Amah leh kei 11

AMAH LEH KEI..(11)

Ziaktu : Toni Râlte

"Tu nen maw? U Dampuii nen maw?" Ka ti hâ a. 

"Duhtawk rih ang. Ka ni lo tihah chiang la a tawk mai. Chuan, ka thusawite kha hrereng ang che " a ti a. A nelawm leh vak tawh loh. 

"Ka chhuk dawn" tiin ka kalsan ta a. Min chelh zui bik lo. Zanriah kan ei laiin Maliani'n, "Naktuk chawlh a ni sia, Bawihteii te sawm ve ila, huanah chuan zuk kal ang u" a ti hlawl mai. Kan phâwk hlawm ngei mai. Pu Zauva chuan lawm em em hian, "A va ṭha dawn tak êm. I ngaihtuah thiam hle mai. Kan ti ang, chaw ei kham veleh ka'n bia ang e" a ti chul a. Pi Lingi pawh a hmel hmuh a nuam viau mai. Sangi lah a lo phur nasa mai bawk sia,. Victora erawh a ngawi reng thung. Sawrkar chawlh pawh nise ani chu a chawl ve ngai tlat lo va, a lo kal ve lo turah ka ngai. Lo kal lo daih mah se a pawi lo. A awm ve hian mi uap run zel a , a ninawm ṭhin. Chaw eikham veleh Pu Zauva chuan U Mateii chu a be ta a, ani pawhin rem a lo ti viau mai. U Mama zin erawh a lo la haw lo va, U Mateii pawh chu lo kal ve turin a sawm tel nghe nghe. Maliani'n, "Patea te chhung chu sawm rih lo mai ang u,. Sangi leh Pipi te tan a nuam lo palh ang" a tih avangin a naute chhungkua chu a sawm ta lo. Chutianga a damlo berin rawtna a han nei chu kan sahâwk ka ti mai, kan phi cheng hlawm a. Keipawh Maliani ka jection zawhah hawn lam ka hnaih ta a, Tka biak ka tum lai mekin Victora a rawn kal a, "Ka thlah ang che. In vengah tihtur ka nei tho" a ti a. 

"A ngai chuang hleinem" ka tih pawn, "A hrana midang koh kha a buangbar mai mai" a ti deuh tlat. Inngaizawng treat ang deuha min treat leh ta chuan awmdan min tithiam lo, ka ni deuh hûih mai. Mahse, hnial fithlak a har dawn tih ka hriatsa avangin ka zui ve leh ta poh a. Kan tlan lai mekin, "Ka lawm e" a ti thawp sup a. 

"Engvangin?" Ka lo ti hâ a. 

"Ka û i enkawl dan avang hian. Hma a sawnzia hi" a ti a. Ka ngawi reng. 

"Dam chian var chu a harsa ang a, mahse, tunah chuan a nat tirh lai ngaihtuah chuan vanram a ni ringawt." A ti leh a, "Nia, a lawmawm khawp mai" ka ti ve a. Kan in kawt kan thleng a, "I nu kha min lo biak dawn nia" a la ti zui! "I zâm si lo va e" ka ti nghek a. A nui hawk hawk mai. 

Tetea pa thawmhnaw ka hawnsak chu kan han phawrh a, a lawm thiam ve khawp mai, a inthlahrung lutuk chu ka lo khawngaih zawk. Ka nu pawn a be ve luam tawh a, "Naktukah home-ah chuan va indah luh tum ila, i nuteii'n va kalpui se la,. Zu ngawlvei thei i ni lo tih hrereng rawh. Fapa i nei a, i fapa hian i hnungzui se i duh miah lo vang. Home aṭanga i rawn chhuah hunah ruahmanna thar te pawh kan siam ang a, eizawnna te pawh i ngaihtuah chho ve ang a, nupui fel tak i la hmu thei a nia" a ti sauh sauh mai a. 

Tetea pa pawn, "Puii, in rilru ṭhatna leh ngilneihna hi ka theihnghilh tawh ngai lovang. Ni e, ka theihtawp ka chhuah dawn alawm,. Zu hi ka duh em em vanga in pawh ka ni lo. Jail aṭangin hlim em emin ka rawn chhuak ve a, ka nupui pawmlai ngeiin tiang khan min lo uiresan ta si a, kawng dang ka hre lo a ni. Thil pakhat ka hriatchhuah tak chu midang kan phatsan hian a hnuah phatsanin kan lo awm ve leh ṭhin tih hi.." a ti charh charh a. Ka nu nen an inneih lai rengin nuthlawi kha a fan san a, kan nufaa khawsa turin min hnutchhiah kha a nia, tunah neih engmah nei lo khawpin a nupuiin a phatsan ve leh a,. Nun inlumlet fô ṭhin khawvelah kan cheng tih hi hriatreng a va ṭha êm. 

A tukah phei hma ka ngaih avangin ka mu hma a. Zira hi tunlai chu min rawn be uluk leh thei riau mai. Thutak deuha chhan chuan a rawn chhawrthlapui nghal ruih zel a. Ka dawngsawng thiam ve hlawl lo. Ateii nen pawh kan inbia a, a bialpa nen an la ni tluang ve zel a, a ṭha e. Kei ṭhiante ngaina mi tak ni mah ila, thil pawimawh ni lem lova va be reng chi ka ni lo va, Ateii hi chu keima letling chiah, min ngaihsakin a khat tawkin min rawn be reng zel. Ṭhiantha te hi chu an chhiat ṭhatah tlanchhiatsan lo ila, a zawng azaa va biak sek hi ka mizia a ni tlat lo. Puih an ngaih hunah erawh an bula din erawh ka ṭhulh ngai lo thung. "Awii, mate, ka rilru a hah ve deuh a, tunlai chu maw..kan inhmu remchang thei bawk si lo. " A rawn ti a. 

"Engtin?" Ka va ti vat. 

"Ka la period lo" a rawn ti ta. 

"Inentir ta che. " Ka va ti a. 

"Mawli, chutiang lam a ni lo. Ka rai niin ka hria" a rawn tih chuan ka ka hau mai. Khatiang lam kha a rawn sawi ka lo ring miah lo va. "Ehe! In inti law?" Ka ti bawl a, thu han khuh ṭit ṭet thiam lo tih takah. 

"Ti ve ang chu. I â sia,. Thla 2 ka period tawh lo" a rawn tih takah chuan, "Test ta vat che, nge i nghah reng" ka lo ti hlur a. 

"Nia, naktukah hian test ka tum deuh a. Ka hlauthawng ê, ka nute hian min ring ṭha ve ropui sia maw. " A rawn ti a. A dik ang, Ateii nen hian sawi tawh angin kan inkawmna a rei tawh a, chhungkaw pangngai tak, a pa pawh kan kohhran chairman elect a ni a, a nu lah BKHP-ah Secreatry a ni bawk. Chulai karah Ateii pawh Programme Committee member a ni ve bawk nen,. A rilru tur ka hrethiam khawp mai. "Mahse, in tisual tawh a, a lêt pawh in tuar ve ang chu" ka va ti a. Ka khawngaih ve tho mai. 

"Ni e, ka rai a nih chuan inruk kan tum a" a rawn ti. Hriata a sual lo bawk a, ani chu a ngaihṭhatthlak alawm le. "Nia, result hre phawt r'u..i lamah ka ṭang reng aw" ka ti a. 

"Dik tak chuan chance kan nei zing sia, ka insum ve nasa. Amah pawh a ni tho,. Mahse, sual hi a lo chak êm a ni. Nang chuan min dem ka ring lo." A rawn ti a. 

"Dem reng reng lo ve. Ka hrethiam lutuk che alawm. Mahse, i rai lo a nih hlauh chuan tisual tawh lo u la" ka ti ve ngial a. Ka famkim bik lohzia ka inhriat avang hian zilhhau kual vak ka tum lo. Dar 12 dawn kan inbia. Mut hma tum nak alaiin, mahse, min mamawhtu hian ka mamawh laiin min tlansan ngai tlat lo va, ka tihtheih tawk ka tihsak ve a ni mai. Ka nu ka chah ngun bawk a, zing dar 6-ah min kai tho a, dar 7-ah Maliani te in thlen a ngaih avangin ka insiam nghal mawlh mawlh. Inthiar mawlh hi aw..mite anga awlsam taka inthiar ve theih hi a chakawm thin. Maliani lahin min lo call sek tawh, "Taxi i hmuh loh ka hlau sia, Vica ka rawn tir" a la ti zui! A tha vek mai e. A phur êm avangin lo phurpui mai tur ka ni. Victora pawh thophang zetin a rawn thleng a, a tûm vûau mai. A u-in a mutui lai a kaitho miau a. "Chuang rawh" a lo ti hmuk a, ngawi rengin ka chuang a, motor veivak an la tam over lo bawk a, kan thleng phei hma viau e. An lo insiam vek tawh a, nizanah mamawh zawng zawng an lo lam khawm tawh a, bangbawr takin kan kal ta a ni. Pu Zauva motorah bungrua leh Pi Lingi leh Sangi te an chuang a. Keini Maliani nen Maliani scooty-in kan kal thung. Keiman ka khalh nghe nghe. U Mateii te kan sawm phei a, naupangho chu a pute motorah an inhnawh a, U Mateii pawh chaw ei kham lama rawn kal tur a ni bawk. Victora erawh amah chauhin inah kan hnutchhiah a, kal ve tum âwmin a awm si lo va, a kal ve lo turah kan ngai. An huan chu Lawipu ramah a ni a, a hla over lem lo. Gate pawh a lo inkalh thlap mai. Kan tlan lut a, a hmun a zawl nuam si,. Kuhva leh nimbu bakah balhhla te, eng thei thei emaw an lo ding ṭhuau mai a, Pu Zauva hian a hlawkna a la tel dawn chauh a nih hmel. Huan lai takah thlam lian hek hawk, dap leh di hmanga sak ngat, ṭha tho si a lo ding luah a, a sir maiah tanky awmin englai pawhin tui a khawh liam pur pur reng mai. Engkim chu a felfai a ni ber e. Huan enkawltu an la nei chiah lo va,.mahse, nitin deuhthaw hnathawk an awm thung. Thlamah chuan lutin kan han insingsa fel a. Khum dawhkai zau angreng tak a lo awm ve a, namthlakah te chuan kan dak vang vang a. A dai nuamin a zo reih rawih hle. 

"Nakkum lam chu huan enkawltu hi lak a ngai dawn a ni. Saw lamah sawn vawk leh ar vulh ka tum si a. Bakah huan hi ven ve deuh a ngai tawh reng reng" Pu Zauva chuan phur takin a ti sur sur a. A hlim hmel chu hmuh a nuam kher mai. Tun ṭum zet zawng Pi Lingi nui hmel pawh hmuh tur a tam ve ta. Chaw ei lova kal kan nih avangin thingpui kan lum nghal a, an driver Dina a fel thar thar hle. A che zung zung mai a, Sangi nen an inhnial leh hlak hlak bawk ṭhin. Keini Maliani nen pawh huan chu kan fang dun a, an dil lah chu a zau phian mai a, sangha sen chi leh a dang an lim kual zek zek mai. Hmuhnawm tak an ni. An kuhva pawh a rah ṭhuah tawh hlawm. Thlam lama kan let phei leh chuan beisei loh lutukin Victora bike a lo ding run mai. Kan va luh chuan Lalvala nen an lo ṭhu ve kur a, min en bik lo va, ka melh lo lui ve ngar ngar. 

"Hawh u le,tui cheng turin i kal tawh ang u, inchiah daih a chakawm tawh alawm le.." Pa ber chuan phur zetin a ti a. Kan insiam nghal sang sang mai. An huan mawng chu lui lian vak lo a lo ni a, mahse, li pangngai ve tak, patling pil vel chenna tham a lo awm ve a, kei tui hleuh thiam miah lo chuan a hnaih pawh ka hnaih duh lo. A chhak li lian lem lo takah chuan Sangi nen kan inchiah dai a. Maliani erawh a ke bak a chiah duh lem lo. Victora leh Vala lah chu naupangchhia zetin an hleuh vei pap pap a, Pi Lingi pawh a rak ve teng tung mai. Kan hlim ti hian sawifiah ila a tawk mai awm e a. Chawhnu her a lo ni ta bawk a, ril pawh a ṭam chho ṭan dawn ta nen, kan inzui chho leh dam dam a. Eirawng kan bawlzui ta a. Vala leh Dina te an fel êm a, Sangi nen kan âwl phian mai. Namthlakah ṭhuin kan titi leh sap sap a, Victora chu ka hnung chiahah a rawn ṭhu vei chut bawk. Mahse, ngaihven lo angin ka awm tlat thung. Kekawrbul chhingtê leh tshirt lian hlep hlup ka ha a, a zangkhai vang a nia. Sangi titi tui lai takin, "I mal hi i hlim thui mah mah lo maw?" A rawn ti sur sur a. Amah pawh en chuang lo chuan, "A ho e, tumah mi hrang an awm lo" ka lo ti hlak. 

"Mipa pahnih dang an awm ve" a rawn ti leh a, an driver leh a ṭhianpa ngei pawh a thîk duh a nih chu! Êm em a na. Ka chhang tawh lo.U Mateii kha eng emaw rokhawlhna avangin a rawn kal thei ta lo hlauh a! A fate erawh an hlim phian mai, A pi Pi Lingi aiin a pu an zui tam a, Maliani an ngheng reng bawk. Pu Zaua te nupa leh naupang ten huan an fan hlanin thlam piah lawka phul hmun zawl zau angreng tak, daihlim hnuaiah chuan kan ṭhu khawm laih a, Victora chuan, "Truth or dare ti ang u" a ti a. 

"A ho e a" ka lo ti hlak. 

"Nia, ti ang u" Maliani hmel thutak ran ka hmuh chuan hlauhthawnna ka nei nghal. Thil ṭul tak a ni lo asin le. Vala'n bottle a va zawng a, hmu lo se ka duh tehlul nen a rawn khai phei nalh nalh mai. Kan ṭhu kual pap a, Bottle chu lehkhakhawng chungah dahin Dina'n a tuaivir chho ṭan ta a. Thu ho mai mai bak kan inzawh hlawm loh avangin ka hlimpui ve ṭan dawn chauh a, Victora thu min zawh hun a thleng ve ta tlat mai le. Chhungrilah zâm riauna ka nei nia mawle. Mahse, a lang apau chuan ka intizangkhai lui thung. 

Chiang taka min melhin, "Truth or Dare" a ti a. Ka rilru a buai ta hle, mahse, "Dare" ka ti ta a. A chhan chu Truth ka tih vaih chuan kan pahnih inkar vel bak a sawi ka ring lo a ni. 

"Min fâwp rawh" a ti ta. Ka rinsa thil sawi mah se a zahthlak ve duh lutuk. Phur lutukin Maliani'n, "A fawp ngam dawn em?" Kut ben pahin a lo ti a. Ka kut ka hum ruh a, ka tho nalh a, Victora bulah chuan va ṭhu hnaiin a biang tawn tawnah ka vuan sauh sauh a, an hmuh lai ngei chuan ka fâwp ta a. Mahse, a rei lo, kut an lo beng dar dar a, Victora hmui deh nawmzia erawh ka hre hman chu a nih kha mawle. Engahmah ngai lo ang tlatin ka awm thung. Chumihnuah thil duhawm lo zet a thleng leh ta a, boruak a thlak danglam chiang teh e. Maliani'n Victora a zawh hun a thleng a, "Truth" a thlan avangin, "Rinzuala thihnaah khan mawhphurhna i nei em?" Tiin Maliani chuan a zawt ta a ni. Chu chu a lo tumsa reng a nih ka ring, a mitmeng chu a de sawr sawr a, a hlauhawm lek lek thei. Victora pawh reivaklo chu a ngawi dat a. Kan hmel a thutak hlawm ropui si,. Chutah, "Aih, Rinzuala kha nangmah vangin ka hua a. Ka huatna kha a thihpui a nih chuan mawhphurhna dang ka nei lo ve" a ti nghet charh a. Thaw dêp dêpin Maliani ka melh a, a mitmeng chu a inthlak tial tial a, hul zeta nuiin, "Ka beisei" a ti ta sep a. Thil chu a dik dawn lova hriain, "Chaw ei a hun dawn, va inbuatsaih ṭan ang u" tiin ka tho ta daih a. Min rawn zui ve ta hlawm. Chaw pawh chu ka eizui nghal ta mai reng a. Maliani leh Voctora te erawh an ṭawng tawh reng reng lo, an ngaihtuahna an kawm melh melh ni mai hian ka hria. Tichuan, chaw eikham kan intihfel zawhah muangmarin kan haw ta a. Naupangte pawh tui an cheng nasa bawk nen, an chau viau ang. Maliani te in kan thlen chuan dar 5 a la ri lo deuh. Kawngka chu a lo inkalh lo va, kan luh rualin U Mama a lo haw tawh tih ka hre nghal. A chhan chu ṭhutkhawmna pindanah chuan hmeichhe pakhat nen an lo ṭhu dun tlat a tin ni. Chu nu chu Dampuii kha a ni hauh lo lehnghal,. U Mama nen an inrual khat loh pawn an inthlau lo hle ang. Sam sei hnûp mai, hmai sin leh hriam lam lek lek, thawmhnaw dawrâwm tak ha a ni a. Kan thlen hnu pawh chuan a awmdan a danglam miah lo. Pu Zauva te nen an inbiak bawrh bawrh takah chuan an hmelhriat ṭha takah ngaiin ngaihṭhat lohna pawh ka nei zui ta lo. Zep loh chuan ka chau ve khawp mai,. Tui chen hi chuan chauh hi a na ve ṭhin êm a ni. Ka la haw mai thei lo lehnghal a. Maliani jection hun nghah thlen tho ka ngai. Maliani chu a inbual zui nghal a, a chau ve ngawtin ka ring. Kei chuan jection hun ka nghak ta ngat ngat mai a ni. Ka nghak chhuak ve ta hram a, ka hmanhmawh viau chu keipawn ka hrethiam lo, mut ka châk vang a niang. Hawn tuma ka intintuah laiin Vica bawk a rawn lang leh a, "Ka hman tawh aw" a rawn ti ham ham mai. 

"Eng titurin maw?" Ka lo ti hû a. 

"Thlah tur chein " a ti bul hmuk. Pindan aṭanga kan chhuah chuan U Mama leh hmeichhia kha U Mama pindanah an lut dun mêk bawk. Victora chu ka hnial buai peih ta lo va, ka chau tawh bawk nen, a bike hnungah ka ṭhu leh ta vung mai. "Tu nge U Mama lo awmpui kha" ka ti a. Ka hre châk ve mai mai,. "U Mali a nih kha" a ti a. 

"In chhungte mi?" Ka va dilchhutin ka buai lohna turah ka va buai peih tak. 

"Ni lo" a tih hmuk avang chuan ka zawt zui ngam ta lo va, keimah pawh ka inhau mawlh mawlh mai. Tu pawh lo nise keia lo buai vena tur hi a awm lo chiang êm a ni. 

"Ka rawn leng nghal dawn" a tih ri-ah ka inthingharh vat a. "A ṭul lo" ka ti nghal vat. 

"Ṭul ka ti alawm" a ti dam thlup a. Hnial theih ka inrin loh avangin, "Ka chau êm mai, mut nghal ka châk lutuk a" ka ti ta a. 

"Aw le, chau ang. Mu nghal ang che." Thupe aw bawkin min ti leh tawh. Tu nge maw nia a inhria le? Chhang buai tawh lovin ka chhuksan ta daih a. Ka nute pawn chaw an lo eikham deuh chiah a, Tetea pa chu Ngawlveite rûn-ah an lo dah lut a lo nia. A rawn ṭha chhuak turah ngai ang. Ka inbual zawhah mut mai ka tintuah laiin Zira te an rawn leng tlat! Ka va tûm lian tak, an bulah tihlan a rem si lo. Ka chauhzia leh mutchhuahzia chu aw. A ṭhianpa Samuela lah chu tlema huihphai kan tih ang chi, sawi awm leh awm lo pawh hre vak lo a ni bawk nen, "Tetea nen hian in pa a hrang tiraw?" Tih angreng chu a sawi duhzawng a ni roh a. Thingpui an in zawh hnu lawkah Zira pawn ka awmdan chu a hrethiam nge hawn a rawt ta vat a, ka thaw huai mai. Chelh pawh ka chelh khawmuang lo. Mut nghal tumin khum ka pan nghal a. Kan in a zau tawh avang hian mutna pindan pathum kan siam ve tawh a, ka nu leh keiin room kan la inṭawm a, Nuteii te nufa leh Tetea te a hrang ve vein. Ka mu deuh chiah tihin ka nu chu Putea'n a lo call a, speaker-a a dah avangin ka hre lo thei si lo. "Hei kan intifel thei dawn hnai a. A buaithlak khawp mai. Kan pawisa neihsa hian a la daih lo nasa bawk si a,. Kan nu chuan kan in kha hralh mai a rawt a. Rilru putdan neih thiam a harsa khawp mai" a rawn ti nia! Muthmunah ka lo thinur ve hlur mai. Ka nu pawn a ni em em tawh lo a ti nge ni, "A va zakthei lo ve, ka nu leh pate lu phûmna hi kan phalna tel lo chuan i hralh awzawng lo vang. A thuhrimin Lawmi lo pawh fapa pahnih in nei a, nakin zelah engtin nge awm se i tih a? Hralh ta la, in lo hawn hunah engtin nge in awm ang? " A ti vin ta ṭhak ṭhak a. A hlau duh tawh bik lo a niang. 

Putea lah chuan, "Ka pite in hnuai hi a ruak a, kan luah ve rih mai dawn mawni ka tia. Ka hrethiam tawh lo" a ti nuah nuah a. Pi Biaksangi zem âtin a awm a, a ngaihna a awm hlawl lo. Ka nu chuan, "Ka u, kei leh Apuii pawisa pawh eng emaw zat in puk a, engtia min rulh nge i tum? Biaki pawh kha chen a sumdawng a, pawisa chu a khawl ve em em ang, a account in khawih che reng reng em?" Zawldawh deuh zawk hian a ti a. 

Khuh kharh kharhin, "Aa..khawih che chiah lo, nakinah kan inenkawl zawhah kan la mamawh dawn a tia. Rilru hi a hah khawp mai" a ti a. 

"I in i hralh chuan pawisa kha hetah kan lo la nghal ang, kan pawisa in puk kha. I thu thu a ni e. I nupui i ngam loh a leiah i fate nen in la rethei dawn a nih kha. " Ka nu chuan a ti ta hmak mai. Bathroomah a luh daih avangin an thusawi dang ka hre zui ta lo. Khawvel hi chu aw, hmun pakhatah hlim ṭhin viau mah ila; Hmun pakhatah chuan buaina a inṭan mek a, hmun ṭhenkhatah harsatna hneh harsa takin min tuam bawk a. Nun hi a harsa fô a, zir zawh a awm thei lo chu a nih hi maw..

Sunday a ni bawk a, ka tho tlai leh tawh. Sunday kha chu Pu Zaua ten chawlh min pe ve a, Maliani pawh an veng chhunga nurse pakhatin vawiin na nâ na chu a lo buaipui dawn a ni. Ka thawh chuan Nuteii'n a bawngsa kawchhung siam chu a lo chan mek a, a siam tui leh dawn e. Chaw pawh puar takin kan ei tlang e, ka insiam nghal a. Ateii ka lo nghak. Niminah khan min rawn be miah lo va, kei lah ka lo buai ve nen, nizanah lah ka va text a, tukin thlengin min la reply lo. Ka nghah thlawn ka hlauh avangin ka call ta ringawt a,. Rei fê hnuah a rawn la a, a rawn nui vak ringawt. "Hmeli, nge min reply duh loh" ka ti nghal chat a. 

"Awii, kan buai lutuk a, kan zin chau nen, lo call che ka tum tho alawm. Hetah Cherhlunah Hriata pite bulah kan awm daih tawh" a rawn ti ta mai. 

"Ehe! Ti nge min va hrilh har ve a. In mak ve maw" ka ti hluai a. 

"Rawn hrilhna hman che a awm lo, ka intest a, result kan hriat rualin hmanhmawh buangbârin kan tlan dun nghal daih alawm. Inkhawm phawt rawh, banah hman tawkin inbia ang" a rawn ti lang lâng a. A thawven hmel phian bawk sia. A ṭha reng reng e. A rai tihna a nih chu! Kei hian tu tak pasalah nei ve ang maw? Ateii chuan a nei dawn chu a ni ta phawt a. Kei chu ka la laklawh kual vel vek chu a nih hi maw..

Inkhawm pawh Ateii tel lo chuan a nuam lo e a. Banah ka hman bawk a, ka mu deng deng. Maliani pawn min la rawn be lo,. Victora a reh hmak bawk. A ho ê..Ateii nen rei tawk kan inbiak hnuah Nuteii pui turin ka intiharh ve ta chauh a. Zanah ka inkhawm ve leh hram. Ban veleh ka inthlak a, Story chhiar tur zawnga ka phone ka bih ngat ngat lai chuan kawngka an rawn kik dat dat a. Lo lut tura tiin ka va hawi chhuah nâk chuan Victora a ni reng mai. Engmah a rawn sawi lâwk bawk si lo. Nuteii chu tv enin a ṭhu a, Bawihtea leh Tetea te chu roomah. Ka nu damlo kan a lo la hawng lo thung. "Lo ṭhu rawh" nelawm vak loh hian ka ti a. Inringtawk zetin ka bulah tak a rawn ṭhu chat a. "Nge i rawn tih dawn?" Ka ti a. 

"Ka rawn rim dawn che" a ti a. Nuteii hi chuan phung a thlu êm mai a, a lo be leh chul a, Vica pawn fel a tih thu a hmain a sawi tawh nghe nghe. Ka nu lo haw hma ngeia hawntir a ngai dawn a nih hi. 

"Nute, mu miah suh aw. Ka nu lo haw hma chu, ka nu a den thei si" tiin a rukin ka va text a,. A rawn nui chur chur ringawt. Victora chuan, "Ka û a khuahar khawp mai" a ti a. "Nia, vawiin chu ka chawl ve a" ka ti mai a. 

"Khaw nge i nu?" Zawitê hian a ti a. A zâm ve deuh em mawni. 

"Damlo a kan a, a lo haw hmain haw ang che" ka ti a. 

"Chuzawng ka thu thu" a la ti zui. Rum zet hian ka melh a, a khi suk ringawt. "A ankhum ang che. A tha lo" ka ti a. Ka hlauthawng a ni. 

"Ka hlau ve hleinem" a ti zel bawk si. 

"Thingpui ka lum che ang a, in zo la, haw rawh aw" tlawn titih hian ka ti a. A ngawi reng. Thingpui chu ka va lum a, Nuteii nen ka pe zo chiah tihin ka nu a rawn haw ta. Victora a hmu chu a phâwk ve deuh naa a insiamrem leh vat. Mahse, hlim hmel erawh a pu hauh lo thung. Nuteii bulah a thu ve chat a, "Khaw nge Tetea te" a ti khawmawi a. Nuteii'n a lo hrilh vat. Kan lam chu rawn hawiin, "Kha..Voctora chu i rawn leng a ni maw? Thil pawimawh a awm em ni?" A ti ta chiah a, ka lo îp châwih. 

"Awm hran lo ve, Hruaipuii ka rawn rim a." Pangngai takin Victora chuan a ti a. 

"E! Chutia sawi takah chuan mate, Zira khan rawn len a tumin ka hria,.inkhawm ban rualin i lo haw daih a." Tiin min rawn en daih a. Ka sa zak hman, mahse, ka nu a nihna laiah, "A lo leng dawn lo a niang" ka ti chhum hmak a. 

"Victor, i chhungte an dam a maw?" Ka nu bawk chuan a ti leh a. An dam thu a hrilh ve var. An hnena hnathawk reng ka nia, chutiang te chu a hre vek,. Engtin emaw tak ṭawngkhum a tum tih ka hrereng. "U Mama te kha an inru mi?" Tiin titi dang ka vawrh ta daih a. Vica chuan thutak fê hian, "Chutiang vel chu" a ti ringawt. Thil hi a sawi chiang duh ngai bawk si lo, ninawm. 

"Chu! I û pawh a nupui a ṭhen chauh a, nupui dang a lo ru leh hman a maw? Hmm..a mak hle mai" ka nu chuan engtin nge chutianga ngeiawm taka ṭawng chu a lo thiam ka hre miah lo. 

"Ka la chiang bik lo" Vica lah chuan a ti ve mai bawk a. 

"In khata cheng nisi chutiang thil han hriat loh pawh chu..chhungkaw mak tak chu in ni vein ka hria." Ka nu chuan a ti leh hlang hlang a, ka ngei ve tawh lutuk a. "Nu, i ho êm mai, kan chhungkua ang vek hi an ni lo tih hriat tur" ka lo ti vat a. Victora erawh chu hrehawm tihna emaw nuam lo tihna nei lo niawm tak hian a dam thlup reng a. A inthunun thei khawp mai. 

"I bân i chhut rân kha ka lo hmu ngai miah lo,. Awii, i taksa pawh a lang hleithei lo chu a nih kha mawle, a na lo mi?" Ka nu chuan min ngaipawimawh miah lo hian a ti leh a. Ka melh no lo tawh khawp mai,. Nuteii pawn mitmeia khap a tum ve nasa, a tu amah chu min ngaihven lo hrim hrim, Victora mize hmasa kha cho chhuah a tum ni berin ka hria. 

"A chhut lai chuan na ve bawk e. " A zawhna chiah chiah a chhang leh tawh. Zawite hian,"Haw mai rawh" ka ti a. 

"Aih" a ti nghut ringawt. 

Tichuan, ka nu chuan ngeiawm rawngkai tel chiah tawh lo hian, "Vica, tak tak ana, ni e, Mateii nen in inkar engkim ka hria a, mahse, a nu ka ni a, ani hi ka fanu neihchhun ka innghahna a ni. Kei hi ka vanduai tawh a, mizo society-a thil zahthlak zinga an sawi fa pahnih a pa te hran ve ve ka pawm a. Hmuhsitna leh diriamna tam tak bakah retheihna te ka lo hmachhawn tawh. Ka fanu hian ka sulhnu chhui ve lose ka duh a, Pathian hnena ka dil tam ber pawh pasal ṭha tak,nangmah ṭihtu pe ang che tih a ni ṭhin. Mahse, ka beisei loh lamah nang nen intawngin tiang hi in lo thleng ta a. Kei chuan in inzui zel hi ka remti tawh lo a ni. Ruihhlo ti ṭhin i ni a, i pianthar thu lah kan hre hek lo. Ruihhlo tih loh ringawt hi piantharna a ni bawk si lo va, tunah lo felin lo insiamṭha tawh viau mah la, i nunhlui zawng zawng hrereng chung leh in chhungkaw inrêlbawl dan hre chung chuan ka fanu hi ka neihtir thei lo che a, ka rilru hi ka sawhsawn pawh ka ring hek lo. Ka duhna lamah chuan tawhkhirh ve deuh mai ka nia. In ina a la thawh theih chhan pawh nang nen inṭhen tawh anga a insawi vang a nia, mahse, in khata in la chendun fô chuan boruak a la awm lo thei lo tih hretu ka ni. Chuvang chuan i û saw i hmangaiha Mateii enkawl i la duh zel a nih chuan ka fanu hi hnaih tawh lo la ka duh a ni. Hei hi ngenna angah min ngaihsak thei la ka lawm viau ang. " A ti ta charh charh a. Ka chil ka lo lem khawlh ringawt. Thawm chu a reh duk a, Nuteii chuan min khawngaih hmel deuhin min lo melh vawng vawng mai. 

Victora thaw hawk chuan thawmvâng reh duk chu a rawn luahkhat a. Ka nu chu va enin, "Ni e, ka pi, i ngenna chu a zahawmin a puitling khawp mai. Mahse, thil pakhat chiah ka sawi min phalsak rawh aw. I fanu chu i thunun thei a ni thei, mahse, kei chu min thunun thei lo. Ka thinlung leh rilru ngaihtuahna hi keimah ngei pawn ka thunun thei tawh lo. I fanu hi ka hmangaih a, nupui atana neih ngei pawh ka tum a ni. A tan i duhthusam ang tak pasal ka la ni ngei ang tih fiahna hi ka la hmuhtir ngei ang che. Ka nunhlui chu keipawn hriatreng ka duh tawh lo asin. Hruaipuii hi ka bansan dawn lo, i ngenna ka tihhlawhtlin theih loh avangin min hrethiam ang che. " A ti ve ta nghut nghut mai. Boruak chu a ṭang at mai a,. Awmngaihna reng ka hre lo. Ka nu lah chu a ngawi hmuk tawh bawk si. Vica chu a che ta hrut a, "Hruai, ka haw phawt ang. Boruak ka rawn tinuam lo vek a, ka tihpalh. Mahse, ka siamṭha vek ang" tiin min rawn en a. Chuta a hmela tumruhna leh luhlulna chuan min hneh ta em em mai a nih chu! Ka induhtawk vena leh ka nu ka ngaihpawimawh vena te pawh an bo ta diak ni hian ka hria, mahse, ka la ngawi reng tho a, kawngka bul thlengin Nuteii zawkin a va thlah ta a nih kha. A rawn let leh chuan, "Ka u chu aw i timak ṭhin ka ti. Khatiang em ema ṭawngkhum a ngai em ni? A thuhrimin Zuala thusawi i ring em em ringawt a, ani khan dâwt pawh a belh nual thei. I mak lutuk, tiang tur kha a ni lo" a ti malh malh a. Ka nu erawh a ngawi reng. Kei chu mu turin pindan lam ka pan a, mahse, "In la inṭhen miah lo a ni maw?" Ka nu aw chu a chang kher mai. Ka ding châwih reng a. 

"Ṭhen" tih chauhin ka chhang. 

"Ani kha i lo hmangaih hman em ni? A hmeichhe kawp tam zawkte angin i lo inchul nêltir tawh zawk em ni? Min chhang rawh." Ka nu aw chu a ring lo, a hlauhawm em em tho si. Mahse, a thisen, thla kaw chhung a pumchhunga a pai a fanu kha ka ni ve miau a, ka zâmna te dah thain ka hmachhawn a, "Victora nen hian vawikhatmah kan la mudun lo. Tin, ka hmangaih em ka la chiang lo. Ka hmangaih a nih pawhin a mak lo vang. Hmangaih theih tur mipa a ni miau a." Ka ti ve ta fak fak a. Ka nu mitmeng ling phat chu ka haider hram hram a ni. 

"I nu thu i hnial ang maw?" Lungchhiat hmel lek leka a tih chuan ka nem leh deuh lawi si. 

"Ka hnial che a ni lo. Kan inṭhen a, mahse, ka hrethiam lo. " Ka ti ta ringawt a. 

"Va mu rawh" a ti chhum hmak a, keipawh pindanah ka lut nghal hmak bawk. Muthilh erawh a harsa turah ngai u la, Victora lah chuan eng msg mah min hnutchhiah der bawk si lo, va biak hmasak ka duh bawk si lo. Ka awmdan hi a hrehawm, ka lai kual vek tawh. A chang leh ka nu lamah ka ṭang a, a chang leh Vica lamah. Thutlukna diktak ka siam thiam theih nana Pathian hnena finna ka dil lo kha a mak pawh in ti maithei, mahse, hetiang hun khirh ru deuh tawh lai hian Pathian kan va ngainep lam ni lovin setana hnathawh vang nge ṭawngṭai hi a lang mawh riau! Mi piangthar te chu an tlulut ngei mahna le..

Phak chuapin ka tho a, nizan thil thleng ka hrechhuak nghal. Ka mood chhiattir loh hram erawh ka tum nasa. Ka nu chu dawrah a lo kal tawh a, Nuteii'n , "Nizan kha chu engahmah ngai suh. Ka lo hrilhfiah ve ang, i nu hi chu a mak lutuk ṭhin a. Victora ka khawngaihzia kha..a zak ve ngawt ang" a lo ti nghal bawrh bawrh a. 

"Hrilhfiah a ngai lo, Nute, a rilru a sawhsawn chuang lovang. Mahse, hetia langsar deuha a awm zel dawn chuan ka rilru a hel ve daih thei" ka ti ve ta nge nge a. 

"Ni chiah e, Tupawn nunhlui kan nei a, bakah siamthat theih loh mihring an awm lo. Zawng zuala vang vek a ni, thil ni lo pui pui a sawi a, a rui kamnam hmelchhe lutuk kha" a ti leh hlaih hlaih a, a duhthawh ve thei sia aw. Ka nui tawp. Chaw pawh tihtham ka ei meuh lo, a harsa tlat. Tka ka bia a, min lo lam a, Victora te in lam kan pan leh ta a. Nitin hna ngai reng thawh pawh ngaiah ka neih tawh mai bakah boring tih chang ka nei. 

U Mama lo hruai hmeichia kha ka hmu leh ta miah lo. Engmah an sawi zui tawh miah bawk si lo va, kei ang bawkin Sangi lah a lo bangbo bawk. Kan tihtheih hi a tlem dun ṭhin teh e. Tin, sunday zana Vica lo leng kha a tukah Gauhati-ah a lo zin daih! Maliani ka aṭanga ka hriat a ni thung. "Mamawh zu lam pahin kar 2 vel ka zuk châm ang e" tiin a lo zin daih a lo nia. Tuman an dang lo bawk. U Mama te chungchang erawh Maliani takngial pawn a sawi duh lo, a hriat ngei erawh a rinawm a, thil sual lianpui an ti leh tawh a nih ka ring. Victora han awm ta lo tak tak hrehawmzia ka tem chho ṭan ta chiah a,. An in lianpui chu bungraw manto pui puiin khat vel vek mah se; a ruak..! Ni e, a ruak a, hawina lam apiangah Victora hmel hmuh ka tum a, a awm si lo. Vawikhat phei chu a rukin a roomah ka lut tawp nghe nghe, a lo fai hun ringawt. Phone-ah pawh min rawn biain min rawn text bawk si lo. Ka zep lo, awmngaihna tak pawh ka hre lo a ni ber. Victora hi ka lo duh thûk hle tih erawh ka chian phah ta thung a ni. Tuma bulah ka sawi ngam bawk si lo. 

A zin aṭanga kar khatna chiah zanah min rawn call ta thut mai le..khur der der chungin ka la a. "Min ngai tiraw?" A rawn tih chuan ka phone ka hum nghet kher mai.