Amah leh Kei 2

AMAH LEH KEI..(2)

Ziaktu : Toni Râlte

"Morning, i lo tho dam em?" Maliani rooma luh pah chuan ka ti zangkhai vah a. Khumah a lo ṭhu mu a, a tum leh bâr tawh. Parda te chu ka han hlim sawt sawt a, tukverh pakhat ka hawng bawk. "Vawiin chu eng nge i ei duh ang?" Ka ti leh a. 

"Engmah" a ti leh tawh. 

"A ti leh ta, engmah hi tuman an zuar bawk si lo. Ka hria, chaw ka kansak ang che aw, ka thiam lutuk" ka ti zawt zawt a. Na zeta min rawn melhin, "I hneawm, nang hi" a ti ram hmak. 

"A dik ang,bialpa ka neih ve pawn min hne zel, a chhan chu ka duh huam zel a.." ka lo ti leh puat a. 

"Coffee sa ver vawr min zu lak rawh" a lo ti daih. Lawm ru deuhin in hnuaiah ka chhuk leh a, U Mateii leh Pi Lingi pawh an lo awm ve tawh. Coffee chu ka lumsak ta nghal a. 

"I duh ang ang hian i che ve a, i zam lo reuh ka ti" Pi Lingi bawk a ni leh tawh. 

"I fanuin coffee a in châk a" ka ti a. Ka aw pawh a pangngai. Mateii chuan, "Ma-i chuan a tak lam a duh ṭhin, ti tak deuh mah la a pawi lo" a lo ti ve siam siam a. 

Sangi chuan thleng a hru hul mek,. Pi Lingi bawkin, "Sangi, ti zo la, ka hnungzâng hi min han hmehsak teh. Bawihteii nu hian engmah a thiam lo, tlaw leh lutuk " tih pahin Mateii a melh râm râm a. Mateii erawh chuan nui sângin, "Ka chemkal lohna lam a nia" tiin min rawn en daih thung. 

"Chem kalna tak tak pawh i nei ve mawni le..Dampuii kha ka mo ni zawk se a dan a dang ang mawle" Lingi chuan a lo ti leh hmak. Mak ka ti ve deuh, a monu a tham lo mah mah chu. Mateii lah a fel hmel hle si. Mateii hmel pawh a dur khap a, "I fapa hian lo nei zawk se ṭha tur a nia tiraw? Ka nu, mahse, Dampuii aiin min thlang zawk miau sia" a ti ve ta ngat a. 

"Rûl i nia, i zar thiamin i thlem thiam em alawm. " A lo la ti hmak zui. Mateii chu a kalsawn ta daih a, he chhungkaw mizia hi a mak ṭan riau. Inpawh tak anga an lanna phênah hian an inla hrang ru ṭhûm hian ka hria a ni. Tin, Pi Lingvûti hi mak ka ti bawk, a fanu hi a ngaihsak vak lo nge, ni khat lek ka la kal naa nimin nilêng Maliani ka buaipui chhung khan eng a tih ka hre lo, rawn kalin a fanu chu rawn besâwm ve se a dan a dang daih maithei a nia, a rawn dîkdâk loh chu thuhran, in chung lamah a hmel hmuh tur a awm lo hrim hrim. Chutah a monu a la hmusit em em zui a. Misual tak chu a ni khawp mai. Pu Zaua kha a fel duam duam nen. 

Coffee nen ka chho leh ta a,. Ani pawh khum sirah a lo ṭhu ve tawh a. Coffee chu ka pe nghal. A in laiin a room hnawk laite chu ka lo chinfelsak ve a, a hnawk vak lem lo bawk. A phone a rawn ri ta ral ral a. A chechâng eih lo,. "I phone a ri a nia" ka ti a. Vin zet hian, "Ka hria, ka beng a ngawng lo" a ti zek. Ka ngawi ta hmak a. A rawn ri nawn ta sek si, ka ning ta deuh a. "I lak dawn loh chuan ka reject dawn a nia. A bengchheng" tih leh lukham bula a phone chu lek ka rual a, lo calltu chu 'Mi tenawm" tiin a save ! Dangdai ṭhin hle mai a ! A ex a nih ka ring deuh. 

"A va tenawm âwm bawk ve mawle" ka tih sap ri chu a hre pha a niang. 

"Tenawm e, in tenawm vek, kei tih chauh lo chu in tenawmin in rimchhe ngawih ngawih" a lo ti nang nang a. A aw erawh a ring hran lo. 

"A tina hle che a nih dawn hi.." ka ti ve ta zel a. 

"Lo inrawlh suh. " A ti chang ta fak. Damdawi ei a hun takah chuan ka eitir a, a lo hnial bik lo. Ka lawm ru hle. 

"Chaw chu ka zu kansak ang che aw" ka ti leh a. 

"Chaw kan a ṭhing ultra pro max lutuk " a lo ti hlak a. Ka nuih a za deuh, ka sawi dan kha a ṭhing ve bawk a ni. Fried rice te chu ti ila a changkan hmel leh daih. A ho ê..In hnuaiah chuan Sangi'n Pi Lingi hnungzâng chu a lo hmet a, "Sangi, chaw ka kansak dawn a nia" tiin ka hrilh zauh. 

"Chutiang a ei duh lo tawp ang. " Pi Lingi bawk chuan a lo ti leh a,. Ka chhang peih tawh lo. Frying pan ka la chhuak a, chaw chu khawrh chhuakin ka chawk rual a. Carot leh zikhlum chanpawlhin, purun sen nen ka kansak ta a, Sangi a laklawh avangin keimah chuan Knorr soup ka va leisak bawk. In lama ka intuituah ve dan a nia, mi hausa ho pawn ka siam hi tui an ti ve tho ang. Ka siam zawhah, "Sangi, i eitur ka dahsak ve che aw" tiin in chung lam ka pansan leh ta a. Sangi hi nakinah an chhungkaw boruak vel la zawh tur a ni ka ti rilru, mahse, 'I duty chu Maliani enkawl a nia, an chhungkuaah inrawlhna tur i nei lo. Lo buai ve suh' tiin ka rilru kilkhat chuan a rawn ti ve tho. Mi nuna inrawlh vak chi ka ni lo bawk nen. 

Maliani bulah dawhkan hunsakin ka eisiam chu ka chhawpsak ta a. Hmarcha a duh tih ka hriat avangin a duh anga a inpawlh theih nan hmarcha ka chhawp tel bawk. Min rawn melh a, "I inti thiam ve sia a" a ti hlak a. 

"Ka thiam miau bawk sia lawm" ka lo ti. Chaw kan chu a ei ve leh ta poh a, min fak hreh dawn tih ka hre tho naa nimin ang bawkin tui a ti tih ka hrethiam vek. A ei zo leh vek avangin. 

A puar ta bawk a, a pân ṭhenkhat ka tihfaisak hnuah muhil turin ka chhuahsan ta rih a. Mateii'n thingpui min lo pe vat,. "Naupang school kal hi tuin nge hruai ṭhin " ka ti thuphung a. 

"Kan pa hian a thlah mai zel a, tlai lamah erawh keiman ka va hruai ṭhin. A hla vak lo va" a ti a. 

Pi Lingi te pawn an rawn in ve a. Ti nge hlim hmel put hi a harsat em em ni. "A ei em? I thilsiam ve chu" tham lo zet hian a ti a. 

"Ei fai vek" ka lo ti vat a. A dang ve deuh nge a ngawi dat a. "Chaw pangngai hi ei se a ṭha ber. " A ti leh hram. Sangi ta pek chuan, "U Pipi, nang chu i danglam bikin ka hria. U Ma-i pawn lukhamin a la vawm ve lo che tiraw?" Nui var var chung hian a ti a. 

Ka chhan hma hmain Lingi bawkin, "Ni 2 a thawhna chauh alawm,. Khu ruai suh" a lo ti leh hmak. 

"Ni 5 hmain min ngaina ngei ang. Ka beisei" ngei rilru ve deuh hlek hian ka lo ti a. A ner nâwng a, "Tum buai suh" a ti nghat. Mateii zawk chuan, "I Mize mak deuh vang hian i hneh thei mai ang. Misual a ni lo, thil tam tak a tawn vang a nia. A khangaihthlak zawk" a lo ti luam a. 

"I kamtam ṭhin mang e. Pawnlam mi a nih hi, Ramdinsang.."..nu ber chuan a lo ti chang ta fak a. Mateii mitmeng pawh a khup ta zâl zâl mai. 

"A ho e,. Ka la hre tho ang, amah khian min la hrilh ang" tiin Mateii thlavang ka lo hauh a. 

Ka kalsawn tak daih avangin eng nge a sawi ka hre zui ta lo. Sangi puan pho seng tur chu ka zui chho ve a, in chungah chuan thlifim a thaw heuh heuh bawk nen, Sangi pawh muangchangin a che a. 

"I pi khu chu a tawrhhlehawm ve dawn a nih khu, chhe leh lutuk.." ka tih chuan a nui hak hak a. 

"Ngaiah ka nei tawh. Ka thawh tirh chuan hremhmunah ka awm emaw ka ti thin" a ti a. 

"Kum engzat nge i awm tawh" ka tih chuan, "Kumin hi kum 4na a niin ka hria. Ka awm rei thei ta ber a nih hi. Hlawh a ṭha êm a, ka mamawh ve nen, mahse ,tunah chuan ka pi pawh ka enliam ve vek tawh." A ti mawlh mawlh a. 

"U Mateii khu a fel hmel sia, i pi lah khuan a ti fek fek reng bawk si, a tuar thei ngawt mai. " Ka han ti kual vel a, hetia mi chhimbudawi vel hi chu ka hnehsawh zawng tak. Mahse, ka ti zen zen ngai lo. 

"Nia, a fel lutuk, mo ṭha tawpkhawk a ni ka ti tawp. A ṭha lutuk hi ka pi hian a thik a niang te ka ti tawp zel. A tute pawn an ngaina lo. U Mateii chu ni ila ka haw daih tawh maithei a ni" a ti ve a. 

"Zinga i thusawi kha ka ngaihtuah zui a, a mak ka ti deuh. Ka tih zawk chu nang i awm tho sia, maid dang an la tho thin em ni!" Pehhel zetin ka han ti a. Victora chungchang kha ka hre châk tlat pek a nih chu. 

A aw a thian kharh a, "Keimah ringawt hi chuan ka enkawl hneh lo ve deuh a, bakah zep miah loh chuan eisiam lamah hian ka tlachhe ve tawp a, ka siam tui loh vang hian rawngbawl tur hrim hrim an la thin. U Mateii eisiam lah ka piin a ten emaw tih mai tur a ni sia, bakah U mateii hi a hma chuan damdawi dawr a nghak ṭhin a, kumin atangin U Mateii nau an nghahtir chauh a ni. Eisiam tur chu pahnih an la tawh. Mahse, sawi tawh ang khan ka pi leh U Vica vang hian an bang a, Nurse pawh U Maliani a sual ve bawk nen, an nurse rawihte lah khan U Vica an lo star luklak kual a. An ban phah leh daih alawm.." a ti niah niah a. 

"Victora chuan a bân tihna nge?" Hrethiam vak lo hian ka lo ti a. 

"Ban chuang nang,. Engtin nge a tih ka hre chiah bik lo. Nurse bang hnuhnung ber kha chuan vawikhat U Vica a be lai ka hre tawh a, "Hetiang a nih chuan ka thawk reng thei lo vang. Min tina tam tawk tawh" a tia, U Vica lah khan, 'Bang daih mai la ni mai lawm. Ka dang reng reng lo che' a ti hmiah sia. Chuan, ka pi hi a inrawlh ve zel bawk sia,. Hmusit taka min tawngkhum rengtu te chu tuin nge an hna thawhsak reng duh bik ang? Kei chu kan rethei êm a, ka inti chhel hram hram zawk a ni. " A ti ta mial mial a. 

"Mahse, Victora ka star kha i hlau viau sia, nurse te chuan an star vangin an na ringawt a maw?" Mawlmang zet hian ka lo ti leh a. 

A thaw hak a, nuihzat hmel lek lek hian, "Aw an star thei lutuk a, ka bulah hian a chanchin min zawt nasa ṭhin. Ka pi hian a lo hre ru ve zel sia, U Vica an ngaihzawn phak a nih lohzia te a sawikhum vak vak zel a, U Vica lahin tumah kha a duh ve bawk si lo. Chutiang vel chu niin ka hria. U Vica i star ve ka hlauh chhan ber erawh ka pi vang a nia. A sual si. " A ti bawrh bawrh a. Ka nui hawk ringawt. 

"I pite ang khu chu hlau leh zum dêka deal chi an ni lo, min zuam telh telh zel. Ti nge maw khutia a awm tlat ni. Hrehawm pawh a ti lo mawni.." ka ti ta hmiah hmiah a. "Chu chiah, hnehsawh zeta i ṭawngkhum hian ka lo ṭan thei tawp che." A la ti zui..kan rei tak deuh avangin kan chhuk thla leh ta a. Maliani roomah ka kal nghal. 

Vawiin chu min ankhum vak lo, a ṭawng duh lo viau bawk. Jection dawn pawn ṭha takin a dawh ve mai a. White blood a mamawh tawh êm avangin naktukah kan pe ang,. A pain a rawn hawnsak dawn a niawm e. Dar 5-ah ka haw a, in ka thlen chuan ka nuin rawng a lo bawl ṭan ve chauh. A buai thei sia, ka khawngaih thin. Ka pui ve nghal sawk sawk a. vawiinah chawhmeh a lo thlen avangin a lo buai zual niawm tak a ni. 

Thleng ka sil laiin Nuteii a rawn lut hlawl mai a. Kan ri chul mai. Kan veng a inhlat deuh tawh a, kan intlawhpawh khât angreng. Ani pawh a pawisa khawl hmangin bazarah 2nd hand dawr a nei ve a, an pa hi Electric department-ah a thawk ve bawk a, fa pakhat chiah an nei thei. Nuteii a lo upa ve tawh nen, a thi a la hul lo naa doctorin nau neih a phalsak tawh lo a ni. "Bawiha i rawn hruai na nge?" Ka lo ti vat a. 

"Hruai lo, a pain phal hek lo" a ti nghat a. Ka nuin, "Chu! I rawn tlan ve deuh tihna mi?" A lo ti hê hâw a. 

"Aw.. inṭhen mai ka duh tawh a ni" a ti hap a. Kan rik hlut avang khan a hmelhmai ka lo enchiang lo va, ka han chik takah chuan a hlim lovin a ngui riau mai. Ka nu pawh chuan, "Ringawt chuan..eng buaina nge in neih? Engmah i rawn sawi ngai si lo" hrethiam lo zet hian a ti a. 

Thawk a la halh a, kei pawh ka sil zo a bulah ka ṭhu ve nghal. "Ka rawn hrilh duh thin lo che u alawm, in buai ve sia. In rilru tihbuai belhchhah ka duh lo va. Mahse, zanin chu a tawpkhawk tawh. Ngaihzawng min neihsanna hi kum 3 dawn a ni tawh, zaninah chaw eiah a sawm a, a rawn hruai lut nia mawle. Ka tlawm vawng vawng hian ka hria,. Ka na lutuk a, ka rawn phei ta ngawt mai a nih hi." A ti ta a. Mak ka tihzia chu! Nuteii pasal Pate Zuala chu chutiang mi niin ka hre si lo. Fel duam, fiamthu duh ve tak, keini chhungkua pawh min pawh ṭha ve em emtu kha a ni sia. Thil hi a mak thin teh e. 

"A va mak dawn ve. Zuala'n ngaihzawng a nei a maw?" Ka nu pawh chuan a ti hâ mai. A ṭhawng ve hle tih a lang. 

"Nei e mawle, ka sawi duh lo mai mai alawm. Zuala chhungte bulah erawh ka sawi tawh. Keimah zawk min mawhpuh a, i ngaihsak tha lo a niang te an tia. Theihtawp ka chhuah ve asin. Kei pawn rin harsa ka ti lutuk. Englo a nia, an hna avanga Reiek-ah an va zin ṭum khan kha thla khat dawn an va riahchilh kha. Tah khan an mamawh lamna ber dawrkai nuthlawi nen an lo in chukhâ a lo nia. Mahse, kha nu kha chu mi pangngai tak a nih hmel, keiman ṭha takin ka va bia a, an in be zui lo. A hnuah nula hnahkhat ngat min zuisan leh a, nula pawh ka be leh a, a zakin hrehawm a ti viau nghe nghe. Chuan, tuna a kawp leh mek erawh Zodini a nia, nuthlawi fa pahnih nei, hmelchhe lo tak mai a nia. Vawi tam ka biain ka hrilhfiah tawh. Engahmah min ngai lo, langsar takin ka pasal min ṭawmpui ngam hmiah mawle…pawisa ni se an inpe nasa a niang, a hlawh pawh hi ka kuta a luh lohna a rei tawh mai. Bill leh eng ilo hi a pe ve a ni mai a, a bak chu ka dawr aṭang vekin ka pe. Kan mi chhiat êm avang hian ka inti chhel lui hram hram a , belh tur ka nei lo angah a ngai a ni tehchêk ang chu, kan pa lahin vawitam ka ngen hnu pawn sim a tum si lo. Min zah lohzia tihlan nan chaw eiah a rawn sawm a, a hmeichhia lah zâm hek suh. Ka tuar thei ta ngang lo a, chaw eikham veleh ka insiam a, Bawiha pawh rawn hruai ka tum, a phal tlat lo va.." Nuteii chuan a ti ta dap dap a. Mak kan lo ti tlâng hle. 

Ka nu pawh chuan, "Zuala mai mai chu aw..ka rin a va ang lo tak. A pawi lo, i û ka la dam ve alawm. Bawiha pawh kan va hruai vat dawn nia. " A ti charh charh a. A lungawi vak lo hle. 

"Hmeichhia chu ka va kek chak ve le.." ka lo ti ve chiam a. Ka nuin, "Nang lah hi tharum thawhna ringawt ngaihtuah suh, Zuala thiamloh vek zawk alawm, nupui pasal kan nei tawh a nih chuan rinawm mai tur. " A lo ti khauh fang mai. A pasal ka pahrawn ngei pawh khan hmeichhe dang a lo umsan ve tawh bawk a, ani hi chuan Nuteii natna pawh a hriatthiampui viau ang le. Nuteii chu ka khumah a mu ve a,. Kan in hi a lian lo ka tih tawh kha. Pindan pahnih bak a awm thei lo, pakhat chu ka nau room a nia, room pakhatah ka nu nen khum hrang ve veah kan mu thung a ni. Muthmunah ka hnathawhna hmun velte min zawt ve a, kan titi rei angreng. Thawh pawh ka hai phah ta chiah a. Dar 9 hmaa ka hnathawhna hmun thlen a ngaih avangin chaw pawh ei lovin dar 8: 45-ah ka chhuak ta a. Tka bike a chiangkuan loh avangin a rawn kal thei lo zui! 

Ka hnathawhna hmun ka thlen meuh chuan dar 9 chu 15 mins laiin a pel tawh. Nuam ti vak lo chungin ka lut a. Pi Lingi nen bawk kan inhmachhawn leh ta. "I tlai,. Engvang nge?" A ti fiak ṭhak a. 

"Thawh ka hai a, ka motor hman ṭhin a chhe bawk nen, ka tihpalh." Ka ti a. 

"Chu chu i buaina a ni. Kan ina i thawh dawn khan kan dan leh dun engkim i hre sa. Vawikhatmah rawn tlai tawh suh ang che. " A ti bawrh bawrh a, ka rin aiin min hau na lo zawk. Chhang tawh lovin Maliani room ka pan chho nghal a, Victor nen kan intawk leh pek! Mahse, inbe lem lovin kan inkal pel mai a, biakna tur ka hre lo bawk a ni. 

"Morning. Kan tho nuam em?" Tiin Maliani chu ka nuih sâng a. 

"I tlai a nia" a lo ti ringawt. 

"Tihpalh. Thawh ka hai khanglang a" tiin parda ka hlimsak leh a. Mak ka tih deuh chu ka kal hma hian tuman an tlawh ngai lo em mawni le. Parda em em pawh hlim loh hian a la awm reng zel a. Ani lahin chetlak a tum bawk si lo. 

"Chaw kan em ni? Kan ei leh dawn?" A ti mial a! Ka nui ver ver mai. 

"Chow fry ve thung aw" ka ti a. Kei pawh ka ril a ṭam khawp mai. "Chumi hmain coffee in ang aw. Ka zuk la ang e" tiin ka chhuahsan leh a, min rawn ko let leh .."Ka nu a awm em?" A ti a, a hmel a inthlak deuh,. 

"Awm e. I hmu duh em ni?" Ka ti a. 

Za lo zeta nui luiin, "Engvangin nge ka hmuh duh ang?" A ti hul hak. An nufa boruak hi a ṭha tehchiam lo a ni ngei ang. Eng emaw hriatchhuah tur hi chu a la awm ang mawle. Coffee ka lum laiin Mateii chu inchei angreng deuhin a rawn kal a, tui a rawn in. 

"I va nalh ve, i chhuak dawn mi?" Ka lo ti sawt sawt. 

"Aw, ka nute ka va tlawh lawk ang e, ka nau a lo haw a. " Phur hmel tak hian a ti a. 

"Maliani chu eng nge i eitir leh dawn?" A ti leh hliai a. 

"Chow ve thung " nui chungin ka lo ti a. 

"I deal thiam dawn riau mai. Ka nu saw chu ngaipawimawh suh. Maliani hi a pawimawh ber " zawitê hian a ti sep sep a. Ka lo bu nghat. A kal hnuah coffee pawh chu ka siam zui a, chhang eng emaw tal hmeh tur awm se ka ti rilru,. An chhang bawm ka hre si lo, Sangi ka ko ta ngawt a. An chhang dahna ka zawh chuan ṭha takin min hrilh a, chhangthawp ka la a, butter ka tat bawk. Maliani pawn a ei duh ka rin avangin bangbawr zetin ka chho a. 

"I in ve dawn elo?" A ti a. Lawm lo awka aiin mak a ti deuh niin ka hria. "Aw, chaw ka ei lo va" ka ti sep. 

Kan in dun lai chuan a phone bawk a ri leh ta. Mi tenawm tia a save tho kha a ni. "La rawh" ka tih chuan rum fahran hian min melh a, "Engvangin?" A ti ram hmak. 

"A chhan chu i block chuang si lo va, i la be duh tihna a ni mai" ka lo ti ve hrâwk a. Kut min thlak duh mai hmelpu hian min melh a, "Ka mimal nunah inrawlh suh" a ti ta daih. 

Tawitêin ka nui a, "Inrawlh ka tum hauh lo. Mahse, ani saw block mai la..i ring raltir zel tho sia" ka ti leh hram a, "Ngawi mai mai teh" a ti duh lek. Kan ei inna ka zuk silfai leh hnuah a damdawi ei a hun ta bawk a, ka han pek chuan, "Ka duh lo" a ti leh tlat. 

"Khatia inlak luhlul vak a ngai lo,. Nuam i ti tak tak lo. Ei mai mai teh" ka tih chuan thinrim fê hian min rawn melh a, "I va han zakthei lo tak. Hmai bialnu, haw rawh. Min enkawl tawh suh, ka ban a che. Min zah lo pâng pâng em mai" a ti ta hrep mai a. 

"I pa chauhin min ban thei. " Ka lo ti leh chat,. "I hmaa lo thawk tawhte kha chuan zah dêkin min be thin asin. Tu nge i nih a? Mi rethei i nih kha, damlo ka nih avangin min zah lo ringawt suh. I boss ka ni, i hria em?" Awki ring angreng tak hian a ti chiam chiam a. A taksa a chet lawih lawih bawk si avangin a chau vat dawn tih ka hria. "Ka tihpalh. Damdawi hi ei phawt la, i duhtawkin min ankhum leh dawn nia. " Ka ti dam thlap a. Insûm hun a ni tlat. Chutia aw dam taka ka tih vang chu ni maw.. a ei ve leh ta mai bawk a! Thisen var pek a ngaih avangin ka singsa fel a, a ban chu ka ka han en kual a, an vit zing tawh a, a duk thleh thluah bakah ser te taktê tê a tam mai. Vein pawh hmuh tur a vâng angreng. Drip khai deuh reng a ngaih avangin venflon vuahsak mai ṭhain ka hria a. "Venflon vuah ang aw. I tan pawh a awlsam ang" ka ti a. A ngawi reng. Venflon ka hmuh mai loh avangin in hnuaiah ka zu chhuk leh, loh theih lohin Pi Lingi ka zawt ta a. Meng thip leh râmin, "Eng atan nge i tih a?" A ti kher..

"Drip khaisak fô a ngai sia,. A hrana vein zawn chawp reng kha a tan pawh a hrehawm ang." Pangngai takin ka ti a. 

"I thatchhiat vang a nih lek chu a! Ka hre ve lo e. Dampuii khan a hria ang" a lo ti daih. 

U Mateii number ka neih loh avangin Sangi phone atang chuan kan call ta a,. "Ma-i roomah, drawer hnuai berah khan a awm aw" a rawn ti ta hlauh a. Ka chho leh vat, Sangi pawn min lo zui ve a. Victora pindanah a lut thung. A tihfaisak dawn a niawm e. Vein chu ka zawng rei kher mai, a puar zel bawk nen, a kut hmawr lama vih chuan a tan nakinah a hnawk dawn si. A tawpa tawpah rilru ṭawngṭaina nena ka beih fê hnuah ka vit hlawhtling thei hram e. Thlan a tla bat bat thei alawm le. "Nurse tlaw lutuk" a la ti zui. Ka syringe ken lai chuan ka chhun sawk ṭep a ni. Drip khai chhungin a eitur chow chu ka zuk fry sak leh a. Sangi'n min vil ran bawk. Ka eisiam tui a tih thu a sawi bawk a, ka phur phah hle. "I pi a chhuak nge a va reh ta ve" ka ti sur sur a. "A muhil leh tawh a niang. Nitin a muhil thin" a ti a. 

"Maliani hian a nu a chhun a niang, an sual nufa em mai" ka ti ta hlawl mai. 

"U Mai chu ka awm tirha ka fak ber a nia sin. A fel lutuk. Min be tlangnel bertu a nia, U Mama fate lah a duat si,. U Vica nen erawh an inmil vak lo thung" a ti mial mial a. 

"A nih chuan a dam lohna vanga rilru kawi a nih chiah chu" ka lo ti ve a. 

"Ni chiah e. Ka pu leh U Mama te nupa hi chu awm lo se a thi daih tawh ang, an ngaihsak êm a..ka pi leh U Vica te chuan tlawh pawh an tlawh ngai lo" a ti niah niah a. Mak ka tihna kha a rawn pung leh sawt. Ni e, he chhungkuaah hian thil danglam tak eng emaw chu a thleng chiang a ni. 

"Maliani hi engtik aṭangin nge a nat a?" Ka ti he haw a. 

"Kum 1 chu a liam tawh ang. " A ti tawi tak, thildang sawi duh nei hmel a pu, mahse, ka zawt zui tawh lem lo. Eitur kengin ka chho a, Maliani pawh a lo harh tawh. Thisen var chu chawhnu lama pek tur a ni a, in eipuar phawt teh se. Engmah sawi nawi lovin chow chu a ei zo leh ta vek a,. "Nurse dangte aia i danglamna chu eisiam i thiam, thildangah erawh i tluk lo vek" a ti a. 

"Tluk kher ka tum lo, thil i ei ṭhat hian ka lawm a ni mai" thutak deuhin ka ti a. 

"Khatin min ngaihtuah tak tak angin lang duh suh. Lemchang ho hi ka haw teh mai a nia" a ti chang rât a. 

"I chhungte pawn an ngaihtuah vek che alawm.." ka tih chuan za fê hian a nui ta hawk hawk a. Hrilhhai deuhin ka lo en reng ringawt, chutah nui tawp thutin.."Ka chhungte maw? Hehe..ka nu leh Victora pawh telin em ni? Ramhuai pahnihte thih hnuah ka dam ang.." a ti ta riap mai. A ṭawngkam rapthlak zet avang chuan ka lo îp châwih, thisen zawmpuite laka hman atan chuan a hriam deuh mah mah a ni. 

"Anni pawn an hmangaih che." Ka tum loh deuhin ka ti a, ka inthiam lo letling zawk. Lungngai tih hriat zeta min rawn melhin, "Hmangaih a?! Hmangaihna thinlung pai an ni ve hleinem. Huatna chauh an nunah a awm, ka nu chuan thi vat se min ti hle asin. I awih na nge? Engvangin nge dâwt ka sawi ngawt ang? Victora hian ka nu thinlung a ei zo vek tawh, a fapa chauh a nunah hian a lal tawh a. Fanu a nei tih a hre tawh lo. Ka nu khu ka nu a nih avangin keimah hi ka inhua..ka thih niah chuan a nui ver ver ang. Ramhuainu khu.." uar fê hian a ti tawn tâwn a. Sawi tur reng ka hre ve tawh lo. Victora chuan engvangin nge a û chu a huat? A nu pawh chuan engvangin nge a ril arah a fanu chu a huat em em? A chhan leh vang hi a ril viau ngei ang. 

"Aw le, duhtawk tawh la, khawngaihin.." ka ti a. A thinrimna a zual zel dawn si a, ka khap mai loh chuan. Chauh hmel zetin a mu zangthal a. "Ni e, ka duhtawk e..intihfai ka duh" a ti zawi raih a. 

"Ka bual ang che aw. Pawi i tih loh chuan" ka tih rual rualin, "Aih, ka ti ve thei mai ang" a ti tham ṭiak. A tho va, a che vel reng reng hi a zawi ngawih ngawih a ni ber. A lainatawm tak tak a ni. Bathroomah a lut zuk tawh, a rawn dak leh a, "Ka lu erawh rawn su mah la a pawi lo" a ti a. Phur takin ka va lut ve a, a lu chu ka suksak ta a ni. Venflon vuahna laiah sarangin ka tuamsak a, a inbual thei mai ang chu..dam loh bawk, balh bawk hi chuan kan uih hmel thei vut vut êm mai. A inthlak chhung chuan ka chhuahsan ta rih a,. In chungah tumah midang an awm ve lo bawk a, pindan dangte en kual chu ka châk ta tlat! Ṭhing ka intiim zaktheilo ka inti em em, mahse, Victor pindan bik phei chu ka en châk ta zek zek. Dimtêin ka hawng a, a rimtui chêk mai. Engkim chu a felfai thlap a, Sangi khan a tihfelsak bawk nen. a closet chu ka hawng dûk dûk a, a lo inkhai ve dul mai. Kamiz te chu a inhmeh ve pawh ka ring lo e a. Guitar hi fel takin a lo in tung at bawk. Guitar perh thiam ka châk thinzia leh ka hlawhchham sizia ka ngaihtuah zawk mai. Ka inthiam loh rûk em avangin ka chhuak leh ta thuai a, U Mama te pindan erawh ka en ta lo. Study rooma ka va luh chuan naupang toys nen a lo ni ve deuh niaih a, lehkhabu pawh an lo tlar ṭhahnem hle. Lehkhabu chhiar lam hi ka peih chi a ni lem lo,.ka mizia nen a rem lo te pawh a niang e. Maliani pindanah ka va luh chuan a lo inthlak fel tawh a, "I sam kha tihro vat a ngai a nih kha. Ka lo ti ang" tiin hair dryer ka la a, ani pawh rem takin a ṭhu ve sauh sauh mai. A inbual fai bawk a, a rilru pawh a harh ṭha ve deuh niin a lang. A sam ka chhem ro lai chuan a bengchheng deuh nen kan ṭawng lem lo va,. A muthlu duar duar mai. Nula hmelṭha tak zawng a ni mawle. 

Kan inchhem ro zawhah bed sheet chu thlak tura min tih angin ka thlaksak a,. "Thisen var min pek chhungin ka muhil lawk ang" a ti a. Ka hnial hran lo. Tichuan, thisen var chu kan inpe leh ta a. A muthilh avangin kei pawn a thawmhnaw suk ngai te chu pawm thlain Sangi ka pe a. "Tihtur ka nei lo a nia, puih i ngaih chuan sawi hreh suh" ka ti a. Engmah ti lo va awm deuh tlawk tlawk hi ka ning thuai zel. Phone khawih melh melh lah hi ka peih em em si lo. "Ih, bai siam a ngai a, min baisak la,. I peih chuan" a ti ru sur sur a. "Tehreng mai" tiin ka khi var var. 

Dar 1 a pel âwrh chauh a, dar 2 velah ka baisak ang chu. Chumi hma chu eng emaw sawipui mai mai ka tum rilru ta a,. A pi lah a tawmbo daih bawk si. Ka nuin min lo call tehmial a, ka la vat. "I nuteii chu an pain a rawn ko a, an inhruai haw leh ta phawt..Bawiha a ngaihtuah ve bawk sia" a rawn ti a. Mak ka ti lem lo. 

"A tha reng alawm, Patea pawn a sim ve maithei asin" ka ti a. 

"Beisei ang., Hei bungraw thenkhat va lak a ngai a, ka va kal lawk ang e. " A ti a. A dah zui nghal. Ka phone chu ka hmet zui nghal a, Atei'n, "I thawhnaah tlangval an awm mi?" A rawn ti a. Teh tlat chuan. 

"Awm e..ti nge?" Ka va ti a, a seen rih lo. Chutihlai tak chuan kawngkapui chu rawn inhawngin Victora kha a ṭhiante niawm tak hian an rawn kuah lut a. Sangi a chiâi ngei mai, A pi a va ko ta chung chung a, Pi Lingvûti pawh a rawn chhuak rang kher mai. Ṭhutthleng seiah chuan Victora chu an muttir a, a chal sir dinglam chu amah chuan rawmawlin a hup bet bawk, a ṭhen chak chak mai. Ka lo hamhaih ve deuh bawk nen, lo chiauau dan pawh ka hre bik lo. A nu chuan, "Eng nge thleng? Eng thil nge?" A ti chung chung a. A fapa chu a dap kual vak vak bawk. Victora chuan, "Nurse, ka thisen chhuak hi lo titawp lawk teh" tiin min rawn melh ṭâwk ṭâwk a, ka harh thut,. Ka va pan ta vat a, a chal chu a lo kak duai mai a, thisen a chhuak ṭha duh ngei mai. "Lawk aw, hmanrua ka han la ang" tih leh in chunga tlanchhoh ka rual nghal. Maliani pawh a la mutui viau. Ka hmanrua nena ka zu thlen thlak chuan a mut dan pawh an lo siamrem tawh a, "Sangi, tuilum a awm em le? Tifai phawt ang" ka ti lâng lâng. Pi Lingi lah a lo phi ve sek, tihtheih a nei der si lo. Sangi'n tuilum a rawn la vat a, ka dep phawt a, fai taka ka sil hnuah damdawi ka hnawih a, a thip ve viau maithei. Mahse, Victora chu na tiawm pawn a lang lem lo. Ka tuamsak lai chuan a ṭhianpa chuan, "A nâk ruh pawh kha a khawlo deuhin ka hria. Nakinah x-ray a la ngai ang" a lo ti mawlh mawlh a. 

Pi Lingi chuan, "Thil thlen dan chu sawi vat ta che u, tu phiangsenin nge ka fapa duatlai hetianga lo khawih ?" Ring zet hian a ti tuar tuar a. 

Victora chuan, "Awm mai mai teh. Hahdam rawh" a lo ti dam thluam a. Ka tuam zo ta bawk a, "Hliam dang i nei em?" Ka ti sap.

"Ka nâk chu a ni mai." A ti ringawt. A nak ruh lam chu keia tihtheih a awm tawh lem lo. A hmai pawh a khem ve nen nuan a,. Mawi lo khawp erawh a ni hran lo ve. A thawh zawng chuan a ṭhen chak chak a, a nakruh chu a ti-auh deuh em mawni aw ka ti. A thaw pawh a tisak deuh niin a lang. "Lalval, nangin han sawi teh, eng nge thleng!" A nu bawk chuan a ti leh a, a âwm ve tho,. Hliam neiin a lo haw a, engmah thil thleng an la sawi si lo. 

Lalvala a tih chu cher deuh, vai hmelpu lam lek lek a ni a, a hmui pawh a duk tluk mai. Ani chuan, "Customer nen an insual a.." a ti ringawt. A va kaitawi thiam tak. "Ngati nge an insual?" Pi Lingi'n a tih leh chuan, "A tirah rui deuhin an rawn kal a, an chapo angreng sia, Vica hi hmusit leh thamlo deuh deuh ten an tawngkhum a. Vica lahin engahmah a ngai si lo. A motor nei lotu zawk khan an kal hmain Vica motor hnuaia a awm lai chu a kapah a tlawhsak kher a, . Vica a thinrim ve ta a nih kha. Chupa nen chuan an in sual a, a inrin hmain hmanrua a chuh ta thut a, a chal hi a chhu kak a, ṭhelh tuma kan inpawm buai laiin motor neitu zawk khan Vica nâkah hian a rawn chhuih zawt a, chu chu a natna chhan niin ka hria. Mahse, a insualpui pa kha chu damdawi inah a awm rei ve deuh hlek maithei a ni, Vica'n a kapah a tlawhsak ve nghek a, bakah a dula a hnekna kha a la natpui dawn chauh.. " tam deuhin a sawi ve thei ta alawm. Pi Lingi chuan, "A tu phiangsen nge mawni dawn le..an va zakthei lo ve " a ti hlaih hlaih a. 

"Mate, a na viau em? Damdawi inah kan kal mai dawn mi?" Tiin a fapa chu a chul kual leh a,. "Ka ṭha. Chaw ei titui tawk lek alawm. Phi ṭhin suh" Vica chuan a lo ti hluk. 

"Tikhan va phei leh mai r'u, chuan, Val, i kutah ka dah rih mai ang. Chawlh lak ve a ngai tlat" tiin Vala chu a en a, Vala pawn, "I nâk ruh ber kha hna rum thawk chi i ni lo, rit te kha lo la lo la aw. Nih chuan, Sawmtea, phei ila" tiin la ṭawng ve miah lo, la naupan hmel tak chu a melh zauh a, an chhuak zui nghal. Victora pawh chu a tho va, "Ka han intifai ang e" tiin in chung lam a pan. A nu nen kan thlir zui reng a, a ṭha chho êm ang chu maw. 

"Nang kha ti nge i din reng? I hnuhma kha tifai rawh" Pi Lingi a ling leh ta. 

Keipawh chuan ngawi rengin ka senghawi fel sawk sawk a. Pi ber an pindana a luh hnuah Sangi ngenna angin Alu bai tur chu ka vel nghal mial mial. Mahse, in chung lam aṭanga au ṭial ruai ruai ka hriat takah chuan ka alu vel lai chu ka dah tawp a, ka pen chho pâwk pâwk,. Maliani pindanah ka tlan lut nghal a, ka beisei loh deuhin thisen var kan pekna kha phawiin a room kilah a lo ṭhu tawm châwih châwih mai. A au tawh lo naa lungchhe zet hian a ṭap hlawp hlawp. Ka va pan thuai a, "I ṭha em? Eng nge thleng?" Tiin a hnungzangah ka chul a, a thinrim hlur ka rin nen a rawn âwn riai riai a, ka âwmah chuan beiin lungchhe vankaiin a ṭap leh ta hlawp hlawp mai. Tihngaihna ka hre si lo,. Ngawi rengin ka lo ngaichang tawp ringawt. 

"Awmpui reng tur i nia sin. " Kawngka bul aṭanga rawn titu chu ka va melh zawk a. Victora a ni. A inbual fai tawh a niang, towel a veng ṭât a, kawr a ha ṭhak lo lehnghal. A âwma a tatoo chu sakei lem niin ka hria. A six pack pawh chiang takin a lang. 

"Ni e, ka tihpalh a ni" ka ti sap a. 

Ka ngaihven zui lo, Maliani chu ka kai tho a, a tho ve mai. Khumah ka muttir a,. Thisen var chu a zo lek lek tawh sia, "Zo law law rawh se..a rei tawh lovang" tiin ka pek chhunzawm leh ta a. A ngawi char char chu a nuam lo, eng emaw tal sawi se ka ti asin mawle. 

"Keimaha awm ka duh, ka ngaihtuahawm loh" a ti ta sep a. 

"Aw le..lo ṭha rawh aw" tiin a sam ka chulsak zauh. Ni 2 kan inenkawl tawh a, ka lakah sual a chhuah ngat ngat zel naa, a duh vang renga hetianga sual chhuah hi niin ka hre ta lo. A chhungril nun hrethiamtu a mamawh a, he a rilru dam lo hian a taksa pawh a khawih chhe tel vek a ni. Chuvang chuan ngainat rûkna riau ka nei tawh tlat. 

Thawm dim takin a pindan chu ka chhuahsan a, Victora kha a lo ding run mai. "Eng nge?" Ka ti hlar a. Ka duh vanga pawr pawh ka ni lo, ka hrethiam bik lo. 

"Ani sawn min la haw reng em ni?" Mitmeng hriatthiam harsa zet hian a ti tham ṭuak a. Natna thûk tak nei hmel a pu a ni. "Aw" ka ti mawl tawp. 

"Ka hmangaih em em tih min lo hrilhsak dawn nia.." a ti zawi ruih a. "I danglam bik tih pawh a hre vat mai ang. " Tih pahin ka dar a rawn hmer a,. Ka chhan hmain a pindanah a lut daih..heng mite hian eng thil nge maw an thup le?!..