Amah leh kei 8

AMAH LEH KEI..(8)

Ziaktu : Toni Râlte

Lalvala chuan an buaina chu a bul aṭangin a sawi ta a. 

"Nimin tlaiah min lo bia a. Tluangtluangi te inah zana kalpuiah min sawm a, zawh duh ka nei tiin. Mahse, zanah khan chhuah in remti ta si lo va, zan reiah a chhuak a, ka games khelh rei avangin keipawh ka la meng. Tluangi te inah chuan a va kal a niang, an buai dan tak ka va hre ve lo, amah hian Tluangi mu tawh chu kaihthawh tumin a lo au a niawm e. Tluangi û te ṭhianzaho inkhel en chuan an lo tibuai zui ta a ni. An khawih rawn hnu in chhunga an luhsan hnuah min lo bia a. A rawn sawi a, chubak chu keipawn hriat ka nei lo. An lo khawih na mah mah a, amah chauhin a ni bawk nen, ka sa ve phat a, mahse, keipawn ṭhian dang ka neih bik loh avangin ka ngawi zui ta a ni. " Tiin. Victora chuan Tluangi chu eng tak zawh tum ang maw. Pi Lingi chu a ling ta phat a, Tluangi a call ta rap mai. 

"Ka fapa duatlai i û ten an lo khawih rawn hi ka lawm lo viau mai a, FIR ka thehlut dawn a nia. Ngaihdam an rawn dil lo a nih chuan" a va ti nghal bawrh bawrh. Tluangi pawh chuan, "Amah kha a dik lo êm alawm, rui chungin a rawn kal a. Ka mu tawh tih a hriat pawn a ṭhu tlat a, ka û te ning khan an khawih mai a ni"a rawn ti hlak hlak a. 

"Engvanga rawn kal nge a nih reng reng? Eng thu nge a rawn zawh che"..pi Lingi chuan a ti leh a. A ṭawngkam pawh a nem deuh tawh. 

"Kolasib-a kan zinna vel kha,. U Ma-i nurse khan engtin chiah nge a bulah min lo sawi ka hre lo, engkimah min rawn mawhpuh ringawt a nih kha" Tluangi chuan a rawn ti tân tân a. 

"Ka awih lo, nangmah vangin alawm an intihthiam loh, nang hian sawi i lo nei deuh a niang. " Pi Lingi'n a ti fiak leh ṭhak. Tun ṭum chu ka ṭan ve tlat mai. 

"Engmah ka sawi lo,. Zanah Vica a rui a, a phone call ka lo chhansak a ni mai. Kha nu vang vek kha a nih kha. Zak thei lo lutuk" Tluangi chuan min la rawn ti êrh a. Ka ṭawng hman ṭêp a ni. 

"Engpawhnise, i û te chuan ngaihdam an rawn dil ngei tur a ni. A chiang em?" Tiin phone chu a dah ta a. 

"He nu thir ther hi ka mil lo hrim hrim, a zam lo si, Julie nen an inzui lai pawn a rawn kal reng a. Amah vangin ka fapain kut a tuar lehnghal" a ti zui bawrh bawrh, kei erawh ka ngawi reng. 

Maliani eitur ka siamsak zui ta daih a. Victora hlir ka rilruah a awm thung. Nimina ka thil sawi vel avang khan Tluangi chu hmuh a duh tih a chiang a, a thuhrimin ka bulah sawifiah ve mai tur a ni. A mizia hi ka hrethiam teh nuaih tawh lo e a. In chunga ka chhoh chuan Maliani pawn an buaina vel chu min lo zawt vat a, ka hrilh ve mawlh mawlh bawk. "Victora hian a duh tak tak che a nih hi" a ti hlawl mai. 

"Ka hre lo le" ka ti ringawt. Victora pindanah ka lut ve leh a, "I ril a ṭâm em? Eitur ka siamsak ang che aw" ka ti a. Enkawltu tur dang an awm si lo va, ka kutah a tla miau si. "Ka ei châk zawk che" a la ti zui! 

Khum bulah ka ṭhu a, "Fiamthu lo teh. A thuhrimin Tluangi chu eng nge va hmuh i duh chhan?" Ka ti ta a. 

"Kolasib-a thil thleng ka zawt duh mawle. I bula ka insawifiah hmain,." A ti lawi a.

Mak ti zetin, "Thil thleng engmah i hre lo a maw?" Ka ti hâ a. 

"Chutak chu ka thiam lohna a nia, chuvang alawm va hmuh ka duh" a ti leh bawk si. 

"I va han mumal lo tak e aw. " Ka ti nghat a. 

"Thil awmzia chu hei hi a ni. Renga te ina thlen tum kha ṭhian dangten Hotelah riak mai ang u, kan tihautak mai mai ang an tih avangin ka pawm ve mai a. Hotelah kan innghat ta a ni. Zanah khawhar inah kan kal leh a,.ka phone ka theihnghilh daih lehnghal. Kan lêt leh hnuah zu kan in a, khati em ema ka rui kha eng emaw tak an pawlh a nih ka ring. Engmah ka hre lo tawp a ni ber. Chu vang a nia ka insawifiah theih loh. Tluangi nen in lo inbe bawk si,. Ka buai ta vek a ni" a ti ta charh charh a. Thil ni thei chu a ni ve tho mai. 

"I ṭhian dang ten an hre lo mi?" Ka ti a. 

"Ka zawt duh bik hleinem,. Ka mizia a ni lo" a ti bur bawk si. 

"Aw le, engpawhnise, damdawi ina i inenkawl chu ṭha ka ti, i banrek ber hi.." ka ti ta daih a. 

"Min enkawl la, ka dam mai ang" a tih tlat avangin ka nawr peih tawh lo. 

"Rui tawh lo la a ṭha a ni mai." Ka ti hmak a. A ngawi daih. 

Chawhnu lamah Maliani chu a intifai a, "In chung zawlah tal khian chhuak chho ve la, i rooma tawm ngawt ngawt chu i â mai ang" ka ti hlut a. Ka beisei loh deuhin a lo duh ve mial a! Ni e, hetia tawmsen reng hian awmzia a nei tlat lo. Kan chho dun ta a. Thlifim dawngin kan ṭhu dun a,. A hmelhmai chu a dik lo tlatin ka hria. A ngui tlat. "I ṭha em? I lunglen hmel" ka ti zauh a. 

A hmui tizûm pûtin, "Ka ṭha. Mahse, engkim hi sulhnu a ni ṭhin a.".a ti sep a. Rinzuala vel bawk a nih hmel. 

"Amah bawk em ni?" Ka ti ve mai a,. "Aw..La thi lovin la dam ve mai mai se, inṭhen tawh mah ila a pawi lo a nia" namnul tum tak hian a ti a. 

"Thihna hi chu a tawp chiang bawk a ni tiraw?" Ka ti ve sap a..

"Thih hnu piahramah hian kan damlai anga kan la inhriat zui zel i ring em?" A ti leh a. 

"Ka hrethiam lo, ka ring chiah lo deuh. He lamah chuan ngaihtuahna ka seng thiam vak lo" ka ti ta ngawt a. Za vak lova nuiin, "A pawi lo zawk,.phatsantu a ni tih ka theihnghilh thei ang a. Ka na lo zawk ang" a ti ta daih a. Rinzuala hi a hmangaih hle ang tih ka ring thiam,. Hetiang taka a nun vaw chhe thei mihring chu. 

"Hmeichhe dang a kawpsan che nge? Engtin chiah nge a phatsan che le?" Ka ti a, min chhan duh pawh ka ring chuang lo, ka zawt ve mai mai. 

"Min phatsanna hi ka putea fanu a nia. Tikhan a nat dan tur i hrethiam em?" A ti ta mai a! A lo nih mai mai dawn chu a. A na viau tak ang le..

"A va mak bawk ve mawle,. Amah Rinzuala bakah i putea fanu pawh chu a timak hle mai.Chu chu em ni? I nu nen inbuaina bul?" Ka ti ve ta zel a. 

A ngawi dat a, thawk la halhin, "Ni tho a, a ni vek kher lo bawk. Nakinah a chinchhuakin ka hrilh ang che. " A ti a. Ka zawt zui duh lem lo. Ka rilru erawh a kal thui viau thung. Ka khawngaih takzet a ni. A nu nuṭapa fanuin a han luahlan ta mai chu a nia! A tlawmthlak piahlamah a zahthlak hle dawn a nih chu. 

"Chhuk ang, mut ka duh, ka tai a nâ" tiin a tho hluai a, ka ding ve nghal zat. Victora pawh a lo la muhil a, a banrêk hian rei a awh deuh ang a, a bak a hliam dang hi chu a dam har lovang. An in ka chhuahsan hmain U Mateii a rawn haw a, a lo thlen lai takin chokaah ka lo awm a, a rawn thinrim haw nasa mai. 

"Ka nu, ka nu..ka lawm hlek lo a nia. In thiltih dan tenawm lutuk hi" tiin a au nghal tuar tuar mai. Naupangho pawh an awm ve reng, a insûm zo ngang lo a ni mahna le. Pi Lingi pawh a rawn lang vat a, "Eng thil maw? Eng nge a?" Cho zet hian a rawn ti ve a. Hmundanga kalsawnna hman a awm tawh si lo, Sangi nen chuan kan lo ṭi dûi mai. 

"Dampuii'n dawrah min rawn kal chilhin mualpho thei ang berin min rawn ankhum chiam a, lawm lo tak ka ni. Nunsanga pawh rawn haw rawh se, a hre viau ang. Tun thlengin i lo la inzui ruktir a, a sawi fai vek. I thu hmua la inchulnêl an nih thu te..ka nu, a tawk tawh em em e" U Mateii chu a sen vek thei, a thinrim thawkhat hle tih a lang. 

Pi Lingi lah chuan hrilhhai hmel lek lek hian, "Eng a?! Chutiang engmah ka hre ve lo e a. Ka hming a rik chhan ka hre hauh lo. An lo la inzui ru tih phei chu a mual bovin ka bo" a ti mawlh mawlh a, lemchan a thiam viau te a nih loh chuan a hmelhmaiah dâwt a sawi loh hmel. Mak a ti ve hle niin a lang tlat nia. 

"Kan hre dawn alawm, Nunsanga rawn haw se kan hre vek ang. Heti reng renga buai reng hi ka peih tawh lo" U Mateii chuan a ti hlak hlak a, an pindanah a chho nghal daih. Boruak a nawm loh zui êm avangin keipawh nidang aiin ka haw hma a,. Ka pa dawr ka tlawh kawi leh zuai. Tihfel ngai leh sawifel ngaite kan sawi ho a, An hlawh pawh san sak ka remti a, an lawm dun ve khawp mai. Mihring hi chu ṭhat leh ṭhat hi inlâwm ila thil a kal fel mai zel. Mi ring hma tak mai ka ni a, tin, ka theih ang tawka rinawm ka tum ve bawk. Sum leh paia mi sawisep kai ka hlau a, bâ ka neihte hian min kap rûn zel a, pek vat vat ka duh zel. Mi ka rin hma luatah bum erawh ka tawk zeuh zeuh,. Hmelhriat ṭhenkhat ten pawisa pûk min rawn dil a, pek loh ka hreh thin si, hausa lê lû lo mah ila ka lo puktir ve mai zel a,. Dil leh lah inthlahrung chi ka ni sia,. Ba ral ta daih pawh an awm ve nuk, .pawisa puktir chu dil dawnah a puktirtu zawkin kan harsatna sawi duah a ngai zawk zel. Ka sim ṭan.

Zanah Zira a rawn leng a, ṭha tak chuan ka lo kawm ve. Ka awmdan aṭang hian ka hnar tih a hrethiam ve ni tur a ni, a hma ang khan min ngaizawng em em tawh lo. Keimah zawk hi ka inthlahrung lek lek zel. A la awm lai rengin Victora'n min rawn call a, lak loh ka tum zet naa a nâ te a zual a nih takin tiin ka la ta a. 

"Lo riak rawh" a rawn ti teh ngawt a! Ka ner sawk mai. 

"I ti anglo êm mai a" ka ti hlak a.

"Ka tukkhum hi a na tulh tulh a, chhungte bulah ka sawi hreh deuh si" a rawn ti a, a tukkhum dûp ul mai kha a nih hmel. "Sawi rawh, U Mateii hrilh rawh" ka tih chuan, "A haw daih alawm, Mama nen an inhau hrep a. A tlan ve daih" a la tizui! An buai chho ta a nih ngei dawn chu. 

"I nu tal hrilh rawh,.kha thil kha a serious a nia aw. " Ka ti hram a. "Ka tum ang,. Min lo ngaihtuah ve rawh aw" a rawn ti a. Min dek riau, "Ka ngaihtuah che alawm, ka lo ṭawngṭaipui ang che" ka ti ve ta thliam a. Kan dah ta rih. Zira bulah chuan ka ṭhiannu angin ka sawi daih, a nuam bik lo ve a. Ani pawh rei awm lovin a haw ve ta a. Ka mu nghal daih. 

A tuk zing ka tho chu putea te nupa an lo ṭhu kur mai. Mit nuai chawt chawt chungin ," In lo kal elo" ka lo ti a. Putea chu ka hmu tar sawt mai. 

"Nia, in khawngaihna kan rawn dil dawn a nih hi" a la ti zui!

Hmai ka va phihsan ta daih a. Ka nute nen an sawi ho thei reng. Mahse, ka inhruk hul lai chuan ka nu a rawn kal a, "Mate, engtia han tih chi nge maw ni dawn le..an beisei ve tlat che sia" a ti a. 

"Eng nge min beisei ve ringawt a? Engmah ka nei hleinem"..ka ti hlak ringawt. 

"Dawr aṭang sawn an beisei ve tlat mawle" a ti a. Ka tum bûr mai. "Ka pui thei lo. Hrilh rawh" ka ti ta hmak a. Ka sual vena lamah chuan sual thiam ve tak hi ka nia. Putea hi ka ensan ta tihna a ni lo, a nupui fa bik ka ṭanpui nachhan tur ka hre lo. Kan chenho lai khan ka la naupang êm zawk a, chutiangin min en hranna kha ka hre vak lo zawk. Mahse, ka hriatchian em em chu Lawmi'n bawnghnutê a chawm laiin kei chuan dâl ka chawm ṭhin, sa hrang khat lek ka khampui laiin Lawmi chuan ei sen loh a suak ngam ṭhin bawk. Tin, an nufa vang liau liauin rethei taka khawvel hmachhawn turin ka nu nen min chhuahtir a, ka nu retheih ṭhinzia leh kan unau tana a thawhrimzia hretu ka nih avang pawn puih hi ka châk hlawl lo a ni e. Bakah ka pa dawr ka chhawm chauh a, engtin nge a hlawkna ka tel hman ang le..

Ka va chhuah chuan Putea chuan, "Naute, tihtheih i nei hram lo'm ni? Kan la indaih lo nasa si a,. Phaia kal a hun tawh bawk si" a lo ti chuai ruih a. 

"Pawisa ka nei lo,. Ka hlawh a tlem sia,.min hrethiam rawh" ka ti a. Rei pawh awm duh loin chaw ka ei sawk sawk a, ka chhuak ta daih. Ka zuk thlen chuan Victora chu damdawi in lama hruai an lo tum mek a, Pi Lingi'n min hmuh rual rual chuan, "A va tihzia tak, rawn biak che ka tum mek laiin, i va kalpui mai loh chuan" a lo ti sawk sawk a. Ka va phur tehchiam lo e aw. 

"U Mateii a awm lo mi?" Ka ti ve ta ngat a. 

A hmel a dur khap mai, "Awm lo" a ti chhum hmak mai. 

"Aw le, ka va hruai ang" ka ti a. Maliani roomah ka kal ta phawt. 

Min lo hmuh rual chuan, "U Mateii a tlan a. A pawi khawp mai. Ka nu vang vek" a lo ti nghal bawrh bawrh. 

"Nia, a pawi khawp mai" ka ti ringawt. Victora damdawi ina ka hruai tur thu ka sawi chuan , "Aw min ngaihtuah suh,. Va hruai phawt mai teh" a ti thliam a. 

Ka chiu phawt a, Victora hruai tur chuan ka intintuah ta a. Ani pawh hmuh a nuam ta deuh,. A mit erawh a la vûng a,. A sual hmel zualin ka hria. A banrek avangin motor a khalh thei si lo va, an driver Dina lah a awm si lo, Lalvala a rawn phei ta ringawt a. Kan pathum chuan kan chhuak ta a. Victora chuan, "U Mateii haw ta daih chu aw. A pawi ngawt mai" a ti charh charh a. 

Ka chhang lo. Vala chuan, "In pahnih hian ṭha tawh rawh u, Tluangi pawh ngaihven a ngai tawh lo, buaina a tam mai mai, Pipi, nang pawn hrethiam rawh" a ti mual mual a. 

"A ho e a. Kan ṭha thei tawh lo" ka lo ti hluk, Victora'n min lo vuan chat a, "Ṭha ang" a ti sup. Damdawi in kan thleng zui ta a, Tihfel ngai ang angte kan han tifel a, buaipui vek a ngai, amahin engmah a ti duh si lo. A banrek chu an x-ray ta a,. A pelh a lo nia. A tukkhum pawh chu CT scan an chawh a, mahse, ni 2 hnua tih tur a ni thung. Chawhma chhungin kan intifel thei a, "Thil ei ang u, chaw ka ei lo" a tih tlat avangin damdawi in thlang dawrah kan chawl ta a. Kan ei lai mêkin a nuin a rawn bia a, "Tluangi û te chu rawn kalin ngaihdam min rawn dil e".a rawn ti a. 

"Ka hnek ve phawt loh chuan ka ngaidam dawn lo, lo la awmtir rawh" a ti tlat. "Chutiang a ṭul lo, hnek ve kher a ngai lo" ka tih pawn, "A thlawnin ka tuar duh bik hleinem" a ti tlat bawk si. Tihngaihna tak pawh a awm lo ve a. Kan ei zawh veleh kan haw nghal vang vang mai. Kan thlen chuan Tluangi û leh a ṭhiante chu an lo awm ngei a. Victora hmel chu a dur nghal khap mai,. 

"Mi pangain mi pakhat min sual rawn a, in la pawr em em zui a, in zak tawh em?" A ti nghal hmiah hmiah mai. Pi Lingi a mangan hmel deuh,. "Bawiha, hei ngaihdam min rawn dil tawh a, tha taka sawifel a ṭha e. "..a lo ti sawk sawk a. 

"Aw le, kan in chhungah êm chuan kut chu ka thlak lovang che u. Mahse, mipa inti ve si chu tumah khawih rawn tawh suh u" ..a ti thei ta hram a. Ka thaw huai mai. An chhuak ta zâl zâl hlawm a, Lalvala pawh a meng rum kher mai. Mipa tan chuan a thinrim thlak ve bawk a ni. Maliani ka han hmu ta nghal a, khumah tukverh lam hawiin a lo ṭhu ngât mai. "I muhil thei na nge?" Ka ti a. 

"Ka thu hriat hi a rapthlak êm a, ka mut a chhuak lo".a ti sep a. Nasa taka lungngai hmel a pu a ni. "Engkim a ṭha leh vek mai ang" ka ti ringawt a. 

"I awih lo maithei, ka nuin min rawn hmu asin" a ti a, a mittui a tling pam mai. 

"Tak tak maw? A va lawmawm êm, i lo dawngsawng ṭha em?"ka ti chul a. 

"Ka ngawi reng, a duh a sawi a, a chhuak leh nghal" a ti a. 

"I nu nen in inkar hi ṭha tawh se ka va ti êm" ka ti vang vang a. 

"Ka rilru hel vek tawh hi chutia tihtâwp mai theih a ni lo a ni. Chuan, keimaha awm ka duh e." A ti chang leh ta nghat a. Ka chhuahsan nghal daih. Victora pawh mu hahdam rih tura ka tih angin thuawih takin a mu ve mai a,. Lalvala pawh a phei leh nghal. Pi Lingi nen kan ṭhu dun leh ta ran mai. A hmel a thutakin lungngai hmel a pu bawk, biak pawh huphurhawm tak a ni. Mahse, ka ṭawng ve hmain, "In kal hlan khan Ma-i chu ka han hmu asin" a ti ta a. 

"Nia, a sawi a, i tiṭha khawp mai" ka ti vel. Ka pawimawh hmel tawp ka awmdan leh ṭawng dan vel chu. 

"Engkim hi i hriat a hun tawhin ka hria. " A ti sap a. Ka phurzia chu a hriat ka hlau zawk. "Hre tura min duh ang chu ngaithla turin ka inpeih e" ka ti a. 

A chhin vang vang hnuah thawk la leh hawkin, "Ma-i bialpa hi Rinzuala a ni a,. Veng ṭhenawm lawka awm an ni nghe nghe. Chhungkaw pangngai tak an ni bawk. An inngaizawng rei tawh bawk a, kan inah pawh tlangnel tawh tak a ni. Keini pawn makpa ang thawthângin kan en ve tawh, amah a felin a rintlak niin kan hria a. Ka chhang chiah fanu Lalawmi hi kan inah a rawn awm ve a, anni hi Lungleiah an awm a, hetah college kalin a rawn awm ve a ni. Ma-i nen pawh an inngainain Ma-i pawn thawmhnaw leh eng ilo a pe fô mai. Mahse, kan Lalawmi chuan Rinzuala chu a lo ngaizawng ve chu niin, ani Rinzuala lah chu a rintlak viau dawn emaw kan tih laiin Lalawmi thlem thluk theih chuan a lo awm ta tlat mai a. Gauhati-ah i pa Zauva check upa kan zin hlanin Ma-i chuan Rinzuala leh Lalawmi mu dun lai chu a lo phâwk pek a! Lalawmi pawh a zan la lain a hnawtchhuak ta a ni. Rinzuala'n ngaihdam a dil paw'n a ngaidam thei thlawt si lo va. Lalawmi nen chuan an inkawp zui ta a, Lalawmi chu ka û te inah a awm ta thung. An suahsual lehzualna em em chu Ma-i an runluih ṭhin chu a ni. Keini pawn kan hua. Mahse, chutih lai chuan Lalawmi pa, ka nau chu Aizawlah a rawn inentir a, kei min bêl lo thei si lo. Mai chuan kan inlaichinna zawng zawng chhut chah a duh a, mahse, ka thei ngawt bik si lo, Lalawmi pawh a pa buaipui turin kan inah a la rawn kal ta zauh zauh a,.chutaṭang chuan Mai chuan min mil lo chho ṭan ta a. Mahse, a la nasa lo. A damloh avangin damdawi inah kan indah lut a, a thisen an han test khan Hiv a positive tih kan hre ta si, min ṭhâwng lutuk a, kei ang mi mawl chuan Hiv te chu natna rapthlak leh mi hurherh te vei turah ka lo ngai ngawt a. Mai pawh nasa taka hauin kan bula chaw a ei leh a awm ve pawh ka remti ta lo va, kan pa leh Victora te pawn a awmzia min hrilh nasa, mahse, khatih lai khan ka ngawng tlat a, ka zirsan lohna a lang ka ti mai. Rinzuala te inah te ka va kal chilh a, Rinzuala aṭanga a kai a nih miau avangin. Lalawmi ngei pawn a kai ve tawh a ni. Ka thinrimna kal chho zelah Rinzuala chu tihnat ve hial ka duh ta a,. Victora hi khatih hunlai khan Rinteii avangin a la bawraw em em a,. Englai pawn a ruiin insual a cho at reng zel. Victora chu fuihpawrhin "Rinzuala'n i û hi kut te a lo thlak a, i û vanga Hiv vei ang ten mi bulah a lo sawi a, engtin emaw tih chu a ngai a ni" ti ang zawngin ka hrilh ta a. Ani lah Rinzuala lo ngei sa em em a ni bawk si. A zan lêng haw chu a lo khawih ta hrep a, Rinzuala chu damdawi inah a luh a ngai hial a ni. A bialpa hlui a hmangaih em em a nauin thi lek lekin a sawisa tih Ma-i'n a hriat chuan a nau chu a haw letling ta daih a.

Rinzuala te lam erawh chuan min ngaidam thei a ni. Mahse, kan chhungkaw boruak a fuh lo chho ta thung. Maliani chu ka ten miau avangin in hnuaia a rawn chhuk pawn ka bikbosan zel a, chu chuan a rilruah nasa takin nghawng a nei chho a, a hnuah Victora ka aṭangin Rinzuala a sawisak chhan a hre zui ta bawk nen, min haw ngawih ngawih a ni ber e. Tin, pawi em em mai chu Rinzuala thih hma lawk khan Ma-i nen an video chu a leak out ta hlauh mai a. Chu chuan Victora tithinrim lehin a lo khawih leh a, Kan inah rawn hruaiin a û hmaah ngei a sawisa ta a ni. A ngaihdanah chuan a û tana ti-ah a inngai a, mahse, Maliani'n khatiang zawngin a lo ngai ve si lo. Rinzuala a hmangaihna a la bo si lo va, a hnu lawkah tiang khan Rinzuala lah a thi ta mai bawk si. Khang a thihna te kha Victora vangah a puh fai ta vek a, kan nufa chuan huat taktêin min haw ta a nih hi. Mahse, ka siamṭha ang, ka theihtawp ka chhuah ang. Amah vangin ka rilru a hah thin lutuk a, ka mizia pawh a inthlak ta vek a nih hi" ..a ti ta mawlh mawlh a. Rindan sa ka nei lo bawk a, mak ka tiin an chhungkaw boruak chhiat chhan chu a ril ka ti viau mai. Victora pawh ka dem hran miah lo, a unaunu thlavâng a hauhsak ve a ni mai a, Maliani natna nei, bialpain phatsan bawk, a hnua thihsan leh bawk si chu a rilru a kal dik lo vek tawh ni zawkin a lang. Ka khawngaih vek mai. Mahse, pi Lingi'n a fanu a natna avanga a lungten ringawt chu awm lo ka tiin, ka ngaihdan a ni vak lo, maliani tan pawh huat loh chu a har ve khawp ang le. 

"Sawi tur pawh ka hre lo" ka ti ringawt a. 

"Nia, i rintlak nia ka hriat avangin ka sawi ta vek a nih kha. Mateii te nupa chungchang pawh hi nakinah chuan i la hre mai ang" a ti leh a. Min rinngamna chu ka lawm a, chutihrualin inrawlh thuk lutuk erawh ka hlau ve tho mai. 

"Engpawhnise, i theihtawp chhuah la, a damloh nat ber lai hian a nu aia mamawh a nei dawn miah lo a nia" ka ti ve ngial a. A bu ve nghat nghat mai. Victora'n min lo call a, ka chho nghal. A tukkhum chu nâ a tih deuh avangin nachhawknaa jection turin min ngen a,. Ka jection ta sawk sawk. 

"In admit mai tur a nia. Tiangte chu" ka ti leh a,. "Inadmit ila tuin nge min awmpui ang? Ka nu mizia i hriat kha" a ti bur mai si. "Ani te chuan a ngaihtuah êm che kha.." ka ti a. 

"Chupawh nise, i bula awm ka duh alawm" a ti tlat. Ka kal tur chu min pawt let a, "Min chhawk hma chu min awmpui rawh" a ti a. A pangchang riau mai. Ka ṭhutpui ve ta reng a, "Engkim ka hre tawh, i û nen in inkar thil thleng pawh, i nuin min hrilh a" ka tih chuan, "Min dem em?" A ti vat. Ka lu ka thing a, "Dem lo, mahse, i nu ka dem. I û natna avanga a rilru put dan kha" ka ti a. 

"Kan hrilhfiah nasa alawm. Tihngaihna a awm ngang lo a ni" a ti ve luam a. 

"Mahse, boruak hian that lam a pan alawm, nang pawh i rui tawh lo ang a" ka ti ta zaih a. 

"Chuan, min nei ang a tiraw?" A ti thut. 

"I â mi?" Ka ti chiam a, " lo,. Inneih ka duh. " A ti leh bur tawh. 

"I insiamthat loh chuan ka nei awm lo che e" ka ti si,. "Min neih duh nan thla 3 vel ka piangthar der mai ang" a la ti zui. 

Chutiang chuan nitin Vica leh Maliani ka enkawl kawp a, Vica pawh a tukkhum chu result a ṭha a, a lawmawm tak tak. Dam lam a pan ve mêk a, Maliani leh a nu inkar pawh a ṭha hret hret chuan ka hria. Mahse, pawi deuh maiin U Mateii te chuan bungraw lak an rawn tum ta tlat a,. Pu Zauva'n a phal lo bur thung. Mak leh em em chu U Mama chuan engmah a sawi ve eih lo a, bungrua chu la mah se pawi a tih hmel vak loh. Pu Zauva ngenna avangin an la ta lo phawt a, U Mateii pawh an ko naa a rawn haw duh rih lo. An buaina tak kha ka hrethiam tehnuai lo ve a. Dampuii leh U Mama chu an lo inkawp ru tak tak nge phei zawng ka hre lo va. An lo inzui a nih chuan U Mateii tan a ngeiawm ve khawp ang, Pi Lingi'n a ngeih lo sa tawh bawk nen. An fate pawh U Mateii bulah an awm a, an rawn len ngai pawh ka hre lo. Putea ten min beiseina chu ka la tihlawhchham zel a, ka nuten an puktir nen tu tu emaw puihnain phai lam pawh an pan ve thei ta a niawm e. Nun hi a inthlak fô a, kan awmdan ngai reng hian a awm theih loh. 

Victora nen pawh kan ṭha ti tawh mai ang. Tluangi avang khan kan inhau zui tawh lo va, amah Tluangi ngei pawn a rawn be ngam tawh lo. Kei aiin a hmelṭha daih zawk a nia,. Nge maw kei hi min duh ve tlat ni. In tharah kan insuan lut ve ta bawk a, kan thawl ta deuh e. Victora dam chian hnu chuan zanriah kan ei chhuak fô a, ka nute pawn min khap lem lo. Zu a in tawh miah lo bawk a, keipawh ka ngaih a ṭha chho ve ṭan,. Chutihrualin inneih chu ka hmanhmawh tehchiam lo. Sunday zan ka inkhawm kal tur chu Victora'n min rawn call a, hmanhmawh hmel deuh hian, "Ka lo hruai dawn che, ka û a ṭha lo" a rawn ti. Ka hlauthawng ve hle, ka inthlak sawk sawk a, ka lo nghak ta a. Ani pawh a rawn thleng har lo. Chak zetin min tlanpui a, in kan thlen chuan in chungah an lo awm vek a, Maliani chu a lo chau hle a lo ni. Dam lam a pan ṭan ve tawh emaw tih laia chutia a han chau thut chuan mi ṭhawng viau mai. Ka han en dik nghal vat vat a,. "A rang thei ang berin damdawi inah hruai ang u" ka ti a. Anni pawh ka thlen kher an lo nghak chu mak ka ti. Chau hle e ti lo chuan Maliani chuan, "Aih, ka thi dawn a nih pawhin ka khumah ngei thih ka duh,. Ani pawh kha ama khumah ngei a thi a" a rawn ti ṭâwk ṭâwk a. "Hruai kan tumin tiang khan a ti tlat sia..tihngaihna kan hre lo a ni" a pa chuan a ti a. 

"Malian, i dam a ngai, i thi thei rih lo. Kan sawi dun ṭhin kha, engtikah emaw kan inah i la rawn kal dawn kha.." ka ti a, a chal ka dawm bawk. A meng peih ngawr ngawr a ni. "Dam hi a nawmna ka hre lo, mi tibuai reng renga dam ve reng hi ka peih tawh lo" a ti tham ṭiak a. 

Pi Lingi mittui hru zauh chu ka hmu reng. "Chutiang sawi tawh suh,. Damdawi in kal i duh tlat loh chuan drip khai ang aw" tiin ka che nghal sawk sawk a. A vein ka zawn lai chuan Pi Lingi chu khumah a rawn ṭhu ve a, "Mate, Ma-i, kal suh aw. Ka hmangaih em em che a nia. Kan inkar a ṭha chho ṭan dawn chiah a, hetianga min kalsan leh si chuan engtin nge ka awm ang?" A ti mawlh mawlh a. Maliani erawh a ngawi reng. Victora'n min lo pui bawk a, Vein pawh kan zawng hmu hram e. Thisen var kan pek lohna a rei deuh avanga chau zual ta a nih ka ring. Ka khawngaih ṭhin mang e. 

A muthilh hnu pawh chuan kan ṭhutpui ta reng a. "Riak ve mai rawh, zanin chu.." pu Zauva'n a ti a, ka tum deuh sa hrim hrim..Sangi'n thingpui te a lum leh a, Pi Lingi te nupa pawh mu tura ka tih angin an mu ve nghal, U Mama erawh a chhuak a,. Victora nen chauh Maliani roomah kan awm a. "Va mu rawh, nang pawh. Keipawh ka mu nghal mai ang" ka ti a.

"Eng emaw a thlen chuan min kaitho vat la aw" a ti a. Kan inmangṭha hnuah a room lam min pansan ta a. Kei pawh Maliani rooma an sofa hunah chuan ka mu thân a, mut erawh a chhuak mawh viau thung. Dar 11 velah Victora'n, "Lo phei mai rawh,. Ka bulah mu rawh, an hre chuang lo vang" a rawn ti a. 

"I zak lo, ka duh teuh lo mai" ka ti ve tlat si. "Ka lo phei zawk mai ang aw..a nih chuan" a la ti zui. Ka chhang duh tawh lo. Kan inkawp hnuah hmeichhia ka nihna angin min zah thiamin min hrethiam ṭhin viau. Ka thu pawh a theihna chinah chuan a awih ve bawk. Chance vawi tam nei mah ila, sex kan la hmang lo va, ka hnar zel avang hian a tum lui ngai em em tawh lo. Hei vang hian kei pawn ka ring ṭan ve viau tawh a ni. 

Zawitêin kawngka a rawn hawng a, a rawn pen lut ta dân dan mai. A lo kal kha ka ring miah lo a nia. Ka bulah a rawn inhnawh ve sawt sawt a, ṭawng hluah chi a ni mang si lo, "Va phei rawh, Maliani a harh ang" ka tihin, "Reilotê" a ti deuh tlat. Inhmatawnin kan mu ran a, a chep bawk nen, kan inhnaih kher mai. Min rawn fawp a, kei pawn ka lo chhang let ve vat,. "Va phei tawh la" ka ti leh a. Chutihlai tak chuan ka phone a rawn ri thut, ka van phu chiang tak. Kimtea lek a lo nia! Tun ang zan rei tawha min lo call ta chu a pawimawh viau a niang tiin phone chu lain room chu ka chhuahsan a. Min rawn zui nghal vut,. Ani Kimtea lah a lo rui chu niin, "Hruaipui, ka hmangaih lutuk che. Kan inkar hi ka siamṭha leh ang" a rawn ti buh nuaih mai. Thinrim zetin ka off a,. A rawn call leh avangin ka phone pawh ka switch off ta hial. Victora chuan hmel rum zet hian, "Tu nge?" A ti a. 

"Ka ṭhianpa" ka ti hak ringawt. 

"Dawt sawi suh, tun ang zan rei tawhah i ṭhianpa mai maiin a be lovang che" a ti khauh bur mai a,. "Tak taka ka ex a nia" tim dâia ka tih chuan, "Ex te la biak theih maw i nih a? " A ti rum ûl mai. 

"Mu ang, va mu rawh, inhnialna hun a ni rih lo" tia kal mai ka tum chu min pawt lêtin bangah min nawr bet a,. "Tun a chinah i unaupa tih loh mipa reng reng i be tawh tur a ni lo. A chiang em?" A ti hriam hraih mai. 

"Ka bia ang. Ṭhiante ka nei ve alawm,.thikthu tihchhiat vak a ngai lo, naupang kan nih tawh loh hi" ka ti puat a. 

"Hruaipui, min namnul mah mah, tun hnuah chuan ka strict viau tawh dawn. Ka nupui tura ka thlan hi mipa dang biak theihin a awm tur a ni lo. " A ti fân ruih a. A mitmeng erawh a la alh phat phat mai. 

"Ka mu dawn, muttui" tiin ka kal tau sawk sawk a. 

"Pakhat ka chân tawh a, a pahnihna chân leh ai chuan tualthah pawh a ṭha zawk." A tih sup ri chu ka hre hman. 

"Ka be tawh lo vang" tiin ka ding dat a. A mitmeng nelawm loh zet kara nunrâwnna ka hmuh avang chuan ka insangmar ṭeuh mai. Ani hi Rinteii avanga pawisak nei thei tawh lo kha a ni miau a..

(Ka ziak tam hman lo. Tin, football tournament-ah a buai pawlah ka awm ve avangin zan khat dana ka rawn dah a ngai maithei aw.)