Miteii nu Last

MITEII NU (LAST) 

Ziaktu : Toni Râlte

Doctor te bulah kan sawi a, Duatpuia a ṭha tawh tho bawk nen, thihna meuh a ni bawk si a. Kan chhuak ta rum rum mai. Lucy chu a pachang khawp mai, han chetbuaia han chiâi a nei vak lo. Tichuan, ka nute pawh an vaiin keini chhungkua nen kan khaw lam chu kan pan ta vang vang a. Ka pain zuam mah se; ka nuin motor khalh a remtih chiah loh avangin Samua tlawmngai turin kan ngen a, ka pa motorah ka nu leh pa bakah naupangho an chuang a, kan motorah Lucy leh Parteii te an chuang thung. Parteii chuan Duatpuia a pawm kawngtluan a ni ber e. Lucy a chauh ve bakah a rilru a hrehawm dawn tih kan hria. Biak pawh kan inbe tam lo. 

"Ka nu kha chu keimah ngeiin ka dawmhlum a, tin, kan inenkawl nasa bawk a, a thih pawh khan ka lo sun lawk tawh avangin ka tuar na em em hran lo. Ka pa erawh ka enkawl tam hman si lo va, min ngai ve ngawtin ka ring" hnukulh ṭeuh hian a ti sêp sep a. Ni e, kan inneih hlimte kha chuan han inhalin kan han inhlat deuh naa, tun hnuah erawh pa leh fa na nâ na chu inhlat kumkhua theih hek loh, ka pu hian Lucy rai laia Anxiety a han neihte khan a ngaihtuah khawp a, a rawn chhuk zut reng mai. Duatpuia tak hi chu a pawm tam lo, Miteii erawh a sen lai aṭanga an bula seilian a nihnaah vanduaina a tawhte khan a rilru na kha patling e ti lo khan a tap tawp mai kha a nia,. A fanu neihchhun Lucy hi a thih dawnah a hriatchhuah ngei ka ring. Kan tlan muang lo bawk a, kan thleng hma angreng. Khua a la var lo deuh a, Ka pute in chhak deuhah dingin kan chhuk ta ṭhâm ṭhâm a. Ṭhalai ho an lo zai ṭhap ṭhap mai. YMA hruaitu ten min lo dawngsawng vat a, ka rin aiin tlaivar pawh an tam daih. Kan va lut a, Ahruaii hian Lucy a hmuh veleh, "Pa, hei ka û a lo thleng asin . I ngaih êm kha..lo chhang ta che" tiin a ṭap hawm hawm a. Bena leh Remlala te pawn an mittui an hru an hru ve mai, Pi Siami pawh chuan, ",Paa, Mateii te an lo hawn hi, i lam zin êm kha..lo chhawn ta si che", a lo ti ve bawk. Lucy chuan a pa chu a zuk bawh rawp a, a ṭap hliam hliam mai. Han chham vak dan a hre ve lo nge Pa..pa tih bak a sawi lem lo. Miteii leh Mampuia te pawn an pu chu an sun takzet tih a lang. Mampuia ngat phei hi chu ka pu hian a tet lai chhung zawng kha a mutpui ṭhin. Miteii a nuin a buaipui a ngai ve si a, ani a pu khawhar lungleng khan Mampuia hi a kuah chawt mai a niawm e. Chutiang chuan inthlak pawh inthlak lem loin khua kan nghak var ta a. Ruang kil zinga Nancy ka hmu ve hlawl chu mak ka ti deuh. A la ṭap ve zui! An inhruai leh awm kan hre si lo. a..kha chen a mo ve tawh a, chuvang a niang. Khua a rawn var a, thalai lam an ṭin a, nu leh pa ho an rawn lang sap sap. Keini pawh insingsa turin in lam kan pan ta rih a. Ka nute pawh an fakawm khawp mai. Kan han insingsa a, Parteii hi a awm lovang tih ka hlau thin. Lucy tan pawh hian hlu tak a ni, ka farnu a nih vanga fak ka ni lo. A fel ve êm a ni. Khi lamah chaw ei tur an tih avangin kan intihfel zawhah kan chho leh dial a. Tukṭhuan eikhamah kan inthlak leh. 

Chutiang chuan ka puzawn chu kan vuiliam ta a. Remlala'n chhungkaw aiawhin thu a sawi a, a puitling khawp mai. Ka pate pawh khi lamah pawimawh dang an ngah ve si avangin vui zawhah Aizawl panin an haw a, Parteii te nufa erawh an la châm. Lucy a lo chhawk zangkhai theih pawh a hlu ve êm a. Tlai lamah pawh ka pu te inah bawk chaw kan ei leh. Duatpuia a ṭha tawh a, a zia zia a awm. Ṭhen leh rualte an fakawmin engkimah kan chetbuai ngai lovin min hmui zel a, makpa ka ni nain ka âwlthawng letling. Makpa mawhphurhna hi ka pa hian kan inneih dawn khan min hrilh nasa mai a, tunlaiah chuan hmanlai ang diak diaka kal a harsa tawh a, mahse, makpa tam zawk hi chuan kan mawhphurhna kan la hlen ṭha viauin ka hria. 

Hun a kal ve zel a, Parteii te pawh an haw tawh. A châm chhung khan lo hmelduhtu a hmu pek a! Mapuia nupui nau, tlangval fel leh puitling tak, Pastor zirlai, chawlh rawn hmang zawk a ni a. Kan inah pawh a rawn rim ve,.Muanpuia a ni a, Parteii paw'n a haw vak lo niin ka hria. Ngaihzawng ngaihven tawh eih loin chutia mipa a han ngaina chho ve leh chu a lawmawm lamah ngai ang. Muanpuia lah a felin a rintlak bawk si. Kan naui lah chuan nuthlawi a nih thu hmangin a lo hnar ve zuk zuk a, a iai phah lo nge mawni dawn ni, Parteii te hawn dawn zana a rawn rim ṭumin Mampuia zan zung turin an infawp lai a hmu tlat mai. A nuteii chu a fiam a fiam mai a, Parteii zak leh lai chuan a melh rum teh e. An han haw chu a reh leh ta ruih mai, Miteii pawh a ngui viau. Mahse, school te a han kal chho leh a, tleirawl ta ngang chu a hlim ve leh ta viau tho e. 

Pari pawn an pa lung a phun ta zân mai. Khawtlang huapin ruai a siam a, a hautak duh ngawtin ka ring. Keini nupa pawh a buai pawlah kan ṭang ve a, a rinngam berte bakah amah hnaih bertu te kan ni bawk nen. Pari hi a chanchin kan sawi kan sawi a, ka sawi hmaih chu Chhawrpial khua a ni lo va, Serchhip khua daih a ni. A pasal nen an inneih hnuah a nu leh pate an boral a, unau pahnih chiah an ni bawk nen, a nau lah sipai niin Shillongah an chhungkuain an awm daih sia, tihian Chhawrpial khuaah hian insawhnghetin a khawsa zui ta a ni. A pasal lung a phun ta bawk a, Faka nen pawh innei vat turin kan nawr chho ṭan. Rina chhungte lam khan a in leh lo chu an rawn beisei deuh a niawm e. Ani lahin zâm hauh loin ama thawhchhuaha a sak a nih bakah a hminga in leh lo a awm vek thu document nen lam a lo kawhhmuh ta sia, hehhil takin an hawng ta a niawm e. An zaktheilo ve reng reng ka ti. Ka pu boral kha chhuanlamah a hmang nge ni dawn ni, Nancy lah chu a awm zui ta hmiah a. Remlala pawn a hau lem bik lo, kha chen lo innupa an ni ve tawh a, fate avang pawn inhruai leh hi chu a ṭha hrim hrim. Ka pu boral aṭanga thla 3naah Marovi, nu Thari kha a boral ve a,. Veroi pawh a hmel kan hmu leh ta. A tuar khawp mai a, ama nu diktak a lo boral tawh bawk si. Chhungkhat laina hnai a nei ta vak lo a ni maithei. Mahse, Marovi pa hian a fanu ang tak takin a lo en ve bawk a, nu Thari awm tawh lo mah se: Veroi chu an hnenah a khawsa zui ta tho. Bakah Marovi nau te hmundangah zirna avangin an awm bawk nen, a pa chu awmpuia puih kha a ngai ve reng reng bawk a ni. Pu Zuala fapa, Mama pawn Lawitlang ami nupui a nei a, an inhmeh phian mai. 

Kum chanve kan thlen meuh chuan ka pu vanga an lungngaihna leh lusûnna te pawh a zia chho ta a. Pari leh Faka te pawh inneih lam an tintuah chho ṭan, rem lohna han sawi thei awm vak hek lo le, thla tharah an inkutsuih ve ta rup mai. Am fate ve ve lah inrualkhat an ni a, an inkawm thei nghal bawk nen. A zia khawp mai. 

Ber thla kan chuangkai ṭan ta der mai, hun hi a kal chak mang e. Ni khat bank-a ka awm laiin Ni Dari a rawn kal ve hlawl mai. Ani hian dawr a siam tawh lo va, kan inhmu khât angreng, veng kar a lo inhlat ve bawk nen. Tah chuan ka rilru tina deuh min hrilh ta a, "Miteii hi tleirawl tam tak ang bawkin damdawi a ti ve an ti tlat a nia. Anni ang rual ho hian bar an ching an ti tlat..lo chîk deuh teh u" a ti ta mai. Mak ka tih bakah awih ngaihna pawh ka hre lo. Chaw a ei tlem deuh tih bak a danglamna em em ka hre bawk si lo. 

"A va mak ve, tu ten nge sawi?" Ka ti a. 

"An sawi nual,.Remremi te ho pawn an sawi a, an ching thar viau a niawm e" a ti ve zel a. Ni Dari meuhin a sawi chuan a dik a nih ka ring ta. Rilru nuam lo deuhin ka awm ta a, thinrim lova ṭha taka sawipui phawt a fuhin ka ring. Ka hawn chuan Miteii chuan a nau a lo chhaih nui iar iar a, Lucy erawh rawng a bâwl thung. Ka inthlak sawk sawk a, chokaah pheiin a ruk deuhin Lucy chu ka hrilh ta a, ani pawh chuan mak a tih ve hmel khawp mai. A thinrim leh dawn ringawt a, ka khap ta rih. Zanriah ei lai chuan a nu nen kan insignal zauh zauh hnuah, "Mite, thil sawipui che kan duh a.." tiin bul ka han ṭan a. Rawn hawichhuakin, "Umm eng nge?" A ti thâm ṭiak. 

"Englo a nia, vawiinah tu ten emaw thil min hrilh a, damdawi i lo bar ve ṭhin niin an sawi tlat mai a. Thudik a ni em?" Harsa ti ru zet hian ka ti ta a. A chaw ṭhial lai a tawp chawt, a nu lahin a lo melh kul bawk si. Zâm hmel zet hian a lu a thing nar nar a, "Aih, bar lo" a ti nawk nawk. Dâwt a sawi tih chiang takin ka hria. A hmel a pha dâi mai a, a mitmeng lah a huaisen tawk lo hle bawk. Lucy chuan, "Dâwt i sawi tih kan hai lo ve. I lo ti ve ṭhin tih a chiang a, engvanga damdawi chu ti nge i nih?" A ti fak fak a. 

Miteii chuan chaw a eilui thei tawh lo nge ni a tho ta tharh a, zawitê hian, "Ka tihna a la rei lo, ka ti ve chhin châk a, ka ti ve mai mai" a ti niah niah. Lucy a ân hrep ka hlauh avangin, "A tawk rih e. Chhung inkhawmah kan sawi leh ang" ka ti ta vat. Rilru a na hle mai, tunlaia damdawi an bar ṭhin pawh ka hre ve lo. A hma kha chuan Avil te, cyclopum tih velte kha a ni ṭhin a, codain lam hi an in nasa bawk. Keini nupa pawn chaw chu kan ei tam bik lo. An intihfel zawhah chhung inkhawm chu kan nei ta a, an damdawi bar ṭhin hming chu spashmolar te, tempfix te a lo nia. Vawikhatah pali an bar tlangpui. An dose a la hniam deuh a nih hmel. A ṭhat lohzia ka sawi fê hnuah sim hmak tura intiamtirin ka ṭawngṭai ta a. A sim thei êm ang chu maw..

Nghei tawh anga a insawi avang leh lehkha a zir nasat vangin kan ngaih a ṭha chho ve ta ngawt a. Mahse, Zan khat kan chaw eikham hian Remlala a rawn lut hlawl. Tah chuan Miteii te ṭhianhoin an la tih reng thu leh Pu Laikunga te dawr ami an lei ṭhin thu a rawn sawi ta a. Lucy a sa ta hle,. Apuii te ina a nau a lenpui chu a va ko haw a, a vaw ta ṭhak ṭhak mai. An tleirawl ve uaih tawh a, chutia nute vuak han tawrh chu a zahthlak bakah a hrehawm ang tih ka ring. Mahse, a tana ṭha tur a ni si. Remlala pawh chuan a lainat deuh nge ni, "Duhtawk rawh,. A ti tawh dawn hleinem tiraw? Mite" tiin a lo khap a. Mi rilru nêm nisi kha Miteii chu a ṭap miah lo va, a ngawi ngal mai..rin aiin a lo luhlul zêk dawn a nih hmel. Kei erawh ka inrawlh ta rih lo. Tiang chuan kan nupain kan buai ru ve em em a, Apuii pawh a nuin a vaw ve tho. An school-ah chuan damdawi ti lo aram pawh an awm mang lo. Sawmi phei chu damdawi mai duhtawk lovin zu a in hial tawh..chutiang zinga kan fanu a han tel ve chu rilru a nain han zilh leh vak dan kan hre tawh bawk si lo. Engvanga damdawi chu lo ti ve reng reng nge maw a nih dawn ni. A ruk hian a rilru te hi a lo hah ve deuh em mawni. Engpawhnise, a nuin a vuak aṭang kha chuan a ti tlem ta deuh nge ni,. Sawi a awm ta vak lo. Zorina nen pawh an inbe chho leh nasa a, a hma a damdawi tih lai kha chuan phone te kha a khawih peih lo. Tin, a nghei ve deuh tak vang nge ni a tla rawk rawk mai a, a dâng bawk si, ti sen hi a nei mang lo. A nu hian eitur tuihnai leh hriselte a chahsak reng a, tiang chuan in lamah nasa takin kan inenkawl ve a ni. Hetihlai mek hian Nancy leh Remlala te pawn buaina an lo nei ve leh pek a. Ka pu boral hnuah pi Siami te nen an la khawsa ve zel a, Pi Siami a fel viau tawh ka tih kha. Ka pu boral hnu lawkah Pathianah harhtharna changin a hlim em em mai a, lamtual mawitu a ni hawt e a. Remlala nen pawh an inpawh sâwtin Nancy chu theihtawpa siamṭhat an tum ve a, mahse,mi hur zilh an sawi ang maiin Nancy chuan ṭhat a hnêkin a suahsual tukkhum pawnna chu a lantir uar sauh sauh ta mai. Ka pu a awm ta lo bawk a a ti a ni chêk ang chu. An chhungkhat nisi Pi Siami te chu a hnawtchhuak thul. Chuvang taka Remlala nen pawh buai an ni. Zan khat chu Pi Siami hi a rawn tlan lut tawp mai a, a thlabâr hmel hle nghe nghe. Remlala a hna thila a zin lai a ni bawk nen, thil awmzia kan lo zawh chuan, "Nancy lo rapthlakzia hi..chempui nen min rawn umchhuak a nih hi..min sat duh tak takin a nia ka rin ni. A fanu pheikhawk leisak a tum a, 'Pe rawh' a ti hmak a, tlaiah kan lo inbat fuh vak lo nen, 'Ka pe awm lo êm mai" ka ti kha a thinrim ta em em a. Sumdawngho chhuah hnuah min ânkhum ta char char, kei lahin ka lo chhang ve zel bawk nen, a thawk lawk a min sah a tum ta mai a ni" tiin. 

Nancy em em pawh chu! Lucy te nen kan han chho a, a nute in lama an lêng tur nen kan intawk. Lucy'n chabi a dil chuan, "I in a ni lo, ka in a nih khi.. tihian lamṭang in inzawng kual a, he pitar hi awmpui ve tawh rawh u" a ti hlaih hlaih mai a. Lucy chuan, "Rawn la vat rawh. I zakthei lo lutuk hi ka la beng duh tak tak ang che" a ti a. Nancy lah a lo zâm lo nasa, khawlai mah nise Lucy chu khawih duh mai hmelpu hian, "Ka hlau chhetê lo che. Ka in chhungah ro rawn rel tum suh. He pitar hi ka hnawtchhuak tawh. A bungrua eraeh zingah in lo laksak dawn nia " a ti khar khar a. An inbakkaih chho ta mai si, naupang an awm ve bakah kawngkal an awm ve nuk bawk nen, ka ṭhelh ta a. Lucy thinrim lah chu a khur der der mai. Pi Siami lahin rapthlak tih hmel em emin Nancy a lo melh bawk. Khawlaia buai vak chu ṭha ka tih loh êm avangin Pi Siami leh Lucy te chu ka hawnpui ta a. Pi Siami pawh a riak ve ta mai. A tukah Remlala nen kan inbe ta a, Nancy'n ni lo loin a han sawi leh tawh a niang. Mahse, lo awih nghal bik loin min rawn zawtfiah a lo ni. Kei pawh chuan engkim chu ka sawi ta vek a,. A chek hluk mai. 

"Ni 2 lai ka la châm dawn sia,. Ka nu chuan lo tuar hram hram rawh se. Ka rawn haw veleh ka chingfel ang" a ti nghet churh a. Pi Siami pawh a tan haw leh ngamna ni hek lo kan bulah a khawsa ve ta rih a, Nancy chhungte lam chuan Pi Siami chu an rêl phâr lo chauh a ni, engkim chu Pi Siami thiamloh a ni deuh tawp mai. Mahse, an zia an hrechiang tawh bawk a, an awih hlawm pawn ka hre lo e a. Remlala a rawn haw ta a, a rawn thlen zan la lain Nancy chu an in lamah lenpuiin tah chuan, "Ka pi leh pu te, min hrethiam u la. In fanu nen hian kan innupa thei tawh ngang lo a ni, tihian hei ka rawn thlah a nih hi..a rang thei ang berin bungrua pawh in raan la dawn nia. In fanu hi ka hmangaih tawh lo a ni mai e, ka fate nu mah nise, ka khawsakpui thei tawh lo. Ka fate erawh keiman ka enkawl ang..Nancy, pasal zaidam tak dawhtheihna i pal lui a, a tawp i thleng ta a nih hi..tikhan nang leh kei chu kan tâwp ta a ni" a ti charh charh a. An hrilhhai hle a niawm e. Nancy tak pawn ṭawng nachang a hre lo. Tichuan, an hamhaih buai laiin Remlala chu a fate pahnih nen a haw chho leh ta hmiah mai. A thiltih dan a dangdaiin a tâwp chiang khawp mai. 

Khawtlang titi a tling hial rêng a, Nancy te lam pawh an ngawi reng hauh lo. Mahse, eng ang pawhin insawithiam mah se; khawtlang ṭan an hlawh hran miah lo. An fate an khawngaihthlak. Mahse, Pi Siami a felin an ngaina bawk a, tar alamah a chhangchhe ṭha leh a ni ringawt mai. Nancy te pawn bungrua an la ta nge nge a, zep loh chuan Remlala chuan thutlukna diktak a siam niin ka ngai. Amah lah a ngawi hmuk tawh a, Nancy te lam thusawite chu engah vak a ngai lo a niang. Mênah a thlak hmiah hmiah mai. A fate chu Nancy chuan lak a tum ve zet a, mahse, Remlala'n, "Sawtiang in chhung aṭanga ka fate seilen ka phal lo. Court-ah kan kal mai a ngai ang" a lo tih bur avangin leh enkawl an huphurh rûk deuh vang em mawni an chuhbuai zui ta lo. Nancy thlawi ta chu Remlala runluih reng rengin hun a hmang chho a, a inchei parh sâwt hle. A ṭha vek tho e. 

Keini Miteii pawh chuan a nghei tak takah kan ngai a, inah a awm tamin kan tir a nih ngawt loh chuan a chhuak zen zen lo. Zorina rawn haw zuai chang pawn kan inah a rawn rim ve mai a, rilru a hahdam ta deuh. Lucy hian a nu Siami a khawngaih deuh avang hian a û zawk hi a han lathla fô a, Duatpuia nen tikhan an lo awm ve mual mual mai. Kum pawh a tâwp leh mai dawn,. Boruak pawh a vawt chho ṭan a. Miteii'n a ngen ve nasa bawk a, Aizawlah kan han bazar, Mampuia pawh kan hruai haw ve a. Parteii leh Muanpuia te pawh an lo la inbe zui zel a lo nia, an serious phian lehnghal. Mahse, inneih lam eraeh an la sawi lem lo, Muanpuia thil zir a laklawh ve bawk nen. Bakah pastor te han ni ta se, Muanpuia chhungte lamin an duh ka ring lo,. Tin, Kohhran dân leh dûn zawm a ngai bawk si. Kumin Christmas chu kan hmang nuamin kan dam tlang a engkim a pangngai ti mai teh ang. Kumhlui thlah zanah erawh Miteii'n zu a lo rui ta tlat mai le! 

Zantir aṭangin kan inah an awm lêt lêt a, kan ina hmang turin kan ti bawk nen, anni pawn an sawi nawi lo. A nu nen Remlala te in lamah kan chho a, chhungkaw ho bakah ṭhian hoin chhang kang ve ang u kan ti a ni. Kan kim ve ṭhap mai. Dar 11 rik hma deuhin kan ṭin ta hlawm a, Miteii te chu an lo awm lo. Ngaihṭhat lohna pawh nei hran lovin kan mu nghal a. Mahse, dar 12 bawr velah Mampuia'n min lo be ta a. 

"Pa, Miteii a rui lutuk a, hei kal pawh a kal thei lo. Ka zak bawk si, engtin nge ka tih dawn?" Tiin . Ka lungphu a rang nghal viau. Lucy nen rang takin an awmna hmun Pu Sawia tlang lamah kan kal nghal a, "Insûm ang che. A ṭhiante awm laiin velh loh tur" ka ti mawlh mawlh mai. Kan han thleng chho a, Mampuia chuan min lo pan nghal var, Miteii thian dangte pawh chu an rui viau hlawm a, Apuii pawh a hmai a sen vek. Miteii chu thingkung nghengin a lo ṭhu zawi nên mai a, a chauh hmel takzet. "Haw ang" tiin kaihthawh ka tum a, "I kut tenawm khan min thlah nghal rawh. Ka pa pawh i ni lo ve" a ti chang ta fak mai. Ka tawlhhnung nghal dâwrh bawk. Ka zak lutuk chu ka sen awp awpin ka ring. Lucy chuan, "Vohbik, tho la, rawn haw nghal rawh. Vatin" a ti fiak ṭhak a. Miteii chu a nui lui hak, "Tikhan i ṭan leh ang a, ṭan hlum lo chauh rawh. Kei chu tuman min hmangaih ve lo. I pasal hi ka hua, ka haw lutuk" a ti ta phiar phiar mai a. Zorina'n, "Mite, a tawk. Engmah sawi tawh suh, midang an awm ve hi. Hawh, haw ang" tiin a kaitho a, kan nupa hmaihmaah ngei Zorina chu a melh a, "Zorin, min ru rawh. An bulah ka awm duh tawh lo" a ti ta mai. Lucy ka chelh leh hman ta lo, a fanu samah chuan kekin, "Mai mai che chuan le..eng chu nge maw i hriat a hetia kawhmawh i bâwl ziah mai ni. I hre dawn khawp e" tiin a hnûk kal ta zawt zawt mai. Zak taka ka enzui laiin Zorina chuan zawitê hian, "Pa Pui, hrethiam rawh aw. Hetiang rilru a pu tlat hi keipawn mak ka tia, ka hau ve nasa thei lutuk. Tu ten emaw an fuihpawrh a nih ka ring ber, nang aia hmangaihtu an awm lo tih kan hre vek a nia" a ti a. Ka chhang thei lo, Miteii ṭawngkamte kha ka ngaihtuah lêt a, ka zah chu thuhran ka thinlung a na ngawih ngawih mai a ni. Mampuia nen muangchangin kan haw ve ta a, Mampuia pawh a thinrim khawp mai. A âng ve bawrh bawrh mai, kei erawh ka hmui an charbet ta emaw tih mai turin ka ngawi hmiah. In kan thleng a, Lucy chuan, "Sawi rawh, tuin nge i pa hian a hmangaih lo che titu te chu..sawi rawh" a ti vin ṭhak ṭhak a. 

"An sawi nasa lutuk,. Keipawn min hmangaih lo tih ka hria. Englaipawn min vêng a, ka lakah a strict em em reng a, ka hne tawh lutuk. Zanin te pawh hmun danga hman kan duh ve a, hetah hmang rawh u a ti tlat a nih kha.. ka pahrawn a nia, ka nunah thuneih ve tum buai suh se" a ti tân tân a. Ngaihthlak loh theih ka duh a, tihngaihna a awm si lo. Mampuia a insûm zo ta bik lo a niang, "Chutiang hrilh thintu che chuan an hmangaih lo tawp che tihna a nih chu,. Mi pahrawnte an sual theih nen, tikhawp hian a duat chein a hmangaih che a, i la inchhir khawp ang" a lo ti ve mawlh mawlh. 

"Nang pa pawh kha lo ṭawng suh. Inla Aizawl awm lutuk i nih kha, ka û tak tak pawh i ni lo. I pate bulah awm ta che.." miteii chuan a ti ve zel. Lucy chu a sen vek tawh. Chutiang em em chuan kan fanu rilru chu a lo danglam tih rin harsa tak a ni. "Vohbik, i lo nasat hi le..tu ten nge fuihpawrh thin che, sawi rawh. I sawi lo a nih chuan i pa te bulah ka dah ang che. " A ti khur dar dar a. Nui sâwng chungin, "A pawi hleinem, i pasal i duh hlum lo chauh a, kei min ensan tawh. Pawngsual ka tawh avang khan i pasal hian min beisei a, ka la naupan deuh avangin a la che lo mai mai a nih hi,. Chuvang chuan ka pa diktak te bulah chuan ka awm ang, ka duh duha ka awm theih lohna hmun hi ka ning tawh" a ti hmak hmak mai. Ka ngawi thei ta ngang lo va, "Mite, i thusawi chuan min tina hle mai. Ka nupui fanu hi ka lo beisei che a maw? Chutianga ngaihbel theih tur pawn vawikhat tal ka awm tawh em? I ti mah mah lo maw? Lucy fanu i nih vanga ka lo hmangaiha ka lo ngaihtuah che hi ka tisual hle a nih dawn hi. Aw le, i awm awmin awm tawh rawh. Vawikhat pawh kei hian ka zilhin i lakah complain ka nei tawh lovang" ka ti ve ta a. Ka rilru tak tak ka sawi. Lucy erawh a thinrim leh rilru nat êm vangin a ding khur hlawk hlawk ringawt. A fanu chu thinlung na ngawih ngawihin a melh kal mai a, ka khawngaih takzet a ni. Miteii rilru piangsual ta vek chu tu te thiltih nge ni ta ang? 

Mut kan hmu ta miah lo va,. Lucy nen pawh kan sawi dun chuang lo. A ṭap faih faih reng chu ka kuah a, ṭawngkaa inhnem dan pawh kan thiam tawh lo. A mak êm mai, he khawvel hi zawng. A tukah kumthar te a ni sia tiin phur lo tak chungin kan inkhawm hram. Miteii erawh kan kal dawn thlengin a la mu. Inkhawm kan han bâng chu le, Pari'n an ina peng turin min ti nghal a, Zoteii te nupa bakah Bena te nen kan lut ta vek. Nizan thil thleng chu an lo hre vek a lo nia. An sawiho ta nak nak a, Faka pawh a ngawi thei ta lo nge, "In rilru a nat ka hlauh avangin ka sawi duh lo va, damdawi pawh hi a la bar reng alawm. Mahse, Lalruata te ho an leitir ṭhin a. Tin, sawi ta law law mai ila, tlem lai deuh pawh khan school a tlanbo a, Pu Hluna te fapa, Aizawla awm reng lo hawnlai kha a nia. Kha pa nen khan an inhmuh bakah mudun tawh ang hialin an sawi. Hrilh tur che u ka nih laiin tiang sawi hi nuam ka ti chiah lo va, mite hian thil an lo hre thei bawk si" a ti chuar chuar a. Kan nupa kan na thar leh ta, Kan Miteii chu a lo him ta lo hle te hi a ni lo maw? Lo rui ve zeuh zeuh mah se; mipat hmeichhiatna lamah êm chuan rinhlelh ngaihna ka hre lo asin le. Chhungkuaa zilhhau chu kan rawt ta a, kei tak hi chuan engmah ka sawi tawh lovang. Nuteii lo lut bulah a thuphungin Lucy chuan, "Nute, Miteii hian tu nge a biak thin? Whatsapp velah hian" a lo ti a. 

"Biak chu a ngah ve mai. Ngati nge?" A lo ti ve mai a, "Nakinah nang chu a ṭhianṭha ber i nia, lo la zawt mai mai teh. A pa chungchang lo sawipui thintu hi" Lucy chuan a ti a. 

"Hmm,. Hman deuh kha chuan 'Damdawi ka tih chhan hi chu ka pa vang a nia. ' kha a tia. Mahse, a hnu lawkah, 'Ka pa hian min hmangaih lo i ti nge ti lo" a tia. Kei chuan, 'I pa diktak ai pawn a hmangaih che' ka tia. "Min hrilhtu hian dâwt a sawi tihna mawni le" a ti ringawt a, tu nge chutiang hrilhtu chu ka zawt a, mahse, a sawi duh lo" a ti ve ta mawlh mawlh a. Umm, thil chiang tak chu Miteii hi fuihpawrhtu an awm. Tu emaw kei min ngaithei lo tak a ni ngei ang. 

Inah pawh a lo awm lo va, Lucy chuan a call naa, a la duh lo hrim hrim. Tlai tawkah a rawn haw a, ruih chu a nei chiang, mahse, zu rim a nam lo. A nuin a hau naa kei ka ngawi reng. Inrawlh ka tum tawh lo. Zanah inkhawm lovin a putea te nen kan ṭhu ta ṭhap a. Pari pawh chhungkhat anga innei kan ni bawk a, a tel ve. Miteii chu an zilhhau ta liam liam a, An hau nasa bawk a niang. A ding thut a, "Keimah chauh min dem lovin heng zawng zawng min hrilh thintu hi dem rawh u. Mahse, keipawn tu nge a nih ka hre bik lo. Hman aṭangin min rawn be tawh,. A rei tial tial a, pawisa ka mamawh chângte hian chumi khamiah ka lo dah ang a tia, keipawn khatiang kha chu ka lo ngaina ve zel a. Chuan, apa chungchang a sawi chho ṭan a. A tirah ka awih bik lo, mahse, a strict lutuk hi ka ning a. Chuan, schoolah te, khawiah emaw awmkhawm chang hian ka hriat theih ngei turin U Sawmi thiante ho hian pawngsual tawk ka ni tih an sawi reng zel a. Mipa lahin min zah si lo, min ngaizawngtu ka hnar ve ho pawn, 'Ve khanglang a, pawngsual hnu mai mai" tiin min ṭawngkhum ṭhin. Ka rilru a na êm a, damdawi pawh ka tih phah a nih kha. " A ti ta a. Lo be ṭhintu number chu Lucy'n a dil nghal..a pe ve mai a, tuman chu number chu kan lo nei lo. Kan call a, tumah kan hlawhtling lo. Mahse, hriatchhuah dan zawng a awm dawn khawp mai. Chu mihring chu a nuin a block sak ta a, mahse, Miteii rilru hi kan la siamṭha thei ang em ka hre lo. Kei lah ka hel hlauh tawh bawk si,. Aman bul a ṭan a nih loh chuan kei chuan a laka kut sil hmak ka tum tawh a ni. Lucy pawn min dem maithei, ka mihring rilru hi ka hneh ngawt thei bik si lo a ni. Mahse, Pathian erawh ka auh tam phah viau. Chhungkua kan din ve a, fanaute enkawl thiam lo nih hi ka hlau êm a ni. Miteii avangin kan chhungkua chuan sawi kan kai nasa a, a kal a kal a, vengthlang lamah te chuan, "Nunpuia'n sual a tum" tihte a ni daih tawh. A ruka min lo er ve ngat ngattu te tan chaw ṭha kan chhawpsak a ni ringawt mai. Mahse, ṭhenawm khawveng ten min hrechiang a, a tawk rih mai. Miteii lo be ṭhintu chuan kan number a nei tih a chiang a, chuvang chuan sim card kan lei a, Lucy chuan a call nghal mai lo, he mihring hi mi mâwl a ni tlat lo a ni. Kar khat ṭha âwm vel kan ngawihsan hnuah zan tirah a call ta a, keipawh ka awm ve reng. Sim card kan lei tih midang tuman an hre lo bawk. A ring ral ral a, a rawn la ta mial e. Hmeichia a ni tlat! A aw chu ka hriat hnu a ang, mahse, aw ringawt te chu inang a tam lutuk. Lucy chuan, "Awii i dam maw? Inhmuh lohna a va rei tawh ve" a ti hluai a. 

Chu nu chuan, "Tu nge aw? " A rawn ti. 

"Hmm, min hre lo va maw? Bdi,. Eng nge i fate an dam ṭha em?" A ti leh a, "Ka van hre mai lo che ve. Fa pawh ka la nei lo. Min hai a nih dawn hi" a rawn ti nghat a, "Ehe! A niang a. I number ngei niin ka hre sia, a zia lo hle mai" nelawm takin a ti a,. "A ho lutuk. " A rawn tih chuan a dah hman hlau takin, "Chhawrpialah i awm lo mi?" A ti leh vat a. Thaw hak ri kan hre zawm nghal, "Awm char char e. Hei ka buai deuh a, ka dah phawt ang" tiin a dah ta a. Kan record sa bawk a, a hnuah a aw chu kan ngaithla chiang leh..vawi 3 ka ngaihthlak hnuah ka hrechhuak ta. Lucy melhin, "Veronica" ka ti ta hluai a. Lucy pawh a meng phâr nasa mai. Umm, a kaw hreuh dan a dangdai e, engtin nge hma kan lak ang aw tih kan sawi dun a. Miteii bulah pawh Veroi'n kei min ngaihzawn ṭhin vanga kan chhungkaw tihchhiat a tum thute..a awih em kan hre lo. Veronica be tur chuan palai kan thlak ta a. A lo ṭang nasa mai, mahse, thiam takin an dâwi kual ve bawk a, a tawpa tawpah a inpuang ta nge nge. "Nunpuia min laksak avanga Lucy chunga ka phuba a nih kha" tiin. Lucy a thinrim êm vangin thuneitu sang zawka thlen hial a tum chho a, Marovi te lamin lo hriain ngaihdam dil turin an nawr ta chûk chûk a, hreh ru deuhin Veroi leh Marovi te nupa ten ngaihdam chu min rawn dil ta a ni. Marovi te an zahawm ka tih bakah thil chhe ber thlentir chu ṭha ka tih chiah loh avangin keini lam pawn lawm takin an ngaihdam dilna chu kan lo pawmsak ta a ni. 

Miteii nen erawh kan la inbe lo tluang zel a. Kan in chhung boruak a nuam thei tak tak lo. Mampuia a chho leh tawh a, Duatpuia pawh a leikang chho ve zel e. Remlala pawh Chawntlangah a kal zauh zauh, a fate nu tur a zawng a ni mahna le, amah hian a sawi ṭha duh meuh si lo. Engpawhnise, a fate hmangaihpui thei tur a neih vat chu a ngai, Pi Siami a khawngaihthlak lutuk. A buai thei si. Sawmi kha a rai ta nge nge a, a fa paina nia a puh lahin a lo la pawm lo zui! A suahsualthlak hi ka ti mang e. Miteii pawn Matric result a nghak mêk. Kan pafa inkar chuan hmasawn lam a la pan ta chuang lo, Lucy hian siamthat tum viau mah se; keimah hi ka hel tlat. Amah Miteii hi chuan min bia min bia ve tawh. A rul tawkin ka chhang a, amah hlat thei ang berin ka awm thin bawk. Ni e, engtin emaw lo hnaihin a taksa te lo dek palh ila ka beisei emaw a tih ka hlau. 

"Puitling zawk i nia, hetia i hel reng chuan kan chhungkaw boruak hi a nuam lo kumkhua dawn a nia. Inngaihtuah ve teh" kan nuin a tih chuan, "Ka hel hran lo. Amah Miteii tan a him zawk ang" ka ti hmuk. Min zahthiam leh ka mitmei a ven êm avang hian min nawr na ngam lo. Ka pa te bulah a vuivaina a han thlen ṭhin nge ka pa meuh pawn min rawn kawm tawh. Naupang fuihpawrh nuam tawk lek an nia, a rilru kawihher a awlsam dawn a, kei a pa tak ka nih lohnaah leh ka lo khuahkhirh ve deuh vangin tiang rilru kha a pu tih a lang reng. A tira 'emaw' a tih kha a rei telh telh a, a tak tak emaw a ti chho ta a niang e. 

Matric result a rawn chhuak ta. Bank-a ka awm lai chuan, Miteii call ka dawng ta. Kan khatih hnua min call vawikhatna a niawm e. "Pa, 1st-ah ka pass ve a. Ka lawmzia hi" a rawn ti chul a. Ka thinlung a dek zawk mai.

"A va lawmawm ve aw. Pathian hnenah lawmthu sawi rawh" ka ti a. 

"Nia..kan thianho kan pass vek a..kan lawm lutuk" a ti leh a. Ka thinlung tak takin ka lawmpui e. Phone a dah hnua ka ngaihtuah chhuah chu, Naupang zawk pawn bulṭan a hreh lo va, kha chen pafa inngaina tak ni ṭhin, miin an fuihpawrh vanga a rilrua awm a sawichhuah tak avanga a pa zawk a hel tlat reng le..tiin. 

Lucy call ka dawng zui ta bawk. "Tun hi bulṭanna hun a ni. A harsa ang ka hria e. Mahse, Pathian neitu i ni tawh a, engvangin nge i fanu i hmangaihna hi i bansan kher ang? I sawi ṭhin kha tiraw? 'Khawvel thlak danglam i duh chuan, nangmah kha danglam hmasa rawh' tih a nih kha.. Nunpui, i chhungkua hi i chhanhim leh thei asin" tih thu a sawi mawlh mawlh a. Ka mittui a hnâm sawk, ringtu inti ve siin tikhawp hian ka bo rei a maw? Hmuh theih ka fate pawh ka hmangaih thei lo a nih chuan, hmuh loh Pathian pawh engtin nge ka hmangaih theih ang le? 

Hna laklawh ka nei lo bawk a, ka ding hluai. In lam panin nun bul ṭan ṭhaa chhungkaw thar din turin phur takin ka pen ta thoh thoh a. .

A TAWP TA.