Amah leh Kei 10

AMAH LEH KEI..(10)

Ziaktu : Toni Râlte

"Awm lo ve" tiin ka kalsan ta hmak a. A nui ve huk chu ka hria, min elsen kual vel chu a naupangchhia ka ti lutuk tlat. Julie a kawp leh nghal mai thei te hlei hlei chuan ka inchhir tur ang pawn min inchhirtir thei lo. Mihring rilru nghet lo deuh, thil eng emaw a thlen vanga danglama petek zung zung chi hi ka ngaina ngai lo. Victora pawh chutiang mi chu a lo ni tihna a nia,. Chuvangin kan inṭhen chu a ṭha zawk daih. Eirawng kan bâwl a, ka pui ve mai zel hi min phût vang pawh a ni lo, engmah ti lo va awm mai mai kha ninawm ka tih vang zawk a ni. Tukṭhuan chu Maliani pawh kan bulah bawk a rawn ei leh a, boruak pawh a nuam angreng viau mai. Victora nen kan dinhmun an hre pawp ta sa sa a, han inthupa inzêp ṭit ṭêt a awm lo bawk nen,. He lai takah hi chuan chhungkaw rilru zau tak an ni ve leh tlat lawi si! An mizia hi ka hrethiam thei ngai dawn lo a nih hi. Mahse, enliam ve tawp zel ila a ṭha a ni mai. Chaw ei kham hnu reivak loah Sangi pawm Victora thawmhnaw chu a han siamsak a, khawiah nge a zin dawn ka hre miah lo. Mahse, Vica dawra a kal lawk hlanin a nuin, "Kha, in boruak khatiang kha a ni ta si a, zin bo rih mai a tum ta a nih kha. Khutah a nite bul Gauhati-ah zuk châm rih vang vang se, a rilru pawh a ziaawm chho mai ang." A ti ta a. Gauhati-ah Julie a hruai ve dawn tihna maw?! Chu chuan mi la kap run tlat. Mahse, ka sawi duh lem lo. 

"A pawi ngawt mai, keimah vang vek a ni. Tihtheih ka nei bik si lo va" ka ti ve a. Ka inthiam lo tak tak hran miah lo chu ka chapo vang pawh a ni maithei. 

"Nangmah vang ni lo ve, a bul chu amah vek alawm. A nunhlui kha sawi tlak a awm lo ve bawk êm a ni." A ti ve melh melh a, Pi Lingi a ang lo tawp. 

"U Mateii te lo inṭhen ve leh zel nen, rilru a hrehawm" ka ti ve duah a. 

"Khalam kha chu ngaipawimawh suh. An inpum tawh lovang. Kan fapa thiam loh vek a nia,. Tihtheih kan nei lo a nih hi." A lo ti leh thliam a. An inṭhen chhan taka ka ngaih Dampuii nen chuan inneihtir law law se a pawi vak pawn ka ring lo. 

Victora pawh a rawn lêt tawh a. Dar 3 velah an chhuak dawn a niawm e. Maliani'n a ei châk bawk a, theihai ka bâwl sak a. Chi chu a tlem deuh avangin zuk la tura in hnuai ka panthlak chuan in hnuaiah a nu nen an lo inbe mek, "Julie kher hi chu kawp tawh lo la ka duh. A hmangaih che emaw hmangaih lo che emaw" Pi Lingi'n a lo ti hlak hlak a. Victora chuan, "Min rawn biak avang khan ka kawp leh dawn tihna a ni hleinem. Harsatna a tawk a, ka puihna a rawn dil a, puih ka tum ringawt" a lo ti liam puat a. Awih tur nge awih loh tur pawh ka hre lo e a. A nu pawh a ngawi zui ve daih. Ka zuk thlen chuan Vica chu a kalsawn nghal daih. A zin daih dawn sia, a ngaihawm ve riau maithei a ni. Mahse, heti ṭhêm ṭhûma awm ai chuan hetia a kal bo tur pawh hi a ṭha tho mai. A chhuah hmain a inei puar a, Julie lahin a rawn call sek tawh a niang,. A bag nen a inak chhuak ta a ni. Kamkhat mahin inthlahna thu pawh kan sawi lo. Zêp nâk emaw a han chhuak chiah chu in pawh a ruak huai hian ka hria. Zanah ka riah leh dawn tho avangin inthlakna lak pah chhuanlamin ka haw ve zuai a, ka chhungte pawh an ngaihawm ve tawh reng reng e. Hlawh ṭha viau mah se; chhungte hmu thei lo va awm chu a nawmna pawh ka hre lo. Nuteii a lo haw tawh a, min hmuh rual rualin, "Awii, i putea te ka ninzia hi. Vellore aṭangin min lo ṭah awh leh a, ka pawisa khawl sa ka thawn leh ringawt. I nu lahin a nei tawh bik si lo, ka hne lutuk" a ti tûn tûn mai. 

"An va ninawm tak ve mawle,.loan te pawh puk ve mai tur alawm, an rul leh awm tawp si lo che a" ka ti ve hrep a. Ngei sa tawh nen, an laka rilru tihṭhat hi a har ve êm a ni. "Kei a hmeithai zawk min purbuai reng chu a nih hi, U Biaki pawh kha chen a sumdawng a, a inkhawl ve îm êm ang, kan ta hman hrim hrim kha an duh a ni mai." A ti leh hlaih hlaih a, ka hrethiam khawp mai. Ni e, an ina kan khawsak lai pawh khan piteii te nufa khan kawr thar emaw pheikhawk thar emaw an nei deuh reng zel a nih kha. An sumdawnna kha a tluang bawk a, hetiang hun atan te hian lo inkhawl ve tur a nia. Mizo te chu han inhrilhfiah dawn ila retheihna thu ngawt kan chhuanlam a, rethei tak tak, nitin eichawp zawng chu an awm tehmeuh mai. Mahse, an zingah pawh rilru nei deuhte chuan ni khatah 50 te an dah ṭha a, vawikhatah cheng sang chuangte khawl kan tum ṭhin hi a dik lo, teirei peih leh inren thiam, savings ngaipawimawh apiang te hi hetiang natna avanga phai lam emaw panpui an ngaih pawn midang an pur buai dan a nêp nge nge. Putea pawh a hmingin sawrkar hna chhete a thawk ve a, a nupui lah a sumdawng a, nei ve tur chu an ni. Ka inbual ta daih a, ka zai pah rat rat bawk. Tetea school bang a rawn haw tih Bawihtea nen an ṭawng lâng lâng danah ka hre thei. Ka inthlak laiin ka nau chu ka bulah a rawn kal a, "Û, vawiinah Apa ka hmu a, zu a rui lutuk, a bal bawk sia, ka zak tak tak a ni" a ti mual mual a. A pate hi khawi vengah nge an awm kan hre thei chiah tawh lo, an insawn kual ve chhên a, ka nu aia a thlan zawk nen khan an la innei ve zel chu a niang a. "A.va zia lo ve, i bia em?" Ka lo ti var a. 

"Min hriat loh hmel lutuk a, ka be ta lo mai. Bakah ṭhiante nen kan ni sia, ka zak a" inthlahrun hmel tak hian a ti a. 

"E! Tea, min hringtute chu eng ang mi pawh nise zahpui ngai loh tur aw. An tluang ngai lo an tia, bakah amah lo pa dang i nei tawh dawn hleinem." Tiin ka lo zilh ve zuk a. 

"Aa..nu leh pate pawh faten an zahpui tur khawpa awm kher a ngai chuang hleinem" a ti ta khauh a, ka dang deuh,. Mahse, "A ni tho a, chutihrualin kan lei pathian an nihna laiah engtin pawn awm se zah thiama hmangaih chu an phu alawm. I pa pawh chu be tawh ngei ngei rawh" ka ti ta a. Ka nau sawi kha a dik lo miah lo, chutihrualin nu leh pate hi an hlu êm mai a, keipawn hmanni lawkah reitak ka hel ṭhin ka pa ka chân a, a han boral chiah khan pa ka lo mamawh ṭhinzia ka hrethiam chiah. A theih chinah tal chuan kan nu leh pate hi tuamhlawma zahthiam hram hi ṭha ka la ti fan e. 

"Chuan, ih, U Victora ka hmu a, nula nen an kal dun" a ti leh daih a.  

"Khawiah" ka ti ve mai a.

"Damdawi in thlangah sawn a nia, nula chuan a kai a.." a ti leh nuah nuah. Kan inṭhen boruak vel engmah a hre ve lo a ni. "A bialnu thar a niang" ka lo ti sam êt a, "In inthen mi?" A ti hû. Mak a ti hle tih a hmelah a lang thei. 

"Ṭhen e. Kan inṭhen alawm" ka ti zangkhai vah. "Mahse, a van nei leh hma awm"..ngaihtuah nasat hmel deuh hian a ti leh a, ka nuih a tiza deuh. 

"Nang, Esi nau nen chuan in la ni em?" Ka ti a, "In ninawm. Kan ni lo, bialnu ka nei dawn lo. A zahthlak" a ti hlur mai. A sawi ringawt pawh a zak tih a hmelah a lang thei. Min chhuahsan ta daih reng a. Maliani ka ngaihtuah deuh tawh avangin ka che hmanhmawh deuh, Nuteii behlawi bai ka tem hram. Ka nu ka tlawh zuai bawk a, Victora zin tur thu te chu ka sawi a, "A ṭha alawm, i tan pawh inven a ngai dawn lo va" a ti sam êt mai. 

Two wheeler taxi hman mai tur a vâng riau mai a, kein ka kal ta phawt, Vanneihthlak takin Zira a rawn tlan ta hlauh a, a nî te inah a kal dawn a ni. Ka kalna tur nen a inan tho avangin min sawmna chu ka hnar phal ta lo. Ka hnathawhna hmun hriat ve a châk hrim hrim avangin Maliani te in kawt thleng min thlah ta a, Bike aṭanga ka chhuk rualin gate bula Victora lo ding rum ûl chu ka va hmu nghal, mahse, inthunun tum takin Zira chu lawmthu ka hrilh mawlh mawlh a, a tlan hmain, "Zanah ka rawn bia ang che" a rawn ti lûng lûng. Kan invailiam ta a. Gate kal pelh chu a huphurhawm ru ta riau mai, zin tur kha a ni sia, ti nge hetah a lo awm leh le..chak zetin ka phei a, gate ka hawng a, ka kal leh tur chiah chu ka bânah a rawn vuan ta chat mai. Hmalam hawiin ka ding khawng ve reng bawk. 

"A la hma mah mah lo maw?" A ti sup a. A sawi awmzia ka hrereng, "Eng chu maw hma?" Ka ti ve ta ngat a. 

"Ngaihzawng neih nghal hi mawle" a ti leh nghut a. 

"Chute chu ka thu thu alawm, ka duhthlanna min zahsak a ni lo'm ni?" Ka ti ve leh ta khauh a. 

"I nghal ṭha ve maw?" Tiin a khi suk a. 

"Min thlah teh, Maliani ka ngaihtuah tawh" tiin ka bân chu lakthlak ka tum a, a hmer na ngang mai. 

"Ka mithmuhah mipa be lo la, kalpui lo bawk ang che. A chhan chu ka inthunun peih lo" thupe aw fê hian a ti a. Min thlah zui nghal bawk, chhang tawh loin ka pen ta hmawk hmawk a. Maliani pindan ka pan nghal. Jection a hun dawn tawh bawk a, ka buatsaih nghal a. Ani erawh a lo intifai ve a niang, fresh varin a lo ṭhu a, a phone a lo hmet ve mual mual mai. 

"Victora khu ti nge a zin leh loh?" Ka ti a. Ka zawt hreh em em tawh bik lo. 

"Ka hre ve miah lo." A lo ti liam puat. Ka jection zawhah Sangi pui turin in hnuaiah ka chhuk ve leh ta a. Sangi pawh Vica zin loh chhan ka zawt leh a, a hre bik lo. "U Julie a rawn hruai a, i rawn thlen hma lawk khan a haw chiah" tih zawng a sawi. Ka sa deuh pupin ka hria, Julie a thlah zo vel a ni maithei gate-a a lo awm kha. Ngawi rengin ka che zui mawlh mawlh a, Kan inbawl fel thawkhat tihin Pi Lingi a rawn kal a, "Chaw kha chhuan belh a ngai maithei. Mama ṭhianten chaw an rawn ei ve leh dawn sia, Pipi, lo tlawmngai tluan hram mai ta che" inthlahrun hmel deuh hian a ti a. Ani pawh hi a natna fak sawi tur awm si lo hian a cher em em tawh a, a tlahniam zel ringawt. Biopsy pawh an test tawh, engmah an hmu bawk si lo. Amah pawh khan cancer kha a inring ru ve deuh kha a nia, mahse, result an va lam khan engmah a lang bawk si lo. A mak ngawt mai. 

"Aw le, a harsa hleinem" ka lo ti ve var a. A tawi hrat a, "Vica lah kha a ṭhulh leh ringawt a, ngati nge mawni?" A ti fân raih. 

"Ka hre bik miah lo" bangbo takin ka lo ti a. A nu bulah pawh engmah a sawi lo a nih hmel. U Mama ṭhiante chu pathum an nih ve avangin cooker tê-ah chaw chu kan chhuan belh leh a, chawhmeh erawh an hmeh chhe ngai lo hrim hrim a, siam belh a ngaih loh hmel. U Mama te rawn thlen hmain Maliani ka han hmu leh a, "Lo chhuk ve leh rawh aw. Kha i ṭhat chak êm kha" ka ti a. 

"Nia, mahnia ei chu a tui lo thei êm alawm" a lo ti ve a. Vawiin phei chu nidang aiin a harhvâng a, han ngaihsak vak pawh a ngai lem lo. Pu Zauva lo hawn hnu lawkah U Mama te pawh an lo haw a. "Ei hmasa u la, in ei khamah kan lo kil ve nghal mai ang" a tih avangin Sangi nen chuan kan siam nghal mawlh mawlh. Victora pawh a rawn kil ve,. A pain a ṭhulh chhan a zawh chuan, "Buaina tlanchhiatsan kher chu a mipa hna lo êm a, ka rawn kir leh daih" a la ti zui! Ka tum nghal bâr mai. Maliani'n, "Naupang inkhualtelem in ang mang e" a lo ti zauh a, chu chuan boruak a tinuam ta deuh. Pu Zauva pawh chuan, "Engpawhnise, Mateii hi han zia chho se la, kan la picnic dawn nia, kan huan pawh a nuam tawh viau a nia. I patea te chhung kan sawm ve bawk ang a." A ti chuar chuar a. Maliani thusawi ka hrechhuak zawk,. Victora nun chhiat hma leh Maliani la dam ṭhat lai kha chuan chhungkaw nuam leh inpawh tak an nih ka ring, mahse, harsatna buan tur hi kan hmachhawn fo lo thei si lo va, chu chu an buan hneh bik lo niin a lang. Chhungkaw nuam hi chu vanram tem lâwkna a ni chiang a ni. 

"A va thak e, Hruaipuii siam a ni ngei ang" Vica chu a khuh nghal tuar tuar a, Maliani'n hmarcha a ngam êm avang hian bai emaw vaipaden emaw ka siam hian ka thak duham deuh ṭhin a. Bean leh vawksa rêp ka vaipaden kha a lo ei ve ngei a nih hmel e. Tlangval pui si, hmarcha pawh ngam loh. A hmai pawh a sen vek alawm..Sangi a nui tet tet mai. Kan eikham rualin U Mama te pawh chuan an rawn kil ve ta nghal a, An zu rim chu ka hre nghal chat mai. An palian hlawm phian a, bakah an changkangin an zahawm khup hlawm. Sangi nen kan vil pah deuh a, an tlangval lai vel te an sawi danah nupui nei vek tawh an ni maithei a ni. Engvanga rawn ei khawm thut nge maw an nih dawn ni. 

Kan intihfel hnuah Maliani nen, Sangi te nen in chungah kan chho a, pangpar te chu kan en kual vel mai mai. Boruak a nuam pangngai a, khaw thlir a nuam bawk nen, kan pathum chauh pawh chuan kan ri ve noh noh tho. Mahse, U Mama te ho kha an lo chho ve a, "Kan lem lawk dawn sia, nuam in ti lo vang" U Mama'n a tih avangin kan chhuk leh ta dial. Sangi pawh a bialpa nen an inbiak a hun leh tawh avangin a pindan lam a pan ta nghal a. An khaw lam mi bialpa a nei ve a, an inbe ve reng zel. Vica erawh ka hmu miah lo, a leng leh tawh a nih hmel. Ngaihtuah loh tum pawh hian a har ve rih êm a ni. Ani pawn ka lakah feelings a la neihzia chu vawiin aṭang ringawt pawn a hriat theih alawm. Maliani lehkhabu kawl lai te chu ka chhiar ta mai mai a, hman deuha a lehkhabu kara thlalak lo inzep chungchang kha ka la sawi chhuak miah lo. Rinzuala chu a nih ka ring ta riau, chuvangin a theih chhung ngawih rih mai ka tum a ni. Ani pawh tunlai chu phone a hmet ve neuh neuh reng mai a, tu tak be ve ṭhin ang maw. Ka lehkhabu chhiar chu ka lo mutthluksan leh daih pek a! Ka mutui em em mai lehnghal. 

Mahse, mipa phun sur sur thawmin min tiharh ta a. Maliani pawh a lo muhil tawh. Zing dar 1: 20 chiah chiah a ni. Victora'n phone aṭangin tu emaw a bia a niang tiin ka inlet thawk a, muthilh leh mai ka tum laiin a rawn phun leh ta sur sur a,. Room chhung chu a ni lo. Zan a rei tawh avangin pindan pawnlama thawm ri hlek pawh hriat a harsa tawh lo va, tu pindan aṭanga thawm chu lo chhuak nge a nih ka hre lo. Ka meng ta reng a, hlauhna ka nei hran lo. U Mama leh Victora a tu emaw zawk zawk an nih ka rin vangin. Ka muhil leh siar siar tawh ang tihin mipa rum hawk leh mipat hmeichhiatna rawngkai lam awrâwla rak ri ka hre ta a. Ka lungphu a rang nghal ut ut nia! Victora leh Julie te an nih loh reng ka ring lo. Mahse, thawm chu a reh leh daih a. Ka va phâwk law law dawn mawni aw ka ti hman. Vawiinah khati khawp khan a thikthu a la tichhia a, tunah ka mutna pindan ep chiahah midang a mutpui leh thei chu a nia. Tenawm tihna leh huatna ten ka khat nghal der, chutiang tak chuan ka tan a la pawimawh tihna a nih chu. Ka muhil har leh ta zêk a,. Tun ang hunah phone pawh khawih ila biak tur mumal an awm tawh bawk si lo, ka thinur hlur mai. Thawh pawh ka hai ta chiah a, Maliani'n min thawh khalh. Min lo nuih sâng a, nizan lam thil pawh ka hrechang lo lek lek hman hial,. Mahse, ka duh vang pawh ni miah lovin ka thawm hriat kha ka bengah a rawn ri nawn leh a, ka tûm chawpchilh nghal. A ngaitein zingkar hun pawh ka hmang leh a, Victora pawh tlai tawkah a rawn chhuk ve chhar chhar. U Mama erawh hna thil avangin Serchhipah an zin dawn a, zingah a lo chhuak tawh a lo ni. Vica chu ka lo en ngun viau a niang, "Eng nge dik lo a awm mi?" Tho phang zet hian a ti hû a. Melh râw raw chungin, "Awm lo" ka ti chhum hmak. Min ngaipawimawh lo zetin tuilum a va in daih zui. Ka kek hrep chak khawp mai. Ka chaw ei pawh a tui lo. Victora bialnu chu a rawn tho chhuak ngam lo nge zingah a haw tawh zawk pawh ka hre lo e a. Ka thlithlai ru ve reng a nia, ka hmu lo reng reng. Ka mood a chhe nileng a ni hawt e. Maliani vangin ka tilang ṭha thei lo mai pawh a, ka ngaihtuah chian poh leh ka thinrim a, ka rilru a nâ bawk. Min tham lo leh zah lo lutuk chuan min tihel zo a, runluih nan mipa dang biak ve hmiah te ka duh rum rum. Mahse, an awm hnaivai bawk si lo, mamawh hunah lah hian an lo hûng ve ṭhip ṭhep tawh zel a, a tawpah kan riang bul zel. Mahse, a pawi lo, keimah chauh pawhin ka hmachhawn thei ang. 

"Malian, i zia ve tawh tho sia, zanin chu ka jection zawhah che kan inah ka va riak ve lawk dawn mawni ka tia. " Tiin ka dil a. A chhan pawh chhunah ka nuin thil pawimawh deuh a awm avangin ka haw theih leh theih loh min lo zawt a, eng thil nge a sawi ṭha duh bawk si lo. Tetea pa chungchang vel tih chu a sawi thawi thuak,. Tin, chu thil vang em em pawh ni lovin Victora ka ngei vang hrim hrim pawn kan ina riah ka duh a ni tawp. Maliani pawh chuan, "Tehreng mai,. I lungte pawh a leng ve tawh ang. Ngaihṭha deuhin va riak rawh" a ti diam a, a lungawithlak e. Zanriah erawh ka ei leh a, Victora a awm lo hlauh thung. Maliani ka jection zawh chuan Tka ka bia a, min lo hruai dawn a ni. Victora rawn hawn hma ngeia hawn hman tumin ka rilru pawh a hmanhmawh tawh ngei mai. Tka pawh a rawn thleng thuai a, mahse, ti nge maw ka vanduai viau zel ni. Tka bike-a ka lawn tur chiah chu min tawk zawngin Vica chu a rawn tlan ve leh ta chiah. "Tlan vat rawh" hmanhmawh zetin ka ti chul a. Tka lahin hrethiam hek lo, che muang si a ni bawk si, min rawn nagching ta nge nge a. 

"Khaw nge i kal dawn?" A rawn ti nghal vut, a pawr hran lem lo thung. 

"Ka haw dawn" ka ti a. 

"Ti nge? Thil thleng a awm em ni?" Min ngaihtuahna a hmela la langchhuak chu awih lo zetin ka lo melh a, "Awm hran lo ve, zanin chu ka va riak ve lawk ang ka tia. Mangṭha phawt" tiin Tka ka kheuh zeuh a, ani pawh a tlan zui nghal. Min thlir zuiin ka ring. 

"Ti nge? In ni maw ka tia" Tka pawh chuan a ti a. Ka ṭhiante bulah engmah ka la sawi lo, Ateii pawh hmaichhanah ka hrilh ang ka ti kha a nia. 

"Kan inṭhen thut a" ka ti ringawt. "In va tiho ve mawle" a ti ve mai. Thil la lâp chi kha a ni ve a, engmah min zawt zui lo hlauh. Inah min zui lut a, thingpui hâng a in châk vangin..inah chuan ka rinlawk ang deuhin ṭhutthleng seiah Tetea pa chu a lo mu hnar kûk kûk mai. A chatthla tih a lang reng, kan in chhung chu zu rim pawh a nam huam alawm le. Tka pawh chuan nuam a ti vak lo nge ni, "Lum leh lo mai teh, Johny te inah kal lawk ka ngai, a hmanhmawhthlak" tiin a chhuak ta nulh a. A va tiho ṭhin tak. 

Ka nu chuan, "Hei vawiinah Tetea a rawn zui haw ve ngawt a, jail aṭangin a lo chhuak deuh chiah a niawm e. A nupui khan pasal dang a lo neihsan ta si a, awmna tur pawh nei lovin a tei vel mai mai a, a rawn tlulut tawp a nih hi. Engtia tih chi nge maw ni dawn le?" Ka mitmei veng tih hriat tak hian a ti niah niah a. 

"A va pawi ve. An nu pawh chu a va tiawm ang lo ve leh! Ngati nge jail-ah te a lo tan a?" Ka ti hû a. An chanchin ka ngaihven lo êm mai a, hriat loh pawh a awm ve reng. 

"Tlem lai khan an nu hian sumdawn chhuanlamin damdawi a lo tawlh ru ve a niawm e. Chu chu an man ta sia, a tan ai a zu tang a ni ber ang chu. An fate an ngaihtuahawm ve bawk nen" a ti chuar chuar a. 

"A va mak bawk ve mawle. Damdawi te lo zawrh ve reng reng chu. Tete, engtin chiah nge a zui hawn che a?" Ka tih chuan, "Ih, nimina ka hmuhna chhakah khan ka hmu leh a, a ṭhiante pahnih nen an lo inhnial nasa mai a, an hnek a, ka insum zo ta bik lo nen a ṭhiante chu ka sual ve ta a. Chuan, an kalsawn hnuah kalsan ka tum pawn min zui ta zel a." A ti chhut chhut a. A ṭawng hi ka lo hmanhmawhpui ṭhin. 

Nuteii chuan, "Engpawhnise, a khawngaihthlak êm mai, tihian khawsa ve rih se la, nakinah ruahmanna te la siam zawk ila" a lo ti ve a. A hmel zawng zawng nen a khawngaihthlak ve bawk êm a ni. "Nia, naktukah a harhfim hunah te pawh kan sawipui dawn nia. Khawlaia riah ringawt chu tunlaiah ruang chhar a tam tawh si, a hlauhawm" ka ti ve a. Ka nu hmel hmuh pawh a hahdamthlak huai mai. Tetea pa hi ka pa ai chuan a nunah a tla na lo zawk chuan ka hria, mahse, fate pa lo ni tawh chu ensan ngawt pawh a harsa ve ang. Ṭhutthleng seiah chuan a mut ngai ngaiin kan muttir a, keini pawh kan mu ve ta nghal. 

U Mateii'n min rawn be hlawl mai a, ka nute hriat hlau takin zawi tê têin ka ṭawng. "Niminah Mama ṭhian ten chaw an rawn ei em ni?" A ti a. An ei thu ka sawi chuan, "Hmeichhia an tel lo maw?" A ti leh kher a, an telh loh thu ka sawi leh. "Aw..chu zawng chu,. Ka lo bia che tih ka nute kha hrilh suh aw" a ti a, a dah daih. A pasal hlui chu a la ngaihven ru ve tho a nih dawn hi. Ka khawngaih, a mo chhung zawngin Pi Lingi mitmeng râng hmu reng reng leh a ankhum a tuar a, chutiang a nih laia a pasalin a han phatsan lehzel hi, a chhel ngawt zawk mai. 

Whatsapp ka lut zuai a, Victora msg a lo awm vung mai. "I chhungte an ṭha maw?" Tih ringawt. Ka haw thut avang khan a ngaih a ṭha lo chiang, "Aw an ṭha e." Ka ti a. 

"In hi a ruak vek" a rawn ti ve leh hram. 

"Ruak lo turin riahpui leh mai la" ka va ti ve ta ngat a. 

"Ka bula i riah loh pawn kan inah i awm tih ka hriatna khan min tihlim ṭhin." A rawn ti daih a, "I bula riak ngei kha riahpui leh mai la, nizan ami kha.." ka va ti ta duah a. Ka msg type pawh ka type chawrh chawrh mai, "Eng a?! Eng nge a awmzia?" A rawn ti hû a. 

"Hre lo der vel lo mai teh. A lo riah leh chuan thawm in dim ve deuh tawh dawn nia" ka ti a. Ka thin lah chu a rawn rim thar leh vel,. "I sawi awmzia pakhatmah ka hre lo. " A la rawn ti tak deuh deuh. 

"Aw tikhan pawisawi lo ang deuh khan awm rawh, a ho. Mangṭha" ka ti a, ka data ka off nghal daih. Mahse, awlsam takin ka muhil thei awzawng bik lo. Victora min kaih kual tum dan ka ngaihtuah apiang chuan ka sa pup pup zel a, ka tha hi a nâin ka tlawmla ngawih ngawih a ni ber e. Ka harh chuan dar 8 a lo pel vah tawh, tunlai chu thawh tlai ka hrat ve hrim hrim. Tetea pa pawh chu a lo harh ve tawh a, a inthlahrun hmel kher mai. Nuteii zawkin a be siam siam reng a,. Tihtlangnel a tum ve hle. 

"In inah i haw tawh reng reng em?" A tih chuan, "Haw e, pasal a lo nei hmiah sia,.bakah engkim thawkchhuaktu a ni bawk nen, min hnawtchhuak chu a ni mai." A ti chhur chhur a. 

"Hetah i khawsa ve rih ang a, zu pawh nghei tum la, i theih dawn loh chuan home-ah te kan dah che ang a." Nuteii chuan a ti ve zel a. 

"Nia, in leh lo pawh nei lo, chhungte pan tur mumal pawh nei lo tan chuan home-a awm mai a ṭha zawk. Ka awm hreh reng reng lo a nia" a ti ve ta a. A hreh loh phawt chuan zu a nghei theih nan awm ve rih se a ṭha viau ang. A rilru te pawh a fim chho ang a, ama intunnun dan tur pawh a duang thei mahna. Ka nu chuan a be tam lem lo, nuam lo a ti ve a niang. Tetea kal tur chuan, "Pa, lo inbual fai la, ka thawmhnaw saw i lo ha mai dawn nia. Chuan, lo chhuak miah suh, tian in i lo nghak ang a. Zu in tawh suh aw" tiin a chah ve mawlh mawlh a. Ka nau chu ka chhuang reuh hle mai. Ka kal dawnin ka nuin cheng 2000 min pe a, "Thawmhnaw hak thlak takngial pawh a nei si lo va, lo ensak mai ta che." A ti a. A nachang a hre khawp mai. "Pawisa te chu keipawn ka nei ve reng alawm" ka ti ve ngial a. Min pe lui tho. Tka nen bawk kan inphur phei leh a, chaw an lo eikham diam tawh. Maliani ka buaipui nghal a, khatia a chauh vak hnua kan han inenkawl leh hnu hian hma a sawn ta riau mai a, hmuh theihin a taksa pawn ṭhat lam a pan ve. A lawmawm takzet a ni. Pawn te hi chhuak ve duh nise a inteiharh ang a, a ṭha dawn a nia. A natna vang hian midang hmachhawn hi a hreh vek tawh a nih hi maw, a nu leh a ṭhiante vang vek a ni. Victora pawh a hnaah a lo kal hman tawh a, zingah khan min rawn reply-na ka hmu chiah. 

"Naktukah kan sawi dun ang.".tih a ni. A ṭang na ve sia, ka hrechiang ropui sia a. Maliani pawh in hnuaiah a chhuk ve peih a, vawiin zet chu a danglam takzet. A nu nen pawh pangngai takin an inkawm thei a, U Mateii ngaihawmzia leh a vahte a ngaihzia a sawi chuan, Pi Lingi pawn, "Be mai la, a rawn kaltir mai dawn alawm. " A ti a. 

"Naktuk hi chawlh a nia, ka bia ang ka ti" a lo ti ve mai a. 

Sangi lah hi a â roh sia, "Awii tihian awm reng tawh ila, U Ma-i dam ṭha tawh se, U Pipii leh U Vica innei bawk se..a nuam awm" a lo ti nulh pek a. 

"Nia tiraw? A nuam viau ang, chuan nangpawn pasal min neihsan lo bawk la".Maliani'n a lo ti ve a,. Pi Lingi chuan, "Kan Victora nunphung hi tunlai zawng ka hrethiam hauh lo mai. A awm awm hian awm phawt teh se, a nun chhiat leh kan hlau si a. " A lo ti a. 

"Hruaipui, i nu rilru hi hneh dan a awm mai lo mi le? A phak tawkah a fel ve tawh êm hi..In inṭhen a tunah pawh zu a la in miah loh hi. " Maliani chuan a ti ta phawng mai. Ka hamhaih deuh a, "Nia, ka lo sawipui leh ang. Ka nu hi chu a fimkhur ve lutuk a" ka ti bah nuaih. Pi Lingi'n, "Nu ṭha a nih vang a nih chu, fanute pasal tur chu duh uluk viau tur" a lo ti ve zauh. Maliani mitmei ka lo veng deuh a, mahse, engmah ka rin angin a thleng ta lo. An nufa inkar hnai sâwt telh telh chu kei aia lawm an tam bik kher lovang. Zanah kan ina riak leh tur ka ni a, tin, ka nu lah khan Tetea pa thawmhnaw ensak turin min ti bawk si. Maliani muthilh lai bawkin ka bazar ta lawk a, bazarpuiah pawh ka kal hman tawh lo. A rem rem ka fawm khawm tawp mai a ni. In ak bawr luaiin an inah ka lut leh ta phawt a. Sangi ka pui zui nghal. Eng em em lo ti lo pawh ni ila ka awm hian Sangi hian nuam a ti ve tih ka hria. Ka rin aia hmaah Vica a rawn haw ta a. A rawn bal leh nuan mai. A inbual zawhah rawn chhuk lehin, "In chungah chho lawk ang" a rawn ti a. A thutak êm avangin ka hnial duh ta bik lo. Tuma mitmei ven tur a awm lo bawk a, kan chho dun ta a. 

"Eng nge kan sawi dawn?" In chung kan thlen rualin ka ti nghal. 

"Nizana i thil sawi chungchang kha..eng nge a awmzia?" A ti a, a awki a san miah lo. 

"Ka sawi vek tawh kha, hmeichhia i rawn riahpui, mahse, zing tawkah a haw nge ka hmu zui miah lo. Nge i roomah a la tawm zawk?" Ka ti zawt zawt a. 

Thawk a la hawk a, a hawi kual ruai bawk. Ka melh ran tawh si. "I hresual ang tih ka hlau ngawt mai" a ti dam thlup a.

"Ka hre sual lo. Naupang ka nih tawh loh hi" ka ti chiam a. A la ṭang nasa em em hi ka ngei lutuk tlat. 

"Keimah ka ni lo. " A ti nghut a. 

"A nih tu nge?" Cho zet hian ka ti a. 

"Ka hre lo" mangan hmel lek lek hian a ti a. A kut te chu a lu chungah an dah ringawt thul, Victora meuh pawh a zâm tih a lang reng. Chu chuan ka manchhuak ta tih a pholang chiang kher mai. 

"A tawk a nih chu, heti hian ti ang. Hmeichhe dang chu kawp la, keipawhin ka kawp ang. Chuan, ka lakah vawikhatmah i thikthu tichhe tawh bawk suh." Ka ti duah a,. Ka vin ve deuh khar khar bawk. 

"Chutiang ka duh lo. Ka ni lo ka tih chuan ring ve mai la. Dâwt ka hrilh ngai lo che" ngenngawl zet hian a ti a. 

"Aih, nangin i duh hun huna hmeichhia i kawp theih laia kei ka lo single bik nachhan tur ka hre lo reng reng. A fair lo, min vau tawh miah bawk suh." Zâm miah lo hian ka ti leh a. 

"I mak ka ti,. Ka ni lo. A va mak e" tun ṭum chu ani pawh a awki a sang ve ta. Kan inmelh dun ngar ngar mai. Min tihnat tum awm hmel erawh a pu lem lo. 

"Victor, duhtawk teh ang. A ho tlat..ka ning. Kan inṭhen a, i duh duh i kawp thei. Keipawn bialpa ka nei dawn. " Tia kal mai ka tum chu min va pawtlet chiang tak. Min pawm bet tlat a, talchhuah chi rual a ni lo. "Ni lo, a teuh lo. Kan inṭhen ngai lo vang,. I nu rilru hneh nan i duhthlanna ka zahsak mai chauh che a ni. " A ti mawlh mawlh a,. Min tihrilhhai lek lek alawm le. 

"Vica, a tawk. Min thlah phawt teh" tiin ka talchhuak a. 

Ka melh kal bawk. "A nih leh nizan ami te chu tu te nge ni ang?" Ka ti ta a. A ṭan nasat êm avangin ka ringhlel ve deuh ṭan tlat a ni. 

Ka mita min en ngam loin hnuai lam a bih a. Mahse, a rawn hawichhuak leh,. "Mama te an nih kha" ..a ti zawi ta sup a.