Parchuailovi 12

PARCHUAILOVI (12)

Ziaktu : Toni Râlte

Pu Saiṭhuama a rawn haw ta a, Zonuni nen hmuh leh ngei kan tum, a thusawi kha a chhumbung laklawh ve êm a ni. Ruatkima case pawh kha chhuichhuah hleihtheih a la ni ta chuang lo a niawm e. Tuman "Tûr kha ka dah a ni e" ti duh an awm si lo, rinhlelh an nei bawk si lo va. Ruata pawn han rinhlelh tur a hre rih bik lo, keimahni kaihhnawih tho a nih chu a ring ve a. Mahse, a sawi dawt ngam lo. Zonuni mitmei a veng te pawh a niang e. Inrinni chawhnu lamah Pu Saia chu hmuh kan tum ta a, an inbe fel vek tawh bawk. A fapa Hotelah min lo nghak dawn a niawm e. 

"Mawlhtu ka nei tawh lo ang a, ka nui leh thei tawh ang" Zonuni chuan a ti sar sar a. Kei tak pawn he thil hi fel vat se ka duh. Kei thlengin min nghawng lo thei si lo va. Ban veleh kan tlan haw nghal a, Jerry Hotel lam chu kan pan nghal. Kan va thlen chuan thil thleng eng emaw tak a awm tih hriat takin an lo phâwk hrû mai a, an che vel reng reng chu a dik lo. Zonuni nen pawh chuan kan lo thlir tawp ringawt, Reivakloah Hotel aṭang chuan tu emaw an rawn zawn chhuak a, Car pakhatah zawn lutin emergency tih hriat zetin an tlan chhuahpui ta vawn vawn mai. Eng nge maw thleng ta le?! Kan piah lawka lo thlir ve rengtu chu va panin, "Ṭhianpa, eng nge thleng a?" Ka ti ta thâwr a. 

"Pu Saiṭhuama lung ṭha lo a chhuak thut a, an kalpui a nih kha" a ti ta mai. Zonuni nen kan inmelh nghek ringawt. A va mak dawn ve aw. Engtin nge ni ta ang le? "Zosang, amah bawk a ni. Thudik ka hriat duh lotu bawk..he thil hi a rapthlak zozai tawh e.." a ti hmawk hmawk a. 

"Lawkin, heart attack te chu engtin nge midang tih a nih theih ang? I ngaihtuahna hi a nger lam i âwn tlat tawh a. Engkim a tha leh vek mai ang" ka ti ve a. Intihthawven nan zanriah ka kilpui ta bawk. Ani pawh hian hlim luiha boruak tihzangkhai hi a tum ve lutuk, mahse, mawlhtu leh kaptu a nei rûn reng a, chu chuan a hlim ve dawn pawn a rawn dal leh zel. Ka tihtheih sang ber ka ti tawhin ka hria a, han tihhlim leh vak dan ka hre hlawl lo. 

"Thuamchhawm tur pawh ka inlei zo thawkhat tawh chuan ka hria a, innei vat ila engkim hi fel vat se ka duh ta ber mai" a ti ve thlawt tawh. Keipawn chu chu ka duh ber a ni. Kan zanriah einaah Asanga leh hmeichhe pakhat ka la hmuh ngai loh an rawn lang ve hlawl mai a, kan inbe hlut mai. Ani hi a nupui ṭhen hlim khan Delhi-ah a zu zin ve vang vang a, a rawn hawna a la rei lo. A hranpa taka inbiak hi kan nei tam lem lo va, bakah Zonuni thiltawn avang hian midang ka ngaihven hleithei lo nen, Opa pawh a vui ve nuah nuah tawh. Asanga chuan a nula rawn kalpui chu min hmelhriattir a, "Puiteii a nih hi.." tiin. Puiteii chu a la upa lem lo tih a lang, a hmelṭhain a fresh kher mai. "I che rang hle mai" ka ti zauh a. Ka banbula rawn hnek uangin, "Sawi tur tam tak a awm. Hman hunah aw" a ti ve zauh a. An dawhkan lam min pansan. "Baby nen an inṭhen hlen tak tak dawn a nih hmel" Zonuni pawh chuan a ti ve a. 

"Ṭhen hlen rawh se, an sual êm mai" ka ti ringawt.. "inṭhen ve lovang aw" ka kut rawn vawn pahin a ti sap a, a nui sâng bawk. A va hmelṭha tak. 

"Ka ṭhen ngai lovang che" ka lo ti nghet ve ta charh a. Kan hawn meuh chuan dar 8 a ri vah tawh. Kan teikual ve leh bawk nen, a chauh deuh bawk avangin keipawh ka leng phei ta lo va. Hriatrenga a lo haw tawh a, Numami te inah a riak tawh lo. Ka nu chuan Pu Saithuama chungchangte chu min lo hrilh ve a, ka û pawh a bialnu pa a ni ve bawk a, a han kal ve a niawm e. Nikhua a la hre lo va, a thaw erawh a pangngai an ti. Ani hi a dam vat a ngai, Zonuni nen kan inkar thlenga nghawng thei thil hretu a ni tlat si a. Sunday a ni bawk a, phur takin ka inkhawm a, han piangthar hluai lo mah ila a hunah hi chuan Kohhran hi han bêl ve chawt zel ila a ṭha mai. Mak ve deuh chu mi mawl leh lehkhathiam lo, an bâwl kual mai mai nia kan ngaihte pawn Kohhran an han belha theihtawp an chhuah chuan tuman kan hmusitin kan tinawmnah ngam ngai miah lo, tin, Kohhran belh hi finna a ni bawk a, Inkhawm ngai mang lo ho hian khawtlang an hruai khât khawp mai, mi hian thlan tinah kan tin vak ngai lo a nih hmel. Ka han tlak ve duah a nih chu! Kan inneih tur vel te an lo hre ve hlawm tawh nen, "Inru pawh in ni mang si lo va, in lo puklawk zawk em ni?" Min ti chawt chawt lah an tam. Biak in hawng lova kan innei tur an lo helh ve te pawh a niang e. Zonuni pawh a rawn nalh leh hle, simple tak, zahawm deuha inchei a thiam ṭhin. Numami pawh a teichhuak ve ṭan tawh a, a kal bai ve deuh. Inkhawm banah ka peng leh a, thingpui a lum rak rak. 

"Biteii hi a ngaihawm riau mai. Leng turte hian ti ve thin ta che. " Ka ti a. An inneih hnuah vawi 2 bak a lo la kal pawh ka hre lo. "A buai ve lutuk a, chaw eiah ka sawm alawm, zanin tlaiah an pa nen an rawn ei dawn. Rawn ei ve rawh aw" a ti nghal siam siam a. 

"Ringawt a" ka ti hluk. 

"Vawksa pawh ka lei tho alawm. " A ti mai a. Kan chhungkua hian vawksa hi kan duh viau mai a, sa dang hi chu kan lei khât khawp mai, Zonuni a rawn awm hunah chuan a eitur bik lei kep ve zel a ngai tawh ang. Mahse, sa hi a heh lem lo. Ka kamiz phelhin tawnzau nen ka awm tung a, a lum ve deuh bawk nen. "Pu Saia chu naktukah kan ve ila" inthlahrun hmel tak hian a ti a. 

"Nia, kan hman chuan" ka ti mai a. 

"A upa ve tawh sia, a thi ang tih ka hlau lutuk, nizanah pawh ka ṭawngṭaipui nasa alawm" a ti mawlh mawlh a. 

"Ka u-in, 'Pu Saia saw Zonuni pa a nih ka ring' a tia. Mahse, ni theiin ka hre si lo" ka tih chuan a nui hak a.."I û hi chu aw.." a ti ringawt. 

"Hlupuii hi a neih hmel sia, in mo dun dawn chu a nia. I hrawn hreh em?" Ka'n ti deuh thâwr a. A huphurh ang tih ka hlauh vang a ni. Nula fing tih takah, "Hreh tehnang, a fel êm kha..a induh ve si lo" a ti mai a. An dinhmun a inthlauh em vangin eng emaw tak zawng chuan a huphurh tho ka ring. Biteii a rawn thleng ta. Amah chauha a nih avangin khaw nge an pa tiin kan lo zawt a. A pum pawh a puar ve tawh. Ṭhut chawrh pah hian, "Thanzova ten zu in puiah an sawm a, a zui leh ringawt a nih kha. Chaw ei hmain ka rawn thleng ang a ti" a ti nghat nghat a. A lawm lo hle tih a lang. 

"A in tawh lo emaw ka tia" a ûin a tih chuan, "A hnathawk a hah zual chang hian no 2 khat te a lem ve ṭhin a, a reng chuan a in chuang lo. Thana te khan an sawm tlat a, ka ngeizia hi a " a ti leh buan buan a. 

"Chaw a rawn ei hman tho dawn chu..i ngaihawm vung vung lutuk a. I reh si" ka lo ti ve a. Tlema hlim hmel leh deuhin, "Nang pawh i ngaihawm. Mite pawh rawn tlawh ve ṭhin tur che a nia, A û bak i buaipui thei lo a nih hi.." a ti sar sar a. Zonuni nen kan innuih sak. 

A û chuan, "In nupa inkar a tha zel maw? Kha i puar lian ve tawh angreng sia, i awl ve deuh tawh em?" A ti a. 

Thawk la hawkin, "Zep loh chuan hrehawm chu ka ti ve thin khawp mai. Ka chet ngaiin ka la che reng, hmanni phei chu ka kawng a na lutuk a, inthlahrung chung chungin ka mu ve a. Ruata u, U Sangi leh a fate an rawn leng a, ka nu bulah min rêl char char, ka hre vek sia. Ka rilru a na ve lutuk a. Ka nu leh pate tak saw chu an sual lo, ka nu saw chu a theih chinah âwl ve zel ka tum a, amah a hrisel lo bawk nen. Mahse, U Sangi leh Nuni te saw an sual. Nuni sawn pasal nei vat se ka ti lutuk.." a ti ta mawlh mawlh a. 

"Nuni saw Singapore-ah a awm leh dawn an ti maw ka tia" Zonuni chuan a lo ti a. Nuni chu Ruata chhang chiah a ni. An farnu awmchhun a ni tawh bawk. A intilal ve deuh a ni maithei. "Ka pa te pawn kal leh turin an ti reng alawm, a duh tawh lo a niang. Engmah tih a tum ve bawk si lo, a tho tlai thei si. Engkim zawng zawng ka tih turah a ngai a, ka nu zawk saw a inthlahrung a niang, Biteii a rai lian tawh a, âwl ve rawh. Chaw eina sengfel leh thleng sil tal te hi chu ti ve rawh..a ti ṭhin. A tum chuang lo. Nilêng hian ka che a ni tawp mai, insuk tur a tam thei si, U Sangi lah saw a rawn leng reng a, min tir zet zet reng a, a fate thawmhnaw te hi ka suk tur ten a rawn keng thin mawle. Mahse, U Chhuana'n a khak fawk a, a ngam tawh lo a niang. Min hmumawh ve hrim hrim niin ka hria. Ruata bulah hian ka vui ngai lo va, mahse, ka nawmsam loh nîa min rel hrep vel chu ka hrilh ve a. A thinrim ve lutuk, ka la hau ang a tia. Mahse, a hauh chuan ka chungah bawk a ṭuan ka hlau sia, ka khap alawm. Tunah hian mistiri a ni ve thei ṭêp tawh a, 'Ka mistiri veleh kan in dang daih dawn nia. Kan nghei bik lo vang' a tia. Ka thla a timuang ve tawp. " A ti leh melh melh a. A la naupan nen a chhel reuh ngawt mai. Hmeichhia hi an lo sual a ni, Mo leh pasala nu leh farnu te an buai a, hmeichhia vek an ni. Inhrethiam tawna inkhawngaih tur zawk an nih lai hian sual an chhuah tlat zel. Mipa hi chu kan awm ve tawp a, han sawisel leh i kan nei ngai lem lo. Hmeichhia te inenfiah in ngai hle mai. 

Zonuni pawn, "Ruata a taima a, inhlawhna a hmu ve reng bawk nen, nang lah awmhmunah i sumdawng thiam bawk a, in rethei bik lo vang. " A ti ve a,. Biteii tan hian sum eng emaw zat a dah ṭha khiau a, amah Biteii erawh a hrilh duh rih lo. Nakinah mangan tâwp te pawh a awm thei a, chutiang hun atana an hman ve a tan a ti a ni. "Kuhva leh meizial pawh ka chawl rih. Ka vung nasa bawk sia. Tuman min puih an tum bawk si lo nen,. Ka zawrh laia ka hralhna te hi chawhmeh lei nan te ka hmang ve a, mahse, a rukin ka khawl ve tho. Ka nu ka pe zel bawk a, kan nupa mamawh lei nan ka la dah ṭha ve..tam phei chu a ni lo va" Biteii chuan a ti leh siam siam a. Hmeichhia an sual ti mah ila, chhel kawngah erawh mipa hian kan tluk meuh lo a ang viau. 

Ruata pawh a rawn thleng hma phian a. A inthlahrung lutuk chu ka lo khawngaih zawk. Zonuni a fing fel êm a, a lo be tlangnel thiam hle. Zu rim pawh a nam ve ngei kha..zanriah chu hlim takin kan ei tlang ta a. 

A tukah hna ngai bawk. A chang chuan ka hne thut zel, ka eizawnna a ni ve miau bawk sia. Pu Rinawma'n min rawn bia a, Zonuni rawn vautu phone number kha Pi Zasangi hminga book a niawm e. Pi Zasangi chu Thenzawl lam mi daih a la ni zui a! A phone an ruksak a nih hmel. Tunah phei chuan kha number kha kan call tlang thei tawh lo hrim hrim. An paih bo daih tawh a nih hmel. A rawn vau leh tawh lo bawk a, kan lo ngaihven zui ta vak lo a ni. "Ngawlveite rûn lam khu sawi chat tur hre si loin ka ringhlel riau. A thawkte zawng zawng khu chuan engmah an hriat ka ring lo va, a hotu deuh chin ho khuan eng emaw zep chu an nei a ni. Lo dawhthei u la, kan thleng thui viau tawh a nia. Zonuni kha lo enkawl ṭha hle rawh, fimkhur bawk u la" a ti dap dap a. A ngaihṭhatthlak ṭhin e. Ngawlveite rûn-a an Director hi Alpha Ministry-a an khaipa ber Pu Dinsang a ni a. Mi ṭha leh fel tak a ni. Ani êm han rinhlelh chu harsa ka la ti deuh. In chung lamah an ri deuh laih mai a, an tlan khup khup bawk si, hâwkdak ta ngang chu ka lîm chho ve nghal a, Damlo enkawlna room-ah an lo awmkhawm laih. Pi Zahnûni, kum 96, Chaltlang ami chu thawktir tumin an lo buaipui laih laih mai a. Mahse, an hlawhchham chiang hle. Ani hi kum hmasa aṭanga heta admit tawh a ni ve a, tar thinchhe ve deuh, khawvel ning hluah hluah niawm taka ṭawng ṭhin, tar dangte pawn an nêl hleihtheih loh a ni. Nurse te hi a vin nasa thin a, Zonuni hian a deal thiam ber an ti thin. Kar hmasa nilai vel aṭang khan a hritlang âwmna a, Damdawi ina dah ngai khawpa serious erawh a ni lo. An upa tawh a, a behpui ve a ni mai. Tin, lung lam chiang lo a nih avangin, lung damdawi hi nitin dar 2-ah a ei thin. Zonuni ten an vil reng a, ka sawi duh leh lawk chu heta an inenkawlna senso hi an chhung ten a hranin an pe leh ṭhin. A zia tawh viau khan ka lo hria a nia. Tunah a thi ta thut si! Ka thawh ve aṭanga he lai hmun aṭanga ruang a chhuah vawikhatna a niawm e. 

Male nurse Zotea chuan, Zonuni kawkin, "Nangmah vang a nih hi. Nangmah vang vek, i that a nih hi" a ti ta phiar phiar mai. Mak tiin kan melh ṭhap hlawm a, Zonuni chuan chiâi miah loin, "Ka that lo. Tuin nge that che u. " Tiin Teteii nen a melh tawn ta sek mai. Teteii chuan, "Ka that lo chiang khawp mai, nangman i vil ngun ber a, nangmah bak rinhlelh tur an awm lo. I hmabak a thim ve khawp ang" a lo ti khawl khawl mai. Teteii hi tunhnaiah a zia a dangin chhun chawlhah pawh kan rualin a rawn chawl tawh mang lo, Zotea nen an inzui nasa a, Kan biak erawhin ṭha tak chuan min chhang tho. A ze danglam thut chu Zonuni nen pawh kan sawidun nghe nghe tawh. 

"Ka damlo enkawl lai tihlum tur khawpa nurse nunrâwng ka ni lo" Zonuni'n a ti chang rât. Dik tak chuan hetah tar hote intihlim tur leh enkawlna ṭha zawk dawng turin an chhungten an rawn dah a nia, hetianga ruang hial a chhuah chuan mipuite rilru a danglam dâwrh thei tlat. Chu chu hotu lamte pawn an vengthawng a, an fimkhur hle reng bawk. 

"Eng nge a awmzia?" Zorema a rawn lut ve hlawl. Zotea chu tuai deuh tih takah a lo ṭawng zawt zawt a. "Pi Hnûni enkawltu ber chu Zonunpari a nia, tukin zingah pawh Pi Hnuni hi a la ṭha lutuk, a hritlang awmna pawh a zia tawh lutuk. Chuan, chhun chawlh dawn khan Zonuni chuan 'Eitur ka zu laksak ang che aw' a tia. Pi Hnuni hian, "Nang uichonu kha kalbo rawh. Ka hmu ning che. In damdawi min pek pawh hi ka ei tawh dawn lo. " A ti hrep a. Zonunpari hian phuba lak nan lung damdawi aiah damdawi dang hmangin a chiu hlum ta a ni " tiin. Ka va hnek châk e aw, zawt zawt a. Dakthei ropui si. Zorema chuan khauh zet hian, "A dik em?" Tiin Zonuni a melh a. Hmelhmai danglam eih lo hian, "Dik lo. Ka that lo, Damdawi chu ka pe ngei, lung damdawi ngei a ni bawk. " a lo ti dam thlap a. 

"Khaw maw damdawi chu?" Zorema chuan ti lehin bur lian vak lo an inpe a. Lung damdawi ngei chu a ni. Damdawi mum var te taktê te chu a bun chhuak a, "Hei hi lung damdawi chu a ni si lo va maw?" Bo hmel zet hian a ti hû. Teteii chuan, "Ni e, mahse kha damdawi kha pe loin, damlo thi mai tawh tur te hahdam taka an thih theih nana an chiu luh ṭhin hmangin a chiu hlum ta zawk a ni, hei chu damdawi bur leh syringe pawh dustbin-ah a awm khiau hi, ani lo midang an ni thei lo hrim hrim . " A lo ti bawrh bawrh a. Hmana Teteii, mi hlim thei leh ngainatawm tak kha a ni ta hauh lo. Zonuni chuan, "Ka chiu miah lo, a taksa kha dap rawh u, chiuna hnuhma a awm leh awm loh chu" a lo ti khauh ve fan a. An han dap ngial a, Zotea zet zawt bawk chuan, Pi Hnuni nghawnga chiuna hnuhma niawm tak chu a hmu leh ta hlauh mai, "Hei, a chiang e tikhan. " Tifuh intih hmel zet hian a ti a. Thawh lawka chhipthlak bur ka chak ngei mai. Zonuni erawh mangang hmel leh zâm hmel a pu lo. Zorema chuan, "Police ka'n call ang e" tiin a phone a phawrh ta. Ka bula ding Fela ta pek chuan kan pahnih hriat phak lek hian, "Pitar sual leh ancheh lutuk, a chhungte pawn an nin vanga heta an lo dah, chutia ngaihhlut em em..a lung ṭha lo a thihpui tih mai kha a tawk viau asin le" a ti sup sup a. Kei erawh ka ngawi reng. Zonunpari hian tual a that dawn lo tih hrechiangtu ka ni a, a damlo enkawl lai a thah hi ka ring therte lo. Police a biak zawhah, "Ruang kha lo la khawih danglam lo mai rawh u. Zonun, ka office-ah min rawn hmu rawh" Zorema chuan a ti nghut nghut a, Lung damdawi pawh kha a keng chhuak nghal. Chutiang chuan thil dang tihzai pawh rel hleithei lovin police chu kan lo nghak ta vang vang a. Zonuni tan a pawi thui thei viau ang em tih ka ngaihtuah rauh rauh. He thilah hian eng emaw inthup chu a awm chiang a ni. Damdawi bur ruak leh syringe kha a awm ve kher bawk si a, Zonuni tih ni lo ta se, tuin nge kha pitar kha that ringawt ta ang? A thih avanga hlawkna dawn tur a awm dawn em ni? Zonuni tal awhtir nana tu emaw thangkam a ni mai lo maw? Zonuni hian tihlum duh se, khatianga a chet ngai lovin Lukham pawn a up hlum daih thei. Inphiarrukna chu a awm chiang e. Fela te pawn an sawi mam mam a, Ropuia pawn Zonuni tih a nih a rin loh thu a sawi ve nasa. Anni nen hian kan innêl tawh viau hlawm a, Zonuni nen kan inneih tur thu hre hmasa pawl an ni nghe nghe. 

Police pawh an rawn thleng ta, ruang chu an han endik a, a nghawnga chiuna hnuhma pawh an en ngun khawp mai. Damdwi bur ruak leh Syringe pawh chu fingerprint lak a ngaih avangin an la a. Zonuni an biak dawn chuan luh ve ka dil tawp mai,. A pasal hual ka ni bawk a, min phalsak ve mai. 

"Engtik nge Pitar saw i hmuh hnuhnun ber? Vawiina in inenkawl dan han sawi teh" police chuan a ti leh a. 

"Englai pawha mood fuh lo reng thin a nih avangin kei chuan ngaiah ka nei tawh a. Chhun chawlh thleng kha chuan engkim a la pangngai. Ṭawngkam chhe pui puiin min ankhum thin mah se; ka enkawl duh loh phah ngai lo. Dar 2-ah a lung damdawi kan eitir ziah ṭhin a, keipawh pe turin ka va kal leh. A khum bul dawhkanah hian a damdawi hi kan dah mai zel. Damdawi chu ka eitir a, "Ka mut a chhuak a nia, min rawn tiharh tawh suh" a ti nghe nghe. Ka kalsan ve leh mai a, Darkar chanve hnu velah Zotea a rawn au ta tuar tuar a, a BP check tur khan Pi Hnuni chu a lo kaitho zo lo a lo ni. Kan inbawihsawm laiin Teteii khan a lung damdawi ka pek leh pek loh min zawt a, ka pek thu ka sawi. Ṭhat lohna engmah nei lo, chutia a thi ringawt chu mak kan ti viau a, lung ṭha lo ni mah se; thihpui nghal mai theih tur khawpa serious a ni lo, Zotea khan bawlhhlawh bawma syringe leh damdawi bur ruak kha a hmu ta a, i chiu hlum tiin min ringhlel nghal ta ngawt mai a ni. " A ti dap dap a. A zâm lo lutuk leh bahlah hauh lo va a sawi theih avang chuan ka thaw huai mai. Ka lo insangmar nasa ve êm a ni. 

"A lung damdawi i pek zawh hnuah vawikhatmah i va hmu leh tawh lo maw?" Police chuan a ti leh a. 

"Aw lut tawh miah lo. Pu Ramhluta ruh chuktuah nâ ka hmehsak, Aw..Pu Rama'n ka chhuak miah lo tih a hre ngei ang. " Phur zet hian a ti ta hluai a. Ka lawm takzet. Pu Rama chu an ko ta vat a, tiang nen a rawn kal ṭuih ṭuih mai. An han zawt vel a, "Ka muhil daih a, a chhuah leh chhuah loh ka hre miah lo" a ti ve leh ta tlat. Ani hi kum 75 vel tur, la tar chhe lo tak a ni a, a ruhseh a nei ve a, hmehsak a ngai ve fo zel. "I muthilh loh kha, 30 mins chhung khan i muhil miah lo, kan titi a, in chhungkaw chanchin te pawh i sawi nasat kha le.." Zonuni chuan a ti ta fak fak a. Pu Rama chuan, "Sawi e, mahse, a hnuah ka muthlu daih alawm" a ti tlat. Police te chuan Zotea leh Teteii te an ko ve leh a, "Engtin nge bawlhhlawh bawmah khan damdawi leh syringe a awm tih i hriat? Mitthi sawngbawl laia bawlhhlawh bawm i va en daih chhan eng nge ni?" Tiin Zotea chu an zawt ve ta a. 

"Englo a nia, sikhar ka hmuam a, khatia kan han inbuaipui lai khan a tui ka lem palh a, ka sikhar chhak turin ka va hmu ta a ni" a ti a. A meng zek zek reuh a, ka ringhlel tlat. Teteii nen chuan dar 2 hnu lama an awmna an zawt ve leh a. 

"Ka nawmsam loh deuh avangin duty roomah ka tlu zâl a, mahse, ka lo muhil zui daih a, Zotea au thawm khan min tiharh ta a ni" Teteii chuan a ti a. 

Zotea ve thung chuan, "In chungah pitar thenkhat te nen kan awm. Chuan BP check a hun khan ka chhuk " a ti a. In chunga pitar awm ve te hming pawh a sawi dan dan a, anni pawh an va zawt ve leh, "Aw a awm ve alwm. A bialnu a bia nge ni? Phone a hmang reng a" tiin an lo chhang. Teteii chu duty roomah a mu ngei tih hriatpuitu an awm lo thung,. Mahse, Zonuni rilru thatzia chu, "Ka lu a na lutuk, ka'n tluzâl lawk" tiin ka bulah chuan a sawi ngei alawm" tiin Teteii chu a tanpui ta hlauh a. A buaithlak ta hle mai,. Zonuni pawh chu Police lamin an ringhlel lutuk loin ka hria. A inringtawk em mai a, chuvangte pawh chu a ni mahna le. 

Mahse, Zorema aia la thu zawk ti mai ang, Pu Saiṭhuama aiawhtu ber Pu Muanthanga chuan, Zonuni chu ban a nih thu a hrilh ta hmak mai le. Zorema pawn hrehawm a ti ve hle, a han sawipui ngial paw'n, "Rinhlelh mêk a ni a, engtin nge damlo enkawl turin kan rinngam tawh ang" a ti mauh mai si. Zonuni erawh chuan rilru na hmel pawh a pu lo va, "Ka tan a nuam zui tawh dawn chuang lo. A pawi lo, kan innei ṭêp tawh tho" a ti hmiah thei. Mahse, an ban chhanah hian ka lungawi lo thung. Police pawn Zonuni an kâwh miah loh laiin amah chauh ban a ni bik chu ka lawm lo takzet. Pu Muanthanga pawh ka be ve ngat a, "Ani chauh i bantir hi chu a fair lo khawp mai. Teteii leh Zotea te kha engvanga ringhlel lo nge i nih?" Ka ti sak sak mai. 

"Nang pawn ban i duh chuan i rawn thehlut thei reng e" a ti chang fak a, "Banna ka thehlut lo tawp ang. Nakinah ka ban ngei ngei theihna tur thang an kam leh mai ang.." ka ti hul hak a, ka chhuahsan zui nghal. Zonuni zawkin min hnem a, "Tualthattu diktak an hriatchhuah hunah ngaihdam min dil ngei ngei ang" a ti a. Kha pitar ânchhe lutuk vang vek kha a ni. 

Ka chhungte pawn an hre ve a, Zonuni an lainat hle. Social media lamah pawh Pi Zahnuni thih dan chu an tarlang chei chuai a, sawi a tamin zeldin thubawl lah a tam. Zonuni hmingte pawh a ri ta hial a! A ṭhen chuan Zonuni thah ngei a nih an rin thu an sawi pûng pûng a, hmuh ve reng chuan thin a rim duh khawp mai. Home lam pawh an mualphoin, "Tar enkawlna ni loin, Tar dah thatna a nih hi..in nu leh pa, pi leh pute kha dah ve reng reng suh u " tih angreng ten an vawm zui chiam bawk. Mizo te hi zawng a hniak tam lam kan zui dul dûl a, mi thinrim ruala thinrim ve em em thei, mi dem rawn chu dema diriam chiam thei, mi fak rawn pawh sual kai lo ang hiala faka tlawn ching hi kan tam khawp mai. He kan ze nghet lo leh dazât zet hian hnam inpumkhatna thlengin a nghawng tel ka ti lo thei lo. Social mediaah kan huaiin kan âng pûng pûng a, kan nihna dik tak thup boin a hre ber, a fel ber, a piangthar ber leh fing ber niawm takin kan awm a, kan lemchanna tualzawlah lemchang leh lemchang kan inpel ta suau suau chu a nih hi. Zonuni erawh chuan a ngaihven ve lem lo,. Engahmah a ngai lo a ni ber. Keimah chauhin hnaah pawh ka kal ta rak rak a, nitina ka hnunga ṭhu ṭhin tel lo chuan a ruak vek mai. 

Pu Saiṭhuama pawh a harh ṭan tih thawmte kan lo hre ve a, Ka û pawn a tlawh zauh zauh. A la â ruai a, a la ṭawng miah lo bawk. Enkawlna a dawng ṭha bawk a, a ṭhat chhuah vat theih beisei ang. Zonuni pawh a chawlh tak avang leh hnathawh tur a la hmuh mai loh avangin a awm deuh tawp mai. Sum a lo khawl ve ṭin ṭên bawk a, a buai bik lo. Inneih ni pawh kan hnaih ve zel a, ka pindan pawh kan singsa chho mêk. Kan Home-a Pi Zahnuni thihna pawh chhui zel a ni naa, an chhui chhuak hleithei lo. Zonuni pawh an ko zing malh malh viau,. Rinliani a rawn haw hlawl mai a, Pa Tlana'n a lo hnawtchhuak nghal hmiah. Kan inah a rawn tlu lut a, ka nute tan lo hnar kha nuam hek lo. Thin a rim ṭûn reng mai. A pian erawh a rawn nalh haw fû mai, min ngaizawng ang chuan a awm tawh lo va. Mahse, a hnawk tho, ka be vak lo a,ani pawn min enliam ve deuh tawp. Mikhual pindanah a awm ve a, ka nî inthlahrung hi a rawn kal zut zel a, Pa Tlana rilru hneh tura theihtawp a chhuah tur thu leh lo nghak hram hram turin ka nute chu a'n ngen leh ngawt ṭhin. Ka nu laka a inthlahrung lutuk chu ka khawngaih letling. Pa Tlana pawh a timak ve hrim hrim, fanu pahnih a nei a, engtin pawn lo khawloin lo sual deuh pawh nise fate na nâ na chu nu leh pa ten an ensan hlen thei ngai lo. Mahse, Pa Tlana chuan ka nî rawn kal ṭhin pawh a khak a niawm e. Rinliani pawn, "Amah vanga hetia nun hmang hi ka nia sin. Amah saw ka nun tichhetu a nih saw, a tluang bik lo vang" a ti ve ṭhin. Engtin tak awm zel ang maw..

Pu Saiṭhuama a chhuak tawh tih ka û ka aṭangin ka hre ta a, Zonuni ka hrilh ta vat. Ka hman remchan veleh va leng turin thutlukna kan siam a, inneih a hnai zel si, buaina tur awm theite chu chinfel zel ka duh. Hnathawka ka bur ngur ngur laiin Police an rawn lut huk mai. Pi Hnuni case chungchang bawk a nih hmel. In chungah chhoin ka rin loh deuhin Teteii leh Zotea te an rawn chhawm thla leh a. Zorema'n thil awmzia a lo zawt vat. "An pathumin station lamah kan hruai lawk dawn, Zonunpari pawh kan nauten an la mek e" an ti a. Ka phâwk hle. Teteii chu a âng tân tân a, Zotea pawn, "Min manna chhan tur in nei lo. Engmah kan ti lo" a ti pûng pûng mai. Mahse, an in hruai lui ta tho va. Zonuni ka call nghal, midangin an lo la a, "Police stationah kan hruai a. A biak theih rih loh" a ti. Ka ngaihtuah rilru ta hle. Mahse, finfiahna hmuh a nih loh chuan tantir ngawt theih a ni dawn chuang lo. Pu Rinawma'n min lo bia a, Zonuni an man tih pawh a lo hre ve tawh. "Thil pakhat chu kan hmuchhuak tawh e. Zonuam guest house- cctv footage kha uluk zawkin kan han zirchiang a, dar 6 velah khan Zonuni ina mipa kal nena intiat tak, mask vuah tho a lut a. Thawktu te kan han zawt chiang a, an guest house neitu te fapa a nih thu leh manager anga a awm thu an sawi a. Martina thih hnu ni 2-ah training tenau nei turin phaiah a zin a, Zonuni vau a nih lai kha chuan rawn haw leh tawhin tunah chuan Guest house lamah a thawk tawh rih lo aniawm e. Vawiin tlaiah kan va hmu ang" a rawn ti charh charh a. Hma kan sawn ve zel e. 

"Tin, Ngawlveite rûn lamah pawh enthlatu kan dah dawn a, kan nau pakhat a involunteer a, engkim hi haichhuah vek kan tum..lo lungkham suh u" a rawn ti leh a,. "A va lawmawm êm. " Ka lo ti chul. 

Fela a rawn kal a, Teteii an lak chungchang kan sawi dun a, "Kei chu an pathum hian an nih ka ring lo vek. Tualthat ngam khawpin an huaisen lovang. Mi dang daih, heta thawk tho si hi an nih ka ring" a ti a. Keipawh ka rindan a ni ve tho mai. "Keipawh ka rindan a ni. Mahse, han kawh chat tur ka hre mai si lo" ka ti ve a. 

Hawn pahin Police station-ah chuan ka peng kawi ta a, mahse, Zonuni te chu hmuh min phalsak lo. Thu an inzawh mêk lai a lo nia. Kut an thlak ang tihte ka hlau, ka khawngaih dawn si a. Mahse, vau zam mai mai theih tur khawpa derthawng a ni lo. Tihtheih nei hek lo ka hawnsan ta ngawt a. Khaw thim hmaa an chhuah tur thu erawh an sawi kha. Ka nu te bula ka sawi chuan a phili leh hle..Rinliani'n, "Phiarrutu a nei a nih ka ring. In sawi hmangah a tir phat aṭangin tu emaw hian a tal awh nan thang a kam char char niin ka hria" a lo ti ve a. Ka thaw hawk. 

Ka û pawn, "A mimal nun hnawk tak vang pawh kha a ni thei ang. Zonuni hnawk ti an awm a ni" a ti ve charh charh a. Sawi tur pawh ka hre lo. Ka hne lek lek tawh, thil a kal zel a, a hnawk tulh tulh bawk si. Police lah an che muang bawk si, ka duhkhawp hlawl lo. 

Zonuni'n khaw thim hnuah min rawn call a, a chhuah tawh thu leh phei turin min rawn ti a. Keipawh ka phei nghal,. Chaw a lo ei mek a, ka khawngaih ṭhin, amah chauhin a awm bawk si, dawngsawngtu pawh nei lovin tihian amah leh amah a inbuaipui tawp zel a, lainatawm tak a ni. Police ho nen an inbiak dan te chu a sawi ve siam siam a, kut man a awm loh bakah thahna chhan tur a neih loh miau avangin chhanna ngai reng a pe a. An kaltir ta mai. Teteii leh Zotea te erawh chuan amah Zonuni an rinhlelh thu an la sawi ngat ngat,. An tenawm dun mang e. Anmahni avangin a hna aṭanga ban a nia, duhtawk ve tawh mai âwm. Hriatrenga lo chhuk hnu lawkah ka hawnsan ta a. Inneihna tur kar khat chauhin a dang ta. Keini lam pawh kan inpeih thawkhat tawh viau,. Zonuni in a zim deuh avangin pa zawn atana a hman Pu Zamawia te inah engkim buatsaih tur a ni. Pu Rinawma te nen pawh inbe lehin Guest house enkawltu te fapa Sangliana an tih mai chu an va kawm ta ngei a, "Martina kha ka mi hriatchian ve tak a ni a, house-ah hian a rawn kal ve reng reng zel bawk a. Khami zan pawh khan kan titi leh luam,. Mahse, tikhan a hnu reiloteah a ruang kan hmu ta mai sia, mak ka ti khawp mai. Mikhual pahnih awm ve te lahin an room an chhuahsan loh bakah Martina pawh an hre ngai lo a, hnathawkte lahin Martina chu an ngainain an inhre sa vek tawh bawk si. Kei pawhin kha thil titu kha hriat ka châk lutuk asin. Kan tan pawh a mualphothlak ve a.." tiin a lo chhang a niawm e. A beidawnthlak ṭhin viau. Keipawn an case lam chu ka ngaihven rih ta vak lo, nupui nei mai tur ka nia, kha lamah khan rilru pek ve a ngai tawh. Asanga ka dinpui dawn a, Opa ka han ti deuh naa, "Pathlawi tharlam a awm alawm, kei chu pa ka ni tawh sia" tiin Asanga a hnawn tlat. Zonuni pawn Numami a dinpui ve dawn bawk. Keipawn chawlh ka dil a, Zorema zarah min phalsak ve ta hlauh. Ka chawlh chhung chu ka ai a lo awh rih mai dawn a ni. Mo kawr en turin kan chhuak a, Kan hlim tlang ve hle. Zonuni'n mo kawr, simple taka ṭhui a han ha zân mai chu en nin a har ngei mai. A pian hi a lo nalh viau. Asanga pawn, "Ka lo chîk ngai lo va, in nu hi a lo chhe lo reuh hle mai.." a ti ru sur sur mai. Ka sawi hmaih pakhat chu Asanga leh Baby te inthen hnu reivakloah khan Baby chuan a naupai kha a chhiat daih a, Asanga eraeh chuan, "A chhiat lovang. A titla a nih saw" thinrim takin a ti thung. Mahse, sawi zui loin tiang hian an inṭha ṭhen ta vang vang mai a ni. Baby pawn bialpa thar a nei ve leh tawh a niawm e. Fa a la nei lo bawk a, pasal ṭha tak a la hmu ve leh mai ang chu, a zeihawi bawk a. 

"Inneih hma hian Pu Saia chu va hmuh leh ka duh a. Amah pawh ka be tawh. Min kalpui leh la" Zonuni chuan a ti sar sar a, "Nia, engtikah nge ?" Ka tih chuan, "Naktuk tlai dar 3 leh 4 inkarah hun a nei dawn a niawm e." Phur takin a ti a. 

"Thudik i hre thei ṭêp tawh e.." tiin ka nuih suk a. 

"Nia, engvanga midang kuta min hlan nge an nih tih hi ka hriat châk ber a ni" a ti leh vang vang. Mahni fa hrin, midang kuta dah hi nunrawnthlak viau angin lang mah se; thenkhat chu awihawm loh khawpa dinhmun chhia an ni a, rethei taka fate seilentir ai chuan tia an nawmsak theih nana midang kuta dah te an ni ve nawk hlawm mai. Engpawhnise, anmahni kan nih ve loha an dinhmun anga kan din ve phawt loh chuan indema insêl chiam loh hi a tha ber mai ka ti. 

A tuk tlaiah chuan Pu Saia te in lam pan chuan kan tlan leh ta vûk vûk a. Kan helhhawlh dun hlein ka hria. An nula bawk khan min lo dawngsawng lehin kan kal tur thu a lo hre sa a niang, min luhtir ta vat a. A pindanah min hruai nghal bawk. Pu Saia chu a lo mu a, a la chauh hmel angreng. Nurse pakhat hian a lo vil ran bawk. An nula hnenah chuan, "I pi chu a chhuak tawh em?" Pu Saia chuan a lo ti a. 

"Aw chhuak tawh e" a lo ti var, Pu Saia nupui kha a nih hmel. "A ṭhat chu, a hriat ve loh ka duh a. Chuan, Zuali, thil sawiho lawk a ngai a, min lo va chhuahsan rih teh aw. Hei ka ṭhat hi" a ti leh a, nurse pawh bu nghatin a chhuak zui. An nula bawk khan keini chu min rawn enin, "In tur in duh dawn em? " A ti sap a. "Duh lo ve, kan lawm e" ka lo ti vat. A pu melh leh zauhin min chhuahsan ve ta nghal a. Khum bul chairah chuan kan ṭhu a, kan inring tawh kher mai. Pu Saia chuan a aw thian kharh kharhin, "Zonunpari hi i pianpui hming a ni lo. I hming diktak chu Parchuailovi a ni. " A'n ti tê tê a. Zonuni nen kan inmelh zauh. Thil mak em em chu a la ni lo. 

Chiang zeta Zonuni melhin, "I nu chu a thi tawh. I pa chu i hmaa ṭhu keimah hi ka ni" a ti dam ta thlup a.