Amah leh kei 12

AMAH LEH KEI..(12)

Ziaktu : Toni Râlte

"Ngai lo" chu ka ti tak naa, ka ngai lutuk tih erawh ka thinlung hian a hre viau lawi si. Ti nge maw mihringte hi a hun lo loah hian kan lo chapo ve ṭhin ni. 

"Ka ring lo" a rawn ti tawl mai. 

"Engvang?" Ka ti satliah a,. "Ka ngaih che avangin" a rawn ti nghet charh mai. Sawi tur em em ka hre tawh lo. "Naktukah ka rawn haw dawn" amah zawk chuan a rawn ti leh a. 

"Ti nge?" Bangbo fê hian ka lo ti ve a. 

"Ka ngai tawh che a. Engkim bulṭan turin ka rawn let dawn" a rawn ti bung nghut. 

"Kan thei lo tih i hriat kha" beidawn hmel zeta ka tih chuan, "Min ring em?" A rawn ti thum chhak a. Ka ngawih vang vang hnuah, "Rin che chu ka duh alawm" ka ti sep a. 

"Min ring la, engkim ka siamṭha ang, min ring a nih chuan ka thu pawh i awih ang" a ti ta a. "Kan hria ang chu" ti chauhin ka chhang. Beiseina siamsak vak ka duh loh rualin, tihbeidawn ka hreh tawh tho bawk si,. Ka awmdan tehhrep chu a nuam vak lo hle. Kan inbiak zawhah pawh rilruah a châm zui vawng vawng mai. Ka nu nen erawh kan sawi dun leh tawh hauh lo thung, keiin ka sawi duh bik si lo va, ani lah ka lakah a lungawi lo nge kan inbe tam lo khawp mai. Putea te lah khan an in chu an lo hralh tak tak a, mahse, ka nuin a hriat rual rualin kan pawisa an puk kha a va lam ve nghal rap mai a, Putea lahin hnial ngam hek lo, ṭha tê te chuan an inrul thei ta a niawm e. Tin, ka dawr pawh a kal ngaiin a la kal ve reng a, ka pute nen pawh kan inbepawp reng reng a, chaw te pawh va ei lâwp lâwp chang ka nei. Ka nuhrawn hi a felin min tiṭha em mai a, keipawn nuam ka tih phah viau a ni. 

Victora chu a sawi ang ngeiin a lo haw ta ngei a, a chhungte lahin a lo haw hma chhan an zawt bik lem lo bawk. Inbiakna hun remchang kan la nei hleithei lo va, tunlai chu Maliani a phunchiar thar leh a, mi hrâwk khar khar reng mai a, kei lahin ka lo hlau vak tawh bik si lo, kan han inhau leh bap bap ṭhin, a tukah a ngaite bawkin kan inhmu leh zel tho va, a pawi thui hran lo ve. Tlaia ka haw tur chu Vica chuan gate bulah min lo nghak a, min thlah a tum tih ka chian êm avangin hnial buai ka tum hran lo. A bike a va la chhuak a, ka chuang zui ve zat bawk. Mahse, kan in lam min panpui ta awzawng lo, "Khaw nge kan kal dawn?" Ka ti vak a. 

A ngawi reng. "I â mi? Ti nge i ngawih reng a" ka ti leh nghek a. Chawlhhmun lam min panpui ta vawn vawn mai si,.kan veng nen a inkarkîk lutuk tlat. "Victor, ka biak che chu" ring zetin ka ti leh a. 

"I hre mai ang, au vak vak suh, miin i rui emaw an ti ang" a la ti hluk hluk zui! A hnunglam aṭangin rum zetin ka melh nghek ringawt. Ngawi reng chuan ka chuang ve ta hle hle a. A tawpa tawpah chawlhhmun daiah min dinpui ta a. Dai han tihah hetah hian Mizo chaw dawr an tih mai, a bang dap, a chung dî, a chhuat erawh lei rinchhana sak, dai nuam zet mai hi a awm a. Tourist ho a hîp hle ṭhin a niawm e, kei phei chu ka kal vawikhatna a ni. "Chaw kan ei dawn, tah hian" a ti sup a. Khua a thim tawh a, ka nuin min lo call tawh ngei ngei ang, ka phone phawrh vatin ka nu miscall ka hmu zui zat bawk. Ka call back ta nghal a. Ka sawi lan hram duh chu, kan picnic hnu aṭang khan an inah zanriah ei tawh lovin a hmaa ka haw dan ang khan haw leh tawhin an veng nurse khan zan lam chu a lo enkawl tawh thung a ni. Chuvang a nia ka nu pawn min lo call reng ni. 

"Chaw eiturin kan nghak reng che a, i va rei ve" a rawn ti a. 

"Nia, ka phone hi ka lo silent daih a, nurse kha zanin chu a hman loh avangin hetah zanriah ka ei a ngai dawn a, ka buai deuh nen ka rawn hrilh hma thei lo che u a nih kha" ka ti ta zung zung a. Dâwt sawite pawh chu ka lo thiam reng reng e a. 

"Aw le, nih chuan kan ei mai ang" tiin a dah zui nghal. Ka thaw hap a, "Sawi lâwk ta che" Victora melh chung chuan ka ti vin ṭhak a, min rawn kai a, ngawi rengin Mizo Chaw dawr lam chu min panpui ta a. A kawtkai a nuamin a thengthaw a, kawt an nei zau bawk nen,. Zo deuh, simple deuhin a bul velte chu an chei luklak ve a, hnamdangin an tlawh nasat vang a ni pakhat. He Dawr hawngtu idea hi chu a ṭha khawp mai. Zufâng bakah Zupui thlengin a awm a, hnamdang zu erawh hmuh tur a awm lo thung. A chhung lah chu a pawnlam landan ang ngawt chu a ni lo chiang, a changkangin a fai kher mai. Dawhkan hi book lawk kher a ngai ve lem lo va, keini pawh chuan dawhkan 8-na kan chang hlauh mai. Menu te chu kan han endun a, "I bai nge tui an bai kan en ang" a ti a. Ka khi sak ringawt. Zo buh ngei mai an rawn khawrh rum ṭhah mai a, ril a ṭam tawh bawk nen, ka pum a ri ruk ruk mai. A hria ang tih hlauh ruk nâk alaiin "A va ri ring e" a la ti zui a. Ka melh vak ringawt. Vawksa chhum, a naksah ngei mai hrang lian nelh nawlh bakah thlai hnah leh rah bai tui hmel zet zet an rawn chhâwp hnûr mai a. An tauh lah chu lambak tih velte a ni nuaih mai. Mizo chaw hi mizo hrawkah chuan a lo tui ber mai e. Chaw ei chhung zawng kan inbe mang lo, ani pawh a bur ve ngar ngar mai. Kan eikham meuh chuan puar tak ka ni, ka dul ka zût ka zût mai. 

"Chaw min eipui a, ka lawm e." Thutak deuha a tih chuan keipawh ka thutak ve nghal rûn. "Ka lawm zawk" ka ti ve mai a. Dawr kan chhuahsan a, a bike lam kan pan lai chuan, "Vic, Lalrinmawi.." hnunglam aṭang chuan a rawn ti lâwng lâwng a. 

"Julie, hun ka nei lo, sorry" Victora'n a ti hmawk hmawk a, min rawn kai chat bawk. "Min thlakna tur talte chu duh uluk ve tur alawm le.." Julie chuan a la ti zui! Ka sa ve zak mai. Ka kut rawn hum ngheh sauh pahin, "Ngaithla suh. Mi â a nih saw" a ti sup a. 

"Mi â ka ni lo, Lalrinmawi, Khatiang hmeichhia kha i ngaizawng tak tak lo vang" a rawn ti leh ṭâlh a. 

"Nangmah alawm ka ngaihzawng nisi lo, ka kawp ṭhin chu" Victora'n a lo ti hmak. 

A hmui tisawiin, "I kawp rei ber leh tina theitu che" a ti sap a, min rawn melh zauh bawk. Vica chu a nui hul hak a, "Ani nen hian thla tharah kan innei ang. I lo kal ve ka remti e,. " A ti nghet charh a, ka lo îp deuh. Julie mitmenga tawrhna lo lang chu keipawn ka hai hauh lo. "Kan hria ang chu" a ti nghat a, min kalsan zui ta a. 

"Ani nen khan in boruak a ṭha emaw ka tia.." ka ti hap a. Ka sawi awmzia zawk chu Julie kha a puih thute kha a sawi ve sia, tunah tiang tak khan an inṭawng el leh ta bawk si. "A ṭha dawn emaw ka tia, min lo bum ve khanglang alawm" a ti nghut a. A bike a start zui nghal. Hmundangah min kal kualpui tawh lo va, kan in lam kan pan ta zar zar, ka lawm hle. Chutihrualin ka thlahlel a, a hnunga ka ṭhut reng laite chuan ka ngai veng veng mawle, a zin ve reng bawk nen. Kan inkar erawh sawifela sawichian vat erawh a ṭha khawp ang, puitling anga inngai kan ni ve tawh bawk a. Kan in kawt kan thleng a, ka chhuk vat , a lo len leh ka hlau a ni. "I hlauh ka hria, ka lo leng lo vang" a ti a, a nui zui hek hek bawk. "Chulam a ni lo", ka ti naa ka hmelah a lang vek thoin ka ring. 

"Inleng nei suh ang che. Tuaimam..nih phawt" tiin min kalsan ta a. Tuaimam tiin min ko leh ta..bul kan ṭan leh dawn tak tak em mawni le. In ka thlen chuan ka nu chu a lo mu tawh a, a hritlâng âwmna vang a lo nia. Keipawh ka mu ve nghal daih. 

Vica chuan boruak siamṭhat leh a tum takzet tih a lang a, kei lahin ka hlat thei lo telh telh bawk, a chhungte mitmei ven a ngai bawk si lo, a hna kal te hi min thlah hman loh hlau hian a rawn haw hma ziah a, a chhungten engmah an sawi ngai chuang lo. An workshopah hian ka la kal ve miah lo va, min hruai a tum lem lo bawk a, ka tum lui lem lo. Kan awmdan tak chu ni leh ni lo inkar a ni mai awm e. Ngaihzawng dang inneihsan phal si lo, thuk taka inlaichinna nei hleithei bawk si lo ang kha a ni mai. Keipawn tihdanglam vak dan ka hre lo, ka nu bulah erawh kan inṭhen thu ka la sawi ngar ngar tho. Thildangah a buai ve deuh bawk a, min ngaihven lutuk lo, Zira lah chu ka nu mitmei a hmu ṭha nge ni a rawn leng tlut tlut mai a, phone-ah nise min be âwl lo bawk. Kei akar min lo duh dertu chu a lawmawm tehlul nen, ka tan erawh ninawm leh hneawm a chang zo. Victora'n a hriat phei chuan kan mualpho palh ka hlau, pawisak a nei lo nasa si a. An in chhung pawh Pi Lingi mize danglam deuh vang nge a boruak pawh a ziaawm chho ta viau mai. Chutihrualin U Mama hmel hmuh erawh a khât deuh. Hna thilah a zinchhuak deuh reng bawk nen, Maliani pawh han phunchiar deuh mah se; ka awm loh hlek chuan min lam chul zel tho. Inrinni a nih avangin an ina chaw eiah min sawm leh a, a tuk ka chawlh thin vang hian min thlahlel ve deuh a ni mahna, ka hnial bik lo. 

Sangi nen rawng kan bawl leh a, "U Pipi, ka bialpa kha a lo zin dawn asin" a ti siam siam a. Sangi hi sawi tawh angin Thingtlang khaw pakhat aṭanga helaia rawn awm a ni a, an khua pawh zep nâk emaw a la pilril angreng. "Ih maw, naupan lai aṭanga inkawma inkhualtelem ṭhin kan nia, Anu leh Apa te an inṭhen hnuah Anu bulah khan ka awm ta daih sia, rei tawk kan inhmu lo va. Anu-in pasal dang a neih takah khan Apa bulah ka awm leh a, tah kha chuan kan tleirawl ve tawh a. Kan inzah vel tawp a, mahse, inṭhenawm kan nih avangin kan inkawm zui leh ta a, a bialnute pawh ka tihpui ṭhin. Mahse, an ni rei ngai lo. Aizawla ka awm hnuah vawi 1 a rawn zin a, kan inhmu a, tah chuan min lo duh ṭhinzia a sawi ta a, a rilru ang chiah kha ka lo pu ve bawk nen, ka chhang ve ta a ni. Ka hlim asin aw. Ani pawh lehkha a zir rei lo va, mahse, a puin huan ṭha deuh a hnutchhiah a, a huanah chuan a tal tam zawk, vawk, ar, ui thlengin a vulh a..helaia mi hausa fapa, nu leh pate chawmhlawma nalh deuh deuha leng ai chuan a lêt za velin ka thlang zawk.."a ti leh bawrh bawrh a. Sangi te feelings hi ka tleirawl lai khan ka neih âwm pawh ka hre ngai lo e a. A nawm hmel tawp. Bakah a rilru putdan tê chu ka duhin ka chhuang rilru reuh hle,. Amah hi a hmelchhe lo reuh sia, duh nise khawpui tlangval tu emaw chu a chhaithlu ve thei mai ang. Mahse, a bialpa tan hian a rinawm ve tlut mai a, la innei mawlh teh se. 

"U Mateii nen in inbe ngai em?" Ka ti a. 

"Be zeuh zeuh, naupang ho ka ngai thei lutuk a,. Anni pawn min ngai." A ti a. A mitmeng chu a ngui rawih mai. "An inṭhen hlen dawn chu a ni awm sia tiraw?" Ka ti sap a. 

"Umm, U Mama hian nupui a nei dawn an tih kha..an sawi ka hre ru a" a ti zawi sep a. Ka beng a verh hle naa thudang ka sawipui leh ta daih. Ka nu sawi ang khan an inṭhen aṭanga kum êm pawh a liam hmaa nupui dang a neihsan chuan U Mama chu ka mil lo ru ngawt ang. U Mateii aia hmangaiha dawm thiamtu kha a hmu tawh pawn ka ring lo. An inkar buarchuar nuaih hi ngaihtuah vak dan ka hre lo, Dampuii hming a ri ve zeuh zel bawk si, hmannia hmeichhia lah Mali an ti daih bawk sia. a, nakinah ka la hrefiah ve leh mai ang chu maw. 

An rawn haw khawm ṭak ṭak a, mi chhe sawi chu koh aiin an hnai tih ang deuhin U Mama pawh a zin emaw ka tia, Mali bawk kha chaw ei turin a rawn hruai haw ve leh a, an inneih tawh dawn vangte pawh a nia nge. Victora erawh tlaiah khan min rawn bia a, "Khawih laklawh lutuk ka nei a, vawiin tlai chu ka rawn haw hma thei dawn lo. Thlah hman hram che erawh ka tum ang" a rawn ti. 

"A ngai kher hleinem" ka tih lahin, "Midang bula i ṭhut a ṭul lo" a ti hmuk bawk si. Ka ngawi ringawt tawp. Tichuan, Vica tel loin zanriah chu kan kil leh ta a. Mali an tih chu ka rin aiin a tlangnel a, hmeichhe lu zo tak, a duh huna zak lo thiam tak, mi tihlungawi thiam tak niin ka lo hmu ve tawp, misual tak erawh a nih ka ring lo. Mize hlauhawm kan tih ang chi kha a nih duh hmel, keia lo teh ve vak vak tur a ni lo bawk a, ka ngaihtuah vak peih lo. Tunlai chu ka chaw ei a tui deuh nge ka dul pawh a kiar ve deuh a, tlema ei tlem leh deuh a ngai a ni. Kan ei mek laiin U Mama chuan, "Ka pa, kar tharah chuan em ni palai chu kan tirh ang?" A ti ta a. Sangi nen chuan min vengthawng tawh vak bik lo a nih hmel. 

Pi Lingi lo meng ralh chu ka hmu hman, a lawm lutuk lo tih hrethiam tur khawpin kan inchenchilh rei ve tawh a, lawm chiamna chi a ni lo ve bawk a ni. Pu Zauva pawh chuan, "Nang berin ṭha i tihte chuan kan tir poh a niang chu" a ti chuar chuar a, ani pawh a hmin hmel vak lo. Fate duhdan na nâ na chu tihhlawhtlin loh a hreh ve niang e.

"A ṭha lawm, thil tihfel vat vat hi a ṭha. Kan mualpho thui hmain" U Mama bawk chuan a lo ti ve leh a.

Pi Lingi chuan, "A la hma mah mah lo maw?" A lo ti ve khauh a, Mali hmel chu a dur nghal khap mai. 

"Kan la innei dawn tho tho alawm, a ho lutuk" U Mama lah chuan a ti liam puat a. Maliani a kham ta nalh mai, chaw a ei tlem tih ka hre kar bawk. A kam a va ṭhuah zawha a rawn let leh pah chuan, "Zahna tlachham tawk vek vek hi chuan pawisak in nei lo mang e. U Mateii ka ngai hle mai" a ti ta ngat mai le. Boruak a reh nghal duk mai,. Sangi nen kan inmelh zuk zuk ringawt. Pu Zaua zawk chuan, "Ma-i, chutiang sawi a ṭul tawh hleinem, thil a nihdan tur ang a ni vek tawh alawm" a lo ti dam ta thluam a, Maliani erawh tum bâr chungin in chungah a chho nghal vang vang. Keini pawh kan ṭawng zui tawh hauh lo. U Mama chuan thinrim hmel a pu hran lo naa, a lawm chiah lo tih erawh a lang, Mali erawh a awmdan a ngai reng a, hrehawm han ti hmel a pu hran lo. 

Victora pawh Maliani ka jection hma deuhin a lo haw a, Maliani roomah a rawn dak zuai, "Ka inbual lawk ang, min lo nghak rawh aw" a ti a. A hmanhmawh hmel viau. Ka lo chhang lem lo,. A va inbual sawk sawk a, ka rin aiin a rawn inpeih hma, "Kal ila" a rawn ti a, Maliani chu a inthiar mêk. "Chaw i ei dawn lo mi?" Ka lo ti a. 

"Ka ei leh chuan i tlai vek dawn asin. Ka ril a ṭâm lo" a ti sam êt a, a hah ve dawn tehlul nen, min thlah loh a hlau lutuk chu ka khawngaih letling zawk. "Ka nghak thei che lawm, zu ei phawt rawh" ka ti ve tlat a, ka nu pawn min hriatthiam mai ka beisei. "I nu a rawn sa leh ang a, a harsa zual leh vek ang. Kal zawk ang" a ti deuh tlat a, ka hnial thei ta bik lo. Maliani pawh a rawn chhuak a, "Ka va phei tawh ang e aw. Lo ṭha la" ka ti a, ka bag ka la zat bawk. "Va fimkhur u la.." a ti sep a. Kan inbye bye zui ta a. In lam pana kan tlan mek laiin ka phone a rawn ri tlang tlang, ka nu a nih ka ring deuh, mahse, Zira a lo nia , "Hello" ka ti vat. 

"Lo len ka tum asin, i awm ang tiraw?" A rawn ti a. Vica hriat hlau takin phone chu ka hup deuh ṭat ṭât a. "Aw hei ka haw mek a" ka ti a.

"I thlen hunah min lo hrilh la tiraw? Ka lo phei ang" tlangnel tak hian a rawn ti ve zel a. "Aw le" tiin ka hmet hlum nghal daih. Ka chetdan chu a mawi chiah lo tih ka hre tho, mahse, Victora hriat ka hlau êm a ni. Mahse, "Tu nge?" A ti ta tho va, dawt sawi ka duh tawh bik loh avangin thudik ka hrilh a. "A ṭha lawm, i nu lungawi nan be ṭha satliah rawh" a ti thluam nia! Mak ka ti letling zawk e a. Kan in kawtah ka chhuk leh a, "Chaw ei rawh aw, i ei lo ringawt ang e" ka ti ve hram a, vei nuih leh sukin, "Ka ei ṭeuh ang. Chuan, a bula i ṭhut pawn si miah suh ang che" a ti sup a, Zira daih a lo vei tihna a nih hmel. A tlanliam thleng ka thlir hnuah inah ka chhuk ta chauh a, ka inbual nghal a, ka inthlak laiin Zira te an rawn leng ta bawk. Zira ṭhianpa Buanga hi phawk zet, a bula awm nuam tak a ni a, amah vang hian Zira lo leng ṭhin pawh hi ka ning lo deuh ṭhin. Pathlawi a ni bawk a, Buanga chuan sawi tur leh han uan kual dan a thiam ṭhin khawp mai. "Engtik nge maw palai hi kan rawn tirh ang le? " A ti thut pek a! Ka nu hoin kan ê dual mai. Amah lah chu a nui duh ṭhak si lo, hrilhhai zeta ka melh laiin a insum zo ta lo nge a rawn nui chhuak ta phut a, kan zavai nuih ta hawk hawk hlawm a, Zira lai lah chu a ṭhen a ṭhen ringawt mai. Zira nen chiang takin inlaichinna kan nei lo tih hretu a ni tho va, khatiang fiamthu han thawh pawh kha a palzam ve niin ka ngai. Mahse, ka nute mut hnuah Buanga pui chuan "Chance ka pe lawk dawn che u, naute nu ka va hmu lawk ang e, nautê a damlo a" tiin a chhuak ta nulh a. A nupui hlui te hi kan in aṭanga hla lotê-ah an lo awm ve kher bawk nen, an inbe chhe hran lo va, innei leh tang e erawh an ti lem hlei lo. Zira nen chuan lai zetin kan ṭhu dun ta ran a. 

A tawpa tawpah mipa zawk na nâ na chu a rawn ṭawng chhuak ta a. "Pipi, hei kan inhel rei ve ta viau mai a, naupangchhia pawh kan ni tawh lo va, whatsappah pawh kan inhrilh chamchi a, i rilru diktak hi min hrilh a hun ve tawh lo maw?" A ti khur dar dar a, Zira hi nula mi tak a ni lem lo bawk a, a laiin a zak ve ṭhin hle tih ka hria. 

Ka chil ka lem khawlh a, chhan loh theih ni hek lo le, "Min lo duh ve hi a lawmawm ka tia, mahse, dik tak chuan..ih,. Hetia ṭhian anga awm hi ka duh a. Nuam pawh ka ti zawk, ngaihzawng atan chuan ka tlak loh, ṭhian hi ni ila bialnu ṭha deuh la nei zawk rawh." Ka ti tlang ta râwt râwt a. Hetia beiseina siamsaka a tawpa tihnat leh ai chuan tuna sawifel nghal mai hi keipawn ṭha ka ti zawk a ni. A ngawih vang vang hnuah, "Umm, min hnarna chu ka hrethiam e. Ka theihtawp ka chhuah a, ka tling zo ve loah ka ngai. Hetiang a nih avang hian kan inkarah inhuatna emaw boruak eng emaw awm lo se tiraw?" A la ti ve hram hram a, a ruk tak chuan nuam lo ka ti takzet. Ani ang tlangval fel leh khawsak pangngai tak kei ve mai maiin han hnawl ngawt pawh chu, mahse, ka thinlungah mi pakhat a cheng tlat tawh si. 

"Teuh lo mai, ka haw teuh lo mai che. Min haw lo zawk la ka lawm viau ang" tlema zangkhai deuh zawk hian ka ti a. Ka nui bawk,. Thingpui lum ka tum chuan, "Lum tawh lo mai rawh, hei a tlai dawn, ka haw phawt zawk ang" a ti a. A tan len ve reng kha a nuam dawn lo tih ka hria. A sawi ang ngeiin a ding tharh a, a haw zui ta a. Keipawh ka mu ve nghal daih. Zira lakah chuan inthiam lo ru viau mah ila, lehlamah chuan ka thawl hawk tho mai. Khatia laklawh deuha nuntir reng kha ka tan pawh thil nuam tak a ni hran lo. A tukah tukṭhuan ei laiin ka sawi chhuak ta a, Ka nu elsen ka chak ve vang a ni pakhat. Beisei ang ngeiin a hmel a dur nghal khap a, "Zira te ang tlangval fel leh ṭha lutuk hnawl chu a zah pawh i zak lo mawni le.." a ti khar khar mai. 

"Duhzawng kan nei ve alawm" ka lo ti awlsam êt a. 

"I duhzawng kha ka duhzawng a ni ve hleinem" a tih chuan, "I neih tur a ni chuang hleinem" ka ti ve leh ngat. 

"I va chaltlai reuh tak e aw. A tu hi nge maw i chhun a, hetiang mizia hi nei tlat nge maw i nih le?" A ti hlak hlak a. 

Ka ngawi reng. "Zira chu hrilh leh la, hun pe leh rawh. Ani saw nei la, i ngaihtuahawm loh ber" a ti a. 

"Aih. Ka duh lo. " Ka ti ve tlat si, min tih vak dan a hre tawh bawk si lo chu a titau a, a che bur bur mai. Nuteii nen kan inmelh a, kan nui kan nui ringawt. 

Victora te in ka thlen chuan ani chu a lo la chhuak lo va, Sangi'n an chaw eina vel a lo sengfel vel chauh. Maliani pawn chaw a lo ei ve peih a, a phunchiar leh hnu hian zing lamah chaw a thlah leh tlat mai a, tukin erawh kaikuang an lo siamsak a, a ei ve ṭeuh thu a lo sawi siam siam a, ka lawm hle. "Vawiin chu Rinzuala thlanah min kalpui rawh aw" a tih chuan mak ka ti deuh a, a sawi dan teh bawl lah chu a thawveng phian bawk si. 

"Tehreng mai, i chhuah hi alawm ka duh ber" ka lo ti var a. 

"A thihcham a nia lawm" ka makti hmel a hmuthiam ni ngei tur a ni. Ka lo bu nghat a, "Kan pahnihin em ni?" Ka ti a. 

"Umm, ni mai. Ka scooty-in kan kal mai dawn nia, i khalh ang a" a ti a. Ka phur ru viau. Kan picnic bak kha pawn lamah a teihawi peih leh ta vak lo va, Rinzuala vanga chhuak tur mah nise, a lawmawm lamah ka ngai. Damdawi ka eitir zawhah, "Tui ka zu lum lawk ang e, dressing phawt che ila tiraw?" Ka ti a, a lo aw ve mai. Ka chhuahsan nghal a. Step bulah Vica a lo ding run mai. "I va kal har" pangngai tak hian ka ti a. 

"Ka lo nghak che lawm.." a lo tih chuan ka lo melh hû a, "Rinzuala thihcham a nia, a thlan in va tlawh dawn tiraw?" A hniam ruih a. 

"Umm" ka ti mai a. 

"Ka lo kal ve ang" a tih chuan rang zetin, "A ngai lo, boruak a chhe leh vek ang" ka lo ti vat. A nui suk a, "Ok, i hlauthawng thei si. Ka lo kal lo vang. Hun hlimawm deuh va hmang u la aw" a ti a, kal mai ka tum chu bangah min nawr betin min fâwp a. Ka ṭang vel peih tawh lo, kan inthlah thei tak tak chuang si lo va, lo ṭan kual vel vak khan awmzia a nei pawn ka hre tawh lo. Mahse, awmze nei deuh hleka kan inlaichinna hi kalpui emaw sawifel emaw chu a la ngai ang. Ka nu hi kan mutân ber ni mah se; mak deuh maiin kei hian ka nu ka zah ta lo ni lovin ka namnul ṭan riau tawh a, Victora vang nge ni dawn ni a rilru kan la hneh theih mai ka beisei ru ve tlat tawh. Tui ka lum laiim Vica pawh chu a hnaa kal turin a chhuak ve ta nghal a. Keipawh Maliani ka dressing zawhah a intifai leh thuak a, kan insiam zui nghal. "A chhungte pawh an rawn lang ve maithei. A farnu hian a ngai bang thei lo va, a tuar ber nghe nghe alawm. Rinzuala kha chu hmeichhe duat thiam tak kha a ni ve bawk a" a ti mawlh mawlh a. A bialpa hi chu a nunah a thi thei ngai dawn lo chu a nih hi maw..Pi Lingi pawn engmah min lo zawt lo, a hresa a nih hmel. Tichuan, a scooty chuan kan phei ta a,. Thlanmual chu a lo hla lem lo va, aman hma a hruai a, ka zuk ve zel. Mawi taka chei vul chûk thlan pakhat hmaah chuan a ding ta chat a. Hming inziak aṭangin kan kalna tur a ni tih ka va hre ve nghal. A pangpar ken chu a va thiat mawlh mawlh a, ka awm ve tih hre miah lo niawm tak hian, "Ka rawn tlawh khât che tih ka hria, ka tan chhuah a harsa êm a ni. Min hriatthiam ṭhin kha tiraw? Chuan, Vica pawh hrehawm a tia, hman zanah pawh a inthiam loh thu a sawi nghe nghe asin. Ani pawh ngaidam tawh rawh aw. Keimah min hmangaih leh duhsak vang zawk a nia, engkim i hriatthiam ṭhin kha. Chuan, ka dam ve sâwt tawh lutuk asin. Ka chaw eite pawh a tui tawh lutuk, Hruaipuii nen hian inhmelhriat ve u la ka va ti ṭhin tak, i ngaina ve ngawt ang. " A ti mawlh mawlh a. Nuam lo ka lo ti angreng. A rukin a thla erawh ka laksak hram. 10 mins vel kan awm hnuah a sawi ang tak takin nula keimah ang rual vel tur pahnih hi an rawn kal ve ta ngei a. Pakhat zawk chuan, "U Ma, awii i lo kal ka ring reng a" a ti chul a. Rinzuala farnu a ni ngei ang. A mitmeng a zim lek lek e tih lohah chuan nula hmelṭha leh hmuhnuam tak mai a ni. Maliani pawh chuan, "Tebawih, i lo kal ka ring reng a ni. Kan thlenna a la rei lo, kha kha Hruaipuii, min enkawltu a nih kha..Hruaipui, Tebawihi, Rinzuala nau aw" a ti zung zung a, Maliani ka damlo enkawl ṭhin kha a ang lo tawp. Tebawihi nen pawh chuan kan inchibai lâwp lâwp a,. "In lo kal hi ka van lawm, i lo la hre ve reng tih ka hriatna hian min tihlim sawt" a tih chuan mi dek deuh, Maliani pawh chu a hnuk a ulh deuh nge ni, "Engvangin nge ka han theihnghilh tehlul ang le? Ani hi a awmchhun a ni reng tawh dawn alawm." A ti charh charh a, a thusawiah chuan a dinngheh hmel ngawih ngawih, he nula hi lehlamah chuan a ngaihsanawm ka ti takzet a ni. Tebawihi ṭhiannu nen an inkawm lai chu kan lo thlir ve reng a, thu hotê tê an sawi naa an inpawhzia chu a langsar em em tho si. Hmuh an nuam takzet a ni. 

Kan haw lamah, "Victora workshopah i kal tawh em?" A ti thut a, ka la kal loh thu ka sawi chuan, "Ka kalpui ang che. Kual rawh" a ti ta tlat mai a. Kal kher pawh ṭul ka tih loh nen, hnial a nuam bik si lo, Victora pawh hrilhlawk lem lo chuan kan kal ve ta ngawt a. Kan va thlen chuan an lo buai lai tak a nih hmel, Vica pawh Bolero hnuaiah a lo lut a, Lalvala lah car pakhat a lo vil bawk, midang thawk ve ten min hre ve mang si lo. Maliani zawk chuan a nau chu a ko ta a, bal nen nuan hian a rawn chhuak a, min hmu chu mak a tih ve hmel deuh. "Sawi lawk tur alawm" a ti hluk a, a lungawi lo hran lo tih erawh ka hrethiam ve vek. Dawr chhung tak erawh a thianghlimin a nuam viau. Motor parts an zuar nghal bawk a, amah Victora ber hi dawr nghak tur a nih laiin a naute hi rin zawh loh chang a nei nge ni, motor hi a va siampui leh nge nge ṭhin. "Kan kal leh nghal mai ang. Kan rawn tlawh ve zuai che, Ṭhiani hian a la hmu ve lo va" Maliani chuan a ti a. 

"Thingpui in u la, ka'n chah ang aw.." a tih chuan, "A ngai lo" kan lo ti rual ṭhawt. "A va ho e aw" a ti nang nang a, chutihlai tak chuan Julie ngei mai kha a ṭhiannu nen an rawn lang ve leh ta tlat mai. Helmet a khum vâ a, "Vic, ka scooty saw a hand brake saw a chiang lo, ka sawi thiam lo, min ensak teh" ngampa zet hian a rawn ti lâng lâng. Min hmuh takah chuan a hamhaih ve deuh nge a ding chawt mai. Mahse, engtinmah ka danglam ve lo thung. 

"Sena, va ensak lawk mai ta che.." Vica lah chuan a lo ti daih a. Julie mitmeng râng chu ka hmu reng,. "Nangman en la ka tia sin le, an hre ve tak tak lo" a tih chuan, "Scooty mai mai khawih hman ka ni lo, hei special guest ka nei bawk si" tiin min rawn kawk vah a. Confi zetin ka lo hawi ve larh bawk. A nuam ve mai mai alawm le..Julie chu a tum bâr a, Vica lahin a ngaipawimawh der si lo. Maliani pawh chuan kan boruak hrethiam zetin, "Coffee zawk in ila" tiin a ṭhu ta thek a. Vica pawn coffee a chah nghal vat vat. 

Victora'n a customer te a biak lawk hlanin, "He Julie hi lawm ka lo khawngaih ve hman viau a, ka rin loh deuhin a awm leh ta roh sia,. Ka tei thei ṭhak tawh lo" Maliani chuan ka beng bulah a rawn ti sur sur a, ka nui hawk ringawt. 

"An inzui leh tawh maw ka lo ti hman a, keipawh" ka ti a. 

"Kan ti vek alawm. In inṭhen lai khan" a ti deuh kher a, "Tunah pawh kan la inṭhen tho alawm" ka tih chuan, "Ṭhen lo, ṭhen lo. In inthlah thei tak tak lo, ni ve mai mai teh u. In ninawm" a ti ta hlak hlak a. Ka nuih a za bawk si, a sawi dik viau mai. Ni e, tuilairap nun hi kei ka thiam ve meuh lo chu a nih hi maw. Julie chu an khawihsak zo a niang, a kal lo thei ta lo va, a lunghnûr ru viauin a nia ka rin ni. Coffee a lo thleng a, kan pathum chuan kan in ho ta a. Rinzuala vel a rawn sawi ka hlau hle a, a rawn sawi ta lo hlauh. Maliani zawk chuan, "Dawr hi nghak la, va inrawlh ve vak tawh lo la, hnathawk i ngah tho alawm" tiin a nau chu a zilh mial mial a. "Complain a awm hi ka hlau ṭhin mawle..an la thiam fumfe lo lutuk a.." a ti nuah nuah mai. Mechanic nih hi a inhmeh ve hrim hrim, a tatoo zawng zawng nen. Lalvala a rawn lut ve a, "U Ma-i chu ka hai dawn che lawm le..lo leng ziah teh u, nula inleng neihte hi kan châk ve thei a nia" a ti hlut a. 

Maliani lah chuan hrechiang fê hian, "I bialnu hnarbang sang deuh bak i ngaihtuah tak tak lo" a lo ti ve vat. Lalvala hi gorkhali nula hmelchhe lo tak nen an inngaizawng ve a, ka la hmu ve lo thung. Inneihte pawh an sawi hman a, nula lam chhungte hi an hel deuh reuh em mawni an la inrem hleithei lo a niawm e. 

Coffee kan in zo ta bawk a, kan hawsan ta rih a. "Tlaiah ka lo haw hma ang" Vica'n a ti hram. Maliani pawn, "Thlah loh hi i hlau ve sia maw, ka scooty hi kawltir ka lo tum tawh asin" a lo ti zauh a, "A ṭul lo. " A lo ti hmuk. 

In kan thlen chuan Pi Lingi chuan inleng a lo nei a, amah aia upa hlek tur nu pahnih an ni. An thutak deuh bawk nen, in chungah kan chho tlang ta daih a. Maliani pawh a chau ve deuh nge a mu hle hle mai. Eitur kan lei haw nghal avangin ka siam a, kan ei dun nghal mawlh mawlh. 

"Mali nu leh a nuteii te an nih kha" a ti zawi sap a, ka lo bo hman deuh. Mahse, Pi Lingi inlengte a sawina a ni tih ka hrethiam ve leh nghal. 

"Eng nge an lo tih dawn le?" A ngaihna hre lo fê hian ka ti a. 

"An fanu tan an rawn inpalai a niang" ngaihnep hmel zet hian a ti a. 

"Ni bik lo vang" ka lo tihsan. 

"Heng ho nena inlaichinna neih hi ka duh lo a nia. Lawmkima vang vek a ni. Tenawm lutuk, U Mateii aia mo ṭha hi an awm tawh lo tawp ang" a ti tân tân a. Lawmkima chu U Mama hmingpum a ni. 

"Nia, U Mateii kha chu a fel ve thlawt ka ti. A pawi êm mai" ka ti ve hluai a. 

"He thil inṭanna hi a rei tawh alawm, a tuar ṭâng ṭâng a, U Dampuii a lo lang ve sek thul, a tawrhna kha a namai lo asin. A tawpah a tuar zo ta ngang lo a nih kha" ..a ti vang vang a. A thil ei lai pawh a ṭhulh daih,. A rilru a kal thui hle a nih hmel. 

"Mali kha eng mi nge ni reng reng? Dik tak chuan in inah ka awm ve reng sia, engmah ka hrethiam lo, tuman insawi duh bawk si lo" ka ti ta phawng a. Ka ning zozai tawh a ni, thil thup an nei reng hi. 

"Va seng fel phawt rawh" tiin kan thil ei lai chu a thawhsan a, keipawh rang takin ka che nghal vat vat. Ka insengfel zawhah khumah hahdam zetin kan ṭhu dun a. Ka ngaihchan vang vang hnuah, thawk la hawkin.."Mali hi Mama best friend nupui hlui a nia." A ti ta a.