PARCHUAILOVI 1

PARCHUAILOVI.. (1)

Ziaktu : Toni Râlte

Kal kawnga motor tleh dul dul bakah kea kal mipui insulpêl zut zut karah chuan thin tâwt leh dawhthei lo zetin ka motor steering vuan chungin ka phun hluk hluk mai. Boruak lah chu a lum hulh mai a, ka mood chhe ṭawih zet avang bakah traffic lo jam ve chhên chuan ka thin a tiur hlur tawh. Ka phone pawh a vawi 8 nan a rawn ri leh ta. Ner nawk chungin ka la a, "3 mins-in i tlai tawh a nia" ka aw hriat ṭhan zet chuan a rawn ti leh. "Ka hria, ka ning ve tho" ka ti nghut a. 

"Midang pawh an la kim bik lo, hahdam rawh" a rawn ti lawi a! Ka awm a tihnawm phah chuang der lo. Engmah sawi tawh lo chuan phone ka hmet hlum a, hmalam ka pan leh nghal. Vawiinah hian hna pawimawh tak thawh theihna chance ka nei a, bawhpelh loh hram ka duh a ni. 

Zosangliana ka ni a, Zosang emaw Zova tia koh ka ni ṭhin. Kum 30-na ka hmang mêk a, Venghlui, Aizawlah kan chhungkuain kan khawsa mêk a ni. Ka pa pa ka pu hi Aizawl mihlun inti te chuan a hming chauh zawng an hre maithei, Vanrammawia a ni a, Sumdawng niin an vanglai chuan khawsa nuam ve pangngai tak an ni ve âwm e. A sumdawnna erawh ka pate unau zinga naupang berin a chhunzawm a. Ka pate hi unau 6 niin mipa pali, hmeichhe pahnih an ni.Ka pa hi a upat dan aṭanga chhiara pathumna a ni. Ka nu erawh East Lungdar khawchhuak a ni a, anni unau erawh pathum chauh an ni thung. Keini unau hi pathum niin upa ber dawttu ka ni. Ka û hi pathlawi a ni a,Private School-ah a inhlawh ve ṭhin, a fapa Duatpuia kan awmpui bawk, ka nau erawh zirna lamah tui mawlh hek lo, class xii a pass hnu lawkah Malaysia-ah maid turin a kal ta rup a. Nikuma a lo hawin ka nuten kal an remti ta lo va, a sum khawlsa hmangin thawmhnaw dawr changtlung tak a nei ve ta a, ani hi chu a ngaihtuahawm loh. Ka pa hi kum 2 liamtaah khan stroke vangin a bawksawp a, a hna pawh thawh zawm thei loin a pension zui a. Ka nu erawh house wife a ni. Ani hi awm lose chuan kan buai ve fat fat khawp mai. Tichuan, kei hi a hminga master degree nei mawl ve tawp, kan chhungkuaa sum la lut ve lo awmchhun ka nia, School-a han inhlawh lâwp lawp changte chu ka nei ve a, sawrkar hna lah han beisei ve ṭhin mah ila; keini aia thiam leh laktlak zawk hi an lo kuh ṭûn zel si. Mi ten 'Family black sheep' an tih ve kha ka ni reng reng a. Chutia va suala va rui bûng bûng chi ni lo mah ila; thawhchhuah neih mumal loh chuan a nuam tak tak thei lo, mi min thlirdanah pawh ka mi chuang bik riauin a lang. Chuvangin vawiinah hian kum khat liamtaa din Tar enkawlna, Old age home kan tih ang deuh hmuna thawh ve theihna chance ka nei mial a! Ka ṭhianpa Opa leh he Home-a thawk leh a fawng vuantu pawimawh ve tak hi cousin an ni a, Opa min sawipuina azarah chu pa chuan interview min neihpui dawn a ni. He Home-hi mimal enkawl a ni nain hlawh a ṭhat bakah an hah lutuk lo va, Opa hian ka thawh chi taka a ngaih vang pawh ni lovin ka thawh tur duh lutuk min manganpui ve lutukin min sawihmuh a ni. Kei lahin ka lo hnial hauh si lo va, bakah he Home ṭhan chakzia leh an lunzia ka lo hre ve bawk a, sawrkar lam pawn an ngaihven ṭan viau tihte, ka luh ve theih hlauh chuan a lawmawm dawn êm asin. Ka bike a chiankuan loh avangin ka u motor ka hmansak a, Bike chu keng ila ka thlen tawh ka ring. 

Zemabawk dai, reh raih maiah chuan Tar enkawlna chu a lo ding luah mai. Kawt zawl zau tak bakah tar hote tana infiamna chi hrang hrang hmanrua a lo inhung fur a,. Pangpar huan lian vak loa ṭhutthlengah chuan pitar leh putar te hi an lo inkawm melh melh mai. An titi mûk hmel angreng viau. An hmuhnawm letling zawk e a. Opa min lo nghahna hmun ka va thlen chuan, "Lut nghal ang" a lo ti vut a. Sawi hmaih loh tur chu tar enkawlna hi Aizawl pa lar tak tak pathumte inthurualin an din a ni, sumdawnna a nih piahlamah lehlam zawng tak chuan upa tawh lamte tan an hlu ve tlat. Tunlai khawvelah mi kan buai tawh em em a, kan nu leh pa, pi leh pute kawm hlim hman pawh kan awm tawh mang lo, hei vang hian khawhar reng rengin ni an vuiliam a, hetianga anmahni leh mahni inkawmhlima ṭha taka enkawlna an dawn theihna hmun a awm hi thil lawmawm tak a ni. Zing dar 8- 9 ah an lut a, tlaiah dar 5-6 inkarah an haw leh ṭhin, school naupang ang deuhin zing leh tlaiah bus-in a thiar kual ve ṭhin a ni. Awm man erawh a tlawm lem lo, thla bîa pek ve a ni a. Mahse, ṭhenkhatin, 'Home-a dahte chu ka duh lo. Kan nu leh pa an nia' tiin ṭankhawh viau mah se; He home-a nu leh pa, pi leh pute dah thei lo nih zak an lo awm ve lawi a. An intihhmuh chho ta zel chu a nih hi,. Tarte tan erawh he lai hmun hi an tam vanram a nih ngei ka ring. 

Opa cousin palian zet mai, sek ṭul chuan min lo dawngsawng vat a. A hmel nelawm loh aiin a ṭawngkam a dam thlup roh a, keipawh ka inthlahdul ve thei ta deuh. Thu ho angreng tak tak min zawt a, a hnuah "Hei kan hnathawk pakhat hi chhungkaw problem vangin a ban a ngai tlat a, chuvangin a aiawh tur kan mamawh ta a ni. I thawk a nih chuan i tihtur chu nitina an mamawh lo endika ngaihtuahsak a ni mai. Sum khawihtu i ni dawn tihna a ni mai. Suma i rinawm ka ring a, Opa hian a recommend ṭha êm che a, amah vangin ka ring ang che. Sum lut chhuak ziahfel leh an mamawh lama chhuah te a ni dawn a, i hna i semzai thiam chuan i hahdam a ni mai.." a ti mawlh mawlh a. Hei hi chu ka hre sa hrim hrim, MA-ah Economics ka la ve bawk a, sum chevel han khawih kual chu ka tlin ve theih mai an ringte pawh a niang. Keimah zawk hi ka inring zo chiah em ka hre lo thung. Suma ka rinawm loh vang lam ni lovin ka haihawt leh ka ngaihsam lutuk te, eng emaw changa ka lo lem ve hlek ṭhinte hian min ticonfi lo zo a ni ber. Mahse, hna ka mamawh a, tuna ka dil mêk hi hlawh a chhe lem lo. Private school-a inhlawhte aiin a let fêin a tam ang., Tiang a nih chuan in chhungah pawh ka inthlahrung em em tawh bik lovang chu. Tichuan, a awlsam thei ang berin kan intifel thei ta a. Naktuk aṭangin ka zawm dawn a ni. 

Chu pa Zorema chuan an home-a thawkte leh an kalphung min hrilh ve malh malh a. Uluk zetin ka lo ngaithla ve. He in-ah hian hnathawk mi 20 bawr vel an awm a. Nurse pathum leh doctor, lânga rawn ṭhin 1, eisiamna lama thawkte an tam ber a, room tifaitu an ni leh a, mahse, Zorema chuan hnathawkte pawh an inpawh viau thu leh kei pawn nuam ka tih vat tur thu a sawi tel zauh a. Beisei ang,. Ka duty-na hmun tur, pindan te fel at mai, Computer bakah ka mamawh tur thildang lo awm thlapna te chu min kawhhmuh a, rilru a hlim ṭan ta hle. Mite ngaihah hna sang ni lo mah se; ka hmuh ve chhunah hian ka lawm. Opa chungah tak pawh thinlung takin ka lawm takzet a ni. 

Opa chu ka rualin a haw ve nghal a, ani pawh a motor workshop-a a dahluh vangin kha lai hmunah khan Zorema rualin a lo va kal a lo ni. 

"I mood chhe zet kha engvang nge a? Ka rawn call che khan ka hre nghal" kan tlanchhuah hnuah a ti a. 

"A ngai" ka ti bung nghut. A aw a thian kharh a, "I peih ka ti" a ti leh ringawt. Mahse, a sawi awmzia ka hre lutuk tlat. Opa nen hian tette aṭanga inkawm, veng danga min pemsan hnu pawha school inang khera lut dun zel kan ni a, unau ang mai a ni. Kan mimal nun, chhungkua thlengin kan inhriatsak vek bawk. Anni hi chu an hausa a, a nu leh paten hna an neih ve ve bakah Opa û te lah hna sang thawk an nia. Amah Opa hi a naupangber a ni bawk nen, an duat rawn ve hle. Mahse, mi rilru ṭha, anni aia dinhmun hniam hmusita chaldelh chi a ni ve lo va, kei nen pawh a mei leh a tak ang maiin kan inzui chawt zel mai a ni. 

"Ka peih vang a ni lo. " Ka ti a. A chek hluk, "Chiang deuhin hrilh ta che" pawr angreng tak hian a ti a. Ka nui huk ringawt. A thurawn chuan awmzia a neih lohzia amah ngei pawn a hria ang. Ni e, ka mimal nunah buaina ka tawk ve reng mai,. College ka kal aṭang chauhin ngaihzawng ka nei a, mipa zei tia sawi ka ni ngai lo. A hma phei chu mi chut, ṭawng nachang pawh hre lo an tih ang kha ka ni. Ka mawl tel lehzel bawk nen,. Hmeichhe tan khan ka lo va boring dawn ka ti ṭhin. Mahse, MA ka han zir takah kha chuan tlemin ka ze ṭhing zet kha ka paih ve hlek hlek a, Bialnu pawh pahnih ka nei hman. Ka zawh hnuah ka tluan loh deuh avangin ka âwl ta vang vang a, ka beisei loh tawp thilin min rawn tibuai zo leh ta si. Ka nî, ka pa nau zawk Ni Thari fanu Rinliani'n tihtaktêin min han atchilh ta tlat a nih kha..! Khawvelah hian thleng thei pawha kan rin loh hi a thleng fô mai si a. Chu chu a nia Opa nen kan sawi lai mêk kha. Ka pa damloh aṭanga inṭan niin ṭhenawm lawkah an awm bawk nen, chhungkhat ni ta bawk si chu kan inchenchilh tam lo thei si lo va, ani pawn a duh vanga min ngaizawng a ni bik lovang. Min fiam mai mai emaw ka tih laiin a lo ti tak nasa si a, zahna bosalin pawisak reng a nei ta si lo. Ka buai zo ta a ni ber. Rinliani nen hian kum khat chhuak kan ni a. Ka nite nen hian kan inhnaih deuh vang nge kan inpawh lehzual a, Ka pa unau dangte erawh veng danga awm an ni bawk a, chuti lutukin kan inpawh ve lo, mahse, chhungkhat nge nge chu chhiat ṭhatah kan lo inhre viau zel tho. Rinliani tak hi chu Pa Muana, ka pa te unau zinga upa ber hna avanga Delhi-a awmte bulah a graduate thlengin a zuk awm a, Hotel management te zir leh rihin reitak hnuah Mizoram a rawn chuang chhuak a, kan inhmu lo rei ve khawp mai. Ka pa a han bawksawp a, ani nula fel leh vengva, chhungkhat ni bawk chu kan inah a rawn chengkual tam a, tah khan min endan a lo danglam ta a niang. Reitak a inzêp ve nghe nghe, mahse, bialnu nei ve leh tura rilru ka siam lai mêkin a rawn inpuang a. Ka hau hrep nghe nghe, mahse, beidawn a tum der si lo. Hotel lar takah a thawk zui ta bawk a, vawiinah pawh khan, "Zanin tlaiah dine out ang aw. Ka âwl ve lai a nia,. Lo inring ang che" a rawn ti lehpek a,. Kei traffic jam-ah ka tâng reng bawk nen, mi zaidam ni ta bik lo chu, "I hneawm" ka lo ti bawl pek a. 

"Piteii ka be mai ang" a lo ti ve hmak bawk. Ka chhungte hrilhah hian min vau ziah a, ka hlauh vang pawh ni loin ka nîte nen kan inkar a chhiat phah ka hlauh vang zawkin ka la khap ṭhin. A chhan chu ka nî pasal Pa Tlana mizia ka hrechiang ve a, a engahmah hmain a fanu lam a ṭang dawn tih ka hria,. Mi rilru kha ve chi, ama chhungte lam hre deuh, ka nî ten ka pa an han buaipui deuh pawha vui hmuipu nghal ang chi kha a ni miau a, chhungkua kan inlengdarh ang tih ka hlau a ni. Rinliani vanga ka mood off lutuk kha Opa'n a lo hrethiam nasa viau mai. 

"Bialnu nei vat la, a beidawng ve mai ang" a ti a. 

"Lo zawng la" ka ti ngial a, ka nuih a za leh deuh. Bialnu ka neih ve tam zawk hi ṭhiante min thlansak, 'A chhe lo, a fel..i.duh chi' an tih sek vanga ka duhchawp hi an awm ve ṭhin a, rei kan daih ngai lo rêng a. Opa bawk hian, "Ṭhiante duhzawng ni lo, nangmah ngeiin i duh, i rilrem zawng tak thlang rawh. " Tiin min zilh tawh. Kei aiin kum 1 khat chauhin a upa naa, eng emaw chang hi chuan upa zawk a nihna a lang ṭhin. Opa ka thlah zawhah in lam pan ta mai loin patea te inah ka pêng a,. Patea fapa Asanga hi Opa tih loha ka kawm nasat pawl a ni ve a, kan inrual chiah bawk. Asanga a lo awm lo va, Nuteii'n, "Thingpui in rawh" a lo ti leh chul a. Nuteii hi ka pate unau nupuiah chuan ka ngainat ber a ni rêng a, a duat pawh min duat. Thingpui in pah chuan a titi leh suam suam a, "Asanga bialnu hi ka duhzawng a ni lo, ka hrilh zing tawh. Lo hrilh ve rawh,. Fate ngaihzawng sawisel ching ka ni lo naa tun ami kher hi chuan ka lung a dum zo ngang lo a ni" a ti leh mawlh mawlh. Hei hi chu a sawi zing tawh a, ngaiah ka nei titih tawh. 

"Chutia inṭhen ngawt a har ve lawm,. Hmeichhia chu an tlakna leilung azir an tih kha. A lo fel viau maithei asin" ka ti ve ngial a. 

"Ti ve ziah suh u. Sawtiang hmeichhe rorelna in chhung aṭang chuan eng mo ṭha mah kan nei lovang e. A tu amah pasal nei hlen thei pawh awm lovin an thlawi ṭhup saw..Asanga zawng a â êm mai,. An nufa sawn an ngaizawng emaw tih mai tur hi a nia..a hahthlak" a ti nang nang a. Nuteii hi ka dem lem lo, Asanga bialnu Baby te hian mi sawi an kai ve hrim hrim a. Nu ber lalna leh rorelna a nihzia leh pa ber nêpzia hi an sawi fô mai. Unau hmeichhe pathum leh mipa pakhat an nia, Baby Û te pahnih hi tunah an thlawi leh mêk a, an nau mipa leh a pate chu an lal tehchiam lo khawp mai. Chutiang chhungkua aṭanga seilian chu Nuteii hian a ît hlawl bik lo a niang e. Mahse, Asanga hian a duh hleuh hleuh êm mai a, an inṭhen mai pawh ka ring lo. 

In ka thlen chuan dar 4 a ri thuak tawh. Rinliani call ka la dawng leh lo. Ka û in Duatpuia homework a lo enpui mêk a, ka nu pawn rawng a bawl zo tawh a nih hmel. Ka chhuak tih chiah an hria a, eng nge ka va tih tih an hre lo. Zanriah ei hunah law law sawi ka tum. Ka pa hi a vannei a, a rilru lamah nghawng lutuk a nei lo hlauh, mahse, eng emaw changa han ât but emaw thinrim engphiara ṭawng te chu a ching ve tho. Tiang nen in chhung dungah hi chuan a kal ve thei mai bawk a,. Hetianga a damchhuak leh thei hi kan lawm tehlul nen, "Min thihtir mai tur che u a nia. Rualpawl lo leh khawhar reng reng hun hman ka peih hleinem" a ti ṭhin. Ka nu hian a enkawl thiam,. Ka nau lo haw hnuah zanriah chu kan ei ta a. Ka va kalna leh hna ka hmuh thar thu ka sawi ta a. Ka pain a chaw a la hâk phah zui! Ka nu nen an han inbuaipui leh rih. 

"A va lawmawm ve,.chutia hnate i neih ve dawn takah chuan nupui neih lamte hi ngaihtuah a hun ve tawh" ka nuin a lo ti a. A sawi ka ring rêng a..a chhan pawh ka nauin a sumdawnna bak a buaipui hman meuh si lo va, ani ka nu lahin ka pa buaipui ngai bawk, in chhung chêt leh rawngbawl..engkim a tih avangin hah a inti ve tawh a, puibâwmtu a mamawh ve a ni. An kum a lo tam ve zel bawk nen,. Awmpui lak erawh kan sawi ngai lo. Ka nau hi chuan ka nu a khawngaih ve avang hian la ila a hlawh ka pe ang a ti ṭhin. Kan la zawng lo ve hrim hrim bawk a, nupui ka neih mai dawn loh chuan ka nu puitu tur lak hi chu a ngai tawh. Keiin hlawh ka nei ve tawh dawn tho va, kan tlin ve em em ang. 

"Nupui aiah awmpui la mai ila" ka ti zauh a. 

Ka nu chuan, "Khati kha in nia. Muanzuala lahin hmeichhia reng reng ngaihsak a tum tawh si lo,. Duatpuia chiah hi tu kan nei dawn a nih hi" a ti hlak hlak a. Ka û chu a khi suk ringawt. Kei ai maha la chut leh ṭawng tam lo a la ni ve lehchhawng a, a pathlawi chhante pawh hi a hetih vangte pawh hi a ni mahna. Ni e, U Mamawii khan a uiresan miau a! Chupawh ka û thianpa Ramnghaka lakah. An inṭhenna pawh kum 5 a liam tawh, chutihlai chuan Duatpuia hi thla 10 lek a la ni. Mahse, ka û khan a chhuhsak lui a, ka nuin nau a pawm ṭha leh a ni ringawt, ka nî bakah Rinliani nau Tepuii te hian an rawn pui nasa a, hetiang kum hi a rawn ni ve thei chauh a ni. Ka û tan chuan hmeichhe han ngaihsak pawh a phurawm tawh lo ve viau ang,. School-ah an inneih lai khan a thawk sa a, a senior tawh vangin tunah chuan a hlawh tam pawl a ni ve tawh. Mathematics hi ka u aia thiam an awm lo vang, amah tluka thiam erawh an awm maithei. Chutiang vel chu a ni. 

Ka nau chuan, "Keimah hian ka nei mai dawn mi? Makpa chhungkhung ang khan" a lo ti fiamthu zauh a, ka nu a meng rum ngang mai. "A sawi pawh zak rawh, nangtê hirh hêrh lah hi i thawveng halh ringawt mai a, Kohhran i thlahthlam sâwt tlat. Eizawnna ringawt atchilh hi hlimna a ni lo a nia. Zaninah pawh inkhawm ang che" a ti leh nghal tân tân. 

Ka pa pawn, "Ei kham veleh Bawiha hna hmuh lawmthu sawi ṭawngṭaina kan nei ang" a lo ti ve a. Kohhran bêl chhungkua ti chuan a insawitheih ve mai ang chu. Ka û erawh uiresan a nih aṭangin Kohhranah a tel tawh ngai lo. A bak chu kan theih ang chinah kan la tel ve zel a, ka pa hi Kohhran upa a nih hnu lawka stroke zui ta kha a ni a, Kohhran pawn an ui ve hle. Ka nu erawh kan tette aṭangin Kohhran bel chawt, inkhawm leh hnatlan eng iloah pawh tel ve thei zel a ni a. Mahse, nihna erawh a nei duh lo, an hmehbel pawn a pha zel. "Nihna ka nei lo chung pawhin tiang khawp hian ka hun ka pe a, nihna ka neih lehzel phei chuan midang min beiseina nen ka chhungkaw tan hun ka nei lo palh ang" a ti ve tlat. Ka nu aṭanga ka pu kha Kohhran upa min a ni bawk a. Ka nu nuṭa pawh pastor a ni. 

Lawmthu sawi ṭawngṭaina kan neih zawhah inkhawm turin ka nu a insiam zui nghal a, ka nau erawh, "Ka hman tawh lo sa, thleng sil a ngai sia" tiin a ṭhulh fel leh der tawh. Ka nu pawn a sawisel ta bik lo. Kei erawh sunday zing leh zan bak inkhawm ngai lo ka ni a, phût enah min en lo a niang. Hnatlan lamah ka thawhhlawk ve tho. Naktuk maia hnathawka ka chhuah tawh dawn avangin ka leng chhuak ta lo mai. Thawmhnaw hak turte ka han enkual a, tlema zahawm ve deuh hlek kha a ngaih hmel si, ka va nei pachhe tak. Kamiz nena va nih up kha ka peih dawn der si lo. 

"Sâte, tshirt nghawng nei i kawl em? Ka mamawh dawn" tiin ka nau ka be lûng lûng a. Sarah Zonunmawii a nih ve nâk alaiin 'Satê' tiin kan ko daih. 

"Naktukah a lo thleng dawn chauh,. A hma pawn ka pek tawh che kha. I ha ngai tak tak lo" a tih chuan, "Hna ka nei tawh a, hak ve a ngai dawn tlat" ka ti a. 

"Inla hna nei mai sia maw" a ti hlak. Chutihlai chuan ka û chu chhuak tur niawm tak hian a pindan aṭangin a rawn chhuak a. A inchei ve deuh avang chuan, "I leng dawn law?" Ka lo ti a. 

"Dawn, nula ka rim dawn lo" a'n ti nghal ngawt a! Intlawhkhalh vak pawh a ngaih loh nen. Duatpuia erawh a pu nen tv an en. Ka pindana ka lut tur chu Rinliani aw ka hre leh ta,. Ka hnual nghal ngawih ngawih. 

"Zosanglian, i va tenawm ve" a ti nghal tâwng a. Hetiang ṭawngkam na zet zeta min ṭawngkhum a chin ṭhan avangin ka chhungte hian ngaiah an nei tawh. 

"Ka tenawm lo" ka ti a. Ka pindana lut duh ta loin ka pate epah ka ṭhu ve ta daih. Ka bulah a mawng rawn hûng ve chatin, "Hna te i lo hmu thar elo?" A ti a, ka nu inkhawm kal tur khan a va sawi leh hram a nih hmel. 

" Hmu ve ang chu" ka ti hluk a. 

"Ka va lawmpui che ve, mahse, nitin maia tar deuh deuh hmuh reng chu i tlin dawn mi?" A ti a. 

"Tlin" tih bakin ka chhang lo. 

Ka banbulah min rawn hnek zauh a, ka melh duh lo hrim hrim, "Eng nge lawmpui nan ka pek ang che" a ti zawi sap a.

Sawi châk chu ka nei a, ka pate an awm ve si avangin, "Engmah a ngai lo" ka ti a. 

"Naktuk tlaiah chaw chu ei chhuak ila, ka treat ang che" a ti leh lâng lâng. Ka chhang tawh lo. Ka phone ka khawihsan ta daih a,. Hetiang taka polite loh hi ka duh pawh a ni bik lo. Ka ning ve êm a ni. Rinliani hi a hmelchhia pawh a ni lo, a hleitling a, a pian pawh a nalh. Ngaizawngtu ṭha deuh deuh nei lo pawh a ni lo, ti nge kei a nu û fapa hi min atchilh tlat ni? Ka nî fanu a ni ve lo zawk nge pawh ka hrethiam tawh lo. Thisena inzawmna hi kei ka ngaipawimawh a, a der pawhin ka thisen kai chu ka khawiha inngaihzawnna rawngkaia ka biak theih ka ring lo. Rinliani te hi unau pathum an nia, an naupangber Jerry hi kum 16 lek a nih laiin a ṭhianpa bike khalh fimkhur loh luatah a boral tawh a, Tepuii leh Rinliani hi a ni deuh tlawng tawh. Tepuii hi chuan min ngaina ve tho naa Sateii nen an inkawmngeih zawk. Rinliani lel lul hi engtia tih chi nge mawni dawn ni..

Ka nu leh ka nîte an rawn inzui lut a, ka thaw huai mai. Ka nî chuan lawmpuina min hlan luam a, kan chhungkaw zing ami a tupawh mai hi chuan ka hminga min ko loin Bawiha emaw Mampui ti hian min ko ṭhin. Ka û erawh Mama tih a ni vek thung. Thingpui te an lum leh a, Rinliani lah chuan midang hriat theih si lohin min rawn text sek, "Naktuk tlai chu confirm rawh. A nih loh chuan an awm lai hian ka sawi dawn" tih angreng, ka ning ta deuh a. "Sawi la ti nia. Ka ngaizawng ve che pawh ni hlei lo" ka ti ta a. A aw a thian nghal kharh, mahse.." Ka va haw ang e. Pite, naktukah thil ka hrilh ang che" tiin ka nu a melh a. Ka nu lah chuan hrethiam hek lo, "Bialpa i nei ni maw" a lo ti. 

"Nei chiang e. I duh ve ngawt ang" Kan Rinliani zahtheih lohna chakzia hi chu aw. A chhuah rualin ka phone a ri bawk nen, ka pindanah ka lut ta daih a. 

Ka hnathawhna hmun tur ka thlen chuan hnathawk dangte pawh an lo kim ṭhap tawh. Zorema chuan inhmelhriattirna te min han neihsak a, an fel hmel hlawm khawp mai. 

"Khaw nge Papari hi?" Tiin a hawi kual a. Nurse nelawm leh hmelṭha zet, Teteii chuan, "Vawiin chu a rawn tlai dawn, a inentir dawn a" a lo ti nghal zat a. Zorema pawn engmah a sawi nawi lo. Nurse pakhat zawk kha a nih hmel. Kei pawh ka hnathawhna lamah ka kal zui a, Zorema'n enfel ngai a tihte chu ka enfel nghal zung zung. A ai ka awhpa chu rin aiin a che phuailuai tlat. Enlêt ngai a lo tam riau mai a! Ka zaidamna hian a tlin leh meuh ange maw. Eisiamho kha sawi tawh angin an tam a, chawhma chhungin chhuna ei tur an buaipui nghal a, chawhnu lamah zanriah tur. Zanriah ei sa hlirin kan haw tawh dawn a nih hmel. Mahse, hnathawkte chu kan duhthlanna a ni awm e. Tunah hian kan awmna piah deuhah Tar mai bakah nau awmna tur siam belh leh mêk a ni a, mahse, a sak chhung a rei deuh maithei. In sa ho erawh keini chuan kan va ngaihven lem lo. 

"I va buai awm ve, hawh, thil va ei ila" Ka kun ngur ngur laiin a rawn ti thut a! Teteii kha a ni. Ka phu zawk lehnghal,. Ka hnaah ka insawrbin nasat luatah rilṭâm pawh ka lo hrechang lo deuh a ni. Restaurant lamah kan inzui phei a, kawm a nuam dawn riau mai. Hnathawk dangte nen innêl takin an inbe mawlh mawlh hlawm a, kei erawh ka la mikhual deuh a, ka ngawi kur. Eitur an rawn dah hnu reivakloah, ka bula ṭhu chuan zawitê hian, "Tete, saw a lo kal " a ti sep a. A hawina lam ka melh ve thuai. 

5'3 bawr vel tur, thau lam aia cher lam pâwl zawk, vun dâng tak a ni a. A sam dum tak chu a lai takah bari ṭhenin fel takin a ṭawn thlap a, Teteii angin kamiz var a ha zaih a, kekawr dum smart tak a ha bawk. A hmai chu a tung lam a ni a, a mitmeng fiah leh lian angreng tak hnuai a hnarngûl bang chu a sang mawi tawk, a hmui erawh a lian viau lo naa a kareh zau lam chu a inhmeh phian. Tawi fel takin sawi dawn ila hmeichhe nelawm lem loh tak leh zahawm ru tho si a ni ber ang chu. A rawn kal hnaih deuh takah chuan Teteii chuan, "I laklawh rei angreng, lo kal rawh" a lo ti vat a. Ka hma zawn chiaha ṭhutna âwlah chuan a mawng a hûng ve chat. Teteii bawkin, "Zosang, Papari chu a nih hi. Zonun ti pawn an ko tho, Par, hei Zosanga..U Lianzuala aiawhtu chu" a ti zung zung a. Vawikhat chiang zetin min rawn melh a, menu a bih nghal daih. Keini chuan kan ei zawh tawh avangin kan kalsan a, Teteii bulah, "Nurse maw a nih a?" Ka ti ta hû..a mizia kha nurse ni tur chuan a mak êm a ni. 

Teteii chu a nui hawk hawk a, "I ring vak na nge? Nia, mak an ti fô ṭhin alawm. Kei aiin a thiam daih zawk, a mizia erawh damlote bulah khatiang kha a ni bik lo a nia" a ti duah a. 

Mak ka ti tho, "Smiling face chu a nei lo ve khawp mai" ka ti nuah nuah a. "A chang chuan a fel ve lutuk. Helai amite chuan kan hre tawh a, ngaiah kan nei tawh" a ti liam puat a. Private nurse an ni bawk a, uniform hak chang nei tho mah se; a tam zawkah chuan an duh anga inchei phalsak an ni. An tan chet vel pawh a nuam daih zawk ang. Chawhnu lamah ka buai leh char char, ziahfel neuh neuh ngai hi mipa tan chuan ninawm duh ve tak a ni. Ka û te ang tih chi deuh. Dar 4-ah hnathawk haw duhte chu kan haw thei a, dar 4:30-ah zanriah an ei dawn a, kei chu ka ei dawn loh vangin ka haw ta mai. A ni khatna chu a zia viau tho e. 

Ka nî, ka pa û zawkin "Chawhmeh lo lam rawh" a tih avangin ka peng kawi a. Ka nî fanu hi a hnathawhna Thingtlangah pasal a neih nghal avangin chawhmeh thar tuihnai zet zet hi an rawn thawn ṭhin. Ka pa hian a ngainat thin avangin ka ni hian a rawn thawn ve lehchhawng thin a, ka pa a han bawksawp chho hian chhungkua min huikhawm ṭha zual ka ti. Ka nî hi Ka nîteii ang lo takin ṭawngkam pawh vîn hlar ang chi, meng phakar deuh mai a ni a. Ka ngainat hleihtheih loh chhan pawh a ni. A fanu Salemi lah hi model angreng ve deuh niin an inla êm êm a, khawlaiah chuan chhungkhat kan ni tih a hriat miah loh. 

"I hna thar hmuh pawh min hrilh ve duh lo va, a nuam em?" A lo ti ve mial a. Ka nu bengvar vanga hria an ni ngei ang. "Nuam a ni mai. Ziah neuh neuh tur a tam deuh a" ka ti a, tui ka in khawlh khawlh. 

"Tar ho zinga hnathawh chu a nawm vak pawh ka ring lo e a. Tak takin I Pa Hminga nu hi dah ve mai ka duh, i pa Hminga lah hian ka duh lo ve êke bâl e a ti tuah hum a, enkawl peih tawp si lo" a ti nghat nghat a. Pa Hminga nu, tar ve tawh tak a la dam ve a, an hnenah a awm si a, ka nî hian a ning ru viau maithei a ni. 

"Nia, dah ve r'u, amah pawn nuam a ti zawk ang " ka ti ve mai a. 

Chawhmeh chu lain chhuah mai ka tum a, min rawn ko lehin, "I Pa Hminga hi la sawipui ve teh aw. A buaithlak, in chhuahsan theih pawh a ni lo" a ti leh a, a lungawi hmel vak loh. Buk nghut pahin ka chhuahsan ta a. 

Zanriah eikhamah Opa nen a bialnu thar rim kan tum a, leng turin ka insiam ruk ruk. Ka la hmuh ve loh avangin min sawm ngun tawh a, va hmuhsak ve vat a ngai. Rinliani ṭawng lâwng lâwng thawm ka hre leh, "I va hneawm tak".tiin ka phun zui hluk. A mipa tihchi loh viau pawh ti mah ula, ka dinhmunah hian lo ding ve chhin teh u, in hne ve tho vang. Hmeichhe dang anga inthlahrung chi a ni bawk si lo. Ka chhuah chuan, "Khaw nge i len dawn?" A lo ti chung a. 

"Ele..ka bialnu ka rim dawn" ka ti nghek. Ka nute pawh an awm reng,. "I nei bawk lo, Zosanglian " a ti hlak hlak a. 

"Ka rawn ru haw maithei" tih leh chabi lak ka rual a, min chhan hmain ka chhuak nghal. September thla, boruak nawm vanglai a ni bawk a. Mood pawh a ṭha thawkhat e. Opa pawh a lo inpeih at tawh a, Bawngkawn lam panin kan tlan ta vûk vûk mai. A bialnute in awmna chu a mawng zêk a! Step zawh thui a ngai si, "Hawn lam a va peihawm loh ve" ka ti deuh reng mai. "Step zawh hmain lem hlak ila, zawh chhuah hnuah chuan kai tawh tak kan ni zel" ani pawh chuan a ti ve. A tawpa tawpah kan thleng ta hram. Building lian leh changtlung tak, sakna la rei lo tih hriat tak a ni a. Compound an nei zau bawk, an awmna mawng deuh mah se; mi rethei chu an ni lo tawp mai. Ngampa deuh takin min luhpui a, a bialnu Teremi nen pawh kan inchibai lâwp lâwp mai. Nula tlawntlai ṭha tak, hmai bial lam a ni a, zep nâk emaw ka hmelṭha tihchi erawh a ni hran lo. A fel hle erawh chuan ka hre thung. Keipawh min be tlangnel nghal mai. Teremi thingpui lum lai chuan door bell a ri tlang tlang a, an nulain a va hawn chuan, "E..lo kal rawh" tiin a ko lut a. Zonunpari kha a lo ni! Min hmuh chuan vawiinah dawhkan kan kil ho tih hre miah lo ang hian a awm. Teremi chuan, "Zo, tikhan han chho nghal mai rawh" a ti lang lâng a. In chung lamah a chho nghal hlawk hlawk, ka en reng vang nge Opa chuan, "I hria mi?" A ti zauh a. 

"Hre lo" tiin lu ka thing nur nur. Thingpui kan in laiin, "E taka! Zosang, nichina lo kal kha Zonuni kha i hnathawhnaah khan a thawh ve kha, in inhmu ngai em?" A ti hluai a. 

"Ka hmu tawh chuan ka hria, mahse, vawiin chiah hna ka la kal a. " Ka ti ve mai a. 

"Ka û hi a rawn jection ṭhin a, kan inṭhenawm hnai bawk a, a tihzia tak tak a ni" Teremi bawk chuan a ti luam a. 

"Ngati nge i û chu?" Ka ti hû! A sawi dan hmangah rei tak na hrep tawh a ang êm a ni. Thutak deuh hian, "Thisen cancer a nia.." a ti chuai raih a, ka lo zawt ta kher kher chu ka inchhir mang e. Opa pawn sawi lâwk ve tur a nia. 

Ka tihngaihna hre lo chuan, "A va pawi ve aw. A zia lo hle mai,. Zonuni te kha he lai hnaiah maw an awm?" Ka ti ta ringawt a. 

"Umm, a hla lo. Saw lai lawk saw.." a ti a. 

Thudang kan sawi zui ta daih a. Zonunpari rawn chhuk leh hmain kan haw a, step kan zawh chhungin vawi 3 kan chawl. A fit loh theih hle mai. Teremi fel thu te chu ka sawi ve luam a, mahse, ka rimpui leh ang em ka sawi lâwk thei lo, a hahthlak êm mai. In ka thlen chuan a la tlai chhe lo bawk a, ka nute an lo la meng! Ka û erawh ka hmu lo. 

"In va mu har ve" ka tih laiin Sateii chuan, "U Rini a rui buai vak a,. " A lo ti vak a. 

"Maw..ngati nge?" Ka ti phâwk hrû mai. 

Ka nu a melh a, ka nuin min rawn melh zawk a, ka pa a melh ve leh daih. Thil dik lo eng emaw chu a awm chiang a ni. Ngaihṭha lo zetin ka pa chu ka va melh ve a, mi pawh en chuang lo chuan, "A zia lo khawp mai. Kha..Lalrini a inpuang fai kêlh mai a, Min ṭhâwng khawp mai" a ti chuar chuar a. Ka ding mar nghal zawt, "Eng inpuanna nge?" Ka duh aiin ka ṭawng ring. 

Ka nu zawk chuan, "Lo ṭhu phawt teh. A zia lo em mai" tiin a bula ṭhutna âwl chu a kawk zauh a. Ka ṭhu ve mai. 

"A rui a, a rui lungpuam khan intihhlum a tum a, an danbeh lah khan a tal nasa si, 'Zosangliana chiah ka hmangaih, min kohsak u la ka thi lovang. Ka unaupa mah nise ka hmangaih a, ani pawn min hmangaih' tiin a au a. A zahthlak khawp mai. Kan rin phak bak a ni. Bawiha" a ti dap dap a. Ka inhumruh nasa mai. Mahse, ka thinrim leh hetiang thu thinṭhâwng deuh ka hriat hian ka ngawi daih zel a, hei tak hi ka mize ṭhat vena a ni awm e. Sateii lah chuan, "Ka rinhlelhna a rei tawh rêng a, mahse, i ngaihzawn ve ka ring lo va" a lo ti a. Ka melh hrâwk ringawt. 

Ka pa chuan, "Unau in nia, mite ngaih lam ai mahin Pathian ngaihah thil mawi a ni lo. Chhungkaw mualphona a nih hi..a zahthlak lutuk" a lo ti ve leh chhut chhut. Ṭawng chhuah ve a ngai ta tih hriain ka ṭhutdan ka siamrem tê tê a, engkim a tir aṭangin ka sawi ta vek a. Ka nîte zin vek hlana riahpuia min sawm zan khan a inpuang chiah a, zu pawh kan in dun. Mahse, a thangkama awh ka hlauh luatah ka rui miah lo thung. Mutpui theihna chance vawitam ka kalsan dante, engkim ka sawi vek takah chuan, ka nu chuan.."Ka ring che alawm. Kei pawh ka mit tihkham chang a nei ṭhin. A kuah thuak thuak zel che te, i pindanah a rawn lut ve sek thin te..aa..ngaihbel tur chu a tam angreng. Mahse, i pa Tlana mizia saw i hre vek ang a, nichin maiah pawh 'Zosangliana chu keiman ka kamkhat ang, unaute pawh ît duh chu' a tih leh tûn tûn kha. Kan chhungkaw boruak a chhiat phah ngei dawn a, hei hi a pawi lutuk" a ti mawlh mawlh a. 

Sateii chuan, "U Rini chu a nasa ve êm alawm. U Ruata nen pawh an ruih laiin an infâwp lai ka phâwk tawh" a ti ta mai a. Ruatkima hi ka patea, Asanga pa lo zawk fapa a ni thung a, anni nen hi chuan kan intlawhpawh khât, Falkawnah daih an awm bawk nen. Rinliani chu a chim chin a sang halh halh hle mai. 

Ka pain, "Mu phawt ang u. Mut hmain ṭawngṭaina i nuin nei se la, Pathian kuta tlukluh hi a him ber e" a tih angin ka nu a ṭawngṭai a,. Ka mu tur chuan, "Khaw nge Mama hi" ka ti a. 

"I û hi a zia a dang riau, bialnu hi a nei ve mawni ka ti. A leng a leng ve tawh a" ka nuin a ti sar sar. Ka nui ringawt. Duatpuia hi ka nu te pindanah khum kan dawhsak ve a, a zia a inthlak châng chuan a nî bulah te, a pa bulah te a mu ve zauh zel. Ka bulah erawh a la mu lo. Ka duat tehreng nen. 

Rinliani phiangsen vangin ka muhil thei lawk lo zui a! Patling thinrim inhrosa thawmin min la tiharh zui!..khua erawh a lo var vek tawh..

To be cont..