Amah leh Kei 3

AMAH LEH KEI..(3)

Ziaktu : Toni Râlte

Kar khat zet Maliani enkawl hna ka han thawh takah chuan ka ngaina chho ta em em a, Pi Lingi pawh ngaiah ka nei ṭan der tawh. Pu Zauva nen tak hian kan inhmu khât angreng a, zinga ka va thlenin a lo kal hman tawh ṭhin a, tlaiah lah kan innang hman meuh bawk si lo. U Mateii nen pawh kan titi dun nasa ṭhin, Sangi lahin min ngaina ve em em mai a, ka suala ka chimawm tehreng nen hian. Sunday chu ka kal ta lo. Inkhawm banah Ateii nen kan inah kan inzui lut a. Kan in leh an in hi a inhlat ve deuh a, sundayah bak kan inlenpawh ngai meuh lo. "Lal Tete, i bialnu ka hria" ka nau chu a fiam leh bawrh bawrh a. Tetea lah a lo lai leh tawh. "Ka nei lo e a" a ti hluk a. 

"I nei, Estheri nau Kimkimi kha..ehh..lai vel kher suh,." Tiin Ateii a nui hawr hawr. "I ninawm, nang hi tiang khan min fiam ziah suh. " Ti hlurin a pindanah a lut leh daih. Thingpui ka lum a, ka nu pawh a rawn thleng ve chiah. 

Ateii chuan, "Duati, Victora chu a thlalak i nei lo mi?" A ti a. A hma khan ka thawhnaah tlangval an awm leh awm loh min lo zawh tawh kha, Victora a nih thu ka lo hrilh tawh a ni. Engvanga min zawt nge a nih erawh ka hre hauh lo. 

"Ngah nge ka neih ngawt ang?" Ka lo ti hâ a. 

"Aw..an star thei si, Hmingi sawi a nia, ani pawn a star lutuk a, chuvang alawm ka zawh che" a ti ta a. Hmingi chu ka thawh hma chiaha thawk kha a ni. "LalHmingi te chu a lerh ve êm alawm, a star leh hman ang chu" ka lo ti a. 

"Eng ang hmelpu nge ni reng reng a? A sawi nasa thei sia, ka hmu ve châk mai mai" a ti a. 

"A hmel chu a chhe hran lo, korean letling ti ila i mitthla thiam ber ang. Tatoo a ngah si, ka ngaina lo kei chu a.." ka ti bawrh bawrh a. Nia, tatoo chhu tuarh mihring ho hi mi fel tak an nih ka ring lo ve tawp, mahse, ka sawi ve sek chuang lo. 

"I ho e a, tatoo a ngah vanga ngainat loh ringawt. " A ti nghat a. 

"Ka hmu khât angreng,. A roomah a tawm chawt zel a, guitar erawh a perh thiam rap" ka ti a. Nia, a nâk ruh tihnat avang khan a hna a thawk thei rih lo va, inah awmin guitar a zût nasa thei tawp. Maliani pawn a ning thei rap. Kei chuan ka ngaithla uluk thei viau, guitar perh thiam ve ka châk êm a tin ni. Thingpui kan in laiin ka nu chuan call a dawng a, a biak zawhah, "I nuteii te nufa an rawn phei dawn a nih chu" a ti a. 

"Ngati lehpek nge?" Ka lo ti vat. Ateii hi chu kan mihrang en lo bawk a, "Tun ṭum chu inṭhen a duh tak tak niin ka hria" ka nu chuan a ti a. 

"A ṭha, hetiang nupui nei chunga hmeichhe dang kawp ching hi chuan an sim tak tak thei lo" ka lo ti hmak. Mahse, upat tawh alawmah pasal a nei a, hetianga inṭhen leh ngawt chu nuteii ka khawngaih reuh. Pate Zuala chu hmaichhana hauh hrep ka châk ngei mai. 

Ateii pawh chuan thil awmzia min zawt ta vat a, ka sawi ve mai. A chek hlak a, "A va tenawm ve mawle. Saw ṭhenawmte nupa pawh saw an intitlan reng mai. An nu saw a dawhthei teh asin,. A awm ve reng lai ten a bialnu a biaksan vel ṭhin. Tiangho hi chu na lua awm lova sawisatu hi awm se ka ti ngawt mai" a ti ve tân tân a. 

Baptist-in chawhnu inkhawm kan nei ve lo hi chu a nuam riau. Aizawlah hian kan la tam lem lo naa, a awmchhunte hi kan inpawh khawp mai. Dik tak chuan ka pi leh pute kha Kohhran thianghlim an ni a, hetia kan nufaa kan indan tak hnuah hian kan in luahna te hi Baptist an lo ni ve bawk nen, "Lo awm ve mai r'u, in kohhran a dik lo kan tihna ni lovin..Kohhran belha hetia activities neih tam hi a ṭha hrim hrim.." an tia,. Ka nu pawn a lo hreh lem lo bawk a, kan inpe ve ta a ni. Kan tam lo bawk a, kei pawh ṬKP-ah Committee member ka ni ve a, Programme committee-ah ka tel ve bawk. Ka inthlahdah êm zawk a, zan inkhawm han skip te hi ka ching roh a,. Ka nu hian min hau reng zel. Mahse, a mawi tawk leh zeizia hre tawka Kohhran leh khawtlanga inhnamhnawih ve zel hi a ṭha, inzirna zel a nih bakah finna a ni tel bawk a, mi nawlpui ngaihah kan lang mawi ve bawk. Hei chauh pawh hi a ṭha reng reng e. Thlarau lam nunah hi chuan ka chhah mep mep viau a niang, Salvation campingah vawi khat ka lut ve tawh a. Ka bo hle. Mite kha rau bik riauin ka hria a, an ṭap te kha ka awt thin, ka ṭap ve thei der si lo. Ka chimawm leh ka nghal hi langsar taka ka sualna ni maiin ka hria,. Zu leh ruihhlo dang lakah ka fihlim a, mipat hmeichhiatna lamah ka tal na ve bawk si lo,. Sualna liantham anga ka ngaih sawi tur ka neih loh avangin ka inngai ṭha ve ringawt mai a ni. Tunah hian thi ta ila vanram ka kai ka ring ngam lo. 'kai ve maithei' dinhmunah ka ding. 

Tlaiah chuan Nuteii te nufa pawh chu an rawn thleng ta a. Bawihtea chu a u Tetea nen an inkual nghal chat, Tetea hian a duat ve bawk a, an inngaina takzet. Nuteii chu ka nuin thil awmzia a han zawt a, "Aa..ka u, ka peih tawh lo, ka thei tawh ngang lo. Ka sim ang a ti ve a, sim a hnêkin a zual zawk. A bialnu lahin min la rawn vau zui a! Ani pawn inthen hi a duh ka ring tawh. Ka hnawksak tawh zawk tlat. Naktukah bungrua va lak nghal ka duh" a ti ta hmiah mai. A tawpkhawk ve tawh a niang e. Ka nu pawn, "Aw le, nang berin i theih tawh si loh chuan tihngaihna a awm lo. Kan ngaihtuah dawn nia, bungraw lak pawh chu" a ti ta nge nge a. Nuteii chu a cher ve kâwk mai a, a rilru a hah hle a niang, ka khawngaih hle mai. 

"Pu Zara te in hnuai saw a ruakin ka hria,. Hmanniah a fanu nen kan inhmu a, ka zawt luam a. Tah sawn kan nufain kan awm ve ang a, Pathian zara ka dam chuan kan nghei bik lo vang. " Nuteii chuan a ti a. "I ti ang lo e a, kan chengho vek ang chu, i inthlahrung a nih kha. Hei in chung chiah khi an siam mek a, an peih veleh kan insawn dawn alawm,. " Ka nu chuan a lo ti zung zung a. Ka putea'n keini nufa min hnawhchhuah lai pawha phatsan lo va zui ve zeltu a laizawn neihchhun chu ka nu pawn a ngaihlu hle tih ka hria,. Bakah Nuteii te an lo awm ve chuan kan khua a har loh bakah ka nu buai pawh a zia deuhin ka ring. Chaw kan ei a, Bawihtea chu ka nuin, "Apa i ngai em?" A han ti a. 

"Aih, a sual si.." a ti mai a. A fapa pianhlim te khan Patea chu a lawm ve tehlul nen,. Mihring hi kan lo danglam chak mang e aw. Zanah ka nu ka zahder vang hrim hrim leh ka nihna te avangin ka inkhawm ve leh a, Ateii erawh a rawn lang lo. Inkhawm laiin ka phone a ri sek a, ban veleh ka en nghal. Maliani miscall a lo awm dul mai. Rang takin ka call back a, a ring fê hnuah chau aw zet hian a rawn la ta a. 

"Ka inkhawm daih a,. I ṭha em?" Ka ti nghal zat. 

"Ṭha vak lo, ka tai bâwr hi a na lutuk a, chuan ka mawng khawihli hian ka khawsik a siam bawk. " A rawn ti tlang nghal mawlh mawlh mai. 

"A va pawi ve,. Nachhawkna i ei em!" Ka ti a. 

"Ei e, ka lo call chhan zawk che chu niminah khan dressing table-ah bracelet ka dah chhuak a, a bo daih a! I lo la em ni?" Awki danglam angreng tak hian a rawn ti ta mai. Ka makti pawh ka meng phar kâwk alawm le, "La miah lo,. " Ka ti hul hak a. 

"I lak loh chuan amahin a kal thei tihna a nih dawn chu" rinhlelh hmel zet hian a rawn ti nghal. 

"Enteh, bracelet ka hmu lo va, hmu pawh ni ila ka la lo vang. Ruk ka ru ngai lo " ka ti ve nghek a, ka lawm vak lo. 

"Nangni ang mi rethei tan chuan a hlu viau ang, rangkachak a ni sia. Lo hmang ṭangkai hle rawh u,. Mahse, kha thil kha ka hmangaih em em min pek a nia. Ka ngaihlu teh asin." A rawn ti kual a. A ngeiawm duh kher mai. "A thuhrimin nimina i dah tawh, tunah a awm lo tih han hriatchhuah chauh chu leh! Tin, ka la lo chiang bawk a, tikhan bo vel mai mai teh se. Ka hek phah lo êm mai. " Ka ti ve ngat. Tlawm taka mi dawnsawn hi ka thiam ngai dawn lo a nih hi. 

"A hlutzia hria la, i la awm si lo. Naktukah rawn dah lêt anh che. I rawn dah lêt lo a nih chuan Police ka ko vang" a rawn tih chuan, "Tunah khan ko nghal rawh. Ka hlau awzawng lo mai." Ka ti ve hmak. A dah ta daih a,. Ka sa vek thei mawle. Vawih lo vawiha inpuh mah a na an tia, hetiang kutkem nei anga inpuh nghal thâwr chu keia mihrinna hian a tuar zo lo. Bracelet a sawi pawh chu ka hmu ngei, hmuh chu. Mahse, ka khawih lo tawp a ni mai. Mut pawh a tui hrep lo ve a. Tetea roomah Nutei te nufa chu an mu a, Tetea thutthleng seiah a mu thung. Kan chep deuh chu a ni, kan luah thar tur hi an peih ve ṭep tawh chuan ka hria. Zingah Nuteii'n rawng a lo bawl sûrh sûrh a, eisiam hi a thiam a, keipawn ka chhun ve deuh a niang. Ka nu hi zawng chhum tawrh vel bak a thiam meuh lo. Ka nu pawn dawr a lo han hawng ve. Bungraw lak kha ka nuin ni khat ngaichâng ve lawk ang u a tih avangin vawiin lamah chuan an va la rih dawn lo a ni. Nuteii te hi an pate in bul lawkah mi in luahin an khawsa ve a ni. Chaw ka ei sawk sawk a, hmabak kô tak nei chungin Maliani te in lam chu ka pan leh ta a. 

Vawiin chu Pu Zaua pawh a lo awm ve mial,. Sawrkar chawlh a lo ni reng a lo nia. Ka lo hre ve lehpek lo a nih hmel. Pi Lingi'n min lo melh leh hrâw hrâw a, "Mai ngûn i lo laksak em ni?" A ti ta chiah mai. Naupangho an awm ve sia, nuam lo ka ti deuh. Ka rilru hrethiam niawm takin Mateii chuan, "Sangi, bawihteii te hi dawrah va kalpui lawk rawh" a ti ta hlauh a. Puitling inhnialna kara naupang lo awm ve hi hrehawm ka ti thin. Sangi te chhuah hnu chuan, "Ka la lo. Ruk ka ru ngai lo" ka ti ta a. 

U Mama chuan, "A dahna a hre lo zawk a nih hi ka ring a ni. Pipii hian a lak mai ka ring chiah lo" tiin ka thlavang a lo hauh ve vat a. Pi Lingi erawh chuan, "Ani bak Mai rooma kal thin an awm hleinem. Amah bak hian a la lo vang. Lo la vat rawh, kha ngûn hlutzia kha i hre lo a niang. Rawn la vat rawh" A ti hlak hlak a. Pa ber chuan, "Ni e, Pipi, hei Mateii khi a nuar titih ringawt lehnghal a, kha ngûn kha a hmuhlet loh chuan tumah a hmu duh bawk si lo. Engtia tih chi nge mawni le" a lo ti dam thluam a. 

Inringtawk takin, "Ka pu, Bracelet chu keipawn ka hmu alawm, khawih chu sawi loh deh pawh ka dek lo. Tin tlereuh hian ka mit an la em em ngai lo bawk. Lak ngawtna chhan tur ka nei lo va, ka la lo chiang viau bawk" ka ti ta charh charh a. Ka nuin he thil hi hria se a phili leh viau maithei a ni. 

"Dawt i sawi a nih ka ring, tumah a roomah kan lut ve ngai lo" Pi Lingi'n a ti leh hram a. Victora rawn chhukthla thoh thoh chuan, "Eng nge in buai chiam? Hei bracelet chu ka hmu alawm." Tiin a ipte a zen a, bracelet chu a rawn lek ta va mai. A nuin makti takin, "Engtin nge..khaw nge i hmuh?" A lo ti bah nak a. 

"Nancy'n a rawn pu lut a niang, ka khum bulah a let ngât alawm" Victora lah chuan awlsam zet hian a ti a. Nancy a tih chu ka hre ve hauh lo,ui an neih awm ka hre bawk si lo. 

"A lawmawm nasat kha, Mai chu han pe vat ru. Pipi, thil kan lo hriatṭhelhnaah min hrethiam rawh aw. " Pu Zaua chuan a ti a. Ka lo bu nghat ringawt, an nu erawh chuan min la melh râw chungin, "Fimkhur hle ang che. I la him mai mai a ni" a ti ram hmak a. 

"A hranpa taka i pawi ka sawi a nih chuan sawi rawh. Englai pawha min melh hraw reng leh min haw em em anga i awm hi ka hne tawh. I eng pawi nge ka sawi, ka pi.."..ring ve tak pawr ve deuhin ka ti ta siah siah mai a. Ka hlau duh tawh lo, ka hne êm a ni. 

"Ekhai! Pipi, insum hram hram rawh. A fanu damlohna hian a rilru thlengin a nghawng chho tawh a,. A mizia a danglam vek tawh a nih hi..hrethiam hram teh" Pu Zauva bawk chuan inthlahrung takin a lo ti leh sawk sawk a. U Mama te nupa erawh chuan chutia ka han ti deuh hrep chu an lawm hmel ka ti mai, phurna ka va hmu thei. 

"Chuvang a nih chu, Maliani pawn a nu chungchang reng reng a sawi ngai loh. Fanu damlo tuar hle si, fanuin a mamawh ngawih ngawih lai pawha awm thei lo nu chu le.." tawitê mei nei zeta nui hakin ka ti a, In chung lamah ka chho nal nal. Ka tawngkam avangin an hamhaih nge tumah an rawn ṭawng chhuak miah lo. 

"Morning. I bracelet i hmuh leh avangin ka lawmpui a che." Tiin a bracelet chu ka lek vâ a. Makti zetin a rawn melh, "I lo ru ngei a ni maw? Tenawmnu leh.." a nu anga ṭawngkam bung zetin a lo ti daih a. Mahse, ka hrethiam ani hi chu. 

"Ru lo, i nau Victora roomah a lo awm a. Nancy'n a pu lut a niang a tia, Nancy chu tu nge?" Dawhthei tak hian ka ti a. A meng phâwk deuh. "Hmelchhe Nancy mai mai chu leh! Victora zawhtê mawle. Hmanah pawh ka bengbeh a ru tawh. Ka la talhsak daih ang, rukru reuh lutuk mai.." a ti hlak hlak a. A ban te taktêah chuan bracelet chu ka buntir ta a. A melh vawng vawng lai chu ngunthluk zetin ka lo melh ve thung. Chu bracelet chu a hlu viau a ni ngei ang le. 

"A mawi tiraw?" Min bia pawh a ang lo. 

"Aw..mawi lutuk, i ngo sia, i inhmeh tawp" ka lo ti ve hluai a. 

A hmel erawh a ngui deuh,. "Mahse, ani kha a awm tawh si lo va.." a ti tham ṭiak a. 

"Pawi ka ti hle mai. Mahse, hnutchhiah che a nei tal a,. Kei chu ka ex te hian mittui bak min hnutchhiah ve ngai hleinem. " Nui chungin ka lo ti a. Mipa vangin ka la ṭap ngai miah lo tih erawh ka hre kur. 

"Ka ex a ni hleinem" a ti sep a. Ka ngaithla tih ka tilang nghal. 

"Ka ex a ni ngai lo vang" a ti nawn leh sak a. 

"I hmangaih hle a ni tiraw?" Ka tih chuan, "Ka theihtawpin ka hmangaih" a ti hul hak a. A mimal nun hi hriat ve châkna chu ka nei fô, mahse, ka zawt dawt duh ngai lo. Hun a tihah min hrilh mai ka rin vang a nia. Thil hriat châka phi chung mi nih ka duh lo a ni. 

Kan ngawih dat hnuah, "Vawiin chu egg roll siam la.." a ti leh ta daih a, phur takin, "Tehreng mai. Tunah chuan coffee nge green tea i in ang?" Ka ti ta vat a. 

"Green tea ka lo in ang e. Chuan, Victora chu a hnaah a kal dawn lo em ni?" A ti leh a, "Ka hre miah lo, a dam ṭha tawh viau chuan ka hria a" ka ti ringawt. A hmel thim leh hmak avang chuan ka chhuahsan ta thuai a. Green tea ka siam lai chuan min vil niawm tak hian Pi Lingi chu ka bulah a lo ding ve run a, ka ngaihsak lem lo. 

"Nichina i ṭawng dan khan lei a la khawp mai. Ka fanu hi ka hmangaih lo emaw i ti em ni? " A ti tûn tûn a. 

"Ti chuang nang" namnul zet hian ka ti a. 

A thinrim sauh emaw tihtur hian, "Engtin pawn min ngai rawh. Nanga ngaihdan hi ka ngaipawimawh chhete eih lo e. Ka fanu dam lohna hian min vaw chau takzet a ni. I hria em? Enkawl ṭha hle ang che. A dinhmun a hniam a nih chuan i tuar ang.." tiin mi sawi nawk nawk mai a,. A chak zêk lehnghal. 

"I hlauthawng em ni? Ti nge i phi buai em em a? I hmangaiha a dam i duh takzet chuan a pindanah han kalin i malchungah te muttir la, a sawi duhzawngte sawipuiin ngaihthlaksak ta che. Chutiang chuan mi nute chuan an ti ṭhin. " Ka ti ve ta khawl khawl a, Maliani avang pawn a lakah hian ka lungawi hlawl lo. Heti khawpa a fanu a hmu lo thei leh a ngaihven lo thei hi..

"Engmah i hre lo" a ti ram hmak a. Min eizawh vek châk hmel a pu. "Hriat ka chak lo ve. " Tiin Green tea nen in chungah ka chho leh ta a. U Mateii te chhungkua chu chawlh denchhenin parkah an va leng ve dawn a niawm e. Victora erawh ka hmu leh tawh miah lo, a hna a kal a ni maithei. 

"Taka Malian, ka rawn thawh hma chiaha rawn thawk Hmingi kha kan ṭhiannu tho ania sin. " Ka ti a. Hmel danglam chuang lo hian, "A lerh thak êm a nih kha.." a ti daih. Hmingi hi kan training lai pawn sawisep a kai zeuh zeuh ṭhin. Man te pawh a tawk hial a, mahse, thuk takin kan zuk hre ve lem lo thung. Mipa lamah a chak lo kan ti dawn nge, ngaihzawng thlak zung zung chi, rilru nghet vak lo chi a ni ve a,. Kawmngeih pawh a har angreng. 

"Victora hi a star ṭhin a.." ka ti ve a. Ka nui bawk. 

"He pa leu luau hi engtin nge maw an lo duh ve theih ni? Mawl si, sual si, zei lo si. " A ti duah a, Victora hming ka sawi ruala a hmel danglam loh awmchhun a la ni hial ang. 

"A atchilh ve tawp a niang" ka ti leh vel a. 

Hul zeta nuiin, "A ban phah tak daih reng kha. Bakah a mizia kha ka ngaina lo. In inang lo lutuk a" a tih chuan ka lawm ve hle. Kan la inenkawl rei loh nen min ngaina anga a lang ve ṭan chu ka tan a lawmawm lo thei lo. Damdawi ka pek zawhah a pan ka dressing sak leh a,. A tai bawr vel chu a na a reh theih mai loh avangin nachhawknain ka jection bawk. A room hnawk vel ka chinfel lai chuan call a dawng a, a la ve mial. 

"Kha chen in hmel hmuh inbeiseiin hun ka lo hmang tawh. Tun ataka rawn lan leh hi ṭul ka ti lo. Rawn kal duh suh u, ka mamawh hran lo che u.." a tih hmak hmak chu ka hrereng. 

"Aw..tunah chuan ṭhianṭha hlutna leh tu te nge ka ṭhianṭha chu tih ka chiang ta khawp mai. Biak pawh min rawn be tawh suh u" a ti leh hrep a, a dah daih. A mood a off leh dawn tih ka hriat avangin ngawi rengin ka chet chhunzawm mawlh mawlh a. "Pipi. " Ka eih lawk loh avangin, "Lalhruaipui" a rawn ti tuar. 

"Aw eng nge?" Amah ai maha ringin ka ti let ve a. 

"Ka period niin ka hria,. Pads kha pawhdawhah a awm. " Tih pahin a tho va, pads chu ka laksak ta vat. Bathroomah a lut ta a. Kei pawh ka chingfel thawkhat tawh bawk a, egg roll siam tur chuan ka chhuk a. Sangi'n chhuat a lo nawt mêk. 

Maida ka nuai laiin Victora a rawn lut a, a kal bik lo a nih hmel. Chokaah rawn dak lut vein, "Engkim a ṭha maw?" A ti thum chhak a.

"Aw ṭha e" ka lo ti ve vat. Hmingi mit ang pu der vein a ke ler aṭanga a chhip thleng mai chuan ka lo melh kual a,. "Dik lo a awm em ni?" A tih chuan ka phu zuk,. Ka chebuai ve det mai. "Awm..awm lo ve" ka ti nawk nawk a. Rawn lut pheiin ka bulah a ding a, kan insanhleih mah mah deuh chu a ni. "Eng nge i siam dawn?" A tih chuan ka sawi a. "Min siam kep ve rawh aw. Sangi'n eisiam i thiamzia a sawi sek a, i thiam takzet em tih ka hre duh" a ti duah a.

"Aw le..chutin ka thiam hran lo" ka lo ti ve mai. Ka melh ngam tawh lo hrim hrim. 

"Ka û chu a muhil em ni?" A ti leh a, zawhna a va ngah tak. Thil awmzia ka sawi a,. "Aw le.. lo ṭha dun rawh u. " Tiin ka sam a rawn chul thuak a, a chhuak zui nghal. Hmalam ka melh ran a, eng nge ka ngaihtuah pawh ka hre lo. Ka hriat chhun erawh Victora hian a farnu hi a ngaihtuah ve tak tak tih hi. Min hmuh apianga a zawhna chu a farnu chungchang a ni, midang hi chuan min zawh ziah kher lem lo. Ka siam zawh chuan dawhkanah Victora leh Sangi te eitur ka dahsak a, thingpui sial tawk nen in chung lam ka pan leh ta. Khumah a lo awm lo va, bathroomah a va awm rei ê ti rilru chungin bathroom kawngka chu ka kik a, "Malian, i zo dawn tawh em? Eitur ka rawn keng aw. " Ka ti lâng lâng. 

A reh duk mai. Ka han ko leh a, chhangtu reng an awm lo. Kawngka lah a kalh tlat bawk si, ka ngaih a ṭha thei tawh lo. A BP a hniam bakah HB thlengin a hniam a, a taksa chak tawh loh sa nak alaiin a la period zui bawk si nen,. Ani hi a lu a hai ang a. A lo tlu ringawt te hi a ni thei ang em? Kawngka chu ka sawi vak vak a, a inkalh nghet angreng si. In hnuaiah ka tlan thla hlawk hlawk, Sangi ka ko chul a, "Victora kha va ko teh, vatin" ka ti tuar tuar..ani pawh chuan hlauthawng takin garrage-a Vica awm mek chu a va ko a, hmanhmawh deuhin kan pathum chuan Maliani room lam kan pan ta a. "Kawngka hi nek chhe mai rawh" ka ti khur dat a,. "Hlauthawng suh. " A ti nghut ringawt. A han nek ta sawk sawk a,. A inkau ta tuar mai. Ka rin ang ngeiin Maliani chu wash basin hnuaiah a lo let reng mai. Victora chuan pawm kang vatin khumah a muttir a,. Keiin a lu chu tihuhin ka ko mawlh mawlh bawk. A mar chu a ṭha a, mahse, a harh thei si lo. "Damdawi inah hruai a ngai ang" ka ti a. "Aw le, Kal ang" ti leh nghutin a û chu a pawm leh ta lawp a,. In hnuaiah Pi Lingi a lo awm leh hman tawh. Thil awmzia min lo zawt vat a,. "I duty i hlen ṭhat loh vang a nih hi, ka fanu hi engtin emaw a awm a nih vaih chuan thisaah inngai rawh" min ti leh erh a. 

Mahse, Victora'n, "Mi â angin ṭawng mai mai suh. Tihtheih i nei lo. Tikhan lo ṭhu tawp rawh." A lo ti hriam hraih a, a ngawi chiang teh e. Sangi chu Pi Lingi'n, "I kal ve thei lo. Tihtur i la ngah " a ti tlat sia, Victora nen chauh Maliani chu Hospitalah kan hruai ta a ni. A khalh chak fia fia kher mai,. Doctorin a han en vel a, keiin a natna bakah a bp leh hb hniam thu te ka lo sawi ve bawk nen, "Kan admit phawt ang. Harh chu a rawn harh har lovang" a ti a. Victora'n cabin a book sak nghal thlap bawk. Mamawh eng ilo engmah kan keng nghal si lo va, Victora a let leh phawt a ngai dawn a ni. U Mateii leh Pu Zauva te pawh ka hrilh ve ta vat a,. Pu Zauva kha chawlh a ni bawk a tiin an huanah a zu kal ve daih a,. Ani pawh rawn haw vat a tum thu a sawi. U Mateii te pawh an lo haw nghal dawn a niawm e. Victora bulah mamawh zualpui te chu ka sawi dan dan a,. A bu nghut nghut mai. Tichuan, a va let leh ta a. Ani pawh a motor siam lai a ni sia, a bal nuan mai. Kan hmanhmawh ve bawk êm a ni. Maliani chu drip an khaisak nghal a. Pads pawh a lo vuah hman tawh. Mal taka a mu bal ka hmuh chuan ka lainat thar a, ka mittui te a parawl kiang mawle. A chhungte, a nu ngei pawhin damdawi ina a kalpui thei lo kha mak ka ti tâwp thei lo, tichung khan a hmangaih em em ni khan a sawi a. Hmangaihna a teh dan a mak awm teh e. Darkar khat hnu velah Victora pawh a rawn thleng leh a,. A intifai tawh a niang, a rawn nalh ta vang mai. Kei chuan a thil rawn ken ho chu ka dah fel zung zung a. "A la harh lo mi?" A tih chuan ka lo bu nghat. A farnu chu melhin a samte chu a chulsak hliau hliau a. "I tawrh hi a namên lo bawk a ni tiraw?" A ti sup. 

"Chuan, Hruaipui, engtin nge niang,.ka riahpui thei tho a..mahse. " tiin a û chu a melh zauh a. Ka hrethiam, a û in a huatzia ka hria a, riahtir chi a ni lo. 

"Ka riahpui mai ang. A enkawltu ka nia, ka ti ve tur alawm" ka lo ti thliam a. 

"A lawmawm e. U Mateii pawn a riahpui thei tho ang. " A ti a. Midang va tihbuai kha ka duh lem lo, amah enkawl tura rawih ka nia, hetiang hi chu ka tihturah ka ngai. Ka chet mawlh mawlh laiin, "Eitur ka zuk laksak ang che." Tiin a chhuak nulh a. Ni e, ka ril chu a ṭam angreng. Reivakloah eitur nen a rawn lut bawr luai a, ka lo laksak vat. "Ei ve rawh" ka tih chuan, "I egg roll siam kha ka ei alawm, Sangi ta tur pawh ka ei daih" a ti a. 

"Hmm, ti nge i eisak? A duh ve dawn mahnak alaia" ka ti a.

"A tui em alawm.." a la tizui..

Humburger ber kher a rawn la sia, ka âng zau thei ngei mai, ei mawi vak ka tum lem lo. Ka kamsir dinglamah eng emaw a kai nge ni a rawn la a, kan inmelh zawk. A mitmeng dum fiah kâk chuan min tizâm ve lek lek hial..

"Eng nge?" Ka ti ringawt a. A nui suk a, "Engmah" a ti ve mai. Mahse, kan inmelh dun chhung reiloteah khan keimahah hian eng emaw a thlengin ka hria. Ka sawi thiam lo. "Haw tawh rawh ,i duh chuan" ka ti leh tawp a.

"Ka duh lo" a ti hmuk bawk si. 

"Ti nge?" Ka ti ve zel a,. "Ka farnu bula la awm ka duh".a ti a. Chutihlai tak chuan Maliani che deuh ṭalh ṭalh chu ka va hmu ta a, ka pan ta vat. "Malian.." tiin ka ko sek sek a. Fiah zet hian a rawn meng ta hlawl a. Ka lo nuih sak ringawt. 

"Khaw nge ka awm?" A ti ṭial rian a. 

"Damdawi inah. Bathroomah khan i lo tlu a. Nâ i nei em?" Ka ti seuh seuh. 

"Nei lo, ka tlu a maw?" A ti ta hû zawk a. 

"Umm..mahse, i ṭha aw. Lungngai lo la.." ka ti ve luam a. Victora chu a rawn kal phei a,. A kekawr ipte zen chungin, "Mami, i ṭha tiraw?" Tîm ru tih hriat zet hian a ti a. Ka lo khawngaih ve ringawt mawle. 

"Kal bo rawh" Victora hmel a hmuh rual chuan a ti nghal tuar. 

"Khawngaihin" a lo ti nghet churh thung. 

"Ka hmu duh lo che" tiin Maliani chu a thle sawn hmak a. Victora enin, "Hun dangah ti zawk mai rawh" ka ti a. 

Rilru nat hmel zeta a û chu rawn melhin, "Ka hmangaih che ka û" a ti sup a,. Biak hman rual lohin a chhuak zui nghal. Cabin chu a ruak sawtin ka hre ve ringawt, kei hian Victora hi ka vei ve ringawt te hi a ni lo maw? Ka duh miah hleinem. Pi Lingi vang hrim hrim pawn..U mateii te chhungkua an rawn kal a, Maliani chu a ṭhutchilh nghal sawt sawt mai. Ani nen hi chuan ṭha takin an inbe ṭhin. Naupangte pawh chuan, "Nini, dam vat rawh aw" an ti ve a. U Mama erawh chuan, "Pipi, zanin chu lo riahpui phawt mai la, naktuk atang chuan i U Mateii pawn a riahpui ve thei tawh ang chu" a ti a. 

"A ngai lo, ka mawhphurhna alawm ,lo ngaihtuah suh u" ka lo ti var. Tlaia chaw an rawn dah tur thu sawiin min chhuahsan leh ta phawt a. Khaw thim hma deuhin pu Zauva'n chaw a rawn dah a, Maliani erawh a muthilh avangin eng han tihtheih ni hek lo le, Pawisa cheng 5000 min pe a, "Lo hmang pawp pawp phawt rawh. I chungah ka lawm lutuk a nia" tiin ani pawh a haw ve leh ta a. 

Chaw chu tihtham ka ei meuh lo, Maliani eitur hi a hrana ngaihtuahsak a ngai leh awm sia. Mahse, zaninah chuan a ei duh ka ring chiah lo. Thim hnuah Tetea leh a ṭhianpa Makima ten inthlakna tur leh ka mamawh zual an rawn dah a,. Maliani pawh an rawn hmu ve, Makima lah chuan, "A van dâng em em, mitthi a ang e" te a ti mai mai a. An la â ve bawk si. Ka hawtir ta vat a. 

Rin ang ngeiin Maliani chuan chaw a ei peih lo, keipawn ka nawrlui duh lo. A treatment lak dan a la ngai reng avangin jection hunah ka jection ve leh mai a,. Drip bur 2 ngawt an khai tawh bawk a, rin ai tak chuan a harh ṭha e. "Ka tibuai ngawt mai che tiraw?" A ti sap a. A inthlahrung hmel ka hmuh vawikhatna a ni hial awm e. 

"Tibuai teuh lo" ka ti vat. 

"Min hua em?" A ti leh daih a,. "Ka haw lo che. Huatna chhan tur che ka nei lo" ka lo ti nghet charh a. 

"Mi zawng zawngin min hua emaw ka ti ṭhin" a ti halh a,. Chunglam a melh vang vang. "Ka nu leh Victora te ngei pawhin" a ti leh hap. 

Remchangah lain Victora'n a ngaihvenzia leh a chanchin min zawh zinzia te, damdawi ina kan inhruai dan zawng zanwg te chu ka hrilh ve ta vek a. Dik tak chuan unau inrem tak hi ni se ka duh a ni. Ka tan tak pawh a hrehawm pha ve tlat. 

"Victora'n min pawm a maw?" Mak ti zet hian a ti a. 

"Pawm e mawle, kei chuan ka zo hleinem che" ka ti a. 

"Rin a va harsa ve" a ti ṭiak a. 

"Ani hian a haw reng reng lo che, in tunhma nun chu ka hre hauh lo nain a hmangaih hle che niin ka hria.." ka ti mawlh mawlh a. 

"Keipawn ka hmangaih alawm,. Tun thlengin." A ti ta a. 

"Inrem tawh rawh u aw. A lo kal leh hunah ṭha takin sawi dun rawh u" ka ti a. 

"Ka tum ang. Chuan, Pipi, ti nge kan chhungkaw chungchangah hian zawhna i neih ngai miah loh? Hei hi i danglamna pakhat chu a nia. " A ti ta a. 

"Mi dang nuna buaia inrawlh tam loh hi ka nu min zirtir dan a nia. Ka hriat ve ṭul chu anmahniin min hrilh mai ang ka ti ṭhin. " Ka ti duah a. 

"Inbunruahna tlak i nih chu..i hmaa lo thawk tawhte kha chuan engkim hriat an châk a, inrawlh an tum vek a. Ka hne hlawm êm a ni. " A ti bawrh bawrh mai. Hmingi mizia ka ngaihtuahin a sawi dik ka ring. 

Apple ka velsak a, keipawn ka ei ve. "Awm rei lo ila ka ti. Ka pindan ka ngai" a ti a ti mai. 

"Dam vat vat la, kan inah te i la rawn leng ve ang chu" ka lo ti a. 

Inthlahrung hmel a pu leh tawh. "Kei chu midang tan ka bawlhhlawh alawm" a ti sap a. 

"I ngaihdan mai mai a nih chu, tuman bawlhhlawh angin kan en lo che" ka ti vat,. "Ka nu tan chuan bawlhhlawh tenawm tak ka ni" a tih chuan ngaibtuahna a tithui kher mai. A nih duh hmel êm bawk a ni. Pu Zaua hian SLE bak a natna dang chu a rilru lam a ni kha a ti mai a, min hrilh loh natna dangte hi a nei zawk em mawni le. Ka zawt hreh ve deuh bawk. 

A bula mu tura min tih tlat avangin Maliani nen chuan khum khatah kan mudun ta a. Kei ka mut a chhuak hleithei thlawt lo. Ani chu nachhawkna an jectionah khan mut duhna a tel bawk a, kar lovah a muhil bawrh bawrh mai. Phone ka hmet êng a, Ateii nen kan inbe zuai,. Chanchin ka hrilh ve a. Tunhnaia min rawn be ve deuhtu Lawmpuia nen kan intext bawk,. Min bem tum ang deuh hian a awm ṭhin a, kei chuan ṭhian ang bakin ka en thei si lo. 

Ka dah ṭêp tihin Hmingi'n min lo text ta hlawl mai. Ka open vat a, "Victora kha..awii ka atchilh. Min lo biak teh aw. Ka msg a reply ngai si lo, tihtakzetin ka la kherh dawn alawm. " Tih thu a ni. Ka nui hauh lo, mi dang chu sawi se ka nui leh pût pût maithei. "Tehreng mai" tih chauhin ka chhang a. 

"Bialnu a neih leh neih loh lo ngaihven bawk teh aw. Chuan, Maliani kha i ning ve em? Ka hne a nia, a chhungte tan pawh phurrit a ni ringawt" a rawn ti leh a. Ka ner sak mai. 

"Ka chungah chuan a ṭha lutuk alawm. Victora chu kan inbe ngai mang lo va. " Ka ti a. 

"Nag hi chuan tih dan tê hi i thiam bik a, Maliani'n a ngei ve lo che chu a lawmawm. Vica chu maw IG-ah ka stalk nasa thei,.a man buru turu ka ti êm a ni. Mahse, hmeichhia a ngaihsak lo lutuk a. " A rawn ti leh duah a. 

"I la hlawhtling maithei asin.." ka ti ve ringawt. "Nia, ka beidawng dawn lo, mipa ka atchilh tawh min hnar an awm ngai lo" a rawn ti ham ham mai. 

Number save loh aṭangin msg a rawn lut a,. "A muhil thei em? A ṭha ang tiraw?" Tih hi. Dp a lang lo naa, Victora a nih loh reng ka ring lo. 

"Aw a muhil mêk e." Ka ti a. 

."Nang pawh muhil la.." a rawn ti ngei. 

"A chhuak lo" ka ti teh tawp a. 

"Kei chu a chhuak, muttui le. " A rawn tih chuan ka hnual ve ringawt nia! 

"Muttui" tiin ka chhang a. Hmingi msg pawh en tawh chuang lo chuan ka hmet thim a, ka chhing ta vang vang. 

Ka pa hmel kha ka mitthlaah a rawn lang a. Keini aiin an khawsak a sangin eizawnna ṭha tak an nei a,. Mamawh lam duh ni ila min pek duh ngei pawh ka ring. Mahse, ka mihring chapona hian a tithei hlawl si lo. "Pa' ka tih ruala lo Eih thei hi chu ka mamawh ve fô thin tih ka hria. Ka nu ringawt hi ka duhkhawp lo fô. Hmeithai han nih hrim hrim pawh hi tlema mihring tling chiah lote chuan min han zah lo nghal phawt a, kan lo zuamawm ve bawk nen. Pa uap loh chhungkua hi a zahawm loh ka ti lo va, pain a uap ngei chhungkua erawh a zahawmna a famkim ṭhin. Ka pahrawn khan midang kawp lo se keipawn ka zah viau thoin ka ring,. Ka lakah khan a sual hran lo bawk a. Chutiang ngaihtuah kual vak vak chung chuan ka let ka let a. Ka hriat loh karin ka lo muhil ve ta a niang. 

"Pipi,..pipi" tih ri-ah ka harh hlawl. 

Ka meng kâwk a, ka awmna ka hai ṭhelh a ni. Ka tho vat a, "I va mutui ve" a lo ti a. Ka nuih ringawt. 

"Thawh hi ka hre lo lutuk a" ka ti niah niah. 

"A ho lutuk, a pawi lo. Inthiar ka duh a, ka lu a hai sia.." inthlahrung taka a tih chuan, "Hawh. Ka kai ang che" tiin ka tho ta nalh a. Kan inkai phei a,. Comode-ah ka ṭhut tir a, ka chhuahsan ta rih. 

Kan lêt leh hnuah ka va inthiar ve leh a,. Kei inthiar hi ka bei rei thei khawp a, miin min nghah pawh ka duh lo. Ka nu hian, "Nau i la har ngawt ang" min ti ṭhin. Ke mu chur chur khawpa ka inthiar hnuah ka chhuak phei ve leh a. Kawngka ka hawng tur chu, "Hiv + ka ni tih hi engvanga hrilh lo nge i nih? Ka pa.." Maliani tih ri avang chuan ka kawngka hawn tum chu ka ṭhulh leh phah. 

Hiv+ a nih kha ka lo ring ru ṭhin a, mahse, damdawi ka eitir ṭhinah chutiang a awm si lo. Mak ka ti lem lo naa, Pu Zauva'n ka laka a zêp kher chu mak ka ti deuh. 

Ka aw ka thian lui vak a, ka lut ta chauh. 

"Hrilh tur che ka nei a ni. Pipi" thutak zeta a tih chuan, a sawi tur ka hre tawh tih ka sawi châk viau. Mahse, "Ka ngaithla e" ka ti sap a.