Parchuailovi 8

PARCHUAILOVI ..(8)

Ziaktu : Toni Râlte

A laka ka nêm vang êm êm pawh ni loin a damloh miau avangin leh buaina nasa zawk an tawh ka hlauh ve tho si avangin ka va phei ta a. Home-ah kan kal dun ta lo bawk nen, ka thinrim vangin ka sawm tlat lo va, engin nge a rawn kal ka hre lo. Tunhnaiah tar ho enkawl an ngai nasa zual riau a, Teteii pawn an buaizia leh an âwl hman loh thu a sawi reng bawk. Chuvangin Zonuni chu ni 5 zet ka hmu tawh lo, chhun chawlhah ka pindanah eitur ka laktir zel bawk nen, ani lahin rawn kal tang e a ti bik si lo va, inhnaih hle siin kan inhmu thei miah lo. Tun ṭuma ka thinrimna hi chu a âwm ka tih êm avang leh thurûk dang a la neih chêu avang khan ka lawm lo takzet a, hetia han hrem vang vang hi ka duh ve bawk a ni. Mipa kan nih angin hmeichhe laka tlawm chintawk neih a ṭha, hmeichhe ṭhenkhat hi chu an kawppuite ṭhat luatah an inluling a, an thuhnuaia min dah mai an tum fô, an thuhnuaia dah theih a mual mual an nei reng bawk a. Kei chuan chutiang a thlen ka duh loh vangin Zonuni chu ka pumpelh ta ṭhin a ni. 

An in ka thlen chuan ṭhutkhawmna pindanah Biteii chauh a lo ṭhu a. Phone a lo khawih melh melh. Min hmuh rualin a nui ver ver a, "I lo kal ka ring rêng a" a ti sep. 

"Khaw nge i û chu?" Ka lo ti thung. Nuihza insûm tih hriat zet hian, "Û, lo chhuak rawh le" a ti lang lang a. Ka lo en tawp ringawt. Pindan kawngka rawn inhawngin Zonunpari chu dam ṭha tih hriat zet hian a rawn chhuak ta mai a, Biteii nen innuih sakin, "Kan hlawhtling e" a la ti zui! Min tihderh tih ka hriat chuan thinrim nachâng pawh ka hre lo, â ka ti dun si, ka ngei tho bawk si chu ka tum bûr a. Ka ṭhu laklawh tawh bawk nen, ka bulah a rawn ṭhu ta chat a. Ka bianga rawn fawp zauhin, "I hming thar ka hria..Lalngaihawma" a ti sap. Ka la nui duh chuang lo. Biteii lah chuan pindanah phone a va be daih a. Min han prank vel chu ka lawm vak lo nain chutia ze danglam tak nena min dawngsawng chu nuam tih rukna ka nei tho bawk si. Amah bawk chuan, "Bêr bûr a che. Utûm.." a ti leh, ka thinrim a ring lo nge a hlau lo zawk ni. 

"Ṭhingi" ka ti hluk a. Za em emin a nui hawk hawk. A hmuh loh laiin ka ṭhen ve suk a , nêm anga lan kha ka la duh bau lo. Ka bengah a rawn pawt zauh a, "I lo kal dawn khan i nem vek tawh. Khatia inlak lung sakhat vak a ngai lo. Nui rawh le" a ti ham ham a. Hrechiang lo ila chu "A rui em mawni le" tih mai turin a zia chu a dang a ni. A thawveng halh bawk si. "Damlo dernu" ka ti leh hmuk a. 

"Biteii idea a nih kha..i lo inla rehin i biru thiam ngat ngat khawp mai" a ti a. 

"A chhan i hria" ka tih chuan, "Sawi dun i duh hleinem, sawi dun tur pawn ka hmuh phakah i awm duh bawk si lo va.." a ti niah niah a. 

"Ka lungawi lo hle a nia..Zonunpar" ka'n ti tha leh a. 

"Zosanglian, ka lungawi viau thung. " Tiin min rawn melh sawr sawr a. A hmelṭha lutuk chu ka en rei duh lo. Kan inbiak loh leh inhmuh loh chhunga ka thlakhlelhna te kha a hlawm hlawmin an rawn lêt ka ti mai. Mahse, ka insum rih tlat dawn. 

"Sawifiah ta si che" ka ti a. Ka vin lek lek a ni. 

Min rawn ṭhut hnaih sauh a, "Ih maw, a hmasa berah chuan i hriatpui loha thuruk ka lo neih avangin ka tihpalh. Chhungkaw thil a nih avangin nuam ka ti lo va, bakah ṭul hlei lovah ka tibuai vak ang che tih ka hlau bawk. Min ngaidam thei ang em sawi phawt teh" a ti ta mawlh mawlh a. A hunah hi chuan a tlawm hreh ṭhin si lo. Hei tak hi a duhawmna a ni. Ka ngaidam fel vek tawh. 

"Ka ngaidam a che. " Ka ti a. Ka aw erawh a la chang rût tho mai. 

"Ka lawm e.." tih pahin ka kut a rawn hum ta chat a. Ka lo ngaichâng reng thung. 

"Ka nu boral hma deuh khan Nu Remi te nen in kan singsa ru deuh a, chutah chuan ka pa lehkhabu hlui bakah a diary niawm takte ka hmuchhuak ta a ni. I bula ka sawite kha dâwt a awm lo, chutihrualin ka sawi kim vek lo zawk a ni e. Heti taka vanlaitla kan nih chhante pawh ka hre ta a,. Ka naute bulah erawh ka zêp a, nizanah khan ka sawichhuak ta chauh. Ka pa chuan a ziak kim ve viau, pa taima tak kha a ni ve reng reng a. Ka nu leh pate kha fahrah in aṭanga seilian chho, chuta intawnga innei zui ta an lo ni reng mai a! Chuvang a nia chhungkhat sawi tur reng reng kan neih loh ni. Ka pa chuan a ziah danin, "Kum 6 ka nihin kan retheih bakah ka patea ten min ngaihtheih loh avangin ka patea ngeiin fahrah inah min dah lut a. Ka pianhlimah ka nu a boral nghal avangin ka pain min enkawl a, mahse, kum 3 ka nihin ka pa pawh chu an lo vahnaah thingin a delhhlum ve leh ta si. Ka pa nu, ka piin kum 2 min enkawl a, min boralsan ve leh a, ka patea te nupa kut ka ni ta a. An khawsa thei bik lo va, Nuteii chuan min tiduhdah ṭhin hle bawk. Fa pahnih an nei ve bawk a, an tan ka hnawksak ta deuh a niang. Ka patea'n Aizawla min zinpui tur anga insawiin Fahrah inah min hnutchhiah ta zawk a ni. Heta ka luh hi chuan ka nupui hi kum 4 a ni a, ani chu a sentêt aṭanga awm, a nu leh pate pawh hre lo a ni thung." Tiin a ziak a. Tichuan, an puitlin hnuah inneiin Fahrah in an chhuahsan a, tiang khan thawh theih ang ang thawkin hun an hmang ve ta a ni. Lawk..tui ka in phawt ang" tiin Zonuni chu a tho va, tui a va in leh tê tê a. A thil sawi kha mak tihna em em ka nei lo, a bulah ka sawi duh lo zawk a, a nu a borala laina hrilh tur pawh hre lo va an awm aṭang khan rindan ka lo nei sa ve tawh a ni. Ka bulah bawk a rawn ṭhu leh a. 

"Engvangin nge putar ka hmuha ka kawm ṭhin tih chu ka'n sawi tawh ang e. Ka pa diary-kha kan unau pian ve hmaa a ziah a nih avangin keini kan lan hnua a ziah ka zawng nasa a, ka hmu zo lo. Ka nu khan ka pa a thih khan kan hmuh a hlau ang a, a phumtel daih a nih ka ring. Mahse, a hlui pawh nise ka pa diary chu ka chhiarchhuak ta vek a, vanneihthlak deuhin huana an inhlawhna leh an huan enkawlsak ṭhinte hming a lo chuang ta vâng a ni. Mi pathum huan an enkawl hman a, Pu Saiṭhuama, Pu Chunglura leh Pu Sailothanga te an nia. Pu Saiṭhuama leh Pu Chunglura te khi harsa takin ka kawm ve ve tawh a. Mahse, an hnen aṭangin eng thu mah ka hre thei lo,. A rei ve tawh bawk a, ka nu leh pate pawh an lo hrechang tawh lo lek lek a, Pu Sailothanga erawh a boral tawh sia, tihngaihna ka hre ta lo a ni.." a ti ta dap dap a. A nu leh pate diktak hriat chu a lo tum nasa tih a lang. 

"Hriatchhuah kher kha i duh lo emaw ka tia" ka ti khauh a. 

Tawitêin a nui a, "Tuin nge mahni hringtu diktak hriat duh lo ang? Ka nu kha vawitam ka ngen a, mahse, 'Tu fate nge in nih kan hre bik lo a ni. Hrilh kan ni tlat lo va" tih chhanna bak min pe ngai lo. Chuvang chuan keimah ngeiin beih ka tum ta a ni" a ti charh charh a. A rilru ka hrethiam viau. 

"Pu Saithuama hi kan Home neitu an tia, i hre ve tawh em?" Ka tih chuan, "Hria e, amah pawn a inzêp tawh loh kha. A din dawnin buaina tenau sawrkar lam aṭanga a tawh avangin a inthup an ti" a ti a. Kei ai chuan a hre tam zawk a nih hmel. 

"Pu Chunglura chu em ni? Cottage-a i hmuh kha?" Ka ti leh a. 

Bu nghatin, "Ni chiang e. Ka be pawp tawh a, thil pawimawh tak sawipui ka duh tih a hriat takah khan khalai hmuna inhmuh kha a rawt ta tlat a. Mak ka ti viau, mahse, a hnuah i rinhlelhna ang deuh khan a tar a tarin hmeichhe dang a lo kawp ve thin a nih hmel a, an nuin min rinhlelh a hlauh vangin hmundanga inhmuh a rawt a nih ka ring" a ti leh zung zung a. 

"Pu Saia pawh an inah i va hmu chuang hleinem" ka ti leh kher, dawhtheih loh hmel zet hian, "Hun a neih lohzia i hrethiam ang. Chuvangin an meeting hmain hun chêp tak karah kan inhmu ta hram a nih kha. Engmah ka la ang thei lo zui a" a ti nang nang a. A thurûk kilkhawr ber thlengin ka hre ta bawk a, ka rilru pawh a dam ta zân mai. Chutihrualin a nu leh pate zawnchhuah a duh luatah buaina a la tawk mai ang tih ka hlauhpui. Kan boruak tihziaawm nan, "Atea hi a leng em ni?" Ka ti ta daih a. 

"Aw..ti ila a ṭhianpa ṭhin Bena kha a damlo nasa a, a han kan ve a nih kha" a ti ve mai a. 

"Eng nge damdawi lamte a la nghei ve zel em?" Ka ti leh a. 

"Nghei chuan ka hria. 'Ka suffer hi chu a la reh hlen tak tak thei lo naa, tih tawh loh ka tum' a ti ve fan a. A chhuak tam lo bawk nen, zanin a chhuak tur pawh kan inchah ngun malh malh viau" a ti a, diktak chuan Drugs addict ho kher hi chu damdawi zûna uai a nat êm avang hian rinngam mai an har ve ṭhin. Kum 10 chuang nghei tawh te pawn an tih leh danah a mi fan dan a na hle a nih hmel, tihchhin loh hi a him ber mai. Talchhuah an duh a, Pathian tel loin an talchhuak thei lo ka ti lo, mahse, mihring ve mai an nih avangin a harsa viau ang. An lainatawm rualin a chang chuan ngeiawm chang an ngah bawk..mahse, Atea vang pawh ni loin addict tam zawkte hi misual inti tak, midang nun va sawisel tur pawha tling zo lo anga inhria an ni. He nun hi a duhawm hle thungin ka hria. Atea pawh Kan la hre zel ang chu. Dar 10 thleng ka leng a, hawn dawnah te chuan kan infâwp duhawm kher mai. Kan nghei rei dun tawh bawk a ni. 

A tuk aṭang chuan a ngaitêin kan inphur nitin leh ta a, chawhnua a hawn dawn hi chuan 2 wheeler biak lâwk a nei a, a rawn lam mai zel. Keiin ka thlah hman ṭhin si lo va. Chutiang chuan hun leh nite a ral ve zel a, Atea pawh a tum ang ngeiin a nghei chho a, vanneih asiamin an in chung chiah luahtu te fapa nen hian an inkawm rual vel bawk a, an inkawp ta chawt mai. Kohhranah te tel ve zelin ṭhalai lam lahin an lo dawngsawng ṭha em em bawk. Zonuni pawh hmuh theih khawpin a hlim a, Bawngkawna an awm lai ai ngawt chuan ani pawh a phak ang tawkin Kohhran leh khawtlangah a inhmang chho ve ta a. Mi hriat pawh a hlawh chho ve zel mai. Home aṭanga a hlawh hi chu a khawl ve zel a, a damlo enkawlnain an intungnung chho ve a ni. In chhung bungrua pawh instalment ten a la chho ve a, an in chhung pawh hmuh a nuam chho ta hle. Biteii pawh awm mai mai duh bik lovin a hnehsawh tho nen kuhva bawk a zuar chho leh ta a, dawra a pek bakah an inah a zuar ve bawk a, vaihlo chahin mei a zial pah bawk. Atea lah a unaunu ang maiin a taima a, ruihhlo a bansan hlim taksa pawh fit ṭhat lai a ni bawk nen, Ruata nen inhlawhna awm ang angah an inhlawh ve lâwp lâwp a, unau ṭangrual tak an nihna chu kei ngei pawn hmuhnawm ka tiin ka chhuang thin takzet. 

Kan inah pawh Sateii nen an inkawm avangin Zonuni pawh rawn kal zauh zauh chang a nei ve a, kan inpawh sâwt hle. Ka nu lah hian a changin innei vat turin mi nawr leh ṭhin. Zonuni bulah te a sawi thul, a hahthlak a nia. Tiang chuan Numami te in pawh thla thum dawn an luah ve ta a, keini pahnih inkarah ngau ngau chuan dodaltu kan la nei rih lo. A damlo enkawl pawh chu a fanu sual zet avang khan a bansan a, Home-a thawk ve tho male nurse-in a hna a chawlhsan tak avangin, Home-ah a hmaa a thawh ang nikhat tawp khan thawkin a hlawh pawh an san ta a, a lungawithlak ta viau e. Nun hi a tluang viau zel dawn emaw kan tih lai hian harsatna emaw buaina emaw ten min rawn nanchin hun a awm lo thei ṭhin lo va, Zonuni te nun pawh a vul chho viau dawn emaw tih laiin Atea chuan a nunhlui lamah a letsan leh ṭan ta tlat mai. Kum chanve dawn a lo thlah ve tawh, harsa taka a beih fat fatna chu awmze nei loah a chang leh ta. Engdang a ni lo, a ṭhianpa Bena inawhhlum vang a ni, a tuar na em em a, a chumi lusunna chuan thlemnaah hruailutin a hnar zo ta ngang lo va, vawikhatin vawihnih a hring tih ang deuhin a tirah chuan a rukin a ti a, mahse, a rei a, hriatchhuah loh theih lohin a awm ta a. Zonuni hlim hmel pawn chuai lam a pan leh ta. Atea hi dem chiam chi pawh a ni bik lo, Addict la ni ve chhin lo tan chuan an nun hi hriatthiam a harsa..inah a awm tlem tial tial a, Kohhran a thlahthlam chhoin a ṭhian kawmte pawh an dang chho leh ta. Hetih lai mek hian keini chhungkaw lam pawh eng ruai kan ang lo. Rinliani a rai a, a bialpa lah khan nei tang e a ti bawk si lo. An nu khan a chhuahsan daih a, mahse, Rinliani rai hma thla khat velah an inko leh ta si! Mipa min titlawm hle a ni. A bialpa hi Rinliani ai mahin ka thiam lo tawh zawk, hetiang taka hmeichhe pahnih hringnun a tichhia hi chunglamin a kut a lek ve hun a la awm ngei ang. Rinliani lah hmangaihna la na chi a ni si, a rai ta hial reng a. Pa Tlana ten tihluihnain an paihsak ta ngawt a! Rinliani nun pawh chu a hniam ta rawih rawih mai. Asanga te nupa ve thung kha chu khatia Baby a tlan a ko duh si lo kha koh lohin a haw ve ta tawp a, an lo pawm ve leh mai. Ṭhatte chu a han chhuah ve viau a, Asanga pawn rei tak a lo zui tawh a nih ve avangin hmangaihna la dai hek lo, an hlim chho ve ta viau a. Naute pawh an pai vat turah ngai ang. Nuteii te pawn in hrang chantir an tum rilru ṭan a, chhungkaw hlim zawk nan hetianga chetlak a ngaih chang hi a awm ve tur pawh a ni. 

Zonuni te kawngka bulah chuan ka ding reng a, Atea leh Zonuni te inhau thawm avangin ka lut hreh deuh tlat. Mipa e ti lo chuan ka ngaithla kur roh a, Zonuni chuan thinrim takin, "A ni em em tawh lo, rukru kher lo hian a ruih theih loh em ni? Inhlawh ve la, mite pawh an ruihna tur an thawkchhuak asin. Puan tihtham pawh ka neih tawh loh saw..kan retheihzia i hrereng,." A ti bawrh bawrh a. Atea'n a puan a lo ruksak leh tih ka hrethei. Ka bulah a zep ngai lo va, han tih vak ngaihna ka hre ṭhin si lo. Almira pawh a kar hawng thiam zel chu a ni si a. Atea chuan pawr fê hian, "Pawisa min pe duh hleinem, bike pawh ka awt ve em em a, min lei duh lo va, in la hre zel ang. " A ti zek a. A chang chuan hnek dawp chak chang ka nei thin. 

Pawisa an indil leh ngat ngat a, din rengin awmzia nei hek lo, ka lut ta a. Atea pawh a insûm ta deuh. Ka awm laia inhauh vak a duh loh vang a niang Zonuni pawn 200 a pe ta nge nge a. Hmana No.4 1000 man te kha tunah chuan 200 lek leka lei tur te a awm tawh a, hengte hi engvang tak ni ang maw? A rawn hluar chhoh tak avangin ti thar leh nghei tawh ti nawn an tam phah em em bawk si. Rûkruk, dawtsawi, thatchhiatna a kengtel lo thei si lo va, ruihhlo ngai kawl ve lo chhungkua chuan an hrethiam lovang. Zonuni te avang hian kei chuan a laimu zuk pawh pha lo mah ila, a hrehawm dan tur ka hrethiam deuh. 

Atea chhuah hnuah Biteii chuan, "Ka ning tawh e. Kei chu,. Û, hnawtchhuak mai rawh" a ti thlâwt mai. Hetia an dry vang vang hnua an han tih leh chiah hian a hma aiin an ti nasa zual zawk a, an tawrhhlelhawm thin reng a ni. Zonuni pawh chuan, "A pawi ngawt mai. A hahthlak a nih hi, hnawtchhuak ringawt ila khawiah nge a kal chuan ang" chauh hmel zet hian a ti a. Chaw a ei ṭhat loh bakah mut a hmu ṭha lo bawk nen, a cher ṭan riau tawh lehnghal. 

Biteii chu hla zir turin a kal a. Zonuni chuan min ngheng ar ar mai, "Home-ah dah mai rawh" ka ti a. Atea chungchang a ni ka sawi ni. 

"A duh teuh lo mai,. Sawi rik ngam pawh a ni lo" a ti bawk si. 

"Tiang chuan pasal nei ta la, Biteii a khawngaihthlak dawn lutuk" ka ti a. Kan pahnih chungchang pawh ngaihtuah tham a tling ṭan tlat tawh a ni. 

"Ka mawl hûih zel, engmah hi fim takin ka ngaihtuah thei ṭhin lo. Nang hi awm lo phei la chuan ka thi tawh maithei a ni" a ti ve hial a. 

"Kan ṭawngtaipui ve zel dawn nia, keiman ka lo titipui ve dawn nia" ka ti a, eng ka an chuan ka ring chuang lo naa, beih ve hrim hrim a ṭha. Kawngka an rawn kik avangin a ṭhu ṭha a, "Lo lut rawh " a ti lauh a. Kawngka chu rawn inhawngin ka la hmuh ngai loh mipa, keimah ang tiat vel hi a rawn lut a. Zonuni'n a hmu chiah chu a ṭhu khawng awt mai. Chupa chuan tîm hmel deuhin, "In dam a maw?" A ti a. A la ding reng. Zonuni chu harhchhuak thut niawm takin a phu uih a, "Lo thu rawh..eng nge i duh." A ti bah nak mai. Chupa chu tu tak ni ang maw?

A ṭhut hnuah chuan, "Eng duh lo ve, ka hmu chak che u a. Khaw nge i nu?" A hma aia ngampa deuh zawk hian a ti leh a. 

"A thi tawh. " Tih chauhin Zonuni'n a chhang. Mak ka ti tawh viau, chupa bawk chuan kei chu min rawn melh zauhin, "In pa em ni?" A ti nghut a. 

Zonuni chuan, "Aw, ka bialpa, ka pasal hual a nih hi" a ti mar at a. A aw pawh a khur lo. Za lo tih hriat zeta nuiin, "In inhmeh kha. " A ti hul hak a. 

Zonuni chu hmana a ze lungpui ka tih mai ang khan awm lehin a hmel pawh a rum sâwt hle, "Eng maw i duh a?" A ti nawn leh sak a. 

"Ka hmu châk che u ka tih kha..i nu boral chu a pawi hle mai. Ka lo hre ve lo va" a ti nuah nuah a. 

"I hriat ve a tulna a awm hleinem" a lo ti hmak. Ka dawhtheihnain a tlin ta lo, "Tu nge?" Ka ti ta a. 

"Martina, phatsantu" a ti hriam hraih a. Khai aw! He pa ngei hi a pasal hual, phatsantu chu a lo ni reng a! Khawvel a zim mang e, kan inhmu ve ta hlawl mai. Pangngai takin, "E! A ni maw? Zosanga ka nia" tiin Martina chu ka va melh a, ka nui bawk. Ani erawh chuan thikna hlira khat mitmenga min melhin, "I vannei hle mai" a ti ngat a. Ka chhang tawh lo. Zonuni zawkin, "Engtin nge kan awmna te i rawn hriat theih a?" Lawm lo awki zet hian a ti a. 

"Hmelhriat an awm ve zel mai" a lo ti duh lek. A la chhan dan velah chuan a tham lo riau hian ka hria a, mahse, ka ṭawng hmain, "Tikhan i hre ta bawk a. Haw tawh mai ta che. Rawn kal leh a ngai tawh lo vang. Hetah hian mamawh i ni lo" Zonuni chuan a ti chang ta fak fak mai. 

"Khai a! I la thinrim reng a ni maw? Thil kal tawh chu theihnghilh ila.." a la ti ngam nia! 

"Ṭhianpa, min hrethiam la, thu pawimawh tak kan sawi lai mek a nia. Min lo va chhuahsan rih phawt mai teh" ka ti ve ta nge nge a. Ngawi renga kan melh reng takah chuan nuam a ti ta lo nge, "Ka rawn kal leh ang" ti zauhin a chhuak ta hnu hnu a. 

Zonuni melhin, "I ṭha em?" Ka ti vat. A bu nghat a, "A hmel khan ka thinrimna a chawktho leh a, amaha feelings ka la neih vang a ni lo a nia" tiin a insawifiah a. A kir tawh dawn lo tih ka chian êm avangin ka buai peih lo. Mahse, a rawn tibuai zui ang tih erawh ka hlau ru deuh. Hlauh ang ngeiin Martina chu hnathawka kan chhuah hlan ten a lo va kal ṭhin niawm tak a ni. Biteii pawn a ngei thu a sawi a sawi mai. Zanah erawh a rawn lang tawh rih lo va, chutihrualin kan hnathawk bâng kan veng ṭhenawmah Atea leh Martina inzui kan hmu ta tlat mai. Atea hian a û bialpa hlui a ni tih a hre hman lo naa Martina hian engtin emaw a rilru hneh a tum ka ring deuh. Mahse, Zonuni rilru a lian bawk a, hlauhthawnna lutuk chu ka nei lo. 

Nikhat chu Home neitu Pu Saiṭhuama'n min rawn tlawh ve mial a! Amah hi pa nelawm leh nui huah huah chi a ni bawk a, a uap a na lem lo. Zonuni a hmuh chuan a mitmeng a danglam zawk mai, mahse, a inthup leh vat a. Tar hote tlawh kualin thawmhnaw a sem a, a tiṭha tak tak a ni. A hawn hnuah Zonuni nen thil kan ei dun a. "Hetah i thawk tih a hre lo mi? A hmuh che khan mak a ti riauin ka hria" ka ti a. 

"Hrilh e. A theihnghilh a niang" a ti puat a. 

"I nu leh pate zawnchhuah chu i bansan ta deuh em ni?" Ka ti leh a, khalam kha kan sawidun leh ngai tawh lo. A bansan a nih ka ring. "Pu Sailothanga hi a boral tawh sia, a chhungten engmah an hriat ka ring lo mawle..ka hrethiam tawh lo. " A ti a. 

A kut va vawnsakin, "I ṭobul chu engpawh nise, rilru tihhrehawm nan hmang suh. Nu leh pa duh loh leh enkawl peih loh anga i inngaih chuan i na mai mai. Harsatna lian tak an tawk ve pawh a ni thei" ka ti ve ngial a. Dik tak chuan a rilru tur ka hrethiam a, ka khawngaih ṭhin. Kan chhungkua min han hrechiang chho a, kan vua leh vângte, kan lo hûng ve bawk sia, hnual nan a hman ka hlau a ni. 

"Nia, a dik alawm. Hmu pawh ni ila ka danglam vak tawh chuangin ka ring lo, ka hriat an duh loh vangin ka nute pawn min hrilhchiang duh lo a niang. " A ti ve mai a. 

Teteii a rawn lang a, "Guys, thla thar ni 6-ah kan innei dawn" a rawn ti deuh tâwng. A nui var var bawk a, "Awii ka lawmpui che u.." Zonuni'n a lo ti vat. Keipawn ka lo chhunzawm a. Teteii chuan, "A hmanhmawh ve tawh sia, ka hnial thei ta bik lo a nih kha. Nangni pawh kum tawp lamah ti ve r'u aw. Ka faten in fate an vel palh ang" a ti vel ham ham a. Zonuni nen kan inmelh zawk ringawt. 

Atea a sual leh tawh si a, inneih sawi rik chi pawh a ni tawh rih lo. Biteii a lo awm ve bawk nen. Tlaiah kan haw lamin, "Nupui neih i châk tawh viau chuan midang zawng la, kei chu min vengthawng suh" a ti teh ngawt a. 

"Ka châk viau hran lo..midang eng atan nge ka tih ang?" Ka ti hmuk. 

"Hmabak hi kan nei pawn ka hre lo. Ka unaute ka thlahthlam thei si lo" a ti niah niah a. 

"Inneih hnuah pawh a ngaihsak theih tho alawm, kha lamah chuan buai suh. Mahse, Atea hi insiamṭha phawt se chu ka ti" ka ti ve a. Tunah chuan a rilru a ipik ṭhin em a, a hlimna siamsak hram hram ka duh. Nu leh pa tal chu la nei se a zia ve tur hi a nia. 

In ka thlen chuan U Dami bawk ka hmu leh ta! Mama pawh a lo ṭhu ve luau a, "U Dami chu i lo leng a ni maw?" Ka ti liam puat a. 

"Nia, envelope ka rawn khawn a" a ti ve mai a. Mama chu a melh ralh ralh bawk. Ani lahin a phone a hmet mual mual a, "I û hian pianthar a mamawh" U Dami'n a tih chuan ka nui hawk. Ka u chu a roomah lutin a rawn dak leh zauh a, "Ka piangthar" a rawn ti leh kher. Ka nu pawh a nui pût pût mai. Zanriah kan ei laiin Sateii chuan ,"Atea te vawiinah ka dawr kawtah an intibuai a, tlereuh a lo ru a niang, dawr neitu ten an rawn umzui a. Kut te pawh an inthlakin ka hria" a ti sap sap a. 

"A va zia lo ṭhin ve le" ka ti ringawt. 

Ka nu chuan, "Mampui, Sawtianga a nau a awm leh si chuan in innei har awm ka ti. Biteii a la awm ve bawk si, Zonuni hian inpeih tik a nei thei lovang a" ka lungawi loh hlau tak chung hian a ti a. 

Ka ṭawng hmain ka û-in, "Eng nge maw mo neih pawh chu i châk em em le? Dinhmun siamfel ve phawt te a ngai alawm. Zonuni chu ka khawngaih riau asin. A phur saw a rit tlat" a ni leh ni lo angin a ti ve duah a. Ka pa pawn, "Ni e, an lainatawm unau ngawt mai. Atea chu home lama dah dante a awm lo mawni le" a ti chuar chuar a. 

"Aman a duh miau loh chuan tihngaihna a awm lo a ni" ka ti ringawt. 

Zana ka va phei chuan Atea pawh a lo awm ve mial a! A vun te chu a dum leh tlek tluk tawh, a fel lai kha chuan a hmelte kha a ṭhain a sar ve vuah zel kha a nia. Midang an awm lo bawk a tiin ka ṭhut hnaih sauh sauh a, "Ate, Ti hi chuan i thi mai ang. Enkawldam i mamawh. Home-ah awm la, thla 6 chauh a nia, damdawi pawh i sim thei mai ang. Tiang chuan i unaute rilru a hrehawm lutuk.." ka ti ta mial mial a. 

Mi rawn melh rulh a, "He chhungkaw pa ber hi i ni em ni? Ti nge ka nunah i lo buai ve chiam a? Ka û nen in inngaihzawn avang hian hotupa emaw inti suh. Khanglang che u hian.." a ti ta hrep mai a. Ka heh a hilin ka zak takzet a ni. Kan boruak ṭhat lai kha chuan min zah der vein keipawn inhlawhna tur te ka biaksak fô a, engkimah min râwn ve ṭhin kha a nia. Ruihhloin a rilru pawh a thunun vek tawh a ni ngei ang. Zonuni a rawn inrawlh ta vat a, "Zothansang, i va zakthei lo ve, khatiangtea i tih a? " A ti vin hlak hlak. 

"Ve tak che u hian a. A thlavang ka hauh e te i lo tih. He in chhungah hian mipa awmchhun ka nih hi, roreltu, engkimah ka thu lo chuan engmah in ti tawh lovang" a ti hmuk hmuk a. Biteii a lo chek hlak hlak, "A thawhchhuah nei ve niawm tak hian a" a ti sap chu a hre pha ni ngei tur a ni. "Lalrawngbawl, mi chhang ngam elo? Nang mi chuang, kan unau pawh ni ve hlei lo kha i hrawk kan chawm che a, lawm hle rawh. He inah hian thuneihna chhetê mah i nei lo" a ti chhar chhar a. Zonunpari a rawn kal hnai set sawt a, a nau biang a ri nghal thlawp. Kei pawh ka che dawt mai. A beng na bawk a niang, Atea chu a eu awrh mai. Chutah le an unau chuan an insual zui ta, Biteii nen kan ṭhelh a, Atea lah mipa a nihna laiah a chak ve fun si, Zonuni lahin hlau hek suh. Kan thawm a ring ta deuh nge, in chungte an rawn chhukthla a, kan ṭhelh dai thei hram. Atea chu a inhrosa kûk kûk a. "Zawng ho, ka that vek mai ang che u aw..ka that hreh miah lo che u a nia. Zonunpar, i unaupa aiin i bialpa leh he fahrah nu hi i thlang zawk a maw? I la hre khawp ang" tih angreng, sawi sen pawh a ni lo. Mipa ve si a ang thiam phian mai. Biteii ṭap bawk, Zonuni thinrim lutuk lah a khur der der a, a ṭawng hleithei si lo. In chungten min chhohsan hnuah kei chu, "Nang pawh hi chhuak rawh. Lo kal tawh ngai suh. He inah hian King ka nih hi" Atea chuan a ti ham ham a. "Chhuak tur an awm a nih chuan nangmah zawk kha i chhuak ang. " Zonuni aw chu a vawt reih rawih khawp mai. A nuṭapa chu a melh ngawt ngawt a, thinrimna leh natna hlirin a hmelhmai chu a khat. Atea chuan a elsen kual a, nui lui vak vakin, "Min hnawtchhuak tihna mi? I buai leh chung si ang e. " A ti vel a. Zonuni chuan chechang map lo chungin, "I bungraw neih ang ang la la, min chhuahsan rawh. Nang nen hian inzawmna neih ka duh tawh lo ve" a ti hriam hraih. 

Atea a pawr leh hmain Zonuni chuan Police a call ta rap mai le, keipawh a ngaihna hre lo zetin ka lo awm ve tawp. "Sir, kan in chhungah min rawn tibuai a, min rawn mansak u la ka duh a ni" a tih lai chuan Atea chuan, "Hmeli leh! Police te i call elo? I va hre dawn tak" tia khawih tuma a che chu ka lo dang vat a, mi rawn hnek dawp mai. Biteii a lo au tuar a, "Zosang, hnek thal tawp rawh. Che thei lo khan hnek rawh" Zonuni chuan a lo ti hmiah. Mahse, êmah tiin ka inhumsek pawh chu ka inthlahdul ta a. Ka hnek châk lutuk erawh ka za vek thei. 

Thinrim âng hmuar hmuarin Atea chu a pindanah a lut a, room aṭangin ,"I thu kha va sût leh vat rawh, jail tan ka peih lo. " A rawn ti lûng lûng. Keipawn jail intantir leh êm chu ṭul ka ti vak lo. Zonuni chuan, "Hrem i phû tlat. Min hrethiam rawh" a ti hmak bawk si. Hawnsan chi ni hek lo, Police te chu kan lo nghak ta ngat ngat a, rin aiin an rawn thangrei lo. Atea chu an ko chhuak a, a insawithiam zut zut mai. Family case hi chu a awm fô a, Police lam pawn an hriat fô tawh avangin a insawifiahna chu engah teh vak an ngaihsak lo. 

Pakhat a tê zawk chuan, "Tunah hian duhthlan theihna kan siamsak ang che. Jail tan nge i duh Hone-a awm ?" A ti ta a. Atea mitmeng pawh a buai ve ta nak mai. An zawt nawn leh a, "Home-a awm ka duh zawk" a ti ta sup a. Kan thaw huai mai. A tawi zawngin Atea chu Ngawlveite rûn-ah dah luh a ni ta a. Thla khat chhung chu va kan theih a ni rih dawn lo a ni. Zonuni chu a thutluknaah inchhir âwmin a lang lo va, Atea ṭawngkam te kha a rapthlak ve bawk êm a ni. Thawhchhuah neiin chhungkua enkawl nise khatianga ṭawng pawh a hriatthiamawm mai tur. A u puan ringawt pawh a ruksak hnem zozai tawh a, Zonuni stock ve sa, Têl, Sahbawn leh eng ilo thlengin a hralh duh zel bawk si. Pawisa nise a û a dil reng tho va, a ruih leh hnu aṭang khan sum pawh a khawl hleihtheih loh thu min hrilh keuh keuh zel. Tunlaiah thil man a toin mamawh kan ngah ve si a, ama thawmhnaw leh mamawh dangte hi a lei lohna a rei tawh viau. Kan inzui nasat avang hian ka hrechiang ve tawh bawk a, ka khawngaih ṭhin. Tunah erawh a kawlpui ber khenthlak a ni ti mai ang, thla 6 chhung tikhan a awm bo ang a, chumi chhung ringawt pawh an unau tan a thlakhlelhawm. 

Rinliani pawh a chhungte tan pawha tihngaihna awm tawh lo khawpin a tal hiar chho hle. Phaiah a chhuk sauh sauh a, IG -ah only fan page te siam chhoin a chhungten men ngaihna kan hre ta lo. A saruak thlalak ṭhenkhat kan hmu ve zauh zauh bawk si. Pa Tlana erawh chuan, "Ka tuithlar tawh. Tikhan a duhdanin sum thawkchhuak rawh se. A tawk chiah" a ti a. Kan chhungkuaa thil thleng dangdai a nih avangin ka ni te bakah ka pate ngei pawh an mangang hle. Pa Muana te pawn Rinliani chu biakpawh an tum fô, a tu amah kan vua leh vang a be duh lo bur. A naupai an tihtlaksak khan a nun a ṭha lo zawngin a nghawng ka ti lo thei lo. Pa Tlana vang vek a nia, nau a pai ve a ni mai a, tihtlaksak kher kha a ṭul miah lo. Rinliani khan a bialpa mi pawmlai kha hmangaih taktêin a lo hmangaih hman tawh a, neih pawh a hreh lo. Mahse, kha a bialpa laktlak loh leh tlaktlailo zet khan phatsanin a bum leh ta si! Rinliani hi dem chiam chiam theih a ni bik tlat lo. A nun chhiatnaah hian tel vena neiin ka inhria a, ka inthiam lo veng veng zel. Tihtheih ka nei der bawk si lo. Asanga te nupa pawn in hrang an chang ve ta. An vengah tho an in aṭanga hla lutuk lovah in ding lai an luah ve a, ka va pui ve nghe nghe. Baby mood pawh fuh rem rem tak a ni. Nuteii'n, "Chhungkua han inhrawn dual dual pawh neuh neuh a awm ṭhin a, mizia a inang vek si lo. Chhungkaw ti rêm rûm niha inṭhendarh ai chuan hetia indantir mai hi a ṭha zawk. Mala leh Faktea te an la awm a, in hrang aṭangin Asanga pawh kan la ngaihtuah thei vek alawm" a tih chu dik ka tiin Nuteii rilru ṭhatzia ka hre rauh rauh mai. Baby zawkin indan a kherh reng zawk a nia, an nupa chauha an awm takah chuan a fel chho ve viau tawh ang chu maw..

Ka mutui lai ka harh hlawl mai. Engin nge min mawlh ka hre lo, harhchiang tak ka ni. Dar 2 a lo pel tawh a. Ka va zung ta law law..ralkhatah ui a bauh lauh lauh a, ka rilruah Zonuni call a lang ta tlat! Mak ka ti keipawn. Ngaihṭhat lohna mak deuhin min tuam tlat a nih chu! Ka call ta a, vawihnih hnuah a la ta chauh, "Eng nge thleng a?" Mutchhuah hmel zet hian a rawn ti a. Ka thaw huai e. 

"Ka hre lo, ka ngai thut che a" ka ti ringawt. 

A chek hlak a, "Mu mai mai teh" a ti a. 

"Mu dawn..muttui aw. Love u" ka ti sup a, rawn tilet vein kan dah zui nghal. A mak mang e, zanin chu. 

Duatpuia'n min rawn kaitho leh a, ka tih fo angin ka lo pawm bet a, khumah kan inbuan leh vak. Ka phone a rik tak avangin a chhuak leh ta a, "Hello, hmelṭhanu, i mutui em?" Ka ti zangkhai vah a, "Atea ruang an chhar" a rawn ti ta mai le! 

"Maw?! Engtin? Khawiah?" Ka ti bah nuaih. 

"Lo phei rawh" a insût zui hlawp hlawp a. Phone ka hmet hlum a, thlak pawh inthlak lovin ka chhuak nghal, ka nu te bulah, "Atea ruang an chhar, ka kal a nia" ka ti hman hram. Ka va thlen chuan ṭhenawm khawveng an lo awm ṭaih a, Biteii leh Zonuni ṭap an lo buaipui bawk. Zonuni'n min hmuh rual chuan ka awmah a rawn bei thlawp a, a tap khur ngat ngat. Thil han inzawh theih pawh a ni lo. In chung Pa Zara chuan, "An unau an tap ta hlawp hlawp sia, tui pipe saw ka siamṭha e ka tia, ka ngaihṭha lo ka va lut a, 'Atea ruang an chhar' tih chiah an sawi thei. Keipawh ka bo hû mai" a lo ti charh charh a. 

Zonuni pawh chu inthunun chhoin a heh a pet fan fan a, ka kut a hmer na salh salh hle bawk. "Tunah hian ruang endik tura koh kan nia. Mahse, Atea ngei a ni tih chu min rawn hrilh tawh" a ti a. 

"Tuin?" Ka lo ti vat. 

"Martina khan" a ti zawi sep a. Tehdaih a!

Thil han sawi vakna hun a ni rih lo bawk a, kan pahnih bawkin ruang endik tur chuan kan kal ta a. Silipar nen, pyjama nen, tshirt thawl zet nen ka ni naa inthlakna hman awm tawh hek lo. Ruang chu Atea ngei a lo ni! Zonuni erawh a ṭap tawh lo thung. Postmortem turin an la ta a. A ruang an hmuh dan kimchang kan hre thei ta bawk. 

Tukin zing dar 6-7 inkarah khan Chawlhmun lam nu pakhat sangha sâta eizawng ṭhin chu a hnathawhna lam panin a kal leh a, bazar shed a va thlen chuan a dawhkan bul maiah Atea ruang chu a lo let reng mai a lo ni. A bawkkhup a, a tukhumah hlap a nih hmel, thisen a chhuah nasat danah. A taksa dangah hliam a neih awm hriat a ni lo. Chu nu chuan a pasal biain police an call ta nghal a ni. Police te pawn Zonuni chu thil awmzia an han zawt a, Atea Home-a a awm thu leh a chhuak tih a hriat miah loh thu a sawi mawlh mawlh. Chulai tak chu a mak! Tin, thildang mak a la awm chêu! Engtin nge Martina khan Atea ruang a ni tih a hriat a? Zonuni a rawn hrilh chat theih? Eng emaw chu a awm chiang mai. Police te zarah kan la hre chho zel ang chu maw.