Parchuailovi 5

PARCHUAILOVI..(5)

Ziaktu : Toni Râlte

Rilruin a vei leh ngut ngut ta mai a, thin a rim ṭûn bawk. Kha pa kha engvanga buaipui viau nge maw a nih le. Kalsana inlakhran daih ka tum apiangin amah belhchian châkna min neihtir turin tiang thil kha ka tawng ve ziah. Sateii chungchang ai mahin Zonuni ka hmuh khan min tibuai zawk. In kan thlen hnuah thil awmdan an sawi a, Sateii bialpa hlui kha Rinkima niin, a ṭhian pathumte nen an zu rui chuan an lo tithlabar chiam a niawm a. "Min ṭhen mah la, ka ṭhen ve dawn chuang lo che. Ka tibuai zel dawn che" ti ang zawngin, Sateii lah a duh lohnaah chuan a kawlh ve hrâ si a, "Piang nawn pawh ni la, ka lo kir tawh lovang, i mizia a hniam êm mai" a lo ti ve hrep a niawm e. Chu chu ngaithiam lovin a lo beng a niang, a hnar a thi hial nghe nghe. FIR te kha an sawi ri naa, ka nuin, "Palai kan thlak dawn nia, chuta min chhan dan azir ni rawh se" a ti a, ka pa pawn a pawmpui hle. A engahmah hmaa FIR tih nghal ngawt chu inṭhenawm khawveng leh eng emaw changa inhmu reng reng kan ni ve ṭhin si a, hetianga kan lungawi lo tih hrilh hriat phawt hi keipawn ṭha ka ti. Mahse, vawikhat na rêng rêng chu ka hnek châk ve reng mai. Ka ngam zâwng tak a lo ni bawk nen, bakah Sateii tih dan takah a mizia a ṭhing tlat! Inṭhen tawh hnua la tihbuaia la vau hi a mipa zia vak lo. Kei erawh ka rilruah midang an len zawk tlat avangin ka ṭawng ve meuh lo va, zanriah pawh tihtham ka ei lo. 

"Inkhawm rawh aw, sunday zan tal hi chu tum ve rawh" ka nuin a tih tlat avangin leh kei pawn chin ṭhana ka lo neih tawh avangin inkhawm tur chuan ka insiam mawlh mawlh a. Biteii ka be pah bawk, "I û a lo haw tawh em?" Ka ti nghal thâwr. 

"Aw haw tawh e, a û awmdan hi ka hrethiam lo tunlai chu. Zanah te hian a rukin a ṭap reng zel" zawitê hian a rawn ti sep sep a. 

"Inriak dang an awm ve em?"ka ti leh hram a, "Awm tawh nang, kan unau kan ni mai" khawngaihthlala zet hian a ti a. Ka chhing sawk. 

"A nih i û chuan eng nge a tih?" Ka tih chuan, "Tu emaw a be mêk, tu nge pawh ka hre lo. I lo va leng khât ve" a ti a. 

"Ka inkhawm dawn a, banah ka hman chuan ka rawn kal ang" ka ti ta ringawt. Kal châkna ka nei lo nachungin kal ṭul tihna hian min tur et et niin ka hria. Ka û pawh a inkhawm ve ngei a, Sateii erawh a boruak tawnin a zir lo bawk nen, ka pate nen in an lo nghak thung. Kan nufa thuma Biak in kan pan ṭhâm ṭhâm chu Pu Zamawia nupui Nu Ma-i chuan, "In va mawi nufa ve, nu ber chu in fa rual vel a ang a nih kha mawle" a lo ti hlut a, kan bulah a rawn kal ve nghal. Amah ka hmuh chuan Zonuni ka hrechhuak nghal. 

"Numami chu eng nge a an zel?" Ka ti khawmawi a. Ka la kan ve miah lo erawh ka zak ru chem chem mai. 

"A rilru lamin a la pawm hleithei lo saw a la chhiatpui deuh a, a bakah chuan a zia tawh lutuk. Rawn len pawh i tum si lo" tiin a vui hlak hlak a. 

"Nia, ka hnaah ka buai phar ve lutuk a, ka hman veleh ka rawn kal ang. Nurse kha in rawihsak ta em ni?" Ka ti pah zaih a. 

"Aw kan inbe fel tawh a, naktuk aṭanga thawk turin. Chhiat an tawk leh ta si nen, a rawn kal thei lawk bik lo va..Sateii min hmuhsak a ni nghe nghe asin" a tih hluai takah chuan ka ûin min rawn melh zuk a, ka lo lai deuh. Biak in kan thleng zui ta bawk nen, thildang sawi tawh lovin kan lut zui ta a. Pathian Biakbûk meuha midang ngaihtuah vak vak chu duh lo teh mah ila, ka ngaihtuahna thunun turin ka chak tawk ngang lo a nia nge, Thusawitu kha Upa Thansanga a ni tih zawng ka hria. Eng nge a sawi sawichhawn tur ka hre lo. Kan ban chuan ka thaw huai mai. Dar 8 a la ri lo deuh a, a la hma tho tiin a nih nih ni turin Zonunpari te in lam ka pan ta a. Ka inngaihtuah vak chuan ka thinrim dawn zel a, a buaithlak. 

An in kawtah ka ding ran a, ka rilru a insual nasa..ti nge maw he nu hi ka umzui reng mai le? Tiang khawpa min ngaipawimawh lo te chu engah nge hmeichhe dang lakah ka pakaisan mai loh ang? Dik tak chuan a nu damloh aṭanga a thih thleng pawn kei hian ka puibâwmin ka theih ang angin ka tuamhlawm ve a ni lo'm ni? Ka laka lawma ka chunga ṭhat chhuah hi a ba ve lo maw? Lawm a hnêkin min hlat dan a zawng ngat ngat a, kei aiin addict a ngaipawimawh zawk a..ka inhumruh a, hei chen step thui tak zawhin ka kal tawh a, ka lut ngei tur a ni tiin ka pan thla chhat chhat a. Kawngka chu a lo inkhar phui chiah lo va, kawngka ep chiaha ṭhutthleng seiah chuan Atea leh Zonuni an lo thu dun ran mai. Kawngka hawn tuma ka pharchhuak tawh pawh ka ṭhulh leh, thawm nei lo thei ang berin ka let leh a. Step ka zawh chhoh chhung a rei loh ber ṭum a niawm e. Hah pawh ka hre lo, ka thin a tawt a, ka chhungrilah hian tlawm intihna leh na vung vungin min hnawh ut ut niin ka hria. A chak thei ang berin kan in lam ka pan leh ta a ni. 

Inngaihzawnna nei miah si loin Zonuni chuan min hliam a, min tlawm ta der mai. Mahse, chutimaia tlukchhiat ka tum lo bur. Min lo be ve zeuh zeuhtu Mimi ka bezui ta hmiah a. Mimi hi Patea fanu Tluangi te nena inkawm ve ṭhin an ni a, ta ṭanga min lo hre ve a ni. Tleirawl ti ila nula anga sawi theih mai chu a ni ve tawh, a hleitlingin a pian a dik reuh phian a, a hmel tak erawh ka mit la tak a ni hran lo. Mahse, inhnemna zawng mek ka thinlung khawhar chuan belhbulh tur a zawng lo thei si lo va, Mimi chungah ka natna te chu ka hrikthlak a ngai ta a nih hmel. Rinliani leh Zuali ka tei thei thlawt bawk si lo va,. Engpawhnise, biak ve mai mai, khawhar hnemna kha a ni mai a, kal thuipui ka tum viau hran lo. 

Sateii bialpa hlui Rinkima te hnenah palai chu kan thlak ta nge nge a, ka pa a lungawi thei meuh lo a ni. Ṭhenawm pa leh Pa Hminga te an va leng a. Chhungkaw pangngai tak an ni bawk a, ngaihdam an lo dil nasa mai. Zângnadawmna hial pekte pawh an inhuam a, chu êm êm zawng kan phût hran lo. Mahse, ka pa duhdan ang ngeiin Rinkima chu rui lo hai lova rawn lengin Sateii hnenah ngaihdam a dil ta a ni. Vawikhatmah tibuai tawh lo turin a intiam bawk. Hetianga kan inrem tak hnuah chuan ka û pawn Rinkima a duh loh chhan a sawi ta chauh a. "Ṭhianpa Sawma te in hnuaiah sawn a leng ziah a, kei chu min hmu ngai lo a niang. Sawma te sawi hmangin an nula nen sawn an inzui rei viau tawh a niawm e, a û te awm loh chang phei chuan nupa ang thawthanga khawsain an riakdun thin a. I hriatchhuah hunah i na dawn a, chuvangin tiang khan ka ti ta mai a nih kha" tiin. A tiṭha khawp mai. Sateii lahin Rinkima zia a hriatchian tak vang nge an tuar lo leh em em khawp a, a thawveng sawt emaw tih mai tur a ni. Kei erawh ka pik tulh tulh a, hnaah kal reng mah ila ka ṭawng tlemin Fela takngial pawn, "I zia a dang, sawn te hi i lo thlak a ni lo maw?" A ti hial mai. A chhan diktak ka sawi thei der bawk si lo. Zonuni ka hmuh lohna pawh kar 2 zet a ni ta.

Thlasik rim a nam chho ṭan a, boruak a nuam chho viau. Mimi nen pawh kan inbe nasain amah phei chuan bialpa treatin min treat vek tawh. Kei tak hi chuan ka la la thutak hleithei lo va,. Asanga sawi fô thin, "Midang theihnghilh nan midang hmang suh" a tihte pawh kha hre mah ila, ka kal laklawh tawh nen, mumal lo zetin ka tal chho a ni ber. Hetiang taka ka nuna nghawng nei lian hmeichhia hi ka tawng tawhin ka ring lo. Friday zan a ni a, dar 7 a pel âwrh chauh tihin Rinliani'n min rawn call a, ruih hmel zet hian, "Zo, khawngaihin min lo hruai mai teh. Hei min phatsan a, min hawnsan vek. Ka rui bawk sia" tiin. 

"Taxi rawn hmang mai la" ka ti chung pawn, "Tun chiah ka ngen ang che. Ka timualpho hauh lovang che. Ka mangang ve tak tak alawm" ṭah aw tiaua a rawn tih takah chuan phur lo zetin ka insiam a. A awmna a sawina lamah chuan ka tlan phei ta nghal. An ṭhianhoin cottage pakhatah an ṭhiannu birthday an lo lawm a, an rui ta hlawm nen, an thu a inhmu lo hlawm ta a. An inhawnsan ta pheuh pheuh a nih hmel. Scooty a ken loh ni a lo ni kher nen, a khawngaihthlak ve reng. "Lawk Zoa, ka rui zualpui reh lawk rawh se" tiin a lute a va leih huh a. Harh chu a tum ve khawp mai. Tunhnaiah a mark a chhe bawk nen, Pa Tlana lah a tih tawh loh lamah a che Hitler thei viau bawk nen,. Ka lo nghak ran a. A thawmhnaw leh sam te chu siamṭha sât sâtin, "Zu i duh chuan ka la kawl asin" a la tizui! Ani kher kher zu inpui chu ka duh lo bur. Tih loh lohte kan tih ka hlau a ni, ka nawi ve thei ropui sia. 

"Haw vat ang" ka ti sek a,. 

"Taka! Zonunpari ka hmu asin. " A tih chuan ka lum nghal pupin ka hria. 

Ngaihpawimawh loh hmel deuha lan tumin, "A ho e..i hmu ni mai a" ka tih chuan, "A nu thihna hian a nghawng viau a niang, putar te a kawp ta vel mai mai a" a ti ham ham a. A thusawiin min den natzia a hre lo chu a lawmawm lamah ngai ang. 

"Nia, a tuar na ve a niang" ka la ti thei hram hram. 

"A putar kawp lah kha a neihnun hmel viau..sum hi chu a pawimawh a ni tiraw?" Nuih sâng paha a tih chuan ka insum zo ta lo nge, "Rini, Zonuni chungchang hi eng chen nge i hriat?" Ka ti ta tawl mai. A ngawi dat a, darthlalang hmaa dinga inenkual chungin, "Ka hre tam lo. Ka sawi tawh ang khan a pasal hualin a phatsan a. Chumi hnuah veng dangah an pem a, mipa a ngaihsak tawh lo tih bak hriat ka nei vak lo. I ngaihven tih ka hriat khan amah a ni tih pawh hre loin ka lo chhui ru ve a, hmana Zonuni ngei kha a lo ni sia. Chuzawng chu" a ti mawlh mawlh a. 

"Putar nen chuan an inkawp tih engtin nge i hriat?" Ka ti leh hram. Za lo tih hriat zeta nui hawkin, "Ṭhenawm maiah sawn an rawn inhnangfâk ve alawm. An pahnih chauhin an lut a, khaw thim dawnah an pahnih chauh bawkin an rawn chhuak leh a..an inkawp tih chu a chiang mai lo'm ni?" A ti sak sak a, a thinrim mai dawna ka hriat avangin, "Haw phawt ang. Kan inbe ngai tawh lo. A ho êm mai" tiin zai ka dawh a. Ka thinlung erawh a rûm. Hmeichhiaah ka duh a ni tih chiang taka ka sawi ve theihin pawisa vanga putar a kawp duh chuan min tina lo thei dawn em ni? 

 An in kawt thleng ka thlah a, pen pawh pengkawi lovin kan in lam ka pansan ta nghal. Mut hahdam ka mamawh. Ka chau hluah hluah. A number ka hmet chhuak a, biak leh mai ka hlauh êm avangin ka delete ta. Mipa nêp tak ka ni. Mipa chak leh huaisen emaw intiin ka duh vak loh hmeichhia ten min ṭhen avanga ka tuar ngai lem lote kha inchhuan nan tak ka lo hmang a, tunah inngaihzawnna pawh awm lo, ka duh thu pawh ka la hrilh loh hmeichhia vangin ka contact list- a tlem phah ta phawt. Ka duh loh dan deuha ka awm chho chuan min tithinur ngawih ngawih bawk. Mimi ka bia a, "Naktuk tlaiah zanriah ei dun ila" ka ti deuh thâwr a. Mak a tih vang nge a ngawi dat a, "Tak tak em?" Phur tih hriat taka a rawn tih chuan, "Ka rawn lam ang che. " Ka lo ti nghet charh. Kan inbiak zawhah Zonuni thawhna hluiah khan dawhkan ka va book ta nghal a. Ka rilruah hei hi a lo awm nghal, "Khawvel thlak danglam i duh chuan, nangmah danglam rawh" tih hi. Ni e, ka danglamna hi khawvelin an hmu ngei tur a ni. Heng zawng zawng phênah erawh hmeichhia a awm si! 

Hna ban veleh ka inbual a, ka inuluk ve ngang mai. Hmeichhia chhuahpui dawn chuan inuluk hi a ngai ve bawk a. Mipa nih vanga ngaihsam ringawt te, "Min duh tho" tih vanga nuailiam mai te hi a ṭha lo, hmeichhe ṭhenkhat hian thil an chîk ve hle tih hriat tur. Zakkha rim nam huam te, pheikhawk bun uih hum hum chunga chhuahpui te hi an tan chuan kumkhuaa inmangṭha hlen theihna chhan a tling ve thei. "Hmangaihna a ni lo a ni mai lo'm" in ti maithei. Nupa kawpchawi nih hma hi chuan a tu apawh hian inteh dan kan nei vek tih hriat tur. Kan veng nu pakhat pawh an inneih aṭanga thla 2na lekah a haw leh ta mai a! A chhan an han zawh tak tak chuan, "Ka rin a ang lo. A hnâr ring si, a ha nise a nâwt ṭha peih lo va, hnar hmul lawr sung ten a awm a. A care lo va, ka care sia, kan inbah fô a, a tawpah inṭhen kan duh ta hial a ni" a ti mai asin. Thil awm thei hi ngaihtuah chian a ṭha ve. Keipawh ka inrintawk dan berin in ka chhuahsan a, ka chin tur ka nute ka hrilh bawk. Mimi pawh a lo inpeih der tawh, a phur ve hle a ni mahna. A han inchei tak tak chuan a lo nalh reuh khawp mai. A hmel pawh ka ngaidam thei mai tawh ang chu. Ka u motor ka kensak a, Bike-a han inphurh vâwk vâwk kha ka hreh ve deuh a ni. Kan thlen chuan dar 6 a pel tawh a, boruak a nuam tawk khawp mai. Cabinah chuan lutin kan titi zui nghal bawrh bawrh. A naupan ang aiin sawi tur a hre reuh a, ka tan pawh a nuam viau. Korean dish ei ve hrim hrim a châk vangin kan order a, A duh tan wine a awm bawk a. Ka tihtel tir. Zonuni laka ka inlakhranna hmanrua a ni nachungin chhungrilah lungdam lohna lian tak ka la pai rûn a, Mimi bulah thinlung takin ka nui hleithei lo. A tan harsatna siam ka duh loh vangin a nia wine pawh ka chah ni. Ani erawh chuan a duh lo thung. Eitur an rawn dah a, "Muangchangin aw. Hun kan la ngah" ka ti a. Wine ka in nghal zat. 

"Ti nge zanriah ei hi i rawt thut a?" A ti sap a. 

"Ka phur thut a niang. A pawi lovang chu tiraw?" Ka ti khawmawi a. 

"Pawi lo lutuk. Chaw ei chhuah hi ka rawt ziah a, an thei thin lo va. E taka! Karleh tawp lamah picnic kan rawt a, lo kal ve rawh aw" no zeta nui seih chungin a ti siam siam a. Pum ruaka wine lem ka ni bawk nen ka zangkhai sâwt riau. "Changtunu berin i tihte chuan hun lo insiam ka tum ang" ka ti ham ham a. Zonuni pawh ka hrechang ta meuh lo. Chaw erawh ka ei tam thei lo, ka tui tihzawng a ni lo. A da ka ti mai. Wine erawh ka lem sek thung. Dar 7 pelh fêah kan inpeih ta chauh,. Hawn tlaipui a pawi lo turah ka ngai a, ka lungkham vak lo. Bill ka pe zo va, "Haw nghal lovang aw" ka ti hram. A bu nghat a, nuam tih vak lohna erawh a nei deuhin ka hria. Ka motor parkna lama kan inzui phei lai chuan kan sir veilam atangin Zonunpari leh Atea te ṭhian dun bawk kha an rawn inzui phei hlawk hlawk a. Hmuh loh der ka tum tehlul nen, Atea chuan Zonuni kawihher sawk pahin, "Khawi.. vatin" a ti tuar a. Thinrim awrâwl a ni. Ka ding ta chat a. Kan inkar chu hlam khat vel a niawm e. Zonuni pawh chuan thinrim zetin, "I tan pawisa ka thawkchhuak lo" a ti nghat a. Atea ṭhianpa chuan,"Kan laklawh a nih hi..ti mai rawh. " A lo ti ve sek. Atea chuan Zonuni dinhnaihin, "Min pe dawn nge dawn lo" tiin insehruh ṭeuh hian a melh khûi a. 

"Duhtawk rawh, ka pe dawn lo che" Zonuni aw chu a nghet charh mai. 

Atea kut vai tum chu ka va man hman hram, makti zeta min thlek buai lai chuan, "A tawk. Kut êm chu thlak suh" zaidam tak hian ka ti a. Thinrimna ka nei miah lo chu a mak ka ti. Zonuni pawh chu a hamhaih ve tlat. Min hmu thut a ni bawk a. 

"Lo inrawlh suh" Atea chuan a ti ṭêng chhuai a. Ka khi suk ringawt. A kut chu ka thlah a, "Pawisa chu thawkchhuak ve mai la"ka ti sak bawk. 

"Papar, he pa ve chhên hi tu nge a? I eng nge a nih?" Atea'n a tih khur khur chuan, Zawitê hian Zonuni chuan, "Min kalsan r'u, Zosang" a lo ti. Mimi lah kil khatah a lo ding zum reng a, a thlabar hmel lek lek. 

"Kalsan chu i duh maw?" Ka ti ve leh ngat a. A mitah chiang takin ka melh bawk. Hmana ka hmuh tawh ṭanpui ngai ngawih ngawih mitmeng ka hmachhawn leh tak avang chuan ka thinlung sak leh khauh ṭan mek tawh pawh chu a nem leh ta suai suai mai. 

Min chhan tak loh avangin, "Lo kal rawh, ka thlah ang che" pangngai takin ka ti a. 

Atea chuan, "I va zakthei lo tak,. Tu nge nia i inhriat a?" Tih pahin ka kawr âwmah a rawn ṭhâm khanglang! Mai mai chuan aw. A kut chu ka chelhsak a, "Heti zawng chuan ni lo ve.." ka ti a. Zonuni ka melh leh daih, "Ate, ka kal dawn. Pawisa min dil tur ringawt chuan min rawn hmu tawh suh ang che. Chuan, i nun hi sim hram rawh" a ti dap dap a. Atea thianpa a lo nui vel. 

"Kal ang" tia inher ka tum lai chuan, "Pawisa min pe la, vawikhatmah ka rawn hmu tawh lovang che" Atea bawk chuan a ti leh. Zonuni chuan, "Ka nei lo" a ti ve tlat si. 

Atea beidawng thinrim chuan ka inrin hmain ka bekah a rawn hnek a, "Nangmah vang a nih hi, Zawnga" a ti tuar. Thisen a tilum ve pha tlat, Mimi a lo rak chul a, chet ka tum laiin min rawn kuahbet tlat. Zonuni erawh chu milim ang maiin a ding khawng tlat a, eng nge a ngaihtuah tih pawh hriatthiam a har. Atea chuan Zonuni chu kuai herin, "Khawi. Vatin" a ti leh a. Mimi min kuahna chu ka lo phelh ve mek thung. 

"Zothansang, a tawk viau. Ka pe dawn lo che. Nanga ruihna tur hian hah takin sum ka thawkchhuak lo" Zonuni aw chu chang tak a ni. Atea lah a za ruai tawh si a, "Min pe dawn lo maw? Chiah maw? A nih ka thi ang. Bawiha, kal ang, naktukah ka ruang i hmu ang" tiin Zonuni a kawk a. Chuta Zonuni hmela hlauhthawnna leh thlabarna chu ka hmuh vawikhatna a ni. A chiâi vek nia mawle! "Ni lo, Ate..kha kha ka sawi tum a ni lo. Khatiang khan ti suh" a ti mawlh mawlh a. Ka thinrin a diar ta lo. 

"Aw le, in awm awmin awm rawh u. Zonun, in inkarah ka lo inrawlh buai a, ka tihpalh. Puih i ngai emaw ka tih vang a nia. Mimi, kal ang le.." tiin Mimi ka kai a, Atea vawikhat tal ka hnek lo erawh chuan ka thin a titâwt deuh. Zonuni chuan, kan panga chauhina kan hriat theih tur khawpa zawi hian, "Ka thisen zawmpui awmchhun a ni asin" a ti ta sap a. Ka ding chawt. Mimi pawh a ding ve tho..ka lehhawi vut a, Mittui tling ṭeuh hian Zonuni chuan min lo melh kiau mai. Ka thu hriat zawh chiah kha a makin min ṭhâwng lutuk a, ṭawng nachang pawh ka hre lawk lo. Ka hmuh lai ngeiin a ipte aṭangin 500 tlang pakhat a phawrh a, Atea kutah hmehbelin, "A tawpna ni rawh se aw" a ti sep. Kan lo thlir tawp ringawt mai a ni. 

Atea te chu pawisa an hmuh rualin lawmthu pawh sawi loin an kal nghal. Zonuni chu ka ngaihtuah leh si, "Mimi, ka thawhpui a nia. Thlah lawk ang aw" tiin Mimi ka râwn thlap. Ka hruaichhuak tawh a, ka ngaipawimawh tur a ni. A bu nghat a, Zonuni chu va pan lehin, "Ka hruai haw ang che . Lo kal rawh" ka ti a. 

"Taxi ka la mai ang" a ti tak naa, Mimi a â lo bawk a, "Lo kal rawh. A ho lutuk" a lo ti ve a. Polite ka ti khawp mai. 

"Lo kal rawh" ka ti leh hmuk a. A hnial thei ta bik lo nge, car hunna lamah chuan kan inzui phei ta a. Boruak a uap churh mai. Sawi tur ka hre lo va, hre mah ila Mimi a awm ve avangin sawi chi a ni si lo. Step bulah a chhuk a, "Fimkhur la" tiin ka thlah, a bu nghat a, a penthla chhat chhat chu ka thlir zui reng. Kan haw lamah chuan Mimi chuan, "I thawhpuinu maw?" A ti leh kher a. 

"Aw nih kha, hmanniah a nuin a boralsan a" ka ti nghut a. Thil pakhat ka hrechhuak zui zat. Zonuni thusawi, "Ani hi ka thisen zawm neihchhun a ni" a tih kha eng nge a awmzia ni ta ang? A nu boralta leh Biteii te hi a thisen zawm an ni lo tihna maw?! Hriatbelh ngai thil a va tam si êm. Ka ze danglam ta deuh chu Mimi pawh chuan a hrethiam nge, "I va cool" a ti ta chiah a. Han inlak thawven ka tum chiam pawn eng ka ang hleithei lo. An in kawtah ka ding a, "Ka rawn peng tawh lo mai ang, zandangah ni mai" ka ti ta ngawt a. A lungawi vak lo tih chu ka hrereng. Pawisa thei dinhmunah ka ding tawh lo a ni e. 

"Aw le..mangtha" tih pahin na zetin car kawngkhar a khar bur..ngawi rengin keipawn in lam ka pan zui ve ta a. Muthilh a har viau mai. Zonuni ka be mai dawn mi aw ka ti thut thut a, mahse, ani pawh rilru buai taka a awm ka rin avangin tihbuai loh ka duh bawk si. Ka let ka let mai a, sunday chawhnuah va hmuh ngei ka rilruk ta a ni. 

Chawhnuah chuan ka insiam nghal mawlh mawlh a. Ka nuin, "Khawia kal nge i tum? Tunhnai hi i chhuak tam riau mai" a ti a. 

"Tihtur pawimawh deuh ka nei a" ka ti ringawt. 

Ka nu bawk chuan, "Kha Ruatsanga te nupa lah kha an intitlân ve leh ringawt lehnghal, an inneihna la rei loh nen" a tih chuan Asanga miscall ka hmuh, ka call back tak loh ka hrechhuak nghal. Pen phei ka tum tho vang a ni pakhat. 

"Ngati nge a?" Ka ti hû a. 

"A rawn sawi chiang lo, i nuteii pawn a hrechiang bik lo a niang " a ti a. 

"Ka lo peng dawn nia..a zia lo em mai" tiin ka chhuak zui nghal. Asanga te ina pen phawt chu ka rilruk ta zawk a, a pindanah a lo awm a. Ka va lut ve nghal, Nuteii te chawhnu inkhawm turin an kal dawn bawk nen. 

"Ti nge? Eng nge thleng a?" Ka ti nghal tâwng a. 

Hul zeta nui hukin, "A rilru a kawi êm a nih kha" a ti hmuk. 

"In inhau mi?" Ka ti leh a. 

Ṭhu ṭha deuhin, meizial a ṭan a. "Nizan aṭangin kan inhnial tawh. Nitin deuhthaw an in lama a kal hi ka sawisel a, 'I nuten i bula an sawi vang maia min sawisel ve. Kan in a nia ka leng ve bawk ang chu' a ti pâng pâng a. 'A nih hei hi i in a ni ve lo mi?" Ka tih chuan, 'I nute in alawm. Ka len reng i duh lohte chuan in dang vat ila, kan in bulah in luah tur a awm reng alawm' a ti vel a. Ka ngei lutuk khan ka chhang tawh lo tawp. Chuan zingah khan inkhawm hmain, 'Tlaiah sawtah chaw ei phei tur aw' a ti leh khanglang a. 'Nangmahin va ei rawh. Ka peih lo' ka tihsan a. A haw ta em em a nih kha..haw daih rawh se, ka ko dawn teuh lo" a ti ta tûn tûn a. A sawi hi thudik a nih chuan Baby ka dem takzet. Asanga te chhungkua a tham lo ka ti lutuk a ni. 

"An inah chuan a leng ngun over mi?" Ka tih chuan, "Ka dawr nghak tur hi mi zui chhuak deuh ziah alawm. Kar khatah ni 3 chu a leng ngei ngei" a ti bawrh bawrh a. An inneihna a la rei si lo va, chutia mahni in lam tlawh zut pawh chu thil mawi tak zawng a ni lo mawle. 

"Chaw nise kan va ei nupa reng a, chhungte lakah pawh a inthlahrunawm alawm. U Mala meuh pawn, 'In nute in lamah i tal tam mah mah' min ti tawh a. An duh dana min kaihkual an tum hi ka ngaithei bik lo" a ti hmuk hmuk a. Ka pawmpui viau. 

"Engpawhnise, a vawi khatna te a nia, ko leh rawh. A zahthlak.." ka ti ve ngial a. 

"A duh leh amahin rawn haw mai rawh se. Ka ko dawn teuh lo" a ti bur mai. Thinrim a sosan lai hi chuan kan thu hi kan duh rum viau zel a, Asanga pawh a lung a leng ve leh mai ang. 

"Kalna tur ka nei a, ka va kal lawk ang e aw. I lo kal ve duh em?" Ka tih chuan, "Aih, Jona te nen zu in kan tum a" a ti mai a. Min sawm zawk naa ka kalna tur a pawimawh ka tih zawk avangin ka hnar thei hram. 

Zonuni te in ka thlen chuan dar 2 a ri thuak tawh. Ka be lâwk lo naa a awm ka ring ve tawp ringawt. Kawngka chu ka han kik karh karh a, zawitea pen thawm rawn awmin a kalhna chu a hawng ri rak a, Zonuni mitmeng bui lâk nen kan indinchilh ta ran mai. A beisei loh hmel a hmu tih hriat takin a phawk ve deuh a, mahse, a inthunun leh vat. Kan inzui lut ta a. Biteii chu a ṭhiante nen an lo leng ve daih a lo nia, a remchang khawp mai. Insi lovin kan ṭhu dun a, "Ka tibuai che em?" Ka'n ti hnuhnawh a. 

"Buai lo ve" a ti ve mai.

"Atea'n a rawn be tawh che em?" Ka ti thuphung a. 

"Be lo, min biakna tur phone pawh a nei hleinem" a ti nghat a, lunghnur deuh a ang. 

"Ka ngaihtuah deuh che a, ka rawn leng a nih hi" te chu ka han tia. Sawi tur kha ka haihchham titih tlat a ni. Awih loh hmel deuha min melhin, "Eng emaw hriat i duh vang emaw ka lo tia" a ti ta zawk a. Chu chuan min ngampattir ka ti mai. "Aw a dik alawm, nizana i tawngkam khan ka rilru a tibuai, ka inrawlhna tur ni lo mah se; inrawlh ka duh tlat sia" ka ti ta tawl mai. A ngawi vang vang a, ka ṭawng bik lo. Thawk la halhin, "I bialnu kha a titau em?" A ti ta daih a. Ka nui hawk, "Titau e. Ka bialnu erawh a la ni chiah lo" ka ti a. A dik rêng bawk. Chaw ka ei chhuahpui a ni mai a, ka duh thu leh inngaihzawnna thu ka sawipui miah lo. 

"A fel êm kha, a la naupan hmel ang aiin" a tih chuan, "Ani lam chu sawi loh ka duh" ka lo ti nghut a. 

"Thil tam tak a ni" a ti halh a. Chhuat lam a melh daih bawk. 

"Ka ngaithla thei alawm. " Ka lo ti. 

Min rawn melh hâw a, a awmdan avang chuan ka lo zâm lek lek mai, fiah zet hian.."Engvanga hriat duh nge i nih? I tan eng nge a pawimawhna?" A ti ta sak a. Ka zâmna dahthain, "I hre zawk ang chu.. ka rilru i hriat vang a ni lo'm ni min pehhel i tum ngat ngat, ka duh che tih hi chiang takin i hria.." ka ti ve ta siah siah a. Hei chen ka kal tawh a, hlawhchhama hawn ka tum tawh teuh lo. Zaktheilo pawh min ti se ka ṭhu ve tlat dawn a ni ringawt. 

"I lo awm ve hi a pawi a ni" a ti nghat a. Hnualna tham a ni naa beiseina min siamsaktu a ni zawk daih. "Kei ve mai mai ka lo awm chu eng nge a pawi viauna" ka ti hluk a. 

"Ka nunphung i tikhaihlak nasa lutuk. Ka indaidanna bang ṭhiah phêt i tum a, nangmah vangin ka hrehawm ṭhin" a ti ta a. Ka melh vawng vawng ringawt..a sir zawng pawn a lo hmelṭha hle mai. 

"Ka rilru ang i lo pu ve tho tiraw? A dik em?" Ka tih chuan, "Pu ve lo ila ka ti ngawt mai" a ti dam thlap a. Ka thaw lak chu a nuam suai suai thei nia.. 

"A nih chuan engin nge min la dâl?" Ka ti a. 

"Vawiina i lo kal chhan hian mawle" a ti sep. 

"Sawi vek rawh. A bul aṭangin.." tiin ka ṭhuthnaih sauh sauh a. A heh liak huhin a pet leh fan fan a. Inthlahdul lehin rem tak hian a ṭhu tê tê a. A aw thian kharhin hetiang hian a hringnun chu a sawi ta a ni. 

"Ka nu leh pate fanu ka ni lo va, Biteii chauh hi ka nu leh pate fa a ni. Fa dang an nei thei tawh lo. Chumi hmaa thilthleng chu ka'n sawi ang e. Ka nu leh pate (Biteii nu leh pate) hi an inneih tirh phat aṭangin mi hausa huana inhlawha khawsa dun an ni a. An taima dun bawk a, mite pawn an duhin an chhawr nasa ṭhin hle. An awm kual an awm kual hnuah mi hausa tak mai huan an enkawl leh a, chutah chuan hlawh a ṭhat bakah a hmunhma a remin nuam an ti bawk a niang, kum 2 zet an enkawlsak ta a ni. Sawi tawh ang khan fa an nei thei lawk lo va, fa an awt ve em em, entir pawh an inentir zing. Dik lohna an neih âwm hriat a ni si lo. Chutia mangang ru deuh taka an awm lai chuan an huan enkawl lai neitu leh nula pakhat hian an rawn hmu a, nula chu a hmelṭha viau nghe nghe. An zu kal satliah hauh lo va, basketah nautê phir duhawm deuh an lo keng tel a lo nia. Huan neitupa chuan, "Heng nautê te hi kan nau pakhatin raicheha a thihsan an ni a, hnuchham ina dah ai chuan ka hriatchian nangni bula dah ka duh zawk a. Fa in nei thei lo bawk nen, tihian ṭha takin in enkawl ang a, thla tin in enkawlna senso ka pe ang che u. Tuna in huan enkawl hlawh aia tam in dawng ziah ang. Mahse, midang bulah reng reng nangmahni fa angin in sawi tur a ni" tiin thu a pe ta a. Ka nute lahin an hlau si, bakah nau awt reng reng ni ta bawk chu an lo pawm ve ta mai a. Tu nge an hringtu tih pawh an zawt lo, an hamhaih a ni maithei. Tichuan, an hawnsan leh ta a. Ramhnuai huan thlamah chuan kei leh ka unaupa te chu an fa angin min enkawl ta a ni. An sawi ang tak takin an hlawh aia tam, min enkawlna man chu an dawng ta ziah bawk a,. Vannei an intih phah hle nghe nghe. Keini an falâk te pawh chu min duatin kehthei dawmin min dawm ve a, nikhua kan hriat theih aṭangin kut hmawr pawn min la beng lo. Keini chuan kan nu leh pa tak tak angah kan ngai a ni. Anni lahin sawi bik hek suh. 

Huan chu picnic spot atana siam an duh avangin ka nute pawn an chhuahsan a ngai ta a. Pu ber pawn, "Kum 18 an tlin hma chu an zirna senso leh an mamawh chu kan rawn tumsak zel ang" tiin keini unau pawh min la ngaihtuah khawp mai. A rawn kalpui nula erawh an hmu zui ta lo. Tichuan, veng pakhatah in luah vein an thawh theih ang ang an thawk a, thla tin keimahni zara pawisa a luh avangin khawsak pawh a ziaawm phah viau a niawm e. Kum kan tling ve ta a. Ka nau chuan zirna a bansan a, a chhan pawh a tui hlawl loh vang a ni. High school a kal lai aṭangin zu a in der tawh a, ganja zuk bakah damdawi han bar te a ching chho zel a. A ṭhian kawmten an lo zir bawk nen, sual kawng a zawh chho chu a ni ta reng mai. Kei erawh ka châk leh ka thawh duh ber nurse ka training ve a. Ka pa khan rilru a lo nei khawp a, thla tina kan unau tana pawisa lo lut kha a ṭhen azar lo khawl nachang a hre hlauh a, ka training pawh chuan kan buai em em lo. Tin, sawi hmaih loh tur chu tlai khawhnuah Biteii hi a rawn piang ve leh ta tlat a! Kan inthlau hle nghe nghe. Ka nau tak tak angah ngaiin keipawn ka duat kher mai. Biteii a pai lai hian zan khat ka nu leh pate titi chu ka nauin a lo hre ru pek a, an rila rah kan ni lo tih a hre ta a ni. Ani ruihhloa talbuai mêk bawk si chuan lakawiin, "Ka nu leh pate tak tak in ni lo" tiin a zah lo chho ta hle a. Hna a thawk peih bawk si lo, ruihna tur a duh ve bawk si. Nurse ka training chhuah, hnathawh tur ka zawn laiin zan khat chu ka pa nen an inhau chiam mai a. Zah lo tak takin ka pa chu a ṭawngkhum a ni. "Fa atan min la ve lo law law mai ta che u, in rethei si, hetiang reng renga khawsak ka duh hleinem. Nangni hian min la lo ula mi hausa inah ka seilian mai tur..nangmahni vangin ka nunkhua a chhe vek a nih hi.." a ti ta hrep a. Biteii hi kum 3 a ni ve tawh âwm e. Ka nute thurûk kha a hriat tirhin ka nau khan min hrilh ve nghal a, kei chuan ka pa ka zawt chiang ta vat. An pu lakah an lo intiam tawh avangin, 'Kan kawngka bulah an lo hnutchhiah che u a' a ti. Ka awih thlap. Mahse, ka nau chuan a awih ve duh lo, "Ka nu leh pate diktak sawi u la, ka zawngchhuak dawn" tiin a vau a. Anni lahin an sawi thei bawk si lo. Ka nau thinrim inhrosa chuan pawisawilo Biteii chu a pawm kang a, ani lo ṭap ve bawk nen, bang thlang lam den nan a hmang ta a. Ka pa thinin a tuar ta lo a niang. Ka nau chu beng hrepin a hnawtchhuak ta a ni. "Ka damchhungin i hmel hmuh ka duh tawh lo. Nang leh kei hian inzawmna kan nei tawh lo ve. I awm awmin awm rawh" tiin a nawrchhuak a. Ka nuin a lo lainat nge, a thawmhnaw bakah pawisa tam vak lo a lo kentir hram. Tiang chuan ka nau nen kan in awm hrang ta a. Mahse, ka pa demna ka nei lo. Ka nau kha ka haw em em zawk a ni. Kan pali chuan hun kan hmang ve zel a, private hospitalah te ka han thawk ve lâwp lâwp a, ka hnaah ka lungawi êm avangin hlawh tam leh tlemah ka buai vak ngai lo. Mahse, ka pa a hrisel lo chho a. A tawi zawngin ka pa a boral a, ka nu hoin kan awm ta ran mai. Thil eng emaw avangin Bawngkawnah hian kan insawn a,. Kum 3 liamtaah khan Atea hian min lo zawngchhuak a, lo let tura ka sawm pawn a duh lo. Ruihhlo ngai a ni tawh a, pawisa a mamawh ṭhin êm avangin min rawn zawngchhuak niin ka hria. Kei lahin ka pa a boral ta bawk nen, ka thisen zawm awmchhun ni ta chu ka lo thlahlel lo thei lo va, ka khawngaih bawk si..ka theih ang anga puiin ina lo haw turin ka ngen ziah bawk. A sâwt thei lo a nih hi.." tiin. 

A sawi zawh hnuah ka chil ka lem thei chauh. Ka thinlung zawng zawngin ka ngaithla chiang. "Ka nuin a boral hmaa min hrilh a nia. Sawi kim loh tam tak a nei " a tih zawm a. 

"I nu leh pa diktak i hre ta chuang lo a ni maw?" Ka tih chuan, "Hriat ṭul pawh ka ti chiah lo. Anni khan min hmangaih lutuk alawm" a ti mai a. 

"I nute huan enkawl neitupa chu tu nge? Ta ṭang chuan a hriat theih ang" ka ti a. 

"An sawi lo. A hming an sawi ngai lo. Ka nu pawh ka zawt. A sawi duh lo" a ti tlat. Mak ka ti ta viau. 

"An sawi duh loh chhan a awm ngei ang" ka ti a. 

"Ka nu thusawi kha dâwt vek a ni thei bawk" a tih chuan makti zetin ka en a, "Hnuchham in aṭanga min lak tih a sawi hreh vang pawh a ni thei" a ti leh a. Ka manthiam deuh. 

"Mahse, mi boral mai tawh turin a hmangaih em em a fanu bulah dâwt a sawi thei dawn em ni?" Ka ti a. A mittui rawn hnâm sawk avang chuan nuam lo ka ti ngei mai. 

"Ka tihpalh" tih pahin a kut ka va vuan a, hnai takah kan inmelh dun.."Tun aṭang chuan ka.." ka tih mêk laiin kawngka a rawn inhawng rawk a, Biteii'n, "Ehe! U Zosang.." a rawn ti chul a..