Parchuailovi 3

PARCHUAILOVI..(3)

Ziaktu : Toni Râlte

Asanga te inneih man hlan pawh tluang takin kan nei thei a, harsatna em em a awm lo. Zuali erawh ka hne lek lek zel. Rinliani pawh Asanga te inneih hmang turin a rawn haw a, a rawn danglam deuh nge min mitmei tawh miah lo va, ka thaw huai mai. Inneih ni pawh chu a rawn inherchhuak ta a. Chawhnu dar 1-a innei tur an ni bawk a, chuti teh ruaiin kan hmanhmawh lo. Mahse, Nuteii hi a phili chi a ni ve a, a aw chhia chhiain a fate bakah midang pawh a vin khar khar reng mai. Hall-ah chuan kan ṭhu ve ta ṭhap a. Ka zâm lem lo, moneitu ka ni lo bawk a. Baby te pawh an nalh dun viau e. Buaina tawk loin an innei fel thei a, thlalak luklak chhung a rei sia, ka ning hman ṭêp. Asanga te in lamah chaw ei nghal tur a ni a, keini pawh kan inthlak nghal sawk sawk. Opa a rawn lang ve zuai a, Teremi û kha rin aiin a daihrei zêk a, Asanga te nena inkawmho vek kan ni bawk a, a rawn ngaipawimawh khawp mai. Chaw erawh a ei hma a, kan hrethiam khawp mai. A bialnu hi a duh ve viau mai a, A hma chuan kan zingah bialnu nei rei lo thei ber, hmeichhia play mai mai ṭhin kha a ni ve a, tuna a han puitlin tak hnua a bialnu nen hi chuan an nghet ve ve dawn riauin ka hria. Chaw chu kan ei har zêk a, ei tura min rawn koh laiin buaina ho angreng tak a chhuak ta tlat mai. Rinliani mipa rawn hruai khan Salemi ka nî Zami fanu, model ve angreng ka tih kha, kha kha a lo chhuahpui daih niawm tak a ni. Ni Zami mangang chuan Salemi chu a call ṭhin, an rawn thleng thei si lo. Mi zawng zawng chaw ei hnuah rui phet phâwtin an rawn thleng a. Ka ûin ka nî manganzia a hriat avangin, "Chaw ei la, haw ang che. " Tiin Salemi chu a lo khak ve a niawm e. A mipa kalpui chuan lo huatpuiin ka û chu a lo beng khanglang a niawm e, a chhan pawh an inchhang ve maithei. Buaina a punlun loh zawk nan tiin Patea leh kan unau dangten ka û chu an lo khap a. Mahse, ka û a lungawi thei tlat lo. Salemi te'n chaw an eikham ta maw tihin a va pan hnai set sawt a, a mipa hruai bulah chuan, "Ka lo beng ve lawk che" tih leh na zeta ben a rual a, a awp rawk nghe nghe. 

"Tikhan ka lungawi chiah" tia kalsan leh mai a tum chu, chupa chuan a rawn sual zui leh ta mai si. An buai ta deuh a, mahse, Pa Hminga bakah patea te'n an ṭhelh thei hram. Ka û pawh inthunun thei ve tak a ni bawk a, a insûm zui ta a. Salemi zu rui lah a ṭap chiam bawk. Chhungkaw mualphona te pawh a ni thei awm e a. Midang zawng kan fîm ve tehreng nen. Rinliani ber pawh hmuh tur a lo awm leh tawh chuang lo. Chutiang tehnuaih kan nih vang nge kan chaw eilaiin ka ni Zâmi'n a fanu a vuipui lehpek a, thinrim engphiarin, "Muanzuala hian kan nupa min timualpho, ka fanu thlengin" ti ta daihin an chhungkuain an haw tau ta daih a! Patea pakhat zawk Asanga pa ni lo zawkin, "U Zami zawng a danglam hrim hrim, mi kâwi a nia. Engahmah ngai suh u" tiin boruak a khap dai thei ta hram. Chutiang a nih mêk laiin kan chaw eikham Asanga pindana kan awm laiin Baby chuan, "I chhungten min han duh lo vel a, in lo nasa hle sia" tiin a pasal an chhuahchhal ta pang zui! Asanga a ngawi reng ringawt. Ka lung a dam zân lo naa kei pawn ngawih ka chuh ta rih a. Opa call ka dawng zui ta zat bawk. Pawnah ka va be ta a. 

"Tun mai khan Teremi û chu a kal chiah e. Ka rawn hrilh ve hrim hrim che" a rawn ti a. Inneih buai nen vawikhatmah ka kan ta bawk si lo chu nuam lo ka ti hle. Teremi nen kan innêlin min ngaina der ve tawh si. Eng em em tih a ngai tawh lo bawk a, Asanga te bulah chuan ka sawi a, "E! Han kal rawh. I kan ve hman ta bawk si lo va. Hei ṭhian dangte an awm alawm" tiin min lo hrethiam khawp mai a. Kei pawh inah ka haw phawt a, ka intihfai hnuah Teremi te in lam chu ka pan ve ta ngawt a. Opa erawh ka bia. Tin, Zonuni pawh ka call a, sawm tura min ti chu ka lawm ru ngei mai. In an va singsak avangin a haw leh phawt a, a lo insiam leh mêk zawk a. Biteii'n thingpui min lo pe nghal var. "U Mabiaki chu ka khawngaih ê..a hmelṭha thei sia, an tuar ngawt ang" a ti niah niah a. Ni e, khawi hmunah pawh lenglai thihna hi chuan min ṭhâwngin kan sûn tlang viau ṭhin reng a ni. Zonuni nu erawh a nawmsam chiah loh avangin a mu tawh thung. Zonuni pawh rawn inpeihin kan chhuak ta a,. A vawt hran lo naa, "Zing lamah chuan a vawt ve deuh ang" tiin shawl a keng thlap. Opa pawh kawtah a lo awm vûng a, makpa la ni hek lo, lo phusak ve chiam kha nuam a ti chiah lo a niang. Kan pathum chuan kan lut ho ta a. 

Ṭhalai pawh an tam narawh e,. Zonunpari chu ka rin ai daihin a zaithiam. Hla a hre reuh bawk si. "Reilotê ka lo jection ve tawh ṭhin sia,." Tiin puanin a va khuh ve kha a nia,. A nachang pawh a hre viau e. Dar 1 a la ri lo deuh ang tihin Zonuni chuan call a dawng ta tlat! Biteii a lo nia. 

Zawitêa biain a meng phâwk deuh. Min rawn en zawk a, "Ka nu a buai deuh a niawm e. Ka haw ang" tih leh kal mai a tum a, "Ka lo kal ve ang" tiin ka ding ve zat. Ṭhu leh rihin Opa chu thil awmzia ka hrilh a. "Chanchin rawn sawi rawh aw" a ti a. Ka bu nghut. Zonuni chungchang eng vakmah ka la hrilh lo va, a tan chuan a hrilhhaithlak deuh maithei a ni. Zonunpari nen kan inzuichhuak lai chu min en ṭhup hian ka hria a, ka zak ve lek lek. Kan va thlen chuan an in chung nu niawm tak leh Biteii ṭhiannu ni ngei tur tleirawl hi an lo awm ran a, a nu chu Biteii chuan a lo bawihsawm nasa. Mangan hmel zetin Zonuni chuan a nu chu a va sawi nawk nawk a, "Engtin chiah nge a awm?" Tiin a nau chu a zawt pah bawk. A nu lah nikhaw hre lo niawm takin a chhing tlat a, a zawi nen bawk si. A marphu erawh a la awm thung. Kei atak pawh ka hamhaih ve bawk nen, tih ber tur ka hre lo hle. Biteii chuan, "Ka inthiarpui hnu lawkah a rawn rum kâwk kâwk a, ka va en chuan, 'Ka thaw a chham' a tia. Ka tung tho vat a, nikhua a hre lo zui nghal ringawt. Nu Remi leh Tlingi te hi an awm sa hlauh zawk a" a ti khur dar dar a. Zonuni a thaw hawk. 

Harhchhuak thutin, "Damdawi inah chho ila. Mahse, bike ka keng" ka ti vut a. 

Pi Remi an tih chuan, "Hei Mama ka bia a, sawtah an lo tir kawkalh a, a rawn thang mek ang" hlauhthawn hmel tak hian a lo ti ve a. Ka thaw deuh huai. Zonuni chu lungpui ang maia nghet ni ṭhin mah se; a nu meuh chutianga a han awm takah chuan chiâi hmel te pawh a pu ve..mahse, inthunun erawh a tum nasa tih a lang. Hnem dan vak ka hre si lo,. "Hlauthawng suh. A ṭha ang" ka'n ti ngawt a. Keimah ngei pawn ka thusawi chu ka ring zo lo. Motor pawh a rawn thleng ta a, Zonuni nu chu a zâng bawk a, ka pawm lawp a, motorah chuan ka hlang lut ta vat. Zonuni leh Biteii te chuan an ṭhutpui nghal a, in chung nu pawh a hmaah a rawn ṭhu lut ve. "Ka lo zui ang che u" tiin ka bike hunna lam ka pansan a. 

Casualty-ah kan luhpui a, an han en vat vat chuan Emergency ward lamah an dah lut ta chûk chûk a, Zonuni te tan chuan a thlaphanawm duh ngawt ang. Kei lah mi a zawnga mi hnem thiam lo ber mai ka ni si. Opa nen kan intext zuai a, Teremi bula thupha min lo chawisak mai turin ka ti bawk. Oxygen nen an ni rup tawh mai si a, ward-ah chuan mi panga an lo awm sa a, a thaw ipikthlak ngei mai. An awmdan tur ka zawh chuan, "Kan riahpui mai loh chuan" a ti a. Pi Remi chuan, "In lam chu lo ngaihtuah suh u, chanchin min rawn hrilh zel u la aw" a ti mawlh mawlh a, lehlamah an in luahna te an fel hmel viau a, an tan pawh a thlamuanthlak ve deuh ang. Pi Remi te nufa kal hnuah pawh ka la awm ve ta rih a, awm ṭhup an phal loh avangin pawnah kan chhuahsan rih. Biteii chuan, "Û, a thi lovang tiraw?" A ti thâm ṭiak a. 

Zonuni a ngawi reng. Keimah zawkin, "Mangang lutuk suh u, damdawi in thlenpui hman hi chu an damchhuak tlangpui a nia" ka ti ve ringawt. Biteii chu coffee ka zu lamtir a, a kal hlanin, "Ka intuak ngah hman ṭêp asin le.. retheihna hi ka hua" a ti sap sap a. Tun ṭum a hmel chu puih ngai ngawih ngawih hmel a ni. A lo inthununna bangte chu a nu hmangin chunglamin a ṭhiahsak pawh a ni mahna. 

"Eng êm a ti lovang,. A ṭha mai ang" tih bak han sawi tur ka hre bawk si lo. Asanga emaw Opa tal chu awm se an hnem thiam deuh tur. 

"Ka nu hi ka engkim a nia sin. Ka tan a hlu lutuk. " A ti leh a. Ngawi rengin mi tei vel chu kan thlir reng a. Biteii a lo thlen hnu lawkah Zonuni chuan, "Min hawnsan tawh rawh, chanchin ka rawn hrilh ve ang che. Kan ṭha mai ang." A ti a. A inthlahrung tih ka hria, "Ni e, eng emaw a awm chuan min hrilh vat rawh aw. Luh ṭeuh an phal bawk si lo va, va chawl hahdam tawh rawh u" ka ti a. Awm ve reng khan ka mitmei an vêng ve tho si, a nu bulah awm se ka tihpui a ni. Rilru buai angreng takin in lam ka pansan ta a ni. 

Ka muhil thei lawk lo, a nu dinhmun khatiang a nih laia lo va biak sek kha nuam ka ti bawk si lo. Teremi te in lamah ka lo phei leh mai lo ni te ka ti leh hnuhnawh. Ka hriat loh karin ka lo muhil ve sek a niang, ka harh chuan dar 8 a lo pel ṭêp. Chawlh ka la neih avangin ka nu ten min kaitho duh lo a lo nia. Tukthuan eikhamah Zonuni chu ka bia a, "Hei rin ai daihin a zia chho a, tihbuai che ka hreh a, ka lo hrilh ta lo che a nih kha. Tlai lamah ward pangngaiah min sawn dawn a" a rawn ti siam siam a. A aw pawh a zangkhai deuh. 

"A va lawmawm ve aw. Chaw in ei tawh em? Ka lo keng ang aw" ka tih chuan, "Ei tawh e, heta mi kan ei a. A ngai lo" a ti niah niah. Sawi duh eng emaw nei nia ka hriat avangin, "Mamawh in nei em? Sawi hreh suh" ka ti vat a. 

"Englo, nizan khan kan inkeng kim lo deuh a, mamawh lamkhawm a ngai a, Teremi te ina i phei dawn tho chuan ka lo bet ve lawk dawn mawni ka tia" a ti ta a. Chutiangte han inthlahrun em em zel aw..Teremi te ina phei ka tum chiah lo, Asanga te in lama phei ka tum zawk kha a nia, mahse, "Tehreng mai. Ka rawn lang har lovang" tiin ka dah ta a. 

Ka nuin, "I ni Zâmi lah chu a la lungawi lo viau a niang, zingah mi rawn ankhum chiam mai a. A buaithlak ṭhin mang e " a lo ti ve niah niah a. Ka û erawh a chhuak tawh. 

"A ho êm mai, tau mai mai rawh se" ka lo tihsan. A mizia kan hrechiang tawh a, engah teh vak kan ngai tawh lo. 

Damdawi in ka thlen chuan Zonuni chu a lo inpeih at tawh a, a nu chu zing lama a rawn harh zawk thu leh an chiu mut leh thu an sawi a, naktukah tlema a zia deuh chuan test eng eng emaw an nei dawn a niawm e. Eng natna tak chu vei ang maw? A hmel dawldâng mai bakah a kut leh ke rawn vûng chho chuan ngaih a tiṭha lo zual. Rei awm theih ni hek lo, an in lamah kan inphur phei leh ta vang vang a. An ṭhenawm lawkah chhiat tawk an awm a ni bawk a, motor bakah mihring an tam viau. Tuman min hre ve chuang lo bawk a, ka zak lem lo. An mamawh tur ang ang chu bagah a khungkhawm zung zung a, "Kar khat chawlh ka dil a, min phalsak ang em ka hre lo. Ka tibuai zing tawh sia, min bân daih maithei a ni" a ti mawlh mawlh a. Ni e, chawhma chhung thawh phalsak a ni tawh a, tuna chawlh a dil leh chuan saw lamah hna an duh ve bawk nen, a rilru a hah ve viau ang. Tihtheih nei ila ka ti mang e. A inkhung zawhah muangchâng lovin kan chhuak a, "Teremi te ina kal ka tum chiah lo va,." Tiin a hmain ka hrilh tawh bawk a, chutah pawh chuan a inthlahrun hmel hle. Hetiang hmel put hi a inhmeh hlawl lo, ka hmuh hmasak ber nîa a awmdan ang khan awm leh se ka duh, khatiang hmeichhia khan min tiphur ka ti dawn nge min cho ka ti dawn. A phurawm zawk daih. Damdawi inah ka thlah leh thlap. Asanga ten shooting nei tura min lo call sek tawh avangin ka kalsan ta mai. 

"Ka lawm e aw. I lo awm hi" tia min thlahna ṭawngkam khan ka nilêng âwm a tihnawm phah ngei dawnin ka hria, rilruah a ri nawn sek mai. Asanga te nen chuan Patea te huanah kan liamthla zui leh nghal a. Mipa tan chuan shooting hi a ninawm duh riau,. Patea te huan hi a changtlung tawh bawk a, a nuamin thlalak nan pawh a mawi ve viau mai. Kan han ṭan chho a, ka ning ṭan der mai. Mahse, ṭhian kan ni bawk a, keini chu a ngai tam ve lem lo. Zuali zawkin lak dun a rawt reng a, hnial kha a nuam chiah si lo. Haw vat vat ka châk kher mai. A zualpui kan tih zawha thil kan ei lai chuan, "Zosangliana hian bialnu a nei lo tak tak em ni?" Zuali'n Asanga bulah a ti lehpek a, Asanga lahin, "Nei se ka hre tawh ang" a ti si. Ka lo nui vur vur ringawt. 

Baby chuan, "Zuali nen hian ni ve tawh mai r'u, in induh reng, a rukin" a lo ti ve sek. 

"Ani te chuan min duh lovang. Ka tan a sang lua" inla zei fahranin Zuali'n a lo ti. Zonunpari ka lo mitthla daih thung. Duhzawng hi mihring hian kan nei ve tlat si a. Hawn ka rawt zing bawk a, kan tlai chhe lo viau. In lam pan ta lo chuan damdawi in bawk ka pan leh, Zonuni chu ka call bawk a. "Hei ward pangngaiah kan insawn dawn mêk a. " A ti a. Ka han pui ve hman chiah chiah, an ward-ah pali chauh an lo awm a, extra bed pawh an la theiin a rinawm. Zonuni chuan, "Pakhat bakin awmpui an phal tawh lo va. Zanin chu keiman ka riahpui ang" a ti a. A nu pawh a meng peih ve tawh a, thil ei erawh phalsak a la ni lo thung. 

"Chawlh i dilna chu?" Ka tih chuan, "Min remtihsak lo va. Ka awmdan tur chu naktukah an sawi ang" a ti ta a. A nguizia ka hmu thei. "A va zia lo ve,. Mahse, Zonun, bân ai chuan kal hram dan ngaihtuah la, chawhma chauh alawm i kal tawh dawn. Chawhma chhungte chu Biteii'n a lo awmpui ang a" ka ti mawlh mawlh.

"Nia, chu chu ka ngaihtuah ve tho. Mahse, chawhnua ka enkawl tur pasal khan min rawn nawr sek tawh a, rilru a chawl lo" a ti a. Ni dawn tak e. Hna a nei thuahhnih bawk si, nun hi chu aw. 

"Kha pa kha chu i harsatna engkim hrilh la, a hrethiam mai lo'ng maw?" Ka ti ve a. 

"Hrethiam thei lo, naktuka ka kal lo a nih chuan midang a zawn tur thu a sawi a. Hlawh a ṭha sia, ka ui lutuk" a ti chuai raih. Sawi leh mai tur pawh ka hre lo, ka nêp ve bawk si, zahzelah, "Englo, midang enkawl tur ka lo zawnsak dawn che mi?" Ka ti ta ngawt. 

"A ngai lo, keimah vangin intibuai tawh suh. " A ti nghat a,. A mitmeng pawh a danglam nghal vek. Kha nu, A hmaa Zonunpari ngei mai hmel leh mitmeng kha ka hmachhawn leh ta ran mai. An harsatna avanga buai leh chiâi hmel kha thinlung khauh leh sak tak hmelin a rawn thlak leh vek tawh. 

"Kal tawh rawh. Lo kal tawh suh." A ti leh fak a, min melh lo nachungin ka hamhaih tih a hriat tho ka ring. Biteii a rawn lang a, Zonuni chu a kal nghal daih. Biteii chuan inthlahrun hmel tak hian, "U Zosang, i fel ee, i lo kal ziah a. Nangmah bak kantu pawh kan la nei lo" a ti niah niah a, kei erawh rilru buai ru zetin ka lo âw ê liam ringawt. Kan in pana ka tlan mêk lai pawn Zonunpari hmel inthlak lai kha mitthlaah a cham ngut ngut mai, ti nge? Hetiang hian a awm? Engvangin nge lungpui nih chu a duh? A past life ka hriat tlemtê te khan a nunah nghawng a la nei lian hle tihna em ni ang? Nge chhan dang a awm zawk? Nasa taka hliam a lo ni tawh a, a kehchhe vek tawh tih ka hria, ka thu hriat kha thudik a nih ngai chuan.. mahse, khatiang a nih vanga amah pui duha a ṭhian nih duh thlenga a hlat hi ka hrethiam lo. Engpawhnise, tu nge luhlul rei thei zawk kan hria ang chu. 

Ka inbual zo ka inthlak laiin Asanga'n min lo call a, "Ui kan talh leh chûk chûk a, lo phei leh mai ta che. Opa pawh rawn kal a tum" a rawn tih chuan ka khi suk. Tunah tak chuan ṭhiante bula awm ka mamawh rih tlat,. Tin, Asanga awki aṭang khan a veilam a awm dawn tih ka hre ve tlat bawk. Keima tawka ka buai rukna te hrechang lo lêka ruih ka mamawh te pawh a ni mahna le. Ka inkhalh phei leh ta a. Asanga te in hnuaiah rawng kan bawl a, kan ri ve laih laih mai. Baby ṭhiante bakah Asanga ṭhiante ho bakah kan cousin ṭhenkhat te an rawn tel ve bawk. Opa pawn tunhnaiah a men rim deuh avanga chawlh hahdam a mamawh thu a sawi ve luam, a dik ang. 

"Teremi hi i duh ve ta riauin ka hria, amah a fel bawk a" ka tih chuan a nui vur vur a, "A mak ngawt mai. Ka bialnuah chuan ka la duh ve ber chu a nih hi..a danglam bik ka ti mai, min ngaihsak thiam a, min zah thiam bawk. Tiang hi mipa te duhthusam chu a ni mai lo maw?" A ti sur sur a, a sawi dik viau. Mipa kan nih anga min zahthiam hi an lo hlu khawp mai. 

"Nang pawh kha nu nen khan in kal thuk riauin ka hria, min hrilh hun i la ti loah ka ngai a" a ti a. Ka hnual deuh. Vawiin lama Zonuni nen kan inbiakna ka ngaihtuah let a, beisei a bo angreng si. 

"Ka ngaina ṭan riau, mahse, a inhung bîk, ka sawithiam chiah lo" ka ti nuah nuah a. 

"Teremi pawn a sawi kha, mipa a ngaihsak lo a tih kha.."a lo ti ve mai. Han sawi thui vak tur ka nei rih lo bawk a, thildang kan sawi ta daih. Chaw pawh dar 7 dâwnah kan ei thei ta chauh a, kan lem hlek hlek a, kei phei chu ka ni deuh chiai chiai tawh. Ka dose hi a hniam khawp a, no 2 ka in pawn ka ti chhulh tawh zel. Opa hi rui thei lo kan tih ang chi, in thei hle si ang kha a ni thung a. Asanga erawh ruih tawh chuan zai leh lam lama thawk tlat chi a ni bawk. Kei chu ka ṭawng duh bakah ka zakthei lo viau zel. Hmeichhe ho pawh chuan an in ve tih ka hre ru kar. Baby hi chu ka hriatsa a nia, Zuali pawh a meng ve phât tawh. Uisain kan charge ta bawk nen, chaw eikhamah meuh chuan a in ve lo te an hah phah viau ang. Kan che peih hlawm der lo a ni e. Kei pawh chaw ka ei hnem sia, ka zawi nguai tawh. Zuali lahin ka easy lai a ti deuh nge ni mi nêk salh salh reng mai a, ka kutte chu a rawn humin a kheuh neuh neuh thul. Mahse, a mak khawp mai, mipa tam zawk hi kan nih ka ring a, rilruah midang an len zawk miau chuan lo ti deuh phêt phût mah ila hmeichhe dang han khalhfal hi phurna a awm miau loh avangin kan peih meuh thin lo. Keipawh chutiang chiah chu. Zonunpari ka la ruihchilh zui a, Asanga leh Opa te bulah rem leh rem lovin kan inbiak dan leh a mizia te ka sawi zawt zawt lehnghal. Anni chu ka ṭhiantha an nia, ka ringtawk bawk a, tin, ruihhnan miau chuan a inthunun hleihtheih loh. Zu rui ve ṭhin chuan in hrethiam dawn nasa. 

Rinliani ṭawng lâng lâng ka hriat rual chuan ka harh deuh kâwk mai. "Hmelchheho, ti nge in ruih phung a? Ṭhing lutuk. " A ti hlak hlak a. Ka bula Zuali a ṭhut lai tak a ni. A rawn kal phei tawrh tawrh a, "Zosang, haw ang, min thlah a ngai. Nang pawh i rui lutuk reng reng" a ti hmarh hmarh a, mi rawn pawt bawk. A kut vaithlaksakin, "Haw ve mai teh. Ninawm" ka lo ti hmuk a. Ner sakin, "Thu hi awih thin teh. Hawh.." tiin min pawt leh, Zuali lo kamnam ve tawh si chuan, "A duh lo a nih hi..nge mi duh lo chung pawh chu i tihluih chiam" a lo ti ve hlak a. 

Rinliani a ding mar nghal awt. "Lo inrawlh ve lo la a ṭha a ni mai. A bialnu pawh i ni lo" a ti ta zêk a. Zuali lah zâm tawh hek lo, "I hre lo, a bialnu tur ka nih hi" a lo ti ve sak. Midangin an rawn khap liam liam a, Kan Rinliani lah chuan verther zeta nui chungin, "Kan ni lo ve ve..A bialnu tur chu maw damdawi inah a awm" a ti chang ta fak a. Ka mengphâwk hrû mai. Opa leh Asanga te hmelah pawh mak tihna a lang thei, anni pahnih bulah bak Zonunpari chungchang ka la sawi lo. Anni tan midang bula sawina hman a la awm lo bawk. Rinliani chuan engtin nge a lo hriat teh daih?! Nimin piah maiah Delhi aṭangin a rawn haw chauh a ni sia. Min zui ru tihna em ni ang? Nuteii a rawn kal ta hlauh a, "In insingsak fel chuan ṭin darh hnai rawh u. Inleng an awm ang a, a ṭhen in kai si, a zahthlak" a ti lang lâng a. Kei pawh rang taka thovin ka ṭhiante ka buk khum zauh a, tumah nghak lovin ka tlanchhuak vang vang. 

Ni a liam a, hun a kal ve zel a. Zonuni pawh a hna ngai a rawn chhunzawm leh thei a, mahse, private-a enkawl tur a hmuh erawh a chân ta tih Teteii ka aṭangin ka hria. Min hmuh a hlau nge min pumpelhna a zawng char char a, chawhma chhung chauh a rawn kal tawh si avangin kan inhmuh lohna pawh ni 4 lai a ni tawh. Damdawi inah an la awm tih zawng ka hria, ka text ve pawn min reply ngai si lo va, ka be zui ta bik lo. Ka beidawng ta tihna erawh a ni lo. Nakinah a mize ngai, inthlahrung leh nun tlawm takah khan a let leh ka beisei a ni. Tuna a mize chapo leh induhtawk tak kha mipa tan phurawm viau turah ka lo ngai rawk a! A nun derthawng leh puih ngai ka khawngaih vang lek zawk a lo ni tih ka hrechhuak. Opa bula a mize inthlak dan ka sawi ṭuma a thusawi, "A tan mi eng emaw tak i nih tawh avangin a hlauthawng a, a biru mai mai a nih chu" a tih kha a dik beiseinain ka khat a, a tan mi satliah ni ila chuan ka lakah a mizia a thlak hlawk kher a ngaih ka ring lo. Teremi pawh ka râl ve tawh a, an chhungkua an hûng sia, an la ni deuh niaih bawk nen, ka leng ta rih lo. Rinliani a ninawm leh ṭan tawh a, Delhi-ah lah chhuk a tum tawh der si lo. Zonuni a lo hriat ve ngawt dan lah kha ka zawt duh hauh lo va, ka zawh chuan ani pawisak nei lo hian Zonuni tan hnawk a siam ka hlau a ni ber. 

Ni khat ka hnathawh laiin ka save loh number hian min lo call a, "U Zosang, keimah Biteii, i va reh em em?" A rawn tih chuan ka lungphu a rang sawt. Ani number tal nei ila ka lo ti rilru thin kha a nia. 

"Reh em ni? Ka buai ve lutuk a, tunlai chu..eng nge in chanchin zel?" Ka tih chuan a ngawi dat a. Ka ngaih a lo ṭha lo hman deuh..

"A û-in a la hrilh lo che mi?" A rawn ti daih.

"Hrilh nang. Eng nge ni a?" Ka ti a, "Ê..in inhmuh loh chuan a hrilh thei leh si lo che. A phone a chhe daih alawm. Ih, anu chu a chuap a cancer a.." a ti zawi ta raih a. Thil pahnih ka hre ta phawt, Zonunpari phone a chhia,. Tin, a nu a cancer bawk. Rilru tibuai thei thil ve ve a ni. 

"Ehe! A va zia lo êm..? A pawi hle mai. Engtikah nge a cancer tih in hriat?" Ka ti a. 

"Niminah khan. Ka ṭap nasa lutuk, cancer êm hi chu ka ring phal lo va, U Zosang, chhungte kan nei bawk si lo, a hrehawm lutuk" a rawn ti ṭiau a. 

"A van pawi tak aw. Ti nge ka number i neihte chuan min lo biak vat loh?" Ka tih chuan, "A û lawm, midang hrilh a phal tlat lo va. Mahse, i rawn kal ngai tawh si lo va, engmah i hriat loh chu a dik lo ka tia ka rawn bia che nih hi, A û phei chuan hria se min ngei maithei" a ti mawlh mawlh a. 

"Engtin nge ka number i neih?" Ka ti vat a, "Hmm..hman deuhah a û-in a phone batery low vangin ka phone aṭangin a lo biak tawh che kha" a rawn ti nghat. Ka hrechhuak zo miah lo lehnghal. A pawi chuang lo ve. 

"Chuan, damdawi inah in la awm anga tiraw?" Ka ti leh a, "Aw, anu chuan chhuah a duh a, a û-in a phal lo va. Kan la awm rei ang" a la rawn ti ta deuh deuh. An lainatawm chhungkua hle mai a. "Tlaiah ka lo peng haw ang, i û hrilh kher a ngai lo aw" ka tih chuan, "Hrilh dawn pawh ni ila a awm lo. Dawrah a inhlawh daih alawm" a ti a. Hmaichhana zawhchian ka duh zawk avangin kan inbiakna chu kan titawp ta rih. Rilru a kal thui angreng. Nu ber cancer chuan a fateah nghawng eng emaw tak zawng a nei dawn ngei a, Zonuni hian enkawl dam theih a ni lo tih hre mah se; a theih chen chen a nunna chelhsak a tum dawn..chuta a mamawh ber chu pawisa a ni. Hlawh ṭha tak a hmuh theihna lah a thawk thei leh ta si lo. Hringnun hi a fair lo fô ṭhin chu a nih hi a.. 

Damdawi in ka thlen chuan nu ber pawh ka beisei ai daihin ka hmu nula..drip an lo khai a, a ke erawh a vûng nasa hle. An hrechhuak tlai a ni bawk a, a stage pawh a sang thawkhat tawhin ka ring. Eitur ka leisakte chu Biteii chuan a dahṭha vat vat a, lawmthu a sawi siam siam bawk. 

"Ti nge i lo kal duh tawh miah loh a?" A ti leh a, ka reh ve thut lah tak a..a tan chuan hriatthiam a harsa ve ang. Ka buai thu bawkin ka chhang leh. 

"I û chu eng dawrah nge a thawh a?" Ka ti a. 

"Restaurant-ah nia, khulai lawkah khuan. Chawhnu aṭangin a thawk ṭhin a, hlawh pawh a hlawh tam lovang ' a ti mai a. Nurse kha restaurant-ah inhlawh lo thei lovin a awm ta chu a nia. Mi hausa tawk chu ni ila ka pui ngei ngei ang mawle. Inkan hun a tawp leh ta mai si, ka chhuahsan leh ta nge nge a. Biteii min hrilh a û thawhna dawr zawnah chuan ka ding dat a, He restaurant hi an hawnna a la rei vak lo nachungin a lûn thei viau. Tlai lamah chaw ei an awm ve ṭhin bawk nen,. Bakah a nuamin a changkang bawk a. Rilru buai ru deuhin ka lut ve ta a. An hawn tirh khan Opa nen kan chawl ve tawh. Zanriah an buatsaihna cabin lam ka pan nghal a, ka book lâwk lo naa a la âwl turah ka ngai. Kaw khat chu a lo awl tak tak a, Amah Zonuni ngei rawn lang se ka tih tehreng nen mipa kei aia nau deuh tur smart zet hian min rawn buaipui a. Ka hnual rawih mai. Menu chu ka'n en a, ka hriat loh eitur a tam ngei mai. Mizo pa ve tak ka nih avangin mizo chawhmeh ka hriatchian deuhte chu ka order ta tawp a, a thuphungin, "Hetah hian Zonuni kha a thawk ve tiraw?" Ka ti zauh a. Waiter chuan nelawm takin, "Zonunpari i tihna em ni?" A ti a. 

"Aw ni e" ka ti vat. Nui var var hian, "Aw thawk e. Ani chu Restaurant lamah a duty" a ti a. A tawngkam a felfai khawp mai. Ka eitur order pawh an rawn peih ta vat a, a tui hmel hlawm viau naa, an bai chuan ka nu bai a tluk lo. Mahse, ka puar lutuk tho. Ei man erawh a sang viau mai. Zonuni hmuh hram ka duh sia, engtin nge ka tih ang aw tia ngaihtuah nuah nuah chungin bill chu ka pe a. Waiter bulah, "Zonuni chu a hmuh lawk theih ang em le? A pawimawh riau a.." ka ti leh a. 

"Ka lo hrilh ang e. Lo nghak rawh" tiin a bu nghut a, a kal zui nghal. Ka lo thu ta ran a. 2 mins velah parda chu rawn keuin Zonunpari chu uniform nen a rawn ding ta ran mai. Min melh chiang fahran bawk sia, ka zâm lek lek alawm le. 

"Min hmu duh em ni?" A ti fiah kâk a. 

"Ti nge i reh? Chanchin engmah ti nge i sawi loh?" Ka lo ti mawlh mawlh. 

A chil lem khawlh danah zâm rûkna a nei ve tih ka chiang lutuk tlat. 

"A pawimawh ber lo a ni mai" a ti sap a. A awmzia ka hrethiam lo. 

"Phone i nei tawh em?" Ka tih chuan maktih hmel angreng tak hian, "Aw" a ti sap. 

"Zanah ka lo bia ang che. Ka call chhang rawh aw" ngenngawl deuh hian ka ti a. Engtinmah a awm lo. Duty nei a nih avangin ka chelh reng thei lo. Ka kalsan dawn chuan, "Nangmah kha ni rawh, Zonun" ka ti sup a. Luhlul hmel zeta min melh kal chung hian, "Ka danglam lovang" a ti vawt raih. Ngawi rengin ka chhuahsan zui ta a. Amah ka be leh theiin a hmel ka hmu leh thei a, a lawmawm hrim hrim e. 

Zanah chuan ka call ta ngei a, a ring ral ṭhak. A la buai a niang tiin ka nghak ren rawn a, dar 8 velah ka call leh ngat. A la ve ta nge nge a, "I buai em?" Ka tih chuan, "Buai zo chiah" a ti mai a. 

"Khaw nge i riah?" Ka ti leh a, "Ka nu bulah. " A rultawka inchhan kan thiam dun hle mai. 

"I nu chu a muhil thei em? Eng nge a an?" Ka ti ve luam a. A thaw hawk ri chu ka hre reng. "A ṭha ti ila, an chiu mu a. " A ti a. 

"Engtia chetlak zel nge i tum? Zemabâwk lamah te dah phei i tum lo em ni?" Ka ti leh mawlh mawlh a, "Amah ka nu hian a duh tlat lo va, insenso a ṭul lo ka thi dawn tho tho tih ṭanin a ṭang a. In lama inenkawl a duh" a ti a. Ka rindan vel a ni. 

"Mahse, i thu ber zel tho a, a ni lo'm ni?" Ka ti ve ngat. 

Tawitê hian a nui a, "Ka nu a nia, ka thuhnuai thei lo" a ti nghet charh. Engtin nge a nu chungchang ka hriat min zawh loh danah Biteii'n engkim a lo hrilh tawh a nih ka ring. 

"Doctor a lo kal a, ka dah phawt" a rawn ti leh a, a dah zui nghal. 

A tuka tukṭhuan kan ei laiin ka nu chuan, "Numami chu aw, a pawi êm mai..a ke chu an tan ta em ni? ..Sate.." tiin ka nau a melh a. Sateii hi a nawmsam loh vangin vawiin chu a chawl dawn a nih hmel. 

"Aw, a khup hnuaiah " A lo ti ve zat a. Numami chu kan veng pa lar leh hausa Pu Zamawia fanu a ni.Sateii te nen pawh inkawm ve ṭhin an nih bakah Pu Zamawia pate leh ka pu te hi a hmain sumdawnna kawngah an lo inthurual tawh thin a, chuvang chuan chhungkhat ang deuhin kan inpawh ve ta zel a, Ka û-in nupui a neih pawh khan a nupui man an rawn tumsak ve ngat a ni. Kan buai tawh em a, kan intlawh reng hman lo nen, kar liamta khan Numami te accident thu chu ka hria a, Zonuni vanga ka buai lai leh neuh neuh ka ngah lai kha a nia, a ke a sâwp vek an tih kha chu ka hria a, an hausa a, phai an panpui avang khan engtin emaw tihdan a awm mai ang ka lo ti liam ringawt a, tunah chanchin ka hre ve chiah. 

"A va zia lo ve" ka û pawh chuan a lo ti a. 

"Chu chu lawm, Pu Zamawia te hian an duat ve sia, a tuar viau e an tih kha. Accident hi zawng a rapthlak êm mai, fimkhur ru aw nangni pawh" ka nu chuan uar zet hian a ti leh a. Keimah chu min melh rawn deuh. Nia, tlangval thaza rual kan ni ve bawk nen, motor hi ka khalh chak ve deuh thin bawk a, bike tak hi chu ka confi bawk a, an hlauthawng lutuk pawn ka hre lo. 

Sateii chuan, "Numami chu private nurse rawihsak an tum kha, amah sawn a la tuarthiam lo bawk nen, kawmhlim a ngai lutuk a. " A lo tih chuan ka melh vat a, "An hmu tawh em? Nurse chu?" Ka ti hluai. Makti deuh tak hian, "Lak pawh ka la hre lo, an zawng mek chauh, ti nge a?" A ti hâ a. 

"Nilênga enkawl tur ang khan mi?" Ka ti leh a, "Ka hre bik lo. Ngati nge ka tih chu" a ti leh a, a vin ṭêp bawk. 

Dâwt sawi thiam lo tih takah Zonuni te dinhmun leh hna a mamawhzia chu ka sawi ta vek a. Ka thawhpui a ni tih ka sawi avangin an ngaikawi chuang lovang. Ka pa chuan, "Sateii'n a zawt chiang thei ang chu.." a lo ti a. 

An khawngaih ve bawk a niang, ka nau pawh chuan, "Ka lo zawt chiang ang. Tihdan tur ka lo ngaihtuahpui dawn nia" a ti a. Ka nau hi chu a fel ve a nia. Rilru nuam ru angreng deuhin ka kal ta a. Zonuni erawh ka la hrilh duh lo, a sure loh khan ka tan a nuam lo ve a. Pu Zamawia te ina a thawh theih chuan hlawh an pe tha ngei ngei dawn a, ka tan pawh chance a ṭhat sawt ka beisei a ni.  

Vawiin chu Zonuni haw tur nen kan inhmu ve ta hlauh bawk,. Nidangah kha chuan min pehhel thin a nih ka ring. A nu chanchin ka zawh chuan, "Phai lam pan pawn awmzia a nei tawh lo an tia. Ruahmanna engmah ka siam thiam lo" a ti a. Ani ang nula la upa em em bik lo phur rihzia ka ngaihtuah hian chhel ka ti ngawt mai, ka tlin ve loh tur thil a ni. Kan ban chuan damdawi inah ka peng leh zuai, mahse, ka awm rei lo. A nitêlin a nu chu a tlahniam zel tih ka hria,. Rei a daih ka ring tawh lo. Zonuni erawh dawrah a awm leh daih tawh a, a taksa pawh hi a fit ka ti. A chau ve thei ngawt ang. An dawr kawtah chuan din loh theih lohin Zonuni leh mipa pahnih hi an lo ding a, an inhnial niin ka hria. Mipa te lah chu en reng reng pawn drugs addict tih hriat zet, meng chang chang an ni a, an khawro angreng viau bawk. Zonuni puih ka duh vang liau liauin ka ding ta a. "Eng nge ni ta? Zonun" tiin ka va inrawlh ve ta ngawt! 

Zonuni ṭawng hmain ka bula mi mipa chuan, "Lo inrawlh suh. Tupawh ni la" a ti nghal tâwng a. Zonuni melhin, "Min pe vat rawh. Khawi" a ti tuar..Zonuni chuan a kekawr ipte zenin 500 tlang pahnih hi a rawn phawrh a, chu pa chu a pe ta a ni. Makti zetin ka lo thlir reng ringawt. An kalsan dawn chuan, "Ate, khawngaih takin lo kir leh rawh aw.." Zonuni chuan a ti sap a. Mipa lah chuan ngaihnep hmel zet hian, "Ka mamawh leh hunah che aw" a ti pawr hluk a, kawng kanin an inzui phei nghal. Zonuni chuan min rawn en a, maktia ka lo melh reng lai chuan, "Ka khawvelah hian i leng ve lo. Kal bo rawh..kal bo hlen rawh" ti sep sepin hmanhmawh zetin dawrah chuan min luhsan ta a. Rilru mang zeta nui hukin ka hawi kual ruai ringawt..