Amah leh kei 6

AMAH LEH KEI..(6)

Ziaktu : Toni Râlte

"A nih chuan i hmanrua mai chauh maw ka lo nih a?" Ka ti tuar a. Ka lawm lohzia ka hmelhmaiah ka tilang nghal bawk. Hmalam a bih ngur a, "Hmanrua atan chuan i ṭha mah mah" a ti duh chauh a. 

"Victor, engmah inzawmna neih ka duh lo. Inlaichinna hi nei leh lo zawk mai ang. " Ka ti hmawk hmawk a,. A ding thut, ka bu dâwrh mai. "Ka thu thu. Nang leh kei hian inlaichinna kan nei ang, a chiang em? " Awki hlauhawm lek lek hian a ti a, chiang zetin min melh kul bawk. Ka ngawih dat avangin a tlan leh a,. Mahse, chutia a vau zâm mai mai theih ka ni bik lo, a thu thua awm tura piang ka ni bik lo tlat. "I hre mai ang. " Ka ti ve ngat a, kan in kan thleng zui ta bawk nen, "Min thlah avangin ka lawm e. Mangṭha" tiin a biak leh chelh hman rual lohin ka chhuk sawk sawk a, kawngkhar pawh ka khar na e. Ani pawn min rawn umzui hlek lo. In ka thlen chuan helhhawlh ang hian ka awm a, ka sa vek thei. Ka thinrim nge ka rilru a na nge, engmah ka hrethiam lo. Ka awmdan chu an hriatthiam ka hlauh avangin ka inbual ta vat a. Ka ngaihtuahnaah erawh thildang a leng thei mawlh lo. Victora khan zep nei miah lovin Maliani ngaihdan paihthlak nan kei hi min hmang tih a sawi a, chu chu kei hian ka lo pawm ang maw? A unaunu rilru hneh nan mai mai a duh hun hunah a bialnu ka ni ang maw? A teuh hnaisai lo mai. Hmeithai fanu mah ni ila; keimah ang hi tumah an piang ve lo va, mi pakhat ka ni ve, damchhung reilotêa tu emaw kaih kual theih a uitê nih ka tum lo bur. Mahse, ka buaina te chu Ateii takngial pawh ka la hrilh duh lo. Zahthlak tihna chen ka nei ve tlat. 

Ka inbual zawha mut nghal mai ka tum chu ka nuin, "Naktuk chawhnuah i pa te inah i va kal a ngai dawn aw. Rokhawm chungchang an sawi dawn a,. Engpawhnise va kal ve teh poh la, eng thilah pawh lungawi theih zir ang che." A ti mawlh mawlh a. "Aw le..nia" ka ti ringawt. 

"I ṭha em?" Ka nu chuan a ti a. 

"Ka ṭha reng, ti nge?" Ka ti hâ a, ka insangmar ru ṭeuh thung. 

"Hlauthawng hmel i pu" a ti sap a. 

"I ngaihdan mai mai a niang. Mut mai ka duh, ka chau riau".tiin ka kalsan ta a. Ka mu pawh ka muhil hleithei chuang lo,. Thinur ru ṭeuh hian ka awm a ni ber e. Victora chuan a rawn call a, ka phone ka switch off ta hmak. Rilru erawh a nuam chuang miah lo thung.

Sunday a ni bawk a, ka tho hma peih lem lo. Ka chhungte pawn min hrethiam ve bawk a, ka thawh meuh chuan dar 8 a ri lek lek tawh. Vawksa chhum rim nam châk châk chuan ka ril a tiṭâm mang e. Vawiin chu ka kawr ṭhui thar ka ha ve a, ka inringtawk ve khawp mai. Ateii ka lo nghak leh a, kan ṭhut dun loh hi chuan kan kim thei mawlh lo. Ateii bialpa Hriatpuia hi kan veng ami tho a nia, Salvation Army an ni thung,. Tlangval fel deuh, zuk leh hmuam pawh ti lo a ni a, eizawnna mumal erawh a la nei bik lo. Kei nen pawh kan inpawh tawh viau. A ṭhianpa Ruata hi min tihpui a tum ve viau naa, Victora a rawn lan tak avangin a ngawi zui ta kha a nia. Remruata pawh chu a hmelchhiat loh bakah Mobile phone dawr an nei a, a che nuam ve viau. Victora thlak nan pawh a pawi hran lo vang. Inkhawm banah SS kan kal leh a,. Kan inah kan chhuk zui nghal. Noodles kan chhum hluai a, ka chet lai laiin Victora'n a rawn call leh sek tawh. "Eng nge?" Ka ti vin ṭhak a. 

"Ka bialnu ka rawn bia" a ti hlur a. 

"I bialnu a awm lo." Ka tih chuan, "Ka rawn kal,.ka rawn thleng ṭêp" a la tizui. Ka tum bûr mai. Ateii chuan, "In inhau mi?" A ti a. 

"Hau pawh ni lo, zu a in a, nizanah" ka ti ta ringawt a. 

"Aw..a in ve a ni mai a, a ruih chuan lohte chuan" a ti a. 

"Rui turin alawm an in ṭhin le aw..".ka ti nang nang. 

"Zu hi i haw ve sia tiraw?" A ti ve mai bawk a. Thingpui ka thlit laiin Victora chu a rawn lut hlawl! Ka nute erawh an lo la haw lo va, Tetea a pindanah a awm thung. 

"Bialnu thinchhe deuh neih chu zaidam a ngai hle mai" a rawn ti lûng lûng a. Ka lo ner khum nghek. Ateii chuan a lo be bawrh bawrh a, vawikhat chiah an la inhmu nângin an innel nghal viau chu mak ka ti deuh. Ateii hi ṭhian siam thiam tak a ni ve bawk a. "Ate, i ṭhiannu hmaibial deuh hian min ṭhen a tum a nia" Victora chuan vuivai âwka deuh hian a ti a. 

"A va ti ang lo ve. Ka hau ang" Ateii lahin a lo ti. "In ninawm" ka ti zêk a. Noodles chu bowl-ah suak chhuakin kan sem a, Tetea pawh a rawn chhuak ve. A zakzum a, Victora nen pawh hian mumalin an la inbe mang lo. A eitur pawh chu a pindanah a la phei daih. "Chawhnuah ka pa te inah ka phei a ngai" hrilh bik pawh nei lovin ka ti sep a. 

"Ka hruai ang che" a lo ti leh zuk. 

"A ngai kher lo" ka tih chuan, "I mak, tiang khan awm suh, ka tan pawh a nuam lo" Ateii'n a lo ti hmak a. Ka ngawi zui daih. Ka nute an lo haw a,. Victora pawh an rawn be ve hlut mai. Engmah an hre der si lo. "Kha..a pate ina phei lawk a ngai a, i va hruai lawk mai dawn mawni?" Ka nu lah chuan a la ti ta deuh deuh a. Ka melh no fahran lo hle. "Chuvang alawm ka rawn phei" a lo ti leh vut a. Kan in eipuar zo va, ka inthlak zui nghal. Ateii te nen kan pathum chuan in kan chhuahsan a, Ateii chu a scooty-in a phei zui nghal. Lungawi lo ru zetin Victora motorah chuan ka ṭhu lut a, melh pawh ka melh duh lo. 

"Kan sawi dun dawn nia, i pate inah kal phawt la" thutak deuh hian a ti ta nge nge a. 

"A ṭul tawh lo. " Ka lo ti khauh ve tlat. 

"Ṭul ka ti alawm. Tuaimam" tiin ka biang a rawn piai zauh a. "Tuaimami pawh ka ni bawk lo. Rinmawi" ka lo ti let hrep. 

"I tuai a, i mam bawk,.".a ti duh lek. Ka pa te ina kan kal chhan kha ka nuin a sawi thuak tawh bawk a,. Kan thlen chuan, "Khi lai waiting shed-ah khian ka lo nghak ang che. " A ti nghet charh a. Ka chhuksan zui nghal. Ka pa te in ka va luh chuan an lo kim ṭhap tawh mai a, a zâmawm ve deuh. Ka nuhrawn ti tawh mai ang, Nu Remi chuan min lo be sawk sawk a. Ka pi leh pute bakah ka pa unaute pawn min lo be ve luam mai. Ka han ṭhu fel a. Pu ber chuan thutak fahranin ka pa ro khawm dan chungchang chu a sawi chho ṭan ta a. 

"Kan tunu Lalhruaipuii hi a pa hian a hmangaihin a ngaihven em em reng a, thil kal sual avangin kan tunu rilru hi a hel si a. Mahse, a pa chuan tiang hian a fanu tan a neih aṭangin hnutchhiah eng emaw tal neih ve a duh a. A dawr pakhat Electronics dawr saw a fanu upa ber Hruaipuii tan a hnutchhiah ve a ni. Hruaipuii pawn a pawm ngei kan beisei a, a pa duhthusam a ni a, lawm taka a pawm theih chuan kan lawm viau ang. " Tia a sawi lai chuan ka lo thaw dêp dêp mai. Ka beisei loh daihin ka pa chuan min lo hmangaih a lo ni. Dawr lian zet zet pali lai a nei a, a dawr em em min hnutchhiah phal ka lo ring miah lo. He thil hi a nupui fanaute bakah a nu leh pate hriatpuina thlapa a tih a nih ka ring bawk si. Tikhawpa ka nu duh lo va iai si ten ka pa thutlukna an pawm theih mai danah ka pa chu an zahthiamin a thu pawh an ngaichâng ve ṭhin viau a nih ka ring. Sawi mai tur hre lo va ka ngawih rauh rauh hnuah, "Ka..a van mak em em. Ka beisei miah lo asin. Ka phu lo hle mai" ka ti nawk nawk a, ka zâm hle a niang ka aw pawh a khur nasa. Ka inrintawk ve theih tehreng nen. 

Ka nuhrawn chuan, "I pawm theih chuan a lawmawm ang. I pa kha nangmah vangin rilru mawlhtu nei reng rengin a awm ṭhin a, a duhthusam hi pawmsak hram ang che" a lo ti ve charh charh a. Pawm loh phal chi pawh ni nghal lo chuan. 

"Ni e, ka nute nen kan lo sawiho ve phawt ang e.".ka ti tham ṭiak a. Rethei taka hun lo hmang ṭhin ka nihnaah chutiang dawr lian enkawl tur chuan ka inringtawk lo a ni ber ang chu. Ka rilru hria niawm takin ka pu chuan, "Nangman enkawl i huphurh a nih pawhin tuna a nghaktu te hi i chhawr zui zel thei alawm. I pa pawn a ringtawk a, a enpui ngai mang lo". A lo ti chuar chuar a. Ka ngaih a ngam huai mai. "Ni e, kei chuan han tih vak dan ka thiam dawn miah lo va,.in mi puihbawmna ka mamawh viau ang. Chuan, hetiang taka min dawngsawng ṭha hi in chungah pawh ka lawm takzet a ni. Ka pa chungah pawh thinlung takin ka lawm" ka ti ve ta thlap a. A hunah hi chuan ṭawngkam ka haihchham bik lo. An ro khawm tur dang an sawi leh hmain, "Ka ṭhian pakhatin min nghak si a, ka hawnsan rih mai dawn che u aw. Nidangah a hranpa takin ka la rawn lêng ang, ka hna avangin duh ang pawn ka rawn lang tam thei lo va.." ka ti duah a. Anni pawn tihtur ka neih tawh miau loh avangin min chelh hran lo. Ka chhuahsan ta a, waiting shed-ah chuan Victora chu a lo ṭhu ran a, phone a lo khawih ve ngei. Phone hi mi a bia te a nih loh chuan a khawih ve zen zen ngai lo. Min hmuh chuan a tho vut a, keipawn motor ka pan zui ve zat. A la hma angreng a, min thlah hawn nghal ka ring lem lo. Ka rin ang ngeiin, "Hmun pakhatah ka hruai ang che. Mak ti kher lo la.." a ti nghut a. Ka ngawi reng. An veng lamah min tlanpui a, an in pawh kan tlanpel vûk vûk mai. Veng mawng lam kan pan zel a, ka beisei loh tawpin thlanmualah kan chhuak ta hlawl mai. Mahse, ka hamhaih rei lo, Maliani thusawi te kha ka hre chhuak nghal, Rinteii thlanah min kalpui a tum a ni ngei ang. Engmah sawi lo chuan ka zui ve dawr dawr a. A tawpa tawpah chuan thlan pakhat bulah chuan a ding ta a. Thlan lung tak tak la ni chiah lo, YMA ten lung lian vak lova an phunsakah chuan, 'Lalrinsiami - Kum 20 ' tih bakah a thih ni leh kumte a lo inziak kuau mai. Thlan chu uluk taka enkawl tih hriat takin a faiin grass phah vek a ni a,. Pangpar simple leh mawi tak a kual bakah rose par sen a lo intar vâ bawk. 

Hre sa lo niawm takin, "Eng nge a awmzia?" Ka ti hâ a. 

A hmun a dai nuam bawk a,. Thlan chungah chuan kan ṭhu dun ta a. A ngawih vang vang hnuah, "Ani hi nang tih loha ka bialnu awmchhun a ni" a ti ta a. 

"Chuan" ka ti sap a. 

"Ani kha râwng taka thah a ni a, tuma dawm hlum lohin a thi a ni. A thihna khan rei tak min nghawngin ka nun a vaw chhia a, hmeichhe dang a rualpui la dam vete thlengin ka haw ṭhin. Ka sawi thui duah peih lo. Hmeichhe dang ka kawp te kha tumah Rinteii thlanah ka la hruai lo va,. Tikhan i laka ka thutakzia i hrethiam tawh ang chu.."..a ti charh charh a. Fiamthu thawhna hun a ni lo tih ka chiang ve bawk a, "A pawi hle mai. I tawrhna chu ka hrethiam che. " Ka ti ve a. 

Ka mitah rawn melhin, "Ka duh che a, ka û rilru awlsam taka i hneh theih avangin hmeichhe chak tak i ni tih ka hre thei. I ngaihdan atthlak zet kha dah boin ka duh angin awm la ka duh a ni." Thupe aw angreng tak hian a ti a. Ka tlawmla hle naa hnehsawh zeta ṭawngkhum chu harsa ka ti tho bawk si. 

"Kan hlim dun ve tak tak i ring a maw?" Ka ti ta nge nge a. 

"Ka ring. Nangmah i nih reng phawt chuan".a ti nghet charh a. 

Ka inngaihtuah vang vang hnuah, "Aw le, kan hre zel ang chu" ka ti ta ringawt. 

Rinteii thlan kan kalsan dawn chuan inthiam lo hmelpu deuh hian, "Min hrethiam ang che. Hei hi i duhdan a nih ka beisei".tiin a hming ziahna lung chu a chul zauh a,. Ka lo thlir reng. Mitthi thik tur khawpa rilru chhia ka ni lo va, Victora chu ka khawngaih viau zawk. Kan let leh lamah chuan rilru thar kan pu a niang chu, kan titi pawh a zangkhai ta hle a, kan nui dun hawk hawk reng mai. Kan ina rawn peng kher tawh lovin a haw tlang ta nghal a. Zanah inkhawm ka tum si avangin a lo leng dawn lo bawk. 

Ka nute bulah ka pa rokhawm chungchang chu ka sawi mawlh mawlh a. Anni pawn mak an tiin an beisei loh lam daih a nih thu an sawi ve hlut mai. "Kan hausa ve tawh dawn a ni maw? Class xii ka pass ang a, keiman ka nghak ang" Tetea chuan a ti ve hlawl mai. Ka nuin ka mitmei a veng deuh nge, "I â lutuk, nang khan engmah i manage thiam lo vang. BA tal zo phawt rawh". A ti a. 

"A hreh loh phawt te chuan a inzir ve zel ang a, nghak mah se a pawi hleinem. Ka pain ka kuta a dah tawh a nia,.a nghaktur leh enkawl zui tur te chu ka kut vek tho alawm. " Ka lo ti zung zung a. 

Nuteii paw'n, "Nia, tunlaiah zirna ngawr ngawr pawh hi a ni lo. Sawrkar hna lah keini ang tan beisei phak chi a ni bawk si lo. Tetea'n a peih phawt chuan nghak daih rawh se, Pipi te chu nurse a ni tho va, bakah pasal la nei mai tur a ni bawk nen, nakin zelah in nufa intuamhlawmna tur a ni zawk.."tiin a lo tlip ve mawlh mawlh. Mahse, class xii a la pass lo va, tun tut tutah chuan tihngaihna a awm chuang lo. 

Zanah inkhawm banah ka mu nghal daih. A tukah Maliani check up a ngaih avangin Victora hovin Damdawi inah kan kal a. Nghah rei a ngai lem lo. A hriselna pawn hmasawn lam a pan ve zel a, tunhnaiah Victora nen kan inkar avangin a rilru a kal kawi leh deuh a, chu chuan a taksaah tlemin nghawng a la nei deuh. Mahse, hun a kal ang a, a thlir dan pawh a zia chho ve zel mai ang chu maw. Chawhnuah kan haw hman a, a inbual fai hlanin eitur ka siamsak. Victora erawh a dawrah a kal zui nghal. Maliani'n eitur a ei lai chuan kan titi pah a. Victora'n Rinteii thlana min hruai thu ka sawi chuan min melh deuh kâwk mai. Tlema hahdam deuh huai hmelpu hian, " A mak hle mai. " A ti sap a. 

"Nia" tih chiah ka sawi ve. 

"Ka rindan hi a lo dik tawk lo te pawh a ni mahna le. " A ti ve ta a. Ka rilru a tinuam huai mai. "Kan hre zel ang chu, eng nge maw kan an dawn ni?" Ka ti a. Maliani berin sawisel leh î a neih tak lohah chuan Victora pawh rilru hmin ve deuh hlekin ka ngaizawng ve thei tawh ang chu. 

Zanah Victora chu a rawn leng a, "Naktukah zin thut ka ngai dawn. Kan ṭhianpa a boral a, Kolasib-ah zan khat riakin ka zu kal zuai ang" a ti a. 

"Kolasib-a thei tui ber min lo hawn dawn nia" ka tih chuan, "Tuaimami tan te chuan le" a ti sup a. Tuaimam ti hlira min ko chu ka duh vak lo. A mawi tehchiam si lo. Chu aia hming mawi leh induatna ṭawngkam a tam ve tehreng nen. A phone a rawn ri sek a, a en a, a reject mai zel a. A vawi 6naah chuan, "La rawh" ka ti ta thlawt a. 

"A pawimawh lo" a ti ringawt. 

"A pawimawh a niang, a ri zing êm mai. " Ka ti nghat a, ka lungawi lo ve ringawt lehnghal. A rawn rik leh takah chuan ka thin tertek a chhuak ta nge ni a phone chu ka chhuhsak a, Tluang Tluangi tih a ni a, keiman ka pick up sak hmiah. 

"Khaw nge Vica " a rawn ti lâng lâng a.

"Hei a awm reng, a la duh si lo va, ka laksak"ka ti hmak a. Ka chetdan chu a mawi lo tih ka hre ve reng,. Mahse, engvanga lo call sek nge a nih ka hre duh tlat. 

"Khawi phone pe rawh, i va zak lo ve. Tu nge i nih?" A rawn ti fiak ṭhak a. 

Victora beng bulah phone dahin, "Be rawh, Victor" nelawm lo fê hian ka ti ve ngat a. Victora lah chuan ngeng zet hian, "Tluangi, a pawimawh a nih pawhin ka buai, ka bialnu ka rim mek" a ti bung nghut a. 

"Naktukah khan i motorah ka kal ve dawn tih rawn sawi ka tum mai a nia,. I bialnu chu i va hlau âwm ve, call pawh i pick up ngam loh. A va rapthlak awm ve a" a rawn ti deuh hrep. 

"Ka dah. Aw i chuang ve dawn. Nih phawt".tiin Victora chuan a phone chu a hmet hlum ta daih. Lungawi lo fê hian, "I eng nge a nih a? A va ngam che ve" ka ti ve ta ngat a. 

"Ka ṭhiannu kha..hmanniah pawh i hmuh tawh kha" a ti nghut a. 

"A kal ve dawn a maw? Khutah" ka duh aiin ka aw a ring. 

Chhuat lam bih ngur hian, "Aw, kan ṭhianho zingah hian hmeichhe pathum an awm ve alawm" a ti mai a. 

"A ṭha lawm. Zu zin r'u". Elsen rawngkai zet hian ka ti a. Ka banreka rawn hmerin, "I thikthu a chhe viau a nih pawhin keimah min hau hrep zel rawh, hmeichhe dang laka cheap taka i khawsak ka phal lo" a ti khauh bur mai. Keipawn chutiang cheap lutuka chet chu ka tum hran lo, a rawn call zin êm vang leh Victora'n a la hreh tlat khan mi run ve deuh bawk a ni. 

"Lungngai suh, tumah ka thik peih lo" ka ti hmak. 

"Ka zin dawn zanah chuan inhau lo teh ang". A ti dam leh thlup a. Ka ngawi ta reng. Mahse, a hawn dawnah reivaklo kan infawp tho, ka lungawi ta vek tihna erawh a ni lo. Rin aiin Victora lakah chuan ka thikthu a chhe dawn zêk mai ka ti,. Ka duh miah lo asin le..kalpah mai mai thei ila nakinah min tihnat a tum pawn ka palzam thei zawk tur a nia. Heiham,. Khawvel hi chu a..kan duh loh dan deuha khawsak te hi a ngai ve ṭhin a nih hi a. 

Zing dar 5 rik hmain min lo call a, "Hei kan chhuak dawn chiah e. Lo inenkawl ṭha ang che" a rawn ti a. 

"Aw le, tluang deuhin le" ka ti ve ta tho, chhe deuha thlah kha a mawi lo alawm. Phur fahran lovin an in lam ka pan a, ka thlen hun a timing a fuh chiah lo zui! U Mateii te nupa leh Pi Lingi te chu an lo inhau nasa mai a lo nia, naupangte erawh an kal tawh thung. Zûm zetin ka lut a, Sangi lah chuan nuam a ti bik lo nge, "La awm ve rih rawh. U Ma-i pawh Coffee ka pe tawh tho" tiin chokaah min chelh tlat si. 

U Mama chuan, "Ka nu, i ti ve mah mah a ni. Mateii hian i eng pawi mah a sawi lo, englai pawha i hmusita i diriam tur a ni lo. Chuvang chuan zanin tlaiah ka pa lo haw se, indan dan tur kan sawi ho vang. A ni em em tawh lo ve" a ti khur dat dat a. A thinrim hle tih a aw khurh dan aṭang chuan a hriat mai. Pi Lingi pawh chuan, "Aw..tehreng mai. In vawm hrang vat vat teh u,. Kan thu awih lovin i duhzawng i nei a, chutah i la ṭan em em zui a, hauh theih pawh a ni lo. Tih tak êmah chuan fa mo a nia, awmpui nei lo va awm thei tur pawh kan ni ve asin. Mahse, tiang hian awmpui kan lak tho a ngai a, eng nge mo neihin awmzia a neih ang? In fate lah an in lamah in tamtâl tir lutuk a, in pawh nuam an tih tawh loh hi. Nangni chhungkua hi awm lo ula kan hlim zawk ang " a ti hlawih hlawih a. 

U Mateii chuan, "Ka nu, hetah kher hi chuan min dem thei i ni lo asin. Damdawi dawr nghah loh ka tihin nghak rawh titu ber i ni, dawr nghak chungin engtin nge in lam ka enkawl theih bik ang? Dawra ka thawh loh chhung pawn ka theih ang tawkin Sangi ka pui ve, naupangte enkawl ngai bawk, engkimah ka kutah a tla a, ka phur a rit ve tho asin. Heng i mi ṭawngkhumna leh diriamna te hi chu ka la ngaithla liam thei,. Dampuii hming i lam sek leh chaw eia i sawm teivet hi ka tuar thei tawh bik lo a ni e." A lo ti ve bawrh bawrh a, an buaina chu rei tak an lo up tawh, tuna puakkeh ta hi an nih duh hmel ka ti. Awm ve reng nuam ka tih hlawl loh avangin Sangi min ngenna pawh ngaipawimawh hleithei lovin in chung lam ka pan ta a. Pi Lingi'n min lo sawizui ka hlau hle naa min sawi ta lo hlauh. 

"Morning, Coffee te i lo in diam tawh a" ka ti zangkhai vah a. Ka kal dawna ka phur loh tehreng nen, an in chhung buaina kara mal taka Maliani lo awm bîk chu ka lainat a, ka mood chhiate ka dahbo hram hram a ni. 

"An inhau nasa hle a ni maw?" A lo ti daih a. 

"Aw" ka ti tawi tak. 

"An la puahkeh khu ka ring reng a, a pawi teuh lo. Ka nu hi inhmuchhuak ve tawh se a lawmawm viau ang" a ti bawrh bawrh a. Damdawi ka eitir nghal zat. 

"Indan te kha an sawi kai a, an awm loh chuan an ngaihawm ngawt ang" ka ti ve a. 

"Ka pain a remti teuh lo vang, Mama te chhungkua awm lo se kan chhungkua kan darh vek tawh ang. An nupa an chhuah ai chuan ka nu hnawhchhuah a duh zawk ang" a ti ta hmiah mai. 

"Mahse, inngeih lo reng renga chenho reng ai chuan indan mai hi a fuh zawk lo maw?" Ka ti ve hram a. 

"Kan inngeih reng alawm, Mama bialnu hlui Dampuii leh ka nute game khelh hma te chuan, chu chu ka pain a hai hleinem" a ti a. 

"Nia, i nu pawh a timak ve ka ti. An innei tawh a, chutia lo la tih kual reng pawh chu"..tîm ru zet hian ka ti a. Chauh hmel deuha mut zangthal pahin, "A hahthlak a nih hi. A tir aṭangin engmah a dik thei tawh lo a ni ber. Victora nun chhiat aṭang khan kan chhungkua hian ngai kan awh thei tak tak tawh lo. " A ti chuai raih a. Kha lam sawipui vak kha thil hre châk ka ang dawn si a,. "Eng nge i ei duh?" Ka ti ta daih a. 

"Vawiin chu chaw pangngai ka ei ang. Chawhmeh erawh artui curry leh dal tak tawk leh hmarcha a ni mai" a ti a. Ka lawm hle. Siam a hautak lo bawk si. 

"Ka zuk siam ang e. Lo inngaihtuah vak vak lo la aw".tiin a lu-ah ka chulsak zauh. In hnuaia ka zu chhuk chuan an lo reh diak tawh a, Sangi'n in a lo tifel mêk a. Min hmuh rual chuan, "Nakinah ka hrilh ang che. Awii ka pi hi a rapthlak êm alawm" a lo ti sur sur a, ka nuih a za lek lek. Maliani duh ang chu ka siam zui mawlh mawlh a, Artui ka curry dawn laiin door bell a ri tlang tlang a, Sangi chuan a va hawnsak vat a. Ka la hmuh ngai loh hmeichhe vantlang zet zawt, keini aia upa ve deuh hlek tawh tur, hmelchhe lo tak hi a rawn lut zân zân mai. 

"Ka pi chu a pindanah a awm a, va lut mai la" Sangi'n a tih chuan ngawi rengin Pi Lingi pindanah a lut zui ta a. 

"Tu nge?" Ka va tih chuan, "Dampuii an tih ziah kha" zawitê hian a rawn ti a. A mak mang e aw. A fapain nupui neiin fa pawh pahnih lai an nei tawh a, chulai kara a bialnu hlui zawk lo la ngaihven huam mai chu..âaa he pitar hi a maksak ve hrim hrim a nih hi a. A chhungte lam hi Maliani pawn a sawi ka la hre ngai miah lo. An rawn dîk dâk ve ngai lo niawm tak a ni. Eitur nen ka chho leh ta a,. 

"Dampuii in tih kha a lo kal a" ka ti a. Ka kamtam vang pawh a ni hran lo, engtin nge a ngaih ka hre duh ve tawp a ni mai. 

"Hmeichhe turu, zahna tlachham lutuk" a ti nghat a. 

Ka ngawi reng. 

"Kan chhungkua chu i hre chho zel ang a, mak i ti tulh tulh mai ang. Chhungkua kan nihna chu thisenah a ni mai. Ka pa hi boral ngat se chuan hmalam hun kan nei lo tluk a ni ringawt. Hei hian rilru thlengin a nghawng a, keipawn dam lam ka pan hleihtheih loh hi,. Dam ṭha pangngai ni ila chuan siamṭhat hna ka thawk em em ang. A harsa a nih hi..".beidawn hmel zeta a tih chuan ka lo khawngaih ve em em a ni. 

"Engkim a ṭha leh vek mai ang. Victora pawn a siamṭha thei maithei asin".ka tih rual rual chuan, "Ani hi chuan chhungkua a hmangaih lo. A mimal nun hlimna chiah a ngaihtuah" a ti chang leh bawl tawh. Ka chhang duh tawh rih lo. Ka jection zawhah ka dressing leh a, Thisen var kan inpe leh ta nghal. Keipawh in hnuaiah ka chhuk rih a,. Sangi pawh a lo intifel zo tawh a niang, TV a lo en a. Min hmuh rual rualin , "Awwii, kei chu U Pipi, a hrehawm ka ti ê. Rethei lo ila chuan ka chhuak daih tawh ang. Tihian an inhauh chang lah hian ka pi hi ka chungah a ṭuan zel bawk sia,. Tunah pawh Coffee ka va pe zo chiah,. Mûk tawkin an lo inkawm a, ka ngei a nia" a lo ti sawk sawk a. 

"Nia, a hahthlak a nih hi a. Ka hrethiam che. I pi ber hi a niin ka hria.." ka ti ve tawl mai. 

"Ni chiah e, a ṭawng peih si, U Mateii a rêl reng a, a biak ve pawn a chhang ṭha duh ngai si lo. Nimin khan U Dampuii kha chaw eiah a sawm a, U Mateii lungawi lo a âng chhuak ve ta a nih kha. A chawh ngawt mai ka pi chu, ka pu pawn a ṭan der si lo va.". A ti ve tân tân a, a ngei ve hmel khawp mai. 

"I pi chhungte lam hi an rawn lang ngai em?" Ka ti ta daih a. 

"Ngai lo ti ila ka awm hnu thla 4na velah khan ka pi û fanu hi a rawn awm ve zuai a, a thatchhe sia, a mu reng zel a. Bakah zana chhuah te a ching a, U Mama leh ka pu ten an hau a, a chhuak tau daih alawm. A hnuah a rai an tiin ka hria. " A ti a. Sangi hi thil a zawh tlak riau zel. 

"I pi hi chu a mak ve êm a ni. Ka hrethiam tawh bik lo " ka ti ringawt. Min chhan hmain Pi Lingi te pahnih chu an rawn inzui chhuak a, Sangi'n min rawn kheuh zeuh. Pi Lingi chuan kawngka bul thleng a va thlah a, a rawn let leh chuan, "Sangi, ka pheikhawk chah a lo thleng a, sawtah Pu Muanthanga dawrah khan va lam rawh" tiin a tir nghal zat a. Sangi pawh a kal nghal vat. Keipawh Pi Lingi nen awmdun ka peih loh avangin in chunga chhoh ka tum a, mahse, "Ṭhu rawh, nang kha. Sawipui duh che ka nei" a ti hriam hraih a,. Ka ṭhu leh ta zal zal. Eng nge ni ta?" Ka ti sap a. 

"Victora chu i la bansan ta chuang lo em ni?" A ti chang rât a. 

"Aw" ka ti mawl tawp. 

"Bansan rawh ka tihna che khan chhan pahnih a nei. Pakhatna chu a tihnat ve che chuan Maliani i kalsan dawn a, pahnihna chu engtiang pawhin lo inkuai lunglêng pawh ni ula ka mo atan ka pawm ngai dawn loh che avangin. Tikhan i bansanna chhan tur i chiang tawh em?" A ti leh khur khur a. Tu te emaw anga dawihzep chu ni ila ka hlau viau ang, a mitmeng a no lo rapthlak bawk si. 

"Amah hi min bansan turin hneh tum zawk la, kei chuan englai pawn ka kalsan thei".ka ti ve ta ngat. Ka hlauh viauna chhan tur ka hre lo. 

"In chhungkaw dinhmun i hria tiraw? Kan chhungkaw dinhmun i hre bawk a,.kan in chhung boruak pawh i hria, a awm pawh i awm peih dawn em ni? " A ti ta khauh mai. Hul zetin ka nui a, "Awm peih hauh lo mai. Ka awm châk lo ka tihna zawk aw" ka ti ta a. 

"Nang chu Maliani tan awm reng la a ṭha,. Victora chu a phutawk hmeichhia a la tawng leh mai ang. Chuvangin thutlukna i siam dawn nia. " A ti zui mawlh mawlh a, min vauna awki erawh a ang ta lo deuh. 

"Victora ka bansan dawn a nih chuan, in chhungkaw thurûk hi ka hre ve ngei tur a ni. Nang leh i fanu neihchhun te inkar khik chhan te, Maliani leh Victora te inkar boruak te hi..engkim ka hre vek duh" ka ti ve ta hmiah mai. Min beng mai duh hmelpu hian min melh tlawk tlawk mai a, ka hlau duh bik der si lo. 

"I hriat hi a ṭulna pakhatmah ka hre lo. Kan inhaw lo, thil a inbât fuh lo mai zawk a ni. I rin ang kha a ni lo bawk. Ka fanu hi ka hmangaih loh i ring tak tak em ni? Mawli, tuin nge rila rah fate thlauhthla thei ang? A thinlungah min huatna chi a pai khat tlat a,. Chu chu ka thlak danglam theih a nih si loh avangin tihian in chhung khata cheng siin mi hrang angin kan awm ta mai a ni. Engtikah emaw chuan a la ṭha vek dawn. Ka siamṭha vek ang"..a ti hmarh hmarh a. Tumruh hmel te pawh a pu ve deuh alawm. 

"Siamṭhat hunlai tak a ni. A thih hnuah em ni i siamṭhat dawn" ka ti ve leh ngat a. 

"Min hmu duh lo a, min ngaithla duh hek lo. Ka tan kawng a ping vek alawm"..beidawn hmel zetin a ti ve ta a. Pi Lingi hmela lungngaihna thuk tak ka hmuh vawikhatna a ni hial awm e. 

"A nu i ni a, i duh chuan i thunun thei alawm. A la damlai ngei khian siamṭha rawh. In boruak hi ṭha se a lawm ber pawl ka ni ngei ang. " Uar zet hian ka ti ve ta a. 

A ngawih dat hnuah, "Ka tum ang e. Mama te hi ka chingfel phawt ang" a ti nghet ta charh a. U Mama te chu eng nge maw chinfel a ngaihna le? Tihian awmtir ve mai mai se aw. 

Maliani bulah erawh a nu nen kan inbiakna chu ka hrilh duh rih lo. Dar 3 bawr velah Vica call ka dawng a, in chung zawlah ka han bia a,. "A thi ropui khawp mai, tlangval ṭhalai a ni bawk a. " A rawn ti ve nuah nuah. 

"Chuan, khaw nge i riah dawn?" Ka lo ti ta chat a. 

"Kan thianpa tho Renga te inah ka innghat ang ka ti. Ka û a ṭha em?" A rawn ti luam a, a ṭhat thu ka hrilh mek laiin nizana rawn betu aw ngei mai khan, "Vic, Lal Vic, towel ka keng lut lo, min lo pe lawk mai" a rawn ti lang lang a. Ka ṭawng tawp chawt mai. 

Victora pawh a ngawi ve daih a, Towel an inpe zo a niang, "Aw..hei ka la inbual lo va, ka inbual dawn" a rawn ti a. 

"Aw le" tia chhangin ka hmet hlum nghal. Tuna inhnial buai ka duh rih lo, an inah ka la awm bawk si nen. A ṭhianpa te ina an innghah ka ring ta lo bur mai. Hotelah ngei a ni an riah dawn ni, chu chu ka thinlungah hian a chiang ve tawp. Ka sa pup pup thei mawle..engvanga dawt min hrilh kher nge an nih ang? Mitthi vuia an kal tihte chu ka ringhlel zo ta vek a. Victora ṭhianpa a workshopa thawk Vala number kha ka nei a, ka call ta hmiah, "Val, Victora hi eng nge a tih? Ka call tlang thei lo va".ka ti ve zaih. 

"A zin daih alawm, Kolasib-ah, a ṭhianpa a boral a" a rawn ti a. A ṭhianpa chungchangah chuan dawt a sawi lo phawt. Mahse, an thlen in a sawi kha ka ring thei lo. Maliani pindana ka luh pawh chuan ka hmel a dik lo deuh nge, "Eng nge thleng a? I sen vek?" A lo ti a. 

"Nia, a lum lutuk a" ka ti ringawt. 

"Vica nen in chungchanga thil thleng a awm chuan min hrilh zel rawh,. ".a ti a. 

"Chutiang a awm lo" ka ti puat. 

Vawiin chu a phalnain ka haw hma thei ta hlauh a, Nuteii kha kan veng kâwnah 2nd hand dawr kha a nghak thei tawh a, ka peng zuai. In lamah ka nu a buai ṭhin avang hian ani hi chu dar 4 rik hma ten a haw tawh ṭhin. Vawiin chu a lo la inhawng a, eng dang a ni lo, Putea a lo ṭhut kur vang a lo nia. Putea'n min hmuh rual chuan, "Nauteii pawh chu inhmuh a va khât ve mawle. Min rawn tlawh lah in tum der si lo" a lo ti luam a. 

"Nia, kan buai ve ṭhin êm a ni" ka ti ve mai a. 

"I U Lawmi lah chu engtia han enkawl chi nge kan hrethiam tawh lo, sum mamawh a na si a. Tlangkam aṭangin i pa khan a dawr pakhat a hnutchhiah che ni khan ka lo hre ve a, Naute, i puihna pawh kan la rawn dil maithei a nia. Chhungkua kan nihna lantir hunlai tak a ni alawm tiraw?" A ti duam duam a, Nuteii lo ner nâwng chu ka hmu reng. "I nupui a hausak kha. A fanu a nia, enkawl ang hmiang, Lawmi chuan pa pawh a nei ve tho ang chu" ka tihsan ve ta hmak. A ṭawng leh hmain Nuteii'n, "Chutiang sawina hun pawh a nih loh chu..ka û, ka inkhar tawh dawn, ka û a buai lutuk a, Pipi, min lo pui rawh" tiin a che ta sawk sawk a. Pute hrilhhai zet chu khawngaihna ka nei ve tho. Mahse, awlsam taka an tihkual theih kan ni tawh bik lo tih an hriat ve a ngai tlat a ni. In kan thlen phei chuan nuteii a ang leh bawrh bawrh a, ka ngawi reng thung. Victora hlir ka rilruah a awm tlat a tin ni. Hrehawm pawh ka ti takzet, msg pawn kan la inbe leh lo va, zan lama chinfel ka tum rilru deuh. 

Zanriah eikhamah ka intifel sawk sawk a,. Hla zir an ti naa ka pha ta mai, ka mood in hla zir a feel thei hlawl lo. Pindanah ka tawm sauh sauh a, Victora chu a vawikhat nan ka call hmasa ve ta. Vawi 2 a ring ral ta ṭhak a, a ṭhianpa boralte inah an leng a niang tih rilru ka la pu hram hram. Ipik ru zetin ka mu a, ka chhungte hriat ka hlau ve tho bawk si. Dar 9 a rik takah chuan an bang ve tawh êm em ang tiin ka call leh ta hram a, tlawm chu ka inti tawh ngang mai, mahse, thudik hriat ka duhnain min tur et et mai si a. 

A pick up ta, mahse, hmeichhe aw a ni ta tlat. "Khaw nge amah?" Ka ti nghal tâwng a. 

"Hei a muhil tawh a,.eng nge ni ta?" A rawn ti no nguak a. Mahse, a ṭawng dan chu ruih nei a ang ka ti. 

"Eng ni lo ve, ka be duh a. Khaw nge in riah reng reng a?" Tlema dawnsawn nuam tur hian ka ti a. A thaw hak, "Ngatan nge i tih? A bialnu inti kha i ni tiraw? A save dan che hi a ṭhing mai bawk sia, Tuaimami maw i hming?" A rawn ti hawm hawm a. 

"A eng nge i nih zawk?" Chhan tawh loh ka duh tehlul nen ka chhang lo thei lo. 

"Amah i la zawt dawn nia. Ka dah phawt,. " Tiin a dah ta a. Kan inbiak chhung khan ka thaw lo nge ni kan inbe zo chu ka thaw hawk hawk mai. Zawi zetin ka mu zangthal reng a, ka rilru a na lo va, ka thin pawh a rim hek lo. Ka zak êm êm thung,. Ni e, ka zak ngawih ngawih. Engtin nge Victora kha awlsam taka ka lo rina ka lo thutak em em theih? A farnu leh a nu ngeiin a mizia leh nungchang min hrilh vek chungin Rinteii thlan min tlawhpui avang maiin ka zui a,. A rukin min va nuihzat dawn tak. 

"Victor, i hre dawn khawp. Ka na hmel hmuh i duh a maw? Ka nui hmel mawizia zawk hi i la hmu mawlh mawlh ang. " Tiin Victora chu ka rilruin ka be ta mawlh mawlh a.