Amah leh kei 15

AMAH LEH KEI..(15)

Ziaktu : Toni Râlte 

Tlaiah Victora min thlahtu ber a awm ta si lo va, Taxi ka hmang ta ringawt. Hawn pawh hi ka chak hlawl lo, ka nu âng thawm hriat fô hian ka buai zual si a. Phur fahran lovin ka lut a, an lo haw kim vek tawh. Nuteii'n chawhmeh a lo chhuang lum mêk a. Tetea'n lehkha a zir bawk, ka nu erawh chuan a kawr hlui a lo ṭhiat mek thung. Tuman min lo be lo bawk a, ngawi rengin ka che nghal mawp mawp mai. Ka inbual zawhah zanriah kan ei zui nghal a, chaw ei châkna a bo. Mahse, ei luih a ngai si. Kan mûk rûn hlawm a; ka nu pawn engmah a sawi hauh lo, chu chuan min tihrilhhai letling. Kan eikham dawn tawh lamah Tetea ber chuan, "Û, u Vica te chu an tâng dawn ta mi?" A ti ta a. 

"Aw, an phur thla phawt a, mahse, thiam loh chantir an la ni lo, an court ve phawt ang" ka ti duah a. Ka nu ner sak chu ka hai lo chiang hle. Nuteii chuan, "A zia lo em mai a, an tâng rei ang tih pawh a hlauhawm alawm le " a lo ti ve a. 

"Bail kha an tumin ka hria, an thei ang e maw" ka ti a. 

"Bail lo se a ṭha zawk, midang tan pawh an hlauhawm alawm, tualthah chingte chu.."ka nu chuan a lo ti hlang hlang a. Ka va ngei tak e aw. Chhan ka tum zet a, ka ṭhulh leh. Thleng ka sil zawhah roomah ka tawm hmak a, Jasmine khan whatsapp-ah min lo bia a, kan inbe zui ta reng mai, a rilru hrehawmzia leh a chhungte a huatzia te a sawi ve mawlh mawlh. Ka khawngaih ve lehchhawng, a unaupa a thi kher bawk nen, amah vanga thi a nihna chen a awm ve si a. Nuteii'n min lo au va, "Inleng i nei" a rawn tih chuan ka va phur lo tak êm, hlauh ang ngeiin Zira te bawk. Nuih pawh ka nuih peih lo, a piahah ka ṭhu a, ka nu chuan a lo be mêk a, a be ṭha vel lutuk chuan mi run ngawih ngawih, ka nu hian min runluih ni berin ka hria. Zira chuan, "I va nawmsam loh hmel ve a" tiin min rawn thlêk a, "Ka ṭha alawm" ka ti tawi tak. Thingpui ka va lum ta tharh a, Buanga pâwt leh ham ham pawn ka nuihbawm a hawlh phak lo a ni e. Zira thleng chuan ka hmel huat zo vek tawh. Ka nu chuan, "Tikhan lo inkawm r'u, In chungah ka han kal lawk ang e" tiin a tho ta a. Bawihtea'n a ngen tlat avangin a hruai ve bawk, Tetea a roomah a awm a, nuteii lah chuan, "Inthleh fel ka duh" tiin a pindan a pan ve nghal daih. Mood chhe lutuk nena inleng kawm chu a hahthlak dan a hahthlak zual ngawih ngawih, min biakna pawh a rul tawk chauhin ka chhang zel a, Buanga chuan call a dawng a, "Ṭhianpa, ka kalsan che u a ngai, ka fanu khawsik a sang deuh a, damdawi inah an chhohpui dawn a, ka va lan ve loh chuan" tiin a ding uaih a. "A va zia lo ve, chanchin min lo hrilh rawh aw" tiin Zira chuan a thlah a. Buanga a chhuak chiah tihin ka bulah a rawn ṭhu hnai vut a, ka lo melh hraw ringawt. "Min huat loh tur thu kha i sawi sia, i awmdan hi ka hrethiam lo" a ti sur sur te chu ka ten zo vek tawh. Mahse, theihtawpa inthununin, "Ka haw hleinem che, ka chau ve deuh a, ka harhvâng lo tawp" ka ti a. Ka nui lui bawk. 

"A nih bialpa i nei em?" A ti ta daih a, ka ngawih vang vang hnuah, "Aw nei e" ka ti sap a. "Tu nge?" A ti lehzel a, "I hre ve chuang lovang, kan veng ami a ni lo" ka tih chuan, "Ka hre maithei asin, i damlo enkawl mek unaupa kha a ni lo'm ni? Tualthata an puh kha. " A ti ta mai a, ka melh nghek mai. "Engtin nge i hriat?" Zawitê hian ka ti a. 

"In inphur nitin a, ka hmu ve vek che u alawm" a ti ringawt. Ka nu bawk hian a lo hrilh em mawni le.." Amah vang khan a ni lo'm ni? Tunah pawh i mood a off em em" a ti ta zel a. Zêp hni hne ṭulin ka hre ta lo, "Aw ni e, tu nge bialpa te puhchhiata an awm laia phurh hûrh theih ang" ka ti chang fak a. 

"Ka lo dahsan vei che nen ka rin aiin i mizia a hniam,. Ani angte kha chu i duh ka ring hauh lo a nia" a tih chuan mi run deuh. "Ti maw ka duh loh ang a? A fel a, min care a, min duat bawk a. " Ka ti duah a. Chhan fawk fawk chi niin ka hria. 

"Kei chuan ani ai khan ka duat zawk ang che mawle,. Tunah phei chuan jail-ah a tânsan daih che sia. I inchhir ve tho em? Ani ang i lo ngaizawng kha. " Ani pawh chuan min dim lo ve sâwt ta khawp mai. 

"Inchhir teuh lo mai, tualthattu a ni lo tih ka hre tlat a, thudik a rawn lang ṭêp tawh ang." Cho zet hian ka ti a, a nui kual vel chu ben sawk ka va châk tak. Mipa fel leh nungchang ṭha tak anga sawi kha a ni ṭhin a, hetiang mizia hi a lo nei ve tho tihna a nih chu..ka lo ngaizawng ve ang tihte ka hlau hnuhnawh viau. 

"I inlamlêt theih lai leh ka rilru ka hawn lai hian thlah mai rawh. I nu pawn min iai lo asin. I inlamlet phawt chuan ka pawm thei che a nia." A ti leh mawlh mawlh a, "Zira, min hawnsan mai teh. I lo zaktheilo êm mai. Ka duhzawng i ni lo, i ni ngai lo vang." Ka ti ta zêk a, ka zahpah duh tawh bik lo. Ani pawn min zah hleinem le..a ngawih vung vung hnuah, "Lo inngaihtuah ang che. Ka haw phawt ang. " Tiin a tho va, thlah pawh ka thlah lo,. A hawn hnuah te chuan ka thinrim thar leh a, ka lo ânkhum na lo mah mah a ni te ka ti thul, Nuteii bulah kan inbiak dante chu ka sawi vek a, ani pawh a chek hlak hlak mai. "I nuin mitmei a hmuh ang a, a ngampa vek a nih dawn chu..i nu hi ka ngei riau tawh a ni" a ti hlak hlak a. Keipawn ka ngei tawh, ka nu ve si a fanu rilru engmah a hriatthiampui duh miah lo hi na ka ti bawk. A lo tihsual tawh avanga kei thlenga min nghawng tel ve hi ka lawm lo. Amah ang vek kan ni dawn lo chiang. Muthmunah pawh ka rilru ka siam sauh sauh mai, Victora hi ka kalsan lovang tiin. Tunah phei chuan min mamawh a, a rilru a hrehawm dawn lutuk, chutihlai kara lo phatsan kha ka damchhungin ka inthiam thei tawh lo vang. 

Sunday a ni naa inkhawm ka châk hlawl lo. Ka mu lui tlat a, Nuteii a rawn kal a, "Ka awm a nuam lo lutuk a, ka inkhawm lo mai ang " ka lo ti. Min hrethiam bertu a ni a, ka nu ai mahin ka ngai tawh zawk. An inkhawm hlanin Jasmine nen kan inbe leh a, kan inbiak hian ka record zel ṭhin, nakinah a la ṭangkai thei tih ka hriat avangin, ani lah a lusun piahlamah Vala'n a lo tuar ve zel nen a ṭawng ṭha duh phian a. Engpawh thleng se Vala te lama a ṭan tur thu thlengin a sawi hmiah hmiah mai. Chu chuan keipawh min tichak ka ti mai, Jasmine zawk pawh a inhuam chuan kei chuan ka theihna zawnah Victora tlanchhiatsan ka tum bik lo bur mai a ni. Ateii'n tlaiah anmahni ina chaw ei turin min lo sawm ve a, an pa nen an ei phei dawn a ni. Inbunruahna ka mamawh bawk a, ka hnial lo chiang hle. Chawhnuah chuan ka insiam a, ka nu chuan, "Khawm pawh inkhawm peih chai si lo, mi ina chaw ei leh duh hle si" a ti hlaih hlaih a, "Chaw ei chhuah hi a nuam alawm." Ka lo ti ve mai bawk. 

"Zahpuiawm lutuk" a ti hlak a, ka chhang zui tawh lo. Ateii pasal Hriata'n min lo hruai a, Ateii te in lam kan pan ta a. Kan inhmu chu kan inpawm chawt mai, a room hlui kha mikhual roomah an hmang tawh a, tah chuan kan lut nghal hmak, Hriata erawh an ṭhianpa damlo kan turin a chhuak leh nghal a. Ateii nen chuan hun thawl kan nei thei ta, a ṭawng ve hman mang lo, engkim zawng zawng ka hrilh malh malh a, Jasmine ka bialk thu leh kan inbiakna te chu ka ngaihthlaktir ve vek a , "Victora a ni thei lo hrim hrim, ka hriat tirh pawh khan ka ring lo nghal" a ti ve a. Ka nu min tawngkhum dan zawng zawngte pawh ka hrilh a, a chek hlak hlak mai. "I nu em em hi chu aw, a timak ve ṭhin ê..ka la hau ang mawle" a ti a, a nu ang chiaha a en ve avang hian ka nu lakah pawh a pangchang hle ṭhin. Ka nu pawn keimah ang thoin a hau ve bawrh bawrh zel. 

"Engpawhnise, chhel taka i awm a ngai aw. Victora pawh thlahthlam chi a ni lo. A rilru a hah ve dawn lutuk." A ti a, ka lo bu nghat nghat mai. An lo haw khawm a, chaw pawh kan ei zui ve ta a, ka rin ai takin ka eitui phian mai. Eikhamah pawh inkhawm ka tum lo bawk a, ka leng ve leh ta reng a, dar 9 velah ka haw. Ka mu nghal hmak bawk, kan tunlai boruak chu a hrehawm ve reng, ka nu nen kan inbe hleithei der bawk si lo. Mahse, pal ve bawrh bawrh mai ka duh tawh. A tukah pawh chaw ei lovin ka kal a, mut ka hmu ṭha vak lo nen, ka lu te a hai ve deuh a, energy drinks ka in deuh reng mai. Maliani te chhungkua pawh an ngui nghiai reng mai a, an fapa meuhin jail bang a zût chu a ni si a, ruih thu hla vang lah a ni hauh bawk si lo. Pu Zauva te chuan bail dan kawng an dap nghal char char a, a tihtheih mai ka beisei. Hetihlai hian Mali erawh a la ni deuh hurh reng ni hian ka hria a, Maliani hian a mil lo zual. Vawiinah erawh an in lamah a leng phei dawn a,a awm loh hian a nuam zawk. Maliani roomah Pi Lingi pawh a rawn chho ve a, Sangi erawh a bialpa kha a lo zin ve sia, chhuah ve lawk a dil a, an phalsak mial a, an va inhmu ve dawn niawm tak a ni. 

"A pawi ngawt mai, Lalvala nupui ruk vang vek a ni. Mahse, Vala pawh a khawngaihthlak tho bawk sia,. A nu a damlo an ti lehnghal a, naktukah i pain va kan teh se.." Pi Lingi chuan a ti mawlh mawlh a. Lalvala te hi keimah ang thoin pa nei tawh lo an ni ve a, kum 2 liamta khan a pain a lo boralsan ve tawh a, a nu leh farnu te nen an khawsa a, a nu hi damdawi inah cook niin, Lalvala hi an eizawngtu ber a ni ve a, Victora hian a khawngaih avangin midang aiin hlawh pawh a pe tam a ni. 

"Jasmine kha a huaisen tlang ka ring, a thi te a nih ngawt loh chuan" Maliani chuan a lo ti daih a. Pi Lingi chuan a ngaihna a hriat loh hmel hle, kan inbiakna te chu ka ngaihthlaktir ve ta a, a hmel hmuh pawh a nuam sawt mai. "I Pa Zauva hrilh vat a ngai a nih hi, in inbiakna kha police lam pawn an hriat ve a ṭha alawm." A ti a. Pa Zauva a lo kal hman tawh avangin ka hrilh ta lo kha a nia. 

"Mali hi engmah hrilh suh ang che. A tikhawlo palh ang" Maliani'n a tih chuan, "A teuh lo mai, a lakah hian fimkhur hle rawh u, a thu hriat ang ang hi a chhung ten an hre nghal zel a nia, hmanni Victora nen in lo awmdun pawh kha an hre leh vek tawh. Vica chungchang hi ngaihtuah fel ila, in dang vat rawh se" Pi Lingi chuan a ti tûn tûn a, a lo mil lo ve nasa a lo nia. 

"U Mateii'n nizanah min rawn bia a, Mali chuan an inneih dawn zan khan a lo va be vel a niawm e. A va han zakthei lo tak e aw. " Maliani chuan a ti leh mawlh mawlh a. "Zak thei ni se, mi nupui ni chungin mi pasal a ngaizawng nang, ti chung hian a chhungte lah hian an la fak kur dup a, Zorema hi a va zahawm tak e aw. Hmuh pawh ka inthlahrung vek" Pi Lingi pawh chuan a lo ti ve a. An mi ngainat loh leh ngei ruk ruk em em an mo a nih a ngai tlat si hi an vanduai mang e. 

Chhuna thil kan ei laiin Jasmine khan min lo call a, "Hei Shillongah vawiinah ka chhuk dawn a, chawhnuah hian kan chhuak dawn, ka nite bula min awmtir rih an tum a." A rawn ti a, "Aw le, ka sawi tawh ang khan an thu awih rih kha a ṭha,. Mahse, Police lam hian an la rawn ko ngei ngei dawn che a, lo inring tho la aw" ka ti a. 

"Ka pa chuan, 'An koh che pawn an intihbuai lai khan ka hlauh vangin ka tlanchhe daih a, engmah ka hmu ve lo' ti ang che min tia. Mahse, U Vala te zalen theihna a nih dawn chuan thudik chu ka puang hmiah ang, thu dik lo vanga an damchhunga jail an tân hi a dik lo hrim hrim. " A ti nghat nghat a, ka lawm hle. "I huaisen ka ti khawp mai' ka ti hial nghe nghe. "U Vala te in lo kan takin a tan ka rinawm reng ang tih min lo hrilhsak r'u aw. Ka dah phawt, ka pa a lo kal." Tiin a dah ta a. Pi Lingi'n, "Naktukah hian zu kan ka duh a, a rem ang em ka hre lo, mamawh te pawh an nei tawh ang. Kan kal dawn nia" a lo ti a. Ka lo beisei leh rin ngai reng reng loh thilin min tlakbuak ta chu a ni si a, Jail vawikhat pawh la hmu lo khan ka bialpa kan turin ka zu hmu ve dawn chu a nia. Ka nu tan mawlh hian helh awl awl tham chu a tling ve reng mai. Tlaiah Tka'n min lo bia a, ka hmu ṭha ngam lo kha a nia, mahse, a hrana taxi chan kual vel kha a buaithlak avangin a rualin ka haw ta a ni. 

Victora chungchang pawh min zawt ngei a, ka chhang ve zel bawk, "Lehlamah social mediaah te in inpost ve vak vak lo bawk a, in lar vak lo. Miin a bialnu i ni tih an hriat chuan an ngaihven nasa dawn che a, public-a intheh dere vak hi a ṭul lo rêng a ni." A ti ve bawrh bawrh a, ka pawmpui hle. Victora nen hian thla chu kan la dun fô, mahse, kan post ngai lo. Vawi hnih vel chu a statusah hmang ve tawh a, kei phei chuan ka la hmang eih lo, ka nihdan ve hrim hrim a nia. Ka zah zawng tak a ni ve tlat." Engpawhnise, keini i ṭhiante chu i lamah kan ṭang tih hria la, engmah hi i rawn sawi duh ngai lo va, inthlahrung ṭhin suh" a ti leh a, "Ka zak alawm" ka tih chuan, "Hiu heu reuh che hian, zah hun pawh a nih loh hi. Hnem i ngaih lai a nia,. Ngaw rawh, kar tawp lamah Ateii pasal neih lawmna ni pah fâwmin picnic teh ang u, groupah ka rawn rawt ang." A ti hluai a, min ngaihtuah tih ka hriatna ringawt pawn min hnem hle tho mai. Ṭhian ṭhate hi chu an lo hlu nge nge e. In ka thleng a, Pa Zuala a lo ṭhu ve leh kur mai. Ka thin a rim nghal hlur mai a, amah lah chuan nui huah huah chungin, "I va tlai ve a, Bawihtea ka rawn tlawh a. " A lo ti a, a mitmeng aṭangin a fim lo tih ka hrethiam nghal. 

"Nangmah vanga kan buaizia hria la, i rawn lawr ngam tawh lovang mawle.." ka ti hmak a. Ani pawh a nui tawp chawt, ka nuin, "A fapa a rawn kan ve a ni mai a, eng nge amah avanga kan buaina" a lo tih phei chuan sa tak ka ni. 

"I hre daih zawk ang chu, ani nupui nei chunga ngaihzawng neih ching thusawi i awih luat avangin a ni lo'm ni kan inkar pawh a hlat tak.." ka ti ve ta fak fak a, ka nuteii'n, "A dik chiah, i kamtam luatah kan chhungkua kan buai phah asin. Ka û lahin nanga zu rui thusawi mai mai a lo ring bur bawk sia. Rawn kal fo a ngai lo. I fapa hian a mamawh lo che" a lo ti ve bawrh bawrh a, "Eng nge a awmzia? Eng nge ka sawi a?" Pa Zuala chuan a la ti hû a, a hrethiam lo tih a hriat hle. 

"Victora chungchang i sawi vak kha a nih chu kan sawi." Nuteii chuan ring leng lawng zet hian a ti a. "E! Tehdaih a..ngati nge in buai vak a? Dawt ka sawi pawh ni hlei lo" a ti leh nuah nuah a, rum zeta melhin, "Ka hua che" ka ti tawl mai. Pindanah ka luhsan nghal hmak bawk. Bawihtea pawh hian a ngaina vak lo, zu rim a nam thur thur zel bawk nen,. Nupui lah chu a nei duh malêk a, nuteii hi a rawn hêl leh ka la ring tlat, fate nu nge nge chu an tih ṭhin kha. Mahse, Nuteii hi a lêt ka ring tawh lo. 

Pa Zuala awm lai rengin chaw kan ei a, ka nu chuan a sawm tak naa kei leh nuteii ten kan melh no lo bawk nen, a rawn ei ngam chiah lo a niang. Kan ei hnu lawkah a haw ve leh ta hnu hnu a, "Thudik a sawi vanga huat ngawt kha a kawngkâl lo reng reng. " Ka nu chuan a ti zauh a, kan chhang duh si lo, a ngawi zui ve daih. Zanah Pa Zauva nen kan inbia a, Jasmine nen kan inbiakna te pawh ka thawn ve a, "Pu Rina ka lo pe ve dawn nia, case IO pawh kan pe ang a, bail pawh karleh lamah a theih hmel e." A ti luam a, rilru pawh a nuam ta deuh e. 

A tukah Pi Lingi leh Sangi te nen Victora te kan tur chuan kan chhuak ta a, Dina'n min hruai a, an mamawh eitur leh meizial te kan keng a, Victora leh Vala te lu pawh a lo kawng mul mai. Sangi'n a nuih ṭiah ṭiah mai a, a hlimawm ta phian. Vala pawh Jasmine chungchang te ka hrilh a, a rilru a nawm hmel hle. Victora pawh hmuh a nuam e, ani zawng a inthunun thei bawk a, a nu leh Sangi pawh a zah zo tawh lo nge, "Ka ngai lutuk che, mumangah ka hmu che a, ka harh a ka ui tak tak a ni." A ti nuah nuah a, "Keipawn ka ngai che lawm. Eng nge jail tâng dangte lakah buaina te in tawk em?" Ka ti a. 

"Tawk nang, hmelhriat erawh an vâng ve khawp mai." Za lo zeta nui chung hian a ti a,. "Kan lo ṭawngṭaipui reng che u a nia, kar lehah chuan bail-a chhuah an phal dawn niin ka hria. Lo tuar hram hram rih rawh u" a nu pawh chuan a lo ti ve a. "Dawr pawh kha Bawiha leh Chawnga te khan lo hawng rawh se, khar reng ringawt chu a uiawm." Vica chuan a ti a, a dawr kha an la khar char char rih a ni. 

Inkan hun a tâwp ta mai sia, inngai tak chungin kan invailiam leh ta phawt a. Thil ka ngaihtuah mai mai a, Victora te hi mi khawsa thei ve tak ni loin mi rethei dai kil kar ami te zawng nise la chuan bail pawh an phalsak ka ring chiah lo,. Tunlaiah a tithei fate chuan sum hmangin engkim hi an chingfel zung zung tawh si a. Mizoramah hian case chinfel loh hi a awm ta nualin ka hria, police lamin an tlangzarh lo nge phei zawng ka hre lo va, hman deuhah chhim lam ami nula pakhat an thlenna hotela a ruang an chhar ngawt te kha tualthi ni ngei khan a lang si a, an chingfel ta lo nge ni,. Ni e, mi ramte angin hmanrua te hi kan la nei ṭha tawk lo ve bawk a, chutihrual chuan thil lang tlang reng anga kan ngaih, pehhel an tum ṭâng ṭâng mawni le tihtheih tura a ni lo lama an kual daihna te pawh hriat tur a awm châwk. Kohhran pakhat pastor meuh mahni intihlum anga an han chhal ngawtte kha nuih a za lek lek zawk alawm le..engpawhnise, Victora te hi chu an tih ni lo puia puh an ni bawk a, thiltih pawh a awlsam deuh ang chu. 

Chutiang chuan hun a kal ve zel a,. Keipawh ka hna ngai thawkin ka chhuak nitin, Tka khan picnic chu a rawn rawt ngei a, mahse, Hriata nî, Lawngtlai ami a boral hlauh mai a! Kan hun tiamah kan ti thei ta lo. Ateii'n, "Victora te lo chhuah hunah ti law law ang u " a rawn ti a, a remchang phian ang. Ṭhiante an fel viau laiin in chhungah erawh ka chêp telh telh a, ka nu a hrâng tial tial mai si. Zira lah a rawn lawr sek a, ka hne ngawih ngawih. A chang phei chuan roomah te ka awmsan daih a, a haw hnuah ka nu âng thawm ka hre leh nge nge zel. Ka nu lakah ka hel tial tial a, a mizia a maksak tulh tulh bawk. Victora vang ringawt a nih te hi ka ring lo rum rum zel,.eng emaw tak thil pawi deuh hi a hre zawk mawni aw te ka ti ṭhin. Heti em ema a han duh lo leh Zira min neihtir a tum lutuk hi a mak êm a ni. 

Vawi khat phei chu, "Nu, i fanu tak tak hi ka lo ni lo em ni le? Heti em ema ka chunga i chetdan hi.." ka ti hial tawh. "Ka fanu tak tak ni lo la, hetiang tak hian ka ngaihtuah lovang che." A ti ve bawk si. Nuteii pawn mak a ti ṭan tawh, a rukin a lo hau ve nasa ṭhin. "Victora ni lo mipa dang tupawh nei se ka lawm zawk" a ti hmiah mai. 

Mahse, ka tum a tiruh sauh emaw tih tur a ni ve thung a,. Beisei leh duhthusam ang ngeiin Victora te pawh an bail thei ta a, court lamah an inlan zak zak a ngai tawh dawn a ni. An thubuai chinfel nan hian hun a duh rei dawn a, a la zalên lo hle. An lo chhuah tlaiah a patea te chhungkua nen chaw an ei khawm a, keipawh ka ei ve nghe nghe. Mali'n a nu leh pate sawm a lo rawt ve a niawm e, U Mama'n, "A ngai ve zel lo" a lo tihsan a, a zak ve chem chem maithei a ni. Pu Rina an ukil khan a rawn ei bawk a, thubuai chungchang deuh hlir an sawi a, "A harsa lo turah ka ngai. Jasmine-i pa thusawi ringawt kha thu tling a ni thei lo, Jasmine-i kan tan a din theih chuan eye witness kan nei dawn tihna a nia, chuvang chuan ka huphurh lo viau mai." A ti a. Vica nen kan inmelh zawk mai,. Jasmine nen kan inbiakna kha amah Pu Rina'n la tlangzarh a duh lo va, case IO erawh chuan a lo ngaithla ve tawh thung,. Chaw eikhamah kan han intifel zung zung a, Mali erawh puitling ho bulah a ṭawng lang lang reng a, buai lai laiin thingpui hâng lum turin min rawn ti ve sek,. Sangi pawn, "A ninawm a nia, lalnu emaw hi a intia a. Ka kek hrep chak thei lutuk" a ti hlak hlak mai. Vica a rawn lut a, "Ti zo vat la. Ka ngai tawh che" a rawn ti lûng lûng, Mariai leh Sangi an awm ve sia, ka zak deuh. "Zo ṭêp" ka ti ringawt. Ka tihfel zawh chuan in chung lamah kan inzui chho ta a, Maliani damdawi ka pe leh zuai. "In inngai dawn sia, chance va nei vat teh, kawngka kalh nachang hre tawh u la. " Tiin a nui har har a, Mali a sawi chhan tih ka hre reng. Vica roomah kan lut dun ta a, kawngka pawh a kalh nghal rap mai. Ka nui hak a, ani pawh a nui ve huk. Khumah chuan min bawh rûn a, "Jail tang chhuak ka nia, ka fit a nia" a ti sur sur. 

"Tenawm lo mai teh" ka ti hlak a. 

"Min ten ngai dawn lo nang hian.." tih leh min fawh a rual nghal a, ka thlahlel ve tawh bawk nen, ka lo chhanglet duhâm viau. Kan inlehthal zak zak a, tun ṭum zawng a insûm zo ta ngang lo nge, "Pawi ka ti lutuk, Tuaimam..min hrethiam mai teh.." tiin ka kekawr a pawtthla ta hawk mai. Ka lo inring lo bawk nen, ka hamhaih hman. "Lawk, Vic, sawi tur ka nei" ka ti a, a thaw halh halh a, keipawh ka biang a sa hat hat tawh. "A va hun lo tak" a ti hlur a, min ngaichâng tho. 

"Ka virgin tawh lo" ka ti ta tawl a. A mitmeng a danglam zawk naa rei a ni lo,. "A ṭhat chu, virgin la chuan ka insûm leh a ngai dawn sia.." tiin mi rawn fâwp leh nawk nawk. Tih loh hram ka tum, ka lo insûm ve ṭang ṭangna te chu phumboin a awm ta a, Victora hmeichhia ka ni ta. Inchhir loh hram ka tum a ngai dawn a ni. Kan zawh fel chuan, "Ka lawm e. Tikha chuan ka ngaih a ngâm zân tawh" a la tizui. 

"I chhia" ka ti hlar a, ka hnara rawn tuai zeuhin, "I rai ngei tur a ni. " A ti hniam raih a. Chunglam ka lo melh daih. Dar 9 velah ka haw phei ta chauh a, Victora a lo chhuak tih ka nu ten an hre ve bawk nen, kan boruak a sosang leh viau ang em ka tih rilruk laiin Putea a lo leng chu niin ka nu chuan min melh rum bak tihtheih a nei rih lo, putea awm lai chuan min hau dawn lo tih ka chiang. Engvanga rawn leng nge a nih pawh ngaihven loin ka inbualsan a, ka mu nghal daih. Mahse, ka mut hnu reivakloah ka nu a rawn lut a, "Rawn ṭhu chhuak ve eih la mawle, i putea saw a rawn tlan ve a nih saw" a rawn ti a. Makti zetin, "Pasal zawk an tlan ve ngai mi?" Ka lo ti hû. 

"Tlan tihah a lungawi lo a rawn kal tihna.." a ti a. Keipawh chutiang a nih takah chuan ka va tho leh a, Putea chu a lo ṭhu ngui bûr mai. "Pute, engvang berin maw i rawn kal?" Ka ti khawmawi a. 

" a..i piteii nen kan inhnial deuh a, ka pizawn ten lo vuipuiin min hnawtchhuak a ni ber ang chu" a ti sup sup a. 

"An va timak ve a. I fate i rawn hruai bawk si lo" ka ti a. 

"Anni lehzel ka rawn hruai chuan kan buai dawn lutuk alawm. Ka rilru a na khawp mai, ka in leh lo kan hralh te tê a, hetianga inchachhuah leh chu,.ka ngawi mai mai dawn bik lo. In hralhna la bang ang ang kha ka account-a tranfer turin ka ti dawn. A fanu ka enkawlna senso pawh a ṭhen azar tal chu min pe ngei ngei tur a ni ringawt" a ti tûn tûn a. Ka lo thinrimpui ve hle, han ngeih loin ngaihsak lo viau mah ila, ka putea neihchhun a ni ve a, kha zawng zawng a nupui fabîk enkawl nan a sum pai a hmang a, a in thlengin an hralh luihtir a, tun ataka hetianga an ti leh chu an sum ît vang bak niin ka hre lo. "Engzat nge i in hralhna chu la bang ang." Nuteii'n a lo ti ve a. 

"Nuai 30 khan a hmunhma zawng zawng nen ka hralh a, nuai 10 bak kan la hmang lo, ka chhinchhiah ve alawm, an rawn thawn dawn pawn ka account-ah rawn ti ru ka ti mawlh mawlh a, Biaki account-ah an lo thawn a, an ruahmanna vek a nih ka ring." A ti a. 

Ka nu chuan, "Ni chiah e, an thluak hi i man pha si lo va, in kha chu tihral loh mai tur a nia. A pawi tak tak a ni. Mahse, ni e, Biaki te pawh an duhdan ang chuan an khawsa bik hauh lo vang, hei in chungnu û hi ukil a nia, naktuk aṭangin hma kan la dawn nia, muanchan chi a ni lo. Pawisa i la ang a, hna chhetê i nei ve bawk a, i fate pahnih pawh awmpui ang che, hei ṭhenawmte hian an in hnuai saw an tiruak dawn a, i luah lailawk ve ang a, in awm ve thei mai ang. Keini kan awm bawk a. " A ti zung zung a, ka nu hi an unau zinga upa ber niawm a ni ṭhin, ruahmanna siam a thiam a, a ṭul hunah chuan amah ngeiin chet a la mai zel bawk. Putea chu Tetea roomah a riak a, a tawpa tawpah chuan chhungkua kan awm khawm leh ta chu a nia. Ṭanpui loh theih lohin putea a awm miau si, ka nute tan han thlauhthlak chi a ni tawh lo. Pite Biaki chu ka ngei hle mai. 

Chutiang chuan buaina neuh neuh karah ni a liam ve zel a, Victora te case pawh a la kal ve zel bawk. Jasmine te chhungkua pawh koh an ni chho ṭan a, Jasmine ngei pawh koh hawn a ni ta. A zawng aza va hre vek lo mah ila, Victora te dinhmun chu a ṭha zawk tih ka hre ve, Jasmine lahin thudik a sawi hmiah hmiah si a. A chhungten a ka an hup zo meuh lo, A chhungte lak aṭanga ven ngai deuha a lan avangin an dah hrang ta bawk. Mahse, lehlamah chuan Jasmine-i pa pawh khan a fapa kha a tum reng vanga that a ni bik lo va, an chinfel pawn a nêp thei ang bera an tihsak ka ring. Chutihrualin Victora te lamin Defamation case an file ve chuan a chung a rip ve leh deuhin ka ring. Victora chuan a dawr pawh a hawng tawh a, a thubuai avangin customer a neih tlem phah lem lo a niang,. Bakah motor part hi an nei chikim ve êm bawk a. A tân hmaa kan tih dan ang thoin tlai tin min la thlah a, ka bialpa a ni tih miin hre mah se, pawi tihna ka nei tawh bik lo. Kan mutdun hnu khan chance a awm ta rih lo bawk nen, kan chhunzawm ta miah lo va,.Kan ngaih a ṭha dun ve ve tawh ni maiin ka hria. Ka nu pawh putea avangin a buai bawk a, ka chungchâng a khel vak tawh rih lo,. A sawi ang ngei khan Pite Biaki chu Putea'n a be hmasa phawt a, a pawisa bakah Lawmi enkawlna senso atana a pawisa khawl ve sa an hmante kha a zatve tal rul leh turin a ti a. Pite Biaki lah chuan a lo ngainep nasa a lo nia, "Engti kawng mahin ka account-a awm tawh hi i la let lovang. Ka ta a ni tawh,. Lawmi enkawlna phei chu ka hman luihtir che pawh ni hlei lo, engvangin nge ka pek ngawt ang che." A lo ti ham ham mai, tin, Putea lo phei hnu ni 2-naah an fate pahnih Kimi leh Bena te chu an rawn pheitir ve leh hmak bawk a, putea pawh a bungrua la turin an rawn chah bawk. Khawvelah hian mihring hi kan va chikim tehlul em ka ti. Lawmi natna hmang ṭangkaiin putea account an tiruak thak a, a in leh lo an hralhtir a, tunah an hnutchhiah leh ta hmak chu a nia. An inhnialna nia a sawi lah a ho angreng si. Arpui tuilai an talh a, Pite Biaki nute inah an siam a,an zanriah ei lai chuan Piteii nu chuan, "Tihian in luah ve reng ang a, in dang zawn pawh a tul tawh lo" a ti a niawm e. Mahse, an in luah chu in hnuai a nih bakah a chêp riau a, pindan pawh pakhat bak a awm thei si lo, chuti reng renga damchhunga awm kha putea'n a lo tum bik si lo va, "Ka in hralhna bâng pawh a la tam ve khat a, in hmun emaw in dinglai lei tur hi ka melh deuh a. Loan te hi han rul zo phawt ila.." a lo ti ve a niawm e. Chu chu ka nute bula awm i hreh vang, i hmuhsit vang de de dei an lo ti zêk sia,. An in âng thinrim tluang zel a, a tawpah phei chuan Putea chu,"Kan ina i awm theih loh chuan chhuak mai rawh. " An ti ta hial a ni. Ani thinrim ve tawh bawk si leh tlawmla chu a rawn chhuak ta a ni. Mahse, inṭhen mah se; a pawi vak lo, putea hi a hmelchhe lo va, hna a lo nei ve kher bawk nen, nula hnahkhat pawh a la hmu ang tih theih tur a la ni ve tlat a, a fate lah an nu ang lo takin an felin Kimi phei chu a che peih reuh a, lehkha lah an thiam. Chutiang a nih tak duah avang chuan ka nute pawn hma an la ve ta rap rap a, in chung nu Nu Machhungi û Pa Sawma biain court-ah an thlen ta hmiah a ni. Court hial a thlen ngam takah chuan Piteii te chu an buai ve leh ta a, chawh hi ka va ti tak. In leh lo kha putea hming veka awm a ni si a, a nupui pawh ni tawh hlei loin a neihsak kha thil theih ni hek lo,. Piteii lah chuan kan inṭhen lo tih a ṭanchhan a, Putea bakah an fate bungrua pawh kan va la vek tawh si. An tan kawng a ping ṭan ta a, Sum mena meng ta ngang chu Piteii chuan Putea chu a rawn hel chho leh vel..ka nuih a za zawk e a. "Inṭhen ang ka tih loh kha, ka rilru i tina êm a, ka lo ṭawng duhthawh ve deuh a nih kha, nupa te chu kan inhau fô va,. Hetianga mualpho taka in chhuah tur a ni lo, lo haw u la, ṭha takin awm tlang leh dial dial ang u, naupangho pawh an ngaihawm tawh.." a rawn ti vel a, "I sum ît vang a nih kha. Kan inṭhen ta sa sa, tawp hlen rawh se,. In nufa vanga ka sum sen tawh zozai hmang khan in ṭha pui ka sa thei tawh ang. Min lo be tawh suh.".putea'n a ti ta hmiah. Tichuan, Awlsamtêin Putea chuan hnehna a chang ta a, Piteii account aṭang chuan cheng nuai 20 chu a dawng leh ta a ni. Lawmi enkawlna erawh kha chu an inneih lai a nih bakah intihluihna a tel loh avangin an sawi zui ta lo. Nuai 20 te chuan anni pafa thum ringawt te chu nuamsa ve khatin an awm thei tawh ang. "Hmeichhe ṭha lo tawn chuan inchhirna chiah min hnutchhiah" putea'n a ti tlawk tlawk mai,. "Hei hi ka in a nia" tih tur neih loh hi ngaihtuah chian chuan rapthlak deuh a nia. Mi in luaha tette aṭanga khawsa kan nih avangin mahni puala in leh lo neih hlutzia hi kei chuan ka hrethiam daih tawh, ka hlawh bakah ka pa dawr aṭang hian in hmun ka tuak ve ang ti rilru ve reng ka ni bawk. Eng nge maw ka ân dawn ni. 

Victora te case erawh a la kal reng a, mi pawn an sawi zui tawh lo, an vengah pawh an entleu phah pawn ka hre lo, Mali kamtam zar an zo ve bawk a, ṭhenawm khawveng bakah a hmelhriat ho bulah Vica te thah a nih loh thu a lo sawi ve a, kha khan miin an rinhlelhna tur a tidal ve deuh niin a lang. 

Putea te pafa an indan zanah in thar lawm nan tiin an in tharah chuan chaw kan eikhawm ve let lêt a. Kan hlim ve viau mai. Bar thum vel ka bar hman tihin ka pum a let ta but a, insum hman rual lohin min rawn pump tawh si, hmanhmawh zetin bathroomah ka tlan lut a, ka va uak bawrh bawrh mai. Ka let leh chuan min lo melh ṭhap a, "Vawksa rim kha a niang.." ka ti lawi rât a. 

Chang beng bawng hian ka nu chuan, "I rai a ni lo maw? Hruaii" a lo ti fak mai.