Parchuailovi 11

PARCHUAILOVI..(11)

Ziaktu : Toni Râlte

Chuta thu inziak chu pentui sen ngata ziah a ni nghe nghe. Hawrawppuia ziah a ni bawk. Ka ak bo ta daih a, Zonuni'n a hmuh ka remti lo. A hlauhthawnna a zual dawn chiang. Tikhan Zonuni hian umzuitu chu a nei tih a chiang ta phawt a, a lo hlauhthawnna te kha a tider lo tih pawh a chiang. Police hmuh vat vat ka duh avangin zing karah Police station ka pan ta a, Zonuni hriat ve ka duh bawk si loh avangin zingkar bak hun ka nei tlat lo. Case IO a lo la awm lo zui! Pu Rinawma naute zinga pakhat bulah lehkha chu entirin Zonuni kawngka bula a lo awm thu te chu ka sawi zung zung a. IO a awm veleh keimaha hmuh ka duh thu ka chah bawk. Tihngaihna vak awm rih hek lo, ka haw thla leh ta phawt a. Ngaihtuahna tam tak ka nei a, mahse, a la buai nuaih nuaih thung. Zonuni pawh nidang ang bawkin a ngui leh nghiai a, tunlai chu heti deuh reng hi. Mahse, ka hau duh lem lo, a hun tawn hi a khirhin a hlauhawm tlat a ni. Chhun chawlh laiin Ruatkima call ka dawng a, "Zanin dar 8ah ka lo bia ang che. Ka phone an kawl leh dawn avangin eng msg mah lo thawn suh aw..call pawh" a rawn ti zung zung a, a hmanhmawh hmel viau. Ka chhan hmain a off leh daih bawk. Zonuni chuan, "A pawimawh viau a niang, ka hre châk tawh" a ti sap a. 

"Kan hre vat ang" ka ti ringawt. Fela leh Ropuia te an rawn lang ve leh a,. "In lo hre tawh em? Hnathawkte an siksawi dawn an tih kha!" An tih chuan mak kan ti hle. 

"Engtia siksawiin?" Kan ti hê hâw a. 

Fela chuan, "Sum leh paiah harsatna a tawk deuh nge thawktu ṭhenkhat an bang dawn an tia, chutihrualin nau awmna tur saw an peih ṭêp a, saw lama pakaitir dan an zawng mêk an tia" a ti mawlh mawlh a, ani pui roh hian thil a hre thei phian mai. 

"Chu! Bân zingah kan tel ve ang tih a va hlauhawm ve" ka lo ti a. Zonuni hmel pawh a danglam nghal. 

"Hlauhawm deuh a ni, kei pawh ka lo innghat deuh tawp tawh sia. " Ropuia pawh chuan a lo ti ve a, "Pu ber thu a ni miau sia,."Fela pawn a ti ringawt. Zorema biak chian deuh a ngai niin ka hria. Eizawnna dang ka lo ngaihven tawh miah lo va, a hrana hna zawng leh tur chuan kan upat tawh bakah a peihawm tawh loh. Zonuni chu lehlamah damlo a la enkawl thei tal a, thiam bik nei ve ta lo chu kan hlauthawng bik lo thei lo. Dar 4 a ri ta, keipawh ka inziak zo hram e. Tunhnaiah sum kan hmang nasa a, mamawh a tam ve êm a ni. Chaw eitur thawm pawh ka hre ṭan..Zonuni ka la nghak a, Teteii leh male nurse te kha an rawn inzui thla a, "Khaw nge?" Ka lo tih chuan a ngaihna hre lo zet hian, "A lo chhuk tawh kha" an ti rual ṭhawt. A tirah chuan ka hamhaih deuh a, mahse, hlauhthawnna namên lo hian min rawn tuam ta tlat. Rang fahranin in chung panna stepah chuan ka tlan chho zawt zawt a, Zonuni ka call pah bawk. A ring ral ṭhak ṭhak si. A duty room ka va luh chuan a lo ruak hiai tawh a. Khawiah tak chuan awm ang maw..nge ani hian pawnah min lo nghak zawk..ka call a chhang thei si lo lai chu a ni. Room tin ka fang kual a, Zonuni a awm lo. Washroom chiah luh lohna ka la nei, Guard pakhat hian room tukverh leh kawngka te a lo kalh fel ve mêk bawk a. Washroomah chuan ka lut a, tumah ka hmu lo. Ka mangang tawh bawk si chuan, "Zonun" ka ti tuar a. Ka aw thangkhawk bak ka hre lo. Chhuah mai tuma ka inher lai takin, "Zo.." rawn ti ri niawm tak ka hre ta a, ka bengchhe ri a nih ringin ka ngaichâng vang vang. Washroom piah chiah roomah chuan, Store room a awm a. Chuta ṭanga thawm chu rawn kal niin ka hria, ka va hawn chuan chair an dah ṭawl tawh phênah hian Zonuni chu a lo awm a, "Ti nge?" Ka ti vat. 

"Damdawi stock sa lak ka tum a, pawnlamah kawngka min lo kalh hnan daih sia, ka phone ka keng bawk si lo" mangan hmel deuh hian a lo ti a, kei erawh ka thaw huai thung. Engtin emaw a lo awm kha ka hlau lutuk a, ngaihṭhat loh sa tawh nen, "Kal ang, a nih chuan" ka ti vut a, kan chhuak a, kawngka a ben nasatzia leh Teteii te pawn a lut tih an hriat thu a sawi mawlh mawlh a. Teteii te kha chuan lo chhuk daih tawh ang khan an sawi sia, a mak ta deuh, mahse, an hriatsual ve pawh a ni thei tho. Kan tlan laiin ka phone a rawn ri a, amah chuan ka phone a phawrh a, "Pu Rinawma a nih hi, ti nge nangmah a lo biak zawk che le" tih leh lak a rual a, "Hei bike a khalh laklawh sia, keimah Zonuni" a ti nghal zat. 

"Aw le..kan lo peng ang" a ti leh a, Zing lama ka mi hmuh khan Pu Rinawma chu a lo hrilh tawh a ni ngei ang. "Pen lawk a ngai a nih chu, thu thar an hria ni maithei" a tih chuan an vauna chungchang kha a ni sia, engmah a hre ve si lo. Engtin nge a lakah ka thup bo theih ang aw tih ka ngaihtuah neuh neuh. Police stationah chuan kan lut ve leh ta a, Pu Rinawma room lam kan pan nghal. 

"E..lo kal r'u, in fel thin e" a lo ti duam duam a. Amah hi pa nelawm leh misualte tana rum tak si a ni. Zonuni zawk chuan, "Thu thar in hre tawh em ni?" A ti a. Ka lo îp deuh,. Pu Rinawma hmel pawh a buai nak mai, Zonuni"n engmah a hre ve lo tih a hre lo a niang. 

"Lehkha chungchang zawk kha a nia. " A tih chuan, "Eng lehkha nge, Atea chhuah dilna kha maw?" Hrethiam lo zet hian Zonuni chuan a lo ti a. Pu Rinawma chuan min rawn melh zauh, thup hleihtheih ni ta hek lo. Keimah zawk chuan zinga lehkha ka hmuh thu leh thu inziak chu ka sawi ta a, Zonuni chuan a laka ka zep avangin lawm vak lo hmel a pu nghe nghe. Lehkha pawh chu a en ve a, hlau leh chiâi hmel erawh a pu lem lo. "Min zuitu an awm thin ka tih kha.." a ti thawp sap a. 

Pu Rinawma chuan, "I in luahna ten cctv an vuah em?" A ti a. 

"Aw vuah e." A lo ti var a. "Chu chu kan en vat a ngai a nih chu, a hriat theih mai ang" a ti zung zung a. Chhuak mai thei tur ang hian a awm bawk. A nau pakhat nen kan pali chuan kan chhuak ta a. Kei pawh Zonuni te inah ka tlang nghal, Numami te pawh chuan thil awmzia an hre lo thei ta lo va, cctv footage chu kan en ho ta a ni. Zing dar 3: 20 ah chuan Lukhum hmathlawk khum, mask vuah, kawr dum leh kekawr dum ha hi Zonuni te in panna stepah chuan a lut thla ta ngei e. Mahse, han zoom viau pawn mask a vuah tlat si! A hmel diktak a hmuh theih ta loh. Mahse, tu te emaw fiamthu thawhna mai mai a ni lo tih erawh kan hre thei ta a, a serious ṭan ta khawp mai. Police kal hnuah Zonuni chuan a hlau thar ta chauh. Numami te pawn an ina khawsa rih ve mai turin an ti a, thutlukna erawh a la siam lo thung. Zanah Ruatkima nen kan inbiak dan azirte pawh nise. Ka phei hma viau, ka nute bulah pawh ka sawi a, hlauthawng hma chi ka nu pawh a mangang hle. "Ti nge an awmtir ve mai mai loh le? Tuma pawi a sawi loh nen, a hringtu pa chu a ni thei dawn em ni? A buaithlak em mai. Innei mai rawh u" a ti ta chiah a. Innei ringawt mah ila ka venghim thei kher ang em? Kei chuan tuar ve pawh ni ila ka tuar thei mai ang, ka chhungte lehzelin an tawrh ve erawh ka duh hauh lo thung. Ka û pawn, "He thil hi a ril dawn riau niin a lang tlat" a ti ve khauh a. Rinhlelh tur tal te hi nei ila chuan a zia zia pawh a awm ang, han kawh chat tur kan nei lo lai tak hi a ni buaithlak chu. Zonuni pawh Numami te inah chaw a lo ei a, lehlamah chuan a nunna la duh nise a bula ka awm loh remchan lai pawn hun chu a awm lutuk. Mahse, Zonuni kher hi chu zuaha Atea thihna chungchang ngaihven tawh lo turin an duh a nih hmel, an lehkha atang pawn a hriat. Chuvangin hlauthawng lutuk lo turin ka ti a, Ruatkima min lo biak hun chu kan nghak ta ran mai. Dar 8 a ri ta, a rawn call rual rualin ka la a, speaker ka on bawk. A ṭawng chu a khâwk avangin bathroomah a awm a ni ngei ang. 

"Han sawi teh le" nghakhlel tak hian ka ti a. Zonuni pawn a ngaichâng uluk hle. 

"Martina chu an lo hre hlawm nasa, heta awma thawk ve nghal, U Hmaa nen phei chuan an lo inhnimhnai hle a niawm e. Bena pawn a hria a, mahse,chutiangin a hre thui lo. U Hmaa sawi dan chuan, a thih hma thleng pawh khan Martina chuan Rûn hi a la rawn tlawh zeuh zeuh thin. Chuan Director nen hian an inbe ṭha hle bawk. Atea pawh kha kar khat a awm chhung khan vawi 2 a rawn kan a niawm e, thla khat an awm hma chuan an kan theih loh kha a nia, Martina erawh a tlang hle bik danah an duhsak hle tihna a ni mai. Chuan, pawimawh lutuk chu Atea chhuah tlaiah khan Martina chuan a rawn hmu aw. U Hmaa pawn Atea leh Martina thi ve ve kha mak a tih vanga sawi a nia, midang bulah Martina chuan Atea kha ka bialnu nau a nia a lo ti mai zel a niawm e. Tikhan an chhuah hnu lawkah Atea a thi a, amah a thi ve leh bawk a. Thil eng emaw tak chu a awm a ni" a rawn ti ta dap dap a. A phurawm chho ṭan e. 

"A lawmawm e. Tikhan i beng lo chhi ru ve reng rawh aw. Mahse, fimkhur la" tiin zonuni an vau dante chu ka hrilh ve a, a chek hluk. "In fimkhur zawk a ngai a nih chu! Ka lo chhui ve zel ang, Taka! Mamuani'n min rawn be leh a, ngaihdamte min rawn dil. Mahse, zu ka nghei aṭang hian ka tuar ta vak lo,. " A rawn ti mawlh mawlh a. 

"Let tawh suh, nang aiin a upa zawk bawk si, a aia ṭha kan zawng dawn nia" ka lo ti vat. 

"Ka dah dawn, bathroom hmang ve duh an awm a. " Tiin a dah leh ta vut a. Zonuni nen chuan kan ngawi dun vang vang. Rilru ngaihtuahna hrang hrang a awm a, keini ang duang tan chuan han thlitfim a har khawp mai. 

"Pu Rinawma hrilh ila" ka ti a. 

"Ni e, kan hrilh dawn nia. Chuan, hetia nghak tawp lo hian keimahni ngei hian chhui ve ang. Ka nu leh pate hi" a ti ban charh a. 

"Bulṭan nan tu nge kan hmuh ang?" Ka lo ti ve vat. "Pu Sailothanga nupui hi va hmu ila a ṭhat ka ring" a ti ta a. Nizan lama kan khatih avang khan a englo chu na a tihzia leh a zun zawng pawn a nat thu a sawi sep sep a. "A na rei lovang, zaninah ti leh ila" nui chungin ka ti a. 

"Ka mood lo" a ti hmuk. Keipawh ka ni ve tho. Hriatrenga a la awm lo bawk nen, ka riahpui leh ta a, ka pain min la khak ngeiin ka ring. Zonuni pawn, "Numami te inah ka riak chho tawh mai ang. Miin an hriat chuan a zahthlak" a ti ve nghe nghe. Pawi ka ti lem lo. Inneih chungchang kan sawi leh a, "Neih che ka hreh thar thut. Ka dinhmun atang chuan neih che hi châk ngawih ngawih tur ka nih laiin min vauna avang khan i chhungte thlengin ka hlauhthawnpui tawh. Keimah vanga eng emaw in tawh ve hi ka hlau a ni" a ti sar sar a. 

"Chutiang ngaihtuah suh, kan inneih te chuan heng misual ho te pawh hi an reh ve mai ka ring" ka ti a. 

"Ka nu leh pate diktak ka hriat an hlau lutuk hian hriat min tichâk zual. Ka hrechhuak tho tho ang" a ti nghet charh a. Keipawn theihtawp chhuahpui ka tum ruh hle. 

A tuk tlaiah a la tlai chhe lem lo bawk a, Pu Sailothanga te in lamah kan peng kawi ta a. Dawrpui hmun hulum lai takah an lo awm a, an rethei lem lo tih a hriat viau. An awmpui nulain min lo dawngsawng a, nu ber hmuh kan duh thu kan sawi nghal. A pi chu a va ko a, a rawn phei chhat chhat mai. Ka rin aiin a tar..a nulat lai chuan a hmelṭha hle ang, a nelawmin a nui var var mai a. Zonuni chuan tlang takin kan kal chhan a hrilh ta a. 

"Ka pi, hmana in huan enkawltu Pu Hruaitluanga leh Pi Vanlalngaii te nupa kha i la hria em le? Kha mite enkawl seilen kha ka nia, ka nu leh pate diktak i lo hriat tak mialin tiin kan rawn hmu ngawt che a ni. " Tiin. 

Pitar chu a ngawi vang vang a, harh thut niawm tak hian, "Khai aw! Hruaia te fanu maw i nih a? Lo inchibai teh ang? An dam maw i nute chu" tiin a chibai ṭha leh a,. Zonuni chuan, "An fanu diktak ka ni lo va, ka buaina hi ka pi, khawngaihin min han ngaihtuahpui teh" a ti leh a. Pitar hmel chu a danglam ta deuh, "Mami, a va mak ve. I pu chu la dam se a hre tur, kei chu ka zawh tlak loh lutuk. Kan huan an enkawl lai khan kei chu ka kal zing ve lem lo, fa an nei lo va, I nu khan, "Ka rai thei lo a niang" a ti a ti zel. Ka lo khawngaih ve ṭhin viau. Kan huan kha an enkawl rei vak lo hrim hrim a, thla 5 erh awrh chauh a niin ka hria. Kan pa khan a hralh zui ta sia, anni nupa kha a khawngaih vangin huan enkawlsak tur te pawh a zawnsak nasa a, Saw Pu Saiṭhuama huan saw a hmuhsak ta a, an lawm ve hle nghe nghe. A bak chu engmah ka hre lo" a ti ta mial mial a. A khuh kherh kherh bawk. A chhungte dang an rawn lan pheuh pheuh avang leh engmah a hriat ve lem loh avangin keini pawn kan hawnsan ta thuai a, Pu Hruaia te nupa an dam tawh loh thu erawh Zonuni chuan a hrilh hre ve hram. Pawi a ti ve hle niin a lang. 

"Pu Saia leh Pu Chunga hi hmu nawn leh ila a ṭha lo maw? In inbiak khan engtin chiah nge an sawi?" Ka ti a. 

"Pu Chungnunga kha chuan, "Ka tlawh zen zen lo va, ka hre bik miah lo. " A ti ringawt. Mi kha a beisei deuh titih dawna ka hriat avangin chhuahpui vat kha ka duh bawk nen, ka zawt dilchhut vak bik lo va" a ti niah niah a. "Pu Saia thung kha" ka tih chuan, "Ani kha chuan, "Hun ka ngah lo a nia, chutiang engmah ka hriatpui lo. Sum i mamawh chuan sawi la, khatiang thu belhchiandawl lo kha chu ka ngaithla hman lo' a ti hmawk hmawk a, kan thawhna neitu a lo ni ve bawk nen, bakah a sawi ang tak tak khan hun a nei lo êm a, keipawn ka sawipui zui ta lo. Sum a ngah avang hian dil chawt an awm ve ṭhin a niang, sum dil turah min ngai deuh tlat a." A ti mawlh mawlh a. 

"Kan hmu leh ve ve dawn nia. An inah ngei" ka tih chuan a bu nghat mai. 

Ka nu lah chuan inneih a sawi a sawi ta mai a, Zonuni a khawngaih vang a ni pakhat a, bakah tunhnaiah a ruh chuktuah na thin avangin in chhungkhur chet ngai pawh a duh angin a ti hleithei tawh lo va, ka pa lah enkawl ngai ve tho a ni bawk nen, kan nula lah chhawr hleihtheih a ni si lo va. Eirawngbawl hi chu mo pawh nei ila amah bakin a ti leh lovang, midang siam hi a remti vak lo, in chhungkhur chet ngai eng ilo tihpui tur mamawh a inti ve a ni. 

Sateii'n , "Mo tha chhawr i châk a nih kha" a lo ti hlak a. 

"Moin a hranin thâ an nei mi?" Ka û chuan a lo ti khauh. Ka nu chuan, "Chutia sal ang maia chhawr tum ka ni lo a nia. In chhuak vek sia, a khawharthlak thei si, darthlalang nawhfai bakah chhuat nawh takngial pawh hi a hahthlak ve tawh lutuk a. Khawi iloah vahchhuah duh ve mah ila i pa awmpui a ngai si. In nghak tur hrim hrim pawh kan mamawh alawm, Sate, zing karah kal tawh loin chaw eikhamah kal tawh mai rawh. Zingah in chhungkhur tifel la.." a ti malh malh a. 

Kan chhang zui tawh lo. Awmpui han lak hi dik tak chuan venthawn a tam a, chhungkuaa thil sawi ho kan ching si, thurûk sawi ngai te a awm ve a, a buaithlak. Bakah ka nu hian awmpui han neih ve luah kha a zak tlat! A rilru a hmanlai kan ti dawn nge pawh ka hre lo e a. Kei pawh min nawr reng takah chuan Zonuni neih thâwr mai chu pawi ka ti lo ṭan hle. Ka û lahin neih a la sawi der si lo va, keiman ka neih phawt hi a ngai a ni. Zonuni bulah pawh ka sawi leh a, "Innei ta ila ,ka hna hi ka bansan dawn mi?" A ti sap. 

"Ka hre lo, kha chu i thu thu" ka ti a. 

Ka nu thusawi te kha ka hrechhuak rauh rauh mai. Mahse, Zonuni chu a zahawm ve si a, ka nute nen sawiho a ngai ang. "Hnathawka kan chhuah vek chuan i nute khua a har dawn sin" a ti leh khauh. 

"Inneih hnuah chuan thawk tawh lo mah la a pawi lo. " Ka ti ta tâwng a. 

"Palai lo tir ve la..nge kan inru dawn?" A tih chuan ka phâwk hrû mai. A sawi awlsam teh puat lutuk chuan min tihrilhhai letling. 

"Tak tak em?" Ka ti hluai a, "Fiamthu ka thawh thiam lo tih i hriat kha" a ti sep. Ka fawp ta vawng vawng a,kan infawh zawhah "Palai ka rawn tir vat ang" ka ti a. 

Mahse, Zonuni chuan, "Dan khatna kan tlin tawh loh kha aw. I chhungte hrilh sa rawh" a ti a. 

"Mite pawn tlin lo chungin an ti ve tho alawm" ka tih chuan, "Mite kan ni ve hleinem, nang leh keimah alawm ni..mihring chu kan bum thei, Pathian erawh a bum theih loh" a ti tlat mai. Kan han inhnial deuh naa, ka hnial hneh loh bakah chhungrilah tlin lo chunga mite ngaih ropui duh vanga dan khatnaa inneih chu ka ngam chiah bik lo. Kohhran dan hnihnaa innei mai tur chuan thutlukna kan siam ta a ni. Ka hlim viau tho mai, ka leng haw pawh ka ke pen a zangkhai khawp mai. Ka nute bulah ka sawi ta a, Ka pa chu ka zah ru khawp mai. Mahse, "In tlin kha kan ring tawh lo hrim hrim alawm, hetiang khawpa inchenchilh te chuan..inthiamlo lutuk suh, hetia huaisen taka in langtlang ngam hi a ṭha daih zawk" ka pa chuan a ti ta hlauh a, ka thaw suai suai mai. Ka û lah chuan, "A rai har ka lo ti angreng zawk lutuk a" a lo ti! Ngei fêa melhin, "Hmanni lawkah alawm kan hman, a duh teuh lo mai" ka ti pûng pûng a. Zonuni thlavang ka hauh pah a nih ber chu. 

"I va insum thei zawk ve" a ti leh nghut roh a, "Nang ang ni ve hek lo" ka nu lah chuan a lo ti kawkalh. 

"Kei ang chu nise dan khatna an tlin ang, ka pathlawi tak aṭanga ka nghei rei tawhzia hi.." ka u chuan a ti duah a, ka nuin, "Zahmawh sawi suh, i ninawm" a lo ti hlak hlak. Sateii nen erawh kan lo nui pût pût mai. 

Zonuni nen kan ruahmanna angin palai chu kan tir ve ta poh a, Pu Zamawia te nupa leh in chungte nupain an lo dawngsawng, a lo ngen tawh angin. Awlsam takin kan inberem thei a, a hun leh ni atan erawh October ni 10 kan ruat thung. Thla khat zên zawn inpuahchahna hun kan nei tihna a nih chu. Thil nuihzatthlak ve deuh chu Zonuni nen a man eitu tur kan han ziak dun ngei a! 🤣 Ka lo sawi ve zut zut. Khatiang kha a ngai miau si a ni. "Ka nu leh pa la dam se aw..an lawm ve dan tur hi" a ti ve reng mai. Ka hrethiam viau,. Hetiang khawpa vanlaitla a lo ni te hi ka tan chuan lehlam zawng takin a lawmawm, chhungkaw pangngai nei ve nise kan inneiin ani pawn min duh kher ang em hriat va ni suh. Tichuan, nupui nei mai tur mutin ka han mu chho a, ka phur teh hawrh lutuk chu Sateii hian min ngei thei, min fiam reng bawk a. Ka nu phur leh helhhawlh lutuk chu a hahthlak lek lek zawk,. Ka nî te bakah ka pate lam pawn min lawmpui vein min ṭawiawm ṭha ṭhin viau. 

"Kan inneih hma hian Pu Saia te chu va hmu leh ila" ka ti a. Kan hun awl neih ve hi Sunday a ni tawp zel a, sunday chawhnuah Pu Chungnunga hmu turin kan thawkchhuak ta a. A lo awm remchang hlauh mai a, Zonuni a han hmu chu a hmuh hnu ang a ti si, a hrechhuak zo tawh si lo..an han inhmelhriat ṭha leh a, annu pawh a lo awm ve. Min lo be lem lo va, a lungawi vak lo nge a hmelhmai a tûm deuh vuauin ka hria. An pa lerhkawh vangin an pa hmu tura hmeichhe lo kal hrim hrim a hua te pawh a niang e. 

Zonuni bawkin bul a han ṭan leh a, Pu Chunga pawh a bu nghut nghut mai. "Ni e, a hma khan kan sawi chiang lo ve deuh bawk a ni. Englo a nia, ka huana an thawh khan an inneih aṭangin thla 2 a liam chiah, innei thar an ni tih pawh an sawi nghe nghe. Fa neih vat vat an duh thu pawh an sawi ve reng mai. Ka hnenah khan kum khat dâwn chu an thawk awm e, mahse, fa an nei lo. Chuan,tuna i sawi ang phei kha chu engmah ka hre lo. Ka tlawh khât angreng a, mahse, ka hnena an thawh chhung khan fa an nei lo hrim hrim, nautê emaw pawh an enkawl ka hre miah lo. Chu zawng chu ka hriat chhun chu a ni mai" a ti chuar chuar a. Biak a nuam phian mai. Zonuni nu leh pate inneih hlim a nih chuan Pu Chunga sawi chu a dik hmel, An inneih hnu fê, fa an awh ngawih ngawih hnuah daih Zonuni te kha an enkawl tih a nuin a sawi a, Pu Chungnunga te huana an thawh laia thleng a nih a rinawm loh. Lawmthu te hrilhin kan hawnsan ta phawt a. Pu Saiṭhuama chiah kan hmabak ta. "Tlawh nghal law law ang, tun bak remchang a awm tawh loh takin" ka tih avangin Pu Saia in lam chu kan pan leh ta a. Dar 3 a pel tawh. An in han lenzia leh turu zia chu aw..Security guard bulah a pu a awm leh awm loh kan zawt a, "A awmin ka hria" a ti ringawt. Door bell chu ka'n hmet a, rei nghah ngai lovin nula pakhat, cher lam hian a rawn hawng ta a. "Eng nge ni ta?" A ti a, a aw chu a chher lek lek. "Pu Saiṭhuama rawn hmuh lawk kan tum a" ka ti a, "Amah in hrilh lâwk em?" A ti leh. Mi pawimawh leh hun awl nei mang lo a nih avangin Appointment siam phawt a ngai ve ṭhin. "Be lâwk lo, mahse, a pawimawh khawp mai" ka ti leh a. 

A ngawih dat hnuah, "Lo lut rawh u" a ti ve ta chauh. An in chhung chu a ropui ti ila a tawk mai ang chu. Kan ṭhut fel hnuah an nula bawk chuan, "Lo nghak lawk r'u aw" tiin in chung lamah min chhohsan ta a. Pindan pakhat aṭangin Hlupuii kha a rawn chhuak hlawl mai. Min hmuh chuan ani pawh a meng phâwk deuh, "Teh hlawl che u chuan" tiin a nui var var a. 

"Nia, hei i pa rawn hmuh lawk kan tum a" ka lo ti vat. Tar enkawlnaah kan thawk tih a hria a, chuvanga kal kan nih a rin ka beisei. "A nih chu, a awm em le.." tiin in chunglam a han thlêk zauh a. 

"In nula khan a ko mek a" Zonuni chuan a lo ti a. 

Kan bulah a rawn ṭhu ve a, awm ve rih lo mah se; pawi ka ti vak lo. Kan thu ken hi mi nazawng hriat chi a ni si lo va. Reivakloah in chung aṭang chuan Pu Saia te nupa niawm tak leh an nula kha an rawn inzui thla a. A nupui chu a hmelṭhain a la naupan hmel kher mai. Awmhmunah pawh a nalh viau,. Kan bul an rawn thlen chuan Pu Saia chuan a tarmit siamthain Zonuni chu a rawn melh ta chat a, ner sukin, "Nang bawk maw?" A ti nghut a. Zonuni chuan zâm miah lo hian, "Aw keimah bawk. Ka duhkhawp thil ka la hre lo a ni" a lo ti ve hmiah bawk. An nu chu a melh zauh a, Zonuni melh lehin, "Eng thil nge ?" A ti leh hmuk. 

"A ngai tho kha. A fâla biak che kan duh a ni" Zonuni pawh chuan a lo ti vat a. Hlupuii leh Pu Saia nupuite mitmengah chuan mak tihna a langsar hle. Kan mûk ve bawk si, a pawimawh hle ang tih an ring thiam a ni mahna. Pu Saia lah chu a che muang ruih mai a, "Tihian sawi mai rawh" a ti khauh a. 

"Aw le" tiin Zonuni chuan sawi a han tum a, A ngaingam leh si lo nge, "Aw le, min lo zui r'u" tiin Pu Saia chu a kal ta nulh a. Rang takin kan zui ve nghal. In chung panna step hnuai pindanah min luhpui ta a. Dawhkan changkang leh ngheh hmel zet kilin kan ṭhu ta ṭhap a. "Hun ka ngah lo a nia, sawi vat rawh" Pu Saia chuan a ti ta khur khur a. A nelawm ṭhin tehreng nen tunah chuan a dan a dang ta zar mai. Lungawi lohna a neisa nge mawni. 

Zonuni chuan zawitê hian, "Tu nge ka nu leh pa? Nang chauhin i hria" a ti sap a. 

"Engtin nge chu chu ka hriat ang? Ti nge chu thu keng bawka i rawn lan leh tak? " Pu Saia aw chu a khur deuhin a hria. 

"Ka pu, thinrim lova sawiho a ṭhain ka ring, Zonuni hi a buai takzet a ni. I puih kan ngai a nih hi" zaidawh deuhin ka lo ti ve a. 

"A bul aṭangin han sawi leh teh" Zonuni melhin a ti ta nghut a. Zonuni chuan a sawi ta mial mial, a chal a lo chuar leh nâng ṭhin. A tawpah, "Nang hian i hre ngei tur a ni. A chhan chu he thil vang hian ka nunna a derthawng miau a" Zonuni chuan a ti ta a. 

"Maw?! Engtin nge i nunna chu a derthawn?" A lo ti nghek. Keiman vauna a dawn dan te leh a nau ngei pawhin a thihpui tawh thu ka lo sawi ta a. A indawmkun ta reng mai. Mak ti takin Zonuni nen chuan kan melh ta ngat ngat a, thawk la hulhin.."In thi daih tawh emaw ka tia sin" a ti hul hak a. 

"Maw?!" Kan ti rual ṭhawt. 

A ngawih vang vang hnuah, "Hruaia khan "An thi tawh" a ti miau alawm. Thihna thuah dâwt a sawi ka ring lo a ni. "A ti ta a. Lungphu a rang teh e, a thilsawi dan aṭang chuan Pu Saiṭhuama chuan engkim a lo hre vek tih a lang. Engvanga hre lo dera zêp tlat nge a nih ang? 

"Hruaia te nupa khan fa an awt thei em em a, anni kha mi taima leh viak ṭha tak, huan enkawltu ka neih tawh azawnga enkawl thiam ber an ni a. Kei pawn ka ngainain hlawh pawh ka pe ṭha. Ka huan kha ka tlawh zing hle bawk..tichuan,.." a tih lai mekin kawngka an rawn hawng a, a nupui kha a rawn lut zan zan a. "Min lo hrethiam teh u, Paa, ka pa nikhaw hre lovin a awm thut mai. Kan kal vat a ngai" mangang tih hriat zet hian a rawn ti a. Min rawn pawtchat chu a inthiam lo takzet tih a lang bawk. Ka phone a lo ri ve mêk bawk, ka nu a lo nia. Lak loh ka tum zet naa a pawimawh a nih ringin ka pick up ta a. "Ruata chanchin kha i lo hre tawh em?" A rawn ti nghal tâwng mai. 

"Hre nang, ngati nge?" Ka ti hû a. 

"A pum na lutuk damdawi inah an tlanpui a, i patea te pawh an kal tawh. I û a chhuak chiah bawk" a rawn ti ta mai. 

Phone ka dah rualin, "Ruatkima a serious riau a nih chu! " Zonuni bulah ka ti a. Pu Saia pawh chuan, "Keipawh ka chhuah a ngai a nih chu, kan nu pa chu ka va hmuh ve loh chuan" a ti a, a ding uaih bawk. Zonuni erawh chechâng lovin a la ṭhu reng a. Ka va sawi ta ngawt, phu zawkin, "Aw le, aw le, kal ila. Ka pu, hun dangah ka rawn hmu leh thei che ang em?" Tiin Pu Saia chu ngenngawl takin a melh a, "Aw ,tehreng mai. Hei ka card aw, min rawn be dawn nia" tiin a card a pe a, kan vai chuan pindan kan chhuahsan nghal. Keini pawh chak zetin Damdawi in kan pan a, kan ngawi tluan parh. Kan han thlen chhoh chuan OT-ah an lo nawr lut tawh a lo nia. Ruata nu chu a mit a sen ram mai, an chhungkua an kim ṭhap a, ka û pawh a lo ṭhu ve rûn.

"Engtin chiah nge a awm?" Ka tih chuan, Tetea'n, "Khu lam aṭangin an rawn call a, a pum a na an tia, mahse, damdawi ina kalpui ngai khawp kha chu a serious tih kan hrethiam nghal" a lo ti var a. "Ngati nge niang le? Zu lah a nghei tawh si" zawh bik pawh nei lovin ka ti a. Patea chuan, "A zu lo in tawhte khan a rawn ṭhing let a ni maithei..a chilphuan te kha a tla nasa mai a, mak chu ka ti deuh" a ti charh charh a. Fate ngaihtuah mi an ni ve a, bakah anni chhungkua hi Pathian zarah damdawi in luh ngai khawpa nâ la nei lo an nia, an ngai thutak khawp ang le. Kan nghak ve ta ngat ngat a, Zonuni pawh a awm ve zel, eng emaw a ngaihtuah veng veng zel a, biak pawn a hre hleithei lo. Khaw thim hma deuhin Patea chuan, "Zosang, i ṭhiannu hi haw pui rawh. Hei kan awm tho alawm, i û a awm bawk a. In ril te pawh a ṭâm ve tawh ang" a ti a. Zonuni mitmei ka veng ve deuh bawk si, ka û pawn haw tura min lo tih avangin kan hawnsan ta a. "Kan inah chaw lo ei mai rawh aw" ka tih chuan a hnial lem lo. Chaw te chu a ei tlem kher mai. Mak ka ti deuh, kan eikhamah a tifel leh vek a, "Ka inbual lawk ang a, min lo nghak dawn nge" ka tih chuan, "Umm, rei lo la" a ti mai a. Sateii te nen an lo inkawm. Ka inbual zawhah kan phei leh ta a. In kan lut chiah chu a thil vei ngut ngut kha a rawn sawi chhuak ta hlawl mai. "Ruatkima pawh a kangkai ta a nih hi, heng zawng zawng hi keimah vanga thleng a ni zel..mi awm hle hle lai kha engvangin nge a pum a rawn nat vak kher ang? " A ti ta chiah a. Ka lo ngaihtuah phak miah lo. 

"Mahse, a ni lo ve thei tho.." ka ti a. 

"A nih theih dan ngaihtuah ve rawh. Ruata chu kan tan a spy a, chu chu hria an awm a. Dahbo dan an ngaihtuah ve a nih hi.." a ti khur dat a. Beidawn hmel zeta ṭhu hnawkin, "Mahse, ti nge ka nunna hi an lak mai loh? Ka la dam ve a ngaihna chhan tak hi ka hre châk" a ti leh hap a. Sawi tur pawh ka hre lo, thil thlengah a inngaihbel zel sia. A inentir ve lahin that lohna i nei lo, chawlh hahdam i mamawh an lo ti ringawt kha a nia. Thil a ngaihtuah nasa lutuk ber hi a chauhpui a nih hi a. Kan inhmuh hmasak ber nen kha chuan inang lo tak a ni. A cher tawh viau, inhmu reng reng kan nih avangin a danglamna ka hmu tam lo mai mai zawk. Ka nu te pawn, "In innei tur a enghelh lutuk a niang, a cher kâwk kâwk mai alawm" an ti tawh. Ngaihtuah deuh chu a ngai. 

"Inenkawl ṭha phawt teh. Ngaihtuah tawh rih loh tum rawh" ka ti a. 

"Ka thei lo" a ti tawl mai. A tana he thil pawimawhzia hretu ka ni bawk si. A inbual hlanin a phone ka ensak mai mai a. Valtea pawn a lo be leh tawh chu niin , "Pasal i nei dawn ta chu a nia. I uiawm mang e,. " Tih angreng. 

Teremi nen pawh an inbe nasa hle. Mipa lamah chuan rinhlelh tur an awm lo,. Rinliani tia a save chu kan Rinliani kha a ni em tia ka'n en chu a lo ni tak tak. "Zawngi, ka damchhungin ka ngaidam ngai lovang che. I nun ka tihchhiat hma chu ka dam ve reng ang,. Then rawh ka ti lawm lawm che a ni lo'm ni? Inneih te in lo tum a, in hre viau ang. Ani kha ka ta chauh a nih kha" tih thu bakah ṭawngkam bawlhhlawh tak taka a hauhna te a ni. Ka ner sawk mai, Zonuni chuan a chhang lo thung. Ka en mek laiin msg a rawn lut ta tlang a, number ringawt a ni. "Tihnawktu ni lo la, in damrei a ni mai" tih thu a ni. A number chu ka la ta vat a, a tihzia e. A number atang hian chhui chhuah a har lo vang. Zonuni pawn a hmu ve ta ngei a, a call nghal hmiah. A la lo chiang teh e. Pu Rinawma ka be ta nghal a, chu number chu ka pe ta. An lo chhui ve tawh mai ang chu.. Ka û ka va be leh a, Ruata chu an zai zo tawh a, a kawchhungah tur chak tak an hmuh thu a rawn sawi ta mai! Hlauh ang ngei ngeiin maw! Zonuni ngaihdan kha a dik dawn a va ang ve le..Patea'n FIR a thehluh thu a sawi ta bawk a, Ngawlveite Run lam chu an buai ve map maithei a ni. Khu Rûn aṭang khuan eng emaw tak zawng hmuhchhuah tur a awm ngei ngei ang. 

Zonuni bulah a rilru lakpen nan Rinliani chungchang kha ka sawi a, "Khati reng kha..a ruih phur lai hian min rawn ankhum hrep zel alawm. Ka hrilh duh ta lo che a nih kha. A khawngaihthlak ve tho sia" a ti mai a. A ngaih hoh hmel khawp mai. "Ani pui hi pawisak a nei si lo va, kan inneih dawnah te hian a rawn haw leh nulh ang a" ka ti a. 

"Fiahna nei loin kan inneih a dal ngam lo tawp ang. " Tiin a hmeichhia zawkin min hnem. Valtea chungchangah ka pakai leh a, "A bialnu nen an inthen a niang. Numami te ina ka riah aṭang hian min hmu tai leh riau, mahse, engah teh vak ka ngai lo" a ti mai bawk a. Innei mai tur kan nih tawh avangin keipawn hlauhthawnna em em ka nei tawh lo. 

Ruatkima pawh chu ṭha takin an zai bawk a, a rawn harh chho ve zel. Police te bulah chuan, "Zanriah eikham aṭanga 10 mins velah a rawn na ta vak a, ka va inthiar pawn awmzia a nei si lo. Nikhua ka hre lo chho ta a ni" a ti. Ngawlveite Rûn lam insawithiamna hriat a chakawm, nakinah kan la hre mai ang chu maw. Thil mak deuh deuh kan tawng chho ta nawlh nawlh mai a,. Zonuni lah kan lakah a inthlahrungin a inkiltawih thar hle bawk, amah vanga keini lam thleng pawh him loa a hriat avang a ni. Engtin pawn sawifiah mah ila a luhlul si, "Inneih ka lo duh ta mai hi ka tisual a ni. Ṭhulh leh mai ang hmiang" tih changte a nei a. Ka thinrim lek lek zel. 

"Kan innei ang a, a fel vek zawk ang" te ka'n ti leh ringawt ṭhin. Kan pahnih pawh kan hlim lutuk lo, a thuamchhawm tur lamah rilru a pe nasa bawk si, a eizawnna nen, a rilru kap tlattu thil thenkhat te avang nen..ka khawngaih a, mahse, ka khawngaih poh leh hrehawm a ti si, awmdan thiam a har ṭhin khawp mai. Pu Saiṭhuama kha Champhaiah a zin avangin kan la hmu leh lo va, a thusawi dan kalhmangah chuan Zonuni nu leh pa a hria a, mahse, hmaichhan ngeia sawi a duh vangin phone aṭang takngial pawhin a sawi duh lo. "Lo inenkawlṭha rawh.. engkim i hriat hunah a shock dawn che a nia" tiin a rawn chah thlap thung. Ni 3 hnua rawn haw mai tur a ni bawk a, Zonuni pawn dawhtheih a zir ve hle. Kei tak pawn Pu Saia thu pai chu ka hre châk tawh takzet. Heti taka ka bialnu tibuaitu hi hailana pholan vek a chakawm tawh a ni. 

Ruata pawh dam takin a chhuak a, Patea ten rûna dah an duh tawh loh avangin an inla chhuak ta nghal. Rûn lam pawn an hnial ngam lo, case a kal mek bawk nen. Eng tak ang zel ang maw? 

Zonuni ka thlah haw, kan ina ka lut leh chiah chu ka û nen kan insu ṭep a ni. Chhuah tum anga a lan avangin, "Khaw nge i kal dawn?" Ka ti a. 

"Hlupuii nen zanriah kan ei chhuak dawn" a ti nghut a. 

"A pa hi a lo haw tawh em?" Ka ti nghal zat a. 

"Naktukah a rawn haw dawn a ti. In va kal leh dawn em ni?" A ti a. 

"Kal leh ang" ka ti nghut. "Ka bialnu saw nghawng tel ve suh se aw" a ti dam thlap a. Engkim Zonuni chungchang leh Pu Saia kan hmuh chhan an hre ve vek tawh a ni, Hlupuii bulah pawh kan zep bik lo. 

"Ka hre lo le, nghawng lo turah ngai ang" ka tih chuan, "Unau kan indo ngai suh se. " A ti hul hak a, a ṭawng dan chu mak ka ti deuh. 

"Eng nge maw i sawi awmzia le?" Lungawi vak lo hian ka ti a. 

A vei nuih leh suk, "Ka bialnu pa hi Zonuni pa a nih ka ring..lo thlir reng rawh" a ti hniam ruih a. A chhuak nghal nal nal..

"Thil ni thei a ni lo. Zonuni pa nise a tuamhlawm ang..i len len nen i â sia. " Tiin ka û chu ka rilruin ka hau ta hrep a..