Parchuailovi 13

PARCHUAILOVI (13)

Ziaktu : Toni Râlte

Zonuni nen hamhaih zetin kan inmelh a, "Lo la chîai mai lo u la, ka han sawi zo phawt ang e" Pu Saia chuan a ti a. Keini pawh kan ṭhu ṭha sauh sauh mai. 

Hetiang hian Pu Saiṭhuama chuan Zonunpari ṭobul chu a sawi ta a ni. 

"Ka nupui hmasa ber nen kan inṭhen hnuah khan Jerry te nu nen innei lehin ani kha ka hmangaih vanga nei ka ni lo va. A pa leh ka pate hi sumdawnna kawnga inṭhian ṭha tak, insangawizawnpui ṭhin an ni. Ka pa te remruatnain ani nen khan kan innei ta a, khatihlai khan ka tleirawl lai ngaihzawng nen inzawng chhuak lehin kan inhnimhnai hle a. Nupui ka neihsan tak avang khan ani pawh chuan pasal nei zuiin a hmuh te pawh kan la inhmu fô mai. Mahse, uirena suala tluk erawh kan hlau dun thin hle. Jerry kan han nei a, ka nupui kha sawiselna tur ka hre lo, thinlung takin ka hmangaih thei lo tih a ni mai. Mahse, Jerry a rawn piang kha a hrisel lo zui ta riau a, nupa nun pawh kan hmang ngai lo tluk a ni. Chutah chuan ka ngaihzawng ti tawh mai ang, Thanpari nen chuan remchang kan hmu thei nasa si a, kan insûm zo ta lo chu uirena sualah kan tlu lut dun ta a ni. Beisei loh deuhin a rai ta hial mai a! Kan chetsual hma thla 2 liam taah khan a pasal nen chhungkaw inhmuh thiam loh avangin an inṭhen nghe nghe a. A pasala fa a pai lo tih chu a chiang viau mai si,. Kan mangang dun ta a. Ka pa a boral tawh a, ka nuin min la dampui a, ka pa kha ka zah em em thin, kan unau tana a thawhrim zia leh he sumdawnna hlawhtlin nana a tha leh zung a sen nasatzia ka hriat avangin a thih dawna a thuchah, "Muani leh in fate hi lo thlahthlam hauh suh ang che. Ka ṭhianpa nena kan inremsiamna bawhchhetua i ṭan chuan i pa thlarau hi ka chawl hahdam thei lovang" a tih kha keipawn zawm ka tum ve tlat a. Lehlamah Pari chu a rai ta bawk si. Ka nupui ṭhena han lakluh lah ka pa vangin ka hreh bur bawk si a. Ka tenawm ngawt mai. Nau tihtlak lah kan duh bawk si lo. Ani kha ka hmangaih hmasak ber a ni a, ka lainat ngawih ngawih. 

Tichuan, ruahmanna ka siam ta ngawt a. Pari chuan nau hring se la, keiman a enkawlna tur zawng zawng ka tumsakin amah pawh ka chawm vek ang tiin. In ka leisak a, chutah chuan nurse rawihsakin nau a hrin hma loh chuan pawn pawh a chhuak ngai mang lo, ka va tlawh zeuh zeuh thung. Ani pawn ka ruahmanna chu a pawm lo thei bik lo va, a chhungten an tuithlar titih bawk si. A tawi zawngin ka'n sawi ang e, tichuan, nau chu a hring ta ngei a, damdawi ina hruai hman pawh a ni lo. Phir a hring nghr nghe, vanduaithlak takin Pari chu nau a hrin hnu darkar tam pawh a liam hmain a boral ta mai a! Khatihlaia ka manganzia leh rilru hrehawmzia tak kha aw. Midang ka chhungte takngial pawh ka hrilh thei si lo. Ka nupui Muani bula sawi tawp mai te kha ka duh rum rum a, mahse, hrin hrang han enkawl duah kha nakin zelah naupangte tan buaina a la awm ka hlauh vangin ka zep tluan ta a ni. Tichuan, ka huan enkawltu Pu Hruaia te ka hrechhuak ta a, fa an awhzia leh an pai thei si lo an mangan zia hriain nurse nen chuan huanah kan zu kalchilh ta a. Naute nu leh pate erawh ka la zep ṭâng ṭâng tho. Kum 18 thleng min enkawlsaka a senso pawh ka pek vek tur thu ka hrilh a, kum 18 an tlin hunah chuan keiman in leisaka an unaua enkawl ka tum ve a ni. A chhan chu Pari khan a thih hmain min chah uluk em em a, "Tikhawpa ka mualphopuina che leh ka thisen ka hlanna hi rawn namnul suh aw. Kan fate tan hian nu leh pa chan i rawn chang ngei tur a ni." Tiin. Kha thil khan min hneh bawk a, ka fate chu thlahthlam ka tum hauh lo. Mahse, an sentêt lai chuan ka tan enkawl ngaihna an awm rih lo a ni.. Pu Hruaia te lahin fa an lo awt ve em em bawk si. 

Tikhan ka huan an enkawl tawh loh hnuah pawh la inbe pawp rengin thla tin naute enkawlna tur sum ka thawn ṭhin a. Anni tan pawh han insensona tur em em a awm lem lo. Hun a kal zel a, Hlupuii a rawn piang a, ka nupui lah a bawrhsawm chho zel bawk. Kan neihin a tlin hrim a, a la dam ve hram hram a ni mai e. Pari avanga ka lungleng khawhar lah chu belh tur zawngin ka vai ruai mai a. Muani chu ka hua pawh a ni lo, ka fate nu a nihna angin ka tuamhlawm a ni ta ringawt. Vanneihthlak takin ka sumdawnna lahin hmasawn lam a pan zel a, putar anga ngaih ni tawh mah ila ka rosum te avanga min iai lo nula bakah nuthlawi nalh tak tak ka hmu zut reng mai. Ka nundan tenawm tak khan min ṭhinglet mek a nih hi. Muani pawhin ka khawsak dan a hre lo thei ta bik lo va, a hriselna a tlakhniam phah sawt. Heart attack vanga boral ang khan kan sawi tak naa, a nihna takah chuan ka nun tenawm leh pawisak nei lo lutuk khan a ei ral a ni zawk. A boral te khan inthiam lohna nei mah ila, zalen ta sawtin ka inhria a. Kha ka nunphung vang khan a nia ka fanu upa zawk nen pawh kan inbiak hleihtheih loh. Upa ber tih takah ka chetdan engkim, a nu ka treat dan a hre vek a, ka sumdawnna chhunzawm ngei tumin ṭan a la nasa, a chhan pawh min rahbeh nan a ni. Chuvangin ka khawihtir duh lo va, nupui ka fapa tê zawk nena inrual reng tur ka lalut zui ta bawk nen, kan bula khawsa peih lovin phaiah a chhuk ta daih reng a, keimah vang vek a ni. 

A hma lamah khan kir leh ta lawk ila, in pian aṭanga kum 18 a liam ta tihah chuan Pu Hruaia chu biain in unaua awm tawh tur leh ka rawn hruai vat tur thu che u ka hrilh ta a. Mahse, mak deuh maiin Hruaia chuan, "Ka pu, hetiang khawp hian kan enkawl rei tawh a. Kan hmangaihna zawng zawng kan lo hlan vek tawh si a, anni hi kan innghahna an ni tawh, khawngaihin min laksak tawh lo hram rawh " a rawn ti ta mai a. Thinrim takin ka hau ta hrep a, ani lahin min chhang ve zel si, ka insum zo ta lo khan ka fate in nih thu ka sawi palh ta hlauh mai a! Chu tak chu Hruaia khan min vau nan a hmang ta tlat. "I fate leh i unaute ngei pawn an hriat chuan i tan a pawi viau ang, tin, Zoram mipui ten hetiang thurûk lian lutuk i nei tih an hriat chuan i sumdawnna pawh a tlachhe ngei ang. " Tiin. Ka thin chu rim viau mah se; ka sumdawnnain a tawrh ka hlau ve tho a, tin, ka fate nen kan boruak chhiat lai a ni bawk nen,. Ka ngawihsan ta rih a. Mahse, ka han insawh nghet ang a, ka fate chu ka la tho vang tiin ka ngaihtuah. Mahse, a hnu lawkah Pu Hruaia boral thu ka hre zui a, sumdawnna avangin ka buai phelêng a, ka fanu nen buaina kan lo nei ve zel bawk nen. Ka ngaihsak hleithei ta lo,. A hnuah an lo insawn daih tih ka hre ta a, an awmna hmun ka hriatchhuah meuh chuan Vani chuan, a fapa chu OD-a a boral thu leh a fanu erawhin pasal fanau a neih tawh thu a sawi ta a. "Intibuai zui tawh lo mai rawh. I fanu chu a hlim a, kan fa a ni lo tih a hre lo. I va tihbuai zel chuan a hlim loh phah zawk ang" a ti tlat a. A awmna hmun ka zawt nasa, a sawi duh si lo. A vau te hial pawh ka vau, mahse, a ṭang kawh ve tlat. Lehlamah kha chen an fa anga an lo enkawl a nih tawh avangin an tan pawh a harsa ve ang tih ka ring thiam. Mahse, ka fapa lah OD in a boral tawh a, ka fanu tal chu la chana Pari laka ka thutiam vawnhim ka duh a ni. 

Tichuan, ka naute zinga ka rinngam ka chhui ruktir ta a. Mahse, vauna ka dawng ta tlat! "I fanu i chhuitir zel chuan amah i fanu ngei nunna hian a la tuar ang, amah enkawltu te thleng pawn" tih hi. Tumah ka hrilh thei si lo. Min vautu pawh ka chhui ru ve nasa, tun thlengin ka la hrechhuak thei lo. Kan thuruk hre vektu tihna a ni mai a, nau chhartu nurse lah in pian hnu lawkah accident avangin a boral tawh si. Tuin nge ka thurûk hria ang tih ka ngaihtuah nasa,. Vani thih thuin min han deng ta bawk a. Min vautu hian a ti mai mai lo a nih ringin ka fanu hriatchhuah ka tumna pawh ka bansan ta a ni. Tikhan, nang i rawn lang a, Tar enkawlnaa thawk i ni tih ka hriat khan rinhlelhna lian tak ka nei a, ka thurûk hriain min blackmail i tum niin ka ngai a. Mahse, vauna i dawng ve tih i ṭhianpain min hrilh khan ka fanu tak tak i nih rinna ka nei ta a. A rukin ka chhuitir leh ta che a ni. Mahse, kan buaina chu a kiang ta a, buaina dang erawh tu nge min vaua kan nunna derthawnga min siamtu hi tih kan ngaihtuah a ngai.." tiin. 

A sawi rei bawk a, tuisik chu Zonuni'n a thlitsak vat a, a in khawlh khawlh mai. "I hming leh i nau hming hi in pian hlim khan i nuin 'Parchuailovi ' leh 'Lalhmangaiha' te ni rawh se tiin in hming a sa a. In unau pualin ka rosum pawh ka ziak fel vek tawh. Tunah chuan i nau boral dan leh engtin nge i nun i hman chhoh dan min han hrilh ve ta che.." tiin Zonuni a melh a. 

Zonuni pawn an tetlai aṭanga a tun hun thleng sawi chho zar zarin Atea boral dan, Martina thihna thlengin, Tar enkawlna aṭanga bân a nih thu te pawh a sawi fai ta vek a. Chhing duar duar chungin a lo ngaithla a, a dam loh hma ai khan a lang tar sâwt hle. 

"Ka fapa chu ka hmu ve hman ta lo chu a nia. A pawi hle mai, ka nun uluk loh vang a ni. " A ti vang vang a. 

"Keimah ngeiin a hranpain detective ka rawih a ngai a nih chu! Tunah chuan min ṭinsan tawh rih rawh u. Ngaihtuah tur ka nei. Inneihna senso zawng zawng chu keiman ka tum ang, Inneih te han zo se, ka thurochhiah pawh puanna ka nei dawn nia. " A ti ta a. A chauh hmel êm avangin keini pawn sawi nawi loin kan chhuahsan nghal. 

"I hausa dawn chiang" ka ti fiamthu a. 

"Hausak vak hi ka duh hran lo. Ka pa ka hre tawh a, a thusawi kha dâwt a nih loh chuan ka lo ngaihdan a dik lo hle tihna a ni. Ka nu lah a boral tawh si chuan tu nge min umzui rengtu hi ni ta ang le?" A ti mawlh mawlh a. 

"I pa thuruk hretu leh i rosum chanai ît tu a ni mai lo'ng maw?" Ka tih chuan phâwk zeta min rawn melhin, "Ti nge kan lo ngaihtuah chhuah loh? Amah Pu Saia pawh hrilh vat tur a nih chu.." a tih chuan, "Pu Saia ti tawh suh, i pa a nih saw" ka ti vut. Ani erawh a nui ringawt. 

"Tunah chuan inneihna chiah ngaihtuah tawh rih ang. Thudik kan hre ta bawk a"..ka ti a, "Ni e, ka thaw huai tawh e. Engkimah ka tihbuainaah che min hrethiam thin a, ka lawm" tiin ka kut a rawn vuan a. A hmel pawh a eng sawt sawtin ka hria. 

Inneih ni pawh a rawn inher chhuak ve ta hlawl mai. Nupui ka nei ve dawn chu a ni ta a, ka phur hurh hurh viau. Kan chhungte pawh an rawn lang ṭiam ṭiam tawh a, ka nu nuṭa pastor pawh a nupui nen an rawn kal ve thei. Kan inhmu khât bawk a, kan innêl lutuk lo. Min cheitu lah chuan min uluk ngang mai. Asanga pawn a bialnu thar Puiteii kha a rawn hruai ngei a, Sateii te nen an inkawm thei nghal mai. Rinliani erawh zing kar aṭangin hmuh tur a awm tawh lo, a pawi lo daih zawk. Hall-ah chuan kan khat ve ṭhâm a, keimahni lam deuh vek an ni. Hlupuii pawh ka û nen rawn kalin a rawn nalh viau. Zonuni nen pa hmun, nu hrang an ni tih lah a hre ve der si lo, mahse, ka û ṭawngkam atang khan a ringhlel deuh chuan ka hria. Nakinah a pain thudik a la hrilh êm ang chu maw..inneih thutiam kan chham lai te chuan kan inhmuh hmasak ber ni kha ka hrechhuak rauh rauh..ka hêl rei zia leh kan inzui tak tak hmaa ama hriat si loha ka thinrim ringawt thin te, a tam mai. Tunah chuan ka nupui a ni dawn ta mai si a, ka tisual lo turah ka ngai. Tluang takin kan tlingtla ve thei a, buaina liantham thleng a awm rih lo. Pu Zamawia te lam pawh an inhawng bawk a, Zonuni a lawm kher mai. A pa diktak hi lo hrechhuak hma pawh ni ila Pu Saia in aṭanga a rawn lawi a rinawm chuang loh,. Pafa mah nise, hnawk leh chinfel ngai a la tam tlat. Inneih thilpek vel kan hawn laiin Rinliani ngei mai chu rui tih hriat lutukin a rawn pai lut ta chhawr chhawr mai. Ka nu hlauthawngin a pindan lama hruai vat a tum a, a duh ṭhak lo. Zonuni chu a kawk ang ve vâw a, "Mi chhenu, i duh i hmu ta maw? I hlim tawh viau ang chu tiraw? Mahse, eng nge thleng kan en zel ang chu..fahrahnu, tumah ṭanpuitu tur i nei lo" a ti ta siah siah mai le. 

Ka nîin lo kuah hrangin, "Mu nghal rawh, i va zak lo ve..min tizak hle mai" a ti bawrh bawrh. Salemi lo kamnam ve lah chuan, "Ruih duh pawn mahni dose hi hriat ve tur a nia. Zahpuiawm lutuk" a lo ti kawkalh. 

"Nang nu kha ngawi tawp rawh..i ka kha chip la, i mualpho lo a ni mai. Mi tenawm vek in ni, in zavai hian"Rinliani lah chuan a ti buan buan a. Ka pa a ṭawng chhuak ve ta. "Mama, va muttir teh u. A ka a chip vat loh chuan ka beng duh mai ang" tiin. Ka û leh Ruatkima ten an nawr lut ta rawk rawk a. A hahthlak ṭhin teh e, Zonuni erawh chuan engkim a lo hriatsa tawh avangin mênah a thlak thei a, "Mi zurui ka khing lovang" a ti sep. In khata kan chenho chuan buaina dang pawh la chhuak thei a nih avangin Ruatkima te ina awm rih turin a hriat lohin thu ka titlu ta a ni. Inneih zan a ni naa, kan chau dun ve nen, nupa nun kan hmang lo. 

Kan inneih atanga ni 2-naah Pu Saiṭhuama hnen aṭangin pawisa tam tham tak Zonuni chuan a dawng ta a. "Kan thurûk erawh lo la zêp hram hram rawh u. Ka puangzar ṭêp tawh e" a rawn ti thung. Zonuni chuan pawisa chu thawn let leh a rilruk a, mahse, "Kha chen amah tibuai lovin kan lo awm ve tawh a, ka pa a nia, a hausakna zar chu ka zo ve tur alawm" tiin a thawnlet ta lo. Ka chhung ten Pu Saia kan hmuh chungchang min zawt tho a, "A sawi duh lo nge, engmah kan la hre thei lo" kan ti mai a. Ka nu lah chuan, "Keini kan awm tawh a, hriatchhuah kher pawh a ngai tawh hleinem, i nu leh pa ang chiahin min en mai rawh" a lo ti ve kawkalh a. Innel sa, a hma atanga inkawm bawrh bawrh sa an ni bawk a, harsatna a tawk lem lo. Rinliani erawh sawi tawh ang khan Ruatkima te inah a awm ta a, patea a strict si a, hrehawm a ti ve khawp ang. Ka chawlh hun a tawp a, hnaah ka kal leh ṭan ta, Zonuni erawh ka nu duhthusam ang takin in lamah ka nu a pui a, ka nu khua pawh a har lutuk ta lo. Duatpuia pawn a ngaina viau mai,. Mama nen erawh tawng tam lo ve ve tih takah an inbe tam lem lo. Pu Saiṭhuama kan ngaichâng ru reng a, a la dam ṭha thei chiah lo nen thu thar a la nei leh lo. 

Ka nuin hna ka thawh laiin min lo call a, "Duatpuia khawsik a sang lutuk a, hei Zonuni nen kan chhohpui dawn, i û pawh a rawn kal ve ang, ka rawn hrilh vr che a nih chu" a rawn ti a,. Nizan aṭang khan a hritlang awmna nen a khua a sik a, ka nu lah a phî chi a ni ve bawk nen, Duatpuia han damlo ve chu a buaipui khawp mai. Damdawi in luhpui ngai khawpa a khawsik a sang chu pawi ka ti, naupang hrisel leh harhvâng tak a nih vei nen. An lo admit ta tak tak a, keipawn ka tlawh haw ve, ka nuin a riahpui dawn a, An mamawh bakah chaw han pek pahin ka chho ve leh. Ka û pawh a la awm ve rih a, Hlupuii pawh a rawn thleng chawpchillh nghal. Ka nu chaw eikham law law ka nghak a, Hlupuii chuan, "Zosang, hawh inbe lawk ang" a ti sap a. Ka û ka va melh chuan a lo bu nghut. Bathlarah kan chhuak dun a, "A va pawimawh hmel ve mawle.."nui chungin ka ti a. 

"Pawimawh viau, ka pa chungchang a nia, Zonuni nen hian inzawmna an nei tiraw? Kei tal hi chuan ka hriat a ngai. Ka pa hi a damkhawchhuak zo tawh kher lo maithei" ..a ti charh charh a. 

"I pain hun a tih hunah chuan a hrilh mai turah che u ka ngai a.." ka ti ta ngawt a. 

"A puanzar hmain thi ta si se,." A ti sap. Thil tam tak ngaihtuah hmel a pu bawk. "I pa chu titipui tum zawk la..keini lo sawi ve ngawt kha a dik lo alawm" ka ti a. 

"Ka tum zing alawm, a nupui saw a awm ve reng zel a, duh ang thâlin kan titi thei lo. A nupui mitmei a ven danah Zonuni nen thuruk an nei ngei tih ka hria" a ti leh mawlh mawlh a. 

"A va buaithlak e aw" ka ti ringawt. Keiin lo sawi ve vak kha ka hreh si, "I pa ka be leh phawt zawk ang" ka ti leh a. 

"Aw le, a hmalama biak lo tum teh aw. Ka pa hi a dam rei dawn lo a nia" a ti hmiah mai. Ka rilru kilkhatah chuan duh lo viau mah ila, Hlupuii hi rinhlelhna ka nei tlat! Ka û bialnu mah nise, Pu Saiṭhuama fanu a ni miau a. A laizawn neihchhunin in a chhuahsan tawh a, ama pualin sumdawnna a din tawh. Tunah amah han nêka ter pha tur fanu dang a pain a nei tih a hriat chuan chet lak a duh ve thei tlat! A û te pahnih lahin eizawnna ngelnghet tak an nei tawh a, Jerry Hotel pawh distric capital dangah din a ni fur tawh. Amah hian a pa ro zawng zawng khawm theih a duhna laiah hetiang hian chet a la a ni ve thei tlat. Mahse, ka û zahawm ka tih avangin rinhlelhna lantir loh hram chu ka duh thung. Zonuni bulah pawh ka sawi a, a ranglama inbiakna kalpui turin ruahmanna kan siam ta a ni. Pu Saiṭhuama hian a fanu leh ka û inngaihzawn thu a hre vek tawh a, kan inzawm kual neih nuaih dawn a ang viau. 

"Zanin dar 8-ah in nupain rawn phei u la, ka thurochhiah puanzarna chu ka nei ang. " Pu Saia berin a rawn ti ta bawk a, ngaihṭhain kan awm thei ta deuh. Duatpuia erawh a khawsikin a hneh deuh a, an la chhuak thei lo. Zonuni pawn zan khat chu a han riahpui ve tawh nghe nghe. A nî leh a pi ten zan lam chu inriahchhawk tawhin chhun lamah Zonuni'n a han vil thung. 

Pu Saia hun tiam pawh a rawn thleng dawn ta, helhhawlh angreng takin kan phei dun ta a. Kan va thlen chuan anni lam pawh an lo kim ṭhap mai. A zâmawm duh angreng. Pu Saia pawh chu wheelchair-ah ṭhuin a pindan aṭangin an rawn nawr chhuak a. Hlupuii sawi vang nge ka hmu cherin dam rei hmel a pu tawh lo hle. Pa ber kan ngaichâng ta ṭhap a,. An upa ber Tluanga tia an koh te chhungkua bakah Jerry leh Hlupuii, Pu Saia nupui leh keini nupa kan ni. Tichuan, Pu Saia chuan a thurûk, Zonuni nen kan bula a sawite kha a sawi ta vek a, tumah kan ṭawng lo. A tawpah, "Zonunpari hi in farnu leh in laizawn a ni tihna a nih chu. Tun aṭang chuan in unau tak tak angin in en tur a ni, chhungkhatah kan insiam zui tawh ang. Rethei takin a seilian chho a, harsatna tam tak paltlangin vanlaiatla takmeuhin a awm a. Tun aṭang chuan chhungkua a nei tih lo hre tawh se la, a pasal pawh mi fel tak a ni a, ka makpa ni reng se ka duh bawk. Tin, Hman ata tawh ka fanu tan hian thurochhiah ka lo siam tawh a. Ka tidanglam dawn lo tih hre nghal bawk u la,. Mahse, ka thurochhiah erawh ka thih hunah in hre chauh ang. Tumah hi in rethei zui lo vang. " A ti charh charh a. 

Boruak a reh duk hnuah upa ber tih takah Tluanga chuan Zonuni leh kei chu min rawn chibai ṭha leh a, "Unau kan lo inhre lo rei hle mai. Kan chhungkuaah kan lo lawm a che u.." nelawm takin a ti a. Midang te nen pawh kan inchibai zui ve nghal. Pu Saia nupui Julie pawh chuan nui sângin, "Kan kum a inthlau vak lo maithei a, min nu hreh pawn a pawi lo aw.." a ti a, kan nui dar dar mai. Julie hi a sum ûm vanga Pu Saia nei a ni tih a fate pawn an hre ve vek, mahse, an eizawnna kawngah an buai hlawm tawh a, a pa ngaihsaka enkawltu tur an mamawh tho nen, an hnialsak duh lo a ni. Nupui na nâ na chuan a hna pawh a tlin ve viau a niawm e. An pa boral hunah chuan ani pawn chan a nei ve nual ang. Thingpui te kan in ho a, Hlupuii lah chuan, "Unau nauin in khatah kan lawi dawn a nia. A dangdai e.." a la tizui! Jerry chuan, "I zak lo siah. In innei dawn tih pawh a la chiang lo" a lo ti hluk hluk. Jerry leh Hlupuii hi an hmelhmai a inang viau,. Jerry hi tlemin a hâng deuh a. Ani pawh nupui hual nei lai a nia, a nupui hual la remchan loh vanga la innei lo mai an ni. Lehlamah an chhungkua hi an inngeih hmel phian ka ti. Hlupuii hian a pa dam loh aṭangin a pa sumdawnna pawh a khawih chho ṭan a. An sumdawnna hi in sak ṭhat hna aṭanga bulṭanin tun hun an thleng a ni. In hlui tawhte ṭhiatin a thar an din a, a neitu te nen inbiakrem chang an neih bakah a in hluia kha lei tawpin a thar hlak dinin manto pui puiin an hralh leh ṭhin. An hnuaia hnathawk mi eng emaw zat an awm a, Tunah hi chuan in aiah Hotel hluihlawn tawh lam an ti chho mêk a. Dawr lian takte pawh khawih zui zelin an hlawkna pawh a lêtin a pung a ni. Tar enkawlna leh Ngawlveite rûn aṭang ringawta an sum lakluh pawh hi a tam tham khawp ang. Zonuni chuan, "Kei chu pasal nei ka ni tawh a. Bakah i fanu mah ni ila i sumdawnna kawngah pawh ka pui ve lo che a, chan engmah nei lo mah ila vuina ka nei lo a nia,. Hetia chhungkua ka nei hi ka lawm tawh hrim hrim" a ti ve siam siam a. 

"Ni lo ve, Thanpari thlah awmchhun i ni tawh a, ama hnena ka thutiam avang pawn tuamhlawm che hi ka bat a ni" Pu Sai'n a lo ti nghet charh. A chauh deuh avangin an pindanah an nuin nawrluh a tum a, chumi hma chuan, "Taka! Nang leh kei min vaua keima din Tar enkawlna leh Ngawlveite rûn ngei aṭanga thil dik lo thleng chungchang kha chu a chhui tur midang ka ruai tawh e. Ngaihṭhain lo awm rawh u" a ti leh mial mial a. An innawrlut zui ta. Ngawlveite rûn leh Tar enkawlnaa inadmit an tlakhniam phah avangin hei hi chu an ngaihtuah ve tur pawh niin a lang. Police te lah hi an kut phuarsak an ni nge, eng thu thar mah an la nei leh ta lo. Ngawlveite rûnah erawh spy chu an intir thla tawh a niawm e. Pi Zahnûni thattu erawh an chhui chhuak zo dawn lo a nih hmel viau. 

Duatpuia chhuah tlaiah Hlupuii chaw eiah kan sawm a, kan hlim tlang hle. Zonuni nen unau an ni tih an hre ve vek tawh bawk a, kan inpawh dan a ril sawt. "Innei ve vat r'u" ka tih chuan an nui pût pût a, "Inngaihzawn hi a la nuam rih" ka û chuan a lo ti nghut. 

"Mawina, nupui neiha hmeichhe dang melh theih loh a hlauh vang a nih kha" Hlupuii'n a lo ti ve vat, kan nui dar dar hlawm a. "Tunah chuan Duatpuia nu ni tura ka hrual leh phawt che a ngai" Mama chuan a ti liam puat. 

"Min train nasa tawk tawh bawk alawm le..i ninawm,." Titau lek lek hian Hlupuii'n a lo ti. 

"Hrehawm i tih tak tak loh kha a.." a lo ti duh lek. An inhmeh dun viau. 

"Hlupui, i nuhrawn saw engtin nge i koh?" Ka tih chuan, "Julie ka ti ve mai, kan inthlau lo sia" a ti mai a. A âwm ve reng. "Ṭawng thu chhe loah i pa saw boral ta se, rosum velah in buai ang em le.." Sateii'n a lo ti ve khauh. 

"Buai lovang, ka pa hi pa fing tak a nia, tunah hian a ziak fel vek tawh ang. Julie pawh a rethei zuiin ka ring lo" a ti leh mial mial. Hlupuii hi ka hmuhdanah chuan ngaihsam ve lam, han mûk ren run ni lo, thiante zingah pawh a phusa ber chi a nih ka lo ring ve ngawt,. Ka û lahin a sawi tha duh meuh si lo va, a fel turah ngai phawt ang. 

Tar enkawlna lamah pawh nurse an la thar ve leh tawh a, Pu Saia khan Pu Muanthanga kha biain, engvanga Zonuni chauh bântir bik nge a nih a zawt a, "Rinhlelhawm ber a ni a, khatianga action kan lak ve loh chuan kan mualpho lutuk dawn asin" tiin a chhang. Zonuni'n thawh a duh tawh lem lo bawk a, Mi thar an la leh ta ringawt a ni. Seni a ni a, Cher lam hmel chhe lo tak a ni. A felin a nelawm viau bawk. A khat tawkin police pawh an rawn lang ve zut a, chhui chhuah tak tak a awm thei lo. Mahse, an vawi 4 rawn kalnaah putar ngawichawi tak, ṭhian pawh kawm vak ngai lo, mahnia tla mual mual ṭhin Pu Rotluanga chuan, Pi Hnuni thih nia a thil hmuh a sawi chhuak ta nge nge a. Dar 2 leh 3 inkarah khan guard thuam inbel, mask vuah mipakhat chu damlo enkawlna pindanah a lut lai chiang taka a hmuh thu a ni. A hmel erawh mask a vuah avangin a sawi mai thei lo. Engvanga zêp char char nge a nih tih an zawh chuan, "Pi Hnuni thih tukah khan ka khum bul dawhkanah vauna ka dawng a. 'I thil hmuh i sawi chhuak a nih chuan i nunna leh i chhungte nunnain a tuar ang' tih thu hi. Ka hmu tih kha a hrechiang a, a hlauthawng a ni ngei ang. Keipawh ka hlauhthawn avangin ka sawi duh ta lo va, mahse, a dik lo zawk in man mai ka hlau a, ka puakkeh ta a nih hi..Damlo dahna pindan aṭanga a chhuah hnuin store roomah a lut a, ka bp leh thildang min check sak tak avangin ka hmu zui ta lo" a ti ta a ni. Police te chuan guard zawng zawng an ko ta a, mahse, Pu Rotluanga hmuh anga palian an awm lo,. Pu Tluanga khan kha pa kha palian hle angin a sawi sia,. Bakah guard hi pali an awm a, kan mi hriatchian em em, tualthat duh tur chi an ni si lo. Store room- an va dap chuan parcel pakhat chhungah guard ho uniform a lo awm ta ran mai. A awmzia chu heta thawk ve tho hian guard uniform hain kan pitari kha a va that ang a, a hnuah a thawmhnaw thlakin thawk pangngai angin a awm leh tihna a nih hmel. Pawnlam mi an rawn kal ngai lo tlat. A palian deuhte chu kan awm a nuam ta lo riau mai. Kei pawh a palian zingah ka tel ve si,. Mahse, ka dawhkan ka thawhsan lohzia hretu an awm ka beisei,. In hnuaia che tla ka nia,. Kawngkapui bula ṭhu guard Mapuia'n khaminia ka dawhkan ka thawhsan lohzia a hre ngei tur a ni. Tichuan, a mal tê têin hnathawkte chu min be ta a, Kei, Fela, Zorema leh Hotu ber Pu Muana te chu min khalh fal ta ngei e. Cctv kan vuah lo hi a pawi ngawt mai,. Tunah chuan an rawn vuah tawh a,. Kan boruak a ṭang ru hle. Pi Hnui chhungte lam lah khan police lam an lo nawr ve chhên a, a damlaia an duat loh hmel tehreng nen. Pi Zahnuni case IO chuan, "He thil hi Pi Zahnuni huat vanga thleng ni loin, tu emaw ten tu emaw tana an thangkam a nih hmel.." a ti ve thei ta. Syringe leh damdawi burah lah fingerprint hmuh tur a awm lo, Pu Tluanga khan kutkawr a bun tih a sawi ngei bawk a. Kan home-ah chuan tualthattu a lo awm ru ve reng tihna a nih chu.

"Vawiin chu Biteii'n ṭap chungin min lo bia a, ka rilru a tihah êm mai. Nau neih a hun ṭêp tawh a, nau puan leh mamawh engmah pawh an la inlei si lo. Ruata hlawh lah an chang ve si lo va..engtin nge niang le?" Kan nu chuan a ti malh malh a. Muthmuna titi hi nuam kan ti ṭhin. 

"Biteii tan pawisa i dah kha lachhuak la..pe mai rawh, nakinah an mangan tawpah te chuan kan la inbuaipui thei alawm" ka lo ti a. 

"Nia, râwn hmasak che ka duh deuh mawle. Naktukah keiman ka leisak ang ka tia" a ti a, "Rai ve tawh la ka ti" ka lo ti daih. 

"Kan inneihna a la rei loh êm hi.." a ti hlak a. 

"Baby ang kha chu ni ve suh aw" ka'n ti ngawt a. 

"Teuh lo,. Mahse, nau paite chu Pathian thu thu aw" a ti a. 

"I nu diktak kha a hmelṭha ngawt ang, i pa i chhun si lo va,." Ka lo tih leh chuan min sik hlak a, "Keipawn ka hmu ve châk khawp mai. Ka pa khan ka nu chhungte address chu min pe a, kan la tlawhchhuak ve ang chu.." a ti sar sar a. Inkuah dun rialin kan thaw dun sâk sâk mai. 

Pu Rinawma'n min rawn call a, "Lo phei teh u, Atea thattu kan hre tawh e" a rawn tih chuan kan phili hle. Sunday a ni hlauh a, Zonuni nen chuan kan phei leh ta vawn vawn. Kan va thlen chuan nelawm takin min lo dawngsawng a , kan ṭhut fel hnuah lehkha phek hlai lutuk lo, inziak khat dal hi min entir ta a ni. 

"Martina file an haina lama an hmuhchhuah, a pa hi mi fair tak a nih vanga min rawn pek a nih kha..chhiar u la, in hrethiam mai ang" a ti suam suam a. Lehkha chu kan bih dun ta vang vang. 

"He lehkha in hmuhchhuah hunah chuan kei chu mitthi ka ni tawh ngei ang. Min bumtu te thangkamah ka awk laklawh a, talchhuah ngaihna ka hriat tawh loh avangin he lehkha hi nakinah thudik puanzar a nih theih nan ka ziak ta ngawt mai a ni. Ngawlveite rûn-a ka awm lai hian chuta an hotupa ber Pu Dinpuia nen chuan kan inkawmngeihin, min duhsak ve hle mai a. Tikhan ṭha takin ka chhuak a, kan la inbe pawp zui zel ṭhin. Home-a ka awm lai khan ka nupui ni tawh mai tur ka phatsan avanga ka rilru hrehawm thinzia te ka hrilh ve thin a. Ka chhuahsan hnuah chuan Zonuni ka hmuh ngai leh ngai loh te min rawn zawt teh nawlh a, mak ka ti viau nghe nghe. Zonuni chu engtin tin emaw ka zawng chhuak a, pasal a lo la neih loh avangin ka ngaizawng leh ta hle. Mahse, bialpa nghet a nei tih ka hriat avangin ka bansan ta a ni. Ka tina tawk tawh a, hlim reng turin ka duh. Pu Dinpuia bawk chuan, Zonuni nau Atea chu kawmngeiha ṭhiana siam turin min rawn ti leh a, "Sum tam tak i hlawh theihna tur a nia" a tih chuan ngaihṭhat lohna ka nei ṭan tawh. Mahse, ka hna aṭanga min suspend lai a nih avangin pawisa kha ka mamawh si, Atea chu thianah ka siam ta thuai a. Sum ka pe thei bawk a, min ngaina ta hle. Tichuan, Ngawlveite rûnah a û-in a dah tih ka hre zui a, Pu Dinpuia bawkin min rawn hrilh. Ngawlveite rûna a luh hma khan Atea khan, "Ka nu leh pate diktak ka zawng chhuak ang a, zawnchhuah dan tur ka hre tawh. Ti reng chuan ka rethei lo vang" a ti ṭhin. Khang a thusawi zawng zawngte kha Pu Dinpuia duhdanin ka hrilh leh vek zel. Ngawlveite rûna a awm lai khan ka zuk kan a. Tah chuan, "Ka pa dik tak ka hre tawh. Ka û min lo biaksak la, min la chhuak rawh se" a ti a, engtin nge a pa chu a hriatchhuah dan a sawi duh lo. Mahse, a pa chu tu nge a nih a sawi duh miah lo. A û hrilh phawt a duh a ni. Mak ka ti viau nghe nghe. Chung kan inbiakna te chu Pu Dinpuia khan a lo ngaithla ve vek a, tichuan, "Atea lakchhuah dilna lehkha rawn ziahsak la, kan chhuahtir dawn nia. Tichuan, i tih leh zel tur ka rawn hrilh leh ang che" a ti a.A sawi ang chuan ka ti ta a, Atea pawh ka chungah a lawm kher mai. Mahse, a chhuah zanah khan, chhungkaw thil avangin Saituala ka zin thut a ngai a, Pu Dinpuia ruahmanna bawkin Atea chu, "I û chu hmu buai duh rih suh, a haw lutuk che a. Pawisa ka pe che ang a, khawiah emaw lo riak la, naktukah keimah nen i û kan va hmu dawn nia" tiin pawisa pawh ka pe a, a rui châk tawh bawk a. A û chu a va tlawh ta lo reng bawk. A tukah chuan an lo ruahman sa tawh, Tanhril ramhnuai thlam lamah kan inhruai thla ta a. Mi pahnih, chak hmel deuh deuh an lo awm sa. Anni chuan haw vang vang tura min hrilhin an sawi ang chuan ka hawnsan ta a. Ka ngaih erawh a ṭha tawh lo, mahse, engmah ka sawi ngam tawh si lo va. Kar khatna velah Pu Dinpuia bawkin min rawn be lehin Atea chu zuk hruaichhuak a, that turin min rawn ti ta a ni. Rapthlak ka ti a, tual êm thah chu ka ngam lo. Mahse, ka sum dawn tur chu Cheng nuai 5 lai a ni a, ka hna nei lo, pawisa mamawh bawk si chuan Atea chu that turin ka zu hruaichhuak leh ta a ni. An mi chhawrte thahtir lo va kei kher min tihtir khan chhan ṭha tak a nei. Ka kâ ka an mai an hlau a, an mi chhawrte hmel ka hrechiang bawk si. Pu Dinpuia lahin tual ka thah chuan ka kâ a hupbo hmak thei dawn a. Ka rin ang ngeiin Atea ka thah hnu lawk aṭangin vauna ka dawng zui nghal. Ka kâ ka ân vaih chuan Atea ka that tih Police beng a thlen nghal tur thu leh an hming ka sawirik ruala kei leh ka chhungte min thah chimih tur thu te nen lam. Mangang leh nunkhaw nuam lovin min siam a, ka sum ûmna lamah ka tlachhe ta vek zawk a ni. Ka mangang tawngkhawng chu Zonuni bulah ka inbunruak a, a thawitham tala eng emaw ka hrilh loh chuan ka inthiam thei ngang lo a ni. Heng ka sawi zawng zawngte hi dâwt a tel lo va, thudik tak vek an ni. Ka thi a nih chuan khang mite ngei khan ka nunna an la tih ka sawi duh e. A kaikuang ber, thu min petu ber chu Pu Dinpuia a ni.. " tih thu inziak kan han chhiar chu thâwk lak nachang pawh kan hre lo lek lek alawm le. 

"Martin leh.." Zonuni'n a ti chuai raih. 

"Tichuan, Sir..engtin nge?" Ka tih mek laiin call a dawng a, a la vat. 

"Eng a?! Hrep tak chuan leh! Min tlankhalh thiam hle mai maw.." a ti tûn tûn a. Kan lo melh ngawt ngawt ringawt. A phone chu dah thlain, beidawn hmel zet hian.."Dinpuia la turin ka naute an thang mek a, mahse, Dinpuia ruang an hmu.." a ti hniam ruih a. A mitmeng chu a rumin a hlauhawm kher mai. 

"Sir, Pu Dinpuia chunga la awm, a kaikuang ber hi Pu Saiṭhuama chi leh kuangte zing ami an nih ka ring.." ka ti ta tawl mai. 

"Kan en ang,. Police min tithangtlâwm bawk a, he thil titu ka manchhuah hunah chuan na lua awm lovin ka sawisa ang mawle.." a ti nghut nghut a. A ti duh tak takin ka ring. 

"Ka pa chhungte lam emaw ka nu chhungte lam emaw an ni ang. Ka nunna an la zuah hian chhan ṭha tak a nei ngei ang.." Zonuni'n a lo ti vawt raih a. Pu Rinawma nen pawh kan lo thaw hawk mai.