Parchuailovi 9

PARCHUAILOVI..(9)

Ziaktu : Toni Râlte

Police ten investigation an han ti chho ṭan a. Martina pawh koh a ni ve. Martina te hi a remchan zawkna avangin kum 3 liamtaah khan Chawlhhmunah an lo insawn tawh a lo nia, Atea ruang an chharna piah lawkah an lo awm nghe nghe. Ruang pawh hmu hmasa pawl a va ni ve a, chuvanga Zonuni rawn be ta vat a ni. Police lo thlen lai pawn a hmelhriat ruang a nih thu chu a lo sawi ve tho a, mahse, endik ve reng reng rawh se an tih avanga ruang dahnaa la dah rih an ni. Ngawlveite Rûn lam pawh biak an ni a. Atea kha kar hnih liamtaa lut kha a nia. Kar khat vel a awm hnuah chhuah a dilna chu pawmsak niin a lo chhuak daih tawh a lo ni. Mahse, in lam a rawn tlawh miah si lo. Tu tu nge a kawm ṭhin a, tu ten nge hmu tih pawh hriat a harsa tab riau. Ruihhlo ngai a nih avangin ṭhian a ngah viau bawk a, mi hrang hrang a kawm kual a rinawm. An chhui zel a, a ṭhiante zinga pakhat Bena tih loha a kawm nasat ve ber Kima chuan a rawn chhuah zana an ina a riah thu a sawi thei ta a. Mahse, a tukah "Kan inah ka va haw ang e" tiin a chhuak a. Chu chu a damlai a hmuh hnuhnun ber a ni. Kima a ṭangin a ṭhian dangte pawh an hre thei ta a, mahse, a tu amahin Atea chu an hmu ngai miah lo tlat! An hlauhthawn vangin dâwt an sawi nge tih lah hriat va ni suh. Potsmortem result-ah chuan zing lam dar 4-5 inkara thah a ni a, a tukhuma thil sakhat chang taka hlapna chu a thihpui bawk. Tualthattuin a hlapna hmanrua pawh a ruang hmuhna bul velah zawn a ni a, hmuh a ni lo thung. Zonuni pawn a tuar na khawp mai a, amah inthiamlohnaa khatin amah vanga a nau chu thi niin a ngai, chu chuan a nun a pawthniam zual a. Hnem vak dan ka hre lo, a nu leh pa a chân hnuah a unaupa, a thisen zawm awmchhun chu râwng taka thahsak a ni leh a, he khawvelah thisen zawmpui a nei ta lo. Ani nula la upa lo tak tan chuan a vanduaina hi a thuahthîp em a, a tuar viau pawh chu demna pakhatmah ka nei lo. Mite pawn an lainatin inleng pawh an nei rei hle. Keipawh ka hun awl zawng zawng an inah a hmang ti ila ka sawi sual lovang. 

Police lam lahin case hrang hrang an nei kuh ve ṭêl ṭûl bawk si a, chetlak a harsa si. Tuin nge Atea nunna chu la ta ang le? Ani kha a ruihsual chang chuan ṭawng chapo ve tak, insumkar lo ve thei tak a ni a, tu te emaw pawi a lo sawi a niang a ti ten ka ngaihtuah ve nasa. Tupawh nise tualthattu chu hrechhuak vat ila ka duh ber mai. Nunna hi a hlu a, nunna siama dintu kan ni lo bawk nen, mi nunna chhat tu chuan hremna hmachhawn ngei rawh se. Ka chhungte pawn Zonuni te ina ka tâp chawt chu min hrethiam khawp mai. An lainat bawk a, chaw eiah pawh kan sawm deuh reng. A chang chuan ka nei thut ang a, an inah hian ka awmpui dawn mawni te ka ti thut thut zel. A unaupa chunga thil thleng avang hian anni unau nunna pawh a derthawn ka ring tlat zel. 

Tin, thilmak deuh pakhat chu Ngawlveite Rûnah khuan rules & regulations felfai tak an nei a, khuta luh tawh chuan an course zawh hma chuan an chhuak thei lo tawp. Entirnan: an chhungte an boral paw'n security ten rawn guard thlapin ruang an rawn kil ve thei, chutiang ni lo inneih tih vel mai mai chu chhuanlam a tling lo. An inenkawlna a ṭha a, ei leh in pawh an dawng ṭha. Thlatin 4000 erawh an chawi ve a, an chhungten an kan pawhin eitur kensak phal a ni lo. An mamawh zuk leh hmuam leh lotion tih vel thlengin a thlawnin an dawng vek. A dinna a la rei lutuk lo naa, an inenkawlna a ṭhat êm avangin a lun tawh viau nghe nghe. Atea pawh Drugs addict a nih avangin thla 6 a awm tlin ngei ngei a ngai a, mahse, kar khat lek a awm hnua an chhuahtir thei mai kha thilmak a ni tlat! Police lam pawn an hmuhhmaih bik lo a, an zuk zawtfiah leh thlap. "A taksa lamah harsatna a nei a, a û hriatpuina thlap lehkha a nei bawk a, kan lo phalsak a nih kha" tih chhanna an dawng. Zonuni'n engmah a hriatpui hauh si lo. Tin, taksa lamah harsatna an neih pawhin ICU -a dah luh ngai khawp emaw serious tak an nih loh chuan an centre-ah khuan an inenkawl vek tho. Centre dang angin tumah thiin an la chhuak ve lo reng bawk a, Doctor-in kar khatah vawikhat a tlawh ngei ngei bawk. Atea chuan eng natna nge a lo vei ang? Chhuah a duh luatah dâwt a sawi tih chu a lang reng mai a, mahse, a phênah hian tu emaw a kal ve zel niin a lang, chu chu mi thiltithei tak a nih a rinawm bawk. Ngawlveite Rûn hi Alpha Ministry te enkawl a ni. Atea a thih avanga hahdam sawt tur chu tu tak ni ang maw? Zonuni pawh an ko zing khawp mai, kei ngei pawh min ko. A û bialpa ka nih piahlamah khamizana thilthlengah khan tel vena ka nei a, kan insual ṭêp thute kha sawilan loh theih ni hek lo, min ringhlel em mawni tihtheih tur ten min han kawm a. Mahse, kan hmelhmaiah zâmna hmuh tur awm hek lo, min kaltir leh ta ringawt a. 

"Zosang, vanram a kai awm si lo va, hei mawlh hian ka rilru a tina" a melh ngai melh reng chungin a ti sep sep a. 

"Thih hnu piahlam te chu engmah kan hre hleinem, Pathian thu thu a nia" ka ti ngial a. Kei tak pawn vanram a kai beiseina ka nei lian vak lo. 

"Sualin a changin haw thin viau mah ila; a'n thih meuh chuan a mi den dan a dang khawp mai" a ti leh a. A dik a ni, ka hmelhriat nu pakhat pawn a tia lawm.."Kan pa zu ngawl han vei tak tak kha chu a sual thei si, kut min thlak loh leh bungrua a suasam a, thinthiin min muttir ngai si lo. Thi daih mai se han tih rum rum chang te a awm ṭhin. Mahse, tun hnuah chuan ka pawm thiam tawh, ka faten 'Pa' an tih ruala 'Eih' a lo la ti ve thei hram hram pawh hi a hlu ka ti..thihna zawng a tawp chiang êm mai.." a ti. Hei hian nunna hlutzia te, mihring kan la nih ve chhunga hlutna kan la neih ve zia te, sualin chhungte tibuaitu ni ṭhin mah ila, kan hmun ruak luahkhattu midang an awm theih tawh lohzia a tarlang chiang viauin ka hria. Atea pawh Zonuni te tan chuan an mipa neihchhun a ni tawh a, han sualin han rawlbo ṭhin mah se; sim hun a la nei ve mahna tia an beiseina avangin a la hlu hle tho. Tunah chuan lo haw tur a awm tawh si lo. 

Mama'n, "Atea thattu hi an zawnchhuah theih pawh ka ring lo" a ti hluk hluk a. 

"Keipawh" ka lo ti ve vat. 

"Tualthahna te hi a hluar tawh lutuk a, ruang chhar tih vel hi chu mak pawh kan ti tawh lo a nih ber hi a. Kan khawvel hi a rapthlak tawh êm mai" ka nu pawn a lo ti ve mawlh mawlh. 

Ka û bawk chuan intuha lo deuh hian, "Zonuni saw nei thut la" a rawn ti. 

"Nangpa lah hi i mawl chet chut ṭhin sia a. Lusun hlima pasal neihte tuin nge duh ang?" Ka nuin a lo ti vin hlak hlak. 

"An lusun lai te, an hlim loh laite hian nei daih ila, an hlim leh mai dawn alawm" ka û lah chuan a lo ti ve bawk. 

"Nangmah zawk hian nei teh, i bialnu chu tupawhnise,. Duatpuia pawn nu a mamawh" ka nu chuan a lo ti leh daih. 

"Ka nei hreh a, ka ngaizawng tho sia. " Ka û chuan a lo ti mual mual. "Chutiangte awmzia a awm em ni? Neih duh loh tur te an ngaizawng ngai em ni? Muanzual.." ka nu chuan a ti leh hrep. Ka u nen hian an inmil lo ka ti dawn nge an thu a inbat fuh lo ve ziah. 

"Neih tlaka siam ka tum mêk reng alawm le..mi vin vak vak zel suh. " Ka û pawn pawr lek lek hian a ti ve a. Ka nui ringawt. A bialnu hi a la zêp ṭâng ṭang chu a ni sia, siamthat ngai tak a nei a ni phawt ang a. Ani pui roh hian a tisual leh ang tih a hlauhawm khawp mai. 

Inrinni a ni bawk a, chawhma chauh kan kal a. Intihthawven nan Zonuni chu Alexander's Garden-ah ka kalpui a. A harhvang lo lutuk hi chawh harh a ngai tawh. 

"Zosang, Atea thih zana min lo call kha i la hria em?" A ti a. 

"Hria e, Atea thih dawn vang a niang min mawlhtu kha a awm tlat a, a mak ka la ti reng" ka lo ti vat a. 

"Keipawh maw a thih hun an sawi bawr velah khan ka harh thut a, ka taksa pangkhing hi a ze ka ti dawn nge, ka che thei miah lo asin. Phir kan nih vang a niang" a ti mawlh mawlh a, a sawi vawikhatna a ni bawk a, mak ka lo ti ve hle. 

"A thattu hian keipawh min thah a duh tlatin ka hria" a la ti ta deuh deuh. 

"Chutiang ngaihtuah suh" tiin ka kuah a. 

"Tak tak alawm. Ka rindan phei chuan ka nu emaw ka pa emaw a nih ka ring.." a tih chuan makti fê hian ka melh a, "Thu awmze nei lo sawi suh, Pari.." ka ti hluk. Ka lungawi loh hian Pari tiin ka ko ṭhin. 

Hmel danglam chuang lo hian, "Nu leh pate duh loh, huan enkawltu te hnena an pek kan nia. Kan la dam tih an hriat avangin kan zawnchhuah an hlau a, min dahbo an duh a niang. Chu chu ka rindan a ni." A ti sak sak a. Inringtawk taka a sawi a ni bawk si. Mahse, ngaihtuah chian chuan thil âwm lo a ni hran miah lo. 

"I nu leh pate zawnchhuah hna chu kan thawk leh mai dawn em ni?" Ka ti a. 

"Tel ve suh. Ka ring lo che ni loin i nunna a tan i tel ve loh a ṭha zawk" a ti hmak nia! 

"Pari..Parvulchûk.." ka ti nghek a. Ka biangah a rawn fawp zauh, "Tun chiah ka thu awih rawh. " A ti sep. 

"Aih, keiman ka zawnchhuahsak ang che. I bialpa ka nia, ka mawhphurhna a ni" ka lo ti khauh ve fun a. 

A phone a rawn rik avangin a sawi tur pawh a ṭhulh leh, Martina a lo ni! Min melh ralh a, "Ka'n be lawk" tih leh biak a rual nghal. 

"Aw..buai lo ve. Sawi rawh.." a ti mawlh mawlh a. A phone chu laksakin speaker ka on hmiah,. Engmah chu a sawi bik lo. 

Martina chuan, "I ṭha zel em tih ka hre duh a, lusun chu a hrehawm sia" a rawn ti duam duam a. "Ka tha" Zonuni'n a ti sap a. 

"Lo len pawh ka duh ve reng, mahse, min la huat ka ring sia. Bakah i bialpa khan min thik bawk si" a rawn ti leh a. 

Zonuni'n thawk la halhin, "Thu pawimawh sawi tur i neih loh chuan ka dah dawn a nia" a ti chang rât a. 

"Dah suh, khawngaihin..Atea thattu chu ka hre lo naa, a thih hma khan vawikhat chu kan inhmu a..tah chuan "Min hringtu ka pa ka hre tawh asin. Mahse, ani chuan min duh lo va, min pawm lo. Chuvangin ruih chhum hmawkna tur ka mamawh, pawisa min puktir hram teh" a tia. Police bulah khan chhungkaw thil a nih avangin ka sawi duh lo a nih kha. Pi Vani leh Pu Hruaia te kha in nu leh pa dik tak an lo ni lo a ni maw?" A rawn ti ta zawt zawt a. Zonuni hmel a danglam nghal vek, keipawh ka ni ve tho. 

"Maw?! Thudik a ni em? Martin" a ti sek sek a. 

"Ni chiang e mawle. A sarhu laia rawn sawi kha ka hreh deuh a, pawisa pawh min dil lui tlat sia, 500 ka pe. Mahse, a hnuah ka hmu zui tawh lo.." a rawn ti a. 

"Ka pa chu tu nge? Mawh? " Zonuni chu helhhawlh kan tih ang hian a awm. 

"Ka hre bik lo, a hming a sawi duh lo. Keipawn ka zawt nasa. 'Ka û ka hrilh phawt dawn' a ti tlat a. Khamizan khan a rawn haw turah ka ngai a" a rawn ti leh a, a thutak viau bawk. 

"A va mak ve le..ka rindan leh ngaihdan a dik a nih chu. Atea chu ka pa ngeiin a that a ni.." Zonuni'n a tih chuan, "Eng a?! Engvangin maw?"a ngaihna hre lo fê hian Martina chuan a rawn ti. 

"A chanchin eng emaw tal a sawi lo maw? Pakhat chauh tal pawh" Zonuni chuan a zawhna pawh chhang lo chuan a ti leh a. 

"In rin loh deuh a niang, min pawm duh lo bawk a, keipawn ka pawm bik lo. Khatiang mi hurherh fa nih kha ka duh lo" tih thu chu a sawi a..a nihna vel a sawi lo. Kei lah ka damlo kanpui turin min lo call sek bawk nen, pawisa pein ka kalsan daih a.." Martina chuan a rawn ti zung zung a. 

"Aw le, ka lawm e. Ka la rawn be leh ang che" Zonuni chuan a ti a. A hmet hlum nghal. Reitawk fang kan ngawi dun vang vang a. A tawpa tawpah, "Mi hurherh fa maw ka lo nih a?" A ti chuai raih. 

"Khatin ngaihtuah suh, Atea thinrim inhrosakna mai mai a niang. Martina pawh khan dâwt a sawi thei tho" ka ti a. 

"Dawt ni ta se, engvangin nge min rawn hrilh kher ang?" A ti khauh a. A dik angreng bawk si, ka hrethiam tawh lo. Amah chuan hawn a rawt a, a mood a chhiat êm avangin amaha awm a duh a nih ka ring. Hun thawl ka pek a ngai a ni. Ka thlah a, an inah pawh ka peng lo. "Ṭha vat rawh aw" ka ti a, bu nghatin, "Ka tum ang..min ngaihtuah suh" a ti sap a. Kei tak pawh ka ipik takzet, mi zawng zawng bula sawi chhuah chi a ni si lo. Opa leh Asanga te lah kawppui an nei tawh a, mimal nun buaina va thlen sek kha nuam ka ti si lo. Zanah pawh leng loin roomah ka tawm daih. Sateii'n inleng a nei ve bawk nen. Ka u pawh a lengchhuak leh tawh. Zonuni chuan min rawn be rih lo bawk a, va biak buai sek ka duh lo. Ka phak tawkin thil tamtak ka ngaihtuah ve a, ka fing lo ve ropui si. Dar 8 velah ka ning lutuk chu ka inkhalh chhuak ta ngawt mai. Kalna tur ka hre leh bawk si lo, Ka tlan kual vak vak ringawt. Street food an zawrhna piahah ka ding a, ka rilṭam em em pawh a ni lo, tihtur a vâng êm a ni. Lei tur chuan kein ka phei a, ka rin loh deuhin ka û ka hmu. Hmeichhia a kalpui a, hmeichhe lian lo tak, ngo zet mai leh hmui sen hlar mai a ni a. A hmel chu a ṭha reng, mahse, an insan hleih mah mah a, ka nuih a za deuh. Min hmu ve lo bawk a, a lai leh ṭût ang tih ka hlauh avangin ka va be bik lo. Hmeichhia chuan a banah a kai deuh ngei a, ka û mood pawh a ṭhat hmel hliah hliah. Saw nu saw a sawi ve ziah chu a nih hmel. A ṭha vek e. Eitur chu ka pack tir a, ka bike pana ka phei laiin call ka dawng a, Zonuni a lo ni. Ka la ta vat a, "Zo, i mu tawh mi?" Zangkhai takin a rawn ti a. 

"Mu lo ve, ka chhuak lawk a, ka haw dawn mek, nang?" Ka ti a. 

"Mu têp, tu nge i chhuahpui a?" Rinhlelh hmel angreng tak hian a rawn ti a. 

"Keimahin" ka ti ringawt. 

"Nih chu, haw phawt rawh" tiin a dah daih. Min lo be hrim hrim chu a lawmawmah ngai ang. A ṭha ve zel ang chu. In ka thleng a, Sateii thingpui ka lumtir a..a ṭhianpa chuan, "Ehe! Ruang an chhar leh tawh" a rawn ti hlawl mai. 

Sateii chuan phâwk zetin, "Tu ruang" a lo ti vat a. 

"Lawk aw..ka'n chhiar ang e.Nichin mai dar 9:45 bawr vel khan Zonuam guest house-ah mipa ruang hmuh a ni a. He pa hi hrechiangte sawi danin, Martin Lalnunkima, Chawlhhmun niin an sawi. A ruang an hmuhna hmun hi ama room hman laiah a ni a, vihhlum niin a lang" tiin a chhiar lûng lûng a. Ka ding mar awt awt ngei mai. Martina maw?! Chawlhmun a awm a nih chuan amah ngei kha a ni lo'ng maw? Nge Martina dang an awm ve zawk? Zonuni ka call nghal. 

"Martina ruang an chhar kha i hre tawh em?" Ka ti nghek a, Sateii te chuan makti zetin min melh hû mai. 

Zonuni pawh a ṭhâwng ve hle a niang, "Hre lo, khawiah,?" A rawn ti chul a. Kan han inhrilhfiah a, "Amah ngei a nih chu! A mizo hming Lalnunkima alawm. A va mak ve. Zo" a rawn ti khur dat a. 

"Thil hi a dik dawn lo tawp mai" ka ti nghut. Ka awm a nuam lo zo ta vek mai. Vawiinah khatiang khawp khan Zonuni leh Martina te chu an inbia a, tunah a thi ve leh a maw? Thah ni ngeiin a lang lehnghal. Thil pawh ei ta lo chuan Zonuni te inah ka tlan phei leh nghal, mak tak maiin ka hlauthawng tlat a nih chu! Ka va thlen chuan ani meuh pawh a chiâi ve hle, Biteii erawh a mu tawh a. Sawi tur em em hre si lo hian kan kuh ṭûn ni maiin ka hria, "A mak tiraw?" Kan ti rual ṭhawt a. 

"Engtin nge a nih theih le ka ti. Atea thihna nen a inzawm ang em?" A ti leh vang vang a. A zawhna chu ka chhan theih pawh a ni hran lo. "Ka hre lo, tu emaw pawi a sawi pawh a ni thei" ka ti ringawt. 

"Vawiina min lo biak vangte kha a ni thei ang em? Ngawi teh, Zosang, Martina hian ka pa a hria ang a, chu chu ka pa hian min hrilh hlauin a dahbo a ni thei ang em?" A ti zung zung a, a rilru chak lutuk hi mak ka ti deuh ṭhin. Hmeichhia a nih vang a niang. Kan ngawi dun vang vang a, sawi tur a vâng êm a ni. Zawhnain kan khat a, chhanna min pe theitu chu tu nge tih kan hre chuang lo. Dar 11 a ri dawn ta hial a, "Ka va haw phawt ang e, naktuk lamah thil awmzia kan hrechiang maithei asin" tiin ka ding a, min thlakhlelhna ka hmu thei. Riah ve êm chu amah ka venthawn avangin ka hreh ve bawk si, "Thlamuang deuhin awm rawh, kawngka kalh ṭha la" tiin ka chah a. Kan inmangṭha ta phawt. Numami te kawtah Valtea leng lo haw nen kan intawk a, "Kan va haw rual ve" a ti zauh. Nui chungin ,"Nia mawle" ka ti ve mai a. Ani hian Zonuni a ngaihven ta lo a, ka tan chuan a lawmawm viau. An inhnaih tawh si a, a rîkrâp ang tih a hlauhawm tlat. Ka muhil thei thlawt lo va, thil kal dan hi mak ka ti êm a ni. Zonuni thlirdan pawh kha a âwm ka ti hliah hliah..

Phak chuapin ka tho a, ka nute pawn ruang chhar chu an lo hre tawh. Zonuni bialpa hlui tih erawh ka sawi duh lem lo, a hmelhriat a nih thu chauh ka sawi. Inkhawm pawh ka phur lo ngei mai. Zonuni pawh a rawn inkhawm ta lo, a tlaivar thak avangin a tho peih ngang lo a niawm e. Inkhawm banah ka peng a, a lo tho ve tawh. Martina chungchang post tam tak te chu kan chhiar dun a. Zonuam guest house-ah khan a bialnu nena riakdun tur anga insawiin a bialnu a lo nghak a, mahse, a rawn thlen hmain tikhan a thi ta a nih hmel. Mikhual pahnih thleng an awm ve a, anni pawh koh an ni ngei ang le. Thingpui kan in laiin Police an rawn lang thut mai. Mahse, chutin kan hamhaih chhe lo, "Station lama min zui a ngai tlat mai. In pahnih khan min lo zui lawk ta che u, thu zawhfiah lawk che u kan duh a" an ti a. Îhe loin Zonuni pawh a va insiam a, keipawh inthlak tawh lem loin ka kal ve nghal. Kan va thlen chuan Case IO chuan Zonuni zawk chu kawm hmasain an hun kal tawhte kha an sawi dun a. "A tina viau che a, a phatsan dan che a zahthlak bawk nen. Rei tawh viau mah se; i thinlung a la dam thei lo va, tichuan, nizanah khan i tana hnawksak em em i unaupa i thahtir ang khan i thahtir ve tihna a ni thei ang em?" A tih chuan Zonuni a meng kâwk mai. Keipawh ka phâwk deuh. Zonuni chuan, "Chutiang chuan ti duh tak tak ila keimah ngeiin ka that ang, midang tihtir lovin. " A ti dam thlap a. A thinrim hle tih erawh a mitmeng leh a sen ṭâwn ṭâwn danah a lang. A insûm thei lehpek hle mai. IO pawh chu a nui ta suk a, "Atea thattu pawh kan la chhui zel a nia. Martina thattu nen hian mi thuhmun an nih erawh a rinawm chiah loh.." a ti a. Kei pawh Martina nen kan hmu tawh em tih te min zawt ve a. Thudik takin ka chhang ve zel. Tel vena kan nei lo chiang bawk a, min kaltir ta thuai mai. Rilru a ngui a, tihtheih nei mang si lovin kan hah ve hle ringawt. A tupawh lo nise, chhuichhuak vat vat teh se. 

Martina thih hnu aṭang hian ka ngaihbel nge phei chu ka hre lo va, Zonuni chu a danglam tlatin ka hria. A lo tuar ru viau em mawni te ka tia, lo tuar ve deuh mah se; a awm ve tho. Mahse, chutia lusun tuar ang chuan a awm vak chuang lo. Min thlahlel lo sâwt riauin ka hre ve tawp, ka sawithiam lo a ni ber mai. Police te thil chhui dan kan hre ve vek lo naa, Martina bialnu pawh an kawm tawh a. Inhmuh chu an lo tum ngei a niawm e. A thlen hmain a lo thi fel der tawh tihna a nih chu. Martina chuan hmelma a neih âwm hriat a ni lo va, a chanchin ka han hre thui ve deuh a, Zonuni a phatsanna nu nen khan innei zuiin a hnathawhna hmun Keifangah an han khawsa ren râwn a. Mahse, zu a in chhoh nasat tak êm avangin an nu nen chuan fa pakhat nei hmanin an inṭhen zui leh ta mai a. Ngawlveite rûnah khan dah a ni ve nghe nghe, tichuan rawn ṭha chhuakin tuna a bialnu nen hian an inzui ve leh a, a bialnu chhungte lam hian an duh vak lo a niawm e. Chuvangin hotel velah te inhmu ṭhinin a riahte pawh an riakdun hial ṭhin. Zui erawh an la inzui rei lem lo. A bialnu chhungte lam thiltihte a ni thei ang em tih zawhna pawh a awm thei ang chu. Martina thih aṭangin kar khat a liam tawh a. Zonuni nen pawh kan la inzui ve zel, sawi tawh ang khan amahah eng emaw maw tak a thleng nge ni inla hrang riau ang hian ka hmu a, mahse, ka len loh hlek chuan min lo call zel tho si. Patea Falkawn ami zawk te fapa Ruatkima zu in nasa lutuk an mangang a, tun hnai ti ila thla hnih liamta vel aṭang khan a bialnu nen an inṭhen a laknat luatah zu-ah a ṭuan a, a in tluk tluk mai. Patea te pawh an mangang khawp mai a, mi rum ve tak a ni bawk a. Zan khat Ruata zu in chahthlak laiin min lo bia a, "Ngawlveitê rûnah Tetea nen zuk dah lawk rawh u" a rawn ti hmiah. Tetea chu Ruata nau a ni. Ka lo nghak ta a, min rawn lam phei a. Ngawlveite Rûn lam kan pan ta. Tetea pawn, "A ruih dan hi a ngaihna a awm lo ve bawk a ni, a mu reng a, engmah a ti peih si lo, a harh rual rualin a in leh nghal zel a. U Mamuani vang mai maia hetianga awm. A hmelchhiat chhiat nen" a ti mawlh mawlh. Mamuani hi an veng ami tho a nia, Ruata aiin a la upa zui. Engvanga inṭhen nge an nih pawh kan hre lo. An inzui rei ve tawh êm a, a tuar viau pawh chu ka hrethiam tho mai. Rûn chu kan thleng a, Patea'n a lo be lâwk tawh bawk a, harsatna kan nei lem lo. Hnathawkte an fel thar thar hle. Ruata pawh kan han bawihsawm takah chuan a rawn harh ve a, a phun nuah nuah mai. A suffer huna a buai lutuk loh nan a half kan dahsak a, hei hi heta thawkte pawn an hre vek, vawi leh khatah nghei thut a har vangin hetiang hian an ti ṭhin. A khumah kan muttir a, "Ka awm peih lo asin. Ka duh hun hunah ka nghei thei" a ti bul bul mai. 

"Thla 3 chhung lek alawm..i rawn hmelṭha haw viau ang. " Ka ti a. 

"Ka pa hi chu aw..min râwn ve eih tur a nia" a ti leh hmuk hmuk a. A lawm lo tih a hriat viau. Mahse, a tana ṭha tur zawk a ni tlat. Kan haw tur gate-a kan din khawmuan lai chuan car a rawn tlan lut a, thawktu te chu an insingsa deuh mawlh mawlh bawk. "A va pawimawh hmel ve le" Tetea pawn a ti nghe nghe. Car aṭang chuan Pu Saiṭhuama a rawn chhuak hlawl mai. Zah takin an lo dawngsawng a, eng emaw tak a donate leh dawn a nih ka ring. A hausakna hi a hmang thiam ngawt mai. Gate vengtu bulah chuan, "Thil eng emaw tak in dawng leh dawn a ni maw?" Ka ti thuphung a. 

"Amah hi a neitupa a nia, chuvang zawk alawm" a tih chuan makti deuhin ka melh hû ringawt. Hei pawh hi a ta tho maw?! Mimal din niin ka hre si lo va,. Engkimah a lo inrawlh zel a nih dawn hi. Keini pawh kan hawng ta a. 

Zonuni ka va tlawh leh hram. Atea thawmhnaw vel a lo thlep fel a, a ngui hle. Ngawlveite runah kan kal tih ka hrilh sa a, min lo zawt ve thuphung a. Tah chuan, "Pu Saiṭhuama ta bawk alawm lo ni le.." ka ti a. Ani pawn mak a tih hmel viau mai. "Pa hausa tak a nia, thil ṭha tih nan a sum leh pai a hmang a, a lawmawm.."a ti a. 

"Mahse, ka ti mai mai a. Ṭhenkhat hian hetiang taka a hausa hi a sumdawnna ringawt a ni lovang an ti tlat. Kum 2 liam ta aṭang khan a rawn hausa zual sauh a.." ka ti a. 

"A ngah ngah hian an duh belh a..tiraw?" A ti mai a. 

"Biteii hi a bialpa nen khan an ni tawh lo mi? A reh riau" ka ti leh daih. "A niang, a rilru pawh a na vak lo a nih hmel..a la thawveng tho" a ti a, kan nui dun. 

Hun a kal ve zel a, ka û pawh a bialnu nen ka hmuh dun thu ka hrilh a, a khi suk ringawt. "A chhiat loh kha..a tê deuh tih mai loh chu" ka ti a, "Tê mah se, a rilru a lian" a ti duh lek. 

"Tu nge a hming ni reng reng?" Ka ti ve zel a. "A hming a ṭhing sia, nakinah" a ti tlat! A mak ṭhin teh e. Engpawhnise, ngaihzawng a nei leh thei chu a lawmawm lamah ngai ang. 

Baby'n nau a pai lawm nan chaw eiah min sawm a, Zonuni pawh a lo tel ve dawn. Opa te nupa nen, Zuali leh a bialpa te nen, kan inhmukhawm ta ṭhup mai. Zuali mitmenga thîkna la lang thei chu mak ka ti angreng zawk. Bialpa a nei tawh reng sia. Zonuni pawh a titi ve siam siam a, Teremi nen an lo inkawmngeih sa bawk a, a mikhual lutuk lo. Baby'n a û Lawmi a lo sawm ve bawk a,. Lawmi a rawn thlen aṭang chuan Zuali nen Baby nen an pathum chuan an phun sur sur hlawm a. Asanga hoin Zonuni te chuan rawng an bawl thung. Teremi leh Zonuni chuan salad tur an chan mêk a, Asanga chuan, "Baby, bai tur hi lo chan ve lawk teh u, duh aiin kan tlai dawn tlat" a ti lûng lûng a. 

Baby chuan ner sak chungin, "Mi phût hi i tina ve sia maw..kha Zonuni te an awm kha" a ti a. Khatiangah te chuan Lawmi leh Zuali te pawn "Kan lo ti ang" an tih ve ka ring a nia. Engahmah an ngai lo. 

"Zuali, lo chan lawk rawh" Asanga chuan a ti ve leh hram a. "I ninawm, kan la titi tui" Zuali'n a ti hlak. 

Keini Opa nen a veilam ngaihtuah dan tur kan lo sawi ru ve laklawh si. Ṭhiannu te hriat loha lem sek dan kan zawng a nih ber chu. Kan ti khât tawh bawk a, a châkawm ve tlat. Eirawng an bâwl zo thawkhat a, khua a thim tawh. Zuali chuan, "Zosanglian, engtik nge inneih in tum?" A ti ham ham a. 

"Innei ve têp" ka ti ringawt. Zonuni erawh chuan a phone a khawih mêk thung. "Zonuni chu nu leh pa a nei tawh si lo va, palai tirh vel a buaithlak awm..amahin a lo dawnsawn a ngai dawn sia" tiin an pathum chuan an nui vak vak a. A ṭawng duhdan teh hrep chuan Zonuni thin a khei deuh a ni ngei ang, "A nuihzatthlak viau a ni maw?"a ti ta nghat a. Fiamthu thawh a inti maithei, a nuihzatthlak lohzia chu an pathum chiahin an nui! Zuali awki leh ṭawngkamah khan hmuhsitna a tel tlat a ni. Rilru kawi tak pû saa ngaithla kan ni lo, an han nui lui vak vak kher khan boruak a thlak danglam tlat a tin ni. 

"Nuihzatthlak loh mi? Ka sawi dik viau bawk sia..a buaithlak êm dawn alawm. In rilru te lah hi a zîm lutuk a" Zuali chuan a ti ta zêk a! 

"Lo buai ve vak lo la a ṭha a ni mai. " Zonuni'n a ti let ve sak. "Ka duh leh ka buai ang a, i thu lo ê..Zosanga nen in in hriat hma fê khan kan inhre tawh tih lo hre ve mai mai rawh" Zuali'n a ti leh hlang hlang a, a va chauhthubarawh e aw. 

"In inngaizawng leh chuang miah lo tiraw?" Ngeiawm zeta nuiin Zonuni'n a lo ti ve khauh. Opa nen kan lo nui suk mai. Asanga a inrawlh ta a, an inhnial zui ta lo hlauh. Zuali'n min ngaihzawn ṭhinzia hretu an ni hlawm sia, Zuali pawn engmah a sawi ngam tawh lo. Chaw ei hmain Asanga te room-ah kan inluhchhawk ta sek mai. Baby chuan a hrethiam a, Teremi te chu an inno bawk a, bakah min lo ngaihven lem lo nen, an hrethiamin ka ring lo. Lawmi leh Zuali te pawn an va lem ve zuai a. Zuali bialpa pawh mipa na nâ na chu kan inkawmho bawrh bawrh mai. Chaw pawh kan ei ta a, Uisa, vawksa leh sangha bakah bai tui tak nen,.ka ei hnem khawp mai Zonuni erawh chuan sangha bak a ei lo. Kan han eikham a, Baby te pathum bawk chu an ṭhu leh ta hmak. Zonuni leh Teremi ten an sengfel a,. Thleng sil tur chu an dah a. Hmun an phiah zawhah an rawn ṭhu ve ta hmak a. Dar 8 a ri lek lek tawh bawk nen, "Kan phei tawh mai dawn mi?" Zonuni chuan a ti sap a. Teremi te pawh hawng turin an inpuahchah ve mêk. Lawmi chuan, "Mi ina chaw ka ei hi chuan thleng sil hi ka tihturah ka dah tawp zel, ka ning thei a nia aw" hrilh bik pawh nei lo hian a lo ti hlang hlang a. Tuman kan ngaihven duh der si lo, Opa pawn Baby te awmdan chu a ngei ve nge an nu bulah, "Kal ila, chu! Thleng sil pawh a ngaih tawh loh chu, Lawmi'n a sil leh thei dawn a.." a ti mual mual a. Keini pawh dingin, "Asang, ṭhut khawmuan chu duh viau mah ila, kan tlai tawh angreng sia, Hei zonuni hian a nau a ngaihtuah ve bawk nen..kan phei ang" ka ti a. 

"In rawn ei thei a, a lawmawm lutuk..a nih u le.." Asanga pawn a ti ve a. Kan chhuahsan ta. Teremi leh Zonuni te an rêl zui maithei a ni Baby te khan. A ho em mai. 

"A tlai laklawh sia, ka rawn leng tawh lo mai ang. Bakah ka puar lutuk a, a hrehawm" ka tih chuan, "Zu leh chaw puara puar chuan a hrehawm ang chu" a ti ta fak mai. A lo hre ru kur a nih hmel. 

"Ka in lo e a" ka ti ve ngial a. 

"Khatiang mitmeng phen deuh khan i meng ngai lo"a tih chuan ka nui hawk hawk. Mitmeng phen han tih chu! "Engtin nge a inphen? Ka mitmeng chu.." ka ti a, ka la khi vur vur mai.

"I meng phâwt a, a inphen ka ti mai. Chhe sêng sûng lutuk" a ti zêk a. 

"Ka in lo tak tak" ka ti leh a, "Tun ṭum chu chaw eikhawm te a nia, ka hrethiam ang che. Next awm tawh suh se" a ti khauh leh fang tawh. Ka sim ang ka ti duh bik si lo lai hi a buaithlak. Ka la ui a ni ber ang chu. Ka sawi ang khan ka thlah a, ka leng zui ta lo. Ka nî a lo leng a, an mûk riau hlawma ka hriat avangin, "Lusun in va ang ve" ka ti puat a. Ka la rui ve deuh bawk nen. Ka ngaih a sam hle. 

"Hei Kan Rinliani'n vai pasala neih a tum a nih âwm chu..a nute a rawn hrilh hre ve a nih kha" ka nuin a lo ti ta a. 

"A mak hran loh chu" ka lo ti chu min melh rum ngang mai. 

"Hnamdang êm nei tur chuan kan phal hleinem. A pa pawh a rilru a hah khawp mai" ka nî pawn a lo ti ve a. Sawi ve vak tur hre hek lo i, ka roomah ka luhsan ta daih a. Ka inphih fai a, ka mu daih. 

A tuk chaw ei laiin ka û-in, "I rim mai mai chu'h! Inbual ang che" a ti nghut a. A ṭhing rim ka nam pawh ka ring lo a nia,. Ka nu a rap nghal char char..ka ngawih reng avangin hauh reng ka har si, chaw eikhamah a duhtawk ve ta hram. Ka û vang vek. Ani lah a ngawi zui daih bawk si. Vawiin chu hnathawk te kan meeting a, kan department chan ṭheuha kan problem kan sawi a, Zorema khan a kaihruai, kan han sawi liam liam a, kei chuan problem ka nei ve lem lo. Zorema pawn hmalakna thar tur te chu a chhinchhiah zung zung a. Tin a tawpah, "He Home neitu Pu Saiṭhuama hnena ngenna kan siam angin kan hlawh pawh tihsan a ni dawn a, a lawmawm khawp mai" a ti a. Kut kan beng dar dar hlawm. A lawmawm duh em asin. Zonuni hmel hmuh pawh a nuam hle. 

Nidang aia kan ban hma avangin Police stationah kan kal zuai a, Atea chungchangah hmuhchhuah thar te an nei tawh em tih kan va zawt a ni. Case IO pawh a lo fel viau, "Hei kan chhui thui zel a, hmuh chhuah a mual mual pawh kan nei tawh e. Lawkin..hei he lehkha hi en u la, hei hi Ngawlveite rûn- atanga i nau chhuah dilna kha a ni. Hei hi i signature a ni reng em? " Tiin lehkha phek hlai vak lo hi a rawn pharh a, Zonuni chuan a en vang vang a, "Aih, mahse, ka signature chu a ang khawp mai" a ti ta a.

"Umm, tu emaw i signature hrechiang tak a nih a rinawm. Atea bawk kha a ni thei tho bawk. Ngaihdan i nei em?" IO chuan a ti a. 

A ngawih dat hnuah, "Atea kha chu a ni theiin ka ring lo. A ngaihven lo hrim hrim, ka kutziak pawh a chhiar tawh ang em tih vel tur a ni. Ka signature hrechiang tur chu mi pakhat a awm, a thi tawh. Martina kha a ni" a ti ta mawlh mawlh a. Mak ka lo ti ve hle. "Engtin nge i signature a hrechiang tih i hriat?" Police pawh chuan a lo ti vat a. 

"Kan inzui lai khan ka ac-ah ka pa hian pawisa a dah vek avangin lakchhuah a ngaih chang khan amah kha a chhuak nitin bawk nen kan thawn mai zel a. Ka awm loh chang pawn keimah angin signature a lo pe mai zel a, bank-a thawk te pawn keima signature emaw an ti ve mai zel. Chuvangin ani khan a hrechiang ber" a ti ta a. Thil chu a mak dawn ta riau mai le. 

IO pawh a ngawi ta vung vung a. Zonuni bawk chuan, "Chuan Sir, mak ka la ti reng, Ngawlveite run atanga Atea a chhuak thei kha, keiman lo dilsak tak tak pawh ni ila thihna leh natna serious tâwp te a nih loh chuan an chhuahtir ngai si lo. Kha thil pawh kha chhuizui chi a ni lo maw!" A ti leh a. IO a bu nghut nghut mai. 

"Khulaia thawkte khu ngun taka kawm leh an ngai a nih hmel. Tichuan, Martina chuan i nau chhuah theih nan a lo pui angah ngai ta ila,. Engvangin nge a chhuah chu a duh viau ang le? I nau a nih vang nge niang a..eng emaw tak ruahmanna a nei zawk ni ang..amah lah a thi ve leh bawk si. A inphaman chho riau in ti ve lo maw?" A ti charh charh a. 

"Tum nei ranin Atea kha lakchhuah a nih hmel a, eng emaw tak tihtir a duh pawh a ni thei. Sir, Amah Martina khan Atea kha a that te pawh a ni maithei asin. An vengah, an in aṭanga hla lo takah Atea ruang chhar a ni bawk sia" ka lo ti ve ngial a..

"Chulai tak chu a ni. Mahse,chhan nei lo chuan a that awm hauh si lo. " A ti khauh a. 

Zonuni chuan zawitê fiah zet si hian, "Min hringtu ka pain a thahtir a ni ngei ang." A lo ti sap a.