Parchuailovi 14

PARCHUAILOVI ..(14)

Ziaktu : Toni Râlte

Zonuni nu Pi Thanpari chhungte address chu Pu Rinawma pawn a la ve a, an lo chhuichian tur thu a sawi bawk. Keini pawh kan haw ve leh ta a, Martina'n Atea a that tih a hriatna chuan a vaw na hle a ni ngei ang, zanriah pawh a ei peih lo. Kan hrethiam tlâng a, kan dem lo hrim hrim. Martina lah a thih ve tawh si avangin hremna han pek theih ni hek lo le..mahse, ka ngaihtuah a, Atea thihna an chhui kal reng tih leh Atea kha an kutthlak hmasak ber a nih avangin Martina thah ang hian an lantir ta mai em ni ang? Mitthi khinte chu awmzia awm tawh hek lo. Martina chhungten file an dap chhan hriat a ngai dawnin ka hria. Mahse, Zonuni ngei pawn Martina kutziak ngei a nih thu kha chu a sawi a, an inhrechiang tawh bawk a, dâwt a sawi chu ka ring lo. Engpawhnise, an sawr zîm ve hret hret tho a, a ṭha e. Pu Dinpuia kha inawkhluma hmuh a ni a, lehkha engmah a hnutchhiah âwm an hre lo. A nupui leh a fate pathum nena khawsa an ni a, a hma chuan an khawsa thei vak bik lo. Amaherawhchu, Alpha Ministry te an han din chho a, a khaipa a han nih chhoh hnuah eng eng emaw thilpek te dawng vein an khawsak pawh a ziaawm chho ṭan a. Ngawlveite rûnah Director-in a han awm zui ta bawk a. An changkang sâwt hle niin an sawi. Police ten an va be hmasa a, station-a kal tura lo inring turin, Martina lehkha hnutchhiah erawh Zonuni leh keima bulah bak an la sawi miah lo. Police ten an rawn hruai dawn tih a hriat aṭangin a phîli nghal niawm takin Ngawlveite rûna thawk Hmangaiha chuan a sawi a, Hmangaiha hi Pu Dinpuia nen pawh inhnaih leh inṭhianṭha tak an ni. A room-a a va insiam chu a rei ta riau a, an ngaihṭha loin an va en nâk chuan a lo inkhai reng tawh a lo ni. Thawktir leh tumin theihtawp an chhuah naa an chhan hman ta ngang lo a ni. Postmortem turin a ruang pawh lak nghal a ni. Pu Dinpuia hi thah pawh a ni thei a, amah leh amah a intihlum tak tak pawh a ni thei. 

Zonuni chu a mu ngât a, chunglam a melh vang vang. A mittui a tla lo va, a fîm kêk kâwk hlein ka hria. "Chaw tlem tal chu ei la, mangṭhat nan tal" ka ti a. 

"Ka châk rih lo. Min hrethiam rawh" a ti sep a. 

"Ka hrethiam che alawm. Mahse, tihtheih kan nei tawh chuang si lo va" ka ti ringawt. 

"Pawi ka ti, Aizawl pa hausa ber pawla an sawi fanu ka lo ni hi..keimah vangin nunna engzat nge lak a nih tak le? Heng zawng zawng phênah hian ka tel ve zel a, ka tihtir ni lo mah se; keimah vanga thleng a ni tlat si. Atea aiah te khan min lo tihhlum zawk mai tur a nia.." a ti leh sêp sep a. Ka kuah vawng vawng mai. "Khatiang ngaihdan kha nei lo turin ka duh che a ni. Engkimah inburbun suh, Atea kha chu ka sawi thei lo, Martina leh Pu Dinpuia te erawh an tihsualin a vaw lêt a ni mai. An thi hi ṭha ka ti e tihna ni loin, an thih a ngaite pawh a ni thei. Tin, engmah chian hmain ngaihdan siam nghet tawp ṭhin suh. Nangmah vang pawh a ni kher lo thei" tiin ka hnem ve ngial a. 

"I awm a, ka lawm ṭhin. Zosang" tiin min rawn melh a. A mitmenga lungngaihna langsar zet pawh chuan a hmelṭhatna a hliah zo chuang lo. 

"Ka lawm daih zawk. I kiangah ka awm zel dawn alawm.." ka ti ve a. Ngawi rengin kan mu vang vang. 

Keini hnathawhna lam pawh kan buai lo bik lo. Pu Rotluanga vauna lehkha kha amah Pu Tluanga khan a lo la dah ṭha mial a. Hetiang thil a sawi tak avang hian ama nunna a derthawn phah hlauin a rukin Police lamin an veng reng tawh a ni. Vauna lehkhaa kutziak leh Zonuni vautu kutziak chu ka ngaihbel vang pawh ni loin a inang ka ti khawp mai. Police te chuan, Kei, Fela, Zorema leh Muanthanga te chu a mal tê têa min koin lehkha phekah chuan vauna lehkhaa thu inziak chu lachhawng turin min ti ta a. Kei kan lehkha zir lai khan, "Mipa ve si, i hawrawp a nu" an tih khawpa hawrawp felfai leh ziak mawi ka ni ve ṭhin a. Awlsam leh zâm hauh lo chuan ka han lachawng a, Police te pawn, "I tilui a ni lo maw?"an ti nghe nghe. 

"Sir, ka account bu pawh in duh chuan in check thei ang, a inang vek" ka lo ti ve ngat a. Min kaltir ta daih. Midang kutziak erawh ka va hmu ve lo, Fela hi chu a nih ka ring lo hul hual. Zorema pawh hi rin harsa ka ti, Pu Muanthanga hi a ni thei maithei, Zonuni pawh ban hmaktu kha a ni miau a. Hawrawp inân vanga inman ngawt thu erawh a awm lovang, Finfiahna tel lo chuan convict theih ni hek lo le..Chhun chawlh laiin Fela chuan, "Zonuni chu a ṭha zel maw? A ngaihawm vung vung hle mai. " A ti a. 

"A nau thihna hi a la tuar deuh a, a bakah chuan a ṭha viau e" ka lo ti ve a. 

"A nau thattu chu an la hre ta chuang lo mi?"a ti hê hâw a. Kamtam loh kha ṭha bera ka hriat avangin kan hriat loh thu ka sawi ta ngawt . 

"Pu Muana hi kei a rinhlelhawm ber ka ti..amah hi a rum ûl bawk sia, Zonuni pawh kha a mil lo sa ve hrim hrim a niang.." a ti nghut nghut a. 

"Keipawh ka lo tia. Eng nge maw kan ân dawn ni?" Ka lo ti ve. 

Teteii te an rawn lang ve a, "Zosanga chu i hausa tawh dawn hle mai" a rawn ti teh ngawt a . "Engvang chuan" ka lo ti hû thung. "Aw..in nu pa pawh Pu Saiṭhuama a nia, rokhawm tur a nei ve ang chu" a ti deuh kher a. Ngeiawm zetin, "I va hre thui bik ve.." ka ti ve ngat. 

"An sawi alawm" a mitmenga dawihzepna lo lang erawh ka hmuh hmaih bik hauh lo. Kan laka a danglamna te chhûtin ani pawh hian inhnamhnawihna a lo nei ve a ni mai lo maw? Zonuni ka chhun zo tawh a, mi hi rinhlelhna nen ka en deuh zel ta mai,. Police chuan min ko ta rih lo va,. Ngaih a ngam ta deuh e. 

Pu Dinpuia ruang postmortem result te chu keini hriat ve phak a ni lo naa, Zonuni kaihhnawih zel a nih miau avangin leh Pu Rinawma mi rin zawng tak kan lo ni ve êm mawni..Pu Dinpuia chu a ring ruh a tliak tih min hrilh tlat mai. Inâwkhlum te ring ruh hi a tliak kher ngai lo va, an thâwkna dâwt hnawh a nih avanga thi an ni zawk ṭhin. A awmziaah chuan pu Dinpuia chu a ring ruh a tliah hnuah inawkhlum anga lantir a ni tihna a nih chu! Ngawlveite rûn pawh khar rih a ngai ta hial mai. Police ten an chinglet nasa a, Pu Dinpuia room zau lo takah pawh an veituak zing hle. Tin, thawktu te bakah khatihlaia home-a awm te zawng zawng, a mal mala biak vek an ni bawk. Police te tan pawh a rit chho ṭanin, Media lamah nawrna leh demna pawh a nasa ta hle. Sawrkar lam demna te hial pawh a awm chho ṭan nawk. Tualthihna tunhnaiah a thleng zing mah mah tlat a ni.

Pu Saiṭhuama'n min koh avangin kan nupain kan va hmu leh a, Julie pawh a lo awm ve, pa berin a awm ve pawi a ti ta lo nge, "Ka mi rawih hian a bul rât aṭangin thil a chhui a, police te nen an thawh hona a ṭha bawk nen, Atea thih dan aṭang khan a ṭan a. Martina lehkha te pawh zir chiangin ama ziak ngei tih a chiang a. Tanhril thlam lam pawh an zu fang tawh, mahse, engmah hmuh an nei lo. Mahse, thil pakhat a awm ta a ni. Dinpuia, Director boral ta leh ka fanu Nunhluzuali te hi inhmelhriat satliah ni lo, unau ang tak taka inen an ni! Tin, thil dang pakhat bawk Tar enkawlnaa hotu ber Muanthanga saw Dinpuia nu û fapa a ni bawk. Ka thurochhiah zinga lehkha pakhat, ka fapa Lalhmangaiha, tun hnua Atea tia in koh, thi ta tana ka thurochhiah chu rukbo a ni bawk a. Tunah hian a awmna chin kan hre lo. Zawn mêk erawh a ni.." a ti chuar chuar a, a khuh zui nghal bur bur. A nupuiin tui a lo pe ta vat a. 

"Tichuan, Hlupuii chu em ni? I rinhlelh?" Zonuni'n a ti ta khawl mai. 

Maimichhing duar duarin, "Ka ringhlel phal lo. Ka fate zinga chimawm leh khirh ber mah nise, a chhungril thatna hi ka haider thei lo. Thisen chhuah tur khawpa nunrâwng a ni hek lo. Mahse, kan chhungkaw zing ami emaw Pari chhungkaw zing ami emaw chu an ni ngei ang. Eng nge an duh ber hi hria ila a ṭha mai tur, an duh chu pe ila nunna chân an awm tawh lo mai tur" a ti vang vang a. 

Julie chuan, "Paa, ka lo inrawlh ve lawk,. Hei chen kan chengho tawh a, i fate hian an nu tak tak ang chuan min en lo tih ka hria, mahse, mi rilru chhia leh kawi, duhâm tak an ni miah lo. An unau hian an inhmangaih a, nang pawh an hmangaih êm vang chauh chea kei pawh min pawm thei an ni. Chuvang chuan kan chhungkua aṭanga he thil hi chhuak a nih ka ring thei lo a ni" a lo ti ve mawlh mawlh a. A la ṭhalai si, an pa nen chuan pafa ang chiah an ni. Mahse, nupa an ni ve miau si a. 

Pu Saia pawh chuan, "Ni e,. Keipawn ka chhungkua aṭanga chhuak ni lose ka duh takzet a ni" a lo ti ve a. 

Keini lam chu min rawn en lehin, "Ka koh nachhan ber zawk che u chu, kar tawp zirtawp tlaiah chhungkaw chaw eikhawm kan nei dawn a. Chutah chuan ka ukil pawh a rawn tel dawn a, ka thurochhiah leh in ro chanai puanchhuahna a nei dawn a ni. Phone hmanga sawi mai theih a ni naa hmaichhana sawi ka duh a ni. Ka fanu i ni a, kan inah i khawsa si lo, i hmelah hian Thanpari hmel ka hmu ṭhin a, min rawn chenchilha min rawn kan reng beisei ngam lo mah ila, ka hun tawp dawnah chuan i tel ve hi ka duh a ni.." a ti mawlh mawlh a. 

"Hun tawp lam te chu sawi suh, i dam leh vat dawn alawm. " Zonuni chuan a lo ti var a. Atea thattu a hriatchhuah aṭang khan a nun a ngui êm a, a pa pawh a ngaihven hleithei lo a ni e. Amah nurse a nih tho bawk avangin ka nute bulah pawh, "Ka pa saw enkawl ve ka duh a, in remtih chuan" tiin a dil thlap tawh. Phalsak pawh a ni, mahse, a nau thih dan a han hriat khan a nghawng lutuk a, eng thildang mah a ngaihtuah hleithei lo a ni ber. 

"Ka damreiin ka ring tawh lo. Tunah chuan thlamuangin ka kal thei tawh ang.." Pu Saia chuan a lo ti ve leh a, Julie'n, "Chutiang sawi suh, min ngaihtuah ve la.." titau awki lek lek hian a rawn ti. 

Kan haw kawngah pawh a pa thusawi te kha kan sawi dun ve nasa. Hlupuii'n dandawi inah min biak dan te han ngaihtuah lêt chuan, eng emaw chu a awm ve a ni lo maw tih mai chu a awl ang. Pu Dinpuia nen lah khati khawpa inhnaih an lo ni bawk si, Pu Muanthanga ka rinhlelh ber lah Dinpuia cousin a lo ni bawk. He buaina hi reh fel vat vat se ka va ti ve mawle.

Nilaini a ni a, Keipawh hnaah ka bur leh ngar ngar tawh. Ruatkima'n min rawn bia a, "U Rini a bo leh tawh, a hahthlak a nia. Ka pa a thinrim sia, nang a awmna tur awm i hre mial lo maw?" A rawn ti a. 

"Hre hauh lo mai, a rawn haw ve leh mai lo'ng maw?" Ka ti liam puat a, Rinliani tih vel hi chuan min tibuai pha rih lo a ni ber. Buaina dang ka ngah tawh êm mai. 

"A buaithlak em mai, Eng nge in thil buaipui chu a an zel le,.chhui pawh ka la chhui ve hman lo. " A rawn ti a, "Nakinah hmaichhanah aw" ka ti ringawt. Kan thusawi hre phak tupawh ka ringhlel tawh a ni ber mai. Police an rawn lan takah chuan ka dah ta nghal bawk. "Lalrinfela rawn man tura lo kal kan ni e" an ti ta mai. Ka rin loh ber ka ṭhianpa Fela maw?! Wow! A va mak dawn ve le..

Zorema pawn thil awmzia a lo zawt ve luam a, "Pi Zahnûni a thah avangin" an ti hmiah mai si! Fela pawh a ṭang nasa, "Finfiahna tel lovin min man ngawt thei lo vang. Ka thah a ni lo, ka that lo hrim hrim" tiin a au chul mai a, an phurliam lai chu kan lo thlir thap mai. Pu Muana chuan, "Ka rindan chiah a ni" a ti sup, eng thil nge maw a lo hriat bik le?! 

Chhun chawlh lai pawh chuan sawi duh nei si, sawi hreh si ang hian kan awm vek. Ropuia phei chu Fela nen an inzui nasa sia, hrehawm a tih hmel viau. Zotea chuan, "A mak ê, Fela ber kher chu! Ka rin loh ber pawl a nia sin" a rawn ti ta hluai a. 

Kan ri ve ta noh noh mai. "Vauna lehkhaa kutziak leh a kutziak kha a inang viau a nih hmel. " Zorema'n a lo ti khauh a, kan hmuhpui ve bawk si lo. 

"Chupawh nise, fiahna a tling lo." Teteii'n a lo ti vat. 

Seni, ṭawng tam vak lo chuan, "Kei ka rindan chuan finfiahna ṭha tawk an kawl ran tawh a nih ka ring, chuti ni lose an rawn man ngawt dawn em ni?" A lo ti ve zauh a. Ni e, rinhlelh thuhla vang mai mai chu nise, an ko mai ang. Thu zawhfiah ngai keini pawh min ko zen alawm, Pi Zahnuni thattu ti khan an rawn chhal ta hmiah si a, keini ang tan chuan hriatthiam a har riau mai. Zonuni pawh ka hrilh ve vat a, "Fela ber kher maw?" A ti ve nghek. A ṭhawng ve hle a niang e. He Home-a ka thawh aṭanga ka mipa ṭhian neih hmasa ber leh min kawm tlangnel bertu kha a ni ve a, kan inneih pawh khan Ropuia nen an rawn kal ve zân asin le..Engvanga Pi Hnuni chu that ta ngawt nge a nih ang? 

Ningani-ah Pu Dinpuia thattu niawma rinhlelh Hmangaiha, Ruatkima'n 'U Hmaa' a tih ṭhin pawh kha man a ni leh ta chat mai. Kan police te an fakawm e. Martina thattu erawh an la chhuichhuak dawn lo a ang riau. Hmangaiha an rinhlelh chhan pawh chu kan hre ve lo, nakinah puanzar te a la ni mahna. Thil inthup te hailan a ni chho zel dawn e. Chutiang a nih mêk lai chuan Ninga zanah ka puzawn Pu Saiṭhuama chu a zual deuh avangin ICU-ah dah luh a ni ta bawk. Zirtawp tlai kha engkim puanchhuah hun tur a ni a, a dawn zanah chutiang chu a thleng leh ta. Kan Police te pawn rilruin tinzawn an nei lo thei ta lo va, Pu Saiṭhuama nupui fanaute chu thu an zawtfiah chho ta a. A bik takin Hlupuii an khalh fal deuh. Chu chuan kan chhungkua a nghawng tel lo thei lo va, Ka û rilru hah lah a vei tawn sek mai. A bialnu hi a lo hmangaih ve tawh hle a nih ka ring. Zonuni pawh koh a ni ve leh tho, tin, a nu chhungte lam pawh a rukin an thlithlai tih pu Rinawma'n min hrilh. A bultê aṭanga ruang chhuah dan enin Pu Saiṭhuama leh Zonunpari te kaihhnawih, a bulṭhum an ni tlat. Ngawlveite rûnah leh Tar enkawlna lamah he misual hian chet a la miau si a, heng Home lah a neitu Pu Saiṭhuam a lo ni si! Kum tam tak hnuah a fanu a zawngchhuak a, rosum ṭhahnem tham tak a hnutchhiah tih a lo sawi tawh bawk nen, Zonuni hnawksak ti em em, a ro chanai neih duhtu hian Zonuni tal awhtir tumin a hma aṭangin hma a lo la tawh a. Atea pawh Zonuni phirpui a nih avangin a nunna laksak a ni, Atea thah a nih chuan engvanga Zonuni hi zuah bik nge an nih ang tih mawlh hian min tibuai,. Police te lû pawh a hai hle. Thu zawhfiah theih ber tura an ngaih Pu Dinpuia lah a thi leh ta bawk si. Pu Saiṭhuama natna a zual chhan pawh hi heng buaina te vang a ni tel khawp ang. Ani tar chak lo tan chuan heng thisen chhuahna te hi a lutuk mah mah deuh chu a ni e. 

Fela, kan ṭhianpa chungchang chu ngaihtuah a ni ta a. Pu Rotluanga pawh thuhretu atan koh a ni. Mahse, ani hmuh dan kha chu a chiang lo êm a, mit chauh lang thei aṭang chuan anni ang kum upa tawh tan chuan hriat a harsa ve bawk ang. Fela kutziak leh Vauna lehkha ziaktu hawrawp chu a lo inang hle a nih hmel. Tin, an rinhlelhna ber zawk chu Fela account-ah Pi Zahnuni thah a nih hma nî khan pawisa cheng nuai 2 a lut a, ani Fela, a nu hova hmeithai, a farnu lah rualbanlo ni ta bawk si chuan chung pawisa zozai chu engtin nge a neih theih tehlul ang? Chu tak chu Police lam pawn an rinhlelhna chhan a ni ta a ni. An inbiak dan tak erawh kan hre ve lem lo va, Pu Rinawma ṭawngkam aṭangin, Fela chu a inpuan thu leh Pi Zahnuni chu a thah a nih ngei thu te, a nu damlo inentirna a mamawh luat vanga pawisa îta khatiang kha ti ta mai a nih thu a sawi a. Pawisa thawntu chu Teteii a nih thu a sawi ta bawk. Eheu! Thil chu a kal ta zel e. Teteii pawh an rawn hling ta chat mai. "Teteii kal tlang vekin min rawn bia a, Teteii hian Pi Zahnûni tihhlumna tur damdawi leh syringe pawh min pe a ni" Fela'n a tih kalh kalh tak avangin, Teteii pawh inzêp thei lovin.."Zonuni tal awhtir an duh a, chuvang chuan Pi Hnuni khan Zonuni a ankhum nasat thin bakah a enkawltu ber a nih avangin rinhlelh a awlsam dawn a. Pi Hnuni tihhlum mai kha an duh ta a ni,. Tichuan, pawisa hlawha tihhlum ka duh leh duh loh min zawt a, ka ngam ngang loh avangin tihlum thei tur zawng turin min ti leh a, Fela hian pawisa a mamawhzia leh pûk tur te pawh a zawng hial tih ka hriat avangin ka be ta a ni. Tichuan, Fela dawn tur pawisa pawh min lo thawn hmasain keiman ka thawn chhawng veleh ta a ni. Heng zawng zawnga min rawn be thintu chu Pu Dinpuia, boral ta kha a ni " tiin a inpuang ta nge nge a. Mak kan ti hle..a lo inhnamhnawih ve daih chu. Dâwp chikima an dâwp pawhin Pu Dinpuia vekin thu a pek thin thu leh Zonuni tal awhtir an duh thu bak sawi tur a hre lo. A kaikuang ber chu tu nge tih hriat a la ni ta chuang lo va,. A manganthlak lu deuh a ni. Zonuni lahin hrehawm a tih phah em em mai bawk si. Ka khawngaih takzet a ni. Fela leh Teteii te chu IPC section 302 hmanga thiamloh chantir niin, jail run thim an belh a ngai dawn ta. Teteii chu an dah thlak hmain Zonuni nen hmuh min phalsak a, kha chen lo inkawm ve tawh si chutiang a chunga a ti thei chu a chhan a zawt ta chat mai a. 

Teteii chuan hrehawm tih hmel takin, "Duhâm vang a ni e. Tin, dik takin ka thîk che a ni. Zosanga kha a rawn thawh tirh aṭangin ka duh a, bialpa nei mah ila ka bialpa kha ka iai ve ṭhin. Mahse, nangmah ringawt a buaipui ta si che a. Pasal ka neih hnuah pawh Zosanga ka hmuh hian ka danglam tlat zel a, in inneih hnu aṭang phei kha chuan ka pasal nen kan hlim thei tawh lo. An dawr lah a nauin a enkawl zui a, ani thawh engmah nei si lo kha ka hlimpui zo tawh lo a ni ber. Pawisa ka kum khat hlawh aia tam min offer takah chuan, tuman an hrechhuak chuang lovang tih rilru puin ka ti ta mai a ni e. Min ngaidam lo pawh ni la ka vui lo, ka dem lo bawk che. Mahse, pawi ka ti takzet a ni.." tiin a lo chhang a. Mak kan ti dun kher mai. Keimah vang a nihna chente pawh a awm a nih hmel..ka ngaihtuah lêt hian ngaihbel theih tur âwm chu a awm ve tho mai,. A bialpa khan a vil hneh êm zawk a, min zuam lo mai mai a niang. A pawi ṭhin mang e aw. 

Fela erawh kan va hmuh chuan hrehawm a tih ka hlau a, kan hmu ta lo. A thiltih kha dik ka ti hauh lo naa, a tihchhan zawk avang khan ka khawngaih letling. A nu a hmangaih luatah tual hial a that a, mahse, sual chu a inthup bo hlen thei si lo,. Tihian a damchhung deuhthaw Jail run thim a bêl dawn ta chu a nia. Heng zawng zawnga a kaikuang, engkim manage tu hi hriatchhuah a nih tak mial chuan engtin tin emaw Fela leh Teteii te tân hun chhung pawh a tihtawi theih deuh mahna le..

Zonuni rilru tihaha tina zual thei thil thleng chuan min tithinrim hlur tawh. Pu Saiṭhuama lah ICU-ah a la mu reng a, a fate leh a nupui ten a nunna chelhsak an la tum ve hram hram chu a ni si a. Nunna hi zawng a lo hlu ngei mai. Hmangaiha, Dinpuia thattu nia an rinhlelh lah kha finfiahna a ṭha tawk lo nge an chhuah leh daih a, Dinpuia thihna leh Martina thihna chhui tho an la ngai. Dinpuia kha thi lo se heng zawng zawng bulṭanna hi kan hre mai tur. 

"Hlupuii hi an thlûr bik a, a âwm ve tho mai. Ṭawng huat thu suhah" ka û pawisawi hlau taka ka tih chuan, ka û thin a lo khei tho a nih hmel.."Engvangin nge âwm i tih a? Ani ber kher chu engvanga ringhlel nge i nih?" A ti ta hlur mai. Ka nuin mitmeiin min lo khap viau naa, " a..ka hre lo. A û te chuan eizawnna ngel nghet an nei vek tawh a.." ka ti chauh a, "A hmain i bulah ka sawi tawh kha..Zonuni chungchang avang hian unau kan indo ngai suh se tiin..i la hria ang chu tiraw?" A ti hriam ta hraih mai. Zonuni a awm lo hlauh zawk a, ka nu chuan, "A tawk, duhtawk r'u, Mama, ani pawn a ringhlel bur a nih loh kha..nang pawh Mampui, thil hrechiang lo chuan engmah sawi ve ngawt suh" tiin kan boruak chu bengdaih a tum a. 

"Unau kan indona chhan tur ka hre lo. I nupui a nih hma hauha khatia lo ṭan hlur kha thil ṭul ber pawh a ni lo" ka ti ve leh ngat a,. Ani ai hi chuan ka ṭawng thei zawk hrim hrim,. Mahse, Hlupuii hian Zonuni lo phiarru ngat se chuan ka lawm lo viau ang, hetiang khawp hian buaina a thleng zing tawh. 

"Ka nupui a la ni lo chung hian, i nupui i hmangaihna aia nasain ka hmangaih, a chiang em? Zosanglian.." Ka û mitmeng thim raih chu ka melh rei ngam lo. Ka hming puma min koh tawh chuan chhan let loh hram ka duh. A thinrim cho chhuah ka duh lo. Ka chhan zui tak loh avangin a chhuak ta nghal a. Ka nuin min zilh nghal malh malh, "I u rilru a hrehawm tawh tehlul nen, a tizualkhai turin tawngkam engmah cheh suh. Hlupuii avangin engmah pawh a tih hleihtheih loh hi..hrethiam rawh" tiin. 

"Ka nupui pawn engmah a tithei bik hleinem. Depression te hi a la nei lovang tih a sawi theih loh. Engpawhnise, Heng thil thlenga Hlupuii a inhnamhnawih a nih ngat chuan ka ngawi mai mai lovang" ka ti ruh ve tlat! Kil khata lo ṭhu ve reng ka pa chuan, "Hetiang tehnuaih hi kan ni si a, In nu nen hian i nute khuaah han zin khawthawng daih ula a ṭha ang. Boruak dang hip te pawh a ṭha" a lo ti ve charh charh a. 

"Mahse, pu Saithuama thi chhawngin a awm reng a, Zonuni hian a kalsan thei lovang" ka lo ti si. A ni chiah bawk a, zin khawthawnpui mai pawi ka ti lo, a pa thi mai thei dinhmuna a din avangin Zonuni hian a zinsan theih ka ring lo a ni. Kan chhungkaw boruak pawh a inlûmlet chho a, kan mûk run hlawm. Ka û lah inah a awm ngai mang lo va, Hlupuii bulah a tamtâl ṭhin a ni mahna le..Zonuni inthiamlo leh hrehawm ti bawk si lah a ngui si,. Vawikhat phei chu ka vin hrep nghe nghe. "Nang lehzel khatianga i awm chuan eng kan ang thei nang. I inthunun thei thin a ni lo'm ni? Ti nge i inrintawkna zawng zawng i hloh tak vek a? I thiam loh ni miah lohah i inburbun a, i hming lamrik a nih vang ringawtin engkimah i inhmehbel a, nuam i ti a nih hi, hetia awm hi..kan inchhung boruak hi ka hne..ka leng dawn.." tiin Asanga te in lam ka pansan ta daih. A hnuah ka inthiam lo tho naa, intihpachan a tum lo lutuk leh amah a inthiamlo ngawih ngawih reng chu ka ning tawh a ni ber. Asanga nen kan inkawm ta mai mai a, Baby'n a lo la biak ṭhin thu te, a inlak khawngaihthlak dan velte a sawi a, kan nui kan nui mai. Nizana an in bang a lo nei mial a, a roomah kan lem dun mai mai. Ka rilru ipik lutuk tihthawl nan hmanraw hmantlak loh ber zu bawk ka hmang leh ta chu a nia. Ka in lohna a rei tawh nen, ka zo lo viau mai. Bike erawh ka khalh haw ve thei mai bawk a, kan pindan ka luh chuan Zonuni chu khumah a lo ṭhu ran mai. Ka va inphihfai thuak thuak a, "I va meng rei ve" ka ti liam puat. 

"Ka lo nghak che" a ti sap a. 

"Nghah ka ngai hleinem" tiin ka inthlak pah a, khumah chuan ka let thla zui nghal. 

"I rim chu leh!" A ti hlak a. Ngaipawimawh lo zetin, "Kan awmdan ninawm lutuk ka tlanbosan ve a nih hi".ka ti hmuk. 

"Min ṭhen mai la" a ti ta sak a. 

"I duh maw?" Ka ti ve leh ngat..

"Ka duh ka ti hleinem, min nin viaute chuan min ṭhen thei alawm" a ti ve leh a. A awki erawh a dam thlap thung. 

"Sim tum ve la.." ka tih chuan, "Thil zawng zawng hi kan thunun thei lo" a ti ṭiak a. 

"A nih chu, ka muhil dawn" tiin ka maimichhinsan ta hmak. Kan inneih aṭanga kan inhauh ve vawikhatna a ni hial ang. Pasal ṭha tak ka ni e chu ka ti ngam lo va,. Ka theihtawp erawh ka chhuah ve chuan ka hria,. Engkimah ka ṭawiawm a, ka tan pawh a hlauhawm thei tih hrereng chungin khawi kipah ka zui a,. Kan chhungkaw boruak hre vek chunga hetianga a khawsa tlat hi hmeichhia ka nih ve loh avangin ka hrethiam thei tawh lo a ni. 

A tuk zing dar 8 velah ka harh a, Tar Enkawlna pawh thla khat chhung vel khar rih tura nawrna a awm avangin khar a ni rih a, keipawh ka awl rih angreng. Duatpuia'n min lo kaitho a, ka lo buan fiam leh chu, "Zu rim i nam" a ti a, min kalsan daih. Ṭi ru deuh takin ka va chhuak a, Zonuni leh ka nuin rawng an lo bâwl a, an lo nui dun bâwk bâwk ka hmuh chuan ka mumang emaw ka ti hial..min rawn hmuh chuan, "Tuilum ka dahsak che kha aw..va in rawh" a rawn ti dam thlap a, a nui sâng bawk. Tuilum hi zing tin ka in ṭhin. Ka nu pawh chuan, "Vawiin chu i pu va kan ve rawh u aw, tihtheih nei lo mah u la, va lan ve zeuh zeuh kha a mawi" a lo ti nghal zung zung a. Ka lu a nat deuh avangin nachhawkna ka hmawm zauh, chu chu lo hmuin, "Pum ruah laiin nachhawkna ei tawh suh ka tih kha.." Zonuni chuan a rawn ti nghat. Mahse, thinrim hmel a pu hran lo. Ka hrilhhai deuh vangin han sawi mai tur ka vân deuh a, "Ka û hi a la tho lo mi?" Ka ti ta ringawt. 

"Tho lo, nizan a rawn haw tlai lutuk a,. " Ka nuin a lo ti vat. Sateii erawh Zonuni rawn awm hnu aṭangin zingkarah a kal leh tawh a ni. Ani pawh a bialpa nen khan an la inzui tluang ve zel a,. A lawmawm lamah ngai ang. Tukṭhuan kan kil pawn ka û chu a la rawn tho chuang lo, U Mamawii nen an inṭhen laia a awmdan ang deuh khan a awm leh a, kan inhmu khât angreng. Pawi ka ti viau naa ngaipawimawh deuh angin ka lang duh bik lo. Chaw eikham an intihfel zawhah Pu Saia kan tur chuan kan insiam ta a. Ka be hreh tlat, nizan ka awmdan vel avang kha a niang. Bike ka nin deuh tawh avangin kan nupa puala car 2nd hand lak ve ka rilruk a, sawi erawh ka la sawi lo. Car hlui han melhna khua pawh a kaw lo a nih hi a..

Damdawi in kan thlen chuan Julie bakah Jerry leh a nupui hual te an lo awm a. Min lo be nghal vat vat mai. ICU-a la awm a nih avangin va hmuh a theih loh a, lo ngaihchân a ni deuh tawp. Jerry chuan hna pawimawh a neih avangin reivak loah an haw a. Julie te nen kan ṭhu ho ta thap. "A la ngai reng nge? Hmasawn âwmin an sawi em?" Ka ti a. 

"Doctor kha chuan, 'Rei a daih ka ring tawh lo, lo insingsa deuh mah ula a pawi lo vang.' a lo tia. Tluanga bulah a lo sawi niawm tak a ni. A natna hi lung lam mai ni lovin Thin cancer rang ber chi a lo nia. A damdawi in awm hmasak khan an hre tawh a, mahse, a bulah kan zêp tlat thung. Chuvang chuan hmasawn lam aiin hniam lam a pan lo thei lo a ni.." a ti ta a. Zonuni pawn chu chu a hriat vawikhatna a ni. 

Sawi tur a vâng duh riau mai. "I hah awm sia, lo va awm hahdam la, vawiin chu kan nupa pawn kan lo awm thei mai ang" ka ti ve ngial a. Nui lui tih hriat taka nui chungin, "A hun tawp dawnah chuan awm ve zel ka duh,. Mite chuan a sum ûm vanga neiah min ngai vek, a fate ngei pawn. Mahse, kan inhmangaih ve miau a, chuvangin a theih chen chen chu awmpui ka duh a ni" a ti khauh ve fan a. A hmela tih tak zetna langchhuak chu a der mai niin ka hre thei lo. Kum hi number mai mai alawm an lo ti ṭhin. Anni tan pawh number satliah lek a ni ve thei tho. 

"A dik khawp mai. Ka hrethiam che lawm" ka ti a. Zonuni pawhin, "Keipawh a hun hnuhnung bera awm ka duh. Kan inhrechhuak chauh a, kan inthlah leh a ngai dawn chu a ni sia.." a ti vang vang a. A kut ka va humsak ta ngawt. 

"Ni ngawt mai, i tan phei chuan a hrehawm dawn hian ka hria. Bakah heng buaina hrang hrang hian min tibuai reng bawk sia, Police te lahin min enthla reng ni te hian ka hria..Hlupuii pawh a lungawi loh teh kha" Julie chuan a lo ti ve a. 

"Heng buaina lo irh chhuahna, a bultumtu ber hre hman tal hian thi se a ṭha tur.." Zonuni chuan a ti a, a kut ka hum nghet sauh. 

"Ṭawng mawi lo ni lo se, i nute lam te pawh hi an ni thei ang em aw te ka ti..i ro chan ai ît vang emaw i nu tana eng emaw tal hnutchhiahtir an duh vang emaw te pawn.." Julie chuan a ti ve ta hlawl mai. A lo mangang ru ve hle tih a lang. 

Thawk la halhin kan nu chuan, "Ka hre lo le..eng rosum mah hian min han tihbuai loh nen,. A damlai ngei hian a thurochhiah te puang hman ni se chuan ka chan ve tur ka hnawl vek mai tur a nia. Hetiang taka lo ît tu hnenah hian ka pe phal reng asin mawle..midang nunnain a tawrh zel dawn ai chuan.." a ti sap sap a. 

"A pawi ngawt mai" Julie pawn a ti chuai raih. 

Chawhnu lamah Hlupuii leh an nula min lo dawngsawng tu kha an rawn lang ve a. Hlupuii chu ka ngaihbel nge min hlat ta riau hian ka hre pek a! Keiman ka hlat zawk vang pawh a ni maithei. Zonuni nen erawh an inbe bawrh bawrh tho va, "Julie, Lo va awm hahdam rawh. Kan lo awmpui ang" Hlupuii pawn a ti ve. 

"A ngai lo,. Ka chau lo." A ti ve tlat. 

"Tunlai chu U Mama pawh a rilru a hah hmel thin khawp mai. Kan buaina hian chhungkaw pahnih min nghawng tel ve vek sia" Zonuni chuan a ti mawlh mawlh a. 

A heh liak zauhin Hlupuii pawn, "A dik ang. Police ten min ko zing sia, a rilru a hah ve a nih kha. Kan pahnih pawn sawi tur dang kan hre lo. " A ti ve mai a. Zonuni han huatna leh han enhranna em em a nei awmin a lang lo. Kan ngawih dat laiin an nula Rengi chuan, "Ehe! U Saroni a ni reng mai. Hlupui.." a ti chul a. A hawina lam kan hawi ve vat, nula hleitling tak, inkhaithli thlerh thlawrh, inchei smart tak hi corridorah chuan a rawn kal phei ta zân zân a. Hlupuii pawn, "Mami chu.." tiin a va pan hnai vat. An upa ber a pa laka a tihtauh vanga phaia chhuk ta daih kha a nih hmel..Hlupuii'n ka ngaihdan chu a rawn nemnghet ta chiah bawk. A lo ni ngei e. Saron Lalmalsawmi a ni a, a hming hi ka hriat hnu a ang. Hlupuii chuan keini nupa pawh chu min hmelhriattir ve a. "Kan unaunu, reitak ka pain a lo zawn tawh chu hei ngei hi a ni" tiin Zonuni chu a comment kher..Saroni chuan a shades chu la thlain, "I nu i chhun a ni maw? Uirenu leh nupui phatsan hmang fanu nih chu a nuam bawk em?" A ti chang ta fak a. A mitmeng chu Hlupuii te ang lo takin a kha ka ti dawn nge, a nelawm loh hle. A thusawi dan chuan Zonuni pawh a khei deuh nge a ngawih dat hnuah, "Nuam e. Min piantirtu te hi eng mi pawh nise, ka zah em em a ni" a ti ve ta ngat a. Boruak chu a ṭang at mai. An inchhang khawlo ang tih hlauin Julie pawn thu dang rawn zeh teh a tum a, mahse, "Nang hi chu lo ngawi hle hle rawh. Ka pa nupui nihna bak engmah i nei ve lo. A boral velah in i chhuahsan bawk ang" Saroni chuan a lo ti chang ta fak fak a. A inrintawk hmelin mi chaldelh pawh a thiam hmel khawp mai. 

"Ka tihpalh" Julie pawh chuan a ti ta ringawt. Hlupuii erawh chuan, "Ka pa chuan heng hi hria se a lawm hauh lovang. I ti mah mah aw" tiin Julie leh Zonuni te thlavang a lo hauh ve a. 

"Ka nau, khawvel i la hmang tlem lua a ni e. Engpawhnise, ka pa chu ka va hmu ang e. Thil pawimawh tak sawipui tur ka nei.." tiin luh mai a tum a, nurse ten an lo phal lo nasa. "Tunah chuan an chiu muhil leh tawh. Biak theih a ni rih lo.." Julie pawh chuan a lo ti ve a. Saroni pawh chu a ṭhu ve leh mai a,. "Ka pa hi a boral chuan nangmah vang a ni ngei ang" Zonuni melh chungin a ti leh ta chat a. Zonuni tawng hmain, "Nang hian i duh duh rawn sawi suh. A ṭha em?" Ka lo ti chang fak. Min rawn enin a nui sak a, "Nupui thlavang hauh chu i tina ve maw?" A ti vel a. A chetdan chu a ngeiawm riau. A hmelṭhat tehlul nen..

"Ka nupui hian engmah a ti lo, amah pawn hrehawm a ti hle asin. " Ka ti ve leh a,. 

"Amah vangin pawisawi lo thenkhat ten nunna an chân a..chung pawh chu i hria ang chu tiraw?" A tih leh takah chuan, Zonuni'n, "I ngawi thei tawh ang em? Duhtawk rawh, a nih loh chuan.." a tih mek laiin Saroni chu a rawn ding chhuak a, Zonuni mitah tak melhin, "A nih loh chuan khang mi te i thah ang khan keipawh min that ve dawn tihna em ni?" A ti fiah kâk a. Saroni chu ka va melh kâwk, inringtawk zetin Zonuni pawn a lo melh let ve a,. "Eng thil nge in sawi le?" Hlupuii'n a ti tuar. 

"Ka nau, fimkhur rawh. Nang pawh an target tawh maithei che a ni.." Saroni'n duhdah zeta tiin a bag a la a, chak zetin a kal sawn ta daih. Zonuni khur dar dar chu va kuahin, "Engah mah ngai suh" ka ti sup a. 

Ka rilru erawh a kal thui ta viau mai..