Parchuailovi 16

PARCHUAILOVI..(16)

Ziaktu : Toni Râlte

Ka nu leh Zonuni te ka hrilh ve a, an phili hle. Kei tak pawh chiai tak ka ni. Duatpuia hruai a ngai tawh bawk si, ka chhuak ta phawt a. Duatpuia nen in kan thlen veleh Ruatkima ka be ta nghal a, Hlupuii an man thu te chu ka hrilh ve, "Hlupuii a nih ka ring lo. Ani pawh in nu ang bawkin tal awhtir an tum a nih chu" a ti hmiah mai. Chutiang chu ni tak tak se ka ti hle. Ka û chu ka be leh a, "Hei hmuh an phal lo. Rilru a buai, ka rawn haw ṭêp,. " A rawn ti a. Biak buai vak ka duh loh avangin ka dah nghal. Zonuni leh ka nute pawn Hlupuii a nih an ring lo, kei erawh ka mang vek. Hlupuii a nih theihna lam ngar ngar ka ngaihtuah a, sual pawh ka inti. Ka thunun thei si lo,. Mi an pawnlam landan aṭanga teh ngawt hi a dik lo fô tih kan hria a, tin, kan laina emaw kan lamhnai an nih avanga thil dik lo an tih pawha sawi mamsak te, awihsak duh loh tlatte hi a dik chuang lo. Ka û bialnu a nih vang ringawtin Hlupuii hian khang thil kha a ti thei lo turah ngaih ve ka duh lo a ni. Pu Saiṭhuama thusawi ka hrechhuak nghal vang vang mai a,. Pu Dinpuia thattu pawh an la man hmain Hlupuii an hling ta chat a, Hlupuii hnen aṭangin Pu Dinpuia leh Martina thattu pawh an hrechhuak thei ang chu. Ka u a rawn haw a, a chauh hmelin a ngui khawp mai. 

Ka nuin a lo be nghal mawlh mawlh a. "A ṭang nasa, a pindana kha thil an hmu kha amah pawn mak a ti ve hle niin a sawi a. Ka hrethiam tawh lo. Nula huaisar leh kawlh tak ni ṭhin mah se; Khang ruahmanna zawng zawng siam tur khawpin a fing lo. " A ti nghut nghut a. Tihtheih kan nei der si lo. Pu Saiṭhuama lahin nikhua a la hre chiah bawk si lo, an chhungkua chu an buai ve khawp ang le. Pu Tluanga'n Zonuni nena zana an ina kal turin min rawn ngen a,. Kal kha chu kan tumsa hrim hrim. Zanriah eikhamah ṭhu khawmuang lovin kan phei ta nghal a. 

"Hlupuii hi lo ni tak tak se, eng nge i rilru tur?"ka ti a. 

A ngawih vang vang hnuah, "Ngaihdam chu harsa ka ti ang. Mahse, U Mama nun chhiat ai chuan ka tlawm thei ang" a ti khur dar dar a. 

"I ngaihdam theih loh pawn ka hrethiam che kei chuan aw. Ka û pawn a dem miah lovang che" ka ti mawlh mawlh a. 

"Hlupuii a nih loh hram ka la beisei. Thil kal sual palh ni hram rawh se" a ti vang vang a. Ni e, an unau zingah rau rau Hlupuii nen an inhnaihin a kawm pawh an inkawm thei ber a, Zonuni rilru pawh a buai viau dawn tih ka hria. Hlupuii te in kan thlen chuan amah Hlupuii pawh a lo ṭhu vâng a,. An neinung bawk a, ukil ṭha tak an nei a ni bawk a. A pindana lehkha pawimawh an hmuh vang mai mai chuan a tâng lo khawp ang. Zonuni a hmuh rual chuan, "Dâwt vek a ni. Ka ni miah lo a nia" a lo ti nghal chawt mai. Zonuni pawh chuan, "I nih hi keipawn ka ring thei lo, eng emaw chu a awm a ni" a ti ve a, Hlupuii chuan thaw huai hmel a pu. 

Sharoni chuan, "I game play dan a mawi hle mai. A kawtawpa i ṭan hnuah ka nau chungah burbun i tum leh a.." a lo ti leh hram a nih chu! Zonuni pawh a insûm thei ta bik lo a niang, "U Sharon, a tawk ta viau mai. I pa fabik ka nih vangin min hmumawhin min enhrang ni la chu ka hrethiam. Hetiang buainaa ka inhnamhnawih rinna i nei leh min puh chhe viau zel mai hi ka lawm tawh lo. Engvangin heng thil hi ka tih ang? Mawh? Engvangin nge ka tih ang?" Awki sâng angreng tak hian a ti ve ta sak sak a. Midang pawn an lo khap miah lo, an unaunu chu an ngei ve tho a nih ka ring. 

Nui lui kual velin, "Ka pa laka phuba lak i duh vangin mawle..ama din leh enkawl Home pahnih chu hei i khartir thei ta a, ka pa damloh lai remchangah hmangin Hlupuii pindanah lehkha i rukchhuah ngei kha i dah leh a, Hlupuii hi tâng se, a aiawhte pawh i duh a ni thei. A chhan chu ani hian ka pa sumdawnna a chhunzawm dawn tlat a..ka sawi chu a dik em?" A ti hlang hlang a, inla confi zetin a inkuangkuah thân bawk. 

Zonuni chu a nui hawk, "I rilru chhiat ang ang kha pu ve turin midang ngai tawh suh. Kha chen ka pa diktak hriatchhuah tumin theihtawp ka chhuah a, engvangin nge phuba chu ka lak duh ang? Ka pa hnen aṭanga engkim ka hriat hnu aṭang phei kha chuan ka khawngaih hle zawk asin. Phuba lak duh vang ringawtin engvangin nge ka thisen zawm awmchhun ka nau chu ka thah duh ang? Ka thawhna home-ah midang min rinhlelh turin engvang tehlulin nge pitar kha ka thihtir ang? I fing viau emaw ka tia,. Engti kawng zawng mahin kei hi ka ni thei lo hulhual, tunah hian a victim chu keimah ka ni. I lo hre tawh dawn nia aw" a ti ve leh ta fak fak a. An inngam dun khawp mai. Pu Tluanga chuan, "A tawk tawh e. Duhtawk tawh rawh u, a zia lo ṭhin êm mai. Sharon, nang pawh a ranglamin phaiah chhuk ang che. Ka pa damloh veleha tum nei rânin i rawn haw tih hi kan hai hleinem. Ka pa lak aṭangin i inlahrang tawh a, tun ataka rawn inlak hmangaih thar viau a ngai lo. " A lo ti ta thak ṭhak a. Zonuni pawh a ngawi zui ve nghal. 

Boruak tihdaih tum takin Hlupuii bulah, "An rawn check tawp em ni? Engtin nge lehkha chu an hmuh theih?" Ka ti a. Ka û khan khalam kha engmah a sawi tlat lo a ni. 

"Aw..min koh mai duhtawk loin kan in chhung dap theihna lehkha an nei a. Pindan tin an dap, ka pindanah an han hmu ta bîk a! Mak ka ti asin aw. Kha lehkha kha ka vawikhat hmuhna a ni" Hlupuii chuan a ti a. Ka awih thlap e. A hmaa ka rinhlelhna te kha an bo duak nia! A chhan chu Hlupuii hmelah zâmna emaw han manganna emaw hmuh tur a awm lo, thinrimna erawh hmuh tur a awm thung. 

Ṭawng ngai mang lo an tlangval Jerry chuan, "Zonuni te nupa pawh in zahawm ka ti,. Mahse, ka farnu a nih vang pawh ni lovin Hlupuii hi mi duhâm leh sum ît huam mi a ni ngai lo. Ka pain a sumdawnna chhunzawmtir a tum pawn a hnial nasa a, mahse, hei tunah kan ngen nasat avangin a ai a awh chho dawn a, ṭawng huatthu suhah in unaua ka pain a hnutchhiah rosum aia tam daih a la thawkchhuak dawn chauh, chuvang chuan heng thil hi chu a tih ka ring lo hul hual..ka pa pawn a ring hek lovang" a lo ti chuar chuar a, A tawng hi a muang a, a la ṭawngtlem em em zui. Misual erawh a ni lo. 

Hlupuii bawk chuan, "Police te kha chuan engkima min burbun kha an tum bur niin ka hria. Atea thihna aṭanga ṭanin Martina inpuanna te kha min chhiar khum a, U Dinpuia nen unau ang maia kan inngainat te an hre vek,. Ani pawh a inpuan mai ka hlauh avangin ka thahtirah an ngai a, ka chiâi ve bawk nen, han insawifiah vak ngaihna pawh ka hre lo a, mahse, Pu Jeru-a a rawn lang a, min rawn chhan ta a ni. Ani chu awm lo se min puhna zozaite kha ka nih awm ve hmiah maithei a ni. An thiam sia.." a lo ti ve mawlh mawlh a. Pu Jeru-a chu an chhungkaw ukil a ni. Jerusalemthara a nia, ukil zingah a lar pawl a ni bawk. 

Tluanga chuan, "Mahse, tikhan engkim a fel nghal lo a nia, an la rawn ko fô dawn che a, keini tan pawh heng thil titu hi hriat ngei ngei a ngai tawh a nih hi, ka pa detective rawih lah khan engmah a chhuichhuak thei si lo. Malsawmpeka hi awm se a ṭha tur a nia" a lo ti ve mial mial. Ruatkima kan chhuitir thu erawh sawi kher ṭul ka ti lo,. A la hun lo. Zonuni chuan, "Keimah vangin rilru nuam lo deuhin awm miah suh. I ti lovang tih hi ka thinlung hian a hria,. Kan chhungkaw zing ami an nih pawh ka ring ta lo. Mahse, kan chhungkua min hrechiang em emtu a ni ngei ang" a ti dap dap a. Sharoni chuan, "Chhungkua tih zingah tel vena i nei lo" a lo ti leh zauh. 

Jerry thin a thawk deuh nge, "Nang hi naktukah thlawk thla ang che, kan chhungkaw inlungrualna leh inpumkhatna tihchhiat duhtu i nih hi, he inah hian mamawh i ni tawh lo. " A ti chang ta fak fak a. A nau mah nise, Jerry chu a chhang ngam lo nge a ngawi ta dûk mai. Hlupuii pawn, "Mami hi a ni thei mai lo maw? Heti em ema Zonuni hua chu" a lo ti ta hmiah mai. Sharoni chu kan melh ta ṭhap a, ani lah thinrim engphiar hian, "Phaia awm chungin engtin nge khang zozai kha ka rawn tih ang a? Dinpuia thawhpui turin kan inhmuh sakhi ṭhinzia in hria alawm, a sawi pawh in sawi ngam zawk hi ka ti. Nunhluzual, ka beng hrep mai tur che nia" a ti ta tâwn tâwn a, a sa takzet tih a lang. 

Mapuii chuan, "Inbengdai teh u. Ni e, Sharoni pawh a ni lovang, Dinpuia nen khati khawpa boruak nei an nia, an thawk dun lo tawp ang" a lo ti ve a. Ani hi chu a dam thlap reng mai a, "Tluanga te nupa saw an chhungkaw khaidingtu an ni" tia Ropuia'n a lo sawi pawh kha a dik hmel viau. A hnua ka hriat leh danin Sharoni leh Dinpuia te kha inngaizawng hrep tawh, innei mai tura mite pawn an ngaih an lo ni ṭhin a, mahse, Dinpuia khan tuna a nupui lakah sawn fa a lo nei ta hlauh mai si a! Sharoni chuan huat namên loha huain a nun leh mizia pawh a danglam phah vek niin an sawi. Chuvangin anni pahnih chu an thawh dun theih a rinawm loh. Rilru a buai leh ta mup mai. Engkima ṭang tlanga inpeizawn zel tura inchahin Zonuni nen chuan kan hawnsan leh ta phawt a. 

Pu Rinawma nen pawh kan inbia a,. Chet lak dan tur a vân tawh hle tih a sawi,. "Thil pakhat erawh kan hmuchhuak leh e. Dinpuia thih nî khan Home-ah tu nge a nih insawi duh loin donation a rawn hlan a,. Smart Tv lian ṭha tak leh Dining chair 20 bawr vel a rawn hlan an tia, a rawn dahtu te kha mi pathum an ni an ti mai a, an zinga pakhat chu pa lian tak, lukhum khum, mask vuah, tarmit dum vuah a ni bawk a, a inchei dan a dangdai deuh avangin an lo notice deuh a nih hmel. Hmangaiha khan khang thil kha sawi nachang a lo hre lo va,. Tv chu Pu Dinpuia roomah a zu dahluh sak nghe nghe a niawm e. Mahse, tlai lamah daih Dinpuia kha a thi bawk si,. An va kal hun kha chawhnu lam dar 3-4 inkar vel a ni bawk sia,. Mahse, thil nithei ve tho chu, kha pa Zonuni vautu anga kan ngaih kha Dinpuia nen inhresain an thawk dun a, Dinpuia rooma a lut kha chhuak tawh lovin a awm zui ta pawh a ni thei. Tin, khatia bungrua an va dah fel lai khan thawktute bakah patient te kha pawn lamah hnathawkin an buai viau a, an lo ngaihven lo pawh a ni maithei" ..a rawn ti teh nuaih a.

"Chu pa chu in hrechhuak thei bawk si lo,. Rilru a buai tawh khawp mai" ka ti a. Ka dem ve dawn lek lek zel,. Amaherawhchu, hnuhma hnutchhiah nei lo misualte chhuichhuah a harsat zia ka hre ve a, han dem viau dawn pawn ka tîm leh ṭhin. 

"Ni e, theihtawp erawh kan chhuah a nia. Nunhluzuali kha kan ko leh ang a, a inpuang em em ang" a la ti fan a. Anni lam chuan chiang hlein an ngai tihna a nia,. "Hlupuii pindanah khan heng thil titu hian a lo dah pawh a ni thei" ka ti ve leh a,. "An cctv footage kan en dawn alawm. Hmuhchhuah eng emaw tak zawng a awm em em ang" a rawn ti ve a. Thaw a ipik ṭhin mang e. 

Ka û lah chu a rilru a buaiin a bialnu chu a theihna zawng zawnga chhan a duh tih a lang reng. He buaina chingchivêt hnawk lutuk hian chhungkaw pahnih min nghawngin boruak lah a ṭha lo lam hlirin a kal bawk si. Ka û chuan Zonuni a biak tlem phahin a inthlahrun vang nge phei zawng ka hre lo. Zonuni lahin be tang e a ti lem chuang lo, mahse, midang nen erawh an inpawhna a thuk tial tial thung. Sateii pawh a bialpain inneih a sawi ve ṭan thu te a sawi niah niah zel,. Ka nu hian a ûksâk duh ṭhin lo. A fanu neihchhun kha a ni ve a, Singapore-a a awm lai phei kha chuan an inbiak ve tawh chuan an ṭap dun ngei ngei, nufa inngai tak an ni. Chuvang chuan pasal neihtir mai chu a tum rih lo a nih hmel. Keini tak pawn kan la ui,.a bialpa Hruaia hi tlangval fel tak, ruihtheihthil ti lo, Kohhran bel mi tak a ni a. An khawsak erawh kan inang vel ang. Wholesale dawr an nei ve a, chu chu a nghak ṭhin. Sumdawng ve ve chu an inrem phian ang. 

Hna kan la chawl si, tihtur a vâng duh angreng. Hlupuii pawh an ko leh tawh a, a thu ngai bak engmah a sawi si lo, Police lam lu pawh a hai viau ang. Cctv footage pawh an en a,. An inah hian lut chhuak an awm ve zut zel a. Hnathawkte bakah pa ber chanchin ngaihvena lut an kat nuk mai. Tin, inleng kawmna pindan leh pawnah bak cctv an vuah bik si lo va, han hmuhchhuah tur a vân hmel khawp mai. 

Biteii te pawh an chhuak tawh a,.an fapa pawh a ṭha e. Chutihrualin Ruata chhungte mak ka tihna mai mai chu, an nau neihna senso zawng zawng kha kan peksak vek a ni. Ruata pawh a lungni lo viau mai a, an chhuah dawn khan, "Kan khâwk hlauh, i û ten puk tur an neih chuan lo pe rih mai se, nakinah rulh dan a la awm mai ang" an ti a. Ruata û damlo enkawl nan an lo hmang ve bawk nen, Bill chu kan peksak a, Zonuni chuan, "Rulh kan ngai tawh lo" a ti naa Ruata inthlahrung chu a chhungte bulah a lo âng ve phiar phiar a niawm e. Keipawh ni ila ka ti ve tho ang, mipa tan a tlawmthlak tlat. Biteii chuan an chhuah atanga ni 4naah a u a rawn bia a, a rawn ṭap ṭuau mai. 

"Û, ka thei tawh lo, ka tuar thei tawh thlawt lo, min lo hruai thei ang em? " A rawn ti ta. A chhan a han zawh chuan, "Nau nei zo hlim ka nia,. Ka nau neih hmaa ka chet ang chiahin ka la che a,. Ka hlûm na avangin ka che tha thei si lo, ka ṭhen tlawk tlawk pawn, U Sangi leh Nuni te chuan, "I tider a niang" te min tia. Naute nise min lak chhawktu ka nei bawk si lo,. Ka peih tawh lo" a ti tawl mai. Ruata nu hi ruhseh nei, natna dang pawh nei nual, hrisel lo em em a ni ve a, chuvang chuan Biteii chu a chet chhâwk vak thei lo vang. Zonuni pawn a nau lungchhia chu a hawisan thei awkawng lo mai. Numami te in hnuai an luah kha an bungrua leh eng ilo te kha an la dah vek a, luah man pawh Zonuni'n a la pe reng tho,. Nakinah Biteii ten in hrang chan an duh ve huna an luah atan tiin a la humsak ve hram hram a ni. Chhungkaw rual luah chi a ni lem lo bawk a, Numami te lam pawn an remtihsak a ni. Ka nute chuan, "Sawta awmtir ringawt pawh a fel lo vang, kan inah rawn awm rawh se, inthlahrung reng reng suh u, kan nau tho alawm" an ti a. Ni e, Biteii te nufa ringawt awmtir kha a dik thei lo. Zonuni erawh a inthlahrung hle. Tihngaihna awm chuang hek lo, Biteii chu kan va hruai ta hmiah a, Ruata a awm lo naa kan hrilh ta tho. Zonuni'n Ruata chhungte bulah, "Ka nau hian ngaihsaktu a la nei ve tih hria u la, hetiang em ema sal ang maia in chhawr hi kan remti tawh lo. Kan lo enkawl ve rih tawh ang e,. " A ti ve hmak hmak. A zahpah duh tawh bik lo a niang. Ruata û Sangi lah chuan, "Bungrua rawn lak nghal tur alawm le" a rawn ti nghat a. 

"E! Kan rawn la em em ang, lo buai suh. Nang hi he chhungkaw mi leh sa pawh i ni tawh lo a ni lo'm ni? I pasal farnu pasal nei tawh te kha i monaah sawn i awm ang hian rawn awm ve se, i huat dawn nen. I zahpuiawm ka ti khawp mai. Lo kal rawh le, Bite.." Zonuni chuan a ti hmiah hmiah. A nau thlavang hauh chu a tina ve hle. Ruata pawn, "Ni e, inhlawha ka chhuah a ngai thin sia, a khawngaihthlak êm mai, lo hruai rih mai r'u, mahse, inṭhen kan ni lo a nia. In dang turin ka lo inbuatsaih dawn nia" a rawn ti ve hmak. A chhungte lakah a lungawi bik lo tih a lang. Lungawina chi ni hek lo le. Kan inah Biteii te nufa chu an rawn lut ve ta râwih a,. Mikhual roomah an mu a. Ka nu hi mi lainatna ngah chi a ni bawk nen, a khawngaih hle. Naute pawh amah vekin a bualin a enkawl a, Biteii a leh âwl ta phian. Ka nu khua a har loh phah bakah Duatpuia lahin lawm rual la ni chiah lo mah se; naute chu a lo lawm ve em em bawk nen, kan chhungkaw boruak uap churh pawh Biteii avangin a ziaawm chho ta phian. 

Rinliani kha kan inchah ngunin chhungkuain an zilh nasa bawk a, a nun sim a tum ve hle a niang. Inah a tawm deuh ngawt ngawt a, zu ngawlvei han tih mai tur a la ni chiah lo bawk a, kar lovah a taksa te pawn ngai rawn awh chhoin amah pawh hmuh a nuam chho ta hle a, Pa Tlana pawh hmuh theih khawpin a insiamṭha ve a, ka pa pawh a lawm hle. A hma ang bawkin chhungkua kan inpawh leh tawh a, keipawh va lenluh zauh zauh chang ka nei. Ka nî rilru hah chaw ei thei lo pawh a mum kâng tawh. An lawmpuiawm e. Ni e, keimahni duhthlanna hi a pawimawh ber, kan duhthlannaa kan chian a, kan tum phawt chuan thihna chauh lo chu hneh theih loh a awm lo. Engkim hmachhawn thei tura min duangtu Siamtu hian engkim hneh thei turin min din ve tho tih hi hriatreng a ṭha. 

Ruatkima pawh a han reh leh vang vang zel a, hma a sawn turah ka ngai ngawt a, aman min lo biak loh chuan va zawh sek kha hrehawm a tih ka hlauh avangin ka be hmasa vak lo. Pu Saia pawn hmasawn ve zelin a biak theih tawh a,. A cancer tih pawh a inhre tawh. "Muani thinlung ka tihnatna phuba chu lakin a awm ta a nih hi" a ti thei hmiah mai a, a thlarau nun va hriatpui lo mah ila; a hmel hmuh a nuamin a ṭawngkam chhuak pawh dawnsawn a nuam viau. A fanu Hlupuii chunga thil thleng pawh an hrilh ve a, "Rindan neih thiam a harsa hle mai. Ka fanu a ni a, ka hmangaih hle bawk. Khatiang thil êm ti tur chuan ka ring phal lo, mahse, a lo ti ta a nih pawhin ka pawm thiam ang" a ti mai a. Zonuni nen a phone aṭanga vauna kan dawn dan kan hrilh ṭum chuan, "Kan nu bula ka zawh khan, 'Damdawi ina kan hruai hnu chea ka hawn khan i phone chu ka hmu tawh lo. Ka call nasa, document i dah tam si a, a pawimawhzia ka hriat avangin. Mahse, ka hmu zo thlawt lo' a ti a. Chutia keima number atang ngeia vauna in dawng a nih chuan kan chhungkaw zing ami ngei a nih a rinawm ta hle mai. " A ti a. A chhing vang vang bawk. 

"Pa, sawi nuam a ni lo naa, Julie te hi a ni thei mai ang em?" Zonuni chuan inthlahrung zetin a ti a. 

"Aih, ni lo, Julie zawng a ni thei lo vang. A dawihzep lutuk, tin, chutiang em ema duhâm a ni lo. " A ti tlat bawk si. "Mi hi kan rin ang ngawt an ni thin lo asin" ka ti ve ngial a. 

"Tun hnuah in dawng leh tawh em?" A lo ti daih. Kan dawng leh ta miah lo va, kan dawn hnuhnun ber, "Ro a sem hun hunah kan inremsiamna kha hrereng ang che" tih kha a nia,. A reh ta char char. Ruatkima pawn a call fô thin thu leh tunah phei chuan voice mail pawh dawng tawh loin a tlang thei tawh lo tawp niin a sawi. Pu Saia sim card kha an paih daih tawh a ni ngei ang. "A tirah policeah thlen u la, number kha an trace mai tur a nia. Tichuan, ka phone kawltu chu awlsam taka man a ni mai tur" ..Pu Saiṭhuama chuan a ti a. Min tlankhalh leh mai kan hlauh thu leh nunna dangin a tawrh leh kan hlauh thu kan sawi. 

"Ka fate hi a mal mala ka zirchian pawn nangni unau chan tur ît ngawih ngawih khawpa rilru rethei an awm ka hre lo. Ka nupui lah sawi tawh angin khatiang ruahmanna zozai nei tur khawpin a fing tawk lo, a dawihzep bawk si. " A ti chuar chuar a. 

"I damloh tirh, damdawi ina hruai i nih lai khan mi hrang an awm ve em le?" Ka lo ti a. 

"Ka hre hauh lo mai,. Ka pindan bîla ka awm lai a nia. Ka thaw a rawn sak thut a, nikhua ka hre lo zui a ni mai." A ti bawk si. Julie kan biak a ngai dawn a ni. Ruatkima bulah pawh ka sawi nghe nghe. Pu Saia ang deuhin Julie hi chu keipawn rin harsa ka ti ve khawp mai,. Kan inhriat hnu hian han sêlna tur ka hre mang bawk si lo,. Tluanga te unau pawn Julie hming kha an sawi ri lo hrim hrim, an ringhlel bik lo a niang. 

Ruata leh Biteii te pawh an in dang ve thei dawn ta a. An inah bungrua a awm sa vek a, han buai hluaina tur a awm hran lo. Kan nupain kan va pui ve a,. Biteii pawh a hlim hle. Naute lah hi a mu chuah chuah reng a, a chum roh si, ka nu phei chuan a paw nasa bawk a, an in dang tur chu a ui ru hle niin ka hria. Tunah chuan chhungkaw nu leh pa mawhphurhna an ko-ah a tla ve ta chu a nia,. Ruata pawh Zonuni'n zu nghei turin a hrilh ve ngial kha. An inzawmsak ve ang nge mawle. 

Muthmunah, "I la rai lo mi?" Ka ti ngawt pek a! Ka zawh dan teh ngawt chuan a nuih a tiza a niang, a nui vak vak. "Ka hre lo, hei ka la ngaichâng" a ti ta a. Thla laihawlah a period tlangpui thin a, thla chanve chu kan hmang tawh. "Thla tawpah in test rawh, i period loh chuan" ka ti a. 

"Chiang sa..kan boruak avang hian rai lam pawh ka lo ngaihven vak lo va, mahse, nimin khan ka ngaihtuah ta mai mai a, ka la period miah lo tih ka hrechhuak a" a ti mawlh mawlh a. 

"I rai ka ring, kan tih lai khan ka ṭawngṭai nasa alawm" ka tih chuan ka bengah a rawn pawt a, "Engtikah khan..kan ti zing sia" a ti sap. 

"Tih apiang khan" ka tih chuan a nui awr awr a. "Ka awih lo nasa, ṭawngṭai theiin i awm ngai lo" a ti hap a. 

"Nia, rilru zawng zawnga tawngtai chu a har ve reng" ka lo tih leh phei chuan, "Ka nu chuan kan titi hi ngaithla se min hau hrep ang" a ti a. 

"A ho lutuk, nupa chu engkim sawi dun tur. Ka sawi zak tih vel hi chu inpawh loh vang mai mai" ka lo ti duh lek a. 

"A dik alawm. Ka tleirawl aṭanga ka nulat chhuah thleng khan kei chu zahmawh lam hi ka ngaithla zak tlat zel. Ka lo lai ve tawp zel a nih chu, mahse, nang nen kan inneih hnu hi chuan i bulah na nâ na chuan ka zak tawh lo nasa" a ti ham ham a. Kan nui dun hawk hawk. Kan nunah hian zahmawh hi a bet ve tlat tih hriat tur,. Min tizahawm lo khawpa va uanpuia va inpholan erawh tih loh tawp tur a ni a,.ṭhenkhat chuan an ngai thutakin lo nuihpui ve pawh hremhmun tlakna khawpah an ngai châwk! Nupa ve lem si, nupa nun hman danah rau rau pawh, "Hetiang hi kan nu duhdan,.hetianga ka awm hian kan pa a phur zual thin" tih pawh ngaihtuah nachang hre lo, bung ve tawp, tla hlawm ve tawp hi an tam mai. Tu emaw zawkin an nupa sex life han sawi se lo ngai hur ngawih ngawih lah bâng lo. Sex education kan inzirtir tam tawk lo hi a pawi..Tu emaw thawnthu ziaha sex scene lai bik lo notice chat, a ziaktu lo ngai hur ta viau ho hi chu a tlangpuiin an rilruah sex a len vang a ni thin. Nupa khumlaizawl nun a nawma kan intihphur tawn thiam poh leh vuivaina tur leh han inkhikkhakna tur pawh hi holam takin a nuailiam theih mai zel,. Hei hi nupa nuna thil pawimawh tak a ni. Zonuni pawh hmeichhe vawt, thinlung sak anga lang thin kha a ni tak naa..khumlaizawlah meuh chuan a fing leh tlat,. Zonuni a ni meuh maw tih rum rum chang ka nei fô. Mahse, ani ka nei hi ka inchhir lo ber mai awm e. 

Pu Saithuama, in lama an inenkawl aṭangin kar khat a liam leh chiah. A dam loh hmaa a lo rawt tawh kha tihpuitlin hram a duh bawk a, Chhungkaw chaw eikhawm kan nei thei dawn ta. Buaina dang awm tawh lo hram se kan ti viau. Keini pawh chawhnu lam atangin kan inbuatsaih tawh a. Zonuni'n bawkbawn a bai sak leh hram bawk, Sateii hian a bawkbawn bai tui a ti lutuk a, a rawn lei haw tlut tlut zel. A pa room atangin Duatpuia a rawn tap chhuak a, a piin a lo chiau au vat, "A pa saw a sual si. " A ti ṭiau a. 

"Ngah nge i va kal? Tibuai rih suh ka tih kha" a pi chuan a ti a. 

"Ih, zu a in a nih kha" a lo ti daih. Ka nu nen kan inmelh zawk mai. 

"A in lo, a nam ve mai mai a nih kha..hawh le, chaw i ei ṭêp, ka silfai ang che" tiin bathroomah an inkai lut a. Zonuni'n zawi sapin, "An inthen tak tak em mawni le?" A ti a. 

"Ka ring".tih chauhin ka chhang. Nimin piah khan ka û chuan Hlupuii nen an inṭhen thu a sawi a,. A chhan erawh a sawi lo. A tuar na hle a niang, a inkhung char char a, school pawh a kal lo. Kan rualin chaw a ei ngai hek lo. Ka nu leh pate chuan enliam rih mai turin min ti a,. Keini nupa vanga an inthen a nih chuan nuam lo ka ti viau ang. A vanduai ve ngawt mai. Rilru mawlhtu nei run chungin ka pute in lam chu kan pan ta a. Kan va thlen chuan an lo kim ṭhap tawh, Pu Jeru-a pawh a rawn tel thei a,. A lawmawm e. Hlupuii erawh ka ngaihbel nge a hlim thlawt lo va, a mitmeng pawh a bui deuh lâk mai, an inthen tak tak a nih dawn hi. Police lamin an tibuai tawh rih lo va, a ṭanna ngaiah a ṭan ngheh em vangin fiahna dang nei ta lo chu an thlah zalen tawh a ni. Zanriah pawh kan ei zui nghal a,. Sharoni kha a pain nikhua a rawn hriat hma khan a haw thla tawh. Nuam a ti ta bik lo a niang e. An siam chikimin a tuihnai bawk a, puar tak ka ni. Tluanga fate hi an u ber hi chu a tleirawl ve uaih tawh a, an zakzum hle, biak erawh chuan ṭha takin min chhang thung. Chaw eikhamah kan ṭhu ta ṭhap a. Pu Saia pawh nachhawknain an jection a, buhhawp an eitir kha a nia,. 

"Le..hei zaninah chhungkaw thu pawimawh tak kan sawi dawn a. In rawn kal thei hlawm a, ka lawm khawp mai. Kei hian hun ka nei tam tawh lo va, he hun avang hian ka la dam hram hram ni maiin ka hria. Zaninah hian ka thurochhiah ka puang dawn a ni. Ka pu hunlai ata tawh sumdawnna ngelnghet tak neiin hei chen kan thleng tawh a. He kan chhungkaw sumdawnna hi ka fate pawn in rawn chhawm nun zel ka duh a,. Ka fa naupangber Hlupuii'n chu chu min tihhlawhtlinsak dawn a ni. Tin, Ngawlveite rûn leh Tar enkawlna hi tunah khar rih mah ila, nakinah chuan Zoram hian a la mamawh dawn chauh avangin hawn leh thuai a ni dawn a. Heng Home ang hi District Capital dangah pawh bulṭanna kalpui mêk a ni a,. Hei pawh hi in chhunzawm a ngai dawn a ni. Tluanga ka fa upa ber hian Hardware dawr changtlung tak neiin ngaihtuahawm a ni lo va,Jerry pawh Hotel lian tak tak a nei bawk a, a tluchhe lo turah ka ngai. Sharoni hi min do thin viau mah se; ka fanu a nihna a bo lo va, ani pawn chan a nei ve tho dawn a ni. Tichuan, in rosum chan dan tur te chu Pu Jeru-a'n han chhiarchhuak se la.."..tiin Pu Saia chuan, Pu Jeru chu a melh a. Thu tam tak a sawi thei tawh lo, a ṭawng hnem chuan a chauh phah zel tawh si a. Pu Jeru chuan lehkhaphek inthuah tam vak lo hi a rawn lek chhuak a,. 

"Ka'n chhiar nghal pawp pawp ang e. Fapa upa ber Vanlaltluanga hian Tanhrila ka ram leh Tuikual south-a ka in saw a chang ang. Sharon Lalchhanchhuahi hian Shillong-a ka in khu a chang ang. Jerry Ramthanpuia hian, Chanmari-a ka dawr leh building saw chang bawk se la. Nunhluzuali hian ka sumdawnna a rawn chhunzawm ang a, Zarkawta ka in saw a chang bawk ang. Tuna kan luah mek ka in leh lo hi Lalhmangaiha tana ka dah kha a ni a, mahse, a boral tawh avangin ka tidanglam a, Ka fapa upa ber te chhungkuain luahzuiin chenho zel an duh a nih pawhin harsatna an siam tur a ni lo. Ka nupui Julie Lalrinsiami hian, Dawrpuia ka in sak thar leh Ramhlun south-a dawr atana an hman building pumpui saw a chang bawk ang. Ka fanu Parchuailovi, tuna Zonunpari ni ta hian Ngawlveite rûn leh Tar enkawlna bakah Nau awmna tur ruahman mekte hi a chhunzawm bawk ang. Sum leh pai thuah chuan ₹ Nuai 50 ṭheuhin ka nupui fanaute hian an insem ang a, a la bang zawng hi ka sumdawnna chhunzawmna leh Home pahnih enkawl zui nan ka ruahman bawk a. Nuai 40 hi ka unauten an insem ve bawk ang. Kan ina hna min thawhsaktu Vanlalrengi, Lalhlimpuii leh Lalmawizuala bakah ka driver kumhlun Laldampuia ten nuai 1 ṭheuh an chang ve bawk ang. Hei hi ka thurochhiah, ka thih hnua ka nupui fanaute tana ka tihtheih tawk a ni e. " Tiin a chhiarchhuak ta dap a. Ka lungphu a lo rang kher mai. Zep thu a cheng lo, nuai 10 aia tam pawisa hi hmaichhanah ka la hmu miah lo. Boruak a reh duk hnuah Pa ber chuan, "Sawi duh nei in awm chuan sawi hunlai tak a ni e" a ti sup a. 

Zonuni a che hrut,. "Ka pa, sawi duh ka nei a" a tih rual rualin a pa chuan a kut a lo vai a, "Ka pawm lo. Vautu che avangin ka thu i hnial tur a ni lo. Tin, i pawm emaw pawm lo emaw khang misual te kuta heng ka rosum te hi a luh theih ngawt dan a awm lo ve. " A lo ti ta hmuk hmuk a. A unaute pawh chuan an lo sawi ve tliar tliar mai, min rawn melh a, Kei chuan a duhthlannah ka dah. Mahse, uiawm chu ka ti khawp mai. "Aw le. Heng thil titu hi kan hriatchhuah phah maithei asin.." a ti ve thei ta a. Pu Saiṭhuama sawi ang khan keipawh heng ruahmanna siamtu hi fing viau angin lang mah se; a fing ziktluak lo deuh chuan ka hria. A chhan chu Zonuni hian pawm lo ta pawh nise, tu hmingin nge a dah chuang ang? An hminga dah turin an rawn ti ngam dawn bawk si lo,. Engtia neihsak theih inring nge maw an nih le? Pu Saiṭhuama at lohzia an hrechiang ve viau sia. Naupang inkhualtelem te pawh an ang alawm mawle. 

Kan boruak mûk zet a kian tak hnuah chuan, Pu Saia chuan, "Bawiha, ka damlai ngei hian nupui neih hi i tum chiah lo em ni?" Tiin Jerry a en a. Jerry nupui hual Ruthy hi sawi tawh angin model lar ve tak, hmelṭha leh piannalh zet mai a ni a, Social media lamah pawh a lar hle. Jerry nen hian an inkawpna a rei tawh angreng a, mi zawng zawng deuhthawin an inngaihzawng tih an hria ang. An zêp lem lo bawk a. Jerry chuan, "Nia, sawi ka lo tum mêk a, Ruthy pawh a inpeih thawkhat tawh chuan ka hria, palai tirh mai pawh a pawi lo" a lo ti ve mual mual a. A pa damlaia neih chu a duh ve ngei ang. 

"A ṭha, a ranglamin kan tir dawn nia. Ka chau deuh e a. Nu-i, min muttir tawh mai ta che" tiin Julie a en a. Rang takin an pindan lam an pan dun ta a. Rengi thingpui lum kan in laiin Rengi chuan, "Hlimi hian bialpa a nei a nia aw. A chhe vak lo lehnghal. Vawiinah pawh an inhmu" a ti zuah zuah a. Hlimi hi Rengi ang lo takin a khal a, awmpui pawh a ang lo. An ei a ṭha a, a vun a mamin skincare te pawh a ti ve nasa a niang,. An eisiamtu ber a ni a, Rengi hian in chhung tihfai leh in leng lo dawnsawn hi a chang ve bawk. An mipa awmpui erawh Tluanga te dawrah a awm tam zawk mah ang. Mapuii chuan, "Eheu! Chu! Tu nge a? Kan makpa tur chu" nui chungin a lo ti ve a, Hlimi lah chuan, "U Rengi khan a ti ve mai mai a nih kha. Bialpa ka nei teuh lo,. Thil min zawh duh vang a nih kha" a lo ti hlak hlak a. A la upa lo tih a lang reng. "A nih loh kha, a kuah hnâp che kha " Rengi'n a lo tih leh chuan lai zetin choka lam a pan chan chan a. Chhungkua ang vekin an awm a, an inngeih phian bawk si, a nuam ngawt ang. Hetiang chhungkua ni tur chuan a lu ber hi an pawimawh khawp mai. Tluanga te chhungkua in chunga an chhoh hnuah Jerry pawh chuan, "Sanga ka va hmu lawk" tiin chhuah a rual a. Pu Jeru kha chu tihtur pawimawh a neih vangin a chhuak daih tawh a. Hlupuii chu Zonuni'n ṭhut hnaihin, "Mama nen hian eng nge in awmzia? Ti nge in inthen?" A ti ta hawk a. 

Hlupuii chuan a heh a pet fan fan a, "Nangmahni a venthawn êm che u avangin 'Inṭhen mai ang. " A ti tawp. Ka naute nupa hian ka mitmei an veng si a, keimah vanga chhungkua an hlim loh ka duh lo a tia..kei chuan harsa ka ti khawp mai" a ti ṭial rian a. A lungchhia tih chu haider a harsa. 

"Keimahni vang a nih ka lo hlau rêng a..engah nge min venthawn em em le..i fihlimzia kan hria a, kan ring che a. A hmuin a hre ve vek sia" Zonuni chuan hrethiam lo fê hian a ti a. 

"Ka hre lo, a chhuanlam pawh a ni mahna. Midang a nei a niang" tiin a insut hraih. 

"Midang a neih chu ka ring lo, ani pawn a tuar ve khawp asin. Ka lo bia ang" ka lo ti vat a. 

"Be lo vang,. Tlawm tak anga lan ka duh lo. Harsa taka ka beih fê hnua inzawm kan nia, hetia kan tawp ringawt tur hi nâ ka ti.." Hlupuii chuan a ti vang vang a, a mittui a rawn luang ta hial. Zonuni chuan a lo kuah ta vat a. "Lungngai suh, engkim a fel vek tawh a. In ṭha leh em em ang. Keiman Mama chu ka bia ang" Zonuni chuan a ti nghet charh. Ka lo insangmar nasa ve hle. Chutiang khawp chuan Hlupuii'n ka û a duh ang tih ka lo ring ngai lo. An ṭha leh tur a ni ringawt. 

Kan hawn kawngah ka hrechhuak thut a, "Zonun, i intest tawh em?" Ka ti vak a. 

"Vak a che. Test lo, naktukah ka ti" a la ti ta chêu. 

"Rai hi i duh vak lo mi?" Ka ti nghut a. 

"Ka duh loh hmel i ti mi? I mak thin. A negative ka hlau a, ka pehhel zawk a nih hi..bakah a la lang thei lo vang" a ti hlak hlak a. Ka lungawi zawm ve mai. Muthmunah a ro khawm chungchangte chu kan sawi dun a, "Engtin nge maw neihsak che an tum reng reng le..an hmingin i dah dawn pawh a ni si lo va" ka tih chuan, "Ka rindan chuan ka pa hi ziah luihtir an tum a niang te ka tia. Ka hrethiam bik lo" a ti niah niah. 

A tukah zing karah a zun chu a va test ta ngei a. Helhhawlh zetin ka lo nghak. A rawn lek va a, a positive chiang e. Kan khek dun chiam mai. Kan inpawm a, kan va hlim tak êm. Ka nute pawh kan hrilh nghal a, an hlimzia chu aw. Ka û meuh pawh a khi ve sun sun mai. Mahse, a pindanah a lut leh vut a, Zonuni'n min rawn mitmei zauh a, ka zui lut ve ta thâwr mai. Khumah kan ṭhu dun a, nizan lama Hlupuii nen kan inbiakna te chu ka hrilh ve a. "Keimahni avang chuan inthen lo hram rawh u. Kan tan pawh a nuam lo. Hei in tuar dun ve ve bawk si" ka ti a. 

"Englo a ni. Zep loh chuan a langah a thlavang hauh nasa viau mah ila, heng thil titu a nih rinna ka nei tlat a ni. Manchhuah a nih hmaa inlaichinna tihtawp mai kha ka duh a" a ti a. 

"A fihlim vek tawh hi, a zalen tawh " uar zetin ka lo ti a. 

"Ka phak tawka ka chhui ve danah hian amah a nih ka ring ta ber a. Mahse, ring sual zawk ila ka ti khawp thung mai" a ti ro hulh a. "Engpawhnise, sawi dun rawh u,. Sawti khawpa a hmangaih che chuan i bulah chuan thudik pawh a sawi duh maithei asin. " Ka ti ve ṭang ṭâng. 

"Ka lo tum ang" tih chauhin min chhang. 

Ro khawmna puanzar a nih takah chuan min vautu kha kan ngaichâng deuh a,. Rin ang ngeiin tlaia Duatpuia ka han hruai chuan, "Apate, mi pakhatin i lehkha tur min thawn a" a ti ta chiah a. In thlen veleh lehkha chu ka chhiar ta vat a. A ziak tam lehpek lo hle. "Ka pa ro ka khawm zawng zawngte hi a bo a bang awm lovin Chûn chawi loh rûnte tan ka hlan e" tih khawl chhuta inziak hnuaiah Parchuailovi tih hawrawppuiin a inziak a. Chumi lehkha ni lo lehkha phek te taktêah chuan, "I hming sign-na turah sawn signature pe ang che. Tichuan, envelope-ah khungin in veng thlanmual thlen hma lungrem karah khan i lo dah dawn nia. I ti thei lo a nih chuan Mipa naupang duhawm tak hmang hian in inkhul a ngai tawh ngei ang" tih a inziak a. A hawrawp chu hmeichhe kutziak ngei niin a lang bawk. Ka Û fapa thlengin hria a, min lo zirchiang nasa awm hle mai. Duatpuia bulah lehkhathawn petu chu ka zawt a, "Ka class ami Rinrini'n min pe alawm. 'Miin i patea pek tur an ti' a ti.." a ti mai a. A hmel a hmu hauh lo tih a lang. Ka u phei chu kan hrilh duh ta lo. A mangan a zual dawn hian ka hria a. Lehkha an rawn thun telah erawh Zonuni chuan sign a tum eih lo. "Kan hrechhuak dawn tih ka chiang" a ti tlat mai. 

Zan dar 8:30-ah Ruatkima a rawn lut hlawl mai a. Ka nuin a lo be chul mai. A insum zo ta lo nge, kan nupa min rawn enin a nui sâng bawk a. "Ka hlawhtling ta e "a ti ta a. Kan ding rual thawt mai. Ka nu lah a lo hawihai, Sateii erawh hla a zir a. 

"Tu nge?" Ka lo ti nghek a. 

"In lehkha dawnah khan Zonuni khan sign rawh se, Finfiahna a ni nghal dawn a,. Police lam pawh ka be tawh e. " a ti zangkhai vah a. 

"Chuan, tu nge? " ka ti leh vak a. ka hamhaih êm a ni. 

"He thil hi en u la, in hrethiam mai ang. "Tiin pendrive a rawn lek va a, ka lo laksak vat. Ka nu te pawh ngaihsak chang ta lo chuan pindanah ka tlan lut a, Laptop ka on nghal vut. Thil hi rin loh lamah daih a lo thleng fô thin a nih hi a..

(Youtube -a min la subscribe lo a nih chuan, min lo subscribe ve turin ka ngen che a. Comment lam hi tumah ka force lo na che u a..uar ve leh deuh ila tih ka sawi bawk e. )