Amah leh Kei 4

AMAH LEH KEI..(4)

Ziaktu : Toni Râlte

Maliani chu a khuh kharh kharh a,. Thil thui tak ngaihtuah lêt niawm tak hian a chhing leh vang vang phawt. Chutah, "SLE chauh hi ka natna a ni lo, HIV ka positive a,. Mahse, i ngaih ang kha a ni lo a nia" a han ti ta a. Ngaihdan ka nei tawp si lo, mahse, a rilru tur chu ka hrethiam. "Ka bialpa aṭanga ka kai a ni. Ani kha ka hmangaih ber a ni ṭhin a, a la ni reng a, a ni zel bawk ang. Mahse, min phatsan a. Min phatsan hnu lawkah ka natna avangin thisen test ka ngai si a, hiv ka positive tih ka hre leh ta bawk. Khawvel hi ka tan a fair lo, nun hi a hma chuan nuam ka ti ṭhin, mahse, tunah chuan dam zel châkna pakhatmah ka nei tawh lo. Ka pa leh U Mateii bakah naupangte avang hian ka la dam hram hram a nih hi, AIDS ka vei tih an hriat aṭangin ka ṭhianṭhaa ka lo ngaih te zawng zawngin min thlauhthla bawk a. Mahse, ka vui lo. Mak i ti em? Tikhan min ten tawh em? Min thinhrik ve em?" A ti ta mawlh mawlh a. 

"Cancer vei ai chuan AIDS vei ka thlang zawk. Tin, ka tenna chhan tur che ka hre lo bawk,. Tunlaiah mi nawlpui hi kan mawl tawh lo va, hmanlai ang khan kan inthinhrik tawh hleinem. " Ka ti ve ta duah a.

Hahdam huai hmelpu hian, "Ka lawm e. Nang chu i danglam bik ka tih reng kha. I rawn thawh hmaa thawkte kha chuan ka natna chauh an hria, nang chu hre ve tlak i ni a, i fimkhur nan pawh ka sawi a nih chu..ka chau riau mai. Ka'n muhil leh lawk ang e" tiin a chhing ta diar diar a. A hmel dâng bai melh vang vangin, "I damkhawchhuak ngei ngei ang" ka ti zawi sap. 

Victora'n eitur a rawn dah a, a û chu a la muhil thung. "In mu ṭha thei maw?" A ti a, a thil rawn ken dahfel pah chuan ka lo chhang a. "Keipawh hnaah ka kal ve leh tawh dawn a, tlaiah ka rawn tlawh leh ang che u. Ka û hi lo enkawl ṭha rawh aw. " A ti nghut nghut a, "Aw le" ka lo ti ve var. Chhuah pah hian, "I hmai bial hi i inhmeh " a ti zauh a, ka hre pha si. "I sual e a" ka lo ti hlak a. "Ka lawm e i ti dawn emaw ka tia" a la tizui. Ka chhang tawh lo. 

Ateii'n min zawt zing bawk a, rem leh rem lo va a thla ka lak ruksak chu ka va thawn ta a, "Awii a man êm a nih hi, a zûnah i uai ve ang e aw" a rawn ti chul a. 

"A tatoo hi" ka ti leh, "I ninawm. E chuan, Kimtea'n min rawn be leh reng a, renew ve leh mai r'u, a ninawm." A rawn ti leh daih a. Ka tûm nghal hmak. Ka ex te zinga ka hne ber kha a nia, renew leh ngaihna a awm lo nasa. Bakah sawi leh sawi hnu min duhin min hmangaih nise min lo kawp khanglang lo vang. Tun hnua inchhir leh khan awmzia a nei lo. Doctor ward rawn fang pawh chuan, "Hei a ṭha chak khawp alawm,.naktukah te chuan in chhuak thei tawh maithei" a rawn ti a. Ka lawm hle. Damdawi ina tâmtâl zawng a boruak hian min uap ve ṭhin a, nuam ka ti hlawl lo a ni. Bakah inah te pawh ka haw châk tawh hrim hrim. Ka beisei phak miah lohin U Mateii a rawn kal a, "Chhun lam chu ka âwl ve ang che. Zuk awm hahdam rawh" a ti a. Ka hnial naa min nawrlui tlat si, Maliani pawn a remtih avangin phur ru takin ka haw ta a. Veivah nan hian scooty hi chu la lak ve a ngai a ni,. Ka khalh thiam tawh reng, Ateii ta hi ka khalhsak nasa ve a. Mahse, hna ka hmuh hma te kha chuan ka nau zirna senso nen han la ve rup thei kha kan ni lo miau a ni. Nuteii'n in a lo nghak a, Bawihtea erawh ka nu nen dawrah an lo awm daih. A mit a sen râm bakah a bui deuh bawk avangin, "Nang hi i lungleng te hi i lo ṭap a ni lo maw?".ka ti fiamthu a. 

"A teuh lo mai. I putea te nen nizanah kan inhau deuh a, phone aṭanga inhrilh kha a remchang si lo va, kan rawn hrilh duh lo che a nih kha. " A ti ta mai a. Putea ka nei tih pawh ka lo theihnghilh lek lek tawh alawm le. 

"Ehe! Eng nge an rawn tih a?" Ka ti nghek a.

"I nu pawisa puk an rawn dil mawle" a ti hul hak a. "An khawsa thei viau emaw ka tia" ka tih chuan, "An nu fa bîk kha phaiah an refer a, eng nge a natna pawh ka hre lo. Chuta hman tur chu an tia,. An zam lo ham ham hi ka ti lutuk a ni" a ti duah a. An nu fabîk Lawmi chu a damlo tih pawh kan lo hre ve lem lo. Phai an refer hial a nih chuan natna serious tak a nih chu a rinawm. 

"Engzat nge an mamawh reng reng a?" Tiin ka han dilchhut deuh a,. "Nuai 2 vel an ti..rapthlak lutuk a." A ti ta zêk a. Lehlamah a thinrim viau pawh chu ka hrethiam khawp mai,. Pasal a neih dawn khan Putea chuan man a ei lo thei bik lo va, an khawsak nawm lai tak a ni nghe nghe, chuti chung chuan Nuteii hi a thuamchhawm pakhatmah an rawn tumsak miah lo a nia! Ka nu pawn mi pawisa a pûk phah hial nghe nghe. Chuvang chuan nuteii tan chuan ngeiawm tak tur an ni. Tin, bakah kan harsat vanglaiin min awmpui duh lo va, keini nufa pawh min han hnawtchhuak kha a nia. Ka nu tan pawh puk tur nei mah se; inpuktir a har ve ṭalh ang. 

"An zakthei lo hle a nih chu" ka ti ve ta sap a. Kan sawizui tawh lo. Ka chauh ve deuh vangin ka mu ta daih a, Nuteii te lo awm hi ka tan chuan a nuam hle, in chhung chet a taima si, rawngbawl a thiam bawk si. Ka nu pawh hian an indan a phal ka ring miah lo. Bawihtea lahin khawhar a hnem bawk si. Inṭhen hlen daih se a ṭha ang. Dar 3 dâwnah ka tho a, ka inbualfai zui a, tlai lutuk kha thil tih chi-ah ka ngaih loh avangin Damdawi in lamah ka chho leh ta a. 

Maliani chu a lo ṭhu harh peih ve a, U Mateii'n soup a lo siamsak mek bawk. "I duty i hre lo leh ṭhin. I haw a nih pawn rawn kal leh vat tur i nia sin. U Mateii pawn hawn a duh ve tawh ang a. " Maliani chuan a ti hlak hlak a,. U mateii mitmei a ven vang nge phei chu ka hre lo. "A ho lutuk, haw hmana chhan tur ka nei hleinem. Naupangho lah a pite inah an lo awm dawn a. " A lo ti vat vat a. 

"Nia, U Mate, i duh chuan haw tawh mai rawh. Ka awmpui thei tawh lawm".ka ti ve a. 

Maliani chu tuiluma deh a ngaih avangin ka buatsaih nghal chuk chuk,. Mateii pawh chu haw tumin a insingsa ṭan nghal. Maliani ka deh lai chuan a muthlu duar duar a,. Nuam a tih hmel hle. "Hruaipui, a chang chuan midangte tibuai tur ringawta dam ve reng hi eng nge maw a ṭulna le ka ti ṭhin" a ti sep sep a. 

"Chutiang ngaihtuah tawh suh. I rilru kha kal dik se i taksa pawh a chak mai ang" ka ti a. Ni e, a rilru a kal sual laklawh tawh a, han insiamṭhat thut pawh a har ve ang. A muhil zui ta a. Kei pawh tihtur em em ka nei lo bawk a, phone te ka khawih mai mai,. Ateii'n bialpa a nei thar a, min ngaihsak ṭha hman vak lo. Hmingi lah khan mi rawn be sek reng a, Victora chanchin bak sawi tur a hre si lo, kei lahin sawipui vak dan ka hre bawk si lo. A hahthlak ṭhin. Tlaiah Victora'n chaw a rawn dah a, "Naktukah chuan kan chhuak thei maithei" ka lo tih chuan, "In chhuah theih dawn chuan min lo hrilh la, ka rawn hruai ang che u. Ka pa leh ka û chu an hman dawn lo va" a ti a. Ka lo bu nghat nghat. 

A û chu a harh tawh a, a khum bulah a va ṭhu a, a lo melh no vak lo. A û kut cher ṭhiak chu a vuan a, "I dam vat ang. " A ti sup a,.Maliani a ngawi reng. "I rawn chhuah veleh sawi dun tur thil kan sawi dun ang. A ṭha em?" A ti leh a,. A kut lak pahin, "Sawi dun tur kan neih ka hre lo. I nu nen in sawi thei ang chu" Maliani chuan a ti ram hmak a. 

"Ani saw i nu a ni ve tho alawm" Victora chuan a ti a, "Ka nu a ni ve lo ve" a lo ti chang leh rât. 

"Ka û, i ngaihdan kha a dik lo. Chu chu nang pawn i hria.." Dawhthei zet hian Victora chuan a ti leh a. "Haw rawh, haw mai rawh. Hetianga min biak hi a ṭul lo" a ti nghat nghat a. A mood a chhiat leh vek dawn avangin keipawn Victora chu haw mai se ka lo duh tawh, min rawn melh zawk a, mitmeiin haw turin ka hrilh. A ding ta hluai a. Kawngka bul thleng ka zui ve a,. Zawitê hian,."I mawhphurhna a ni ta. A rilru i hneh thei a nih chuan i lakah bat ka nei ngei ang. I ti ngei tur a ni. " A ti nghet charh a, ka chil ka lem khawlh ringawt. Min chhuahsan zui ta nghal a. 

Maliani chu ka be ṭawng zo lo zui ta bawk, chaw lah a ei duh der si lo. Victora lo kal chu ka haw rum rum mai. Mut dawnah ka insum zo ta ngang lo va, "I nu leh i nau hi engvanga haw em em nge i nih?" Ka ti ta hrâwk a. Chiang takin ka melh bawk, chhuat lam melh ranin,"Anmahniin alawm min hua" a ti zawi sap a. 

"A huat loh che kha..a ngaihsak em em che asin." Ka ti leh hram. 

Za lo zeta nui hakin, "Chu! A zûnah i lo uai ve tawh tihna em ni?" A ti ta daih a. 

"Uai lo, ka uai bawk lo vang. Mahse, in unau inkar hi ṭha se ka duh em em a ni" ka ti hap a. 

"Ka nu uitê a nia,. A zûnah chuan uai duh miah suh. Ka nu tan Victora nupui tlak mizo hmeichhiaah an awm lo" a ti zui mawlh mawlh a. Ka zawhna tak min la chhang ta chuang lo. 

Muthmunah ngawi rengin phone ka khawih a, Victora msg a rawn thleng hlawl. "A ṭha em?" Tihtê hi.."Ṭha lo" tih chauhin ka chhang. 

"Sorry" a rawn ti a,. Han haw viau dawn mah ila a û laka rilru chhia pu nia ka hriat loh avangin ka khawngaih tho bawk si. "Ka buaina tur chu a ni miah lo naa engvangin nge hetiang em ema a huat che u le?" Ka ti ta thâwr a.

A lo call ta. Thawm dim takin ka chhuak a, toilet lam ka pan nghal. "In mu tawh mi?" A rawn ti a,. "umm" ka tih chuan, "Hetiang boruak hi engmah a hrilh lo che em ni?" A ti a. 

"Hrilh miah lo" ka ti ve mai a. 

"Hmaichhanah ka la hrilh dawn che nia. " A ti leh lawi a! Min hrilh tawh dawn emaw tih laiin. A dah zui daih bawk si,. Phun zui hlakin keipawh cabinah ka lut zui nghal a. Ka mutui phian lehnghal. Doctor te berin chhuak thei turah min ngai bawk a, kan inbuatsaih a, Pu Zauva leh Victora ka hrilh bawk. Chawhmaah kan intifel thei hlauh a, Victora'n min rawn hruai a, bangbawr zetin kan haw ta a ni. In thlen ruala Pi Lingi mitmeng thîp hlar han hmachhawn leh chu a hahthlak leh hle,. Min be eih lo va, ka be duh bik lo. U Mateii leh Sangi ten bungraw dahfel tur chu an lo dah fel zung zung a,. Maliani chu a room lamah a chho nghal hmak bawk. Keipawh chhoh ve mai ka tum a, "Nang kha..chiang deuhin ngaithla rawh. I mawhphurhna hlen tawh ang che. Khatiang thil kha a thlen leh chuan i inbân angah ngai hmak ang che. I hria em?" Nu ber chuan a ti leh ta tûn tûn a, Victora'n, "Hahdam teh, ka nu..i fanu tan ani hi nu leh pa a nih hi..a lakah hian mawi lo leh sual taka i awm leh chuan keimah min hmachhawn tawh ang. Hrereng ang che" a lo ti ta hmiah a, ka lawm ru viau naa, Pi Lingi chu ka lakah a thinur nasa zual sauh dawn tih ka hria. Victora inah a awm tam si lo va, ami ṭawng khumna kha zet ngaihthlak a ninawm leh dawn a ni. Ngaihven zui duh lo luiin in chungah ka chho ta nghal a. Maliani chu a lu ka suksak a, a inbual zui nghal. A room chu Sangi'n a lo tifai ṭhin a niang, a felfai khawp mai. Maliani inbual lai chuan kawngka bulah Victor a rawn ding a, "Ka nu hi chu ngaipawimawh suh" a ti nghut a. 

"Nia, a mizia hi ngaiah ka nei thei mai ang" ka ti ve hmiah. 

A rawn pen lut a, a sang angreng sia, Room chu a chêp sawtin ka hria. Ka hmaah tak a rawn ding a, a chetdan vel chuan min tihamhaih deuh,. "Eng nge?" Ka ti hâ a. 

"Hmai bial hi hmelṭha ka tih zawng an ni ngai miah lo" a ti ta daih a. "E" ka lo ti ve hmak. Ka hmai bial pawh chu min chham khum sek hlawm le. 

"Mahse, ka ngaizawng dawn tlat chein ka hria" a tih leh chuan ka melh hrâwk mai, a thutak em em bawk si. "Fiamthu i thawh thiam lo e".nui chungin ka ti a. 

"Hmeichhe dang chuan ka bialnu nih an châk ṭhin asin" a ti leh sup a. "Ka tel ve lo a nih chu" ka ti zangkhai vah. Zep nak emaw hmelṭha chu ka ti alawm, mahse, a tatoo vang bakah ka pride te hian chutimaia intihtlawm an phal lo. Mahni tawkah inlak value ve tlat hi a ṭha. "I tel" a ti hmuk a, rum fahrana melhin, "I zak lo" ka ti nghek. 

"Ka nupui i la ni maithei. Ka nu i deal thiam dawn tlat" a tih leh phei chuan, "Ka hrawn peih awzawng lo" ka ti ta hrep a. A nui ta hawk hawk mai. Maliani a rawn chhuah takah chuan a nui tawp hmak a, Maliani pawn kan pahnih chuan min melh uluk ngang mai. "Eng nge in tih ?" Keimah zawk min enin a ti ro hak a. "Engmah ti lo ve, i nau hian min bem a.." ka ti hmiah. Victora chuan, "I mize tereuh hi..Lo ṭha rawh u. Hnaah ka kal leh dawn" tih leh chhuah a rual daih. Maliani chuan, "Fimkhur ang che. Ani sawn a eizo ve palh che ang e" a ti a. "Mahse, hmeltha chu ka ti" ka ti ve hram, no lo zeta min melhin, "Hmeichhe dang aiin i danglam thei. Hlat la a ṭha a ni mai. " A ti vin hlar mai. Ka chhang zui tawh lo. Pu Zaua'n Maliani chhuah lawm nan chawhlui kilpui turin min sawm ve nasa si a, nidangah ka hnar ziah sia, ka inthlahrun tawh avangin ka ei ve dawn ta nge nge a. Sangi nen rawng kan bawl a, U Mateii'n a khat tawkin min rawn vil bawk. Alu leh mautuai rêp ka bai pawlh suah suah a, Sangi'n, "Ka ei châk tawh" a ti sek mai. Victora leh U Mama te pawh an rawn haw ta a, naupang pahnihte hi an zahzum luatah kan innel thei tak tak lo, kei lah naupang han chhawnchhaih vak dan ka thiam si lo va. Pi Lingi pawh ṭhuthmunah a phun a phun leh tawh, tuman an ngaipawimawh tehchiam lo a niang. Maliani pawh ngen taktêa ka ngen avangin zanriah chu kan bulah a rawn ei ve thei dawn ta a, a chhungte bula chaw a ei lohna a rei tawh viau a niang, U Mateii leh Sangi an lawm fâl hle. A ṭawng lo va, a tum bâr reng mai. Zanriah chu kan han kil ho ta ngei a, kei thil ei niap niap chi ka ni lo bawk a, ka ei leh bawrh bawrh pek a,. Pi Lingi'n, "Ṭawp e" min han ti ta chiah a. An pain a mitmei ka hmuh avangin ka chhang duh lo. Ka bai siam chu tui an ti ve bawk a, a siamtu nih a nuam takzet,. Maliani meuh pawn tui a tih thu a sawi ve niah niah kha, Victora ta pek chuan, "Ka nu hian eisiam thiam a ngaisang khawp a, a mo i nih pawh a pawiti lo viau ang" a ti a, a nui sâng bawk. "I ti ang lo em mai a,. Ani leh keini dinhmun chu lei leh van ang a ni. Kan inah a khawsa thiam lo vang" a nu chuan a lo ti bawrh bawrh,. U Mama'n, "Ka nu pawh hi a..fiamthu hi hrethiam ve ṭhin rawh" tiin a lo khap ta vat. A mo atan chuan min duh lo awm rem rem hle mai. A mo nih ka châk lohzia hria se a zak ve deuh mahna le. Eikhamah Sangi ka pui ve nghal a,. Mateii pawh a che zung zung mai. "Damdawi dawr nghah leh ka tum ṭan a, ka awm loh lek phei chuan Ma-i hi i lo ngaihtuah zual a ngai viau ang. Hrethiam em?" A nute hriat loh chuan a ti sar sar a, "Umm hrethiam e" ka ti vat. Kan intihfel meuh chuan dar 8 a ri thuak tawh, kan ei tlai ve bawk nen. Victora chuan "Ka thlah ang che. Lo ṭhu lawk rawh" tiin in chungah a chho a, rin ang ngeiin, "Thlah kher eng nge a ngaihna? Taxi veivak a la tam ang chu" Pi Lingi'n a ti leh tawh. "Awm ve mai mai teh,. Nge maw i kawih em em reng ni" an pain a lo ti ta hmak mai. Ani pawh a ngawi zui ve ta a. 

Kan in pana kan tlan lai chuan sawi tur ka hre lo nasa si, amah pawh chuan a hre bik lo nge a ngawi ngul reng a. Mahse, a tawpa tawpah a mipa zawk na nâ na chuan, "Lo len i phal em?" A ti ta hlawl mai a. 

"Tunah maw?" Ka ti hû, ka at hmel thei e. "Tunah pawh nidangah pawh" a ti a. 

"A tê lutuk, kan in" ka ti ringawt,. "Ka leng ve tho ang, sai pawh ka tiat loh hi" a tih chuan kan nui dun hawk hawk. Tlemin ka inthlahdul ve thei ta deuh,. "Englo, Hmingi khan min lo biak rawh a tia" hmalam melh chung hian ka ti a. 

A thaw hawk a, "A luhlul zêk a" a ti hniam ruih. "A duh che ê" ka tih chuan, "Ka duh ve lo. " A ti bung nghut. 

"Duh ve mai la, a chhe lo alawm." Ka ti ve ta zel a. 

"Hmeichhia ka thêngthâwnga thawk awmchhun i la ni ang" a ti ta daih a. 

"Eng nge a awmzia?" Hriatchian châk ru ve deuh siin ka ti lawi rût a. 

"Hmeichhia hian ka nunah hmun an chang ngai meuh lo. Nang chu i danglam" a ti ta a. Sawi mai tur ka hre lo chu ka khuh der vak ringawt. Kan in pawh kan thleng ta a, Min zui lut ve ta nge nge e. Tv an lo en ṭhap a, Victora an hmuh chuan mak an tih hmel deuh. Inhmelhriattirna te ka han nei a,. Inthlak turin roomh ka luhsan. Ka inthlak zawha ka va ṭhut ve hnu 5 mins velah a ding ta hluai a. "Zan khatna a ni sia, leng rei min ti palh ang. Ka haw ang e. " A ti a,. "A la hma lawm" te chu ka'n tih khawmawi ve kha. Kan inthlah liam ta tho va. 

Nuteii'n, "Nula ho duh chi a nih roh kha. A pa riau" a ti ve ngei, ka ṭawng ve hma hmain, "Inngaizawng daih u la" a la tizui a! "Awii ka duh bawk lo,. A nu a sual si" ka ti hrep. Ka nu bulah min tihdan engkim hi ka sawi vek lo va, min ngaihtuah ka hlauh avangin, bakah tawrh theih loh khawp a ni lo bawk nen..vuivai kual kha ka peih vel lo. 

"Bialpa hi nei ve leh tawh hrim hrim la a ṭha, hei pasal neih te pawh in hun ve mai dawn" Nuteii chuan a ti ve leh ta zel a, "A intiduhtui khanglang a, Zira pawn a duh em em alawm, khitiang khawpa tlangval fel,.ruihtheihthil ti bawk si lo te khi a hnawl duh a nia. A la lengtar ang a a ni mai" ka nu chuan a lo ti ve zut zut a. Zira chu TKP Treasurer a ni, thawk khat lai khan min rawn be nasa mai a. Kan inah te pawh a lo leng reng zel. Mahse, mak deuh maiin a fel tehreng nen ka duh thei thlâwt lo, ṭhian atan chuan ka duh reng, han ngaihzawn ka tum pawn keimahah tui lohna a awm zel. 

"Ninawm, ngaihzawng kan duhtui loh ten, duhtui viau tur. Kan duhthusam ang thlap kha ngaihzawn tur zawk alawm" ka ti hmarh hmarh a. Ka nu pawh a chek hlak ringawt. Muthmunah Ateii bulah Victora min treat dan velte chu ka hrilh ve a, a rawn phur ngang mai. "Awii Duati, nihpui ngei ngei ang che. A chhiat loh bakah eizawnna mumal tak a nei a, kha bak bak" a rawn ti nasa mai. 

"Ka hrechiang lo ê, ruihhlo te pawh a lo ti ve ṭhin maithei asin. Ruihhlo ti mi ngaihzawn ka hlauhzia i hriat kha".. ka ti a. Nia, Victora taksa rang bei buai avang khan mipa fel leh ruihhloa fihlim a nih rin a har ve êm a ni,. Ka nu min fuihna fô, "Pasal chhia ṭha i la nei ve ang a, a hmasa berah ruihhloa fihlim hi an ṭha,. In ve zeuh zeuh ang chi pawh inneih hnuah chuan ngawlveiah an chhuak ṭhin. Fimkhur la" a tih vangte, ka hmuh leh hriat khawvela ruihhlo ti ṭhin nupuite retheihzia leh rilru hrehawmzia aṭang pawh hian pasal thlan sual hi ka hlau ve êm a ni. Ka phutawk, ruihhloa fihlim hi chu Pathianin min la pe ve êm ang chu maw. 

A tuk aṭangin hna ngaitê ka thawk chho leh a, Maliani nen pawh ṭhian ang maia kan inkawm chang a tam tawh zawk, a natna vanga ka ten lohzia ka tilang leh amah pawh tenawm a intih tawh loh nana ka fuih ve nasat vang a niang, a rilru pawh a ngil chho ve zelin ka hria. Victora nen pawh an inbe ve ta fô a, a nu nen erawh an inbe lai vawikhatmah ka la hmu lo. A nu awmdan ber hian ka rilru a tibuai ṭhin. A ṭhian milian nu niawm tak takte an rawn len chuan khawvela nu fel leh ṭha ber angin a nung thiam a, keite hi min fak tlawr duah zel,. Chhungkaw bila an awm erawh chuan biak chu sawi loh a mitmengah hian min huatna ka hmu thei ṭhin. Ngaihpawimawh loh tum paw'n a harsa ve ṭhin. 

Ni khat chu Maliani chuan tlawhtu a nei hlawl mai. Ka thawh aṭanga tlawhtu a neih vawikhatna a niawm e. Hmeichhe hleitling leh hmel hmuh nuam tak, tarmit vuah a ni a, kei pawh ṭha takin min bia. Pu Zauva nau fanu a lo nia! Eizawnna avangin USA lamah a awm reng a, a rawn haw ve zawk a lo ni,. A ngaihpawimawh vang ni maw Maliani pawn hlim takin a lo lawm a, hnawk min ti ang tih ka hlauh avangin chhuahsan rih ka tum a, Maliani zawk chuan, "Hruaipui, Coffee zuk siam la, in ho teh ang u" a ti a. Thuawih takin ka kal. "Pipi tih hi a tar êm mai, Hruaipui tih hi a mawi zawk" a tih avanga Hruaipui ti hlira min ko a ni. Victora pawn tiang chuan min ko zel tawh. Ani hi niminah mamawh lamin Gauhati-ah a zin a, naktukah a lo haw ang. Kan inhmu khât angreng a,. Phone ah pawh kan inbe ngai chuang lo, a mizia chu a mak angreng khawp mai. Min fiam vel mai mai a nih hmel. Coffee ka siam laiin Pi Lingi a rawn lang leh a, "Seni chuan min rêl ngei ngei ang. Khi nu cheng chawng khi ka mil lo" a rawn ti nghal bawrh bawrh, ka ngawi reng thung. Ka kal dawn chuan, "Sangi ka tir a, coffee kha han dah la, ka chhun eitur rawn siam ang che" a ti ram leh hmak a. Chiang kek kawka melhin, "Kut leh ke i nei ve, insiam ve mai rawh. Ka duty chu Maliani enkawl a ni" ka ti hriam hraih a, ka hmel zawng zawng nen min su zui ngam ta bik lo a niang. A ner nâwng ringawt. Coffee chu kan in ho ta a, Seni chuan, "Enkawl hautak i ti em? A sual ve thiam sia tiraw?" Nui chungin a ti a. 

"A tirah chuan hremhmunah min khung a ni ringawt, tunah chuan keimah zawk hian ka vin hrep zel" ka lo ti a. Maliani pawh a nui ve har har mai. "Nupuii erawh a la danglam lo a nih khu..an nufa inkar hi theihtawpa siamṭhat ka tum ṭhin a, mahse, an luhlul dun lutuk a.".Seni chuan a ti ta zauh a, Maliani mood a chhiat ka hlauh avangin, "USA chu a nuam em? Sapṭawng hlirin i ṭawng dawn sia,. Ka kal ve châk e"..ka ti ta daih a, ka zawhna chuan an nuih a tiza khawp a, an nui vak vak mai. 

"Kan Victora lah chu hmanniah Julie'n min lo bia a, an inṭhen hlen dawn ta tak tak a ni maw?" Maliani melh chunga a tih chuan ngaithla lo anga lang siin a rukin ka lo ngaihven ve viau,. "Ṭhen hlen chu a nih ber tawh hi. Pawm leh chi ni hek lo" Maliani pawh chuan a ti ve mai a. Julie chu tu tak ni ang maw? "Victora a luhlul ropui sia, Julie hi chuan a la duh mawle. " Seni bawkin a ti a,. No ka zuk dahsan ta daih. Hriatzui ka châk rualin ka hreh tlat a nih chu! In chung zawlah chhoin U Mateii pangpar te chu ka enkual ta mai mai a, ani pawn damdawi dawr a nghak tawh a,. Kan inhmu khât ta viau mai. An fate pawh U Mateii nauin a lo hruai mai zel a,. Ina awm hi nuam an ti vak lo niin ka hria. Mi hausa chhungkua pawh hi an lo hlim vek bik lo tihte, pawisa ngah ṭûn sia chhungkua inpawh theih miah lohna hmun chu a nuam dawn chuang miah lo tihte ka ngaihtuah mai mai a. Keini nufaho kan inpawhzia leh pawisa nei lo chung pawha kan neih ang tawka kan lungawi ve sizia te thlengin, chuvang chuan vannei ka inti hle a ni. 

Seni haw hnuah Maliani chu ka dressing a,. Thisen var pawh pek leh tawh a ngai. Seni felzia leh a cousinte zingah an inngainat ber thu te, an chhungkaw chungchangte a sawi siam siam a. "Ka pate unau hi pathum lek an nia, an vanduai a, unau pa 7 zingah an ni pathum chauh hi an damchhuak a ni. Ka nî te chu Gauhati-ah an khawsa a, ka patea te erawh Bawngkawnah sawn. A hma chuan keini chhung hnih hian chhungkaw picnic leh chaw eikhawm te kan nei fô ṭhin,. Ka nî te an rawn hawn phei chuan ngei ngeiin a ni tawp. Mahse, ka damlohna hian chhungkua thlengin a nghawng a, kan intlawhpawh ta vak lo. Mi kan buai ve tawh bawk nen.." a ti siam siam a. A lunglen hmel kher mai. 

"I ṭhiante hian an rawn tlawh ngai lo che em ni?" Ka ti a, ka ṭawng sual ang tih erawh ka hlau viau. "Tlawh ngai lo. Hiv ka positive tih an hriat aṭang khan min hlat ta vek a ni. Seni leh a unaute kha ka ṭhiante an ni tawh mai. " A ti a, a ngui hle bawk. 

"Pawi ka ti hle mai,. Khawpuia seilian lehkhathiam zawk ten chutiang taka Hiv lo la hlauha lo ṭih chu an mawl te pawh ka ti zawk e a." Ka ti a. 

"An demawm loh, an zahawmna an venghimah ka ngai mai. Mi ten ka natna an hre ve vek si a, min kawm zel chuan anni pawh an rinhlelh an hlau a niang. A ho êm mai, nang i awm tho alawm tiraw?" Tiin min rawn nuih sâng a. Nuih let vein, "Dik chiah, i bulah ka awm zel dawn alawm" ka lo ti ve var. 

A mutthilh hlanin a room chu ka ching fel leh mai mai a, Drawer-a a damdawi stock sa te chu ka rem felfaisak a,. Ka tum loh deuhin thlalak pakhat hi lehkhabu pakhat kar aṭangin ka titla palh ta hlauh mai. Chu thlalak chu a rapawm lek lek,. Mipa niin a thi nuaih mai a, a hmel pawh a hmuhchian hleihtheih loh, leiah a bawkkhup a, a hmai chu thisen hlir a ni deuh mai. A mak mai mai mang e, chutiang thlalak te Maliani'n a kawl daih mai chu! Victora emaw U Mama emaw a ni der bawk si lo. Lehkhabuah bawk chuan ka zep leh ta a,. A thawmhnaw te pawh ka thleh felsak leh vek a, thawmhnaw a ngah hran miah lo chu mak ka ti deuh, mahse, a neih ho an brand hlawm thung. Maliani ṭawngvai bial bial chu ka hrereng, ka nui pût pût a, mahse, " Rinzual,. Lalrinzual..i thi thei lo." Tih thu a sawi chuan ka ve melh hrâwk a, a mutui viau bawk si. Mahse, a hnuah a thle twn ta sek a, harh chhuah châk deuh ang hian a awm ka ti mai. Ka sawi harh ta vat a. A meng phâwk khawp mai, "Mangchhia i mang em ni?" Ka ti a. Hlauhlawp hmel a pu a, a hnuah phei chuan a ṭap ta hlawp hlawp mai. Ka pawm bet a, "A pawi hle mai. Malian" ka ti ringawt. A ṭah zawh hnu chuan la insût faih faih chung hian, "Ani kha ka mumangah ka lo hmu a, mangchhiain min tihbuai lohna a rei tawh viau asin. " A ti a. 

"Ani chu tu nge?" Ka tih chuan, "Rinzuala mawle. Ka bialpa " a ti tlang hrâwk mai. "Ani chu khawiah nge?" Ka ti hû a. 

Zawi deuha mut thlawp pahin, "A thi tawh" a ti ta sep a. Sawi tur reng ka hre tawh lo. 

"Keimaha awm ka duh" a ti leh sap a,. Keipawn ka chhuahsan nghal. Victora zawhtê Nancy chu pawmin in hnuaiah ka chhuk a,. Sangi'n rawng a lo bawl mek. Nancy chu bawnghnutê ka eitir a, Pi Lingi a awm lo bawk a, ka hlauthawng vak lo. Ka nuin min lo bia a, "I pa damdawi inah a awm a,. " Hah hmel deuh hian a ti a. 

"Tu ka pa zawk?" Ka ti hê hâw! Tetea pa kha ka pa tiin ka ko ve tho bawk si a ni. "I pa, nangmah hringtu i pa" a ti hlar a. A hlauhthawn hmel riaua ka hriat avangin, "A serious viau em ni?" Ka ti leh a. 

"A lung nâ a chhuak a, hmuh che a duh a ni" a rawn ti zawi sap. Ka ner sak ringawt. "Tunah chuan ka hman lo alawm" ka ti ta tho va. 

"Ka hria. Zanah kan nufain kan tlawh dawn nia, chumi hmaa a kal loh hram beisei ang". A rawn tih chuan min tihlauthawng ta deuh, "Thi mai tur angin a awm em ni?" Ka tih chuan nin hmel zetin, "Aw..aa..nakinah kan sawi dawn nia. Hî hê che hian" a ti hlur a, a dah daih. Ka pa chuan engtin nge ka nu a va biak theih le? Nge ka hriat ve lohin ka chungchang thu-ah an lo inbe fô thin zawk, ka hrethiam tehnuaih loh e a. 

Mahse, ka awm a nuam ta chiah lo, ka nu biak leh ka hreh deuh bawk si, hawn vat vat ka châk tawh kher mai. In ka thlen rual rualin ka nute chu thil awmdan ka zawt ta chung chung a, "Dar 2 bawr velah khan a lung na chu a chhuak a, an inphur nghal rum rum a niawm e. Chuan, a nupuiin min rawn bia a, nangmah hmuh a duh thu che a rawn sawi ta a ni" a ti a. 

"Engtin nge a nupui chuan i number a neih theih." Mak ti zeta ka tih chuan, "A hmain kan inbe zauh zauh tawh alawm, amah i pa nen ngei pawh. Ka hrilh duh lo che a nih kha, i rilru a hel rih êm a, i pa a nihna a bo chuang lo va. Nakin zelah in inhriat pawh hi ṭha ka tia. " A ti mawlh mawlh a. A sawi dik reng mai. Kei pawh chuti teh vakin ka hel tawh lo. Pa te meuh thi lek leka an han awm takah chuan a damlai ngeia hmuh ka duh ve hle a ni. Chaw kan ei sawk sawk a,. Eikham veleh ka nu nen insiamin in chung pa hoin ka pa an dahna hospital lam chu kan pan ta a ni. Ka pa chu a muhil nge nikhua a hre lo, a harh lo hrim hrim,. A hma aṭang tawhin a lung lam chian loh vang hian damdawi in an lut zauh zauh tawh a niawm e. A nupui chuan min lo chibai var a, a fel hmel khawpin ka hria. "I pa hian hmuh che a châk a, a sawi fô thin che. Mahse, i rilru te i nuin a hrilh avangin a ngam ngai lo va,. Tunah chuan hmana i rilru kha dahbo thei tawh la a lawmawm ngawt ang. Hei i hmelṭha, i pa pawh chhunna lai i nei a nih hi" tiin min be siam siam a,. Ka nui vur vur ringawt. Amah ka pa ber harh thei hek lo le, a harh veleh inhrilh hre tura inchahin kan hawnsan leh ta phawt a. Ka inbual zui nghal,. Ka phone ri ral ral chu ka hre thei, Tetea'n a la a, ka inbual thua hrilh. Tu tak ni maw. Ka inbual zawha ka'n en nak chuan Victor lek a lo nia! Min rawn call teh tlat chu mak ka ti deuh. Ka inthlak laiin a rawn call leh ta a, "I zo tawh maw? I fai bawk em?" A rawn ti zang vah mai. 

"Sil loh pawn ka ei tlak" ka ti ve zuk a. 

"Ve che. Thil rawn zawh che ka tum a" a hma aia thutak hian a ti a. "Aw..sawi la" ka ti vat. 

"Vawiinah thil thleng a awm em ni? Ka û in engmah a ei duh leh lo va, tumah a hmu duh lo bawk a niawm e. U Mateii'n min rawn hrilh a" a ti ta zung zung a. 

"Aw. Thil pakhat chu a awm a" ka ti sap. "Ka ngaithla e" a ti dam thlup a. 

"Ih englo, mangchhia a mang a, Rinzuala a lo hmu a niawm e. Chung vel chu" ka ti niah niah a. A rum hawk chu ka hria. "A va pawi e aw. " A ti vawng vawng a, Rinzuala pawimawhna leh engtiang chiahin nge Maliani nun a nghawng tih hre ve lo tan chuan a ho ka ti dawn nge, a mak ka ti zawk dawn. Thup hi chu an nei chiang alawm. 

"Rinzuala chu tu nge?" Ka ti ta tawp a. "Ka û bialpa, mi tenawm tak" a ti bung nghut a, "Kohsak mai u la, Maliani hian a la ngaihven hmel sia." Ka ti ṭâlh a. "Mitthi tawh kan kaitho thei hleinem " a rawn ti hrâwk mai. A thi tawh tih Maliani'n a sawi khan thi tak tak ni loin a nunah a thi tih lam sawi a tumnaah ka lo ngai deuh a, a lo thi tak tak a nih hmel. 

"Naktukah a ṭha mai ang chu maw" ka ti ta ringawt a. "Ka beisei,. Chuan keipawh naktukah ka rawn haw dawn. I chungchang hi ka ngaihven deuh thei tawh ang" a rawn ti leh daih a. 

"Ti ve ziah,. I awmzia hi ka hrethiam mai mai lo e a" ka ti hlak hlak a. 

"I hre dawn alawm. Bialpa lo nei lo la a ṭha a ni mai." A la tizui. Inleng ka neih thu ka nuin a rawn sawi avangin , "A bulah ṭhu miah suh ang che." Tia min vauin a dah daih. Hmela mai mai chu aw..

Ka inleng lah chu a hmaa min ngaizawng ve deuhtu Tlana a la ni zui a! Ka va phur lo ber tak. "Inhmuh a va khât ve " nui sun sun chungin a lo ti a. A bulah ṭhuin ka be ve ta hlut tho a,. Ani hi hmuhsit lam pawh ni lovin pianphunga rualbânlo, a ban veilam zeng a ni a. Chu chu ka duh loh chhan a ni hran lo, kan ṭhenawm lawka khawsa an ni nghe nghe, an hausa hle a, min ngaizawng deuha an hriat khan a farnu leh a nuten "Sawtiang hmeithai fa mai mai, a hminga nurse ni ve ringawt chu a hniam mah mah" an lo ti a niawm e. An in luahtu Lindai'n min hrilh leh vek sia, chawp leh chilhin keipawn Tlana chu ka hlat nghal ta hmak a ni. Mahni tawkah induh ve hle tur ka tih kha..hehe..

Tlana awm lai rengin Voctora bawk chuan min lo call leh mawle.."Eng nge?" Ka ti hlar a. 

"I inlengpa chu a la haw lo mi?" A rawn ti dût dût. 

"Haw lo, ngatan nge i tih?" Ka ti a. 

"Ka ngei alawm" a rawn tih chu! A va naupangchhia tak. 

"I zak lo" ka ti nghat a, "Zak rual ka ni tawh lo. Haw tir tawh rawh" a rawn ti leh. 

"Hmela" tih leh phone dah ka rual a. Tlana chuan, "Tu nge?" A lo ti vat. A nu leh a farnu mitthla chungin, "Ka bialpa mawle" ka ti sap a.