Amah leh kei 2

AMAH LEH KEI (S2) 

Chapter - 2

Ziaktu : Toni Râlte

Victora phone chu a ngai ngaiin ka dah a. Ka thinrimna pawh ka thunun hram hram, Victora hian mitmei hmuh lo nise Daisy hian a vir a vir ang em? Chu mawlh chuan ka rilru a tihah a, a tina tel bawk. Mahse, hmeichhe ṭhenkhat anga nu buta chet buan buan chu ka duh lo, fim taka enthlak hna thawh ka duh rih a ni. Maliani ka lamah a ṭang bawk a, ka zâm bik lo. Mama te pawh zanriah ei dawn ṭêpah an rawn haw a, an hlim loh hmel em em lehnghal, Mali phei chu ṭap hrep hmel a pu, tuman kan lo zawt ngam bawk si lo. An intihfai zawhah zanriah pawh chu kan ei ta a, Mali pawh amah ang lo takin a ṭawng tlem kher mai, ka pa chuan, "Sunday cham tur ang khan i insawi sia, ti nge in lo va haw hma leh si ve" tiin Mama chu a zawt a. Mama chuan, "Nia, kan hna a laklawh leh thut alawm, karlehah ka zin leh a ngai ang" a lo ti mai a. An nupa inkarah buaina eng emaw tak a awm tih erawh a lang reng mai. 

Kan intihfel zawha rooma ka chhoh chuan chhuak turin a lo insiam a, "Khaw nge i kal dawn?" Ka tih chuan, "Ṭhianho inhmuhkhawm lawk kan tum a, mipa ho bik." A ti mai a. 

"Engvang chuan?" Ka ti ve ngat. A thleng ngai tlat lo a tin ni. Min rawn melh zawk a, "Inhmuhkhawm a khât êm hi, an rawn haw khawm a, kan rêl chawp chûk chûk a." A ti leh mai a, rinhlelh tur chu a awm miah lo, mahse, Daisy vangin ka âwm a nuam lo laklawh tawh tlat. 

"Nih chu mawle" ka ti nghat a, Bawihteii thawmhnaw ka la chhuak zui nghal. Ka bulah a rawn ding a, "I lungawi lo em ni? I mood hi a dik hlawl lo tunlai hi.." a ti ta nge nge a. Thawmhnaw thlang dan dan chung chuan, "Ka ṭha lawm. Ka ṭha. " Ka ti sep a. Ka bânah rawn manin min pawt ding a, "Daisy vang bawk em ni? A ni em? " Mitmeng hriam angreng tak hian a ti a. Ka hmui tipawrhin, "Ani ang thîk tur khawpin ka tê lo." Ka ti vei hmak. A khi suk a, "Good girl, khatiang ngaihdan kha ka nupui chuan a nei tur a ni. " Tiin ka hmuiah a rawn nul thuak a, "Ka lo haw har lovang, ka kal aw. Ka hmangaih che.." a ti sup a, min chhuahsan zui nghal. Kan pindan chu a ruak huai hian ka hria a, ni e, dik tak chuan ka pasal hi ka khuahkhirh hran pawh ngai lovin kan inneih aṭang khan zan lamah pawimawh a nih loh chuan a chhuak ngai mang lo. A ṭhiante pawn fiamthu hian, "In nu i ngam lo si" an ti fô, a nui liam mai zel a. Zaninah erawh an ṭhianho inhmukhawm turin min chhuahsan a, a vawikhatna a nih vang nge Daisy vang zawk ka lung a awi lo ve ringawt. Ka nu sawi ṭhin, "Kawppui te an nih vang maia a lova luata khuahkhirh leh thikthu tihchhiat te hi inṭhenna siamtu a ni ve fô a nia, hun thawl inpek thiam ve te a ngai aw" a tihte kha ka hrechhuak a, he lai pindan zimtêa ka pasal khung chawrh chawrh chu a tan pawh a hahthlakna chen a awm ve dawn tih ka hrethiam, a tlangval chhung zawnga tlangval lênglâm leh khawlai ngaina mi a lo ni ve chhap nen, chuvang chuan zanin pawh thinrimna pai rûn lova enliam ve theih ka tum ta a ni. Sangi'n Bawihteii a rawn la a, keipawh rooma tawm reng ai chuan tiin in hnuaiah ka chhuk ve ta daih a, Maliani erawh thisen var a dawng mek a, ka va lut ta lem lo. Daisy ka hmuh peih loh vang a ni pakhat ang chu. Tv te kan en ta vel mai mai a, Sangi'n Bawihteii a awi mu ta bawk nen, dar 9 a lo pel tawh bawk a, mut mai ka rilruk ta a. Mahse..

In chung atang chuan Mali hi chak mangkhêna rawn pen thla pâwk pâwkin a âng zui bawrh bawrh a. Kan lo thlir ṭhap mai. A hnungah Mama'n a rawn zui bawk a, ani erawh a ngawi reng thung. 

"Ka peih tawh lo, ka peih tawh hlawl lo. Hetiang hmeichhe pakhata lungawi thei lo tan hian ka hun ka sêng peih tawh lo. " Mali chuan a ti hlawih hlawih a, ka pa a lo ding ta vat, "Engtizia nge? In lo haw ve chauh a, hetia in awm leh tak?" Pangngai tak hian a ti a. 

"I fapa hi mi piangsual a nih hi, ka ten lutuk. Nupui nei a ni tih a inhre hlawl lo, a kalna apiangah ngaihzawng a nei a, ka peih tawh lo. " Mali chuan zâm hlek lo hian a ti a. Mama pawh rawn thleng thla vein, ka nu chuan, "Eng nge thil awmzia ? Mama" a lo ti vat a. Mama chuan Mali melh run run chungin, "A duh chuan kaltir rawh u. Keipawn ka nei peih tawh bik lo. Hmeichhia tupawh a thik a, ṭhian pawh ka nei ve thei lo, amah leh amah a intihmualpho bakah kei thlengin min timualpho a, engdang a ni lo, ka zin ka lo haw hma chhan pawh kan thawhpuinu Thiangi a thîk vang a nia. Thiangi a rawn ânkhum hrep a, ka zak lutuk..min tizak zing zozai tawh e." A ti ve ta hmuk hmuk a, a thin a tâwt hle ni turin a thaw lak reng a rang mai. Mali chuan, "Nupui neih tawh chuan hmeichhe ṭhian neih a ngai lo, Thiangi kha i duh alawm, i zinpui vel a, hotelah in thleng a, eng nge in tih ang? Ka hre vek" a ti chiam chiam a, a biang pawh a tai hlar mai. Mama chu a chek hluk a, "Thiangi chu ka thawhpui a ni, a zin ve a ngai tlat. Kan pahnih chauha zin kan ni lo tih hria la, i mawng i hlim nasa mah mah ṭhin. I leplerh anga lerh ve turah min ngai suh." A ti charh charh a. Ka pa chuan, " aa..hei in inneihna pawh rei a la ni lo, ka duh aiin in inkhik khak zing tlat. Zah pawh a zahthlak, zir tur in nei ve ve in nupa hian. Mama pawh Mali thikthu chhiatzia i hria a, incontrol hram hram a ṭha, Mali pawh a kaw nei nazawng i thik zel chuan i pasal tan khaw hawi ngaihna pawh a awm nang. Insiamṭha ve ve rawh u, a thuhrimin naute hi pai ve tawh u la, in inkar pawh hei ai hian a nghet zawk ang." A lo ti duam duam a, Mama chuan rang fê hian, "Nau neih maw? I monu hian duh hek lo, a pian tih nalh loh hi a hlau vet vet êm alawm,. " A lo ti hmak mai. Mali pawh a ṭi deuh dûk hian a lang. Mahse, tlawm zawka ṭan hreh êm em a ni bawk a, "I va zak lo tak. Ka hriselna a pan rih avangin indang rih mai ang ka ti a nih kha..fa neih hi ka duh lo a ni reng reng lo, rinngam i ni tlat lo alawm. " A ti leh hlaih hlaih a. Mama thin so phut chuan ben a tum ta uaih mai, ka pain a lo dang ta vat a. Mali erawh a la zâm eih lo, hawi valh valh chung hian, "Min beng rawh,kut min thlakte i tum khanglang elo? I va zakthei lo ve. Ka chhuak dawn. Ka chhuak dawn khawp mai." Ti leh tûn tûnin kawngka lam a pan ta fua fua a. Ka pain va dan a tum chu Mama'n a lo dang vat, "Chhuak rawh pawh ka ti lo va, a duh phawt chuan chhuak rawh se. Mali, ka rawn ko dawn lo che a nia. Hre rawh." A ti zui zat a. Mali chuan a chhang tawh lo. Kawngka a hawng a, a chhuak zui nal nal. Kan boruak teh hrep zel chu aw. He in chhungah hian Pathian a leng lo ka ti mai, khawmte chu kan inkhawm fô mai. Mahse, chhungkaw lu berte nunah Pathianin hmun a chang tlem êm mai a, keini an fate pawn an hnung kan zui a ni ber ang chu..hei hi hrehawm ka ti ṭhin, sum leh paiah chuan kan buai lem lo, ka pa hlawh bakah khawi emaw atanga a lawmman lak (anmahni sawi dan) te bakah Mama hlawh, Vica dawr te aṭang ringawta thla khata sum lut hi chhungkaw tam zawkte kum chanve lakluh a ni maithei a ni. Mahse, pawisa ngah chu hlimna ber a nih lohzia ka tem chho mawlh mawlh chu a nih hi a..rilru a rethei a, pawnlamah hlimna kan zawng a, chu chuan kua a hreuh zau zel a, kehdarh hmabak kan lo ni ta ṭhin a ni. Kan inrêlbâwlna hi thlak a niha Pathian hming lamrik ngun a nih hma loh chuan chhungkua hi kan la pengdarh sung ang tih pawh a hlauhawm a ni. 

Ka nuin, "Mama, a buaithlak a nih hi, a pawi êm mai, Mateii i lo ṭhen hi, ani tluk kha chu i hmu tawh lovang mawle." A ti chuar chuar a, U Mateii ka hmuh lohna a rei deuh tawh a, biak erawh kan inbe zeuh zeuh, a ngaihawm khawp mai. Mama pawh chu a rilru a hrehawm ve deuh em mawni, ngui zet hian, "Tuhrah seng chu hei hi a nih hi. Ka tisual a, tihsual leh hi ka duh tawh lo asin mawle.." a ti vawng vawng mai. Engtin nge an nupa an awm zel ang tih chu keini lo sawi phak pawh a awm lo va, lo thlir tawp bak tihtheih kan nei hran lo. Kei pawh Bawihteii pawmin ka chho a, Vica lah a reh vung vung si, ani hian zu te hi a lo va in leh ang tih ka hlau khawp mai. Ka hmai ka hrukhul lai takin Maliani'n min rawn call a, pindante hi thawm inhriat phak lutuk a nih loh avangin mamawh kan nei emaw pawimawh a awm chuan in au lung lung lovin kan incall mai zel. "Daisy a lo la haw si lo va, ka drip khai a zo tawh a, lo phawi lawk mai ta che" a rawn ti a. Ngaihtuah lem lo chuan ka aw puat a, a room ka luh rualin thil ka hrechhuak nghal. Ka ding châwih mai, amah pawh chuan maktih hmel zet hian, "Eng nge a?" A lo ti hû a. Inthingharh vatin, "Phawi phawt ang" tiin hriau chu ka phawisak zung zung a, lapua ka bel hnan hnuah ani pawh chu a rawn ṭhuchhuak a, a lu a thur bâm mai. "Sawi teh" a ti leh hlawl a. Ka vai rûai niin ka hria..

"Daisy khaw nge a kal?" Ka ti hul hak a. "A best friend birthday a nih avangin chhuah min dil a,riak tura a rawn haw leh tur thu erawh a sawi, ka lo phalsak ve mai a, ngati nge?" Ngaihṭha vak lo hian a ti a, ka chil ka lem khawlh. "Victora pawh a chhuak." Ka ti khur dat a. Ka chhing zui sawk bawk. Ani pawh a chek hlak a, "Hrep tak chuan..eng thil chiah nge maw an lo tum ruk le.." a ti hriam hraih a, a mitmeng pawh a alh phat thei. "Vica chuan an ṭhianho inhmuhkhawm an tum niin a sawi, mipa ho bik.." chhuat bih rân chung chuan ka ti sep a. Ti nge ngaihṭhaa awm dawn pawn tiang hi ka tawn teivet le..

"Call rawh, tunah.." Maliani chuan a ti khauh fang a, ka phone ka lekkang a, amah Victora ngeiin a number ka phone-a a save, 'Mine 🥰' tih chu hmetchhuakin ka call ta a. A ring ral ta ṭhak mai. Ka rilruah thildang rawn lutin Lalvala ka call ta nghal a, a ring ral ṭêp tihin a rawn la ta hram, "Khaw nge Vica?" Ka ti nghal thâwr a. A irh uk uk a, a rui a ni ngei ang. "Hei a awm reng, ngati nge a?" Inthunun tum zet hian a rawn ti a, "Tu nen nge an awm a? Ti nge ka call a lak theih loh?" Ka aw chu a chang mah mah tih ka hria, mahse, ka insum thei tawh thlawt lo a ni. 

"Rinchhana te ho nen, kan awm tlâng vek, an titi tui sia i call a hre lo a niang. Ṭhianpa, hei, Vica, in nu call i chhang thei lo a, a lo call a nia.." a ti zui lûng lûng a. Ka off daih. Lalvala te nen an awm ho chuan Daisy nen an inhmu lo tihna em ni ang? Thawk khat chu a veng a, mahse, kim lo a la awm tho. Maliani chuan Daisy a call ve ta thung a, a ṭhiannu niawm takin a lo chhang, "Daisy a chhuak lawk a, a lo haw ṭêp ang." A rawn ti. Ka hlauthawng leh ta, Lalvala khan Vica kha a va be ngei kha a ni a, mahse, ṭhian an nia, an thupsak ve thei tlat, amah Vica ngei biak ka duh a ni. Ka call leh dawn lai takin amah pui roh chuan a rawn call ta si a, ka la ta vat. "Ti nge call i lak loh?" Ka ti pawr hlar a. 

"Kan lo titi tui bakah thawm a ring sia, ka lo hre lo a niang." A rawn ti dam thlup roh a, an hla play pawh chu keipawn ka hre pha. "Lo haw tawh rawh" ka'n ti ngawt a. 

A rum nghut, "Tumah an la haw lo, hahdam rawh Tuaimam" a rawn ti a. 

"A tlai tawh alawm, zu te kha i in ve ang e aw.." ka ti hram. A nui huk a, "Beer ka in ve, ka rawn haw ṭêp ang, Hniangi a mu tawh em ni?" A rawn ti a. 

"Mu tawh e, ka khua a har asin.." ka'n pangchang leh ta vel a. "Lo la muhil suh, 20 mins vel ka ṭhu lawk ang a, ka rawn haw nghal ang. " A ti a. Ka dah zui ta daih. Maliani nen chuan kan inmelh reng a, rilru siam dan tur pawh ka hre lo,. Daisy lah kan be thei bawk si lo. Lo haw ve ve phawt se kan hrethiam mai ang chu maw. Maliani damdawi ka pek zawhah keipawh kan pindan lam ka pan leh ta a, khua a lum em em pawh a ni lo, ka chhungril so phut khan min tilum ka ti mai, ka intleuh thuak thuak a, mut pawh a nuam ta deuh e. Nuteii nen kan intext mai mai a, tun hnai ti ila thla 1 liamta vel aṭang khan tlangval pakhat hian a hel ve tlat mai a, tlangval pangngai tak, eizawnna pawh hna sang ni lo mah se; a ngelnghet nei hi a ni a, nuteii aiin kum 6 laiin a naupang ve a, Nuteii dawrah hian a hnathawk bang hi a penkawi ziah bakah zan lamah pawh a khât tawkin a rim ve reng ṭhin. Chung vel chu kan sawi dun a, Opa a ni a, an chhungkua pawh chhungkaw pangngai tak an ni nghe nghe. Nuteii pawn, "Tihngaihna ka hre tawh lo, ka ngaina ve tho sia, ngaihzawng angin min en a, keipawn ka hnar thei bik lo a niang.." a rawn ti a. "A duh phawt che chuan kumte mai mai a ho lutuk, ngaizawng ve hmak rawh" ka va ti a. 

"Nuthlawi ka nih a hnu hmanah kan kum lo inthlau nen, an chhungkua an pangngai bawk si a, ama lam chu ka ngaihtuah lo, nakinah a chhungte atangin harsatna a la awm ka ring. " A rawn tih chu dik ka ti tho mai. "Chutiang i ngaihtuah kai zel chuan tumah i nei thei nang, hmachhawn ve pawp mai tur, thil chu a thleng dik chho ve mai zel.." tiin ka han fuih ve ngial a. 

"A dik ve reng mai, nia, thlir zel phawt mai ang. " A ti ve ringawt. In hnuai kawngkapui inhawng thawm ka hria a, Vica a ni ang tih ka ringhlel lo. Phone ka dah a, ka muhil der vel. Mahse, a rawn luh mai loh avangin ka meng leh ta nge nge a, Maliani pindan kawngka inkhar khap thawm ka hre zui nghal. Daisy a nih ngei dawn chu. Dar 10 a pel ta, Vica lah rawn haw tik a nei thei si lo, ka call duh ta bik lo va. Ka lo chhing sek ni tur a ni, ka chala rawn fawp zauhtu avangin ka harh ta hlawl a, Vica chuan nui sâng chungin min lo en reng mai. Thophang zetin, "I lo haw chiah elo?" Ka ti a. 

"Umn, ka tum aiin ka thang rei, Lalvala rui lutuk ka buaipui a, a che nawi zet mai" a ti bul bul a. Min rawn en lehin, "Ka va intleuh zawk ang aw, lo intiharh hram la,.zanin chu ka kuailet dawn che." A ti zui sup. Ka ner khum nghek ringawt. A va intleuh thuak a, keipawh ka mutchhuak a reh laklawh tawh,. A phone chu ka ensak ta mai mai a. Groupah hian a awm ve ṭeuh a, mahse, a lut ngai mang lo, a clear pup zel. Private-a rawn betu tam zawkte chu keipawn ka hmelhriatte an ni. Daisy hming ka zawng nghal a, a lo bo daih. Chat a delete tih ka hriatna chuan min vilh leh ta ngut ngut mai. Mahse, inthunun hram ka duh si. Vica chu towel vengin a rawn chhuak a, ka lo thlir tawp. Boxer a ha, tawnzau a ha tawh zet a, "Phelh leh tho tur" tia phun supin a hlip leh daih. Ka va phur lo ber tak êm. A rawn mu a, a taksa dai diak chuan min rawn nêk salh salh a, ka lo dawngsawng ṭha vak si lo. "Thil thleng a awm leh tawh mi?" A ti hû a, a inbengkang ûr bawk. 

"Awm lo " ka ti hmak a. Ka pasal duhna hi tihhlawhtlinsak chu ka duh, mahse, tun dinhmunah chuan a harsa takzet a ni. 

"Ka hmangaih che,..tuaimam.." ti leh supin min rawn fâwp ta a, ka hmui a nem thlep hma chuan dim tê têin min fâwp, ka hmuiin a dawngsawng ve ṭan ta tihah chuan a rawn duhthawh uchuak ta a. Keipawh ka inthlahdul thei ta. Mahse, rilru kil khatah Daisy a la châm veng veng, nupa nun kan hman tawhah chuan ka la zalên lo ber mai âwm e. Mahse, a nuam tho mai..hehe..

Thawh ka hai leh ta, lehlamah kan chhungkua angah chuan thawh han hai pawh hi a zia ve riau, han zah em emna tur a awm lem lo va. Bawihteii pawh a pain a lo paw leh pur pur tawh, tukin chu ka nu a tho harh peih lo a ni maithei. Tukṭhuan ei laiin ka pain Mama te chungchang chu a sawi a, "Office ban pahin rawn ko haw ang che, heti ringawt chu a ni lo lutuk, ṭhenawm khawvengte pawh an zahawm.." a ti a. Mama lah chuan, "A duh chen chen tlan rawh se, inthen a duh pawn ka cho zân e. Ka ning tawh, min tizak tam zozai tawh..ṭhiante pawn min kawm ṭha ngam tawh lo chu a nih hi." A ti hmuar hmuar a. A tir phat aṭang khan an inneihna kha a hlawhtlin ka ring vak lo rêng a ni. Ka nu erawh chuan, "Kei zawng Mateii te nufa hi ka ngai ṭhin êm mai, sawi rem dan hi awm leh se ka ti. " A lo ti ve char char a, Maliani'n, "A rem tawh lovang, U Mateii'n bialpa a nei ve tawh alawm." A lo ti hmiah. Mama a ngei deuh vanga sawi niin ka hria. Mama erawh a ngawi dâk thung. Daisy zia a zawi riau, nidang a ang lo, nizan lamah a che na deuh a ni maithei ni. 

Mali chhuah aṭangin ni 4 a liam ta, thawm a rawn nei lem lo va, an nupa bik an inbia em tih erawh ka hre lo. Tin, Vica leh Daisy bikah rinhlelh tur ka hmu leh ta rih lo bawk, a rawn be ngai ta lo nge, Vica hian ka hmuh ve hmain a delete ṭhin zawk ka hre lo. Thla thar dawn zanah Maliani chuan zanriah ei laiin Daisy bân a tum thu chu a sawi ta a. Amah Daisy erawh chaw a ei chhuak a, a awm laia sawi kha a nuam miah lo vang. Chuvanga Maliani pawn remchang chuh a nih a rinawm. Ka pa ten a chhan an zawh chuan thiam takin, "Ka ṭha ve tawh a, damdawi ni se ei hunbi ka hre vek tawh. Injection leh dressing a ni ringawt a, Pipi hian a ti thei vek, ṭul lova sum sên vak kha ṭul ka ti lo a ni. " A ti a. Victora ka lo chîk ngang mai, ka rin loh deuhin, "Nia, Tuaimami pawh a thiamna te hi a hman chhuah ve reng loh chuan a theihnghilh ang tih a hlauhawm. Mahse, Bawihteii avang hian duh angin in inenkawl thei lovang tih erawh a hlauhawm." A ti ve a. Hei hi keipawn ka huphurh kha a ni rêng a. Maliani chuan, "Kawng a awm mai ang, Daisy kan chhawrna zatve pawn nau awmtu kan la thei ang chu. " A lo ti mai si. Vica a ṭêk ta tlat, "Ka fanu hi mi hrang daih enkawl ka phal lo." A ti bur mai a, kan ngawi ṭhap. Ka pain, " aa..ma-i, engpawhnise, Daisy hi kei fel ka ti riau asin, kan chhungkaw ze milin a awm thiam bawk si, thla khat tal chu han inchhawr leh phawt ila, thla tawp lamah phai lam kan pan dawn bawk nen,. Pipi te pawh an lo leikang hman ang a, ani naupawm êm inenkawltir chu a tan a hahthlak lutuk ang e." Tiin thutâwp a siam ta a. Pawm loh theih loh a ni ta bawk si lo, Maliani pawh a tûm bâr mai, a chhan dik tak a sawi thei bik si lo. Kei tak pawn thla khat chhung Daisy chenpui leh chu ka châk hran miah lo. A ṭul miau si a, mahse, ka pasal nen an inkarah eng nge thleng tih ka hrechhuak thei maithei asin. Beisei phawt teh ang. 

Ka nute pawh Tetea pa nen insawirem kha ṭha kan ti tlâng ta bawk a, Tetea pa Pa Thlenga pawn kan veng ami tho a hnampui Pu Zika te chu innghah lailawk nana hmangin Pu Zika te pawn lawm takin an lo dawngsawng a, palai te tir zuiin, engkim chu a dan dik tak angin an kalpui ve vek a ni. Kan ina awm tur a nih avangin man leh mual pawh chhungkhat hnaivai leh ṭhenawm hnaivaite sawmin an inhlan fel thei ta a. Mipa zawk hmeichhe inah a lawi a nih ber mai chu! A hma an inneih han ti ila Pa Thlenga'n a luhkhung khan man leh mual an lo inhlan reng reng lo a lo nia. Tunah chuan innei diktak an ni tawh. Man leh mual an inhlan zanah chuan kan chhungin chaw kan va ei phei ve a, ka nu leh Vica pa hi an inkawm thei fû mai a, an rilru a lo inang te pawh a niang e. An inkawmtui thei barh barh a nia. Nuteii nen rawng kan bâwl a, kan titi leh nasa, Maliani erawh a damdawi eiin a hneh deuh a, Tetea roomah kan muttir daih, Daisy pawh a inthlahrung nge ni an in lamah a phei rih a. In chungte leh keini chhung bakah Pu Zika te chhungkua leh putea te chhungkua kan ni mai e. A hautak lo thei ang ber kha a ngai ve si a. Bathlara ka va chhuak chu Victora phone hmang lai ka va phâwk a, phâwk tihah a hmel a thutak êm vangin ka tum loh deuhin ka ngaithla a ni ber ang chu..

"Tiang khan awm suh, awm tawh lo hram teh. Khawngaihin.." a ti sup sup a. 

Lehlam ṭawng ka hre thei lo, "Zaninah lo kal ka tum ang. A ṭha em?" A ti leh a. Min hmuh hmain rang lutukin ka lut nghal. Ka lung a phu leh dup dup tawh, tu nge zaninah a hmuh dawn le? Hmeichhe pakhat bak ka mitthlaah a lang lo. Ti nge maw he thil hian min kiansan duh tlat loh le..! 

Ka chaw ei pawh a tui loh phah vek, mahse, mood chhia chu tihlan loh hram erawh ka tum ve, Vica lah chu a thawveng ropui si. Chaw eikhamah kan han intifel leh zung zung a, Bawihteii a tlei lo riau mai a, hnute ka pek pah chuan a pang ka dep a, a lo sa hat hat mai. Tiang hian a pang a sa ngai si lo va, ka ngaih a ṭha lo hle, ka nu ka hrilh ta vat a, an rawn dek ve liam liam a, Bawihteii lah hnute pawh a hne ṭha duh lo a ṭap deuh reng mai, nidanga a tlei ṭhin tehlul nen, mipui huhâng chu a zo lo deuh em mawni ka ti. Vica nu zawkin, "Vica nen han kalpui mai rawh u, ngaihthah ngawt zel tur a ni lo." A ti a. Vica chuan phone a lo hmang leh tawh, an va ko a. A rawn phei ve vat, Bawihteii chu a han dek ve a, "Kal ang." A ti nghal hmiah. Keipawn hnial lem lo chuan ka zui nghal a, ngawi rengin damdawi in lam kan pan ta a. A hmel a thutak run avang chuan ka be peih lo, ni lo, phone-a a biak kha tu nge ni ang tih ka ngaihtuahna lamah ka ngawi a ni zawk e. Damdawi in kan thleng a, Vica vekin a tifel a, nurse senior tawh lam hian a rawn en a. Nachhawknain a jection nghal a. "Tlang hrileng a man ve a ni maithei,." A ti a. A nelawm phian mai. Doctor a rawn kal hnuah a han en vel a, a thawk dan te a han enkual leh hnuah, "Damdawi ka chawh che u ang a, ni 5 chhunga eng a an loh chuan in lo kalpui leh mai dawn nia" a ti a. Damdawite chu a ziak ta zung zung a, chumi keng chuan Vica chuan a va lamkhawm leh zung zung a, kan haw thei chu a ni der mai. Motora kan luh hnuah, "In in lamah kan let leh dawn nge, kan inah kan phei dawn?" A ti a. 

Keima nu zawk ka call a, " a. Lo phei tawh lo mai r'u, hei an ṭilṭiak ṭan tawh e. Bawihteii kha chhuahpui vak chi pawh a nih loh kha. " A rawn ti lâng lâng a. Tichuan, kan in lam kan pan ta a. Kan thlen dawn hnaihah chuan, "Ka chhuak lawk dawn a, ka rei lovang, eng emaw a thlen chuan min lo call la aw.." a ti a. Ka thaw a tâwp mai dawn hian ka hria. Hmalam ka melh ran a, ka hmui ka pet fan fan bawk. Ka ngawih reng vang nge, "Thil pawimawh deuh a nia, ka la hrilhfiah vek ang che." A ti leh a. A âw-ah chuan ka ngaihbel nge zâmna a awm tlat. Intipaukhauh luiin, "Aw le." Ka ti sap a. Amah pawh ka la en duh chuang lo. In kan thleng a, kan nufain kan chhuk a, ani erawh a tlang nghal dawn a nih hmel. Hawilet eih loin inah ka luhsan a. Ka na a ni, a chhan ka hriat si loh hian min chhun zawk zawk ni hian ka hria a, ka khua te chu a sik hluah hluah niin ka hria. Bawihteii erawh an jection-na khan a hneh deuh nge ni a muhil chiah chiah reng a, ka mut a, a thawmhnaw pawh ka thlak ta lo mai. Ka hmai ka phih a, a la tlai chhe lo naa ka chau ngawih ngawih. Chau viau e ti lo chuan ka mut a chhuak reng reng lo thung a, ka mu meng kar mai a ni., An rawn haw thawm pawh ka hre reng, ka va chiauâu peih lo. An rawn lut hram ang tih ka hlau zawk. Ka ṭah a chhuak ṭûn a, ka ṭap thei si lo. Ka thinlung chu a rûm a ni ber. Ka inlet chhên a, ka rilru lah a buai nuaih mai si. Ka tho a, in hnuaiah chhukin fridge ka hawng a, beer hi fridge-ah an dah mai zel a, Mama leh Vica hian an in ber a, Mali awm lai khan a heh bawk. Sual angah kan ngai lem lo. Ka hriat lar ve ber pakhat kingfisher chu ka pawt chhuak a, eng nge ka hriat pawh ka hre lo, ka in châk tlat a nih chu. No-ah ka thli chhuak a, ka thawkkhat piap, ka ner nawng mai, tui lo ka ti nasa. Mahse, ka ti ve thei mai. Ka zâng deuh hûih a, mahse, ka puar awk mai. In chungah chho lehin khumah ka ṭhu vang vang a, ka va zung leh phawt. Chumihnu chuan ka mu ta vang vang a. Kawngkhar khar thawm avangin ka harh a, Victora thawm dim taka a rawn lut chu ka va hmu nghal, ka maimichhing leh vat a, ka be châk hlawl lo a ni. Thawm dim takin bathroomah a va intifai a, ka harh kar thung. A insil zawhah dim em em hian a rawn mu a, zu rim a nam tlatin ka hria, beer ka lo in tawh vangin ka thaw ka hip let nge phei zawng ka hre lo, a nâ lam min chhawn ta bawk nen, ka thinlung hi nat namên lo hian a na..chutakarah a phone a la hmet zui mawlh mawlh thung. Tu nge a biak ang tih ngaihtuah reng renga awm chu thil nuam a ni miah lo. Ka va bih ngam chiah bawk si lo. Ka insehruh ngat ngat ringawt, muthilh chu khawilamah. Dar 1 a pel fel tihin Victora chu a muhil ta niin ka hria, dimtêin a lam ka hawi a, a phone chu lukham sirah a dah a, thinphu dup dup chung chuan ka va ban dê dê a, a harh lo hlauh e. Thil tisual ang riakah ka inngai a, a nuam miah lo. A whatsapp-ah ka lut nghal a, Daisy msg hmuh tur a lo awm leh lo! Mahse, call log-a ka luh chuan Daisy call bakah number pakhat aṭangin call a dawng zing hle tih ka hmu thei. Chu number chu ka phone-ah ka save ta hmak a, ka muhil thei lo bawk a, Daisy chu whatsapp aṭangin ka va be ta a. "Mu tawh mi?" Ka va ti a. 

Reivakloah, "Mu tawh a, muhil lo. I va mengrei ve" a rawn ti a. 

"Nia, ka muhil thei lo ve tawp. " Ka ti leh a. Thil ka sawi vak chuan ka tikhawlo ang tih ka hlau ve deuh bawk si. "A hria ang em?" A rawn tih chuan ka lungphu a rang sawt. 

"Eng ber chu" ka ti ve ta ngat a. 

"Zanin vel kha.." a rawn ti leh ta zel, ka khur titih tawh. 

"Hre lovang, i sawi a nih ngawt loh chuan." Ka ti thei hram..

"I whatsapp password kha thlak la, min ringhlel tih ka hria a nia. " A rawn tih zet phei chuan chhan dan tur ka hre tawh lo va, awmngaihna ka hre lo a ni ber mai. Victora muhil thaw sâk sâk chu thlirin ka mittui a tla ta hial a! 

Phone chu dahin chunglam melhin ka mu ta vang vang a. Bawihteii a piang a, kan inpumkhat zual ang tia ka lo beiseina te chu tunah mai khan ṭhiahin a awm ta mai si a! Engtin nge min neih loh hlau ngawih ngawihtu Victora hian min phatsan theih le? Ni lo, ka thuamchhawm leina tur pawh a ruka tum duhtu hian engvanga hetianga min hnungchhawn theih le?! A tawp nan tiin Daisy chu ka text leh ta a, "Zanin kha i ṭha maw?" Tiin. Eng nge hriat ka duh a, eng nge ka thiltum pawh ka hrethiam chuang miah lo. A type rei viau mai , a tawpa tawpah, "I la harh tho chuan in chungah chho lawk ila, sawi dun leh ang. Ka lo nghak ang che aw. Ka ngai che, hmuh reng che hi ka duh a ni." Tih thu a rawn thawn ta a. Ka kut ka humruh nasatzia chu aw. Ka hachang ka ṭhiap bap bap bawk,. Victora ka zu en leh a, "Aw le, ka lo kal ang." Tiin ka reply ta a ni. kan inbiakna te chu ka delete vek hnuah phone chu a awmna ngaiah ka dah leh a, Bawihteii muhil chu ka ennawn leh tê tê hnuah khum chu ka thawhsan ta a. Ka lungphu a rang tawh lo va, ka thin erawh a rim,. Mihring thinrim leh rilru nâin pawisak an nei tawh lo an tih hi a takin ka tem ve ta niin ka hria. Zaninah hian ka pasal ka chân dawn nge nupui dinhmun ka la luah zel dawn tih hre turin eng thil emaw ka hmachhawn dawn a ni. Darthlalang hmaa rei mawi tawk ka inthlek vang vang hnuah ka nui lui sak a, In chung lama kal tur chuan pindan ka chhuahsan ta. In chung panna step chu ka zawh chho zel a, kawngka chu a lo inkau hiar a, ka nam hawng nghal. Thli a rawn thaw nghal vur vur a, chutitakin pawnlam a lo thaw ang tih ka lo hrechang miah lo. In chung zawl chu ka va chuang chhuak a, hmar lamah chuan min hnungchhawn zawngin Daisy chu a lo ding ran mai. 

"Hruaipui, zâm suh, i fanu chauh ngaihtuah rawh." Tiin ka infuih a. Hmalam chu muangchanga pen zelin a bul ka thleng ta. 

"I ṭha em?" Ka tih rual chuan rang lutuk hian a rawn inher a, min hmu chiah chu a hmui a hup a, a ding ngil at mai. Kei lahin mit la lo lêkin ka lo melh si. Ka nui lui titih bawk nen..

."Nang..nang maw? Eng nge awmzia?"a tawpah chuan a ti ta hram a. 

A mitah tak melh chungin, "Thudik hmachhawn tura lo kal ka ni, nang hian engkim min hrilh ang. " Ka ti hniam raih a, ka mit ka la sawn eih lo bawk, zâmna chhetê mah ka nei lo va, engkim chu cho chikimin ka cho a ni ber e. 

Mangan hmel zeta thawk la hawkin,. "Aw..a nih ka sawi ang, ka sawi vek ang. Mahse, khaw nge Victora?" A ti a. 

"A muhil.." ka lo ti tawi tak ringawt. 

A ngawih leh daih avangin, "Hun ka ngah lo, ka fanu a damlo mêk tih hria la, i sawi tur sawi la, ṭha takin kan inbia ang. A ṭha em?" Ka ti chang leh fak a. Tunah hian Victora bialnu ni loin a nupui, a fanu hrinsaktu ka ni tihah hian ka chiang em em a ni. 

Daisy chuan ṭi zeta min rawn melhin,."Ka sawi ang." A ti sep a. Ngaithla turin ka insiamrem a, Daisy chu ka thlêk ta vang vang a..