Parchuailovi 15

PARCHUAILOVI..(15)

Ziaktu : Toni Râlte 

Hlupuii chuan, "Engah mah ngai suh u. A ṭawng ve mai mai a nih kha, hman aṭanga ka pa do tawh, ka pa thu hnialkalh char char a nia" a lo ti ve a. Nuam lo kan ti ang tih a hlau ve tak tak a nih hmel. Julie pawh chuan, "Ni e, hrethiam rawh u,." A lo ti ve bawk. Zonuni erawh chuan, "Kan vawikhat inhmuhna aṭangin kan inbakkaih nghal a, a fuh lo khawp mai. Tin, ka lawm lo hle bawk. Amah zawk kha chhui chian a ngai a nih kha" a ti fak fak a. Hlupuii leh Jerry te inkara Zonuni hi piang a ni a,.Hlupuii tan chuan a û chiah ang a ni ve. Chuvang ni maw a chhang zui tawh lo. Kan boruak a nawm loh zui êm avangin kan haw ta daih a. Zonuni lungawi lo lutuk chu ka hrethiam, mahni lo maha a rilru a hah ve dawn nak alaia khatiang teh hrepa a pa fanuin a ṭawngkhum kha kei tak pawh ka thinur ve hlur mai. Zanriah ei laiin ka nuin kan va kalna vel min zawt a, Pehhel deuh takin Saroni lo kal ve thute chu ka sawi a. Ka û chuan, "Saw mihring saw a la hnawk ang. An unau pawh an buai viau maithei" a ti nghut a. 

"Nia, mi chaldelh pawh a thiam hmel khawp mai. A pa nen an inremlo pawh a awm ve tho" ka lo ti ve a. 

"A pa sumdawnna chhunzawm bakah in leh lo saw chan vek a tum tih Hlupuii pawn a sawi. Mahse, Pu Saiṭhuama hi a vanglaiin lo che nawi viau mah se; a tu leh fate a kilkawi thiam riau.." Ka u pawh chuan a ti ve leh duah a. Saroni mizia chu belhchian vak pawh ngai lovin Zonuni avangin kan hre thei ka ti mai. Zonuni erawh a ngawi reng, a rilru a la na hle a ni mahna. 

Zanah erawh Rinliani avangin kan chhung buai leh zo tawh. Chhungkhat vua leh vangte kan inrâwn khawm a, mipa ho zawngin Aizawl khawpui suartluanin kan zawng ta ruk ruk mai. Nidangah a rawl bo chuan a nu emaw tu emaw tal bulah a awmna hmun leh a lêt leh hun tur a hrilh ve hram zel a,. Tun ṭum erawh Patea nen an inkhik khak deuh a, a roomah mipa a rukin a lo hruai lut ṭhin chu niin, khatia Patea'n a khak kha a lawm lo viau a niang. "Ka thih leh ka dam pawh in ngaihven a ngai lo. Tuman min rawn zawng suh u" tiin a chhuak ta daih a,. Tunlaiah ruang chhar tih luklak a tam si a, ka nî a hlauthawng tlat a ni. Bakah heng tualthihna hi kan chhungkua nen a inzawm deuh titih bawk nen. Rinliani chuan a phone a switch off tlat bawk si. Police kuta thlen êm lovin kan han zawng ta phawt a ni. 

Dar 10 dawnah kan inah kan haw khawm a, Asanga te leh Ni Zami fapa Zawma te erawh an haw nghal a. Kan beidawng ta viau mai. Patea chuan, "Naktukah engmah chanchin kan la hriat loh chuan Police hnenah kan zualko tawh mai dawn nia" a ti a. 

Pa Tlana'n, "Engpawh thleng se, mawhphurhna in la ngam ang chu maw..fa tak a nih loh vangin in lo thlahthlam lu deuh a ni ngei ang" a lo ti ta daih a! Mak tiin kan melh ṭhup mai. Ka pa a rawn ṭawng chhuak ve ta , "Tlanthang, i rilru hi a lo chhiain a lo kawi hle mai ka ti. Tunah i fanu i tuithlar ngei mai kha a pu te bulah khawsain chin hriat lohin a bo mêk a, chuta mawhphurtu ber chu nang hi i ni. I duh loh i fanu an lo enkawl pawh lawm tak aruangin hetiang rilru hi i pu leh daih a, hetiang a nih chuan Thari te nufa nen hian in chengho reng thei lo vang. A nuṭa te kan awm ve dih diah e" . Tiin. 

Ka nî chuan inthlahrung ngawih ngawih hian, "Ka û, hrethiam hram rawh u. Ani hi chu ngaih khatah ngai mai teh u" a lo ti a. 

Patea pawn Pa Tlana zawk chu melhin, "I mak hram hram ṭhin maw? In chhungkaw tana kan unau thiltih zozai te kha i hre ta meuh lo a ni maw? Kan Rinliani kha engvanga tuithlara hnawtchhuak nge i nih tehreng ni?" A lo ti hmuk hmuk a. Pa Tlana rilru hi zawng a kheuhbeuh êm a, tihngaihna tak pawh kan hre tawh lo. Ka pa te unauin an khaichhuah, tuna an in leh lo pawh Pa Muana te in a nia. Eizawnna nise Asanga pa sawipui azara MR-a thawk ve thei a ni a, chubak eizawnna an neih loh avangin ka pate unauah an dinhmun a chhe ber reng a, engkimah kan tuamhlawm a ni ber. Pa Tlana chhungte lamin an lo pur buai ve sek zawk a, ka nî a fel êm zawk a, an la inpum hram hram a nih hi. Pa Tlana pawh a ngawi ta dûk a,. Naktuk lam ngaihchan leh phawt kan ti ta a. 

Muthmunah "U Rini chu aw..a ruangte hi kan hmu leh ngawt ang tih ka hlau" Zonuni chuan a ti sar sar a. 

"Chutiang êm thleng lo turah ngai ang..ṭawngṭaipui ila" ka ti a. Ṭawngṭai hi ka thatchhe chho ta riau mai a,. Zonuni tak pawh hi a ṭawngṭai khat riauin ka hria. Buaina nasa zawkin min han den chiah hian Pathian neitu dik tak hi an hriat ṭhin. Chuvang chuan kei hi chuan ka lo la nei thûk tawk lo a ni maithei a ni. 

Mawlhtu ka neih vang ni maw ka harh ta hlawl mai. Zing dar 3 a pel hret chauh a,. Ka bulah Zonuni a lo mu ta hauh lo mai. A inthiar a nih ringin ka lo ngaichâng a,. Mahse, a rei tak êm avangin ka ngaihṭha lo chu ka tho va, Pindan chhuahsanin kan in chu ka fang kual vel. Kawngkapui chu a inkalh lo tih ka hre ta, ka hawng vat a. Bathlar pangpar an khawina bulah chuan ka nupui chu a lo ding reng mai. "Eng nge i tih?" Ka va ti chu a phu nasa kher mai. Mahse, inthunun tum zet hian, "Ka muhil thei lo va, ka teiharh mai mai" a ti a, a aw pawh a khur dar dar. 

"Hawh, lut ang. "Tiin ka kuah a. "Zosang,. Vauna ka dawng leh a. " Tiin a ding leh rih. 

"Khaw maw?" Ka tih chuan, a phone chu min entir a. A pa Pu Saiṭhuama hnen aṭangin msg hraw zet a dawng a lo ni. "Eng ang pawhin chhui chhuah tumin theihtawp chhuah mah u la, hnehna ka chang tho tho ang. Pu Saiṭhuama laka i chan tur i ro chanai te i hnawlna thu ziakin Pu Saiṭhuama ukil hnenah thawn la, tichuan, nang leh i pasal chhungte bakah i nau Biteii te nupa pawh an dam ang. Ni 3 hun i nei.." tih thu hi a lo chuang vâng mai. Pu Saiṭhuama hnen aṭanga a dawn a ni bawk si! Thil naran a ni lo tawp mai. Zanin dar 9:36-a a dawn a ni. 

"Ti nge min hrilh loh?" Ka tih chuan, "Rilru siam thiam harsa ka tia,. Bakah in chhungkaw tawrhna thlen thei thil a ni ve bawk si, ka sawi duh ta rih lo a nih kha" a ti mial mial a. 

A phone aṭang chuan Pu Saiṭhuama chu ka call ta a, a switch off.."A tirah i call em? I dawn tirhin" ka ti a. "Call chiang e,. A ring ral thak. Tunah a off ta chauh a nih kha.." a ti a. In chhungah ka luhpui ta phawt. Tikhan thil chiang tak chu Zonunpari tana a sum dahte lo îttu leh Zonuni tan sum a hnutchhiah tih hrechiangtuin heng thil zawng zawng hi a ti tih a lang chiang ta. 

"Pu Rinawma kan hrilh mai dawn em ni?" Ka tih chuan, "Ka hre lo, min chet khalh zel sia, Police kan hrilh tih an hriat chuan chet an lak mai ka hlau a ni" a ti mawlh mawlh a. Thil ni thei a ni ve bawk si. Rilru a buai riau. 

"Mahse, eng rosum nge, engzat nge a hnutchhiah che i hre si lo va. I hlan tawp thei dawn em ni?" Ka ti a. Zep nâk emaw kan nupa nakin hun zel ngaihtuahin fate pawh kan la nei ang a, Tar enkawlnaah hian ka thawk reng lo a nih phei chuan sum kan la mamawh dawn chauh si a, a uiawm tham ve êm a ni. 

"Ka pa saw a rawn harh phawt a ngai a ni" a ti sap a. 

Thil ka ngaihtuah thut,. "I pa hi a thurochhiah puang hmana a awm chuan, he thil titu hi kan dang thei. I pa phone aṭanga hetiang thu a rawn thawn thei a nih chuan an inhnaih hle tihna a nia,. 'Ka pa hi rawn harhin a thurochhiah puang se la, tichuan ka pawm theih loh thu amah ngei hrilhin, ukil pawh ka hrilh ang. ' tiin reply rawh. Tichuan, i pa condition azirin heng buaina bultumtu hi kan sawrzîm thei ang" ka ti ta zung zung a. Ani pawh chuan, ka sawi ang chuan a reply ta nghal a, a switch off avangin a la double click lo thung. A hmu tho turah ngai ang. Tu emaw hnenah tuin nge pu Saiṭhuama phone kawl tih kan zawh a ngai dawn a ni. Julie a nih ka ring ta ber, a nupui a ni a, a phone pawh aman a kawl ngei tur a ni. Kan rin loh lam aṭangin Julie chuan min rawn bei tihna em ni ang?! A hmel pawisawi lo zet kha ka mitthlaah a rawn lang nghal,. Mi zawng zawng deuhthawin gold digger tiin an diriam a, mahse, a tuang tichhah lui tlatin putar a nei lui a. A fate aṭang pawn selna leh deusawhna a dawn fô ka ring,. Mahse, a inhamtâng ve ṭâng ṭâng a. Pu Saiṭhuama sum hnutchhiah tur hi a tlem ka ring miah lo, mahse, duhâmna hian chinlem a nei si lo va, Julie paw'n, "Ka mualpho ta sa sa" tiin hetiang hian a che ta mai a nih ka ring. A tirtê khan engvanga Julie chu lo ringhlel lo nge maw kan nih le..kan mawl mang e. 

A tuk zinga kan thu hriat chuan awmzia a nei ta chiah a. Ni e, Hlupuii'n ka û a rawn bia a, "Ka pa chu a rawn harh ve deuh a, ICU a chhuahsan ve dawn e. Cabinah kan indahlut nghal ang. A cancer kha a ṭaidarh nasa tawh lutuk a, phai lam pawh min refer ngam tawh lo" tih thu chu ka û kâ aṭangin kan hre ta a. Zonuni nen awmze nei zetin kan inmelh zawk. Zonuni pawh Hlupuii chuan a rawn be ve leh tho,. "In remchan chuan lo chho ve leh u la..mahse, ka tilui lo che u a nia" a rawn ti. Chhoh leh ngei kan tum a ni. 

Kan han thlen chhoh chuan an chhungkaw ho chu an lo kim ṭhap tawh a. Pu Saiṭhuama te hi unau 7 an ni a, mahse, pahnih an boral tawh thung. A la dam zingah Pu Saia hi a upa ber tawh a ni. Tin, an naupang ber tih loh chu hmeichhia vek an ni bawk. An patea te chhungkua leh Pu Saia chhang chiah te hi Aizawlah an inbengbel a, midang erawh Lunglei leh Kolasib lamah te an awm thung. A hlawhtlin anga hlawhtling an awm ve lo a niang, an lar lo êm mai. An naupangber Pu Thangruaia erawh Pu Saiṭhuama'n a pui nasa bawk a,. An khawsak a harsa lo ve hle. An nî heta awm leh an patea te pawh an lo awm ve a, Zonuni chungchang an hre vek tawh bawk a, min lo be ṭha hle. Tupawh rinhlelhna mita entu tan chuan min biak ṭhat poh leh rinhlelh a awl zual lehnghal. Kan kal hma khan Zonuni nen theihtawpa midang chîk turin kan inchah kha a nia. Pu Saia, thi mai tawh tura ngaih chutianga a rawn harh ve leh deuh chuan a tilawm viau hlawm a nih ka ring, an hlim hmel hle. Kan va hmu ve a, a lo muhil tho nain hmuh a nuam hle. Saroni pawh kha a awm ve ran a,. Zonuni a lo melh leh râwm râwm mai. Ngaipawimawh duh bik loin kan ṭhu ve a, Pu Tluanga a awm ve vang nimaw Saroni chuan engmah a sawi bik lo. Julie pawh hlim hmel tak hian a lo ṭhu ve a, "Nakinah tuilumin ka dep ang, inbual a châk tawh ngawtin ka ring" a ti lang lang a. 

"Keimahni'n kan tithei, lo va hahchawl rawh" Saroni chuan a ti leh hmak. Julie chuan a ngei ve deuh nge, "A nupui ka nia, keiman ka ti ang" a lo ti ve ta sak a. Ka lo ṭan rilru hle. Mahse, Julie ber hi ni lawm ni kan enthlak zual tur kha..hetia a pawnlam ṭhatna hmang hian inhnehtir loh a ṭha. 

Zonuni chuan, "Kantu a rawn nei deuh reng dawn sia, keini pawh kan haw hma ang. A chêp ṭhin" a lo ti a. 

"Tipawh khan i chêp tawh lo mi?" Saroni chuan a rawn ti zauh a. Tluanga pawh a zah zo tawh lo a niang. 

Kan chhang zui tawh lo va,. Mahse, nakinah chiang fek fawka la hrilhfiah tho chu ka tum rilru. A enga kima ka nupui a puh fai vek hi ka duh bau lo,. A fahrah vanga lo hmuhsit em em ringawt te chu a. Zonuni sawi ang tak tak khan kantu bakah chhungkhat laina an rawn lang ṭuam ṭuam ta a. Hawn ka rawt ta vat. Zonuni pawn a lo hreh lo bawk a, pu Tluanga nupui Pi Mapuii an tih mai, fel leh nelawm tak chuan min thlah ve a,. "In rawn lang hram ṭhin a, a lawmawm..kan zia chho mai ang" a ti siam siam a. 

"Ni e, a zia deuh hunah chuan in lama inenkawl a duh zawk ka ring. Tak ana ka pa phone hi tu nge kawl le?" Satliah angreng tak hian Zonuni chuan a ti ta a. An ṭhutkhawm ṭhup lai kha chuan sawi chi a ni bik lo a ni. 

Mapuii chuan, "Ka va hre mai lo ve, Julie'n a kawl ka ring" a ti a. Kan ngaihdan a rawn nemnghet ta chiah e. Mapuii chuan ngaihthat hmel vak loh hian, "Mahse, ngati nge a?" A ti leh ta sia,. Zonuni chuan, "Nizanah ka pa a damlo tih ka theihnghilh a, ka call pek alawm mawle.." tiin za deuhin a nui hawk hawk a. Mapuii pawh chuan, "Ta mai mai ṭhin hian aw..umm, lo kal leh vat r'u aw. In awm hian a nuam, Zosang, nang pawh i fel ṭhin lutuk. I u pawh a rawn lang ve ṭêp ang " ti duahin min kalsan ta a. 

Hawn kawngah Biteii pasal Ruata call a dawng a, "Hei nau a vei a.." a rawn ti ta. Tlan let lehin taxi kan hire sak nghal a, Biteii chu civil hospital lam kan panpui ta a. Biteii nâ ti lah chu a vial ngawlh ngawlh tawh. Ruata leh a nuin an rawn ṭawiawm thei a, kan thleng a, nau neihna ward lamah an kuah lut ta nghal a. A veina a lo rei tawh nge ni kâr lovah a nei ta thuai a! Mipa a hring nghe nghe,. Zai ngai lo va a nei thei chu a lawmawm khawp mai. Puantê leh a mamawh tur kha Zonuni'n a lo leisak vek tawh a, khangte kha an lo keng sa ve bawk a, an che buai lutuk lo ve. Ruata pawh a lawm ve viau a niang, a khi vur vur reng mai. Biteii chu an pain a riahpui thei dawn hlauh a,. A û chu a thlahlel viau nain a inthlahrung a niang. Zonuni'n, "Dam chuan naktuk nilêngin ka rawn awm ang che u" tiin a thlah a,. Damdawi in kan chhuahsan meuh chuan khua a thim tawh. Ka nute kan be tawh tho bawk a,. Tum lâwk em emna pawh awm lovin zanriah kan ei chhuak ta law law. 

Kan ei chhungin vauna chungchang kha kan sawi dun leh a,. Nizana a replyna dar 4 pelh hlekah a delivered a, a thawk chak khawp mai. Pu Saia pawh Cabinah an sawn nghal rawp rawp a nia. A hma ICU-a a awm lai te pawh khan a lo harh ṭha tawh reng a nih te ka ring ta hial mai. Mahse, ka sawi duh lem lo. "Pu Rinawma chu hrilh mai ṭha ka ti..mahse, phone kawltu hi chiang takin hre phawt ila chu ka tia" a ti a. 

"A dik alawm. Amah I pa ngei pawh hi a harh chian veleh hrilh vat a ṭha" ka ti ve a. 

"Hman hmanah te khan tiang hian min rawn vau tawh se nunna dang khan a tawrh a ngai lo tur,. An sawi ang hian ka ti mai tur a nia. " A ti vang vang a. 

"Mahse, i pa diktak Pu Saiṭhuama a ni tih i la hrechhuak tlat lo va, i hriatchhuah an hlau tho bawk si a nih ka ring. I hriatchhuah hma kha chuan khawiah emaw dahbo dan che an ngaihtuah a, jail-ah emaw i hun hmang la an duh vangin i tan thang an kam chu a nih kha mawle" ka lo ti ve mawlh mawlh a. 

"I fing riau mai..nang chu" tih pahin a nui sak a, hetianga a nui hmel hi ka hmuh lohna a rei tawh angreng. A nuih ve pawn a chhungril aṭanga nui a ni lo tih ka hre thei tlat zel. Ka rin aiin chaw pawh a ei tam a. Kan hawn kawngah, "U Mama bulah erawh la zêp rih a ṭhat ka ring. Ka rin loh vang ni lovin" a ti a. 

"Nia, ka sawi tum tak. Tunlai chu a rilru a hah deuh a, tihbuai vak rih loh a tha" ka ti nghut a. Kan inhrethiam tawn khawp mai. 

"Kan chhuak deuh reng a, ka nute hian min ngei ang em le? Naktukah lah ka chhuah leh a ngai dawn sia" a ti a, a inthlahrung hle. "Engvangin nge an ngei ngawt ang che. Thil ho mai maia chhuak i ni hleinem..ngaihṭha rawh" ka ti vut. 

Ka nute erawh Rinliani chanchin engmah an la hriat loh avangin police an be ta nge nge a,. Pa Tlana lah Police sawi rik takah chuan a kut a sil leh hmak a,. A fanu hi thi ta se keini chhunglam min puh a tum ni berin ka hria,. A rilru chhiat vang ni maw a hrisel lo chho riau mai. 

A tukah a sawi lawk tawh angin Zonuni pawh ka nu dil thlapin Biteii awmpui tur chuan a chhuak leh ta a. Kei erawh inah ka awm ta mai mai. Rinliani ngaihven a lo ngai ve bawk nen,. Kawmthlangah hian huan zau vak lo ka nu hian a siam ve a,. "Hawh, i zuk thlo fai lawk ang. Maian leh anṭam pawh lak tur a awm leh tawh ang" tia min sawm avangin kan inzui thla a. Kan thlawh fai mawlh mawlh laiin ka nu chuan, "I û hian ka mang a ti ang deuh thin. Heti tak hian Hlupuii hi a buaipui ang tih rin ngaihna ka lo hre lo va. A rilru zawng zawng hi a pe vek ni berin ka hria" a ti a, a thlan chu a puan lukhumin a hru pâwk pâwk bawk. 

" Ni ngawt mai. Kei thleng hian min hmumawh ni berin ka hria. Hlupuii kan ringhlel pawh a ni si lo va" vui âwka lek lek hian ka ti a. 

"Engpawh nise, kan hriatthiama kan enliam rih a ngai a ni mai. Mamawii hnua a hmeichhe buaipui awmchhun a lo ni bawk nen,. Mahse, buaina eng emawah hian a inhnamhnawih ve ka hlau a ni, nang pawh tih tawh nak alaiin" a ti leh a. 

"Buaina hi chu an chhuichhuak ṭêp tawh ang. Chu zawng ai chuan nunna dang hian an tawrh leh a hlauhawm a" ka ti a. Anṭam leh maian, kan chhungte pek ve tur nen kan lak hnuah kan inchhawm chho leh ta hnak hnak a. "I ni Zami a vui leh palh ang, va pe vang vang rawh. Inbual fai la" tiin anṭam leh maian chu a tel mawlh mawlh a. Ni Zami mizia a hrechiang tawh bawk a, eng emaw thlai thar emaw ramsa lam emaw kan nei a nih chuan pek ve zel a duh thin. Lehlamah Ni Zami pawn a fanu rawn thawn thlai rah ka pa a rawn thawn ve thin tho a, mahse, a thleng zen zen lo. Ani zawng Ni Thari ang lo takin an pa a ngam deuh a, a nawm pawh a nuamsa deuh e. Ṭhenawmpain a tia lawm, "Nupui ngam tak tak hi an awm thei lo, nupui ngam loh hian chhungkua kan hlim zawk" fiamthu hian a ti ṭhin. A sawi dikna chen a awm. Ṭhenkhat mipa inla pa leh inla tawrawt tak ten hmeichhia an vêl fô,. An nupui ten sakei hlauh takin an hlau a, kha kha inzahna emaw an ti châwk! An thih hun hun chu an nupui fanaute zalên hun a ni mai. Khatianga awm kha patling nihna emaw an ti thin. A dik lo hul hual. Tin, thaibawih kan hriat dante hi a dik tawk lo,. Pasalin nautê a puaka a awih dûrh dûrh chuan thaibawih emaw an ti tlat! Thleng sil emaw in chhungkhur thil eng emaw a tih ve chuan thaibawih an ti mai zel. Kan ngaihsan em em hnampui, khawthlang lam pa ten an nupui te an puih nasatzia hi..chhungkua kan nih tawh chuan kan ṭangrual ang a, kan thawk ho mai tur a ni. Thaibawih diktak chu Baby pa te ang kha an ni zawk,. Nu ber rorelna ang anga awm, pa ber ṭawng huna nupui zawk lo dak zet zet te, pa te lam chhung an in chhunga an kimkit dûkna hmun angte hi thaibawih in chhung a ni tlangpui. Keipawn fa kan neih ve hunah pawh a theih ang anga kan nu puih hi ka tum khawp mai, a duh chuan thaibawih min lo ti mai mai teh se, kan nupa kan hlima kan lungrual chuan chu bak bak ka ti mai. Chutihrualin rorel huna pa ber ka ngawih dûk leh nu ber thutlukna ka lem duak duak chuan ka inngaisang thei ngai lo thung ang. Mipa hi chu mipa kan ni mai tur a ni. 

Ni Zami te inah chuan ka va dah a,. Awm rei hi ka peih vak thin lo. Mahse, Salemi'n min lo be ve mial a, kan inbe khât viau a nia. "U Zosang, U Zonuni te case vel hi a fel tawh mi?" Tiin. 

"Fel nang" ka ti mai a. Ka nî ha hawlh zawng tak a ni teh chêk ang chu, "Lehlamah Zonuni i lo nei hi kan chhungkaw tan a pawi thei maithei a ni. Rinliani bo daih dan nen pawh hian a inzawm hial ka ring asin. A pa lahin engmah a hnutchhiah ve awm chai si lo,." A lo ti zawt zawt a. A kamtam êm avang hian kan chhungkaw bîl thuruk ang chu ka pa hian hrilh a remti ngai lo va, engmah a hre ve lo a ni. 

"Ni lo vang" ka ti ringawt a. 

"A nih a pa chuan eng nge a hnutchhiah ve reng reng le? A sawi tawh em? A hausa rapthlak sia, a fanu ve tho a nia, eng emaw tal chu phûttir ve rawh. Nakinah phei chuan Salemi te pawh hi eng emaw hnaah te thun dan la ngaihtuah ve teh. Tihian a inla model laklawh si, a incheina man a san ang huin a thawhchhuah a tlem ropui sia, i pa Hminga hlawh ringawt chu kan khamkhawp tawh lo. Salemi a theih loh paw'n Zawmtea tal pawh" a ti leh duam duam a. A beisei chu a hriat theih vek mai. "Nia, tihtheih kan la neihte chuan" ka ti mai a. 

"I nupui a nia, i thute chu a zawm ve ang chu,. Bakah tiang khawp khan buaina in tawk tawh a, in chhungkua pawn Zonuni pa hausakna zar chu in zo ve ngei ngei tur a ni" a ti leh hmawk hmawk. 

"A ho em mai a, kan awm thei ve reng alawm. Ka haw phawt ang. " Tiin a ṭawng leh hmain ka chhuak ta daih,. Zonuni ka bia a, "Hei Ruata a rawn chho têp a, ka rawn haw thei ṭêp aw" a rawn ti a. 

"I inthlahrung a nih kha..ka nu chu ka pui thei alawm, Biteii'n a thlakhlelh em che kha" ka ti ve ngial a.

"I fel ṭhin..dear Zosang" a rawn ti hnâp a.

"Min tilai e a" ka ti duh lek. 

"Chuan, whatsapp kha lo en rawh. I hman veleh" a rawn ti a, a dah zui nghal. In ka then veleh whatsappah ka lut a,. Zonuni chuan a pa phone atanga a msg dawn a rawn ss a lo nia. "I duh ang chu ngaihpawimawh a ni ang. Mahse, kan duh anga i tih leh si loh chuan, i pasal kha kan target tur a ni e." Tih thu a ni. Hlauhna ka nei lo naa, a ngam sarh sârh lutuk chu a mak ka ti. Julie mizia leh hmel nen a inmil hlawl lo. "Julie hi be tawp chhin teh, tuin nge i pa phone kawl tih hi" ka va tih chuan, "Rin harsa i ti ve tho ni maw? Saroni mizia nen a inrem thlap i ti ve em?" A rawn ti ve a. 

"Aw" ka ti teh tawp.

"Keipawh amah bak ka mitthla thei lo. Mahse, tu emaw mi rintlak, amah enthlatu tur kan mamawh a ni" a rawn ti a. Police tel lovin hnuchhuina kan ṭan ve dawn ta reng mai. Ruatkima ka mitthla nghal, Detective story leh Crime kaihhnawih a chhiar leh en peihzia ka hria a, amah pawhin private investigation din a rilruk tihte thlengin ka hria,. "Ruatkima hi a rintlakin ka ring, kan purbuai tawp mai dawn mi niang" ka ti a. 

"U Rinliani avangin am buai sia, a inthlahrunawm e" a rawn ti a. "A ngaipawimawh vak lo,. Ka lo bia ang" ka ti ta a. 

Mama'n ka nu a lo bia a, "Rinliani an hmu tawh aw. Nakinah chanchin kimchang chu" a rawn ti hlauh mai. Rinliani ruang ti lo va Rinliani a tih avangin thla a muang ta huai huai e. Ka ni pawh a rawn tek lut rang khawp mai. Kan ri ta hlut a, U Mala leh ka û ten Rinliani chu an rawn hruai haw dawn a niawm e. Ngaih a ṭha ta bawk a, Ruatkima pawh ka bia a, "Zaninah lo riak ta che. Kan mamawh che" tiin. Kan buaina vel a nih a ring sa a niang, "He hun hi alawm ka lo nghah reng tawh"a rawn ti chul a, ka nui nghek ringawt. 

Zanriah pawh ei duh lawk lovin ka û te chu kan inah kan lo nghak ta thap a. An rawn thleng ve ta nge nge e. Rinliani pawh hmel phelh leh balh hmel zetin a rawn hawng ve a, zak leh hrehawm ti hmel erawh a pu lem lo. Ka pain thil awmzia a lo zawt vat a,. "Ka ṭhianpa Famkima'n min rawn hrilh a, khutah Phunchawngah zu zuar hmeithai inah a lo khawsa a lo nia. Famkima te zu zuk lain an lo hmu a niawm e..engti tiha zuk awm ve ringawt nge a nih kan hre lo thung" Mama chuan a ti zung zung a. 

Rinliani chu kan melh ta thap, a ṭawng duh mai loh avangin ka niin, "I awmdan chu sawi ta che. Ngawi reng lo khan" a ti vin ta ṭhak a. Rinliani chuan, "Ka pu tihhlauhthawn nan khan zan hnih khat riahbo ka tum hrim hrim a, mipakhat ka hriat ngai pawh ni lo nen kan inkawp a, ka phone a bo daih bawk si, kha pa lah khan ka awmna hmunah khan min hnutchhiah ringawt a,. Nu ber kha a lo fel hlauh a, 'Tihian i duh chen chen awm la, min pui ve ang a' a tia. Zu ka in tluk tluk nen, chet pawh ka che hleithei lo. Chaw ka ei lohna chin pawh ka hre tawh lo. Biakpawh ngaihna che u ka hre si lo va, hmelhriat an lo kal ngai bawk si lo. Keimaha rawn haw dawn pawn zu ka in nasat êm avangin ka che hleithei thlawt lo a ni. Bakah kha pa ang khan khawiah emaw min hnutchhiah ve mai ang tih ka hlau bawk nen,. Min lo lam hun ka lo nghak tawp mai a ni" a ti sep sep a. A mitkhur tla dâk te, a cher leh a taksa ṭhenkhat duk thleh thluahte avang pawh chuan a thusawi chu a dik ka ring. Ka khawngaih ta hle mai. Kan unaunu a nihna a bo si lo. Pa Tlana lah chuan a sama keh pahin, "Tenawmnu, mi tihmualpho hi chu i thiam hle mai tiraw? Lo piang lo ve law law la a ṭha mai tur" tiin chhuatah a kek thlu ta mai a. Mipa ho kan che nghal ṭhuau, ka û erawh kan chet khalh hman lo, Pa Tlana kut phihthlak sawk pahin, "Nang hi ka hnek duh mai ang che. Ani hi ka farnu tho a nih hi, i nawm amaka i kut thak hnawihna tur a ni lo ve" tiin a nam nghek a, a tlu zui thlawrh mai. Ka nuin ka u chu lo dang vatin, "A tawk, Mama..duhtawk rawh" a ti mawlh mawlh a. Pa Tlana chu a rawn tho va, "Muanzual, i ni pasal hi kut min thlak a maw? I lo va huaisar ve. I pa chu rual pha êm lo mah ila, i ni pasal ka nih hi.." a ti khur khur a. Ka û lah chuan ngaipawimawh lo zet hian, "Sate, Rini hi eitur va siamsak rawh u" a lo ti daih. 

Pa Tlana chuan ka ni a kai a, "Haw ang, Tepui, nang pawh rawn haw rawh. He in chhung, min hmusit tute in chhung hi ke hmawr pawn in rap tawh tur a ni lo" a ti buan buan a,. Ka nîin a kut chu a lo vaithlaksak ta hmak mai le. Boruak chu a ṭang at at ngei mai. Zonuni leh Sateii nen choka lam an pan a, eitur an siam dawn a ni. 

Ka ni chuan, "Ka duh lo, ka peih tawh lo. Inṭhen ka duh a ni. Ka fate chu keiman ka enkawl mai ang. I bula chen hi ka peih tawh lo" lungchhiat hmel tak hian a ti ta a. Tumah kan la ṭawng lo, upa ber ka pa a la ngawi tlat si a. 

"I va zakthei lo e aw. I chhungte mi chapo vang hian maw min then i lo duh a? Nge i fanu mihur ks vang zawk hian? Lo kal vat rawh" tiin Pa Tlana chuan kaih leh mai a tum a. 

"In saw ka u te in a ni a, zanin chu ka u te inah hian kan riak ang a, naktuk zingkarah lo chhuahsan ang che." Ka nî aw-ah chuan inrintawkna a lang thei ta. Pa Tlana pawh a heh a hil ta hle. Tepuii lahin a pa chu a zui duh teuh si lo, Ka pa chuan, "Tharte, i chiang chiah maw? Hei chen in innupa tawh a, upat tawh lama nupui pasal inthen te hi a harsain a mawi pawh a mawi lo asin. Rini hi chu keini a pute kan awm ṭhuau alawm, kan kutah dah rawh u. Tlana, nang pawh ka sawi zing tawh,.nupui fanau te rikrâp hi sim rawh ka tih kha. I fanu hi a thiam e a dik e kan ti hauh lo, an tleirawl chhuah phat aṭangin nasa theihtawpin i khuahkhirh a, in bulah ngaihzawng chungchang pawh engmah an sawi ngam ngai lo. Thil an tihsual hlekin kut i thawh nghal zel a, i tihel vek tawh tih hi haider miah suh. Rini pawh a mualpho zo tawh a, a duh lo leh phal lo chungin a naupai i tihhlumsak a, a beidawng phaiah chhukin ni e, a chhungte tana zahna tam tak a thlen tih kan hria e. Mahse, he lamah rawn chuang chhuakin chutah i hnawtchhuak a,. A bo laiin hmangaih ber niawmin Ruatkima pa i dem leh daih a. In inenkawl dan aṭang hi chuan fa ṭha tak nei chi ziazang in ni lo. Inngaihtuah nasa ang che. I nupui fanaute i rîkrâp leh dawn chuan Tharteii te nufa nen inzawmna in neih ka remti lo." A ti ta charh charh a. Pa Tlana pawn a chil a lem khawlh ringawt. 

A tawpa tawpah inthen êm chu a ngaingam lo nge ni, "Aw le, ka u, thil ka lo tisual a ni e. Tun hnuah chuan ka ching tawh lo vang. Tharte, lo haw rawh u. Rini pawh..chhungkua kan dinṭha leh dawn nia" tlawm takin a ti thei ta a. Rilru pawh a dam ṭan e. Ka ni pawh ka pate a zah vang a ni pakhat ang chu, an haw nufa ve leh ta a. Rinliani erawh zanin chu hetah a riak dawn a ni. Zonuni ten an rawn ko a, ei erawh a la ei tam thei chuang lo. Tuilumin a inbualfai ta vâk a,. A harh ve deuh ang chu. Mikhual pindan a pan hnak hnak lai chu lainat zetin ka lo thlir a ni. Ni e, ka thinlung zawng zawngin ka khawngaih. Zonuni pawn a khawngaihzia a sawi ve sep sep mai. Ruatkima kha lo riak turin ka ti kha a nia, Rinliani a lo riah dawn si avangin naktuka rawn leng phei turin kan inchah ta kha a nia. Eng tak ang ve ang maw?!

"Police in hrilh emaw midang hriata in sawi ri hrim hrim a nih chuan, in sawi chhuahna te kha a nunna chân hmasa an ni zel ang" ..Pu Saiṭhuama number aṭang bawkin kan dawng leh ta. 

"Tu nge i nih sawi la, i kutah ka ro chanai tur chu ka dah ang. " Zonuni chuan a va ti pek a, "I hre ngai lo vang. " Tih thu a dawng. Kan call lahin min block tlat bawk si. Midang phone aṭanga call ngawt lah eng emaw thil thuah kan hlauthawng ve tho bawk si. Mahse, a hma ang em em khan kan rilru a hah tawh miah lo mawle. Thil tisualtu, engkim bulṭantu ngeiin a rawn be pawp tawh tlat a, kan inhnaih ve zel tih a chian vangte pawh a niang e. 

A tukah chuan Ruatkima pawh a rawn thleng phei hma viau. Rinliani pawh a nu leh paten tihtakzeta an rawn koh avangin leh ka pa pawn a zilh nek avangin a haw phei ve ta a, "Nunphung pangngai i la zawh thei. I harsatna leh buaina te kha inbawhbehtir suh aw. Hun hi a hlu a, i thinlung natna leh beidawnna te kha hunin a thawidam hun a la awm dawn. Mahse, chu hun nghak ngawt lovin nang pawn beiletin hneh tum ve la, Tuna hmusita nuihzattu che ho hi i la lehpel thei..i tan kan awm reng a nia" tiin ka ṭawngkam thiam ve tâwpin ka chah ve a. Nui chungin, "I hnen aṭang meuha hetiang dawn chu ka beisei lo asin. Ka lawm e. Ka tum ang. Ni e, Ka hun thim ber laiin khawvel thilah ka tlan a, min hnem aiin a tizualkhai zawk a. Harhfima khawvel hmachhawn ka zah phah a, ka ti a, ka ti ta zel a nih hi. Mahse, hei chen damna min la petu Pathian hian chhan awm lovin min la damtir lo vang. I thusawi te kha ka hrereng ang" a ti ve ta thlap a. Rilru inhmu leh unau tak tak angin kan inthlah thei ta. 

Ruatkima chu kan pindanah kan ko lut sauh sauh a, vauna kan dawnte chu kan entir ta vek a. A hriat tur thil ṭangkai nia kan hriatte pawh kan hrilh kim barh. Tuna a chhui ruk tur erawh Pu Saiṭhuama phone kawltu hi a ni. A bik takin Saroni leh Julie a chhui bîk ang. Amah chuan Pu Saiṭhuama chu a'n call nghal tâwng a. Voice mail-in a dah a niang,. Hmeichhe aw hian a rawn chhang ta, kan ngaithla ṭhap mai. "Tuna i biak mêk hian phone call a chhang thei rih lo va, Voice mail lo hnutchhiah mai ta che. " A rawn ti puam ṭâlh ṭâlh a. Zonuni nen kan number aṭanga kan call ve lahin a reject zel si, min block tih chu a chiang ta. A awmzia chu he phone controltu hi a awm tih a chiang reng. Voice mail an dah mai loh chuan sumdawnna chungchang bakah amah Aizawl pa lar a nih avanga chanchin zawh tum an kat nuk dawn a, chuvangin khatianga an set kha a ngai tlat a ni. 

Ruatkima chuan buk nghut nghut pahin, "Thil chu a lang nghal ruak alawm. Chhuichhuah a harsa dawn lo. Police erawh hrilh rih lo mai r'u, in tisukuk zo ang. An awmpuite hming leh hmel ka hriat ka ngai. An in chhung awmdan nen. " A ti ta zung zung a. Zonuni zawkin a hriat duhte chu a hrilh mawlh mawlh a, kei aiin an in chhung awmdante chu a lo chîk daih zawk a nih dawn hi. An security guard hming thlengin a lo hria a, Pu Saiṭhuama driver Puia an tih te thlengin a hrilh ta a. Tin, Hlupuii te unau mizia kan hriat theih ang angte pawh. Julie pawh kan sawi tel vek. A chhinchhiah zel a,. "Detective tak tak i ang ve hle mai" ka ti fiamthu a. 

"Engah nge ka an loh ang. Amanda pasal Samsona leh ka nu te hi 1st cousin an ni tih i theihnghilh ta em ni?" A ti duah a. Ni dawn tak e. Amanda case te kha Ruatkima hian a pu Sama kha a zawt chîk thei viau a nih nghe nghe kha. "Amanda pawh i râwn ve thei ang chu, upa deuh tawh mah se" ka lo ti vat a. 

"Nia, ka tum alawm. U Sawmpeka awm se aw..a phur ve dawn nen" a ti vang vang a. Malsawmpeka chu Amanda fapa leh a fa neihchhun a ni. Malsawmpeka nupui kha hmelṭha kan va tithei tak. 

"I tithei em em ang, Ruata, kan ringtawk che a nia" Zonuni chuan a lo ti ve a. 

"In beisei ang nih ngei ka lo tum ang. Ka rawn be zeuh zeuh ang che u. " A ti a. Ruatkima, tu khaw khain an hriat loh chu kan innghahna a ni ta. Mahse, kan beiseina erawh a sang viau mai. Min hawnsan hnu lawkah ka nu leh Zonuni ten rawng an bâwl a,. Duatpuia school bang hruai turin ka insiam a. A hma kha chuan a pa hian a thlahin a rawn hruai haw leh mai ṭhin. Mahse, kumin atangin a school luhna kan sawn a,. Ṭhenawmte tlangval 2wheeler service hi kan hruaitirin an ban hunah a rawn dah leh mai ṭhin. Mahse, tukinah a pi boral vangin Thingsulthliahah an zin a, a lo la haw loh vangin ka hruai dawn a ni. Ka insiam laiin Mama'n min rawn call a, "Hello" ka tih rual rualin,. "Hlupuii an man" a rawn ti ringawt. 

"Eng a?!" Ka ti nghek a. 

"Ka bialnu hi ka ringtawk. Engmah a ti lo" a rawn ti leh ngawt a. "Eng vangin nge an man?" Ka tih chuan, "A pain Atea rosum a hnutchhiahna lehkha bo kha a pindanah an chhar a.." a rawn ti ta a.