Parchuailovi 4

PARCHUAILOVI..(4)

Ziaktu : Toni Râlte

Ka harhchhuak ta zawk. A ranga rangin bike ka tinung a, tlangvalte kalna lam panin ka tlan ta nghal. Ka hawi kual pah bawk a, tlema kawng lûn lo deuh laiah chuan footpath-ah an lo kal dun chhar chhar a, ka tlan pel a, kawng zau laiah chuan ka lo nghak ta a. Zonunpari hian ka tih duh tur pawha ka rin loh min tihtir ta zeuh zeuh mai. Amah hriatchian ka châkna lah a zual tulh tulh bawk si a. Ka zawn an lo thlen chuan aw ka lo thian kharh a, min la hre ngei turah ka ngai bawk. 

"Ṭhiante u, ka lo tibuai lawk che u. Nichin ami kha ka nia,. Zonuni te nen khan engtin nge in inhriat ka hre duh a ni" ka ti ta thâwr mai. Thu han khuh kual vela pehhel vel kha thiam ve hek lo i..Atea tia a koh khan nuih vun vun pahin, "Amah zawt mai la" a ti a. An thinrim lem lo tih ka hriatna chuan min tihuangtau deuh nge, "A sawi leh duh dawn chuang lo, tikhan sawi mai la..khawngaihin" ka ti a. A ṭhianpa nen chuan inmelh zawkin, "Hre lo la a ṭha zawk. " Tih leh chak zeta kal an rual ta a. Va um leh mah ila engmah an sawi duh chuan ka rin loh avangin bangbo ru deuhin kan in lam ka pan ta zawk a. Ka chau nghulh mai. Kan zanriah ei pawh chu min chîktu ka nu chuan ka ngui deuh niin a hria nge, "I chawk let i chawk let ringawt a, mawlhtu che i nei em ni?" A ti ta nge nge a. 

Nui luiin, "Ka ṭha. Ka chau deuh a" tiin dawhkan ka thawhsan ta daih. Sateii chuan, "Vawiinah Numami te chu ka bia a, an dawr mek hi a inchhiar to mah mah a, i ṭhiannu chu biakpawh an duh deuh a" a la ti zui! Zonuni lahin khatiang khan min thlah tawh bawk si. Mahse, hna chungchang a ni bawk a, chutin a inla khauh tlat bik lovang tiin ka call ta a. A lak theih thlawt loh avangin Biteii zawk ka be ta mai. Ani erawh chuan a la rang viau. Thil awmzia chu ka hrilh nghal zung zung a, a û bula lo sawi turin leh a duh dawn a nih chuan keimah min rawn be turin ka chah thlap bawk. Vawiina mipate chungchang kha sawi ka duh viau nain buaina dang zawk ka thlen palh ka hlau a, ka insûm ta rih. Ti nge maw he hmeichhia hi ka buaipui tak chiam mai le..

Ka thaw a ipik deuh avangin Asanga te in lamah ka leng phei a, Opa lah hi a kawm hleihtheih tawh si loh. Teremi te ina len ve lah chu 3rd wheel nih reng bik kha nuam ka ti lo bur. Asanga te nupa pawh a sarhu lai a ni bawk a, an la induat heuh heuh khawp mai. Baby pawh mo thar tih takah a mawng a zângin, inlengte thingpui lumsak pawh a peih thar thar fû. Asanga te farnu neihchhunin pasal a nei ta bawk nen, Nuteii chauh hmeichhia ni ta chu Baby pawh an in ai chuan a buai ve hlek maithei. Mahse, tunlaiah mo tha chhawr tih luklak hi a awm vak tawh lo va, engkim a awlsamin khawl hmanga tihtheih a tam tawh bawk si. A zia viau. Asanga te nupa inthlahlel kara lo awm ve kûk pawh chu nuam ka ti leh ta lo. Ka chhuahsan leh ta ngawt a, kalna tur em em pawh hre lovin ka tlan kual ta vel mai mai. Zonuni thawhna dawr pawh an khar ṭhiap tawh a. Ani hi damdawi inah nge an inah a riah ka hre lo. Biteii kha zawh nachang ka lo hre miah lo va, a atthlak mang e. Dar 10 a la ri lo deuh tihin haw tumin ka inbuatsaih a, bike ka start dawn lai takin call ka dawng. Amah a lo ni. 

Pangngai thei ang berin, "Hello" ka ti a. 

"Biteii'n min hrilh a. " A rawn ti teh ngawt. 

"Eng maw!" Ka ti ve ta ngat a. A hunlaia min be duh mang si lo, tun ataka min rawn be leh si chuan mi run ve deuh a ni ber. 

"Hna chungchang kha mawle, hriatchian ka duh deuh a" inthlahrun hmel tak hian a rawn ti a, ka nem leh duak tawh. A inthlahrun hian hrehawm ka ti tlat zel. 

"Nia, call i la duh si lo va" ka ti leh hram. 

"Sorry, ka nu ka dep a, ka buai deuh a ni. " A ti ve mai a. Dâwt pawh a ni kher lo maithei. Chiang deuh zawkin Numami chungchang te chu ka hrilh ta malh malh a, "I number ka pe ang a, an lo be mai ang che" ka ti a. 

"Aw le, ka lawm ngawt ang..chuan.." tiin a ngawi leh daih. Tlaia thil thleng kha sawi a duh a nih ka ring deuh. 

"Chuan" ka ti a. 

"Tlaia ka thusawi kha ka ti tak tak aw.." a rawn ti leh ta daih! Zonunpar leh! A aw pawh a chang leh khap tawh. 

Mahni tawka inla pa ve nafam chuan insehruh chungin, "Aw le, ka lo hria ang. Mamawh i neih erawh chuan min rawn be hreh leh chuang lo la" ka ti ve ta hmak a. 

"A kawtawpah ṭang lo ila chuan tihbuai i ni tawh hauh lovang mawle" a rawn tih chuan, "Hmeichhe chapo tak, sum mamawh bawk si" tiin ka lo ṭawng el a. Za lo tih hriat zeta nuih hak pahin, "Khatiang khan min hre zel rawh. Sum hmuhna tur a nih dawn phawt chuan tihhreh ka nei lo" a rawn ti a. 

"Nurse aṭangin call girlah inlet daih la ti nia" duh aiin ka ṭawng tam hret tih ka hria. Mahse, ka mood zawng zawng nen ka dik hleithei lo a ni. 

"Hehe..chu zawng a thleng ngai lovang. Chapona ka la neih ve chhung chuan" a rawn ti khur dat. 

"Aw le.. ka tibuai leh tawh lovang che. " Ka lo ti vut a, "Ka lawm e. Keima khawvel bikah hian ka lungawi e" a rawn tih rualin ka hmet hlum nghal. Meizial ṭan zatin ka hîp kâwk kâwk a, hul zeta nui hawkin, "Khanglang chuan" ka ti nghut. Chak zetin kan in lam ka pan ta a. 

Zonunpari chuan ka nun a tihnguai phah viau naa mipa ka nihna angin amah vanga tlukchhiat emaw hmuhsitawm emawa awm ka tum lo bur. A dika dik chuan khawsak dinhmunah pawh anni ai chuan kan sang zawk, ka hmel leh pumrua nise vantlang chin ka ni ve. Ani aia hmelṭha hi hmu lo ka ni bîk lo. Ka ngaihzawn thu pawh ka hrilh hma hauhin hnaih thei miah lo turin min dang chêp a, chuti chung pawn an chhungkaw dinhmun avangin ka khawngaih a, ka la inphahhniam hram hram a. Ni lo, a nihna takah chuan Numami enkawl se ka duh chhan kha chu a rilru hneh theih ka inbeisei vang chu a ni ngei mai. Hneh a hnêkin kan inhlat ta vawng vawng zawk a. Sateii hnenah a number ka pe a, aniin Numami te a lo pe ve tawh mai ang chu. 

Ni 3 zet kan inbiak tawh loh hnuah zan khat chu Opa a rawn leng hlawl mai. "Ti nge i tawmsen reng a? Biak lah i har si" a ti bawrh bawrh a. Ka pindanah kan inzui lut nghal. Ka ṭhianṭha ber a ni bawk a, Zonuni min tihdan leh amah vanga ka nguizia te chu ka sawi ta vek a. Hmeichhia ang thoin mipate pawh hi kan rinngam te bulah chuan kan inbunruak ve fô tih hria u la..nep min tih ka rin nen, Opa chu a nui vur vur a. Ka darah beng thuk thukin, "Ṭhianpa, ka lawmpui che. Hmangaih i tawng ve ta niin ka hria" a ti ta daih mai. Ka ner nawk a, "Tehdaih a che" ka ti hmuk. 

Thutak zet hian min melh a. "I ex te han thlir let teh, in inṭhen chang pawn zan khat emaw chu i han ngui ve deuh a, i eng tihmah i ṭhulh phah lo mai ni lovin an aiawh tur i melh nghal ruai zel a ni lo'm ni? Tunah hian eng nge i nih tak? Ngaihzawn pawh la innngaizawng si lo, a ṭawngkam ṭhenkhat vangin i ngui a, i hnual em em a, i huat phah a. Hei bak baka i thinlunga khatliam hmeichhia an awm tawh em ni? " A tih tak mawlh mawlah chuan ka fiah ta uar mai. Kei chuan amah Zonuni chapona ngawt ka lo thlir a, ka nun a tihbuai phakzia ka lo ngaihtuah duh lo tlat a lo ni. 

"Mahse, hnar ka ni ta tho chu a nih hi" ka ti fân ruih a. 

Ka khuma tlukzal pahin hahdam hmel zet hian, "Hnar a?! Inhnarna a ni lo. A thinlungah i tla na tawh si a, mahse, i hriatchian a hlau niin ka hria. Umm, a dik..ṭhianpa, amah i hrechiang ang a, i kalsan daih a hlau chiang" tiin a mu lai chu a rawn tho leh hluai. A phurzia chu keipawn ka hai lo, kei erawh hamhaih ru deuhin ka lo ṭhu ngil ut thung. 

"Dik tak chuan i hrechiang lo rêng a, hmanni tlaiah addict-in pawisa a dil a, i lo awm ve ta si. Ngaihdan dang daih i neih hlauin tikhan a hnar ta ringawt che a nih hmel.." a ti leh mual mual a. 

"Mahse, min duh lo hrim hrim emaw mipa hnaih leh hi a duh lo ve tawp pawh a ni thei tho. A past life thlirin" ka lo ti ve a. 

"Chutak chu a ni kan hriatchhuah tur chu. Ekhai! Tlangval, i puanven sawi chhing la, i sava hêl mêk hi kahthlak ngei tumin veh ṭan rawh le..i duhnaah chuan i fingin rem i hriatzia ka hria alawm. " Tiin min han fuih vel a, ani hi chu phawk ta ngang a ni bawk a, chutianga min han ti kual vel pawh chu mak ka ti lem lo. Kei pawn Opa zarah ngaihtuahna thar ka nei thei ta a. Zonuni nen kan inkawm tawh dan zawng zawng leh kan titi dante ka'n chhutlet hian Zonuni hian min haw bik lo tih hi ka hrethiam ve tlat! Chutihrualin mipa ṭhalo a tawn tawh avangin bum leh phatsan nih a hlau tawh a, min pehhel a ni thei, Opa sawi ang khan a dinhmun leh nihna diktak ka la hriat tam tawk loh avangin a inlahrang ta a ni thei bawk. Opa'n a haw dawna a sawi, "I biak hmasak hunte hi a lo nghak ru reng maithei asin. Hmeichhia tluka inthup thei an awm loh hi..be rawh, pa takin" a tih kha ngaihtuahzui rauh rauhin ka phone ka phawrh a. Whatsappah lutin Zonunpari tia ka save-ah chuan, "I ṭha em? " Tih ka thawn ta a. Ka eng emaw ti thawl hawk nia mawle..Opa sawi ang khan ka tan chuan hmeichhe danglam a ni tlat si a. Ka hriat loh karin ka lo muhil daih a, min chhanna pawh ka nghak hman ta lo a nih chu. Zinga ka harh ruala ka phone ka en chuan, "Aw" tih chauha min chhanna chu ka hmu ta a. Tawi tek tawk viau mah se; Zonuni'n min be duh. Hei hi zingkar mood on nan chuan a tawk viau a ni lo'm ni?

Sateii biak hman tumin ka tho chhuak vat a. A lo insiam mek, Zonuni laka ka tihtauh avangin Numami te khan an chhawr ta em tih pawh ka zawt duh lo lui tlat a, ani lahin sawi nachang a hre lo nge,. A â hiu heu reuh bawk sia a. 

"Sate, Numami te khan tu nge an chhawr tak?" Ka ti puat a. Engahmah ngaih loh ka tum ve a ni. 

"I ṭhiannu kha an la dawnin ka hria, kar thar aṭang law law thawk turin. " A ti ta a. Ani pawn a lo chian chiah bik loh avangin a lo sawi lo mai mai a nih dawn hi. Engpawhnise, a lawmawm tho tho e. Amah Zonuni ka ngei aṭangin ka hre tur a ni. 

Vawiin chu ka âwlthawng phian. Mamawh lama chhuak tur midang an rawih belh tawh bawk a, ṭhu chunga hnathawh chu a hahdam lo thei lo, chutihrualin ka fit lo ṭeih ṭuih lutuk a, Opa te gym lama kal ve leh a ngai tawh a ni. 5'11 ft ka ni a, ka thau ngai mang lo naa tunhnaiah ka dulte chu kiar a rawn tum ve deuh nge ni, ka awm awl ve bawk nen, dulkiar hi ka hlau. Ka ngo hran lo va, ka hâng lo bawk. A en nuam tawk ka ni ti ve mai teh ang, ka sam hi ka zuah ṭhin a, ka nuin nasa theihtawpa min zilh takah chuan nikum kumtawpah khan ka tan a, mahse, lu buk tak erawh ka la nei tho. Ka taksa leh hmelhmaiah han chhuan em em tur ka neih pawh ka hre lo, min star vetu te sawi tam ber "A mitmeng a please. A cool" an tih hi a ni mai ang em aw. Rinliani ve thung chuan, "I hmui hi fawh ral vek ka châk" a ti ve thung. Ka fuke a sei thlurh a, ka kutzungṭang te hi Sateii hian, "Inthleng daih ila" a ti ve ziah, ani chu a bawng turh mai a. Ka nute lamah a kal ve deuh bawk a ni. Ka pate lam hi an hleitling hlawm a, Ka nî pawh Pa Tlana aiin a sang. Mizote pawh kan ei leh in a ṭhat chhoh vang nge environmentin a zir vang ni, ṭhangtharte hi tê chhia an awm tawh lem lo. An sei thlurh vek tawh a, kan zahpuiawm loh tawh khawp mai. Zonuni nen kan inhmu lo a, Teteii nen coffee kan in dun a. Zonuni nu cancer chu a lo hre ve tawh a, a khawngaih thu leh puih ve theih a chak thu a sawi luam mai. 

"Ka va kal ve khan rei a daih ka ring lo, a lainatawm khawp mai, an unau chauhin an awm tawh bawk si" a ti a. 

"Ni e, a pa tal la dam se a ṭha tur" ka ti ve mai a. Min rawn en leh thutin, "I bawhzui ta lo mi?" A ti hliai. 

Ka nui hawk a, "Engtia bawhzuiin maw!" Tiin ka hre lo der vel. 

"I hriatreng kha..inzêp a ngai lo aw" tih pahin mi rawn chum taih a, "Ka hlawhtling dawn lo a niang" ka tih chuan mak tih hmel deuh hian, "Tak tak maw? Ka va awih lo tak. I duh thu i la hrilh lo mi?" A ti leh a. Ka lu ka thing ringawt. 

"Ka lo hrilh ang aw" a tih chuan rang fê hian, "A ṭul lo..ka bawhzui ve mai ang" ka ti vat. Mipa ka nia, insawipui tih vel ka duh ve lo. Bakah Zonunpari hian ka rilru a hre vek tawh tih ka chiang. Chulai takah chuan ka tâng a, ruahmanna ka siam a ngai a ni, hmanhmawh ka duh lo va, ka tihel ang tih ka hlau a ni. 

Asanga te inah ka jacket lam pahin ka peng kawi a, Asanga te nupa chu an nu te in lamah chaw ei turin an lo kal tawh. Nuteii leh Asanga nau chiah Faka te an lo awm a, Nuteii hmel ngui tak avang chuan, "Patea'n a hau che ni maw?" Ka ti fiamthu a. 

A hmarcha mal lai dah meuhin, "Fakte, thingpui kha lo thli teh, ṭhu teh, Mampui..sawi duh ka nei" a ti hluai a. A thutak êm avangin ka ṭhu ve mai. Faka thingpui rawn thlit chu kan in dun a, "Ka hlauh ang ngeiin thil a thleng dawn tlat. I patea lah hi a zin reng a, in chhungkhur engmah ngaihtuah si lo. Ka rilru a hah ania" a ti a. 

"Eng thil? Baby te maw?" Rindan ka neihsa avangin ka ti a, a bu nghat mai. 

"Tukin midang chhuah tawh hnuah an nupa an inhnial chiam a,. Hei kar khat ṭha pawh an la innei êm lova, Baby chuan, 'Thingpui lum te hi ka hne a nia, sawtah ka lum ngai lo, machine lei ang che. Awmpui pawh la thei kan nia, ti nge lak chu in hreh viau, in peih loh ti tura rawn lawi ka ni hleinem' a ti piap piap mai a. Ka awm tih a hre lo a ni maithei. Englo a nia, nizanah khan Lalbawihi (a fanu) te nufa an rawn leng ve a, thingpui a lo lumsak kha a la na nge ni, An inna no vel phei chu Lalbawihi'n a sil vek a. Len pawh an leng rei lo, tlawmthlak a ti a niang e. In leng neuh neuh kan nei ve zut sia, thingpui lumtu ber a lo ni bawk nen, a lo ning ta a nih pawhin a mawh lo. Mahse, Asanga chhuak tur kha a zui ve a, engmah ka sawi chuang lo. Tlaia an rawn haw kha engmah pawh sawi loin an insiam sawk sawk a, an kal dawnah Asanga'n, "Baby te inah chaw kan ei dawn" a ti tawp a, engmah sawi hman pawh a ni lo. A rawn lawi aṭangin vawi 3 zet chaw an va ei tawh a, inkhap bur ka duh pawh a ni lo. Ṭha tê têa inhriattir pawh awm lo va an tawngpawng chhuah ngawt zel hi ka duh lo. Tin, ka lai tina em emtu pakhat chu i patea nen hian vawikhatmah min la ko lo a ni" a ti ta dap dap a. An inngeih viau dawn emaw ka lo tia, mak ka ti viau mai. A la mo rei bawk si lo, chutianga a pasal bula a vuivai nghal maite chu an inneih hma aṭanga Nuteii lo hmuh lâwk kha a rawn dik chho dawn a nih hmel riau.

" a..nute, a la naupang ve a, Asanga lahin a duat ve bawk si, a pangchang ve mai mai a niang. Ka sawi kha hmeichhia te chu an tlakna leilung azir ka tih kha..i enkawl thiam chuan a ṭha ve mai ang" tiin ka'n hnem ve ngial a. 

"He ṭawngkam hi a dikna chen pawh a awm ang. Mahse, Mampui, nang chuan hrereng rawh. Mo an nih hnu pawha sual hi chu an nulat lai pawn an fel tak tak lo,. Mihring ve lêm an lawina te avanga danglam thar hluah an awm thei tak tak lo. Chhungkua chu thup leh zêp nei loin inpawh dial dial ila, inhriatthiamna nen in en tlâng ila a fel duak mai. Inpawh tur erawh chuan chenho tam te, inbiak tam te a ngai thung. A pasal nu leh pa min la koh miah loh danah inpawh a duh tehchiam lo niah ka ngai. Eng thilah mah hian ka phût lem lo asin, rawngbawl nise a rawn awm hma ang tho khan ka kut vek a la nia, in chhung chêt nise Faka a che fel chi a nia, zingkarah a khawih vek bawk a. A hah em em lo. " A ti leh mawlh mawlh a. Faka hi ṭawng mawi lo ni lose, tuai tih dawna mipa va ngaihmelha mawngkaw hur ni si lo, ṭawng nêm leh pianphung pawh tlema nu zêm hi a ni a. Hmeichhe tam tak aiin a che fel a, a nu aiawhtu ti ila kan sawi sual âwm lo ve. 

"An inneih hma khan in lo duh tehchiam lo tih te kha a hre ve sia, a runluih che u pawh a ni ve thei tho" ka tih chuan, "Ni e, kha kha keipawn hetia an inneih takah chuan tiin ka inthiam lo va. Chhung inkhawm kan neihnaah tlang taka sawiin ngaihdamte pawh ka dil alawm. In inneih hma boruak kha chu theihnghilh ang u aw..chhungkua kan ni tawh ka ti ve lawm lawm, tin, a thuhrimun an inneih hma khan ṭawngkam chhia leh dengkhawng ka cheh ngai lo, Asanga hi ṭhen turin ka nawr a ni mai. Mi hrang bulah phei chuan ka sawi ngai lo. Aa..engpawhnise, ṭhatna hian lo dawngsawng zel phawt ila, kan hneh theih tak ngang loh le an awm awmin awm mai rawh se" beidawn hmel angreng tak hian a ti a. 

"U Mala hi nupui neihtir ve vat ula, mo pahnih an awm chuan an in el ngei ang a, a ṭha viau ang" fiamthuin ka ti a. 

"Hmm, Mala hi e Muanzuala ang chiah, hmeichhia ai chuan a dawr a thlang zawk" a ti hmarh hmarh a. U Mala, Asanga te upa ber leh ka û hi mize inang tak, kawm pawh inkawmngeih zet an ni a, U Mala erawh tlangval hnahkhat a la ni thung. Khua te a tlai lam ta bawk nen, ka hawnsan ta phawt a. 

Zanriah ei laiin nidanga ṭawng ngai mang lo ka û chuan, "Sate, i bialpa hi ṭhen rawh" a ti tawl mai a! Sateii bai tui hawp tum pawn a ṭhulh leh ringawt, "Ngati nge?" A ti hâ a. A hrilhhai hmel viau.

"Mipa ṭha a ni lo. " A ti leh hmiah. A bak zawh belh zel a ngai thin hi ka nu pawn a hauh zinna ber a ni, a sawi thui ngai mang si lo. 

"Eng nge a ṭhat lohna?" Ka nu zawkin a lo ti a. Asanga te inneih hma vel khan bialpa thar a nei ve kha a nia, kan inah phei chuan vawi 2 vel chiah a lo la leng ang,. Veng ṭhenawm lawk ami a ni a, tlangval harhvang tak hmel a pu a, kan inbe tam lo nen ka hrechiang ve lem lo. 

"A lerh" kham pahin ka û chuan a ti nghut a. A tawk tiu teu viau lawi si! Sateii erawh a lungawi hmel vak loh. Bialpa hi a nei ngai mang lo va, a tleirâwl chhuah khan bialpa nghet a nei a, ram danga a awm thleng khan an inngaizawng. Mahse, a han awmbo rei deuh nge ni a bialpa chuan sâwn a thlaksan pek a, khami hnu khan pakhat chu a nei ve leh awm e, mahse, "Cousin a ngah êm mai" tiin a ṭhen daih. A tirah a cousin ngah vanga a ṭhen mai chu mak ka ti khawp mai a, a hnuah, "Hmeichhia tupawh a cousin an ni zel a" a tih takah chuan ka manthiam ve chiah. Tuna a bialpa hi a duh ve hmel viau a, ka û-in tiang khan a ti leh bawk si, ka û thu hnial chu a hreh ve khawp ang. Kei takngial pawn ka û thu ka hnial ngai lo. Pindanah ka tawm deuh tlawk tlawk mai. 

Dar 9 rik hma deuhin a hman tawh ang tiin Zonuni ka call ta a. Rei fê a ring hnuah a la ve ta hram. "I buai em ni?" Ka ti a. 

"Eng nge i duh?" A ti tâwng mai. Ka ner suk a, "Damlo kha i enkawl dawn ta em?" Ka ti ve mai a. 

"Aw..kan inbe rem thei hram e. Chawhnu dar 2 aṭanga zan dar 7 thleng kan inbia a. Chuan, ka lawm e" a rawn ti leh zung zung lawi a! He nu mizia hi a. 

"A ṭhat chu, hlawh te in sawi nghal em? A ṭha em?" Ka dilchhut leh ta. 

"Ṭha e. Ka theihtawp pawh ka chhuah ang" a rawn ti nghet charh. Pu Zamawia te hi misual an nih loh bakah an hausa bawk a, hlawh pawh a chhiat ka ring lo hrim hrim. 

"Aw le.. i nu chu eng nge a an zel?" Ka ti a. Biak zui luam ka duh ve bawk si, "A ngai..karlehah inah kan hawnpui ang. A duhthlanna a pawimawh ber a" a rawn ti zangkhai vah a, a nu chuan chhuah a ngen nasa hle tawh a ni ngei ang. 

"In chhuah hmaa lo kan ka tum dawn nia" ka ti ban charh a. 

"Kan lakah ṭhat chhuah fô suh. I na mai mai zawk ang" a rawn ti chang khauh mai. Ka dang titih a, mahse, "Engvangin maw?" Ka ti nawi nak. 

"I hria e. Kan laka i ṭhat tawhnaah kan lawm a, mahse, a bak kan beisei tawh lo. Lo tel duh tawh suh..inenkawlṭha ang che" a ti nghat nghat a. A aw erawh a khur deuhin ka hria, ka ngaibbel a ni maithei. Ka tawng leh hmain, "Hei ka nu a harh a, nih phawt, muttui mangṭha" tiin a dah ta daih. Khawharna, luck lo intihna leh mahni innuihsawhnain ka khat leh ta der mai. Ka duh thu takngial pawh hrilh ngam awm loh khawpa min dang chêptu Zonunpari chuan min tithinrim a, min titlawm ngei mai. Chutitaka ka laka inlak hran duhte chu engvangin nge ka ngaihtuah reng bîk lem ang le. A chapona hi a tlawm hunah chuan ka bulah hmeichhe dang a ding tawh ngei ang. Ka tum dan a nih chu..mahse, rilru kilkhatah , "Inchhir lo se" tih a awm tho. 

Ka mutui phian mai. Inrinni hi chu kan bang hma a, hna kal pawh a nuam. Ka chhuah hma deuhin ka nî a rawn phei a, hmuh theih khawpin a hmel a ngui, a zawh pawh kan zawh hmain amah chuan, "Rinliani zan 2 a rawn haw tawh lo" a ti a. Ka lo thaw hawk. A reh ka ti reng a. Ka nuin a lo dawngsawng a, kei erawh ka hmanhmawh deuh avangin ka chhuak nghal. Ka thlen chuan ka inziak nghal mawlh mawlh a, chawhma chhunga tunkar chhung kan sum hmanna leh pawimawh ziah zawh ngei a ngaih avangin inrinni hi chu ka ṭhu rei ṭhin viau. Ka inziah fel meuh chuan chaw chhun ei a lo hun der tawh. Zawi zetin eisiamna lamah ka phei a. Eitur hi an siam tui thei zêk, vai te pawh an chhawr avangin an paratha te hi a tui thei riau. Teteii a rawn kal dawn lo va, Zonuni haw tur ka va hmu hman zuai. Ngawi rengin ka kalpel ve ta hmak a, min be lo va ka be bik hek lo. Ka awmdan chu mak a tih ka beisei thung. He thinlung zet hi chu a..

Amah Zonuni a awm dawn lo bawk a tiin ka ban pah chuan a la hma bawk nen, A nu kan tur chuan ka peng kawi a. Biteii erawh ka call lâwk chuang lo. Ward-a ka va luh chuan ka kir leh ṭêp a ni. Hmannia ka mipa hmuh addict te bakah Zonuni leh Biteii leh a nu an lo ṭhu khawm laih mai. Biteii'n min lo hmu hman si a, phur lo ru zetin ka phei ta. A nu pawh ka beisei loh deuhin a lo chechâng peih a, a harh ve viau. "Kha..i ṭha zel maw?" Tiin eitur ka ken tam vak lo chu Biteii ka pe a. "Hei vawiin chu ka harh ṭha ve lutuk..Pathian zarah" a lo ti thâm ṭiak a. A khuh zui bawrh bawrh thung. Biak vak chi pawh a nih loh avangin Biteii zawk chu enin, "I tha em? Nang?" Ka ti a, tawitêin ka nui bawk. 

"Ka ṭha mah mah, i reh si. " Pangchang deuh hian a lo ti a. Mi a ngaina ve riau a, keipawn a û vang pawh ni loin ka nau en ve deuh tawp mai. Zonuni leh mipa te erawh an ngawi hmak a, min melh ralh ralh thung. Ngaipawimawh duh lo luiin ka ṭhu ve tlat a, Atea ṭhianpa chuan a biang hiah nuah nuah pahin, "Ate, keini pawh kal tawh ila..Amy te khan min lo nghak dawn sia" a ti nuah nuah a, a meng diar diar bawk. 

Atea chuan Zonuni enin, "Kan kal dawn. Khawi pawisa chu" a ti a. Zonuni chuan a bag chu zen rak rakin cheng 1000 bawk chu a pe leh ta a, "Thil ei ṭha rawh aw" a ti sap. Atea pawh chuan nui vur vur chungin, "Min lo thlah la, kawngka bul thleng" a ti zauh a. Zonuni a tho nalh. An inzui phei lai chu Biteii te nen a nu te nen chuan kan thlir ṭhap mai. A lo let hmain Biteii bulah zawitêin, "Tu te nge?" Ka ti a. 

"Ka hre lo" tih chiahin min chhang. A nau pawhin a hriatpui loh chu a nu pawn a hriatpui ka ring lo. Addict te ka hnualsuatna ni lovin Zonunpari chuan engvangin nge khang mite kha a zuia pawisa thlenga a pek hial mai le? A tan eng nge an nih ang? A bialpa maw?! Hei kher chu rin harsa ka ti si. A rawn let leh chuan a nu biang leh chal vel chu a chul thuak thuak a, "Buhhawp chu i ei thei ang tiraw?" A ti sap a. A nu chuan, "Tlem tal chu ei ka lo tum ang e" a ti ve bawk. Kei pawh ka thu rei ta bawk a, "Ka va haw ang e, lo dam ang che aw. " Tiin nu ber ka melh a, ka nuih bawk. Biteii chuan, "Chawhmeh lei pahin ka lo thlah ang che" tih leh min zui a rual a. Zonunpari nen ṭawngkam khat mahin kan inbe ta lo. Kan boruak erawh a ṭang at at ngei mai. Biteii nen step kan zawhthlak lai chuan, "A û nen hian in inngaizawng emaw ka tia" a ti ta phawng mai! Ka nui hawk hawk a, "I â sia" ka ti ringawt. 

"Tak tak alawm. Kha pate kha an vawi 2 lo kalna a nia, an ruih hmel thei si, ka ngei a nia. Anu lah hian ṭha deuh hian a lo be ve ziah a" a ti zui nang nang a. Zonuni tana mi pawimawh tak an nih avangin a nu pawn a be chhe ngam lo a nih ka ring. 

"A bialpa a niang, pakhat kha" ka ti zauh a, "Awihawm loh" uar fê hian a ti a. 

Zanah Rinliani a rawn lêng leh ta zan zan mai. A rawlbo reng vang nge a cher deuhin ka hria. A dâng bawk. Delhi-a chhuk a duh ta miah lo hi keimah vang a nih ka hlau, mahse, min ngaizawng ang khan a awm em em tawh bawk si lo. Ka pindanah a rawn lut a, phone ka khawihsan daih. Khumah ṭhuin a phone a hmet ve mawlh mawlh mai. A tawpa tawpah a ning ta deuh nge, "I sava veh lai saw a chapo zêk mai" a ti ta hlawl a! Ka mengphawk viau maithei a ni. 

"I sawi awmzia ka hre lo" ka ti tak naa, ka mitmeng a dâwih ru ngawt ang. Nui har har hian min rawn melh hâw a. "Ka hriat theih nan min zawt suh, ka sawi dawn chuang lo. Zonunpari saw a hmain ka hre tawh alawm" a ti ta a. Ngawihsan mai ka duh tehlul nen, "Engtin" ka ti hram a. 

"A pasal hualin a phatsan tak avangin tuna a nun chapo zet saw a nei ta a ni mahna. " A ti leh daih. 

"Sawi ṭha la" ka ti nghut a. 

"I va hre châk ve mawle.,in inngaizawng dawn chuang lo. Bansan rawh" a ti ta tlat mai. He nutê hian hriat a nei em mawni le..

"Engvangin maw?" Cho zet hian ka ti a. 

"A chhan chu mipa a mamawh lo. Ka unaupa i nihna angin leh ka lo duh tawh ṭhinna ang chein ka sawi ang, bansan rawh. I na mai mai" a ti ta sak sak mai a. Ka chil ka lem khawlh ringawt. Sawi tur ka hre ta hauh lo mai. Ka nîin a rawn koh avangin Rinliani pawh chuan min chhuahsan ta a. Chauh chhan sawi tur hre si lo hian ka chau rawih thei,. Ka mu thlawp a, ka phone bawk ka hmet leh. Mipa ka nihna angin tu puihna mah dil ka tum lo va, mahse, Zonuni nuna eng emaw inphum rû hi hriatchâknain ka khat si. Atea kha a tan eng nge a nih tih chauh tal hi chu hre thei ila ka kawng zawh tur pawh a lang ruak tur a nia. Ani lahin a sawi duh dawn der si lo. 

Sunday zingah hi chuan ka nalh ve thei a nia. Chawhnu lamah erawh ka inthlahdah leh em em thung zel a. Chhun thingpui kan in laiin Biteii call ka dawng a, "Aw Bite" ka ti puat. 

"U Zosang, a nu hi.." tiin a rawn tap ta hlawp hlawp mai. Ka ding nghal hluai, ka chhungte pawn min melh thap mai. 

"Engtin nge a awm?" Ka ti nghek.

"A thi.." a ti teh tawp a. Eheu! A va rang teh thut ve le! Nimin lawkah kha chuan a ṭawng te pawh kha a ṭawng ve peih si a. Nunna derthawnzia hi aw..ka insiam sawk sawk a, Opa ka hrilh ve bawk. Ka nute ka hrilh thuak thuak bawk, Satei'n , "Ka lo kal ve dawn mi?" A ti tak nain , "Ka va kal phawt ang" ka ti a, hmanhmawh zetin damdawi in lam ka pan ta vawn vawn a. Biteii mangang leh thlaphang awrâwl kha ka bengah a ri nawn awn awn mai. Nu an nei lo ta der chu a nia. 

Ka va thlen chuan an lo la inla chhuak lo va, chhungkhat hnaivai pawh an nei si lo, an in luahna te chhungkua leh Teteii bakah kei chu kan ni deuh tawp mai. Hei tak hi a nia ka lainat zualna em em chu. Ambulance in an in lam chu kan pan ta a, Ka bulah Biteii a tâp chawt mai. Zonuni erawh a mize sakhat a rawn hmang ṭangkai ka ti mai, a ṭah te chu a ṭap ve tho a, mahse, ruahmanna a siam zung zung a. A chiâi eih lo. Hetiang taka mize nghet a nei pawh hian chhan ṭha tak a nei ang. Ka pa sawi ka hriatreng chu, "Mite hi an landan leh nihdan ang hian teh tur a ni lo. Ṭhenkhat chuan, An mizia leh nungchang te hi theihtawpa an beih hnua an neih, a bo mai hlaua an chelh ve ṭâng ṭâng a ni ṭhin. Mize nghet leh khauh tak nei tam zawkte hi chu thil tam tak paltlanga tawrhnain a hrual fei tawh an ni thin, an thil paltlang hre miah lo va lo hnualsuat hi mi mawl zia a ni." a tih kha. Zonuni nun pawh hi belhchian chuan tawrhna leh natna ten an hrual fîp tawh a lo ni thei. A thil paltlang hre miah lo va, chapo, induh ka lo ti ve ngawt pawh hi nakinah ka zahna la thlentu a ni lovang tih a sawi theih loh. An in a zau lo bawk a, kan khat titih der mai. An veng chhungah an intilar mang si lo va, hria pawh an tam ka ring vak lo. Mahse, mi hi kan ṭha êm a, mizo nih nawmna fô a ni. An unau bakah in chung nu leh paten ruang chu an kil tlawng mai a, chutiang em ema vanlai tlaa han awm mai chu! A eng emaw zawng chuan a zahthlak duh ngawt ang. Opa leh Teremi te pawh an rawn lang ve a, Teremi nu a bengvar khawp mai, ruang va kilin puante pawh a pe ve nghe nghe. Teteii pawn puan kha a lo ak sa diam a, bakah a nu ṭhatlaia chawhmeh zuara a vahna aṭanga amah hretu nu bengvar tak tak ten a nachâng an rawn hre ve zel a, mualphona dâl khawpin puan pawh a dawng ve ti mai teh ang. In chungah rawng an bawl a, kei pawh tihtur hre si lo, tihtur duh bawk si ang khan ka ṭhu ve reng ringawt. Zonuni thawhpui kha ka ni satliah ve ringawt bawk si. 

Khaw thim dawnah loh theih lohna avangin Zonuni chu ka bekbawr a, "Kan va haw phawt ang e. Zan lamah kan rawn kal leh ang." Ka ti a. 

Meng bui lâk chungin, "Aw le..in tilawmawm lutuk" pangngai tak hian a ti a. Teteii te ho nen chuan kan hawnsan ta rih. Ka chhungte bulah an chan chhiatzia leh chhungte an neih lohzia ka sawi chuan ka nuin, "An va khawngaihthlak ve, a nu pawh chuan chhungte a nei miah lo tihna em mawni le. " A ti vang vang a. Zana kal tura ka insiam laiin chanchinbua puan tuam mawlh mawlh pahin a rawn lut a, "Kha hei hian khuh ve la, naktukah pangpar i keng dawn nia. Tunlaiah mi an thi ropui tawh sia, a nuam lo thin" a ti a. Nu fel neih hi chu a nuam mang e. 

Ka û-in, "Ka rawn kal ve dawn mi? " A tih chuan, "In hre ve si lo va" inthlahrung tak hian ka ti a. Nui ruh ruh chungin ,"Kan monu tur pawh hmuh a chakawm alawm" a ti nulh. 

Lai zet hian ka nui tawi tak a, "I ho " ka ti ringawt. Teteii te nen bawk kan phei leh ta a. Naktuk lamah Home-a kan thawhpuite pawh rawn lan ve an tum a niawm e. An in a tê êm mai a, kan khat ngang mai. Ruang pawh kan kilpui lo thei lo va, Biteii zawk a ṭap reng mai. Zonuni erawh a intipachang thei viau. Ngawi rengin a nu ruang chu a melh tlawk tlawk zel a, thil tam tak ngaihtuah hmel a pu a ni. Zai a nuam phian mai. Zonuni nu kha a damlaiin a tlawm êm a, a thih hnuah Pathianin a chawimawi ve ta te pawh a niang e. 

A tukah Zonuni nu pawh chu vuiliam a ni ta a. Thawhpuite an rawn kal ṭhap bawk a, thlate pawh kan lakpui ve kha. Ka chau viau mai. In ka thlen chuan bual pawh inbual lovin ka muhil bawrh bawrh. 

Chutiang chuan Zonuni nu thih sarhu lai chu amah Zonuni vang em em pawh ni loin an in lamah ka tal tam ta viau mai a. Biteii lahin min lo thlahlel ve tumhrang bawk nen. Zonuni nen pawh pangngai tak chuan kan inbe leh thei tawh a. Atea a tihte pawh a sarhu lai khan vawi 3 vel ka hmu,. Mit tikham zawngin an khawsa lem lo bawk a, ka ngaipawimawh duh lo. A thihchamah pawh thawhpuite nen kan râl nghal a. Kan lo khawngaih tlang viau ni tur a ni, a phal pawh kan inphal zau viau mai. Dr. Dinpuia pawh kha a rawn lang ve nawlh, mahse, Zonuni mitmeng râng ka hmu thei, ka lo lawm ru ve ngawt lehnghal. A thihcham aṭang chuan ka tlawh khât ta deuh a. Chhungkaw thilah buaina neuh neuh a lo awm ve sek bawk nen..

Sateii khan a bialpa chu a lo ṭhen ngei a, mahse, ni khat a dawrah kha pa pui khan buaina a lo siam niawm tak a ni. A sawi duh lawk lo va, Tepuii ka atangin kan hre ta tho. Mahse, a chhunzawm tawh loh te chuan tiin kan ngawi ta rih a. Mahse, sunday tlaia an ṭhian hova an leng khawthawng ve chu lo kalchilh lehin kut hial a lo thlak a. Tepuii'n ka û a rawn bia a, hmanhmawh zetin ka û nen kan va tlan a. A bialpa hluite chu an lo insaseng hman hlauh mai! Umzui kan tum chuan amah Sateii'n, "Min hruai haw zawk rawh u. Nidangah che mai rawh u" tiin min ngen a. Kan umzui ta lo. Motora ka lut tur ka hawi kual chuan ka duh loh tawp thil ka hmu ta a ni. 

Zonunpari leh Atea te, fianrial taka an ṭhu dun lai leh mûk taka an inkawm lai chu..Car kawngkhar ka khar na hle tih ka hria.