Amah leh kei 16

AMAH LEH KEI (16)

Ziaktu : Toni Râlte

"Maw?! Ngati nge?" Ka ti hê haw a. Ka meng phâwk viau bawk. Ka nu chuan uluk zet hian ka chhip aṭanga ka ke ler thleng a en chhuak a, Vica nen kan mudun tih keipawn ka hrechhuak zui nghal. Hlauhthawnnain ka khat a, chaw pawh chu ka ei zui tawh lo. Boruak ka tinuam lo zo vek dawna ka hriat avangin, "Nizan aṭangin ka pum hi a nuam tawh lo va, ei ṭeuh r'u, nakinah ka ei leh mai ang" ka ti ta ringawt. Ka nu pawn tihtham a ei meuh lo, Nuteii chaw eikham chu ka bulah a rawn kal a, "Mate, nau i pai tak tak a ni lo maw? Han chhût teh. " Zawitê hian a ti a. 

"Ka..ka hrethiam lo, ih, nute, sawi miah suh, vawikhat chiah kan chesual a, vawikhatnaah a rai theih dawn mi?" Ka ti bah nuaih a. Nurse ka ni a, hetiang thil hi chu hre ber tur zingah ka tel ve reng, mahse, ka hamhaih lutuk chhiava a ni. Ka nuteii chuan, "Theih tehreng mai. A va pawi tak êm, naktukah intest ngei ngei ang che " a ti chul a. "Ka ngam lo" ka ti tawp mai. Ka hlau a ni, rai ta ila ka nu rilru nat turzia leh thinrim dan tur ka hre sa vek a, min hnawtchhuak duh hial ang tihtheih tur khawpin Victora a haw si a. Ka thin ka dawm a, ka kun tlawk tlawk ringawt. Nuteii chuan, "Kha tin i rilru tihah lâwk chiam suh, i lo rai lo ve thei tho a nia, i pum lam chiankuan loh vang pawh a ni ve thei" a ti sasawi a, rai ka inring bur tawh si. Kimi leh Tetea ten kan chaw eina an sengfel hlan chuan ka nu te unau chuan min ṭhutpui ta ran mai. Ka nu chuan ka beisei aia nem daih hian, "Naktukah intest a ngai a nih kha,tun hnaia i chaw ei tlem leh i dawldâng riau hi mak ka lo ti tawh rêng a ni. I thi neih hnuhnun ber i la hre thei em?" A tih chuan, "Thla hmasaah khan" ka ti zawi sap a. Ka lung a chhe kher mai. 

"Hei tun thla pawh a ral leh mek chu a nih hi, naktuk tukleh khi thla tawp ni a ni tawh a nia. Engpawhnise, hrechiang phawt ila, hmalak dan tur kawng a kaw mai ang " a ti leh mawlh mawlh a. 

Putea pawh chuan, "Naute, i nu leh i nuteii te hetiang hi an ni tawh a, nang lehzelin sawn i pai chuan a zahthlak dawn lutuk a nia. I nuin a hma khan Victora chungchang min hrilh tawh a, a pawi êm mai. " A lo ti ve ṭuih ṭuih a. Ka ngawi reng tawp, tun ṭum zawng thiamthu sawi tur reng ka nei lo. Putea te indan boruak nuam tak tur pawh ka thlak ta vek si a, rei pawh awm loin ka haw hma ta daih. Ka nute erawh putea in luahna te an rawn lenthlak avangin an la ṭhu khawmuang thung. Ka hawn dawn khan ka nuin, "Victora hrilh a ngai rih lo aw, a rana rana lo a la nia, inhrechiang phawt rawh" a tih si avangin engmah ka hrilh rih ta lo, Ateii tal hrilh ka châk viau naa insûm rih ṭha ka tih avangin ka ngawi leh ta zawk a. Rilru hrehawm takin khumah ka mu meng kar a, ka thaw leh hawk ṭhin. Rai ta ila tih ka ngaihtuah chuan ka nu bak ka hrechhuak thei lo, Victora ai mahin ka nuin ka rilru a luah a ni. Inchhir loh duh teh mah ila, nupa nih hmaa ka insum tluan lo kha ka inchhir ve ta a, mipat hmeichhiatna kawngah hmeichhe buan chak lo tia sawi tur ka ni miah lo. Kimtea lakah ka petek palh a, Victora lakah ka insum zo lo leh a, ka vei zui miah lo kha a nia. Tunlaiah Mizote zingah pawh sex hi a mikhual tawh lo, inngaihzawn chuan sex hman ngei ngei tur emaw kan ti tawh ni ber hian a lang a, tleirawl tam tak fihlim tawh lo pawh an awm. Kha vang khan Victora nena kan han mudun pawh kha ka vei zui tehchiam lo a nih kha. Mahse, ka rai si chuan..awii, mite pawn vawitam sex an hman laiin an rai vek bik lo va, keini vawikhat lek kan hmang a, ka rai a nih teh chuan ka vanduai ve hleah ka ngai ang. Rai inhuama sex hman ka ni bik hleinem le. 

Mut pawh ka hmu ṭha tehchiam lo va, ka tho hma tho bawk si. Ka ni nghulh mai a, luak lah chu a chhuak em em reng a, ka uak ṭha ngam tawh bawk si lo. Ka chhungte erawh chuan ka lo rindan angin min melhin min ti hrek hrek hran lo, pangngai takin ka nu pawhin, "I kal pahin test kit i lei ang a, chanchin min rawn hrilh vat ang che." A ti a. Ka lungphu a rawn rang leh dat mai. Kan veng ṭhenawm damdawi dawrah nachhawkna lei pahin test kit chu ka lei ta a, Tka chuan nachhawkna ka lei turah a ngai ang. Engmah ka la hrilh thei si lo. Maliani te in ka thlen chuan gateah Victora'n min lo hmuak a, a lo nui var var mai. Tun ṭum erawh chhungril takin ka nuih let ve thei lo. A ngaih a ṭha lovang tih erawh ka hlau ru viau. U Mama a zin dawn a, Mali'n zui ve phêt a tum a, hna thil a nih avangin a thawhpuite nen an zin dawn si a, U Mama chuan kal ve a remti chiah lo a niang, an lo inhnial hlak hlak a. Ka ngaihven duh lo lui ve a, Maliani roomah ka luhsan ta daih. A lo tho dam vak lo nge ni a hmel hmuh a nuam tehchiam lo, "Kan ṭha vak na nge?" Ka ti a. 

"Ṭhat reng hi a theih loh a nih hi,. Nizanah ka mu ṭha lo lutuk a." A lo ti a. Damdawi ka siam nghal zung zung bawk. "Nang pawh mut i hmu ṭha lo a nih kha, i mitmeng a bui tlat" a tih chuan, "A dik alawm. " Ka ti ringawt. Putea te chungchang vel te kha ka hrilh ve ṭhin a, awmhmunah a lo ṭang ve ṭhin hle. 

"Eng nge i ei ang?" Ka tih chuan, a ngaihtuah vung vung hnuah, "Cup noodles ka ei châk, chicken ni se" a ti ta a. Ka chhuksan ta rih. Dawrah ka kal ta nghal a, Vica pawh a kal tawh. Ka thil va leina nu nu tar ve lek lek tawh lah chu a lo ṭawng duh zêk a, "Ma-i enkawltu maw i nih? A la tawrhhlehawm reng em?" Tih vel te, "A nau lah case nei lai, an chhungkua saw an mak teh e tiraw? An hausa naa ka awt miah lo" a ti bawrh bawrh mai. Chhan dan tur ka hre si lo va, "Nia" ka ti liam ta vel mai mai. A thil sawi dan aṭangin mi kamtam ve thawkhat chu a niin ka hria. Mahse, Vica chungchâng a sawi kha chu mak pawh ka ti chuang lo. A nihdan tur ve reng a ni tlat alawm. Ka haw a, tui ka lum nghal, Maliani eitur ka siamsak zawh chuan tihtur em em ka nei lo bawk a, ka mu ve ta mai mai a. 

"ka rilru a ruak ngawih ngawih." A Ti a. "I ṭhat a ngai ka ti" ka ti sap . 

" Ti nge hetiang chhungkuaa ka lo pian le?" A ti tawl mai. 

"Hahdam rawh, kan ni vek" ka lo ti tawi tak a. A nui hak ringawt. 

"Mama mize diktak hi hria la, min thlawhbosan ang" a ti ram hmak a. 

"I hre lo" tih chauhin ka chhang. 

'Nakinah le" a ti chang fak a..ka ngawi zui daih. 

A muthilh hnu chuan ka test kit chu phawrhin ka lek vâ a, bathroomah ka luhpui ta nghal. Victora ka hrilh lo bawk a, ka chhungte bak helhawlh tur an awm lo. Test kit chu melh vang vangin Chutah, "Fanu a nei" an tih thawm ka hre zui hak, a hnua ka hriat leh danin raicheha thi an awm tihna a nih chu, ka lo rin ang ngawt chuan a thleng lovang.Mahse..chu chu midang daih a lo ni si,. 

'I ṭha em?" Maliani aw ka hriat chuan min tithlamuang hle. Keipawh ka meng kâwk mai. Ka inthing harh a, Pregnancy test chu ka han thlêk leh a, rin pahnih lo awm vâ chu ka melh ta tlawk tlawk a. A awmzia chu ka rai tihna. Kei hian Victora fa ka pai a nih chu! Vawikhat chiah kan mudun asin le..ka rilru a mang vek a, rai kha inring ru tho mah ila; ka han test dawn tak tak chuan 'Ka rai lo mial maithei asin' tih kha ka rilruah a awm ve tho. Bathroom aṭanga ka chhuah chuan Maliani chuan min lo en uluk ngang mai. "Ti nge i va awm rei ve, i pum a dik chiah lo mi?" Ngaihṭhat loh hmel deuh hian a ti a. "Umm, chutiang chu" ka ti ta ringawt. Nilêngin ka dik hleithei lo, Victora text pawh ka seen ringawt a, ka chhang lo. Min lo call ta nge nge a, "Ti nge? Thil thleng a awm mi?" A rawn ti a. 

"Awm lo ve, ka buai deuh a, chu chu ni mai" ka ti a. 

"Min chhan loh hian motor ka siam dik thei ṭhin lo" a rawn ti nuah nuah a. "I â siah" ka ti nghat. "Ka rawn haw hma ang. Vawiin chu customer an tam lo va" a ti a, "Aw le" ka ti leh tawp, inthunun tum teh mah ila, a harsa rih tlat. Tlaiah chuan a ngaitê bawkin kan inthlah leh a, ka ṭawng tlem êm avangin a ngaih a ṭha tawh lo. "I nuamsam vak lo mi?" A ti a.

"Umm, nizan aṭang khan" ka ti a. 

"Damdawi ei rawh aw" a ti a, "Ei dawn e, ka ṭha mai ang" ka ti a. 

Min ngaihtuah tih ka hria, mahse, ka rai tih ka la hrilh rih lo, ka nu thu ngaihchan ka duh tlat, tun ṭum zawng dawl zawrin ka zawr a ni ber e. In ka thleng a, ka chau nghulh mai a, ka rai tih ka hriat vang nge mawni na neuh neuh bakah ka luakte chu a chhuak zual hian ka hria a,a va hrehawm tak. Ka nu a lo haw a, ka inbual zo vel chiah a ni. Khumah ṭhuin, "Eng nge chanchin le?" A ti dam diai a, a ṭawngkam nem ta lutuk hian awmdan min tithiam lo. 

"Ka rai" ka ti tlawng a. 

"Ka ring rêng a ni. Ka hmelhriat doctor pawh ka be fel tawh e, naktukah chawlh i lak a ngai. Kan paihtir ang" a ti ta mai a! "Eng a?! Kan paih ang maw? Aih, a teuh lo" ka ti tuar a. Nuteii te pawn an hre phak ang. 

"I awki sân hlek suh,. Ka remtihna tel lovin nau i pai a, a hnulam chu ka kut a ni, ka thu thu." A ti chang fak a, mitmeng thîp zet ka hmachhawn leh ta. 

"Nu, aih, ka phal lo. Ka fa a nih hi" ka ti thâm ṭiak a. 

"A nih chuan sawn pai i duh a maw?" A ti a, "Tihtlak ai chuan duh e. Victora'n min neih a duh ngawih ngawih bawk." Ka ti ve ta hmiah a. 

"Hruaipui, ka fanu leh..! I mit hi a lova del rei tak êm" a ti hluai a. Sawi duh nei, sawi thei si lo ang hian a awm ka ti mai, "Ka taksa chungah thu i nei lo, ka fa nena min pawm thei lo a nih chuan ka chhuak ang, ka pu te inah pawh ka awm mai ang" ka ti hmawk hmawk a, chu chu ka duh tak tak hial. Sâwn ka pai ngei e, mahse, ka fa ka titla lovang. Chu chu ka thutawp a ni. 

Nuteii te leh Tetea te pawn nau ka pai tih an hre ve a, Tetea chuan, "Bawihtea kawm tur a ni mai lawm. A khua a har thei si" a ti liam puat a. Pawi a tih hmel vak loh. Nuteii erawh chuan ka nu vengthawng takin, "Mate, a pawi êm mai, engtia tih chi nge mawni le?" A ti thung. Chhan dan pawh ka hre lo. Chaw eikhamah ka nu chu damlo kanin a chhuak a, a damlo kan hi a tan a hlu ve viau, kan indan tirha bungrua eng eng emaw min petu kha a nia. Cancer vangin a na rei tawh a, tunah chuan an tlaivarpui ta fô mai. Nuteii pawh Putea te inah a phei a, Tetea'n, "Û, a nu lo haw hmain ka chhuak lawk dawn a nia" tiin a chhuak nulh bawk, Kimkimi nen an inhmu ve dawn a niang chu maw. Kei pawh kawngka ka kalh a, roomah ka awm daih, Zira te an rawn len leh ka ring deuh a, ka kawm châk hlawl lo a ni. Amah vang hian kohhranah pawh ka tel tlem phah khawp mai, a active si a, kan inhmu lo thei si lo, ka ngei laklawh tawh bawk si, tihlan a rem ṭhin si lo, ka ning ṭhin êm a ni. Victora'n a rawn call ta a, engkim hrilh ka tum tawh a ni. 

"I zia deuh em? Damdawi chu i ei em?" A rawn ti mawlh mawlh a. 

"Ei e, chaw pawh ka ei ṭha' ka ti a, min ngaihtuah leh vak ang tih ka hlau a ni. "A va ṭha ve, ê taka! Naktukah Thenzawlah phei lawk ka ngai a, lo kal ve la" a rawn ti hluai a. 

"Ka hman lo tih i hriat ve reng kha" ka ti hlak. 

"Ka û chu ka lo dil ang a,." A ti zel a, "Dil chhin la, a phalte chuan kan kal ang a ni mai lo'm..mahse, ka riak thei lo a nia" ka tih chuan, "Kan ina riak angin i insawi mai dawn alawm, hmun danga va riahte pawh a chakawm ve lawm, golf course-ah te kan kal ang a." A ti luam a. 

"Thil hrilh duh che ka nei tak asin." Ka lo ti a. Ka zâm ru viau mai, "I va sawi har zawk" ngeiawm zet hian a rawn ti a. 

"Ih, Vic, ka rai.." ka ti ta thâwr a, "Eng a?! Sawi nawn leh teh" a rawn ti nghek a, "Ka rai ka ti" ka ti hlar a, "Tuaimam. Lalpa ka lawm e, ka lo phei, ka rawn thleng nghal" tih leh dah a rual a, biak leh dawn pawn a la thei ṭhak lo. Ka nu a awm chuang lo bawk a, ka lo nghak ta ran a. Rin ang ngeiin a rawn thleng phei hma khawp mai, eitur eng eng maw a rawn keng ṭeuh zui. Min hmuh rualin min kuah chawt a, midang an awm ve lo hlauh a, a zia e. "Engtikah i intest?" A ti a, test kit kha ka hmuhtir ve a, a khi vur vur mai. "Vawiinah khan" ka ti a, "Min va hrilh har" tiin a vui nuah nuah mai. 

"Ka nuin tihtlaktir min tum a" ka ti ta tawp a. 

A meng phâwk khawp mai, "Khai a! I nu hi a lo va rapthlak ve. Engtikawng mahin a titla lovang. Ka nei dawn che, zaninah hian min zui haw nghal mai rawh." A ti sawt sawt a. 

"Rilru fim takin le, i chhungte hrilh la, palai in rawn tir dawn nia. Palai pawh len a hmaa lo inruk kha a tih chi loh." Ka ti a. Nau ka pai tak hialah leh ka tihtlak duh si lovah chuan ka nu pawh a nem ve mai ka beisei tawh a ni. 

"Ni e,. A mak ee, vawikhat chiah kan ti sia, kan vannei tiraw?rai hma chi i ni a niang." A ti a, ka nui ringawt. "Mama te aiin kan nei hma dawn tihna..ka nute pawn an duat ngawt ang, mipa nise ka duh"a ti leh a, "Ngai lo, hmeichhia ka duh alawm." Ka lo ti, kan inhnial leh rih. Kan hlim dun ve khawp mai. Nuteii a lo haw a, puitling takin Victora chu a zilh malh malh a, "Innei lo thei lo dinhmunah in ding chu a nia, ka û pawh a nem mai chuan ka ring a. Nupa in nih hnuah pawh 'Kan innei tawh tho' tia zu va in leh mai te, hmeichhe dang lo melh taih te kha i ti ve hauh tur a ni lo. A nu lungdam zân lovin in innei dawn a, Mateii hi hmangaihna leh khawngaihna nen i en a ngai dawn a nia." Tiin. 

"Nute, lungkham suh. Hmalam hun a hriat miah lo nain a ṭhentu zawk ka ni dawn lo ka tih tawh kha. Fa kan neih phei chuan ka rilru pawh a puitling ve deuh ang a." Nuamtih hmel zet hian Victora chuan a ti a. Ka fa pai mêk pa hi keipawn ka rin a ngai tih ka hria,. Ka nu lo haw hmaa haw turin ka tur sek a, phur lo zetin a haw tak kha. Ka nu nen an innagching hman ṭhelh a ni. Ka mu zui ta daih a, a nih tur ang a ni vek tawh a, lungkham vak ka tumbuai peih tawh lo. Maliani leh Pi Lingi ten min lo call a, Victora'n a lo hrilh tawh a lo ni. Pi Lingi chuan, "Naktukah i pa Zauva hoin kan sawi ṭha dawn nia" tiin min thlah a. Palai pawh an rawn tirh har ka ring lo. 

A tukah chuan keipawh ka thleng phei hma a, Pa Zauva pawn min lo nghak a, Mali erawh U Mama zin chhung an in lamah a va awm rih dawn a niawm e. Zanin rum ruma palai lo tirh chu an tum ta a, ka rai len hma ngeia inneih kha an duh ve a ni. Keipawh ka duhdan a ni, "A rai vangin an innei" tih ai chuan a zia zawkin ka ring. Ka nu pawh lo hrilh hre turin min chah a , ka huphurh ru deuh. Maliani nen fa ka neih huna kan awmdan tur vel hlir sawiin kan nileng deuhthaw a ni e, Jasmine pawh ka hrilh ve a, min lawmpui hle. Ani pawh Aizawlah a la awm a, koh a nih reng avangin chhuk leh kha a buaithlak an ti a niang. Victora a zin daih sia, kal ve tura min duh nen a urgent deuh vangin zingah a lo kal a, hmuh pawh kan inhmu hman lo. Mahse, riah loh hram erawh a tum thu a sawi. In ka thlen chuan ka nu pawh a lo awm tawh a, Tetea nen an lo inṭhutchilh a, an thutak angreng sia, ka va be buai duh rih lo. Chaw ei laiin, "Nu, palai an lo tir dawn a" ka ti ta tawl a. Ka zak ve deuh, mahse, hrilh hriat kha a ṭul si. Zaninah an rawn kal dawn bawk nen. "A nih chu" tih chauhin min chhang, "I Putea pawh koh a ngai a nih chu. Zanin rum rumah te lo tirh" Nuteii'n a lo ti ve a. An hmanhmawh thu ka hrilh ta mai, ka nu erawh a ngawi char char, a rilru a insual ve a nih ka ring. 

Ka inseng fel vat vat a, Palaite awm laia awm ve kur kha ka duh loh avangin roomah ka awm ta daih. Putea pawh chu an va ko a, "A va hmanhmawhthlak ṭhin ve mawle" a ti chuar chuar mai. Rin ang ngeiin palaite pawh an rawn thleng ta a, ka nu chuan sawi loh loh a sawi ang tih ka hlau ngawih ngawih, Victora pawh a rawn haw mek a, kan helhhwlh ka ti mai. Ka za sek nia mawle. An ṭawng ri a hriat ve theih deuh a, ka ngaithla ru kur..ka nuin, " Pasal nei thei pawh a la ni chiah lo asin. Hei a nau zirna hi ama tumsak vek a nia, chhungkaw khawsak harsa ve tak kan ni a, a tel lo chuan a nau hian zirna a chhunzawm thei lo mai ang tih kan hlau deuh,. Engtia han tih chi nge mawni dawn ni." A tih chuan ka nei nasa ngang mai, ka nau ka chawm tawp si lo va, dik tak chuan keia hlawh ve mai mai ai chuan ka nu hian a dawr aṭangin a lalut hnem daih zawk. Engmah ka thawh loh lai pawh khan kan buai em em bik lo. Tunah phei chuan nuteii a awm tawh a, sumdawng a ni bawk a, kan chhungkaw income hi a chhe hran miah lo. 

Palaite pawn rawn kal leh intiamin min hawnsan ta a. Nuteii'n min rawn ko lâng lâng, ka va chhuak a, putea chuan, "Naute, nau i lo pai hman hi a pawi a ni. Innei lo ringawt dawn u la, sawn pawm i ni mai dawn si,. Nuthlawi rual han khawsak ho ringawt pawh chu ṭhenawm khawvengte an zahawm ve bawk si, i nu rilru hi eng nge maw ni reng reng le?" Tiin ka nu a melh zauh a. 

Ka nu chu a ngawih vang vang hnuah, "Kan duh leh beisei ang hian kan awm thei ṭhin lo chu a nih hi,. Makpa atana ka duh loh ber chu ka makpa a nih a ngai dawn ta a nih hmel e. Hruaii, ka hrilh lawk a che, in lo innei ta a nih pawhin vuivaina i nei tur a ni lo va, inṭhen ngam khawpa in lo intithiam lo a nih pawhin hetah chuan i rawn tlan thei dawn hauh lo a nia. Ka phal lo leh remti lo chung i nei dawn a, tlan tauhna nei lo angah inngai hmiah ang che. I hria em?" A ti bawrh bawrh a, Vica nen kan inneih a remti tih ka hriatna chuan min tihamhaih lutuk a, a thusawi dangte chu ka hre mang lo zawk. "Tehreng mai " ka ti ta ngawt a. Victora kutah ka innghat ta a nih ber chu. 

"Tin, i dawr hi i nau hmingin dah ang che. I tan ṭangkaina a awm tawh lo, i nau hian eizawnnna ṭha tak a neih a ngai, zirna pawh hi chhunzawm zel tawh lo se a pawi lo. A hautak mai mai." A ti leh a, Nuteii'n, "Ka û hi chu aw, chutiangte chu nakinah a la sawi theih" a lo ti dêk dêk a, "Lo ṭawng suh. Tetea tal hi chu ka duhdanin a nung ang. Hruaii lahin ka thu a awih bawk si lo. " A ti tân tân a. Nuteii pawh a ngawi ta daih, ka nu rilru hi a nêm ta vek e tihna a ni lo, kawng dang a nei tawh bik rih lo a ni. 

Ateii pawh engkim ka hrilh ve tawh a, innei thei mai dinhmunah kan ding tih a hriat chuan a lawm ve hle, "Tu nge ṭhianah i hman ang?" A rawn ti a. Amah bak hmeichhe ṭhian tia sawi theih ka nei bawk si lo chu a lo mangang ve deuh a ni ngei ang. "Ka hre tawh bik lo" ka tih chuan, "Ka ṭang ve leh mai dawn ni? Ka dul a la puar over chuang lo va, tihdan a awm mai ang " a ti a. 

"I hreh loh chuan ka lawm viau ang" ka ti vat a. "Hreh hran lo ve, bakah midang i hman khan ka thîk zawk ang" a rawn ti. Kan phur teh hâwrh lutuk chu ka ngaihte a ṭha lo thul, Victora bulah erawh a âwm tawk chiah ka hrilh rih. A phur chingchivet hi a rawn kal leh roh ang tih ka hlau a ni. Mut pawh zan dang ai chuan a tui ta deuh e. 

A tuka ka va thlen chuan Pu Zauva'n min lo nghak ran a lo ni, kan inbe ta vat a. Kan mutân ber nia ka nuin a sawi ka nau ka chawm tih vel chungchang kha min swipui a, ka nu tihmualpho ka duh loh avangin ka nau chawm ang chuan ka insawi ve ta ngawt a. "Kha kha a lungkham a nih chuan buaina a awm lo aw. In innei a nih pawhin harsatna a awm lo turah ngai ang, Pathian zarah sum leh pai chu kan mamawh tawk kan nei ve e. " A ti a. Hei chu ka rindansa a ni. "Ni e, ka nu bulah sawi u la, ka tan sawi a nuam lo ve a" ka ti ringawt. Palai rawn len leh huna sawifel intiamin ani pawh hna kal turin a chhuak ta a. Maliani room ka pan ding nghal. Damdawi ka eitir lai chuan Vica a rawn lut a, "Ka tho chiah, chaw pawh ka la ei lo" tiin a hâm bui bui a. Nizanah a thleng tlai ve deuh bawk a ni. "Hnaah i kal dawn em?" Ka tih chuan, "Dar 2-ah kan court leh dawn sia, kal lo law law mai ang" a ti a. An case hi a la kal ve reng a, a ninawm, rilru a tibuai ve tho si a. Maliani chuan, "In inneih theih loh vaih chuan ka thinrim ngawt ang" a lo ti a. 

"Kei aia thinrim tur an awm lo vang." Vica'n a lo ti vut. "In ninawm" ka lo ti hlar a, kan inpawhna boruak vel chu a nuam chem chem mai. Chawhma chhung zawng Vica room ka chinfelsak a, a thawmhnaw te chu ka thleh ṭhatsak vek. A pindan hi a zau angreng a, lo innei pawh ni ila zauh belh vak a ngaih ka ring lo. A inbual a, bed sheet ka thlak lai laiin, "Tuaimam, lo lut ve lawk teh..please" a rawn ti dût dût a, "Ka hman lo" ka tih pawh chuan, "A nih towel var kha min lo laksak" a rawn ti leh lung lung. Towel var thianghlim zet chu lain a kut rawn dahchhuahah chuan ka hmehbel chawt chawt a, mahse, mi rawn pawtlêt thut a, ka lo inring hman si lo, chhuatah chuan ka tlu ta a, a tawpsan duh chuang lo, ka hreh chung chung bathroomah chuan min pawtlut ta a. " I va â tak, Over suh." Ka ti hlak hlak a. 

Bangah min nawr bet hmak a, engmah sawi lovin min fawp nawk nawk mai. A taksa huh chual chuan min ngheng bet tlat bawk si, "Vic, a hun lo ê.." ka ti tak naa ka chhanglet ve tho. 

"Inbual dunte hi an innei duh an tia lawm. Inbual ve rawh" a ti sup sup a. 

"A awihawm loh lutuk. Ka la inbual peih lo, khawi ka kal dawn" tia kal ka tum chu, "Ka fa paitunu, awm mai mai teh. " Tiin ka hnunglam aṭangin min rawn kuah a, a rit roh si. Ka tum loh puiin ka inbual ve ta ngawt, hak thlak tur ka keng bawk si lo, kan inbual zawhah zo zetin min pawm chhuak a, khumah min nghatin min hru hul leh vek a, "Kan inneih huna ka tihdan tur a nih hi.." a la ti ham ham zui. Ka panty thlengin a huh si, Mahse, ka beisei loh lutukin underware thar hlak, la inpack thlap a sen hi a rawn khai chhuak a, "Inneih zana i inbel atana ka lei a nih hi,. Mahse, tunah ha mai rawh" a ti a. 

"I zak lo ê, ti nge hetiangte i lei a?" Ka lo ti nghek a. 

"A sexy alawm,." A ti sup a. Victoria secret underware te chu keini ang inbel ngam chi pawh a ni dawn mawni le..mahse, hak tur nei hek lo ka ha ta sât sât a. Basketball jersey lian hlep hlup min haktir a, boxer ka ha bawk. Ka thau lo ve sia, ka zawr tawp. Ka rai hi ka la raino lo nge ni, ka uak deuh sek hi a ni rih mai. Cher erawh ka cher ve deuh. Chawhnuah chuan Victora pawh court-a inlan tur chuan a kal ta a, an thubuai hi chingfel tawh se ka ti ngawt mai. Sangi nen in chungah pangpar kan en dun a, Pi Lingi hian a vil peih bawk a, an mawi tawh hlawm khawp mai. 

"I bialpa chu a haw tawh mi?" Ka tih chuan, "Aw, mahse, thle leh velah hian a rawn kal leh dawn. Aizawlah a naute an awm dawn a, in an luah ve dawn a." A ti siam siam a, "Innei ve tawh mai r'u" ka ti a. 

"U Vica nen innei phawt ula, ka chhuak ang ka ti. Tunah chuan an la buai bakah ka pi hi sual ve deuh ṭhin mah se; ka khawngaih ve deuh a, U Mali a thatchhe sia" a ti niah niah a. A thusawi awmzia ka hrethiam. Mali pawh an in lamah a la chengkual rih a, a hahdamthlak zawk daih. Ateii'n min lo call a, "Facebook Comedian Fth groupah khan lut teh, an troll luih luih che a nia." A rawn tih chuan mak ka ti viau mai. Eng sawi set set lo chuan ka lut ta vat a, karei! Victora leh Julie pic hnuaiah ka pic an lo dah ve a, captionah, "Mi inkara tlakzeh ching a nih hi. Nurse a nihna hmang ṭangkaiin a damlo enkawl unaupa fa a pai a, Hetiang hmeichhia hi chu vuakhlum vek tlak an ni" tih a dah bawk. A posttu chu fake account a nih a rinawm. Comment ka han chhiar ta a le! Min hmelhriattu leh kei ngei pawn ka hriatchiante ho thleng chuan, "He nu hi a landan ang a ni lo, a easy ru zêk ang. A tan chuan Victora te chu a ṭha mah mah alawm. " Tih te, "Hruaipuii hian chutianga a tih ka ring chiah lo. " Tihte a ni nawk mai. Victora lo hrechiangtu te lah chuan, "He pa tualthata rinhlelh mek pa hi in va tilar peih ve, a sual sual nen. An hausak vang mai a..chuti khati.." an lo ti ve bawk a, hmeichhe ṭhenkhat lahin, "Mipa hi a chhe lo ve chiang ê, nurse khi chu a duh tak tak ka ring lo, nawmchen nan bak a ti lovang"..te an lo ti thul. Julie leh Victora pahnih ding dun lai chu an lak hun a rei ve leh deuh tawh a, eng emaw function-a an kalna vel a nih hmel, Julie pawh a nalh khawp mai. Ka thlalak an dah ber kher lah chu ka cher zual lai, hna ka hmuh hma daih ami tawh kha a nia, ka chhe ve tip tep bawk si. Tu chuan nge hetiang thil hi post ta ang le?! Julie ka rilruah a rawn lang nghal, amah bak a nih ka ring lo. Mahse, ka rai thu hi ka chhungte leh Victora te bakah Ateii te nupa chiahin an la hre si a, ka buai deuh. Julie'n a lo hriat ve ngawtna chhan tur ka hre lo a ni. Victora ka call hreh si, an thubuai an chai lai tak a nih ka ring sia, Maliani bulah kalin ka entir ve ta a, "Julie thiltih a nih dawn hi" a ti ve tho. 

"Mahse, ka rai tih engtin nge a hriat ang? Tu nge hrilh ang?" Ka ti hâ a.

Min melh kâwk chungin, "Kan inah hian cctv kal thei leh reporter kan kawl tawh tih i hre lo mi?"a ti ta a. Ni dawn tak e, U Mali ka lo ngaihtuah phak miah lo. "Mahse, Mali leh julie an inhria mi?" Ka ti leh a. 

"Hre mah mah, Julie leh Mali naute hi best friend alawm an nih" a ti ta mai. Ka var ta uar mai le.."Engtin nge hma ka lak ve ang aw. " Ka tih vang vang chuan, "Victora chinfeltir rawh. A hmetmit thei ber ang" a lo ti fiah kâk mai. A nau a ringtawk ta hle chuan min tilawm viau. A sawi ang chuan Victora lo haw phawt se sawidun ṭha ka ti a, facebook-a an comment-na te chu ka chhiar zui duh tawh lo. Thin a rim mai mai. 

"Hei ka rawn haw dawn mêk e, ei châk i nei em?" Vica'n a rawn ti dût dût a. "Nei hran lo, chaw ei a hun ṭêp tawh alawm, lo thleng vat teh" ka ti a. A tlai ve deuh tawh bawk nen, ka hmanhmawh tawh a ni. Ka tur hmanhmawh vang nge ni a rawn thleng thuai a, Maliani pindanah kan inzui lut nghal. Post bakah comment te chu ka chhiartir ve ta vek a, a hmelhmai a danglam lem lo. "An va buaipui ho ve aw. " Tiin a phone a phawrh a, Julie chu a call ta a ni. 

No zet hian a rawn hello ham ham a, Maliani a lo ner nawk mai. "I post saw 5 mins ral hmaa i delete loh chuan leh Hruaipuii hnena ngaihdam dilna post i siam lo a nih chuan cyber crime ka be nghal dawn a nia." Victora chuan a ti nghal rap rap mai. Julie chu a hamhaih deuh nge a ngawi dâk mai. "Ka thusawi chu i hria em?" Vica chuan a ti chang leh fak a, "I sawi awmzia engmah ka hre lo. Eng post nge i sawi a?" A rawn ti khur dat a. 

"Rawn inla hre lo kual suh. Kei hian ka hria che, a tawk. Ka sawi anga i ti lo a nih chuan hei kan chhuak a nia." Vica chuan ti leh hmiahin a hmet tawp ta a. "Amah a ni tih i chiang maw?" Ka ti hram chu a lungawi vak lo nge, "Ka tana hnawksak ngam tur khawpa ka kawp rei ber a ni miau a. " A ti chhum hmuk. Ka ngawihsan ta daih a. A va biak aṭanga 3mins velah post chu ka va zawng leh a, ka hmu ta lo, Julie ngei chu a lo ni tih a chiang ta. Ngaihdam dilna erawh a la post lo va, kei chuan ṭul pawh ka ti em em tawh lo, social media vela lar chiam kha ka duh lo a ni ber. Mahse, Maliani ngaihdan a ni lo bur si a,.amah ngeiin a va call ve leh, "Ngaihdam dilna bakah sawifiahna chu rawn post vat rawh. Ka thil kawl ho ka tlangzarh ve vaih chuan hruihrual i zawng ruai mai tur asin." A va ti ve ta fak fak a,. Julie chuan, "Ka post dawn alawm" tih chauhin a chhang. 

"Eng thil nge i kawl a?" Inthlahrung ru deuh hian ka ti a. 

"Hmu ve lo la a ṭhat zawk ka ring. Victora hi tilreh a ni lo tihah chiang ila a tawk mai" a ti a. Ka zawt duh ta lo,. Rindan erawh ka nei tho. Ka haw a hun ta bawk a, ka thawmhnaw pawh a ro ta bawk nen, Vica nen kan inphur haw leh ta a. In ka thlen chuan in chung nu a lo awm ve a, Nu Lâni kan ti mai a, nu fel leh dam thluam mai a ni. Min hmuh rual rual chian, "Vawiin kha i va lar ve..facebook kha i hmu em?" A lo ti ta chiah mai. Ka chhungten an hriat ka hlauh nen an hmelah an hre vek tawh tih a lang reng si. "Nia, ka delete tir tawh e, ngaihdam dilna a rawn post ṭêp ang" ka ti a. Pindanah ka lut nghal daih. Ka nu a rawn lut ve zat a, "I nasa mang e, Hruaii, ka rinphak bakin thil hi a thleng zel chu a nih hi maw. Mi inkarah i tlazep a, Victora thiam loh ngawr ngawrah ka lo ngai a, nang hi i lo nasa zawk êm a nih hi.." a ti nghal tâwn tâwn a. Mak ka ti zawk. "Tihsual ka nei lo, Julie nen an inkawp lohna a rei tawh lutuk." Ka ti hap a. Nau ka pai hnu pawn hlimna aiin hlim lohna zel ka la hmachhawn a, a hrehawm takzet a ni. 

"Zanah kan sawi leh ang" ti ngal ngalin a chhuak leh ta vut a. Zanriah ei lai chuan a insûm ve nge ni engmah a sawi bik lo, ka chaw ei a tui hlawl si lo va, ka kham hmasa ber. Thleng ka sil zo chu, "Lo ṭhu rawh" ka nu chuan a lo ti ta chat mai. Zâm ru deuhin ka va ṭhu a, Tetea leh Bawihtea te erawh dawrah an kal.. 

"Khatiang chung khan Victora chu neih i la duh fô a maw?" A ti a, a aw a chang em em tawh lo. 

"Aw" ka ti sep a. 

Hah hmel deuh hian a thaw hawk a, "I ngaihtuahawm lo takzet ang maw?" A ti leh ngat , "Ka hre lo le, hmalam hun ka hre bik si lo va. Chuan, ka nau chawm zui zel kha an remti e" ka ti duah a, sawi law law kha ṭha ka ti a ni. 

Reifê a ngawih hnuah, "Aw le, i duhthlanna nh angin ka kaltir ang che. Ka thih hma ngei hian. " A ti ta a. 

"Thih thu sawi ka duh lo." Ka lo ti vat a,za lo zet hian a nui hak a. ,"Ka thi vat dawn alawm. Engkim sawi hun a ni tain ka hria" chauh hmel zet hian a ti a..

"Ka ngaithla e" ka ti thâm ṭiak a, Nuteii chuan, "Ka û, tunah chuan ni lo ve." A lo ti vat. 

"Ni lo, tun hun hi a remchang ber e.." tiin ka nu chuan a chhang a, ka lam rawn hawia a kâ a an dawn lai takin Tetea leh Bawihtea te an rawn inzui lut leh ta si. Ka nu pawh a ngawi zui leh ta daih a, an awmdan teh hrep chuan ka ngaih a tiṭha thei hlawl lo. "Nu, sawi la" ka tih chuan a hmui bula a kutzungchal dahin, "Puitling chauhin an hriat a ṭha." A ti sap a.