Amah leh kei 14

AMAH LEH KEI..(14)

Ziaktu : Toni Râlte

Ka nu chu a lo ding to mai a, a hmela thinurna nasa tak avang chuan ka îp chawih chawih mai. Ka kut lakthlak ka tum chuan Vica chuan a chelh nghet zual ta sauh a, "Thlah rawh" ka tih chuan min rawn en a, tumruh leh luhlul tih hriat zet hian, "Hlau suh" a ti hriam hraih a. Ka hlau pawh a ni lo, ka nu thinrim khaw hmu lo hian tih loh loh a ti ang tih ka hlau a ni zawk. Ka nu chu a rawn kal phei a, Ateii te erawh room aṭang khan an chhuak tawh a, kan pathum chauh chuan kan awm ta ran mai. 

"Thlah turin ka ti che a ni lo'm ni? Min va pawisa lo ve a" dak vah hian ka nu chuan Victora bulah chuan a ti a. Victora lah chuan ka kut a hum nghet sauh sauh zawk si,. "Ka pi, eng ber nge i buaina? Ka nunhlui chu em ni? Tunah hian min en ta che. Ka ṭha ber e chu ka ti lo, mahse, hma ka sâwn chho ve zel asin.." a ti ta charh charh a. Ka nu erawh a danglam eih lo. "Ka sawi chiang thawkhat tawh viauin ka hria. Ka makpa atan ka duh lo che, retheitê mah ni ila, Pathian hre lo chhungkuaa lawi lut turin ka fanu ka phal lo. A pasal tur ka hualsak tawh a, lo inrawlh duh tawh suh." A ti chang ta fak fak a, ka zak bawk si, ka dinhmun chu hralh thei ila cheng duli pawn ka hralh phal awm e. 

"Pathian chu kan hre ve asin, harsatna tam tak kan tawk mai zawk a ni. Pathian hria inti si i fanu thinlung leh rilru i hrethiam miah lo leh a zalenna i hupbosak hi a dik bik em ni?" Victora lah chuan a chhang ve zel si. Chutah ka nu chuan min melh thîp vâwt a, "Hruaipui, i duhthlannaah a innghat e. Duh thlang fel nghal ang che. Ani nge keini?" A ti ta mai a! Chu em em chu a tihtheih ka ring ngai miah lo. Ti nge ka nu hi hetiang tak hian a lo danglam tak le..mak ka ti em mai. 

"Nu, khawngaihin,. Tunah chuan min kalsan ve ve teh u, mahnia awm ka duh" ka ti tham ṭiak a. Victora pawh chuan min thlah ta vat. "Ka pi, i fanu hi i hmangaih em? Ti nge duhthlanna harsa tak i hmachhawntir mai le? Ani nen hian kan induh a, kan inhmangaih a, hmalam hun chu ka sawi thei lo, mahse, i rindan ang kha nih loh tumin theihtawp ka chhuah ve mek asin. Min hrethiam thei ngang lo em ni?" Ngenngawl takin Victora chuan a ti leh a, chutianga tlawm taka a han awm chu a inhmeh lo takzet. Mahse, keimah vanga a tlawmna leh inphahhniamna chuan ka rilru a hneh viau mai. 

"Victor, mimal inhuatna a ni lo a nia. In inzui tirh aṭang khan in chhungkua bakah nangma chanchin hi ka theihtawpin ka lo chhui ru ve a, sum leh pai chu in ngah, in rethei dawn hauh lo tih pawh ka hria. Mahse, a pawi ber mai chu in nun in hloh tlat hi a ni. Tunah hian ka fanu hi i hnenah kaltir ta ila, hmeichhe dang tam tak i lo tihnat tawhte ang khan i tina ve lovang tih a sawi lawk theih loh. Chhungkua nisi thurûk in nei ru ṭhûm te, khakna in pai run reng te hi kei fate hmangaih em em tan chuan palzam mai chi a ni lo alawm,. Keimah anga nuthlawi, hmeithai a la ni ve mai ang tih hi ka hlauh ber a ni. " Ka nu chuan a ti dap dap a. 

"Thil i ngaihtuah nasa lutuk a, i buai a nih kha. Thutiam mai mai chi ka ni lo va, i fanu hi ka nei a nih phawt chuan kei chu a ṭhentu zawk ka ni ngai lovang" Victora chuan a lo ti leh hmiah. Ateii te an rawn lut ta si a, ka nu pawn engmah a sawi zui lo, "Haw ang" tiin min rawn melh zauh a, a chhuak zui nghal. Ateii erawh chuan thil awmzia a hrethiam tih a lang, "Awii, a zia lo e. Mate, hrehawm ti suh aw. Inneihte zo fel se, in chungchang hi kan ngaihtuah ṭha dawn nia" a ti mawlh mawlh a. Ka ngawi reng, ka ṭah a chhuak, ka awmdan chu ka sawithiam lo. Victora pawh chuan, "Va haw rawh. Inngaihtuah vak vak suh aw. Ka ngaihtuah che a nia" a ti a,. Ateii room kawngka thleng min thlah. Keipawh Ateii'n riak tura min sawmna pawh tihlawhtling thei ta lo chuan ka haw ta a. Nuteii a ṭawng bawrh bawrh a, ka nu nen erawh kamkhat mahin kan ṭawng ve lo. Khumah chuan ka mu meng reng a, ka ipik hluah hluah. Ngaihzawng ka lo nei ve fô a, hetianga harsatna hi ka la tawk lo, ka bialpa ṭhenkhat te phei chu ka nuin min hriatpui ngai lo. Tin, hetiang tak hian keipawh ka serious ngai lo reng a, kan inṭhen pawn ka tuar zui ngai lo ka tih tawh kha. Victora erawh a danglam a, min hip bet ka ti mai, buaina kan tawh aṭang phei chuan ka thlahlel zual telh telh lehnghal. Ka nu rilru hi ti nge maw a sak em em mai le..

A tukah mood chhe zetin ka tho a, nizanah khan Victora nen dar 2 thleng kan intext a, eng thu mah kan sawi kaw tak tak chuang lo. Ṭan lak tak tak a tum hian ka hel leh zel a, ka nu sut luih kha ka ngam tlat ṭhin lo. Bakah hetiang nupui pasal insiam kawnga chhungte remti lo chunga neih luih chu a malsawm lo an ti bawk si. Ka nu leh ka naute bak neih ka nei lo tih ka inhriatna hian ka nu dodal a tiharsa zo vek ṭhin. Inneih hun kha dar 1-ah a ni a, a lawmna hranpa a awm tawh dawn lo va, Hriata te in lama chaw ei nghal tur a ni. Kan phei hma a, min cheitu tur pawh a lo awm vâng tawh. Ateii chuan, "Ka hlim niah i hlim famkim thei si lo va, pawi ka ti, tihtheih nei ila ka ti ngawt mai" a ti sap sap a. 

"Ka hlim reng, rambo part 3 ka nih hi.." tiin ka uang a. Keimah vanga a mood a danglam ka phal lo, ka ṭhianṭha ber a ni a, hlim takin pasal nei se ka duh a ni. Tichuan, kan inpeih ta bawk a, kan chhuak ta a, mahni tawkah kan mawi ve hle. Inneih inkhawm chhimtu pawh an ṭhahnem kher mai. "Ka zâm e" Ateii chuan a ti sar sar a, "Nui rawh, nuih sâng kha a pawimawh" ka lo ti thung. Hriata hmel hmuh pawh a nuam hle. Inneih hunserh chhung a rei hran lo, a thiam khawp mai. Thlalak chhung zawng ka insangmar tihtheih a ni, ka pheikhawkin ka ke a nawt pilh bawk nen, a va nuam lo mai mai tak. Ateii pawn a ning ru hle tih ka hria, nuih luih ngai ve reng bawk nen. A tawpa tawpah kan zo fel hram,. Tichuan, Ateii te in lamah let lehin kan inthlak sawk sawk a, Hriata te in lama lawi lut tawh turin kan chhuak leh ta. Victora pawh suit nen a rawn induang zuih a, a va inhmeh tak êm. Maliani'n inneih thilpek a rawn kentir ve ngei bawk a, a nachang a hre khawp mai. Ruai an ṭheh ta mup mup a,. Keini pali erawh a hranin dawhkanah min rawn chhawpsak a, a tuihnai khawp mai. Ka pheikhawk phelhin chapal ka bun tawp tawh. A na tawh lutuk chu..chaw kan ei laiin Vica chu band aid nen a rawn kal a, "Kha, bel rawh" a ti. Ka ke ka nawhpilh thu kha msg in ka lo va hrilh bawk nen, mi chu a care mawle. Ka bel ta vâ a, a kal leh nghal daih, "Inpa hi chuan a va care tak che e aw.." Ateii pawn a ti sur sur mai. Ka nui ringawt. Chaw te kan ei kham hnu chuan gift hawnna kan nei zui ta a, an dawng ṭha hlawm khawp mai. Victora te pawh an la awm ve a, ka bulah a ṭhu char char tawh, Hriata cousin hmeichheho chuan an rawn melh zauh zauh tih ka hria, an phun leh sep sep bawk ṭhin. An star a nih ka ring. A nuam ve mai mai, ka nu a haw tawh tho bawk a, ka free ve viau. Rilru chhungril erawh a nuam chiah chuang lo. Inlengte haw darh hnuah Ateii te nupa khum tur chu kan siam a, kan siam zawhah chuan haw lam kan tintuah zui ta nghal mai. Vica'n min thlah a, thim chinah kan inchuks zuai. "I chau awm sia, mu nghal mai rawh. " A ti a. Ka chhungte pawh an lo mu vek tawh a, keipawh ka mu ve nghal a. Thawh ka hai chiang viau, pawi ka ti vak lo. Chawlh ka lak rei tawh avangin Ateii te pawh ṭawiawm duh viau mah ila Maliani te in lam ka pansan ta a, anni pawn min hrethiam khawp mai. 

Ka va thlen chuan tukṭhuan an lo eikham tawh a, Pu Zauva pawh a lo chhuak hman tawh. Pi Lingi leh Mali te chu ṭhutkhawmna pindanah an lo ṭhu a, Mali chuan, "Chaw i ei tawh em ni? Va ei nghal la" a lo ti mial a. Ka ei tawh thu ka hrilh nghal vat. Maliani roomah ka chho nghal a, min lo ngai ve tawh ngang mai. Chaw pawh a lo ei leh duh lo va, "Chaw kan ka ei duh" a tih chuan ka khi var var mai. Damdawi ka pek zawhah ka zu siamsak ta a, Sangi pawh ka bulah a tâp leh chawt tawh. Inneih nîa kan thlalakte chu ka entir ve a, "I va mawi em em, i inchei lo thei êm a, i inchei chuan i lo chhe lo êm a nih hi" a ti chul a, a dawngsawngtu tan chuan lawmawm ve duh tak a ni. Mali a rawn kal a, Sangi ṭi nghal dâk chu ka hmuthiam.."Sangi, thingpui lum teh, a sen hângin ka lo in teh ang, ka nu pawn a duh ve ang" a ti a. Sangi a che nghal. Ka chaw kan lai chu rawn hmuin, "Tu ei tur nge?" A ti leh a, "Maliani" ka ti mai a. 

"Hetiangte ei duh ila hnathawh a ngai nang le..duh maksak thei sia" a ti nghat a. 

"Ei loh ai chuan a ṭha zawk tho alawm" ka ti a. A ner sak ringawt. U Mama a rawn lut ve a, "Ka ken tur ho khi lo su teh u aw.." a ti a, Mali chuan, "Sangi khan thingpui lum zo se la, han su rawh se" a lo ti vat. Tumah kan ṭawng tawh lo. An nupa chhuah hnu chuan, "U Mateii nen an inthlau tawp, ka awm mai mai hi a hmu thei lo ka ti mai, tihtur min kawhhmuh nghal zel a. Hetiang reng reng chuan ka awm rei peih pawh ka ring lo" a ti sar sar a. Chhungkua ang tak takah a lo ngai ve tawh hlawm a, Pi Lingi han sual deuh pawh a tuar thei ve mai ṭhin kha a nia, tunah erawh Mali chu mi hrang ang a ni a, a mil lo ru ve hle tih ka hre mai. "Tuar hram hram rawh, Midangin an ṭan vek tho che alawm" ka ti a. Victora a rawn lut ve chhak bawk. "I kal tawh maw ka tia" ka lo ti a. 

"Ka kal dawn lo vawiin chu, Ka nauten chawlh min dil a" a ti a. 

"Nih chu, Chuan eng nge i tih dawn?" Ka ti a, "Ka awm dawn che" a tih chuan ka hmui ka lo tihpawrh khum a. Chaw kan chu bowl-ah suak chhuakin Maliani rooma ken chhoh ka tum a, "Sawtah Danny te inah ka va kal lawk ang e, ka rawn haw vat ang" a ti a, ka bu nghat ringawt. Maliani chuan tui ti takin chaw kan chu a ei a, hmuhnawm ti zetin ka lo thlir reng a, "Mali'n a bia che em?" A tih chuan min biak dan vel chu ka sawi a. 

"Inlak mark ṭhat a tum vel a nih chu,. Sangi a treat dan aṭang reng khuan mi ṭha a ni lo vang" a ti hlak hlak a, a thak deuh nge ni a si hlat hlat bawk. 

"A la ṭha ve leh mai ang" ka ti ringawt. 

"Victora hi neih i tum em?" A ti leh thut mai a, a zawhna inpersanzia mai chu! 

"Ka hre lo. Ngati nge?" Ka ti a. 

"Nei rawh. Kan inah hian mi pangngai an awm ve a ngai,. Mali hmetmit thei tur" a la ti ta deuh deuh. 

"Ka ngam lovang, a huai hmel si, bakah kei aiin a upa bawk sia" naupangchhia zet hian ka ti a. 

A nui ta hawk hawk mai, "I va dawih tak, a hlauhawm loh lutuk, i lamah kan ṭang vek dawn alawm, Lawmkima tih loh chu" a ti mawlh mawlh a. 

"Victora'n min chhan ngam loh phei chuan e.." ka ti hram a, a nuih a za tawlh tawlh mai. A ineipuar hnuah a intifai a, keipawn a room chu ka lo tihfelsak bawk. Hmun ka phiah laiin Victora a rawn hawng a, "I zawhah ka room saw min phiahsak ve zuai rawh aw" a ti a. 

A rooma ka va luh chuan guitar a lo perh a, ka phiah mawlh mawlh laiin mi rawn pawm thut a, khumah chuan min nam mu a, ka inrin loh lai taka a chet avangin ka hamhaih deuh, min rawn bawh nghal rawp mai. "Heii, Victor, i â mi? Tho teh" ka ti chiam a. 

"Lawk, a rei lovang, hetianga awm ka châkna rei tawhzia hi i hre lovang" a ti ham ham a. Ka beng bulah te chuan a thaw lum hiam hiam a, a za bawk si, ka mur er er thei. Min fawp a, min hrâwm nawk nawk bawk. "Ti nge hetia i awm thut a? I va â tak" ka ti a, zep nâk emaw keipawn nuam ka ti ve reng, mahse, tu ten emaw min rawn hmuh ka hlauh bakah hetianga awm chu ka duh lo. "Ka ngai che..Tuaimam, ka nei dawn che" ti lehin a duhthawh sauh a, ka lo chhing diar diar ringawt. Chutihlai tak chuan kawngka kik pawh awm eih loin Mali ngei mai kha a rawn lut hlawl mai a, "Ehe!" A tih tuarah kan harhchhuak a, Victora pawh a tho rang kher mai. "Kawngka i kik thiam lo em ni!" Victora chuan aw lawi lek lek hian a ti a. Keipawh ka sam ka chulmam thuak thuak, ka zak khawp mai. Mahse, thil pawi zawk engmah a thleng hman lo hlauh. Mali lah chuan, "Suk tur i neih leh neih loh rawn en ka tum a, ka tihpalh lutuk. Tiang khan in lo awm ṭhin a ni maw?" A ti zuah zuah a. Victora chuan, "Ka bialnu a nia, kan awmdan chu kan thu thu aw. Insuk tur ka neih chuan Sangi ka hrilh mai ang, min chhuahsan rawh." A ti chhum hmuk hmuk mai a. Mali pawh chuan a hlau deuh nge engmah sawi tawh lo chuan a chhuak ta nal nal a. 

"Nangmah vang vek" ka ti mawlh mawlh a, "A ho lutuk, engtinmah kan awm loh kha" a ti a. Keipawh hmunphiah lain ka chhuak nghal daih, a nuam vak lo. Lo chesual phei ila chu a zahthlak dantur zia kha. In hnuaia ka chhuk chuan Pi Lingi leh Mali te chu an lo awm a, Min hmuh rual rualin, "Fimkhur tawh r'u aw. A mawi lo êm mai, khatia awm kha. Nang phei chu Maliani nurse i nia.." Mali chuan a lo ti zawt zawt a. 

"Engtinmah kan awm loh kha" ka ti ve hram . Pi Lingi erawh chuan engmah a sawi ve lo thung. Maliani bulah engkim chu ka sawi ta vek a, "Mali ber kherin a hmu che u sia, a chhungten an hre nghal vek dawn a nih chu,. Mahse, a ho e, inngaizawng in nia." A ti mial mial a. 

"Kan chesual ang tih a hlauhawm tawp" ka tih chuan, "Hruai, i la virgin mi?" A ti phawng mai. Ka nui hawk a, ni e, ka hun kal tawh ka ngaihtuah chhuak ram ram mai. Ka famkim bik lo ka tih tawh kha, vanduaithlak takin ka virginity ka hloh tawh a ni. Kum 20 lek ka nih lai a nia, Kimtea nen kan inngaihzawn lai a ni, kan picnic ṭumin a nia. Khamini khan eng nge ka hriat ka hre lo, min han khawih vel khan ka danglam tlat a. Ka lo nêm ve ringawt mai a ni. A hnuah ka imchhir leh ta roh sia, Kimtea lahin ka virgin a hawn vang nge min intineitu ta ropui sia. Tun thlengin min biak a la ṭhulh lo chu a nih hi. Mahse, khami bak kha ka hmang tawh lo hrim hrim. Ka duh lo bur mai a ni, thil chu kan lo tisual tawh a ni thei, mahse, kan siamṭha thei tawh lo a nih pawhin kan phumbo thei tih hi ka changvawn a ni.Hnu ngaia kir leh hi ka duh lo bur bawk. Victora pawh hi ka la hrilh miah lo va, hre ta se a rilru ka hre châk ve reng, ka hrilh ngam rih thlawt lo a ni. 

"Gin tawh lo tia sawi ka hreh viau naa a dik sia" ka ti ta ngawt a, a hmel landan a danglam tehchiam lo. "Tunlaiah virgin an vâng tawh, Vica pawh a virgin tawh hleinem" a ti ta khauh a. Ka sawi zawmpui ngam tawh lo. Ka zak a ni tawp mai. "Vica hrilh rih suh aw. Keiman ka hrilh ang" ka tih chuan, "Hrilhna chhan tur ka nei hleinem" a ti mai a. A hrilh ka ring lo hrim hrim. Mahse, bialpate farnu bula han share atan chuan thil zahthlak tak a la ni tho tho mai. Mahse, Kimtea bak kha ka la hmanpui lo va, Victora lahin ka virgin tura a ngaih vang nge min fight ngai bawk si lo, min fight mah se; ka inpek ka ring chuang lo. 

"Nuam lo ti suh, tumah kan famkim hleinem, Natna ṭha lo em i vei ve hleinem" a ti leh a, ka rilru erawh a nawm phah huai hran lo. Tlaiah Vica nen bawk kan inthlah haw leh a, Mali vang nge mawni a mood chu a off deuh tlata ka hriat ni. Kei tak pawh ka rilru a nuam vak lo. 

"Zanin chu chhuah lawk ka ngai a, i remti em?" Ka chhuk chuan a ti a. 

"Khawiah ?" Ka tih chuan, "Lalvala nupui ka rukpui dawn,." A ti a, nui hak bawk. 

"Ru kher lo va neih dan a awm lo mi?" Ka ti a, "Awm lo, Jasmine chhungte saw an sual em alawm, ru hmak rawh se" a ti a. 

"Taka! Naktuk tlaiah Ateii te nen chaw kan ei chhuah dawn kha aw, i lo theihnghilh ang e." Ka ti hluai a, "Nghilh lo ve. A nuam khawp ang. Saw i nu,." Tiin hmalam a melh nghal vut a, ka nu pawh a rawn phei hnak hnak mai. Min rawn melh chat bawk a, mahse, a hma ang khan han zâmna em em ka nei tawh miah lo thung. "Kal rawh,keipawh ka haw ang" ka ti a, thuawih takin a kal ve ta mai. Ka nu nen in kan lut rual a, Tetea leh Bawihtea te an lo inchhaih nui uar uar mai. "I luhlul ngat ngat hle mai maw? Ngawi tak rawh. Zira ka bia ang a, palai rawn tir rawh se" ka nu chuan a ti hmawk hmawk a. 

"I duh leh ti la ni mai lawm, a neitu tur berin ka duh loh chuan min nei lui chuang lo vang." Ka ti vei hmak hmak. 

"A nih chuan Victora chu keini i chhungte aiin i thlang tihna maw?" A ti hawk a, lungchhe hmel a pu. Nuteii chawhmeh chan lai chu rawn dak chhuakin, "Hmangaihna awmzia i hre miah lo a nih hi, ka û.." a rawn ti ve a. 

"Nang lah hi inrawlh ve phêt tum suh. Engmah i hrethiam lo, Zuala pawh a tirah neih ka remti lo va, i nei lui a, eng nge i nih tak hi le? Unau nauin kan thlawi a, ka fanu lehzel a thlawi phei chuan miin min hmusit dawn lutuk." A ti ta phiar phiar a. Kei erawh inthlak turin pindanah ka lut daih, ka nu ânhla tam tak chuan ka rilru an luah hleithei lo, a hma aiin ka huaisen sawt nge ka nu chu ka zah lo ta sawt zawk ka hrethiam lo. Victora'n min lo call a, a va thleng hma awm em em ve le.."Eng nge kan an?" A rawn ti a. "A âng leh" ka ti tawi tak. 

"Ka rinsa a nia,. I tan a khirh a ni, kei min tawng hi. I duhthlanna ka tih tawh kha aw. Ka khawngaih che, chhungkua in hlim loh phah bawk si, ka hma ka sial vang ringawta nun chêp taka i awm ka duh lo." A rawn ti duah a,. "Kan kal thui tawh i tih kha, kal law law ang." Ka inrin hmain ka ti a. 

"Takzet em? Chu chu ka duhthusam a ni. Min zui duh phawt chuan ka phatsan ngai lovang che." A rawn ti nghet charh a, Victora chu ka ringhlel lo, mipa a ni miau a, kan inkawp hnuah Tluangtluangi bak kha chu rinhlelhawmin a la awm lo bawk. Kha pawh mi kut a tawrh phah hial a nih kha. Ka nu aṭanga dodalna kan tawh hnu phei chuan min ngaihtuah zualin ka thu lah a ngaichâng thiam em em bawk, tunah rih chuan ka chhungte aiin ka thlang tihna ni lovin Victora nena khawvel hmachhawn law law ka thlang ta rih a ni. Zanriah pawh ka nu chuan a ei duh ṭhak lo, Nuteii'n, "Lehlamah chuan i nu hi ka hrethiam, mizo society-ah chuan a tawpa a chan chhe zawk chu hmeichhia zel kan ni sia, a hlauthawng a nih hi. A dika adik chuan nuthlawi tawh chuan tum hi a sang mawh tawh riau a, keini ang bawka fa hnih khat neih hnua i rawn let leh mai hi a hlau ta ber niin ka hria. Chuvang chuan inngaihtuah chiang ve leh deuh la a ṭha." A ti malh malh a. 

Tetea lah chuan, "Aw ama neih tur pawh ni hlei lo, A û pawn a tihsual leh a chawh ang a ni mai lo'm, tunlaiah hetiang buaina neih ṭut ṭut hi a ṭhing tawh." A lo ti ve chuar chuar a,. Mipa a ni bawk a, a ngaihal a sam viau. Kei erawh ka sawithiam lo, ka sak tlat, keimahah hian luhlulna a pung ka ti dawn nge, ka nu chuan min dodal eng ang mah se; a rin ang a ni lo tih hmuhtir hi ka chak ngawih ngawih pek a nih chu! 

Vala nena an chhuah dawnah min rawn hrilh thlap a, Jasmine chu va ru chhuak thei tak ang maw..Vala hian a duh ve ropui sia. Dar 9 velah ka mu ta daih a, ka mut erawh a chhuak lo hle. Maliani nen kan intext zuai a, Mali chuan kan chungchang kha a cousin te a hrilh ngei a niawm e, phone-a an inbe lai Maliani'n a lo hre ru a nih hmel. A kamtamthlak mai mai mang e. Mahse, ka thinrim peih chuang lo, kan inngaizawng miau a, sex êm kan hmang chuang hleinem le. Dar 10 a rik takah chuan ka mit a thîp deuh bawk nen, phone dahin ka chhing ta vang vang a. Mahse, 11 rik hma deuhin call ka dawng zuk,. Maliani a lo nia! A ṭha lo leh deuh em mawni ti rilru chungin phak zetin ka lo chhang a. "Victora te an man" a rawn ti nghal tawl mai. Ka ṭhu chhuak vat a, "Maw?! Ngati nge?" Ka ti khur dat a. 

"Engmah kan la hrechiang lo, Lalvala nen an la tih kan hre ve tawp, ka pa leh Mama te an phei dawn." A rawn ti zung zung a. Ka lungphu a rang ngei mai, eng thil nge maw an va tih ang le? Victora ka call nghal a, mahse, a switch off tawh. Chiai takin ka va zung a, ka nu pawh a la muhil bik hauh lo tih a mut dan aṭangin ka hre thei. Ka hrilh ngam teuh si lo, min deuna hmanrua tur mai mai, mahse, a hriat hun a la awm ngei ang a, rilru a zîng mup mup thei alawm le. Maliani ka call leh ringawt a, "Eng thil nge an tih ang le?" Ka ti a. 

"Ka hre lo, mahse, ka pa te thlen phei hnuah kan hre mai ang, ka lo hrilh leh ang che." A ti a. Ka dah leh rih. Maliani nghak chuan ka mu meng ta kar a, ka zun lah chu a chhuak sek reng mai. Ka nu pawn, "Teh sek a, ti nge i zun sek a." A ti nghe nghe. 

"Tui ka in tam deuh a" ka ti ringawt. Darkar khat hnu velah Maliani chuan a lo call leh ta a, ka nu a muthilh tawh avangin thawm dim takin choka lam ka pan a, "Ka pate sawi hmangah chuan Jasmine an va ru chhuak kha Jasmine û mipa leh a paten an umzui a niawm e, an insual ve deuh nge Jasmine û chu a petek palh a, kawng thlangah a lum zui ta a, a thi ta bawk sia. Tah chuan Vica leh Vala te chu mawhphurtuah an ngai deuh a nih hmel e." A ti ta mawlh mawlh a, ka lo îp chawih chawih mai. Sawi mai tur pawh ka hre lo. "Mahse, Vica te chuan Jasmine-i pain a ṭhelhna lamah a fapa chu a vai thla tih an sawi a, khawih pawh an khawih ve hman loh thu an sawi. Khua te var phawt se, engtin nge an intih zel dawn ka hre lo" a rawn ti leh a, ka lo thaw hawk ringawt. "Jailah an tâng ngei dawn a nih chu" beidawng zet hian ka ti ta a. 

"Nia, reivaklo chu an tâng maithei, mahse, trial te an nei ang a, ka pa ukil Pu Rina hian a chhan theih ka ring. Victora te lah an ṭang na ve bawk sia" a ti a, ani chu a lungngaih hmel vak pawn ka hre lo. Zing dar 3-ah pawh ka la meng kar a, ka mut a chhuak thei hlawl lo. Victora ka khawngaih a, ka nu ka vengthawng bawk. Naktukah te chuan mi zawng zawng deuhthawin an chungchang an hre tawh ang a, men ngaihna pawh ka hre lovang, ka nu lahin "Ka tih rêng kha" tih melhin min melh dawn chiang. Ka ṭhu leh hlawl a, "Lalpa, min pui rawh" ka ti ta ngawt a. Ti nge maw harsatna te hian min duh em em bik ni. 

Leilung lan âwm velah ka lo muhil ve hram a, mumangah Victora thisen nena inchiahpiah nuaiha lui kama a lo mu ka lo hmu lehnghal. "Hruaii, em em a che. Nizan khan i meng rei ka ti reng a ni, i hna i tlai dawn a nia. Tho rawh" ka nu aw ri avangin ka harh ta zawk a. Dar 8 a lo ri vah tawh. Ka tho ta ṭuih ṭuih a, ka lu a na bûr mai. Thawh veleha chaw ei chu peihawm hek lo, "Sawtah ka ei mai ang" tiin ka insiam zui nghal a, ka insiam laiin Ateii'n min lo call ta. "Ka thu hriat hi a dik em?" A rawn tih chuan Victora te chungchang tih ka hrethiam nghal. "Dik e, ka rilru a hah lutuk." Ka ti hap a. 

"A va pawi tak êm, mahse, thu chiang pawh a ni chuang lo va, rinhlelh man chauh alawm a la nih" a rawn ti ve ngial a. 

"Chupawh nise a zahthlak tho alawm, ka nuin a hriat hunah phei chuan." Ka ṭap ṭêp a ni. Ateii bulah tunah hian awm ila ka ṭah feih feih ka ring. 

"Tlaiah lo peng haw la, kan sawi dawn nia, inngaihtuah vak vak suh aw." A rawn ti hram hram a, lungchhiat a tizual zawk. Ka insiam zo ka va chhuah chuan ka nuin min lo melh kul mai a, a phone a hum rân bawk. "Zêp hlen theih i inring ni maw? Hei an post chuai chuai tawh mai. I bialpa ve chu tualthattu a lo ni reng tihna a nia, a va zahthlak tak êm.." a ti nghal bawrh bawrh. 

"Tualthattua rinhlelh tih chauh a nih kha,. An la confirm lo" ka ti a. 

"Awii awii, harh chhuak hram teh, heti chung pawha i la harh chhuak lo a nih chuan i bo pil hlen dawn a nih hi. A ranga rangin thlah hmak ang che. " A ti tûn tûn a, Nuteii bawkin, "Ka û, tunah chuan a rilru a buai dawn lutuk, belhchhah rih lo teh, Mate, nang pawh inngaihtuah harh nan hman phah hram ang che." Zaidam takin a lo ti ve a. "A rilru a buai lo a nih hi, a la ṭan pâng pâng êm mai." Ka nu chuan a ti leh hram, ngaihthlak zel ka peih loh avangin ka chhuak nghal nal nal. Mittui tling pam chungin two wheeler ka châng a, Tka pawh ka be lo, ka zah vek tawh. Engkim an hre ve sia,. Maliani te in ka thlen chuan tukṭhuan an lo ei mêk a, min hmuh rual rualin Pi Lingi'n, "Pipi, a pawi em mai tiraw? " A lo ti a. Nuih luih a harsat êm avangin ka tum buai lo law law. Maliani roomah ka chho a, ani pawh a lo ngui bâr mai,. "Victora thah a nih ka ring thei lo, a ṭan nat danah khan. Hruaipui, ka unaupa hi i kalsan ang tiraw? A dik em?" A lo ti nghal mawlh mawlh, ka hrilhhai letling zawk. 

"Ka hre lo. Mahse, ka thinlung hian Victora hi tualthattu a ni lo tih min hrilh tlat,. Thudik chu a la lang chhuak em em ang." Ka ti a. 

"Mama leh ka pa an va kal leh dawn a, i duh chuan va kal ve rawh. Chawhnu lamah Central jail-ah an phur thla tawh dawn sia." Hnukulh tih hriat zet hian a ti a. 

"Um., Ka kal ang" tiin ka lo bu nghat. Pu Zauva te pawh chuan ka kal an lo beiseisa ve deuh hrim hrim a, Maliani ka jection leh tê tê hnuah Victora hmu tur chuan Police station chu kan pan ta a. Kan inbe tlem hlawm kher mai. Phone pawh ka khawih duh rih lo, Victora te chungchang an sawina vel ka hmu peih rih lo. Kan thleng a, Police pakhat hian Lock upah min hruai zui nghal. Lalvala nen chuan Lock up rimchhe zetah chuan an lo ṭhu ran a. Ka melh vawng vawng ringawt,. "I lo kal ve loh ka hlau lutuk a. I ṭha em?" A lo ti var a. Min la ngaihtuah ve hram hram te chuan ka lungchhiat a tizual. 

"I tih a ni lo tiraw? A ni em?" Ka ti a. "Aw..ka that lo, tumah kan that lo. Lo lungngai suh aw, ka pain min bail dan tur a ngaihtuat vat dawn alawm. Kar khat vel bak kan tâng lo vang. " A ti sauh sauh a. Ka laka beiseina a la neihsanzia te chuan min tihrehawm ngawih ngawih. "Nia, min lo ngaihtuah suh. Mahse, ka nu ber hi" ka ti sap a. 

"Kha chu chiang sa, ka tilui thei lo che aw. Eng pawh ti la, ka dem lo bawk ang che. Mahse, tualthattu ka ni lo." A ti hniam ruih a. Lalvala chuan, "Jasmine ka ngaihtuah khawp mai, Pipi, a number ka pe che ang a, min lo ngaihvensak thei ang em?" A lo ti ve a, ka lo bu nghat mai. "Nakinah Jasmine hi a huaisen chuan thuhretuah a ṭang thei ang chu, engkim a hmuin a hre ve vek a. Mahse, a chhungten a kâ an hup thei tho bawk. " Mama chuan a lo ti ve a. Inbiakna hun a tawp ta, ka va kham lo tak êm. 

Kan kal dawn chuan, Victora chuan, "Tuaimam, min rinna te kha a bo loh hram ka beisei, thudik hi rahbeh a nih vang maiin dâwt a ni ngai lo a nia. Ka rawn haw vat ang, lo inenkawlṭha rawh aw. " Min thlahlel tih hriat ngawih ngawih hian a ti sup sup a. Ka mittui a tla mai dawna ka hriat avangin ka bu nghat nghat a,. Ka kut a rawn hum zawk a, a la leh nghal. Tichuan, kan kalsan ta a, rilru a hnim ruih mai. Hawn kawngah Pu Zauva chuan, "Ekhai! Lungngai lutuk suh u, finfiahna pawh a awm hleinem, Jasmine-i pa thusawi chauh kha finfiahna a tling bik lo. Pu Rina'n theihtawp min chhuahpui dawn alawm,.bail pawh an harsat dawn loh kha, kan biak kual khan. " A ti charh charh a. Thla a timuang khat ve deuh e. U Mama pawh chuan, "Sual ve hle ṭhin mah se; tual êm a thah chu ka ring lo." A lo ti ve a, thisena inzawmna nge nge chu a tawpah a langchhuak leh ṭhin. 

Maliani nen pawh thildang vak sawi tur kan hre lo, ka nu min ṭawngkhum dante thlengin ka hrilh ve ta vek a. "I nu pawh a demawm hleinem, dem suh. Nu tihtur diktak a ti a nih chu! " A ti hmiah mai a, a rilru a zau ka ti viau. "Mahse, Victora hi ka ringtawk, min mamawh ber lai chuan ka phatsan lovang" ka ti khauh ve fan a. Maliani chuan nui hmel pu lek lekin, "Rinzuala min tihrechhuak,. A tan khan thih pawh ka huam ṭhin asin. Chutiang khawp chuan ka hmangaih." A ti a. 

Mali a rawn lut ve hlawl, "Pipi, a pawi em mai tiraw? Victora chu ka khawngaih, a damchhungin criminal a ni tawh dawn chu a ni sia." A ti vang vang a. 

"A ni kher lo thei, tunah hian thiam loh a la chang hleinem, an la convict reng reng lo" Maliani'n a lo ti ram hmak. Mali pawh a ngawi dâk mai. "E taka! Lalvala khan Jasmine number min pe a, lo ngaihven teh a ti tak asin, ka'n call chhin dawn mi le?" Ka ti hliai a. 

"Call rih lo vang, nakin deuhah. Coffee in ila, i lum peih em?" Maliani chuan a lo ti vat. Mali a vengthâwng a nih ka ring deuh. In hnuaiah ka chhuk a, Mali pawn min rawn zui ve vat, step kan zawh lai chuan, "Maliani khakzia em em hi chu a, damlo âwm reng pawh a ni. Rilru hrisel lo reng rengin a la thi dawn a nih khi" a ti bawrh bawrh mai a, ka chhang lem lo. An inkara boruak ṭang at zel hi chu a reh mai mai rih lo vang,. Maliani ka dem hauh lo bawk. U Mateii ka hrawn ve hman a, a felzia leh Maliani a ngaihtuahzia ka hria, U Mateii luahlantu Mali chu Maliani tan engti kawng maha lo pawm hiam hiam theih a ni tlat lo a ni. Coffee nen ka chho leh a, Sangi erawh ka hmu miah lo, a chhuak a ni maithei. Pi Lingi pawh Victora te boruak nen a rilru tihthâwl nan a nuṭa te inah a leng a niawm e. Coffee kan in lai chuan, "Call rawh le.." a ti a. Jasmine number chu hmetchhuakin ka call ta a, a ring ral ral mai. Aw sin lam deuh hian min rawn chhang ta a, "Jasmine a ni em aw?" Ka tih chuan a nih thu a sawi a. 

"Lalvala ṭhianpa Victora bialnu ka nia, i number hi Vala'n min pe a, i ṭhat leh ṭhat loh a hre duh a mawle.." ka ti a. 

"Awii a ni maw? U Vala chu a ṭha zawk em? Ka rilru a hah lutuk" a rawn ti chul a. A tap nasa nge a aw pawh a lawi hle. 

"Aw a ṭha rih e, vawiinah Jail-ah an phurthla dawn a. Mahse, an bail vat ang. Chuan, i chhungte an thinrim em?" Ka ti a. 

"Thinrim e, ka û ruang vuiliam zawhah ka nite hnenah min awmtir an tum a. U Vala chu ka van hmu ve châk tak.."tiin a ngik feih feih a. "I û ruang chu an la vui lo mi? Khaw nge i awm nangmah" ka ti he haw a. 

"Vui tawh e. Nichin lawk khan. Tunah chuan ka naute inah ka awm a." A rawn ti a, "Jasmine, engpawh nise i chhungte thu kha lo awih rih la, tihlawm an ngaih hun lai a nih kha. Nakinah i rilrute a fim hunah thil thlendan kha ngaihtuah la, thuhretuah i ṭang thei a nia. I hmu ve vek a ni lo'm ni?" Ka ti mawlh mawlh a. A ngawih vang vang hnuah, "U Vala te namthlak a ni lo, ka pain U Victora namthlak a tum a, a lo bum hman sia, ka u zawk kha a namthla a nih kha. Ka hrechiang lutuk.." a ti ta a, kan inbiakna ka lo record chu ka lawm kher mai le..Maliani hmel pawh a eng sawt sawt niin ka hria. 

"A ṭha e, lo ṭha phawt rawh aw. Ka rawn be zeuh zeuh ang che, Vala'n a ngaihtuah si che a. " Ka ti a, "Aw le, ka lawm e, keipawn ka lo be fô ang che, sawipui tur ka duh ve lutuk a." A ti a. Kan dah ta rih. 

Maliani chuan, "I record em?" A ti sap a, phur zetin ka lo bu nghauh nghauh mai. 

Ka phone-a Jasmine nen kan inbiakna record file chu melh vang vangin, "Ṭangkaina a la nei ngei ang" ka ti sap a.