Parchuailovi last

PARCHUAILOVI (Last)

Ziaktu : Toni Râlte

Video kan en mêkah chuan Julie leh mi pakhat, palian leh thahrui ngah hmel tak hi inhmatawnin an ṭhu dun a. Julie chuan, "A tawp têp tawh e. Lehkha chu i thawn fel tawh maw?" A ti a. Mipa chuan, "Aw..a bak chu i kut a ni tawh ang" a ti a.

"Aw ka ti thei ang. Mahse, a nunna êm saw chu ka laksak theih ka ring lo" Julie chuan a ti leh sap a. Mipa chuan, "A damrei poh leh kan tan a ṭha zawk, a thih nghal mai chuan manchhuah kan nih a hlauhawm. Min veh reng bawk si a" tiin a hawi kual a. 

"Ka hlauthawng ṭhin, mahse, amah sawn min ring êm a, a fate pawn min ringhlel lem lo a niang. Mahse, Zonunpari hian kan duh ang hi a ti duh kher ang em tih hi ka buaina a ni" Julie chuan a ti leh sar sar a. 

"A tih duh loh chuan, kan sawi lawk angin mipa naupang kha kan rubo mai dawn alawm, an chhungkua an buai phah ngei dawn a, ti lo thei lo dinhmunah an ding dawn.." Mipa chuan a ti nghut nghut a. 

Thu tam an sawi lo, inngaizawng tih hriat takin an inkuah vawng vawng a, an infawp bawk. "Ka kal ang, fimkhur tluk a awm lo" Julie chuan tiin a chhuahsan ta a. Mahse, chu chuan engkim a tifiahin a tichiang ta hle mai. Julie chu ka lo ringhlel phal lo va, amah vek a lo ni reng sia! 

"Mipa hi tu nge?" Ka ti a. Ruatkima chuan, "Rosangliana, Zonuam guest house enkawltu te fapa kha mawle. Zonuni ina rawn kala vauna lehkha rawn dahtu, Dinpuia thattu, Martina ngei pawh thattu kha amah ngei hi a ni e" a ti ta zung zung a. Zonuni erawh chu kan thil hmuh chuan a la ṭhawng deuh nge a la ṭawng ve lo. 

"Police te chu engtin nge i hrilh?" Ka tih chuan, "Engkim zawng zawng, mahse, man nghal mai lo turin ka ti a. Zonuni lehkha dawn kha dawng fel phawt se, Pu Saiṭhuama'n a hming a ziah hnan a ngaih avangin Julie chet lak dan ka hre duh mawle.." a ti a. 

"Chutiang nghah a ngai lo, man nghal rawh se. Ka pa nunna a derthawng thei " Zonuni'n a rawn ti ve ta a. Keipawh ka ngaihdan a ni. Finfiahna ṭha lutuk kan kawl tawh a, engti kawng mahin an talchhuak dawn lo. 

"A thuhrimin Chûn chawi loh rûn hi a awm em ni?" Ka ti hû a. 

"Awm ve e, Mamit lamah khuan a awm ve. Mahse, kha chu an hmanrua mai a ni e.." Ruatkima'n a ti a. 

"I chhui chhuah dan han sawi la, i lo ropui hle mai a.." tiin ka han fak luam a. Nui huah huah pahin zial a ṭan a, a zu khu hlat hlat. 

"A hmasa berah chuan an chhungkaw zing ami a ni lo thei lo tih hriain a mal tê têin ka zirchiang a,. Sharoni khan min tibuai rei deuh, mi duhâm tak a ni ve a. Mahse, An awmpui pakhat zawk Hlimi kha ka ngaizawng der a, ka ngaizawng tak tak tawhin ka hre zawk e a. Ani lah dâwp a nuam phian a, Pu Saiṭhuama te inah sawn kum 10 zet a lo awm tawh avangin thil chu hre tak a ni. An chhungkaw buaina velte ka han sawipui kual a, zawh vak pawh ngai lovin a sawi zung zung mai. Sharoni bik chu a pa nen an inngeih loh dante bakah a bialpa Dinpuia'n a phatsan avanga a nun inthlak dan thlengin a sawi ta a, Chutah chuan Sharoni leh Dinpuia te chu an thawh dun theih ka ring ta lo a ni. Julie bikah ka bur leh ta a,. Hlimi chuan pawnlama fel tak anga a lanna phênah awmpuite tan pawh a tawrhhlelhawm thin thu a sawi ta zauh a. Tin, ngaihzawng a neih a rin thu thlengin..Khamini Pu Saia damdawi in an panpui ni khan pawnlam mi an awm ve miah loh thu leh Julie'n a pu chu a va hmuh hmasak ber thu te a sawi a. Chutiang a nih chuan Pu Saia phone kha pawnlam miin an ruk ka ring ta lo. Amah Julie bak chuan..Julie chanchin ka zirchiang a, Chhungkaw khawsa thei tak an ni lem lo, A nu leh pate inthen avangin a nu bulah a khawsa a, a nu hian pasal dang neiin an inngeih vak lo bawk. Chawlhhmunah an khawsa a, Zonuam Guest House ah khan pasal a neih hma hian a lo thawk ve hrep tawh bawk. Pu Saia hi a sum um vang takmeuha nei a ni. Martina nen pawh khan an inhre ṭha hle ang, a chhan chu Martina farnu te nen hna an thawh ho ṭhin vangin. Tichuan, ka enthla chho ta a, a number ka neih hnuah ka ṭhianpa puihnain a whatsapp chu kan hack sak ta a, Bialpa a nei tih pawh kan hre thei ta. A bialpa number lain ka zawng chhuak leh a, Sangliana ngei kha a lo ni. An ruahmanna zawng zawng te chu whatsapp-ah an sawi duh bik miah lo thung. Pu Saia damdawi ina a riahpui thin lai te khan Sangliana hi a han kal fo va, Pu Saia'n nikhua engmah a hre si lo. Tichuan, finfiahna hmuh ngei tumin ka zui ru ta reng a,. Kha video kha Zonuam guest house-a an inhmuhna a nih kha. Nimin lama an inhmuhna a ni. Mikhual angin ka va thleng ve a, an inhmuhna tur roomah camera kha ka kam ta a ni. Kan Police te hian ka chhui ang hian chhui ve nise hman hmanah an man tawh ang,. Mahse, Police zingah Sangliana cousin a awm ve tlat a, ani pawh sawn inhnamhnawihna a neih ka ring tlat. Kan la hria ang chu.. ruahmanna siamtu kha chu amah Sangliana vek a nih ka ring. An inpuanna pawh ngaihthlak a chakawm tawh .." a ti ta dap dap a. Ka nau mah nise, thluak chu kan inneih that hleih deuh chu a ni. 

Zonuni chuan Tluanga call a dawng a, "Hei, Julie an rawn hling ta chat mai. Finfiahna nei tha hlein an insawi bawk" a rawn ti a. Police lam pawn nghah leh kha an duh lo a nih hmel. "Keini pawn kan lo hre ve chiah e. Ni e, amah ngei kha a ni. "Zonuni pawh chuan a ti ve a. 

Ruatkima chu chaw eiah kan sawm nghal a, ani pawn a hreh lem lo. Ka nute pawh chanchin kan hrilh a, Ka û pawh a mitmeng a nung sârh tawh. A bialnu a lo ringhlel ve ringawt chu hrehawm a tih thu a sawi nghe nghe. Zanah Ruatkima pawh telin ka û te nen Pu Saiṭhuama in lam kan pan leh ta a. Anni pawh thil hriat chak si, helhhawlh an tih ang hian an lo awm ve a. Thil awmzia ka han sawi a, Ruatkima pawh chuan a chhui chhuah dan a sawi ta vek a. Pu Saia chuan, "Tlangval, kan buaina min chinfelsak a, kan lawm hle mai. Bat kan nei bawkin ka hria,. Lawmman ka pe ang che. Min hnial miah suh" a ti ve hial. A lawmawm êm a ni. 

Mapuii chuan, "Ka pa number atangin vauna in dawng tihte chu sawi ni ula, Julie hian ka pa phone a khawih lai ka hmu zauh zauh asin le..in lo zep kha a pawi" a ti vang vang a. A dik khawp mai, ti nge maw khatihlai khan kan hlauhthawn em em ni. Pa ber pawn, "Ka rinhlelh loh ber kha a nia, min lo bum thei hle mai. Sangliana in tih pawh chu kan inah ngei vawi 2 a rawn kal tawh kha..Julie'n ka nî fapa a tih avangin kan lo enliam mai mai a. Min lo bum hnehsawh hle mai" a ti hmuk hmuk a. Tar alamah leh natna khirh tak a tawh laiin phatsan leh bum a han ni ve lehzel a, a tawrhna a nasa bikin ka ring. 

Hlupuii chuan, "Muanzuala nen kan han inṭhen phah vel a. Julie chu ka kek châk hle mai" a ti lâng lâng a. Ka û zak leh lai chu a nui pût pût ringawt. Jerry chuan, "Nang lah hi ri phawng phawng zel suh. I â lutuk a" a lo ti leh zauh. 

"A ho em mai, tunah chuan ka thaw huai huai tawh. A nuam ee..mahse, an inpuanna ka hre châk" Hlupuii chuan a ti a. 

Zonuni pawn, "Pu Rinawma atangin kan hre thei mai ang" a lo ti vat. Chutia kan han zalen ta ringawt mai chu awmdan pawh kan thiam lo, kan ni deuh halh mai a. A nuam a ni tawp mai. Ka u te pawh an nui dun leh thei ta. 

Julie leh Sangliana te man an nih thu chu Social media lamah pawh a lar vet vet hle,. Police te pawh an thaw huai tawh ang chu. Ruatkima pawh a hmingṭhain Police lamte pawn an ngaihven nasa hle,. Nakinah chuan Police a la ni lo vang tih pawh a sawi theih loh. Finfiahna a ṭha bawk a, Julie te chuan insawithiam an tum lem lo a niang,. Damchhung lung in tâng tura thiam loh chantir an nih ngei ka beisei. Teteii leh Fela te dinhmun pawh a ṭhat phah ka beisei hle , dan leh dun lam ka hre vak lo naa, engtin tin emaw an tân hun chhung pawh tawi dan a awm ka ring tlat a ni. Pu Rinawma pawn Julie te inpuanna an record chu min pe ve phal hlauh mai a. Kan ngaithla ṭhap mai. 

"Sangliana nen hian pasal ka neih hma khan kan inngaizawng tawh a. Mahse, thawhchhuah kan nei lo ve ve, ani pawh nu leh pa thawhchhuaha ei in ve mai a ni si. Pu Saiṭhuama hnuaia hnathawh ve hi ka dil a, chuta ṭang chuan kan inhre ve ṭan a, Pu Saia chuan min ngaizawng ta tlat mai a. Hnathawh tur erawh a lo nei remchang si lo. Tichuan, Sangliana hian ruahmanna a siam ta a ni. Pu Saia chu ngaizawnga nei turin, tichuan, inneih hnuah a rosum ruksaka tlan dun kan tum ta a ni. Sangliana hi ka duhin ka hmangaih em a, a thu ka hnial thei thin lo. Tichuan, kan innei ta a, Kan inneih hnu lawkah vawikhat chu a rokhawmna lehkha pawimawh hi ka hmu fuh ta hlauh mai a. A fate bakah a unaute leh keima tan ngei pawh a lo dah a, Parchuailovi leh Lalhmangaiha te tana a dah ve tlat chu mak ka tiin ka zawt ta tawp mai a ni. Ani pawh chuan zep nei lovin min hrilh ve ta vek a,. Mahse, a fate bulah erawh sawi lo turin min ti thung. Ka rilruah a len em avangin Sangliana ka hrilh a, ani hian rilru dang daih lo puin "A zawn chhuah hmain zawng chhuak ila, an rokhawm tur kha neih tum ang" a ti a. Kei chuan a ngaihna ka hrethiam vak lo. Amah vekin engkim a lo ti a, Zonuni te unau pawh a lo zawng chhuak tawh a ni. Kan pain zawnpui beih a tum tih ka hrilh chuan kan pa chu a vau ta hmiah a,. Mahse, tikhan Zonuni zawkin a rawn zawng chhuak leh ta si. Ate kan tihhlum nachhan kha chu engtin tin emaw a pa kha a lo hrechhuak tlat mai a! A zawngchhuak ang tih kan hlau ta si a, Martina kha kan tihtir ta mai a nih kha. Tin, Pu Dinpuia leh Sangliana te hi a hmain school an lo kal ho ṭhin a, an khawsak a harsat ve tho avangin sum hmangin kan thawhpuiah kan siam thei ta a. Kan hming leh nihna tilang hauh lovin Dinpuia kaltlang vekin engkim kha kan ti a ni. Martina kha chu Zonuni bulah sawi a neih bakah sum a phût tam zel a, Dinpuia blackmail te a tum avangin Guest house-ah khan Sangliana hian a that ta a ni. Tichuan, Tar enkawlna lamah Zonuni dahbo nan thang kan kam leh ta a,. Teteii leh Fela te kan buaipuitir ta a nih kha. Tin, Ruatkima tura hraitu kha chu Dinpuia a ni. Zonuni te nen an inbe lai a lo hriat ruk vangin thil pawi zawk a thlen a hlau a, mahse, a thi ta lo hlauh a nih kha. Martina inpuanna an hmuhchhuah takah khan Dinpuia chuan a ka ân mai kan hlau a,. Sangliana'n remchang zawng ngar ngarin a roomah ngei a tihlum ve ta a nih kha. Kan tum dan takah chuan Zonuni hian Home pakhat tana a rokhawm turte dahtira a pain a remtihpuina ziah hnantir kan tum a ni. Tichuan, Home-ah chuan a rokhawm tur hmun thuma ṭhena hmun khat peka a dang zawng chu fanghma no ei kan tum a ni. Mahse, kan hlawhchham ta a nih hi. " Tiin. 

Sangliana chu a rapthlak ka ti khawp mai. Rosum ît vanga mi nunna lak mai duh hi kan kat nuk ta ve ang,. Mahse, an thisen a far thlawn ngai lo, mi nunrâwng leh tualthattu chu manchhuah an ni leh nge nge zel. Man chhuak lo pawh nise, an damchhung hian nun nuama an nun ka ring thei lo. 

Kan zalen ta bawk a, kan chhungkua pawh boruak a nuam ṭhin hle. Zonuni lahin ka fa a pai mêk bawk si,. Mama te lah inneih hmabakin inlaichinna ṭha tak an nei zui bawk a. Kha chen boruak ipik tak hnuaiah nun kan lo hmang thin a ni bawk a, Zalên leh tuma umzui leh enthlak loha nun hman chu a danglam ngei mai. Amaherawhchu, a nunah thil tam tak a thleng a ni bawk a, a natna lahin zual lam a pan zel bawk nen, Julie te an man aṭanga thla khat velah Pu Saiṭhuama chuan min peih lohsan ta nge nge a. Ropui taka vuiliam a ni nghe nghe. A fate pawh anmahni kawng ṭheuha an kal a ngai ta. In leh lo ṭha tak tak nei vek mah se; unau inhmangaih leh lungrual tak an ni bawk a, Tluanga ten an lo ngen ve bawk nen, an in puiah chuan an la khawsa ho vek a. An awmpuite pawh an la ngai vek a ni. Hlupuii chuan a pa sumdawnna hnutchhiah chu a chhunzawm chho a,. A line ni chiah lo mah se; exprience lo nei fê tawh a hnuaia thawk an tam bawk a, Ka û tuina zawng tak a lo ni bawk nen, ka û chu a assistant atan a ruai ta rup mai. School-a a hlawh aia tam fê a hlawh dawn bawk a. Kan chhungkua pawn kan lam kan pan ve ang chu. Jerry erawh a pa damlaia nupui a neih loh avang khan hrehawm a ti a, boruak khati teh nuaih a nih avang khan inneih lam kha han sawi rik chi a ni lo ve bawk a ni. Sharoni pawh phaiah a awm leh tawh a, vai ṭha chi pasalah a zu nei ta nge nge. A unaute erawh tumah an kal lo. Keini lam pawh kan mutân ber Rinliani a fel tawh bawk a, chhungkaw buaina em em kan nei lo. U Mala'n nupui naupangtê a nei ve leh ta rup bawk a, Baby ang lo takin a felin an fak viau. Zonuni pawn Tar enkawlna leh Ngawlveite rûn enkawl hna chu a thawk ṭan a, siamṭhat ngai lai leh thil kim lo lai te enfiahin a hma aia ṭha leh changtlung zawka siam turin ruahmanna a siam a. Kei pawh ka hna ngai thawk tawh lovin Ngawlveite rûnah Dinpuia hna ruak kha ka thawk zui ta bawk. Nuam ka ti zawk bawk nen,. Ngawlveite rûn chu kei enkawl a ni deuh mai. Tar enkawlna lamah thawktu lak belhin Biteii pasal Ruata pawh Fela ai kha a thawk ve ta a, an khawsak pawh a ziaawm phah ngei ang. Kan dinhmun han danglam ta dâwrh chuan a ṭha leh ṭha lo zawng pawn nghawng a nei lo thei lo. Kan in hi kan sakna a rei ve tawh a, Zonuni chuan, "U Mama'n nupui a neih hunah pawh in khata la awm ho vek ka duh, in sa ṭha ila, chhawng thumin..a hnuai ber Sateii tan, a dawt U Mama te tan, keini a chung berah awm ila, ka nu leh pate nen" a ti fiamthu thin a. Chhungkaw pangngai neih chak reng renga nun hmang a lo ni thin a, min thlahlel ve em em a ni. Kan in pawh chu sak ṭhat lam kan sawi chho a, ka pa erawh a tlawmla viau niin ka hria, "I pa hnutchhiah che hmanga in han sak ngawt pawh chu,. Nakin zelah in nupa ,in fate tan a la ṭangkai zawk ang mawle" a ti chuar chuar a. 

"Lungngai suh, Pa, kan sumdawnna hi a huang kan zauh zel ang a, kan dam a nih chuan pawisa te chu a awm ve zel alawm. Kan rethei bik lo vang" Zonuni chuan a ti a. 

Ka û-in, "Kei chu nupui ka neih pawn Hlupuii inah sawn kan awm hmel ka ti, inneih hma atangin ka ngam lo tawh hle ringawt sia" a ti sur sur a. Ka nuin rum zeta melhin, "Fiamthu ka thawh e te hi i ti ve a, a nuihzatthlak loh. Hmeichhe in lama va awm daih kha ka remti lo. In hrang in chan hunah te chuan in duh leh in awm ang a" a ti hlak hlak. 

"Nih Duatpuia hi ka chhawm dawn em?" Ka u chuan a ti leh hêu mai. 

"Ka phal awzawng lo, kan la dam ve ṭêk ṭêk chhung chuan kan enkawl ang,." Ka nuin a lo ti leh hlar. Sateii chuan, "Pasal neih in phal bawk si lo va, Duatpuia hi ka ṭulpui mai ang kei chu" a lo ti ve zauh a. 

"Nei e a, pasal te hi chu neih ngei ngei tur, kan dampui reng dawn lo che u. Nakinah i tar hunah nuṭa te bêla kual kual chu hrehawm i ti ang. Nakkum lamah chuan nei ve tawh mah la a pawi lo" ka pa melh zauh chung hian a ti a. Ka pa erawh a ngawi hmuk. Zonuni duh ang ngeiin in pawh chu kan puah ve ṭan ta a. Mahse, sak chhung a la rei deuh ang. 

"Zosang, hei..Zosang, tho teh. Ka pum a na lutuk" tih pahin min rawn sawi nawk nawk a, ka harh kâwk mai. A naupai thla 5 a ni ve tawh a, a dul pawh a puar ve viau tawh . A pum chu ka chulsak a, "Ngati nge a nat ringawt le? Eng nge i ei?" Hlauthawng ru deuh hian ka ti a. Ṭhen chak chak chungin, "Eng vak mah ka ei lo. A na ê..Nau hi ka nei dawn a niang, ka nute va kaitho teh vatin" a tih chuan hmanhmawh zetin ka tlanchhuak a, ka nute pindan kawngka ka beng dawt dawt, harhvang tih takah a rawn tho vat a, "Zonuni'n nau a nei dawn" ka lo ti. Min melh kâwk a, "Thla 5-ah nau an nei ngai em ni? Kal teh" tiin kan pindan lam a pan ta vat. Zonuni na ti lutuk lah chuan lukham a lo hmer ngawt ngawt, a thaw te chu a sa a, thlanin a bual huh nasa bawk. "Damdawi inah kal ang, motor va la chhuak rawh" ka nu chuan a ti vat vat a, Sateii a ko nghek nghek bawk. Tichuan, Sateii te nen kan pali chuan Zonuni chu damdawi in lamah kan phur chho ta vawn vawn a. Casualty-ah tlan lut nghalin, anni pawn min lo ngaihsak ṭha viau mai. A naupai thla 5na chauh a la ni si a, Doctor an call nghal chul. Zonuni chuan nikhua a hre lo titih tawh, nachhawknain an jection ta sawk sawk a. Doctor a rawn thlen chuan OT-ah an nawrlut nghal rawk rawk mai. A serious takzet tih a chiang e. Kan lo nghak thap a, Mama leh Hlupuii te pawh an rawn lang ve nghal. Rei hi ka'n ti khawp a, ka vei ka vei a, ka ṭawngṭai mawlh mawlh bawk. An zai zo ta hram e. Doctor chu a rawn kal a, Ka nuin chanchin a lo zawt vat. "Pawi ka ti khawp mai. Naute kan chhan thei ta ngang lo a ni. A nu erawh a ṭha e" a ti ta a. Hriau zum taka vih ang mai hian ka na a ni. A raino kan inbuaipui nasatzia te, hmalam hun sawia kan hlimpui thinzia te kha. "Phir a niang, a che na thei êm mai." A tih thinte..ni e, raino kha a la na riau a, a pa thih sarhu lai vel a ni bawk nen, chaw rim hi a tithei hlawl lo va, a ei lo tawp zel. An dam chho a, thei bakah chawhmeh maksak deuh deuh ei chak lamah a kal leh a. Theitê rah hun lai a ni lo nachungin theitê zawngin Aizawl hi ka suartluan tawh, "Ka mumangah theitê ka lo ei ṭeuh a" ti khawpin a châk kha a pe na thin. Tuikep kan zawnsak thul, Kei phei chu ka phar buai nasa ve em em zel. Hrisel takin naute nei se tih kan duh avangin in check up hun a bawhpelh ngai lo. Khatiang khawpa inenkawl nasa kha kan nih avangin kan beisei leh kan lo suangtuah ber naute a han awm lo tur chu nâ ka ti lutuk. Zonuni te chu ka han mawhpuh thul,. Ka nuten min hnem mawlh mawlh lai te chuan, "Ei loh tur eng emaw tak a ei a ni mai. Engvang mahin naute kha a thi thei lo" ka lo ti rilru daih a. 

Zonuni kan va hmuh pawh chuan ka hel tlat nia! A lo ṭap hlawp hlawp a, "Nu, ka naute kha ka duh a ni. Ti nge a thih bik?" Tiin ka nu a lo ban lawm lawm a. Ka nu pawh a inhru ve fap fap mai. An hnem mawlh mawlh a, kei erawh ka ngawi tlat. 

"Zosang, eng emaw tal sawi ve ta che" a ti ṭiak a. 

"Engvangin nge naute kha a thih? Eng emaw tak i ei a ni lo maw?" Ka ti hmuk a, an vai mai chuan phâwk zetin min melh, "Ka hre lo, engvangin nge a thih? Engmah ka ei lo. I hria alawm" Zonuni chuan a ti a. 

"Ei lo la a thi nang. A tir aṭangin rai kha i hreh a, keimah zawkin a nih kha sawi hmasa thin.." ka ti leh tûn tûn a. Ka nuin, "Zosang, i â em ni? Engvangin nge tiang khan i ṭawng a? Ngawi hmak rawh" a lo ti bawrh bawrh. 

"Chu! Ka thiam loh maw ni a?" Zonuni chuan a ti ha a. 

"A paitu i nia, i thiam loh a ni mai lawm. Kei chuan pai ve ila ka tihlum lo vang" ka ti leh sak. Ka ûin, "Zosang, duhtawk rawh. Eng nge maw i hriat le? Hnem a ngaih ber lai a nih hi " a lo ti vut a. Sateii pawh chuan, "Nia, i timak êm mai. U Zonuni tan hian a na zawk daih ang" a lo ti ve nghat nghat. 

"Na a ti tak tak lo vang e. A lawm zawk ngawt ang" ka ti leh chiah chu ka ûin min rawn vuan chat a, "Nang hi haw rawh, haw mai teh" tiin min kai chhuak ta dâwr dawr. Hmuhnawm siam ka duh loh avangin ka ṭang lo mai mai. Damdawi in kawtah chuan ka ding rân a. Ka piah lawk waiting shed-a nu pakhat naute hnute pe mek chu ka melh vang vang. Ti nge an naute saw a thih ve loh? Ti nge ka fa kha a thih bik? Ka rilru kal dan chu a dik lo tih pawh ka hre lo, mite pawn nau an chhiat fô, hrin hun tawha thi saa lo piangte pawh an awm thin. Mahse, nu leh pate tana a nat turzia ka lo ngaihtuah thiam ngai lo, tunah ka han tawng ta chiah a, hmachhawn dan thiam a har hle mai. Nau lawm mi tak ka ni a, Duatpuia te hi a pa ai mahin ka duatin ka chhawnchhaih peih zawk. Keima fa ngei han pawma han buaipui ka châk a, kan nupa inkar pawh a nghet sawt ang. Rilru a mangan leh nat lai chuan ngaihtuahna mak pui pui a lo awm ṭhin ang hian keipawh chuan Zonuni hi hetiang hian a hausa ta thut sia, min iai thar ta si a, a rukin bialpa a nei ang a. Chuvangin naute pawh a tihlum a niang ti ten ka ngaihtuah a, chutiang ni tura ka han ngaihtuah ringawt pawh chu ka natpui veng veng thei. Rilru kalsual nge ka rindan hi a dik tak tak ka hre lo. 

Zonuni pawh chu Sateii leh ka nu bakah Hlupuii ten an vil chawt a, kei erawh vawi hnih khat chu ka kal ve ang. Mahse, biak ṭhat harsa ka ti, a mak lutuk. Ka awmdan chu zahpuiawm min tih êm avangin chhungkuain min zilh rawn hrep a, Asanga leh Opa te pawn min hau fô, "A hausa tawh a, min mamawh tawh lo va. Chuvang chuan fa neih a duh lo alawm" ka la ti fan. Ka naute chân ka tawrh lutukna lamah ka nupui chu thiam loh ka chantir ta der a, ka thusawite chu a tirah ka zeldinna ni mahse, a hnuah phei chuan ka awih titih ta der mai. Zonuni chu in lama inenkawl zui turin an chhuahtir ta a. An rawn chhuah lai pawn inah ka awm duh lo. Zanah chuan, "Sawi dun ang. Khawngaihin" tiin min ngen a. Keipawh ka ṭhu ve ta nge nge, a damloh chhung khan zu ka in nasa a, ka hna pawh ka thawk hleithei meuh lo a ni. 

"Engvangin nge hetiang hian i awm? " A han ti phawt a. 

"I hria alawm, i hre daih zawk ang chu" ka lo tihsan a. 

"Ka hre miah lo, min tina a nia Zosang" tiin min melh vawng vawng a. 

"Ka na lo bikin i ngai em ni? Na tak ka ni, ka kehchhe vek tih hre rawh. Ka fa ngei min tihhlumsak a..engvang nge?" Ka ti tuar tuar a. A kun a, a insût faih mai. 

"Ka tihlum lo, keipawn dam se ka ti lutuk asin. Ti nge tiang rilru hi i put tlat a?" A ti khur dat a. 

"I bialpa chu tu nge ni? Eng ang mi nge? I hausa tawh a, min mamawh tawh lo a, a dik em?" Ka ti ta sak sak a. Za lo zet hian a nui sak a, "A mak hle mai. I ngaihtuahna chu..ka mamawh ber lai chein ka bulah i awm lo va. I hming ka lam ka lam asin" a ti sep sep a. 

"Lemchang kual vel suh. Ka naute kha ka duh, min pe let leh rawh. A thih ringawtna chhan tur kha ka hre lo" ka ti leh chiam a, ka lo lem hlek bawk nen, tawng a kal bakah ka ruihhnan sia, ka thinrim tulh tulh bawk. 

"Zosang, duhtawk rawh. I thil ngaihtuah te kha engmah a dik lo. A paitu ka nih hi, engvangin nge ka naute chu ka tihhlum ang? Thu ṭha taka sawipui che ka tum a, zu rui biak ka peih lo. Ka mu dawn" a ti ve ta nghat nghat a. "Mu daih la ni mai lawm. Ka leng dawn" ka ti puat a,. Ka chhuak nghal daih. Ka û leh ka nuten min rawn dinchilh nghal, Mama chuan ka darah a rawn hmer a, "Naua, i kal thui ta hle mai. Inngaihtuah chiang ang che." A ti hriam hraih a, a lungawi vak lo tih pawh a lang. Ka nu erawh chuan, "A mak zozai tawh e. I la inchhir khawp ang. Zu rim lah hi i nam ham zel a. Zahpuiawm lutuk" a ti hlak hlak a. Chhang lovin ka chhuahsan ta daih. Ka awmdan teh hrep chuan ka chhungte mang pawh a tiang ṭan ta hle. Zanah nise Zonuni bula mu duh lovin ṭhutthlengah ka mu ngat a, ka hel laklawh a, ka hel zel ni maiin ka hria. Zu lahin ka rilru a kaihruai nasa a, Zonuni pawh ka tihrehawm ngang a niang. A lo chhuah aṭanga ni 3-naah Biteii te inah a lo phei daih mai. Pawi ka ti miah lo thung. Chutiang meuh a nih takah chuan ka pain na takin min zilhhau ta a, ka chhuah an remti tawh lo va, min umzui zel mai. Zu pawh zan 2 ka in ta lo, ka muhil thei lo va, chaw ka ei thei hek lo. Rilru a'n fim chhoh takah chuan ka awmdan ngeiawm tak chu ka ngaihtuah ta neuh neuh a. A tawpa ka hmuhchhuah tak chu miin sum leh pai an ngah thut emaw an hausak thut hian awmdan chintawk an hre lo fo tih leh keipawh Zonuni rokhawmah ka lo buai em em zawk tih thlengin ka ngaihtuah ta a. Ka inchhir ṭan ta hle, khatihlaia tih âta ka awm kha ka duh chuan ka hneh thei, mahse, hneh tum lovin ka thinlung thu ka awih a, tihian kan nupa mai bakah ka chhungte nen kan inkar thlengin nghawng a neih phah ta chu a nih hi. Ka inchhir leh pawiti chu ka rum kâwk kâwk mai. 

A tukah ka chhungte hriatpuina thlapin Biteii te in lam ka pan ta a. Zonuni pawh ka hrilh lâwk chuang lo. Biteii'n min hmuh chuan a phâwk viau,. Min lawm tehchiam lo tih a lang bawk. "Khaw nge?" Ka ti a. 

"A awm" tih chauhin min chhang. Ka lut phei a, ṭhutthlengah Zonuni chu a lo mu bâm a. A rilru ka tihnatsak bawk a, a taksa la chak lo nen, a cherin a dang bai mai. Min hmuh chuan a meng râng nghal a, mahse, "Ka tihpalh" ka ti nghal thâwr ringawt. 

"Eng maw i tihpalh?" A ti duh lek a. 

"Engkim kha" ka ti a. 

"Chuan" a ti nghal zat. 

"Min ngaihdam theih chuan ka lawm ngawt ang. Ka tihpalh takzet, ka lo ngaihtuah chiang lo a ni.." inphah hniam takin ka ti a. 

A thaw hap ringawt. "Inṭhen ka duh lo. Ka nupui ni reng la ka duh" ka tih chuan, "Ka rosum te vangin maw?" A ti chat mai. 

"A teuh lo, heng rosumte hi ka tan engmah an ni tawh lo, kan inkar buaina min thlentu a lo ni zawk a. Lo khawm lo tawp la a ṭha tur" ka ti zung zung a. Ka rilru diktak pawh a ni. Ro a khawm hnuah ka rilru a danglam ta tlat a, ngaihtuahna ṭha lo pui pui neiin tlema tlemah ka thlawi ṭêp alawm le. 

"Zosang, min tina takzet a ni" a ti sap a.

"Ka hria lawm, ka tihpalh.." tiin ka ṭhut hnaih a, a tawlhsawn bik lo. 

"Lo haw tawh la" ka ti sup a. Thawk la halhin, "Aih..awm hran rih a tha" a ti ta tlat mai. 

"Ngati maw? Ka ngai che sin." Ka ti hluai.

"Kan inthen hlen thei ang em tih enchhin ka duh" a ti ta hmak mai le..ka rin aiin a khirh dawn zêk. 

"Inthen a?! Ka duh lo, ka duh hauh lo" ka ti mawlh mawlh a. 

"Ka duh maithei asin. Keimah hian" cho zetin a ti ta a. Ka tê rawih rawih niin ka hria. 

"Mahse..ka duh ve hleinem" ka ti hul hak a. 

"Keiin ka duh miau chuan tihtheih i nei hleinem" a ti tlat mai si. 

"Zonun, khawngaihin chance min pe leh rawh. Kan naute thihna khan a ṭha lo zawngin min nghawng na êm a ni" ka ti a. Ngenngawl takin a ni ka sawi ni. 

"Ka tuar lo bik lo, nu ka ni lehnghal..taksa leh rilruah natna ka tuar a, ka mamawh ber lai chea i awm thei lo kha ka hrethiam thei lo a ni. Nang hian min hmangaih lo..Zosang" a ti ta khawl khawl mai. Ka chil ka lem khawlh a, "Ka hmangaih che. Ka hmangaih lutuk che." Uar zetin ka ti a. 

"Tihian awm hrang rih ila, kan thei a nih chuan inpum tawh loh a ṭha. Ka tana i lo inpek tawhna ṭhin zawng zawngah ka lawm e. " A ti charh charh a, a thutak hle tih pawh ka hria. 

"A va mak dawn ve. I chiang maw?" Ka ti sup a. 

Ka mita min melhin, "Ka chiang e. Nakinah buaina lian zawk kan nei leh lovang tih a sawi theih loh. Ka nu leh pate erawh ka zah khawp mai" a ti ta a. Ani ang hmeichhe lunglian chu vawi leh khatah ka hneh mai mai dawn lo tih ka hria, ka tilui duh ta lo. Mahse, Zonunpari hi a rawn kir leh ang, a rawn kir leh tur a ni tawp mai. 

Lunghnur takin ka hawnsan a. Ka nute bula kan inbiak dan ka sawi chuan, "A âwm lutuk, i tina êm a ni. Tuar ve rawh, tikhan. Mahse,inṭhen hlen êm erawh kan remti lo" an ti hmiah mai. Ka khua a har a, Zonuni chu ka ngai êm em, whatsappah ka be âwl lo va, a rul tawk bakin min chhang ngai lo. Kar khat zet min hrem ta. Amah ngaihtuah loh lai hi ka nei mang lo a ni e, ka nute pawn, "Koh a hun tawh viau e" tiin Mama an va kohtir a, "Zosangliana hi tlawm hnêp phawt rawh se" tiin a lo hnar leh hmak. Ka nute chuan hrethiam takin an sawi zui lo. Kei erawh ka hrehawm a, amah ka tihnat tawhna te khan min rawn ṭhing ka ti mai, min vilh ngut ngut zel. A hnuah phei chuan mihring chapona zia a rawn chhuak ve ta a, "Hetiang khawp hian ka tlawmin ka be lui hram hram a. Ka lo rindan ang khan mipa dang chu a lo kawp a ni ngei ang.." tih ngaihtuahna a rawn lut leh a. Ka induhtawkna ten min rawn chenchilh ṭan a, "Ani pawn a theih chuan engvangin nge ka theih loh bik ang?" Tia inngaihtuahin ka be lo lui ve ta ngat ngat a. Ka ngaihna erawh a zo thei meuh lo chu a ni. Zu in leh erawh ka hlau a, ka inthunun ve hram hram. Asanga leh Opa te bulah ka tâp chawt a, ka hna erawh ka la kal ve reng. Mahse, nikhat chu ka inngaihtuah a, ka hnathawhna pawh hi ama ta a ni si a, hetianga a hnuaia thawh reng pawh min hmuhsitna mai mai tur tiin ban ka tum ta a ni. 

Zanah whatsapp-ah, "Ka hna ka bansan e. Banna lehkha pawh ka rawn thehlut ang. Hetiang khawpa min duh lova min rap bettu hnuaiah hian ka thawk duh tawh lo" tih ka va thawn a. A seen a, min chhang miah lo. Dar 9 a pel hlek tihin ka room kawngka chu a rawn inhawng riai riai a, Duatpuia a nih ringin ka phone melh chungin, "I lo riak dawn mi!" Ka ti a. 

Min chhan mai loh avangin ka va en a, Duatpuia ni loin Zonunpari ngei mai kha a lo ding zân mai. Ka tho vat a, "Nang maw?" Ka ti nghek. A nui sen sen a..zawimuanga min rawn panin, "Zosangliana diktak kha hmuh leh ka duh a. Ka nghak chhuak ta..mipa a huna induhtawk thei, inrintawkna ngah tak ngei mai kha" a ti sap sap a. Hamhaih zetin ka lo thlir tawp ringawt. 

Inhmatawnin kan ding dun a, "Ka lo lêt leh tawh e..min fawp dawn lo em ni?" Tiin fawh cho zet hian min rawn melh chho vah a. Ka lo do vena leh inlak hran ka tum vena zawng zawngte kha vawmbo ang duak an ni. Hneh zeta a khabea dawmin ka fawp ta mawlh mawlh a. Khumah tlukpuiin kan inbuan leh ta thial thial mai. Zosangliana'n nupui a nei leh ta. 

Kan nupa kan inpumkhat leh ta bawk a, a sumdawnna pawh a khawih chho leh ṭan a. Nau awmna tur kha sak zawh a ni hnai a,. Advertisement pawh chhuah ṭan a ni tawh. 

"Ka duh dan chuan Tar hote pawh hi zan riak duh chu riak tawh se la, kar tawp chawlh hmangin haw thin mai se la, thawktute awmna tur quarter hi sa bawk ila. " A ti thin a,. Hma pawh a la chak vut vut khawp mai. Kan in pawh kan sa chho ve zel a, sak len leh sak pui a tum nasa mai si. Mahse, sum a nei alawm..keinin kan thawhpui ve reng bawk a. Ngawlveite rûn lam pawh lun mep mep tak a ni. A hma khan mipa chauh a awm theih kha a nia, hmeichhe awmna tur a saktir leh mêk bawk. Chhungkua kan dam tlana kan inrem hi chuan nun a nuam a ni mai e. Pu Saiṭhuama fate nen an inbe pawp reng bawk a, Jerry te inneih niah pawh kan chhungkuain kan va kal ve, a ropui mup mup khawp mai. Kan in sak zawh veleh a nu leh pa leh Atea thlan lung phun a tum bawk. 

Ka u leh Hlupuii te pawn nakkum lam an tinzawn a, an intawn dan leh an boruak kal chho zel hi thawnthu ngaihnawm tak a la ni thei ngei ang. Hlupuii sumdawnnaah Mama hi a fawng vuantu a ni a, a chang chuan a intithu mah mah em aw tih chang ka nei, mahse, Hlupuii hian a hnial ngai miah lo thung. An induh dan hi tleirawl inngaizawngte pawh an ang alawm le. Sateii lahin, "Min inneihtir ve tawh r'u" a ti sek mai a, nuih hi a tiza ṭhin mang e. Ruatkima pawh CID lamin an ît thlu ngang a niang, a lut ve ta a, a châk ber leh a suangtuahna te tihpuitlin a ni dawn ta. A lawmpuiawm e. Biteii te nupa pawh Biteii a fing reuh bawk a, an khawsa thei phian. Zonuni'n in a leisak a, tah chuan an khawsa tawh a ni. Rinliani pawn bialpa pangngai tak neiin an inneih vat pawh a rinawm..Asanga erawh a la thlawi tluang zel thung. 

"Lo haw lawk teh. Vatin" Zonuni'n min rawn call a. 

"A va laklawh, eng nge thleng a?" Ka ti a. Chhun chawlh lai a ni. 

"Lo haw mai rawh" a rawn ti deuh tlat. Nupui te thuawih tih takah ka tlan haw ta vang vang a, ka ngaih a ṭha vak lo bawk. Ina ka luh chuan an reh thap a, Zonuni chu ka ko lûng lûng. Room-a ka va luh chuan khumah a lo ṭhu a, "Eng nge? A va pawimawh hmel ve" ka ti a. 

"Hei hi i hmuh duh ka ring a" tiin pregnancy test kit a rawn lek vâ mai. Nau a chhiat aṭangin thla 4na a ni tawh. Ka en vat a, rin sen pahnih a lo awm leh ta vât mai.

"Lalpa, ka lawm e" tih pahin ka nupui chu ka kuah thawk a. 

"Duatte, ka lawm e, ka hmangaih che" ka ti mawlh mawlh. 

"I siam zing êm alawm" a tih chuan ka nui hawk a. 

A chala fâwpin, "Tun ṭum chu pa ka ni ve tak tak tawh ang" ka ti a. 

"Ka beisei" a lo ti sap bawk. 

Inkuah vawng vawngin , "Lalpa, tun ṭum chu thihtir tawh suh aw" ka ti rilru vang vang a. 

A TAWP TA.