Parchuailovi 6

PARCHUAILOVI..(6)

Ziaktu: Toni Râlte

"I van reh em em" a tih zawm zat a. Zonuni chu thoin, "Rawngbawl a hun tawh a nih hi" tih pahin sana a melh a, a hun tawh mai a ni lo, khua a tlai tawh viau zawk. Kan titi tui a talangin khaw thim leh thim loh kan lo hrechang tawh lo a ni. Zonuni chu a che nghal vat vat a, Biteii chuan, "U Zosang, ei ve la.." tiin min sawm ve ngial a, nui chungin ka lo hnar. Biteii a awm avangin eng han sawi leh tihtheih ni tawh hek lo, a tlai tawh bawk nen, ka hawnsan ve ta a. Mahse, a hmaa min mawlha min kam rûntu a awm ta lo. Zonuni te chhungkaw chunga thil thlen dan leh Atea chungchang velte erawh chuan ngaihtuahna a tithui angreng viau mai. Tin, Zonuni te unau nu leh pa diktak te chu tu te nge ni ta ang? An huan enkawlsak aṭanga hriat dan chu a awm ang a, mahse, a hming kha an sawilang hauh bawk si lo. Ka rindanin Zonuni nu leh pate hian Zonuni te nu leh pa tak tak an hriat rûk ka ring tlat! Eng emaw thil vangin an zêp a ni ngei ang. Tunah zawh ngaina a awm tawh bawk si lo. Engpawhchu nise, Zonuni hian min haw bik lo va, a ruktêin min ngaina ve tih ka hre tawh a, chu chuan ka awm a tinuam viau e. Inngaihzawnna chungchang erawh remchang hmasa berah ka sawipui leh ang chu. 

A tuk aṭangin Zonuni pawh chuan chawhnu lamah Numami a enkawl ta a. Chanchin min rawn hrilh ve danah min ngaipawimawh ve ta a niang. Zanah Nuteii ten Baby ko tura min ngen tlat avangin Asanga te in lam ka pan ta nge nge a. Asanga a lo tûm bûr mai. "Koh kha a ṭul lo asin, a duh chen chen va awm se la.." a ti hmuk hmuk a. Nuteii'n, "In inneihna a la rei si lo, mi ngaihah pawh a zahthlak. Chutia va koh bûng bûng pawh a ngaiin ka ring lo, Zosanga hi va kal se la, an rawn inhruai haw thei mai turah ka ngai" a ti ve hlak hlak. Asanga pawn hnial ngaihna a hre tawh lo a niang, a ngawi zui ta a. Kei pawh Baby te in lam ka pan ta. Ka call lawk a, "Ka lo leng dawn,ka rawn ko haw dawn che" holam deuhin ka ti hmiah. Khunkhân deuha va koh kha thiam ve hek lo i..ka va thlen chuan an lo kim ṭhap mai a, ka zâm rilru hle. Baby chuan min lo be sawt sawt a, ka'n ṭhu fel a, "I lo haw daih ringawt a, in pa lunglêng a iak a iak mai. Lo haw rawh aw zanin chu" ka ti a. A nuin aw a lo thian kharh. 

"Min va hmu hniam awm ve ka lo tia, Zosang, min lo hrethiam la, nupui tlan koh dan phungte pawh a awm ve a. Hetia namnul deuha inkoh hi kan lâwm vak hleinem. A inhmuhsitthlak" a ti ta bawrh bawrh mai. Sawi mai tur ka vân si, a tawpa tawpah " a..englo a nia, midang hriat tam vak loha inkoh kha an duh a. Midang han tihbuai kha an hreh ve deuh a nih hmel" ka ti ta a. Baby û chiah Rsi chuan, "A thuhrimin mo an kawl rei theih pawh ka ring lo. Chenchilh an dâwl lo em mai" a lo ti nghat. A tlawm zawka ṭan a ngai si, ka ngawihsan tawp. Nu ber chuan, "Baby, engtia awm nge i tum? I haw dawn chuan insiam la,. " A ti leh hmak a. Pa ber a la ṭawng eih lo, hetiangah te chuan ṭawng ve bawk awm a nia. Baby chuan inthlahrun hmel lek lek hian, "Ka hre bik lo. Zosanga pawh a zahawm ve tho sia. Ruatsanga pawn ngaihdam min rawn dil ve phawt tur a nia" a ti niah niah a, haw a duh tih ka hrethiam reng. Thildang kan sawi kual leh hnuah kan inhruai haw thei ta hram e. Hetia intihtlâna inkoh haw zan hi a zahthlak duh viauin ka ring. Thingpui te ka in leh tê tê hnuah ka haw phei ve leh ta a. 

Rinliani msg ka hmuh chuan ka thil mangnghilh pakhat ka hrechhuak zawk. A zu rui ka va hruai haw ṭuma a thusawi, Zonunj leh Putar an inkawp tih thu kha..Zonuni ka la zawtfiah miah lo. Thil serious tak a nih vei nen, an chhungkaw chanchin khan min luah hneh êm a, ka lo hrechang tawh lo a niang e. Zonuni ka call ta nghal. 

"I hna thar chu a nawm hmel em?" Ka ti phawt a. 

"Umm nuam dawn, an fel chhungkua sia. Zanriahte ei turte khan min sawm nasa ,ka hnar thei hram" a rawn ti duah a. 

"A nih chu mawle, a lawmawm chu..chuan thil pakhat zawh duh che ka nei a" ka ti hniam ruih a. "Sawi la" a ti sap. 

"Englo, hmanni deuh khan cottage-ah putar pakhat nen in kal dun em ni?" Ka ti a. Sawi pawh a nuam vak lo. A thaw hawk a, "Kal dun e. Sumdawnna chungchangah a nia" a ti a. A aw a khur deuh tlata ka hriat ni. 

"A nih chu mawle. Hmutu che u an lo awm a niang,. Ngaihdan ṭha lo deuh an neih a hlauhawm a" ka ti a. 

"Rinliani hrilh che a nih ka ring. An rawn kal ve alawm. " A tih chuan, "Rinliani hi ka nî fanu a ni tih i hria em?" Ka ti ta a. 

"Hria e. Engkim ka hria. Mahse, a pawimawh lo" a ti lawi a. Ka rin aiin an lo inhre thûk zêk em mawni le. Rinliani'n ka laka rilru a putdan te hi a hria ang em? 

"Hun awl i nei khât tawh sia,. Naktuk tlaiah min lo bia la, ka va thlah haw ang che" ka ti ta daih a. A chhan chu hmaichhana kan pahnih inkar sawi ka duh tawh a ni. Inngaihzawn dawn chuan inngaihzawn vat vat ka duh. 

"Aw..nia, i hmante chuan" a ti zawi sap a. Ka dah ta rih. Zonuni makna chu social mediaah a active lo em em a, status, story tih luklak te hi a nei ve ngai lo. A dp pawh a ngai a hmanna a rei tawh khawp mai. Chuvang chuan whatsapp vela inbiak pawh kan ching tam lo hle, kei lah ka lo peih em em lo bawk nen. Amah lah ina a awm ve pawn a kut a âwl ngai bawk si lo va,. Inngaizawng pawh ni ila kan luangliam khât ve khawp ang. Tleirawl kan ni tawh hleinem mawle. 

A tukah chuan ka sawi lâwk angin a hna banah a lo sawi a, Pu Zamawia te in lamah ka inkhalh phei nghal. Ka hrilh lâwk duh lo va, Biteii erawh ka hrilh lâwk, zanriah eipui ka tum a ni. Simple zetin a lo induang leh a, hmuh a nuam telh telh. A nui hmel te pawh ka hmu ve ta alawm. A thawhna hlui kawta ka din chuan mak tih hmel angreng tak hian, "Eng nge kan tih dawn?" A ti a. 

"Zanriah eipui che ka tum" ka ti duh lek. A dar a san âk a, "Biteii'n min lo nghak awm sia" a ti nang nang. Ka hrilh tawh thu ka sawi chuan a ngawi zui ve mai bawk. Kan han ṭhu fel a, lo thawk ve zuai tawh a nih avangin min rawn viltu nen pawh an inbe ve bawrh bawrh a, "Inpa mi?" A tih zauh laia Zonuni hmel landan danglam zawk chu ka hmuhhmaih lo,. Mahse, "Ka thawhpui a nih hi" tiin a chhang a. Ka lo khi suk. 

"Rinliani nen chuan engtin nge in inhriat?" Tiin bul ka ṭan a. 

"Kan ṭhenawm tlangval nen an inzui ve tawh a. Kan inkawm em em lo naa kan inhre ve" a ti ringawt. 

"Chuan, damdawi ina in awm lai khan a rawn hmu che tiraw?" Ka ti leh a, "Umm, ka beisei lo lutuk a. Mahse, chhan ṭha tak neia lo kal a ni" a ti ta a. 

"Ka chungchang a sawi tiraw?" Ka ti ve zel. 

"Aw..inneih in tum thu te..mahse, ka awih hauh lo thung" tiin mi rawn nuih sak a, ka lo ka deuh hôin ka ring. Rinliani thusawi vanga Damdawi ina an awm lai khan min hlat a nih rinna ka nei dawn hman a, mahse, ani chuan Rinliani thusawi a awih loh thu a sawi ta si. A ṭha zel mai e. 

"Putar zui tawh suh aw" ka inrin hmain ka ti thut a. Ani pawh a hamhaih lek lekin ka hria. "A ngaih châng a awm alawm. " A ti mai a. Eng sumdawnna dang nge a la buaipui chêu ka hre lo va, lo dilchhut uchuak vak kha ka duh bawk si lo. Aman ṭul a tih hunah min la hrilh ang chu. Kan chaw ei pawh a tui dun viau e. Numami damkawr thinchhiat rih dan te, Pu Zamawia te nupa fel a tihzia a sawi siam siam a. Hetia ngaihngam hmel taka ka bula a titi hian nuam ka lo ti ve em em ringawt. Mipa a hnaih leh hmasak ber ka nih ka ring ve ngawt a, a hnuhnungber pawh ni thei ila ka duh khawp mai. Kan eikham hnuah an in lamah kan inthlah haw leh a, an khawhar ve ṭhin bawk nen, Biteii hian min thlahlel der ve em em thin. Keipawh ka ṭhu khawmuang a. Remchang zetin Biteii chu a ṭhiannuin hla zir turin a rawn sawm hlauh mai. Chance ka nei thei dawn e. Ka ṭhut hnaih nghal zat a, "Eng nge?" A ti hû. 

"Engmah" ka ti bawk si. 

"I luhlul zêk mai a" a tih chuan a sawi awmzia ka hrethiam nghal. "Ka hlawhtling ta em?" Ka ti ve zat. 

"Hlawhtling mai rawh. Mahse, i beisei ka pha dawn lo" tiin a intlawhkhalh lawk a. 

"Ka beisei pawh i hria em ni?" Ka lo ti thung. Za vak lo hian a nui a, "Pathian zarah ka hna hi ka thawh theih zel chuan Atea te nena awmho ka duh a, Biteii pawh Open aṭangin exam leh se ka duh bawk. Chhungkaw mawhphurhna ka chunga nghah a ni tawh sia, i tan hun ka ngah tawk dawn lo a nia" a ti ve ta duah a. Ni e, hun awl hi nei lo tak a ni. Englai pawn hna a thawk a ni ringawt mai. 

"Amah Atea khan a duh leh dawn em ni? Bakah ani hi khaw nge a khawsak reng reng?" Ka ti a. Ka dilchhut ngam tawh bawk a, engkim hriatchian ve zel ka duh tawh. Kan naupang tawh lo bawk nen. 

"Awmna hmun nghet a nei thei tak tak lo. In aṭanga a chhuah hnu kum hnih khat kha chu damdawi zuar te tirhkah ang deuhin a khawsa ve a, a changin jail-ah te, home-ah te a lo awm leh daih a. Chuvang alawm awmna hmun nghet nei se, ka theihtawpa enkawl ka duh a ni" a ti mawlh mawlh a. A unau neihchhun a ni bawk a, a rilru tur ka hrethiam khawp mai. 

"Engpawhnise, thil pakhat min la hrilh loh i nei a..a dik em?" Tiin a pasal hual chungchang vel chu ka han sawi dawn ṭan a. 

A fing bawk a, a lo manthiam chak khawp mai. "Ani chungchang kha sawi fo ka duh hleinem" a ti nghat a, a mitmeng chu a thim sawt bawk. Mahse, a eng ka hria ni maw ka hrechiang châk ve tho si. "An la innei em?" Ka ti a. 

"Nei lo. Tunah chuan Addiction centre pakhatah a awm mêk an ti.. " a ti ban charh. 

"Sawi chian i hreh viau a ni maw? I la natpui hle tihna a ni thei ang em?" Ka ti ve thung. Kum 4 dawn a liam tawh a, tun thlenga a nuna nghawng a la neihtir chuan ka rilru a tihnual ve deuh a ni. 

Chiang deuha min rawn melhin, "Ka phatsan ve pawh ni hlei lo, min phatsana zak taka min siamtu chanchin sawi pawh hi ka zak deuh mawle..mahse, ni e, i sawi ang khan ka nuna thil rapthlak tak thlentirtu a nih miau avangin ka theihnghilh lovang. Ka hriatreng dan tur erawh phatsantu angin.." a ti dap dap a. A awki aṭang chuan rilru nâ leh lunglenna a tel meuh lo. 

"Rinhlelhna i nei ngai miah lo em ni? Engtin nge inneih dawn a ruaiah i inbumtir theih?" Ka ti a, rum fê hian min rawn melh. Mahse, ka inchhir lem lo, a mak êm alawm..inneih dawn thleng pawha rinhlelhna a la nei lo kha. 

"I hre duh takzet a ni maw? Tun bak hi sawidun ka duh tawh lo aw. Ni e, ani kha ka 1st love a nia,. Ka hmangaih ṭhin. Kan chhungkaw dinhmun pawh ka pa a la dam avangin a chhe lutuk lo va. A chhungte pawn min iai bik lo va,.mahse, inneih kha ka hmanhmawh hran lo. Mahse, a pa nu a pi tar tawh tak hian a thih hma ngeia innei turin min duh ta tlat mai a. An chhungkaw dinhmun a lo ṭha ve thawkhat a, amah lahin hna chhetê a nei ve bawk nen, ka nute pawh chuan innei mai turin min ti ta a. Khatih lai pawh khan ṭhenawm nuthlawi nen chuan khawi khawiah emaw an lo hmu dun zauh zauh tawh. Ka ringhlel lo a ni lo. Amah atchilhna khan ka khat a,chân kha ka hlau em em ringawt. Inneih hun an han ruat a, ka rilru takah chuan inneih vat vata nuthlawi nena inzuitir tawh loh ka duh a ni. Mawlnain ka khat a ni tawp mai,. Ka nu hian vawi hnih lai min zawt, "Hei upa te chuan Pân lovah tho a fu ngai lo an lo ti ṭhin a. Anni pahnih hian sawisep an kai riau mai a, mi mit a kham riau a niawm e. Inneih hun lah kan ruatfel tawh si, i rilru i thlak leh duh chuan sawi hunlai tak a ni" tiin. Mahse, sawh ang khan ka khauh fun a. Tin, amah ka bialpa kha a insawifiah thiamin min tilawm thiam si. Nuthlawi pasal hlui hian koh leh a duh a, chuvanga inzuia inbia kan ni zawk a tihte kha ka lo awih duak duak a. Ka la naupang ve bawk nen. Mahse, tikhan an inthup seng ta ngang lo va, an tlan dun ta a ni. Khamihnu pawn ngaihdam min la rawn dilin an tlan dun loh thu leh an laklawh kual vek thu a la sawi ngam nia. Mahse, ka rilru a lo sak tawh thung a, ka rilru a lêt vek a ni mai. Tikhan kan tawp zui ta a ni mai e. A hnu lawkah ka pa a boral a, kan veng kha nuam ka tih tak ngang loh avang leh tuna kan in luahna Nu Remi leh ka nu te hi an lo inhre ve bawk nen, in luah man an titlawm bawk sia, kan insawn ta a ni. Tikhan a tawk em?" ..

A sawi chhung khan chil pawh ka lo lem ṭha ngam lo. A thil tawn tehhrep chu aw..tawrh hrehawm ve tak chu a ni ngei ang. Ka khawngaih piah lamah a chhelna chu a ngaihsanawm bawk. 

"Engpawhnise, ani chu i nunhlui a nia. Keimah nen khawvel kan hmachhawn tawh ang. A ṭha em?" Tiin a kut ka vuan a. 

"Inchhir miah suh aw" a ti leh hram. 

"Ka inchhirna tur thildang a la awm a nih chuan sawi mai rawh" tiin ka nawr a. 

"I beisei angin ka kawm hman chein i duh ang hun ka pe tam thei dawn lo che ka tih kha" a ti sar sar. 

"Keipawh chutia mi hman em em ka ni bik hleinem. Rinawm dun ila a tawk reng alawm. Mahse, putar hmu tawh suh, eng sumdawnna nge ka hre lo naa..mi hmuhdan che a dang palh ang" ka ti duah a. Ka ngaimawh ve tlat a ni. Tunlaiah sugar daddy neih an intihhmuh tawh a, Zonuni sum mamawhzia hre ve tan chuan ngaihngam taka putar bula kaltir kha ngamawm loh ve tak a ni. 

"Sumdawnna pawh a ni chiah lo,. He thil hi chu nakinah i laka rinna ka nghah ngam hunah ka la hrilh ang che. Chumi hma chuan min ring la ka duh a ni" thutak deuh hian a ti a. Hriat a châkawm telh telh thung si, mahse, ka zawt duh bik lo. Ṭul a tih hunah min hrilh ve mai ang. Bul kan ṭan chauh a, engkim hriat vek nghal pawh a dik bik lo ve. A vawikhat nan ka fâwp a, a hmui a nem viau, a zei hran lo hle thung. A pasal hual kha a bialpa hmasa ber leh a awmchhun a ni bawk a, dâwt min hrilh lo a nih ngai chuan. Ka tan pawh lehlamah a ngaihṭhatthlak angreng. A virgin erawh ka ring tawh lo thung. Mipa tam zawkte ngaihdan a nia, indem ngawt chi a ni bik lo a nia. Innei hial tur khawpa inkawp nghet chu vawikhat na reng reng an chetsual rinna ka nei, ka zawt lo mai zawk a ni. Tunlaiah hmeichhe virgin an vâng pharh tawh a, ngaihzawng nghet nei phei chu an virgin ka ring lo deuh tawp zel tawh. Inngaizawng nghet pawh ni hran lo, inzui leh inbe ve satliahte pawh an chetsual theih fô avang hian. Virginity ka ngaihlu ta lo ve tihna erawh a ni lo va, Zonuni nunhluiah khan tel vena ka neih miau loh avang leh thuneihna ka neih loh avangin ka pawmzam mai zawk a ni. A thuhrimah kei pawh ka virgin tawh chuang lo va, kan inrultawk a ni mai e. 

Zonuni nen pawh thla khat dâwn inngaihzawnna kan kalpui ve ta a. Christmas pawh a hnai ve ta ruak mai. A buai ngaiin a la buai reng a, Numami nen pawh an inkawmngeih tawhin an inpawh tawh viau. A sawi fô angin Atea a ngaihven ru reng thin a, Atea nen kei pawh kan inbe ve ta zauh zauh. A unaunu bialpa ka ni chu pawi a ti vak bik lo niin ka hria a, a û ngenna ang erawh a la tihlawhtling thei lo. Chhungkaw pangngai tak dina ani pawh ruihhlo bansan kha a zuam chiah rih lo a niang e. Biteii pawh an in nghaktu a la ni reng a, kumthar lamah zirna te pawh a chhunzawm mahna. Tin, Zonuni hian Biteii bulah unau diktak an nih loh thu hi a la sawi miah lo bawk. Biteii rilru hliam a hlauh vang niin a lang. Kar khatah vawi 3 inhmuh hram kan tum ve a, zantin len pawh duh mah ila a hah ṭhin êm vang hian chawl hahdam ve se ka duh a ni. Kuhva leh meizial pawh dawrah an pe tawh lo. Ama hlawh ngawr ngawr hian anni unau ringawt mamawh a phuhrûk thei ve tawh tlat a, Biteii a awlthawng ta phian. Ka len dawn loh pawn tlai tin ka thlah haw tho va, dar 6-ah a bang tawh bawk a, Numami te ina chaw a ei ṭumte pawh a awm ve. Zep nâk emaw kan inngaihzawn dan hi mi chuan boring an ti maithei. Kan inhau ngai si lo, kan awmdun lahin kan titi melh melh a, kan sawi romantic lo thei si. A ze ngheta a lo neih tawh thinlung sak pui kha a paih ve hret hret tawh a, mipa dang lakah erawh lantir zel turin ka'n chah ngei a! A nuih a za ṭhin. A inpuan tumin, "I rawn thawh ni hmasa bera i nui hmel kha zanah ka mangphan a, ka mumangah ka hmu zing thei lutuk che kha mak ka intia. Kan inphurh nasat zual lai khan ka duh che tih ka hre daih tawh. Mahse, hmeichhe enin min en lo emaw ka ti thin a, ka nu damloh aṭang khan i rilru ka hre ta chiah. Nat leh ka hlauh vang bakah ka chawrchhuahna chhuanawm loh zet avangin ka theihtawpa hnar che ka tum a nih kha".tiin. Ani hi chu a thiltihte hian awmzia a nei thlap zel a,. Tluk lohna tam tak ka nei. Zu ka in tih a hriat ṭum chuan nuin a fa a zilh ang maiin min zilh a. Kei lah ngaihsamna nen, "In dan tawk ka thiam alawm, a ngawl ka vei lovang" ka lo ti puat. 

"Zu in dan thiam hi khawvelah ka la hre miah lo. A tira thiam inti te pawh thla hnih khatah chuan an buai zel tho. Zuin a in let ve hma che hian bansan tum rawh. " A tih chu dik ka ti viau lawi a! Ka in regular loh êm avang hian zu ngawlvei te aiin ka lo inla sang ve ringawt zawk a ni. Mahse, ka sim ang pawh ka ti chuang lo, eng emaw tihpui nikhuaa han in leh te kha ka duh roh ang a, mipa mahni thutiama din loh chu ka duh bik si lo. Zu ka in ṭumin ka leng ta ngai lo thung. 

Rinliani pawh a tal hraw ṭan ta viau. Mi pawmlai a kawp tlat mai a! Pa Tlana'n vawikhat chu a hlap nek tawh. Mahse, a duh tawhna lama pawisak nei lo ve zet a ni bawk a, a thlah duh hauh lo. Chutiang vang chuan ka nî mangangin ka pa a pun a, Inrinni zanah chhungkaw hoin an zilh ta liam liam mai. Falkawn lama ka patea hi thu vuakthlak rum lam hrat a ni bawk a, ni Zâmi lah a fate zilh ṭha ngam mang si lo va midang fate chunga ṭawngkam hriam thei zet a lo ni bawk nen, an hau nasa ngang mai a. "Mi pasal kawp duh hi chu a hur pawh in hur tlangpui. A tu nge maw i chhuna hetianga i tal tlat mai ni. Indanna te i ei ṭhin em? Nau i pai a nih vaih chuan chhungkua kan mualpho dawn a nia" Ni Zami'n a tih hlawih hlawih takah chuan Rinliani a insum zo ta bik lo nge, "Awi awi, ve lutuk a che. I fanu Salemi sawn mi pawmlai a ngaizawng kuh ṭên ṭûn aw. Tunah pawh dawr lar tak neitu nen an inkawp mek,. I fanu zilh ṭha phawt la, kei chu min la zilh zawk dawn nia" a lo ti vei hmak hmak a. Ni Zami a zak chuang der lo,. Patea'n, "Aw, inhnial suh u. Ka û, Salemi pawh a sawi ang tho kha a nia, nangni pawn lo zilh deuh rawh u. Keini vua leh vâng zawng a hmeichhia chhia in thak a, mipa lam hi an zia phian zawk. Rinlian, hre rawh, i ṭhena i thlah lo a nih chuan keimah ngeiin ka hnuk ang che. A ruk arâl pawh ni lo, langsar takin in inkawp a, ani pawh lo hrilh rawh. In inthlah lo a nih chuan ka khawih duh mai ang. I hria em?" A ti kûk kûk a. A thu a rum ka tih tawh kha, midang erawh an ngawi reng. 

Rinliani'n ṭap par chung hian, "He pa vang vek hi alawm, ani hian ka nun a tichhe vek" tiin min rawn kawk ta siah mai. Min en ṭhap hlawm bawk si. "Ngawi mai mai teh" ka lo ti hluk a. Nuam chu ka ti lo nasa. 

"Ka sawi dik lo mi? Pianpui unau pawh an innei fô, ka hmangaih em em che a, zah pawh dawn lo khawpin i lakah ka awm a. Min hnar duhtawk mai lovin Zonunpari min ngaihzawnsan a. Zosanglian, i nun hi nuamsain ka siam bik lovang. Lo hria ang che" a ti tân tân a. A ṭap pur bawk si, ka va ngei e aw. Chhan ngaihna vak lah chu ka hre der lo. A laizawn Tepuii zawkin, "U Zova puh daih suh. Ani hian mi pasal kawp rawh a ti che pawh ni hlei lo" a lo ti ve hlak hlak a, Pa Tlana'n, "Thanpui, ngawi rawh. I u hian a sawi dik ve tho" a lo la ti zui! Ka tho nalh a, "In ninawm hle mai. Min pawhtel tum reng reng suh u. " Tiin ka chhuak ta daih a. Engtin lêk nge an va inhauh zui ang tih pawh ka hre lo e a. Mood off angreng zetin a tukah ka tho va, inkhawm pawh ka phur loh phah vek. Ka nu pawh a lungawi vak lo nge ni, "Rini chu a tiang lo khawp mai. Tlana lahin a lo ṭan tumhrang bawk a, ka lawm vak lo " a ti ve nghat nghat a. Ka pain, "Tihian ngawihsan daih r'u,. Tlawh pawh tlawh rih lo u a, an inhrechhuak mai ang. Tlana hi chu ka û ka la zilhtir ang" a ti charh charh a. Ka û a tih chu an upa ber Pa Muana, Delhi-a awm kha a ni. Upa ber tih takah an zahin a thu pawh an ngaichâng thei viau. 

Kan inkhawm bang chu ka kal zeuh zeuh tho avangin Numami te inah ka lut kawi a. Ani hian Zonuni nen kan inngaizawng tih a hre vek tawh a, chuvanga inpawh thar ta riau pawh kan ni. Balcony-ah a lo ṭhu a, wheelchair- a hmang tawh a, tunah hian ke lem an chah mêk a, an vuahsak thei ang nge maw. 

"Lo kal teh, hrilh tur che ka nei" a lo ti nghal chul a. A nat hlim nen chuan inthlau tawh tak a ni. A bialpa nena accident kha an nia, mihring rilru lo makzia hi chu a bialpa kha chu ṭha pangngai takin a damchhuak a, Numami hetia ke bul a nih takah chuan a thlauhthla zui ta daih. A sum ûm vanga ngaizawng kha an ti rêng a, Numami pawn a tuarin a natna lo ni ve bawk nen, Zonuni thawhtirh te khan an invin phar nasa ṭhin a nia, a thinchhiain a rilru a kawi vek tawh a, mahse, ka bialnu hi a fing viau a niang. Tunah chuan khang a tawrhna te kha a hmelhmaiah hmuh tur a awm tawh lo mai ni lovin an inlengte lo chhawntu ber a ni tawh a ni. 

"What about" ka ti zauh a. 

"Enteh, thinrim chuang lo la maw..U Valtea hian kan Zonuni hi a melh tai riau a nia. " A tih chuan ka beisei loh lam daih a nih vang nge ka mengphâwk deuh. Mahse, inthunun leh vatin, "I chiang maw? " Ka ti a. 

Valtea a tih chu Numami nuteii fapa, eizawnna avanga an ina rawn khawsa ve a ni a. An khua tak chu Khawzawl niin ka hria. Kumin aṭanga lo awm a nia, kei nen phei chuan kan inhmu ngai vak lo bawk nen, kan la inbe mang lo. T. Romana college-ah a thawkin ka hria. 

"Chiang chuan ka inhria. Zonuni hian a hawi lo êm zawk a, mahse, hman zanah U Valtea chuan a bia a, I hmingte kha a sawi nuai mai. Chuan, a hna bang a rawn haw hian Zonuni bulah a tâp chawt zel a, thlah a tum nasa ṭhin bawk. Mahse, i rawn lan hi chuan a roomah a lut daih zel a" a ti mial mial a. Zonuni'n engmah min hrilh lo va, ka thîk a hlaute pawh a ni maithei. 

"Lecturer lai a ni sia, ka dinhmun a va derthawng ve" fiamthu titak hian ka ti a, "Zonuni lam aṭang chuan ka hlauthawng chuang lo nain, U Valtea hi a ruih phei chuan a che râwva thei riau a, Zonuni lah a nau nen chauha khawsa an ni sia, ka lo hlauthawng ve deuh" a tih chuan kei pawn ka ngai serious ta riau mai. A unaupa aia keini lam a ṭang pawh chu a mak ve hrim hrim. 

"Engtin nge a chet? A fel mual mual viau emaw ka tia sin" ka tih chuan, "Chhungte an nia, mahse, a pa a chhun a nih hi. A pa pawh khian Nuteii kut a thlak nasa thei lutuk a, ka nu hian 'Lo chhuk la, kan bulah awm mai rawh' a ti fô mai. U Valtea chu a bialnu te kutthlak a ching a, heta a rawn chhuk hma lawk pawn an buai deuh laih tawh. Jail a tâng hman ṭêp alawm, mahse, a bialnu chhungte lam an fel êm a, an inngaidam thei ta hram a nih kha. Khatiang tih phut kha a nei sia, kei pawn ka ngaina thei tak tak lo" a ti ta mawlh mawlh a. Mihring hi kan landan ang hi kan va ni lo tak êm aw. 

"Zonuni chu lo chhimbudâwi deuh la, kei chuan engmah ka sawi rih lovang" tiin kan inchah a. A bu nghat nghat mai. 

Zan inkhawm banah leng lo va mut mai ka tum laiin Zonuni'n, "A la hma tho, lo kal zuai la" a rawn tih ve mial avangin a ṭawngkam ṭha ka umzui leh ta duan duan mai. Monday, Wednesday leh Friday zanah hian ka leng tlangpui ṭhin. Inrinni tlaiah a changin zanriah kan ei dun bawk a. Step ka zawhthlak laiin Atea nen kan intawk hlawl mai. A rui lo nge a harh ṭha phian. "I leng dawn mi?" A tih chuan ka lo chhang vat a. Min dinchilh renrâwn takah chuan ka ding ve mai a. 

"Ka farnu hi tina miah suh aw. Nangmahah a innghat tawh si a,. Keipawh insiamṭhat ka tum dawn. " A ti nuah nuah a, mak ka ti ru deuh. Chutiang thu chu a thawi pawn a la sawi ngai lo. 

"Ka tina lovang. A va lawmawm ve, i insiamṭhat dawn chuan" ka ti ve var a. 

"Mipa uap loh an ni sia, an zuam mai ang tih ka hlau. Nakinah ka la hrilh ang che. Zu chhuk phawt rawh" a ti leh zung zung lawi a. A pen chho pâwk pâwk. Keipawh muangchangin ka chhuk ve leh ta a. Ka zu thlen chuan, "Atea nen khan in rawn intawk hial lo maw?" A ti lâng lâng a. A aw leh a hmel landan a zangkhai hle. 

"Tawk e mawle..a rawn kal a ni maw?" Ka ti a.

"Tun ṭum a lo kal chu pawisa pawh min dil lo, 'Insiamṭhat ka duh a, zanin chiah sawtah ka riak ang a, thil semchhuah a ngaih avangin..naktukah ka rawn haw ang. Awm hlen tawh turin' a tia, ka lawm dan hi. " A ti sar sar a, a mitmeng pawh a de sawr sawr mai. Zonuni a hlim vang pawh ni lovin , Atea'n chutiang rilru a pu ta chu lawmawm ka ti a, ka lo hlim ve em em ringawt. 

"A ṭhat nasat chu. Tihian in khawsa ho ang a, mahse, damdawi a tihna a rei tawh avangin a tan nghei a harsa viau dawn a nia. Addiction centre lamah i dah phawt zawk dawn mawni ka ti" ka tih chuan, "Ka ngaihtuah alawm keipawn. A duhthlanna nise kha chu.. nurse ka ni tho va, enkawl deuh a ngaih pawn ka tithei mai ang" a ti a. 

Thingpui a va lum rak rak a, a phone a rawn ri tlang tlang. "Tu nge?" Choka aṭangin a rawn ti a. 

Ka en nak chuan 'U Valtea' tih a lo ni! Chhuna ka thu hriat zawng zawng nen thîkna a rawn lut nghal zawk mai. "Valtea" ka ti hmuk a. "Reject rawh" a rawn ti teh ngawt. 

Mahse, ka ring ral tir ta zawk mai. Thingpui kan in laiin, "Ti nge a lo biak che" ka ti ta nge nge a. Sawi chhuah rih loh kha ka duh a nia. A loh theih loh a ni. 

"Ka hre lo, min rawn be ve reng zel, ka sawi ang ka ti tho va, mahse, i thik ka hlau a" a ti ta chiah a. 

"Kan pahnih inkarah zêp leh thurûk awm suh se kan tih kha" ka ti bung nghut a, "Min ngaizawng ang pawn a awm chiah si lo va, a awmdan hi ka hrethiam lo" a ti niah niah. 

"Mipain kan ngaihzawn rukte lo kan be sek ngai lo" ka lo ti si. 

"Chuti ka be tawh lo mai ang. Numami û a ni sia, han biak loh tawp kha a nuam bik lo va" a ti a. 

"Be rawh, a ho lutuk. Lecturer a ni bawk a,. " Ka ti el a. 

Ner nâng chungin, "Chutiang ka care lo. Min hmangaihtu i nia, phatsan che ka tum hleinem" a tih chuan min hneh leh ta viau si, sawi tur ka vân ta deuh. Valtea chu ka mitmei deuh a ngai niin ka hria, Numami sawi ang khan Zonnuni te chungah chet a lak a hlauhawm tlat. Ka leng rei ta phian a,. A fawh lah kan infawp ngun. An inah bak hmundangah kan inkawm ngai meuh loh avang hian sex hmanpui ka la tum chhin lo va, Biteii a awm ve ṭhin sia, bakah mak deuhin infawh ringawtah ka la lungawi rih tlat. Vawikhat tal chu khawiah emaw kalpui ila la fight ve tur a ni. Ani hi a lo ṭang der eih lovang tih erawh ka hlau ru tho roh a, ka nikhua lo ngawt mai. 

Christmas pawh kar khat chauhin a dang ta. Hunpui chhung chu Home pawh khar a ni rih dawn a, kan chawl ve ṭep e. Mahse, Zonuni hlim lohna thlentu thil pakhat a awm a, min mawlh deuh. Atea bawk a ni lehpek a, khatia sunday zana a haw an damdawi vawrh kual kha an lo man ta hlauh si. A tamtham lutuk lo naa, Jail a tân phah ta tho, thla 3 vel chu a tân hmel. Insiamṭhat a tum ve lai taka chutia jail a han tâng chu a ûin a hrethiam lo va, a nau chu a khawngaih si, mahse, "A tân hi ka lawm vang ni loin, ruihhlo bansan a tum tho a, jail-ah a tithei dawn lo bawk a, a tan chuan ngheina chance ṭha lutuk a ni tlat. A rilru kha a la put tlat theih nan erawh kan fuih a ngai" tiin ka hnem ve a. Dik a ti ve tho mai. Atea pawh ka zuk kanpui a, a suffer nasa lutuk, chaw a la ei thei si lo chu a cher khawp mai a, a thu bawk si. Mahse, kan han infuih ngial a, ka beisei ang chiahin, "Ka tan a ṭha zawk alawm. A hauva tuar hi hrehawm mah se; kan sim chiang nge nge zawk ang. Chaw pawh ka ei ve thei ṭêp e" tiin a û pawh a lo ṭawng thlamuan zawk a, Zonuni pawh a thaw ve huai mai. Mahse, a nu boral tawh nen, unau kim lo bawka Christmas han hman chu a huphurh thu a sawi a sawi mai. Keipawh ka len phei deuh reng a ngai ang. Bialnu bula awm te chu a hrehawm hranpa hleinem. 

"Mama hi bialnu i nei chiang..tu nge sawi teh"Sateii'n ka û a fiam zâwrh zâwrh a. Ni e, reitak hnuah zana lenchhuah a ching ve roh tlat mai a, a kalna lah kan hre bawk si lo. 

"Ka la zirchiang mek" a ti duh lek a. A zirchiang rei angreng, ka nu pawn, "Eng ang mi nge ni reng reng a?" A lo ti ve a. 

"I duh loh ang deuh hmeichhia..lerh leh zakthei lo deuh mai" Mama chuan a ti nghut a. Ka nu a mengzim san mai, "I ti tak tak em ni?" A tih lahin, "Dâwt ka hrilh ngai che mi?" A lo ti bawk si. 

Ka nu a chek hlak a, "Duatpuia hmangaihpui thei che an ṭha ber ka tih kha aw" a ti leh hram a, ka û lah chuan ngaihsam hmel zet hian, "A hmangaih thei ang, hmangaihna a semzai thiam lutuk" a la tizui! Ani pui roh hi a thlang sual leh ang tih kan hlau ru far a, U Mamawii aṭang khan a inzir fing ve tawh turah kan ngai deuh ringawt. Ni e, U Mamawii khan ka û tlangval chhuah phat aṭangin a atchilh a, a zarbuai nasat thehzia keipawn ka hriatpui. Tin, keini aia khawsa thei zawk an nih vang nge a chhungte lamin ka û kha an lo duh tehhuam lo va, chupawh pawisa zo lovin an fanu khan ka û hi a rawn ko ṭâng ṭâng zel. Khatiang khawpa a laka zawr hneh kha chu ka û pawh a lerh lo chi a lo ni bawk nen a lo hnar seng ta bik lo va, thla 2 awrh an inngaizawng ang tihin U Mamawii chhungte ṭawngkam vangin ka û khan a rawn ru haw ta rup mai kha a nia. An inhrechiang hman lo nge , an han innei chho a,Thla 4 vel an inneih hnuah puitlin zir nan pawh a ṭha e an tih avangin Pa Muana te in, an pemsan tak an luah phei ta a. An la hlim ve viau naa, U Mamawii pawn an inngaihzawn lai ang khan a atchilh ta bik lo a. Nau an pai ta lawk bawk si lo nen, tiang khan Ramnghaka, Mama te ina leng reng reng nen lo inmitmeiin Ramnghaka lah nula mi lutuk, hmeichhe cheng dek thiam zet mai a ni a. Mama lah a hna avangin nitin a chhuah a ngai si,. An lo inchu ê kha e ta mai a ni. Duatpuia a piang a, kum khat êm pawh a nih hmain tikhan an inmanchhuak ta a, a pawi ngawt mai. A tuar ber tur chu pawisawi hauh lo an fapa hi a ni si a. Nupui pasal dangte chu an nei leh mai ang, mahse, Duatpuia hian nu leh pa pakhat bak a nei thei tawh lo. A pain nupui ṭha vak lo a neih phei chuan a pi leh pute an dam reng dawn si lo va, keini lahin chhungkua te kan la din ve bawk dawn nen, rilru ngaihtuahna a kalthui ṭhin hle. Ka nu pawn a sawi tam ber a ni. "Tuman lo thlahthlam suh u" a ti ṭhin. A pa hian nupui fel deuh nei se chuan rilru a thlamuang deuh ang. 

Kan hna pawh kan chawl ve thei ta a. Hah a dam ta huai e. Zonuni pawh Numami enkawl a ngai ta vak lo bawk nen, a chawlhsan ve tawh a. A chawlh dawn nî-ah chaw eikhawm an rawt ve a, kei leh Biteii te pawh min sawm ve a, kan va ei ṭeuh mai. Hlawh an inpek piahlamah Pu Zamawia te an â lo va, an unau dinhmun hriain Christmas thilpek a tan a hlawh aia tam mah tur an pe tel bawk. Zonuni lung pawh a chhe lek lek tih a lang. "Kum te lo thar se, ke lem te pawh kan han vuah chhin ang a, i la rawn enkawl tho chu a ngai ang" tiin an thlah thlap bawk. Numami zawk a ni khawhar tur chu, "Kan in hnuai ber khu rawn luah mai r'u, chuan ka khawhar a zia ang" a ti deuh reng mai a. Keipawn luah daih se ka ti hle. An awmna a mawng ve sia, bakah an in kha duh aiin a chêp tlat tawh. A awngrawp ve tawh nen, kan haw hnuah Zonuni pawn min rawn ve nghe nghe. "Kan veng lamah lo awm daih u la chu ka duh ber a" ka ti hmiah mai. Ani pawn, "In saw sak ṭhat an sawi an sawi ve tawh tho va, insawn pawh pawi ka ti vak lo. Mahse, luah man a inthlau dawn sia"a ti ve a. Numami te in hnuai chu a to ve hret ang. 

"Nangni in nia an hrethiam maithei che u asin. In unauin sawi dun ula" ka ti ta ngawt. 

Ni 22-ah kan bazar dun ve a, kamiz min leisak ngei, keipawn kawrlum ka leisak ve bawk. Manto tak ni lo mah se; duh berte thilpek aia hlu a awm dawn chuang em ni? Teteii te nen kan inhmu fuh ta hlauh bawk nen, Teteii bialpa te dawrah kan chawl ta a. Customer an tam bawk a, an buai viau. 

"Nakkumah innei r'u" Teteii chuan an ti ngawt a! Zonuni nen inmelhin kan nui hawk hawk. "Nangni khan ti hmasa r'u" Zonuni'n a ti a. Teteii bialpa Dinga pawh chuan, "Inpeih hi a inti thei thlawt lo, hei ka nghak kumtluan leh dawn ta a nih hi" a lo ti ve sup sup. 

"Nakkumah chuan kan ti ve tawh ang chu.." Teteii'n a tih chuan Dinga pawh a khi vur vur mai. Teteii hi hmelah a phu vak bik lo va, a duh hlum lo chauh a ni ber e. Kan ei zawh dawn lamah Rinliani leh a bialpa, mi pasal te kha an rawn lut ve leh nawlh mai. Min rawn hmu chat bawk si, khatia chhungkuain an zilh rawn hnuah khan kan intlawhpawh ta vak lo va, hmuh pawh ka hmu ngai mang lo. Min rawn pan nal nal a, Zonuni'n min rawn nghawk zauh mai. "A ho" ka ti sup a..