Amah leh kei 7

AMAH LEH KEI..(7)

Ziaktu : Toni Râlte

A tuka Maliani te in ka va thlen chuan, Pu Zauva pawh a lo la awm a. U Mama te nupa pawh. An hmel a thutak hlawm êm avangin in chungah ka chho nghal daih a, tuman min lo be bik lo pawh kha a nuam lo hrim hrim. "Good morning, i tho harh em?" Ka ti a. Parda ka hlim nghal sawk sawk, "Ka morning chhe lutuk" a lo tih chuan ka nui hawk a. Chhungrila mawlhtu nei chunga damlo enkawl chu thil nuam tak a ni lem lo. 

"In tur i duh em?" Ka tih chuan, "Thingpui ka lo in ang e. Chuan, U Mama te chu an indang dawn ta em ni?" A ti zaw mah a. 

"Ka hre nang, i hre zawk lo mi?" Ka ti hû mai. 

"An buai tih chiah ka hria, mahse, in hrang an chan chu ka ring lo. Ka pain a remti lo vang" a ti hram a. An indan chu a hlau ve hle niin a lang. 

"Indang lo turah ngai ang." Ka ti ve sep a. In hnuaiah ka chhuk zui nghal. Chokaah Sangi a lo awm a, Pu Zauva pawh ka hmu tawh lo. Thingpui chu ka lum nghal a, zingah chaw ka ei loh avangin keipawh ka ril a ṭâm angreng. Ka harh tirha ka phone ka en bak kha ka khawih leh tawh lo va, Victora msg engmah ka la dawng lo bawk. Sangi chuan, "Nizanah an inhau leh a. U Mama phei chu a thinrim khawp mai". A ti sar sar a. 

"A buaithlak e, indan vel chu an sawi em?" Ka ti ve a, "Sawi e, ka puin a remti teuh lo, ka pi nen an inhauh phah hrep alawm. " A ti a. A hahthlak a nih hi maw, hetiang chhungkua nih chu. Thingpui ka siam zo chu ka chho nghal daih a, U Mateii'n , "Kan ṭha maw?" A lo ti var a, a nui sâng bawk. 

"Aw ṭha e. " Tiin ka nuih let ve a. Pi Lingi erawh chuan min be lo. U Mateii chu dawrah a kal dawn lo a niawm e. A inbuatsaih lo êm mai. Maliani nen chuan thingpui chu kan in a, "Nizan ka mu ṭha lo lutuk a, vawiin chu intihfai vata mut deng deng ka duh" a ti a. Pawi ka ti hran lo. 

"Eng nge Vica nen in inkar te?".a ti leh zauh a. 

"A tha ni mai" ka ti ringawt. Victora nen kan sawi dun phawt loh chuan hrilh rih loh ka duh. A va intifai a, ka dressing leh hnuah ka jection a. A mu ta vang vang. Chhun eitur siam nan a la hma deuh si a, Sangi puih pahin tiin in hnuaiah ka chhuk leh a, Sangi chiah a lo awm. "An chhuak vek, ka pi pawh a chhuak ve" a lo ti a. 

"Ti nge maw i pi hian U Mateii hi a ngeih loh em em ni? A fel tehlul nen" ka ti ve ngial a. 

"Nia, mahse maw nizan an inhauhna vel aṭang chuan U Mateii hian U Dampuii kha luahlan daih angin ka pi chuan a sawi a. 'Dik lo takin Dampuii chungah i ti a, ka fapa i neih theih nan thang i kam kual a, Mama hiam a hriat a hun tawh.' tih velte a sawi a, U Mateii erawh chuan a pha nasa,. Ka hrethiam tawh bik lo. Tuna an fa upa zawk Nanteii phei hi chu U Mama fa ni ve lo ang hialin ka pi chuan a sawi asin".. a ti ta mial mial a. Mak ka ti leh ta hle. Ṭawng ka tum lai takin ka phone a rawn ri ta sia, Victora a la ni zui. Biak ngei ṭha ka tih avangin ka chhuak a, Garrage piaha ṭhutna an siamah chuan ṭhuin ka be ta a ni. 

"Nizanah ka chatthla daih a, hei Kolasib aṭangin kan rawn chhuak dawn chiah,.msg pawh min hnutchhiah miah lo va".tiin a la rawn vui ngam nia! 

"Tluang deuhin in lo kal dawn nia,. Hmaichhana sawi dun tur kan nei" ka ti salh a. 

"Eng thil nge? A va pawimawh hmel"..ngaihsam hmel zet hian a ti a. 

"Pawimawh khawp mai. " Ka ti ringawt. nkhum phiar phiar ka châk lutuk, mahse, phone aṭanga inhauh te, inhnialte hi mahni inhremna a nia, chinfel tak tak a awm thei ngai lo tih ka hrechiang tawh êm a ni. 

"I awki a dik lo. Thil dik lo ka ti em ni?" A rawn ti leh hram a. 

"Lo haw phawt rawh. Ka buai,.ka dah" tiin ka insum zawh loh ka hlauh avangin ka dah ta a. Thawk lain ngawi rengin rei tawk tak ka ṭhu vang vang. He chhungkuaa hnathawka ka luh ve aṭang khan buaina eng eng emawin min chim ve ta reng a, ka hriat tur nisi lo ka hriat thar te, rilru tibuai tur ting tanga zêp rûk an neihte chuan kei meuh pawh min tinguiin ka inthing harh hleithei thlawt lo a ni e. Victora ngaihtuah loh luih tumin in chhungah ka lut leh a, chhun eitur ka siam zui ta nghal. Ka siam zo tih velah Pi Lingi a rawn haw a, Sangi khan a incheck up thu a sawi tak e. Ni e, chîktu tan chuan ani pawh hi a bawrhsawm chhoin natna eng emaw tak chuan a bawm tih a lang reng mai. Ṭhutthlengah a ṭhu hnawk a, an driver hi Vena niin kan inhmuh khât deuh avangin kan la inbe nêl vak lo. Tui a rawn in a, "Thingpui min lo siam ve lawk mai teh a, engmah pawh ka la ei lo" inthlahrung takin a ti a. Sangi'n in chung lam a tihfai lai a ni. Keipawn îhe lovin ka lo siamsak nghal sawk sawk a. Pi Lingi'n min rawn koh avangin ka kalsan ta rih. 

"Hruaii, Maliani enkawl ngawr ngawr hi hna a tling meuh lo tih ka hria. Doctor ten ka natna hi an la zep niin a lang a, engtikah emaw chuan min la enkawl a la ngai ang. I hlawh pawh kan pe double mai ang che" a lo ti nghal zat zat a. A hmel chu a thu that a, eng emaw tak chu a tlachham chiang a ni. 

"Nia, a pawi hleinem" ka ti ve ringawt. 

"Damdawi ina inenkawl ai chuan ina hahdam taka inenkawl ka thlang zawk. Kar tawpah test result a chhuak dawn a, chumi azir chuan kan sawi ṭha leh ang. Victora chu i ṭhen fel tawh em?" A ti leh daih a. 

"Kan inhmuh veleh sawifel ka tum" tih chauhin ka chhang. 

"A ṭha, tunah pawh Tluangi'n a zui a, engtin nge an zuk khawsak ang tih i hre lo. Ka fapa a ni na chungin hmeichhia te infiam nana a hmang hi a theih chin chinah dan ka duh. " A ti leh mawlh mawlh a. Nizan vel kha ka sawi châk kher mai, mahse, ka tîm ve deuh. "Maliani chu engtikah nge i biak ang." Ka ti ve ta chat a. Min rawn melh ralhin, "Ka hre lo. Hun ka tih hunah a ni mai".a ti leh ringawt. 

"Be vat la ṭha ka ti khawp mai. " Ka ti ve leh hram a. 

"A tawk, i thu thua awm turah min ngai suh. Ka tan awmpui aia i sanna a awm lo" a ti leh hmak a. Ka tho ta nalh. 

Maliani nen an zia hi inân chang a awm. Ṭha takin a tirah han inbiain thil han sawi ṭhin mah ila; engtin emaw ka thurawn emaw ka duh anga awm tur anga an inngaih hian an danglam leh tlat zel. Ka thu awih anga lan an hreh ka ti mai, an inhung bîkna palchah kha an hlau a ni ber. An chapo vang lam ai mahin invenhim an duh a, an nihna diktak hailan an hlau niin ka hria. Chutiang thleng thlenga zuk hailan chinral kha ka tum ber pawh a ni lo. He chhungkuaah hian remnain rorel se ka duh ber zawk. Ka hne tawh. A ngaitê angin ka nileng hun chu ka hmang leh a, ka pa dawr min hnutchhiah pawh ka la tlawh lo, chu chuan mi kap ve deuh run a. Tlawha thil tihfel pawh a hun ve tawh reng, ngaihsak lo lutuk anga min ngaihte pawh a hlauhawm alawm le. Tlai lamah an rawn haw khawm leh ṭak ṭak a,. Pa ber leh Victora chiah an lo la haw lo. Keipawh ka timingah ka haw ve leh ta a,. Victora nen kan inhmu hman ta lo. In lamah an buai vak lo bawk a tiin ka pa dawr tlawh haw chu ka rilruk ta a. Tka'n min rawn hruai leh,. Ka pa dawr kan va thlen chuan an lo lûn viau mai. Hnathawk pahnih an awm a, an fel thar thar ngei mai. Ka lo nghak a, customer an ṭin takah chuan ka han insawi a, min lo beisei reng tawh thu an sawi nghe nghe. Manager chu Pu Hruaia a ni a, hnathawk tlangval fel tak mai chu Dinga a ni bawk. "Pu Hruai, kei chuan han enkawl vak ngaihna ka hre lo va,. Lehkha te kan han tifel ang a, ka pain a thawhtir dan ang che u khan in lo thawk leh thei mai ang chu tiraw?" Ka ti a. 

"Ni e le,. I pa kha pa ṭha leh thilphal tak a ni bawk a, keini pawn chhungkaw chawm nan tak tak kan hmang tawh a. Zep nak emaw nangmah hian min bân mai ang tih kan lo hlau ru em em asin. " Nui huah huah chung hian a ti a. A nelawm roh hle. 

"Nakinah chuan ruahmanna ṭha zawkte pawh kan la siam ang a, tihzau belh emaw lamte pawh maw. Ka ring deuh tawp dawn che a nia. " Ka ti ve leh a. Mi rinawm tak a nih ka rin vang a ni, a chhan chu dawr a hawn aṭangin ka pain vawiin thlengin a chhawr miau a, sawisep kaina chu nei se a bân daih tawh ang. Chutiang chuan ngaihngam takin kan inthlah ta phawt a. 

Zanriah ei laiin Victora'n a lo call a, ka la lo. Ka intihfel hnua ka phone ka en chuan, "Msg i lo hnutchhiah ka beisei a. I lo haw daih bawk sia" tih thu a rawn thawn a. 

Ka reply lo. Ka seen tih a hmuh hnuah a niang min rawn call leh a, "Eng nge i awmzia hi?" A rawn ti dut dût. 

"Eng nge ka awmzia?" Ka lo ti hâ a. Vawiin khan rawn thleng hman nise hmaichhana biak kha ka tum reng, ka haw hun thleng pawn a rawn thleng si lo va, ka hawnsan mai lohin. 

"I awmdan a dik lo. Lungawi lohna i nei em ni?" Zaidam zeta a rawn tih chuan min hneh leh lek lek a ni. 

"Nei tawh lo ve. I nu leh i û te thu ka zawm ta a nih kha..an lo sawi dik bawk sia" ka ti ta duah a. 

"Ka lo kal" tih leh phone dah a rual. Lo kal se pawi ka ti lo, naupangchhia zawk zawk kan ni tawh bik lo va,.puitling taka hmaichhana sawidun kha ṭha ka ti ve tlat. Bakah ka duh loh ruk deuh chu insawifiah se tihna rilru ka la pu tlat chu a ni. A awmziaah chuan insawifiah se ka awihsak leh dawn tihna a nih ber chu. Ka lo nghak ve ta ngawt a, Ka nu leh nuteii te chu Putea te ina kal turin an chhuak a, Unau na na na chu an in lama zuk kala ruahmanna siam an tumte pawh a niang e. Kei chuan ka ngaihven lo. Mimal tak chuan ka pui hauh lo thung ang. Ka nuten an lo pui a nih pawhin ka sawisel chuang lo bawk. A rawn thleng ta a,. "Chhuak lawk ila" a ti a.

"Hetah a sawi theih" ka ti tlat si. Tetea leh bawihtea te pindanah an awm a, ka hre tho. Pawi ka ti lo. 

"Aw le. Eng nge i buaina?" A ti ta nge nge a. 

A mitah tak melhin nizana thil thlen dan, Tluangi'n ka call a lak dan engkim chu ka sawi ta mawlh mawlh a. A tawpah, "Hotela thleng si, dâwt min hrilh leh Tluangi'n i phone chinglet thei khawpa a hnaih che kha kan inṭhenna tur chhan a ni"..tiin ka khar a. 

A ngawi ta vung vung. Ka ṭawng tawh bik lo. Chutah, "Ka tihpalh" a ti ta sup a. 

"Awmzia a awm lo" ka lo ti hmak. 

"Sawifiah i remti em?" A tih chuan ka rilru a buai ta nak mai. Insawifiah se ka awih ang a, ka tlawm leh mai ka hlau si, insawifiah lo se ka rilru a nuam chuang bawk si lo. Ka ngawi ta reng a. A ding hluai a, thûk angreng zeta min rawn chhuk melhin, "Ka kal ang. Ka hrethiam e. " A ti dam thlup a. Chhan hman lohin a chhuak ta nul nul. Ka hrilhhai letling zawk. Mahse, ka pride a rawn lang ve vat tho a, "Insawifiah pawh tum lui ngam lo khawpa tisualtu ka then theih tluka ṭha a awm hleinem" tiin ka infuih ve ngial. Ka nute lo hawn hun pawh nghak thleng lovin ka mu a, an lo thlen thleng erawh ka la meng kur thung. Ka zep lo, tlawm ka intihna hian min vaw chau lutuk a, ka na a, ka zak a ni. Tluangi'n min ngaihdan tur te ka han ngaihtuah a, ka thin a rim et et bawk. Engpawhnise, hmalam hun chu tâwn ve leh bawrh bawrh phawt mai teh ang. 

A tukah tukṭhuan kan ei laiin ka nuin, "I putea te chu an mangang ve tak tak a nih khu,.engtia han tih chi nge maw ni dawn le.." a ti chuai raih a. 

"In tih dan dan, kei chuan ka pui thei lo" ka ti bur mai. 

"Chutiang tur a ni ngai lo. Eng ang pawhin kan chungah lo tisual tawh mah se; kan thisen zawm awmchhun an la ni ve a, mamawh huna inpuih aia hlu a awm hleinem. Anni pawn kan hlutna te an hre chho ve zel mai ang" ka nu bawk chuan a ti leh charh charh a. 

"Putea nena an fa te chu nise ka pui thei mahna, a nupui fabîk, kan awmho lai pawha kei aia lal ziah Lawmi tan ka cheng khat pawh ka sêng dawn lo." Ka ti leh tlat si! Ka pa lakah pawh khatiang khawpa rei hel thei fanu a nei tih hretu ka nu pawh chuan beidawn hmel zetin min en tawp ringawt. 

"I nuteii nen tlem azawng ve ve kan tihsak mai ang. An duh ang zat phei chu tihngaihna a awm dawn lo a " a ti ta nge nge a. Ka chhang tawh lo. An tih tihin ti rawh se. 

Hnaa kal pawh a peihawm loh mang e. Kal tinuam vetu ber nen kan inṭhen ta rup sia. Mahse, ka ngui hmel hmuh a duh vanga min kawp dertu chu hmel hlim taka hmachhawn ka duhna chuan chona min pe a, phurna tlem chu ka la nei ve thei e. Nidang aiin ka thawmhnaw hak pawh ka uluk ve ngei. Ka va thlen chuan Pi Lingi leh Sangi bak an lo awm leh tawh lo. Ka thleng tlai ve deuh bawk a,. Dar 9 rik hma kher kherin ka thleng tawh ngai bik lo, anni pawn min khik khak tawh chuang lo. Victora pawh a chhuak tawh a ni ngei ang le. Maliani pindan ka pan nghal a,. Ani a kua a lo ṭha lo chu niin ,nizanah vawi 6 dawn a tlan thu a lo sawi a, a hmel pawh a tla kawk alawm le. Ors ka siamsak nghal mawlh mawlh a, ka intir zui nghal. "Drip kan khai dawn nia"..tiin kan vih nasat tawh avangin a bân chu tuiluma deh phawt tumin tui lum tur chuan in hnuaiah ka chhuksan leh rih a. Tui ka lum lai chuan Victora a rawn lut thut mai. Inthunun hram hram erawh ka tum ve, ngaihven loh luih ka tum tlat a, mahse, ka bulah a din run avangin a harsa angreng. 

"Tuilum kha eng atana hman tur nge?" Pangngai taka a tih chuan, "A bân khi kan vit nasa tawh sia, ka dep ang ka ti"..ṭha takin ka lo ti ve a. 

"Ni dawn tak e. Chuan, i ṭha em?" Tiin min melh a, ka ngui hmel hmuh a duh tih hrereng chungin ka nui sâng a. "Ka ṭhat loh hmel em ni?" Ka ti zangkhai vah. 

"I tha mah mah a nih kha"..ngeiawm rawngkai lek lek hian a lo ti a. Ka chhang zui lo. Tuilum keng chungin in chungah ka chhohsan ta a,. Min thlir zui tih ka hriat avangin ka danglam deuh. Maliani chu ka dep a, kan vihna hnuhma duk thleh thluah te chu ka melh vawng vawng mai. Vein hmuh zawh a har tawh avang hian kar khat chhung tawp venflon vuah chang kan nei ṭhin, amah pawn ngaiah a nei deuh tawh. Mahse, a rawn puara a rei deuh hnuah chuan nâ a ti ṭhin a. A laklawha phawi a ngai fô zel. 

"Victora chanchin i la sawi miah lo" a ti sap a. 

"Sawi tur a awm lo alawm" ka ti ringawt. Ka deh zawhah a va inthiar leh a, naktuk maiah thisen var pek leh a ngaih dawn avangin a hrehawm a ti dawn em a tiin, "Drip hi chu khai rih lo phawt ang. I chau viau naa, soup ka zu siamsak ang che. Chuan ORS hi lo in tluk tluk phawt teh aw. Kha, i chau lutuk"..ngaihtuah zetin ka ti a. A mitmeng te chu a da lup mai si a, ani damlo chak lo sa tan chuan kaw that loh lehzel chu a pingling tlat. "Umm..ka chau takzet. Ka muhil ang aw"..tiin a chhing diar diar a. Muhil rih mah se pawi ka ti lo. Kawṭhalo damdawi ka eitir tawh bawk a, a muthilh hnuah in hnuaiah chhuk lehin soup siamsak ka tum ta a ni. Sangi'n pi Lingi dar a hmehsak a, kei tiang inhmeh, inzût lam hi ka zeihawi lo viau. U Mama te chu an indang dawn ta lo a nih hmel a, engmah boruak danglam thleng chu a awm tawh rih lem lo. Ṭhutkhawmna pindan lamah ka va phei a, "Eitur hi eng nge in duh ang? Ka'n siam nghal law law ang e" ka ti lâng lâng a. Pi Lingi chuan, "I siam ang ang kha a ni mai. Chow pawh a la awm kha.." pangngai deuh hian a ti a. Mak ka ti zawk, ṭhat a chhuah ve dawn te hi a ni ang em? Chokaah bawk ka lut leh a,. Door bell a rawn rik takah chuan Pi Lingi bawk chuan, "Pipi, nangman lo hawnsak lawk mai teh, Sangi a laklawh sia" a rawn ti nem leh thliam a. Nuihza ru deuhin kawngka chu ka va hawng ta a. Ka beisei loh tawpin hmannia kan hmuh Tluangi tia a koh, Kolasibah pawh a kalpui ngei mai nen khan kan inhmachhawn ta ran mai. Mak ka tih ang bawkin ani pawh a meng phâwk ve a, apron ka ha kher bawk si. Mahse, a harhchhuak hmasa zawkah ṭangin, "Lo lut rawh" ka ti vat a. Ka hnungtawlh hrat bawk. A rimtui kher mai , a rawn penlut a, Pi Lingi chuan, "Tu nge a? Pipi" a rawn ti leh lâng lâng. 

"Victora ṭhiannu" ka ti a. Bialnu tih ka sawi hman ṭêp a ni. Ṭhutkhawmna pindan lam ka kawhhmuh a, chokaah ka luhsan leh daih. An lo inbe ve tawh mai ang chu. A hnu deuh fêa Sangi rawn lut chuan, "Ti nge? U Vica nen in ni maw ka tia" a rawn ti lut a. Nia, kan inzui chhung reilotê khan amah Victora hian zep hni hne a tum buai lo bawk a, Pu Zauva thlengin an hria tih ka hria. 

"Chu chu ti nge?" Ka ti let ve a. 

"Kha nu kha u Vica roomah a chho hmiah sia,. Ka pi lah khan engmah a sawi bawk si lo"..a ti ta a. Victora chu a hnaah a kal lo tihna a ni phawt ang a,. Aaa..ka lo buai vena tur a awm lo ve. 

"A ṭhiannu a niang" ka ti ringawt a, "Chupawhnise, i awm lai laia U Vica rooma han kal kher.." ner nâng chung hian a ti a. Ka thlavang a hauh ru ve tih ka hrereng, "Engtin an awm dawn hleinem. I pi va ko rawh. Maliani ka han pe lawk ang e." Tiin ka ei siam chu bowl-ah ka suak chhuak a. Tray-a chawiin in chung lam ka pan nghal. Pawi lutuk tak maiin stepah Vica leh Tluangi te nen chuan kan intawk ta tlat mai le! Mahse, zâmna leh han laihna chhetê mah ka nei lo chu keipawn mak ka inti. "In maid a ni reng sia,. Ka bialnu te kha i ti vel a.." Tluangi aw chu a ring lo, ka bengah erawh a rik dan a danglam zar mai. Victora chuan, "Maid ni loin ka û enkawltu nurse a nia,. Ka û hi eitur a siamsak ṭhin. Pipi, kan eitur a daih ve thei ang em?" A ti nghal zat a. 

"Thei ang" tih chauhin ka chhang,. Pipi tia min ko ta pawh chuan min khawih danglam tho tho mai. Ka chhohsan a, "Lo inla bialpa ve che sia..ka lo zak" Tluangi tihzui ri chu inpetruh chunga ngaithlain ka hawilet lo thung. Maliani chu a lo la mutui viau mai a, tihharh ka hreh si, a damdawi ei a hun tawh bawk si. 

"Malian, hei..intiharh lawk rawh. Damdawi ei a hun bakah thil i ei a ngai"..zawitêin ka ti a. A rawn harh ve mai. Damdawi chu ka eitir nghal a, "I ṭhu peih hram ang em? Thil sakhat i ei peih loh pawn soup tal hi ei tum rawh aw" tiin ka kai tho a. A ṭhu chhuak ve mai bawk. "Ka nu ang mai i ni" a ti sep a. Ka rilru a dek zawk thei, "Kum lamah kei aiin upa mah la, i u ka ni" tiin ka uang zui ta daih a. A khi ve sak mai. Soup chu a hawp zo ve vek a, ka va lawm tak. A harh deuh hawk bawk nen, "Intihfai ka van duh" a ti leh a,. Bathroomah kan inhruai leh, a tluk leh mai ka hlauh avangin kawngka pawh ka hawntir a, balh leh rimchhiat hi a hlau bawk a, a rimchhe ngai lo rêng bawk. Kan inmuttir laiin kawngka chu an rawn kik a, chumi rual deuhthaw chuan, "Ka u, ka ṭhiannuin rawn kan che a duh a" Victora aw kan hre zui nghal. Ka hawilet vat a, Tluangi nen an lo ding ran mai. Tluangi chu a khi var var bawk. "U ma, min la hria em? Tluangi kha, Tluang tluangi kha" tiin ka ṭhutna lo lam khum tlangah chuan a rawn ṭhu ve chat a, Maliani ringawt a melh bawk. Maliani lah chuan a'n hriat loh hmel khawp a. A melh vang vang hnu pawn, "Ka va hre mai lo che ve" a ti ta sep a. 

"Tluang Tluangi kha mawle,U Lawmkima nau kha. " Victora chuan a lo ti var a. 

"Ee! Lawmkima nau maw? Tikhan ka hre leh deuh che. I va fel ve" Maliani pawh chuan a ti ve ta chul a. Kei chu ka la thu ngawi reng. Ka awmdan chu a lai kual vel vek. 

"Nia, ka awm bo char char a, hmanni lawk khan ka rawn haw a. Vica hian i dam loh thu a sawi a, ka rawn kan ve che nih hi. Hei nurse i nei fel a, i dam vat mai ang" a ti leh hlang hlang a. 

"Nia, amah vang hian lawm dam ka tum leh tak ni.." Maliani'n a lo ti ve hmak chu ka lawm viau. Kan inkara boruak inmûng chu a hrethiam pha ve tho maithei a ni. Mi mawl a ni bik lo bawk a. Victora chuan, "Nia, Pipi hi a fel êm a,. A lawmawm tak tak a ni." A lo ti ve ngei bawk. 

Mahse, min tih elna tih ka hrethiam ve kur a, ka lawm hran miah lo. "Ka zuk sil fai lawk ang e".tiin a thil eina chu ka khawm sawk sawk a,. Biak leh hman rual lohin ka chhuk vang vang. Ka silfai sawk sawk a, an rawn lan leh hma ngeiin in chung zawlah ka chho leh ta daih. Khua a duai angreng a,.chuvang ni maw ka ni lûk mai. Thli a rawn thaw heuh heuh a, Ka hringnun kal chhoh dan ka ngaihtuah ta mai mai. Engtianga rei nge ka ṭhut pawh ka hre lo. 

"A va leng awm ve" tih ri ka hriat chuan ka phu zawk a. A aw aṭangin tu nge tih ka hriatchian em avangin hawilet tawh chuang lovin, "Leng lo ve" ka ti sap. 

"Ti nge nangmah leh nangmah i inbum?" A ti leh a. 

Ka nui hawk. "I hre lo ve" ka ti nghat a. 

Ka bulah ṭhuthmun rawn rem vein, "I nui tak tak lo. Tuaimam" a ti sup a. Hmalam ka la melh lui ngat ngat, "Ka ngui hmel i hmu châk em ni?" Ka ti dam thlap a. Ka inthunun nasa viau. 

"A teuh lo. Mahse, keimah vang ni miah lo va i hlim hmel hmuh erawh ka duh lo"..a ti hriam hraih a. Ka chil ka lem khawlh,. Che hrutin, "Ka chhuk dawn" ka ti a. Mahse, min pawt ṭhu rang kher mai. Min kai lawk a, a chak nasa si, "Min thlah rawh, ka duh lo" tiin ka tal chiam a, in chung thlanglam railing-ah chuan min nam bet a, thli lah chu a rawn thaw nasa tial tial lehnghal. Ka sam pawh a tawi a tawiin a phe hlawp hlawp mai. Ka dar tawn tawna chelh betin min sawi nghek nghek a,. "Engvangin nge kei hi i tan engmah ka nih theih loh? Ka khawvel chhuahsan hlen tura min hneh thei khawpa mi chak ni turah ka lo ngai che a. I lo ni bik lo. Hmeichhe dang ang tho i ni. I chak tawk lo. A dik em?" Tiin a au tuar tuar a,. In hnuai lam aṭang chuan kan thawm an hre pha lo vang. 

"Victor, min thlah rawh. I engmah ka ni lo, i duh leh kha uipui kha va mutpuiin nuam va chenpui rawh. Ka ni ve lo, i duh ang hmeichhia nih hi ka tum reng reng lo. I hria em?" Tiin ka nam vak vak a,. Kan insual a ni thawthâng e. 

Min thlah thut a. Mitmeng hriatthiam harsa zeta min melh ngat ngatin a khi ta suk a. A râpawm lek lek a ni. "Kal rawh. Ka hlatah chuan kal ta poh che. " Tiin amah zawk chu a hnungtawlh chhat chhat a. Hrilhhai ru zetin ka lo melh ve,. Mittui tling ṭeuhin in chung atang chuan ka chhuk thla ta hlawk hlawk a. Ka ṭah a chhuak em em mai chu ka hrethiam lo. Choka bul bathroomah ka lut a, tui chu ka herh haw a, ka ṭap vak ringawt. Mipa vanga ka ṭah vawikhatna. Victora hi ka hmangaih nge? Ni lo, ani hi ka hmangaih duh lo, min tinatur ringawta min ngaizawng dertu hi..eng nge a sawi khah.."I lo chak bik lo, hmeichhe dang ang bawk i ni" a ti a nih kha. Chu chu engvangin nge a sawi? Rinteii vanga a nun chhe vek tawh khaichhuak turin min duh tihna em ni ang? Ni lo, ka ngaihtuah zui tur a ni lo. Ani hi ka tan engmah a ni lo. Ka nawmsam loh chhuanlamin Maliani chu hawn hma ka dil ta tawp a, amah tlemin a lo harh ve deuh tawh nen, min chîk ru ang tih ka hlau hle. Ka hlauh ang ngeiin, "Ṭap hrep hmel i pu, eng nge thleng sawi rawh. Victora khan a tina che em ni? Kha nu kha a kawpsan che em ni?" A ti mawlh mawlh a. 

"Aih, chutiang lam a ni lo. Ka khuasik ringawt a, ka hritlang dawn niin ka hria" tiin ka insût faih a. 

"Aw le, a that chu. Inenkawlṭha rawh aw. Naktukah i la nawmsam loh chuan lo kal kher a ngai lo a nia. U Mateii ka hrilh mai ang" a ti diam a. Ka tan hian a ṭha tawh ngawt mai. 

"Eng emaw a thlen chuan min lo be vat rawh aw" ka ti ve ngial a, ka chhuahsan ta a ni. Victora hmuh hlau takin hawi zuk zuk chungin gate chu ka pan a. Thaw huaiin gate chu ka hawng,.mahse, Gate aṭanga waiting shed ka pan chhoh laiin Victora chuan bulletin min rawn tlan pel a, Waiting shed-ah chuan a lo ding vah mai. "Pipi, chuang miah suh" tiin ka infuih mawlh mawlh. 

Ka han thlen chhoh chuan, "Khaw maw" tih leh ka chal rawn deh a rual a. Ka hamhaih deuh. "I pang chu a sa si lo. Engtin chiah nge i awm?" A ti a. Mi kal vel te chuan min rawn melh hrek hrek mai. 

"Engtinmah ka awm lo, ka ṭha reng" ka ti khur dat. 

"Kha i hmel a dik lo,. Lo chuang rawh. Incheck up ang"..tih leh a bike tihnun a rual a. 

"Aih, taxi ka chang mai ang, a awm mai ang"..tiin ka hawi vak vak a,. Taxi lah chu mamawh lai berin a la vâng em em zui! 

"Chuang mai rawh, hei an en duh êm che hi"..zawi sup hian a rawn ti leh a. Ṭah chhuak deuhin ka chuang leh ta nge nge. A chhan chu a mize pawisak nei hauh lo khan a dawhtheih loh chinah ennawm siam a hreh dawn hauh lo tih ka chiang tlat tawh a, midangte ennawm siamtu nih ka duh bik lo a ni. Ngawi rengin a tlan a, keipawh ka ṭawng lo. Doctor Malsawma clinic chhak deuhah a ding ta a. 

"Victor, ka tha, incheckup ka mamawh lo." Ka ti ta nge nge a. 

"Takzet em?" A tih chuan, "Aw..tak tak"..uar fê hian ka lo ti a. Damlo ni lo napui inentir kha ka duh hlawl lo a ni. 

Kan in lam panin min tlanpui ta mial a! Ka thaw huai mai. Hmun dangah min hruai daih ang tih kha ka hlau lutuk a. Kan in bulah a ding a,. Ka chhuk ta vat. "Inenkawl ṭha ang che. "..ti leh supin a inher a, a tlan zui leh nghal daih. Ka thlir zui vawng vawng mawle. 

Ka nute chuan, "I putea te lah khan i pa dawr i chhawm tih an lo hre ve luklak a, an beisei ve ringawt lehnghal che a, engtin nge mawni dawn le?" An ti a. Mahse, chutiang mood-ah ka cheng thlawt lo. 

"Pawisa thawhchhuah a hma a. Ka ning" ka ti chang rât. 

Ka nu chuan, "Tun hnai i mizia hi a dang riau, eng thil nge i tawn le?" A ti ta chiah a. Nu nge nge chuan min lo chîk hle a nih hmel. 

"Ka ṭha reng, ka hah ve deuh a." Ka ti ringawt. Victora vanga thinchhiat ngawt te, mize hloh ngawt te chu ka duh bau lo. Mahse, ka inla chapo tluan thei tak tak ngai lo chuan min tithinur a, ka inngei phah lek lek zel. Chaw pawh tihtham ka ei lo. Hla zir hram an ti tlat sia, ka han zir leh hram a, Kan haw hma angreng a, a zia viau e. Ateii bulah takngial pawh Victora nen kan chungchang ka sawi thei lo,. A chhan chu kei hian eng emaw tak ka la beisei a ni. Ka mawl takzet. Ka nute leh ka ṭhiante bula "Kan inṭhen" ka tih hnu lawka Vica laka ka tlawm leh si khan min ngainep ang tih ka hlau tlat. Ka nun hi engtiang chiahin nge maw a khawih danglam dawn ni..

"Hruaipui, Victora nen in inkarah eng nge thleng?" Pi Lingi aw ngei maiin a rawn tih chuan ka meng kâwk mai. 

"Eng..engmah..ngati nge?" Ka ti bah nak a.

"Hei a rui leh a, engmah ei lo va chhuah a tum a, a ruih êm avangin a û leh a paten chhuah an phal si lo. Zep nei lovin sawi teh" a rawn ti khur dar dar mai, a tawpa tawpah chuan a fapa avangin Pi Lingi meuh pawn ngenngawl takin min be ve ta. 

"Ih, kan inṭhen a" ka ti zawi ta sap a.

"Engvangin?" A rawn ti hluai, "Inthen turin min duh a ni lo'm ni?" Ka ti ve leh ta khauh a. A thaw hawk ri chu ka hre pha,. "I danglam bik ang tih rin ngaihna ka lo hre lo a ni" ..tlawm zet hian a rawn ti ta a. 

"Ka danglam bik loh vang alawm kan inṭhen" ka ti lawi si. 

"Eng nge a awmzia?" Mak tih hmel zetin a rawn ti leh a.

"Tluangi nen Kolasibah an riak dun a, vawiinah Tluangi a rawn kal bawk. Chu chu a ni e, chuvang chuan tuna a buaina chhanah khan ka tel ve lo" ka ti ta zung zung a. 

"Takzet hian..ka va ring lo ê, Tluangi te chuan Julie nen an inzui lai pawn a kherh nasa ṭhin, mahse, Vica hian a hnawl zel asin" a ti zawi sep a. 

"A hnawl phal tawh lo a nih chu" ..ka ti hap ringawt. 

"Ka lo bia ang" tiin a dah ta a. Ka hah hle ringawt,. Victora chu a tawrhhlelhawm ṭan dawn riauin a lang. Zing dar 1 bawr velah Victora call ka dawng a, mahse, ka pick up lo. Ka phone pawh ka switch off ta daih a, inhnamhnawih tawh loh hram ka duh,. Pi Lingi'n min mawhpuh ang tih pawh a hlauhawm e a. A tuk ka harh ruala ka phone ka'n on nâk chuan miscall 11 lai a lo awm, Maliani bakah Pi Lingi leh U Mateii te an ni. Whatsappah ka lut ta vat a. 

"Ti nge i phone i off tlat le? Victora te an intibuai a,.hei an lo sawisak rawn a. Amahin a duh tlat si lo va, damdawi inah pawh kan hruai lo. I rawn kal vat a ngai" tih a ni. Ka phone ka hum nghet kher mai. Maliani chu ka call ta nghal a. Min lo call hun kha zing dar 6-7 inkar vel a ni a, a muhil tawh loin ka ring. 

"Tihpalh lutuk, nizan khan ka bty a lo low daih a" ka ti ta zaih a. 

"A nih ka ring deuh a. A pawi tawh lo mai. Hei tunah chuan nachhawknain an jection a, a muhil an ti." Zangkhai angreng takin a rawn ti a. Ka thaw huai mai. 

Ka ṭawng leh hmain "An intihbuai dan vel chu i lo kal hunah ni mai. " A rawn ti leh zung zung a, keipawn ka dah nghal. Chaw ka ei sawk sawk a, Victora chu accident angin ka chhungte bulah ka sawi thung, intibuai tih vel chu ka nu beng tithleptu a ni dawn tih ka hai lo. Nidang aiin ka thleng hma ta reng a. Pu Zauva erawh a hna avangin zing tawkah a lo zin daih a, Victora chungchang pawh an lo hrilh ngam rih lo a lo ni. Victora pindanah ka lut ta nghal a. 

A lu chu thiam mang lo hian an lo tuam var ve lûk a, a banrek veilam an lo tuam bawk. A mit dinglam a vûng phui titih a. A hmui pawh a kak, mahse, na lutuk chu a nih hmel loh. A lo la muhil a, ka tiharh duh lo. A pang ka deh chuan a sa vur mai. A zu in ṭhing rim lah chu a..! Maliani pindanah ka luhsan ta rih. 

"Nimin i chhuah hnu lawk khan a rawn lut a, i nawmsam loh vanga i haw thu ka hrilh a. Ka va thlah ang e tiin a rawn chhuak nghal a, a khami lo haw kha a pindanah a tawm nghal chawrh chawrh a niang, U Mateii te sawi danin chaw ei tura an koh pawn a chhuak duh si lo va,. Dar 8 velah rui deuhin in hnuaiah a chhuk a, bike chabi a ken bawk si avangin leh a hmelhmai aṭangin ka pa leh ka û ten chhuah an remti ta lo va, an buai deuh laih a niawm e. 'Thu zawh duh ka nei a, ka va zawt ang a, ka rawn haw leh ang' a tih pawn an phal si lo. Thuawih hmel takin a roomah a tawm leh a. An mut reh tawh hnuah a chhuak ta a niang. Zing dar 5 velah Lal Vala'n ka pate a rawn bia a, an intihbuai thu leh Vica chu an sual rawn vanga a hliam nat thu a rawn sawi a,. An va hruai ta a ni. Damdawi ina awm a duh si lo. Lalvala ka pain a ko va, a rawn lang têp ang. Thil awmze diktak pawh kan la hre bik lo, a khawihtu te pawh" Tiin Maliani chuan a naute buaina chu a sawi ta malh malh a. 

"A pawi em mai, a rui kher kher a. " Ka ti ve ringawt. Ka rilru erawh chuan ngaihtuah ru tak ka ni. 

"I enkawl tel ve mai a ngai ang, hlawh pawh kan bonus mai che ang a." A ti a. 

"Bonus a ngai kher lo, a harsa lo lutuk, mahse, a mamawh tur damdawi lamkhawmsak a ngai dawn a." Ka ti a. 

"U Mateii kan be mai dawn nia" a ti ve mai.

Maliani damdawi ka pek zawhah Victora pindanah chuan ka va lut leh a, a nu a lo awm kur mai. Min hmuh chuan thaw huai hmel a pu a, min thlahlel ve ta pawh a niang e. Nurse ka ni miau alawm. Vica chu a lo harh tawh a,. A khawsik a san deuh avang chuan nachhawkna ka eitir phawt. U Mateii ka bia a, a mamawh tur damdawi chu ka chah ta mawlh mawlh a, a rawn dahtir nghal tur thu a sawi a, a thlamuanthlak ṭhin e. Victora bulah chuan ṭhuin a na lai te chu ka han dap ve ngial a,. A banrek chu a ti che ngam miah lo, a chal kak pawh thisen chhuak a reh tawh a, a bak nâ a tih chu a dul thuar vel a ni mai. An ṭumna vel a ni maithei a ni. 

"Intihfai phawt ka duh. " A rawn ti ṭuak a. Ka hrethiam reng,a zu ṭhing rim chu amah ngei pawn tawrh har a ti ve a nih hmel. Ka kai tho a, Sangi'n min lo pui bawk. Bathroomah luhpuiin Pi Lingi lah chuan, "Hruaipui, nangman i tihfai mai loh chuan a che hleithei si lo va" a lo ti ve sek. 

A thawmhnaw hlihsakin a kekawr pawh ka phelhsak vek a, boxer nen a awm ta tung mai. A pian erawh zep nak emaw a nalh thlawt a ni. A tatoo te pawh chu ka hmu inhmeh zo vek tawh. A ngawi ngul a, ka tih ang ang chuan a awm thung. Ka bual fai a ni ringawt e,. A ha erawh amahin uluk zetin a nawt a, a harhvan hmel ta deuh.

"Sangi, bed sheet kha thlak teh" tiin Sangi a tir a, Sangi pawh a che vat vat mai. 

A phah fel hnuah rem takin ka muttir leh a, tawnzau leh pyzama ka haktir hnuah a na lai te chu ka tuam thatsak ta a. A tukkhum dup deuh ul chu ka khawih fuh palh a, ka ban a rawn hmer na ngang mai. "A va ṭha lo e. Doctor hmuh a ṭha ka ti, Victor" ka ti a. 

"Ka duh lo" a ti tlat. 

"I dam nan alawm " ka tih lahin, "I awm alawm" a ti hmiah bawk si. A banrêk pawh xray hrim hrim a ngai ang. Tihchet ngam loh ringawt kha, keiin a englai nge na engtia na nge tih ka hre ve si lo. Nakinah a chhungte ka be mai ang chu. Damdawi a rawn thleng a, nachhawkna injection chuan ka chiu leh ta a,. Vein erawh zawn hrep a ngai ve lo. Damdawi chiu chi a ti ve lo tih chu a hriat viau. 

Sangi'n, "U Vala a lo thleng, Pi. " Tiin a pi a rawn ko a. 

Victora chuan fim zeta min melhin, "Zuk ngaithla ve rawh" a ti ro hak a.