Parchuailovi 2

PARCHUAILOVI..(2)

Ziaktu : Toni Râlte

Pa Tlana'n, "Ka lawm lo, ka lungawi thei hlawl lo, unau an nih piahlamah hetianga inkhawihchhiat te tê hnua mualpho hlauh vanga inhawisan leh hi chu a tluan pawh a tluang lovang" a tih bawrh bawrh chu ner nâwng chungin ka ngaithla a, ka tho ta nge nge. Ka nu leh ka nî ten khapdaih an tum viau nain Pa Tlana'n ka hmel a hmuh rual chuan mi rawn kawk sawk sawk a, "Zosanglian, hre rawh. Ka lawm lo nasa a nia, FIR thehluh hial ka nâp aw. Ka fanu hi nanga kaihkual leh pawh phar mai mai tur a ni lo" a ti ram hmuk hmuk a. 

"I fanu kha ka kaikualin ka pawt phar awzawng lo ve. Ka duh loh thleng thleng min sawitir suh u. Rinliani'n dawt a sawi tihah chiang ula a tawk" ka ti nghut nghut a, thawh phat aṭanga rik nghal buan buan chu a..ka nilêng mood a fuh loh palh ka hlau. Ka nu chuan, "Thil awmzia a bul rât aṭangin sawi zawk rawh. Hetiang zawng a fuh lo, chhungkua kan nia" a dam zawngin a lo ti a. Ka ni erawh inthlahrun hmel deuhin a ding ngawi reng thung. 

"Ka sawi ang" ka ti a. Ka pa pawh a rawn kal hnai ve. Ka û a la tho lo va, ka nau erawh dawrah a kal tawh a nih hmel. 

Rinliani'n min ngaihzawn dan leh kan inhnar nasatzia te, min vau ṭhin dante chu ka sawi ta mawlh mawlh a, Ka sawi laklawh lai laite chuan Pa Tlana chuan, "Ka awih thertê lo ve, ka fanuin chutiang a ti lul lo vang, mipa chu mualpho a harsa a. I puhchhe mai mai a nih kha" a lo ti khur khur a. Ka pain, "Tlana, lo ngawi rawh, sawi zawhtir phawt ta che" a lo ti vin ṭhak. 

Ka sawi zawh chuan ka niin, "A sawi hi a dik ang. Mampui, kei chuan ka ring che. Rinliani nunphung hi nu ka nih angin ka chîk ṭhin, a dik mawlh lo a ni" a ti ta charh charh a. 

An pain, "Mai mai a che. I fanu aiin i vahpa i ring zawk a maw? Nu ni ve tlak pawh i nih hrep loh chu" a ti ta zêk mai. Ka nu chuan bengdaih tum takin, "Ngawi tawh teh u, tuna sawifel chi pawh a nih loh chuan, Rini pawh kan bia ang a, hetiang chuan chhungkua kan darhsarh zo mai ang. Tlana, nang pawh insûm rih teh" a lo ti ve mawlh mawlh mai. Ka pa erawh a ngawi reng thung. Ka ni chuan, "Phei phawt ang. Chaw eikhamah Mateii pawh kan be dawn nia" tiin an pa chu a kai a, Pa Tlana pawh thinur ṭeuhin a chhuak ta hnu hnu. Ka û a rawn tho chhuak a, "Zing kar karah eng nge maw in rik hlut le.." a ti nuah nuah. Tukṭhuan ei laiin ka nuin thil awmdan a sawi a, a chek hluk. "Rinliani chu a pa bakin a ring tawp nang" a ti duh lek. Kei pawh engkim kan hriat vek tak law law avangin ka thawveng huai zawk a,. Hnaa kal turin ka insiam mawlh mawlh. Ka thlen chuan gate keeper Vala chuan min lo nuih var var a, "I hma hle mai" a ti bawk. Harsatna leh rokhawlhna lian tak ka nei a nih loh chuan hun vawndik hi ka ngaipawimawh ve a, kan chhungkua hi eng thilah pawh kan tlai ngai mang lo. Chhungkaw zia azir te pawh hi a niawm e. Englai pawha tlai reng mai te pawh an awm. Inthlahdah vang bak chhuanlam a awm theiin ka hre lo. 

Hnaah ka bur nghal ngar ngar a, choka lama an hotupa Zawma rawn kalin mamawh list min rawn pe bawk. Home-hian mamawh lamna tur motor an kawl hrim hrim a, chawhnu lamah mamawhte chu ka va lawm leh ta zung zung. Sum hman dan felfai taka ziah zel a ngaih avangin ka fimkhur hle. Suma felhlel nih te, rinawm lo nihte hi ka zah zawng tak a ni ve a, Ka pa hi a fir bawk a, kan zui lo thei lo. Home ka thlen leh meuh chuan ban a hun ruai tawh. Account bu ka ziah fel leh zet hnuah ka chhuak a. Hnathawkte thlah tur motor pawh a lo la chhuak lo, vawiinah lunch kan ei ho loh avangin Teteii te pawh tunah ka hmu chiah. Papari nen an lo ding ran a,"Kan inhmu har hle mai a" Teteii chuan a lo ti sar sar. 

"Nia vawiin chu ka buai ve lutuk a, nangni pawh in buai a niang" ka ti ve var. 

"Umm, vawiin chu doctor rawn kal ni a nia, kan buai ve deuh alawm" a ti a. Zonunpari chu ka melh zauh a, "Kha.. zonun, i ṭha maw?" Ka ti satliah. Min rawn melh ve zawkin, "Ka ṭha e" a ti sap a. Nizanah Teremi te inah kan inhmu tawh tih hre lo ang maiin a awm leh tawh. Bike ka ken avangin kan inthlahliam ta phawt a. 

Hun a kal ve zel a, Rinliani pawh ka ni ten an dâwp nasa bawk a, thudik a sawi ta nge nge. "Ka bansan thei thlawt lo, ka hmangaih êm a ni. Min neihtir mai rawh u" a la ti ngam nia! Min lo hmangaih tak tak te pawh a niang e. Mahse, ka ni fanu taksa, mipa anga khawih chu ka theih ka ring hlawl lo. Rinliani vangin kan chhungkaw hnih boruak pawh a chhe ta deuh a, Pa Tlana'n min tlawh a lo khap a niawm e. Ka niin hrehawm a ti viauin ka ring. Kan boruak chu kan chhungte dang pawn an lo hre lo thei lo va, ka lama ṭang an tam zawk. Ka nî Zami erawh chu Pa Tlana ang deuhin keimah min demna niawm tak tak a chhakchhuak zeuh zeuh a, mênah ka thlak. Ngaihven zui chiam ka peih lo. Ka hnathawhna lamah pawh hriat ka hlawh ve tawhin keipawn ṭhian fel tak tak ka nei ve ta nual a. Fela nen phei chuan kan inkawmngeih zual, ani hi tar hote infiamna tur buatsaiha ngaihtuahsaktu a ni. A zaidam hi ka'n ti khawp a, mi ṭha tak a ni. Teteii nen kan inkawm thei viau bawk. Zonuni erawh kan inbiak pawn kam hnih khat a ni deuh mai, ka ngainat chi a ni lo va, kawmngeih ka tum viau lo. A ze mak deuh, vawt raih leh sak tlat chuan min hnar ka ti mai. Midang pawn an kawma an biak siam siam ka hre ngai lo. Ti nge maw hetiang zia hi a neih tlat ni. Ka thawh aṭanga thla khatnaah tar zinga upa ber Pi Siamteii, a kum 100-na kan lawmsak dawn a. Kan inbuatsaih ve nasa hle. Pi Siami hi upa viau tawh mah se; a thothâng a la ṭha viau mai a, tarmit vuah loin lehkha a la chhiar thei tlat nia! A beng erawh a chhet ve ṭan a, biak rin a ngai deuh. 

A birthday a lo thlen chuan cake nen, hall kan chei nasa bawk a. Kan ri ve hlut mai. Doctor Dinpuia pawh a rawn kal ve a. Ani hi sawi tawh angin kar khatah vawi 2 emaw vawi 3 emaw a rawn kal ṭhin. Home neitu te pawh an rawn tel ve thei a, kan phuisui hle. Tlaiah tumah haw hma lovin ruai kan ṭheh a, kei pawh ka puar viau. Khua a thim chhulh tawh a, kan insingsak fel deuh hnuah toilet ka pan chûk chûk. Ka inthiar zo ka chhuak chu, hmeichhe lam washroom aṭang chuan thawm ngaihnawm vak loh ka hre ta a. Ka ding chawt. 

"Ka duh chuan ka tichhe vek thei che tih i hria tiraw? Home neitu te hian ka thu leh hla an ngaihpawimawhzia i hria. Hna nei lo, rethei bakberha i awm leh tur chu han ngaihtuah la..min hnar thei i ni lo. Ka tih ang leh ka sawi ang anga awm mai tur i ni, i hria em?" Doctor Dinpuia'n a ti khur khur mai. 

Zonunpari aw ngei mai hian, "I duh phawt chuan ti rawh. Min tichhe vek rawh. Ka hlau hleinem che,. Nanga uitê nih ai chuan kutdawh ka thlang. I kut hmawr pawh khan min khawih tawh suh ang che. I hria em?" A ti let ve ta sak sak a. Mak ka ti hle..Dinpuia chuan Zonuni chu a lo duh ru reng tihna a nih hmel. An inchai deuh nge an ri ta sawk sawk a, ka ngaithla thei ta hauh lo, kawngka chu ka chum dawt dawt a,. "Lo hawng r'u..eng nge thleng?" Tiin ka au bawk. Thawm a reh ta hmak a, 2mins velah Dinpuia chu pawr angreng tak hian a rawn chhuak ta a, intih nelawm tum takin, "Sawi suh aw. Remchang kan han la ve lawk a nih kha" a ti sup a, min kalsan zui nghal. Zu rim a nam huam danah a rui ve viau a nih hmel bawk. Washroomah chuan ka penlut ve nghal a. Zonunpari chuan a sam a lo hui ṭha mawlh mawlh a, zâm hmel a pu miah lo bawk. 

"I ṭha em?" Ka ti a. 

"Aw.." a ti nghat a. 

"Ka lo tibuai zawk che u em?" Ka ti ve ngat. 

"A hun takah i rawn lang a, ka lawm e" a ti ve ta mial a. Inhmatawnin kan ding a, chiang zeta min rawn melh takah chuan a mitmenga natna thuk tak inphum ru chu ka hmu thei ta tlat! Inthup tum viau mah se; he hmeichhia hian natna a nei a ni. Mahse, chu chu ka buaina tur a ni lo, ka zawh pawh a ṭul hek lo. 

Ka kal tur chu,. "Zosang,." A tih sep avangin ka ding leh a, "Ih, khawngaihin min thlah haw thei ang em?" A ti a. Inthlahrung hmel a pu bawk. 

"Ngati nge Siama'n a thlah dawn lo che u mi?" Ka tih chuan, "Aw, nimin khan chawlh a la a. Kar khat chhung chu keimahni kan inngaihtuah a ngai dawn a" a ti a. Siama ka hmu lo ka ti rêng a. 

"Aw ka thlah dawn che nia, hawn chu a hun tawh reng..i hman chuan " tiin sana ka bih zauh. "Ka hman e" tiin a bag a la a, kan inzuichhuak ta a. Teteii chu a bialpain a rawn lam a lo nia, midang pawh mahnia lirthei kawl deuh vek an nih bakah an ṭhianten an thlah haw thei dawn a niawm e. Bike ka tihnun lai chuan, "Ka chuang thiam vak lo maithei aw,. Ka chuan lohna a rei tawh a" a ti khur dat a. Ka nui ringawt. Ka nu ai chuan a chuang thiam zawk ang, ka nu phurh chu ka sim tawh. A che hrut reng zel a, motor tawh dawn hlekin, "Mampui,.awi awi" ti nghal chul zel. Tiang dawih leh lutuk phurh chu thin a rim duh lutuk. Zonuni pawh chu a rawn lawnkai a, kan tlanchhuak nghal. 

"Kan in awmna chu i hriat tawh kha" a ti a. Inthlahrun hmel deuhin ka kekawr kawngah a rawn invuantâng a. "Teremi te in bul vel kha tiraw?" Ka tih chuan, "Aw..step bulah khan ka chhuk ang" a ti a. Ka beng bula a rawn ṭawng avangin a thaw lum hiam chu ka feel thei, engtin emaw ka awm a, 'A va fit thlak e aw' ka ti rilru nghal. Step bulah chuan ka ding a, "Ka lawm e aw.." tiin min thlah ve thlap. Ka fiam châk ta pek a, "Thingpui lo in kawi rawh te pawh tih ve awm" ka ti nghut a. 

A nui ve ngei, "Step hi a thui sia, hawn lam ka huphurhpui che a" a ti ve ngial a. 

"Tak taka nidangah Teremi te kan rawn rim pahin ka la rawn leng ve ang, i phal chuan" ka ti leh a, "Phal e" a ti tawi tak. In mangṭha zuiin keipawn in lam ka pan ta nghal a. 

Siama berin chawlh a lak rih avangin thlahtu nei lo ber Zonuni nen chuan kan haw dun ta ziah a, "Scooty te la la, i hlawh a tam tho sia" ka tih chuan, "Ka khalh ngam lo" a ti bur. Thisenin a ngam vete hi a ngai ve bawk a,. Sateii'n an hnehsawh rem rem nen, scooty pahnih a khalh chhe ṭhak tawh. Nilai zanah Opa nen Teremi rim turin kan chhuak leh a, Zonuni pawh tlawh ve ngei ka tum. Mawl vang nge pawh ka hre lo, Zonunpari number ka lo la nei reng reng lo. Teremi ka zawt ta ngawt a, a number min hrilh ta bik lo chuan an in min kawhhmuh ta zawk a, leng ve thâwr tur chuan ka pan ta. Building lian vak lo hnuaiah an awm a, an in luah chu a hlui tawh hmel angreng. 

Ka hmel a hmu thut chu a meng phar ve deuh, thawt lawkna ka nei bik lo nen. "Sawi lawk dawnin i number ka nei lo va" tiin thupha ka chawi nghal vat. Kan inzui lut a. An in te fel âtah chuan bungraw manto hmuh tur a vâng viau. Mahse, a fai em em thung. Ṭhutthleng seiah chuan a nu niawm tak hi a lo ṭhu mu a, a cherin a dawldâng hle. Ka ṭhu fel chiah tihin pindan aṭangin tleirâwl, Zonuni nau niawm tak hi a rawn chhuak ve bawk. Ani chu a û ang lo takin a thau a, a tawi bawk. Zonuni chuan, "Ka nau a nih hi, Biteii a nia, chuan hei ka nu a ni bawk. Nu, hei kan thawhpui Zosanga, min phur haw ṭhintu ka tih kha a nih hi" a ti zung zung a. A nu chuan chauh hmel takin, "I va fel ve , i lo leng a. Mateii i rawn thlah thin a, kan lawm lutuk a nia" a ti thâm ṭiak a. Natna benvawn a nei chiang,. "Fel vang pawh a ni lo. Kan thawhhona rei tawh nen ka la rawn leng lo va, ka rawn teilut lawk a nih hi" inti ṭawngkam thiam tak chuan ka lo ti ve a. Biteii chuan panhnah roll tur lain ngawi rengin a roll nghal char char, Zonuni pawn mei a zial pah bawk. Kuhva leh meizial an zuar ve a ni maithei. 

"Teremi te inah in leng em ni?" A ti sap a. 

"Aw..ti nge a û i va jection dawn lo mi?" Ka ti ve nghal. 

"A hranin nurse an laksak tawh a, ka chiu tawh ngai lo" a ti ve mai a. Sawi tur hi a vâng thei e. A nu chuan, "Mate, ka va mu teh ang. Ka pum a nuam lo leh deuh tlat" a ti a. Zonuni a che vat, a nu chu kuahin pindanah chuan a luhpui a, Biteii nen lah kan ngawi dun tlawk tlawk. A u ang bawka ṭawngmawh a nih hmel. Zonuni lo chhuak chuan, "Thingpui in ang aw" tiin a va lum nghal rak rak a. 

Thingpui kan in lai chuan, "Khaw nge i pa?" Ka ti nulh. Mawl hi ka inti hnuhnawh leh lutuk a, ka sawi tawh si. Hmel pangngai tak hian, "A boral tawh a. Ti tlawng hi kan ni mai. " A ti a. 

"I nu kha a nawmsam loh hmel e.." ka tih chuan, "Umm, vawi tam tak kan inentir tawh. A natna tak hi an la hre thei si lo va, a pum leh a hnungzâng te hi a rawn na vak zel. Inenkawl dan vak pawh kan hre tawh lo. Tihian a awm ve tawp a ni ber. Phai pan turin min tia, amah hi chuan ṭul a ti lo nain ka intuak ngah hunah ka la kalpui ang" a ti siam siam a. An chhungkaw dinhmun chu ka hrethiam ta ruak mai. 

"Biteii hian zirna a chawlhsan tawh em ni?" Tiin ka'n dilchhut leh deuh a. 

"Ani pawh TB vangin rei deuh a damlo va, a chhunzawm thei ta lo a ni. Mahse, kei nitin chhuah ka ngai a, in lamah ka nu awmpui a ngai si. Tihian a ṭha zawk" a ti leh sep sep a. An nufa dinhmun ngaihtuah chuan an khawngaihthlak hle mai. Retheihna hi chu a nun a râwng bawk si a. Zan khatna te a ni bawk a tiin ka leng rei lutuk lo. A tuka inhmu leh turin ka hawnsan a, ka len chhung khan pawn lama a mize vawt leh thîp lutuk kha ka hmuin ka hre miah lo. A mizia kha a letling thawk ka ti mai. Teremi'n an chanchin a sawi chiang ta a. 

"Kan venga an lo awmna hi kum 4 vel chu a ni tawh ang. Mi kan buai tawh a, chutiangin ka hrechiang vak lo. A nu saw a dam that lai chuan chawhmeh a rawn zuar thin a, a hlawk pawh a hlawk ve thei lutuk. Biteii pawn school a la kal a. Zonuni erawh khanglai khan eng nge a thawh ka hre miah lo. An dinhmunin a zir lo a ni bawk a, Kohhran leh khawtlangah a inhawlh lawr vak lo. Sunday zingah a inkhawm ve tawp a, chu zawng chu. A nu saw enkawl leh buaipui chawt ngai a ni ve bawk nen, an khawngaihthlak angreng. Amah Zonuni hi a ṭawngtam vak bawk si lo va, ṭhian mumal pawh a nei pawn ka hre lo. Hna saw a thawk mawp mawp tawp mai a ni. " Tiin. Dr. Dinpuia te kha duh mai âwm ka ti rilru deuh. A nu enkawlna turte pawh a sihchhuahsak thei maithei a nia. 

Nitina inphur ve ta reng chu kan innêl ve tawh hle, a number pawh ka nei tawh, mahse, ka be ngai lem hlei lova. Hetih mek lai hian Dr. Dinpuia pawh a rawn kal fô a, Zonuni leh Teteii hian an zui ṭhin a. Boruak danglam han thleng a awm rih tawh lo. Zonuni nen vawikhatmah kan sawi dun lo bawk a, a hnua ka hriat leh danin Dinpuia chu nupui nei lai, fa pawh pakhat nei tawh a lo ni reng a. Zonuni tan pawh han duh chi ni nghal lo chuan. Siama'n a hna a rawn zawm hnuah pawh Zonuni chu ka phur zel ta tho,. Petrol man ka tum ve ang ti thin mah se; ka duh lo bur. Teteii hian min fiam zauh zauh thin, "In inzui ngawrh riau mai, eng emaw a awm chiang" tih velin. Mahse, an ngaihdan ang kha kan inkarah a awm lo lutuk a, a mak zawk. A nu leh Biteii te nen pawh kan innêl tawh viau, An awmna a mawng deuh vang hian ka leng khât êm zawk a. An chhungkaw chanchin erawh hriatbelh em em ka nei lo thung. 

Rinliani pawh Pa Muana te bulah a zuk zin vang vang a, a awm loh hian a nuam zawk. Zan dar 8 vel a ni maithei, Nuteii, Asanga nuin min lo be nawlh mai. "Hei kan Ruatsanga chuan Baby a ru ta nge nge e. I hre lâwk ang tiraw?" A rawn ti. Tunhnaiah Asanga nen kan inhmu tam lo va, engmah ka hre ve hauh lo. Chuti tehthuta a han ru chu keipawn mak ka ti. Min hrilh ve ka beisei vang pawh a ni maithei. 

"Khaw nge an awm tunah?" Ka tih chuan, "Hei a pindanah..nichin mai khan an rawn inzui haw" a ti a. A lawm vak lo tih a awki aṭangin a hriat mai. Baby kha a duh lo ve bawk a ni. 

"An laklawh te pawh a ni maithei. Ka lo be ve dawn nia" ka ti ta ringawt. A hnu lawkah Asanga zawk chuan min lo call a, "Ka ru ta mai asin. Min nawr ve reng bawk sia" a ti sur sur a. 

Unaute an ni bawk a tiin, "In va hmanhmawh bawk ve mawle..inrûk kher ngai loin palaite pawh a tirh theih a" ka ti a. 

"Ka nu te lawm, ka sawi ka sawi a, tir duh hek lo" a ti bul bul. 

"Naktuk tlaiah ka lo peng ang" ka ti a. Han innei ve phawt mai se, A lo fel phian maithei asin. Ka û pawh tunlai chu zantin a chhuak a, a lenna kan hre der si lo. Mahse, hmeichhia a ngaihsak ve a nih chuan kan lawm daih zawk ang. 

Ni khat hna ka thawh laiin Fela a rawn ṭhu ve a, "Home neitu diktak kha i lo hre ve tawh em?" A ti thut. Ka lu ka thing nur nur a, "Pu Saiṭhuama alawm lo ni. Keipawn ka hriatna a la rei lo, tuna a neitu anga an sawite hi chu a mi chhawrte ve lehchhawng an nia. Ti nge a inthup kher le ka ti mai mai" a ti nuah nuah a. 

"Hausa deuh anga lan a duh lo a niang" ka ti ringawt. 

"A hausakzia te chu Aizawl chuan kan hre sa vek tho alawm. Hmanni a fapa nupui neihte kha a ropui rem rem khawp mai an ti.. a nupui saw a nupui pathumna an la ti zui! Ṭhianpa, sum neih hi chuan engkim hi a lo awm a nih hi tiraw?" A ti sur sur a, a dik angreng. Tunlai khawvelah sum pawimawhna hi a lang chiang telh telh. Pu Saiṭhuama chu ka hre lutuk, Aizawl pa lar leh challang, thlahtute aṭanga a chhawm hausakna bakah a sumdawnna huang zauh zelin tunah tak phei chuan a hausa ber ang tih ngam khawp a ni. A nupui pawh amah aia nau fê tur, model te pawh lo ni ve zak zak tawh kha a nia. Putar a han nei mai kha a lar hat nghe nghe,. Gold digger an ti pawh a âwm viau tho mai. Pu Saiṭhuama din a nih vang a niang kan home pawh a changtluna hnathawkte pawh kan hlawh a chhiat hran loh ni, a lawmawm lamah ngai ang. 

Fela bawk chuan, "Ti daih ila, Zonuni nen hian in ni ve deuh mi?" Nui chungin a ti a. Kan inkawm pawn tiang lam hi kan sawi ngai meuh lo. "Ni mai mai lo" ka tih chuan, "Nia..ka duhpui lo che. An sawi ka hriat ruk danin mi pa a kawp ṭhin an ti tlat! " A ti ta mai a. Ka meng nghal kâwk. 

"A va mak âwm ve, i chiang maw?" Ka ti hluai a. Mak ka ti tih ka hmelah pawh a langchhuak ngei ang. 

"Tlem lai deuh khan zing dar 4-5 inkar bawr vela patling pui tawh nen an inphur an hmu zeuh zeuh a ni awm e" a ti ta a. Hriatchian a chakawm rualin mi chungchang va ngaihven hûrh kha nuam ka ti si lo. Zonuni chu a mak dawn mang e. Fela bawk chuan, "A hmel hi chu ṭha ka ti, a sexy ka ti tlat. Mahse, a vawt lutuk a, kan ngaizawng ang tih hlau deuh niawm tak hian a awm zel a. Ka ngaina lo" a ti leh hmuk hmuk. A sawi hi a dik vek, mahse, hetia kan han inkawm nêl hnu hi chuan a ze ṭha tam tak ka hmu ve tho, ka haw lo va, ka ngaina ngawih ngawih hran lo thung. Tlaiah kan inphur haw leh a, "Zosang, bialnu te hi i nei lo mi?" A ti phawng mai. Ka nui huk a, "Nei rih nang. Nang bialpa i nei em?" Ka ti ve zat. 

"Ka ngaihven lo" a ti mawl tawp. 

"Doctora kha" ka ti fiamthu a, na lotêa ka dara rawn piai zauhin, "Fiamthu pawn sawi suh" a ti hlak. Duh loh chu a pe na ve khawp mai. 

Asanga te pawh an inruk tak avangin a ranglamin an insawirem a, Asanga te hi an khawsa thei ve a, bakah amah hian electronics dawr a nei bawk nen, Baby chhungte lam pawn an iai bik lo ang. Patea lam chuan, Mawlmangtêa inhruai an duh a, mahse, Baby te chuan pui huka tih an duh ta tlat. Inneih ropui hi inneih nghehna pawh a ni lo asin le. Engpawhnise a ṭha turah ngai ang. Ka ni Zâmi lah chuan Pa Hminga nu kha home-ah dah a duh si, Pa Hminga'n a remti meuh si lo, an han buai ve hluai a. Ka nî pawh a lungawi loin Patea te inah zan 2 a va riak ve hial. Ani tar tawh em em kha a hnawksak viau em mawni le. 

Asanga te inneih nîa ka dinpui dawn avangin kan bazar dawn a, mo kawr kan va en dawn niawm tak a ni. Kei pawh a hmalamah ka hna ka thawk ngawrh a, chawlh ka la thei hram. Baby ṭhiannu Zuali hi a hmaa min star tawhtu a nia, Asanga aṭanga inhre chho tho kan ni. Rinliani te anga tilang huam chi chu a ni lo naa, ze zâwi deuh anga lang, pawisak nei lo ru deuh ang type kha a nia. Tin, hmelṭha ka tih chi a ni vak lo. Bialpa a nei ta a, mahse, min la rawn be zeuh zeuh. Kan pali chuan kan inzui ve diah diah a, Baby pawh a hlimin nuam a tih hmel viau. Mo kawr pawh an duhthusam ang tak hmuin hawh man a sang angreng. Chawhnu lamah thil ei turin ka chawl a,. Baby chuan, "Zosang, nang pawh nupui nei tawh rawh. Hmeichhia hi i ngaihsak lo riau mai" a ti sar sar a. 

"Nupui neih dawn chuan bialnu neih phawt a ngai" ka tih chuan, Zuali'n, "Nei duh hek lo che. Keini te pawh kan awm a.." tiin Baby a melh ralh. 

"I bialpa kha a sek ṭeng ṭung sia, mi ṭhuai nek palh ang" ka lo ti ve vat. Eitur an rawn dah hnu lawkah Zonuni leh pa pakhat, kum 58 bawr vel tur hi an rawn inzui lut ve hlawl mai. Chawlh a lak âwm ka hre si lo. Nizana kan inbiak pawn vawiin a kal loh tur thu a sawi miah si lo va. Ani pawn min rawn hmu ve, a khi sak a. Kan inbe lem lo. Thil ei pah chuan ka melh zeuh zeuh a, an titi muk hmel viau. Mi pawmlai kawp ṭhin khan an sawi a, tak tak a ni ang em? Mahse, an inbiak dan leh hmelhmaiah inkawp ang pawn an lang si lo. Thu pawimawh tak sawi dun an ang ka ti. Kan ei zo kan thawh sap sap lai chuan Zuali'n ka banah a rawn vuan chat a, "Lo pengkawi rawh aw" a ti zat bawk. Zonuni ka va melh kher a, min lo melh ve chiah. Mak deuh maiin nuam tih lohna ka nei nghal nia mawle. Zuali te inah pawh chuan ka peng ta chuang lo va, in ka thlen chuan Duatpuia a lo ṭap ruah ruah mai. A chhan ka'n zawt chu, "Skateboard a ngen lehpek a, a pain a hau a nih kha" ka nuin a lo ti var. 

Duat rawn tih takah a duh duh hi a ngen a, tihsak loh kan hreh ṭhin si. Anî phei chu a insêng nasa thei viau. "Engzat man nge?" Ka tih rual chuan amah Duatpuia chuan, "Mafela chuan 2000 man a ti" a lo ti vat a. 

A pa rawn phei chuan, "Leisak a ṭul lo. Chetsual a hlauhawm. Skateboard khalh rual a la ni lo hrim hrim. " A ti hluk hluk a. A pa berin a remtih loh chuan keini tan tihluih a nuam lo. Duatpuia chu ka pindanah ka kai lut ta daih a. "Apate, nangman min lei dawn tiraw?" Tiin min tlawn a. 

"I pa khan a phal si lo va" ka tih chuan, "A pa hi a sual si, apate, i ngam em? Hau hrep rawh aw" a ti mual mual a. A lungawi lo ve takzet a ni. Kan tetlai ka hrechhuak nghal vang vang. Ka û nen hian kum 4 in kan inthlau a, a lian bawk si. Ka ngam ngai lo hrim hrim, a sual pawh ka sual ngai lo. Sateii hi a kawlh ṭhin a, min sual âwrh âwrh chang a nei ṭhin. Vawikhat kan râwlthar chhuah tirh, inlak pa hunlai hian kan veng kawnah kan intibuai a, kan insualpui te khan an û te an lo pun chu niin kei leh ka thiante pahnih chu min hnek hrep mai a, thi leh duk churin ka haw a. Ka û leng a rawn haw, thil awmdan a hria chu chelh hman rual loha tlanchhuakin a va cho hmiah mai. Ka thianpa û in a lo pui ve bawk, a nau phuba a laksak ve ngei a ni. Kha bak kha min chhan âwm pawh ka hre lo. Bakah mi ka tibuai khât ve bawk a. Û te na nâ na chu keipawn ka ngaisang ṭhin. A ze dam ruih leh luhlul lutuk te, U Mamawii'n a uiresan ṭuma a ṭawngkam, "Ka hmangaih êm vang chein ka ngaidam ngai lovang che. " A tihte kha a awmzia hrethiam vak lo chung khan ril kha ka lo ti ve em em ṭhin. Uiresan a nih hlim kha chuan han ruih chang chu a nei a, a inkhung chawt zel, keini pawn kan tibuai ngai lo. Thla khat vel a inkhung hnuah, "Uirenu vanga Muanzuala'n a nun a hloh mai ten le..ka fapa vang pawn ka damkhawchhuak ang" tia inhumsekin a rawn tho leh a. Nunphung pangngai a zawh chho leh ta a ni. U Mamawii te lah an innei ta bawk si lo, a rawn hêl leh nasa, a der takngial pawn a hawi tawh lo thung. Mipa ve tak kha a ni miau a. 

Zanriah kan ei laiin ka nu bawkin, "Mampui, nupui lam hi ngaihtuah ve tak tak teh. I thawhpuiah nula te an awm lo mawni le" a ti leh a. 

"Awm e, mahse, kan inngaizawng hleinem" ka ti ringawt. 

Sateii'n nui chungin, "An hmelchhia mi? Ngaizawng ve ta che. I zei lo a niang nang hi" a lo ti a. Ka ner khum nghek ringawt. Ka û chu melhin ka pa zawk chuan, "Mama, nang hi i chhuak ve zut ta mai a. Ngaihzawng i nei ve leh ta mi?" A ti hlawl mai a. 

Ani lah chuan a chaw bar lai ṭhulh eih lo hian, "Neih ka tum" tih chauhin a chhang. Ka nu a phur leh mah mah dawn..ka kham ta daih a. Tlangvala pumpa ngaihzawng nghet neih ve hi chu a ṭha reng. Ka tlei mual mual lutuk nge ti nge hetia ka awm tlat ni. Ngaihzawng tih thumal ka ngaihtuah hian Zonunpari ka mitthla ve ziah lehnghal. Kei pui roh hian ka lo thinlai deuh em mawni, mahse, chutiang zawnga ka en ka hre si lo. Hunin hril teh se. 

A tukah chhun chawlh laiin Zonuni bulah a thuphungin, "Nimin kha i chawl ve ni maw?" Ka ti a. 

"Chawhma ka kal a, chawhnuah ka haw a..mo kawr chu in en ta mi?" Zangkhai takin a ti a. 

"Umm..nimina i kalpui kha in chhung te nge?" Ka tih chuan a mit a tizim san a, a lawm vak lo em mawni ka ti hman. Keia pawh ka dilchhut ve hrim hrim. 

"Ni chiah lo, a nupui ka enkawl theih dawn leh dawn loh min zawt a. Kan inbia a nih kha" a ti ta a. Ka rin loh lam daih a ni. 

"Mahse, hun i nei awm lo..hetah i thawk bawk si" ka lo ti ve a. Thawk la halhin, "Pali vel hi ni thei ila tiraw? Pawisa ka mamawh bawk si, tunah hian heta chawhma chhung thawha chawhnu lama saw lama thawh ka dil mêk a, min phalsak ang em ka hre lo. Chawhnu lamah chuan kan âwlthawng tawh tho a" a ti ve duah a. Chutiang a nih theih chuan a tan pawh a zia viau ang. Nia, an hah lem lo, BP check, chiu ngai chiu bakah dressing tih vel kha a ni mai a, chulah nitin a ngai bawk si lo. An damdawi eitir lah Teteii'n a kep vek thei ang a. Teteii hi a felin a mawng a zâng a, tar ho bula awmte hi nuam a ti phian bawk nen, a thawh âwm tak a thawk ka ti mai. Zonuni erawh a sum mamawh vang liau liau niin a lang. Sawrkar damdawi inah te han lut ve thei se, hah deuh mah se; hlawh tihtham a la ve thei dawn a, a nu leh a nau tan chuan chhenfâkawm tak tur a ni. Tlaiah kan inphur haw leh a, "Chawhnua i haw daih zel chuan ka khua a va har awm" ka ti a. 

"Bialnu i neih chhiat loh êm kha" a ti zauh. Zuali kha ka bialnu angah a ngai a ni ngei ang. 

"Bialnu ka nei lo. " Ka ti mawl tawp. Truck rawn tlan mêk chu a bengchheng kher mai, ka helna lamah a lo lungṭhil deuh nge ka petek ta pek a. Zonuni lah confi lo sa a lo ni bawk nen, a che lawih lawih chuan ka balance tibuaiin side drainah ka tlukpui ta huah mai le..mahse, ka na hran lo. Kopanga ka chal ka va sawh chu a na zawk. Zonuni pawh chuan hliam a nei lo a niang, rang taka thoin, "I ṭha em?" Kan ti rual ṭhawt. Mahse, min rawn pan vatin, "I chal a thi" tih leh a bag zen rawk rawk a rual a, romol thianghlim zet rawn humchhuakin ka chalah chuan a rawn dawm vat. "A na lo, kopangah hian ka va sawh a" ka ti nuah nuah. "Lawkin" tiin a tui pai lai chuan a sil leh a, "Hmanrua engmah ka pai si lo va, a thi chhuak hi a reh har hmel. Engtin nge niang aw" a ti vang vang a. A hlauthawng a khurh te kha ka ring a nia, engtinmah a awm lo. A kut lah chu a dam thlep a, ka chal leh hmai bawr vel a han deh phei chuan a nuam veng veng nia. Kan indinchilh ran a, motor veivak awm tho mah se; bike ka tung tha tawh a, kan tlu tih an hre kher lovang. 

Ka scarf hlai angreng tak ka phawrh a, "Hei hian tuam rih mai ang" ka ti a. Zei zet hian a rawn vet a, a suih chât chât mai. "A zia lo hle mai, i hlau em?" Ka tih chuan, "Keimah vanga tlu kan nih kha. Ka tal vak a.." a ti a. Bike tinungin kan tlan zui leh ta a. 

"I thlen veleh silfai la, pem thar damdawi i hnawih dawn nia. Lo ṭha rawh aw" tiin min thlah thlap a. "Zanah ka lo leng dawn" ka ti teh tawp.."Aw le.." ti sapin a chhuk ta hnak hnak a. Vawi tam inphurin an inah leng zeuh zeuh mah ila, kan taksa a indek ngai mang lo. Vawiina ka hliam min buaipui khan feelings ka nei a, ka sawithiam si lohin Zonuni chu ka thlahlel thar riau. Ka chal kak pawh chu Sateii'n a plaster var lûk mai. Chutiang ni lek lûka len chu ka hreh ve leh si, "Ka chal ka tuam bûr sia, ka lo leng leh lo mai ang" tiin ka va text a. 

"Aw le, lo dam vat rawh" a rawn ti. Biak rengte chu ka'n châk thar ta vel a! 

"Eng nge i tih?" Ka va ti a. 

"Hna ngai, panhnah ka roll dawn a" a rawn tih chuan ka inthlahrung. 

"Mut dawnah lo sawi la" ka ti hram, ka zak ve ṭêp. Hetianga hmeichhia ka biak lohna hi a rei tawh deuh a, ka lai ve lek lek alawm le. Opa'n min rawn bia a, "Teremi u kha a zual deuh a, hei ICU-ah a awm. Ka rawn hrilh ve hrim hrim che" a rawn ti. "Ka rawn kal ve dawn mi? Ka chal a kak a, ka tuam bur a, ka chhuak hreh deuh nain" ka tih chuan, "Lo kal duh rih lo mai rawh, tihtheih a awm chuang lo. Nghah tawp a ni mai, eng emaw a thlen tak leh ka rawn hrilh ang che" a ti a. Ka kal ta lo. Tihtur em em nei ta lo chu guitar perhin ka zai rût rût a, ka inngaihtuah lunglêng khawhar kual vel..ka ṭhian kawmte ber Opa leh Asanga ten bialnu neiin Asanga phei chuan nupui a nei dawn ta hial a. Kei ka la chuang ta lel bik a, ka luck loh hmel bîk ngawih ngawih. Chuvangin ngaihzawng lam hi ngaihtuah a ngai ve tak tak tawh. Zonuniah bawk ka tawp leh ta. Belhchian ka châk a, hriatchian ka chak tulh tulh. Teteii number hmetchhuakin ka call ta hmiah a, "I buai em?" Ka ti zui zat bawk. A buai loh thu a sawi chuan, "Zonuni hi belhchian ka châk deuh a, i hrechiang em?" Ka ti thâwr mai. 

A rawn nui hak a, mahse, ka thutak tih a hria a niang. 

"Hrechiang em em lo. An chhungkua vel chu i hre tawh tho ang a. A mimal nun ang chu a sawi khât khawp mai a, mahse, thil pakhat chu a awm" a ti a, a chawl dat. 

"Ka ngaithla e" ka lo ti vut a. 

 A aw thian kharhin, "Englo a nia, ka û ṭhianpa hian hian a lo hre ve a. An vengah an lo awm tawh a niawm e. Zonuni pasal hual hian an inneih dawn a ruaiah midang a neihsan thut a niawm e. A sawi ṭha duh vak lo va, ih..an inneih hun kar khat velin a la thleng lo tihah a pasal tur chuan Zonuni te ṭhenawm mai ami nuthlawi a ru ta daih a, am buai ve laih a niang. Chutiang vangte pawh a niang Zonuni te pawh Bawngkawnah an insawn tak ni. A zahthlak ve khawp ang,.Zonuni tan chuan." A ti ta mawlh mawlh a. Ka lo insangmar ve ṭeuh ringawt. 

"A va mak ve. Chuan, chumi hnuah bialpa a nei tawh lo a niang maw" ka ti a, "Ka hre bik lo, kan thawh dun hnuah hi chuan mipa hi a ngaihsak lo hrim hrim tawp. An chanchin pawh a sawi ngai lo. A nu entirna tur a tuak thu leh a nu leh a nau a khawngaih thu hi chu a sawi ve niah niah zel" a ti a. Ka sa veh lai chu kahthlak a harsat hmel mang e. Hetiang kehsawm tawh thinlung hi chu a khauh fang zel si a. Mahse, ka tan chona a ni, Zonuni hi hmeichhe ena enin ka bialnu ka nihtir ang. Mihring a nihna laiah nemna leh derthawnna lai chu a nei ve tho vang. 

A tukah ka chal pawh ka tuam ta lo va,. A tuk mai hi Asanga te inneih a ni bawk a, vawiin chu ka thawk ngawrh leh angreng. Chhun chawlh laiin Zonuni chuan, "Kan hotu ten ka dilna kha min phalsak hlauh mai. A tihzia tak tak a ni. Teteii nen kan induty chhâwk tawh dawn a, kei chawhma, ani chawhnu" a ti siam siam a. Teteii pawh chuan, "Ka tan pawh a remchang ve leh zel, ka û nau neih a hnai tawh sia, chawhma chhung an dawr ka nghahsak thei dawn a" a lo ti ve var a. A remchang hle tak mai. Mahse, ka hnual deuh, Zonuni ka phur haw tawh lo tur chu..ka awmdan chu a lo lang deuh nge, "Eng nge i ngaihtuah vung vung a?" Zonuni chuan a ti a. 

"Eng vakmah" ka ti ringawt. Ka lungawi lo ve ringawt te chu mawl ka inti..a tawp nan tlaiah kan inphur haw leh ta, "Zanah lo kal tawh la" a ti ve mial a. 

"Man hlan kha a ni tawh sia, ka theih hmel loh. Inneih chu rawn kal ve la" ka ti ngial a. 

"Anmahni ka hre ve bawk si lo va, a zahthlak. Va che chhe lo la" a ti a. 

Min chhuksan hnute chuan ka ruak huaiin ka hria. Kha zawng zawng chance ka nei a, engmah ka sawi ngam lo va, tunah chuan inhmuh fuhna chance a vâng raih tawh ang. Ani chawhma chhung a buai tawh ang a, kei lah buai bawk. Engpawhnise, zan lama va len tlut tlut a ni tawh mai. 

Ni e, Zonuni hi ka bialnu a ni dawn.