Amah leh kei..

AMAH LEH KEI..(1)

Ziaktu : Toni Râlte

"Mambawih, hei en teh, a va that hmel ve" ka nu chuan a phone melh pah chuan a ti a. Ka va en ve vat. 

"Tuikual South-ah Home nurse mamawh a ni a. Dil duh chuan Ni 15 ral hmain dilna thehluh tur a ni a, interview neih hun hi ni 16/ March a ni ang" tiin dilna thehluhna tur address chiang takin an rawn tarlang bawk. Ka nu chuan, "Dil ve la" a ti sap a. 

"Nia" ka ti ringawt. Ni e, nurse ka training chhuak tawh a, mahse, hna ka la hmu thei lo. Thla 5 zet chu hnathawh tur nei lovin ka nu ka pui tawh a, ka inthlahrung ṭhin hle. Kan khawsak a harsa ve angreng si a. Private Hospitalah pawh nurse training chhuak kan tam tawh êm avangin sawipuitu nei lo chu kan lâng lap zel mai si, Sawrkar hospital phei chu a ngaihna a awm lo tluk a ni. Pawl 12 ka pass hlim khan College kal zawm lo va, eng emaw thiam thil zir mai ka duh a, Ka ṭhiantu Ateii'n nurse a training dawn avangin min sawm ngawrh angreng sia, ka nu lah a lo phur. Ka training ve ta ngawt mai a ni. Ka mizia leh nunphung hian nurse hi a support hlawl lo ti mai ang. Nurse kan hmuh leh hriat ṭhinte hi chu nu zîm zêm, polite tak, kut dam leh ni deuh thlap an ni ngai a, kei erawh mi harhvang leh ninhlei, kawlhsen tak, thawm pawh na ve tak, mi hmai êng zah tehchiam lo ka ni thung. Ka ṭhiannu vanga zir ve ta ngawt, tum mumal pawh nei hlei lo va class xii pass ve ta ngawt kha ka ni rêng a, ka inhmeh tawk lek ka ti mai. Ateii tak pawn hna a la hmu thei bik lo va, mahse, thla 2 liamta khan an veng pa hausa ten an chhawr ta hlauh a, private hospital aiin a hlawh a tam zawk bawk nen, ka awt ve thei hle. 

"Dil ve poh ila ni mai lawm. " Ka lo ti a. Ka thawvenna te kha an zal ve deuh tawh. Eizawnna ngelnghet ka la neih loh vangte pawh a ni mahna. Lalhruaipuii ka ni a, Pipi tia koh ka ni daih thung. Puipui tih lamtawi te pawh a ni maithei. Nikhua ka hriat tirh aṭangin pa ka nei tawh lo. A chhan chu sâwn ka ni tlat! Ka pa chuan ka nu chu neih a duh naa ka pa chhungte lamin ka nu chu an lo iai nasa mai si, an laina hnai tak leh ka pa chu an inneihtir ta daih mai a! Chutihlai chuan ka nu pum chhungah thla 7na ka hmang ve mêk a ni. Ka nu chu a unaute leh ka pi leh pute nen an la khawsa ho va, Aizawl veng pakhatah chengin an khawsak a chuti lua lo hle. Ka pu lah thawhah nei a ni a, enkawl chawt ngai deuh reng a ni si. An in leh lo bak neih an nei lo a ni mai e. Ka nute unau hi panga niin ka nu hi a milai a ni nghe nghe. Ka nu û te pahnih chuan nupui pasal an nei a, ka nu chhang chiahin nupui a neih lai chuan kei pawh kum 5 ka ni ve tawh. Ka pu a boral tawh bawk. Putea nupui chu nuthlawi fa pakhat nei niin a fanu a rawn chhawm lut ta bawk nen, kei aiin a û hlek bawk a, ka ngam lo nasa. A lal nghal halh halh hle. Ka nuteii leh ka nute pawh Piteii chuan a rapbet titih nghal, a chhan chu sumdawng niin sum a lalut thei tlat a, ka nute lah a rem rem thawk an ni si, kawngro chu an insut hleih deuh a ni. 

Vanduaithlak takin ka nu chuan ka chhang tur a pai leh ta hlauh mai! A fa paina lah chu kan ṭhenawm nu nau tlangval la naupang tê a la ni zui a! An lo inzêm a deuh nge ni dawn ni. Ka nu aiin a naupang fê naa, ka nu chu a atchilh lo chauh a ni ber e. A chhungten ka nu chu an duh bawk si lo, mahse, ani luhlul laklawh tawh si khan ka nu chu a rawn luhkhung ta rap mai a! Ka nau chu sâwn a ni ve ta lo. Chutiang tehnuaih kan nih lai chuan ka pi chu a bawrhsawmna a rei tawh nen, a boral ve leh ta mai a. Ka ṭap nasa hle. Piteii te nufa laka ka thlavang hauhtu ber, zanah pawh a bula ka mut loh chuan titau ṭhin kha ka ni tlat a, ka pi kha tun thleng pawn ka la ngai ṭhin. Ka pi kan vuiliam chauh tihin chhungkua kan buai chho ta a. In leh lo chu putea hminga awm a ni si,. An nu thu a awih bawk nen, keini chhungkua leh ka nuteii te chu kan hnawksak ṭan ta riau a, thil a kal a kal a. A tawpa tawpah Putea ngei mai chuan keini nufa leh ka pahrawn te chu in hrang chang turin min ti ta mauh mai. Ka nau hi chutihlai chuan thla 10 vel lek a la ni a, ka nu nau no pawm tan eng han thawh theih a ni si lo. A pasal lah a la naupan bakah hnathawh a zei lo bawk si. Nuteii'n ka nu a rilru natpui ta a, "Kei pawh ka chhuak tel ve ang" tiin kan veng chhungah tho in lian lem lo tak kan luah lut ve ta rup mai a ni. Nuteii hi bazarah mi dawr nghakin a inhlawh ve a, a hlawh a tam hran lo. Tiang chuan kan khawsa chho ve ta naw naw a. Ka la naupang a, retheihna awmzia kha ka la hrechiang lutuk lo. 

"Hello, Pipi, offer ka nei, a ṭhat hmel tawp..Tuikual south-ah home nurse an mamawh a..chu chu" Ateii'n a rawn tih chuan, "Dil ka lo tum ve e" tiin ka lo nuih sâng. 

"I hriat loh ka hlau lutuk a" a ti ve hliai a. Kan inhmangaih ve teh mai a nia, ka ṭhiannu nen hi chuan. Zanriah kan ei laiin ka nuin, "Nasa takin ṭawngṭai ila i hmu ve mai ang. Sawipuitu neih a ngai ve lem lo bawk a. Theihtawp chhuah ang che" a ti leh malh malh a. Ka nau erawh a ngawi reng. Ani hi zawng biak loh chuan chengkawl a ni mai. 

"Nia, ka hmuh ve hlauh chuan a lawmawm viau ang" ka ti a. Kan chhungkaw eizawnna ka nu eichawp dawr ringawt chuan damkhawchhuah a harsa ve bawk a ni. 

Zanah Dilna chu pdf in ka va thehlut ta a. "Interview turin kan lo beisei ang che" tih thu ka dawng. Dil an tam viau chuan ka hmuh theih pawh ka ring lo e a. Keimah hi a thawveng chi ka nih avang hian harsatna hian min buan hneh lo mai mai zawk. Muthmunah chuan kan chhungkaw dinhmun ka ngaihtuah leh mai mai a. 

Khatia kan indan ve hnu khan ka pa ti tawh mai ang, ka pahrawn pawh chuan theihtawp a chhuah ve a, inhlawhna awm thei ang angah a thawk ve zel a. A hah lah a hah, ka nu kha amah aia upa a ni bawk a, a duat thiam êm ṭhin zawk a. Kan bulah a la khawsa peih mai mai niin ka hre thin. Kei pawh school ka kal ve tawh a, ka rilru a chak bawk nen, kan classah a thiam thei pawl ka ni. Ka pa chuan ka nau nen min enhranna a neih awm ka hre ngai lo, Ka nuteii hian min chang deuh bik hrim hrim a. Zanah pawh a bulah ka mu ṭhin. Nikhua ka han hre chho va, ka nu pawh mi in tifai leh buh thlei ten a inhlawh kual ṭhin. Ka pa nen fa dang an la nei miah lo thung. Kum 9 ka nihin ka nu chuan nau a chhiat a, a nau chhiat hnu lawkah a pasal chuan ngaihzawng dang a neihsan tih a hrechhuak ta bawk. Hetihlai hian Nuteii pawh nula senior ve tak a ni tawh a, amah hêla zui ve rengtu U Zuala nen inneih an tum hnai ve tawh a ni. Mahse, ka nu leh a pasalte chu an inmanchhuah tak avangin an inthen leh ta si. Ka pahrawn chuan a bialnu nuthlawi fa 2 nei chu a luhkhungsan leh ta a ni. Nuthlawi zûna uai hi a lo na a niang e. A bialnu lah kan veng ami tho sumdawng ve ṭhin a ni a, ka nu aiin a la naupan bakah a tituai zawk bawk a, Ka pahrawn pawn a ît zawk a ni ngei ang. Bakah kan bulah chuan nitin hna a thawh reng a ngai bawk nen, a peih tawh lo a ni thei bawk. Kei chuan han dem em em nachang ka hre lem lo. 

"Mambawih, Mambawih.." ka nuin min koh avang chuan ka harh hlawl,. Sana ka en chuan dar 7 a lo pel duai tawh. Ka nu hi ka thawh khalh hleithei ngai lo. Ka inbeng tho vat a, mit nuai chawt chawt chungin ka va chhuak phei ve a. Ka nau erawh chu a pindanah a insiam mêk a ni maithei. Ka nu eirawngbawl ka pui nghal vat vat a, kan in piah lawkah a dawr hi a awm avangin zingkarah a nghak lo law law thin, kei lahin thawh ka hre vak si lo. 

"Nizan chu ka mumangah i pa ka lo hmu a" tim ru angreng tak hian ka nu chuan a ti sap a. Inthlahrung hmel a pu deuhin ka hria. 

"Chuan.." ka lo ti teh tawp. 

"A lo cher lutuk a, damlo rei tak na tuar tawh a ang. Ka ngaih a ṭha vak lo.." a ti a. 

"A dam ang. Ngaihtuah suh" ka ti liam leh puat. Ka nau Tetea pa ai chuan ka pa hian a rilru a luah hneh zawkin ka hre ṭhin. Duh taka a ngaihzawn kha a ni ve bawk a. Kei erawh ka pa hi hmaichhanah chuan vawi 2 ka hmu tawh, mahse, amah chuan min hre lo. Khatia nupui a neih tak daihah kha chuan ka nu pawh a lakah tau zuiin kei min neih hnu pawn engmah an hrilh hre duh ta bik lo a ni. Ani ka pa lahin rawn biakpawh a tum ta bik lo a niawm e. Nikhua ka hriata an chanchin ka han hriat takah chuan ka pa chu ka do zui ve ta hmiah bawk nen,. Kan inngaihven zui ta lo vang vang a ni. Ka sawi tawh angin ka nuteii'n pasal a nei ve ta a, ka nu hoin kan awm ta. Kan khawsak a harsa em em a, khata tang chiah khan retheihna awmzia ka hrethiam chho ṭan ve,. Zirna ngaisang tih takah ka nu chuan school ṭhaa min dah a duh ve bawk si, Mi ina lânga hnathawh ringawt hmang chuan inchawm zawh ngaihna awm hek lo, kan ṭhenawmnu thurawn angin chawhmeh a kharchhawng ve ta ngawt a, mahse, rin ai takin hlep a ṭha a, a chhunzawm ta zel. Hun a kal zel a, High school ka rah ve hnuah a pawisa khawl hmangin kan in chhak lawk kawng zau laiah eichawp dawr hawng vein , a kawtah chawhmeh a zuar pah bawk. A hnuah phei chuan sa rêp a zuar tel ta bawk a. Kan veng bawr chuan amah chu an ring vek tawh bawk nen, a hma ai chuan kan khawsak a kâng ta deuh. Putea te kha an la innei ve zel a, mahse, kan inhmu khât angreng khawp mai,. Vawikhatmah kan in dan hnuin an inah ka la kal leh ta lo. Anni pawh an rawn kal hek lo. Chutiang chuan kan in zimtêah chuan kan nufa thumin kan khawsa chho ve ta naw naw a,. Tunah chuan hna neih vea ka nu leh ka naute hahdam taka awmtir ve ka duh tawh a ni. Ka nau nen hian kan inthlau deuh bawk a, tunah hian class xii a kal ve mêk. Rawlthar ṭawngmawh zet, chut tak mai a ni a. A leng chhuak ngai mang lo. Ani erawh hi chu a pa khan a la rawn hre ve reng a, a mamawh eng ilo tam tham ni si lote pawh a rawn tumsak ve fô mai. A ṭha vek zel e. 

Ka hna dil ve kha interview hun a thleng ta a. Zing aṭangin ka insiam tawh, mi phur chi, thil reng reng helhhawlha inhmakhua chi ka ni bawk a, ka thawmhnaw pawh ka thlak zing leh tawh viau mai. "Minister hmuh tum ang mai, i tum urh leh lutuk a nih kha..i thawmhnaw ni loin i nungchang leh i thiamna kha lawm an en dawn" ka nuin a lo ti seuh seuh. Ka inrintawk dan berin ka inchei ta a. Smart pant dum ka ha a, kamiz a dum leh a vara ṭial ka ha bawk. Ka sam hi a tawi a, sam tawi hi put nuam ka tih vang a ni pakhat. A dum hlap a, ka nu ka chhun avangin a kawi deuh bawk, style vek a ni mai. Hmai bial lam, vun mam ve tak ka ni a. Biangsum ka nei ve kêk bawk,.a Hmelṭha e han tihzui vawng vawng ka hlawh awm ka la hre lo va,.mahse, bialpa erawh pathum lai ka nei ve tawh. Tunah hian ka single lai tak a ni thung. Ngaihzawng la runthlak chi ka ni lem lo va, ka mizia hi a ngei duh tur tan chuan ngeiawm rawng a kai ang. Ka thawveng a, engkim palzam chi, ka rilrem loh zawng chu sawi chhuak bawrh chi ka ni. Ka nu min zilhna pawh a ni fô reng a,. Ka sim thei lo. Mahse, mahni infak ta ila mi ka rêl ngai lo, ka bula mi an rel te hian ka kalsawn loh pawn ka ngawi reng zel. Keimah ka inhriatchian avang hian mi dang ṭhat lohna hi ka hmu mam vek zawk zel..a chhan chu mi ṭha tak ka ni bik miau lo a ni. Chaw eikhamah ka chhuak chho a, taxi ka lo châng a. Ṭhianpa Tka a rawn tlan hlauh, ani hi ka ṭhian kawm ve ṭhin tlemte te zinga pakhat a ni. Ateii tih loh hmeichhe ṭhian dang ka nei lem lo bawk. Two wheeler taxi a khalh ve a, ama puala service a ni bawk a, a hausa reuh zêk ang. Tuikual lamah chuan kan inphur phei a, "Nizanah khan i va muhil hma awm em em, group video call pawh i la thei tawh lo" a ti lâwng lâwng a. 

"Nia, tunlai chu mut ka duh tawp" ka lo ti ringawt. Kan ṭhianho groupah mi panga tlawng kan awm a, kan la hlim ve em em zui! Tudang kan ngai ngai bik lo. Ka chhuk hnu chuan, "All the best aw" a ti nghut a, pawisa pawh ka pek hmain a tlan daih. Khi sak chungin ka thlir liam a,. Ka kalna tur lam chu zawh chawp ka ngai bik lo, addess an ziak chiang bawk a. Building lian fahran mai, sakna la rei vak lo tih hriat reng kawtah chuan ka ding ta vâng a. In neitupa hming Lalramzauva tih chu chhiar leh zauhin door bell chu ka hmet ta a. Reilotêah kawngka chu rawn hawngin nula kei aia nau hlek tur nen kan inhmachhawn ta ran mai. "Interview tur em ni i nih?" A ti sap a, ka lo bu vat. Min luhtir hnuah ṭhutkhawmna pindanah min hruai zui nghal a. "Lo ṭhu lawk rawh, in tur ka rawn laksak ang che. Ka pu pawh a hman ṭêp ang" a ti a. Ka hawi kual nasa ngang mai. Mi hausa tak tak inah hian ka lut ngai vak lo va, tuna ka awm mekna te aia hausa pawh an tam ang,. Mahse, an in chhung bungrua leh engkim mai chu a man a tlawm lovang tih ka hria, an faiin engkim a felfai thlarh bawk. Ka ṭhut mekna piah deuhah darthlalang daidanin ṭhut khawmna pindan tho a awm a, an sofa te chu a changkang ngei mai. In chung panna kailawn pawh vai changkang ho ta ang mai a ni. Ka sawi thiam ve chiah lo. In chu a lian hle bawk. Pu Ramzauva chuan eng hna tak thawk ang maw..nula khan coffee a rawn chhawp a, ka nghah daih laiin in neitupa ni ngei tur palian leh thau lam, hmuihmul nei, meng rum angreng tak hi a rawn kal ta a. Din ka lo tum chu min zâp ṭhuin, "Ka tlai hlek a, min hrethiam dawn nia" tiin sana a bih zauh. 

Ka hming leh veng, kan chhungkaw dinhmun thlengin min zawt chhuak ta dap a. Kei lahin thudik tak zelin ka lo chhang bawk. Nurse hnathawk tur ai mahin awmpui tur te pawh ka ang alawm le. A tawpa tawpah, "I enkawl tur hi ka fanu a ni a. Systemic Lupus Erythematous (SLE) natna nei a ni a, Rilru lamah natna namên lo a tuar bawk nen, Enkawl a hautak dawn a, chuvanga a enkawltu tur pawh uluk ka ni reng a. Nurse pahnih chuan an bansan tawp tawh,.chutiang zawng zawng huama i enkawl duh a nih chuan chhawr che ka hreh lo va, hlawh pawh midang ai chuan ka pe tam ang che. " A ti ta charh charh a. 

Ka inngaihtuah vak lo,. Hna ka mamawh êm a ni. "Ka thei ang, ka pu" ka ti a. Ka mitah chiang taka rawn enin, "A lawmawm e. Chhel taka i awm a ngai dawn a nia. A taksa natna lam ai mahin a rilru herh leh kawi vek tawh khi a tawrhhlehawm dawn a nia. Hawh le, ka hmelhriattir ang che. " A ti a. Ka ding vat. In chung lamah chuan kan inzui chho ta a. In chung lam pawh a zau ṭha hle. Pindan pali lai a awm a, Thlang lam pindan kawngka chu a kik kauh kauh a, "Bawihi, i nurse thar tur ka rawn hruai lut dawn e" a ti dam thlup a, kawngka chu hawngin kan inzui lut ta a. Pindan zau nuam tak a ni. Pindan lai takah khum a awm a, chutah chuan nula chu a lo mu bâm a, a cherin a dâwldang takzet. Thawh pawh rawn tho chuang lo hian min rawn melh thîp vâwt vâwt a, ka zam hran lo. Ka beisei sa kha a ni hrim hrim a. "Ani hi Pipi tiin an ko ṭhin, Lalhruaipuii a ni a, Pipi, hei ka fanu hi Maliani tiin i ko dawn nia, Lallianpuii a nih hi. " Pu Zaua chuan a ti sur sur a, Maliani chu ka nuih sak a, "Ṭha taka enkawl che ka tum ang" ka ti ve ngial. Hetiang ṭawngkam polite hi ka hmang khât asin le. "Midang ang bawka ban inring ringawt rawh" a lo ti vawt raih a. A aw erawh a mawi zêk mai. 

"Kan hre zel ang chu" ka ti ve ngat a. Min chona chu ka pawm viau mai. 

"Pipi, vawiin chu âwl la, naktuk aṭangin zing dar 9-ah i rawn thleng zat zat thei tur a ni a,. Hunbi neia treatment la a nih avangin tlai a thiang lo bur. Tichuan, tlai lamah dar 5 thleng i thawk bawk ang. Harsatna a awm ang em?" Pu Zaua chuan a ti mawlh mawlh a. Thupek min pe a ni ber e. "Awm lo ve" ka ti nghet charh, hna awlsam tak zawng a ni dawn mawlh lo, mahse, hlawh a ṭha êm a, Ateii hlawh let daih a ni. Hrehawm te chu ka tuar ṭhang ve tawh alawm. Mahse, in chaldelhna erawh ka haw fô,. Chu erawh chu ka la tawng chho mawlh mawlh dawn tih Maliani mitmeng leh ṭawngkam chhuak aṭangin ka hre nghal. Eng nge mawle..pipi lawm ka nih le. 

Maliani pindan kan chhuahsan hnuah an chhungkaw chungchang a sawi leh vek a. "Ka nupui hi vawiinah a ṭhian ṭha te nen an inhmu khawm dawn a, a awm tlat lo mai a,. He inah hian kan nupa bakah Maliani, Victora leh Mama te chhungkua nen kan khawsa ho va, Mama leh an nu Mateii te hian fa pahnih naupang te te an nei a, anni pawh vawiin chu Mateii te in lamah an va leng ve lawk a nih kha. Awmpui hi nula pakhat, nichina lo dawngsawngtu che kha kan nei ve a, ani kha Sangi a nia. Kei hi Department pakhatah ka thawk ve a,. Ka fapa upa ber Mama hi J Thankima college-ah sawn a thawk ve bawk a,. A naupangber Victora erawh Chanmari-ah motor workshop neiin ani chu inah a tâl tam lo. Naktuk lamah a hranin inhmelhriattirna kan nei leh dawn nia" tiin. 

Kei pawh ka haw leh a, ka nu bulah ka hnathawh tur leh ka enkawl tur chanchinte ka han sawi chuan, "I dawhthei loin i zaidam lo nasa si a, chungte chu i thawk thei dawn em ni? " A ti a. A tih kha ka rinsa a ni hrim hrim.

"Thei thei..i fanu hi mi namai ka ni hleinem" ka ti zat zat a, "Tlai lamah ka inhawng rei thei dawn lo a ni maw? I rawn haw tlai dawn sia" a ti daih. 

"Dawr nghak tur kan la dawn nia, hlawh ka pe ang" ka lo ti leh zung zung a, "Hlawh pawh neih a hmain dawr nghak tur han sawi nghal chu, sum hman i thiam dawn lo nang hi chuan" a ti hlak hlak a. "Tihdan a awm mai ang" ka la ti hram. Min ngei leh ngawt ang chu. 

Zanah thiante bulah ka hna hmuh thar chu ka sawi a, Ateii'n min han zawh chîk deuh chuan, "Lalremi sawi kha a nih ngei chu..Duati, i thawk rei thei pawn ka ring lo. Lalremi, mi zaidam lutuk pawn thla 2 hnuah a bansan thlawt mai a nia. A khirh lutuk a ti tawp" a rawn ti a. 

"Nia, a awlsam hauh lo vang" ka lo ti ve zat. Tka chuan, "A thei leh mai ang, kan patil Pipi chuan" a rawn ti a. Emoji nui vak lai ka va dah tuar. 

"Lalremi chuan, 'Ramhuai a ni ringawt, a ân a chhe si, englai pawn a thinrim a, a nui hmel vawikhatmah ka la hmu lo. Damdawi pek dawn lahin thih thain a ṭang a..ka peih tawh ngang lo' a tia. Ka ngaihtuah che ee, i mizia nen a inmil dawn lo lutuk" a rawn ti leh a. Ni e, ka mizia nen chuan inrem lo hlawm tawp a ni. 

"Luhlul ka chhuah ve tlat mai ang" ka ti ringawt. 

Zualbâla kan tih mai zel Sangzuala chuan, "I va sawp hlum ringawt ang e aw. I zia te kha thup ve la" a rawn ti a, ka nui ṭhâw mai. Ka kawlh tih an hrechiang ve bawk a, ka tleirawl chhuah ka nulat dawn thleng khan mi ka la sual ur ur a! Ka nu hi a mangang thin. Ka nauin class X a zir kum hian an class ami Vansanga an tih mai, a upat tawh bakah a chak avanga an hotu en deuh chuan ka nau chu a lo hmumawh khanglang a, a text book a lo halsak pek a! Ka nau lah chuan a sawi duh lawk lo, a thianpain a sawi takah chuan a sawi ve ta chauh a. Ka thinin a tuar leh ta lo va, an schoolah ka kalchilh leh rap mai, Ka koh chhuahtir a, ka lo beng nghal ṭhuai. A hnar a thi nghe nghe. Kan insual zui a, min bawhbet a, mahse, a nghawngah ka kuai ve tlat, a duh angin a che thei bik lo, an zirtirtu ten min rawn ṭhelh ta zawk a,. Mahse, khata ṭang khan ka nau chu a tihduhdah tawh ngai lo thung. Ṭawngkaa mi hauh chiam ka thiam lo, ka ṭap dawn zel. Chuvang chuan rik deuh rawp rawp hi ka duh mai zel a,. Ka bialpate pawh hian ka kut an tuar zauh zauh, mahse, na taka kut han thlak ka neih loh bakah an dik loh vang a ni zel bawk a, min tilet ve duh ngai lo. 

A tukah chuan dar 8 ah chaw ka ei sawk sawk a, Dar 9 rik hmaa thlen hman hram tumin ka chhuak ta a. Tka ka be lâwk tawh bawk a, harsatna awm lovin dar 8:56-ah Pu Zaua te in chu ka thleng hman. Tka hian tlaiah pawh min rawn lam leh dawn a ni,. Ka va luh chuan tukṭhuan eina an lo tifel mek a, An monu ni ngei tur hmel hmuh nuam leh tituai zet mai hian min lo dawngsawng vat a. Keipawh ka zûm duk lem lo. Pu Zaua nupui Pi Rini chu nu thau lam, samkir, mitmeng thîp râm mai a ni a. Ka vawikhat hmuhna aṭangin nu fel leh ṭha tak tia sawi a nih ka ring lo ve tawp. A biak pawh min be lo, An monu leh Pu Zaua ten min bia a ni mai. "Dar 9: 15-ah damdawi pek a ngai a, Dar 11-ah jection a ngai leh bawk. Ni 1 danah hian dar 1-2 thleng drip khaisak a ngai bawk a,. Dar 3-ah damdawi eitur a nei leh a, dar 4-ah injection..chutiang chu a nih bakah a khawihli leh pân te dressing a ngai bawk thin. " U Mateii chuan a ti zung zung a. Keipawn ka ngaithla uluk khawp mai. 

"Chaw te a ei ṭha em?" Ka ti a. U Mateii chuan a pa melh zauhin, "Chu chu kan buaina pakhat a ni thin. Chaw a ei duh ngai lo va, supplement eng eng emaw hi kan chahsak a, siamsak a ngai ṭhin. I tan a harsat deuh pawn Sangi a awm tho aw. A theih hram chuan thil ei ṭha se kan duh a. A rilru pawh min hnehsak theih kan beisei a nia" a ti ta mawlh mawlh a. Chaw a ei ṭhat duh loh phei chuan a chau thei viau ang,. SLE hi chuan thisen var an tlachham chak bawk si a, pek fô pawh a ngaih hmel. 

"Aw le, ka tum ang" ka ti sap a. Nu ber chuan, "Thawk reng thei lo tur chu kan chhawr duh lo a nia" a lo ti chang fak a. 

Ka chhang lo. A mitmeng thîp vang hian a hmel pawh a chhe vek ka ti mai, ka va ngaina lo chiang tak. Rangkachak a ngaina viau a niang, ṭhi nen, zungbun pathum a bun tlar ṭhat bawk. "Ka han chho ang e" tiin ka chho a, ka thlen hma deuhin mi pakhat nen kan intawk,. Tawnzau dum a ha a, jogger pants a grey rawng a ha bawk. A bâna tatoo in chhu buai chu hmuh loh der a har angreng. A sam chu a met fai angreng,. Han inlak style vak pawh a tum lo a niang. A ngo lutuk lo na a, a hâng lo chiang hle. Min rawn melh zawk a, "Nurse i ni ang maw" a ti a. A aw chu ka rin aiin a thum daih. 

"Aw " ka ti a, kalpelh mai ka tum lai chuan, "A lakah chuan luhlulna a ṭangkai ber.." a rawn tih leh avangin ka ding dat a, amah chu ka va melh chat,. A mithmul buk ṭha tak, rual angreng tak hnuaia a mitmeng dum fiah kêk kawk te, a hnar bang sang leh invuah rem zet te leh a hmui chhah tih dawna ni si lo, pan lutuk chuang si lote chuan an deuh a nei. Ka hre mai thei tawh lo. A mitmeng erawh a bialnu tan pawh a na mah mah ang tih tur a ni a, a nu angin a thîp ve lo thung. "Luhlulna.." a ti leh sup a. 

"Maw?!" Ka ti hâ a. A vei nuih suk a, a nuih a za tak tak lo tih erawh a chiang viau. Ngawi rengin a chhuk thla ta daih a. Keipawh Maliani pindanah chuan ka lut a, khumah a lo ṭhu a, a chawn te chu a lo hlim nasa mai, "I ṭha maw?" Zangkhai thei ang berin ka ti a. 

"Ka ṭhain i hria em ni? Mi mawlnu" a ti nghal ta pang mai. 

"Nia, ka mawl ngawt mai. Mahse, ka hmelṭha tho alawm" ka lo ti a. Ner nâwng chungin, "Hmai bial hmelṭha tak ka la hre lo ve" a ti nghat. 

"Hmai tung hmelchhia hi an hmelchhiat dan a bawnra thei tawp, chhe uluk kan tih ang kha " ka ti zat zat a. 

"I va tawngthei " a tih chuan, "Ṭawngpui tur i mamawh ka ring a" ka lo ti ve hmak bawk. A mal dinglamah khawihli a nei a, an natna avang hian a dam hleithei ngai lo. Hnai chu a la pur a, mahse, a dam hlen thei tak tak lo a ni. Ka tihfaisak a, ka kut hi a dam ve fû roh a, kan nulai pawh chu ka theihtawpin ka dim ve. "Nurse ve si, i kut a va dam lo êm em. " A ti nang nang a. 

Ka ngawi rih, ka thiltih laklawh laia ka ṭawng chuan ka thiltih ka chawl zel a, mipa ang mai ka ni. Ka tihfai zawh chuan damdawi ei a hun chiah a, ka pe a, "Ka ei dawn lo.." a ti hmak. 

"I ei âwm e"..tiin tui ka la sauh sauh a, a hmaah ka ṭhu hmak bawk. "A rimchhe si, ka ei duh lo" tlema nem zawk hian a ti a. 

"I ei a ngai. I dam vat nan" keipawn ka aw ka tinem lui chiam a. 

"Ka dam thei tawh hleinem".beidawng tih hriat zet hian a ti a,. "I thei, i tum leh tum lohah a innghat ang" ka ti ve ṭâng ṭâng. A tawpah chuan damdawi chu a hmawm ve ta nge nge a. Ka thaw huai mai. 

"I eitur ka zu siam ang aw. Eng nge i ei châk" ka ti a. 

"Engmah" ka rin dansa bawk a ni. 

"Engmah chu siam a va har awm, khawiah nge ka lei ang? Engzat man nge?" Ka ti duah a. A mitmeng thîp tak kara nuihzatna lo lang chu ka hmuh hmaih bik lo. "Noodles ka ei chak. Chicken noodles" a ti ta a. Ka khi ver ver mai. "Lo awm hahdam la, ka rawn la vat ang. " Tiin ka chhuahsan ta a. Chokaah chuan Sangi a lo che mawlh mawlh, "Sangi, Noodles kawl lai in nei em?" Ka ti a, maktih hmel angreng tak hian, "Neih pawh ka hre lo. Ngati nge?" A ti hâ. 

"I hman chuan min va leisak lawk ta che. Chicken aw. Hei chu ka lo ti ang" tiin a thil sil lai chu ka melh a, pawisa ka pe a, thuawih zetin a kal ve mai. A thil sil lai chu ka sil chhunzawm a, midang hi an reh leh diak tawh. Chhun chawlh a la ni lo bawk a, an pindan lamah an awm a ni maithei. Sangi pawh a rawn let ta vat a, Noodles chu min pein, "U Mai ei tur nge nangmah?" A ti sap a. 

"Ma-i ei tur " ka ti ve sap a. Hawi kual zak zakin, "Ka piten ei an phal lo asin" a ti zawi leh sep a. 

"A ho" ka ti hmiah. Chaw ṭha chauh hi kan ei châk ber bik lo, chaw ei loh ai chuan chaw ṭhing rum deuh kuttum tiat ei pawh a hlu e. Ka siam nghal zung zung a, Kan in ang maiin Fridge te chu ka hawng ve zut zut a, Sangi bak awm hek lo, tui taka siamsak ka duh ve miau si a ni. Tomato, hmarchapui leh vegetables ṭhenkhat te nen ka han mix nuaih a, Sangi pawn, "A tui hmel tawp" a ti ve nasa. "Ei ve rawh" tiin a ei khawp tur bowl-ah ka suahsak a, Maliani eitur kengin in chung lam ka pan zui nghal. 

"Le, tlem tal ei han tum teh" ka ti a. Hlim hmel put hram hram ka tum ve. A rawn chechâng a, a rimtui a ti ve a ni teh chêk ang chu.."i siam maw?!" Awih loh hmel fâ hian a ti a. 

"Nurse chauh ka ni hleinem, chef pawh ka ni tel".ka tih chuan a khi ve sak a,. "I dangdai riau".a ti ve sep. Noodles chu a ei ta a,. "Hmarcha thak ka ngamzia i hre lo a ni maw? Ka duh aiin a la thak lo" a ti ve ta siam siam a. Ka ken chhohsak chu a ei zo ve ṭhak mai. A pum a zut a zut a, "Kumina thil ka la eitui ber a ni hial ang. " A ti ve sap sap a. Ka lo lawm ve hle. Chhun chawlh a hun dawn ta bawk a, Sangi'n, "U Pipi, thingpui lo in lawk la, nge ka rawn dah chho dawn?" A rawn ti lâng lâng a. Maliani chuan "Chhuk rawh, muthilh ka duh" a ti ram hmak a. A mood a danglam leh daih tawh. Keipawh bowl nen chuan ka chhuk ve ta a. Pi ber leh Mateii te pawh an lo lang ve tawh. Ka bowl ken lai a hmuh chuan, "Ehe! Thil i eitir thei a ni maw? A va lawmawm" Mateii chuan a lo ti var a. 

"Nia, a ei zo vek lehnghal" ka ti ve a,. Nu ber chuan, "Eng nge i eitir a?" A lo ti chang rât a. 

"Noodles" ka ti tawi tak. Chuveleh a ter ta at a, "Eng mi-ah nge i inngaih a, engvanga kan thu hmu hmasa lo va chutiang tur hlauhawm te i lo eitir? I va zakthei lo ve" a ti ta hlawih hlawih mai. Chutiang em ema an huat ka lo ring lo va. "Tûr ni lovin noodles alawm ka pi" ka ti ve ngat a. 

"Chaw ṭha leh hrisel lo chu a ei in ka remti hleinem. A thuhrimin i ngampa mah mah. " A ti leh ta daih a. 

"Ka lo zum dâk tawh dawn nia" tih pahin tuikhawihna ka pansan. A phun zui hlak hlak naa Mateii chuan, "Ni 2 lai chaw a ei tawh lo va, a lawmawmah ngai zawk ang" a ti a. Mahse, "Nang lah hi mi zawng zawng tihlawm tum hian khawsa thin suh. Zêl zûl che hian" a ti hrep mai. A hming phuah a ngai he nu hi..Pi Lingvûti ni teh se a. A ling nghal vût zel mai si a, kan inhrawn rei thei ang em aw. 

Chawhnu lamah jection ngai leh thil dang ka ti zui leh a, hna hahthlak em em a ni lem lo. Chutihrualin Maliani mood chu a chhe telh telh a, khaw tlai ang zelin a mood chu a chhia ni maiin ka hria. Mahse, ngawi rengin ka che mawp mawp a. Min ankhumna te chu ka hre lo der hmiah, a taksa pân ṭhenkhat ka dehsak lai chuan, "Hmai bialnu, in rethei ngawt ang ka ring. I thawmhnaw hak reng reng te hi.." a ti hlak hlak a. 

"I va sawi dik êm" ka lo ti sap. 

"Retheih hi a hrehawm em? Engtin nge a awm?" A ti leh a. 

"A nuam phian..kan pian a nalh phah alawm, hna kan thawk rim a, kan thau ve luah thei lo " ka ti duah a. 

"Chu! Ka pian hi a nalh lo i tihna em ni?" A ti khauh. A aw pawh a vin tawh lem lo. 

"Aw pian nalh tia sawi tur chu i ni lo alawm, i dul a kiar sia, i lu a lawk bur bawk sia.." ka lo ti a, thinrim ṭah chhuah hmel zet hian, "Kal bo rawh, hmelchhenu, i va han chaltlai ve a.." tih pahin a ke a leng awrh awrh mai. 

"Nang hi ka sum bâwm i ni miau a, ka kalsan thei hleinem che " ka lo tihsan mai bawk. Kan indep zo va, damdawi ka hnawihsak leh. A ngawih vang vang avangin, "Mahse, i hmelṭha ka ti..hmai tung hmelṭha hi chu an hmelṭhat dan a chiang bik" ka ti dam thlap a. Ni e, nula hmelṭha tak a ni. A mut rei tawh avangin a cherin a dawldang a, a dul a kiar bawk. A fit lo viau ang. 

"Chutiang chuan mi pakhat pawn a sawi ṭhin.." a ti sap a, ka han melh chuan a maimichhing a, mahse, mak deuh maiin mittui a rawn luang nia! 

"I ṭha em?" Ka ti a. 

"Ka ṭha, haw tawh rawh, haw hma la a ṭha..in rethei sia, hna i la thawk hman ang. " Tiin a che deuh sawk sawk a. Kei ka lo hamhaih ve deuh. Dam deuh hian, "Haw rawh, dar 5 thlen kher a ngai lo, i tihtur i ti zo vek tawh alawm" a ti leh a. 

"Tak tak aw..ka haw tak tak dawn" ka tih chuan a bu nghat. 

"Naktukah kan inhmu leh dawn nia.." tih pahin ka nuih sak a, a nui ve lo thung. 

In hnuaiah chuan Pi Lingi leh Sangi te an lo awm a. Min hmuh rual chuan, "Khaw nge i kal dawn?" A lo ti leh hmuk. 

"Haw turin min tia..ka haw dawn" tiin ka ding dat a. 

"A theih ngawt loh, dar 5 i thlen a ngai, Sangi va pui rawh" a lo ti leh ta hmak a. 

"Nurse ka ni, maid ka ni lo. Ka pi" ka ti ve hrâwk a, ka lawm vak tawh lo. 

"Kan hnena thawk i nih tawh chuan kan sawi anga awm tur i ni lo em ni?" A ti hlar a. A awrâwl pawh a ring angreng. 

"Ka enkawl berin haw phalna min pe tawh. A nih phawt le.. " tiin ka chhuak nal nal. 

Zanriah ei laiin ka vawiin hna vel chu ka sawi a, ka nuin, "I ngaihtuahawm roh mang e" a ti leh tawh. 

Ka nau chuan, "A ngaihtuahawm loh daih zawk alawm" a lo ti ve mial a. Ka khi var var mai. 

Zanah ka ex in min rawn be leh chiam a, Kimtea a ni a, kan inṭhen chhan pawh a lo lerh ve zuk vang a ni. Ngaihdam min dil nasa a, ka ngaidam a, ka ngaizawng duh tawh si lo. "Vawikhat chiah inhmu leh ila..mawh.." a rawn ti leh ngawih ngawih tawh. 

"Ka hman lo" tih chauhin ka chhang. A rawn rik leh reng avangin ka mutsan ta daih. Ngaihdan chhetê ka nei ve a, ex te bula kir leh turin tumah ka ṭhen lo vang tih hi..ṭhen ve tingtanga kir leh vel kha ka zia hian a pawm hleithei lo. Ka luck loh tehreng nen hian ka la induhtawk ve em em a, ka sawi tawh kha, min ngei duh tan chuan ngeiawm zik zek tak ka ni. 

A tuka ka hnathawhna hmun ka va thlen chuan, Garrage atangin bullet hi an tlangval khan a rawn khalh chhuak mek a, ka zawnah a ding leh chut. "Chhel takin le.." a ti sup a. 

"Tehreng mai' ka lo ti ve sap. 

"Good girl.." tia vei nuih leh sukin a tlan zui nghal. Enzui vang vang paha ka phun bal bal lai chuan, "U Victora hi star ve miah suh aw. Nang chu i fel sia, i nat ve ka hlau.." ka hnunglam aṭangin Sangi khan a rawn ti niah niah a. Ka hawi let vat.."Min tina pha lo" tia hawipir vahin Sangi chu ka kalpel a. 

"U Ma-i vang ai mahin U Vic-a vangin nurse te, an awmpuite pawh an bâng ṭhin" a tih leh chuan ka ding dat. 

"Ka ni ve lo vang" ka ti nghet charh a..Victor hmel erawh ka mitthlaah a rawn lang nghal zut zut..a va buaithlak..

To be cont..