Amah leh kei 18

AMAH LEH KEI..(18)

Ziaktu : Toni Râlte

Ka hriat loh karin ka lo muhil daih a, ka harh rualin ka msg dawn kha ka hrechhuak nghal. Ka phone ka en leh vat a, msg engmah a lo hnutchhiah tawh lo. A dp a lang thei lo va, a hming a ziak bawk si lo. Tu tak chu ni ang maw? Ka thuamchhawm kha Victora'n min tumsak âwm reng reng ka hre lo, a hnen aṭangin pawisa pakhatmah ka dawng lo, ka chiang ve thlawt. Vica chu hrilh mai chi em ni ang tih ka ngaihtuah a, mahse, engti kawng mahin ka thuamchhawm tur a tum tih a sawi duh ka ring bawk si lo, rilru buai ru deuhin ka awm a. Tukṭhuan ei lai pawn ka lo inngaihtuah muk deuh nge ni ka pain, "Pipi vung vung chu, i mumang i ngaihtuah zui a ni maw?" A ti hlut a, ka phu zawk mai. Ka bula ṭhu ka pasal chuan zawitê hian, "Engkim a ṭha em?" A ti sup a. 

"Ṭha e, ka mu ṭha vak lo va, chuvang a niang. " Ka ti ta ngawt a. Min zawt zui bik lo. 

"Vawiin hi ka nau piancham a nia, tlai lamah chaw eiah min sawm a, kan nupain kan va ei ve ang e.Maliani pawh an sawm tel a, a peih chuan lo tel ve se." Ka ti a. Ka nu chuan, "E! Va ei rawh u, a len pawh in leng khât lutuk a, an khua a har ve ngawt ang. " A lo ti var a, Mali ner sak chu ka lo hmu leh hman pek. Mahse, engmah a sawi hran lo. Victora chuan, "Ka û pawh i rawn tel ve thei ang chu tiraw?" Tiin Maliani a melh a, "Nia, a pawi lo,. Vahchhuah ka mamawh ve tho mai." A ti a. 

Victora hna kal tur insiam laiin ka phone a rawn ri a, ka inthiar laklawh avangin a lo la a, "Hello" a tih dût dût chu ka hre reng, a reh leh ta daih a. Ka va chhuah chuan, "Tu nge a?" Ka ti a. "Ka hre lo, a ngawi vung vung sia, ka dah daih" a ti puat a, ka'n en chuan nizana min lo betu number ngei kha a lo ni. Ka call back ta vat a, mahse, a ring ral ṭhak ṭhak. Ka tum buai peih ta lo. Vica kal tur chu gate thleng ka thlah a, kan tih ziah dan a ni. "Rawn haw hma ka tum ang. Lo insiam hma ang che, nghah rei i ngai thei si" a ti sup a. Ka lo nuih sak ringawt. Ina ka luh chuan Mali'n Sangi a lo vin leh hlak hlak tawh. "Kutin su rawh ka ti ka tia, hak tlak pawh a nih tawh loh hi, laktlak loh lutuk" a ti hlaih hlaih a. 

Sangi lah chuan a lo ning ve thawkhat a niang, "Kuta suk ngai chu anmahni hian an su mai zel, min suktir ngai lo, hun ka nei reng bik lo va. " A lo ti ve nghek a, ka nu pawh a awm ve reng, a lo thlir reng ringawt. Mali chuan, "Min va zah lo ve a. Nangtê hi he ina i awm rei tawh avang hian i lo intineitu ve ringawt ang e. Awmpui i nih hi hrereng rawh. " A ti hrep hrep a, Sangi chuan, "Ka hre ve, i sawi zing. I rawn awm hma kha chuan tuman awmpui ang pawn min en ngai lo. Misual i nih hi,. Nang aia thatchhia ka la hre ngai lo." A ti khur dar dar a, a thinrim ve takzet tih a lang. 

"E ê ê, i va han zak lo ham ham tak. Chhuak rawh, chutiangtea min han tih khanglan chu le..zakthei lo lutuk." Mali chuan a ti a, ben tumin a kut a lek uaih bawk, ka nuin, "Duhtawk r'u, Mali, a tawk. Sangi, nang pawh kan room va tifai rawh. Thil ho mai maiah inhauh chiam a ngai lo" a lo ti chang fak fak a. 

Sangi pawh thuawih takin a pite roomah a lut nghal. Mali chuan, "Khatiang khawp khan min zah lo va, engtin nge i enliam theih zawk a? Chhuak rawh se, awmpui tur dang an tam lutuk." Ka nu melh chung chuan a ti tân tân a. 

Ka nu erawh chuan, "Inpain Sangi hlawh kha a pe lo tlat, tin, i rawn mo hmaa heta awm a ni, a ṭhat lohna leh fel lohna kan hre ve lo. I duh leh in nupa chhawr tur hrim hrim maid ruai mai rawh." A lo ti hmiah mai. Mi rapthlak ve ve an ni bawk a, an inngam bawrh bawrh viau. Kil khat aṭangin ka lo thlir ve reng a, chupawh chu a ngaithei lo nge Mali chuan min rawn enin, "Cctv kal thei ang mai, engvanga khatia min lo thlir reng nge i nih a? " A ti ram hmak a. 

"I nihna sawi lo mai teh" ka chhan hmain ka nuin a lo ti zauh, ka nui deuh a, Mali thin chu a rim zual sauh niin a lang. Mahse, Vanneih asiamin ṭhenawm nu a rawn lut hlawl mai a, kan ngawi tlang ta rih. Thenawmnu pawh hi reporter hlawh nei lo kan tih ang ve tho kha a nia, Mali awrâwl a ring angreng sia, kan boruak rawn thlithlai tura rawn kal tih hriat reng reng. Zahpuiawm hlawm lutuk. 

Maliani a inbual zawhah ka dressing a, kan inah chaw a rawn ei ve thei dawn a, a lawmawm. Keipawh ka insiam ṭan a, ka rai hnu hian ka ṭuan a muang zual a, chet zung zung a lo harsa ve bawk nen, inhmakhua ka ngai nasa ṭhin. Tetea chu eng nge ka pek ang aw tih ka ngaihtuah a, dik tak chuan Piancham tih vel hi kan lâwm ngai mang lo va, thilpek inpek tur pawh ka hriat loh phah. Sana leisak mai ka tum ta a, ka lo chah tawh si lo nen, Victora ka call a, an workshop thlang lawkah sana dawr a awm bawk nen, "Pa i tih ber kha rawn lei tawp mai teh, engmah pek loh ringawt chu.." ka ti a. 

"Aw le, ka rawn haw thei têp" a rawn ti a, a aw a zangkhai hle. Victora nghah paha phone ka khawih mai mai lai chuan msg bawk kha a rawn lut leh ta a, ka open vat. 

"Inpa tan hian i va hmuhsitawm tak, a ruk tak, a ruk tak chuan a nuihzat ngawt ang che. " Tih a ni. Ka nui hawk a, "Tu nge i nih?" Ka ti a. 

"I hriat kher a ṭul lo. Hre mah la i hlâwk phah dawn lo." A rawn tih chuan, "Tu nge a nih pawh ka hriat loh leh insawi ngam lo thusawi awih duh tawk lekah min ngai em ni?" Ka ti ve ta ngat a. 

Emoji nui uar uar lai a rawn dah tuar a, "Kha tak kha lawm i mawlna. I thuamchhawm zozaite kha nangma pawisa bila lei angah i lo inngai tak tak elo?" A rawn ti a. 

"Ngai e, ka pawisa an ni tlat." Ka va ti a. 

"Ok, i ngaihdan dan le,. Thudik i hriat hunah zak lutuk lo la. I pasal hian nakinah nangmah hmuhsitna hmanrua atana hman a duh vangin tiang khan a ti tih hriat reng. I mawl êm mai." A rawn ti zêk mai. Victora a rawn haw avangin phone chu ka dah ta rih a. Ani pawh inbualin a insiam zui nghal a, a faifûk rût rût reng a, a mood a ṭhat hmel kher mai. Kan inpeih ṭhap hnuah kan chhuak ta a, ka nu leh pate chu awm lo se Sangi pawh ka sawm ve daih ang mawle. Victora hian kan inneih hnu lawkah car a la thar ve a, ka pain a thar la tur pawn a ti reng, "Savings ka ngaipawimawh e" tiin 2nd hand a la a, mahse, a la thar ṭha viau. A bike pawh a la kawl tho. U Mama motor hi chu an vawnsak ve ngai lo tluk a ni, kan inneih hma pawh khan a bike-a kal a rem loh chuan a pa motor a hmang mai zel. Maliani scooty kha chu chhungkaw chhehchhawl a ni deuh mai. A hman hmanin kan khalh kual tawp. 

Tetea ka pek tur sana pawh a rawn tuamtir thlap a, a che fel viau zel e. "Eng nge i pek ve dawn?" Ka tih chuan, "I hre mai ang. " A ti ringawt. Maliani chuan, "Ka lei ve hman si lo va, a cash-in ka pe mai ang" a lo ti ve thung. Kan in pawh kan thleng ta vat a, putea te pafa pawh an lo awm tawh, Tetea chuan a bialnu leh ṭhiante a lo sawm ve bawk a, an lo ri ve chel chul mai. Kimkimi nen hian an la naupan nen an ni rei ve zêk a, Tetea hi tleirawl ho duhzawng , ṭawng tam si lo, pa ru deuh mai a ni bawk a, Kimkimi pawh hian a bem hmasa zawkin ka hria. A zei awm lo sia maw. Rawng an lo bawl fel vek tawh a, ka nu hmel hmuh pawh a nuam hle.

Dar 5-ah zanriah chu kan ei ta a. Nuteii thiam thil eisiam tui zet zet ka han ei thei leh chuan ei chintawk ka hre lo takngial dawn, "Insum deuh teh" ka nu pawn min ti hial. Vica lah chuan, "Naute eikêp a ngai alawm, ei ṭeuh ṭeuh rawh se" a lo ti ham ham. Ka chaw eikham pawh kaihthawh chawp ka ngai, Maliani'n, "Hruaipuii eisiam a tui viau emaw ka tia, nuteii zawng a la tluk lo deuh a nih hi a..kumina ka chaw ei tui ber ṭum a la niawm e." A ti ve hial mai a, Nuteii pawh a lawm ve hle. Tetea ṭhiante ho pawh an chaw lak a ṭha hlawm khawp mai. Eina vel chu Kimkimi leh a ṭhianten an sengfel vek a, an fel thar thar hlawm khawp mai. Zanah chuan thilpek te chu kan pe ṭan a, Tetea lah a lai chi a ni sia, a nui ruh ruh reng mai. Kimkimi gift pek chu a sial hmel khawp mai, keipawn sana chu ka pe ve a, Victora phone hmang zo pawh a rawn lut ve chiah. Tetea chuan a nêl ve tawh bawk a, "U Vic, eng nge min pek ve dawn?" A lo ti var a. 

Vica chuan ngui hmel deuh hian, "I makpa hi ka da lutuk a, engmah pek theih che pawh ka nei lo. " A han ti tê tê a, ka lo ngei leh hman ṭêp a ni, Tetea lah chuan, "In rawn kal thei a, a lawmawm tawk viau alawm le.." a lo ti khawmawi ve a. Mahse, Victora chuan a kekawr hnunglam ipte a zen ruk ruk a, bawm kil li nei lian vak lo hi ka nau chu a pe ta a. Ka nau chuan phur zet hian a hawng a, chabi a lo nia! A meng bial kâwk kâwk mai, keini erawh chuan a ngaihna hre vak lo hian kan lo thlir ṭhap a, Tetea chuan phur leh helhhawlh tih hriat zet hian "Tak tak maw?" Tih leh pawna chhuah a rual a, kan zui ve dual mai. In chungte garage bulah chuan Burgman street scooter dum nalh zet hi a lo ding rân mai le. Tetea'n a awh em em, vawi tam ka bula a sawi ṭhin kha a ni a, keini nufa tan lei ngaihna awm hauh lo a ni. Pasal ka neih hma khan laksak kha ka rilruk ve rauh rauh a, ka nu khan tiang thil kha min hrilh leh si avangin ka tan tihngaihna a awm tawh si lo. A school kalna leh veivah nan a mamawh ve em em tih hre mah ila, thuamchawm a lo ngai ve lehzel nen beidawng takin ka siam ta kha a nia. Ka dawr atanga lut hi ka nu bulah pawh khawlsaka kum tawp lama laksak ve mai turin ka ti tawh nghe nghe a ni. Chutiang a nih laia a piancham thilpek atana Victora'n a han pe ta mai chuan min ṭhâwng ka ti mai. Sawi mai tur pawh kan haihchham tlang a ni. 

Tetea biang chu a tai hlar mai a, a hnuk a ulh deuh niin ka hria, Vica bulah chuan, "U Vic, lawmthu sawi dan pawh ka hre lo, ka lawm a ni tawp mai,. Ka lawm lutuk." A ti sup sup a. Vica lah chuan inla patling fahran hian, "Ekhai! Ka nau, mipa leh mipa lawmthu an inhrilh ngai lo, i lawmzia i hmelah a lang vek alawm. I ta liau liau a ni e." Tiin a darah a beng thuk thuk a, Tetea chuan a scooty chu ân chul vel a, a lung a awi hliah hliah mai. Ina kan chhuk leh hnu pawn kan la sahâwk ṭhûm mai a, Ka nu pawn, "Vica, khatiang thil liantham em em te chu, a man zahve tal kan lo tum ve ang e." A ti a. 

"In lo tum ve ten thilpek a ni thei nang." A ti tlat bawk si. Ka pasal hi a va fel tak em. Ka nu rilru pawh a dang dâwrhin ka ring a ni. Cake zaina te kan nei a, Maliani pawn Tetea chu cheng 5000 lai a pe ve. Kan chhungkaw tan hian an va hlu tak e aw. 

"Nute, eisiam lamah kal daih rawh, i 2nd hand dawr saw Restaurant emaw hotelah emaw siam la, bul ṭanna i neih loh pawn ka pa pawisa puk dil la, i hlawk daih zawk ang. Eisiam i thiam em mai" Nuteii bulah a ti ve ngial a, Maliani hian eisiam thiam a ngaisang tih ka hre tawh a, mak pawh ka ti lo. Nuteii pawh chuan, "Nia, ka châk ve thin a nia aw. Mahse, sawi tawh angin bulṭanna mawlh mai hi,. Keini ang tan chuan a harsa ve êm a ni." A lo ti ve a. Ka pa bula Maliani'n a sawipui phawt chuan ka pa chuan phal taka a puktir theih keipawn ka ring. Dar 10 dawn thleng kan awm ve a, Tetea hlim lutuk mawlh chuan engkim a tinuam a ni ber. Kan haw tur pawh an vaiin kawngpui thleng min rawn thlah a, zan nuam tak a ni. 

Mut hmunah, "Khatiang thil em em tihsak kha chu ka lo rinphak loh thil a nia, min hrilh ve tur che lawm." Ka ti a. 

"Ka hrilh che chuan i induhtawk ve sia, i remtih ka ring lo alawm." A ti a. A sawi dik chiah, ka bulah sawi sa ta se, ka induhtawkna avang pawn a ngai lo ka tihsak tlat dawn. Ka mizia hrechiangtu ka pasal chu ka dem lo, a chungah thinlung takin ka lawm zawk. A sum khawlzat hi ka hre chiah lo va, sum leh pai lam sawipui hi nuam ka tih loh vang a ni. Mamawh ka neih pawn ka neihsa ka hmang ve mai zel a, bakah mamawh em em ka la nei lo, U Mateii'n nau puan tur bakah nau kawr chenin min rawn pe ve a, a la ṭha hlawm si, a lawmawm tak tak a ni. 

A tuk tukṭhuan ei laiin U Mama'n, "Vica, i nupui nau tana scooty han leisak em em te chu mawle, fa in nei ve mai dawn a, inkhawl nachangte hi hre ve ta che. " Tiin a zilhhau a. Ka awm a nuam lo hle. Engtin nge a pe tih pawh an lo hriat ni. 

"Ka pawisa a nia, ka hmanna tur pawh ka thu thu a ni mai lo'm ni?" Victora chuan a ti dam thlup a. 

"Khatiang thil manto pui pui kha inleisak kher a ngai hleinem, i pianchamah eng thil liantham mah an tihsak dawn che pawh ni hlei lo" Mali'n a rawn ti ve leh nghal a, ka kek châk thei e. 

"An thil neih hlu ber an fanu leh farnu min pe a, a tawk viau alawm le." Nui chungin Vica chuan a lo ti leh hmiah. Ka pa pawh a nui huah huah a, "Ṭawngkamte hi i thiam zêk a, i nu nulat lai ang mai, i nu pawh hian a bei thlum thei teh mai ania" a tih chuan ka nuin rum zeta melhin, "Ngawi mai mai teh, zan 100 a zawna min rim thei i nih kha" a lo ti hlak hlak. Sangi nen kan nui awr awr a, kan boruak alh phat tur chu ka pain a rawn bengdai thei ta hlauh e. 

Ka rilru mawlhtu erawh a awm, msg ka dawn ṭhin kha a ni. Min rawn hmusit thei si, call a la duh ngai bawk si lo, cyber lam hi ka chhuitir tawp mai dawn mawni te ka tia..ka block a, number dang aṭangin a rawn ti zel tho, sim card pawh a ngah viau a ni ngei ang. "I dawra thawkte ngeiin ka thusawi dikzia an hrilh thei ang che." A rawn tih takah chuan ka harh ta kawk mai. Pu Tluanga ka call ta vat a, an buai deuh nge a la thei si lo, eirawng ka bawl laiin a rawn call back ta hlauh a. Sangi a awm ve si avangin, "Sangi, ka thil chhuan lai kha lo vil lawk rawh aw" tia chahin in chungah ka chhohpui ta a. 

"Aw Pu Tluang, zawh duh che ka nei a." Ka ti nghal tâwng. 

" Aw han sawi la, i reh vung vung mai a, i tlei hle mai maw?" A rawn ti duam duam a. 

"Englo a nia..Victora nen kan inneih hma khan thil thleng a awm tiraw? " Ka'n ti tê tê a. 

"Engtia thil thleng maw? Ka va hrethiam lo" a rawn ti hû a. 

"Nia, Vica nen kan inneih hmaa dawra pawisa tlingkhawm chungchang kha a nia ka sawi,. Victora'n a rawn dah belh tiraw?" Ka ti tlang ta râwih a. 

A ngawih dat hnuah, "I hre vek emaw ka tia." A ti ringawt, "Hre deuh reuh a, mahse, engzat chiah nge a dah ka hre lo va." Ka ti ve zel. Ka lungphu a rang tawh hle. 

" a..zep loh chuan khami thla kha Assam lam kawng a pin deuh avang khan bungrua kan chah thleng thei lo nual a, income kha a chhe angreng a. Chuan, Victora hi a rawn kal a, kan hmuh angte chu min rawn zawt a, in innei tawh mai dawn bawk nen ka lo sawi ve mai bawk a. Chuan, a tuk lehah rawn kal lehin pawisa kha a rawn dahbelh ta a ni. Sing 8 leh sang 5 a rawn dah a. "Amah Pipi pawh ka hrilh ang. Nangni chuan lo hrilh lo ula" a tih avangin a hrilh daih tawh turah kan ngai che a. " A rawn ti ta dap dap a. Ka za vek thei mawle. Ka chhing vang vang a, "Aw le, ka lawm e, kha kha ka hre duh a. Tunlai eng nge in an? Bungrua kha i rawn list thlak kha chu ka zu order tawh kha aw." Ka ti zui zat a. "Hei, a pangngai viau e, i hman remchan veleh rawn kal la, bungraw man ṭhenkhat hi a to thut avangin felhlel a awm thei a, i hoin kan en dawn nia." A rawn ti thlap mai. Ka ringtawk bawk a, a la rintlak zel e. Kan inbiak zawh chuan ka rilru a mang ka ti mai, Min rawn be thintu sawi kha a lo dik ngei tih a chiang ta a, mahse, ani khan engtin nge a lo hriat theih ang? Pu Tluanga ten an hrilh a nih loh chuan Victora chuan tu bulah mah a sawi ka ring si lo. A mak ṭhin mang e. Tin, Victora'n chutiang thil a lo ti chu ka eng emaw ti nat tlat! Ka chapona ve la nung hram hramte hian an ngaithei lo ni berin ka hria. Mopain monu thuamchhawm a tumsak ka hre ngai lo, tumsak ngai khawpa rethei anga min hmu chu ka zak a, nâ ka ti bawk. Rilru kawi tak pu phei ila chuan min hmusit ka ti duh hial maithei a ni. Kan chhungkaw buaina a hria a, rilru kawi pu loin lang thei lo lam aṭangin min pui ve chu a ni ngei ang a, mahse, thil hi a thup bo theih tak tak ngai loh. Min puihna te kha ka lawm lo pawh a ni lo, zahthlak leh tlawmthlak ka ti êm a ni. 

A lo haw lai chuan hmarcha ka lo râwt a, "Khawi, i tha i hmang nasa thei si" tih leh min chhuhsak a rual nghal, hmarcha chu a râwt ta sawk sawk a, ka ngawi reng. Ṭha taka lo biak kha ka thei rih tlat lo. A râwt zawhah, "Chho ila" a ti sup a. 

"Tihtur ka la nei a, lo han chho rawh." Ka ti tawi tak, ka hmel a hmuhchian theih loh nan lehlam ka hawi ṭâng ṭâng bawk. "I ṭha tiraw?" A ti a. 

Ka lo bu nghat, khawih tur ka zawng nghal ruai a, zahzelah fridge te chu ka'n hawng ringawt thul, "Mali'n a hau che mi?" A ti leh a, "Hau lo, han inbual rawh, ka rawn chho ang. " Pangngai tak hian ka ti ta a. Thuawih takin a chho ve mai bawk. Keipawh tihtur em em ka nei tawh lo bawk a, a inbual tawh âwma ka rin hnuah ka chho ve ta ṭuâng ṭuâng a. A hak tur ka dah chhuahsak hnuah skincare ka apply zui ta a. A inbual zawh chuan a inthlak nghal mawlh mawlh, "Ka û a ṭha em?" A ti a. "Aw" ka ti teh tawp. 

"Tuaimam, thil thleng a awm em ni? I va ngui ve" min rawn pan pah chuan a ti a. 

"Awm lo se ka ti ngawt mai." Ka ti hniam raih a. "Sawi rawh.' a lo ti vut. 

"Engvangin nge khatiang kha i tih? I puihna ka dil em ni? Ka ngen che em ni? Mawh?" Ka ti tuar tuar a, ka rai vang ni maw ka lung a chhe ringawt lehnghal. 

Bo deuh hian, "Eng nge ka tih? Tuaimam" a ti hniam ruih a. A mita en chung chuan, "ka thuamchhawm lei nan ka dawra pawisa i lo belhchhah kha mawle. Ti turin ka ti che em ni? Engvangin nge i tih?" Ka ti leh vak vak a. 

"Neih loh che ka hlau êm a ni. Ka tihpalh." Ngenngawl zet hian a ti ta a. 

"Ka nu phei chuan hria se a lawm miah lo vang, tu mipa mahin an nupui turte thuamchhawm an tumsak ngai lo." Ka ti hmarh hmarh a, "A pakhatna ka ni tihna a nih chu! " A lo ti khauh. 

Ngei zetin ka melh râw a. In hnuaiah ka chhuksan ta daih a. Chaw pawh tihtham ka ei lo. Ṭawng pawh ka ṭawng ve vak lo, Vica nen kan buaina lah chu an hria ang tih ka hlau tho bawk si,. Mali phei chuan a hre tur a ni lo hulhual. Vica chuan min ngaihtuah tih a awmdan aṭangin ka hrethiam reng, ka ngaihven lo lui tlat. Chaw eikham thingpui hâng pawh in loin, "Ka kâwng a na deuh tlat" ka ti a, ka chho ta daih. Khumah ka tluzâl ta mai mai a. A rawn lut ve rang viau. "Ka pa te pawh zaninah Rinchhana nupui turte chu an ve be dawn e." A rawn ti lut a. Ka lo ûksâk duh si lo. " Tuaimam, a thleng vek tawh, khatianga ka tih avang khan min ngaidam rawh. Hetianga thinrim thara intihtauh khum hi a ṭul ber lo a nia." Tiin ka samah a rawn chul a, ka ngawi lui tlat si. 

"Ka hmangaih em vang che a ni. Ka tihpalh." A ti leh sup a. 

"Tun aṭang chuan engmah thup leh zêp nei tawh ngai suh ang che." Ka ti ram hmak a. "Lutuk, i thu thuin ka awm ang, a changtunu ni la, kei chu a changtunu lo ngaizawng ve ngawr ngawrtu ang kha..a ṭha em?" A tih hûrh hûrh chuan ka nuih a za deuh bawk si, ka ngei bawk si. "Hmela, over lo teh. " Ka ti a, min rawn kuah thlawpin, "Zaninah i tihtauh vangin kan englo thei.." a la tizui! Ka va ner nasa tak. 

"Ka dul a puar lian tawh sia, a chi tawh loh. " Ka tih chuan, "Doctor pawn a khât tawka hman a pawi lo a ti vek" a ti hmiah bawk si. "Raipuar te han ît reng reng, ṭuaha.." ka ti a, "I bulah chuan chaw bêl bula ṭamchhawl ang reng ka ni. " A la ti hram, a bengah ka pawt vak a, a rak nasa ngang mai. Chutiang chuan thil liantham leh thinrimna âwm ngawih ngawihah pawh zan khat chu sawi loh darkar 2 pawh ka thinrim khum hleithei lo chu a ni si a! Hetiang reng hi ni ila ka ti..

Mut dawna ka msg dawn chu nui chungin ka chhiar thei ta a. "I zak ve det em? Tikhan.." a rawn ti a. 

"Victora hi nupuite thuamchhawm tur tumsak hmasa bertu record siamtu a nih hi. Chu chu zaninah kan lawm a, a nuam viau" ka va ti a. Ka block nghal daih. Tui takin ka muhil zui ta a. 

Ka nau paiin thla 8 a kai chho a, mahni tawkah ka rit ve tawh hle. Ka inzo meuh tawh lo a ni, incheckup a piangin Victora'n min hruai thei a, ka nute bakah Vica chhungte lamin min ngaihsak em em a, mo vannei tak chu ka ni ve. Chhuah pawh ka chhuak ngai ta meuh lo va, in chung leh in hnuai kal tawn pawh ka harsat ṭan,.Vica phei chuan chet a phal tawh lo. Sangi pawh a hah phah ta deuh, mahse, awm tawp ringawt kha ninawm ka ti bawk si, ka ke a vûng a, ka kawng lah a kham thei em em bawk. Vica hian zanrei pawh sawi loin ka kawng leh hnungzâng a nat tawh chuan min hmet a, a dawhthei hi ka ti ngawt mai. Ka inthlahrung letling ṭhin. Mahse, engmah sawisel leh î a nei ngai lo thung. Neih dawn hnaihah phei chuan ka stress nasa lutuk a, hlauhthawnna nen hun ka hmang ṭhin a ni ber. Nikhat phei chu thli a rawn thaw vuk vuk mai a, kan inpindanah keimah chauhin ka awm bawk si, ka rai len tak hnuah Daisy hi chhun leh zanah an ruai rih tawh a ni. Ka inzawh meuh loh avangin. Thli hlau mi ka lo ni bawk nen ka mangang tawh hle, thli lah chu a na em em bawk si. Khumah rizai ka sin hlun a, Victora ka call ta ringawt, "Lo haw rawh" ṭah aw ṭuau hian ka ti a. 

"Ka laklawh deuh a, ka lo haw vat ang." A rawn ti ve mai a. "Thli hian kan in a len thlu dawn, hei a rapthlak lutuk." Ka ti a, "Aw , ka lo haw nghal e" ti a. Victora nghah chhung reizia kha, midang lah an rawn dikdâk si lo. An hlau ve tho em mawni dawn ni. A tawpa tawpah Vica chu huh hluamin a rawn thleng ta a, a inthlak sawk sawk a, ka bulah a rawn mu ve nghal, thli lah chu a na tulh tulh a, khua pawh a thim ruai mai. Ruah 

thimpui a rawn sur ta bawk nen, engkim chu rapthlak ka ti a, naupai lo ni ta ila chuan hlau vak loin ka mu mai mai ang. Victora chuan min kuahbet tlat a, ka rilru lah chu a kal thui riau lehnghal, "Vic, ka nau neih dawn hnaihah kher hetiang a thleng hian chhan ṭha tak a nei ang. Naute hi a ṭha lo a niang" ka ti khur dar dar a, ka dul zût pahin, "A ṭha vek ang, thil ṭha entirna a nih hi. " A ti mai a. Ka va duhkhawp lo tak. Nau paite mizia leh nungchang hi a tawng ve lo tan chuan hriatthiam a har ang, over min ti tawk pawh an awm ka ring. Mahse, mak deuh mai a nia, nau in pai ve hunah inhrethiam mai ang, stress-in anxiety a hring a, thi thut dawna inhriatna, naute pawh thisaa lo piang tura ngaihna te hi ka nei chamchi reng a, keimahtê hian ka hrehawm tlawk tlawk thin. Vica hian min deal thiam êm zawk a, ka la ṭha mai mai zawk a ni. Thli tleh vak tuk aṭang chuan ka pum a rawn na ṭan ta a, Vica pawh zingah khan a hnaa kal lo mai turin ka ti tawh a, thli leh ruah a lo thawk leh vak ang tih ka hlau a ni. Ka pum nâ chu a rawn zual telh telh a, ka rai tih ka inhriat nîa zêl anga ka awm laite kha ka ngaihtuah a, 'Raichehin a thi' tih ringawt chu ka bengah a rawn ri nawn tluk tluk mai. Ka thlan pawh a tla bat bat tawh a, Victora meuh pawh a chiâi ve tlat. Mahse, Ka nuin rang taka damdawi in kal a rawt ta chung a, Maliani erawh thisen var pek a nih avangin a rawn kal ve thei lo. Sangi leh ka nu ten min zui thei a, Victora pawn a khalh chak fia fia khawp mai. Kan thlen chuan nau neihna ward-ah min kuah lut ta nghal a, ka bungbu thul, awmngaihna reng ka hre lo a ni e, tiang em em hian nau vei hi a lo na ang tih hi ka lo ngaihtuah phak ngai lo. Nurse ho lah chuan, "Nau a la hnai lo" an lo la ti, thin a rim hlur tawh mai. Vica paw'n, "Kha a vial ngawlh ngawlh tawh kha, veitir tawh mai r'u" a lo ti ve a. Ka pum nâ chu a na tial tial a, nikhua ka hre lo titih dawn ta mai. Vica'n mangan hmel zeta min rawn en vawng vawng chu ka hmu phe ruai a, a bak chu ka hre zawm ta lo. Ka harh leh meuh chuan ka taksa chuan nâ engmah a hre lo, a hik mup ringawt. Ka hawi â hû hû mai. A hnua ka hriat leh danin khatia min buaipui hman lo va an phili lai khan Vica mangangin doctor a va ko a, min han en chuan nikhua ka lo hre lo titih tawh si, nau han sang chhuak thei ni hek lo, ka kumkuruh lah a lo kau thei hlek lo a lo nia. Min zai nghal ta rum rum mai a ni. 

Vica hmel ka hmu hmasa ber a, hlim hmel a pu a, min ngaihtuah tih hriat takin min melh vawng vawng bawk. "Tuaimam, fanu kan nei a nia. A hmelṭha lutuk" a tih ri chuan ka chhungril zawng zawng hi a fanchhuak niin ka hria. Ka rilruin, 'Lalpa, ka lawm e.' ka ti zui vang vang mai. Ka taksa ten nâ an rawn hre ṭan a, mahse, nachhawknain min jection nghal, Keima nu leh Vica nu ten min vil chawt a, naute pawh anmahni vekin an buaipui a ni. Ka nu chu ka thlahlel ngawih ngawih bawk. Ka naute ka pawm hmasak ber chuan ka mittui a hnam sawk thei, ka ril a rah ka thisen ringa thla 9 chhung ka pum chhunga awm kha a ni miau a, a ngo si, a chum roh bawk si. Ka en ning thei thlawt lo. A chalah ka fawp ngawih ngawih mai. 

Keima nuin min awmpui ta char char a. Ka lawm tak tak a ni. Victora nitin a rawn kal bawk, mipa riah an phal si lo va, riah hi a chak hmel thei tawp. Naute han khawih vel chu kei aiin a zei zawk mawle! Mipa intipa ve tak a ni a, a inhmeh lo zawk. Kei chuan ka khawih thiam lo, tihnat ka hlau zel a. Hnutê ka pek lai hi ka pawm ve theih lai a ni deuh mai, ka nu leh Vica ten min âwl hneh lutuk. Nurse ho pawn min fiam ṭhin, "I vannei teh e, in pa hi i ring vek thei dawn a" tiin. Tin, Victora chu chhelo an tih thu thlengin an sawi sep sep zel, zep loh chuan hmel leh pianphungah chuan ka phu lo ve bawk a ni. Ka nau neih chamah min chhuahtir ta a, in kan han thleng chu hah a dam huai huai mai. Damdawi in hi zawng a boruak hi a rit ve lek lek zel a, a hrehawm ṭhin. Naute rawn en ho pawh an awm ve nual mai. Ṭhiante an fel khawp mai. Maliani ber hian a en ning thei thlawt lo, pawm leh khawih vel a inthlahrung tih ka hria, "Pawm ve rawh, a nî neihchhun i nih hi" ka ti ṭhin. Ta ṭang chuan a pawm ve ta fô a, Bawihteii lah chu a ṭal belh lo nasa si, a hming kha kan sa lawk lo va. Maliani'n a hming sak a hauh ve tlat mai a. Tuman kan hnial ngam lo. "Hmingthanzuali ni rawh se. Sap hming neih a ngai lo." A ti a. Kan pawm tlang hle, mahse, tuman a hminga kan koh pawh a rinawm loh. Bawihteii a ni vek mai. Kan pa erawh chuan, "Hniangpui" a ti leh tlat. Keipawh min ti Tuaimami tawh a, a duh uluk lo si. Ninawm. Bawihteii chuan chhungkua min tihlimin min pawtkhawm ka ti mai, Mali chauhin min hlat ti mai ang, U Mama takngial pawhin Bawihteii chu a pawm ve hlu hlu zel. A hmelṭha reuh êm bawk a ni. Sam a ngah phian a, a dum hlap bawk. 

Kei pawh ka che chho ve leh ṭan a, rit erawh chawi an la phal lo, ka la indim ve hle. Victora nghei rei tawh lah hi a phun nang nang zel a, ka nuih a za thei. Nupa nun kan hman theih hma kha chuan kan inkarah Bawihteii chu kan muttir thin a, kan han inupa thei ta tihin ka sirah a mu ta a ni. Nun a nuam a, harsatna leh buaina neuh neuh tawk ṭhin mah ila; kan nupain kan chingfel thei zel a, ka lamah kan pa a ṭang a, kan insupport dun viau zel bawk a, ka hlimna hi a kiang mai ang tih ka hlau ṭhin. 

Bawihteii thla 3 a rawn ni chho ṭan a, keipawh nau neih ka ngeih deuh nge ka nulat lai ai kha chuan ka mum nalh tawh a, ka khal tân mai bawk. Vica pawh a dawr huang a zauh ve zel a, ṭhahnem a ngai bawk a, a hlawkna pawh a tel chho ve mawlh mawlh mai. Hetih lai mêk hian buaina pawh a inmûng chho ṭan ta a, Maliani natna khan zual lam a pan tak deuh avangin Daisy kha kan awmpui deuh chawt tawh a, kei lahin nau ka pawm tawh si, kan inchhawr zui thei ta lo a ni. Ka nute erawh ka pa dawr aṭangin hlawkna an tel ve tawh tho a, pawi an ti em em lo. Tin, Rinchhana te kha an innei tawh a, an vanneih asiamin thla khat lek an inneih hnuah Rinchhana pawh a hna aṭangin a kaisang a, an nuin nau a pai zui ta bawk . Bawihteii pawh kha an rawn en ve a, an fel nupa khawp mai. Ateii te nupa an hlu em em bawk, an fapa pawh a ninhlei rual a ni ve tawh a, Bawihteii nen an puitlin hunah kan la inneihtir dawn nia te kan tih tak mai mai kha. 

Sawi tawh ang khan Daisy kha Maliani pindanah a mu ve mai zel a, ani hi kei ang lo taka nun zawiawi leh dam dap mai, ṭawngkam uluk thei tak a ni a. Maliani pawn kei tih loha amah enkawl tura a duh ber a ni bawk. Mali hian a thîk ta tlat mai a! Chu chu kan buaina inṭan chhohna a ni. Engvanga Mali chuan thîk tlat nge a nih kan hre lo, mahse, zan khat an nupain an inhau chiam mai a, chutah chuan, "Nang mihring hi hmeichhe pakhata lungawi thei lo i nih hi. Daisy pawh i melh tai leh tawh a nia, i lo rapthlak e" a tih hrep takah Daisy a lo be ṭha duh ngai miah loh chhan kha kan hre ta a ni. Daisy lah chu a bangbo hle mai a, "U Mama hian min biak hmasak loh chuan ka be ngai lo." A ti ve tlat, Mama lahin a hranpain a be ngai bawk si lo. Kan hriatpui vek. Mahse, Mali chuan, "Daw suh, hman zanah pawh i rawn text kha aw" a lo ti fak mai. Daisy a meng khup ta deuh, "I ngaih ang kha a ni lo" a ti ṭiak a, a mangan hmel hle. 

"Mali, duhtawk teh, Daisy nen hian mipa leh hmeichhia angin kan inbe ngai lo. I hriat tur chu ka zep lovang, Mateii te nen inṭhenawm an nih avangin ka fate chanchin ka zawt ṭhin. Ka fate ka ensan thei lo. Tun hnuah vawikhatmah Daisy hi khatiang zawng khan ti tawh suh ang che." A ti ta sak sak a. Chu zawng keini tan pawh thu thar a ni. Muthmunah Victora'n, "Lawmkima mizia enin Daisy hi lo be lerh leh pawh nise thilmak a ni hran lo" a ti nuah nuah a. 

"Mahse, a ni ve kher lo thei. A nunte chu a sim ve tawh êm hi." Ka ti hram hram a. Kan chhungkuaah hian hetiang buaina hi awm tawh lo se ka duh takzet a ni. 

"Engtin nge nupui nei chung hian hmeichhe dang an va ngaihmelh theih le?" Tia min rawn kuah chuan, "Nangmah ang an ni ve lo alawm." Ka lo ti sap a, kan innuih var var mai. 

A tuk zing a inthiar hlanin a msg tone a rik sek avangin tu tak ni maw ti rilruin ka ensak ta a. Makti zetin ka melh ngawt ngawt ringawt..Daisy ber kher maw?! Hriatthiam a va har si êm.."Vic, nizan khan ka nghak tlaivar thak che asin. Ti nge i lo kal loh? I û vang kha mi?" Tih thu a ni. Hrep taka!