Amah leh kei 5

AMAH LEH KEI..(5)

Ziaktu : Toni Râlte

Chutiang a nih vang chu nge Tlana pawh rei awm lovin a haw ta hnu hnu a. A pawi lo, a nute chapo vang a nih kha. Rilruah ka pa a awm ve reng bawk nen, mut pawh ka mutui lo. Zinga ka harh rualin ka pa bawk ka hrechhuak nghal a,. Ka nu pawn, "A harh tawh a niawm e. Min lo hrilh a" a lo ti var mai. Mahse, dar 9-ah Maliani te in thlen hman ka ngai si, rilru a buai ta deuh. Pu Zauva leh Maliani te ka be ta ngawt a, ka harsatna te chu ka sawi a,. Ka beisei loh deuhin min lo hrethiam khawp mai. Pu Zauva phei chuan, "Vawiin chu Mateii'n a lo ti thei ve mai ang,. Nilengin i pa chu awmpui rawh" a rawn ti nghe nghe. Pi Lingi ngaihdan erawh a ni lo teh ang chu. Mahse, ka pa meuh a damlo a nia, ani ngaihdan kha ka ngaipawimawh lo nasa, Maliani leh a pate berin chawlh min pe ta bawk a, tukṭhuan eikham veleh ka nu nen bawk ka pa hmu tur chuan kan kal leh ta a. Nuteii hi a rawn lêt leh hnuah a dawr kha a la hawng leh rih lo,. Kan veng kâwnah dawr luah tur a melh pah thung a, a hmuh ngei beisei ang. Tihian in a lo nghak mai zel a, Bawihtea awmpui a ngai bawk nen. 

Ka pa chu chauh hmel tak hian a lo mu bâm a. A harh tawh avang erawh chuan ka lawm viau thung. Min lo melh ṭâwk ṭâwk a, "Ka fanu chu hei hi maw? Kan va inhmu har ve bawihi" a ti tham ṭuak a. "Ni ngawt mai, ka thiam loh vek a ni. " Ka ti ve a. Ka nu pawh a ṭhu ve nghal. 

"Engpawhnise ka damlai ngeia ka hmu thei che hi ka lawm viau tho e. " Ka pa chuan a ti leh a, "Chutiang sawi mah ta che, i dam leh vat dawn alawm" ka lo ti ve a. 

"Tun ṭum chu ka damchhuak zo pawn ka ring lo, a nat dan hi a ril êm tawh mai. " A tih chuan a nupui chuan, "U Zo, i dam leh em em ang. Min kalsan thei i la ni lo" a lo ti a. A lungngaih hmel hle. 

Ka pa chuan ka nu enin, "Puii, ka lo kal ta a nih pawhin Bawihi hi ṭha takin lo enkawl ang che aw. Tin, a tan thil liantham chu ni lo mah se; hnutchhiah ka nei ve a, hei kan nu pawh hian a hria e. In lo inhnangfak ve dawn nia. " A ti mawlh mawlh a. A âwm chu a dawm leh vang vang ṭhin. 

"Ṭawng tawh rih suh, i chau lutuk palh ang. Chutiang ro khawm tih vel chu kan beisei miah lo a nia..pa leh fa in ni a, in inhmuh hi ka duh vang zawk a ni" ka nu pawh chuan a ti ve a. Ṭawngtir vak kha a ṭha lo. Nurse-in damdawi a rawn pe a,. Ka pa nupui chuan, "Zai a ngai dawn a, mahse, a BP leh sugar a san avang hian an la zai ngam lo va. Inenkawl deuh a ngai dawn a ni." A ti sep sep a. Eng han tihtheih ni rih hek lo le, ka pa chu kan hawnsan leh ta phawt a. Chawlh ka la ta sa sa tiin in ka tifel a, kar tharah chuan in chung pawh an peih tawh hmel a, kan luah lut ve thei tawh ang chu. A zau zawk bakah a nuam zawk bawk dawn a,. Kan chêp lo deuh tawh ang chu. Ka nu nen ka pa chungchang kan sawi mawlh mawlh reng mai. Eng nge min hnutchhiah chu ni ang tih ka ngaihtuah ve reng bawk. Eirawng kan bawl laiin Maliani'n min lo call a, "A reh hle mai, i awm lo chu" a rawn ti a. 

"Nia, thil i ei ṭha em?" Ka ti vat. 

"Ei lo" a ti hmuk a. 

"A mak! Ei ṭhin rawh. I taksain a mamawh" ka ti hlar a, nimina a mood chhia kha a reh ṭan tawh niin a lang. 

"Ka ei peih lo" a ti hmak mai. "Naktukah ka rawn kal hma dawn nia" ka ti daih a,. "Victora pawh a rawn haw kha" a rawn ti ngei. 

"Nia, " ka ti ringawt. 

"In inngaizawng em ni?" A rawn ti hlawl, ka nui vak vak a. "Teuh lo mai. " Ka tih chuan, "Kan hria ang chu" a ti sap a. Nuam lo ka ti deuh. 

Zanah hla zir tur an tih tlat avangin Ateii nen kan va zir ve a,. Kan innghah khawm laiin Victora'n min lo call a,. Ka la lo ṭêp a ni. 

"Ka lo leng dawn" a rawn ti dût a. 

"Hla ka zir" ka ti vat. 

"Ṭul lo thei" a ti hluk a,. Ka nuih a za deuh, min bialnu chei deuh ringawt niin ka hria. 

"Ṭul e" ka ti ve hlak a, "Naktukah lo kal rawh aw. Vawiinah i lo awm lo va" a rawn ti a,. "Kal dawn e. I hna i kal dawn lo mi?" Ka ti ve mai a. 

"Kal dawn lo, ka awm dawn che" a la tizui! Ani pui hian a ti tak tak roh ang tih a hlauhawm, ka hnar rei thei miahin ka ring lo. A chhan chu ka hriat loh karah te hian ka lo ngaihtuah vung vung zel tawh tlat. Hmeṭha ka ti ve tho bawk si. Hla lah chu kan zir rei phian a,.ka ning lek lek. Hawn veleh phone pawh khawih zui tawh lovin ka mu hmak mai. 

Maliani te in ka thlen chuan tukṭhuan an lo eikham deuh chiah a, U Mateii pawh a la kal lo. Victora nen kailawnah kan intawk leh chat mai, "Hla zir reinu" a ti nghut a. Nizana a msg kha zingah ka seen chauh ve bawk a. 

"Ka duh leh" tih leh kal pelh mai ka rual a, min kai lêt dâwrh a, bangah min nawr bet titih zui. "Min tihlau a nia" ka ti chul a. 

"Ka bialnu i nih hma chuan ka thlah dawn lo che" a ti ta mai. A nui hmel hmuh ka tum a, a nui duh miah si lo. "Kal teh, min hmu a nge" tiin ka nam a, "A ho,. Victor, i bialnu ka ni ti la ka kaltir ang che" a ti tlat a,. A chak roh si. "Uan hun a ni lo a nia" ka ti leh chiah chu Pi Lingi aw ka hre zui nghal. "Bawiha, eng nge a awmzia?" A ti tuar a. Victora chuan min thlah duh chuang eih lo mawle, "Ka bem mêk a nih hi" a ti hmiah mai. Pi Lingi lah a meng rum nasa ngang mai a, "Kha nu kha maw? Kha nu ber kher kha maw?" Uar zet hian a ti tâwn tâwn a. 

"Aw he nu ngei hi ka duh a ni" A lo tihsan leh hmak. 

"Vica, min thlah phawt teh , a dik lo" ka ti a, ka tal nasa viau bawk. 

Ka mitah tak melhin, "Min duh tiraw? Sawi rawh le..". A ti sup a. 

Pi Lingi chuan, "Ani kher kha chu ni lo ve..Bawiha" a rawn ti leh chuan mi run lutuk a,. A nu hriat phak ngei turin, "Aw ka duh che. I bialnu ka ni" ka ti ta siah mai. Inchhir loh erawh ka tum ang chu. A nui suk a, min thlahin, "Ka bialnu nih i inchhir ngai lo vang" tiin ka chalah a rawn fawp zauh a. A kalsawn nghal, chak zetin Maliani pindan ka pan ta nghal a. Ka lung a phu dup dup mai. Ka va luh pawn ka hmelhmai a dik lo nge ni, "Hlauh nei i va ang ve" a lo ti chiah reng a. 

"Ka ṭha" ka ti hawk ringawt. 

"Eng nge thleng? Ka nu bawk em ni?"dilchhut takin a ti leh a.

A la hre tho dawn tih hriain Victora chungchang chu ka hrilh ta vek a. A ngawih reng hnuah, "A tihnat che ka phal dawn hauh lo va. Chuvang chuan i thu sût leh rawh" a ti hniam ta raih a.

"Min tihnat i ring tihna em ni?" Ka tih chuan, "Hmeichhiate hi a tan infiamna chauh alawm an nih. Ngaihzawng nghet pakhat chauh a la nei, midang chu a kawp kual mai mai. A tan hmeichhia te hi toys an ni, kei ang bawka hmangaihna la runthlak mi a ni a, hmeichhe pakhat avangin he nun hi a nei ta a nih hi.." a ti ta mawlh mawlh a. 

"Julie in tih kha em ni? A ngaihzawng chu" ka ti vat a. 

"Ni nang, Julie te chu a uitê mai mai. Mahse, a hmeichhe kawp rei ve ber chu a la ni ang" a ti hul hak a. A hmel a thutak ran mai. 

"Engtin nge a tihnat ṭhin? Pawi i tih loh chuan a chanchin min hrilh teh. Ka hrechiang duh" ka ti ta sawk sawk a. Zep an nei tlat hi ka ngaithei tawh lo. 

"Coffee zuk siam phawt rawh" a ti a, hmanhmawh deuhin in hnuaiah ka chhuk nghal. Coffee ka siam rak rak lai chuan Victora nu a rawn kal ta a, Victora tak chu khaw nge a awm ka hre lo. Ka bulah a rawn ding a, "I thutlukna kha sût vat ang che. " A ti a, ka rin aiin a pawr lo. 

"Ka hre lo le" tiin ka chhang a. 

"Enteh, i hlimna tur zawk ka sawi aw, ka fapa nundan hrechiangtu ka nia,. Hmeichhe tihnat chiah a thiam. Nakinah i la na dawn. Maliani avang pawn ngaizawng suh" a ti ta mawlh mawlh a. Ngenna te pawh a ang lek lek zawk. 

"Ni e, ka lo ngaihtuah ang" ka ti ringawt. 

"Engkim i hriat hunah i danglam mai ang. Mateii i la zawt dawn nia." Tiin a kalsawn leh daih. Maliani ka aṭangin ka hre dawn alawm le. Coffee nen ka chho a,. Khumah ṭhu dunin coffee in pah chuan a nau chanchin chu a sawi ta malh malh a. 

"Râwlthar duhawm tak a nih laiin a vawikhat nan bialnu a nei ve a. Min bialtu Pastor fanu a ni nghe nghe, thianghlim taka inngaizawngin an hlim dun ve em em ṭhin. An nulat tlangval chhuah hnu thleng pawn inzui zelin kum 3 dawn an inngaizawng âwm e. Rinteii pawh kan inah te pawh a rawn leng ve zeuh zeuh ṭhin. A chhungte lam pawn Vica chu an iai hran bik lo. Mahse, hun a kal zel a, vanduainain a hmuak chho ta a ni. Nang pawn ngaihtuah lêt la i la hre thei maithei. Rinteii chu a nu chhungte bulah Champhaiah a zin a, chutah chuan vanduaina a tawk ta a ni. A nuteii te leileta an feh chu thim thlengin a awmna chin an hre zo ta lo va,.a zan azanin an zawng nasa. Mahse, an hmu zo lo. A tukah khawtlangin an zawng ta a,. Leilet piah lawk luitê kamah a ruang an chhar ta a ni. Pawngsual a ni bawk,. Pastor fanu pawngsuala thah ni bawk chuan Zoram a dengchhuak a, nang pawn tikhan i la hre thei ngeiin ka ring. A thattu lah tun thlengin hriatchhuah a la ni lo. Chu thil chuan Victora nun a vaw chhe ta vek a, a ni lo zawngin a nghawng a ni ber mai. Zirna pawh a chhunzawm hleithei ta lo. Sual kawng zawhin a bawraw chho ta em em a, hmeichhia amah hnaihtu te lakah a rilru kalsualin, "Rinteii aiin ti nge a lo thih zawk loh? Ani chu a la dam a, Rinteii a thi bik. Chuvangin tumah hi nuamsain an dam bik tur a ni lo" tiin tihnat nan a kawp ta hmiah hmiah mai a. Nula ho lahin an lo duh thei phian zel bawk si,. A tawpah tikhan midang kawpsanin a thlauhthla leh ṭhin. Julie kha chu keini pawn an inzui rei êm avang khan Victora hian a hmagaih ve tawh a niang tiin kan lo lawm ru ve viau a, amah Julie zik zek reuh khan a lo kawp ve khanglang a,. Victora'n a hrechhuak ta si nen, a thlah zui ta hmiah bawk. Julie hi chuan a la duh tih ka hria. A tatoo te hian awmzia a nei ve vek alawm,Rinteii hming pawh a bânah hian a chhuttir ngat. Rinteii thih hnu kum 2 chhung kha chu tualthattu zawngin a hun a hmang a ni ber. Champhaiah pawh a zin zing alawm,. Rinteii pa ten beidawng tawh mai tura an ngen pawn awmzia a nei thei lo. Motor workshop hi ka pain bul a ṭansak a, pangngai takin a thawk thei ta hlauh zawk a. Amah a lo tui ve bawk nen,. Tunah chuan a intodelh thlap tawh. Ka nu hian a hmeichhe kawpte hi a tina leh mai mai dawn tih a hriat avangin Victora hlat turin a hrilh fô thin, ka nuin a duh loh vang emaw an ti zawk thin a. Victora chungchangah chuan ka nu a demawm loh..chutiang a nih avang chuan tihnatin i awm ve mai ang tih ka hlau a, heng zawng zawng hi ka sawi a nih chu..".tiin. 

Ka ngaithla tui kher mai. A sawi takah chuan hman deuhah pastor fanu thih dan runthlak tak kha ka hrechhuak uai uai alawm le, kha hmeichhia kha Victora ngaihzawng a lo ni reng a nih chu! Tupawh khan kha nula kha kan lainat a, awmhmunah kan thin a lo rim ve em em ringawt a nih kha..Victora tan phei chuan a va na dawn tak êm. Mahse, Rinteii avanga hmeichhe dang tihnat kher erawh a ṭul ber lo thung. Tawrhna hian mihring rilru leh ngaihtuahna hi a lo chawk danglam thei khawp mai. A chanchin ka han hriat takah chuan ka rilru pawh a buai ve ta viau..

"Ka hmelṭha hran si lo va, ti nge hetianga min duh anga a lan tlat le?" Ka ti hap a. 

"Nang leh kei kan inpawh tawh tih a hria a, ka hlimna lakbo a duh pawh a ni thei tho" Maliani chuan a ti a. Ani pawh hi a rilru a kawi leh zauh ṭhin, Maliani vanga kei min tihnat a duh daih chu ka ring lo ve tawp. 

"Hmingi te kha a hnar tho bawk sia, khatiang khawpa duh si chu.." a ngaihna hre vak lo hian ka ti leh a. 

"A hnar hleinem,. A pindana an tawm dun lai pawh U Mateii'n a phâwk alawm. Mahse, an chesual hman lo va, Ka nuin Hmingi kha a ban ta nghal a nih kha.." a tih chuan mak ka tiin ka hnual rawih mai. Mahse, Tunah Hmingi chu a hnar leh tho bawk sia. A duhzawng a ni vak lo a niang. 

Thil ka hre ta rau rau, hriatbelh zel châkna rauin min man nge ni.."A nih ti nge in unau karah khi a awm?" Ka ti ta tawl mai a. 

"Hre lo la a ṭha zawk" a ti hmak mai a, zawh luih ngam chi a ni lo hrim hrim. Ka ngawi ta hmak a, eitur ka zu siamsak zui ta bawk. Sangi ka hmu miah lo, a piin a tir chhuak leh tawh a niang. Ka nuin a lo call a, hlauthawng deuhin ka la, ka pa chungchang a nih ngei ka rin vang a ni. 

"Tun mai khan i pa chu a kal ta nge nge a nih chu" a rawn ti ta a. Mi nghawng ve dawt mai. "Aw le, rawn haw nghal ka tum ang" ka ti a. Ka thawte a rangin ka lungphu pawh rang tak a ni. Maliani bulah ka chho ta vat a,. "Malian, ka pa a boral" ka ti teh tawp a, a hawi â hau mai. "Maw?! Tunah maw?" A ti nghek. 

"Aw..tunah khan ka nuin min rawn hrilh,. Engtin nge ni dawn?" Ka ti khur dar dar a. 

"Haw rawh. Hei injection a hun chiah a, min chiu zuai la, i haw dawn nia. " A ti ve ta sawk sawk a. Damdawi chu ka buatsaih nghal chuk chuk a, ka jection nghal. "Rawn ṭawiawm che pawh a ṭhat nen,, ka chhuak thei si lo va" a ti ve ngial a. 

Ka kal hma deuh chuan, "Kha hei hian i pa ka lo râl ve ang e" tiin cheng 2000 tlang min pe a, dawn loh chi ni hek lo, pawisa chu lain ka chhuahsan ta nghal. Victora pawh ka hrilh hran lo, khaw nge a awm ka hre bawk si lo va. Mahse, gate bulah a lo ding run mai. "Ngati nge?" A lo ti hû a. Wrench a ken danah motor a khawih leh a nih ka ring. 

"Ka pa a boral a" ka ti chu a meng phâwk ve hle. Mahse, hamhaih rei lovin, "Min lo nghak rawh, ka va intifai thuak ang a, ka hruai ang che" a ti sawk sawk a, chhan hman rual lohin a tlan lut daih bawk si. Taxi chan tho a ngaih avangin ka lo nghak angreng a, 10 mins velah a rawn inpeih nghal. A inchei ve deuh bawk,. Kamiz dum a hak chu a inhmeh kher mai. Motor tinungin damdawi in lamah kan tlan ta nghal a, ka nu ka be pah bawk. Ka pa te in hi ka hre tho naa, damdawi in aṭanga an la lakchhuah loh avangin zui haw zawk chu a fuhin ka ring. Kan va thlen chuan in lam an lo panpui dawn mek a, ka nu te erawh an awm ve rih lo. Tichuan, ka pa chu kan zui haw ve ta a,.an in a zau nen an lo khat hmûr tawh. Ka pa hi pa sual a ni lo bawk a, khawtlang mite pawn an sûn ve khawpin ka ring. A nupui chu a ṭap nasa khawp mai, keipawh ka ṭap ve feih feih a,. Victora pawh ka bulah a ṭhu ve zel. Ruang kilin kan ṭhu ve a, a nupui khan ka pa chhungte bulah ka pa fanu ka nih thu a sawi bawk a, ka tan pawh inthlahrun a na lo deuh. Ṭah hla chham ngam ve hek lo ka rilruin, "Ka pa, hun rei tak hnuah pafa angin kan inhmu chiah a,. Tunah i kal leh nghal si a, ka hun ṭha zawng zawnga ka lo hmu duh ngai lo che kha min ngaidam rawh aw" a ti ve mawlh mawlh mai. Victora bulah motorah khan kan inpafa dan chungchang tlem ka hrilh tawh a,. Kan inah a lo kal tawh sia, mak a tih ka hlauh vang a ni. 

A tawi zawngin ka pa chu ropui taka vuiliam a ni ta a,.ka nu pawh vui ni chuan a kal ve. Amah lo iaia duh lo tawhtu mah nise, ka pa nu leh pa tar tawh takte chu ṭha takin a bia a. Tin, hun a kal tam ve tawh bawk a, ka pi leh pute pawh chuan min lawmin min thlakhlelh hmel ve hle. Ka pate nupa hian fa pali an nei a, anni nen pawh ṭha takin kan inbe thei mai. A hmain ka pain ka chungchang a lo hrilh vek tawh bawk a. Mak an ti lem lo. Ka pa thih sarhu chhungin Victora ka tan a hlu hle, veivah a ngaihna apiangah min hruai zat zat a. Pu Zaua te lahin kar khat lai chawlh min pe bawk. Maliani pawn min rawn be deuh reng a, a khawhar tawh thu a sawi tam mah zawk. Victora chuan min bialnu chei hmiah si avangin keipawn bialpa angin ka en lo thei ta bik lo va,. Mahse, a nunhlui leh Maliani thu min hrilhte kha ka vawng reng thung. Luh thuk lutuk ka hlau ve tho,. Bialpa te nen inṭhen pawha tuar vak ngai lo ni mah ila; Victora hi chu ka bialpa dangte zawng zawng aiin a hmelṭha a, min ngaihsakin a bula awm a nuam bîk tlat, chu chu a danglamna a ni. Ka chawlh hun pawh a tawp ve ta a. Hna ka ṭan leh dawn ta. 

Maliani nen kan han inhmu leh chu kan hlim hle,. Thil ei ṭha turin kan infuih nasa bawk a, a lo mum ve kâng tawh. A vun erawh a dâng bai reng thung. Victora nen kan chungchang pawh ka hrilh ta vek a, min ngaihsakzia leh ka tana a ṭangkaizia te chu.."A nihdan fô alawm. Tikhan a inatchilhtir te tê che ang a, a bansan leh hmak ang che. Chutah chiah chuan kan hnena thawh hi i duh tawh dawn lo va,. I bang ang a, kei a hma ang bawk khan ka awm leh ang. Chu chu a duh alawm" a ti ta daih a. 

"Malian, a lo dik lo ve thei tho asin. Amah ka va duh leh ṭan vang ngawr ngawr lam ni lovin min duh ve tak tak pawh a ni ve thei tho asin" ka ti a. 

A nui hul hak, "Nakinah chuan kei aiin ani i la ngaihsak dawn a nih chu" a ti leh hmak a,. Rilru a va tibuai ṭhin tak. 

"Then dan ka lo zawng dawn nia" ka ti ta ringawt. Victora nen inngaizawng ang tak takin kan awm tawh tih a hriat aṭang chuan a mizia pawh a danglam sâwt hle. Ka thawh tirh lai ang mai khan a awm a, diktak chuan Victora nen pawh inbe ṭha viau lo mah se; an inbe ve thei tawh a, ka lawm tawh tehlul nen. Tunah tiang hian a awm leh ta si. Pi Lingi tak erawh chuan min tawngkhum em em tawh lo, tunhnaiah a bawrhsawm chho ve deuh nge a mu deuh reng mai a, ka hmu khât angreng. 

Victora pawh chhunah thil ei turin a rawn haw ta ziah a,. Ka thilsiam kher a ei duh chu a lawmawm lamah ngai ang. Inngaizawng anga awm e ti lo chuan fawh pawh kan la infâwp lo. Phoneah lah zing leh zan mut dawna in wish bak a hranpain kan ti ngai chuang lo,. Min biak tam a duh chuan a lo call mai zel. Mahse, sawi tur hi keimah zawk hian ka hre vak ngai lo. Vawiin pawh a rawn haw leh a,. Chow ka kansak a,. Sangi a chhuah lawk avangin ruah sur mai turin a lang si a, puan pho seng turin in chungah ka chho a. A tam hrep lehnghal. Ka chhuk leh chuan chokaah Victora chu a lo awm tawh lo va,. Thawmhnaw thleh fel hmain Maliani eitur dah turin ka chho leh ta phawt. Kawngka chu a lo inkau deuh a, Maliani'n, "Keimah vangin i ngaizawng der a, a dik em? Ka hlim ve hi i phal lo alawm tiraw?" A tih nghat nghat ri ka hriat takah chuan ka ding ta reng a. 

Victora chuan, "Rilru kawi tak puin i lo dawngsawng a,. Khatiang kha ka rilru a ni lo. Ani hi nang pawn a danglam bik tih i hai lo. Ka duh a, ka ngaizawng, a ṭha em?" A ti nghut nghut a. 

Maliani chuan, "I tihnat leh kaih kual mai mai turin ani kher hi chu ka phal lo. I tina a nih chuan a pawi khawp ang" a ti tân tân a.

Victora rum nghut chu ka hre pha, "Hunin hril rawh se. Tihnatna chhan tur ka nei lo,.tin, i hriat tur chu ani hi heta a rawn thawh hmain ka hre tawh. Amah pawn chu chu a hre kher lo vang. Rilru ngil pu hram ṭhin teh" a ti mawlh mawlh a. Min lo hre daih tawh a nih awm chu a. 

"Kan hria ang chu.. ka hlimna lak bova a awm a nih chuan nangmah hi a mawhphurtu i ni ngei ang" Maliani chuan a ti leh hram. 

"Ka duh vang renga tina che ka ni lo tih i hriatchhuah hi a hun tawh mawle. Kha mi tenawm vanga kan inkar zau tawhzia hi..i nau ka ni, ani khan a phatsan che. Kan hria,. Harhchhuak tawh teh. Ka u" Victora aw chu a ring hauh lo naa a ngenngawl khawp mai. 

"Chhuak rawh, ani kha i rawn sawi a ṭul lo ve. " Maliani'n a ti chang rât. Victora'n min hmuh ka hlauh avangin hmanhmawh deuhin stepah ka lêt thla leh hlawk hlawk a,. Ka chhoh leh chuan kan intawk a, "Dah la, lo chhuk leh rawh" a ti hmuk a. Ka lakah a thinrim ve ringawt em mawni le. Maliani lah a lo tum lian em em bawk si,. An unau inkar boruak uap lutuk hi keipawn hahthlak ka ti tawh takzet a ni. Victora hian Maliani lakah eng pawikhawihna liantham tak lo ti tawh ang maw..an zêp tlat bawk si. 

"Ka ei peih lo, i bialpa nen zuk ei ru" Maliani aw chu a chang khek khawk hle. "Ka eitur chu a la awm alawm, ei tum rawh." Ka ti hram hram a. 

"Dah la, chhuak rawh. Chance in duh takin" a ti leh hmak a,. Heti nitin hi a ni deuh zel tawh. A bula ka awm tam loh hlau em em thin khan min hlat tial tial tawh a ni ber. Hnial loin ka chhuksan ve ta hmak a,. Vica chu chokaah a lo awm a, ka ṭhu ve nghal. 

"I mood a va off hmel ve " ka ti sep a. 

"Off khawp mai. Hun hi her danglam thei ila tiraw." A ti nem duai a. 

"Ngati maw?" Ka tih chhan, "Let leh thei ngat ila chuan ka û pawi ka sawi miah lo vang le.." a ti chuai ruih a. Zawh hunlai tak a ni bawk a tiin, " A eng pawi tak nge i lo khawihsak le ka ti.." thaw la hawk pah hian ka ti a. 

Coffee no chu a melh ngat ngat ringawt, ka lo ngaichâng ve reng bawk si. "Thil pawi lian tak ka ti a ni. Nang pawn min hnawl phahna tur khawp" a ti zawi sup a. 

"Ka hriat ve chi a ni lo tihna ni maw?" Ka ti a. 

"A hunah chuan i la hre mai ang..hun ka tih hunah, a ṭha em?" A ti nghut a, "Tual i that tawh em ni?" Ka ti leh ta phawng a. 

Hul zeta nuiin, "Sual ve teh mah ila, nunna hlutzia ka hre ve alawm." A ti duh lek. 

"A ṭhat chu, tual i that emaw ka tia" ka ti hap a. Ka hnarah a rawn piai zauh a, "I â roh si. " A ti sup a. 

Ka chhang lo. "Kartawpah zanriah kan ei chhuak ang aw. Lo hre sa la" a ti leh a,. Pi Lingi a rawn lang hlawl. Min melh hrek hrek a, "In tenawm dun mang e" a'n ti ngawt a. Victora chuan a nu kuah thuakin, "Kan bal lo, kan fai ve lutuk" a ti ham ham mai. "Khawi eitur rawn chhawp rawh" tiin a nu chuan min rawn melh leh daih a,. Ka lo siamsak ve mai bawk. Vica pawh a kal a hun leh tawh a, kan inbye bye liam leh ta. An nunhluiah eng thil nge a û chungah a lo tih tawh ang tih hlir ka rilruah a awm chho a, zeldinna maksak tak tak lah ka ngah. Hriat chakawm zetin an sawi ve leh zauh zel bawk si. Sangi hian a hria ang em aw, ka la zawt teh ang. 

A tukah Sangi chu ka kawm fal thei ta hlauh a, pehhel kual lem lovin Maliani leh Victora inkara thil thleng chu ka zawt ta tawl mai. "Kei pawh chu chu lawm ka hriat châk em em. Ka awm hnua thil thleng a nih hmel bawk sia, engmah ka hre ve miah lo. Thup thei tak an ni. Zan khat erawh ka awm ve laiin U Ma-i leh ka pi hi an inhau hrep a, an ṭawngkam pawh na dun tak a ni. U Vica chu engkimah U Ma-i hian a puh fai vek a, "Victora vang hian ka la thi ang. A unaunu chungah tiang thil kha a tithei a nia" tih vel a sawi. Eng thil chiah nge tih an sawi bawk si lo. Ka hriat châk ve zia hi a.." a ti ta zung zung a. An chhungkaw mi leh sa zinga tel ve thei hial tawh tur Sangi meuh pawn a hriat loh chuan ka tan hriat ngaihna a awm lo. 

"An inhauh lai chuan Vica chu a awm ve em?" Ka tih chuan, "Aih, a zin lai a nia. Khang an buai lai vel khan U Vica chu a nî te bul Gauhati-ah a zuk awm bo char char alawm,. Chuan chumi an in hauh hrep hnu lawkah U Ma-i hi a damlo ṭan a,. A inla hrang chho ṭan ta bawk.".a ti mawlh mawlh a. 

"A nih Maliani bialpa Rinzuala hi i hmu ve tawh em?" Ka ti leh a. 

"Hmu ve tawh,. Ka awm tirh hian zantin deuhthaw a lo leng ṭhin. U Ma-i hi a dam loh hma khan Cosmetic dawr a nei a, dawrah pawh a lenchilh reng zel. Mahse, U Ma-i damloh hma deuh khan a thi thut a,. Chu chu U Ma-i dam loh chhan ber pawh hi niin ka hria. " A ti a. Tlem chuan ka hre tam ta deuh,. "Thi thut tihah engtia thi nge?" Ka tih chuan, "Aa..an sawi ṭha duh vak lo, a muhil an kaitho zo lo tawp a niawm e. U Mai hian a tuar nâ asin aw. Ṭah pawh a ṭap ṭha thei lo zawk,. U Mama te nupa leh keiman kan vil deuh tawp, a intihlum ve mai ang tih kan hlau a. Kan veng reng zel,. Thla 2 chhung vel chu engmah a ei duh lo ang a ni, drip an khaisak tawp zel. Dik tak chuan hetia a rilru a kawite pawh hi a âwm ve tho asin. " A ti niah niah a. 

 

Maliani khan ka bulah a bialpa chuan phatsan angin a insawi kha a nia,. A phatsan hnuah a thi tihna a nih hmel a, a tawrh chu a tuar ve tho ang. A hmangaihna la bo fai vek dawn hek lo. Ka khawngaih khawp mai. Phatsan a nih hnuah lu a sûn zui a, a natna nen, a chhel hle zawkin ka hria. 

"A nih Sangi, i pi hi i awm tirh pawn tiang tho hi em ni a nih?" Ka ti thâwr a. Ani pawh heti taka a thîp hian chhan a neih ve tho ka rin vang a ni. 

"Um.,ni deuh tho, an zingah chuan a sual ber hrim hrim a, mahse, tun anga phun reng leh mi chaldelh deuh ang hi chu a ni bik lo. U Ma-i natna hian a vaw chau nge ka hrethiam tawh bik lo" a ti ve mai bawk a. 

A dang ka zawt zui tawh lem lo. Maliani pawh min be ṭha duh lo mah se; ka enkawl dan a ngai reng a, a lakah ka dawhthei sauh bawk. Victora nen zanriah kan ei chhuah dawn avangin ka inchei ve deuh hlek a, tlaiah kan in tlawh kher tawh lo va chhuah tlang ka tum a ni. Ka nute pawh ka hrilh a, ka nu hian Vica chungchang engmah min la sawipui miah lo va, a duh ve ni turah ka ngai ringawt. A tatoo vel hi a hmu ve vek thin sia, ka lo îp deuh ṭhin. Victora pawh a rawn haw hma a, Maliani bulah erawh kan ei chhuak dawn tih ka sawi hran lo, a mood a chhiat belh dawn sa. Dar 5 pelh hlekah an in aṭang chuan kan inphur chhuak ta a,. Jimmy Restaurant-ah kan ei dawn a ni. Anni hi an hawnna a la rei lo va, a awmna hmun a fal nalh a, a nuam phian mai. Victora chu hmeichhe dang lo awm ve ten an melh duh phian a, kan inhmeh lo an ti ru ve tho ang. A ho êm mai. 

Eitur nghah pahin vawiin lam Maliani dinhmun kan sawi dun a. "Dawhtheih hlek a ngai a nih hi. Engtikah emaw chuan a la pawm thiam mai ang" a ti a, keipawn ka beisei. 

"A thuhrimin Maliani rilru hi ka hrethiam tho, kei ber kher hi ti nge min duh ka hrethiam lo. Kei aia hmelṭha, hausa bawk si an tam nen nen" ka ti niah niah a. Ka rinhlelhna hi a la bo tak tak thei lo. 

"I va indah hniam awm ve" a tih chuan a za zawk mai. 

"Chulam a ni lo, ka sawi tum i hria, Maliani vangin min ngaizawng der ve thei tih ka sawina zawk" ka ti hlar a. 

" Ka û ka hmangaihzia hi hrethiam thei la ka ti. Tihnat hi ka duh lo hul hual..a hnen aṭanga rukbo che ka tum lo. Ka bialnu turin ka duh che a, a tawk mai alawm.." a ti ve hluk hluk a, a lawm vak lo niin a lang. 

Eitur an rawn dah avangin kan ngawi ta rih a. Ka eitui ngei mai. "Zanin chu ka fawp tawh dawn che..thil thak lam ei vak suh" a ti sur sur a, ka chhiat khum nghek ringawt. 

Kan ei khamah Restaurant piah lawka park-ah chuan kan va ṭhu dun ve rial a. Kan ang ve tak tak tawp,. Mahse, ka sawi thiam lo, keimahah hian kim lo a a awm tlat. Inngaizawng te nun dan tur angin kan nung lo ka ti dawn nge, min care em em tho nain ka duhkhawp lo zawk. Ka la hre vat ang chu maw. Kan piah lawkah chuan nula leh tlangval an ṭhu ve fur a,.min rawn ngaihven loh lai tak a châng nge ni ka inrin loh laiin min fawp ta thut mai. Min han fawh takah chuan zu rim a nam tih ka hre thei nghal. Ruihhlo ti ngai lo ka nih avangin an rim hi ka hre hma bik hrim hrim bawk a,. Ka nam kiang vat a, "Mawla..mi an awm ve hi" ka ti nghek. 

"A ho" a ti duh lek a. 

"Chuan zu i in a..".ka ti nghat a,. "In e mawle. Zu ka in ṭhin tih i hre lo mi?" A ti ta mai. 

"Kha reng, inhrechiang mang lovin inngaizawng treat-in min treat nghal ringawt a. I chanchin leh nungchang diktak ka hrechiang miah hleinem" ka ti tân tân a. Ka thinrim hran lo naa kan inngaihzawn dan chu a lem ka ti ṭan. 

"I ngaihven ve lo a ni mai lawm,. Kei chuan i chanchin ka hre nual asin". A ti bung nghut a. A sawi dik ve tho, keipawh ka mawl reng reng,. A chanchin leh a eizawnna vel hi han zawha ngaihven ka tum lo ve hrim hrim bawk a. 

"Ngaihven dan ka hre hleinem" ka ti ṭâlh. 

"Kei chuan i nu hming te, i nau leh nuteii, i piancham engkim ka hria. I putea te nen in boruak te..nang chuan ka hming pum pawh i hre tawp nang. " Lungawi lo zet hian a ti ta a. Ka nui a, a nui ve duh ṭhak lo. 

"I hming pum ka hre miah lo tak tak. Eng nge" ka ti hû a, "Hre lo mai rawh. Ka sawi lovang" a ti khauh bur mai. 

"Ka hre tho vang. Maliani ka'n zawt lawk" tih pahin ka phone ka phawrh a,. "Ṭhingi" a ti hluk mai. Mahse, a thinrim lo tih ka hria. U Mateii zawk ka call ta a, Maliani mood a chhiat leh ka hlau a ni. 

"U Mate, Victora hmingpum min lo hrilh lawk" ka tih lai te chuan min melh vung vung mai. "Victor Lalrinmawia..ngati nge?" U Mateii chuan a rawn ti a. 

"Ka ti mai mai, a birthday i hria em?" Ka ti leh nghal zat. 

"November ni 7 aw. A va ho tak e aw" a rawn ti lâng lâng a. Lawmthu ka hrilh a, ka dah nghal. 

"Kei angin i serious ve tlat lo alawm. A dik em?" A tih chuan, "I serious bik lo,. Whatsappah pawh min be khât ve tho ê.." ka ti nang nang a. 

"Khatiang type neuh neuh kha ka peih ve hleinem. " A ti hlur bawk si,. "Ka peih alawm keiman" ka ti leh ṭâlh. 

"A tawk, infawp leh ang" tih leh min rawn fawh a rual nghal hmiah. Awii! Kan piah ami te chu an lo ehem tluar tluar a, ka zak lutuk. "Hmela,. I va han zak lo tak. Kal teh" tiin ka namsawn a, a khi suk duh chauh. 

"Ka bialnu i ni tih an hriat loh ka hlau alawm" a la tizui a. Hawn ka rawt tak tlat avangin a motor parkna lam kan pan dun a, min tawk zawngin nula pahnih an lo phei ve mêk,. Pakhat hleitling leh hmelṭha zet chuan Victora chu rawn thlek deuhin, "Vica.." a ti zauh a. Victora pawh chuan, "Eheu! Tluangi chu!" A ti ve bawk. 

An indinchilh tak avangin keipawh ka ding ve a. "Engtik nge i lo hawn?" Vica chuan a ti a,. "Kar hmasa nilaini khan. Awii i van ngaihawm. Engtikah nge dinner min treat dawn?" A ti zung zung a. A ṭhiannu nen chuan kan lo ngawi dûk mai. A hnu daihah, "I bialnu mi?" Tiin min thlek zauh a, ka lo lai deuh. "Aw..ka bialnu a nih hi, Hruaipuii, Hruaipui, Tluangi a nih hi. Ka ṭhiannu" tiin felfai takin introduction a pe nghal a , kan inchibai ve leh ta lâwp lâwp a. 

"Julie nen khan in la ni emaw ka tia" a ti leh hram. 

"Kan ni ngai lo hrim hrim.." Vica'n a tih chuan Tluangi mitmeng chu a danglam deuh. "Kan kal ang,nih u" tiin min kai a, min kalpui dawr dawr. "I thinrim mawni le..dawr dawr a che" ka ti a. A kal muang ta hlek,. "I thik ka lo ring ve a nia." A ti ta daih a, ka nui nghek. "Thik chu i va duh awm ve" ka ti kual a. 

"Thikthu nei la ka la tih awmchhun i ni" a ti dam thlup. Motora kan luh hnuah uluk zetin min fawp leh a, infawh na nâ na chu ka thiam lo hran bik lo. Ka hnute a rawn dap a, a kut ka paihthla nghal. A nui hak a,. "Good girl. Ka lakah pawh easy hlek suh" a ti zui sup a. 

"Ka virgin tawh hleinem" ka ti uang a. 

"Tu nge chu mihring chu? " A ti ling nghal vût. 

"An tam tawh mai, ka ex te zawng zawng" ka tih leh phei chuan, "I fiamthu em? Naa..pawi lo, kan ti ve ang a ni mai" a ti nghut nghut a. 

Ka nui ta vak a, ka uang tih a hriat avanga a hmelhmai inthlak ranzia ka hmuh chuan min hneh tlat nia mawle. Maliani rin ang lo takin ani hian min duh ve tak tak em mawni dawn le?! 

"Ṭhingi, khatiang fiamthu khan ka nuih a tiza ve lo" a ti hlur a. 

"Tak taka hetiang lam chu nakinah sawi ang. Tlan phawt teh. " Ka ti a. A tlan zui ve mai. 

"Lalrinmawi, i khalh chak lutuk. Ka hlau" ka ti nghek a,. "Duatpui ti la ka tlan muang ang" a ti tlat mai si. 

"I va chhe tak" ka ti hlar a,. "I ex te-ah kei aia hmeltha an awm lo" a ti khauh mai. 

"Duatpui" tih thu chu ka sawi ta nge nge a. A speed a thlak nghal..

"Ka û hian bialpa ṭha tak ka ni tih a hre ngei tur a ni. Nangin min pui bawk ang" a tih chuan ka meng phâwk deuh, "A awmzia chu i û in a ngaihdan che a thlak nan kei hi min lo kawp tihna maw?" Ka ti hâw a. 

"Ni pakhat.." a ti ta sup a.