Amah leh kei 9

AMAH LEH KEI..(9)

Ziaktu : Toni Râlte

Mut pawh a tui mai mai lo e a. Thawh ka hai phah lehnghal. Victora vang vek,. Kimtea reng reng pawh whatsappah ka va hau deuh hrep a, a la tho lo nge ni min la rawn chhang lo. Tukṭhuan pawh ka ei ve nghal ta law law a, U Mateii te awm ta lo chu a reh dûk reng mai a,. Naupang lah a awmpui daih bawk si. Koh leh lam hi an sawi tawh rih lo a niang e. 

Maliani pawh rin ai tak chuan a rawn harh chho ve a,. Thisen var kan pe ta bawk. A pân te ka dressing sak laiin Vica a rawn lut a,. "A ṭha em?" A rawn ti lûng lûng. "Umm a zia deuh e. I va kal har ve" ka ti a. 

"Nia, Pa Rina ka nghak deuh, a motor rawn dah a tum a" a ti ve mai a. Maliani chuan chau chung chung hian, "Vica, U Mateii te rawn hruai haw rawh" a lo ti thâm ṭiak mai. Victora nen pawh hrilhhai zetin kan inmelh hâw mai. "Aw le, ka lo tum ang. Mama ber hi a ngawi tlat bawk sia" a ti nghut a, lungawi vak lo a ang. 

"A mak a nih hi.." Maliani paw'n a ti ve ringawt. Ṭawng vak lo se ka duh, a chau leh palh ang. Ka dressing zawhah in hnuaiah Victora nen chuan kan chhuk a,. Pu Zauva pawh chawlh a nih avangin huana feh turin a lo inṭam leh at tawh mai. Vica nena min lo melh dunin, "Mateii a rawn haw duh tawh bawk si lo va, Pipi, i lo lawi tawh mai dawn mawni le" tiin a nui vur vur a. Min tilai ve deuh alawm le. 

Victora lah chuan, "Takzet em? Ka pa, Ka û khi zia deuh se palai tirh ka lo tum alawm" a la ti zui! Pi Lingi erawh a ṭhu ngawi kar a, eng emaw thil thui tak ngaihtuah hmel a pu. Ka sik hlak a, "I zak lo êm mai a. " Ka ti nghat,. "Inneih vat hi a ṭha zawk, kan inṭhen palh ang" a ti leh ham ham mai. Choka lamah ka kalsan ta daih a. Ka titau tak tak chuang lo, khap mah ila a tih duh ang chu a ti leh duh dawn tho tih ka hria. Mahse, nupui pasal neih hi tih mai mai chi a ni bik lo va, tin, keimah hrim hrim hian hun ka la ti lo. Ka nu ka tinuamsa ve dawn chauh a, ka neihsan leh daih khan awmzia a awm lo. Tetea tal hi chu ka chawm ve a ngaiin ka hria. Victora pawh a kal zui nghal a,. A kal dawnah, "Nizan ami kha a number delete ang che" a la ti hram, ka chhang lo. Maliani roomah ka awm nilêng deuhthaw a ni e, Pi Lingi pawh a rawn chho ve zuai a, a fanu a thlir ngawih ngawih lai hmuh chuan a hmangaih lo tih kha chu dikin ka hre thei lo. Amaherawhchu, kan mamawh ngawih ngawih laia min hawisantu te hi chuan ser nung min siamsak thei bîk êm a, Maliani hian la ngaidam thei lo pawh nise âwm ka ti lutuk tho. Nufa na nâ na chu engtikah emaw an la inrem leh tho vang. U Mateii pawn min rawn be ve hlawl mai a, Maliani chanchin min rawn zawt a,. A dinhmun diktak ka hrilh chuan, "Ka khawngaih êm mai, rawn kan dawn ila a nuam si lo. Min lo biak dawn nia" a ti a,. "Lo haw tawh mai rawh u, in awm loh chuan a hrehawm zual êm mai" ka ti ve luam a. 

"Thil a kal fuh lo laklawh a nih hi,. Kan inṭhen hlen ka ring" a ti hul hak mai. 

"Chutiang ringawt, in fate an khawngaihthlak alawm" ka ti ve zel a. 

" a..pipi, nakinah i la hrethiam mai ang. " A ti ringawt. A dah zui ta bawk a, an buaina ber hi ka la hre ta chuang lo. Hriat kher pawh ka châk lo,. Diktak chuan Victora nen kan inkawp pawh hi inchhir thut chang ka nei ṭhin, an in chhung boruak ka hre ve vek a, hetiang ina lawi luh chu thil chakawm zawk zawk a ni tlat lo a ni. Mahse, Maliani ka khawngaih êm vang hian ka nêm mai pawh a. An lo hawn hmain ka tai nat lutuk vangin damdawi ka ei a, ka period chiang,. Maliani pads ka hmansak a, ka period hi ka la na thei khawp a, ka bungbu ngâwng ngâwng zel. Riak leh turin min la ti zui a! Inthlakna vel erawh ka va lak tho tho a ngai ang. Victora ka call a, a rawn haw hma thei hlauh, kan pahnihin ka inthlakna tur chu kan va la a. Nuteii pasal hlui Pate Zuala a lo ṭhu ve khur mai. Zu a in nasa nge a hmelhmaiah a lang viau,.min lo biak ve vat avangin ṭha tak chuan ka chhang ve a. "Bawihtea ka rawn hmu lawk a" a ti. Nuteii hmel hmuh a nuam vak lo. Ka nu pawh a dawr a lo khar hma ve a niang,. Ka thawmhnaw ka lak hlan chuan Pate Zuala'n Victora a be lûng lûng chu ka hre pha reng. Engti tiha lo inhria nge maw an nih dawn ni. Mahse, khawvel hi zawng a zîm êm mai a. Ka inbual ta law law mai,. Kan phei dawnin ka nuin, "Kan lo ṭawngṭaipui reng a nia, he lam chu rawn ngaihtuah suh" a ti thliam a, a thlamuanthlak angreng. 

"Engtin nge Pa Zuala nen khan in inhriat tehdaih a?" Ka tih chuan, "Kan inhre ve tawp, zu kan in ho tawh a. Kei phei chuan ka lo hre lo deuh tawh alawm" a ti mai a. 

"Zu i in loh a chin chu i hmel pawh a ṭha sawt sawt alawm" ka ti a, a khi suk mai. "Number chu i delete ta em?" A ti leh pek a. Ka melh rum ngei mai,."I ninawm, ka be lo vang. Nang pawn hmeichhia i be ve tho alawm" ka ti hmarh hmarh a. 

"Kan nih aṭangin tumah ka be tawh ngai lo. Bakah a hma pawn mi ka be vak vak ngai lo" a ti a. Hei chu a dik tho ka ring,."Tluangi chu a rawn rak leh tawh em?" Ka ti hram a. 

"A ngam tawh lo vang" a ti ro hak. 

Zanriah kan ei laiin U Mama chuan, "Nangni pahnih hi innei ve tawh mai r'u,. Mo kan mamawh" a ti mual mual a. Ani hi chu a ṭawng tam lo khawp a, kei nen pawh kan inbe zen zen lo. Victora ṭawng hma hmain, "A la hma ê" ka lo ti vat a. 

"Hma lo, ka nei dawn che. " Victora'n a rawn ti zuk. Pi Lingi'n, "Chutiang sawi hun a nih rih loh hi,. Chaw kha ei mai mai teh u" a lo ti leh hlar a. Kan ngawi ta dâk hlawm. Thleng ka seng fel laiin ka nuin min lo call a, "Ka thu hriat hi a mak hle mai. Victora kha mi ṭha a nih ka ring lo rêng a,. Zuala'n a chanchin a sawi vek a, i ṭhen theih lai khan ṭhen ang che" a rawn ti nghal hmawk hmawk. Ka hrilhhai kher mai. Sangi bak chokaah an awm ve lo a, "Nakinah ka lo bia ang che. Ka la buai lawk" ka ti zawi sep a. 

A dah nghal hmak. A rawn tih teh dan bawl bawlah khan a lawm lo hle a, thinrim viau te pawh a ang alawm le. A nuam lo duh hle mai,. Ka tifel sawk sawk a, Maliani ka jection hnuah a ruk deuhin in chung zawlah ka chho a, ka nu chu ka call ta a. 

"Eng thil chiah nge i hriat han sawi teh" ka ti a, ka tîm dai mai. 

"Zuala khan a hre hnehsawh lutuk,. Zu ngawlvei a nia, damdawite pawh a ti hial maithei. Tin, insual te pawh hrat ve thei tak, a û bialpa pawh sawisa duh khawpa nunrâwng a nia. Hmeichhe pakhatah chauh a lungawi ngai lo, tunah pawh khan a kawp ang che. I ṭhen vat a ngai, kha inah khan i thawh tawh loh a ngai a ni mai. I tân thuk hmain" a rawn ti ta bawrh bawrh mai. Sawi mai tur ka haihchham alawm le. 

"Mahse, a nun a sim tawh asin" ka ti ve ta hram a. A chek hlak mai, "I lakah te chuan lem a chang ang chu. Hetiang hoin an sim tak tak thei lo. Ka fanu neihchhun i nia, kei anga hmeithai ni ve turin ka duh lo che. Pathian ṭih mi ni lo chu i nei dawn lo a ni tawp,. Nakinah hmaichhanah kan sawi dawn nia. " A rawn ti leh lâng lâng a. Kan dah zui ta rih. Awmdan thiam harsa ka ti ta hle mai, ka nu mizia ka hria a, a tih tawh loh chinah chuan namnul theih ṭhak loh, luhlul ru deuh mai a ni a. A fate hi pa thuhmun ni lo mah ila; unau pianghmun ang chiahin min enkawl bakah pa nei lo kan nih avang hian kan nu leh pa en vek a,. A thu zawm loh chu kan hreh ṭhin viau zel. Railing bawhin khua chu ka thlir vang vang a,. A thiang nuam kher mai. Rilru buai nuaiha ka awm laiin, "Tu nge i biak rûk leh tak?" Victora aw hian a rawn ti thum dût mai a. Ka va phu chiang tak. 

"Thawm rawn nei ve phawt ta che" ka ti tuar a. Rawn pen hnaiin, "Ka zawhna i chhang lo" a ti bung nghut. Tshirt var leh half pant buang a ha a,. A simple bakah a fresh ngawih ngawih mai. 

"Ka nu alawm ka biak" ka ti sep a. Ka thaw halh bawk,. Victora hi tuna engkim hrilh mai chi a ni ang em tih ka ngaihtuah a ni. A la hre dawn tho tho a, bakah ka nuin a tihzah ka hlau bawk. Sawi tawh angin ka nu chuan a tih loh chinah mi hmai êng a zah vak si lo va, Victora pawh a dim dawn miah lo tih ka chiang. 

"Victor,.ih.." ka tih chuan, "Aw, eng nge ih chu.." a lo ti hluk a. Rum zeta melhin, "Ka nuin inṭhen turin min rawn tia, Pa Zuala khan i chanchin engkim a lo hrilh vek a. " Ka ti tlang ta bawrh a. 

Danglam em em lo hian, "Chuan? Min ṭhen dawn tihna maw?" A ti dam thlup a. 

"Ka hre lo, ka nu chu a khirh viau a" ka ti niah niah a, ka inringtawk chiah lo a nih hmel. 

"I nu chu ka bia ang. Tin, U Zuala pawh chuan ka eng chanchin mah sawi tur a hre lo tawp ang." A ti hmawk hmawk a,. "A hria a niang, a confi êm mai" ka lo ti nghat. Pawisawi lo deuha min melh vang vangin, "Nunhlui nei lo tu nge awm ang? Ka kalsan leh phumbo tawh hnu tharthawh leh hi a ṭul ber lo, nang nen kan inṭhen chhan a tan a tling tawk lo bawk.".a ti dap dap a. Sawi tur pawh ka hre tawh lo. 

"Chhuk ang" ka ti hap a,. Min rawn hnaih sauh a, uluk leh duhthawh zetin min fawp ta a. "Min ṭhen thei lo vang. ".a ti sup bawk. Ka chhang lo, ka rilru a buai rih êm a ni. Kan chhuk ta a, Maliani chu a lo la muhil a. A lawmawm lamah ngai ang. Keipawh mu turin ka inbuatsaih zui ve nghal a. Victora pawn ka mood a hriatchian avangin min rawn tibuai lo. Nizan lam ka mu ṭha tawh lo va, zanin pawh ka nu thusawi vangin ka let leh sek tawh, ka ning..ka rilru a hah. Zing dar 3 velah Maliani chu a rawn rum kâwk kâwk mai a, ka ṭhu chhuak vat. Khumah chuan a lo la mu a, a hma ang deuh khan a thle tawn leh sek bawk. Ka kaitho ta vat a,. Min rawn pawm thlawp mai, a ṭap leh ta hlawp hlawp a, "A ṭha vek ang. " Tiin ka lo hnem ve mawlh mawlh. "Ani kha..ani kha ti nge ka mithmuhah a rawn inlan fô" tiin a ṭap zui leh nghal. Rinzuala hian a va tibuai tak êm aw. Kawngka an rawn kik a, kan kalh lo bawk a, Victora a rawn lut, a va hun lo ṭhin tak. "Mangchhia bawk em ni?" Hriatchian hmel tak hian a ti zawi sup a. Victora aw a hriat rual rualin Maliani chuan, "Nang kha kal bo nghal rawh. Ka hmu duh lo che. Nang hian ani kha i that a ni. I hria em?" A lo ti hlawk hlawk mai. 

Boruak a sosan ka hlauh avangin, "Vic, chhuak rih mai rawh" ka ti ta ringawt a. Ani pawh chuan a û chu lainat hmel taka melh vawng vawngin ngawi rengin a chhuak ta hnu hnu a. 

"Ka hlau a ni. Min mutpui rawh" a tih tlat avangin a khumah chuan kan mu dun a. A huntawn te chu zawitêin a sawi ta sep sep a.

"Min phatsan hnu pawn ka ngaidam thei lo chungin ka hmangaihna a la chuai chuang lo. Mahse, kir leh thei niin ka inhre tawh lo va. Lalawmi nen an inkawp zui a, nasa taka min runluih lai pawn ka hmangaih em em tho, hetiang tak hian ka mihringpui ka hmangaih thei ang tih ka ring pha ngai lo. Ani pawn min la hmangaih reng tih ka hria, vawi tam tak ngaihdam min dil a, Victora'n a sawisak hmasak zawk pawh khan keimah vangin a ngaidam hmiah a ni. Ṭap chunga ṭhingṭhia ngaihdam min dil meuh chuan ka nêp zo ta lo va, ka pawm leh ta a ni. Mahse, ka chhungte leh ṭhiante hriat erawh ka duh hauh lo thung, a rûk vekin inlaichinna chu kan kalpui leh ta a. Ni e, nupa ang maia mutdun chang pawh kan ngah. Hiv ka positive khan amah bak puh tur a awm lo, a chhan chu amah chauh ka la mutpui tlat a ni. Ani pawn a kaina a hre thei tlat lo va, "Kan vei dun ta sa sa, innei mai ang" a ti nghe nghe. Mahse, Victora bawkin a nghaisa leh a, ka mithmuhah ngei a hnekin a chhuih a,. Victora ka huatna sosanzia kha. Ani chuan ka tana ti angah a inngai alawm, mahse, a ruka kan inzawm lehna kha a hre tlat lo a ni. Khami hnu lawkah khan an vengah endawng leh hmuhsit a nih nasatzia a rawn sawi a,. A mut hlum chhan kha thildang a nih ka ring lo,. Damdawi a bar ṭeuh a nih ka ring. 'I nau vangin kan innei thei dawn chuang lo' tih thu hi ka hnena a sawi hnuhnun ber a ni. " Tiin. 

Hriatthiam loh ka nei ta tlat, "A nih lo call zauh zauh ṭhintu che, Mi Tenawm tia i save hi tu nge? Rinzuala a thi tawh bawk si a" ka ti a. 

"Ka best friend ni ṭhin, natna ka nei tih a hriat aṭanga min thlauhthlatu a nih kha. Tun hnuah a inchhir a, mahse, ka mamawh tawh lo." A ti ram hmak a. 

"Engpawh nise, i chau lutuk ang, muthilh tum rawh. " Tiin a sam chu ka chulsak a. "Aw le..min kuah rawh aw, ka hlau a nia" a ti leh a. Kei nurse ka nih vang nge thil rapâwm tak tak kan lo hmu fô tawh a, hlauh hi ka ngah em em lo. Kei pawh ka hriat loh karin ka lo muhil ve ta a. 

Zinga ka zu chhuk chu ka let rang ngei mai. U Mateii ten bungraw lak an rawn tum leh tawh a lo nia. Ka tan lo awm ve kurna chi niin ka hre lo. A vawihnihna te a ni ta bawk a tiin bungraw lak chu an phalsak ta a niawm e. In chungah an rawn chho ṭak ṭak hlawm a, U Mateii bungrua chu an thiar thla ta nghauh nghauh mai. U Mateii chuan Maliani a rawn hmu ve hram a,. "In inṭhen hi pawm harsa ka ti ê. I ngaidam thei ngang lo mi?" Maliani'n a tih chuan ka bangbo hle. "A harsa êm a ni, ka tum ve nasa, mahse, amah hi a tâng nghet tlat tawh a ni. Pawi ka ti lutuk, i vahte erawh hi chu ka rawn kantir fô ang che. " U Mateii chuan a ti siam siam a,. Maliani chuan, "Khawvel tenawm lutuka nangni ang mi ṭha in lo piang ve hi a pawi a nih hi..kei chuan û angin ka la en reng dawn che a nia" a ti a. A rilru a nat hmel viau bawk,. U Mateii pawh chuan min rawn melh zawkin, "Pipi a awm alawm, ani hian a hmangaih em em che a ni. Lo dam vat rawh aw" a ti a. Awm reina chi ni hek lo, min chhuahsan zui ta a. Maliani mittui tling pam chu melhin, "A pawi êm mai" ka ti ve ringawt. U Mateii te buaina bul hi Dampuii leh Pi Lingi an nih ka ring ngawt a, a lo dik lo leh hle maithei bawk. Ka zawt ngam chiah bawk si lo va. Hriat hun ka la nei êm ang chu maw. Tukṭhuan pawh kan ei tlai phah deuh,. Victora phei chu workshop lamin an mamawh êm avangin chaw ei loin a kal daih,. Kan chaw ei boruak chu nuam lo tak a ni. Kan mûk run hlawm a, ṭawng kan tum lo hlawm khawp mai. Kei phei chu mikhual ka nia, sawi ve tur ka nei eih lo. Eikham dawn lamah Pu Zauva chuan, "Pipi pawh i hah hle mai,. I hlawh pawh kan san dawn nia. Mateii awm lai kha chuan zanah a jection thei mai zel a, engtin nge maw kan han tih ang aw?" A ti vung vung a. An ina awm tawpa inchhawr a duh tih ka hrereng, a inthlahrung ve bawk si a niang chu. "Ka hrethiam lo le, ka nute pawh ka lo râwn ve dawn nia" ka ti a. Ka nuin bâng tura min tih kha ka hrechhuak nghal,. Thil a khirh chho zêk maithei a ni. Rin ang ngeiin kan ei kham hnu lawkah ka nu chuan min rawn bia a, "Lo sawifel la, vawiinah lo haw ang che. Eng chhuanlam pawh hmang mai rawh" a rawn ti riap mai. Thupek khauh tak min pe chu a ni ta reng mai a,. Ka thiam ang tawkin Maliani'n min mamawhzia leh U Mateii inṭhen vanga zan thlenga min chhawr an duh thu te ka sawi ve a,. A ngaipawimawh lo nasa mai. "Awiii, zan riak lehnghala inchhawr phei chu, a teuhin a hnai lo. Zan khat lek riah pawh ka remti lo bur, keimah ngei ka rawn kal i duh loh chuan lo haw rawh" a rawn ti khur hlawk hlawk mai. Ka nu a ni miau a, ka hlau ve tho si. Ka mangang ve ta det mai a! Maliani bula sawi ka hreh bawk si, ka awmdan chu a laklawh kual vek. Victora ka call ta tawp a, engkim chu ka sawi ta vek a,. Ani pawh chutiang meuh a nih takah chuan, "Keimah ngeiin ka va hmu ang e" a ti a. Kei lah Maliani avangin ka haw thei rih si lo, amahin a va hmu mai dawn a nih hmel. Ka ipik deuh bawk a, Pi Lingi bulah ka buaina chu ka sawi ta tawp mai. Maliani erawh a mood a chhiat vek dawn avangin ka sawi ri ngam eih lo. Pi Lingi pawh chu a lungngai nghal ka ti mai,. "A va pawi tak êm. Chu pa pawh chu a va ṭawng thei ve mawle,. Victora lahin sulhnu a lo nei ve bawk si. I nu chuan a thu sût leh thei hram se ka va duh êm aw.." a ti vawng vawng mai. 

"Ka nu hmu turin Victora chu a kal dawn a" ka ti a. 

"A duhnaah hi chuan a huaisen ṭhin a nia. Heti taka a buaipui che hi hmangaihna vang bak a nih ka ring thei ta hauh lo" a ti a. Ka hah a tihdam phah hran lo. Maliani bula ka awm pawn Victora leh ka nu inbiak dan tur ngawt chuan ka rilru a luah a, "Thil dik lo a awm em ni?" A ti nghe nghe. 

"Awm lo ve, U Mateii te inṭhen hi pawi ka ti êm a" ka ti ta ringawt a. 

"Mama tenawm lutuk vang a nia, chhetê mahin U Mateii demna ka nei lo. A la inchhir dawn alawm, U Mateii aia hmangaihtu a tawng tawh lo vang" a ti nghat nghat a, engvanga U Mama chu tenawm nge a nih a la sawi ta chuang lo. Ka zawt hreh ve leh zel bawk si. A buaithlak e. 

Victora'n min lo call chuan in chungah ka chhohpui ta vat vat a. "Aw..engtin nge ni ta?" Ka ti hawk. 

"A rilru a thlak loh hmel riau,. U Zuala khan dâwt a lo belh ve zeuh zeuh a niang. Mahse, ka beidawng dawn lo" a ti muang churh a. 

"Ka hawn a ngai dawn a nih chu" ka ti chuai raih, Victora lam ai mah chuan Maliani ber hian ka rilru a tinuam lo a ni. "I hawng lo vang,." A lo ti nghut a. 

"Khatiang ngawt a ni lo , ka nu mizia i hre lo. " Ka ti zêk a, ka thin a ur hlur tawh. 

" Hruaipui, min nei mai rawh" a rawn ti tawl mai a! Ka ner sawk. "Ka thei rih lo, i hria" ka ti nghek a, "Kawng dang kan nei lo" a ti tlat si. 

"Ka va haw phawt ang" ka ti ta a. A thaw hawk chu ka hria. A mangang ve deuh a niang. Ka dah ta rih a, Maliani muthilh hlana ka va haw phawt a ngai, Pi Lingi pawh ka hrilhfiah a, "Lo lêt leh vat rawh aw. A rawn harh chuan a mangang dawn a nia" a ti a. Ka tiam thei lo, ka nu ka hlau si. Taxi lain ka haw ta a, ka va thlen chuan dawrah Bawihtea nen an lo awm a. Min melh no vak lo. "Engvangin nge i rawn tirh vel a?" A ti chat a. 

"Ka tir lo, amah khan rawn kal a duh vang alawm" ka ti a, ka ṭi dûk mai. 

"Ka pawm thei chuang lo. Khatiang mipa bula i damchhunga i chen ka remti thei lo" a ti hap a, min ngaihtuah vang a ni tih ka hre tho,. Mahse, Victora vanga ka hna bansan ngawt pawh chu ka ui ve a ni,. Tin, Victora pawh a insiamṭha ve mek tawh a, dik tak chuan inṭhen hlawl kha ka hreh ve tawh tlat. Bakah amah Vica hi a duhna lama pawisak nei lo a ni sia, engtin emaw min tihbuai zui tho ka ring a ni, chu chuan mualphona nasa zawk a thlen ka hlau. 

"Zanin chu ka va riak leh phawt ang a, Pu Zauva te pawh ka lo sawipui ang a, ka aiawh tur te pawh an zawn ve phawt a ngai alawm. Victora lam ni loin damlo zawk ngaihtuah la" ka ti ve ngial a. Chu erawh chu ka ngen nasa bawk a, a pawm ve thei hram e. Keipawn ka hna ka bansan dawn rau rau chuan ka hmelhriat nurse tu emaw biaksak ka tum rilru a ni. Ateii chu a âwl rih lo va, Hmingi pawh ka duh lo. Ka inbual sawk sawk a, ka phei leh ta a,. Maliani chu Sangi'n eitur a lo siamsak mêk a,. A pindanah ka luh chuan, "I va rei ve" a lo ti nghal. 

"Nia, ka inbual nghal daih a" ka ti ve mai a. 

"I awm loh hlek chuan ka khua a har nghal zel. " A tih chuan ka na zawk thei, hetiang taka inpawh tawh leh inngaina tawh chu ka bansan dawn tih engtin nge ka hrilh theih ang? 

A damdawi ka siamsak a, ka jection zawhah eitur ka zuk laksak a, ka rin aiin a ei tam ve phian. Ṭhat lam hi pan zel se ka tan chuan a thlamuanthlak a ni mai. An rawn haw khawm ṭak ṭak a, Victora pawh a inbual nghal. U Mama erawh chaw a ei chhuak dawn a nih hmel. Zanriah ei lai chuan ka buaina chu hmaih nei loin ka sawi fai ta vek a. Pi Lingi leh Victora chuan an hre sa tawh a, Pu Zauva ber chu a ni. A ngawi vung vung a, "Ka fapa vanga ka fanu hlimna bo tur chu a pawi hle mai" a ti sup a. 

"Ka pa, theihtawp ka chhuah ve mek asin. Palai min tirhsak mai rawh" Victora aw chu a ring hran lo hle, mahse, a fiah kek kawk hle thung. Ka hamhaih laiin a pa chuan, "A nuin a pawm theih loh che chu mawle" a ti nghut a. 

"A nih chuan ani hi ka ru mai ang" Victora zet chu a! "I â êm mai,. " Ka ti vak a. Ka zak bawk si, ka ngei lutuk ringawt. Ka beisei loh tawpin Pi Lingi chuan, "Ni e, inru mai r'u" a lo ti nia mawle! Sangi nen kan phâwk zual hle. 

"Ngawi teh u, a intham loh thlak deuh lo maw? Pasal neih ka la duh lo. Ka hna hi ka bansan mai ang, ka nu thu hi zawm hram ka tum ṭhin. Nurse dang pawh ka zawnsak thei ang che u" ka ti ve ta bawrh bawrh a. Ka kham zui daih bawk, ka lawm vak tlat lo. Ka awm ve reng laia inru tura an fuih thei kha min hmuhsit vangah ka ngai lo thei lo. Maliani roomah ka tawm ta ngat ngat a,.Victora a rawn luh pawn ka lo ûksâk lo. 

"Sawi dun lawk ang" a ti a. A û hriat chu a hlauh ve hmel tawp. 

"Sawi dun tur a awm lo. " Ka ti si. 

"Tihluih che ka duh lo a nia, ka û hmaah lehnghal" a ti a. 

"Tihian tâwp mai ang. A rem lo a nih hi" ka ti ve zel a. Maliani chuan, "In buaina ka hre vek alawm, vawiinah ka nuin min rawn hrilh a, sawi dun rawh u. " A lo ti a, mak ka ti hle. Chutiang na nâ na chu tiin Victora roomah kan inzui lut ta a. Khumah kan ṭhu dun a,. "Engvangin nge min neih i duh loh?" A ti dam thlup a. 

"Ka duh lo a ni lo, a la hun lo. Kan inzuina la rei lohzia hi ngaihtuah teh" ka ti hlak hlak a. 

"Inzui rei leh rei loh hi inneih nghehna pawh a ni lo" a ti ve hmuk a. 

"Chupawh nise, ka la duh lo a ni mai" ka ti hlar a. 

"Engtikah nge i duh ang?" A tih chuan, "Ka hre lo, ka nuin a remtih miau loh chuan kan innei thei chuang nang." Ka ti ve leh lawi si. 

"Min ṭhen i duh a maw? Takzet em? Hruaipui" a mitmeng a hlauhawm ṭan. Mahse, ka zâm duh bik lo,. "ka nu thu ka zawm mai zawk a ni" ka ti sap a. 

"Eng nge ka tihtheih hriat i duh takzet a nih hi.." a ti nghut a, chhuatah chuan a vei tawn ta sek mai. "Pawi ka ti victor, min hrethiam mai rawh. " Ka ti ṭiak a. 

"Ka hrethiam thei lo che. I tan ka nun ka siamtha a, ka engkim ka thlah a, neih che ka duh asin. Ka û vang pawn min kalsan thei lo" a ti mawlh mawlh a,. Ngenna âwka pawh a tel ta. 

"Maliani hi chu keipawn ka ngaihtuah takzet" ka ti a. 

"Kei pawh min ngaihtuah rawh. Khawngaihin" ka bulah ṭhuin ka kut a rawn vuan a, chhuat lam ka bih tlat, "Min en rawh. Hruaii,. Chiang takin min en rawh. Ka hmangaih che. Ka nei lo che a nih chuan, tuman an nei bik lovang che. " A ti charh charh a. Keipawn ka en lo thei lo. A hmelṭha a, midang bulah ka pasal tia sawi zahpuiawm lo tak a ni. Mahse, kan hmalam huna buaina tur ka thlir phak si, ka nu tihnat ka hreh a, tin, he chhungkuaah hian muang takin ka khawsa thei meuh ang em ka hre bawk si lo. 

"Engmah ka hrethiam tawh lo. Min ngaidam mai rawh" ka ti ta ngawt a. Ka ding hluai bawk. Min pawt ṭhu leh vat a,. Min kuah vawng vawng mai. Hnai set sawta min melhin, "I rilru mangan zia ka hmu thiam e. Ka hma ka sial avangin ngaihdam ka dil bawk. I duhthlanna ka zahsak ang che. " A ti ta a. Chutia a tih avang chuan ka hahdam phah huai lo, ka na nget nget zawk. Rin aiin ka lut thuk a, talchhuah leh a har dawn ta zêk mai. Mahse, ka chhungkua avang chuan ka tithei ngei tur a ni. 

"Min hriatthiam avangin ka lawm e." Ka ti ve sap a. Min rawn fawp zauh a, "Kal tawh rawh. " A ti zui sup. Keipawh ka chhuak zui ta nghal a. Tikhan Victora nen chuan kan inṭhen tihna a ni mai niin a lang. Ka duhthlanna a hria a, min zahsak thu a sawi bawk. Maliani bulah pawh kan inbiak dan zawng zawng chu ka sawi ta vek a,. "Ṭha i tih ang ber khan kal tawp rawh. I hlimna tur kha a pawimawh ber..mahse, Vica nen in inṭhen tho si chuan min kalsan kher a ngai dawn em ni?" A ti a. Thawk ka la hawk ringawt. Ka nu rilru ka hre bawk si lo va, "Ka nu ka han be lawk ang aw"..tiin in chungah ka chho leh ta a. Ka nu ka call nghal. 

Victora nen kan inbiak dan leh kan inṭhen tur thu ka sawi ta a, "I ti tak tak em?" A rawn ti hram. 

"Ti tak tak" ka ti nghat a. 

"Mahse, in khata chendun reng chuan in kal hrang thei dawn em ni?" A ti ṭâlh a. 

"Thei turah ngai ang. A thuhrimin Maliani hi i khawngaih ve lo mi? Nurse dang rawihsak leh chuan a hmaa a mizia ang bawk kha a nei leh dawn asin" ka ti ve hlak hlak a. 

A ngawih dat hnuah, "Aw le, kar khat chhung ka enthla ang che" a ti ta a. Ka thaw huai mai. Chumi zan chuan Victora nen kan inbe lo a, hmuh pawh ka hmu zui ta hek lo. A tukah pawh ka hmu lo. Kan rualin tukṭhuan a ei lo bawk a, min hel ngat ngat ni maiin ka hria. Mahse, hei chu ka tawrh a ngai a ni mai. Chumi huama thutlukna pawh siam ka ni rêng a. Chuvang chuan vuivai loh hram ka tum a ni. Hrehawm erawh a hrehawm ve angreng. Pu Zauva te pawn ka thutlukna an hre tawh a, min dem ngam bik lo a niang, engmah nuam lo ka tihna tur an sawi lem lo. An chhungkaw boruak ipik lutuk avang chuan kan chau tlang vek ni maiin ka hria. Ka nu pawn engmah chu a rawn sawi lem lo. 

Kan inah ka phei tawh rih lo va,. Eirawng pawh Sangi ka bawlpui ve a,. "U mateii te inthen chhan hi i hria em? " A ti sar sar a, ka lu ka lo thing nar nar,."keipawh ka hre chak e" a ti vang vang a. 

"A mak e tiraw? An chhungkua hi" ka ti ve ta thlawt a. 

"Chu chu lawm, a mak ee..mi râp riau zawk a ni" a tih chuan ka nui vak ringawt. 

Chutia kan titi mawlh mawlh lai chuan in chung lamah nasa taka ṭe thawm kan hre ta a, hmanhmawh zetin kan tlan chho nghal. Maliani chu a khum bulah a lo ding khur zawih zawih mai a, a meng â ruai bawk. Ka va pawm vat a, "Eng nge thleng?" Tiin ka zawt nghal mawlh mawlh, a ṭe ring bawk si a, ka lungphu a rang nghal vek. A khurh nasat êm avangin ka kuah chung pawh chuan keipawh ka che ve vek thei. A ziaawm deuh hnu chuan a khumah ka muttir a, "Mangchhia hi ka va hne tawh tak êm..ti nge hetia ka awm bik?"a ti mawlh mawlh mai. 

"Ṭawngṭai ang aw" ka ti ta ngawt a. Ka tum lawk vang pawh a ni lo, ka sawi ve thut a ni ber. A lo bu nghat nghat a, khumah Sangi te nen chuan ṭhuin ka ṭawngṭai ta a ni. Ka thinlung zawng zawnga ka ṭawngṭai avangin ka zak miah lo bawk. Kan ṭawngṭai zawh chuan Maliani pawh a mu ta hle hle a, "Rawng ka bawl laklawh sia, kalsan che ila a pawi em?" Ka tih chuan, "Zuk bawl rawh, zanriah pawh in bulah ka ei ve tawh ang" a ti ta hlauh mai a, ka va lawm tak e aw. Maliani room aṭanga Sangi nen kan chhuak chiah chu a room aṭangin Victora a rawn chhuak ve chiah a! Kan mit leh mit a intawng fuh zawk. Sangi zawk chu biain, "Zanriah ka ei chhuak dawn aw." A ti zauh a, melh pawh min melh eih loin a chhuk thla nghal. Engvanga la na ringawt nge maw ka nih chu le?!.. ka inthingharh vat a, In hnuaiah kan chhuk zui ve nghal. 

Sangi bawk chuan, "Inṭhen lo ula ka duh asin le. A pawi ê, a sual leh vak ang tih ka hlau" a ti mial mial a. 

"Sual lo vang. Kawng dang kan nei miau si lo va." Ka ti ringawt. Eirawngbawl zawhah ka inbual a, U Mama pawh a rawn haw ve tawh. Kan inhmu khât khawp mai. Zanriah ei khamah in chungah ka chho nghal daih, Maliani pawh kan bulah a ei ve thei a, a nu leh pate an lawm hle. Hma kan sawn ve zel e. Muthmunah kan titi a, Victora chu a rawn haw dawn lo a nih hmel. Mahse, ama chanchin kan sawi lem lo, Rinzuala nena an hlim lai hun te, a mangchhe man ziahah chuan Rinzuala thisen kai hnuanga a rooma a lo luh ṭhin thu te a sawi mial mial a, ngaihnawm ti takin ka lo ngaithla ve. A titi muhil ta daih a, kei pawh kar lovah ka muhil ve daih. Sofaah ka mu a, duhdah deuha mu kha ka nia, puan pawh sin lovin ka hriat loh karin ka muhil daih a. Zinga ka harh chuan puan chu ṭha takin ka lo sin diam mai. Maliani min sintir a nih ka ring deuh,. A rawn harh chuan, "Puan kha min lo sintir a, ka lo sin theihnghilh daih alawm" ka tih chuan, bo fê hian, "Nizan ka muhil kha ka harh tawh lo hrim hrim" a ti ta mai a. Tu tak ni ang maw? 

Room aṭanga ka chhuah chuan Victora room chu ka va melh zauh a, kawngka inkau deuh aṭang chuan khumah a mu tih ka va hmu thei. A lo haw lai ka hre miah lo. In hnuaia ka chhuk hnu thingpui ka in laiin Vica chu a rawn chhuk ve a.

"Sangi, ka zin dawn a. Nakinah ka thawmhnaw min lo siamsak dawn nia." A ti a. Kei chu ka awm ve tih hre miah lo angin a awm. Mahse, ka ngei ve deuh a. Engahmah ka ngai duh bik lo. Thil dang ka tihsan ve bawrh bawrh a,. A phone a rawn rik chuan, "Aw julie, dar 1-ah ka rawn lam ang che." A ti sup a. Julie hming a lam rik avang chuan ka tum loh tawpin ka nui ta hawk a..

"Nuihzat tur a awm elo?" Ka lama rawn hawi pah chuan a ti nghut a.