Amah leh kei 17

AMAH LEH KEI..(17)

Ziaktu : Toni Râlte

Ka thaw hawk a, "Eng thil nge in zêp le?" Ka ti sap. Tetea te chu roomah an lut ta nghal a, "Le..sawi rawh le" ka ti zui zat. 

A aw a thian kharh a. "Thla thum liamtaah khan ka pum lam chiang lo ṭhin leh ka thawhah ṭhin chu ka inentir a, Hrilh che u ka duh rih lo va, eng emaw a thlen takin ka tia. Tichuan, ka inentir chu test te kan han nei a, Ka thin hmawr chu a lo cancer reng mai a lo nia! A ṭantir a la nih avangin doctor chuan hlauthawng lo turin min ti a, ka thin lehlam chauh a la kai a, chupawh a hmawr lam chauh a ni, chuvang chuan doctor te pawn beiseina an nei sang hle a, mahse, inenkawlna a hautak lutuk a, ka rilru a hah ṭan ta a ni. Tichuan, i nuteii chauh hian a hria a, i putea pawh kan la hrilh duh lo. Hnathawka i chhuah hlanin chemo te kan khai a, Victora te ina i riah chawt laite, Maliani i awmpui laite kha kan hmang ṭangkai ṭhin. Keimah hian ka tum êm a, thil ka ei ṭha bawk a, bakah min chîk vak lo bawk nen damlo ka ni tih pawh in hre mang lo a nih kha. Ka rilru hah tizual turin Victora nen in inzui a, Zuala hnen aṭangin khatiang thu kha ka la dawng zui leh ta bawk nen, i hmakhua ka ngai a, Victora i duh thûk sâwtzia ka hre bawk nen, pawh ṭhen theih che u ka inring tawh lo va. Chutihrualin ka inenkawlna lamah kan sum bâwm a phai ve zel a, i nuteii hian min ṭawiawm ṭha êm zawk a, hma ka sawnin dam lam ka pan ve mêk tawh. Doctor te pawn, "Dam ang i ni tawh e. I rawn kal hma êm a, i vannei a nih hi." Min ti hial nghe nghe, ka lawm hle bawk. Mahse, tihian nau i pai thu ka han hre zui leh a, ka inenkawlna lamah ka inhmang da êm mai a, i nuteii sum lah kan hmang zo titih tawh si, pasal i neih daih chuan kan khawsak a harsa zual dawn tih a lang reng a, i nau mawlh mai hi ka ngaihtuah a ni. An zirna a hautak chho ve zel si a, ka rilruin ar bo ka zawng takmeuh a ni. In unau rilru tihhrehawm ka hlauh avangin ka natna lah sawi ka duh si lo. Chuvang a nia pasal i neih hnuah pawh i nau chawm a ngaih thu ka sawi tâk ni. Nau chu pai lo la Victora i neih hi ka la remti chuang hauh lo vang. Mahse, beisei loh tawpin nau hial i pai ta si a, sawi leh sawi hnu pa lo va fa nei nu pathum han chenho duah chu mite ngaihah pawh thil zahthlak leh mualphothlak a ni ve a, midangte hmuhsitna ka tuar ngam tawh lo a ni. Heng ka sawite hi i nau hriat ve kher a ṭul lo a nia, i dawr pawh i nau kuta dah tura ka tih chhan che chu tikhan i hrethiam tawh ang chu.." a ti ta dap dap a. 

Thawchham lek lekin ka lo ngaithla a, chil pawh ka lem ṭha ngam lo. Chutiang taka a ruka ka nuin a lo tuar chuan ka rilru a tinain ka khawngaih ta êm êm a. A natna kan hriat hlauin a lo inthup ngat ngat a, ka ngaihtuah lêt hian khatihlai Vica te in leh damdawi ina ka chettlat lai khan ngaihbel tur ting chuan ka nu kha a cher deuhin ka hria, amah hi nu thau mum tak a ni lo hrim hrim a, a hriat vak loh zawk a ni. Fanu nurse a nei a, ka rilru tihhrehawm hlauin a natna a lo thup zawk hlauh a! Sum leh paiah phâng êm êmin hun an lo hmang ṭhin bawk. Kei lahin Victora ngawr ngawr ka lo buaipui a, a rilru hrehawm ṭhin dan tur chu..

"Nu, a va rapthlak ve. Engtin nge i zêp theih zawk? Fanu nurse i nei tih i hre lo mi?" Ka ti a, ka aw pawh a khur dar dar mai. "In rilru tihhah belhchhah kha ka duh lo alawm. Tetea lah a la â roh si a, nang lah ka lakah i hel tih ka hre bawk nen." A ti charh charh a. 

"Chupawhnise, engpawh thleng se min hrilh tur alawm, a ruk a rala inenkawl a ngai em ni? " Ka ti a, ka lungawi lo lek lek zawk a ni. "Ni e, a hunlai khan i nuteii nen tih âtin kan awm a ni ber ang chu. Hrilh che kha ka tum ṭhin a, mahse, ka thei lo leh ṭhin. Bakah hniam lam aiin hmasawn lam ka pan ta bawk nen, Zêp hlen theih ka inring a, mahse, Vawiin khan ka inngaihtuah a, engvanga i nau chawm tur leh dawr pawh a kuta dah tura ti che nge ka nih tih hi a chhan i hriat ve ṭulin ka hria a, i ngaihdanah chuan i pain a hnutchhiah liau liau che a nih avangin nu duhâm leh fapa duhsak leh hmangaih zawkah min ngaih ka hlau ve a, chuvangin tihian ka han inpuang ta a ni e. Tunah chuan ka dam tawh lutuk, ka pum pawh a na tawh ngai lo e."..min hneh tum zet hian a ti a. 

"Naktukah va incheck up leh ang, ka kalpui ang che" ka lo ti sawk sawk. "Karlehah hian ka incheck up chu a hun dawn chiah, ni e, min va kalpui dawn nia. " A ti a. 

"Tunah hian sum leh paiah chuan i phâng tawh viau em ni?" Ka ti leh a, "Zep nak emaw Victora nen pawh lo innei dawn ta ula i thuamchhawm tur ngau ngau pawh hi kan lei thei ang em tih a ni, i nuteii nen hian kan khâwk titih tawh a, i putea zawk tunah chuan kan pûr tawh. Mahse, anni pawh sawti mai saw an nia, pur vak chi an ni si lo. Hei tak hian a nia ka rilru tihah zual ni. " A ti ta a, ka rindansa a ni hrim hrim. Tunlaiah thuamchhawm hi a hautak tawh êm a, mi hausa ina lawi lut tur phei chuan tlema mawihnai leh changkang a ngai ve vek tawh a, ka nu phei chu rualawt chi a ni bawk nen, mite chhawm theih ang kha min chhawmtir a tum ve leh tlat dawn tih a chiang reng, chung zawng zawng nen chuan a rilru a lo hah zual âwm mang e. 

"Thuamchhawm lam kha chu ka lo lungkham em em hleinem, chuan Victora ka neih chu i remti tihna chu a nia tiraw?" Ka ti leh hram a. 

Thawk la hapin, "Ka zep lo, thinlung taka pawm hi a harsa ka ti, Zuala sawi bak a chanchin ka han chhui hian ka hlauhthawn ber zawk chu in innei tê tê ang a, hmeichhe dang a kawpsan leh si che ang a, fa nei hman tingtang siin i rawn kir leh ang tih hi..a hmeichhe kawp hnem tawhzia leh tumah tihnat a hreh lohzia ka hre tawh si a. Mahse, sawi leh sawi hnu a fa i pai miau si a, tihngaihna a awm tawh lo a nih hi.." a ti malh malh a. 

"A dik alawm. Mahse, Nu, Vica ka ṭan vang hrim hrim pawh ni lovin a danglam ve tawh lutuk asin. Zu hi chu a in lohna a rei ve tawh, hmeichhe dang lakah rinhlelhawmin a awm bawk si lo. Tunah chuan rin phawt hi a fuh ber.." ka ti ve ngial a. Kan ngawi ta vang vang. 

Nuteii chuan, "Mateii sawi ang khan Vica hi rinngam phawt ṭha ka ti keipawn. Hmalam hun chu lungkham vak a sâwt lo " a ti ve a, ka lama ṭang reng ṭhin a nih avang hian Nuteii hi chu ka ngaina zual a, bakah ka nu thurûk a lo zeppui ṭâng ṭâng leh a sum leh paite ui miah lo va a lo hmantir avangte khan ka lawm takzet a ni. 

"Thuamchhawm kha chu lungkham tawh suh. Dawr pawh ka pute an zahawm avangin ka hmingin awm tho se, sum lut erawh Tetea accountah emaw i account-ah emaw kan dah zel dawn nia. Lungngai miah suh " ka ti ve ta sauh sauh a. 

Zanin chu ka hriat tur ṭul zawng zawng ka hre ta bawk a, ka thawveng ta hawk mai, ka nu lah a lo dam ṭan tawh bawk nen, Victora nen kan innei dawn tih a chiang ta bawk si, ka mutui phian e. A tukah pawh chuan boruak a nuam hle, Maliani te in ka va thlen chuan Vica a lo la awm a. Nizan khan ka nu chungchang tlem azawng kha ka va hrilh ve a, hmaichhana sawi dun kan tum ta a ni. In chungah kan chho a, engkim a zawng zawngin ka hrilh ta a, "Ka pi tur chu a lo va khawngaihthlak ve aw. A rilru a lo buai reuh dawn êm a nih chu mawle" a ti ve boh boh a. 

"Ni e, dem theih a ni bik lo, pasal neih pawh ka hreh phah vek."ka ti a. Min rawn thlêk hâwin, "Hreh lo vang. I â mi? Harsatna hi inbawhbehtir lo va, rahbeh zawk tur aw. " A ti bung nghut a. 

"Nang ang duh duh nei thei dinhmuna khawsa chuan kan buaina hi i hrethiam lo vang" ka ti nghat a, ka lungawi lo ringawt lehnghal,."Ka duh duh ka nei thei lo. " A ti chuai ruih a, Rinteii ka hrechhuak nghal, ka inthiam lo hnuhnawh kher mai. "Sum leh paiah in buai ve hleinem. " Ka ti hlar a. 

"Sum leh pai hi hlimna ber a nih lohzia chu kan in chhung aṭang hian i hrethiam mai lo em ni? Thawmhnaw chu i lei thei ngei ang, hlimna erawh pawisaa lei mai mai theih a ni ve lo. " A tih chu dik ka ti viau mai. Chhan ngaihna pawh ka hre mang lo. 

"In in anga lawi tur chuan thuam chhawm mawihnai te a ngai ve alawm. " Ka ti leh hram a. A ngawih vung vung hnuah, "Buai lo phawt rawh. Thildangah i rilru sêng ve suh. I naupai lai chiah kha ngaihtuah rawh. " A ti nghut nghut a. 

Maliani'n min lo call avangin kan chhuk ta phawt a, ani pawh a hnaa kal turin a chhuak zui ve nghal. Sawi hmaih loh tur chu nizan khan Julie khan ngaihdam dilna post kha a rawn siam leh ngei a, mahse, ka ngaihven zui vak lo, ka nu chungchang kan sawi ta bawk nen. Ngaihven mood-ah khan ka awm lo hrim hrim. Maliani chu a kua a lo dik lo chu niin, "Ka mawng a put" a lo ti a. A pum a dawm vung vung bawk. Ka va kaitho vat a, toiletah ka va hruai ta vat a, zak thei dinhmunah pawh a ding tawh bik lo a nih hmel,. "Zing lamah chaw i ei duh lo leh ang a, i pum ṭha lo a chhuak a nih kha." Ka ti a. "Ka hmarcha ei hi a niang." A ti ve ringawt. Chutiang chuan nilêng deuhthawin a tlan ta mai a, a chauh pawh a chau, Ors kan inpe tluk tluk mai. Dar 3 velah phei chuan a men pawh a meng ṭha peih tawh lo va, diaper ka hrentir ta ringawt bawk,. Pi Lingi te bulah eng nge a ei ka zawt a, tukinah chaw a ei lo va, nimin tlaiah khan theipui leh tengtere den a lo ei ṭeuh a niawm e, chaw lah a ei tlem leh bawk si. Chu chu hetia a awm chhan hi ni ta berin ka hria. Damdawi ina hruai a duh lo bawk nen, a buaithlak tak tak a ni. Vica rawn haw lai pawn kan la inbuaipui a, a û chu a rawn ngaihtuah ve hle. "Riahpui mai la" a ti leh vut a. "Ka nuin a ngaikawi palh ang" ka ti bawk si, mahse, Daisy a fel tho a, an inbuaipui thei maiin ka ring, innei thei dinhmuna kan din tawh avangin an ina riah hi ka duh vak tawh lo. A mawi lo ve ka tia. Maliani pawh a inthlahrung ve nge, "Va haw rawh, Daisy a awm alawm" a ti a. Lungmuang tak chuan kan inhawnsan tak kha. 

Ni 2 hnuah palai an rawn lang leh ta a, an inhuam thui êm avangin ka nute tan pawh lo rem loh theih loh a ni ve tawh a, an inrem chu a ni ta. Ka hlim sosang hran lo va, mawlhtu ka la nei tho. Inneih hun atan thla thar ni 21 an ruat ta a, kei pawh ka raino a lang chho ve ṭan, innei mai tur kan ni bawk a, Vica pawh a rawn leng ve ngam tawh. Ka nu a awm ve kur erawh chuan boruak a nuam tak tak thei lo. Thuamchhawm tur pawh ka dawr aṭang leh ka hlawh ka khawl vete aṭanga inlei ka tum a, ka nu erawh chuan putea pawisa puk a lo dil thung. Mahse, Pathianin kan manganna a hria a, min hmangaihna a lantir niin ka hria, Ka beisei loh deuhin ka dawr aṭang chuan sum ka dawng tam a, engmah felhlel a awm bawk si lo. Mak ka tiin thla hmasaa ka dawn let thum dawn ka dawng a, ka account khawih chet ngai miah lovin thuamchhawm pawh ka inlei thei dawn ta. Ka nu pawh a lawm ve khawp mai a, "Heti hi chuan lung a dam ta deuh e" a ti ve nghe nghe. Victora te Kohhran SS hall-ah kan inkutsuih dawn a, pui deuha tih kha kan tum lem lo. Kan harsatzia hretu Pu Ramzauva te nupain ruai pawh an buatsaih vek dawn a, keini lamah chuan man eitute a hminga kilpui kha a ni mai. Ka ṭhiante hlutzia a rawn lang a, a sum pai ang zawng a nih loh pawhin ka neih phak loh bungraw ṭha pui pui min leisak hlawm a, ka hnuk a ulh lek lek hial mai. 

Raino ka la na thung a, hnaa kal loh chang pawh ka nei ṭhin. Maliani te lamin min hrethiam khawp a, Victora rawn leng hi ka ei duh tura an rin an lo thawn ṭeuh zel. Chutiang khawpa in hrang atang pawha min ngaihtuah chu ka nu rilru pawh a dang ve tial tial mai. Tin, ka thinchhe si a, Victora ngei pawh hmel huat chang leh vin hrep hrep chang ka nei ṭhin. "Ka hmu ning che. I lo kal ngun leh lutuk."ka tih fawk fawk pawn, "Tihpalh,. Nih ka haw rih ang. Min mamawh chuan min lo ko vat la aw. Ka hmangaih che" a ti dam thlup thei reng a, ka nuin chungte chu a hmuin a hre ve vek si, a rin ai daiha ka tana dawhthei a lo ni chu mak a ti ru hle ṭhin niin ka hria. Chaw rim hi ka haw tlat a, ka taksa pawh a tla chak hle. Victora a mangang ṭhin, chaw ṭha nia a hriat miin an sawite chu a lei pawp pawp a, chung chuan min la chelhding hram hram niin ka hria. "Heti em ema raino i la na hi i incontrol ve îk loh vang a niang, Victora'n a duatzia che i hria a, i no mah mah a ni." Ka nu pawn a ti hial tawh. Control chu ka tum ve lutuk, a rawn thawk phut zel. Tetea te hi ka hrawk reng zel a, ama hriat tawk lek hian a phun ve nuah nuah zel. Chutiang harsatna neuh neuh karah chuan kan inkutsuih nî pawh a rawn herchhuak ve ta hlawl mai. Chawhnu dar 1-ah inkutsuih tur kan ni a, mahse, zingkar atangin kan buai tawh. Chhung leh khat kan nei vak lo naa ka pa chhungte lamin min rawn thuam mawi hle, ka lawm takmeuh a ni. Ka cher lutuk a, mo kawr pawh ka inhmeh lo vek,. Ateii ka dinpui ta ngei bawk. Victora erawh a thar vûk mai a, a hlim tih a hriat ngawih ngawih. Ka nuin min chah ngun bawk a, keipawh hlim hmel put ka tum ve nasa. Vica chuan Lalvala a dinpui thung, Jasmine erawh a rawn tel ve thei ta lo. 

Inneih hunserh a zo va, tihtur neuh neuhte kan tih zawhah thawk khat chu a veng huai e. Ruai pawh a tuihnai khawp mai, Maliani pawh a sawi ang ngeiin a rawn vul nasa mai a, hmuh a nuam takzet a ni. Ka rin loh deuhin Julie a rawn tel ve bawk. Mahse, engah mah ngaih loh ka tum ve, tihtheih a nei tawh lo bawk a. Lawiṭhat zan chu chauh a na êm a, kan inbual a, kan muhil nghal daih. Ani pawn min hrethiam ve a niang chu maw. A tukah pawh buaipui ngai ang chi leh tihtur la awmte chu midangin an tifel vek a, Maliani zawk ka buaipui ta daih. Kan inremsiam danin tihian a hma angin ka enkawl leh ang a, ka hlawh erawh ka nu ten an dawng thung dawn a ni. Ka nu te harsatna avangin tlawmah pawh ka la thei bik lo a ni ber. Ka nu ka incheck up pui khan Doctor pawn cancer hrik an hmuh tawh loh thu leh a thin cancer inṭanna lai an paih tawh pawh a rawn ṭhan chhoh ṭan leh thu a sawi a, a ngaihṭhatthlak e. Thin cancer hi a rang viau naa hriat ran chuan kawng hi a la kaw ve a, tin, zu in mi thin ral tawhte pawh a insiam thar leh thei tih kan hriat kha..ka nu pawh hi hriselna ngaipawimawh chi a ni ve a, "Nâ in neih chuan sawi vat zel tur, mahnia tawrh loh tur. Mizote chu kan chhel leh lutuk a, kan tuar ringawt zel a, a tawpah chhan hman loh khawp kan ni zel tawh thin." Tih thu hi a sawi fô mai. Tetea pum a nat ṭum pawn a duh lo chung damdawi inah a hruai hmak tawh. Tawrhchhel ai chuan damna hi a hlû..

Victora nen nupa kan lo ni ve ta reng chu a nia. A hmaa kan awmdan ang tho kha a ni mai. Zantin khum khatah kan mu dun tawh a, nitin a hnaah a kal a, kei Maliani ka enkawl bawk a. Ka raino pawn ziaawm lam a pan ve tawh a, nupa nun pawh lungrual takin kan la hmang thei e. Zan khat erawh, "Vic, ka virgin tawh lo tih i hriat khan a ṭhawng ve deuh che em? Engmah i sawi zui si lo va." Ka ti ta pek a. 

"Ṭhawn kha chu min ṭhâwng ve deuh,. Mahse, zawhna neih ka tum hran lo, kan intawn hmaa i nundan chu i thu thu alawm." A ti sup sup a. 

"Hetiang ngaihdan hi mipa ṭhenkhat chuan an nei ve miah lo asin, kan ṭhiannu pawh a pasalin a virgin hawngtu a zawt ngat ngat a, a lung a dam thei thlawt lo mawle.." ka tih chuan, "Virgin digger an nih chu" tiin a nui hawk hawk a, thutak deuh zawkin, "Mipa kan inang lo ang bawkin hmeichhia pawh in inang lo va,. Hmeichhe ṭhenkhat an bialpa te bula inla virgin tlat, gin tawh si lo an awm ve a, engkim sawi sa se zêp kual lovin. Mipa ṭhenkhat lahin an bialnute virgin hawnsaktu hriat kher an lo châk ve bawk si,an buaina a nia, keini chu kan buai ve lo. A dik em?" Tiin min rawn kuah a, a rim ka lo hnim vang vang mai. Inneih sarhû lai chuan kan inngeihin kan insi chial reng a, eng nge maw kan an zel dawn ni..

Ka nute nen pawh kan inbe reng reng a, ani pawn min ngaihtuah ta vak lo niin ka hria. Victora mize diktak a hrethiam ve ta pawh a niang e. Ka chhungkaw tharte chu reitak ka lo hriat tawhte an ni bawk a, deal an harsa lem lo. Mali ber hi a khirh ta deuh a, kei aiin a upa zawk a, mi hmai êng a zah vak bawk si lo. Ka nulat laia ka mize nghal takte kha ka lo sim ṭhen ve tawh bawk nen, biak hi chu kan inbe thei ve mai, mahse, a ṭawng hian mei tawitê a nei ṭhin a, ka lo manthiam ve tho zel si. Lehlamah amah aia junior ka ni a, ka nu leh pate bakah Sangi thlengin min ngainain kan inpawh bîk sia, min thik pawh a âwm ve reng. Mahse, amah hi pawh theih leh han kawm bawrh bawrh theih tur hian a awm duh tlat lo va, kar khatah ni 3 te hi a chhungte inah a leng tlangpui a, ina a awm pawn ṭhu tawp, ei tawp, Sangi tir kual reng kha a ni mai a, a intilal thiam ka ti mai. Ka ngaihtheih lohna em em chu a pasal nen an thawmhnaw takngial pawh a su peih lo te, mi eirawngbawlsa a sawisel fô ṭhinte hi a ni. Ka nuin min fuihnaa a sawi zin ber, "Mi thatchhia chu khawi hmunah mah an tlangtla tak tak thei ngai lo." A tih kha Mali nunah ka hmu ka ti mai, a taima tawk lo va, Sangi kutah engkim a dah a, chu chuan amahah nuam tih lohna a neihtir tho si, engkimah inngaihbel kualin a rukin a inkiltawih a, mahse, tlawm leh inthlahrung anga lan a hreh vangin tawrhhlelhawm takin a awm ta ringawt niin ka hria. 

Inrinni chhun a ni a, ka puanpho han sengin ka thlep fel mêk, Vica call ka dawng a, "Thil i ei tawh em?" A rawn ti a, "Ei zo chiah, nang?" Ka ti ve vat. 

"Ei tawh e. Vawiin tlai chu lo insiam lâwk rawh aw. Ṭhianpa Rinchhana khan chaw eiah min sawm ve a, ngaihpawimawh a ṭha." A rawn ti a. Rinchhana kha inneih ni pawh khan a rawn nalh khawp mai. "Mahse, U Mali nu ten chaw an rawn ei dawn asin" ka tih chuan, "A ho! I nute pawh ni hlei lo " a ti hluk hluk a, "Aw le, ka lo insiam ang." Ka ti ve leh ta a. U Mali hi chuan a duh hun hunah a chhungte hi chaw eiah a sawm tawp zel, ka nute chuan kan inneih hnuah vawikhat chiah an rawn ei, chupawh ka pa in a sawm vangin. Ka inbual a, ka dul puar ve âk tawh chu chulin darthlalang hmaah ka ding vang vang. Ka vannei a, Maliani'n rai kawr tur kawrfual nalh deuh deuh min pe ṭeuh mai a, "Ka chhuak ve ngai chuang lo, nei vek rawh, a hrana ṭhuitir a buaithlak." A ti a. Ka haksak ta hmiah hmiah mai. Vica pawh a rawn haw hma a, a inbual ve nghal. A hnung nawhsak hi a phût ngei ngei zel a, a bal tak tak pawh hi a ni lo, a tur ve rengah a ngai ka ti mai. A thawmhnaw hak tur ka dahchhuahsak hnuah Maliani ka va jection leh zuai a, U Mali a rawn dak ve zawk. "Chhuah i tum elo? I va inchei ve" tiin min rawn melh a, kawrfual êng, sin te tea a sena par ka ha a, ka hmai ka lo hnawih ve hlek nen, "Aw, chaw kan eichhuak dawn a." Ka lo ti a. 

"Ka sawi vek tawh sia, ka nuten chaw an lo ei dawn ka tih kha, Sangi lah a haw daih si, tuin nge rawngbawl ang?" Lungawi lo tih hriat zet hian a ti a. 

"Ka hre nang, nangmah ni mai lo'm" ka lo ti ve hmak. Sangi hi nimin piah khan a nî a boral avangin an khuaah a haw ve zawk a ni. Sangi awm lai pawn tlai lam eirawng hi chu keiman ka bawl deuh ber a, zing lamah Sangi ka ring ve thung, in chhungkhur hna erawh tih ve vak an remtih loh avang hian Sangi'n a ti thung a, kan nupa leh Maliani thawmhnaw erawh ka su vek tho. Sangi pawn ka awm chu nuam a tih phah ve reng a. 

"I timak e a, eirawng ka bawl ngai lo " U Mali chuan a ti chang rât a. "Order mai la. " Ka ti ve leh ngat. 

"Ka sawi sa vek a, hetianga ro hran lo rel leh kual vel..a rilru chhiatthlak lutuk " a ti hlaih hlaih mai. Maliani'n, "Ti nge mi siamsa ei tura i nute chu i sawm ve ngawt a? I zak lo mi?" A lo ti ta hmak a. Tau bûrin a kal ta a, an pa hi a lo la haw lo va, a vui leh ngeiin ka ring. U Mama lah duapzûla a nia, an nu vangin Sangi leh ka nu pawh a khak tawh. An hneawm nupa ngawt mai. Maliani chuan, ",Julie nge Mali hian zahna tlachham zawk ang le. " A ti hap a, ka nuih a za deuh. Julie tak hi chu kan inneih hnu hi chuan a rawn lang leh tawh miah lo va, Vica phone ka ensak pawn a rawn biakna ka hmu ngai lo.

"U Mali hi a niang" ka ti a, kan nui dun nasa mai. Victora a inpeih ta bawk a, Rinchhana ina chaw ei tur chuan kan chhuak ta a. U Mali min ṭawngkhum dante chu ka hrilh ve a, "Phuihnam kan lei hawnsak dawn nia" a ti vut. Rinchhan pawn a in luah a lo sawn tawh a, a hma ami ai khan a zauin a nuam zawk bawk. Hmeichhe pakhat a lo awm ve a, a farnu a lo nia. An lo inbuatsaih nasa ve ngang mai. Rinchhana'n hetiang taka min duhsak chhan hi Vala kâ aṭanga ka hriatdanin Rinchhana nu hi nikumah khan Aizawl Civil Hospitalah a boral a, an inenkawl rei tawh avangin an khawsak a harsa tawh hle a, a nu ruang lah an khaw lama phurh a ngai si, Chutah chuan Victora hian an veivahna senso zawng zawng chu a lo tumsak a niawm e, chuvang chuan Rinchhana tan hian a lo hlu ve êm a, a tichhe phal lo ve a ni. Hlim takin chaw chu kan ei a, a farnu lah chuan eisiam a lo thiam fû mai, Vica'n, " Kan nu eisiam tih lohah chuan ka la eitui ber e." Tiin a fak ve ngial, engmah ni lo mah ila mi hi a chawimawi thiam ve ṭhin a nia. Chaw eikhamah pawh kan ṭhu khawmuang ve ta reng a, Rinchhana chuan chaw eia min sawm chhan a sawi ta a, "Englo a nia, nupui neih ve ka rilruk deuh a, helaiah mikhual chan kan chang si a, nangni nupa bak han râwn tur ka hre vak lo, ka in luahna te lah hi pa ber rui phût reng a nia,. Engtin nge maw chet kan han lak ang le. " Tiin. 

Vica a phur ngang mai, "Ramhlun N- ami kha mi? " A tih chuan a lo bu nghut a. "Lalvala nen kan va palai ang a ni mai lo'm ? Ni lo'm ni? Tuaimam" tiin min rawn en a, "In patling lo ve e, in zahawm loh ang. Ka pa saw tir zawk ila. Pa Kunga nen" ka lo ti a. Rinchhana pawh chuan, "Nia, Pa Zauva hian min tlawmngaihsak theih chuan a lawmawm viau ang. Nangni chu kal lo ve, in va sawibuai vek palh ang." Nui huah huah chungin a ti a, Vica pawn, "Ka pa chu ka lo be dawn nia. Ṭhianpa, nupui neih chu a inchhirawm loh lutuk. Chuan, hetah in awm nghal dawn nge?" A ti thuphung a. 

"Awm ang, kan khaw lamah kan tlangtla vak tawh si lo va, tihian kan unau hi kan ni tlawng ang." Ngui hmel deuh hian a ti a. An chhungkaw chanchin vel engmah ka hre ve lo naa a nu a boral tawh si chuan a pa a belhtlak vak loh a nih ka ring deuh. Chutianga ruahmanna te an siam zawhah muangmarin kan hawsan ve ta a. Rinchhana te chhungkua vel chu Vica chuan min hrilh ta tho, a nu boral hnu kum khatah a pain nupui a nei leh a niawm e, a nupui lahin Rinchhana te rualpui vel tur fanu leh fapa a chhawm ve ta bawk si, Rinchhana te unau zinga upa ber hian pasal a nei tawh a, Rinchhana'n he lamah hna a hmuh avangin in a rawn luah ta kha a nia, a han awm ta lo chu a farnu kha an lo en hrang ta deuh a nih hmel, a farnu tuar thei tawh ngang lo chuan a û hi a rawn bêl ta tawp mai a ni. An lo khawngaihthlak ve hle mai, nupui pasal pawh hi fa bîk neih ve ve chuan inrem taka khawsak a lo harsa a niang e. In kan thlen chuan dar 9 a ri lek lek tawh a, kan lut chiah tihin U Mama'n a nau chu a lo hau nghal bawrh bawrh mai. "Engvangin nge ka pite chaw rawn ei zan khera chaw in ei chhuah a? Min va zah loin min va tham lo ve" a ti tûn tûn a. U Mali pawh intithei fahranin a lo ṭhu ran mai. Ka nu te pawh an awm ve reng. Vica chuan, "U Mali nute an nia, ka pite an ni ve hleinem, pawimawh ka tihnaah kan kal mai a ni." A lo ti ve hmak a. 

"Lalrinmawi, khatiang khan mi chhang reng reng suh, ka chhang chhang leh i nih hi. Nupui i neih aṭang hian min zah lo sâwt riau mai a, fuihpawrhtu che i nei ṭha tih a lang reng. " A ti leh hmuar hmuar a, a rui deuhin ka hria. "Chaw kan eichhuak kha a pawina leh inzah lohna a awm lo. A bul chu i nupuiin eirawng a bawl peih loh vang zawk a ni, Hruaipuii siamsa a nute eitir a tum a nih kha, ka nupui hi i nupui maid a ni lo a nia. " A û melh kar chung chuan a ti ve ta nghut nghut a. Pa ber a rawn inrawlh ta, a ngawi thei zawk kha ka lo tia. 

"A tawk viau e, Lawmkim, nangni pawh han mu rawh u, Vica te pawh mi chaw ei tur kan neih laia lo chhuah daih kha a mawi lo. Tun hnuah ching tawh lo u la a ṭha. " A rawn ti ve a. U Mali'n ngeiawm fê hian, "Sangi awm ta lo chu tu te emawin inlak value nan an lo hmang a.." tiin a nui lui nghek..

"Sangi awm loh hian tu emaw chu a lo hlutzia i hre ta chiah a nih chu.." ka ti ve sak a, Vica nen in chung lam kan pan zui nghal. 

"Vawikhatmah ka hmingpumin min la ko ngai lo asin. Lawmkima hi Mali nupui a ni ta zawk a nih hi. " Rilru nat hmel deuh hian khuma ṭhut pah chuan a ti a. 

"Hrethiam rawh, min hêk danin a zir a ni mai, chutiangin U Mama hi a rilru a kawi lo" tiin ka lo tlipsak hram a. A ṭawngkam ngeiawm takte erawh kha chu ka ngei ve tho mai. Mood fuh mang lovin kan mu meng kar a, sawi tur a vâng bawk si. A tawpa tawpah a thei ta ngang lo a niang, "Tu te emaw vanga kan nupa inkar thlengin a tawrh ka remti lo, kan mood chhe lutuk thawidam nan..hawh teh, Tuaimam.." tiin min rawn kuah a, min fawp zui mawlh mawlh, keipawn duhâm takin ka lo chhang let ve a, thinrim hrikthlak nana nupa nun hmang ta ngawt hi an awm ve ngai ang em le?! 

A tuk thlengin boruak chuan ziaawm lam a la pan thei vak lo. Sangi zin chhung chu ka nu hian thawh a hre bawk a, mu rei se min duh ve avang hian a lo tho ve diam zel. Mahse, eirawngbawl tak hi a thiam tehchiam loh avangin tlai lamah ka siam âm ṭhin a, zinga a ṭhing rin theih turin. Mahse, nizanah khan Mali chuan an eitur kha a lo order tak tak a, zingkarah kan buai ta deuh. Mali mut tluk tluk chhungin tukṭhuan ka peih ta hram. U Mama phei chuan tlai a hlauh vangin chaw ei loin a chhuak daih tawh. Chaw ei dawnah Mali chu a rawn tho a, "Chaw ka ei peih lo, ka nute inah ka phei dawn." A ti nghal ngawt, tuman kan chhang lo. Maliani pawn a rawn ei ve a, "Indantir mai ta che u, in ngam lo em ni?" A ti bawrh bawrh mai. 

"I pa hi lawm, ka sawi pawn Mama hi a khawngaih zel a, in dang ringawt se tuin nge rawngbawl ang? Tu nge in chhungah che ang? I û vek a ni dawn a, awmpui la se, i û hlawh a chuti tehlua bawk si lo, Mali a che sang si. I û tan phurrit siamsak a hreh êm a ni." Ka nu chuan a ti mawlh mawlh a. A dikna chen a awm, Mali awmdan hrechiangtu tan chuan in dantir a ngamawm tlat loh. 

"Aw..a duh a, u Matei thlak nan a hmang tawh a, tuar ve se ni mai lo'm. Heti hrim hrim chuan kan chhungkua kan hlim thei tak tak lo vang, in dang chiah se in rin aiin Mali hi a fel zawk maithei asin, hetah Pipi leh Sangi an awm a, a ring vel mai mai a niang. Hetiangho hi chu in hrang an han chan chiah hian a ṭhahnemngai ngai an ni ziah. Tenawm lutuk." Maliani chuan a ti phiar phiar a, hei pawh dikna chen a awm. Ateii te monu pawh kha an in dan hma kha chuan a'n hrisel lo khawp a, englai pawha nâ sawi reng chi, mu deuh reng kha a nia, a mutnaah chaw te an va pe ṭhin. In hrang an han chang ta chu leh! Awii, ani aia nu hrisel leh viak ṭha kha an lo tam hauh lo. Ateii te pawn fiamthuin an la tawp. Mo kan nihna hmun hi kan in a ni ve tawh tih hre miah lo ang maiin mo ṭhenkhat hi chu kan inti mo lutuk ṭhin a, in chhungah ṭhahnemngaih kan hreh a, neitu angah inngai ve loin midang kan ring a, tiang chuan kan chhungte nen inpawh a har êm a ni. 

Victora chuan Rinchhana chungchang te kha a pa chu a hrilh a, Ka pa pawh a inhuam ve khawp mai. Va insawirem hlauh se a lawmawm ngawt ang.

Ka naupai pawh thla 6 a rawn ni chho a, ei leh in ka duh ta bawk nen, ka thau ve hmân tawh mai, kan pa chuan, "I îtawm tawk chiah. Rai i inhmeh,." A ti ṭhin. Tlai tin kan in leh thlanmual inkar hi ka kal ṭhin a, Sangi'n a peih changin min zui ve bawk. Maliani pawh a ṭha chho ti mai ang, SLE zawk hi a buaithlak a, Hiv tak hi chuan a tibuai vak lo. Mali hian a thinhrik a, mahse, a chhungte awm lai chuan a tilang ngam ngai bik lo. Enkawltu ber ka nih avang hian, "I thisen hi i test tawh maw? I eisiam kan ei lo thei si lo va, a chang chuan ka tui lo rawih zel. A lo kai ve tawh maithei che ni.." ti te hian min ṭawngkhum ṭhin. 

"I inlak changkan nen i mawl ka ti.." ka ti ve hmiah. A thinrim viau naa ka kalsawn daih avangin a insawh tau nghawng nghawng mai. U Mama hi zin reng se a nuam, Mali hi an inah a phei daih zel a, a awm loh chuan Sangi mood a ṭha thei em em a, chhungkaw boruak pawh a nuam ṭhin. Keipawn an chhungkaw mood ka ti mai, an inkawm ve bawrh bawrh ngai lote chu thaibosaka kan chhungkua anga rik bawrh bawrhtir hi ka tum ve nasa, an lo ṭhanhnan tawh a nih avang hian a la harsa rih êm a, mahse, Zanriah eikhamah ṭhutkhawmna pindanah thingpui hâng in pahin ka titipui chiam zel. Ngaiah an neih chhoh ve mai ka beisei,. Mo ni mah ila siamṭhat an ngaihna zawnah chuan theihtawp chhuah hi a pawimawh ka ti. 

"I tlei hle mai maw. Min tlawh khât lutuk a, ka lawm lo." Ka nuin a rawn tih chuan ka tlawh khâtzia hriain ka inthiamlo nghal. "Ni ngawt mai, vawiin tlaiah chaw kan lo ei ang a,. " Ka ti zui zat. 

"Leh ngawt a che. Chawhmeh kan inlei lâwk tawh hleinem, naktuk i nau piancham a nia, rawn ei phei ang che u, Maliani pawh kha a peih chuan rawn tel ve se.." a rawn ti lâng lâng a. "Tehreng mai, ka lo hrilh ang " ka ti var. Nitin kan inbe ziah naa kan inhmu khât thung a ni. A taksa lamah harsatna a tawk tawh rih lo bawk a, ka lo ngaihthah deuh pawh a ni mahna le..lenchhuah ka lo harsat ve bawk nen. Zanah Vica ka hrilh a, "Tetea chu eng nge kan leisak ang?" A ti nghal. 

"Ka hre nang, ka lo ngaihtuah miah lo." Ka ti a. A bu nghut nghut a, "Ka hria e. " A ti ringawt. Ka zawh lahin a sawi duh der lo. Kan muhil siar siar tawh tihin data ka lo off theihnghilh nge ni..msg ka dawng a. Meng chiang mang hlei lo hian ka en a, number ringawt a ni. 

"Thuamchhawm tur pawh pasal tum chawptir ngai, i la zak ṭhak lo lehnghal a.." tih ringawt hi a ni. Mak ka tih deuh avangin ka mit ka nuai a, ka chhiar nawn leh ngat..a thu a la ngai reng. 

Victora tui taka a muhil sûk sûk chu ka va en a, msg ka chhiar leh ṭhin. "Eng nge a awmzia?Tu nge i nih? " Tiin ka reply a. 

"I nun la tichhe vek tur keimah.." tih thu a rawn thleng zui zat..ka lungphu rang dat chu dawmin, "Julie bawk em mawni le.." ka ti sep a.