Amah leh kei 13

AMAH LEH KEI..(13)

Ziaktu : Toni Râlte

"Maw?! A van mak" ka ti hluai a. A nui hak ringawt, ka rin loh lam daih a ni tak tak alawm. Engtin nge a best friend nupui hlui chu U Mama chuan a lo duh ve mai theih zawk le? U Mateii nen an la inṭhen phah zui bawk si. A mak tih bak ka sawithiam lo e a. 

"Nupui hlui ka'n ti tak naa, an inneih lai rengin Mama hian a chhuhsak ti zawk teh ang" a la ti zui a! Ka meng pawng hlawt ringawt. "Nia, U Mateii nen an inneih reng lai pawh khan buaina a awm reng tawh ṭhin. Dampuii kha chu a hmanrua ve lek chauh,. Ka nu hian U Mateii hi a haw reng reng lo, Mama awmdan tenawm tak avang hian a khawngaih a, chhuahsan se a duh vang zawka hetianga a chunga khawsa ṭhin hi a ni zawk. U Mateii khan a hrethiam ngai lo va, ka nu khan a haw tak tak emaw a ti tlat a, mahse, tunah chuan a hrethiam vek tawh" a ti ta malh malh a. 

"Dampuii kha ti nge a lo inrawlh ve le?" Inthlahrung ru deuh hian ka ti a. 

"Dampuii hi Mama 1st love a nia, kan vengah hian an awm ve reng ṭhin, a nu hna avangin Bawngkawnah an phei ta a, Dampuii hian phaiah training a zu nei a, a chumi zu thang hlan chuan U Mateii leh Mama te hi an lo inkawp a, beisei loh deuhin U Mateii a rai ta sia, an innei lo thei ta lo a ni. Dampuii chuan a tuar na lutuk, engkim kan inhre pawh vek tawh bawk nen. U Mateii hian dik tak chuan Mama kha a lo zar ve deuh bawk a, Dampuii pawn Mama dem loin U Mateii zawk a dem a, a rawn ânkhum phiar phiar zel. Inṭhentir kha a tum ngar ngar a, mahse, U Mateii'n a tuang a tichhah ve tlat si. Bawihteii te hi Mama fa a ni lo ti ang zawng ten Dampuii chuan thu a lo thehdarh a, Mama rilru pawh a buai hman ṭhelh a ni. Mahse, U Mateii nen an inkawp lai khan mipa dang tumah tlazep an awmin a hre si lo va, a pawm leh thei ta a. Hun a kal a, Bawihtea pian hnu lawk aṭangin Mama zia chu a dang chho leh ta a. Mali nen hian an lo inkawp ru reng tawh a lo ni. Mali pasal hi Zorema a nia, Mama childhood friend a nih piahlamah an inneih pawn ṭhianah an inhmang ve ve. Chutiang khawpa inṭhianṭha si chu a nupui pawmlai reng Mali nen an lo inkawp ta tlat si. Kan hrechhuak har alawm, U Mateii kha chuan rinhlelh rukna a lo nei fô tawh a, kut man a awm si loh avangin engmah a sawi duh ngai lo va, bakah Dampuii nena inkawp ru angah char char a ngai ṭhin. Mama thil tihrûk chu Dampuii bawkin a lo hrechhuak ta a, tah zet kha chuan ani nula rilru tluang pangngai tak chuan Mama chu a haw ta em em a, amah phatsanin U Mateii a neih tawh a hnu, tunah midang a kawpsan leh hi U Mateii a lo huatna zawng zawngte kha a bo ta duak a, U mateii lamah a ṭang ta daih a ni. Ka nu nen a rukin ruahmanna an siam dun a, Mama leh Mali te chu an mualpho an hlau ve tho bawk si, Zorema hriat hlau bawk..chuvang chuan U Mateii zawkin Mama a chhuahsan theih nan ruahmanna an siam a, mahse, U Mateii hi a â ka ti dawn nge, a la hrethiam thei chuang lo. Tichuan, U Mateii chhuah hma lawk khan Zorema'n Mama te pahnih chu a hrechhuak ta a, Mali pawh a hnawtchhuak ta nghal a. Mama nen an inṭhianṭhatna zawng zawng a chhu chat ta vek bawk. Mama pawn chutia a bialnu berin pawmlai a neih tak lohah chuan a nupui chu hnawksak a ti chho ta a. Ngaihzawng a neih thu leh chhuahsan tura a duh thu a hrilh ta tawp a ni. U Mateii tan pawh chutiang meuh a nih takah chuan awm rengna chi ni hek lo, a bialnu chu tu ber nge tih pawh hre chuang lovin a chhuak ta a ni. Ka pa ten theihtawpin Mama chu zilhin thunun tum mah se; Mali zûnin a lo phuar nghet tawh lutuk a, a nupui fanaute aiin a thlang fel vek tawh. Tihian an tawp zui chu a ni ta a nih hi..Mali nen chuan an inneih ka ring,. I hriat bawk tur chu Mali pa leh ka nute hi cousin, a hma phei chuan engkima inbantawn leh inti unau em em mai an nia, chuvangin Zorema nen an inneih hnu pawn kan inah hian tlangnel takin an rawn kal ṭhin. Engtik aṭangin nge mipa leh hmeichhia anga an lo inen ka hre bik lo. A zahthlak takzet, kan chhungkua ang hi an awm ve ang em le.." Maliani chuan a ti dap dap a. A lungchhiat hmel viau bawk. 

" a,ih maw, mi kan inchenchilh loh avang hian chhungkaw tam tak hi chu ṭha turah kan ngai ringawt a, a lo ni vek bik lo a nia. In chhungkua aia thuruk tenawm nei hi an tam ang.".tiin ka hnem ve vat a. 

"A mak a ni, ṭhianṭha berte nupui pawmlai ngei han chhuhsak tawp mai chu! Mali reng reng pawh hmeichhe mak tak a ni..i ti ve tho em?" A ti a, keipawn mak ka ti ve em em. 

"Thil thleng thei tur pawha kan ngaih loh hi a thleng ve châwk zel a nia. Ka hriat pakhat phei chu a nau nupui nen an tlandun daih asin. Unau pianghmunte pawh an innei fô alawm, pain a ma fa hrin ngei laka fa a neihte pawh sawi tur a awm asin. Kan khawvel hi a rapthlak tawh êm a nih hi. Kei chu ka theih ve ka ring lo." Ka lo ti ve mawlh mawlh a. 

"Nia, engpawhnise, Mali leh Mama hi an innei a nih chuan kan chhungkua chuan sawisep kan kai leh hat ang. Kan tawn ṭhan a ni naa ngaia neih a harsa a nia aw. Hmingṭhatna lam sawi tur nei lo, mualphona lam ngawta kan han lang fô bik hi chu.." a ti leh vawng vawng a, a rilru tur chu ka hriatthiampui khawp mai. Nula a la ni ve bawk nen, a hma lawkin a natna avangin an sawi hluai tawh a, Victora lahin boruak a nei ve reng bawk nen,. Chhungkaw danglam tak zawng an ni ngei e. Pa ber zir lohte hi em mawni dawn ni. Maliani chu a chauh zual deuh avangin muhil turin ka ti a. Tihtur em em ka neih loh avangin Sangi pui turin in hnuaiah ka chhuk ve nghal, Pi Lingi inlengte pawh an lo haw tawh. Amah Pi Lingi pawh hmuh tur a lo awm tawh lo. 

"An innei dawn tak tak a niang. U Mama te chu" Sangi chuan a ti sar sar a. 

"Innei mai teh se, a buaithlak" ka lo ti ve hawk ringawt. 

"Mahse, U Mali kha hrawn a hrehawm hmel ka ti, U Mateii ang a ni ve lo. Min biak dan velah khan min hnuaichhiah hmel tawp" ngui deuh hian a ti a. 

"Pasal i neihsan ve daih dawn nia" ka lo ti fiamthu a,. A phur leh ta lutuk a, a bialpa chungchang bawk a sawi leh char char. A hlimna hi ka awt ṭhin mang e. Maliani'n min lo call a, ka chho ta vat. A khel pân kha nâ a ti zual a, nachhawknain ka jection ta a, an natna angah hi chuan pân te hi a dam hleithei lo va, chuta karah Hiv a lo positive ve bawk si. Nula hmelṭha tak ni siin pân leh pem neuh neuh a nei reng mai a, a lainatawm ṭhin. Ka hawn a hun dawn ṭan a, ka insingsa ṭan, Vica a lo la hawn loh avangin Tka biak mai ka rilruk a, Vica erawh a ruk chuan ka ngaichâng tho. Pu Zauva lo haw hnu lawkah Vica pawh chu a rawn thleng ve ta a, a chauh hmel reuh lutuk. "Zanin chu min thlah lo mai rawh. I chau a nih kha, Tka ka be tawh" ka lo ti nghal sawk sawk a, a ner suk duh chauh. 

"Ka ti tak tak a nia" ka ti leh hram a, "Ka intleuh thuak ang, ka rei lovang" tiin a pindanah a lut zui nghal. Ka nghak lo ngam chuang si lo,. U Mama pawh a rawn haw a, a mitmeng a fim lo tih ka hai miah lo. Nidanga min be ngai hlei lo khan, "Pipi, bonus ka dawng dawn a, i duh ber ka leisak ve ang che..lo ngaihtuah rawh aw" a ti hlut a, mak ka ti rilru hle. A rui kamnam polite kual vel lek bak a ni lovang, zep loh chuan ka mil vak tawh miah lo. Keia lo ngeia lo huat ve ngawt theih a ni lo tih chu ka hria. Mahse, a chetdan tenawm takte avang khan ngaihsan a harsa ve êm a ni. Vica inbual zawhah kan chhuak zui ta nghal a, "Chaw min lo eisan r'u," a ti zui hram bawk. Kan in lam kan pan zui a, kan ngawi dun vang vang. Traffic jamah rei iak kan tâng leh a, a ninawm ṭhin mang e aw. Ka nuin min lo call leh tawh. "I va rei ve" a rawn ti leh lâng lang, thinur ru ṭeuhin, "Traffic jamah kan tâng" ka ti bul hmuk hmuk a, "Fehchhuah ka duh sia, chaw kan lo eisan mai ang che aw" a rawn ti a, "Aw" ka ti leh tawp. Ka rilṭam pawh a reh vek tawh. Aizawl motor tamzia leh kan kawngpui tetzia hi chu aw..a bul aṭanga Aizawl khawpui hi din ṭhat a chakawm ka ti,. Motor lah a la pung dawn chauh chu a ni sia maw..dar 7 rik hma hlekin in kan thleng thei hram, ka nu a awm lo bawk nen, "Chaw lo ei ve la. Ka nu a awm lo" ka ti zuah zuah a. Nuteii chu ka hlauh loh vang pawh ni lovin min hrethiamtu a nih vang a ni. "Chuti chu sawtah chaw va ei ang, lo chuang rawh" a ti ta vut mai. 

"I â mi!" Ka ti nghek a.

"Chuang vat mai rawh, i nuteii bia la" a ti leh tawp a, min nghak leh reng dawn tih ka hriat avangin ka chuang leh ta nge nge a. Nuteii ka call nghal bawk, "Kan rawn tlai ta sa sa sia, Ṭhiante nen chaw kan eikhawm dawn aw. Ka nu lo haw hmaa lo hawn ka tum ang" ka ti a. A hrethiam thoin ka ring. Victora pawn tu emawni a bia a, a biak zawh chuan, "Tu nge i biak? Khaw nge kan kal dawn?" Ka ti a. 

"Ṭhianpa Rinchhana mawle, a in luahah chaw kan ei ang" thupe aw zet hian a ti a. Ka ner khum vak ringawt. Venghlui lamah kan tlan leh ta a, veng mawng ve lam tawhah tlan zelin a tawpa tawpah kan thleng ve ta hlawl. Step kan zawh leh zet hnuah building lian zet hnuai ber chu kan pan leh ta a. Mahnia luah tih takah a tê reuh hle. Mutna pindan leh choka a inzawm nghal a ni mai. Mei a lo zu hlat hlat a, ka hmuh vawikhatna a ni. Victora ang tiat vel tur, hâng lam lek lek, hmelchhe lo tak mai a ni a. A lo nui vur vur mai. Inhmelhriattirna te kan han neih zawhah, "Vawksa fry a awm a, anṭam tlak nen,.a tawk reng ang chu ka ti mai, i rawn sawi lawk si lo va" a ti nuah nuah a. Ka inthlahrun deuh avangin, "Kan ei lo vang, he pa hi a ti ve ringawt a, a chi loh. Kan tihek vek dawn che sin" ka lo ti vat a. 

"Hek thuah chuan hek lah lo ve. Chaw eipui tur mi mah duh nâk alaia..hei a la tlai chhe lo bawk a,artui hi duh leh kang zuai ila" a ti a. Victora ka melh rum ṭan viau, chawpchilh lutuka heta min hruai ringawt hi ka ngei. 

"Khatin min melh suh. Ani te chu on the spot-a alawm. Artui chu ka'n kang ang e.." tiin a tho nulh a, a va che sûrh sûrh,. Rinchhana chuan, "A sawi ve ziah che a, i thlalak takngial pawh a nei si lo. A tawpah kan inhmu thei ta hram chu a nih hi.." a ti ve luam a. Victora chuan min lo sawi ve ṭhin a maw?! 

"Min rêl vak zel lo maw? Nia, keipawn a ṭhiante hi ka la hmu tam lo, Lalvala bak" ka ti ve a. 

"Rêl hrep zel che. Thinchhe si, luhlul si, te a ti ṭhin che. Nia, keini ṭhianho hi mahni buai buai hian kan buai ve a, inhmuhkhawm leh tawh a ngai a ni" nui huah huah chungin a ti a. A nelawmin a bula awm pawh a nuam viau e. Victora pawh chuan a kang zo ta a, chaw ei kan siam zui nghal. Nuam ka ti vak lo, parawla khawsa chawhmeh kan va eisak ve ringawt a, eirawngbawl pawh a tan a ninawm dawn nen, Vica lah a inthlahrung teuh si lo. Kan ei hma deuhin Rinchhana pui roh chuan, "Ka lem lawk dawn, Vic, i duh ve dawn em?" Nui sun sun chung hian a ti a. Victora'n min rawn melh zawk, ka lo melh ve kal si,."Ka nuhrawn hi a hlauhawm êm mai, ka lem lo ngam mai ang" a ti ta a. Rinchhana a nui chur chur, "Hmela" ka lo ti hlar a. 

"Eng nge? A ni lo mi? Ka nuhrawn ang mai i nia lawm" a la rawn ti zui. Rinchhana'n zu a va in zawhah chaw chu kan ei ta a, chawhmeh a tlem ngaihtuah chuan ka ei tam ve reuh tawp. Eikhamah ka tifel leh vek a, 8:30 a ri ta der mai. Nuteii kha ka nu a lo haw chuan min lo call tur khan ka ti a, min lo la call lo naa ka rilru a hmanhmawh tawh viau. Victora pawn a hrethiam a niang, chaw eikham ṭhutmuan reilotê kan neih hnuah, "A nu haw hmaa ina ka dah hman a ngai sia. Bawiha, nidangah chawhmeh nen kan rawn kal leh ang" tiin hawn lam kan tintuah ta a. 

Ka inbual laiin ka nu a lo haw, "A va inbual tlai ve mawle" a tih lâng lâng chu ka hre thei. Min manchhuak hman lo va, a lawmawm tawh hrim hrim e. Ka va chhuah chuan, "Naktukah i putea te pawn rawn haw an tum a niawm e. An in lah an hralh ta sia, Biaki te in lamah an innghah phawt a ngaih hmel" a lo ti mawlh mawlh a. Ka chhang lem lo. Ka sam ka chhemro zawhah ka mu ta daih a, mut dawna inbual hi chu mut a tui duh bik ngei mai. Mumang bo ṭhak khawpin ka muhil keipawh. 

Ateii te pawh an ko hawng tawh a, palaite tirin an inrem zui ve mai bawk. Nau a keng sa tih chu a hnuah a nu a hrilh chauh a, han thinrim thar leh vak khan awmzia nei hek lo, an innei dawn tho a, a ṭhaah ngaihsak tawh mai ang. Ṭhianah min hman dawn si avangin bazar neuh neuhte pawh a ngai dawn a, Maliani pawh ka hrilh sa vek. Ateii bulah Victora nen kan chungchang engkim, ka nu rilrute ka sawi fai vek tawh a. "Mate, nute thuawih hi chu a ṭha zawk lo'ng maw? Mahse, i tan a harsat turzia ka hrethiam tho bawk si. I duhthlanna a ni, kei chu i lamah ka ṭang zel ang." A ti a. Thla a timuang ṭhin hle. A dul pawh a rawn lang ve ṭan tawh a, raino a la na miah lo chu a awhawm khawp mai,. Ei a duh em em ringawt. Hriata pawh a phur sûrh sûrh viau zel a, Dan khatna tlin tawh lo mah se; inhmangaih ve ve an innei dawn a ni a, a nuam bik ngawt ang. Victora nen pawh kan nitin hun hman dan a la ngai reng. Mak ka tih zawk chu mipa a ni a, hmeichhia lo kawp zel zul tawh, engkim a zeizia hrethiam vek tawh a nih laia ka lakah a che foul ngai tlat lo chu a ni. Insûm a tum ve nasa tih ka hriatna hian amah ka duhna a tipung tulh tulh bawk si,. Ka nu hmuh leh hriat laiin inṭhen tawh angin lang mah ila, midangte mithmuhah chuan inngaizawng nghet, inzui chawt kan ni tho mai. Nuteii hi chu engkim ka hrilh ve vek a, min hau ngai miah lo. "Duh ber neih theih tluka hlu a awm dawn em ni? Khatiang khawpa mipa ṭha lo nia sawi si, nangmah vanga a nun inthlak vang hrim hrim pawh hian tihhlawhchham chi niin ka hre lo. A beidawn vaih chuan i hriatreng tur eng emaw a thleng zawk ang tih ka hlau" a ti mauh mai a. Hei hi keipawn ka pawm angreng,. Ka nu rilru hi chu zawi zawia kan la hneh theih mai ka beisei a ni. 

U Mama leh Mali te pawh tlan koh anga insuih ve ni mai se tiin an inrem ta a niang. Ateii te inneih hma karah an inko ta a, U Mateii rilruah a awm vang vang mai. Thingpui lum leh eng ilo buaipui ve a ngaih avangin ka nu hriatpuinain keipawh ka riak dawn a,. Pu Zauva nau te chhungkua bakah Pi Lingi te lam an rawn tel thei a, Mali chhungte lam an rawn ṭhahnem phian. Sangi nen kan buai zual a, Maliani cousin Mariai an tih mai, a patea te fanu naupangberin min pui ve bawk. Mahse, ka kawm thiam chi a ni vak lo, a insawithei ve deuh a, "Ka scooty saw hralha bike lei ka duh,. Ka Iphone hi tihral ka duh ee" tih angreng chu a sawi tam pawl a ni a. "Vica hi chu model nu nen khan inkawp tak tak se an inhmeh ngawt ang" te a ti thul. Kan chungchang a hre ve lo a nih pawhin khatiang kha sawi a ngaihna chhan ka hre lo. Chhungkaw awmthei ve ve an ni nachungin an tihautak lem lo va, a ṭul lo rêng bawk a, mi nu leh mi pa innei ka chan deuh a, ka hmu tuihnai thei meuh lo. Mali chu a han inchei deuh chuan a lo chhe lem lo hle mai a, U Mateii erawh a tluk ka la ti thei chuang lo. Tiang chuan an inkutsuih zan chu buai zetin ka hmang a, Victora a rawn lang ve leh zuk ṭhin a, "Ka nute pawh a hranin midang chhawr mai tur a nia. Hetiang ti tur i ni miah lo sin le.." a ti nuah nuah mai. 

"A ho lutuk, a harsa hleinem" ka ti mai a, a kal leh vut. A rawn kal leh a, tleirawl pahnih a rawn hruai tel bawk. "Numam, pui ve r'u, hei an buai lutuk. Tuaimam, Mali chhungte lam an nih hi. Tihtur kha lo hrilh zung zung rawh" a ti a. Tleirawl pahnih lah chu an inchei parh angreng sia, tirh pawh a inthlahrunawm zo vek alawm le. Mahse, rin ai daihin an lo fel reuh a, "Min lo koh vat tur alawm, in buai dawn nen nen" an ti siam siam a, Mariai ai ngawt chuan an laktlak ta deuh. Inneih hunserh a zawha eitur kan han sem fel meuh chuan dar 10 a ri vah tawh. A tihfel theih theih kan tihfel leh hnu phei chuan 12 a kawk va tawh a, zep nâk emaw ka chau a ni. 

"Zing lamah ka lo tihtir mai ang, dah tawh rawh, tuilum sa ver vawrin inbual la, mu hmak ang che. I chau tih ka hre thei." Victora'n a rawn ti a, min pui thiam ve bawk si lo chu a mangang tawp. A sawi ang chuan tuilumin ka inbual a, mut a chhuak nghal ngawih ngawih mai. Maliani room-a sofaah ka thal ta der a. Phone pawh ka khawih peih tawh lo,. 

Zinga ka harh chuan dar 8 a lo pel tawh a, ka mutui hle a ni ngei ang. Nizan khan Maliani hi vawikhat chu a hmel a rawn inlan ve zuai a, a chho leh nghal hmak kha a nia. He inneihna hi a pawmpui ve lo tih a pholang hmak mai a, lehlamah chuan ka ṭan viau thung. Mali nen an inkar pawh a buai ve det maithei a ni. In hnuaia ka zu chhuk chuan nizana kan tihfel lohte kha a lo fel duak tawh a, Pi Lingi'n, "I mutui sia, kan kaitho duh lo che a nih kha. Nizan kha i che nasa sia, kan lo hre lo a, hlawhfa te rawih mai tur a nih laiin a zia lo tak tak a ni." A lo ti nghal duam duam a, "A ho lutuk, kan tih ve tur alawm" ka ti ringawt. 

"Nurse i nia, maid i ni lo" Victora awrâwl chu a chang mah mah deuhin ka hria. 

"Ka hria lawm, mahse, ka pui ve che u ni mai a..eng nge?" Ka ti a, ka thlavang hauh a duh tih chu ka hre tho va, mahse, nuam ka tih loh phah zawk. 

"Nurse ang chiahin awm tawh ang che. Ka û private nurse i ni.." Victora chuan a ti leh hluk a. Ka chhang tawh lo. Tukṭhuan chu Lalvala te leh Dina te hoin an lo siambawl a, Mali nu leh paten an rawn ei ve bawk. Kan la ni deuh nuaih nuaih a, ka ning lek lek. Maliani nen nileng deuhthaw a pindanah kan inkhung a, in hnuaia zu chhukthlak pawh ka châk rih lo a ni. Tlaiah Vica'n min thlah leh a, vanduai asiamin kan kawta a ding ka chhuk tur chiah chu ka nu rawn hawin min rawn hmu ta thut mai. Kan phâwk hrû mai a, ka nu erawh a inthunun vat, engmah sawi loin kan inah a chhuk ta a. Hlauthawng takin Victora ka melh a, "Hlau suh, ka awm hi.." a ti sup a. 

"Chulam a ni lo" ka lo ti nghat. "Engtin emaw a hau che a nih chuan ka rawn hruai ang che" a ti dam thlup a, "I â lutuk, haw phawt rawh. Chanchin ka rawn hrilh leh ang che" ka ti hmawk hmawk a, thuawih zetin ani pawh a kal ve mai. Kan in luh chu ka hreh takzet. Mahse, haw loh chi ngawt ni hek lo, hreh zetin ka lut ta a. Nuteii'n rawng a lo bawl mek a, ka nu erawh ka hmu mai lo. Pindanah a awm rih a ni maithei. Keipawh inbual turin ka intintuah nghal a, ka nu chu roomah a lo awm ngei e. A ngawi reng chuan min tizâm zawk. Inbual turin ka luhsan a, ka inbual chhung zawng rilru nuamin ka awm lo tihtheih a ni. Ka inbual zawhah chaw kan ei zui nghal ta mai bawk sia, ka nu hmel erawh a tak ngân mai a. Nuteii pawn a hrethiam nge ni nidang aiin a ṭawng tlem. Kan ei ṭan chauh tihin, "Ka thuawih chu a lo harsa viau a ni maw?" A ti ta khauh a. Ka antui hawp tur pawh ka ṭhulh leh daih. 

"Min chhang ta che. Hruaii" a ti leh ṭhak a, Ka hming hian min ko zen zen lo, Hruaii min tih tawh chinah chuan a thinrim hle tihna a ni mai. 

"I thu ka awih loh avangin ka tihpalh" ka ti a. Tetea chu ka zah ru hle. Ani erawh Bawihtea ngawt a buaipui a, ka nu nen chuan min ngaihven âwm hmel a pu duh lo lui tlat. "Engvangin nge ka thu chu i awih loh a?" A ti chang leh ta 0fak a, Nuteii a rawn inrawlh ta vat, "Ka u, chaw ei lai em em chuan insum ve la, hei a chaw ei pawh i titui lo zo vek dawn asin" a lo ti a. 

"Lo inrawlh suh. Nang pawh ka thu i awih loh vanga hetiang dinhmun thleng hi i ni, i inhre kar ang chu" ka nu chuan a ti nghat nghat a. 

Nuteii pawh a ngawi nghak mai. Kei pawh sawi tur reng ka hre lo. Ka nu bawk chuan, "Hruaii, i rilru siamfel vat ang che. Victora nen in lo inkawp leh a nih ngat chuan an inah sawn hna i thawk tawh dawn lo, inah awm mai mai zawk la a ṭha zawk. Ani nena in inkawp saw ka remti lo bur, i hmakhua ka ngaih vang ka ti lawm lawm a ni lo'm ni? I nu hi min va zah lo ve.." a ti hlaih hlaih a. Ka chaw ei pawh a tui nek tawh lo ve, ka tho ta hmak a. Tetea chuan, "Anu chu i âng hluai zel a, chaw ei laite chuan insum ve la.." a rawn ti ve boh boh a. 

"Tumah lo inrawlh suh u. In nu ka ni a, in tana ṭha hre bertu ka ni. Ka thu in awih loh chuan in rethei zel ang." A ti leh tân tân a. Amah pawh a sen vek mai, a thinrim hle tih a lang. 

Pindanah ka lut a, khumah ka ṭhu hnawk. Victora call ka la dawng zui a, min ngaihtuah a ni ngei ang. Mahse, ka pick up ngam rih teuh lo, heti tiatpui ni tawh mah ila sawi leh sawi hnu ka nu hian nu leh pa chan a chang tlat a, ka hlau lo thei lo a ni. A call ka lak theih si loh avangin whatsapp-ah, "I ṭha em? Ka call la rawh" a rawn ti a. 

"Ka nu a âng rih a, ka la ngam lo" ka va ti. 

"Engpawh thleng se i tan ka awm ka tih kha aw. Ka rawn kal mai dawn mi?" A la rawn ti ta deuh deuh. 

"A ngai teuh lo. A thinrimna a zual mai mai , a ang zo ṭêp tawh ang" ka ti a, ka dah ta rih. Thleng ka seng fel a, ka sil lai te chuan ka nu chu a la âng hlak hlak reng a, chhan ve chu duh viau mah ila ka dik lo miau a, chhan dan tur ka hre lo a ni. 

"Zira te kha ṭha taka lo dawnsawn zawk tur a nia,. A thuhrimin an in chhung boruak hrehawmzia a hma pawn i sawi tawh a, engtin nge i awm theih ang a? I nêp rapthlak si, Victora lah a changa zu in leh thei mai, insual pawisa bawk si lo, mi hmuhah pawh i zahpui lo em ni? Sawtiang taksa râng bei buai saw. " A ti hlawih hlawih a. 

"Nu, duhtawk teh, kan duh ang leh tum ang hian kan awm vek thei lo. Chu chu nang pawn i hria. " Ka ti ve ta nghat a, a âng rei tawh sia ka ning tlat. Min chhan a tum lai takin in chung nu a rawn lut ta hlauh a, a ṭhulh leh ta a ni. Ka lawm ru ngei mai. Roomah ka tawm ta ngat ngat a, Ateii leh Victora ka biak chhâwk a, Ateii pawn pawi min tihpui ve hle. "Inru ve tawp mai r'u" te a ti thul. Chutianga inru tur khawp chuan kan inlaichinna hi a thukin ka hre bawk si lo,. Bakah pasal neih lam chu rilruah a la lang lo hrim hrim. Victora pawn sawi fak duh lo mah se, "A ṭul a nih chuan engpawh ti turin ka inpeih a nia" a rawn ti a. Mahse, ka nuin min hauh vang ringawta inruktir chu ka mizia a ni lo. Bakah ka nu hi dem chi pawh a ni bik lo, ka hmalam hun min thlirpuiin pasal ṭha tak nei se min duhpui vang a ni mai a. Hlimna aia sum leh pai ûm tan chuan Victora chu han iaina chhan tur pawh a awm bik lo, mahse, ka nu chuan chutiang zawngin a thlir ve lo va, a nunhluia a let leh min hlauhpui luatah ka lakah a thinur ta hial chu a nih hi. Mahse, lehlam zawnga ka han thlir ve erawh chuan Victora pawn zu chu a in tawh bik lo va, keimah vangin a insûm ve hle tih ka hria, a rukte chuan a lo in tho maithei a. Mahse, kan awmdun changa min zahthiamna leh min ngaihsakna te avang hian nitin ka hnaih deuh deuh chu a nih si hi..ka mu ṭha lo khawp mai. 

Ateii te nen kan bazar dawn avangin Maliani te inah ka kal lo va, Ateii te pahnih leh Hruaia te nen kan bazar ta a, mo kawr vel kan en kual a, ka engtih mah a phur thei lo naa ṭhiante rilru nguina thlen ka hlauh avangin ka hlim der mai mai a ni. Chawhnua thil kan ei laiin Maliani'n min lo call a, "Engkim a ṭha maw?" Ka lo ti vat. 

"Ṭha ni mai ang chu, Daisy hi a fel reuh bawk a, in bazar ṭha thei maw?" A rawn ti a. Daisy hi an venga nurse zan lama vil thintu kha a ni. Kei ai chuan a û hlek ang. 

"Umm, hei kan haw ṭêp tawh. A ṭhat nasat chu, i ṭhat chuan. " Ka ti a. A ngawih dat hnuah, "Kan mo thar nen kan inhau nghal pang a, chung vel chu ka hrilh châk tawh che" a rawn ti zawi sep a. 

"Lo insum hram hram rawh, inhauh kha a ṭha lo" ka ti ve ngial a, "Rinzuala hming sawi ri ve ngam tur a ni lo hrim hrim. Ka la hnuk ang" a rawn ti hmarh hmarh a, a hmel landan tur ka mitthla thiam mai. "Khaih! Insum rawh, kutthlak phei chu tih chi loh aw. U Mama vengthawng ve la.." ka ti chul a. 

"Lawmkima hian kan chhungkaw hlimna a rawn chhilh bo leh vek zawk alawm. Hmela hi a,.aw, nih ka dah rih phawt ang, in buai takin. Hlim deuhin hun in lo hmang dawn nia" a ti zui mawlh mawlh a, a dah nghal bawk. 

Keini pawh kan bazar zo thawkhat tawh bawk a, hawn lam kan hnaih ta a. In ka thlen veleh rawng ka bawl a, nuteii a lo la haw lo nen, ka nu erawh a rawn haw hma mial a. Tetea te erawh extra class an kal avangin an bang tlai ṭhin. Ka nu nen chuan in be miah loin kan tihtur kan ti mawlh mawlh a, biak dan tur ka hre tlat lo a ni. Ka inbual laiin nuteii a rawn haw a, "U Zuala nu a rawn kal a, zanin chauh chu Bawihtea hi kan lo riahpui ang e a ti tlat a, han ui ṭung kha a nuam si lo, ka kaltir ta mai" a tih lâng lâng chu ka hre thei. 

"A engah chuan nge maw i kaltir le..duat ber niawm fahrana chutia rawn tih pawh a ngai lo, i bungrua kan lak nia an ṭawngkam kha ka theihnghilh thei lo, an tenawm lutuk, saw mite saw" ka nu chuan a lo ti leh hlaih hlaih a. Tunlai ka nu hi a taksa lamah na neuh neuh a nei bawk nen a thinchhiat a zual bakah ṭawngkam te hi a duhtui lo reuh tawp. A upat ang zelin a mizia a danglam ka ti mai. Nuteii chuan, "Aw..an tu ve tho a nia, kan inneih lai pawn Bawihtea te chu an duat ve lutuk alawm. Awm hlen tur pawh ni hlei lo. Va riak ve mai mai rawh se." A lo ti ve hlak hlak a. 

Tetea a rawn bâng a, a ṭhianpa Lawmpuia'n a rawn zui haw bawk. Tetea chuan a bek chu a hup ṭut ṭut a, ka lo hmu fuh si, "Ngati nge? I bek chu..khaw maw" tiin a kut chu ka lakthlaksak a, a rawn thi ta ser ser mai a, "Ehe! Eng nge a awmzia?" Tiin an ṭhian dun chu ka melh tawn a, ka nu pawh a rawn lang ve vat. Lawmpuia zawk chuan, "An insual a, Remliana nen" a ti zawi sup a. 

"Engvangin nge?" Ka lo ti nghek. 

"Englo, Remliana hian Kimkimi a lo ngaizawng ve a, chung vel chu" zah hmel deuh hian a ti leh ringawt. Ka nau lah chu a zak tih a hriat reng, "Ngaihzawng inchuh vangin maw in in sual a?" Ka nu lah chuan ring zet hian a lo ti a. 

"Ninawm, a ho lutuk, a na lo" Tetea chuan a ti hluk a, a roomah a lut zui daih. Lawmpuia zui luh tum chu ka nu chuan a lo chelh ding vat a, "Thil awmzia han sawichiang teh" a ti a. 

Lawmpuia chuan, "Ih, englo, Kimkimi hi Remliana hian a lo be ve ṭhin a, Kimi hian a ngei ve bawk nen, vawiinah hmaichhanah "Min lo be tawh suh, Tetea nen kan inngaizawng" a lo ti a niang. Remliana thinrim chuan Tetea class bang hi a lo chang a, a lo cho ringawt a. Tetea pawn a khawih na ve tho, U Mahlima te hoin an ṭhelh a.." a ti ta nuah nuah a. A va buaithlak e aw. Kimkimi chu a hmaa Ateii dem ṭhin Estheri nau kha a ni, kan veng inang mah se; kan in erawh a inhlat angreng. Remliana pawh kan veng ami tho a nia, Tetea ai chuan a û zawk. He pa hi a chapoin a sual hrim hrim. "A va zakthei lo ve, keiman Remliana chu ka hau ang, saw nau saw engtin emaw la tih deuh a ngai hrim hrim. Ka haw tlat" ka ti bawrh bawrh a. Lawmpuia chu Tetea roomah a lut zui bawk. Ka nu chuan, "Ngaihzawng vanga han insual mai chu! Tetea pawh zilh nek tur a nih chu" a ti hlak a. Ka chhang tawh lo. Zanriah pawh Tetea chuan a ei duh tlat lo, amah mi ṭawngtam lo, luhlul ru zêk a ni a, Lawmpuia kâ aṭangin, "Remliana chu ka la hmu leh dawn alawm, a la hre viau ang" a lo tih te kan hre bawk nen, ven deuh ngaiin kan hria a, zanah pawh chhuah kan remti lo. Zanah hian a chhuak vak ngai lo hrim hrim a, mahse, nakinah thil pawi zawk a thlen ka hlau angreng. Tetea te ang mizia hi chu tih tawh ti tlut chi an ni si a. Ka nu pawn a ngaihtuah deuh nge a tukah pawh school kal lo mai turin a ti ta a, Ka nu thu hnial a hreh êm vangin phur lo zetin a chawl ta kha a nia. Kei pawh ni 3 chawlh ka lak tawh avangin inah ka awm a, a tuk mai chu Ateii te inneih a nih tawh avangin zanah erawh man hlannaah ka kal a ngai dawn a ni. Chawhnu aṭangin ka insiam ṭan a, ka nu pawn man a ei ve avangin kan chhungin va kal ve kan tum a ni. Bawihtea lah chu an rawn dah thei reng reng lo mai a, Nuteii'n a va call pawn, "Zanin chauh" an lo ti leh a. Lehlamah inneih buai nen a pawi lo zawkah kan ngai thei ta mai. Tichuan, tlaiah chaw ei nghal turin kan phei ta a, Tetea erawh a peih loh hmel ngang mai. Chaw kan ei zui nghal a, Ateii'n, "Vica chu ka sawm ve reng sia, a va rawn lang har" a ti a ti mai a. Ka nu ka venthawn êm avangin rawn kal lo mah se pawi ka ti lo. Mahse, kan inhmu khât deuh nen ka ngai ve deuh. Chaw eikham an la insengfel hma siin Victora chu Lalvala nen an rawn lang ta hlawl mai. Ateii'n a lo dawngsawng vat a, in chhunga ka nu ka va melh vat, a rawn hawi zauh zauh chu ka hmu reng. Ka pawisa thei tawh bik lo. Chaw pawh an ei ve nghal a, an hna a laklawh deuh vangin an rawn thleng hma thei lo a niawm e. 

Zan a ni ta, in chhungah kan ṭhu thap a, Victora te pawh choka depah an ṭhu ve a. Ateii khan ṭhian man a eitir ve miau si a, man chu an han inhlan chho a, kan hlim dar dar khawp mai. Ka nu erawh a hlim famkim lo tih a mitmeng aṭangin ka hria,. Victora heti em ema a hua hi Pa Zuala khan engtin chiah nge a lo sawi ang tih ka ngaihtuah ṭhin. Man eitute an puan zawhah thingpui kan in a, Ateii lah a phur lutuk nge ni a rooma kan awm laiin Victora te chu a ko lut ve a, keimah min ngaihtuah vang tih ka hre tho, riang deuha ka awm bik kha a phal lo a niang. Ateii room thlanglam balcony-ah chuan kan ṭhu a, "I nu mitmeng kha i lo notice ve em?" Vica'n a tih chuan ka lo thaw hawk ringawt. "Heti em ema min huatna chhan hi ka hre chak" a ti ve hlawl mai. 

"Pa Zuala khan engtin chiah nge maw a lo sawi ang le.." ka ti vang vang a. 

Ka kut a rawn vuan a, "Engkim a ṭha vek mai ang, ka awm hi. Ka sulhnute avang chuan ka tuar ve tur pawh a nia lawm. Mahse, tawrh hlen erawh ka tum lo" a ti charh charh a. 

"Inṭhen mai kha a ṭha zawk asin le.." ka ti sap a. Min rawn thlek vut a, "Sawi teivet suh. Kan kal thui tawh, letsan phal chi a ni tawh lo." A ti bur mai a. 

"Nu leh pate thuawih loh chu a tawpah harsatna a awm ṭhin asin" ka ti a, "I nu phalna thlapin kan la innei ang, ka tiam a che." A tih chuan ka lo melh ngawt ngawt a, "Ka ring lo, a rilru a sak lutuk" beidawng zet hian ka ti a. 

"Keimah min ring thei alawm. Engmah i tih ve a ngai lo. " A ti nghut a.."ka fâwp chak che e,. A rem si lo" tiin a hawikual ruk ruk a, "Chutiang sawina hun pawh a nih loh hi" ka lo ti hlar. 

Ka kut chu lakangin a fawp zauh a, "Ka bula i awm reng lai pawh hian ka ngai che" a ti sup a,. "A kut kha dahthla nghal rawh." Ka aw hriat ṭhan em emin a rawn tih takah chuan hnunglam kan hawi rual ṭhawt mai.