chi i ni rih dawn lo tih ka hria a, thinrim zawk niawm takin ka awmkhum che a nih kha. Daisy pawh chiang takin tlaiah khan ka hrilh nawn leh, hetiang thil ṭenghneng deuh deuh a ti leh dawn a nih chuan ka nu leh pate hrilhah ka vau a, Mama pawh zarbuai tawh lo turin ka hrilh bawk. I la awih loh fô chuan kha amah Daisy i be thei ang. A sawi ṭha duh tawh viau ang. " A ti ta charh charh a. Ka chil ka lem khawlh. Mak tak maiin Victora sawi zawng zawng chu ka awih vek, rinhlelhna chhetê mah ka nei lo. Ni e, min phatsan kha thinlung takin ka ring phal lo tlat a ni. 

"Ka ring che lawm. Mahse, in inbiakna i delete kher zel khan min tina" ka ti hram a. 

"Nia, kha chu keipawh ka tihsual a ni. Keimah hian ka reply ngai mang lo, i lo hmuh ve chuan i rilru a kawi palh ang a, i thikthu a chhe ve bawk nen, buaina a chhuah hluai ka hlau a, hmeichhe dangte anga zahpuiawm taka i khawsak ve ka hlau a ni ber..nizana i han hmu kher pawh khan min tilungawi lo deuh, tlawm tak anga i lan ka duh lo. " A ti a. Ka hmin leh ta zân mai. Daisy chu hmeichhe mak tak niin ka hria, a inthup thiam lutuk mawlh chu a ni. Mama reng reng pawh chuan engvanga lo kawp ve zuai nge maw a nih ang le? Mali kha kan lo dem ringawt a, thîk âwm tak a lo thîk tih a chiang reng. U Zami sawi, "Mi Hausa mo ka ni mai dawn a. " Tia Daisy lo uang kualte pawh kha a fiamthu satliah mai a ni lo tih a chiang reng mai. Daisy te khawsak dinhmun hi ka chiang chiah lo va, Maliani sawi dan kha chuan a nu leh pate hi an inṭhen a, a nu hova khawsa niin a nu hian vawksa rêp a zuar ve a, amah Daisy hi tihian private nurse a ni mai a, a naute pahnih lehkhazir an la chawm ve bawk nen, an khawsak a chuti teh lua bik lo a ni mahna, mi hausa mo nih a châk danah. Lehlam kawng zawng tak chuan a khawngaihthlak. 

Zan a rei dawn ṭan a, keini pawh kan mutna turah kan mu a, kan inhrethiam tawn ta bawk a, kei pawh rilru thawl takin ka muhil ve thei ta deuh, mahse, kil khatah Bawihteii a châm ve reng a, a natna hrechhuak vat se la, inenkawl dam vat ila ka duh khawp mai. Bawihteii ngik faih faihin min tiharh a, ka ṭhu chhuak nghal vat. A lo tal euh euh a, a meng mang lo. A pang erawh a dai diak a, ngaih a ngam deuh, hnute a chak a niang tiin ka han pe dawn a, a hne duh si lo, a hnu lawkah a rawn ṭap chhuak ta a. A pa pawh a rawn harh ve zat, Ka pawm a, ka han awi dârh dârh naa a ṭap bang duh tlat lo, hnute a hne duh bawk si lo. A ṭap uar telh telh bawk si, Vica chu nurse ko turin a chhuak vut a, a rawn let leh rang viau. Nurse pakhat a rawn lut a, Bawihteii chu a han en kual a, zing dar 4 a pel tawh. "Nachhawkna hian jection leh phawt mai ang. Naktukah thisen te kan la ang a,tunah chuan chiu phawt mai ang." Tiin damdawi a siam zui mawlh mawlh a. A khelah a chiu ta a, a ṭap nasa ngang mai, Vica zawkin a pawm a, a khawngaih hmel ngei mai. Kei pawn ka khawngaih tho, "Tikhan a muhil mai ang. " Nurse chuan a ti a, min chhuahsan zui daih. Kan nupa chuan kan inawih chhawk a, leilung a rawn lan hnuah a muhil ta chauh a, "Va muhil leh rawh. I chau viau ang." Ka ti a. "Muhil zawk rawh. Kei chu dawra kal ka ngai a, mut lehna hun a awm tawh chuang lo." A ti ve tlat, zep nak emaw ka mut a la chhuak bawk si, ka muhil leh ta a. Vica pawh kha a chhing ve leh sek thoin ka hria..Sangi leh ka pa ten chaw min rawn kensak a, Vica erawh an rualin a haw a, Vawiinah a dawr bungrua a rawn thleng dawn sia, a kal ngei ngei a ngai tlat. Sangi'n min awmpui a tum naa in lama an buai ka hlauh avangin ka haw luihtir tlat, han buaina tur em em ka la nei lo bawk nen. Bawihteii chu a thisen te lain test theih ang angte kan han test ta a, nachhawkna kha a hneh lo deuh nge ni a chau riau mai a, a meng lep lep chauh tawh. Thisen chaw an khai ta a, hnute a hne duh tlat lo hi ka buai riau, ka hnute lah a ṭang nasa thin si. Vica pawn vawi 4 dawn min lo call, a fanu hi chu a ngaihtuah ve thlawt a ni. Chawhnuah ka inthlakna tur leh mamawh eng ilo rawn dah pahin Maliani leh Daisy te an rawn lang ve hlawl mai. Bawihteii erawh a muthilh lai a ni a, an eitur rawn kente chu kan ei a, Daisy pawh ka be chhe hran lo,. Engmah thleng lo niawm takin ka awm ve mai. Ani lah inthup thiam a ni bawk a, a ze ngaitê ang khan a titi leh siam siam a, Maliani nen a titi kan ngaithla a ni ringawt e. An haw hma deuh siin Victora pawh a rawn lang ta a, Daisy awm ve avang chuan han danglamna leh han rinhlelh tur angin a awm eih lo, "Ka va inbual ang a, chaw rawn kengin ka rawn kal leh mai ang, kan awm lai hian nang pawh va inbual rawh, Bawihteii kalsan kha a ṭha lo." A ti a. Thuawih tak chuan ka va inbual ve mai bawk a. Ka inthlak zawh fel vek hnuah anni pawh an haw ta a. Keima nu te pawh rawn kal an duh viau naa kan kawmthlang lawkah chhiat tawk an awm avangin kan in a lûn angreng si a. Lo dawngsawngtu an awm a ngai bawk nen, naktuk lama rawn kal mai an tum a ni. Sawi tawh angin Nuteii khan Vica pa zarah Restaurant changtlung tak a hawng ve tawh a, amah a che peihin a taima a, eisiam a thiam bawk nen, hnathawk pawh pahnih bak a la lo. Veng hulum lai takah a hawng bawk a, an lûn ve ṭhin hle. Ka nu hian a dawr aṭanga a hmuh hi chu a dah hrantir zel a, Vica pa pawh a rul zo titih tawh a ni. An nufa hmakhua hi chu a chhe em em bik lo, Pa Zuala khan nupui neiin Champhai lamah an pem ta daih a, a chanchin kan hre zui ta lo. A ṭha daih zawk. 

Victora chaw rawn ken ka ei laiin doctorin ward a rawn fang a, Bawihteii chu khawsikpui a lo ni ve reuh a, thluakah a lut hman lo hlauh a, kan vannei ta a ni. A kaih pawh a zia ta viau a, a pum lam a lo tha vak lo bawk nen, hnutê pawh pe rih lo turin min ti a. Kan inenkawl dam vat a beiseiawm e. Zanin zet chu a khawsik a rawn sang leh deuh a, dar 9 vel aṭangin kan inawi tlaivar deuhthaw a ni ber e, Victora pawh a awl bik lo, a ṭap nasa tawh si, a aw te chu a chhang ṭiak tawh a, "Ka hniangpui, i tawrh ai han tuar thei ila aw..ka duat, ka va khawngaih che êm.." a pain a ti vawng vawng mai. Nurse te pawn min manganpui deuh a niang, an rawn lut ve sek a, an han awi ve dârh dârh ṭhin, a ṭap zo thei lo ka ti mai. Mang a va ang duh tak. Khawvar hnuah a chau tawngkhawng a niang chu a muhil thei ta mial a. Chau tak ka ni, Vica pawh a meng val pap mai. "Vawiin chu dawrah kal lo mai rawh. Mu hahdam mai rawh" ka ti a. 

"Nia, nang pawh" a ti ve mai. Keima nute zawk chanchin ka hrilh a, nilengin min rawn awmpui thei dawn a, Vica nen kan mu hahdam thei êm ang chu maw. Ka nu rawn thlen hnuah Vica chu a phei a, kan chep deuh dawn avangin. Inah a va mu hahdam dawn a ni, kei erawh khumah ka mu ngût a, nute bulah meuh chuan a lo la pangchan theih khawp mai. Ka nu lahin nu nih a tlin, Bawihteii chu a paw ngat ngat mai a ni,. Ka muhil tui bawk a, ka harh chuan dar 2 a lo ri tawh. Ka harh ṭha ta vek vawk hle. Ka va inbual a, Bawihteii pawh a rawn harh ve a, ṭah êm chu a ṭap tawh lo. A chau tih erawh a lang. Ka inthlak fel hnuah ka nu chuan, "Thil sawipui che ka duh a ni. Ṭhu teh. " A ti a. Ka ṭhu ve mai bawk. A thutak riau avang chuan ka lo ngaihṭha lo deuh,. "Englo a nia, i nuteii leh Opa te hi engtia han tih chi nge maw ni le ka ti. Opa hi tlangval fel tak a ni a, i nuteii hian a phû lo pawh ka ti, mahse, tihian a rawn atchilh ve tlat mai si a. Nimin khan mitthi ina rawn kal ka hmelhriatten eng engmaw an sawi a, Opa nu hian i nuteii hi a duh lo viau a niawm a, 'Kan ina a rawn lawi dawn ai chuan kan intuithlar hmak ang. ' ti zawngin ṭawngkam a lo nei a niawm a, kan hma ngaiin min hrilh ve chu a nia. I nuteii phei chu ka la hrilh duh lo, Opa farnute pawn an duh lohzia an lo sawi zauh zauh tawh niawm tak a ni. I nuteii lah hian a ngaina ve tulh tulh tawh niin ka hria a, mi chhungkaw va tihbuai ringawt kha kei ka thil duh loh ber pawl a nia, nang hian i tithiam ber a, sawipui dan lo zawng ve teh." A ti ta chuar chuar a. Ka rindansa deuh kha a nia, mahse, hetiangte hi chu palliam mai theihah ka ngai a, ka nu tan erawh a lo serious leh hle a nih hmel. 

"An fapain a duh phawt a hnu, eng nge maw an duh loh ve ringawt le.." ka ti nghat a. "A ni ngawt lo alawm, ka sawi fô kha, nuthlawi hi mizo society-ah chuan la ngaihhniamna hi a awm tlat a! Ṭhenkhat lo che khawlo leh pawisak nei lo te zar zoin nuthlawi pawisawilo pawn an tuar ve ta vek zel a nih hi. I nuteii phei chuan fa a lo nei ve tawh bawk nen, an kum a lo inthlau ve bawk si. Opa chhungte pawh ka dem lem lo. Chuvang chuan natna an insiam tawn tak tak hmaa an inṭhen mai hi ṭha ka ti..upat tawh lama hetiang tuar leh tur chuan a khawngaihthlak." A ti mawlh mawlh a. 

"U Opa hian a thei ve ngawt dawn mi? A duh hluam hluam em mai." Ka ti a, "I nuteii'n a hnar phawt chuan a peih rei bik lovang. Amah hian a duh ve tlat tawh a, a awm ve tho." A ti leh hmiah mai, ka nu hi chuan thil hi a ngai awlsam mah mah thin. Keini Vica nen kan inngaihzawn laite pawh khan thil harsatna kha a hrethiam ngai lo reng reng, amah hi a chak êm mai a, amah ang turah midang a ngai ṭhin hi a buaithlak. .

"A thuhrimin fate duh leh hmangaih na nâ na, nu leh paten duhpui in lo tum ve sek hi lawm nuthlawi pathlawi tamna chhan, ṭul hlei loah mi rilru in hliam a, nuthlawi an ni emaw pathlawi an ni emaw miin a hmangaih a nih chuan sawi theih kan nei lo, an tisual a nih leh anmahni bakin an tuar dawn chuang lo. Mi hmangaih leh duhte hi lo duhpuia lo hmangaihpui ve kan lo tum sek a, kan inrawlh peih thei lutuk hi a ninawm. Nuteii chu ka fuihpawrh hrep zawk dawn mawni.." ka ti ta hrep a, ka nu pawh a âng huau ringawt. A hnuah, "Chiam chiam zel a che. I ngaih ang ngawt kha a ni lo. I â ṭhin pûng pûng lutuk." A ti a. Ka ngawihsan ta daih. 

Whatsapp-a ka luh rualin number save loh atanga msg lo lut chu ka seen nghal a, "En rawh" tih hnuaiah pic download tur a lo awm a. Ka download nghal..Ka nu ṭawng ri reng reng ka hre ta lo..phone chu ka melh ta tlawk tlawk a..