Parchuailovi 7

PARCHUAILOVI..(7)

Ziaktu: Toni Râlte

Rinliani chu a harhfim lo tih a hriat, "Zonunpar, i pasal hual nen kan inhmu a. A rawn ṭha haw khawp mai.." a ti lâwng lâwng a. Kan chhehvela ṭhute pawn an hre pha vek ang. 

"Nih chu mawle" Zonuni chuan a ti sap a. 

"Zosangliana kha hnaih hnaih suh, a bialnu hlui ngaia la kur duam duam a nih kha" ngeiawm zeta nui sâwng chungin a ti leh zat. 

"Awm mai mai teh" ka lo ti a. A bialpa chuan a kai a, kan piah maiah a thutpui ta a. Teteii chuan thil awmzia a hrethiam mai a, Dinga erawh a bo hmel hle, "Nakinah ka hrilhfiah ang che" Teteii'n a ti ta ngawt. Kan inkara khi siam ve phêt a tum a, kan inhrechiang tawnin kan inringtawn si, Rinliani chuan a tifuh lo ve khawp ang. A sawi pawh kan sawi zui ta lo reng a, sawizui tlak pawh ni hek lo. A tactica ṭhing tawh mah mah tlat. Ka thlah haw a. Asanga thil min chah pek pahin ka pengkawi leh a. Patea, Saitualah a zin a, Nuteii leh Faka ten an han zui ve bawk. U Mala erawh dawr a nghak a niang. 

A thil min thawn chu ka pe a, An nupa an tum bûr avangin a nuam vak lo, an inhau leh nge mawni. Baby rawngbawl lah chu a che tau sawk sawk bawk si. Mitmeiin Asanga chu ka zawt a, "Kan inhau leh a" a ti sup. 

Boruak chawh daih tum takin, "Baby, rai ve tawh la,.inpa hian a siam thiam lo mawni le" ka ti uang a. An inhauhna chhan ber ka sawi fuh palh ta hlauh chu niin Asanga zawk a ter ta at mai. "Kha..Ka sawi reng kha, mi pawn fa nei vat rawh u an ti reng alawm. Nau ka la pai duh lo ek e bale i tia. Hrehawm tawrh i peih loh vang mai mai" a ti ta zêk a. Baby lah duai bik lo, "Tunlaiah miin fa an nei zung zung tawh lo. Bakah raipuar ka peih rih lo, ka la inui" a ti hmiah mai. 

Asanga thinrim taktêin a thinrim tih a lang, "Mai mai che hian a, a model pian nei ve ang hrima ka inui e te i tih khanglan ni..tipawh khan i nalh hlawl lo, i duhtawkin indanna chu ei rawh. Ka dang lovang che. Ka nuten tu an awt ve ngawih ngawih a, Hetiang a nih hrim chuan a neih pawh kan innei hlen lo vang" a ti ta mai a. An boruak tihdaih nana ka thilsawi avang chuan hrehawm ka ti ru kher mai, "Bawiha, insûm rawh. Hmeichhia te chu hriatthiamna chin neih ve a ṭha. In la pai ve vat mai ang" ka ti ngial a. Baby lah rawn kal hnai sauh sauhin, "Ruatsang, min ṭhen hi i cho at reng mai a tiraw? Then che hi ka hlau emaw i tia nge..in inchhung hi nuam tihna pakhatmah ka nei lo tih hre rawh. Ka haw dawn" a ti tûn tûn a, an roomah a lut zui daih lehnghal. 

"Va dang rawh, keimah vang a ni. A zia lo hle mai" ka ti a, ka inthiamlo takzet. 

Asanga chuan, "Inthiam lo duh suh. Nangmah vang a ni awkawng lo. Nizanah fa neih chungchang ka sawi a, ka nute khua a har ve a, tu hmel hmuh an châk ve tawh si. 'Nakkum lamah kan tum dawn nia' te ti nise ka thinrim lovang. "I nute hmuh châk vangin ka pai peih teuh lo, an chhiahhlawh ka ni em ni?" A ti ta daih a. A ṭawngkam tin hian mei a nei zel, ka hne ṭan tawh. Ka nu leh pate nise a mawl biak tawp a, vawitam ko turin ka hrilh, a duh tlat lo. Inhau hlek ila a tlan nghal zel a, haw rawh se..ka ko tawh lo chiang viau ang. Fa min paisak duh lo nupui hi eng atanmah ka ti lo" a ti bawrh bawrh a. A ṭannah chuan a dik reng. Amaherawhchu, a paitu ber ten an duh tlat loh chuan tihngaihna a vâng ve bawk a ni. 

"Dawhthei ve phawt la" ka tih mek laiin Baby chu bag khai chungin a rawn chhuak a.. ka lo dang vat. Ngaihdam te ka dil zui a, an pa erawh a ngawi reng. "Min dang suh, ka haw dawn. Christmas ka chhungte bula hman ka duh zawk. Kumtharah te chuan ka haw ve mahna. Ka hne tawh lutuk,." A ti hlak hlak a. 

"Inhauh hleka tlan nghal ngawtte hi a fuh lo a nia, nuteii pawh an hrilh a hai lutuk ang a sin" ka tih chuan, "Hai daih ang hmiang. Christmas bazar lai a nia, ka ûin dawr min nghahpui rawh a ti ve ṭâwk ṭâwk a, chupawh tithei loin min zinsan a, ka lawm lo nasa.." a ti leh nghat nghat a. 

Asanga'n, "Ka nute hi i hmusit pâng pâng ṭhin teh e tiraw? I nu saw eng nge a nih bik? Mi zawng zawngin pasal ngam an tih saw. I pa lah thaibawih of the century..ve khanglang che hian, kan inah hi chuan lawi lo la an vuakchhuahna che a rei tawh ang. I ko duh miah lo chung pawha i laka an ṭhatna hi i hre duh lo. " A lo ti nghut nghut a. Hei chu a sawi dik ang. 

"Ka nu leh pate chungchang sawi hlek suh aw..i va zak lo ve. Hetia inhrawn lo hian in dang ve ang ka ti ka ti a ni lo'm ni? I chhungte i hlau tlat a. I chawh, tikhan ka tel loin awm rawh" thinrim zetin Baby chuan a ti bâwih bâwih a. Sawi ve tur ka tan chuan a vâng. Baby chhuak tur chu an pa chuan, "Ka hnawtchhuak lo che a, i duhthua chhuak i ni a. Ka rawn koh leh che beisei buai duh suh ang che. I duh leh nangma thuin rawn haw ve mai rawh" a ti fak fak a, Baby chuan, "Ka rawn haw tawh lo vang, kan indang dawn a nih loh chuan" a ti ve hmak bawk. 

Baby chhuah hnu lawkah U Mala a rawn haw a. "Ngati lehpek nge? Baby kha" a rawn ti lut a. Asanga ṭawng har êm avangin ka lo hrilhfiah vat a. Ner nawk chungin ,"Tlan lah hi an awlsam hlawm lutuk a. " Tiin a pindanah a lut zui daih. 

Asanga chuan, "Bro, i hre lo a nih kha. Ka û te hi zahawm ka ti a nia. Baby hian a be ngai meuh lo, ka û-in a biakin a rultawkin a chhang a. Mipa a ni hlauh a, a enliam thei mai zawk a. Insu ve se kan nupa thawmhnaw chiah a su a, machine-a midang thawmhnaw a lo awm sa pawn a dahchhuak ngat zel a nia. In chenpui ve loh chuan in hrethiam lo zawk ang. Rawngbawl se kan chhungkaw hmarcha thak ngam lohzia hrereng chungin a eisiam zawng zawng deuhthaw a tithak a. A ei duh loh zawng ka nuin a lo siam palh lahin a tum bûr a, pawh tumin han ti ve ngial mah se maw he nu hian midang thatna a hrethiam lo. A pawi a nih hi, nu leh pate thu ka awih loh rah vek a ni. Anni hian kan tana ṭha chu an lo hre ber nge nge zel..mo sual hi an awm thei lo, lawina te azir tih hi chu e tih ve mai mai a ni. Mo sual hi an awm chiang lutuk" a ti ve charh charh a, a khatliam ve ngang a niang e. 

"A buaithlak a nih hi a..engtik nge nuteii te an lo hawn dawn? " Ka ti ta daih a. "Naktuk emaw urlawkni emaw kha an tum dan a nia. Eirawngbawl tih vel chu min lungkhampui suh, Baby bawl aiin ka bawl a tam zawk, ka hnehsawh thin kha" tiin a khi suk a. Nia, ṭhianho chaw ei khawm nikhuaah pawh amah hi kan eisiamtu ber a ni deuh zel. 

"Engpawhnise, ka va haw phawt ang e. Zanah rawn len ka tum dawn nia..lo hahdam la aw" tiin ka ding a. A tlai ve tawh bawk nen, ka hawnsan ta rih. Baby leh U Mamawii ka khaikhin a, U Mamawii kha kan inah a awm rei vak lo nain hrawn a nuam phian, a ṭawng duh a, ka nu nen te khan an inkawm siam siam zel a, chet lah a peih, Sateii awm loh lai a ni bawk a, ka nu kha a chhawk zangkhai viau zel. A uire tih mai loh kha chu han demna tur ka hre hran lo. Ṭhat lohna hi kan nei vek si a, Baby te pawh uire ve kher lo mah se; a chenpuite tan a tawrhhlelhawm tho chuan mi ṭha lo chu a ni ve tho si..Asanga te lam pawn dik tawk lohna chu an ngah ang. Mahse, Nuteii leh patea hi han sualthiam vak lo, sawisel leh î nei ngai lem lo an ni a. Tin, Patea hi inah a awm tam loh bakah a awm ve chhuna thu leh hla ngah lem lo a ni a, Nuteii leh a fate erawh inpawh tak, titi ho bawrh bawrh an ni. Chhungkaw nuam siam tur chuan inpawh taka titi te hi a ngai ve a, Baby hian chu chu a ti ve thei tlat si lo. Zonuni hi eng tak ang ve ang maw? Urlawkni hian chaw a rawn ei dawn a, ka chhungte nen a hranpa taka an inhmuh vawikhatna tur a ni. 

Urlawkni chawhma lamah Zonuni nen Atea kan zu kan leh a. Eitur bakah thawmhnaw te kan kensak nual, ani pawh a lo mum ve deuh tawh a, a hmel hmuh pawh a nuam ta viau e. Chik taka en chuan Zonuni nen an inânna pawh a hmuh theih, phir kha an ni miau a. Ruihhlo salah a tang rei tawh êm a, a hmel diktak a paih tawh êm zawk a. "Zosang, i awm hian ka thla a timuang ṭhin ngawt mai. Hlim deuhin Masi pawh lo hmang rawh u. " A ti ve luam a. A nu thlan tlawh a duh bawk si avangin kan haw hma a, a nu thlanah pangpar dahin kan tifai bawk. "Ka nu lu phumna han chhuahsan daih hi chu ka hreh deuh.." a ti vang vang a. A rilru tur ka hrethiam khawp mai. Kan ina chaw rawn ei tur a nih vang nge a inchei smart kher mai. Ka en ning thei thlawt lo. Smart pant grey rawng a ha a, loafers a bun bawk. Kan bazar nîa a lei Blazer a ha bawk a, a sam hi a thlah khât angreng, tunah pawh a felfai takin a ṭawn khawm leh. Mahse, a lang zahawm em em. Kan in kan thlen dawn meuh chuan a zâm ve deuh nge ni, "Ka khur ve lek lek mai" a ti sep a. 

"Zonunpari i nih kha mawle" ka tih chuan, "Chhungkaw pangngai tak in ni sia, ka tan chuan in zahawm alawm" a ti fân raih. Pawnlamah khawng leh induhtawk tak, chapo tak angin lang ṭhin mah se; a ṭobul avang hian a insit ru em em thin tih ka hria,. Vanlaia tla takmeuh an ni ve tawh a, a zâm pawh hriatthiamna ka nei lutuk. Ka chhungte pawh an lo kim ṭhap mai. Zonuni hian ke pali sa a ei theih loh avangin ka nuin zo ar sa ngei mai a lei a, sangha nen, an inbuatsaih ve nasa ngang mai. Sateii leh Zonuni hi chu Numami atangin an inhre tawh viau a, kawm pawh an inkawm thei viau. Ka nu leh pate nen an han inchibai a, ka nu lah han intih thutak rûn thiam ta lo chu, "Ti ve mai hi kan nia. Awm deuh pawp pawp rawh,.mi kan ngaihsak hluai thiam vak lo a nia" a ti a..kan lo nui huk. Ka û pawh a inbual zo a rawn chhuak a, an inchibai ve hnâp e. "Ka hmuh hnu i ang hle mai" a ti ve sup a, a vei nuih sak bawk. Zonuni pawh chuan, "Kei pawh hmuh tawhna che ka neiin ka hria" a ti ve a. A hmuhte pawh an lo inhmu ve tawh mahna le. Khawvel hi a zim êm a. Ka pain ṭawngṭaina a nei a, chaw ei an buatsaih nghal. Zonuni'n puih ve a tum chuan ka nuin, "A khai! Lo thu tawp teh, ngun takin kan chetdan hi lo en la, nakinah i rawn lawi hunah i che buai palh ang. Zanin na na na chu khual zahawm i nia, engmah lo ti ve suh" a lo ti sauh sauh mai a. Zonuni pawh a nui ve hawk hawk, zawitêin, "I nu hi a cute e" a rawn ti. Chaw eilai hi kan chhungkaw titi ve hun lai a nia. Mahse, zanin chu Zonuni a awm ve vang nge ama chungchang te an zawt ve leh zauh zauh, keiman a tlangpui ka hrilh hre tawh bawk a. Satei'n, "Numami te in hnuai chu rawn luah daih tak tak r'u..a nuam reuh asin. " A ti a. 

"Nia, kumthar lamah te chuan kan rawn insawn daih maithei a ni" Zonuni pawn a lo ti ve a. 

Mama'n, "Nurse hleitling pawl tak i nih dawn hi,. " A rawn ti leh daih pek! A nurse hmuh ho an tê ṭhin a niang e. Chaw pawh kan ei puar viau mai..eikhamah rei mawi tawk kan ṭhu leh a, Numami kan turin kan phei leh ta rih a. A lo lawm nasa mai. Valtea pawh a lo awm ve ran a, Zonuni a hmuh ruala a mitmeng danglam zawk kha ka va hmuh hmaih lo chiang tak. Zonuni hian a be ṭha vak duh ta lo va, a rawn call zing vak tawh lo. A msg thawn erawh Zonuni hriatpuinain ka hmu ve vek a, a replyna awmchhun, "Zosanga nen kan inngaizawng a, ka pelhe thiang lo" tih bak ka hmu ve lo. Valtea msg erawh a thlumin a sum hmachhuana rawn hneh te a tum thul, Zonuni'n a hawi loh êm avang hian ka thîk buai peih ta lo va, mitmei rûk erawh ka tum tho. Numami te in hnuaia an insawn phei chuan ven rûk a ngai nasa zualin ka ring. Numami leh Zonuni an titi nghal char char a, phone khawihin an bulah ka ṭhu ve kur..Numami te hi unau pali an nia, an fanu neihchhun a ni. A û te pahnih hi an in bul lawkah nupui fanaute nen an invawm hrang ve tawh a, a nau erawh phaiah zirna avangin a awm thung. Awmpui nula pahnih an nei a, an fel ve bawk a niang an awmpui nula te hi an awmna a rei tawh êm mai. Valtea'n, "Zosang, in hna in chawl tawh maw?" A rawn ti thuphung a. 

"Aw..chawl ve tawh, in khaw lamah i hmang dawn lo a ni maw " ka lo ti vat. 

"Dawn ta lo mai. Ka tum zet a, ka ṭhulh leh" a ti mai a. Phone kan inkhawihsan leh daih. Rei mawi tawk an inkawm hnuah hawn lam kan hnaih ta a, Valtea chuan, "Zonuni chu i rawn leng khât ta hle mai. Numami hian a ngai thei che sia, rawn lang tam deuh rawh. " Thupe aw lek lek hian a ti a. 

"Nia, ka buai ve ṭhin êm a ni" a lo ti ve mai a, "Zanin te chu hetah ar kang ho ila.." a rawn ti leh zauh. 

"Ka nau amahin a awm sia,. Nidangah le.." tia chhangin kei ka eng rau nge thawk ni, Zonuni kut chu ka'n kai kher a! A va naupangchhia tak. An in kan thlen chuan Biteii pawh a ṭhiante nena hman ho tumin a lo insiam der tawh a. Tunhnaiah bialpa deuh reuh a nei ve nge ni a phone a melh nui vur vur reng zel. Zonuni inthlak chhungin a phone ka ensak zuai a, he thil hi a hmain ka ching ngai lo, Valtea vang a ni pakhat. Ka rin ang ngeiin Valtea chuan, "I bialpa ai kha chuan ka siam nuamsa zawk ang che mawle..engpawhnise, ka nghak zel dawn che" a rawn ti. Ka tih ngai loh dan bawkin, "Min lo tibuai tawh lo la ka lawm ngawt ang. Ani hi ka hmangaih a ni" tiin ka reply a, ka dah ta hmak. A hnuah Zonuni pawn ka replyna chu a hmu ve a, "Khatia tih fawk kha a ṭha mai. " A ti ve thliam. Puitling intih ve tawh hnua inngaizawng kan nih avangin chân hi ka duh lo bur, bakah Opa sawi ang chiahin ka nuna thiltithei leh pawimawh em em hmeichhia chu amah chauh hi a la ni a, nupuia neih ka tum nghet ve bur tawp. Zo chhang te kan kang dun ve a, kan hlim dun ve lutuk. 

"Ka chhungte kha i ngaina em?" Ka tih chuan, "Ngaina, ka hrawn chi tak an ni" a ti ve ngial a. 

Thutak deuh zawkin, "Engtikah nge kan inneih ang?" Ka ti ta a. A ngawi dat. Hmabak leh mawhphurhna tam tak a la nei tih ka hriat avangin inneih lam hi ka sawi ngai lo. 

"Engtik nge i duh?" A ti sap a. 

"I inpeih hunah a ni mai lo'm..kei chuan tunah pawh ruk nghal mai che ka duh a" ka ti a, ka nui bawk. 

Ka biangah a rawn piai zauh a, "I chimawm aw. Tak tak ana Atea hi rawn chhuak se , a nun insiamṭha ve phawt se ka tia. Biteii hian min tibuai deuh. Kei angin Atea a ngaina dawn si lo va, an pahniha hnutchhiah tawp chu ka ngaihtuah ngam lo" a ti ta malh malh a. Hei hi chu keipawn muthmuna ka ngaihtuah fô a ni. 

"Biteii bulah hian Atea chungchang hi sawi a hun tawh lo maw?" Ka ti a. 

"Umm, remchang ka hmuh veleh hrilh ka tum alawm. Pianghmun kan ni lo tih erawh zêp ka duh" a ti a,. Biteii a la naupang ve bawk nen, pianghmun an ni lo tih a hriat chuan a tuarthiam lovang tih a hlauhawm viau. 

"Kha chu i tihdan dan aw. Atea pawh i hrilh hriat hmasak a ngai ang" ka lo ti ve a. Inkuah dun rialin hmalam hun kan sawi dun sep sep. 

Christmas vuakvêt chu Zonuni bulah ka hmang tam khawp mai. Khawhar hmana siam loh ka duh ber mai. Hetih lai mêk hian chhungkaw buaina te pahnih Rinliani leh Asanga te nupa te buaina pawh a la reh mai lo va. Rinliani chu a bialpa nupui ten an rawn lenchilh ta rap mai. Ka nî a zak kher mai.."Vawi tam tak phone aṭangin ka rawn ngen tawh che. Thinrim pawn ka ankhum ngai lo che, ka pasal hi a dik lo leh thiam lo zawk a ni tih ka pawm thlap. Mahse, fa naupang tê tê kan nei a, pa tel lova enkawl ka zuam lo tih vawitam ka hrilh che..tin, maw a nupui êm thlak nan chuan a duh lo che tih pawh ka sawi, nang lo pawh hi kawp rûk a nei tho vang. Mahse, nang chuan a sum leh pai i eisak mai bakah langsar taka inkawpin i intimualpho a. Tunah chuan bansan i tum hmel bawk si lo va, ka pasal hi ka pe ang che. Ka ṭhen dawn a, i lo enkawl ve dawn nia" a ti sak sak mai a. Rinliani meuh pawn chhan ngaihna a hre lo nge a ngawi dûk mai. An haw hnuah ka nî, fate kutthlak ngai miah lo khan a fanu chu kekin chhuatah a hnuk ta hrep mai a, ka nu leh Tepuii ten an ṭhelh thei hram. Kan intlawhpawh lo hlen tak tak thei lo va, kan inhnaih leh deuh veleh tiang thil chu a rawn thleng leh ta si. Keimah min kawk leh mai ang tih pawh a hlauhawm e a. 

Asanga te pawh khatia Baby a haw ta kha ko duh ta hek lo, a duh ang ngeiin Christmas pawh a nute bulah a va hmang ta chu a nia. Kumhlui leh kumthar inkar velah Baby chuan min rawn be zauh zauh, Asanga nen kan inkawm ngai leh ngai loh te, khaw nge a kal ṭhin tihte, kei Zonuni bulah ka tâp chawt sia, ka hre vak lo. Nuteii te chuan koh an duh a, an nawr reng, mahse, Asanga luhlulna a kaichhuak laklawh a, "In koh vaih chuan ka chhuak ang" a ti riap mai si. U Mala meuh pawn, "Koh a ngai lo" a ti ve bur si a, an la ngawi ta reng chu a nih hi. A lungleng leh awmthei lo zawk Baby chuan kei min rawn be ta sek a, ka biaktlak loh ropui si. Opa te pawh Teremi nen an la ṭha tluang zel a, inneih lamte pawh an sawi ṭan a niawm e. Innei rawh se, Teremi hian Opa nun a kaihruai thei ber. Zu pawh a in khât pharh tawh a, hetianga kawppui te nena innawrkal tawn hi a lo ṭha ber mai. Kumhlui thlah tlaiah Zonuni nen zanriah kan ei chhuak leh a. Biteii pawh ka sawm ve reng, a ṭhiante nen an lo eikhawm ve dawn a lo nia. 

Zanriah kan ei dun laiin a phone chu a ri ta sek mai a, No 3 tiin a save a. A reject fê hnuah a rawn tih zel avangin, "Ka'n la lawk aw. A rei lovang" tiin a kalsawn a. No 3 tih teh ngawta han save chu! A mak angreng hle mai. Tu tak ni ang maw? 5 mins hnu velah a rawn let leh a, ka ngaihbel nge a tîm dai mai. Inthunun tum tak chungin ,"Ka client hlui a nih kha. An fapa ka lo enkawlsak tawh ṭhin a" tiin a insawifiah a. 

"A hmingin save ve ta mai che" ka lo ti hluk. 

"Tikhan a awlsam zawk. Ka haihawt sia" a ti puat a. Rinhlelhna a rawn piang tlat. Mahse, kan zanin boruak tihchhiat ka duh loh avangin ka sawi zui ta lo. An inah kan phei a, Biteii a chhuak bawk nen, kan free leh ta hle mai. Ka rilruah rinhlelhna a awm vang nge kan han in chu e kha e te chu ka duhthawh ta riau a, nidanga ka tih ngai miah loh angin ka keuh thlu ve ta rup mai. Mahse, ka thiltum a hriat chuan a ṭang nasa mai a, a chak phian bawk. Kei lah tawp mai nachang ka hre tawh si lo, ka thinte chu a rim dawn lek lek a. "Zosang, duhtawk rawh. Ka duh lo. Min thlah teh" a ti ṭâwk ṭâwk a. Mipa zawk na nâ na chuan thahrui ka ngah zawk si, a kekawr ka kek thla a, a rak ṭhawt. Mitmeng thim raih hian, "Khawngaihin..ka la thianghlim asin" a ti chuai raih a. Ka thlah chiang teh e. Khur dar darin ka ding a, ka thawmhnaw ka siamṭha sawk sawk, ani pawh rawn ṭhuchhuakin a inhuih mam sawk sawk a. Boruak a reh duk mai. 

A tawpa tawpah, "Ka tihpalh" ka ti sup a. Chhuat lam a bih ngar a, a ngawi tlat mai si. A bulah ṭhu vein a kut ka vawnsak a, "Ka tihpalh " ka ti nawn leh sak. 

"Ka mipa ten ber angin khawsa suh" a ti hriam hraih a. Ka hrilhhai deuh. 

"Nia, ka lo duhthawh deuh a ni" ka ti a. 

"An mihringpuite duhthlanna zahsak lova ngaichâng duh lo mite hi khawvelah ka ten ber" a ti leh hawk. Ka chil ka lo lem khawlh thung. 

"Min ngaidam rawh, ka ti tawh lovang" ngenngawl takin ka ti leh a, min rawn en ve ta hram. "Ka ngaidam a che. " A ti sap a. Ka kuah thawk..tlema tlemah kan inṭhen ṭêp chu a nih kha maw..

Ka hawn dawnah erawh kan infâwp leh thei ta hram a. Bialnu virgin ka nei tih ka hriatna chuan ka rinhlelhna te chu a vawm bo vek, ka ngaihtuah zui tawh lo hrim hrim. He nu hi ka nei ngei tur a ni. 

Kumthar pawh kan chuangkai ta reng mai. Dam ṭha pangngai taka chhungkuaa kumthar han hman leh chu lawmawm duh tak a ni. Ni 12 aṭangin hna kan ṭan leh a,. Thawktu pahnih an lakbelh leh bawk. Tar hote pawh an rawn inadmit leh ṭan a, a ziakfeltu nih chu a ninawm lek lek zel. Pa Hminga nu pawh an rawn dah ve ta nge nge a, Nu berin pa ber rilru a hneh ta nge nge a niang. Sawi hmaih loh tur chu Zonuni'n Biteii bulah Atea chungchang a sawi ta vek a, Biteii pawn a pawmthiam khawp mai. Tin, a sawi tawh ang khan an in luah chu a hlui ve tawh êm avangin sak ṭhat an tum ta a, Lohtheih lohna avanga an insawn chu a ngai ngei dawn e. Numami te lahin an in chu an lo phal nasa si, an in hi chhwng li a ni a, chhawng hnih anni hian luahin a hnuai pahnihte chu luah theihin an siam a, a hnuai ber Zonuni te luah tur chu an in hlui aiin a zau zawk bakah a nuam zawk a, bungrua nise an dah sa nual bawk si. Luah man pawh hriatthiamna thui tak nen an in hluia an luah man ang zatin an luahtir thei dawn ta. Zonuni te pawh an lawm ngei mai. Damlo enkawl tur a la hmu leh mai lo va, a âwlthawng zui ta phian. Ka hman ve nî-ah an insawn ta a, Opa leh Asanga ten min rawn pui thei bawk. 

Chawhma chhung a thawh ṭhin avangin a hlawh a tlem phah lo bawk a, chawhnu lama thawh tur a melh leh ṭan tawh. Awm mai mai hi a thiam lo a ni ber mai. Kei thlengin ka buai tel leh dawn. Mahse, vanneihthlak takin damlo enkawl tur a hmu leh ta a, chawhnua kal tur thoin an inberem leh ta. Dinhmun siam a tum ve khawp mai. Kan vengah an awm ta bawk a, zantin rial loin ka leng a ni ber, kan inning chuang reng reng lo. Biteii erawh Bawngkawnah khan bialpa a lo nei ve hmanhmawh a, a lung a lêng ve deuh ṭhin niin a lang. Mahse, a rawn lêng ve zauh zauh, tlangval tih dawna la ni chiah lo, lian ve ûr si a ni. A ṭawng tam lem lo va, ka len ve chuan chokaah an inkawm daih zel. Atea pawh Zonuni'n a zuk kan leh a, chhuak thuai thuai se a duh tawh khawp mai. Valtea pawh bialnu a nei ta nge a leng ngai tlat lo. An inhnaih tawh sia, a tlawh zen ka lo ring a nia. Chutia a hlat ta daih chu ka thawveng huai mai. Daltu nei lovin hun kan hmang dun ve zel a. Ka sawi hmaih pakhat chu hman deuha chaw eia ka chhuahpui Mimi khan min rawn la be zauh zauh ṭhin a. Zonuni hian a thîk viau mai. Chuvang chuan an ina ka len dawn chuan a msg ka delete vek phawt zel,. Bakah ka sawi tho a, "Mimi, bialnu ka nei a. Bialpa ṭha tak i nei dawn nia" tiin. Mahse, a changa min rawn biak zauh hi a ching ve a, ṭha taka chhan chang pawh ka nei ve tho. Kan inkarah engmah a la awm lo bawk a, a lakah ka inthlahrung tehchiam lo. Kohhranah pawh Zonuni te chu lawmluh an ni ve tawh a, chhiatni velah pawh Sateii nen an kal dun mai zel a, a changin keimah nen. Ka farnu nen an inkawm thei chu ka lawm hle. Ka nuin neih mai a sawi a sawi mai. Mahse, a dinhmun avangin ka nawr duh rih si lo. Kan pahnih thutlukna te ka sawi ve bawk a, vawikhat chu "Mama hian nei zawk se.." ka ti a. 

A lo khi suk, "Ka neih tawh kha, hmanah" a ti duh lek. 

"Neih leh a hun tawh alawm" ka tih chuan, "Ti hmasa ve tawh rawh. " A ti deuh tlat. Tun thlengin tu nge a rim thin kan la hre thei lo. A inzêp thei ngar ngar khawp mai. 

Zonuni thawhna mêk hi Khatla lam a ni a, mi a rêl ka hriat ngai loh nen a thawhna te fanu, an nula tawrhhlelhawm a tihzia a sawi ve fuk fuk zel a, han inrêlpui chiam chi a ni si lo. A damlo enkawl hi natna hrang hrangin a bawm ti mai ang, bawksawp reng, mahnia che thei lo, engkim inthiar thlenga tihsak vek ngai a ni a. A fanu bakah a fapa ngei pawn an nu chu an hmuh khât thu leh eng nge a an tih pawh an zawt ngai lo chu mak a tih thu a sawi thin. Ni e, nu leh pa kan hmangaihna pawh hi a inchen lo fô, pa ber erawh a fel fû roh a nih hmel. Numami te aiin hlawh pawh a hniam naa thawh tur a duh si a, a la thawk hram hram a ni ber e. Inrinni chawhnua a chawlh la ve, zanriah kan ei dun ṭumin a enkawl mêk fanu leh a bialpa niawm takte an rawn kal ve a. Kan dawhkan bul lawkah an rawn ṭhu ve. Zonuni chu a rawn hmu nghal a, ngeiawm zeta nuih sâwng pahin, "I chawlh lak chhan mai mai chu leh" a ti nghat a. Sam buang thûng mai, hmui pawrh deuh, mit hnawih nasa deuh a ni. A inhnawih paw bawk si. 

Zonuni chuan, "Nia" a ti ringawt a. 

An dawhkan an kil hnuah pawh chuan, "Ka nu enkawltu nurse a nih saw..nurse nih ve lema Hospitala thawh loh hi chu a..a ho e" tiin a bialpa chu kan hriat phak ngei tur hian a hrilh a, ka thik a khei zak mai. Mahse, Zonuni mitmei avangin ka ngawi a. 

Kan ei zo va, kan chhuak nghal daih. 

"A va chaltlai ve" ka ti nghe nghe. 

"Ka laka a awmdan hi chu ka la palzam thei, a nu laka a awmdan hi enliam harsa ka ti ṭhin. Tiang em ema nute han thlauhthlak theih hi" a ti vang vang a. A kut ka va vawnsak vat. 

"Zosang, ka nu hi hriat ka châk i ring em?" A ti ta daih. 

Chhan ngaihna vak ka hre si lo ka bu nghut ringawt a. Za lo zeta nui hakin, "Ka nu diktak hi a thih ka ring miah lo.. " a ti ta a. 

"Engvangin" ka ti vut. 

Thutak deuha hmalam melh runin, "A chhan chu he khawvelah hian a la awm ve tih hriatna ka nei tlat" a ti nghat a, lungawi lo awki a ni. 

"A va mak " ka ti ve ringawt. 

Min la en chuang miah lo hian, "La dam se, ka tina châk" a ti vawt raih a. Ka ngawih loh chuan a rilru kalthui lutuk tur ka tihzual ka hlau a ni. An inah pawh ka leng ta lo. A mizia a vawt leh vek a, ka tan a nuam dawn chuang lo. 

February thla kan chuangkai a, thla tawp lamah Atea pawh a rawn chhuak thei dawn tawh a, Zonuni hmel hmuh pawh a nuam ta deuh. Valentines day te pawh kan pahnih chauhin ONO hotelah kan hmang dun a, sex erawh kan hmang lo. Chocolate a ngaina lo nasa sia, eitur dang ka pe ta ringawt. Kan hlim dun ve viau mai. 

Mahse, a tuk lawka ka thil hmuh chuan min ṭhâwng ta deuh. Ni e, ka office bang haw lam traffic jama ka tan laiin Zonuni leh Pu Saiṭhuama, kan Home enkawltu te ka hmu dun tlat a tin ni. Pu Saiṭhuama car back seatah an ṭhu dun a, khawilam nge an pan dawn ka hre miah lo. Pu Saiṭhuama chu Aizawl pa lar a nih piah lamah hmeichhia pawh a duh duh thing thei khawpa pa hausa a ni ve a, amah a kum tam tawh mah se, exercise ṭha taka a la lak avangin a la pavalai ruih mai a, an nu pawh a hetih vanga thlem thlu a nih hmel. Zonunpari ber kher nena ka hmu dun chu ka bing mup mup a ni ber e. Anni chuan min hmu ve hauh lo thung. Chumi zan chuan ka be hmasa duh ta miah lo va, a call pawh ka pick up duh hek lo. Ka be châk hlawl lo a ni ber e. Msg erawh pahnih a rawn thawn a, "Ti nge? " Tih leh "I tha em?" Tih a ni. Ka chhang lo ve ve. 

A tukah pawh ka wish chuang lo, ka duh chuan luhlul ve thei tak mai hi ka nia. Zonuni hi ka ṭhen a ni lo, mahse, putar awmpuia kawm tawh lo turin ka hrilh tawh. A zawm lo, min ngaihpawimawhna ka ngaihlu a, hei hi a zawm ta tlat si lo. A chhan hriat ka châk a, mahse, chhuanlam a siam leh tho vang. Nilêngin ka buai a, ka rilṭam hrechang lo lêkin ka buai a, ka chau hnâwp thei. Zonuni ka la be ta chuang lo. Amah pawh a reh rih, hmeichhe dangte ang lo takin a phone hi a khawih zen zen lo va, a awm ve tho. Thurûk tam tak nei bialnu ka lo nei chu ka inchhir lek lek a, mahse, amah chu ka ngaiin ka thlahlel ngawih ngawih. Mahse, ka be lo tho si. Luhlulna hi a chungnun châng a awm ve si a. 

Zanah erawh Biteii call zawk ka dawng ta tlat. Ka la lo thei lo, "U Zosang, lo kal vat teh" a rawn ti! Kal lo thei lovin min siam si. Ka chhuak vut a. Ka va thlen chuan Biteii leh Zonuni chu an lo ṭhu thân a. 

"Eng nge thleng a?" Ka ti hû..

"Trick kan hai a" Biteii'n a la ti zui! A va hahthlak e aw. 

Ka ṭhu zui ve mai bawk a. Zonuni erawh ka la be chuang lo. Amah zawkin, "Eng ang thinrimna lianpui nge i neih a?" A ti ta a. Biteii a awm ve reng tho. 

"I hria" ka'n ti ngawt a. 

"Hre lo tak ka ni" a la ti hmak zui. 

"Putar nen in inkawp a.." ka ti chiah chu Biteii a awm ve si avangin ka ngawi leh hmak. Biteii pawh chuan nuam a ti lo nge a roomah a lut daih. 

Zonuni ngawi reng chu ngaithei lovin, "I awm awmin awm rawh. Hetiang gold digger hi ka ngaina lo. Sorry" tih pahin ka ding hluai a. 

Za lo zeta nuiin, "Ani khan ka nu diktak min hrilh theih ka lo beisei vang a nia" a ti ta a. Mahse, ka la ṭhu duh chuang lo. 

"Chu! Ka lakah thurûk i nei nghal pang..min lo va ringtawk lo ve" ka ti chang rût a. Ka thinrim tih a hrethiam ngei tur a ni. 

"Ani khan a hre teuh ber" a ti duh lek lehnghal. 

"Nih phawt le..min mamawh lo tih ka hre tawh e" tih leh chhuah ka rual a. Ka ippik ngawih ngawih. Aizawl khawpui ka va fangkual hrep ringawt, ka mut dawna Zonuni hnen aṭanga ka dawn msg chuan min tiphur nge min tihnual pawh ka hrethiam lo. 

"Awmze nei lova awm vak kha a ṭul hleinem. Fa hmangaih miah lote chunga phuba lak hi sual a ni em ni?" A rawn tih chu..!

"E" tih chiahin ka chhan a, nidanga thlahlela ngai viau si chuan ka ngei lek lek. A induhtawk lutuk hi ka hua, tumah mamawh lo ang maiin a awm a, kei thlengin a thurûk engmah min hrilh a tum lo. Ka thei ve tawk tih ka lantir a ngai tlat. Ka ngawihsan ta ngat ngat a, ni 2 lai chu a ni ta. Ka lungawi lo tih a hrethiam tawh ngeiin ka ring. Mahse, engmah a la rawn sawi chuang lo, ka tih ai a rawn ti zat zat a, zing tin ka morning wish leh zantin ka wishna ang kha a rawn hlen char char..mahse, ka tlawm thei tlat lo. 

Ni 3na a ni ta. Vawiin hi Atea a chhuah ni, chaw ei tura an sawmna nî a ni a. A msg pawh ka dawng, mahse , tihian ka chhang..

"Thuruk neinu, in unau khan einuam u" tiin. Ka rilru hel leh sak tlat chu ka hrethiam bik lo. Mahse, ka khua a harin ka ngai em em tho si. 

"Sawi dun a ṭha lo maw?" A rawn tih chu ka reply tawh lo. A thurûk chu ka hre châk tho, mahse, ka lakah a tlawm ngawih ngawih hun ka nghak tlat. Hetiang hi inlaichinnaa thil thleng fô a ni a, pakhat a induh laiin pakhat a tlawm a, chutiang kual vel mai mai chu..mahse, keini chu puitling tawh kan nia, hetia tawp ringawt erawh ka duhdan a ni ber chuang lo. Ka ippik êm êm laiin kan chhungkuaah thil dangdai leh buaithlak zet a la rawn thleng zui! 

Englo a nia, kan veng nula senior, a thi pawh a hul tawh anga kan tih rûk U Dami chuan ka û a rawn luhkhung rup mai le! Thil thlen dan chu hetiang deuh hi a niawm e. Thursday zana group fehchhuah an neih ṭumin Mama dawr kal chu U Dami hian, "Kan group i nia, vawikhatmah i la rawn lang lo, lo kal rawh" tiin a lo sawm ve a, ani Mama lah hetianga insawm bâwng bâwng chuan inthlahrung chi a ni si, bakah U Dami chu amah aia û a lo ni ve kher bawk nen, "Kalpui ka nei hleinem" a tih pawn, "Kan kal rual dawn nia" a ti ve zel si a, U Dami nen chuan an kal dun ta a. An lut dun chu Mama te nen pawha inkawm ve ṭhin tlangval phawk zet mai Sailova chuan, "Eu! In inhmeh phian mai, kan sawirem mai dawn mi?" A lo ti uang a. Mama lah a ruka phawk ve chi lo ni si, "A pawi hleinem, min palaisak nghe nghe la" a lo ti ve zuk. U Dami hi hlimsang han tih dawna ni chiah lo, Kohhran bel chawt, Upa leh rawngbawltute pawh khak ngam khawpa intineitu, ṭawngṭai mi tak a ni a. A nulat tirh aṭangin sawisep a kai ngai lo. Miin fiam bawrh bawrh mah se; a ngai haw ngai lem lo bawk. Chutianga an infiam kualna chuan nghawng a lo nei deuh nge ni, "Pathianin ka pasal atan Muanzuala hi a ruat tlat a ni. Ka ṭawngṭai chhannaah amah a lang zel" tiin a rawn lut rup mai a! Mi pangngai tak niin a lang bawk si. A rawn luh zingah ka û a la tho lo va, ka nuin thil awmzia hrilh paha a va kaitho chu, "Ka zuangthla zawk mai ang" tiin tukverh bulah a ding ta run mai. Ka nu leh pate an mangang ru ta hle mai a, U Dami lah a zahawm ve tho si. 

"Hetiang ngawt chu a fel lo ve" tia ka pa ten thukhuh taka an hnar pawn awmzia a nei tlat lo. Pathian hnathawh tak tak nge phei zawng a hriat loh a, Mama tihngaihna hre lo mangang bawk si lahin, "Phuar hlawm u la, Zosanga'n an inah va dah rawh se" tiin a roomah a tawm tlat si. Kei chu ka nuih a za ta tlat zawk a, Mama mangang thinur tihngaihna hre lo hmel chuan ka nuih a tiza thlawt. "Nei mai la, a fel alawm" ka tih lek phei chuan rum lutuka min melhin, "Ka hnek duh mai ang che" a ti bul hmuk. U Dami hi a nuṭa te nena khawsa an ni a, a nuṭa an va be ta ngawt mai a ni. An rawn hruai lui ta a, a hnua kan hriat leh danin a hma pawhin veng dang tlangvalin a bazar haw lam a thlah haw avangin a va kalchilh ngawt tawh a niawm e. Chian lohna riau a nei tih kan lo hre lo a lo nia. Mama pawh an chhuak ta chu a room aṭangin a rawn chhuak ngam ve ta chauh. 

"U Dam" tia koh ka ching a, vawikhat phei chu mi tuk lawlh tawh. Ka nu te pawn a hlimawm zawngin an la thei ta a, kan sawiho chang chuan kan nui bâwk bâwk zel. Zonuni avanga ka rilru ipik pawh a rawn tithâwl ka ti mai. Mahse, ka chhungril takin ka theihnghilh chuang lo. 

Ka len lohna leh kan inbiak lohna ni 5 zet a nih tak hnu zan khat chu Biteii msg ka dawng a. 

"A û a damlo nasa lutuk" tih hi.