Parchuailovi 10

PARCHUAILOVI..(10)

Ziaktu : Toni Râlte

Police chuan makti takin, "Maw? Eng nge thil awmzia?" A ti ta nghek. An ṭobul engmah an hre ve lo a ni bawk a, mak tih viau pawh a âwm e. Zonuni chuan, "Ka rindan leh ngaihdan hi a dik e ka ti lo, mahse, ka rilruah a riak reng a, Martina'n min rawn biak aṭang phei kha chuan thildang engmah ka ngaihtuah thei tawh lo. Amah a thi ve lehzel bawk si.." tiin Atea nena an ṭobul diktak te, Martina'n chumi chungchânga a rawn biak dante chu a sawi ta hmiah hmiah a, amah hringtu hian an pa a ni tih hriatchhuah a hlauhna lamah tiang hian a che ta mai a nih a rin thu te a sawi ta vek mai. Tin, Atea'n a hriatchhuah thu leh amah chuan a hriat ve hman loh thu te..engkim zawng zawng a sawi vek. IO pawh chuan a ngaithla uluk kher mai, a sawi zawhah, "Ngaihtuah tham tak chu a tling a nih chu. Thil ni thei lo anga kan ngaih pawh hi a lo inhmudik leh thlup tawh zel a, kan lo ngaihven dawn nia. Information min pek theih ang ang chu zêp lo bawk ula, keini lam pawn kan hrilh zel ang che u. Inpuihtawn a ngai a nih hi..tunah chuan Ngawlveite Rûn-a thawkte kan biak leh phawt a ngai" a ti mawlh mawlh a. Keini pawh kan haw ve ta phawt. 

Sateii bialpa thar pawh zanah a rawn thleng hma leh hle. Chanmari-a awm an nia, a fel hmel viau e. Kan farnu neihchhun a ni bawk nen, pasal ṭha tak nei se kan duh. Kei pawh Ṭhapartini te inah ka phei leh ta hnu hnu. Ke hian ka phei mai zel a, a engakima bike lekchhuah zen hi ka ning. Ka va thlen chuan an unauin an lo ṭhu dun rân a. Biteii chu a ṭap niin ka hria, Zonuni hmel pawh a thim hmak mai a, lungawi lohna lian tak a nei tih a lang reng. 

"Teh rûn che u chuan, thil thleng a awm em ni?" Ka ti a. 

"Rawngbawli hian nau a lo pai alawm mawle.." a ti hul hak a. Maktiin Biteii ka va melh zawk. A hmai hupin a kun ngar mai a, ṭah rik êm chu a hreh ve a ni maithei. 

"Tu fa?" Ka ti a. 

"An inṭhen tawh emaw kan tih Ruatpuia fa kha mawle.." a ti leh hmak a. Sawi tur a vâng ta raih mai. Amah zawk chuan, "Engtia tih nge ṭha ang? Amah Ruata pawn a rai tih a hre tawh tho va, sawn man hi a ranglamin kan va dil mai dawn mi?" A ti a. Tlemin a inthlahdul ta bawk. 

"Chu chu a ṭha ber ang. In chungpa khi a fel a, tir ve tawp mai rawh" ka ti a. 

"Bite, Ruata chuan eng nge a sawi?" Ka ti nghal zat bawk. 

Insut faihin, "Kan innei anga ni mai lawm a tia. " A tih chuan ka thaw huai mai. 

"A ṭhat nasat chu, chutianga neih che a duh chuan.." ka ti a. Zonuni erawh chuan, "Inneih hmaa rai lâwk kha a pawi êm a ni. Nu leh pa kan nei tawh lo va, mi min hmuhsitna tizual turin i rai kher a. A lan tak tak hma khan innei u la a tha" a ti sak sak a. A sawi dik reng mai. 

Biteii nau pai chu thla 2 vel a lo ni tawh a, Atea thih lai pawh khan a lo rai reng tawh a ni maithei. Engpawhnise, sâwn pai ṭhenkhat ho an fa paina ten an neih duh loh laiin Biteii chu a vannei letling zawk. Chutiang chuan ruahmanna kan siam ta ngawt mai a ni. Ka rilru tê têin Biteii'n pasal a neih chuan ka tan pawh chance a ṭha sawt dawn tih ka hai lo. Amaha khawsaktir reng ka phal dawn lo va, neih ve vat a ngai a ni. 

Sawn man chu in chungpa chuan a va dil ta ngei a, Ruata te hi chhungkaw pangngai tak an ni a, amah Ruata hian eizawnna ngel nghet a la nei bik lo va, inhlawhna awm ang anga inhlawh ve thin a ni. An khawsak a sang em em bik lo bawk a, Biteii pawh chu an lo iai bik lo hle. Sawn man pe loin palai an rawn tir ta zawk a, Zonuni lahin palaite dawngsawng turin min lo ko ve zel, a buaithlak ṭhin mang e. Chhungkaw member pawh ka ni ve mang si lo. A awlsam zawngin a hma thei ang bera innei turin ruahmanna kan siam ta a ni. Tin, chhungkua an harsa duh ve bawk a, tih bûng bûng pawh an duh lem lo. Tlan koh anga inkoh mai an ti ta a. Zonuni pawh a nau thuamchhawm tur lamah rilru pe chhoin a sum khawlsa te pawh a lachhuak ta nual mai. Thuamchhawm pawh mi chhawm tluk lo mah se; a mawi tâwk, a vantlang tâwkin a thuam ve thei ta a. Biteii pawh a lawm ngei mai.Man eitu te pawh ṭhenawm hnai leh sawta an in luahna ṭhin pi Remi te an ni nawk mai, man eitu tur pawh an nei tam ve lo, hengte avang hian Zonuni pawh a lungchhe lek lek, mahse, a ṭha thei ang bera a nau chu kaltir a duh ve tlat si. Chhungkhat hnaivai nei ta lo chu Numami te chhung leh an inchungte bakah keini chhungkuain kan va ṭawiawm ve a. Awlsamtêin Biteii leh Ruata pawh chu an inkutsuih ve ta a ni. 

A nau man hlan zanah khan midang haw hnuin Zonuni chuan a nau chu a fuih mawlh mawlh a. Ka lo ngaithla reng. "Naupangtêin pasal i nei dawn a, heta i awm huat huat ang khan i awm thei dawn lo tih hria la, an chhungkua an khawsak a sang bik lo va, inah i tihtheih ang ang ti ang che. Kuhva leh meizial pawh i khawih leh duh chuan bulṭanna ka pe ang che. In chhung chet phei chu i kutah dah tawp la, i naupai len hma chu a lo hrehawm deuh a nih pawhin chhel takin tuar hram hram ang che. I pasal bulah vuiin a chhungte rêlsak ngai suh. Ka bulah pawh rawn vui a ngai lo, a chhungte nen in inkarah eng emaw a awm a nih pawhin ṭhat chhuah hram hram zawk rawh, thatnaa hneh theih loh an awm mang lo. A hmasa berah chuan inngaihtlawm hi a ṭha ber,. Tin, i pasal saw mipa ṭawng tam lo, a lungawi lohna pawh sawi ve mai mai lo tur chi a nia. I tihlawm thiama i duata i ngaihsak a ngai a nia, a hnathawk banin i lo awm ngei ngei a ngai, a thawmhnaw inthlakna pawh i dah chhuahsak thlap zel ang a, chutiang taka i ngaihsak ṭhat chuan nakin zelah engpawh tawk u la, i lamah a ṭang zel ang. A hauh chein chhang lo bawk la..Tlan tauhna nei tawh lo anga inngaiin a nuam leh hrehawmah pawh damchhungin i pasal vawn tum ang che. " Tiin. Ngaihnawm ka lo ti viau. Nupui pasala insiam hi risk a nihna lai a awm ve a, inngaihzawn lai chuan thup chin kan nei ngei ngei, han inneih chiah hian a lo lang chhuak a, kan ze inmil lohna laite han inhriatsak takah chuan khi a awm mai ṭhin. 

Chutiang chuan Biteii tel loin Zonuni pawh a khawsa ta rek rek mai. Ka zêp lo mai ang, kan in aiin a inah ka chengkual tam zawk. A chhan chu amaha awmtir kha ka khawngaih bakah ka ngaihtuah tlat a ni. Tunlaiah misual, pawisak nei lo kan tam tawh si a. Ani pawn min thlahlel zual a, nupa kan nih lohna chu sex kan hmang lo a ni mai. Hmana ka fight hnu khan vawikhatmah ka tum leh tawh lo, sex tel lo hian nghet takin a inngaihzawn theih a, a rinawm theihin a hlimawm em em thei bawk tih ka hrechiang ta khawp mai. 

Police lam pawh an ngawrh zual viau ni ten kan lo hre ve a, a lawmawm khawp mai. Amanda vanglai kha la nise zawng amah ngeiin he case hi a khawih ka ring a, a hlawhtling tawh ang mawle. Case IO Pu Rinawma pawh hi a hmingṭha ṭhin viau a, tun case erawh hnuhma leh han chhuizui theih a vân êm avangin an la hlawhtling rih lo a nih hmel. Ngawlveite Rûn-a an hnathawkte pawh an be leh vek a, Director berin, "Atea chhuah phalna kha ka pek a nia,. A natna vang a ni" a ti mauh mai si. Martina pawh a lo awm ve tawh a, an lo hre viau. "Mi fel tak a nia, a zu in kha a sualna han sawi theih tur a ni mai. A awm rei hnuah phei chuan a thuawih pawl leh lo lut tharte pawh lo dawngsawngtu ber a nia" an ti..a ni thei ang, Martina kha misual tak chu a nih ka ring lo. Zonuni ex a nih avangin han mil vak lohna ka nei a ni mai. A ruang an hmuhna guest house-a cctv footage an han en nawn leh dawn an tia, hmuh an nei ang nge maw. Keini tan chuan hriat ve ngaihna a awm lo. Min hrilhna chhan tur a awm lo miau a. Zonuni nen ngaihtuahna thar kan nei ta a, Kan nau Ruatkima ka hrechhuak ta. Ngawlveite rûnah hian phone a ken luh theih a, mahse, khawih hun bik an siam thung. Ka be pawp ta vat, "Kha lai hmuna senior ber pawlte kha kawmngeih tum la; Zothansanga, Atea tia an koh ṭhin chungchang hriatchian lo tum teh. Hmanni deuha a ruang an chhar kha..mahse, hetianga kan inbiakna hi sawichhuak miah suh" ka ti ta a. Ani pawh zu a nghei chho tawh a, a rilru a fîm tawh viau. Ka bialnu nau a nih avanga kan chhui ruk thu pawh ka hrilh ta vek. A phur ta viau mai a, ani hi zawng Sherlock Holmes atchilhtu kha a ni ve bawk a. Eng tak ang ang i maw. 

Hetih lai mêk hian Duatpuia piancham a lo thleng dawn ta. Kum tin kan lawmsak ziah avangin kumin pawh a phur leh ṭan hle. Aniin cake a leisak dawn a, kei erawh chuan a awh em em skateboard leisak ka tum. A pa leu luau hian engmah leisak nachang pawh a hre lehpek lovang. Nikumah pawh kut ruakin a rawn haw a, ani a fapa birthday a ni tih a lo theihnghilh daih. A hmaa kan sawi rik laiin a awm ve lehpek lo bawk nen. Duatpuia thin a rimin a pa chu sual a ti em em a, ka û inthiamlo lutuk lah chuan a tukah cycle leh toys dang tam zet a rawn leisak rûih mai. Duatpuia pawh a hlim ve leh ta chauh. Ka nu pawn a theihnghilh leh a hlau nge, "Naktuk kha Duatpuia birthday a nih kha..kut ruak te khan i rawn haw leh nulh ang e" a ti sek mai.

"Ka hria, ka khum mawngah ka tar kuau alawm le. " A lo ti hmuk a. Engtin nge a lo tar tehreng kan hmu chakin kan va en a, lian fahran hian "17 July, ka fapa piancham" tih hi lehkhaah a lo ziak kuau a. A tar vah mai. Theihnghilh chu a hlau tawh takzet. 

"Eng nge leisak i tum?" Ka nuin a tih chuan, "Chutak chu ka la ngaihtuah, eng nge a mamawh nia i hriat?" Tiin ka nu a melh a. Ka nu lah chuan, "A mamawh ber maw..NU a mamawh, Nu" uar fê hian a lo ti zêk a. Ka û chuan, "A nu tur ka rawn hruai dawn alawm. Chaw eiah ka sawm. " A ti ta mai a! Ka nu a meng phâwkin a va phur si êm. Keini tak pawh kan lo phâwk. "A nih chuan khawmpui a hnai tawh a, suit leisak rawh, kan dah ṭha ang a. " Ka nu chuan a ti a. Ka u pawh a bu ve nghut mai. Zonuni pawn chaw a rawn ei dawn a, Duatpuia ṭhiante bakah ka nî te chhungkua kan ni dawn a ni. Tlaiah chuan ka û te nghakin kan kim ṭhap tawh. Tepuii te nufa bakah ka nu ten rawng an bawl zo diam tawh bawk. Sa chikim an siam bawk a, kan tlai viau turah ngai ang. Ka û te pawh an rawn thleng ta, hman zana ka hmuh ngei mai nen khan an rawn inchhawm lut ta ngei e. Ka nu ka va melh zauh a, a lo en chîk ngang mai. Ka û chuan laih hmel zet hian, "Hei ani hi Nunhlupuii a nia, Hlupui tiin ko mai rawh u. Hei, ka chhungte" tiin a bialnu chu a melh zuk a, Hlupuii chuan hlim hmel tak hian ka nu leh pate chu a chibai a, kan inchibai lai chuan ka mitah tak a melh a, a tê na vang vangin a zahawm reuh khep mai. Zonuni a chibai lai chuan, "Kan monu hual a nih kha..nang aiin lian mah se; i nau tur" ka û chuan a lo ti zauh pek a, chu chuan kan boruak a tinuamin a tizângkhai hawk mai. Zan lamah cake chu zai tur a ni bawk a, naupang ho an rilṭam tawh bawk nen, chaw ei an siam zui ta nghal a. 

Zonuni'n, "I lem leh pek ange aw. " A ti nasa mai a, "Ka ngam bik teuh lo mai" ka lo ti sur sur. Kan puar tlang hlawm ngei mai. Hlupuii pawh chu a ṭawng ve duhin a titi a zangkhaiin a nui ar ar reng a, hmuh a nuam ngawt mai. Zonuni nen an zia chu inang lo tak a ni. Zonuni hi chu a mûk mah mah ṭhin, bakah a ṭawng tam loin sawi tur hi a hre lo ve thei sia. Mahse, ka hmangaih em em thung si. Eikhamah an insingsak fel zawhin Duatpuia pawh present kan pe sap sap a, a lawm thiam ngei mai. A pa pawn ka nu chah angin suit nalh zet, ama thlan chu a ni hauh lovang..chu chu a pe a, Hlupuii pawn a pe ve..Cake zai thleng Zonuni pawh a awm ve a, kan hlim viau e. Duatpuia pawh a nui var var reng mai. 

Ka û bialnu kan hre ta a, a tukah ka nuin a zawt chiang ta ngei e. "Pu Saiṭhuama fanu a nih kha. Tuna a nupui fa ni lo, a nupui hmasa zawk fanu.." a tih chuan mak tiin ka lo melh hrâwk. Pu Saiṭhuama ber kher maw?! An hausak tehreng nen, engtin nge ka û chu a duh theih zawk? Pathlawi lehnghal. A mak hle mai. Mahse, ka û hi a hmelchhe lo va, a palian bawk nen, hmeichhe ho hian an star ṭhin viau reng a ni. 

"Tuna ka thawhna hi Pu Saiṭhuama ta a nia, chuan ngawlveite rûn pawh khu a ni bawk" ka lo ti a. 

"Ni e..a pa hi a hausa a, ani erawh a hausa ve lo" a ti nulh roh a, kan nui hak. 

Ka pa chuan, "Anni ang te chu kan cho phak êm dawn mawni le? Mama" a lo ti charh charh a. 

"Cho phak loh an awm thei dawn em ni? Mihring vek alawm kan nih" ka û chuan a ti nghut. 

Ka nu paw'n, "Amah kha chu a fel hmel ka ti reng, mahse, keini ang inah chuan a mo thei dawn mi? Duh duh nei thei, ei thei, awmpui ten engkim an tihsak a nia" a ti ve duah a. An hausakzia hretu tan chuan hetianga an ṭawng pawh hi âwm ka ti viau. Mama chuan, "Ka zirchiang rei tawh a, min nei thei turah ka ngai" a ti leh hmiah. Ni e, a zirchianna kha a rei ve thawkhat tawh a, a inringtawk viau chu a mak lem lo. "Amah kha chu a fel reuh ka ti, han chapona pawh a nei vak loin ka hria" Sateii pawn a lo ti ve a. 

Mama'n, "Ka hrual nasa tawh alawm, a chapona zawng zawng ka hnukhniam vek tawh a" a ti awlsam êt. A duh chin bak lo hi chu sawi a tum si lo va, keini pawn kan zawt dilchhut duh lem lo. 

Zonuni bulah Hlupuii chungchang chu ka sawi ve a, mak a ti ve hle. "Pu Saiṭhuama te chhungkua hi ka hrechiang vak lo. A fapa pakhat zawk Jerry-a hi chu a Hotel avang hian ka hre ve a, fa engzat nge a neih pawh ka hre lo" a ti a. Kei chuan Jerry takngial pawh chu ka lo hre lo. Ngaihven loh lam hi chu a hriat loh theih viau mai. Chhun chawlhah Fela te nen Pu Saiṭhuama chungchang kan sawi chhuak a, tah chuan an chhungkaw chungchang pawh kan hre tam ve ta deuh. Pu Saiṭhuama fanu upa zawk driver lo ni reng tawh Ropuia chuan a lo hrechiang ngang mai a, ani hi hetah pawh driverin a rawn thawk leh tho a ni. A thawhna ṭhin Pu Saiṭhuama fanu kha phaiah a chhuk tak vang pakhat a nia. Tihian a sawi a, "Tuna a nupui saw a nupui pathumna a nia. A nupui pakhatna nen khan fa pakhat an nei hman a, an upa ber mipa, Tuna Zarkawta Hardware dawr lian lutuk neitu saw. Chuan, an inṭhen a, an inṭhen chhan an sawi ruk danin Pu Saiṭhuama kha a lo lerh ve deuh a niawm e, ngaihzawng neih a ching a, chuvang chuan an inṭhen an ti. Chuan, a fapa erawh Pu Saiṭhuama'n a awmpui a, a nupui pahnihna nen hian fa pathum an nei leh a, mipa pakhat leh hmeichhe pahnih. An upa ber hmeichhe driverah chuan ka ṭang ṭhin, a pa sumdawnna chhunzawm a tum a. Mahse, thawkkhat lai khan a pa nen inhmu thiam lovin Goa-ah a chhuk ta daih a, sumdawnna eng emaw a zuk buaipui a niang, amahin flat zau tawh a nei a, pasal pawh hnamdang a nei ve zuai a niawm e. Mahse, chu aia thui chu ka hre bik lo. Chuan chumi nau mipa Jerry chu Jerry Hotel neitu hi a ni ta a, an tê ber hmeichhia erawh a pa hian a sumdawnna lama hrual a tum viau naa, an inchai hleithei lo nge ni,.eng ber nge tunah hian a tih ve pawh ka hre lo. A te ber a ni bawk a, an duat ve viau a, an duat sual ve deuh pawh a ni maithei. Chuan a nupui pahnihna chu a boral a, heart attack-in a boral a niawm e. Chuan, tuna a nupui hi chu nikuma a neih chauh kha a nia. A fapa Jerry nen an inrual vel lek ang..Tunah hian phaia awm tih loh kha chu an la khawsa ho vek, a fa hmasa, hardware dawr nei pawn nupui neiin fa pawh pahnih an nei tawh. An monu lah saw a fel em em lehnghal. Anni nupa sawn chhungkua an khaiding ka ti mai,. Pu Saiṭhuama a tar ve deuh tawh nen, a nupui lah a la naupang sia, a sum duh vanga nei a ni bawk a. Pu ber saw a boral hunah an la buai ve laih maithei, mahse, pa fing tak a nia, engkim a rel fel thlap chu ka ring.." tiin. A sawi chipchiar bawk sia, a ngaihnawm tho bawk si. Ka û bialnu hmel ka mitthla rauh rauh mai. Engti tiha intawng ve tak ni ang maw!

Tar enkawlna hi Distric capital dangah pawh din tum mêk a ni a, inzarpharh an tum khawp mai. A ṭha, thil ṭha hi chu intihhmuh zel a ṭha mai. 

Zana Zonuni te ina ka va leng chu ka rin loh deuhin Valtea a lo ṭhu ve run a, "I ṭha maw?" Ka ti ve ngial. 

"Ṭha chu a nih hi..hei ka'n teithla ve lawk a nih hi" a lo ti dam dup a. Titi phungleng sawiin Numami chungchangte kan sawi ta mai mai. A ke lem pawh a hmang thiam tawh viau a, in chhungdung erawh a la pel duh rih lo. Zonuni hian a pui ve nasa a, an inpuitawn nasa khawp mai. Valtea chu thingpui kan in zawhah a haw ta a. Zonuni ngaizawnga rim ang pawn a lang lem lo. A no sil rawn let chu ka bulah a rawn ṭhu a, "Enteh, i rawn phei hmaa ka dawr han kal lawk kha ka sawithiam si loh hian ka hlau tlat a nih chu. Min thlir rengtu awm tlat ang hian ka hria a, sawlai kawr phei saw chu ka tlan tawp alawm" a ti mawlh mawlh a. An in aṭanga dawr hnai ber hi 5mins kal vel a niang,. Mahse, dawr nen an inkarah in din lohna kawrtê a awm a, street light a awm avangin a hlauhawm hran loh. 

"I ngaihbel a ni lo maw?" Ka ti a. 

"A ni maithei. Keimahah hlauhna a rawn awm thut alawm" a ti ve mai a. 

"I fimkhur hi a ngai, nangmahin i khawsa tawh sia, mut dawnah te hian engkim endik tha leh vek zel rawh" ka ti nuah nuah a. 

"Chu chu lawm..ka endik ve reng aw. Thlahrang leh ramhuai tih vel chu ka hlau hran lo, mihring hi kan hlauhawm tawh êm a" a ti a. Ka kuah hle hle mai. 

"Innei tawh mai ang" ka ti sup a. 

Ka beng bulah a thaw ham ham a, "Nakkumah law law ti ila, hei kum chanve kan pel tawh a" a ti sep a. 

"Nangmaha i awm hi ka ngaihtuah che a ni" ka ti mar at a. 

"Ka hria alawm,. Bakah Biteii'n a nei chauh a, keiin neih ve leh nghal kha thil mawi pawh a ni dawn mi?" Min râwn titih hian a ti a. 

"Mi ngaihdanah buai lo phawt ang. Awmpui tal nei la, duh an awm ang, hlawh tam vak lo pawn, tihtur a tam si lo va" ka ti leh hluai a, "Tunlaiah awmpui man a to tawh alawm, a tlem berah 7000 tal a ngai tawh. Chutiang zah zah thla tin senral chu ka ui" a ti melh melh a. 

"Sum khawl vak a ngai tawh em ni? Biteii nise inneih hnuah pawh kan ngaihsak thei dawn tho va,." A ngaihna hre vak lo hian ka ti a. 

"Ngai ve e, inneih hnuah pawh khawl ve zel hi a ṭha. Inṭhen thut te pawh thil awm thei a nia, bakah in ina ka lo awm hunah pawh midang tibuai vak lo va mamawh pawh mahnia inlei ve ka duh alawm. " A tih chuan, "I inthlahrung sa ê" ka ti hmuk a. A nui hawk hawk, "Inthlahrun lam a ni lo, hei hi midang pawn ti ve se a ṭha. Nakinah fate pawh kan la nei ang a, fate mamawhah pasal chhungte pur buai zel te hi mo tan chuan inthlahrun a na alawm. Nang chuan i hna hi a thawk reng thei maithei, kei erawh fa kan neih hnuah chuan ka thawk tawh kher lo maithei. Chuvang chuan tuna thawhchhuah ka la neih lai hian a tam thei ang ber khawl ka duh. Tin, Ka nu leh pa leh Atea te thlan lung phunte pawh ka la duh dawn a" ..a ti ta dap dap a. A han sawi takah chuan a dik leh thlup si. Hnial pawh a sâwt mang lo. Engpawhnise, Pathian zarah eng tawhsual mah a tawk êm lovang chu maw..

Khami zan aṭang khan kan hnathawk chhuak leh haw lam te, Home lama a dutynaah te pawh enthlak ni hian a inhre tlat a! Zuitu, uap rengtu an awm nia a hriat tlat thu a sawi ta sek mai. Kei lahin chutiang ka hre ve bawk si lo. Chu thil chuan Zonuni nun pawh a nghawng chho lo thei lo va, a dâwihzep chho ta riau mai. Zan khat phei chu ka va riahpui tawp..Biteii khumah ka mu a, engtin kan awm lo naa, chutianga a zual zel chuan a buaithlak chho dawn tlat. Vanneihthlak takin an in chungte chhung heta lehkha rawn zir, Pawl 12 zirlai Hriatrenga chu an in a chep tho bawk nen, a riahpui thei dawn ta a. Atea room kha a chang thei ta bawk nen, Zonuni thla pawh a muang suai suai mai. Hriata chu zawiawi deuh, lehkha zir peih zet mai a ni a. Zonuni ina chaw a ei ve chang pawh a awm. In chungte nen an inchhunna a lo hla ve deuh tawh bawk nen, Zonuni in chu nuam a ti zawk emaw tih mai tur a ni. Kei nen pawh kan innel fû mai. 

Ka chah ang ngeiin Ruatkima pawn thu thar a rawn nei ta. An home-a senior ber dawttu Bena chu a kawm tlangnel thei ta a, damdawi vanga awm niin a chhuak ve ṭêp tawh a niawm e. Ruatkima chuan Atea chungchang chu a sawipui ṭan mêk tih leh a hriat viau thu leh a khum bula a mut thu thlengin a lo sawi a, a tihzia dawn e. A thi tih pawh kha a lo hre ve a, mahse,an hotuten , "Hetah awm ve reng reng se a thi lo mai tur" an tih thu te, "Atea'n natna benvawn a neih awm ka hre miah lo. A suffer kha a ni mai. Hrehawm chu a ti khawp mai a, mahse, natna dang a neih awm ka hre lo" a tihte chu min rawn hrilh ta a. Beng a vir chho ṭan ta hle mai. Thil inbat fuh lo chu a awm ta phawt, Ngawlveite rûna thawk te chuan Atea chu anmahni thu hmua chhuak ni lo awm takin an sawi tlat! Tin, a bula mu ngeiin natna benvawn a neih loh thu a sawi bawk. Ni e, khati khawpa an ina tal tam ka ni a, a ruihhlo tih bak kha Atea'n natna a neih ka hre lo. Ngawlvei hi natna anga kan chhiar dawn a nih chuan kha chiah kha a ni mai. Police lam erawh chuan Zonuni an la rawn ko lo thung. IO Pu Rinawma kha beidawng mai mai chi chu a ni lo phawt mai a. Nghak hram hram phawt ang. 

Asanga'n min rawn koh avangin Zonuni bulah zanin chu ka phei dawn loh thu ka va hrilh a, ani pawn, "Group fehchhuahah kal ve turin Maengi ten min sawm nasa sia, ka va kal ve ang e" a ti a. Kei pawn Asanga te in ka pan nghal. Group lamah hian ka tal na ve lem lo va, thawhlawm erawh Sateii nen kan group a inan avangin ka thawn ve ziah thung. Asanga te in ka va thleng chu rin ang ngeiin an lo inhau leh nasa mai a, Baby û Lawmi leh Nuteii leh Faktea an lo awm ve bawk. Baby chu ang hmuar hmuar chungin a insiam a, an inhauh chhan ber ka hriat loh avangin ka ngawi dûk ringawt. 

"Ka peih tawh lo, ka ning tawh. Inhauh reng hi. Ang hmuar hmuar lo khan i chhuah dawn chuan chhuak vat teh" Asanga chuan a ti nghut nghut a. 

"Ka chhuak dawn, ka chhuak chiang khawp ang. Min rawn ko reng reng suh ang che. Mi tenawm chhungkua nena inzawmna neih ka duh tawh lo" Baby lah chuan a rawn ti chiam chiam. Lawmi pawh chuan, "A thuhrimin Ruatsanga pawh i rilru a chhe lutuk reng reng, awmpui in mamawh reng a, in nu a rai a, in la buai dawn chauh. Kan chhungte an nih vanga duh loh kha ka ngaihdan a ni lo hrim hrim" a lo ti ve fak fak a. 

"Lo ṭawng ve lo la a ṭha" Asanga'n a ti chang fak. Lawmi pawh a ngawi chiang teh e. Baby chu bag nen a rawn chhuak a, a dul erawh a la puar lutuk lo. "Sum ka rawn chhuah dawn. Naktukah bungrua kan rawn la ang, ka tel lo hian i awm thei nge thei lo kan hre mai ang." A ti nghat nghat a. Asanga chuan nuihzat hmel zetin, "A awm thei lo zawk chu koh lohin i rawn haw mai kha..aw le, kan lo inring ang ,in lo la ngei dawn nia. Nangni hmeichhe rorelna chhungkua nen inlaichinna neih ka duh tawh lo ve.." Asanga pawh chuan inringtawk zet hian a ti ve a. Nuteii te ber an ngawi bawk nen, ṭawng ka tum bik lo. Lawmi nen chuan an chhuak ta a, Lawmi'n na zeta kawngkhar rawn khar pahin, "Pasal nep lutuk" a ti nghek. An chhuah fel hnuah Nuteii chuan, "Bawiha, i chiang meuh maw? Inṭhen chu i thei tak tak ang maw?" A ti dam thlap a. 

Asanga chuan, "Englai pawn ka thei. In thu ka awih loh rah ka hmu a nih hi. A pawi ngawt mai" a ti hniam ruih a, "Eng nge in inṭhen chhan ni reng reng a? Min rawn ko ve bawk sia. Ka bo hû mai.." ka lo ti a. 

"Ekhai! In hrang kan chan aṭang chiah khan an chhungkaw ze diktak, mi ten an iai em em chhan ka hrechiang telh telh. Nu leh pa chan kan chang a, kei pawn puitling sawtin ka inhre ve. Kan indang ta bawk a a ti nge nau pawh tikhan a pai zui ve ta hram a. Ka hlima ka lawm tehlul nen, ani erawhin phurritah ngaiin a sawisel reng a, fa neih hahthlakzia a pai lai aṭangin a sawi der tawh a nia. Hei hi chu buaina em em a la tling lo. Ka putea fanu hian college a kal ve tawh a hostelah an dah ve renrawn a, a hriselna a tlakhniam bakah hostel fees a to deuh avangin , putea'n kan ina awm a rem em tih min lo zawt a, kan nu pawh ka râwn der ve e ka tia. A sawi pawh ka sawi zawh hmain, "A tul awzawng lo, awmpui pangngai an nih dawn loh chuan tumah awmpui ka nei peih lo. Mitmei venna tur a tam. I nuten an mamawh alawm, awmpui rawh se" a ti nghal hrep a. Keipawn nu berin a remtih loh chuan tiin ka nute ka bia a, kuminah Nu Mapuii fapa Valpuia an awmpui tawh avangin Putea pawh inthlahrungin keimah zawk min rawn ngen kha a nia. Mahse, kan naui chu ka nuten an awmpui thei dawn a. Kan sawi zui tawh lem lo. Hmanni lawkah Baby nî fanu Sihphir ami hi Computer zir turin kan ina awm turin Baby chuan a lo sawifel ringawt mai a. A computer zirna lah kan tumsak vek tur a la ni zui! Inrâwn derna pawh awm lo, kan nau awmpui pawh duh bik lote nau kha kan awmpuina chhan tur ka hre ta bik hauh lo mai a. Hetianga kan nêm zel vang hian a nia kan lakah an inlulin ṭhin. Ka remtih loh thu ka sawi chu an thinrim ta em em a, a nu ngei pawn min rawn ankhum hrep. "I nuten an fuihpawrh che a nih kha" tih angreng, inhauh nikhua apianga ka chhungte chhamtel ziah hi ka kham thawkhat reng reng. Tikhan kan inkar a ṭha lo chho a, a thinrim kual kha ka bulah te a mu duh lo a. Chhunah nise a nute inah a chho a, tlaia ka ban pawn a lo la haw loh chang a awm fô. Tiang khan kan inkar a hla telh telh a ni ber. Kei lah ka tlawm duh bik der si lo. An thu thua min kaikual thei lo hi an la na tlâng em em a ni ber, tihah chuan ka chhungte lamah nangmah bak rawn ngampaa rawn dikdak peih an vâng asin. Baby chhungte lam hmuh tur an awm reng a, an intilal thiam si, an rawn leng peih thin lo. Ka chhungkua vua leh vâng, Salemi te, Rinliani te ho an rêlin an hmusit em em a. Rilru na thei lo ka ni bik lo. Chuvang chuan zaninah khan kan puakkeh dun ta a nih kha. Kan inhauh chhan ber erawh Lawmi tan khan pheikhawk 4000 man leh ama tan puan 2500 man a lo chah a, keima pek turin. Vawiinah a thil chahna te chuan dawrah min rawn ṭhing a, pawisa hi kan hman khawp tur, kan thla khat mamawh lamna tur tawk hi a kutah ka pe ziah, engtin zozai nge a hman thin ka hre lo. Thla chanve pawh kai hmain min dil leh thin. Ka dawr bak eizawnna dang kan nei si lo va, sum pawh a khawl theih loh..sum renchem duh si lo, thatchhe si, che ṭawp bawk si..âaa. Bawiha, ka nei peih tawh ngang lo a ni. In bul a nia ka'n inbunthâwl ve a nih chu..midang bula sawi phei chu ka tum lo. " Asanga chuan a ti ta mawlh mawlh a. 

"A ṭha e. Ṭhen mai rawh, tak takin..in inpumhlen chuang lo vang" ka ti tawl mai. Faktea meuh paw'n, "Au Sanga chu ka khawngaih ṭhin alawm, eirawngte hi amah ngawtin a bawl a. Vawi 2 chu an in pawh ka va tihfaisak tawh" a lo ti nem ve thliam a. Nuteii paw'n, "Ni e, kan tihtheih piahlam hi chu tihngaihna a awm lo a ni e. Naktukah bungrua an rawn lak dawn chuan, Zosang, i nu pawh rawn phei ve teh se" a ti zung zung a. 

"Lo riak daih la, zanin chu" Tiin Asanga ka melh a. A nui hak ringawt. A khawharthlak ve dawn êmin ka hria a ni. Nuteii'n, "A ngai lo, tih loh lohte kha in va ti leh ang. In lunglen hnem dan a sitreet boy thei si" a lo ti vat. Min hrechiang tawh khawp mai. 

"Nia, zanin chu kan inah ka riak phei mai ang. " Asanga pawh chuan a lo ti ve a. An nupa an inṭhen ve dawn ta chu a ni reng mai. An daihrei zawk khawp alawm le. Baby thusawi ngaithla ta ila Asanga pawn thiam lohna tam tak a nei ang, an chapo dun lutuk a, tlawm zawk an awm loh chuan inlaichinna hi chu a fuh tak tak thei lo. A bul ber chu Baby pa nêp lutuk vang a ni daih thei, a nupui a ngam lo va, hmeichhe rorelna in chhung atangin an fate an seilian a, an nu ang rilru pu ta chuan mipa ngaihnepna leh thuhnuai tumna a hring a, pasal an nei hleithei ta lo. An duh duha an sawp theih loh avangin an thlawi thup dawn ta a nih hmel. Chhungkaw inrelbawlna dik hi a va pawimawh êm, hmeithai te an nih ngawt loh chuan pa ber hi roreltu a tan an tlak, zu ngawlvei rui thle mai mai anga kan ngaihte pawh nupuiten pa ber an nihna anga an zaha an rawn der thiam zel phawt chuan rorel tlak an ni zel tho. Hmeichhia hi chuan rorelna fawng vuan tur meuh chuan mipa thluak hi chu an la phak lo deuh zawng a ni. Zonunpari pawh hmeichhia azawnga induhtawk, a duh changa chapo thiam tak, thinlung sak leh nghet tak nei a ni naa, a hunah chuan hmeichhia takin a noin a pangchang thiam a, mipa ka nihna angin min ringtawk a, mawhphurhna min pe ngam ṭhin. Hei vang hian hmeichhia a nihna angin ka zah a, ka chhuang rilru ve thin. 

Asanga te inṭhen chu Zonuni pawn pawi a ti ve hle. Hna ka thawh laiin a tih loh dan deuhin a rawn kal a, "Vawiin chu kan âwl ve lutuk" a ti a, a nui var var bawk. 

"Tikhan lo leng ve rih rawh, ka zo ṭêp" ka lo ti vat a. 

"Ih, i nau kha be leh teh,. Martina kha hria an awm ve em? Tih zawt teh. Chu chuan min mawlh tlat" a ti hmawk hmawk a. A rilru kaptu hi chu sawi vat vat a châk ziah ṭhin. Ruatkima chu ka call ta nghal a, thingpui an in lai tak a lo nia. "Martina, hmannia thi ve tho pawh khata awm tawh kha a nia, an hre ve em tih lo ngaihven leh la, Atea thihna nen hian a inzawmin kan hre deuh a" ka ti nghal zung zung. Chutihlai tak chuan tar ho mahnia insaseng hleithei lote chawisawna puitu Pu Rama hi a rawn kal phei mêk a, ka awki pawh ka tihniam nghal. 

"Aw le..ka lo zawt ang, a hming chu an sawi ri tawh tlatin ka hria" Ruata pawn a rawn ti ve a. Kan dah nghal daih. Pu Rama chuan, "Papar, Pi Khawliani BP hniam kha eng nge a an tak zel?" Tiin a lo zawt a. Hetah hi chuan Papar tia ko an tam zawk. "A ṭha tawh lutuk, Teteii'n a enkawl a. " Zonuni pawn a lo ti ve var. Pu Rama pawh a kalsawn zui nghal. 

Zanah chuan, "Lo phei vat teh, Hriatrenga a haw sia, ka awm a nuam lo riau" a rawn ti thut thut a, a hmanhmawh hmel kher mai. 

" Yes boss" tiin ka inthlak a, ka chhuak tur chu ka nuin, "Pu Zamawia lehkha tur hi kensak nghal teh" a rawn ti. Ka va la leh zuai a. Ka phei zui nghal. Numami pa lehkha ka va dah chu an nuin, "Nei vat teh. A khawngaihthlak" a lo ti nghal chûl a. Ka nui sun sun ringawt. "Ka ti tak tak a nia. Bakah tunlai chu a dawih zual deuh nge ni? In a thlen rualin kawngka a kalh a, len pawh a inthlahrunawm zawk" a ti mawlh mawlh a. Ka hmanhmawh deuh si avangin thudang a sawi leh hmain ka chhuahsan ta mai. Ka zu thlenthlak chuan , "Numami ten chawhmeh min suah a, ka han suak kha a thim deuh chhulh tawh. An in piah lawk zun in bulah sawn lukhum hmathlawk khum, palian lam, a dum veka inthuam hian min lo thlir vang vang a, ka hlau vek tawh. A hrehawm ka awmdan hi" a ti khur dar dar a. A ṭah a chhuah hmel hle bawk. Ka kuah a, a sama chul pahin, "Ka awm alawm, engtin mah i awm lovang. A ṭha vek ang. " Ka ti mawlh mawlh. 

"Ka inngaihtuah nasa lutuk te pawh hi a ni maithei" a tih chuan, "Inentir ang aw. Inrinni chawhnuah Dr. Hrekima pan ang. " Ka ti ta a. A rilru buaina leh hlauhna hi a nasa zual zel si a, a mu ṭha bawk si lo, a taksain a tuar nasa lutuk dawn tlat. 

"Nia, i tihdan dan" a ti thliam a. 

"Zanin chu ka riahpui ang che." Ka ti hmak bawk. Min hnial lo hrim hrim. Dar 8 velah a khumah mu tak tak loin kan tlu zal a. A fawh pawh kan infâwp nasa..kan infawh laklawh laiin choka lam tukverh invaw ri ṭhuai avangin kan inla hrang nghal vat. Rang zetin ka tho va, ka va endik nghal,. Thli thawin a lo chhem a lo nia, a chaw ei laia a hawn kha a lo la kalh lo a lo ni. Ani chu a ṭi dui tawh. Ka khawngaih si, tih vak ngaihna ka hre bawk si lo. Ka mutpui leh a, ruah a rawn sur tak avangin puan kan sin a, taksa insi reng leh infawh mawlh mawlh takah chuan hnuailam chuan chet hun a rawn hai lo nasa mai. Ka insûm zo ta mang lo va, ani pawh min thlakhlelh vang nge a inthlahdul ve tawh zawk ka tih ang ang chuan a awm ve zel si. A tawp thlen mai ka hnial ta lo, "Zonun, i chiang em?" Ka ti sup a. Ka aw pawh a khur deuh. Meng de sawr sawr chungin.."Ka hre lo" a ti ṭiak a. Ka fawp zui hmiah. Engtin pawn ka lakah awm se ka nei dawn tho a, engmah ka pawisa ta lo a ni ber. Pumkhata kan han insiam takah chuan ka hmangaihna zawng zawng hi amahah a inchhunglut vek ni hialin ka hria. Ka va hlimin ka va lungawi si êm..!

Zing dar 5 velah ka tho a, mi hmuh tam hmaa hawn ka duh vang a ni. Ama duhdan pawh a ni ve tho. Kawngka ka hawn chuan Envelop uk hi a lo let ngât a. Inthlahrung ru deuhin ka hawng ta ngawt. Zonuni erawh ka kaitho duh ta lo kha a nia..lehkha phek sei it êt, hlai vak lo hi ka phawrh a. Chutah chuan thuziak dangdai deuh a lo inziak..

"Tum buai tawh lo la, i pasal hual leh a chhungte pawh an him ang" tihtê chauh hi.